Канон на Обрезание Господне

Осмери́ца дне́й, нося́щая о́браз бу́дущаго, Твое́ю, Христе́, просвеща́ется и освяща́ется во́льною нището́ю, в се́й бо зако́нно обре́зался еси́ пло́тию.

Обре́зание прие́млет осмодне́вное Христо́с Своего́ рождества́, и сего́ дне́сь се́нь спря́тает, све́т возсиява́я но́выя благода́ти.

Сло́во вопло́щшееся Пресу́щественное в преста́тие зако́на обре́зася, нача́ток же Боже́ственныя благода́ти и жи́зни нетле́нныя на́м подаде́.

Зако́на исполни́тель, не я́ко сопроти́вен Бо́гу сы́й, Христо́с воплоти́выйся показа́ся и сподо́бися во́лею обре́затися осмодне́вен.

Обре́зание преста́, отне́леже Христо́с во́лею обре́зася, язы́к мно́жество спаса́я благода́тию.

Бу́дущаго непреста́нную осма́го ве́ка жи́знь изобража́ет, в ню́же Влады́ка обре́зася пло́тию.

Ты́, от Де́вы Ма́тере несказа́нно проше́д, Го́споди, и в челове́ческий ны́не сподо́бился еси́ оде́ятися о́браз, я́ко Младе́нец зако́нно зако́н испо́лнил еси́.

Но́щи уподо́бися, я́ко се́нь зако́нную лю́бящи Изра́иля, Ро́ждшая, из Нея́же облиста́вший Све́т ми́ра, Христо́с, яви́ся.

Прия́т коне́ц зако́н, отне́леже Христо́с, младе́нствовав, исполни́тель зако́на Сы́й, обре́зание восприя́т и разреши́ зако́нную кля́тву.

Суббо́тство, обре́зание же шата́ния евре́йскаго я́вльшагося Христа́ манове́нием преста́, и возсия́ благода́ти весна́.

Све́тло и пресве́тло Рождество́ Христо́во, и бу́дущаго обновле́ния подписа́вшее та́инство дне́сь, я́ко зако́нным чи́ном Спа́с обре́зуется, не я́ко Бо́г, но я́ко Челове́к и зако́на исполне́ние.

Зако́н исполня́я, зако́на Творе́ц, пло́тию дне́сь во́лею обре́зуется, обре́зание содева́я грехо́вныя зимы́ и зва́ти да́руя: благослове́н еси́, Бо́же оте́ц на́ших.

Во осмы́й де́нь обре́зуется я́ко Младе́нец Влады́ка, Иису́са же прие́млет именова́ние, я́ко ми́ра е́сть Спа́с и Госпо́дь.

Ко Христо́ву Рождеству́ досто́йно осмы́й спряже́ся, святи́теля всесла́вная па́мять, ю́же почита́юще ве́рою, пое́м Го́спода и превозно́сим во ве́ки.

Дне́сь Влады́ка обре́зуется пло́тию я́ко Младе́нец, исполня́я зако́н.

Дне́сь Влады́ка пло́тию обре́зася, Иису́с нарече́ся.

Преше́д преде́лы Христо́с челове́ческаго всего́ естества́, преесте́ственно из Де́вы ражда́ется и, писа́ние зако́нное я́коже повелева́ет, пло́тию обре́зается, и испо́лнитель зако́на явля́ется.

Прииди́те, Влады́ки сла́вная Христо́ва именова́ния во святы́ни торжеству́им, Иису́с бо Боголе́пно нарече́ся дне́сь. С си́ми же и па́мять святи́теля велича́ем.

Превы́спренняя вода́ми покрыва́яй Еди́н Госпо́дь, возстязу́яй мо́ре, бе́здны же изсуша́яй, из Тебе́, Чи́стая, пло́ть восприе́мый, от Вифлее́ма тщи́тся ко Иорда́ну крести́тися пло́тию.

Недоуме́ет вся́к язы́к благохвали́ти по достоя́нию, изумева́ет же у́м и преми́рный пе́ти Тя́, Богоро́дице, оба́че Блага́я су́щи, ве́ру приими́, и́бо любо́вь ве́си Боже́ственную на́шу: Ты́ бо христиа́н еси́ Предста́тельница, Тя́ велича́ем.

Ѻ҆смери́ца дне́й, носѧ́щаѧ ѻ҆́бразъ бꙋ́дꙋщагѡ, твое́ю, хрⷭ҇тѐ, просвѣща́етсѧ и҆ ѡ҆сщ҃а́етсѧ во́льною нището́ю: въ се́й бо зако́ннѡ ѡ҆брѣ́залсѧ є҆сѝ пло́тїю.

Ѡ҆брѣ́занїе прїе́млетъ ѻ҆смодне́вное хрⷭ҇то́съ своегѡ̀ ржⷭ҇тва̀, и҆ сегѡ̀ дне́сь сѣ́нь спрѧ́таетъ, свѣ́тъ возсїѧва́ѧ но́выѧ бл҃года́ти.

Сло́во вопло́щшеесѧ пресꙋ́щественное, въ преста́тїе зако́на ѡ҆брѣ́засѧ: нача́токъ же бжⷭ҇твенныѧ бл҃года́ти, и҆ жи́зни нетлѣ́нныѧ на́мъ подадѐ.

Зако́на и҆сполни́тель, не ꙗ҆́кѡ сопроти́венъ бг҃ꙋ сы́й хрⷭ҇то́съ воплоти́выйсѧ показа́сѧ, и҆ сподо́бисѧ во́лею ѡ҆брѣ́затисѧ ѻ҆смодне́венъ.

Ѡ҆брѣ́занїе преста̀, ѿне́лѣже хрⷭ҇то́съ во́лею ѡ҆брѣ́засѧ, ꙗ҆зы̑къ мно́жество спаса́ѧ бл҃года́тїю.

Бꙋ́дꙋщагѡ непреста́ннꙋю ѻ҆сма́гѡ вѣ́ка жи́знь и҆з̾ѡбража́етъ, въ ню́же влⷣка ѡ҆брѣ́засѧ пло́тїю.

Ты̀ ѿ дв҃ы мт҃ре несказа́ннѡ проше́дъ, гдⷭ҇и, и҆ въ человѣ́ческїй ны́не сподо́билсѧ є҆сѝ ѡ҆дѣ́ѧтисѧ ѻ҆́бразъ, ꙗ҆́кѡ младе́нецъ, зако́ннѡ зако́нъ и҆спо́лнилъ є҆сѝ.

Но́щи ᲂу҆подо́бисѧ, ꙗ҆́кѡ сѣ́нь зако́ннꙋю лю́бѧщи і҆и҃лѧ, ро́ждшаѧ, и҆зъ неѧ́же ѡ҆блиста́вшїй свѣ́тъ мі́ра хрⷭ҇то́съ ꙗ҆ви́сѧ.

Прїѧ́тъ коне́цъ зако́нъ, ѿне́лѣже хрⷭ҇то́съ младе́нствовавъ, и҆сполни́тель зако́на сы́й, ѡ҆брѣ́занїе воспрїѧ́тъ, и҆ разрѣшѝ зако́ннꙋю клѧ́твꙋ.

Сꙋббѡ́тство, ѡ҆брѣ́занїе же шата́нїѧ є҆вре́йскагѡ ꙗ҆́вльшагѡсѧ хрⷭ҇та̀ манове́нїемъ преста̀, и҆ возсїѧ̀ бл҃года́ти весна̀.

Свѣ́тло и҆ пресвѣ́тло ржⷭ҇тво̀ хрⷭ҇то́во, и҆ бꙋ́дꙋщагѡ ѡ҆бновле́нїѧ подписа́вшее та́инство дне́сь: ꙗ҆́кѡ зако́ннымъ чи́номъ сп҃съ ѡ҆брѣ́зꙋетсѧ, не ꙗ҆́кѡ бг҃ъ, но ꙗ҆́кѡ человѣ́къ, и҆ зако́на и҆сполне́нїе.

Зако́нъ и҆сполнѧ́ѧ, зако́на творе́цъ пло́тїю дне́сь во́лею ѡ҆брѣ́зꙋетсѧ, ѡ҆брѣ́занїе содѣва́ѧ грѣхо́вныѧ зимы̀, и҆ зва́ти да́рꙋѧ: бл҃гослове́нъ є҆сѝ, бж҃е ѻ҆ц҃ъ на́шихъ.

Во ѻ҆смы́й де́нь ѡ҆брѣ́зꙋетсѧ, ꙗ҆́кѡ младе́нецъ, влⷣка: і҆и҃са же прїе́млетъ и҆менова́нїе, ꙗ҆́кѡ мі́ра є҆́сть сп҃съ и҆ гдⷭ҇ь.

Ко хрⷭ҇то́вꙋ ржⷭ҇твꙋ̀ досто́йнѡ ѻ҆смы́й спрѧже́сѧ, ст҃и́телѧ всесла́внаѧ па́мѧть, ю҆́же почита́юще вѣ́рою, пое́мъ гдⷭ҇а и҆ превозно́симъ во вѣ́ки.

Дне́сь влⷣка ѡ҆брѣ́зꙋетсѧ пло́тїю, ꙗ҆́кѡ младе́нецъ, и҆сполнѧ́ѧ зако́нъ.

Дне́сь влⷣка пло́тїю ѡ҆брѣ́засѧ, і҆и҃съ нарече́сѧ.

Преше́дъ предѣ́лы хрⷭ҇то́съ человѣ́ческагѡ всегѡ̀ є҆стества̀, преесте́ственнѡ и҆з̾ дв҃ы ражда́етсѧ: и҆ писа́нїе зако́нное ꙗ҆́коже повелѣва́етъ, пло́тїю ѡ҆брѣ́заетсѧ, и҆ и҆спо́лнитель зако́на ꙗ҆влѧ́етсѧ.

Прїиди́те, влⷣки сла̑внаѧ хрⷭ҇тѡ́ва и҆менова̑нїѧ во свѧты́ни торжествꙋ́имъ: і҆и҃съ бо бг҃олѣ́пнѡ нарече́сѧ дне́сь. съ си́ми же и҆ па́мѧть ст҃и́телѧ велича́емъ.

Превы́спрєннѧѧ вода́ми покрыва́ѧй є҆ди́нъ гдⷭ҇ь, возстѧзꙋ́ѧй мо́ре, бє́здны же и҆зсꙋша́ѧй и҆зъ тебє̀, чⷭ҇таѧ, пло́ть воспрїе́мый, ѿ виѳлее́ма тщи́тсѧ ко і҆ѻрда́нꙋ крⷭ҇ти́тисѧ пло́тїю.

Недоꙋмѣ́етъ всѧ́къ ѧ҆зы́къ благохвали́ти по достоѧ́нїю, и҆з̾ꙋмѣва́етъ же ᲂу҆́мъ и҆ премі́рный пѣ́ти тѧ̀, бцⷣе. ѻ҆ба́че, бл҃га́ѧ сꙋ́щи, вѣ́рꙋ прїимѝ: и҆́бо любо́вь вѣ́си бжⷭ҇твеннꙋю на́шꙋ: ты́ бо хрⷭ҇тїа́нъ є҆сѝ предста́тельница, тѧ̀ велича́емъ.