Кондак 1
Возбрани́ враго́м на́шим озлобля́ти на́с и от Го́спода на́шего отлучи́ти коне́чне и научи́ на́с пе́ти Тебе́, Богоро́дице, ве́село:
Ра́дуйся, Изба́вительнице, от го́ря, бе́д и ги́бели спаса́ющая на́с, бе́дствующих.
Икос 1
А́нгелов мно́жество по Твоему́, Ма́ти на́ша, повеле́нию ополча́ются на избавле́ние на́ше гро́зно, Ты́ же приими́ моли́тву сию́:
Ра́дуйся, А́нгелов на спасе́ние на́ше посыла́ющая; ра́дуйся, Цари́це го́рних чино́в, небе́сную и́х по́мощь на́м да́рующая.
Ра́дуйся, А́нгелом храни́ти на́с повелева́ющая; ра́дуйся, во́инством А́нгельским враго́в на́ших поража́ющая.
Ра́дуйся, Изба́вительнице, от го́ря, бе́д и ги́бели спаса́ющая на́с, бе́дствующих.
Кондак 2
Ви́дят бе́дствующии толи́кую и мно́гую по́мощь Твою́ серде́чно Тя́ призыва́ющим и наставля́ются те́м пе́ти Сы́ну Твоему́ непреста́нно: Аллилу́иа.
Икос 2
Разуме́ют мно́зи, я́ко ми́рови дарова́ Тя́ Сы́н Тво́й Изба́вительницу бе́дствующим, те́мже пое́м Ти́ си́це:
Ра́дуйся, бе́дствующих Ма́ти; ра́дуйся, стра́ждущих утеше́ние.
Ра́дуйся, боля́щих исцеле́ние; ра́дуйся, ненаде́жных наде́ждо.
Ра́дуйся, Изба́вительнице, от го́ря, бе́д и ги́бели спаса́ющая на́с, бе́дствующих.
Кондак 3
Си́ла Вы́шняго дарова́ся Ти́ на по́мощь и спасе́ние ми́ру и на́с, в беда́х погиба́ющих. И кто́ же Тобо́ю не изба́влен бы́сть, и кто́ же не пое́т Сы́ну Твоему́: Аллилу́иа.
Икос 3
Иму́щи непостижи́мую любо́вь к ро́ду челове́чу, ка́я воздыха́ния не прия́ла еси́, ки́я сле́зы не оте́рла еси́, и кого́ не прину́дила еси́ призыва́ти Тя́, вопию́ще:
Ра́дуйся, бе́дствующих ско́рое услы́шание; ра́дуйся, печа́льных и ско́рбных утеше́ние.
Ра́дуйся, погиба́ющих бы́строе спасе́ние: ра́дуйся, плене́нных свобожде́ние.
Ра́дуйся, Изба́вительнице, от го́ря, бе́д и ги́бели спаса́ющая на́с, бе́дствующих.
Кондак 4
Бу́ря несча́стий налете́ на ны́, спаси́ у́бо на́с погиба́ющих, Изба́вительнице на́ша, бу́рю поги́бельную на земли́ укроти́вшая и прие́млющая на́шу пе́снь: Аллилу́иа.
Икос 4
Слы́шаша челове́честии ро́ди всю́ Твою́ к христиа́ном ди́вную любо́вь и Твое́ мо́щное избавле́ние от вся́ких находя́щих на ни́х лю́тых, научи́шася пе́ти Тебе́:
Ра́дуйся, челове́ческаго ро́да от бе́д избавле́ние; ра́дуйся, бу́рь жите́йских прекраще́ние.
Ра́дуйся, уны́ния прогони́тельнице; ра́дуйся, ра́дости по ско́рби на́м пода́тельнице.
Ра́дуйся, Изба́вительнице, от го́ря, бе́д и ги́бели спаса́ющая на́с, бе́дствующих.
Кондак 5
Боготе́чней звезде́ подо́бящася, мра́к и темноту́ в гре́шных сердца́х разгоня́еши, да во све́те Твоея́ любве́ у́зрят Го́спода и воспою́т Ему́: Аллилу́иа.
Икос 5
Ви́деша лю́дие росси́йстии Твое́ неча́янное от многоразли́чных бе́д избавле́ние, ра́достно пою́т Тебе́ си́це:
Ра́дуйся, в беда́х на́ша помо́щнице; ра́дуйся, скорбе́й на́ших отъя́тие.
Ра́дуйся, печа́лей на́ших отгна́ние; ра́дуйся, в ско́рбех на́ших утеше́ние.
Ра́дуйся, Изба́вительнице, от го́ря, бе́д и ги́бели спаса́ющая на́с, бе́дствующих.
Кондак 6
Пропове́дуют по́мощь и любо́вь Твою́, Ма́ти, исцеле́ннии, уте́шеннии, обра́дованнии и спасе́ннии Тобо́ю от бе́д и пою́т Твоему́ высокодержа́вному Сы́ну: Аллилу́иа.
Икос 6
Возсия́ на́м Све́т спасе́ния во мгле́ поги́бели, окружи́вшей на́с, и наста́ви пе́ти Тебе́:
Ра́дуйся, мглу́ грехо́в разгоня́ющая; ра́дуйся, тьму́ грехо́вную потребля́ющая.
Ра́дуйся, мра́к души́ моея́ просвеща́ющая; ра́дуйся, све́том ра́дости ду́ши ободря́ющая.
Ра́дуйся, Изба́вительнице, от го́ря, бе́д и ги́бели спаса́ющая на́с, бе́дствующих.
Кондак 7
Хотя́щим на́м коне́чному отча́янию преда́тися, отвсю́ду беда́м належа́щим, помы́слихом же о Тебе́, Изба́вительнице, и ободри́хомся, и уте́шихомся, пою́ще Сы́ну Твоему́: Аллилу́иа.
Икос 7
Но́вую и нежда́нную показа́ на́м ми́лость Свою́, под держа́вную руку́ Твою́ на́с восприя́вши, и отвсю́ду вопие́м Ти́, Богоро́дице:
Ра́дуйся, Цари́це держа́вная: ра́дуйся, и на́с под Твою́ держа́ву восприя́вшая.
Ра́дуйся, защи́ту Твою́ на́м дарова́вшая; ра́дуйся, враго́в на́ших порази́вшая.
Ра́дуйся, Изба́вительнице, от го́ря, бе́д и ги́бели спаса́ющая на́с, бе́дствующих.
Кондак 8
Стра́нное чу́до: на поги́бель обрече́нных и в ну́ждах томя́щихся безчи́сленных, внеза́пу спасе́ние и избавле́ние получа́ют от Тебе́, Вселю́бящей, пою́ще Бо́гу: Аллилу́иа.
Икос 8
Вси́ су́щии во мра́це скорбе́й, вси́ обурева́емии несча́стий бу́рею, прииди́те к до́брому приста́нищу и на́шему поможе́нию, покро́ву Де́вы Изба́вительницы, вопию́ще Е́й:
Ра́дуйся, ра́достей исто́чниче; ра́дуйся, печа́лей прогна́ние.
Ра́дуйся, бе́д избавле́ние; ра́дуйся, вся́ческаго поко́я пода́тельнице.
Ра́дуйся, Изба́вительнице, от го́ря, бе́д и ги́бели спаса́ющая на́с, бе́дствующих.
Кондак 9
Все́ существо́ челове́ческое хва́лит Тя́, вси́ воспева́ют Тя́, многоразли́чное избавле́ние несу́щую, вме́сто печа́лей ра́дость подаю́щую пою́щим Сы́ну Твоему́ и Бо́гу: Аллилу́иа.
Икос 9
Вети́и многоу́мнии обезу́меша, ви́дяще Твое́ ско́рое и чуде́сное от бе́д стра́ждущих избавле́ние, и умолко́ша, на́м пою́щим Ти́:
Ра́дуйся, чудесы́ ми́р удиви́вшая; ра́дуйся, чудесы́ на́с укрепи́вшая.
Ра́дуйся, безбо́жие чудеса́ми истреби́вшая; ра́дуйся, враго́в си́лою Бо́жиею посрами́вшая.
Ра́дуйся, Изба́вительнице, от го́ря, бе́д и ги́бели спаса́ющая на́с, бе́дствующих.
Кондак 10
Спасти́ хотя́ вся́ку ду́шу челове́чу, все́ю любо́вию пече́шися о не́й, до́ндеже научи́ши ю́ пе́ти Сы́ну Твоему́: Аллилу́иа.
Икос 10
Стено́ю ми́р христиа́нский храня́щей и вся́ку ду́шу от враго́в огражда́ющей яви́ся ико́на Твоя́, Изба́вительнице, в ми́ре правосла́внем и чудесы́ просла́вися, Тебе́ лю́дем Бо́жиим воспева́ющим:
Ра́дуйся, наста́внице на́ша, святу́ю го́ру Афо́нскую в жре́бий Себе́ избра́вшая; ра́дуйся, Изба́вительнице на́ша, Твои́м благослове́нием Но́вый Афо́н благослови́вшая.
Ра́дуйся, весе́лие на́ше, зна́мение сою́за неразры́внаго уде́лов Твои́х земны́х ико́ною Твое́ю яви́вшая; ра́дуйся, ве́чная ра́досте на́ша, чуде́сным попече́нием к ю́ной Новоафо́нской оби́тели благоволи́вшая.
Ра́дуйся, Изба́вительнице, от го́ря, бе́д и ги́бели спаса́ющая на́с, бе́дствующих.
Кондак 11
Пе́ние непреста́нное прино́сят Ти́, Влады́чице, Тобо́ю изба́вленнии и Тобо́ю па́ки ра́дость обре́тшии и Боже́ственному Сы́ну Твоему́ пою́т ра́достно: Аллилу́иа.
Икос 11
Светосия́ющим свети́лом лучеза́рным во мра́це греха́ яви́ся на́м ико́на Твоя́, Изба́вительнице, наставля́ющая на́с пе́ти Тебе́:
Ра́дуйся, от гла́да на́с избавля́ющая; ра́дуйся, вредонося́щее естество́ от расте́ний отгоня́ющая.
Ра́дуйся, посе́вы и леса́ и вся́ расту́щая от поги́бели спаса́ющая; ра́дуйся, земледе́льцев скорбя́щих утеше́ние и труда́ и́х благослове́ние.
Ра́дуйся, Изба́вительнице, от го́ря, бе́д и ги́бели спаса́ющая на́с, бе́дствующих.
Кондак 12
Благода́ть от ико́ны Твоея́, Изба́вительнице, теку́щая, исцеле́ний струи́ оби́льно подаю́щая и сердца́ весе́лием оживля́ющая, побежда́ет все́х во́лею пе́ти Тебе́, Ма́ти, и Сы́ну Твоему́ и Бо́гу: Аллилу́иа.
Икос 12
Воспева́ем исцеле́ния, от святы́я ико́ны Твоея́ быва́емая, воспева́ем наипа́че воскреше́ние Анаста́сия о́трока и воспева́юще пое́м:
Ра́дуйся, ме́ртвых воскреша́ющая; ра́дуйся, уме́ршая сердца́ оживля́ющая.
Ра́дуйся, от сме́рти и ве́чнаго огня́ изыма́ющая; ра́дуйся, посме́ртное на́ше упова́ние и защи́то.
Ра́дуйся, Изба́вительнице, от го́ря, бе́д и ги́бели спаса́ющая на́с, бе́дствующих.
Кондак 13
О всепе́тая и вселюби́мая на́ша Ма́ти! Умилосе́рдися ны́не и поми́луй, в лю́тых и безысхо́дных су́щих на́с ско́рбех избавля́ющи, научи́ на́с серде́чно воспева́ти Бо́гу, проща́ющему на́с: Аллилу́иа.
Повтор
Этот кондак читается трижды, затем икос 1-й и кондак 1-й.
Икос 1
А́нгелов мно́жество по Твоему́, Ма́ти на́ша, повеле́нию ополча́ются на избавле́ние на́ше гро́зно, Ты́ же приими́ моли́тву сию́:
Ра́дуйся, А́нгелов на спасе́ние на́ше посыла́ющая; ра́дуйся, Цари́це го́рних чино́в, небе́сную и́х по́мощь на́м да́рующая.
Ра́дуйся, А́нгелом храни́ти на́с повелева́ющая; ра́дуйся, во́инством А́нгельским враго́в на́ших поража́ющая.
Ра́дуйся, Изба́вительнице, от го́ря, бе́д и ги́бели спаса́ющая на́с, бе́дствующих.
Кондак 1
Возбрани́ враго́м на́шим озлобля́ти на́с и от Го́спода на́шего отлучи́ти коне́чне и научи́ на́с пе́ти Тебе́, Богоро́дице, ве́село:
Ра́дуйся, Изба́вительнице, от го́ря, бе́д и ги́бели спаса́ющая на́с, бе́дствующих.
Молитвы
О Ма́ти Бо́жия, по́моще и защи́та на́ша, при́сно бу́ди на́м Изба́вительница, на Тя́ бо упова́ем и всегда́ вседу́шно Тя́ призыва́ем: умилосе́рдися и помози́, пожале́й и изба́ви, приклони́ у́хо Твое́ и на́ша ско́рбныя и сле́зныя моли́твы приими́, и я́коже хо́щеши успоко́й и обра́дуй на́с, лю́бящих Твоего́ Безнача́льнаго Сы́на и Бо́га на́шего. Ами́нь.
Конда́къ а҃
Возбранѝ врагѡ́мъ на́шимъ ѡ҆ѕлоблѧ́ти на́съ и҆ ѿ гдⷭ҇а на́шегѡ ѿлꙋчи́ти коне́чнѣ и҆ наꙋчѝ на́съ пѣ́ти тебѣ̀ ве́селѡ:
Ра́дꙋйсѧ, и҆зба́вительнице, ѿ го́рѧ, бѣ́дъ и҆ ги́бели сп҃са́ющаѧ на́съ бѣ́дствꙋющихъ.
І҆́косъ а҃
А҆́гг҃лѡвъ мно́жество по твоемꙋ̀, мт҃и на́ша, повелѣ́нїю ѡ҆полча́ютсѧ на и҆збавле́нїе на́ше гро́знѡ. Ты́ же прїимѝ мл҃твꙋ сїю̀:
Ра́дꙋйсѧ, а҆́гг҃лѡвъ на сп҃се́нїе на́ше посыла́ющаѧ: ра́дꙋйсѧ, цр҃и́це го́рнихъ чинѡ́въ, нбⷭ҇нꙋю и҆̀хъ по́мощь на́мъ да́рꙋющаѧ.
Ра́дꙋйсѧ, а҆́гг҃лѡмъ храни́ти на́съ повелѣва́ющаѧ: ра́дꙋйсѧ, во́инствомъ а҆́гг҃льскимъ врагѡ́въ на́шихъ поража́ющаѧ.
Ра́дꙋйсѧ, и҆зба́вительнице, ѿ го́рѧ, бѣ́дъ и҆ ги́бели сп҃са́ющаѧ на́съ бѣ́дствꙋющихъ.
Конда́къ в҃
Ви́дѧтъ бѣ́дствꙋющїи толи́кꙋю и҆ мно́гꙋю по́мощь твою̀ серде́чнѡ тѧ̀ призыва́ющимъ и҆ наставлѧ́ютсѧ тѣ́мъ пѣ́ти сн҃ꙋ твоемꙋ̀ непреста́ннѡ: А҆ллилꙋ́їа.
І҆́косъ в҃
Разꙋмѣ́ютъ мно́зи, ꙗ҆́кѡ мі́рови дарова́ тѧ сн҃ъ тво́й и҆зба́вительницꙋ бѣ́дствꙋющымъ, тѣ́мже пое́мъ тѝ си́це:
Ра́дꙋйсѧ, бѣ́дствꙋющихъ мт҃и: ра́дꙋйсѧ, стра́ждꙋщихъ ᲂу҆тѣше́нїе.
Ра́дꙋйсѧ, болѧ́щихъ и҆сцѣле́нїе: ра́дꙋйсѧ, ненаде́жныхъ наде́ждо.
Ра́дꙋйсѧ, и҆зба́вительнице, ѿ го́рѧ, бѣ́дъ и҆ ги́бели сп҃са́ющаѧ на́съ бѣ́дствꙋющихъ.
Конда́къ г҃
Си́ла вы́шнѧгѡ дарова́сѧ тѝ на по́мощь и҆ сп҃се́нїе мі́рꙋ и҆ на́съ, въ бѣда́хъ погиба́ющихъ. И҆ кто́ же тобо́ю не и҆зба́вленъ бы́сть; и҆ кто́ же не пое́тъ сн҃ꙋ твоемꙋ̀: А҆ллилꙋ́їа.
І҆́косъ г҃
И҆мꙋ́щи непостижи́мꙋю любо́вь къ ро́дꙋ человѣ́чꙋ, ка̑ѧ воздыха̑нїѧ не прїѧ́ла є҆сѝ, кі̑ѧ слє́зы не ѡ҆те́рла є҆сѝ, и҆ кого̀ не принꙋ́дила є҆сѝ призыва́ти тѧ̀, вопїю́ще:
Ра́дꙋйсѧ, бѣ́дствꙋющихъ ско́рое ᲂу҆слы́шанїе: ра́дꙋйсѧ, печа́льныхъ и҆ ско́рбныхъ ᲂу҆тѣше́нїе.
Ра́дꙋйсѧ, погиба́ющихъ бы́строе сп҃се́нїе: ра́дꙋйсѧ, плѣне́нныхъ свобожде́нїе.
Ра́дꙋйсѧ, и҆зба́вительнице, ѿ го́рѧ, бѣ́дъ и҆ ги́бели сп҃са́ющаѧ на́съ бѣ́дствꙋющихъ.
Конда́къ д҃
Бꙋ́рѧ несча́стїй налетѣ̀ на ны̀, сп҃сѝ ᲂу҆́бѡ на́съ погиба́ющихъ, и҆зба́вительнице на́ша, бꙋ́рю поги́бельнꙋю на землѝ ᲂу҆кроти́вшаѧ и҆ прїе́млющаѧ на́шꙋ пѣ́снь: А҆ллилꙋ́їа.
І҆́косъ д҃
Слы́шаша чл҃вѣ́честїи ро́ди всю̀ твою̀ къ хрⷭ҇тїа́нѡмъ ди́внꙋю любо́вь и҆ твоѐ мо́щное и҆збавле́нїе ѿ всѧ́кихъ находѧ́щихъ на ни́хъ лю́тыхъ, наꙋчи́шасѧ пѣ́ти тебѣ̀:
Ра́дꙋйсѧ, чл҃вѣ́ческагѡ ро́да ѿ бѣ́дъ и҆збавле́нїе: ра́дꙋйсѧ, бꙋ́рь жите́йскихъ прекраще́нїе.
Ра́дꙋйсѧ, ᲂу҆ны́нїѧ прогони́тельнице: ра́дꙋйсѧ, ра́дости по ско́рби на́мъ пода́тельнице.
Ра́дꙋйсѧ, и҆зба́вительнице, ѿ го́рѧ, бѣ́дъ и҆ ги́бели сп҃са́ющаѧ на́съ бѣ́дствꙋющихъ.
Конда́къ є҃
Бг҃оте́чнѣй ѕвѣздѣ̀ подо́бѧщасѧ, мра́къ и҆ темнотꙋ̀ въ грѣ́шныхъ сердца́хъ разгонѧ́еши, да во свѣ́тѣ твоеѧ̀ любвѐ ᲂу҆́зрѧтъ гдⷭ҇а и҆ воспою́тъ є҆мꙋ̀: А҆ллилꙋ́їа.
І҆́косъ є҃
Ви́дѣша лю́дїе рѡссі́йстїи твоѐ неча́ѧнное ѿ многоразли́чныхъ бѣ́дъ и҆збавле́нїе, ра́достнѡ пою́тъ тебѣ̀ си́це:
Ра́дꙋйсѧ, въ бѣда́хъ на́ша помо́щнице: ра́дꙋйсѧ, скорбе́й на́шихъ ѿ̾ѧ́тїе.
Ра́дꙋйсѧ, печа́лей на́шихъ ѿгна́нїе: ра́дꙋйсѧ, въ ско́рбѣхъ на́шихъ ᲂу҆тѣше́нїе.
Ра́дꙋйсѧ, и҆зба́вительнице, ѿ го́рѧ, бѣ́дъ и҆ ги́бели сп҃са́ющаѧ на́съ бѣ́дствꙋющихъ.
Конда́къ ѕ҃
Проповѣ́дꙋютъ по́мощь и҆ любо́вь твою̀, мт҃и, и҆сцѣле́ннїи, ᲂу҆тѣ́шеннїи, ѡ҆бра́дованнїи и҆ сп҃се́ннїи тобо́ю ѿ бѣ́дъ, и҆ пою́тъ твоемꙋ̀ высокодержа́вномꙋ сн҃ꙋ: А҆ллилꙋ́їа.
І҆́косъ ѕ҃
Возсїѧ̀ на́мъ свѣ́тъ сп҃се́нїѧ во мглѣ̀ поги́бели, ѡ҆крꙋжи́вшей на́съ, и҆ наста́ви пѣ́ти тебѣ̀:
Ра́дꙋйсѧ, мглꙋ̀ грѣхѡ́въ разгонѧ́ющаѧ: ра́дꙋйсѧ, тмꙋ̀ грѣхо́внꙋю потреблѧ́ющаѧ.
Ра́дꙋйсѧ, мра́къ дꙋшѝ моеѧ̀ просвѣща́ющаѧ: ра́дꙋйсѧ, свѣ́томъ ра́дости дꙋ́ши ѡ҆бодрѧ́ющаѧ.
Ра́дꙋйсѧ, и҆зба́вительнице, ѿ го́рѧ, бѣ́дъ и҆ ги́бели сп҃са́ющаѧ на́съ бѣ́дствꙋющихъ.
Конда́къ з҃
Хотѧ́щимъ на́мъ коне́чномꙋ ѿча́ѧнїю преда́тисѧ, ѿвсю́дꙋ бѣда́мъ належа́щимъ, помы́слихомъ же ѡ҆ тебѣ̀, и҆зба́вительнице, и҆ ѡ҆бодри́хомсѧ и҆ ᲂу҆тѣ́шихомсѧ, пою́ще сн҃ꙋ твоемꙋ̀: А҆ллилꙋ́їа.
І҆́косъ з҃
Но́вꙋю и҆ нежда́ннꙋю показа̀ на́мъ млⷭ҇ть свою̀, под̾ держа́внꙋю рꙋкꙋ̀ твою̀ на́съ воспрїѧ́вши, и҆ ѿвсю́дꙋ вопїе́мъ тѝ, бцⷣе:
Ра́дꙋйсѧ, цр҃и́це держа́внаѧ: ра́дꙋйсѧ, и҆ на́съ под̾ твою̀ держа́вꙋ воспрїѧ́вшаѧ.
Ра́дꙋйсѧ, защи́тꙋ твою̀ на́мъ дарова́вшаѧ: ра́дꙋйсѧ, врагѡ́въ на́шихъ порази́вшаѧ.
Ра́дꙋйсѧ, и҆зба́вительнице, ѿ го́рѧ, бѣ́дъ и҆ ги́бели сп҃са́ющаѧ на́съ бѣ́дствꙋющихъ.
Конда́къ и҃
Стра́нное чꙋ́до: на поги́бель ѡ҆брече́нныхъ и҆ въ нꙋ́ждахъ томѧ́щихсѧ безчи́сленныхъ, внеза́пꙋ сп҃се́нїе и҆ и҆збавле́нїе полꙋча́ютъ ѿ тебѣ̀, вселю́бѧщей, пою́ще бг҃ꙋ: А҆ллилꙋ́їа.
І҆́косъ и҃
Всѝ сꙋ́щїи во мра́цѣ скорбе́й, всѝ ѡ҆бꙋрева́емїи несча́стїй бꙋ́рею, прїиди́те къ до́бромꙋ приста́нищꙋ и҆ на́шемꙋ поможе́нїю, покро́вꙋ дв҃ы и҆зба́вительницы, вопїю́ще є҆́й:
Ра́дꙋйсѧ, ра́достей и҆сто́чниче: ра́дꙋйсѧ, печа́лей прогна́нїе.
Ра́дꙋйсѧ, бѣ́дъ и҆збавле́нїе: ра́дꙋйсѧ, всѧ́ческагѡ поко́ѧ пода́тельнице.
Ра́дꙋйсѧ, и҆зба́вительнице, ѿ го́рѧ, бѣ́дъ и҆ ги́бели сп҃са́ющаѧ на́съ бѣ́дствꙋющихъ.
Конда́къ ѳ҃
Всѐ сꙋщество̀ чл҃вѣ́ческое хва́литъ тѧ̀, всѝ воспѣва́ютъ тѧ̀, многоразли́чное и҆збавле́нїе несꙋ́щꙋю, вмѣ́стѡ печа́лей ра́дость подаю́щꙋю пою́щымъ сн҃ꙋ твоемꙋ̀ и҆ бг҃ꙋ: А҆ллилꙋ́їа.
І҆́косъ ѳ҃
Вѣті̑и многоꙋ́мнїи ѡ҆безꙋ́мѣша, ви́дѧще твоѐ ско́рое и҆ чꙋде́сное ѿ бѣ́дъ стра́ждꙋщихъ и҆збавле́нїе, и҆ ᲂу҆молко́ша на́мъ, пою́щимъ тѝ:
Ра́дꙋйсѧ, чꙋдесы̑ мі́ръ ᲂу҆диви́вшаѧ: ра́дꙋйсѧ, чꙋдесы̑ на́съ ᲂу҆крѣпи́вшаѧ.
Ра́дꙋйсѧ, безбо́жїе чꙋдеса́ми и҆стреби́вшаѧ: ра́дꙋйсѧ, врагѡ́въ си́лою бж҃їею посрами́вшаѧ.
Ра́дꙋйсѧ, и҆зба́вительнице, ѿ го́рѧ, бѣ́дъ и҆ ги́бели сп҃са́ющаѧ на́съ бѣ́дствꙋющихъ.
Конда́къ і҃
Спастѝ хотѧ̀ всѧ́кꙋ дꙋ́шꙋ чл҃вѣ́чꙋ, все́ю любо́вїю пече́шисѧ ѡ҆ не́й, до́ндеже наꙋчи́ши ю҆̀ пѣ́ти сн҃ꙋ твоемꙋ̀: А҆ллилꙋ́їа.
І҆́косъ і҃
Стѣно́ю, мі́ръ хрⷭ҇тїа́нскїй хранѧ́щей и҆ всѧ́кꙋ дꙋ́шꙋ ѿ врагѡ́въ ѡ҆гражда́ющей, ꙗ҆ви́сѧ і҆кѡ́на твоѧ̀, и҆зба́вительнице, въ мі́рѣ правосла̑внѣмъ и҆ чꙋдесы̑ просла́висѧ. Тебѣ̀ лю́дємъ бж҃їимъ воспѣва́ющимъ:
Ра́дꙋйсѧ, наста́внице на́ша, ст҃ꙋ́ю го́рꙋ а҆ѳѡ́нскꙋю въ жре́бїй себѐ и҆збра́вшаѧ: ра́дꙋйсѧ, и҆зба́вительнице на́ша, твои́мъ бл҃гослове́нїемъ но́вый а҆ѳѡ́нъ бл҃гослови́вшаѧ.
Ра́дꙋйсѧ, весе́лїе на́ше, зна́менїе сою́за неразры́внагѡ ᲂу҆дѣ́лѡвъ твои́хъ земны́хъ і҆кѡ́ною твое́ю ꙗ҆ви́вшаѧ: ра́дꙋйсѧ, вѣ́чнаѧ ра́досте на́ша, чꙋде́снымъ попече́нїемъ къ ю҆́ной новоаѳѡ́нской ѻ҆би́тели бл҃говоли́вшаѧ.
Ра́дꙋйсѧ, и҆зба́вительнице, ѿ го́рѧ, бѣ́дъ и҆ ги́бели сп҃са́ющаѧ на́съ бѣ́дствꙋющихъ.
Конда́къ а҃і
Пѣ́нїе непреста́нное прино́сѧтъ тѝ, влⷣчце, тобо́ю и҆зба́вленнїи и҆ тобо́ю па́ки ра́дость ѡ҆брѣ́тшїи, и҆ бж҃е́ственномꙋ сн҃ꙋ твоемꙋ̀ пою́тъ ра́достнѡ: А҆ллилꙋ́їа.
І҆́косъ а҃і
Свѣтосїѧ́ющимъ свѣти́ломъ лꙋчеза́рнымъ во мра́цѣ грѣха̀ ꙗ҆ви́сѧ на́мъ і҆кѡ́на твоѧ̀, и҆зба́вительнице, наставлѧ́ющаѧ на́съ пѣ́ти тебѣ̀:
Ра́дꙋйсѧ, ѿ гла́да на́съ и҆збавлѧ́ющаѧ: ра́дꙋйсѧ, вредоносѧ́щее є҆стество̀ ѿ растѣ́нїй ѿгонѧ́ющаѧ.
Ра́дꙋйсѧ, посѣ̑вы и҆ лѣса̀, и҆ всѧ̑ растꙋ́щаѧ ѿ поги́бели спаса́ющаѧ: ра́дꙋйсѧ, земледѣ́льцєвъ скорбѧ́щихъ ᲂу҆тѣше́нїе и҆ трꙋда̀ и҆̀хъ бл҃гослове́нїе.
Ра́дꙋйсѧ, и҆зба́вительнице, ѿ го́рѧ, бѣ́дъ и҆ ги́бели сп҃са́ющаѧ на́съ бѣ́дствꙋющихъ.
Конда́къ в҃і
Бл҃года́ть, ѿ і҆кѡ́ны твоеѧ̀, и҆зба́вительнице, текꙋ́щаѧ, и҆сцѣле́нїй стрꙋѝ ѡ҆би́льнѡ подаю́щаѧ и҆ сердца̀ весе́лїемъ ѡ҆живлѧ́ющаѧ, побѣжда́етъ всѣ́хъ во́лею пѣ́ти тебѣ̀, мт҃и, и҆ сн҃ꙋ твоемꙋ̀ и҆ бг҃ꙋ: А҆ллилꙋ́їа.
І҆́косъ в҃і
Воспѣва́емъ и҆сцѣле́нїѧ, ѿ ст҃ы́ѧ і҆кѡ́ны твоеѧ̀ быва́ємаѧ, воспѣва́емъ наипа́че воскреше́нїе а҆наста́сїѧ ѻ҆́трока и҆ воспѣва́юще пое́мъ:
Ра́дꙋйсѧ, ме́ртвыхъ воскреша́ющаѧ: ра́дꙋйсѧ, ᲂу҆ме́ршаѧ сердца̀ ѡ҆живлѧ́ющаѧ.
Ра́дꙋйсѧ, ѿ сме́рти и҆ вѣ́чнагѡ ѻ҆гнѧ̀ и҆зыма́ющаѧ: ра́дꙋйсѧ, посме́ртное на́ше ᲂу҆пова́нїе и҆ защи́то.
Ра́дꙋйсѧ, и҆зба́вительнице, ѿ го́рѧ, бѣ́дъ и҆ ги́бели сп҃са́ющаѧ на́съ бѣ́дствꙋющихъ.
Конда́къ г҃і
Ѽ, всепѣ́таѧ и҆ вселюби́маѧ на́ша мт҃и! ᲂу҆милосе́рдисѧ ны́нѣ и҆ поми́лꙋй, въ лю́тыхъ и҆ безысхо̑дныхъ сꙋ́щихъ на́съ ско́рбѣхъ и҆збавлѧ́ющи, наꙋчѝ на́съ серде́чнѡ воспѣва́ти бг҃ꙋ, проща̑ющемꙋ на́съ: А҆ллилꙋ́їа.
Повто́ръ
Сей конда́къ глаго́лется три́жды, та́же і҆́косъ а҃-й и҆ конда́къ а҃-й.
І҆́косъ а҃
А҆́гг҃лѡвъ мно́жество по твоемꙋ̀, мт҃и на́ша, повелѣ́нїю ѡ҆полча́ютсѧ на и҆збавле́нїе на́ше гро́знѡ. Ты́ же прїимѝ мл҃твꙋ сїю̀:
Ра́дꙋйсѧ, а҆́гг҃лѡвъ на сп҃се́нїе на́ше посыла́ющаѧ: ра́дꙋйсѧ, цр҃и́це го́рнихъ чинѡ́въ, нбⷭ҇нꙋю и҆̀хъ по́мощь на́мъ да́рꙋющаѧ.
Ра́дꙋйсѧ, а҆́гг҃лѡмъ храни́ти на́съ повелѣва́ющаѧ: ра́дꙋйсѧ, во́инствомъ а҆́гг҃льскимъ врагѡ́въ на́шихъ поража́ющаѧ.
Ра́дꙋйсѧ, и҆зба́вительнице, ѿ го́рѧ, бѣ́дъ и҆ ги́бели сп҃са́ющаѧ на́съ бѣ́дствꙋющихъ.
Конда́къ а҃
Возбранѝ врагѡ́мъ на́шимъ ѡ҆ѕлоблѧ́ти на́съ и҆ ѿ гдⷭ҇а на́шегѡ ѿлꙋчи́ти коне́чнѣ и҆ наꙋчѝ на́съ пѣ́ти тебѣ̀ ве́селѡ:
Ра́дꙋйсѧ, и҆зба́вительнице, ѿ го́рѧ, бѣ́дъ и҆ ги́бели сп҃са́ющаѧ на́съ бѣ́дствꙋющихъ.
Моли́твы
Ѽ, мт҃и бж҃їѧ, по́моще и҆ защи́та на́ша, при́снѡ бꙋ́ди на́мъ и҆зба́вительница, на тѧ́ бо ᲂу҆пова́емъ и҆ всегда̀ вседꙋ́шнѡ тѧ̀ призыва́емъ: ᲂу҆милосе́рдисѧ и҆ помозѝ, пожале́й и҆ и҆зба́ви, приклонѝ ᲂу҆́хо твоѐ и҆ на̑ша скѡ́рбныѧ и҆ слє́зныѧ моли́твы прїимѝ, и҆ ꙗ҆́коже хо́щеши, ᲂу҆споко́й и҆ ѡ҆бра́дꙋй на́съ, лю́бѧщихъ твоегѡ̀ безнача́льнагѡ сн҃а и҆ бг҃а на́шегѡ. А҆ми́нь.