Кондак 1
Избра́нный уго́дниче Христо́в и чудотво́рче, преподо́бне о́тче на́ш Три́фоне, свя́тостию жития́ и чудесы́ твои́ми возсия́вый стране́ Вя́тстей, я́ко звезда́ богосве́тлая: похва́льная воспису́ем ти́, любо́вию творя́щии всечестну́ю па́мять твою́: ты́ же, я́ко ве́лие име́яй дерзнове́ние ко Го́споду, моли́твами твои́ми от вся́ких на́с бе́д свободи́ зову́щих:
Ра́дуйся, Три́фоне, пресла́вный чудотво́рче.
Икос 1
А́нгела тя́ во пло́ти су́ща позна́вше, преподо́бне, и ве́лия благодея́ния от тебе́ прие́мше, я́ко чудотво́рца пресла́внаго тя́ сла́вим и си́це тебе́ со умиле́нием зове́м:
Ра́дуйся, се́верныя страны́ благоуха́нный кри́не; ра́дуйся, о́трасле благочести́ваго ко́рене.
Ра́дуйся, от мла́дости в до́бром наказа́нии воспита́нный; ра́дуйся, изде́тска сопричте́нный в сыновство́ Отцу́ Небе́сному.
Ра́дуйся, благочести́выя ма́тере твоея́ отра́до и утеше́ние; ра́дуйся, бра́тию и сро́дники твоя́ свои́м благоче́стием удиви́вый.
Ра́дуйся, целому́дрие де́вства невреди́мо сохрани́вый; ра́дуйся, от се́рдца твоего́ вся́ искуше́ния ю́ности отгна́вый.
Ра́дуйся, к Бо́гу име́вый раче́ние ве́лие; ра́дуйся, Го́спода ра́ди пу́ть те́сный и ско́рбный избра́вый.
Ра́дуйся, до́льняя го́рняго ра́ди оста́вивый; ра́дуйся, я́ко спасе́ния иски́й, во страну́ чужду́ю стопы́ твоя́ упра́вил еси́.
Ра́дуйся, Три́фоне, пресла́вный чудотво́рче.
Кондак 2
Ви́дев, я́ко ма́ти и бра́тия твоя́ восхоте́ша бра́ку тя́ вда́ти, и чистоту́ де́вства па́че возлюби́в, до́м оте́ческий оста́вил еси́ и стра́нник бы́ти предсуди́л еси́, да сподо́бишися ве́чно пе́ти Христу́ Бо́гу: Аллилу́иа.
Икос 2
Разуме́в ко́зни, от врага́ спасе́ния на́шего содева́емыя, терпе́ние, проще́ние и моли́тву к Бо́гу проти́ву поста́вил еси́, всеблаже́нне о́тче, и я́ко ни́щ ду́хом же и те́лом, от гра́да во гра́д и от ве́си в ве́сь преходи́л еси́ и во о́ных примета́тися ко хра́мом Госпо́дним возлюби́л еси́. Сего́ ра́ди зове́м ти́:
Ра́дуйся, вся́ кра́сная ми́ра сего́ ни во что́ вмени́вый; ра́дуйся, нищету́ теле́сную и духо́вную возлюби́вый.
Ра́дуйся, ру́бища ве́тхая, я́ко оде́жду драгу́ю, на те́ле свое́м носи́вый; ра́дуйся, а́лчбою и жа́ждею, мра́зом и зно́ем те́ло твое́ изнури́вый.
Ра́дуйся, ча́шу поруга́ний пра́вды ра́ди до конца́ испи́вый; ра́дуйся, за творя́щыя ти́ напа́сть, я́ко за благотво́рцы, Го́споду моли́выйся.
Ра́дуйся, терпе́нием твои́м ми́ра сего́ зло́бу победи́вый; ра́дуйся, огне́м моли́твы твоея́ вся́ стре́лы лука́ваго попали́вый.
Ра́дуйся, си́лою твоея́ ве́ры язы́ческая суеве́рия потреби́вый; ра́дуйся, красоту́ селе́ния Бо́жия возлюби́вый.
Ра́дуйся, примета́тися в до́му Бо́жии изво́ливый; ра́дуйся, я́ко стра́нник и пришле́ц бы́в на земли́, ны́не во оби́телех небе́сных всели́лся еси́.
Ра́дуйся, Три́фоне, пресла́вный чудотво́рче.
Кондак 3
Си́ла Бо́жия даде́ся ти́, преподо́бне, егда́ в честне́м стра́нствии твое́м не́коего младе́нца и́менем Тимофе́я, не́мощию лю́тою одержи́ма и бли́з коне́чнаго издыха́ния бы́вша, моли́твами твои́ми исцели́л еси́, и здра́ва того́ сотвори́в, ку́пно с роди́тели и при́сными его́ воспе́л еси́ укрепля́ющему ти́ Христу́ Бо́гу: Аллилу́иа.
Икос 3
Име́я по́мысл чи́ст и ду́шу непоро́чну блаже́нне о́тче, уразуме́л еси́ суету́ ми́ра сего́ и непостоя́нство, и ве́чных бла́г возжеле́в, ми́ра сего́ отре́клся еси́ и постриже́ние и́ноческое прия́л еси́. Те́мже ублажа́ем тя́, преподо́бне о́тче, и сла́вяще е́же о тебе́ изволе́ние Бо́жие, вопие́м ти́ си́це:
Ра́дуйся, я́ко земна́я отри́нув, умо́м твои́м к небе́сным восте́кл еси́; ра́дуйся, я́ко к вы́шним тече́ние свое́ вы́ну упра́вил еси́.
Ра́дуйся, смире́ние возлюби́вый; ра́дуйся, послуша́ния рачи́телю.
Ра́дуйся, моли́тв кади́ло благоприя́тное; ра́дуйся, сле́з покая́нных неоску́дный исто́чниче.
Ра́дуйся, благо́е и́го Христо́во на себе́ возложи́вый; ра́дуйся, на высоту́ безстра́стия возше́дый.
Ра́дуйся, всего́ себе́ Бо́гу преда́вый; ра́дуйся, от сме́рти напра́сныя изволе́нием Бо́жиим ди́вно сохране́нный.
Ра́дуйся, явле́нием святи́теля Никола́я обра́дованный; ра́дуйся, от неду́га лю́таго и́м исцеле́нный.
Ра́дуйся, Три́фоне, пресла́вный чудотво́рче.
Кондак 4
Бу́рю искуше́ний и бе́д от челове́к, зло́бных на тя́ свята́го ра́ди жития́ твоего́, преподо́бне о́тче, с кро́тостию претерпева́я и еди́наго то́лько на потре́бу ища́, е́же ка́ко Бо́гови угоди́ти, Бо́гом води́мый, дости́гл еси́ Вя́тския страны́, и во гра́де Хлы́нове оби́тель во сла́ву Богоро́дицы созда́в, в не́й с ли́ки и́ночествующих немо́лчно вопия́л еси́ к Бо́гу: Аллилу́иа.
Икос 4
Слы́шавше христоимени́тии лю́дие гра́да Хлы́нова, я́ко оби́тели и́ночестей бли́з гра́да того́ основа́ние положи́л еси́, Три́фоне богоно́сне, возра́довашася ра́достию ве́лию, и я́ко а́нгела Бо́жия тя́ почита́ху, служа́ще от име́ний свои́х к устрое́нию о́ныя оби́тели и вопия́ху тебе́ си́це:
Ра́дуйся, та́йнаго веле́ния Бо́жия послу́шавый; ра́дуйся, Авраа́ма ве́ре поревнова́вый.
Ра́дуйся, во страну́ Вя́тскую пу́ть сво́й благоче́стне упра́вивый; ра́дуйся, оби́тель и́ноческую та́мо созда́ти зело́ восхоте́вый.
Ра́дуйся, хра́мы Бо́жии в не́й благоле́пно устро́ивый; ра́дуйся, чудеса́ пресла́вная при основа́нии оби́тели соверши́вый.
Ра́дуйся, я́ко Моисе́й моли́твами во́ду источи́вый; ра́дуйся, Богоро́дицы заступле́нию и покро́ву оби́тель твою́ вда́вый.
Ра́дуйся, ли́ка и́ноческаго предстоя́телю богому́дрый; ра́дуйся, гра́да Хлы́нова свято́е украше́ние и покро́ве, Бо́гом да́нный.
Ра́дуйся, сотвори́вый во́лю Госпо́дню и и́ны твори́ти научи́вый; ра́дуйся, сего́ ра́ди ве́лий в Ца́рствии Небе́сном нарече́нный.
Ра́дуйся, Три́фоне, пресла́вный чудотво́рче.
Кондак 5
Боготе́чно, я́ко светоза́рная звезда́, ше́ствовал еси́, уго́дниче Бо́жий, в престо́льный гра́д Москву́, поле́зная оби́тели твое́й та́мо устроя́я и от святе́йшаго патриа́рха И́ова в архимандри́та поста́влен бы́в, с ми́лостынею мно́гою от благове́рнаго царя́ Фео́дора дарова́нною, в оби́тель твою́ па́ки возврати́лся еси́, благода́рственно воспева́я Бо́гу: Аллилу́иа.
Икос 5
Ви́дев вра́г спасе́ния на́шего оби́тель твою́ до́бре устроя́ему от тебе́, преподо́бне о́тче, воздви́же на тя́ не́киих от учени́к твои́х, и́же проти́ву тебе́ возста́вше, от оби́тели твоея́ тя́ отгна́ша. Ты́ же, на земли́ сие́ изгна́ние с кро́тостию прие́мый, ны́не же всели́выйся в Оби́телех Небе́сных, услы́ши на́с, пою́щих ти́ сицева́я:
Ра́дуйся, я́ко за блага́я ко спасе́нию словеса́ поруга́ния прие́мый; ра́дуйся, а́ки кро́ткий а́гнец вся́ терпе́вый.
Ра́дуйся, с небесе́ утеше́ние прие́мый; ра́дуйся, молча́нием на укори́зны отвеща́вый.
Ра́дуйся, во изгна́ние незло́биво отше́дый; ра́дуйся, любо́вию Христо́вою ко́зни вра́жия победи́вый.
Ра́дуйся, мно́ги оби́тели и́ноческия во стра́нствии твое́м посети́вый; ра́дуйся, в ни́х себе́ утеше́ние и отра́ду обреты́й.
Ра́дуйся, чудеса́ ди́вная во изгна́нии твое́м соверши́вый; ра́дуйся, мно́ги на пу́ть и́ноческаго жития́ наста́вивый.
Ра́дуйся, блаже́ннаго Проко́пия на по́двиг юро́дства о Христе́ благослови́вый; ра́дуйся, я́ко сы́й на земли́ я́ве с небожи́тели бесе́довал еси́.
Ра́дуйся, Три́фоне, пресла́вный чудотво́рче.
Кондак 6
Пропове́дует при́сно страна́ Вя́тская по́двиги и труды́ твоя́, преподо́бне, в страна́х Арха́нгельских, У́стюжских, Пе́рмских, и све́тло красу́ется, стяжа́вши тя́ помо́щника и покрови́теля себе́ осо́бне. Мо́лим у́бо тя́, свя́тче Бо́жий, не лиши́ и на́с гре́шных небе́сныя твоея́ по́мощи и покро́ва моли́тв твои́х, к твоему́ бо заступле́нию в ско́рбех на́ших вседу́шно прибега́ем и просла́вльшему тя́ Го́споду со умиле́нием зове́м: Аллилу́иа.
Икос 6
Возсия́л еси́, преподо́бне, я́ко звезда́ богосве́тлая, во гра́де Слободсте́м, во́нь же по изгна́нии твое́м прише́д, оби́тель Богоявле́ния Госпо́дня созда́л еси́ и та́мо всели́лся еси́, все́х озаря́я свя́тостию жития́ своего́. Сего́ ра́ди вопие́м ти́ си́це:
Ра́дуйся, гра́ду Слободско́му прише́ствием твои́м благослове́ние от Го́спода низпосла́вый; ра́дуйся, жи́телем гра́да того́ свети́льник пресве́тел бы́вый.
Ра́дуйся, от ни́х ра́достно прия́тый; ра́дуйся, любо́вию и́х уте́шенный.
Ра́дуйся, оби́тель и́ноческую та́мо до́бре устро́ивый; ра́дуйся, ми́лостыню на устрое́ние ея́ мно́гу собра́вый.
Ра́дуйся, ти́хое в не́й приста́нище обреты́й; ра́дуйся, при́сно в не́й в труде́ и моли́тве пребыва́вый.
Ра́дуйся, и зде́ и́ноков богомы́слию поуча́вый; ра́дуйся, ученика́ твоего́ Досифе́я ко спасе́нию наставля́вый.
Ра́дуйся, пу́ть терпе́ния и́ноческаго тому́ показа́вый; ра́дуйся, о́браз ве́ры и любве́ и а́нгельскаго жития́ в подража́ние ученико́м твои́м оста́вивый.
Ра́дуйся, Три́фоне, пресла́вный чудотво́рче.
Кондак 7
Хоте́ние еди́но име́л еси́, преподо́бне, е́же ви́дети созда́нную от тебе́ оби́тель Богоро́дицы во гра́де Хлы́нове. Сего́ ра́ди ве́сть от Бо́га прие́м, я́ко бли́з е́сть кончи́на твоя́, от оби́тели Солове́цкия, ея́же в стра́нствии свое́м богоуго́днем дости́гл еси́, па́ки во гра́д Хлы́нов стопы́ твоя́ упра́вил еси́, да та́мо во оби́тели твое́й, преда́си ду́х тво́й Бо́гу, ему́же от ю́ности твоея́ навы́кл еси́ пе́ти: Аллилу́иа.
Икос 7
Ди́вно бы́сть, уго́дниче Бо́жий, прише́ствие твое́ во гра́д Хлы́нов, егда́ тя́ ве́тха де́нми су́ща и теле́сною не́мощию одержи́ма, бра́тия оби́тели твоея́ отри́нуша, последи́ же, пред кончи́ною твое́ю свято́ю, гне́ва Бо́жия убоя́вшеся и терпе́нием твои́м побежде́ни бы́вше, раска́яхуся и в оби́тель твою́ с любо́вию тя́ прия́ху. Мы́ же таково́му незло́бию твоему́ дивя́щеся, вопие́м ти́:
Ра́дуйся, о́тче благосе́рдый, враждова́вшыя на тя́ любо́вию Христо́вою возлюби́вый; ра́дуйся, гне́в на воздви́гших гоне́ние на тя́ соверше́нно в себе́ умертви́вый.
Ра́дуйся, до конца́ оби́тель твою́ возлюби́вый; ра́дуйся, па́ки в не́й ра́достно и ми́рно водвори́выйся.
Ра́дуйся, в затво́ре келе́йнем в не́й уедини́выйся; ра́дуйся, посто́м и моли́твою к исхо́ду из ми́ра сего́ в не́м уготовля́выйся.
Ра́дуйся, бра́тию твою́ пред исхо́дом от жития́ сего́ благослови́вый; ра́дуйся, поуче́ние от Писа́ния боже́ственнаго и́м препода́вый.
Ра́дуйся, те́м блага́я за зло́ возда́вый; ра́дуйся, при исхо́де твое́м от вре́меннаго жития́ прича́стия Боже́ственных Та́ин сподо́бивыйся.
Ра́дуйся, от у́з те́ла разреши́тися и со Христо́м бы́ти жела́ние всегда́ име́вый; ра́дуйся, о Не́м еди́нем при́сно воздыха́вый.
Ра́дуйся, Три́фоне, пресла́вный чудотво́рче.
Кондак 8
Стра́нствие земно́е сконча́вшу ти́, Три́фоне приснопа́мятне, благоуха́ния ди́внаго испо́лнися ке́ллиа твоя́: вери́ги же та́йно тобо́ю носи́мыя, спадо́ша с твоего́ телесе́, и зра́к лица́ твоего́ просвети́ся, я́ко все́м, ви́девшым исхо́д тво́й, диви́тися зело́ и возопи́ти ко Го́споду: Аллилу́иа.
Икос 8
Вся́ бра́тия оби́тели твоея́, преблаже́нне, со освяще́нным собо́ром и людьми́ мно́гими со слеза́ми и пе́нии надгро́бными изнесо́ша всечестно́е те́ло твое́ ко гро́бу, тобо́ю в хра́ме Пресвяты́я Богоро́дицы угото́ванному, иде́же о́ное, я́ко сокро́вище духо́вное, че́стно положи́ша. Мы́ же у ра́ки твоея́ святы́я вопие́м ти́ с любо́вию такова́я:
Ра́дуйся, во благоуха́нии святы́ни сно́м сме́рти опочи́вый; ра́дуйся, сме́рть вкуси́вый, тле́ния же не позна́вый.
Ра́дуйся, в ри́зу нетле́ния благода́тию Бо́жиею облече́нный; ра́дуйся, чудесы́ мно́гими от Бо́га по сме́рти просла́вленный.
Ра́дуйся, я́ко честна́я ра́ка твоя́ враче́бница бы́сть все́м неду́гующым; ра́дуйся, я́ко вся́к, приходя́й к не́й с ве́рою, прие́млет да́ры целе́бныя.
Ра́дуйся, разсла́бленных укрепи́телю; ра́дуйся, бесну́ющихся от наси́лия диа́вольскаго свободи́телю.
Ра́дуйся, слепы́м зре́ние возвраща́яй; ра́дуйся, хромы́я е́же пра́во ходи́ти устроя́яй.
Ра́дуйся, немы́м проглаго́лание да́руяй; ра́дуйся, неисце́льныя я́звы ди́вно врачу́яй.
Ра́дуйся, Три́фоне, пресла́вный чудотво́рче.
Кондак 9
А́нгели Небе́снии ра́достно прия́ша чи́стую ду́шу твою́, преподо́бне, во оби́тели ра́йския, иде́же Ца́рь Сла́вы Христо́с Госпо́дь венча́ тя́ венце́м небе́сным, его́же угото́ва все́м, возлю́бльшым явле́ние Его́, и дарова́ на́м тебе́ засту́пника и моли́твенника блага́го, да благода́рно пое́м Ему́: Аллилу́иа.
Икос 9
Вити́и многовеща́нии не возмо́гут по достоя́нию воспе́ти сла́ву, от Го́спода угото́ванную святы́м Его́ во Ца́рствии Небе́снем, ея́же насле́дник сподо́бился еси́ бы́ти, Три́фоне преблаже́нне. Сея́ сла́вы соприча́стники бы́ти и на́с сподо́би, уго́дниче Бо́жий, святы́ми твои́ми о на́с к Бо́гу моли́твами, да ра́достно вопие́м ти́:
Ра́дуйся, ликовству́яй в черто́зе Небе́снаго Домовлады́ки; ра́дуйся, граждани́не Иерусали́ма го́рняго.
Ра́дуйся, свя́тче Бо́жий, со все́ми святы́ми прославля́емый; ра́дуйся, от го́рних высо́т к на́м земноро́дным ми́лостивно приника́яй.
Ра́дуйся, оби́тель твою́ и гра́д на́ш при́сно сохраня́яй; ра́дуйся, в со́ниих и виде́ниих ве́рным явля́яйся.
Ра́дуйся, се́верныя и Вя́тския страны́ небе́сный осо́бне покрови́телю; ра́дуйся, гра́да Хлы́нова неотсту́пный храни́телю.
Ра́дуйся, все́х скорбя́щих утеше́ние; ра́дуйся, все́х притека́ющих к тебе́ ско́рое услы́шание.
Ра́дуйся, предста́телю на́ш благи́й; ра́дуйся, хода́таю о на́с пред Бо́гом немо́лчный.
Ра́дуйся, Три́фоне, пресла́вный чудотво́рче.
Кондак 10
Спаси́тельный зало́г Бо́жия благода́ти святы́я мо́щи твоя́, преподо́бне, по ле́тех мно́зех обре́тени бы́ша нетле́нни и в но́вем хра́ме Богоро́дицы че́стне от святи́теля Ио́ны положе́ни бы́ша, и́же с бра́тиею оби́тели и все́м мно́жеством благогове́йне лобыза́ху о́ныя, ра́достно поя́ Бо́гу: Аллилу́иа.
Икос 10
Стено́ю моли́тв твои́х, преподо́бне, огради́ на́с от вся́ких бе́д и скорбе́й, тебе́ бо стяжа́хом засту́пника тве́рдаго и предста́теля о на́с пред Бо́гом неусы́пнаго, да огражда́еми твои́м заступле́нием, си́це тебе́ зове́м:
Ра́дуйся, в беда́х и обстоя́ниих ско́рый помо́щниче; ра́дуйся, призыва́ющим тя́ усе́рдный засту́пниче.
Ра́дуйся, почита́ющих тя́ проше́ния ско́ро исполня́яй; ра́дуйся, мно́гажды проше́ние по́мощию твое́ю предвари́вый.
Ра́дуйся, в ми́лостех неистощи́мый; ра́дуйся, скорбя́щих прибе́жище те́плое.
Ра́дуйся, печа́льных утеше́ние; ра́дуйся, оби́димых засту́пниче.
Ра́дуйся, от бе́д и скорбе́й на́с ско́ро избавля́яй; ра́дуйся, я́ко непреста́нною моли́твою о на́с Бо́га умилостивля́еши.
Ра́дуйся, сосу́де честны́й, еле́й ми́лости Бо́жия к на́м содержа́яй; ра́дуйся, звездо́ све́тлая, пу́ть к Ца́рствию Бо́жию на́м указу́ющая.
Ра́дуйся, Три́фоне, пресла́вный чудотво́рче.
Кондак 11
Пе́ние всеумиле́нное прино́сим ти́, преподо́бне, пред ра́кою твое́ю свято́ю предстоя́ще, и мо́лимся ти́ приле́жно: я́коже отрокови́цу, беснова́нием одержи́мую, ми́лостивно исцели́л еси́, та́ко и на́с, страстьми́ многоразли́чными неду́гующих, посети́ и да́нною ти́ от Бо́га благода́тию исцели́, да ра́достно пое́м просла́вльшему ти́ Бо́гу: Аллилу́иа.
Икос 11
Светопода́тельна свети́льника тя́ ве́мы, о́тче, Престо́лу Бо́жию предстоя́ща и мра́к страсте́й и грехо́в на́ших луча́ми моли́тв разгоня́юща. Озари́ у́бо от го́рних высо́т и на́ша сердца́, всеблаже́нне, да досточе́стно вопие́м ти́ си́це:
Ра́дуйся, све́та Тро́ическаго зри́телю; ра́дуйся, небе́снаго Сио́на жи́телю.
Ра́дуйся, го́рняго ми́ра блаже́нный обита́телю; ра́дуйся, при́сно созерца́яй пресве́тлое лице́ Влады́ки Христа́.
Ра́дуйся, немо́лчно воспева́яй трисвяту́ю пе́снь Тро́ице; ра́дуйся, луче́ пресве́тлая, от Со́лнца Христа́ возсия́вшая.
Ра́дуйся, я́ко и по преставле́нии твое́м с на́ми пребыва́еши; ра́дуйся, в моли́твах твои́х о на́с к Бо́гу те́плый предста́телю.
Ра́дуйся, страну́ Вя́тскую зело́ возлюби́вый; ра́дуйся, мо́щи твоя́ святы́я е́й в насле́дие оста́вивый.
Ра́дуйся, сокро́вище неоску́дное мно́гих исцеле́ний.
Ра́дуйся, Три́фоне, пресла́вный чудотво́рче.
Кондак 12
Благода́ть и ми́лость испроси́ на́м, преподо́бне, у Христа́ и Бо́га на́шего и моли́твенник усе́рдный бу́ди о на́с ко Го́споду, да утверди́вшеся в за́поведех Его́, полу́чим спасе́ние ве́чное и та́ко при́сно пое́м Бо́гу пе́снь: Аллилу́иа.
Икос 12
Пою́ще по́двиги преди́внаго жития́ твоего́ и сла́вяще чудеса́ твоя́, преподо́бне, любо́вию ублажа́ем тя́, я́ко многомо́щна моли́твенника о на́с и предста́теля пред Го́сподем на́шим. Ты́ же, о свя́тче Бо́жий, я́ко благоутро́бен, принеси́ моле́ние те́плое о на́с ко Влады́це, да сподо́бит на́с Небе́снаго Ца́рствия своего́, вопию́щих ти́ с любо́вию такова́я:
Ра́дуйся, Пресвяты́я Тро́ицы служи́телю ве́рный; ра́дуйся, благода́тию Ду́ха Свята́го приосене́нный.
Ра́дуйся, Пресвяты́я Богоро́дицы слуго́ изря́дный; ра́дуйся, а́нгелом собесе́дниче преди́вный.
Ра́дуйся, со апо́столы ликовству́яй у Престо́ла Царя́ Сла́вы; ра́дуйся, му́ченик добропобе́дных сострада́льче.
Ра́дуйся, преподо́бных подража́телю ве́рный; ра́дуйся, все́х святы́х Бо́жиих сонасле́дниче.
Ра́дуйся, о гре́шных всегда́ Бо́га умоля́яй; ра́дуйся, ду́шы и телеса́ на́ша благода́тию Бо́жиею исцеля́яй.
Ра́дуйся, по Бо́зе на тя́ упова́ние возлага́ющих не посрамля́яй.
Ра́дуйся, Три́фоне, пресла́вный чудотво́рче.
Кондак 13
О преди́вный уго́дниче и пресла́вный чудотво́рче, преподо́бне о́тче на́ш Три́фоне: ми́лостивно приими́ сие́ ма́лое моле́ние на́ше, в похвалу́ тебе́ приноси́мое, и предстоя́ Престо́лу Царя́ Сла́вы, умоли́ Го́спода, да сохрани́т на́с от вра́г ви́димых и неви́димых, от неду́га и гла́да, от напа́сти и ско́рби и ве́чнаго муче́ния изба́вит, да сподо́бимся вку́пе с тобо́ю в ра́дости святы́х ве́чно воспева́ти Ему́: Аллилу́иа.
Повтор
Этот кондак читается трижды, затем икос 1-й и кондак 1-й.
Икос 1
А́нгела тя́ во пло́ти су́ща позна́вше, преподо́бне, и ве́лия благодея́ния от тебе́ прие́мше, я́ко чудотво́рца пресла́внаго тя́ сла́вим и си́це тебе́ со умиле́нием зове́м:
Ра́дуйся, се́верныя страны́ благоуха́нный кри́не; ра́дуйся, о́трасле благочести́ваго ко́рене.
Ра́дуйся, от мла́дости в до́бром наказа́нии воспита́нный; ра́дуйся, изде́тска сопричте́нный в сыновство́ Отцу́ Небе́сному.
Ра́дуйся, благочести́выя ма́тере твоея́ отра́до и утеше́ние; ра́дуйся, бра́тию и сро́дники твоя́ свои́м благоче́стием удиви́вый.
Ра́дуйся, целому́дрие де́вства невреди́мо сохрани́вый; ра́дуйся, от се́рдца твоего́ вся́ искуше́ния ю́ности отгна́вый.
Ра́дуйся, к Бо́гу име́вый раче́ние ве́лие; ра́дуйся, Го́спода ра́ди пу́ть те́сный и ско́рбный избра́вый.
Ра́дуйся, до́льняя го́рняго ра́ди оста́вивый; ра́дуйся, я́ко спасе́ния иски́й, во страну́ чужду́ю стопы́ твоя́ упра́вил еси́.
Ра́дуйся, Три́фоне, пресла́вный чудотво́рче.
Кондак 1
Избра́нный уго́дниче Христо́в и чудотво́рче, преподо́бне о́тче на́ш Три́фоне, свя́тостию жития́ и чудесы́ твои́ми возсия́вый стране́ Вя́тстей, я́ко звезда́ богосве́тлая: похва́льная воспису́ем ти́, любо́вию творя́щии всечестну́ю па́мять твою́: ты́ же, я́ко ве́лие име́яй дерзнове́ние ко Го́споду, моли́твами твои́ми от вся́ких на́с бе́д свободи́ зову́щих:
Ра́дуйся, Три́фоне, пресла́вный чудотво́рче.
Молитвы
О свяще́нная главо́, преподо́бне о́тче на́ш Три́фоне! Земны́й а́нгеле и небе́сный челове́че, свети́льниче пресве́тлый, страну́ Вя́тскую озаря́яй чудесы́, гра́ду на́шему стено́ и утвержде́ние, бе́дствующым кре́пкий помо́щниче, оби́тели твоея́ до́брый храни́телю, при́сный о на́с к Бо́гу моли́твенниче и те́плый о душа́х на́ших хода́таю! тебе́, уго́дниче Бо́жий, неистощи́мое от Всеблага́го Влады́ки благода́ти и даро́в даде́ся сокро́вище, е́же цели́ти неду́ги теле́сныя и отгоня́ти стра́сти душе́вныя и от все́х зо́л избавля́ти с ве́рою и́мя твое́ призыва́ющих. К тебе́ у́бо прибега́ем и тебе́ припа́дающе мо́лимся: не пре́зри на́с, моля́щихся тебе́ и твоея́ прося́щих по́мощи, изба́ви на́с от вра́г ви́димых и неви́димых, зави́стно на ны́ возстаю́щих и я́ростию зве́рскою поглоти́ти хотя́щих, изми́ на́с неви́димым предста́тельством твои́м от смуще́ния и бу́ри и тмочи́сленных скорбе́й на́ших, за грехи́ на́ша на́м прибыва́ющих. О преди́вный и богоно́сный о́тче на́ш Три́фоне! Ско́ро потщи́ся на по́мощь на́шу. Вознеси́ благомо́щную моли́тву твою́ ко Го́споду си́л, да укрепи́т держа́ву на́шу Росси́йскую Бо́гом храни́мую, да потреби́т Госпо́дь от земли́ на́шея вся́ неи́стовыя крамо́лы, и утверди́т в не́й безмяте́жие, ми́р и благоче́стие, да сохрани́т оби́тель твою́ святу́ю, гра́д на́ш и вся́ гра́ды и ве́си страны́ на́шея от гла́да и губи́тельства, от мяте́жа и нестрое́ния, от запале́ния и бу́ри, от нападе́ний вра́жиих и от тлетво́рных ве́тр и от вся́каго зла́. Уми́лостиви о на́с благоприя́тными моли́твами твои́ми Христа́ Бо́га на́шего, е́же изба́витися на́м от гре́х на́ших и наве́тов вра́жиих, я́ко да заступле́нием твои́м и по́мощию в ми́ре и тишине́ богоуго́дне зде́ на земли́ поживе́м, и в бу́дущем ве́це да сподо́бимся ча́сти святы́х Го́сподем на́шим Иису́сом Христо́м, Ему́же подоба́ет сла́ва и че́сть и поклоне́ние, ны́не и во вся́ ве́ки. Ами́нь.
Конда́къ а҃
И҆збра́нный ᲂу҆го́дниче хрⷭ҇то́въ и҆ чꙋдотво́рче, прпⷣбне ѻ҆́ч҃е на́шъ трѵ́фѡне, ст҃остїю житїѧ̀ и҆ чꙋдесы̀ твои́ми возсїѧ́вый странѣ̀ вѧ́тстѣй, ꙗ҆́кѡ ѕвѣзда̀ бг҃освѣ́тлаѧ: похва̑льнаѧ восписꙋ́емъ тѝ, любо́вїю творѧ́щїи всечестнꙋ́ю па́мѧть твою̀: ты̀ же, ꙗ҆́кѡ ве́лїе и҆мѣ́ѧй дерзнове́нїе ко гдⷭ҇ꙋ, мл҃твами твои́ми ѿ всѧ́кихъ на́съ бѣ́дъ свободѝ зовꙋ́щихъ:
Ра́дꙋйсѧ, трѵ́фѡне, пресла́вный чꙋдотво́рче.
І҆́косъ а҃
А҆́гг҃ла тѧ̀ во пло́ти сꙋ́ща позна́вше, прпⷣбне, и҆ вє́лїѧ бл҃годѣѧ̑нїѧ ѿ тебѣ̀ прїе́мше, ꙗ҆́кѡ чꙋдотво́рца пресла́внагѡ тѧ̀ сла́вимъ и҆ си́це тебѣ̀ со ᲂу҆миле́нїемъ зове́мъ:
Ра́дꙋйсѧ, сѣ́верныѧ страны̀ бл҃гоꙋха́нный крі́не: ра́дꙋйсѧ, ѻ҆́трасле бл҃гочести́вагѡ ко́рене.
Ра́дꙋйсѧ, ѿ мла́дости въ до́бромъ наказа́нїи воспита́нный: ра́дꙋйсѧ, и҆здѣ́тска сопричте́нный въ сыновство̀ ѻ҆ц҃ꙋ̀ нбⷭ҇номꙋ.
Ра́дꙋйсѧ, бл҃гочести́выѧ ма́тере твоеѧ̀ ѿра́до и҆ ᲂу҆тѣше́нїе: ра́дꙋйсѧ, бра́тїю и҆ сро́дники твоѧ̑ свои́мъ бл҃гоче́стїемъ ᲂу҆диви́вый.
Ра́дꙋйсѧ, цѣломꙋ́дрїе дѣ́вства невреди́мо сохрани́вый: ра́дꙋйсѧ, ѿ се́рдца твоегѡ̀ всѧ̑ и҆скꙋшє́нїѧ ю҆́ности ѿгна́вый.
Ра́дꙋйсѧ, къ бг҃ꙋ и҆мѣ́вый раче́нїе ве́лїе: ра́дꙋйсѧ, гдⷭ҇а ра́ди пꙋ́ть тѣ́сный и҆ ско́рбный и҆збра́вый.
Ра́дꙋйсѧ, дѡ́льнѧѧ го́рнѧгѡ ра́ди ѡ҆ста́вивый: ра́дꙋйсѧ, ꙗ҆́кѡ спасе́нїѧ и҆скі́й, во странꙋ̀ чꙋждꙋ́ю стѡпы̀ твоѧ̑ ᲂу҆пра́вилъ є҆сѝ.
Ра́дꙋйсѧ, трѵ́фѡне, пресла́вный чꙋдотво́рче.
Конда́къ в҃
Ви́дѣвъ, ꙗ҆́кѡ ма́ти и҆ бра́тїѧ твоѧ̑ восхотѣ́ша бра́кꙋ тѧ̀ вда́ти, и҆ чистотꙋ̀ дѣ́вства па́че возлюби́въ, до́мъ ѻ҆те́ческїй ѡ҆ста́вилъ є҆сѝ и҆ стра́нникъ бы́ти предсꙋди́лъ є҆сѝ, да сподо́бишисѧ вѣ́чнѡ пѣ́ти хрⷭ҇тꙋ̀ бг҃ꙋ: А҆ллилꙋ́їа.
І҆́косъ в҃
Разꙋмѣ́въ кѡ́зни, ѿ врага̀ спасе́нїѧ на́шегѡ содѣва́ємыѧ, терпѣ́нїе, проще́нїе и҆ мл҃твꙋ къ бг҃ꙋ проти́вꙋ поста́вилъ є҆сѝ, всебл҃же́нне ѻ҆́ч҃е, и҆ ꙗ҆́кѡ ни́щъ дх҃омъ же и҆ тѣ́ломъ, ѿ гра́да во гра́дъ и҆ ѿ вѣ́си въ ве́сь преходи́лъ є҆сѝ и҆ во ѻ҆́ныхъ примета́тисѧ ко хра́мѡмъ гдⷭ҇нимъ возлюби́лъ є҆сѝ. сегѡ̀ ра́ди зове́мъ тѝ:
Ра́дꙋйсѧ, всѧ̑ кра̑снаѧ мі́ра сегѡ̀ ни во что̀ вмѣни́вый: ра́дꙋйсѧ, нищетꙋ̀ тѣле́снꙋю и҆ дꙋхо́внꙋю возлюби́вый.
Ра́дꙋйсѧ, рꙋ̑бища вє́тхаѧ, ꙗ҆́кѡ ѡ҆де́ждꙋ драгꙋ́ю, на тѣ́лѣ свое́мъ носи́вый: ра́дꙋйсѧ, а҆́лчбою и҆ жа́ждею, мра́зомъ и҆ зно́емъ тѣ́ло твоѐ и҆знꙋри́вый.
Ра́дꙋйсѧ, ча́шꙋ порꙋга́нїй пра́вды ра́ди до конца̀ и҆спи́вый: ра́дꙋйсѧ, за творѧ́щыѧ тѝ напа́сть, ꙗ҆́кѡ за бл҃готво́рцы, гдⷭ҇ꙋ моли́выйсѧ.
Ра́дꙋйсѧ, терпѣ́нїемъ твои́мъ мі́ра сегѡ̀ ѕло́бꙋ побѣди́вый: ра́дꙋйсѧ, ѻ҆гне́мъ мл҃твы твоеѧ̀ всѧ̑ стрѣ́лы лꙋка́вагѡ попали́вый.
Ра́дꙋйсѧ, си́лою твоеѧ̀ вѣ́ры ꙗ҆зы́чєскаѧ сꙋевѣ̑рїѧ потреби́вый: ра́дꙋйсѧ, красотꙋ̀ селе́нїѧ бж҃їѧ возлюби́вый.
Ра́дꙋйсѧ, примета́тисѧ въ до́мꙋ бж҃їи и҆зво́ливый: ра́дꙋйсѧ, ꙗ҆́кѡ стра́нникъ и҆ пришле́цъ бы́въ на землѝ, ны́нѣ во ѡ҆би́телехъ нбⷭ҇ныхъ всели́лсѧ є҆сѝ.
Ра́дꙋйсѧ, трѵ́фѡне, пресла́вный чꙋдотво́рче.
Конда́къ г҃
Си́ла бж҃їѧ даде́сѧ тѝ, прпⷣбне, є҆гда̀ въ честнѣ́мъ стра́нствїи твое́мъ нѣ́коегѡ младе́нца и҆́менемъ тїмоѳе́а, не́мощїю лю́тою ѡ҆держи́ма и҆ бли́з̾ коне́чнагѡ и҆здыха́нїѧ бы́вша, мл҃твами твои́ми и҆сцѣли́лъ є҆сѝ, и҆ здра́ва того̀ сотвори́въ, кꙋ́пнѡ съ роди́тели и҆ при́сными є҆гѡ̀ воспѣ́лъ є҆сѝ ᲂу҆крѣплѧ́ющемꙋ тѝ хрⷭ҇тꙋ̀ бг҃ꙋ: А҆ллилꙋ́їа.
І҆́косъ г҃
И҆мѣ́ѧ по́мыслъ чи́стъ и҆ дꙋ́шꙋ непоро́чнꙋ бл҃же́нне ѻ҆́ч҃е, ᲂу҆разꙋмѣ́лъ є҆сѝ сꙋетꙋ̀ мі́ра сегѡ̀ и҆ непостоѧ́нство, и҆ вѣ́чныхъ бла̑гъ возжелѣ́въ, мі́ра сегѡ̀ ѿре́клсѧ є҆сѝ и҆ постриже́нїе и҆́ноческое прїѧ́лъ є҆сѝ. тѣ́мже ᲂу҆блажа́емъ тѧ̀, прпⷣбне ѻ҆́ч҃е, и҆ сла́вѧще є҆́же ѡ҆ тебѣ̀ и҆зволе́нїе бж҃їе, вопїе́мъ тѝ си́це:
Ра́дꙋйсѧ, ꙗ҆́кѡ земна̑ѧ ѿри́нꙋвъ, ᲂу҆мо́мъ твои́мъ къ нбⷭ҇нымъ восте́клъ є҆сѝ: ра́дꙋйсѧ, ꙗ҆́кѡ къ вы̑шнимъ тече́нїе своѐ вы́нꙋ ᲂу҆пра́вилъ є҆сѝ.
Ра́дꙋйсѧ, смире́нїе возлюби́вый: ра́дꙋйсѧ, послꙋша́нїѧ рачи́телю.
Ра́дꙋйсѧ, мл҃твъ кади́ло бл҃гопрїѧ́тное: ра́дꙋйсѧ, сле́зъ покаѧ́нныхъ неѡскꙋ́дный и҆сто́чниче.
Ра́дꙋйсѧ, бл҃го́е и҆́го хрⷭ҇то́во на себѐ возложи́вый: ра́дꙋйсѧ, на высотꙋ̀ безстра́стїѧ возше́дый.
Ра́дꙋйсѧ, всего̀ себѐ бг҃ꙋ преда́вый: ра́дꙋйсѧ, ѿ сме́рти напра́сныѧ и҆зволе́нїемъ бж҃їимъ ди́внѡ сохране́нный.
Ра́дꙋйсѧ, ꙗ҆вле́нїемъ ст҃и́телѧ нїкола́а ѡ҆бра́дованный: ра́дꙋйсѧ, ѿ недꙋ́га лю́тагѡ и҆́мъ и҆сцѣле́нный.
Ра́дꙋйсѧ, трѵ́фѡне, пресла́вный чꙋдотво́рче.
Конда́къ д҃
Бꙋ́рю и҆скꙋше́нїй и҆ бѣ́дъ ѿ человѣ̑къ, ѕло́бныхъ на тѧ̀ ст҃а́гѡ ра́ди житїѧ̀ твоегѡ̀, прпⷣбне ѻ҆́ч҃е, съ кро́тостїю претерпѣва́ѧ и҆ є҆ди́наго то́лькѡ на потре́бꙋ и҆ща̀, є҆́же ка́кѡ бг҃ови ᲂу҆годи́ти, бг҃омъ води́мый, дости́глъ є҆сѝ вѧ́тскїѧ страны̀, и҆ во гра́дѣ хлы́новѣ ѡ҆би́тель во сла́вꙋ бцⷣы созда́въ, въ не́й съ ли́ки и҆́ночествꙋющихъ немо́лчнѡ вопїѧ́лъ є҆сѝ къ бг҃ꙋ: А҆ллилꙋ́їа.
І҆́косъ д҃
Слы́шавше хрⷭ҇тоимени́тїи лю́дїе гра́да хлы́нова, ꙗ҆́кѡ ѡ҆би́тели и҆́ночестѣй бли́з̾ гра́да тогѡ̀ ѡ҆снова́нїе положи́лъ є҆сѝ, трѵ́фѡне бг҃оно́сне, возра́довашасѧ ра́достїю ве́лїю, и҆ ꙗ҆́кѡ а҆́гг҃ла бж҃їѧ тѧ̀ почита́хꙋ, слꙋжа́ще ѿ и҆мѣ́нїй свои́хъ къ ᲂу҆строе́нїю ѻ҆́ныѧ ѡ҆би́тели и҆ вопїѧ́хꙋ тебѣ̀ си́це:
Ра́дꙋйсѧ, та́йнагѡ велѣ́нїѧ бж҃їѧ послꙋ́шавый: ра́дꙋйсѧ, а҆враа́ма вѣ́рѣ поревнова́вый.
Ра́дꙋйсѧ, во странꙋ̀ вѧ́тскꙋю пꙋ́ть сво́й бл҃гоче́стнѣ ᲂу҆пра́вивый: ра́дꙋйсѧ, ѡ҆би́тель и҆́ноческꙋю та́мѡ созда́ти ѕѣлѡ̀ восхотѣ́вый.
Ра́дꙋйсѧ, хра́мы бж҃їи въ не́й бл҃голѣ́пнѡ ᲂу҆стро́ивый: ра́дꙋйсѧ, чꙋдеса̀ пресла̑внаѧ при ѡ҆снова́нїи ѡ҆би́тели соверши́вый.
Ра́дꙋйсѧ, ꙗ҆́кѡ мѡѷсе́й мл҃твами во́дꙋ и҆сточи́вый: ра́дꙋйсѧ, бцⷣы застꙋпле́нїю и҆ покро́вꙋ ѡ҆би́тель твою̀ вда́вый.
Ра́дꙋйсѧ, ли́ка и҆́ноческагѡ предстоѧ́телю бг҃омꙋ́дрый: ра́дꙋйсѧ, гра́да хлы́нова ст҃о́е ᲂу҆краше́нїе и҆ покро́ве, бг҃омъ да́нный.
Ра́дꙋйсѧ, сотвори́вый во́лю гдⷭ҇ню и҆ и҆́ны твори́ти наꙋчи́вый: ра́дꙋйсѧ, сегѡ̀ ра́ди ве́лїй въ црⷭ҇твїи нбⷭ҇номъ нарече́нный.
Ра́дꙋйсѧ, трѵ́фѡне, пресла́вный чꙋдотво́рче.
Конда́къ є҃
Бг҃оте́чнѡ, ꙗ҆́кѡ свѣтоза́рнаѧ ѕвѣзда̀, ше́ствовалъ є҆сѝ, ᲂу҆го́дниче бж҃їй, въ престо́льный гра́дъ москвꙋ̀, полє́знаѧ ѡ҆би́тели твое́й та́мѡ ᲂу҆строѧ́ѧ и҆ ѿ ст҃ѣ́йшагѡ патрїа́рха і҆́ѡва въ а҆рхїмандрі́та поста́вленъ бы́въ, съ млⷭ҇тынею мно́гою ѿ бл҃говѣ́рнагѡ царѧ̀ ѳео́дѡра дарова́нною, въ ѡ҆би́тель твою̀ па́ки возврати́лсѧ є҆сѝ, бл҃года́рственнѡ воспѣва́ѧ бг҃ꙋ: А҆ллилꙋ́їа.
І҆́косъ є҃
Ви́дѣвъ вра́гъ сп҃се́нїѧ на́шегѡ ѡ҆би́тель твою̀ до́брѣ ᲂу҆строѧ́емꙋ ѿ тебѣ̀, прпⷣбне ѻ҆́ч҃е, воздви́же на тѧ̀ нѣ́кїихъ ѿ ᲂу҆чени̑къ твои́хъ, и҆̀же проти́вꙋ тебѐ возста́вше, ѿ ѡ҆би́тели твоеѧ̀ тѧ̀ ѿгна́ша. ты̀ же, на землѝ сїѐ и҆згна́нїе съ кро́тостїю прїе́мый, ны́нѣ же всели́выйсѧ въ ѡ҆би́телехъ нбⷭ҇ныхъ, ᲂу҆слы́ши на́съ, пою́щихъ тѝ сицева̑ѧ:
Ра́дꙋйсѧ, ꙗ҆́кѡ за блага̑ѧ ко сп҃се́нїю словеса̀ порꙋга́нїѧ прїе́мый: ра́дꙋйсѧ, а҆́ки кро́ткїй а҆́гнецъ всѧ̑ терпѣ́вый.
Ра́дꙋйсѧ, съ нб҃сѐ ᲂу҆тѣше́нїе прїе́мый: ра́дꙋйсѧ, молча́нїемъ на ᲂу҆кѡри́зны ѿвѣща́вый.
Ра́дꙋйсѧ, во и҆згна́нїе неѕло́бивѡ ѿше́дый: ра́дꙋйсѧ, любо́вїю хрⷭ҇то́вою кѡ́зни вра̑жїѧ побѣди́вый.
Ра́дꙋйсѧ, мнѡ́ги ѡ҆би́тєли и҆́ночєскїѧ во стра́нствїи твое́мъ посѣти́вый: ра́дꙋйсѧ, въ ни́хъ себѣ̀ ᲂу҆тѣше́нїе и҆ ѿра́дꙋ ѡ҆брѣты́й.
Ра́дꙋйсѧ, чꙋдеса̀ ди̑внаѧ во и҆згна́нїи твое́мъ соверши́вый: ра́дꙋйсѧ, мнѡ́ги на пꙋ́ть и҆́ноческагѡ житїѧ̀ наста́вивый.
Ра́дꙋйсѧ, бл҃же́ннаго проко́пїа на по́двигъ ю҆ро́дства ѡ҆ хрⷭ҇тѣ̀ бл҃гослови́вый: ра́дꙋйсѧ, ꙗ҆́кѡ сы́й на землѝ ꙗ҆́вѣ съ нб҃ожи́тели бесѣ́довалъ є҆сѝ.
Ра́дꙋйсѧ, трѵ́фѡне, пресла́вный чꙋдотво́рче.
Конда́къ ѕ҃
Проповѣ́дꙋетъ при́снѡ страна̀ вѧ́тскаѧ по́двиги и҆ трꙋды̀ твоѧ̑, прпⷣбне, въ страна́хъ а҆рха́нгельскихъ, ᲂу҆́стюжскихъ, пе́рмскихъ, и҆ свѣ́тлѡ красꙋ́етсѧ, стѧжа́вши тѧ̀ помо́щника и҆ покрови́телѧ себѣ̀ ѡ҆со́бнѣ. мо́лимъ ᲂу҆̀бо тѧ̀, свѧ́тче бж҃їй, не лишѝ и҆ на́съ грѣ́шныхъ нбⷭ҇ныѧ твоеѧ̀ по́мощи и҆ покро́ва мл҃твъ твои́хъ, къ твоемꙋ̀ бо застꙋпле́нїю въ ско́рбехъ на́шихъ вседꙋ́шнѡ прибѣга́емъ и҆ просла́вльшемꙋ тѧ̀ гдⷭ҇ꙋ со ᲂу҆миле́нїемъ зове́мъ: А҆ллилꙋ́їа.
І҆́косъ ѕ҃
Возсїѧ́лъ є҆сѝ, прпⷣбне, ꙗ҆́кѡ ѕвѣзда̀ бг҃освѣ́тлаѧ, во гра́дѣ слободстѣ́мъ, во́нь же по и҆згна́нїи твое́мъ прише́дъ, ѡ҆би́тель бг҃оѧвле́нїѧ гдⷭ҇нѧ созда́лъ є҆сѝ и҆ та́мѡ всели́лсѧ є҆сѝ, всѣ́хъ ѡ҆зарѧ́ѧ ст҃остїю житїѧ̀ своегѡ̀. сегѡ̀ ра́ди вопїе́мъ тѝ си́це:
Ра́дꙋйсѧ, гра́дꙋ слободско́мꙋ прише́ствїемъ твои́мъ бл҃гослове́нїе ѿ гдⷭ҇а низпосла́вый: ра́дꙋйсѧ, жи́телємъ гра́да тогѡ̀ свѣти́льникъ пресвѣ́телъ бы́вый.
Ра́дꙋйсѧ, ѿ ни́хъ ра́достнѡ прїѧ́тый: ра́дꙋйсѧ, любо́вїю и҆́хъ ᲂу҆тѣ́шенный.
Ра́дꙋйсѧ, ѡ҆би́тель и҆́ноческꙋю та́мѡ до́брѣ ᲂу҆стро́ивый: ра́дꙋйсѧ, ми́лостыню на ᲂу҆строе́нїе є҆ѧ̀ мно́гꙋ собра́вый.
Ра́дꙋйсѧ, ти́хое въ не́й приста́нище ѡ҆брѣты́й: ра́дꙋйсѧ, при́снѡ въ не́й въ трꙋдѣ̀ и҆ мл҃твѣ пребыва́вый.
Ра́дꙋйсѧ, и҆ здѣ̀ и҆́нокѡвъ бг҃омы́слїю поꙋча́вый: ра́дꙋйсѧ, ᲂу҆ченика̀ твоегѡ̀ досїфе́а ко сп҃се́нїю наставлѧ́вый.
Ра́дꙋйсѧ, пꙋ́ть терпѣ́нїѧ и҆́ноческагѡ томꙋ̀ показа́вый: ра́дꙋйсѧ, ѡ҆́бразъ вѣ́ры и҆ любвѐ и҆ а҆́гг҃льскагѡ житїѧ̀ въ подража́нїе ᲂу҆ченикѡ́мъ твои̑мъ ѡ҆ста́вивый.
Ра́дꙋйсѧ, трѵ́фѡне, пресла́вный чꙋдотво́рче.
Конда́къ з҃
Хотѣ́нїе є҆ди́но и҆мѣ́лъ є҆сѝ, прпⷣбне, є҆́же ви́дѣти созда́ннꙋю ѿ тебѐ ѡ҆би́тель бцⷣы во гра́дѣ хлы́новѣ. сегѡ̀ ра́ди вѣ́сть ѿ бг҃а прїе́мъ, ꙗ҆́кѡ бли́зъ є҆́сть кончи́на твоѧ̀, ѿ ѡ҆би́тели солове́цкїѧ, є҆ѧ́же въ стра́нствїи свое́мъ бг҃оꙋго́днемъ дости́глъ є҆сѝ, па́ки во гра́дъ хлы́новъ стопы̑ твоѧ̑ ᲂу҆пра́вилъ є҆сѝ, да та́мѡ во ѡ҆би́тели твое́й, преда́си дꙋ́хъ тво́й бг҃ꙋ, є҆мꙋ́же ѿ ю҆́ности твоеѧ̀ навы́клъ є҆сѝ пѣ́ти: А҆ллилꙋ́їа.
І҆́косъ з҃
Ди́вно бы́сть, ᲂу҆го́дниче бж҃їй, прише́ствїе твоѐ во гра́дъ хлы́новъ, є҆гда̀ тѧ̀ ве́тха де́нми сꙋ́ща и҆ тѣле́сною не́мощїю ѡ҆держи́ма, бра́тїѧ ѡ҆би́тели твоеѧ̀ ѿри́нꙋша, послѣди́ же, пред̾ кончи́ною твое́ю ст҃о́ю, гнѣ́ва бж҃їѧ ᲂу҆боѧ́вшесѧ и҆ терпѣ́нїемъ твои́мъ побѣжде́ни бы́вше, раска́ѧхꙋсѧ и҆ въ ѡ҆би́тель твою̀ съ любо́вїю тѧ̀ прїѧ́хꙋ. мы́ же таково́мꙋ неѕло́бїю твоемꙋ̀ дивѧ́щесѧ, вопїе́мъ тѝ:
Ра́дꙋйсѧ, ѻ҆́ч҃е бл҃госе́рдый, враждова́вшыѧ на тѧ̀ любо́вїю хрⷭ҇то́вою возлюби́вый: ра́дꙋйсѧ, гнѣ́въ на воздви́гшихъ гоне́нїе на тѧ̀ соверше́ннѡ въ себѐ ᲂу҆мертви́вый.
Ра́дꙋйсѧ, до конца̀ ѡ҆би́тель твою̀ возлюби́вый: ра́дꙋйсѧ, па́ки въ не́й ра́достнѡ и҆ ми́рнѡ водвори́выйсѧ.
Ра́дꙋйсѧ, въ затво́рѣ келе́йнѣмъ въ не́й ᲂу҆едини́выйсѧ: ра́дꙋйсѧ, посто́мъ и҆ мл҃твою къ и҆схо́дꙋ и҆з̾ мі́ра сегѡ̀ въ не́мъ ᲂу҆готовлѧ́выйсѧ.
Ра́дꙋйсѧ, бра́тїю твою̀ пред̾ и҆схо́домъ ѿ житїѧ̀ сегѡ̀ бл҃гослови́вый: ра́дꙋйсѧ, поꙋче́нїе ѿ писа́нїѧ бж҃е́ственнагѡ и҆̀мъ препода́вый.
Ра́дꙋйсѧ, тѣ́мъ блага̑ѧ за ѕло̀ возда́вый: ра́дꙋйсѧ, при и҆схо́дѣ твое́мъ ѿ вре́меннагѡ житїѧ̀ прича́стїѧ бж҃е́ственныхъ та̑инъ сподо́бивыйсѧ.
Ра́дꙋйсѧ, ѿ ᲂу҆́зъ тѣ́ла разрѣши́тисѧ и҆ со хрⷭ҇то́мъ бы́ти жела́нїе всегда̀ и҆мѣ́вый: ра́дꙋйсѧ, ѡ҆ не́мъ є҆ди́нѣмъ при́снѡ воздыха́вый.
Ра́дꙋйсѧ, трѵ́фѡне, пресла́вный чꙋдотво́рче.
Конда́къ и҃
Стра́нствїе земно́е сконча́вшꙋ тѝ, трѵ́фѡне приснопа́мѧтне, бл҃гоꙋха́нїѧ ди́внагѡ и҆спо́лнисѧ ке́ллїа твоѧ̀: вери̑ги же та́йнѡ тобо́ю носи̑мыѧ, спадо́ша съ твоегѡ̀ тѣлесѐ, и҆ зра́къ лица̀ твоегѡ̀ просвѣти́сѧ, ꙗ҆́кѡ всѣ̑мъ, ви́дѣвшымъ и҆схо́дъ тво́й, диви́тисѧ ѕѣлѡ̀ и҆ возопи́ти ко гдⷭ҇ꙋ: А҆ллилꙋ́їа.
І҆́косъ и҃
Всѧ̑ бра́тїѧ ѡ҆би́тели твоеѧ̀, пребл҃же́нне, со ѡ҆сщ҃е́ннымъ собо́ромъ и҆ людьмѝ мно́гими со слеза́ми и҆ пѣ̑нїи надгро́бными и҆знесо́ша всечестно́е тѣ́ло твоѐ ко гро́бꙋ, тобо́ю въ хра́мѣ прест҃ы́ѧ бцⷣы ᲂу҆гото́ванномꙋ, и҆дѣ́же ѻ҆́ное, ꙗ҆́кѡ сокро́вище дꙋхо́вное, че́стнѡ положи́ша. мы̀ же ᲂу҆ ра́ки твоеѧ̀ ст҃ы́ѧ вопїе́мъ тѝ съ любо́вїю такова̑ѧ:
Ра́дꙋйсѧ, во бл҃гоꙋха́нїи ст҃ы́ни сно́мъ сме́рти ѡ҆почи́вый: ра́дꙋйсѧ, сме́рть вкꙋси́вый, тлѣ́нїѧ же не позна́вый.
Ра́дꙋйсѧ, въ ри́зꙋ нетлѣ́нїѧ бл҃года́тїю бж҃їею ѡ҆блече́нный: ра́дꙋйсѧ, чꙋдесы̀ мно́гими ѿ бг҃а по сме́рти просла́вленный.
Ра́дꙋйсѧ, ꙗ҆́кѡ честна́ѧ ра́ка твоѧ̀ враче́бница бы́сть всѣ̑мъ недꙋ́гꙋющымъ: ра́дꙋйсѧ, ꙗ҆́кѡ всѧ́къ, приходѧ́й къ не́й съ вѣ́рою, прїе́млетъ да́ры цѣлє́бныѧ.
Ра́дꙋйсѧ, разсла́бленныхъ ᲂу҆крѣпи́телю: ра́дꙋйсѧ, бѣснꙋ́ющихсѧ ѿ наси́лїѧ дїа́вольскагѡ свободи́телю.
Ра́дꙋйсѧ, слѣпы̑мъ зрѣ́нїе возвраща́ѧй: ра́дꙋйсѧ, хромы̑ѧ є҆́же пра́вѡ ходи́ти ᲂу҆строѧ́ѧй.
Ра́дꙋйсѧ, нѣмы̑мъ проглаго́ланїе да́рꙋѧй: ра́дꙋйсѧ, неисцѣ̑льныѧ ꙗ҆́звы ди́внѡ врачꙋ́ѧй.
Ра́дꙋйсѧ, трѵ́фѡне, пресла́вный чꙋдотво́рче.
Конда́къ ѳ҃
А҆́гг҃ли нбⷭ҇нїи ра́достнѡ прїѧ́ша чи́стꙋю дꙋ́шꙋ твою̀, прпⷣбне, во ѡ҆би́тєли ра̑йскїѧ, и҆дѣ́же цр҃ь сла́вы хрⷭ҇то́съ гдⷭ҇ь вѣнча̀ тѧ̀ вѣнце́мъ нбⷭ҇нымъ, є҆го́же ᲂу҆гото́ва всѣ̑мъ, возлю́бльшымъ ꙗ҆вле́нїе є҆гѡ̀, и҆ дарова̀ на́мъ тебѣ̀ застꙋ́пника и҆ мл҃твенника бл҃га́го, да бл҃года́рнѡ пое́мъ є҆мꙋ̀: А҆ллилꙋ́їа.
І҆́косъ ѳ҃
Виті̑и многовѣща́нїи не возмо́гꙋтъ по достоѧ́нїю воспѣ́ти сла́вꙋ, ѿ гдⷭ҇а ᲂу҆гото́ваннꙋю ст҃ы̑мъ є҆гѡ̀ во црⷭ҇твїи нбⷭ҇нѣмъ, є҆ѧ́же наслѣ́дникъ сподо́билсѧ є҆сѝ бы́ти, трѵ́фѡне пребл҃же́нне. сеѧ̀ сла́вы соприча́стники бы́ти и҆ на́съ сподо́би, ᲂу҆го́дниче бж҃їй, ст҃ы́ми твои́ми ѡ҆ на́съ къ бг҃ꙋ мл҃твами, да ра́достнѡ вопїе́мъ тѝ:
Ра́дꙋйсѧ, ликовствꙋ́ѧй въ черто́зѣ нбⷭ҇нагѡ домовлⷣки: ра́дꙋйсѧ, граждани́не і҆ерⷭ҇ли́ма го́рнѧгѡ.
Ра́дꙋйсѧ, свѧ́тче бж҃їй, со всѣ́ми ст҃ы́ми прославлѧ́емый: ра́дꙋйсѧ, ѿ го́рнихъ высо́тъ къ на́мъ земнорѡ́днымъ млⷭ҇тивнѡ приника́ѧй.
Ра́дꙋйсѧ, ѡ҆би́тель твою̀ и҆ гра́дъ на́шъ при́снѡ сохранѧ́ѧй: ра́дꙋйсѧ, въ со́нїихъ и҆ видѣ́нїихъ вѣ̑рнымъ ꙗ҆влѧ́ѧйсѧ.
Ра́дꙋйсѧ, сѣ́верныѧ и҆ вѧ́тскїѧ страны̀ нбⷭ҇ный ѡ҆со́бнѣ покрови́телю: ра́дꙋйсѧ, гра́да хлы́нова неѿстꙋ́пный храни́телю.
Ра́дꙋйсѧ, всѣ́хъ скорбѧ́щихъ ᲂу҆тѣше́нїе: ра́дꙋйсѧ, всѣ́хъ притека́ющихъ къ тебѣ̀ ско́рое ᲂу҆слы́шанїе.
Ра́дꙋйсѧ, предста́телю на́шъ бл҃гі́й: ра́дꙋйсѧ, хода́таю ѡ҆ на́съ пред̾ бг҃омъ немо́лчный.
Ра́дꙋйсѧ, трѵ́фѡне, пресла́вный чꙋдотво́рче.
Конда́къ і҃
Сп҃си́тельный зало́гъ бж҃їѧ блгⷣти ст҃ы̑ѧ мо́щи твоѧ̑, прпⷣбне, по лѣ́тѣхъ мно́зѣхъ ѡ҆брѣ́тени бы́ша нетлѣ́нни и҆ въ но́вѣмъ хра́мѣ бцⷣы че́стнѣ ѿ ст҃и́телѧ і҆ѡ́ны положе́ни бы́ша, и҆̀же съ бра́тїею ѡ҆би́тели и҆ всѣ́мъ мно́жествомъ бл҃гоговѣ́йнѣ лобыза́хꙋ ѻ҆́ныѧ, ра́достнѡ поѧ̀ бг҃ꙋ: А҆ллилꙋ́їа.
І҆́косъ і҃
Стѣно́ю мл҃твъ твои́хъ, прпⷣбне, ѡ҆градѝ на́съ ѿ всѧ́кихъ бѣ́дъ и҆ скорбе́й, тебѐ бо стѧжа́хомъ застꙋ́пника тве́рдагѡ и҆ предста́телѧ ѡ҆ на́съ пред̾ бг҃омъ неꙋсы́пнаго, да ѡ҆гражда́еми твои́мъ застꙋпле́нїемъ, си́це тебѣ̀ зове́мъ:
Ра́дꙋйсѧ, въ бѣда́хъ и҆ ѡ҆бстоѧ́нїихъ ско́рый помо́щниче: ра́дꙋйсѧ, призыва́ющимъ тѧ̀ ᲂу҆се́рдный застꙋ́пниче.
Ра́дꙋйсѧ, почита́ющихъ тѧ̀ прошє́нїѧ ско́рѡ и҆сполнѧ́ѧй: ра́дꙋйсѧ, мно́гажды прошє́нїе по́мощїю твое́ю предвари́вый.
Ра́дꙋйсѧ, въ ми́лостехъ неистощи́мый: ра́дꙋйсѧ, скорбѧ́щихъ прибѣ́жище те́плое.
Ра́дꙋйсѧ, печа́льныхъ ᲂу҆тѣше́нїе: ра́дꙋйсѧ, ѡ҆би́димыхъ застꙋ́пниче.
Ра́дꙋйсѧ, ѿ бѣ́дъ и҆ скорбе́й на́съ ско́рѡ и҆збавлѧ́ѧй: ра́дꙋйсѧ, ꙗ҆́кѡ непреста́нною мл҃твою ѡ҆ на́съ бг҃а ᲂу҆милостивлѧ́еши.
Ра́дꙋйсѧ, сосꙋ́де честны́й, є҆ле́й млⷭ҇ти бж҃їѧ къ на́мъ содержа́ѧй: ра́дꙋйсѧ, ѕвѣздо̀ свѣ́тлаѧ, пꙋ́ть къ црⷭ҇твїю бж҃їю на́мъ ᲂу҆казꙋ́ющаѧ.
Ра́дꙋйсѧ, трѵ́фѡне, пресла́вный чꙋдотво́рче.
Конда́къ а҃і
Пѣ́нїе всеꙋмиле́нное прино́симъ тѝ, прпⷣбне, пред̾ ра́кою твое́ю ст҃о́ю предстоѧ́ще, и҆ мо́лимсѧ тѝ прилѣ́жнѡ: ꙗ҆́коже ѻ҆трокови́цꙋ, бѣснова́нїемъ ѡ҆держи́мꙋю, млⷭ҇тивнѡ и҆сцѣли́лъ є҆сѝ, та́кѡ и҆ на́съ, страстьмѝ многоразли́чными недꙋ́гꙋющихъ, посѣтѝ и҆ да́нною тѝ ѿ бг҃а бл҃года́тїю и҆сцѣлѝ, да ра́достнѡ пое́мъ просла́вльшемꙋ тѝ бг҃ꙋ: А҆ллилꙋ́їа.
І҆́косъ а҃і
Свѣтопода́тельна свѣти́льника тѧ̀ вѣ́мы, ѻ҆́ч҃е, прⷭ҇то́лꙋ бж҃їю предстоѧ́ща и҆ мра́къ страсте́й и҆ грѣхѡ́въ на́шихъ лꙋча́ми мл҃твъ разгонѧ́юща. ѡ҆зарѝ ᲂу҆̀бо ѿ го́рнихъ высо́тъ и҆ на̑ша сердца̀, всебл҃же́нне, да досточе́стнѡ вопїе́мъ тѝ си́це:
Ра́дꙋйсѧ, свѣ́та трⷪ҇ческагѡ зри́телю: ра́дꙋйсѧ, нбⷭ҇нагѡ сїѡ́на жи́телю.
Ра́дꙋйсѧ, го́рнѧгѡ мі́ра бл҃же́нный ѡ҆бита́телю: ра́дꙋйсѧ, при́снѡ созерца́ѧй пресвѣ́тлое лицѐ влⷣки хрⷭ҇та̀.
Ра́дꙋйсѧ, немо́лчнѡ воспѣва́ѧй трист҃ꙋ́ю пѣ́снь трⷪ҇цѣ: ра́дꙋйсѧ, лꙋчѐ пресвѣ́тлаѧ, ѿ сл҃нца хрⷭ҇та̀ возсїѧ́вшаѧ.
Ра́дꙋйсѧ, ꙗ҆́кѡ и҆ по преставле́нїи твое́мъ съ на́ми пребыва́еши: ра́дꙋйсѧ, въ мл҃твахъ твои́хъ ѡ҆ на́съ къ бг҃ꙋ те́плый предста́телю.
Ра́дꙋйсѧ, странꙋ̀ вѧ́тскꙋю ѕѣлѡ̀ возлюби́вый: ра́дꙋйсѧ, мо́щи твоѧ̑ ст҃ы̑ѧ є҆́й въ наслѣ́дїе ѡ҆ста́вивый.
Ра́дꙋйсѧ, сокро́вище неѡскꙋ́дное мно́гихъ и҆сцѣле́нїй.
Ра́дꙋйсѧ, трѵ́фѡне, пресла́вный чꙋдотво́рче.
Конда́къ в҃і
Блгⷣть и҆ млⷭ҇ть и҆спросѝ на́мъ, прпⷣбне, ᲂу҆ хрⷭ҇та̀ и҆ бг҃а на́шегѡ и҆ мл҃твенникъ ᲂу҆се́рдный бꙋ́ди ѡ҆ на́съ ко гдⷭ҇ꙋ, да ᲂу҆тверди́вшесѧ въ за́повѣдехъ є҆гѡ̀, полꙋ́чимъ сп҃се́нїе вѣ́чное и҆ та́кѡ при́снѡ пое́мъ бг҃ꙋ пѣ́снь: А҆ллилꙋ́їа.
І҆́косъ в҃і
Пою́ще по́двиги преди́внагѡ житїѧ̀ твоегѡ̀ и҆ сла́вѧще чꙋдеса̀ твоѧ̑, прпⷣбне, любо́вїю ᲂу҆блажа́емъ тѧ̀, ꙗ҆́кѡ многомо́щна мл҃твенника ѡ҆ на́съ и҆ предста́телѧ пред̾ гдⷭ҇емъ на́шимъ. ты̀ же, ѽ свѧ́тче бж҃їй, ꙗ҆́кѡ бл҃гоꙋтро́бенъ, принесѝ моле́нїе те́плое ѡ҆ на́съ ко влⷣцѣ, да сподо́битъ на́съ нбⷭ҇нагѡ црⷭ҇твїѧ своегѡ̀, вопїю́щихъ тѝ съ любо́вїю такова̑ѧ:
Ра́дꙋйсѧ, прест҃ы́ѧ трⷪ҇цы слꙋжи́телю вѣ́рный: ра́дꙋйсѧ, бл҃года́тїю дх҃а ст҃а́гѡ прїѡсѣне́нный.
Ра́дꙋйсѧ, прест҃ы́ѧ бцⷣы слꙋго̀ и҆зрѧ́дный: ра́дꙋйсѧ, а҆́гг҃лѡмъ собесѣ́дниче преди́вный.
Ра́дꙋйсѧ, со а҆пⷭ҇лы ликовствꙋ́ѧй ᲂу҆ прⷭ҇то́ла цр҃ѧ̀ сла́вы: ра́дꙋйсѧ, мч҃никъ добропобѣ́дныхъ сострада́льче.
Ра́дꙋйсѧ, прпⷣбныхъ подража́телю вѣ́рный: ра́дꙋйсѧ, всѣ́хъ ст҃ы́хъ бж҃їихъ сонаслѣ́дниче.
Ра́дꙋйсѧ, ѡ҆ грѣ́шныхъ всегда̀ бг҃а ᲂу҆молѧ́ѧй: ра́дꙋйсѧ, дꙋ́шы и҆ тѣлеса̀ на̑ша бл҃года́тїю бж҃їею и҆сцѣлѧ́ѧй.
Ра́дꙋйсѧ, по бз҃ѣ на тѧ̀ ᲂу҆пова́нїе возлага́ющихъ не посрамлѧ́ѧй.
Ра́дꙋйсѧ, трѵ́фѡне, пресла́вный чꙋдотво́рче.
Конда́къ г҃і
Ѽ преди́вный ᲂу҆го́дниче и҆ пресла́вный чꙋдотво́рче, прпⷣбне ѻ҆́ч҃е на́шъ трѵ́фѡне: млⷭ҇тивнѡ прїимѝ сїѐ ма́лое моле́нїе на́ше, въ похвалꙋ̀ тебѣ̀ приноси́мое, и҆ предстоѧ̀ прⷭ҇то́лꙋ цр҃ѧ̀ сла́вы, ᲂу҆молѝ гдⷭ҇а, да сохрани́тъ на́съ ѿ вра̑гъ ви́димыхъ и҆ неви́димыхъ, ѿ недꙋ́га и҆ гла́да, ѿ напа́сти и҆ ско́рби и҆ вѣ́чнагѡ мꙋче́нїѧ и҆зба́витъ, да сподо́бимсѧ вкꙋ́пѣ съ тобо́ю въ ра́дости ст҃ы́хъ вѣ́чнѡ воспѣва́ти є҆мꙋ̀: А҆ллилꙋ́їа.
Повто́ръ
Сей конда́къ глаго́лется три́жды, та́же і҆́косъ а҃-й и҆ конда́къ а҃-й.
І҆́косъ а҃
А҆́гг҃ла тѧ̀ во пло́ти сꙋ́ща позна́вше, прпⷣбне, и҆ вє́лїѧ бл҃годѣѧ̑нїѧ ѿ тебѣ̀ прїе́мше, ꙗ҆́кѡ чꙋдотво́рца пресла́внагѡ тѧ̀ сла́вимъ и҆ си́це тебѣ̀ со ᲂу҆миле́нїемъ зове́мъ:
Ра́дꙋйсѧ, сѣ́верныѧ страны̀ бл҃гоꙋха́нный крі́не: ра́дꙋйсѧ, ѻ҆́трасле бл҃гочести́вагѡ ко́рене.
Ра́дꙋйсѧ, ѿ мла́дости въ до́бромъ наказа́нїи воспита́нный: ра́дꙋйсѧ, и҆здѣ́тска сопричте́нный въ сыновство̀ ѻ҆ц҃ꙋ̀ нбⷭ҇номꙋ.
Ра́дꙋйсѧ, бл҃гочести́выѧ ма́тере твоеѧ̀ ѿра́до и҆ ᲂу҆тѣше́нїе: ра́дꙋйсѧ, бра́тїю и҆ сро́дники твоѧ̑ свои́мъ бл҃гоче́стїемъ ᲂу҆диви́вый.
Ра́дꙋйсѧ, цѣломꙋ́дрїе дѣ́вства невреди́мо сохрани́вый: ра́дꙋйсѧ, ѿ се́рдца твоегѡ̀ всѧ̑ и҆скꙋшє́нїѧ ю҆́ности ѿгна́вый.
Ра́дꙋйсѧ, къ бг҃ꙋ и҆мѣ́вый раче́нїе ве́лїе: ра́дꙋйсѧ, гдⷭ҇а ра́ди пꙋ́ть тѣ́сный и҆ ско́рбный и҆збра́вый.
Ра́дꙋйсѧ, дѡ́льнѧѧ го́рнѧгѡ ра́ди ѡ҆ста́вивый: ра́дꙋйсѧ, ꙗ҆́кѡ спасе́нїѧ и҆скі́й, во странꙋ̀ чꙋждꙋ́ю стѡпы̀ твоѧ̑ ᲂу҆пра́вилъ є҆сѝ.
Ра́дꙋйсѧ, трѵ́фѡне, пресла́вный чꙋдотво́рче.
Конда́къ а҃
И҆збра́нный ᲂу҆го́дниче хрⷭ҇то́въ и҆ чꙋдотво́рче, прпⷣбне ѻ҆́ч҃е на́шъ трѵ́фѡне, ст҃остїю житїѧ̀ и҆ чꙋдесы̀ твои́ми возсїѧ́вый странѣ̀ вѧ́тстѣй, ꙗ҆́кѡ ѕвѣзда̀ бг҃освѣ́тлаѧ: похва̑льнаѧ восписꙋ́емъ тѝ, любо́вїю творѧ́щїи всечестнꙋ́ю па́мѧть твою̀: ты̀ же, ꙗ҆́кѡ ве́лїе и҆мѣ́ѧй дерзнове́нїе ко гдⷭ҇ꙋ, мл҃твами твои́ми ѿ всѧ́кихъ на́съ бѣ́дъ свободѝ зовꙋ́щихъ:
Ра́дꙋйсѧ, трѵ́фѡне, пресла́вный чꙋдотво́рче.
Моли́твы
Ѽ сщ҃е́ннаѧ главо̀, прпⷣбне ѻ҆́ч҃е на́шъ трѵ́фѡне! земны́й а҆́гг҃ле и҆ нбⷭ҇ный чл҃вѣ́че, свѣти́льниче пресвѣ́тлый, странꙋ̀ вѧ́тскꙋю ѡ҆зарѧ́ѧй чꙋдесы̀, гра́дꙋ на́шемꙋ стѣно̀ и҆ ᲂу҆твержде́нїе, бѣ́дствꙋющымъ крѣ́пкїй помо́щниче, ѡ҆би́тели твоеѧ̀ до́брый храни́телю, при́сный ѡ҆ на́съ къ бг҃ꙋ мл҃твенниче и҆ те́плый ѡ҆ дꙋша́хъ на́шихъ хода́таю! тебѣ̀, ᲂу҆го́дниче бж҃їй, неистощи́мое ѿ всебл҃га́гѡ влⷣки блгⷣти и҆ дарѡ́въ даде́сѧ сокро́вище, є҆́же цѣли́ти недꙋ́ги тѣлє́сныѧ и҆ ѿгонѧ́ти стра̑сти дꙋшє́вныѧ и҆ ѿ всѣ́хъ ѕѡ́лъ и҆збавлѧ́ти съ вѣ́рою и҆́мѧ твоѐ призыва́ющихъ. къ тебѣ̀ ᲂу҆̀бо прибѣга́емъ и҆ тебѣ̀ припа́дающе мо́лимсѧ: не пре́зри на́съ, молѧ́щихсѧ тебѣ̀ и҆ твоеѧ̀ просѧ́щихъ по́мощи, и҆зба́ви на́съ ѿ вра̑гъ ви́димыхъ и҆ неви́димыхъ, зави́стнѡ на ны̀ возстаю́щихъ и҆ ꙗ҆́ростїю ѕвѣ́рскою поглоти́ти хотѧ́щихъ, и҆змѝ на́съ неви́димымъ предста́тельствомъ твои́мъ ѿ смꙋще́нїѧ и҆ бꙋ́ри и҆ тмочи́сленныхъ скорбе́й на́шихъ, за грѣхѝ на́шѧ на́мъ прибыва́ющихъ. Ѽ преди́вный и҆ бг҃оно́сный ѻ҆́ч҃е на́шъ трѵ́фѡне! ско́рѡ потщи́сѧ на по́мощь на́шꙋ. вознесѝ бл҃гомо́щнꙋю мл҃твꙋ твою̀ ко гдⷭ҇ꙋ си́лъ, да ᲂу҆крѣпи́тъ держа́вꙋ на́шꙋ рѡссі́йскꙋю бг҃омъ храни́мꙋю, да потреби́тъ гдⷭ҇ь ѿ землѝ на́шеѧ всѧ̑ неи́стѡвыѧ крамѡ́лы, и҆ ᲂу҆тверди́тъ въ не́й безмѧте́жїе, ми́ръ и҆ бл҃гоче́стїе, да сохрани́тъ ѡ҆би́тель твою̀ ст҃ꙋ́ю, гра́дъ на́шъ и҆ всѧ̑ гра́ды и҆ вє́си страны̀ на́шеѧ ѿ гла́да и҆ гꙋби́тельства, ѿ мѧте́жа и҆ нестрое́нїѧ, ѿ запале́нїѧ и҆ бꙋ́ри, ѿ нападе́нїй вра́жїихъ и҆ ѿ тлетво́рныхъ вѣ́тръ и҆ ѿ всѧ́кагѡ ѕла̀. ᲂу҆ми́лостиви ѡ҆ на́съ бл҃гопрїѧ́тными мл҃твами твои́ми хрⷭ҇та̀ бг҃а на́шего, є҆́же и҆зба́витисѧ на́мъ ѿ грѣ̑хъ на́шихъ и҆ навѣ́тѡвъ вра́жїихъ, ꙗ҆́кѡ да застꙋпле́нїемъ твои́мъ и҆ по́мощїю въ ми́рѣ и҆ тишинѣ̀ бг҃оꙋго́днѣ здѣ̀ на землѝ поживе́мъ, и҆ въ бꙋ́дꙋщемъ вѣ́цѣ да сподо́бимсѧ ча́сти ст҃ы́хъ гдⷭ҇емъ на́шимъ і҆и҃сомъ хрⷭ҇то́мъ, є҆мꙋ́же подоба́етъ сла́ва и҆ че́сть и҆ поклоне́нїе, ны́нѣ и҆ во всѧ̑ вѣ́ки. А҆ми́нь.