Канон святому мученику Полиевкту Мелитинскому

Многожела́нныя пи́щи насыща́емь, и блаже́нныя зари́, сла́вне, исполня́емь, и а́нгельскаго ли́ка удостоя́емь, тво́й благохва́лящия пра́здник, Полие́вкте, спаса́й, Го́споду пою́щия: сла́вно бо просла́вися.

Светоно́сная и благознамени́тая па́мять твоя́, све́та Боже́ственнейшаго полна́, возсия́, просвеща́ющая све́тло ве́рою воспева́ющия тя́, до́блий во́ине Христо́в Полие́вкте всеблаже́нне, Го́споду пою́щия: сла́вно бо просла́вися.

Вжиля́емь кре́постию Ду́ха и Боже́ственною си́лою, блаже́нне, оде́явся, изше́л еси́ тве́рдо к боре́нию го́рдаго и, сего́ кре́пко низложи́в, усе́рдно взыва́л еси́: Го́споду воспои́м, сла́вно бо просла́вися.

Измени́л еси́ мудрова́ние к благоче́стию, свы́ше сподо́бився боже́ственнаго зре́ния Спа́сова, Полие́вкте.

Побе́ды жела́яй, вся́ оплева́л еси́, сла́вне, я́же на земли́, и небе́снаго насле́дия сподо́бился еси́.

Сла́вы жела́я, я́же па́че ума́, устреми́лся еси́ терпели́вно и и́дольское безсла́вие низложи́л еси́.

Благочести́вым испове́данием, всеизря́дне, Влады́це са́м себе́ приве́л еси́, е́же за Того́, сла́вне, заколе́ние любо́вию прие́м и поро́ка вся́каго свобо́ден бы́в. Отсю́ду Спа́су взыва́еши: си́ле Твое́й сла́ва, Человеколю́бче.

Сла́дость благоче́стия услади́ся тебе́, впери́лся еси́ Боже́ственною любо́вию, чи́стым и све́тлым жела́нием уя́звен и любо́вию распала́емь вы́шняго Ца́рствия, песнопое́ши Влады́це: си́ле Твое́й сла́ва, Человеколю́бче.

Преесте́ственным единому́дрием связа́вся Неа́рху, сего́ же глаго́лы огласи́вся ко благочести́вей ве́ре Тро́ичестей, богому́дре му́чениче Полие́вкте, вои́стинну многожела́нныя и любе́зныя сподо́бился еси́ му́чеников све́тлости.

Му́ченическим сочи́слився во́инством, Ца́рство прия́л еси́ недви́жимое, новозакла́вся, в сие́ вше́л еси́, еще́ кро́вем ка́плющим. Взя́лся же еси́, прему́дре, в ра́дость непреме́нную, и Све́т невече́рний, и вели́кия сла́вы получи́в.

Да присносу́щное получи́ши наслажде́ние, блаже́ннейше, кра́сная жития́, и естества́ сво́йство, и сла́дость, и сла́ву, и жи́знь са́мую презре́л еси́ и наде́жды твоея́ не погреши́л еси́.

Тайнонауче́н бы́в Боже́ственнаго о́браза Боже́ственным та́йнам, тве́рдым умо́м к соверше́нным подвиго́м отлучи́лся еси́ и, победоно́сец я́влься, нетле́нных сподо́бился еси́ венце́в, Полие́вкте.

Безбо́жнейшую че́сть, естество́м ненавистозло́бное име́я мудрова́ние, благоче́стно отри́нул еси́ и бо́ги су́етныя низве́ргл еси́, благоче́стия ре́вностию разже́гся и усе́рдия богодохнове́ннаго испо́лнився, пресла́вне.

Чи́на а́нгельскаго удосто́ился еси́, досточу́дне му́чениче, а́нгельскую ре́вность я́ве показа́в, с ни́ми у́бо приле́жно, блаже́нне, моли́, изба́витися от напа́стей воспева́ющим тя́.

Усну́л еси́ любе́зне, страда́льче, до́лжным сно́м, отсе́кшейся главе́ мече́м, многострада́льне, и ны́не на небесе́х жре́бий нетле́нен насле́довал еси́, с му́ченики водворя́яся.

Сообра́зен и о́бщник страда́ний Спа́са бы́л еси́, на́с ра́ди стра́сть кре́стную подъе́мшаго, и ны́не, блаже́нне, с Ни́м, я́коже обеща́, ца́рствуеши во ве́к безконе́чный.

Показа́л еси́, Влады́ко, Твоему́ рабу́ си́лу Твою́, сего́ ра́ди преусе́рдно к подвиго́м прии́де самозва́нен и, победоно́сец бы́в, поя́ше: благослове́н Бо́г оте́ц на́ших.

Сла́вный и всезнамени́тый пра́здник тво́й, му́чениче, возсия́, явле́ния бо твоего́ Влады́ки све́т прино́сит и озаря́ет ве́рою зову́щия: оте́ц на́ших Бо́же, благослове́н еси́.

Бога́тство некра́домо, пребыва́ющее обре́л еси́ досто́инство и неотпа́дающе, но во ве́ки пребыва́ющую прия́л еси́ сла́ву, поя́, чу́дне: благослове́н Бо́г оте́ц на́ших.

Священноде́йствуется дне́сь многомоле́бная па́мять твоя́, му́чениче страстоте́рпче Христо́в Полие́вкте: Христу́ бо благоуго́дна и прия́тна же́ртва бы́л еси́, закла́вшемуся тебе́ ра́ди и поже́ршуся. Его́же о́троцы благословя́т, свяще́нницы воспева́ют, лю́дие превозно́сят во вся́ ве́ки.

Страда́льческое сопротивле́ние, страстоте́рпче, да́же до кро́ве показа́в на земли́, Полие́вкте, в черто́г многосве́тлый на небесе́х всели́лся еси́, твои́х крове́й кре́щся ба́нею и поя́ Влады́це: свяще́нницы, воспо́йте, лю́дие, превозноси́те во вся́ ве́ки.

Умерщвле́нную паде́ньми ду́шу мою́ возста́ви, му́ченическим твои́м дерзнове́нием объе́м, Боже́ственным повеле́нием причита́я, сла́вне, достоле́пно к доброде́тели обраща́я вопию́щую Влады́це: свяще́нницы, воспо́йте, лю́дие, превозноси́те во вся́ ве́ки.

Прииди́те, у́бо боговенча́ннаго, мучениколю́бцы, воспои́м му́ченика, его́же спросла́ви светоиме́нным Свои́м Вы́шний явле́нием, и честны́м дне́м почествова́, и венча́, и боже́ственными доброде́тельми украси́.

Струя́ми му́ченических излия́вшихся твои́х крове́й удави́л еси́ вражде́бнейшаго, зло́бу соде́лавшаго, Це́рковь же Христо́ву напая́я, уясни́л еси́, богоблаже́нне, ве́рою тя́ при́сно блажа́щую.

Бу́ди ми́, му́чениче, помо́щник, от напа́стей мя́ разли́чных избавля́я и обстоя́ний, у́з же реша́ е́реси и лю́тыя свобожда́я темни́цы моли́твами твои́ми, воспева́ющаго тя́ мы́слию чи́стою, пресла́вне.

Многожела́нныѧ пи́щи насыща́емь, и҆ бл҃же́нныѧ зарѝ, сла́вне, и҆сполнѧ́емь, и҆ а҆́гг҃льскагѡ ли́ка ᲂу҆достоѧ́емь, тво́й благохва́лѧщыѧ пра́здникъ, полѷе́ѵкте, спаса́й, гдⷭ҇ꙋ пою́щыѧ: сла́внѡ бо просла́висѧ.

Свѣтоно́снаѧ и҆ благознамени́таѧ па́мѧть твоѧ̀, свѣ́та бжⷭ҇твеннѣйшагѡ полна̀ возсїѧ̀, просвѣща́ющаѧ свѣ́тлѡ вѣ́рою воспѣва́ющыѧ тѧ̀, до́блїй во́ине хрⷭ҇то́въ полѷе́ѵкте всебл҃же́нне, гдⷭ҇ꙋ пою́щыѧ: сла́внѡ бо просла́висѧ.

Вжилѧ́емь крѣ́постїю дх҃а, и҆ бжⷭ҇твенною си́лою, бл҃же́нне, ѡ҆дѣ́ѧвсѧ, и҆зше́лъ є҆сѝ тве́рдѡ къ боре́нїю го́рдагѡ, и҆ сего̀ крѣ́пкѡ низложи́въ, ᲂу҆се́рднѡ взыва́лъ є҆сѝ: гдⷭ҇ꙋ воспои́мъ, сла́внѡ бо просла́висѧ.

И҆змѣни́лъ є҆сѝ мꙋдрова́нїе къ бл҃гоче́стїю, свы́ше сподо́бивсѧ бжⷭ҇твеннагѡ зрѣ́нїѧ сп҃сова, полѷе́ѵкте.

Побѣ́ды жела́ѧй, всѧ̑ ѡ҆плева́лъ є҆сѝ, сла́вне, ꙗ҆̀же на землѝ, и҆ нбⷭ҇нагѡ наслѣ́дїѧ сподо́билсѧ є҆сѝ.

Сла́вы жела́ѧ, ꙗ҆́же па́че ᲂу҆ма̀, ᲂу҆стреми́лсѧ є҆сѝ терпѣли́внѡ, и҆ і҆́дѡльское безсла́вїе низложи́лъ є҆сѝ.

Благочести́вымъ и҆сповѣ́данїемъ, всеизрѧ́дне, влⷣцѣ са́мъ себѐ приве́лъ є҆сѝ, є҆́же за того̀, сла́вне, заколе́нїе любо́вїю прїе́мъ, и҆ поро́ка всѧ́кагѡ свобо́денъ бы́въ. ѿсю́дꙋ сп҃сꙋ взыва́еши: си́лѣ твое́й сла́ва, чл҃вѣколю́бче.

Сла́дость бл҃гоче́стїѧ ᲂу҆слади́сѧ тебѣ̀, впери́лсѧ є҆сѝ бжⷭ҇твенною любо́вїю: чи́стымъ и҆ свѣ́тлымъ жела́нїемъ ᲂу҆ѧ́звенъ, и҆ любо́вїю распалѧ́емь вы́шнѧгѡ црⷭ҇твїѧ, пѣснопое́ши влⷣцѣ: си́лѣ твое́й сла́ва, чл҃вѣколю́бче.

Преесте́ственнымъ є҆диномꙋ́дрїемъ свѧза́всѧ неа́рхꙋ, сегѡ́ же глаго́лы ѡ҆гласи́всѧ ко бл҃гочести́вѣй вѣ́рѣ трⷪ҇честѣй, бг҃омꙋ́дре мꙋ́чениче полѷе́ѵкте: вои́стиннꙋ многожела́нныѧ и҆ любе́зныѧ сподо́билсѧ є҆сѝ мꙋ́ченикѡвъ свѣ́тлости.

Мꙋ́ченичєскимъ сочи́сливсѧ во́инствѡмъ, црⷭ҇тво прїѧ́лъ є҆сѝ недви́жимое, новозакла́всѧ въ сїѐ вше́лъ є҆сѝ, є҆щѐ кро́вемъ ка́плющымъ: взѧ́лсѧ же є҆сѝ, премꙋ́дре, въ ра́дость непремѣ́ннꙋю, и҆ свѣ́тъ невече́рнїй, и҆ вели̑кїѧ сла̑вы полꙋчи́въ.

Да присносꙋ́щное полꙋчи́ши наслажде́нїе, бл҃же́ннѣйше, кра̑снаѧ житїѧ̀, и҆ є҆стества̀ сво́йство, и҆ сла́дость, и҆ сла́вꙋ, и҆ жи́знь са́мꙋю презрѣ́лъ є҆сѝ, и҆ наде́жды твоеѧ̀ не погрѣши́лъ є҆сѝ.

Тайнонаꙋче́нъ бы́въ бжⷭ҇твеннагѡ ѻ҆́браза бжⷭ҇твєннымъ та́йнамъ, тве́рдымъ ᲂу҆мо́мъ къ совершє́ннымъ подвигѡ́мъ ѿлꙋчи́лсѧ є҆сѝ: и҆ побѣдоно́сецъ ꙗ҆́вльсѧ, нетлѣ́нныхъ сподо́билсѧ є҆сѝ вѣнцє́въ, полѷе́ѵкте.

Безбо́жнѣйшꙋю че́сть, є҆стество́мъ ненавистоѕло́бное и҆мѣ́ѧ мꙋдрова́нїе, благоче́стнѡ ѿри́нꙋлъ є҆сѝ, и҆ бо́ги сꙋ́єтныѧ низве́рглъ є҆сѝ, благоче́стїѧ ре́вностїю разже́гсѧ, и҆ ᲂу҆се́рдїѧ бг҃одохнове́ннагѡ и҆спо́лнивсѧ, пресла́вне.

Чи́на а҆́гг҃льскагѡ ᲂу҆досто́илсѧ є҆сѝ, досточꙋ́дне мꙋ́чениче, а҆́гг҃льскꙋю ре́вность ꙗ҆́вѣ показа́въ: съ ни́ми ᲂу҆́бѡ прилѣ́жнѡ, бл҃же́нне, молѝ, и҆зба́витисѧ ѿ напа́стей воспѣва́ющымъ тѧ̀.

Оу҆снꙋ́лъ є҆сѝ любе́знѣ, страда́льче, до́лжнымъ сно́мъ, ѿсѣ́кшейсѧ главѣ̀ мече́мъ, многострада́льне: и҆ ны́нѣ на нб҃сѣ́хъ жре́бїй нетлѣ́ненъ наслѣ́довалъ є҆сѝ, съ мꙋ́чєники водворѧ́ѧсѧ.

Соѻбра́зенъ и҆ ѻ҆́бщникъ страда́нїй сп҃са бы́лъ є҆сѝ, на́съ ра́ди стрⷭ҇ть кре́стнꙋю под̾е́мшагѡ: и҆ ны́нѣ, бл҃же́нне, съ ни́мъ, ꙗ҆́коже ѡ҆бѣща̀, црⷭ҇твꙋеши во вѣ́къ безконе́чный.

Показа́лъ є҆сѝ, влⷣко, твоемꙋ̀ рабꙋ̀ си́лꙋ твою̀: сегѡ̀ ра́ди преꙋсе́рднѡ къ подвигѡ́мъ прїи́де самозва́ненъ, и҆ побѣдоно́сецъ бы́въ, поѧ́ше, бл҃гослове́нъ бг҃ъ ѻ҆тє́цъ на́шихъ.

Сла́вный, и҆ всезнамени́тый пра́здникъ тво́й, мч҃ниче, возсїѧ̀: ꙗ҆вле́нїѧ бо твоегѡ̀ влⷣки свѣ́тъ прино́ситъ, и҆ ѡ҆зарѧ́етъ вѣ́рою зовꙋ́щыѧ: ѻ҆тє́цъ на́шихъ бж҃е, бл҃гослове́нъ є҆сѝ.

Бога́тство некра́домо, пребыва́ющее ѡ҆брѣ́лъ є҆сѝ досто́инство и҆ неѿпа́дающее, но во вѣ́ки пребыва́ющꙋю прїѧ́лъ є҆сѝ сла́вꙋ, поѧ̀, чꙋ́дне: бл҃гослове́нъ бг҃ъ ѻ҆тє́цъ на́шихъ.

Свѧщеннодѣ́йствꙋетсѧ дне́сь многомоле́бнаѧ па́мѧть твоѧ̀, мꙋ́чениче стрⷭ҇тоте́рпче хрⷭ҇то́въ полѷе́ѵкте: хрⷭ҇тꙋ́ бо бл҃гоꙋго́дна и҆ прїѧ́тна же́ртва бы́лъ є҆сѝ, закла́вшемꙋсѧ тебє̀ ра́ди и҆ поже́ршꙋсѧ. Є҆го́же ѻ҆́троцы бл҃гословѧ́тъ, свѧще́нницы воспѣва́ютъ, лю́дїе превозно́сѧтъ во всѧ̑ вѣ́ки.

Страда́льческое сопротивле́нїе, стрⷭ҇тоте́рпче, да́же до кро́ве показа́въ на землѝ, полѷе́ѵкте, въ черто́гъ многосвѣ́тлый на нб҃сѣ́хъ всели́лсѧ є҆сѝ, твои́хъ крове́й кре́щсѧ ба́нею, и҆ поѧ̀ влⷣцѣ: свѧще́нницы, воспо́йте, лю́дїе, превозноси́те во всѧ̑ вѣ́ки.

Оу҆мерщвле́ннꙋю паде́ньми дꙋ́шꙋ мою̀ возста́ви, мꙋ́ченическимъ твои́мъ дерзнове́нїемъ ѡ҆б̾е́мъ, бж҃е́ствєннымъ повелѣ́нїємъ причита́ѧ, сла́вне, достолѣ́пнѡ къ добродѣ́тели ѡ҆браща́ѧ вопїю́щꙋю влⷣцѣ: свѧще́нницы, воспо́йте, лю́дїе, превозноси́те во всѧ̑ вѣ́ки.

Прїиди́те ᲂу҆́бѡ бг҃овѣнча́ннаго, мꙋчениколю́бцы, воспои́мъ мч҃ника, є҆го́же спросла́ви свѣтоиме́ннымъ свои́мъ вы́шнїй ꙗ҆вле́нїемъ, и҆ честны́мъ дне́мъ почествова̀, и҆ вѣнча̀, и҆ бжⷭ҇твенными добродѣ́тельми ᲂу҆красѝ.

Стрꙋѧ́ми мꙋ́ченическихъ и҆злїѧ́вшихсѧ твои́хъ крове́й ᲂу҆дави́лъ є҆сѝ вражде́бнѣйшаго ѕло́бꙋ содѣ́лавшаго, це́рковь же хрⷭ҇то́вꙋ напаѧ́ѧ ᲂу҆ѧсни́лъ є҆сѝ, бг҃облаже́нне, вѣ́рою тѧ̀ при́снѡ блажа́щꙋю.

Бꙋ́ди мѝ, мꙋ́чениче, помо́щникъ, ѿ напа́стей мѧ̀ разли́чныхъ и҆збавлѧ́ѧ и҆ ѡ҆бстоѧ́нїй, ᲂу҆́зъ же рѣша̀ є҆́реси, и҆ лю́тыѧ свобожда́ѧ темни́цы моли́твами твои́ми, воспѣва́ющаго тѧ̀ мы́слїю чи́стою, пресла́вне.