Акафист собору святых преподобных Оптинских старцев

А́нгельскаго и́ноческаго жития́ все́м се́рдцем взыска́вше, вся́ мирска́я пристра́стия отверго́сте, Богому́дрии, и во объя́тия О́тча с любо́вию в оби́тель О́птину прите́кше, путе́м те́сным и приско́рбным до конца́ дне́й ва́ших ше́ствовасте. Сего́ ра́ди воспева́ем си́це:

Ра́дуйтеся, на зо́в Госпо́день ра́достно прите́кшии; ра́дуйтеся, все́м жела́нием Христу́ после́довавшии.

Ра́дуйтеся, кре́ст сво́й на ра́мо восприи́мшии; ра́дуйтеся, па́че Го́спода ничесо́же возлюби́вшии.

Ра́дуйтеся, Христа́ ра́ди всеконе́чно себе́ отве́ргшиися; ра́дуйтеся, Ца́рствия Бо́жия блаже́ннии насле́дницы.

Ра́дуйтеся, преподо́бнии отцы́ О́птинстии, благода́ти ста́рчества свети́льницы.

Разуме́вше се́рдцем и умо́м, я́ко де́лы свои́ми не оправди́тся пред Бо́гом вся́к живы́й, и при́сно содержа́ще пред очесы́ ва́шими согреше́ния своя́, то́ки сле́зныя, еди́ному Го́споду зри́мыя, источа́ти не преста́сте, покая́ние души́ Ему́ принося́ще, Его́же о́браз показа́сте на́м, взыва́ющим:

Ра́дуйтеся, грехи́ своя́ неприкрове́нны прозрева́вшии; ра́дуйтеся, да́р умиле́ния и сле́з от Го́спода прия́вшии.

Ра́дуйтеся, блаже́нство пла́ча о гресе́х позна́вшии; ра́дуйтеся, неусыпа́ющую ско́рбь о ни́х стяжа́вшии.

Ра́дуйтеся, на земли́ покая́ния пропове́дницы; ра́дуйтеся, на небеси́ ны́не Го́сподем утеша́емии.

Ра́дуйтеся, преподо́бнии отцы́ О́птинстии, благода́ти ста́рчества свети́льницы.

Иму́ще в сердца́х свои́х Боже́ственный смиренному́дрия да́р, и́стиннии ученицы́ Христа́, смири́вшаго Себе́ да́же до сме́рти Кре́стныя, ни во что́ же вмени́сте вся́ по́двиги и труды́ ва́ша. Возраста́ющим бо по́двигом, сугу́бо возраста́ше и смире́ние, ему́же дивя́щеся, глаго́лем:

Ра́дуйтеся, послуша́нию и смире́нию Спаси́телем науче́ннии; ра́дуйтеся, за смире́ние Го́сподем Сла́вы вознесе́ннии.

Ра́дуйтеся, безгне́вия и кро́тости смире́нием дости́гшии; ра́дуйтеся, смире́нием и самоукоре́нием поко́й душа́м обре́тшии.

Ра́дуйтеся, нището́ю духо́вною обогати́вшиися избра́нницы; ра́дуйтеся, ва́ше бо е́сть Ца́рствие Небе́сное, ни́щим ду́хом угото́ванное.

Ра́дуйтеся, преподо́бнии отцы́ О́птинстии, благода́ти ста́рчества свети́льницы.

Слы́шавше глаго́л Госпо́день, я́ко Ца́рствие Небе́сное ну́дится и то́кмо ну́ждницы восхища́ют е́, посто́м, бде́нием и моли́твою непреста́нно подвиза́стеся и пло́ть свою́ со страстьми́ и похотьми́ Христо́ви распя́сте, уста́вы и́ноческия неруши́мо соблю́дше. Те́мже ублажа́ем вы́:

Ра́дуйтеся, благо́е и́го Христо́во люботру́дно поне́сшии; ра́дуйтеся, трезве́нием серде́чным ду́ха не угаси́вшии.

Ра́дуйтеся, кре́пкое хране́ние усто́м свои́м полага́вшии; ра́дуйтеся, телеса́ своя́ неща́дно утесня́вшии.

Ра́дуйтеся, с теле́сными по́двиги у́мное де́лание сочета́вшии; ра́дуйтеся, в терпе́нии ва́шем ду́ши ва́ша стяжа́вшии.

Ра́дуйтеся, преподо́бнии отцы́ О́птинстии, благода́ти ста́рчества свети́льницы.

Прозрева́юще всеча́сно не́мощь свою́ и спаси́тельную, благода́тную си́лу моли́твы Иису́совы, николи́же преста́сте твори́ти ю́, страсте́й прило́ги то́ю посека́юще и вся́ ко́зни вра́жия попаля́юще, в безмо́лвии се́рдца моли́твенное собесе́дование с Го́сподем та́инственно обре́тше, на́с науча́ете взыва́ти ва́м:

Ра́дуйтеся, ве́сь у́м сво́й в моли́тву погрузи́вшии; ра́дуйтеся, всеце́ло горе́ сердца́ своя́ име́вшии.

Ра́дуйтеся, на моли́тве ни о че́мже су́етнем помышля́вшии; ра́дуйтеся, и́мя Иису́сово неусы́пно призыва́вшии.

Ра́дуйтеся, моли́твы серде́чныя изря́днии подви́жницы; ра́дуйтеся, вся́ проси́мая во и́мя Госпо́дне получа́вшии моли́твенницы.

Ра́дуйтеся, преподо́бнии отцы́ О́птинстии, благода́ти ста́рчества свети́льницы.

Возсия́вшу в сердца́х ва́ших све́ту любве́ Боже́ственныя, сла́ву земну́ю и похвалы́ возненави́десте и омерзи́сте, безче́стие же от челове́ков и вся́кия ско́рби отве́рстым се́рдцем ра́достно прие́млюще, поноше́нию Христо́ву усе́рдно приобщи́стеся. На́м у́бо о́браз злострада́ния и терпе́ния показа́сте, зову́щим:

Ра́дуйтеся, я́звы Го́спода Иису́са Христа́ на телеси́ свое́м носи́вшии; ра́дуйтеся, поруга́ния, я́ко врачевство́ чисти́тельное, усе́рдно пи́вшии.

Ра́дуйтеся, от по́честей земны́х все́м се́рдцем отврати́вшиися; ра́дуйтеся, за ненави́дящих ва́с с любо́вию моли́вшиися.

Ра́дуйтеся, оби́дящих ва́с, я́ко благоде́телей, возлюби́вшии; ра́дуйтеся, благодари́ти Милосе́рдаго Го́спода николи́же преста́вшии.

Ра́дуйтеся, преподо́бнии отцы́ О́птинстии, благода́ти ста́рчества свети́льницы.

Ди́вна дела́ Твоя́, Го́споди, я́ко па́че кни́жник вразумля́еши рабо́в Твои́х, все́м се́рдцем взыску́ющих Тя́, и открыва́еши о́чи и́х, да уразуме́ют чудеса́ от зако́на Твоего́. Блажи́м бо преподо́бных Твои́х, отце́в на́ших О́птинских, при́сно поуча́вшихся в за́поведех Твои́х, я́же возлюби́ша зело́, и пое́м и́м:

Ра́дуйтеся, словеса́ Бо́жия, я́ко бога́тство мно́го, в се́рдце сокры́вшии; ра́дуйтеся, путие́ за́поведей Бо́жиих все́м се́рдцем возлюби́вшии.

Ра́дуйтеся, вся́к пу́ть непра́вды омерзи́вшии; ра́дуйтеся, от пути́ Госпо́дня николи́же отступи́вшии.

Ра́дуйтеся, в до́брем по́двизе угото́вившиися и не смути́вшиися; ра́дуйтеся, сло́во Бо́жие вмести́вше, ми́р мно́г во Христе́ обре́тшии.

Ра́дуйтеся, преподо́бнии отцы́ О́птинстии, благода́ти ста́рчества свети́льницы.

Вся́кое плотско́е пристра́стие, от любве́ Госпо́дни отлуча́ющее, вседу́шно отверго́сте, еди́ное на потре́бу взыску́юще. Всегда́ у́бо при ногу́ Иису́сову неотторже́нною приседе́сте любо́вию, ко бла́гом жите́йским сердца́ не прилага́юще и все́ упова́ние свое́ на Го́спода возложи́вше. Те́мже похваля́ем ва́с, святи́и:

Ра́дуйтеся, без пристра́стия к ми́ру житие́ свое́ сконча́вшии; ра́дуйтеся, от земны́х забо́т свобо́ждшеся, сла́дость чи́стыя моли́твы позна́вшии.

Ра́дуйтеся, тве́рдою ве́рою попече́ния жите́йская отложи́вшии; ра́дуйтеся, нестяжа́нием и послуша́нием па́губныя стра́сти умертви́вшии.

Ра́дуйтеся, и́ноческий обе́т нестяжа́ния свя́то соблю́дшии; ра́дуйтеся, во́лю свою́ отсе́кшии Христо́вы послу́шницы.

Ра́дуйтеся, преподо́бнии отцы́ О́птинстии, благода́ти ста́рчества свети́льницы.

Вою́ющии на ду́шу плотска́я вожделе́ния посто́м и моли́твою укроща́юще, по́мыслом грехо́вным возоблада́ти ва́ми не попуска́ете, от Го́спода Бо́га, еди́наго вла́сть иму́щаго побежда́ти естества́ чи́н, да́р чистоты́ и целому́дрия прия́сте. Приими́те у́бо и от на́с хвале́ния такова́я:

Ра́дуйтеся, благода́ть Бо́жию в борьбе́ с пло́тию смире́нием привле́кшии; ра́дуйтеся, труды́ и лише́ния возлюби́вше, поко́й теле́сный отри́нувшии.

Ра́дуйтеся, посто́м и всено́щными моле́ньми по́хоть пло́ти умертви́вшии; ра́дуйтеся, естества́ уста́вы си́лою Христо́вою победи́вшии.

Ра́дуйтеся, телеса́ и ду́ши ва́ша чи́сты Го́сподеви прине́сшии; ра́дуйтеся, чи́стии се́рдцем, Бо́га в ве́чнем блаже́нстве зря́щии.

Ра́дуйтеся, преподо́бнии отцы́ О́птинстии, благода́ти ста́рчества свети́льницы.

Возлюби́вше все́ю душе́ю бли́жняго своего́, Ца́рствие Бо́жие вну́трь себе́ обрето́сте, те́мже сни́де в сердца́ ва́ша о́гнь попаля́яй любве́ Бо́жия, е́юже необыме́нно насыща́ющеся, всеце́ло себе́ в же́ртву дело́м любве́ принесо́сте. Ны́не же и от на́с благогове́йное пе́ние сие́ слы́шите:

Ра́дуйтеся, все́х челове́ков свято́ю любо́вию возлюби́вшии; ра́дуйтеся, во е́же не́кия спасти́, все́м вся́ бы́вшии.

Ра́дуйтеся, о го́рестех людски́х сле́зно воздыха́вшии; ра́дуйтеся, все́х притека́ющих в сердца́х свои́х вмеща́вшии.

Ра́дуйтеся, тща́ от себе́ никого́же отпуска́вшии; ра́дуйтеся, ду́ши ва́ша за бли́жних полага́вшии.

Ра́дуйтеся, преподо́бнии отцы́ О́птинстии, благода́ти ста́рчества свети́льницы.

Све́тлыя по́двиги ва́ша похваля́юще, преподо́бнии отцы́ на́ши О́птинстии, ублажа́ем ва́с, я́ко сла́вных наста́вников мона́хов и чу́дных собесе́дников А́нгелов ны́не на небеси́ Престо́лу Бо́жию предстоя́щих и моля́щихся о на́с, с любо́вию пою́щих ва́м:

Ра́дуйтеся, трезве́ния непреста́ннаго усе́рднии ревни́телие; ра́дуйтеся, пла́мени серде́чнаго неусы́пнии храни́телие.

Ра́дуйтеся, непоколеби́мии столпи́ послуша́ния, вся́ претерпе́вшии; ра́дуйтеся, мно́гими скорбьми́ в Ца́рствие Бо́жие вше́дшии.

Ра́дуйтеся, и́ноческаго жития́ равноа́нгельнии подви́жницы; ра́дуйтеся, до́брии раби́ Бо́жии, блази́и и ве́рнии.

Ра́дуйтеся, преподо́бнии отцы́ О́птинстии, благода́ти ста́рчества свети́льницы.

Пою́ще ны́не ва́с, о преподо́бнии, хвале́бными гла́сы, ве́мы, я́ко не пе́ния усте́н взыску́ете, но по́двигом ва́шим после́дования, смире́ния серде́чнаго и жития́ исправле́ния. Те́мже в покая́нии по́мощи ва́шея прося́ще, любо́вию же подвиза́еми, глаго́лем:

Ра́дуйтеся, до́бре жи́тельствующих огражда́ющии; ра́дуйтеся, немощны́х и си́рых укрепля́ющии.

Ра́дуйтеся, па́дающим ру́ку по́мощи простира́ющии; ра́дуйтеся, ка́ющимся сле́зы уте́шительныя низпосыла́ющии.

Ра́дуйтеся, все́м призыва́ющим ва́с ско́рии помо́щницы; ра́дуйтеся, спасе́ния на́шего пред Бо́гом те́плии хода́таи.

Ра́дуйтеся, преподо́бнии отцы́ О́птинстии, благода́ти ста́рчества свети́льницы.

А҆́гг҃льскагѡ и҆́ноческагѡ житїѧ̀ всѣ́мъ се́рдцемъ взыска́вше, всѧ̑ мїрска̑ѧ пристра̑стїѧ ѿверго́сте, бг҃омꙋ́дрїи, и҆ во ѡ҆б̾ѧ̑тїѧ ѻ҆́ч҃а съ любо́вїю въ ѡ҆би́тель ѻ҆́птинꙋ прите́кше, пꙋте́мъ те́снымъ и҆ приско́рбнымъ до конца̀ дне́й ва́шихъ ше́ствовасте. сегѡ̀ ра́ди воспѣва́емъ си́це:

Ра́дꙋйтесѧ, на зо́въ гдⷭ҇ень ра́достнѡ прите́кшїи: ра́дꙋйтесѧ, всѣ́мъ жела́нїемъ хрⷭ҇тꙋ̀ послѣ́довавшїи.

Ра́дꙋйтесѧ, крⷭ҇тъ сво́й на ра́мо воспрїи́мшїи: ра́дꙋйтесѧ, па́че гдⷭ҇а ничесо́же возлюби́вшїи.

Ра́дꙋйтесѧ, хрⷭ҇та̀ ра́ди всеконе́чнѡ себѐ ѿве́ргшїисѧ: ра́дꙋйтесѧ, црⷭ҇твїѧ бж҃їѧ бл҃же́ннїи наслѣ́дницы.

Ра́дꙋйтесѧ, прпⷣбнїи ѻ҆ц҃ы̀ ѻ҆́птинстїи, блгⷣти ста́рчества свѣти́льницы.

Разꙋмѣ́вше се́рдцемъ и҆ ᲂу҆мо́мъ, ꙗ҆́кѡ дѣ́лы свои́ми не ѡ҆правди́тсѧ пред̾ бг҃омъ всѧ́къ живы́й, и҆ при́снѡ содержа́ще пред̾ ѻ҆чесы̀ ва́шими согрѣшє́нїѧ своѧ̑, то́ки слє́зныѧ, є҆ди́номꙋ гдⷭ҇ꙋ зри̑мыѧ, и҆сточа́ти не преста́сте, покаѧ́нїе дꙋшѝ є҆мꙋ̀ приносѧ́ще, є҆го́же ѡ҆́бразъ показа́сте на́мъ взыва́ющымъ:

Ра́дꙋйтесѧ, грѣхѝ своѧ̑ неприкровє́нны прозрѣва́вшїи: ра́дꙋйтесѧ, да́ръ ᲂу҆миле́нїѧ и҆ сле́зъ ѿ гдⷭ҇а прїѧ́вшїи.

Ра́дꙋйтесѧ, бл҃же́нство пла́ча ѡ҆ грѣсѣ́хъ позна́вшїи: ра́дꙋйтесѧ, неꙋсыпа́ющꙋю ско́рбь ѡ҆ ни́хъ стѧжа́вшїи.

Ра́дꙋйтесѧ, на землѝ покаѧ́нїѧ проповѣ́дницы: ра́дꙋйтесѧ, на нб҃сѝ ны́нѣ гдⷭ҇емъ ᲂу҆тѣша́емїи.

Ра́дꙋйтесѧ, прпⷣбнїи ѻ҆ц҃ы̀ ѻ҆́птинстїи, блгⷣти ста́рчества свѣти́льницы.

И҆мꙋ́ще въ сердца́хъ свои́хъ бж҃е́ственный смиренномꙋ́дрїѧ да́ръ, и҆́стиннїи ᲂу҆ченицы̀ хрⷭ҇та̀, смири́вшагѡ себѐ да́же до сме́рти крⷭ҇тныѧ, ни во что́ же вмѣни́сте всѧ̑ по́двиги и҆ трꙋды̀ ва́шѧ. возраста́ющымъ бо по́двигѡмъ, сꙋгꙋ́бѡ возраста́ше и҆ смире́нїе, є҆мꙋ́же дивѧ́щесѧ, глаго́лемъ:

Ра́дꙋйтесѧ, послꙋша́нїю и҆ смире́нїю сп҃си́телемъ наꙋче́ннїи: ра́дꙋйтесѧ, за смире́нїе гдⷭ҇емъ сла́вы вознесе́ннїи.

Ра́дꙋйтесѧ, безгнѣ́вїѧ и҆ кро́тости смире́нїемъ дости́гшїи: ра́дꙋйтесѧ, смире́нїемъ и҆ самоꙋкоре́нїемъ поко́й дꙋша́мъ ѡ҆брѣ́тшїи.

Ра́дꙋйтесѧ, нището́ю дꙋхо́вною ѡ҆богати́вшїисѧ и҆збра́нницы: ра́дꙋйтесѧ, ва́ше бо є҆́сть црⷭ҇твїе нбⷭ҇ное, ни́щымъ дх҃омъ ᲂу҆гото́ванное.

Ра́дꙋйтесѧ, прпⷣбнїи ѻ҆ц҃ы̀ ѻ҆́птинстїи, блгⷣти ста́рчества свѣти́льницы.

Слы́шавше глаго́лъ гдⷭ҇ень, ꙗ҆́кѡ црⷭ҇твїе нбⷭ҇ное нꙋ́дитсѧ и҆ то́кмѡ нꙋ́ждницы восхища́ютъ є҆̀, посто́мъ, бдѣ́нїемъ и҆ мл҃твою непреста́ннѡ подвиза́стесѧ и҆ пло́ть свою̀ со страстьмѝ и҆ похотьмѝ хрⷭ҇то́ви распѧ́сте, ᲂу҆ста́вы и҆́ночєскїѧ нерꙋши́мѡ соблю́дше. тѣ́мже ᲂу҆блажа́емъ вы̀:

Ра́дꙋйтесѧ, бл҃го́е и҆́го хрⷭ҇то́во люботрꙋ́днѡ поне́сшїи: ра́дꙋйтесѧ, трезве́нїемъ серде́чнымъ дх҃а не ᲂу҆гаси́вшїи.

Ра́дꙋйтесѧ, крѣ́пкое хране́нїе ᲂу҆стѡ́мъ свои̑мъ полага́вшїи: ра́дꙋйтесѧ, тѣлеса̀ своѧ̑ неща́днѡ ᲂу҆тѣснѧ́вшїи.

Ра́дꙋйтесѧ, съ тѣле́сными по́двиги ᲂу҆́мное дѣ́ланїе сочета́вшїи: ра́дꙋйтесѧ, въ терпѣ́нїи ва́шемъ дꙋ́шы ва́шѧ стѧжа́вшїи.

Ра́дꙋйтесѧ, прпⷣбнїи ѻ҆ц҃ы̀ ѻ҆́птинстїи, блгⷣти ста́рчества свѣти́льницы.

Прозрѣва́юще всеча́снѡ не́мощь свою̀ и҆ сп҃си́тельнꙋю, бл҃года́тнꙋю си́лꙋ мл҃твы і҆и҃совы, николи́же преста́сте твори́ти ю҆̀, страсте́й прило́ги то́ю посѣка́юще и҆ всѧ̑ кѡ́зни вра̑жїѧ попалѧ́юще. въ безмо́лвїи се́рдца мл҃твенное собесѣ́дованїе съ гдⷭ҇емъ та́инственнѡ ѡ҆брѣ́тше, на́съ наꙋча́ете взыва́ти ва́мъ:

Ра́дꙋйтесѧ, ве́сь ᲂу҆́мъ сво́й въ мл҃твꙋ погрꙋзи́вшїи: ра́дꙋйтесѧ, всецѣ́лѡ горѣ̀ сердца̀ своѧ̑ и҆мѣ́вшїи.

Ра́дꙋйтесѧ, на мл҃твѣ ни ѡ҆ че́мже сꙋ́етнѣмъ помышлѧ́вшїи: ра́дꙋйтесѧ, и҆́мѧ і҆и҃сово неꙋсы́пнѡ призыва́вшїи.

Ра́дꙋйтесѧ, мл҃твы серде́чныѧ и҆зрѧ́днїи подви́жницы: ра́дꙋйтесѧ, всѧ̑ проси̑маѧ во и҆́мѧ гдⷭ҇не полꙋча́вшїи мл҃твенницы.

Ра́дꙋйтесѧ, прпⷣбнїи ѻ҆ц҃ы̀ ѻ҆́птинстїи, блгⷣти ста́рчества свѣти́льницы.

Возсїѧ́вшꙋ въ срⷣца́хъ ва́шихъ свѣ́тꙋ любвѐ бж҃е́ственныѧ, сла́вꙋ земнꙋ́ю и҆ похвалы̑ возненави́дѣсте и҆ ѡ҆мерзи́сте, безче́стїе же ѿ человѣ́кѡвъ и҆ всѧ̑кїѧ скѡ́рби ѿве́рстымъ срⷣцемъ ра́достнѡ прїе́млюще, поноше́нїю хрⷭ҇то́вꙋ ᲂу҆се́рднѡ прїѻбщи́стесѧ. на́мъ ᲂу҆́бѡ ѡ҆́бразъ ѕлострада́нїѧ и҆ терпѣ́нїѧ показа́сте, зовꙋ́щымъ:

Ра́дꙋйтесѧ, ꙗ҆́звы гдⷭ҇а і҆и҃са хрⷭ҇та̀ на тѣлесѝ свое́мъ носи́вшїи: ра́дꙋйтесѧ, порꙋга̑нїѧ, ꙗ҆́кѡ врачевство̀ чисти́тельное, ᲂу҆се́рднѡ пи́вшїи.

Ра́дꙋйтесѧ, ѿ по́честей земны́хъ всѣ́мъ срⷣцемъ ѿврати́вшїисѧ: ра́дꙋйтесѧ, за ненави́дѧщихъ ва́съ съ любо́вїю моли́вшїисѧ.

Ра́дꙋйтесѧ, ѡ҆би́дѧщихъ ва́съ, ꙗ҆́кѡ бл҃годѣ́телей возлюби́вшїи: ра́дꙋйтесѧ, бл҃годари́ти милосе́рдаго гдⷭ҇а николи́же преста́вшїи.

Ра́дꙋйтесѧ, прпⷣбнїи ѻ҆ц҃ы̀ ѻ҆́птинстїи, блгⷣти ста́рчества свѣти́льницы.

Ди̑вна дѣла̀ твоѧ̑, гдⷭ҇и, ꙗ҆́кѡ па́че кни̑жникъ вразꙋмлѧ́еши рабѡ́въ твои́хъ, всѣ́мъ срⷣцемъ взыскꙋ́ющихъ тѧ̀, и҆ ѿкрыва́еши ѻ҆́чи и҆́хъ, да ᲂу҆разꙋмѣ́ютъ чꙋдеса̀ ѿ зако́на твоегѡ̀. блажи́мъ бо прпⷣбныхъ твои́хъ, ѻ҆ц҃є́въ на́шихъ ѻ҆́птинскихъ, при́снѡ поꙋча́вшихсѧ въ за́повѣдехъ твои́хъ, ꙗ҆̀же возлюби́ша ѕѣлѡ̀, и҆ пое́мъ и҆̀мъ:

Ра́дꙋйтесѧ, словеса̀ бж҃їѧ, ꙗ҆́кѡ бога́тство мно́го въ срⷣцѣ сокры́вшїи: ра́дꙋйтесѧ, пꙋтїѐ за́повѣдей бж҃їихъ всѣ́мъ срⷣцемъ возлюби́вшїи.

Ра́дꙋйтесѧ, всѧ́къ пꙋ́ть непра́вды ѡ҆мерзи́вшїи: ра́дꙋйтесѧ, ѿ пꙋтѝ гдⷭ҇нѧ николи́же ѿстꙋпи́вшїи.

Ра́дꙋйтесѧ, въ до́брѣмъ по́двизѣ ᲂу҆гото́вившїисѧ и҆ не смꙋти́вшїисѧ: ра́дꙋйтесѧ, сло́во бж҃їе вмѣсти́вше, ми́ръ мно́гъ во хрⷭ҇тѣ̀ ѡ҆брѣ́тшїи.

Ра́дꙋйтесѧ, прпⷣбнїи ѻ҆ц҃ы̀ ѻ҆́птинстїи, блгⷣти ста́рчества свѣти́льницы.

Всѧ́кое плотско́е пристра́стїе, ѿ любвѐ гдⷭ҇ни ѿлꙋча́ющее, вседꙋ́шнѡ ѿверго́сте, є҆ди́ное на потре́бꙋ взыскꙋ́юще. всегда̀ ᲂу҆́бѡ при ногꙋ̀ і҆и҃совꙋ неѿторже́нною присѣде́сте любо́вїю, ко бла́гѡмъ житє́йскимъ сердца̀ не прилага́юще и҆ всѐ ᲂу҆пова́нїе своѐ на гдⷭ҇а возложи́вше. тѣ́мже похвалѧ́емъ ва́съ ст҃і́и:

Ра́дꙋйтесѧ, без̾ пристра́стїѧ къ мі́рꙋ житїѐ своѐ сконча́вшїи: ра́дꙋйтесѧ, ѿ земны́хъ забо́тъ свобо́ждшесѧ, сла́дость чи́стыѧ мл҃твы позна́вшїи.

Ра́дꙋйтесѧ, тве́рдою вѣ́рою попечє́нїѧ житє́йскаѧ ѿложи́вшїи: ра́дꙋйтесѧ, нестѧжа́нїемъ и҆ послꙋша́нїемъ па̑гꙋбныѧ стра̑сти ᲂу҆мертви́вшїи.

Ра́дꙋйтесѧ, и҆́ноческїй ѡ҆бѣ́тъ нестѧжа́нїѧ свѧ́тѡ соблю́дшїи: ра́дꙋйтесѧ, во́лю свою̀ ѿсѣ́кшїи хрⷭ҇то́вы послꙋ́шницы.

Ра́дꙋйтесѧ, прпⷣбнїи ѻ҆ц҃ы̀ ѻ҆́птинстїи, блгⷣти ста́рчества свѣти́льницы.

Вою̑ющїи на дꙋ́шꙋ плотска̑ѧ вождєлѣ́нїѧ посто́мъ и҆ мл҃твою ᲂу҆кроща́юще, по́мыслѡмъ грѣхѡ́внымъ возѡблада́ти ва́ми не попꙋска́ете, ѿ гдⷭ҇а бг҃а, є҆ди́нагѡ вла́сть и҆мꙋ́щагѡ побѣжда́ти є҆стества̀ чи́нъ, да́ръ чистоты̀ и҆ цѣломꙋ́дрїѧ прїѧ́сте. прїими́те ᲂу҆́бѡ и҆ ѿ на́съ хвалє́нїѧ такѡва́ѧ:

Ра́дꙋйтесѧ, блгⷣть бж҃їю въ борьбѣ̀ съ пло́тїю смире́нїемъ привле́кшїи: ра́дꙋйтесѧ, трꙋды̀ и҆ лишє́нїѧ возлюби́вше, поко́й тѣле́сный ѿри́нꙋвшїи.

Ра́дꙋйтесѧ, посто́мъ и҆ всено́щными моле́ньми по́хоть пло́ти ᲂу҆мертви́вшїи: ра́дꙋйтесѧ, є҆стества̀ ᲂу҆ста́вы си́лою хрⷭ҇то́вою побѣди́вшїи.

Ра́дꙋйтесѧ, тѣлеса̀ и҆ дꙋ́шы ва́шѧ чи̑сты гдⷭ҇еви прине́сшїи: ра́дꙋйтесѧ, чи́стїи срⷣцемъ, бг҃а въ вѣ́чнѣмъ бл҃же́нствѣ зрѧ́щїи.

Ра́дꙋйтесѧ, прпⷣбнїи ѻ҆ц҃ы̀ ѻ҆́птинстїи, блгⷣти ста́рчества свѣти́льницы.

Возлюби́вше все́ю дꙋше́ю бли́жнѧго своего̀, црⷭ҇твїе бж҃їе внꙋ́трь себѐ ѡ҆брѣто́сте, тѣ́мже сни́де въ срⷣца̀ ва́шѧ ѻ҆́гнь попалѧ́ѧй любвѐ бж҃їѧ, є҆́юже неѡбыме́ннѡ насыща́ющесѧ, всецѣ́лѡ себѐ въ же́ртвꙋ дѣлѡ́мъ любвѐ принесо́сте. ны́нѣ же и҆ ѿ на́съ бл҃гоговѣ́йное пѣ́нїе сїѐ слы́шите:

Ра́дꙋйтесѧ, всѣ́хъ человѣ́кѡвъ ст҃о́ю любо́вїю возлюби́вшїи: ра́дꙋйтесѧ, во є҆́же нѣ̑кїѧ спастѝ всѣ̑мъ всѧ̑ бы́вшїи.

Ра́дꙋйтесѧ, ѡ҆ го́рестехъ людски́хъ сле́знѡ воздыха́вшїи: ра́дꙋйтесѧ, всѣ́хъ притека́ющихъ въ срⷣца́хъ свои́хъ вмѣща́вшїи.

Ра́дꙋйтесѧ, тща̀ ѿ себѐ никого́же ѿпꙋска́вшїи: ра́дꙋйтесѧ, дꙋ́шы ва́шѧ за бли́жнихъ полага́вшїи.

Ра́дꙋйтесѧ, прпⷣбнїи ѻ҆ц҃ы̀ ѻ҆́птинстїи, блгⷣти ста́рчества свѣти́льницы.

Свѣ̑тлыѧ по́двиги ва́шѧ похвалѧ́юще, прпⷣбнїи ѻ҆ц҃ы̀ на́ши ѻ҆́птинстїи, ᲂу҆блажа́емъ ва́съ, ꙗ҆́кѡ сла́вныхъ наста́вникѡвъ мона́хѡвъ и҆ чꙋ́дныхъ собесѣ́дникѡвъ а҆́гг҃лѡвъ, ны́нѣ на нб҃сѝ прⷭ҇то́лꙋ бж҃їю предстоѧ́щихъ и҆ молѧ́щихсѧ ѡ҆ на́съ, съ любо́вїю пою́щихъ ва́мъ:

Ра́дꙋйтесѧ, трезве́нїѧ непреста́ннагѡ ᲂу҆се́рднїи ревни́телїе: ра́дꙋйтесѧ, пла́мени серде́чнагѡ неꙋсы́пнїи храни́телїе.

Ра́дꙋйтесѧ, непоколеби́мїи столпѝ послꙋша́нїѧ, всѧ̑ претерпѣ́вшїи: ра́дꙋйтесѧ, мно́гими скорбьмѝ въ црⷭ҇твїе бж҃їе вше́дшїи.

Ра́дꙋйтесѧ, и҆́ноческагѡ житїѧ̀ равноа́гг҃льнїи подви́жницы: ра́дꙋйтесѧ, до́брїи рабѝ бж҃їи, блазі́и и҆ вѣ́рнїи.

Ра́дꙋйтесѧ, прпⷣбнїи ѻ҆ц҃ы̀ ѻ҆́птинстїи, блгⷣти ста́рчества свѣти́льницы.

Пою́ще ны́нѣ ва́съ, ѽ прпⷣбнїи, хвале́бными гла́сы, вѣ́мы, ꙗ҆́кѡ не пѣ́нїѧ ᲂу҆сте́нъ взыскꙋ́ете, но по́двигѡмъ ва́шымъ послѣ́дованїѧ, смире́нїѧ серде́чнагѡ и҆ житїѧ̀ и҆справле́нїѧ. тѣ́мже въ покаѧ́нїи по́мощи ва́шеѧ просѧ́ще, любо́вїю же подвиза́еми, глаго́лемъ:

Ра́дꙋйтесѧ, до́брѣ жи́тельствꙋющихъ ѡ҆гражда́ющїи: ра́дꙋйтесѧ, немощны́хъ и҆ си́рыхъ ᲂу҆крѣплѧ́ющїй.

Ра́дꙋйтесѧ, па́дающымъ рꙋ́кꙋ по́мощи простира́ющїи: ра́дꙋйтесѧ, ка́ющымсѧ сле́зы ᲂу҆тѣ́шительныѧ низпосыла́ющїи.

Ра́дꙋйтесѧ, всѣ̑мъ призыва́ющымъ ва́съ ско́рїи помо́щницы: ра́дꙋйтесѧ, сп҃се́нїѧ на́шегѡ пред̾ бг҃омъ те́плїи хода́таи.

Ра́дꙋйтесѧ, прпⷣбнїи ѻ҆ц҃ы̀ ѻ҆́птинстїи, блгⷣти ста́рчества свѣти́льницы.