Канон святителю Ионе, епископу Ханькоускому

Твоему́, Христе́, уго́днику хвалу́ досто́йну воспе́ти да́руй ми́, Влады́ко, от усте́н нечи́стых и ра́зума помраче́нна, и моли́твами его́ воздви́гни от разслабле́ния грехо́внаго ду́шу мою́.

Каза́нския земли́ украше́ние пресла́вное яви́лся еси́, о́тче Ио́но, служе́нием па́стырства и учи́тельства подви́гся, те́мже, све́том ева́нгельским ю́ныя просвеща́я, мра́к неве́дения дале́че от ни́х отгна́л еси́.

О, гла́са пла́ча твоего́, блаже́нне Ио́но, о лю́дех Руси́, во оте́чествии и в разсе́янии су́щих! И́мже и на́с покая́нию и исправле́нию науча́еши и из се́рдца окамене́вшаго сле́зы изво́диши, я́коже дре́вле Моисе́й из ка́мене во́ду, да вси́ с ни́м зове́м Бо́гу, спаса́ющему на́с: сла́вно бо просла́вися.

Язы́к тво́й, Ду́хом Боже́ственным дви́жимь, вои́стину тро́сть кни́жника яви́ся, сказу́ет бо пресла́вно Писа́ний сокрове́нная и оте́ческих слове́с потае́нная, ерети́чествующих и безбо́жных писа́ния посрамля́ет, весели́т же духо́вно пою́щия всечестну́ю па́мять твою́, святи́телю Ио́но.

Я́ко апо́столом и отце́м дре́вним насле́дник и́стинный, испове́дание пра́вое ве́ры до́бре свиде́тельствовал еси́ и, во учи́тельстве подвиза́яся, ю́ныя ученики́ твоя́ укрепля́л еси́ в ве́трех суему́дрий не вла́ятися отню́д, оба́че к све́ту Боже́ственных догма́тов взира́ти.

Яви́лся еси́ дре́вних отце́в жития́ подража́тель и́стинен, служе́нием бли́жним де́лание моли́твенное раствори́в, во обою́ же стра́хом сыно́вним Го́сподеви предстоя́, усыновле́ние же и обоже́ние во Христе́ улучи́л еси́.

Оте́ческих писа́ний храни́тель и испо́лнитель те́х, святи́телю Ио́но, яви́лся еси́, я́же ю́ношам благогове́йне препода́л еси́, богоуго́дным же житие́м си́лу слове́с и́х яви́л еси́.

Христо́во смире́ние стяжа́в и му́жеством препоя́сан, исхо́диши на служе́ние но́во и, я́ко ле́в, упова́я на Го́спода, пред ски́мны рыка́ющими пра́во ходи́л еси́.

Еди́наго Су́щаго на Небесе́х па́че вся́каго стра́ха убоя́вся, Тому́ Еди́ному вся́ким усе́рдием порабо́тал еси́ и, кова́рствия богобо́рцев оплева́в, со Христо́м, Победи́телем сме́рти, наве́ки воцари́лся еси́.

Ми́лостию к скорбя́щим украси́лся еси́, раздава́яй а́лчущим хле́б тво́й, боля́щим же всеусе́рдно послужи́л еси́ сло́вом па́стырским, моли́твою и увеща́нием.

Гра́д Москва́ хва́лится ю́ностию твое́ю, Калу́га же и Каза́нь уче́нием твои́м, О́птина пу́стынь мона́шеством, но па́че все́х Маньчжу́рия тобо́ю сла́вится, я́ко па́стырем ре́вностным и предстоя́телем любвеоби́льным.

Возлюби́л еси́ Го́спода и все́ю кре́постию Тому́ порабо́тал еси́, мно́ги ско́рби претерпева́я, ду́ши мно́гих, святи́телю, ко Христу́ наста́вил еси́. Ему́же моли́ся спасти́ся на́м.

Богобо́рцем и инове́рным ве́рою кре́пкою, святи́телю, противуста́л еси́, па́ству твою́ от волко́в губи́тельных огради́ти тща́ся, гне́ва зло́бствующих ника́коже убоя́лся еси́, ниже́ осужде́ния челове́ческа.

Долготерпе́нию твоему́ Небеса́ и земля́ подиви́шася, я́ко в са́мых когте́х звери́ных пло́тию держи́мь, не преста́л еси́ упова́ти на Го́спода и возвеща́ти и́стину Его́, пресла́вно тя́, я́коже проро́ка от чре́ва ки́това, свободи́вшаго.

Святи́тельства и́стиннаго о́браз бы́л еси́, страсте́й взыгра́ния пе́рвее обузда́в на стра́жи се́рдца твоего́, те́мже и о́вцы Христо́вы ко приста́нищу небу́рному му́дре упра́вил еси́.

Во́ин Христо́в непобеди́мь показа́лся еси́, проти́ву безбо́жных тве́рдым испове́данием вооружи́вся и отсту́пльшим па́лицею слове́с твои́х противуста́в, венце́м испове́дника от Го́спода увенча́лся еси́.

Еди́наго на потре́бу усе́рдно взыска́в, жития́ сего́ сластьми́ не прельсти́лся еси́, те́мже и поставля́ет тя́ на све́щнице архиере́йства Госпо́дь, да светонаста́вник бу́деши лю́дем Его́.

Дне́сь, ве́рная овча́та Христо́ва, па́стыря до́браго прославля́ем, пред овца́ми свои́ми дерзнове́нно ходи́вшаго и те́х по и́мени глаша́вшаго и ко оби́телем Небе́сным ди́вно наста́вльшаго.

Ра́дости присносу́щныя наде́ждею препоя́сався, терпе́нием в по́двиг страда́льческий вше́л еси́, те́мже не посрами́ Госпо́дь упова́ния твоего́, с ли́ки святы́х сочета́в тя́, пою́щаго: благослови́те, вся́ дела́ Госпо́дня, Го́спода, по́йте и превозноси́те Его́ во ве́ки.

Ели́цы Писа́ний Боже́ственных разуме́ние прия́сте, прииди́те, ку́пно восхвали́те те́х сказа́теля богому́драго Ио́ну, вопию́ще усто́м его́ сло́во Пода́вшему: благослови́те, вся́ дела́ Госпо́дня, Го́спода, по́йте и превозноси́те Его́ во ве́ки.

Вои́стину ни еди́н же от ма́лых си́х забве́н бы́сть у тебе́, блаже́нне Ио́но, ко все́м бо любы́ твоя́ распростре́ся, ни́щим и простеце́м, наипа́че же си́рым и убо́гим. Те́мже и дне́сь исто́чник неоскудева́ющий сло́ва Бо́жия на́м отверза́еши, взыва́ющим: благослови́те, вся́ дела́ Госпо́дня, Го́спода, по́йте и превозноси́те Его́ во ве́ки.

О́тче святи́телю Ио́но! Ты́, кончи́ну свою́ предзря́, со умиле́нием исхо́дное пе́ние приноси́л еси́ Влады́чице, во успе́нии Свое́м ми́ра не оста́вльшей. Те́мже и на́с, бе́дствующих скорбьми́, не оста́ви, венце́м увя́зся от Го́спода нетле́нным во ве́ки.

Сме́рти предстоя́, кро́тостию и незло́бием все́х прости́л еси́, ча́дом же твои́м, любо́вь Христо́ву простира́я, де́ти, да лю́бите дру́г дру́га, ре́кл еси́. Те́мже и на́с с высоты́ сла́вы Бо́жия благослови́, да в едине́нии и любви́ спасе́мся.

И́стинныя сла́вы взыску́я, о́тче Ио́но, тле́нную и земну́ю ни во что́же вмени́л еси́. Те́мже и на́м коему́ждо помози́ ру́це разсла́бленнеи на моли́тву возде́ти и о́чи душе́внеи горе́ возвести́, да гряду́щаго во сла́ве Го́спода бо́дренным се́рдцем усря́щем и сла́вы Его́ прича́стницы бу́дем.

Твоемꙋ̀, хрⷭ҇тѐ, ᲂу҆го́дникꙋ хвалꙋ̀ досто́йнꙋ воспѣ́ти да́рꙋй мѝ, влⷣко, ѿ ᲂу҆сте́нъ нечи́стыхъ и҆ ра́зꙋма помраче́нна, и҆ мл҃твами є҆гѡ̀ воздви́гни ѿ разслабле́нїѧ грѣхо́внагѡ дꙋ́шꙋ мою̀.

Каза́нскїѧ землѝ ᲂу҆краше́нїе пресла́вное ꙗ҆ви́лсѧ є҆сѝ, ѻ҆́тче і҆ѡ́но, слꙋже́нїемъ па́стырства и҆ ᲂу҆чи́тельства подви́гсѧ, тѣ́мже, свѣ́томъ є҆ѵⷢ҇льскимъ ю҆́ныѧ просвѣща́ѧ, мра́къ невѣ́дѣнїѧ дале́че ѿ ни́хъ ѿгна́лъ є҆сѝ.

Ѽ гла́са пла́ча твоегѡ̀, бл҃же́нне і҆ѡ́но, ѡ҆ лю́дехъ рꙋсѝ, во ѻ҆те́чествїи и҆ въ разсѣ́ѧнїи сꙋ́щихъ! и҆́мже и҆ на́съ покаѧ́нїю и҆ и҆справле́нїю наꙋча́еши и҆ и҆з̾ се́рдца ѡ҆каменѣ́вшагѡ сле́зы и҆зво́диши, ꙗ҆́коже дре́вле мѡѷсе́й и҆з̾ ка́мене во́дꙋ, да всѝ съ ни́мъ зове́мъ бг҃ꙋ, сп҃са́ющемꙋ на́съ: сла́внѡ бо просла́висѧ.

Ѧ҆зы́къ тво́й, дх҃омъ бжⷭ҇твеннымъ дви́жимь, вои́стиннꙋ тро́сть кни́жника ꙗ҆ви́сѧ, сказꙋ́етъ бо пресла́внѡ писа́нїй сокровє́ннаѧ и҆ ѻ҆те́ческихъ слове́съ потає́ннаѧ, є҆реті́чествꙋющихъ и҆ безбо́жныхъ писа̑нїѧ посрамлѧ́етъ, весели́тъ же дꙋхо́внѡ пою́щыѧ всечтⷭ҇нꙋ́ю па́мѧть твою̀, ст҃и́телю і҆ѡ́но.

Ꙗ҆́кѡ а҆пⷭ҇лѡмъ и҆ ѻ҆тцє́мъ дрє́внимъ наслѣ́дникъ и҆́стинный, и҆сповѣ́данїе пра́вое вѣ́ры до́брѣ свидѣ́тельствовалъ є҆сѝ, и҆ во ᲂу҆чи́тельствѣ подвиза́ѧсѧ, ю҆́ныѧ ᲂу҆ченикѝ твоѧ̑ ᲂу҆крѣплѧ́лъ є҆сѝ въ вѣ́трѣхъ сꙋемꙋ́дрїй не вла́ѧтисѧ ѿню́дъ, ѻ҆ба́че къ свѣ́тꙋ бжⷭ҇твенныхъ догма́тѡвъ взира́ти.

Ꙗ҆ви́лсѧ є҆сѝ дре́внихъ ѻ҆тцє́въ житїѧ̀ подража́тель и҆́стиненъ, слꙋже́нїемъ бли̑жнимъ дѣ́ланїе мл҃твенное раствори́въ, во ѻ҆бою̀ же стра́хомъ сыно́внимъ гдⷭ҇еви предстоѧ̀, ᲂу҆сн҃овле́нїе же и҆ ѡ҆боже́нїе во хрⷭ҇тѣ̀ ᲂу҆лꙋчи́лъ є҆сѝ.

Ѻ҆те́ческихъ писа́нїй храни́тель и҆ и҆спо́лнитель тѣ́хъ, ст҃и́телю і҆ѡ́но, ꙗ҆ви́лсѧ є҆сѝ, ꙗ҆̀же ю҆́ношамъ бл҃гоговѣ́йнѣ препода́лъ є҆сѝ, бг҃оꙋго́днымъ же житїе́мъ си́лꙋ слове́съ и҆́хъ ꙗ҆ви́лъ є҆сѝ.

Хрⷭ҇то́во смире́нїе стѧжа́въ и҆ мꙋ́жествомъ препоѧ́санъ, и҆схо́диши на слꙋже́нїе но́во, и҆ ꙗ҆́кѡ ле́въ, ᲂу҆пова́ѧ на гдⷭ҇а, пред̾ скѵ̑мны рыка́ющими пра́вѡ ходи́лъ є҆сѝ.

Е҆ди́наго сꙋ́щаго на нб҃сѣ́хъ па́че всѧ́кагѡ стра́ха ᲂу҆боѧ́всѧ, томꙋ̀ є҆ди́номꙋ всѧ́кимъ ᲂу҆се́рдїемъ порабо́талъ є҆сѝ, и҆ кова̑рствїѧ бг҃обо́рцєвъ ѡ҆плева́въ, со хрⷭ҇то́мъ, побѣди́телемъ сме́рти, на вѣ́ки воцр҃и́лсѧ є҆сѝ.

Млⷭ҇тїю къ скорбѧ́щымъ ᲂу҆краси́лсѧ є҆сѝ, раздава́ѧй а҆́лчꙋщымъ хлѣ́бъ тво́й, болѧ́щымъ же всеꙋсе́рднѡ послꙋжи́лъ є҆сѝ сло́вомъ па́стырскимъ, мл҃твою и҆ ᲂу҆вѣща́нїемъ.

Гра́дъ москва̀ хва́литсѧ ю҆́ностїю твое́ю, калꙋ́га же и҆ каза́нь ᲂу҆че́нїемъ твои́мъ, ѻ҆́птина пꙋ́стынь мона́шествомъ, но па́че всѣ́хъ маньчжꙋ́рїа тобо́ю сла́витсѧ, ꙗ҆́кѡ па́стыремъ ре́вностнымъ и҆ предстоѧ́телемъ любвеѻби́льнымъ.

Возлюби́лъ є҆сѝ гдⷭ҇а и҆ все́ю крѣ́постїю томꙋ̀ порабо́талъ є҆сѝ, мнѡ́ги скѡ́рби претерпѣва́ѧ, дꙋ́шы мно́гихъ, ст҃и́телю, ко хрⷭ҇тꙋ̀ наста́вилъ є҆сѝ. є҆мꙋ́же моли́сѧ сп҃сти́сѧ на́мъ.

Бг҃обо́рцємъ и҆ и҆новѣ̑рнымъ вѣ́рою крѣ́пкою, ст҃и́телю, противꙋста́лъ є҆сѝ, па́ствꙋ твою̀ ѿ волкѡ́въ гꙋби́тельныхъ ѡ҆гради́ти тща́сѧ, гнѣ́ва ѕло́бствꙋющихъ ника́коже ᲂу҆боѧ́лсѧ є҆сѝ, нижѐ ѡ҆сꙋжде́нїѧ человѣ́ческа.

Долготерпѣ́нїю твоемꙋ̀ нб҃са̀ и҆ землѧ̀ подиви́шасѧ, ꙗ҆́кѡ въ са́мыхъ когте́хъ ѕвѣри́ныхъ пло́тїю держи́мь, не преста́лъ є҆сѝ ᲂу҆пова́ти на гдⷭ҇а и҆ возвѣща́ти и҆́стинꙋ є҆гѡ̀, пресла́внѡ тѧ̀, ꙗ҆́коже прⷪ҇ро́ка ѿ чре́ва ки́това, свободи́вшаго.

Ст҃и́тельства и҆́стиннагѡ ѻ҆́бразъ бы́лъ є҆сѝ, страсте́й взыгра̑нїѧ пе́рвѣе ѡ҆бꙋзда́въ на стра́жи се́рдца твоегѡ̀, тѣ́мже и҆ ѻ҆́вцы хрⷭ҇тѡ́вы ко приста́нищꙋ небꙋ́рномꙋ мꙋ́дрѣ ᲂу҆пра́вилъ є҆сѝ.

Во́инъ хрⷭ҇то́въ непобѣди́мь показа́лсѧ є҆сѝ, проти́вꙋ безбо́жныхъ тве́рдымъ и҆сповѣ́данїемъ воѻрꙋжи́всѧ и҆ ѿстꙋ́пльшымъ па́лицею слове́съ твои́хъ противꙋста́въ, вѣнце́мъ и҆сповѣ́дника ѿ гдⷭ҇а ᲂу҆вѣнча́лсѧ є҆сѝ.

Е҆ди́наго на потре́бꙋ ᲂу҆се́рднѡ взыска́въ, житїѧ̀ сегѡ̀ сластьмѝ не прельсти́лсѧ є҆сѝ, тѣ́мже и҆ поставлѧ́етъ тѧ̀ на свѣ́щницѣ а҆рхїере́йства гдⷭ҇ь, да свѣтонаста́вникъ бꙋ́деши лю́демъ є҆гѡ̀.

Дне́сь, вѣ̑рнаѧ ѻ҆вча́та хрⷭ҇тѡ́ва, па́стырѧ до́браго прославлѧ́емъ, пред̾ ѻ҆вца́ми свои́ми дерзнове́ннѡ ходи́вшаго и҆ тѣ́хъ по и҆́мени глаша́вшаго и҆ ко ѻ҆би́телемъ нбⷭ҇нымъ ди́внѡ наста́вльшаго.

Ра́дости присносꙋ́щныѧ наде́ждею препоѧ́савсѧ, терпѣ́нїемъ въ по́двигъ страда́льческїй вше́лъ є҆сѝ, тѣ́мже не посрамѝ гдⷭ҇ь ᲂу҆пова́нїѧ твоегѡ̀, съ ли̑ки ст҃ы́хъ сочета́въ тѧ̀, пою́щаго: бл҃гослови́те, всѧ̑ дѣла̀ гдⷭ҇нѧ, гдⷭ҇а, по́йте и҆ превозноси́те є҆го̀ во вѣ́ки.

Є҆ли́цы писа́нїй бжⷭ҇твенныхъ разꙋмѣ́нїе прїѧ́сте, прїиди́те, кꙋ́пнѡ восхвали́те тѣ́хъ сказа́телѧ бг҃омꙋ́драго і҆ѡ́нꙋ, вопїю́ще ᲂу҆стѡ́мъ є҆гѡ̀ сло́во пода́вшемꙋ: бл҃гослови́те, всѧ̑ дѣла̀ гдⷭ҇нѧ, гдⷭ҇а, по́йте и҆ превозноси́те є҆го̀ во вѣ́ки.

Вои́стиннꙋ ни є҆ди́нъ же ѿ ма́лыхъ си́хъ забве́нъ бы́сть ᲂу҆ тебє̀, бл҃же́нне і҆ѡ́но, ко всѣ̑мъ бо любы̀ твоѧ̀ распростре́сѧ, ни́щымъ и҆ простецє́мъ, наипа́че же си̑рымъ и҆ ᲂу҆бѡ́гимъ. тѣ́мже и҆ дне́сь и҆сто́чникъ неѡскꙋдѣва́ющїй сло́ва бж҃їѧ на́мъ ѿверза́еши, взыва́ющымъ: бл҃гослови́те, всѧ̑ дѣла̀ гдⷭ҇нѧ, гдⷭ҇а, по́йте и҆ превозноси́те є҆го̀ во вѣ́ки.

Ѻ҆́тче ст҃и́телю і҆ѡ́но! ты̀ кончи́нꙋ свою̀ предзрѧ̀, со ᲂу҆миле́нїемъ и҆схо́дное пѣ́нїе приноси́лъ є҆сѝ влⷣчцѣ, во ᲂу҆спе́нїи свое́мъ мі́ра не ѡ҆ста́вльшей. тѣ́мже и҆ на́съ, бѣ́дствꙋющихъ скорбьмѝ, не ѡ҆ста́ви, вѣнце́мъ ᲂу҆вѧ́зсѧ ѿ гдⷭ҇а нетлѣ́ннымъ во вѣ́ки.

Сме́рти предстоѧ̀, кро́тостїю и҆ неѕло́бїемъ всѣ́хъ прости́лъ є҆сѝ, ча́дѡмъ же твои̑мъ, любо́вь хрⷭ҇то́вꙋ простира́ѧ, дѣ́ти, да лю́бите дрꙋ́гъ дрꙋ́га, ре́клъ є҆сѝ. тѣ́мже и҆ на́съ съ высоты̀ сла́вы бж҃їѧ бл҃гословѝ, да въ є҆дине́нїи и҆ любвѝ сп҃се́мсѧ.

И҆́стинныѧ сла́вы взыскꙋ́ѧ, ѻ҆́тче і҆ѡ́но, тлѣ́ннꙋю и҆ земнꙋ́ю нивочто́же вмѣни́лъ є҆сѝ. тѣ́мже и҆ на́мъ коемꙋ́ждо помозѝ рꙋ́цѣ разсла́бленнѣи на мл҃твꙋ воздѣ́ти и҆ ѻ҆́чи дꙋше́внѣи горѣ̀ возвѣстѝ, да грѧдꙋ́щаго во сла́вѣ гдⷭ҇а бо́дреннымъ се́рдцемъ ᲂу҆срѧ́щемъ и҆ сла́вы є҆гѡ̀ прича̑стницы бꙋ́демъ.