Канон святому преподобному Льву Оптинскому

Ра́зум да́ждь на́м, Всеси́льне Го́споди, досто́йно воспе́ти уго́дника Твоего́, Льва́ прему́драго, ста́рца О́птинскаго, чистоты́ и милосе́рдия ева́нгельскаго испо́лненнаго и ду́хом прему́дрости све́тло укра́шеннаго.

А́нгельски на земли́ пожи́в, преподо́бне, и, служе́ние ста́рческое, я́ко кре́ст, благопослу́шне от Го́спода прии́м, му́дрый наста́вник мно́гим и́ноком и миря́ном яви́лся еси́.

Ду́хом Бо́жиим наставля́емь, та́йну челове́ческаго се́рдца проразумева́л еси́, смиренному́дрый уго́дниче о́тче Льве́, те́мже и мно́гия лю́ди к Небе́сному Ца́рствию приве́л еси́.

И́стину ева́нгельскую возлюби́в и ку́плю жите́йскую оста́вив, к мона́шескому житию́ устреми́лся еси́, преподо́бне, нищету́ духо́вную стяжа́в и му́жественне греху́ противоста́в, горды́ню злоко́зненнаго врага́ посрами́л еси́.

Свою́ во́лю нивочто́же вменя́я, о́тче преподо́бне, пустыннолю́бцу Фео́дору после́довал еси́ и, сла́дость послуша́ния и поко́й безмо́лвия вкуси́в, страсте́й треволне́ние, богоблаже́нне, укроти́л еси́.

Я́ко сы́н послуша́ния и учени́к добронра́вный, богому́дре Льве́, преда́ние оте́ческое насле́довал еси́, его́же преподо́бный Паи́сий, я́ко боже́ственныя кла́сы собра́.

Все́м приходя́щим к тебе́ наста́вник му́дрый яви́лся еси́, о́тче Льве́, и просла́вися житие́ твое́, умертви́в бо мудрова́ния плотска́я, глуби́ны ве́дения, широты́ любве́ и высоты́ смире́ния дости́гл еси́.

Егда́ к Бо́гу любо́вию возгоре́лся еси́ и усе́рдно Тому́ послужи́ти восхоте́л еси́, тогда́, я́ко зе́млю и пе́пел себе́ вменя́я, в пусты́ню безмо́лвия удали́лся еси́, о́тче преподо́бне.

Свети́льник све́тел в пусты́ни яви́вся, мра́к бесо́вский дале́че прогна́л еси́, моли́тву же непреста́нную в се́рдце, я́ко ме́чь в руце́, име́я, де́монов зло́бу посрами́л еси́.

А́нгельскаго жития́ взыску́я, на стезю́ и́ночества невозвра́тным по́мыслом ступи́л еси́ и, му́дрость отце́в преподо́бных стяжа́в, наста́вник и уте́шитель мно́гим яви́лся еси́, богоблаже́нне.

Ра́достно дне́сь сла́вит оби́тель Валаа́мская по́стническия труды́ твоя́, о́тче Льве́, зде́ бо и́ноческия по́двиги со преподо́бным Фео́дором подъя́л еси́, и ны́не с ни́м на Небеси́ ку́пно ра́дуешися.

Чистоту́ се́рдца и у́м све́тел стяжа́л еси́, о́тче, де́лы благи́ми и чудесы́, я́ко свети́льник многосве́тлый, сия́я, и пре́лести тьму́ богодарова́нным ти́ разсужде́нием изобличи́л еси́.

Ели́цы ку́пли ра́ди духо́вныя к тебе́ прихожда́ху, зла́том смиренному́дрия обогаща́хуся, те́мже и на́шу нищету́ уще́дри, о́тче Льве́, ева́нгельских доброде́телей вели́кое сокро́вище стяжа́вый.

Те́сным путе́м ше́ствуя, житие́ богоуго́дне испра́вил еси́, преподо́бне, в О́птину же пу́стынь всели́вся, духо́вный вертогра́д устро́ил еси́.

Ве́лиих искуше́ний пучи́ну преплы́в, би́сер у́мныя моли́твы, я́ко до́бр купе́ц, обре́л еси́ и пу́стынь О́птинскую, я́ко духо́вную сокро́вищницу, зла́том оте́ческаго преда́ния обогати́л еси́, о́тче Льве́.

Адама́нт тве́рд в терпе́нии искуше́ний де́монских, на тя́ воздвиза́емых, яви́лся еси́, преподо́бне, те́мже боле́зни и труды́, ско́рби и гоне́ния, я́ко И́ов, кро́тко претерпе́л еси́, на Бо́га упова́я.

Оте́ческою любо́вию в боле́знех и ско́рбех су́щих покрыва́л еси́ и му́чимых от духо́в нечи́стых исцеля́л еси́ си́лою на тебе́ почи́вшаго Всесвята́го Ду́ха.

Послушли́в и рачи́телен, я́ко пчела́ боже́ственная, бы́в, некта́р духо́вный собра́л еси́, богому́дре Льве́, и́мже ча́да церко́вная и мона́шествующих собо́ры препита́л еси́.

Иску́с подъя́л еси́, богому́дре Льве́, жития́ по́стническаго и взыску́ющим о́наго и́стинный путево́ждь яви́лся еси́, наставля́я и́х взыва́ти: благослове́н еси́, Бо́же оте́ц на́ших.

Неду́зи врачу́ются и де́мони отбега́ют моли́твами твои́ми, о́тче Льве́, те́мже мно́зии с ве́рою к ра́це моще́й твои́х притека́ют и благода́рне вопию́т: благослове́н еси́, Бо́же оте́ц на́ших.

Собо́р О́птинский тобо́ю хва́лится, преподо́бне, ты́ бо, я́ко ка́мень непоколеби́м во искуше́ниих пребыва́я, на Ка́мени ве́ры утвержда́тися науча́л еси́, взыва́я: благослове́н еси́, Бо́же оте́ц на́ших.

К тебе́, преподо́бне, притека́ют ве́рнии, я́ко любве́ Христо́вы испо́лнен бы́в, оте́ц сиро́т и вдова́м засту́пник, ни́щим пита́тель и наста́вник заблу́ждшим яви́лся еси́, пою́щим: благослове́н еси́, Бо́же оте́ц на́ших.

А́ще и мно́гия ско́рби терпе́л еси́, оба́че не оста́вил еси́ прибега́ющих к тебе́, глаго́ля: а́ще и в изгна́ние пойду́, или́ во о́гнь, а́з бу́ду то́йже, взыва́яй: благослове́н еси́, Бо́же оте́ц на́ших.

О́птинский ски́т, я́коже ра́йский са́д, возде́лал еси́, в не́мже ученики́ твоя́ взрасти́л еси́, и́же благода́тне процвето́ша и зе́млю Ру́сскую арома́ты моли́твенными облагоуха́ша.

Гоне́ния благоду́шне претерпе́л еси́, я́же лука́вый за́вистию воздви́же на тя́ оглаго́ланием от челове́к, за оби́дящих и претя́щих ти́ кро́тко моли́лся еси́, о́тче Льве́ преподо́бне, в незло́бии Христу́ подража́я.

Ле́сть обличи́л еси́, богому́дре, и, пре́лести тьму́ потреби́в, ду́ши от пле́на бесо́вскаго изба́вил еси́, те́мже и исцеле́ния пода́ждь к ра́це моще́й твои́х притека́ющим и превознося́щим Христа́ во вся́ ве́ки.

В зе́млю кро́тких всели́лся еси́, незло́бив сы́й, и, доброде́тельми преукра́шен, с Вы́шними лику́еши, те́мже спаса́й на́с предста́тельством твои́м, о́тче богохва́льне.

Источа́ет благово́ния, я́ко кри́н, ра́ка честны́х моще́й твои́х, вразумля́ющи ве́рныя благоуха́ние ра́йскаго селе́ния взыска́ти, о́тче Льве́ достосла́вне.

Заре́ю Ду́ха облиста́емь, в пусты́ни О́птинстей све́тло просия́л еси́, о́тче преподо́бне, те́мже и доны́не сия́еши во тьме́ грехо́вней пребыва́ющим.

Небе́сная дарова́ния прии́м, прозрева́л еси́ бу́дущая, я́ко настоя́щая, те́мже, мно́гия в ве́ре утверди́в, ко спасе́нию приве́л еси́. Моли́, преподо́бне, с про́чими отцы́ в ми́ре соблюсти́ оби́тель на́шу, пе́сньми собо́р ста́рцев О́птинских ны́не прославля́ющих.

Ра́зꙋмъ да́ждь на́мъ, всеси́льне гдⷭ҇и, досто́йнѡ воспѣ́ти ᲂу҆го́дника твоего̀ льва̀ премꙋ́драго, ста́рца ѻ҆́птинскаго, чистоты̀ и҆ млⷭ҇рдїѧ є҆ѵⷢ҇льскагѡ и҆спо́лненнаго и҆ дꙋ́хомъ премꙋ́дрости свѣ́тлѡ ᲂу҆кра́шеннаго.

А҆́гг҃льски на землѝ пожи́въ, прпⷣбне, и҆ слꙋже́нїе ста́рческое, ꙗ҆́кѡ крⷭ҇тъ, бл҃гопослꙋ́шнѣ ѿ гдⷭ҇а прїи́мъ, мꙋ́дрый наста́вникъ мнѡ́гимъ и҆́нокѡмъ и҆ мїрѧ́нѡмъ ꙗ҆ви́лсѧ є҆сѝ.

Дх҃омъ бж҃їимъ наставлѧ́емь, та́йнꙋ человѣ́ческагѡ се́рдца проразꙋмѣва́лъ є҆сѝ, смиренномꙋ́дрый ᲂу҆го́дниче ѻ҆́тче львѐ, тѣ́мже и҆ мнѡ́гїѧ лю́ди къ нбⷭ҇номꙋ црⷭ҇твїю приве́лъ є҆сѝ.

И҆́стинꙋ є҆ѵⷢ҇льскꙋю возлюби́въ и҆ кꙋ́плю жите́йскꙋю ѡ҆ста́вивъ, къ мона́шескомꙋ житїю̀ ᲂу҆стреми́лсѧ є҆сѝ, прпⷣбне, нищетꙋ̀ дꙋхо́внꙋю стѧжа́въ и҆ мꙋ́жественнѣ грѣхꙋ̀ противоста́въ, горды́ню ѕлоко́зненнагѡ врага̀ посрами́лъ є҆сѝ.

Свою̀ во́лю нивочто́же вмѣнѧ́ѧ, ѻ҆́тче прпⷣбне, пꙋстыннолю́бцꙋ ѳео́дѡрꙋ послѣ́довалъ є҆сѝ, и҆ сла́дость послꙋша́нїѧ и҆ поко́й безмо́лвїѧ вкꙋси́въ, страсте́й треволне́нїе, бг҃обл҃же́нне, ᲂу҆кроти́лъ є҆сѝ.

Ꙗ҆́кѡ сы́нъ послꙋша́нїѧ и҆ ᲂу҆чени́къ добронра́вный, бг҃омꙋ́дре львѐ, преда́нїе ѻ҆те́ческое наслѣ́довалъ є҆сѝ, є҆го́же прпⷣбный паі́сїй, ꙗ҆́кѡ бжⷭ҇твєнныѧ кла́сы собра̀.

Всѣ̑мъ приходѧ́щымъ къ тебѣ̀ наста́вникъ мꙋ́дрый ꙗ҆ви́лсѧ є҆сѝ, ѻ҆́тче львѐ, и҆ просла́висѧ житїѐ твоѐ, ᲂу҆мертви́въ бо мꙋдрова̑нїѧ плотска̑ѧ, глꙋби́ны вѣ́дѣнїѧ, широты̀ любвѐ и҆ высоты̀ смире́нїѧ дости́глъ є҆сѝ.

Є҆гда̀ къ бг҃ꙋ любо́вїю возгорѣ́лсѧ є҆сѝ и҆ ᲂу҆се́рднѡ томꙋ̀ послꙋжи́ти восхотѣ́лъ є҆сѝ, тогда̀, ꙗ҆́кѡ зе́млю и҆ пе́пелъ себѐ вмѣнѧ́ѧ, въ пꙋсты́ню безмо́лвїѧ ᲂу҆дали́лсѧ є҆сѝ, ѻ҆́тче прпⷣбне.

Свѣти́льникъ свѣ́телъ въ пꙋсты́ни ꙗ҆ви́всѧ, мра́къ бѣсо́вскїй дале́че прогна́лъ є҆сѝ, мл҃твꙋ же непреста́ннꙋю въ се́рдцѣ, ꙗ҆́кѡ ме́чь въ рꙋцѣ̀, и҆мѣ́ѧ, де́монѡвъ ѕло́бꙋ посрами́лъ є҆сѝ.

А҆́гг҃льскагѡ житїѧ̀ взыскꙋ́ѧ, на стезю̀ и҆́ночества невозвра́тнымъ по́мысломъ стꙋпи́лъ є҆сѝ, и҆ мꙋ́дрость ѻ҆тцє́въ прпⷣбныхъ стѧжа́въ, наста́вникъ и҆ ᲂу҆тѣ́шитель мнѡ́гимъ ꙗ҆ви́лсѧ є҆сѝ, бг҃обл҃же́нне.

Ра́достнѡ дне́сь сла́витъ ѻ҆би́тель валаа́мскаѧ по́стничєскїѧ трꙋды̀ твоѧ̑, ѻ҆́тче львѐ, здѣ́ бо и҆́ночєскїѧ по́двиги со прпⷣбнымъ ѳео́дѡромъ под̾ѧ́лъ є҆сѝ, и҆ ны́нѣ съ ни́мъ на нб҃сѝ кꙋ́пнѡ ра́дꙋешисѧ.

Чистотꙋ̀ се́рдца и҆ ᲂу҆́мъ свѣ́телъ стѧжа́лъ є҆сѝ, ѻ҆́тче, дѣ́лы бл҃ги́ми и҆ чꙋдесы̀, ꙗ҆́кѡ свѣти́льникъ многосвѣ́тлый, сїѧ́ѧ, и҆ пре́лести тьмꙋ̀ бг҃одарова́ннымъ тѝ разсꙋжде́нїемъ и҆з̾ѡбличи́лъ є҆сѝ.

Є҆ли́цы кꙋ́пли ра́ди дꙋхо́вныѧ къ тебѣ̀ прихожда́хꙋ, зла́томъ смиренномꙋ́дрїѧ ѡ҆богаща́хꙋсѧ, тѣ́мже и҆ на́шꙋ нищетꙋ̀ ᲂу҆ще́дри, ѻ҆́тче львѐ, є҆ѵⷢ҇льскихъ добродѣ́телей вели́кое сокро́вище стѧжа́вый.

Тѣ́снымъ пꙋте́мъ ше́ствꙋѧ, житїѐ бг҃оꙋго́днѣ и҆спра́вилъ є҆сѝ, прпⷣбне, въ ѻ҆́птинꙋ же пꙋ́стынь всели́всѧ, дꙋхо́вный вертогра́дъ ᲂу҆стро́илъ є҆сѝ.

Ве́лїихъ и҆скꙋше́нїй пꙋчи́нꙋ преплы́въ, би́серъ ᲂу҆́мныѧ мл҃твы, ꙗ҆́кѡ до́бръ кꙋпе́цъ, ѡ҆брѣ́лъ є҆сѝ и҆ пꙋ́стынь ѻ҆́птинскꙋю, ꙗ҆́кѡ дꙋхо́внꙋю сокро́вищницꙋ, зла́томъ ѻ҆те́ческагѡ преда́нїѧ ѡ҆богати́лъ є҆сѝ, ѻ҆́тче львѐ.

А҆дама́нтъ тве́рдъ въ терпѣ́нїи и҆скꙋше́нїй де́монскихъ, на тѧ̀ воздвиза́емыхъ, ꙗ҆ви́лсѧ є҆сѝ, прпⷣбне, тѣ́мже болѣ̑зни и҆ трꙋды̀, скѡ́рби и҆ гонє́нїѧ, ꙗ҆́кѡ і҆́ѡвъ, кро́ткѡ претерпѣ́лъ є҆сѝ, на бг҃а ᲂу҆пова́ѧ.

Ѻ҆те́ческою любо́вїю въ болѣ́знехъ и҆ ско́рбехъ сꙋ́щихъ покрыва́лъ є҆сѝ и҆ мꙋ́чимыхъ ѿ дꙋхѡ́въ нечи́стыхъ и҆сцѣлѧ́лъ є҆сѝ си́лою на тебѣ̀ почи́вшагѡ всест҃а́гѡ дх҃а.

Послꙋшли́въ и҆ рачи́теленъ, ꙗ҆́кѡ пчела̀ бжⷭ҇твеннаѧ, бы́въ, некта́ръ дꙋхо́вный собра́лъ є҆сѝ, бг҃омꙋ́дре львѐ, и҆́мже ча̑да цр҃кѡ́внаѧ и҆ мона́шествꙋющихъ собо́ры препита́лъ є҆сѝ.

И҆скꙋ́съ под̾ѧ́лъ є҆сѝ, бг҃омꙋ́дре львѐ, житїѧ̀ по́стническагѡ и҆ взыскꙋ́ющымъ ѻ҆́нагѡ и҆́стинный пꙋтево́ждь ꙗ҆ви́лсѧ є҆сѝ, наставлѧ́ѧ и҆́хъ взыва́ти: бл҃гослове́нъ є҆сѝ, бж҃е ѻ҆тє́цъ на́шихъ.

Недꙋ́зи врачꙋ́ютсѧ и҆ де́мони ѿбѣга́ютъ мл҃твами твои́ми, ѻ҆́тче львѐ, тѣ́мже мно́зїи съ вѣ́рою къ ра́цѣ моще́й твои́хъ притека́ютъ и҆ бл҃года́рнѣ вопїю́тъ: бл҃гослове́нъ є҆сѝ, бж҃е ѻ҆тє́цъ на́шихъ.

Собо́ръ ѻ҆́птинскїй тобо́ю хва́литсѧ, прпⷣбне, ты́ бо, ꙗ҆́кѡ ка́мень непоколеби́мъ во и҆скꙋше́нїихъ пребыва́ѧ, на ка́мени вѣ́ры ᲂу҆твержда́тисѧ наꙋча́лъ є҆сѝ, взыва́ѧ: бл҃гослове́нъ є҆сѝ, бж҃е ѻ҆тє́цъ на́шихъ.

Къ тебѣ̀, прпⷣбне, притека́ютъ вѣ́рнїи, ꙗ҆́кѡ любвѐ хрⷭ҇то́вы и҆спо́лненъ бы́въ, ѻ҆те́цъ сиро́тъ и҆ вдова́мъ застꙋ́пникъ, ни́щымъ пита́тель и҆ наста́вникъ заблꙋ́ждшымъ ꙗ҆ви́лсѧ є҆сѝ, пою́щымъ: бл҃гослове́нъ є҆сѝ, бж҃е ѻ҆тє́цъ на́шихъ.

А҆́ще и҆ мнѡ́гїѧ скѡ́рби терпѣ́лъ є҆сѝ, ѻ҆ба́че не ѡ҆ста́вилъ є҆сѝ прибѣга́ющихъ къ тебѣ̀, глаго́лѧ: а҆́ще и҆ въ и҆згна́нїе пойдꙋ̀, и҆лѝ во ѻ҆́гнь, а҆́зъ бꙋ́дꙋ то́йже, взыва́ѧй: бл҃гослове́нъ є҆сѝ, бж҃е ѻ҆тє́цъ на́шихъ.

Ѻ҆́птинскїй ски́тъ, ꙗ҆́коже ра́йскїй са́дъ, воздѣ́лалъ є҆сѝ, въ не́мже ᲂу҆ченикѝ твоѧ̑ взрасти́лъ є҆сѝ, и҆̀же бл҃года́тнѣ процвѣто́ша и҆ зе́млю рꙋ́сскꙋю а҆рѡма̑ты мл҃твенными ѡ҆бл҃гоꙋха́ша.

Гонє́нїѧ бл҃годꙋ́шнѣ претерпѣ́лъ є҆сѝ, ꙗ҆̀же лꙋка́вый за́вистїю воздви́же на тѧ̀ ѡ҆глаго́ланїемъ ѿ человѣ̑къ, за ѡ҆би́дѧщихъ и҆ претѧ́щихъ тѝ кро́ткѡ моли́лсѧ є҆сѝ, ѻ҆́тче львѐ прпⷣбне, въ неѕло́бїи хрⷭ҇тꙋ̀ подража́ѧ.

Ле́сть ѡ҆бличи́лъ є҆сѝ, бг҃омꙋ́дре, и҆ пре́лести тьмꙋ̀ потреби́въ, дꙋ́шы ѿ плѣ́на бѣсо́вскагѡ и҆зба́вилъ є҆сѝ, тѣ́мже и҆ и҆сцѣлє́нїѧ пода́ждь къ ра́цѣ моще́й твои́хъ притека́ющымъ и҆ превозносѧ́щымъ хрⷭ҇та̀ во всѧ̑ вѣ́ки.

Въ зе́млю кро́ткихъ всели́лсѧ є҆сѝ, неѕло́бивъ сы́й, и҆ добродѣ́тельми преꙋкра́шенъ, съ вы́шними ликꙋ́еши, тѣ́мже сп҃са́й на́съ предста́тельствомъ твои́мъ, ѻ҆́тче бг҃охва́льне.

И҆сточа́етъ бл҃говѡ́нїѧ, ꙗ҆́кѡ крі́нъ, ра́ка чⷭ҇тны́хъ моще́й твои́хъ, вразꙋмлѧ́ющи вѣ̑рныѧ бл҃гоꙋха́нїе ра́йскагѡ селе́нїѧ взыска́ти, ѻ҆́тче львѐ достосла́вне.

Заре́ю дх҃а ѡ҆блиста́емь, въ пꙋсты́ни ѻ҆́птинстѣй свѣ́тлѡ просїѧ́лъ є҆сѝ, ѻ҆́тче прпⷣбне, тѣ́мже и҆ доны́нѣ сїѧ́еши во тьмѣ̀ грѣхо́внѣй пребыва́ющымъ.

Нбⷭ҇наѧ дарова̑нїѧ прїи́мъ, прозрѣва́лъ є҆сѝ бꙋ̑дꙋщаѧ, ꙗ҆́кѡ настоѧ̑щаѧ, тѣ́мже, мнѡ́гїѧ въ вѣ́рѣ ᲂу҆тверди́въ, ко сп҃се́нїю приве́лъ є҆сѝ. молѝ, прпⷣбне, съ про́чими ѻ҆тцы̑ въ ми́рѣ соблюстѝ ѻ҆би́тель на́шꙋ, пѣ́сньми собо́ръ ста́рцєвъ ѻ҆́птинскихъ ны́нѣ прославлѧ́ющихъ.