Кондак 1
Избра́нный уго́дниче Христо́в и ди́вный благоче́стия подви́жниче, преподо́бне о́тче Ио́сифе, и́же сугу́бый свы́ше да́р прие́мый богове́дения же и исцеле́ний, я́ко име́яй дерзнове́ние ко Святе́й Тро́ице моли́ изба́витися на́м от находя́щих бе́д и скорбе́й и боле́зней, да любо́вию зове́м ти́:
Ра́дуйся, преподо́бне о́тче Ио́сифе, богому́дре, чудотво́рче.
Икос 1
А́нгела во пло́ти тя́ ве́дуще, преподо́бне Ио́сифе, по́сланна от Бо́га, да яви́т тобо́ю в челове́цех о́браз и́стиннаго благоче́стия и до́брых де́л, чудя́щеся путе́м Его́, во вре́меннем житии́ твое́м явле́нным, и вели́чие благоутро́бия Его́ прославля́юще, во умиле́нии серде́чнем взыва́ем ти́ си́це:
Ра́дуйся, до́браго ко́рене о́трасле благоро́дная; ра́дуйся, лозо́ виногра́да Христо́ва многопло́дная.
Ра́дуйся, ча́до моли́твы роди́телей благочести́вых; ра́дуйся, наде́ждо и утеше́ние серде́ц и́х боголюби́вых.
Ра́дуйся, изде́тска стра́х Госпо́день стяжа́вый; ра́дуйся, се́мя сло́ва Бо́жия от ю́ности восприя́вый.
Ра́дуйся, измла́да смире́ния и молча́ния храни́телю; ра́дуйся, моли́твы и воздержа́ния ревни́телю.
Ра́дуйся, преподо́бне о́тче Ио́сифе, богому́дре, чудотво́рче.
Кондак 2
Ви́дя Христо́с благо́е се́рдца твоего́ изволе́ние и раче́ние, я́ко от ю́ности немо́лчно прославля́л еси́ И́мя Госпо́дне чте́нием и пе́нием псалмо́в и пе́сней свяще́нных во святе́м хра́ме Его́, в ски́нии небе́сней вчини́ тя́, преподо́бне, в ли́це пра́ведник соверше́нных возноси́ти ему́ ку́пно с ни́ми а́нгельское пе́ние: Аллилу́иа.
Икос 2
Разуме́в от писа́ний оте́ческих благи́х ми́ра сего́ тщету́, исхо́д же от вре́меннаго сего́ жития́ непреста́нно помышля́я и пребыва́я при́сно в сокрове́ннем по́двизе моли́твы, ника́коже се́рдцем прилепи́лся еси́ к су́щим от ми́ра, ра́зве то́чию к еди́ному досто́йнейшему от све́рстник твои́х, с ни́мже и пу́ть богоуго́днаго и́ноческаго жития́ от дне́й о́трочества предъизбра́л еси́, преподо́бне. Те́мже ублажа́ем тя́ си́це:
Ра́дуйся, цве́те благоуха́нный до́браго воспита́ния; ра́дуйся, сосу́де Боже́ственнаго избра́ния.
Ра́дуйся, в ра́зуме Бо́гом просвеще́нный; ра́дуйся, се́рдцем в Бо́зе утвержде́нный.
Ра́дуйся, о́бразе содру́жества непоро́чнаго и неле́стнаго; ра́дуйся, вседуше́вне взыска́вый Ца́рствия Небе́снаго.
Ра́дуйся, преподо́бне о́тче Ио́сифе, богому́дре, чудотво́рче.
Кондак 3
Бу́рю помышле́ний мирски́х препобежда́я благода́тию Христо́вою, по́мыслом лу́чшим восте́кл еси́ к Небе́сным, преподо́бне, в Го́рняя впери́в у́м тво́й безмяте́жный и безстра́стный, и во́лю всеце́ло покори́в под и́го Христо́во, те́ло же твое́ соде́лал еси́ жили́ще Ду́ха Свята́го, отню́дуже и в телеси́, я́ко безпло́тен, со безпло́тными взыва́л еси́ Бо́гу: Аллилу́иа.
Икос 3
Ре́вность име́яй о соверше́ннем житии́ христиа́нстем и от писа́ний оте́ческих науче́н, е́же вда́ти себе́ в послуша́ние иску́сну руководи́телю и наста́внику неле́стну, в ю́ности роди́тели твоя́ оста́вил еси́, преподо́бне, и положи́л еси́ в се́рдцы твое́м вопроси́ти духо́внаго ста́рца Варсоно́фиа, да а́ще что́ рече́т, бу́ди то́ тебе́, я́ко сло́во Сама́го Бо́га, е́же и сверши́ся во благо́е Бо́жиим устрое́нием; сего́ ра́ди, толи́кое ве́ры твоея́ упова́ние ублажа́юще, взыва́ем ти́:
Ра́дуйся, я́ко любе́зная и кра́сная ми́ра сего́ презре́л еси́; ра́дуйся, я́ко Небе́сных и нетле́нных жела́нием вожделе́л еси́.
Ра́дуйся, вну́треннею Креста́ Христо́ва красото́ю восхище́нный; ра́дуйся, си́лою Свы́ше на тру́д крестоноше́ния облече́нный.
Ра́дуйся, во́лею тве́рдою во́ли своея́ отреки́йся; ра́дуйся, отсече́нием страсте́й угоди́вый Бо́гу и спасы́йся.
Ра́дуйся, преподо́бне о́тче Ио́сифе, богому́дре, чудотво́рче.
Кондак 4
Си́лою любве́ Бо́жия влеко́м к вя́щшему жития́ и́ноческаго соверше́нству и му́дре после́дуя сове́ту и благослове́нию прозорли́ваго и свята́го ста́рца Варсоно́фиа, прише́л еси́ во оби́тель преподо́бнаго Пафну́тия и того́ умоли́л еси́ прия́ти тя́ в послуша́ние, да ку́пно с ни́м в труде́х и по́двизех вы́ну благоугожда́яй Бо́гу, воспева́еши: Аллилу́иа.
Икос 4
Прови́дя ду́хом благо́е произволе́ние ю́ноши, чистоту́ же душе́вную и благода́тное призва́ние его́, преподо́бный Пафну́тий а́бие облече́ его́ во и́ноческий о́браз и возложи́ на́нь и́го послуша́ний, я́же со усе́рдием в простоте́ и в терпе́нии мно́зе исполня́ше, я́ко бы́ти ему́ о́бразом безпрекосло́внаго повинове́ния, труда́ и благоче́стия; те́мже ны́не зове́м ему́ си́це:
Ра́дуйся, те́сный пу́ть спасе́ния от ю́ности возлюби́вый; ра́дуйся, яре́м Госпо́день на вы́ю свою́ возложи́вый.
Ра́дуйся, свяще́нными обе́ты во́лю свою́ связа́вый; ра́дуйся, себе́ и ве́сь живо́т сво́й Го́сподеви преда́вый.
Ра́дуйся, коему́ждо во бла́го усе́рдный служи́телю; ра́дуйся, боля́щих и немощны́х успокои́телю.
Ра́дуйся, по́мыслы плотски́я си́лою моли́твы прогоня́яй; ра́дуйся, сомня́щихся в ве́ре сло́вом Бо́жиим утвержда́яй.
Ра́дуйся, преподо́бне о́тче Ио́сифе, богому́дре, чудотво́рче.
Кондак 5
Боже́ственною любо́вию распала́ем и бли́жних твои́х, и́же в ми́ре, не отве́рглся еси́ се́рдцем, преподо́бне: слы́шав бо ста́рца отца́ твоего́ в разслабле́нии теле́снем су́ща, умоли́л еси́ преподо́бнаго Пафну́тия во оби́тель того́ прия́ти и надо́лзе послужи́л еси́ боля́щему роди́телю твоему́, со вся́ким раче́нием призира́я его́ и пита́я теле́сне рука́ма твои́ма и духо́вне сло́вом Бо́жиим до са́мыя кончи́ны, я́ко тому́ взыва́ти к тебе́: Не а́з ти́ оте́ц, но ты́ ми́ оте́ц еси́. Се́й у́бо тру́д любве́ твоея́ сыно́вния восхваля́юще, я́ко же́ртву богоприя́тну, пое́м: Аллилу́иа.
Икос 5
Имы́й во оби́тели осмьна́десять ле́т жития́ в послуша́нии, бде́нии, поще́нии и науче́нии писа́нием святы́х и духоно́сных оте́ц, егда́ наста́ ча́с блаже́нныя кончи́ны преподо́бнаго Пафну́тия, нача́льствовати по не́м, а́ще и не хотя́й, призва́н бы́л еси́ и во пресви́тера поста́влен, да упра́виши до́бре собра́нное и́м ста́до Христо́во; ты́ же вма́ле нача́льствовав, па́ки управля́емь восхоте́л еси́ бы́ти, да приумно́жиши доброде́телей нетле́нная сокро́вища. Те́мже, дивя́щеся ре́вностному добротолю́бию и смиренному́дрию твоему́, вопие́м ти́:
Ра́дуйся, лише́нии теле́сными мно́га бла́га духо́вная собра́вый; ра́дуйся, нището́ю дарова́ния Небе́сная стяжа́вый.
Ра́дуйся, молча́ния изря́дный храни́телю; ра́дуйся, стро́гий уста́вов и́ноческих блюсти́телю.
Ра́дуйся, боля́щим, я́ко бра́тии Христо́вой, послужи́вый; ра́дуйся, высо́кий о́браз любве́ сыно́вния яви́вый.
Ра́дуйся, вла́сти над други́ми и че́сти уклони́выйся; ра́дуйся, па́ки, я́ко слуга́ не зна́емь, во оби́тель Кири́ллову всели́выйся.
Ра́дуйся, та́мо бра́шна уготовля́ти определе́нный; ра́дуйся, и в ру́бище ра́бстем позна́нный и обличе́нный.
Ра́дуйся, преподо́бне о́тче Ио́сифе, богому́дре, чудотво́рче.
Кондак 6
Купцу́ уподо́бился еси́, и́щущему до́браго би́сера, Ио́сифе преподо́бне, егда́ в послуша́нии и вся́цем по́двизе духо́внем благоиску́сен бы́в, оби́тели и́ноческия посеща́л еси́: да испы́тно позна́еши в те́х лу́чшая и соверше́ннейшая и приусво́иши на по́льзу ду́ш ста́да твоего́ слове́снаго, е́же ра́достию ве́лиею возра́довася возвраще́нию твоему́, благода́рственне взыва́я Пастыренача́льнику Христу́: Аллилу́иа.
Икос 6
Слы́шав благове́рный кня́зь Бори́с о прише́ствии преподо́бнаго Ио́сифа в его́ преде́лы, изше́д усе́рдно моля́ше и́, да избере́т в его́ насле́дии ме́сто, да согради́т на не́м святу́ю оби́тель и пребыва́ет в не́й со и́ноки, е́же и сверши́ся, дыха́нию бу́рну указу́ющу ме́сто, и устро́йся раче́нием кня́зя, па́че же благослове́нием Бо́жиим по моли́твам преподо́бнаго, ему́же с любо́вию взыва́ем си́це:
Ра́дуйся, высо́ких по́двигов жития́ христиа́нскаго ревни́телю; ра́дуйся, новонача́льных иску́сный руководи́телю.
Ра́дуйся, неизме́нное пра́вило поста́ и покая́ния; ра́дуйся, храни́телю непреста́ннаго воздержа́ния.
Ра́дуйся, мирски́м наста́вниче жи́зни богоуго́дныя; ра́дуйся, основа́телю оби́тели благопло́дныя.
Ра́дуйся, я́ко блага́я начина́ния твоя́ Христо́с благослови́; ра́дуйся, я́ко сотру́дника тебе́ в лице́ держа́внаго яви́.
Ра́дуйся, преподо́бне о́тче Ио́сифе, богому́дре, чудотво́рче.
Кондак 7
Ве́лие стяжа́в сокро́вище любве́, преподо́бне, я́коже во дни́ пе́рвых христиа́н, и́мже бе́ се́рдце и душа́ еди́на и от ни́хже никто́же от име́ний глаго́лаше что́ свое́ бы́ти, суди́л еси́ и во и́ноцех оби́тели твоея́, я́ко изволе́нием се́рдца отве́ргшихся ми́ра и его́ стяжа́ний, уста́вити сицева́го жи́тельства о́браз, да вси́ вку́пе еди́но взы́щут стяжа́ние ве́чное, Бо́га, Ему́же и да взыва́ют вы́ну: Аллилу́иа.
Икос 7
Но́ваго Феодо́сия, о́бщих жи́тий нача́льника, зри́т в тебе́ страна́ Росси́йская, преподо́бне о́тче Ио́сифе, я́коже бо то́й, и́ноческия обе́ты восприя́в, все́м се́рдцем и душе́ю уста́вом о́бщаго и́ноческаго жития́ пре́дан бя́ше, си́це и ты́, си́м ше́ствуяй путе́м, в терпе́нии мно́зе за́поведем общежи́тия святы́х оте́ц неукло́нно после́довал еси́, те́мже от чту́щих тя́ слы́шиши такова́я:
Ра́дуйся, о́бщее житие́ мона́шествующих основа́вый; ра́дуйся, те́м всеору́жие благоче́стия и́м пода́вый.
Ра́дуйся, о́бщими труды́ пра́здных по́мыслов шата́ния упраздни́вый; ра́дуйся, те́ми, я́ко броне́ю, страсте́й разжже́нныя стре́лы отрази́вый.
Ра́дуйся, всели́вый во оби́тели ду́х о́бщаго воздержа́ния; ра́дуйся, потреби́вый в не́й пле́велы любостяжа́ния.
Ра́дуйся, бо́дрствованию духо́вному мно́ги и́ноки научи́вый; ра́дуйся, до конца́ жития́ пе́рвый в тружда́ющихся бы́вый.
Ра́дуйся, преподо́бне о́тче Ио́сифе, богому́дре, чудотво́рче.
Кондак 8
Стра́нник прише́л еси́ в пусты́ню оте́чествия твоего́, преподо́бне, и а́бие домовлады́ка яви́лся еси́ Бо́гу, прекло́ньшу се́рдце во вла́сти су́щаго благове́рнаго кня́зя Бори́са е́же послужи́ти от име́ний свои́х на созида́ние це́ркве ка́менныя на ме́сте се́м, благоукра́сити же ю́ боголе́пно, и ке́ллии воздви́гнути мно́жащимся бра́тиям, да и зде́ си́ми, я́ко на небеси́ святы́ми А́нгелы, возно́сится Бо́гу пе́снь: Аллилу́иа.
Икос 8
Ви́дяще ре́вностное по Бо́зе и жесто́кое житие́ преподо́бнаго Ио́сифа и бра́тии, непреста́нно в труде́х и поще́нии подвиза́ющихся и ходя́щих в ру́бищных и худы́х оде́ждах, не́цыи от и́нок и вся́каго чи́на мирски́х люде́й и князе́й не то́чию си́х не отвраща́хуся, но па́че ре́вностию духо́вною горя́ще и во оби́тели ку́пно с ни́ми подвиза́тися жела́юще, приноша́ху ту́ име́ния своя́ на по́льзу о́бщую; те́мже зда́телю тоя́ возглаша́ем та́ко:
Ра́дуйся, му́дре предначерта́вый оби́тель но́ву; ра́дуйся, поревнова́вый нищетолю́бному житию́ Христо́ву.
Ра́дуйся, святы́я хра́мы во оби́тели созда́вый; ра́дуйся, мно́г собо́р мона́шествующих собра́вый.
Ра́дуйся, я́ко тру́д тво́й свы́ше благослови́ся; ра́дуйся, я́ко свято́е жела́ние се́рдца твоего́ соверши́ся.
Ра́дуйся, я́ко во оби́тели твое́й мно́зи ду́ши своя́ спасо́ша; ра́дуйся, я́ко из нея́ пастыренача́льницы изыдо́ша.
Ра́дуйся, преподо́бне о́тче Ио́сифе, богому́дре, чудотво́рче.
Кондак 9
Все́м се́рдцем возлюби́вый Бо́га и мно́га дарова́ния духо́вная от Него́ восприе́мый, преподо́бне Ио́сифе, и пред челове́ки толи́ку благода́ть обре́л еси́, я́ко не то́чию мно́зи от просты́х, но и кня́зи, тре́бующе твои́х наставле́ний, в послуша́ние тебе́ вдая́ху себе́ соверше́нно, и́мже миротво́рец бы́л еси́, исхода́тайствовав благоволе́ние самоде́ржца кня́зю Ю́рию, и́же непови́нне оклевета́н под стра́хом сме́ртным бя́ше, изба́влен же бы́в в ра́дости душе́вней возопи́ Бо́гу: Аллилу́иа.
Икос 9
Благода́ть Боже́ственная, привлека́емая моли́твами преподо́бнаго, я́ве зна́менася в не́м дарова́нии чудотворе́ний и ве́дением сокрове́нных: уме́рша бо благочести́ваго кня́зя Иоа́нна моли́твою свое́ю возбуди́, да коне́чне предугото́вится покая́нием и восприи́мет зало́г жи́зни ве́чныя, и та́ко да оты́дет ко Го́споду; те́мже во гресе́х живу́щии и де́йственнаго возбужде́ния на покая́ние тре́бующии возопии́м к нему́:
Ра́дуйся, благочести́вых отра́до и утеше́ние; ра́дуйся, коле́блющихся в ве́ре тве́рдое огражде́ние.
Ра́дуйся, отчаява́ющихся утвержда́яй во упова́нии; ра́дуйся, просвети́вый мно́гих твои́ми писа́нии.
Ра́дуйся, ми́р посреде́ вражду́ющих устроя́яй; ра́дуйся, непови́нныя от сме́рти избавля́яй.
Ра́дуйся, умира́ющия возставля́яй на покая́ние: ра́дуйся, все́м внуша́яй жи́зни ве́чныя взыска́ние.
Ра́дуйся, ше́ствовавый путе́м тру́дным и те́сным; ра́дуйся, возводя́й други́х к оби́телем небе́сным.
Ра́дуйся, преподо́бне о́тче Ио́сифе, богому́дре, чудотво́рче.
Кондак 10
Новоустро́енну оби́тель преподо́бнаго Ио́сифа испыта́ Госпо́дь посеще́нием гне́ва Своего́, ку́пно же и ми́лости: за грехи́ бо людски́я гла́д кре́пок наведе́ на зе́млю Волокола́мску и на вся́ окре́стныя ве́си, я́ко мно́гим лю́дем безго́дно погиба́ти. Преподо́бный же, уве́дев сия́, усугу́би во оби́тели моле́ние и отве́рзе жи́тницы тоя́ а́лчущим; разда́в же вся́ су́щая и не моги́й ктому́ не то́чию ты́сящ прише́дшаго наро́да, но ниже́ бра́тии своея́ препита́ти, посла́ заимова́ти на оби́тель сребро́ и ку́плю де́яй се́мен хле́бных, ника́коже оста́ви тре́бующия погиба́ти гла́дом, де́тем же и́х ма́лым осо́бь созда́ до́м, до́ндеже держа́вный благочести́вый ца́рь Васи́лий, слы́шав сия́, внеза́пу прии́де во оби́тель и дарова́ дово́льная ко призре́нию бе́дствующих, и́же, ви́дяще в се́м милосе́рдующую ру́ку Бо́жию, во умиле́нии серде́ц вознесо́ша хвале́бный гла́с Бо́гу: Аллилу́иа.
Икос 10
Благо́му изволе́нию держа́внаго после́дующе, мно́зи от военача́льник и князе́й уде́льных и ины́х христолю́бцев бога́тая дая́ния в оби́тель Ио́сифову приноша́ху, я́ко все́м прише́дшим к не́й гла́да ра́ди безбе́дно в до́мы своя́ возврати́тися и но́вым изоби́лием благослови́тися оби́тели преподо́бнаго, к нему́же взыва́ем ны́не:
Ра́дуйся, наде́ждо све́тлая в ну́жде и обстоя́нии су́щих; ра́дуйся, покрови́телю си́рых и кро́ва неиму́щих.
Ра́дуйся, гла́дом погиба́ющих пита́телю; ра́дуйся, ча́дом и́х вита́лища созида́телю.
Ра́дуйся, ми́лости исто́чниче неистощи́мый; ра́дуйся, скорбя́щих уте́шителю незри́мый.
Ра́дуйся, после́дняя твоя́ взаи́м Бо́гови да́вый; ра́дуйся, до́брым расточе́нием су́щих бога́тая собра́вый.
Ра́дуйся, преподо́бне о́тче Ио́сифе, богому́дре, чудотво́рче.
Кондак 11
Ве́дый от Боже́ственных писа́ний, я́ко еди́н упова́ющий на Го́спода пожене́т ты́сящи, и два́ дви́гнета тмы́, не убоя́лся еси́, преподо́бне, еди́н со святы́м Генна́дием со́нмищу си́льных побо́рников су́етных лжеуче́ний противуста́ти; и ору́жием и́стины в коне́ц си́х порази́л еси́: вси́ бо разсе́яшася, я́ко пра́х пред лице́м ве́тра, тебе́ же благода́рственно се́рдцем и усты́ взыва́ющу: Аллилу́иа.
Икос 11
Ве́руяй в Мя́,— рече́ Госпо́дь,— ре́ки от чре́ва его́ истеку́т во́ды жи́вы. Сия́ у́бо в тебе́ оправди́шася, досточу́дне Ио́сифе, не бо́ свяще́нным догма́том богосло́вия во учи́лищи не́коем наста́влен бы́л еси́, но са́м живо́ю ве́рою се́рдца взыску́яй Бо́га, и́стину обре́л еси́ в сло́ве Бо́жии и писа́ниих оте́ческих и яви́лся еси́ опло́т необори́м Правосла́вия. Те́мже взыва́ем ти́:
Ра́дуйся, лжеучи́телей злы́х лука́вство разори́вый; ра́дуйся, сомня́щихся в правосла́вней ве́ре утверди́вый.
Ра́дуйся, бо́дрый уче́ния Христо́ва защи́тниче; ра́дуйся, боголюби́вою ре́вностию возжже́нный свети́льниче.
Ра́дуйся, благопотре́бне во оте́чествии твое́м возсия́вый; ра́дуйся, ве́ру в де́лех жития́ твоего́ показа́вый.
Ра́дуйся, разу́мных и препро́стых благоиску́сный учи́телю; ра́дуйся, бли́жних и да́льних россия́н просвети́телю.
Ра́дуйся, преподо́бне о́тче Ио́сифе, богому́дре, чудотво́рче.
Кондак 12
Ми́ру водвори́вшуся в Це́ркви ду́х зло́бы па́ки, па́кости де́я, подви́гну се́рдце волоцка́го владе́теля коры́сти ра́ди мно́га смуще́ния и утесне́ния твори́ти оби́тели, еще́ же и осужде́ние непра́ведно воздви́гнути на преподо́бнаго, е́же и паде́ на главу́ осуди́вшаго; собо́ром бо свяще́нным преподо́бный Ио́сиф с вели́кою че́стию оправда́н бы́сть, при́сно воспева́яй Бо́гу: Аллилу́иа.
Икос 12
Тече́ние жития́ скончава́я в труде́х и моли́твах, и по́двизех благоче́стия, завеща́ преподо́бный неизме́нно храни́ти пре́данный и́м уста́в знамена́тельне прире́к: а́ще получу́ от Бо́га ми́лость, то́ оби́тель сия́ ничи́мже скудна́ бу́дет, и та́ко, заве́су пло́ти отложи́в, оты́де ко Го́споду и по си́х исцеле́ния подава́ше больны́м, приходя́щим с моли́твою к его́ моще́м. Сего́ ра́ди прино́сим ему́ похвале́ния такова́я:
Ра́дуйся, чистоты́ душе́вныя храни́телю нелицеме́рный; ра́дуйся, и́стинный ра́бе Христо́в благи́й и ве́рный.
Ра́дуйся, стрела́ми вра́жиих наве́т неуязви́мый; ра́дуйся, спаса́емых вождю́ непобеди́мый.
Ра́дуйся, досточу́дный о́бразе терпе́ния; ра́дуйся, наста́вниче неле́стнаго благогове́ния.
Ра́дуйся, и по отше́ствии оби́тель твою́ соблюда́яй; ра́дуйся, моля́щимся благопотре́бная подава́яй.
Ра́дуйся, от Го́спода вене́ц пра́вды восприя́вый; ра́дуйся, сла́вою чудотворе́ний просия́вый.
Ра́дуйся, преподо́бне о́тче Ио́сифе, богому́дре, чудотво́рче.
Кондак 13
О преподо́бне и богоно́сне о́тче Ио́сифе! Воспомина́юще ны́не по́двиги и труды́ твоя́, я́же о Христе́ соде́янная, мы́, гре́шнии и недосто́йнии раби́ твои́, смире́нно про́сим тя́: моли́ ми́лостиваго Бо́га, да да́рует ми́р жи́тельству на́шему и Це́ркви Свое́й Святе́й, да огради́т ю́ от все́х душепа́губных и безбо́жных уче́ний, да пода́ст же на́м вся́ благопотре́бная в житии́ се́м, и в бу́дущем ве́це да сподо́бит на́с воспева́ти Ему́: Аллилу́иа.
Повтор
Этот кондак читается трижды, затем икос 1-й и кондак 1-й.
Икос 1
А́нгела во пло́ти тя́ ве́дуще, преподо́бне Ио́сифе, по́сланна от Бо́га, да яви́т тобо́ю в челове́цех о́браз и́стиннаго благоче́стия и до́брых де́л, чудя́щеся путе́м Его́, во вре́меннем житии́ твое́м явле́нным, и вели́чие благоутро́бия Его́ прославля́юще, во умиле́нии серде́чнем взыва́ем ти́ си́це:
Ра́дуйся, до́браго ко́рене о́трасле благоро́дная; ра́дуйся, лозо́ виногра́да Христо́ва многопло́дная.
Ра́дуйся, ча́до моли́твы роди́телей благочести́вых; ра́дуйся, наде́ждо и утеше́ние серде́ц и́х боголюби́вых.
Ра́дуйся, изде́тска стра́х Госпо́день стяжа́вый; ра́дуйся, се́мя сло́ва Бо́жия от ю́ности восприя́вый.
Ра́дуйся, измла́да смире́ния и молча́ния храни́телю; ра́дуйся, моли́твы и воздержа́ния ревни́телю.
Ра́дуйся, преподо́бне о́тче Ио́сифе, богому́дре, чудотво́рче.
Кондак 1
Избра́нный уго́дниче Христо́в и ди́вный благоче́стия подви́жниче, преподо́бне о́тче Ио́сифе, и́же сугу́бый свы́ше да́р прие́мый богове́дения же и исцеле́ний, я́ко име́яй дерзнове́ние ко Святе́й Тро́ице моли́ изба́витися на́м от находя́щих бе́д и скорбе́й и боле́зней, да любо́вию зове́м ти́:
Ра́дуйся, преподо́бне о́тче Ио́сифе, богому́дре, чудотво́рче.
Молитвы
О вели́кий наста́вниче, ревни́телю и учи́телю правосла́вныя ве́ры, свя́те прему́дре Ио́сифе! Приими́ моле́ние на́с, гре́шных, тебе́ приноси́мое, и те́плым предста́тельством умоли́ в Тро́ице сла́вимаго Бо́га, да ниспо́слет бога́тыя Своя́ ми́лости на́м, гре́шным, да утверди́т во Святе́й Свое́й Правосла́вней Це́ркви пра́вую ве́ру и благоче́стие: па́стырем ея́ да пода́ст святу́ю ре́вность о спасе́нии слове́снаго ста́да, я́ко да ве́рующих соблюду́т, неве́рующих же и отпа́дших от и́стинныя ве́ры вразумя́т и обратя́т. Все́м же на́м испроси́ вся́ благопотре́бная во вре́меннем се́м житии́ и поле́зная к ве́чному спасе́нию на́шему. Помяни́ ста́до твое́, е́же собра́л еси́, не забу́ди посеща́ти ча́д твои́х и, я́ко чадолюби́вый оте́ц, не пре́зри, ниже́ отри́ни моле́ния на́ша, но воздежи́ ру́це твои́ моли́твеннеи ко Го́споду Бо́гу, да отложи́т пра́ведный гне́в Сво́й, дви́жимый на ны́, и изба́вит на́с от вра́г ви́димых и неви́димых, от гла́да, пото́па, меча́, смертоно́сныя я́звы, наше́ствия иноплеме́нных и междоусо́бныя бра́ни. Е́й, премилосе́рдый засту́пниче на́ш, пресла́вный чудотво́рче, все́х на́с упра́ви в ми́ре и покая́нии сконча́ти живо́т на́ш и пресели́тися со упова́нием в блаже́нная селе́ния ра́йския, иде́же непреста́нно славосло́вится всепе́тое И́мя Отца́ и Сы́на и Свята́го Ду́ха. Ами́нь.
О преблаже́нне и присносла́вне о́тче на́ш Ио́сифе! Ве́дуще твое́ ве́лие к Бо́гу дерзнове́ние и к твоему́ тве́рдому заступле́нию прибега́юще, в сокруше́нии се́рдца мо́лим тя́, озари́ на́с све́том дарова́нныя тебе́ благода́ти и моли́твами твои́ми помози́ на́м бу́рное мо́ре жития́ сего́ прейти́ безмяте́жно и приста́нища спасе́ния небла́зненно дости́гнути: порабоще́ни бо су́ще су́етными, и грехолюби́ви, и не́мощни е́же от обыше́дших на́с зо́л возни́кнути, к кому́ прибе́гнем, а́ще не к тебе́, яви́вшему неоскудева́емое бога́тство ми́лости в земне́м житии́ твое́м? Ве́руем же, я́ко и по отше́ствии твое́м мно́жайшее стяжа́л еси́ дарова́ние милосе́рдовати бе́дствующим. Те́мже у́бо, припа́дающе ны́не к цельбоно́сней ико́не твое́й, умиле́нно про́сим тя́, свя́тче Бо́жий: са́м искуше́н бы́в, помози́ и на́м, искуша́емым; посто́м и бде́нием попра́вый си́лу де́монскую, и на́с от нападе́ний вра́жиих защити́; препита́вый гла́дом погиба́ющих, и на́м испроси́ у Го́спода изоби́лие плодо́в земны́х и вся́ я́же ко спасе́нию потре́бная; посрами́вый ерети́ческая мудрова́ния, Це́рковь Святу́ю от ересе́й и раско́лов, и смуще́ний моли́твами твои́ми огради́: да то́жде му́дрствуем вси́, еди́нем се́рдцем сла́вяще Святу́ю, Единосу́щную, Животворя́щую и Неразде́льную Тро́ицу, Отца́ и Сы́на и Свята́го Ду́ха, во вся́ ве́ки. Ами́нь.
Конда́къ а҃
И҆збра́нный ᲂу҆го́дниче хрⷭ҇то́въ и҆ ди́вный бл҃гоче́стїѧ подви́жниче, прпⷣбне ѻ҆́ч҃е і҆ѡ́сифе, и҆́же сꙋгꙋ́бый свы́ше да́ръ прїе́мый бг҃овѣ́дѣнїѧ же и҆ и҆сцѣле́нїй, ꙗ҆́кѡ и҆мѣ́ѧй дерзнове́нїе ко ст҃ѣ́й трⷪ҇цѣ молѝ и҆зба́витисѧ на́мъ ѿ находѧ́щихъ бѣ́дъ и҆ скорбе́й и҆ болѣ́зней, да любо́вїю зове́мъ тѝ:
Ра́дꙋйсѧ, прпⷣбне ѻ҆́ч҃е і҆ѡ́сифе, бг҃омꙋ́дре, чꙋдотво́рче.
І҆́косъ а҃
А҆́гг҃ла во пло́ти тѧ̀ вѣ́дꙋще, прпⷣбне і҆ѡ́сифе, по́сланна ѿ бг҃а, да ꙗ҆ви́тъ тобо́ю въ чл҃вѣ́цѣхъ ѻ҆́бразъ и҆́стиннаго бл҃гоче́стїѧ и҆ до́брыхъ дѣ́лъ, чꙋдѧ́щесѧ пꙋтє́мъ є҆гѡ̀, во вре́меннѣмъ житїѝ твое́мъ ꙗ҆влє́ннымъ, и҆ вели́чїе бл҃гоꙋтро́бїѧ є҆гѡ̀ прославлѧ́юще, во ᲂу҆миле́нїи серде́чнѣмъ взыва́емъ тѝ си́це:
Ра́дꙋйсѧ, до́брагѡ ко́рене ѻ҆́трасле бл҃горо́днаѧ: ра́дꙋйсѧ, лозо̀ вїногра́да хрⷭ҇то́ва многопло́днаѧ.
Ра́дꙋйсѧ, ча́до моли́твы роди́телей бл҃гочести́выхъ: ра́дꙋйсѧ, наде́ждо и҆ ᲂу҆тѣше́нїе серде́цъ и҆́хъ бг҃олюби́выхъ.
Ра́дꙋйсѧ, и҆здѣ́тска стра́хъ гдⷭ҇нь стѧжа́вый: ра́дꙋйсѧ, сѣ́мѧ сло́ва бж҃їѧ ѿ ю҆́ности воспрїѧ́вый.
Ра́дꙋйсѧ, и҆змла́да смире́нїѧ и҆ молча́нїѧ храни́телю: ра́дꙋйсѧ, мл҃твы и҆ воздержа́нїѧ ревни́телю.
Ра́дꙋйсѧ, прпⷣбне ѻ҆́ч҃е і҆ѡ́сифе, бг҃омꙋ́дре, чꙋдотво́рче.
Конда́къ в҃
Ви́дѧ хрⷭ҇то́съ бл҃го́е се́рдца твоегѡ̀ и҆зволе́нїе и҆ раче́нїе, ꙗ҆́кѡ ѿ ю҆́ности немо́лчнѡ прославлѧ́лъ є҆сѝ и҆́мѧ гдⷭ҇не чте́нїемъ и҆ пѣ́нїемъ ѱалмѡ́въ и҆ пѣ́сней сщ҃е́нныхъ во ст҃ѣ́мъ хра́мѣ є҆гѡ̀, въ ски́нїи нбⷭ҇нѣй вчинѝ тѧ̀, прпⷣбне, въ ли́цѣ пра́вєдникъ соверше́нныхъ возноси́ти є҆мꙋ̀ кꙋ́пнѡ съ ни́ми а҆́гг҃льское пѣ́нїе: А҆ллилꙋ́їа.
І҆́косъ в҃
Разꙋмѣ́въ ѿ писа́нїй ѻ҆те́ческихъ бл҃ги́хъ мі́ра сегѡ̀ тщетꙋ̀, и҆схо́дъ же ѿ вре́меннаго сегѡ̀ житїѧ̀ непреста́ннѡ помышлѧ́ѧ и҆ пребыва́ѧ при́снѡ въ сокрове́ннѣмъ по́двизѣ мл҃твы, ника́коже се́рдцемъ прилѣпи́лсѧ є҆сѝ къ сꙋ́щимъ ѿ мі́ра, ра́звѣ то́чїю къ є҆ди́номꙋ досто́йнѣйшемꙋ ѿ свє́рстникъ твои́хъ, съ ни́мже и҆ пꙋ́ть бг҃оꙋго́днагѡ и҆́ноческаго житїѧ̀ ѿ дне́й ѻ҆́трочества пред̾избра́лъ є҆сѝ, прпⷣбне. Тѣ́мже ᲂу҆блажа́емъ тѧ̀ си́це:
Ра́дꙋйсѧ, цвѣ́те бл҃гоꙋха́нный до́брагѡ воспита́нїѧ: ра́дꙋйсѧ, сосꙋ́де бж҃е́ственнагѡ и҆збра́нїѧ.
Ра́дꙋйсѧ, въ ра́зꙋмѣ бг҃омъ просвѣще́нный: ра́дꙋйсѧ, се́рдцемъ въ бз҃ѣ ᲂу҆твержде́нный.
Ра́дꙋйсѧ, ѻ҆́бразе содрꙋ́жества непоро́чнагѡ и҆ неле́стнагѡ: ра́дꙋйсѧ, вседꙋше́внѣ взыска́вый црⷭ҇твїѧ нбⷭ҇нагѡ.
Ра́дꙋйсѧ, прпⷣбне ѻ҆́ч҃е і҆ѡ́сифе, бг҃омꙋ́дре, чꙋдотво́рче.
Конда́къ г҃
Бꙋ́рю помышле́нїй мїрски́хъ препобѣжда́ѧ бл҃года́тїю хрⷭ҇то́вою, по́мысломъ лꙋ́чшимъ восте́клъ є҆сѝ къ нбⷭ҇нымъ, прпⷣбне, въ гѡ́рнѧѧ впери́въ ᲂу҆́мъ тво́й безмѧте́жный и҆ безстра́стный, и҆ во́лю всецѣ́лѡ покори́въ под̾ и҆́го хрⷭ҇то́во, тѣ́ло же твоѐ содѣ́лалъ є҆сѝ жили́ще дх҃а ст҃а́гѡ, ѿню́дꙋже и҆ въ тѣлесѝ, ꙗ҆́кѡ безпло́тенъ, со безпло́тными взыва́лъ є҆сѝ бг҃ꙋ: А҆ллилꙋ́їа.
І҆́косъ г҃
Ре́вность и҆мѣ́ѧй ѡ҆ соверше́ннѣмъ житїѝ хрⷭ҇тїа́нстѣмъ и҆ ѿ писа́нїй ѻ҆те́ческихъ наꙋче́нъ, є҆́же вда́ти себѐ въ послꙋша́нїе и҆скꙋ́снꙋ рꙋководи́телю и҆ наста́вникꙋ неле́стнꙋ, въ ю҆́ности роди́тели твоѧ̑ ѡ҆ста́вилъ є҆сѝ, прпⷣбне, и҆ положи́лъ є҆сѝ въ се́рдцы твое́мъ вопроси́ти дꙋхо́внаго ста́рца варсоно́фїа, да а҆́ще что̀ рече́тъ, бꙋ́ди то̀ тебѣ̀, ꙗ҆́кѡ сло́во сама́гѡ бг҃а, є҆́же и҆ сверши́сѧ во бл҃го́е бж҃їимъ ᲂу҆строе́нїемъ: сегѡ̀ ра́ди, толи́кое вѣ́ры твоеѧ̀ ᲂу҆пова́нїе ᲂу҆блажа́юще, взыва́емъ тѝ:
Ра́дꙋйсѧ, ꙗ҆́кѡ любє́знаѧ и҆ кра̑снаѧ мі́ра сегѡ̀ презрѣ́лъ є҆сѝ: ра́дꙋйсѧ, ꙗ҆́кѡ нбⷭ҇ныхъ и҆ нетлѣ́нныхъ жела́нїемъ вожделѣ́лъ є҆сѝ.
Ра́дꙋйсѧ, внꙋ́треннею крⷭ҇та̀ хрⷭ҇то́ва красото́ю восхище́нный: ра́дꙋйсѧ, си́лою свы́ше на трꙋ́дъ крестоноше́нїѧ ѡ҆блече́нный.
Ра́дꙋйсѧ, во́лею тве́рдою во́ли своеѧ̀ ѿрекі́йсѧ: ра́дꙋйсѧ, ѿсѣче́нїемъ страсте́й ᲂу҆годи́вый бг҃ꙋ и҆ сп҃сы́йсѧ.
Ра́дꙋйсѧ, прпⷣбне ѻ҆́ч҃е і҆ѡ́сифе, бг҃омꙋ́дре, чꙋдотво́рче.
Конда́къ д҃
Си́лою любвѐ бж҃їѧ влеко́мъ къ вѧ́щшемꙋ житїѧ̀ и҆́ноческагѡ соверше́нствꙋ и҆ мꙋ́дрѣ послѣ́дꙋѧ совѣ́тꙋ и҆ бл҃гослове́нїю прозорли́вагѡ и҆ ст҃а́гѡ ста́рца варсоно́фїа, прише́лъ є҆сѝ во ѡ҆би́тель прпⷣбнагѡ пафнꙋ́тїа и҆ того̀ ᲂу҆моли́лъ є҆сѝ прїѧ́ти тѧ̀ въ послꙋша́нїе, да кꙋ́пнѡ съ ни́мъ въ трꙋдѣ́хъ и҆ по́двизѣхъ вы́нꙋ бл҃гоꙋгожда́ѧй бг҃ꙋ, воспѣва́еши: А҆ллилꙋ́їа.
І҆́косъ д҃
Прови́дѧ дꙋ́хомъ бл҃го́е произволе́нїе ю҆́ноши, чистотꙋ́ же дꙋше́внꙋю и҆ бл҃года́тное призва́нїе є҆гѡ̀, прпⷣбный пафнꙋ́тїй а҆́бїе ѡ҆блечѐ є҆гѡ̀ во и҆́ноческїй ѻ҆́бразъ и҆ возложѝ на́нь и҆́го послꙋша́нїй, ꙗ҆́же со ᲂу҆се́рдїемъ въ простотѣ̀ и҆ въ терпѣ́нїи мно́зѣ и҆сполнѧ́ше, ꙗ҆́кѡ бы́ти є҆мꙋ̀ ѻ҆́бразомъ безпрекосло́внаго повинове́нїѧ, трꙋда̀ и҆ бл҃гоче́стїѧ: тѣ́мже ны́нѣ зове́мъ є҆мꙋ̀ си́це:
Ра́дꙋйсѧ, тѣ́сный пꙋ́ть спасе́нїѧ ѿ ю҆́ности возлюби́вый: ра́дꙋйсѧ, ꙗ҆ре́мъ гдⷭ҇ень на вы́ю свою̀ возложи́вый.
Ра́дꙋйсѧ, сщ҃е́нными ѡ҆бѣ́ты во́лю свою̀ свѧза́вый: ра́дꙋйсѧ, себѐ и҆ ве́сь живо́тъ сво́й гдⷭ҇еви преда́вый.
Ра́дꙋйсѧ, коемꙋ́ждо во бл҃го ᲂу҆се́рдный слꙋжи́телю: ра́дꙋйсѧ, болѧ́щихъ и҆ немощны́хъ ᲂу҆спокои́телю.
Ра́дꙋйсѧ, по́мыслы плотскі̑ѧ си́лою мл҃твы прогонѧ́ѧй: ра́дꙋйсѧ, сомнѧ́щихсѧ въ вѣ́рѣ сло́вомъ бж҃їимъ ᲂу҆твержда́ѧй.
Ра́дꙋйсѧ, прпⷣбне ѻ҆́ч҃е і҆ѡ́сифе, бг҃омꙋ́дре, чꙋдотво́рче.
Конда́къ є҃
Бж҃е́ственною любо́вїю распала́емъ и҆ бли́жнихъ твои́хъ, и҆̀же въ мі́рѣ, не ѿве́рглсѧ є҆сѝ се́рдцемъ, прпⷣбне: слы́шавъ бо ста́рца ѻ҆тца̀ твоего̀ въ разслабле́нїи тѣле́снѣмъ сꙋ́ща, ᲂу҆моли́лъ є҆сѝ прпⷣбнаго пафнꙋ́тїа во ѡ҆би́тель того̀ прїѧ́ти и҆ надо́лзѣ послꙋжи́лъ є҆сѝ болѧ́щемꙋ роди́телю твоемꙋ̀, со всѧ́кимъ раче́нїемъ призира́ѧ є҆го̀ и҆ пита́ѧ тѣле́снѣ рꙋка́ма твои́ма и҆ дꙋхо́внѣ сло́вомъ бж҃їимъ до са́мыѧ кончи́ны, ꙗ҆́кѡ томꙋ̀ взыва́ти къ тебѣ̀: не а҆́зъ тѝ ѻ҆те́цъ, но ты̀ мѝ ѻ҆те́цъ є҆сѝ. Се́й ᲂу҆̀бо трꙋ́дъ любвѐ твоеѧ̀ сыно́внїѧ восхвалѧ́юще, ꙗ҆́кѡ же́ртвꙋ бг҃опрїѧ́тнꙋ, пое́мъ: А҆ллилꙋ́їа.
І҆́косъ є҃
И҆мы́й во ѡ҆би́тели ѻ҆смьна́десѧть лѣ́тъ житїѧ̀ въ послꙋша́нїи, бдѣ́нїи, поще́нїи и҆ наꙋче́нїи писа́нїємъ ст҃ы́хъ и҆ дх҃оно́сныхъ ѻ҆тє́цъ, є҆гда̀ наста̀ ча́съ бл҃же́нныѧ кончи́ны прпⷣбнагѡ пафнꙋ́тїа, нача́льствовати по не́мъ, а҆́ще и҆ не хотѧ́й, призва́нъ бы́лъ є҆сѝ и҆ во пресвѵ́тера поста́вленъ, да ᲂу҆пра́виши до́брѣ собра́нное и҆̀мъ ста́до хрⷭ҇то́во: ты́ же вма́лѣ нача́льствовавъ, па́ки ᲂу҆правлѧ́емь восхотѣ́лъ є҆сѝ бы́ти, да прїꙋмно́жиши добродѣ́телей нетлѣ̑ннаѧ сокрѡ́вища. Тѣ́мже, дивѧ́щесѧ ре́вностномꙋ добротолю́бїю и҆ смиренномꙋ́дрїю твоемꙋ̀, вопїе́мъ тѝ:
Ра́дꙋйсѧ, лишє́нїи тѣле́сными мнѡ́га бла́га дꙋхѡ́внаѧ собра́вый: ра́дꙋйсѧ, нището́ю дарова̑нїѧ нбⷭ҇наѧ стѧжа́вый.
Ра́дꙋйсѧ, молча́нїѧ и҆зрѧ́дный храни́телю: ра́дꙋйсѧ, стро́гїй ᲂу҆ста́вѡвъ и҆́ноческихъ блюсти́телю.
Ра́дꙋйсѧ, болѧ́щимъ, ꙗ҆́кѡ бра́тїи хрⷭ҇то́вой, послꙋжи́вый: ра́дꙋйсѧ, высо́кїй ѻ҆́бразъ любвѐ сыно́внїѧ ꙗ҆ви́вый.
Ра́дꙋйсѧ, вла́сти над̾ дрꙋги́ми и҆ че́сти ᲂу҆клони́выйсѧ: ра́дꙋйсѧ, па́ки, ꙗ҆́кѡ слꙋга̀ не зна́емь, во ѡ҆би́тель кѷри́лловꙋ всели́выйсѧ.
Ра́дꙋйсѧ, та́мѡ бра̑шна ᲂу҆готовлѧ́ти ѡ҆предѣле́нный: ра́дꙋйсѧ, и҆ въ рꙋ́бище ра́бстѣмъ позна́нный и҆ ѡ҆бличе́нный.
Ра́дꙋйсѧ, прпⷣбне ѻ҆́ч҃е і҆ѡ́сифе, бг҃омꙋ́дре, чꙋдотво́рче.
Конда́къ ѕ҃
Кꙋпцꙋ̀ ᲂу҆подо́билсѧ є҆сѝ, и҆́щꙋщемꙋ до́брагѡ би́сера, і҆ѡ́сифе прпⷣбне, є҆гда̀ въ послꙋша́нїи и҆ всѧ́цѣмъ по́двизѣ дх҃о́внѣмъ благоискꙋ́сенъ бы́въ, ѡ҆би́тєли и҆́ноческїѧ посѣща́лъ є҆сѝ: да и҆спы́тнѡ позна́еши въ тѣ́хъ лꙋ́чшаѧ и҆ совершє́ннѣйшаѧ и҆ прїꙋсво́иши на по́льзꙋ дꙋ́шъ ста́да твоегѡ̀ слове́снагѡ, є҆́же ра́достїю ве́лїею возра́довасѧ возвраще́нїю твоемꙋ̀, бл҃года́рственнѣ взыва́ѧ пастыренача́льникꙋ хрⷭ҇тꙋ̀: А҆ллилꙋ́їа.
І҆́косъ ѕ҃
Слы́шавъ бл҃говѣ́рный кнѧ́зь бори́съ ѡ҆ прише́ствїи прпⷣбнагѡ і҆ѡ́сифа въ є҆гѡ̀ предѣ́лы, и҆зше́дъ ᲂу҆се́рднѡ молѧ́ше и҆̀, да и҆збере́тъ въ є҆гѡ̀ наслѣ́дїи мѣ́сто, да согради́тъ на не́мъ ст҃ꙋ́ю ѡ҆би́тель и҆ пребыва́етъ въ не́й со и҆́ноки, є҆́же и҆ сверши́сѧ, дыха́нїю бꙋ́рнꙋ ᲂу҆казꙋ́ющꙋ мѣ́сто, и҆ ᲂу҆стро́йсѧ раче́нїемъ кнѧ́зѧ, па́че же бл҃гослове́нїемъ бж҃їимъ по мл҃твамъ прпⷣбнагѡ, є҆мꙋ́же съ любо́вїю взыва́емъ си́це:
Ра́дꙋйсѧ, высо́кихъ по́двигѡвъ житїѧ̀ хрⷭ҇тїа́нскагѡ ревни́телю: ра́дꙋйсѧ, новонача́льныхъ и҆скꙋ́сный рꙋководи́телю.
Ра́дꙋйсѧ, неизмѣ́нное пра́вило поста̀ и҆ покаѧ́нїѧ: ра́дꙋйсѧ, храни́телю непреста́ннагѡ воздержа́нїѧ.
Ра́дꙋйсѧ, мїрски̑мъ наста́вниче жи́зни бг҃оꙋго́дныѧ: ра́дꙋйсѧ, ѡ҆снова́телю ѻ҆би́тели благопло́дныѧ.
Ра́дꙋйсѧ, ꙗ҆́кѡ бл҃га̑ѧ начина̑нїѧ твоѧ̑ хрⷭ҇то́съ бл҃гословѝ: ра́дꙋйсѧ, ꙗ҆́кѡ сотрꙋ́дника тебѣ̀ въ лицѣ̀ держа́внагѡ ꙗ҆вѝ.
Ра́дꙋйсѧ, прпⷣбне ѻ҆́ч҃е і҆ѡ́сифе, бг҃омꙋ́дре, чꙋдотво́рче.
Конда́къ з҃
Ве́лїе стѧжа́въ сокро́вище любвѐ, прпⷣбне, ꙗ҆́кѡже во дни̑ пе́рвыхъ хрⷭ҇тїа́нъ, и҆̀мже бѣ̀ се́рдце и҆ дꙋша̀ є҆ди́на и҆ ѿ ни́хже никто́же ѿ и҆мѣ́нїй глаго́лаше что̀ своѐ бы́ти, сꙋди́лъ є҆сѝ и҆ во и҆́ноцѣхъ ѡ҆би́тели твоеѧ̀, ꙗ҆́кѡ и҆зволе́нїемъ се́рдца ѿве́ргшихсѧ мі́ра и҆ є҆гѡ̀ стѧжа́нїй, ᲂу҆ста́вити сицева́гѡ жи́тельства ѻ҆́бразъ, да всѝ вкꙋ́пѣ є҆ди́но взы́щꙋтъ стѧжа́нїе вѣ́чное, бг҃а, є҆мꙋ́же и҆ да взыва́ютъ вы́нꙋ: А҆ллилꙋ́їа.
І҆́косъ з҃
Но́ваго ѳеодо́сїѧ, ѻ҆́бщихъ жи́тїй нача́льника, зри́тъ въ тебѣ̀ страна̀ рѡссі́йскаѧ, прпⷣбне ѻ҆́ч҃е і҆ѡ́сифе, ꙗ҆́кѡже бо то́й, и҆́ноческїѧ ѡ҆бѣ́ты воспрїѧ́въ, всѣ́мъ се́рдцемъ и҆ дꙋше́ю ᲂу҆ста́вѡмъ ѻ҆́бщагѡ и҆́ноческаго житїѧ̀ пре́данъ бѧ́ше, си́це и҆ ты̀, си́мъ ше́ствꙋѧй пꙋте́мъ, въ терпѣ́нїи мно́зѣ за́повѣдемъ ѻ҆бщежи́тїѧ ст҃ы́хъ ѻ҆тє́цъ неꙋкло́ннѡ послѣ́довалъ є҆сѝ, тѣ́мже ѿ чтꙋ́щихъ тѧ̀ слы́шиши такова̑ѧ:
Ра́дꙋйсѧ, ѻ҆́бщее житїѐ мона́шествꙋющихъ ѡ҆снова́вый: ра́дꙋйсѧ, тѣ́мъ всеѡрꙋ́жїе бл҃гоче́стїѧ и҆̀мъ пода́вый.
Ра́дꙋйсѧ, ѻ҆́бщими трꙋды̀ пра́здныхъ по́мыслѡвъ шата̑нїѧ ᲂу҆праздни́вый: ра́дꙋйсѧ, тѣ́ми, ꙗ҆́кѡ броне́ю, страсте́й разжжє́нныѧ стрѣ́лы ѿрази́вый.
Ра́дꙋйсѧ, всели́вый во ѡ҆би́тели дꙋ́хъ ѻ҆́бщагѡ воздержа́нїѧ: ра́дꙋйсѧ, потреби́вый въ не́й пле́велы любостѧжа́нїѧ.
Ра́дꙋйсѧ, бо́дрствованїю дꙋхо́вномꙋ мнѡ́ги и҆́ноки наꙋчи́вый: ра́дꙋйсѧ, до конца̀ житїѧ̀ пе́рвый въ трꙋжда́ющихсѧ бы́вый.
Ра́дꙋйсѧ, прпⷣбне ѻ҆́ч҃е і҆ѡ́сифе, бг҃омꙋ́дре, чꙋдотво́рче.
Конда́къ и҃
Стра́нникъ прише́лъ є҆сѝ въ пꙋсты́ню ѻ҆те́чествїѧ твоегѡ̀, прпⷣбне, и҆ а҆́бїе домовлⷣка ꙗ҆ви́лсѧ є҆сѝ бг҃ꙋ, прекло́ньшꙋ се́рдце во вла́сти сꙋ́щагѡ бл҃говѣ́рнагѡ кнѧ́зѧ бори́са є҆́же послꙋжи́ти ѿ и҆мѣ́нїй свои́хъ на созида́нїе цр҃кве ка́менныѧ на мѣ́сте се́мъ, бл҃гоꙋкра́сити же ю҆̀ бг҃олѣ́пнѡ, и҆ кє́ллїи воздви́гнꙋти мно́жащимсѧ бра́тїѧмъ, да и҆ здѣ̀ си́ми, ꙗ҆́кѡ на нб҃сѝ ст҃ы́ми а҆́гг҃лы, возно́ситсѧ бг҃ꙋ пѣ́снь: А҆ллилꙋ́їа.
І҆́косъ и҃
Ви́дѧще ре́вностное по бз҃ѣ и҆ жесто́кое житїѐ прпⷣбнагѡ і҆ѡ́сифа и҆ бра́тїи, непреста́ннѡ въ трꙋдѣ́хъ и҆ поще́нїи подвиза́ющихсѧ и҆ ходѧ́щихъ въ рꙋ́бищныхъ и҆ хꙋды́хъ ѡ҆де́ждахъ, нѣ́цыи ѿ и҆́нокъ и҆ всѧ́кагѡ чи́на мїрски́хъ люде́й и҆ кнѧзе́й не то́чїю си́хъ не ѿвраща́хꙋсѧ, но па́че ре́вностїю дꙋхо́вною горѧ́ще и҆ во ѡ҆би́тели кꙋ́пнѡ съ ни́ми подвиза́тисѧ жела́юще, приноша́хꙋ тꙋ̀ и҆мѣ̑нїѧ своѧ̀ на по́льзꙋ ѻ҆́бщꙋю: тѣ́мже зда́телю тоѧ̀ возглаша́емъ та́кѡ:
Ра́дꙋйсѧ, мꙋ́дрѣ предначерта́вый ѡ҆би́тель но́вꙋ: ра́дꙋйсѧ, поревнова́вый нищетолю́бномꙋ житїю̀ хрⷭ҇то́вꙋ.
Ра́дꙋйсѧ, ст҃ы̑ѧ хра́мы во ѡ҆би́тели созда́вый: ра́дꙋйсѧ, мно́гъ собо́ръ мона́шествꙋющихъ собра́вый.
Ра́дꙋйсѧ, ꙗ҆́кѡ трꙋ́дъ тво́й свы́ше бл҃гослови́сѧ: ра́дꙋйсѧ, ꙗ҆́кѡ ст҃о́е жела́нїе се́рдца твоегѡ̀ соверши́сѧ.
Ра́дꙋйсѧ, ꙗ҆́кѡ во ѡ҆би́тели твое́й мно́зи дꙋ́шы своѧ̑ сп҃со́ша: ра́дꙋйсѧ, ꙗ҆́кѡ и҆з̾ неѧ̀ пастыренача́льницы и҆зыдо́ша.
Ра́дꙋйсѧ, прпⷣбне ѻ҆́ч҃е і҆ѡ́сифе, бг҃омꙋ́дре, чꙋдотво́рче.
Конда́къ ѳ҃
Всѣ́мъ се́рдцемъ возлюби́вый бг҃а и҆ мнѡ́га дарова̑нїѧ дх҃ѡ́внаѧ ѿ него̀ воспрїе́мый, прпⷣбне і҆ѡ́сифе, и҆ пред̾ чл҃вѣ́ки толи́кꙋ бл҃года́ть ѡ҆брѣ́лъ є҆сѝ, ꙗ҆́кѡ не то́чїю мно́зи ѿ просты́хъ, но и҆ кнѧ́зи, тре́бꙋюще твои́хъ наставле́нїй, въ послꙋша́нїе тебѣ̀ вдаѧ́хꙋ себѐ соверше́ннѡ, и҆̀мже миротво́рецъ бы́лъ є҆сѝ, и҆схода́тайствовавъ бл҃говоле́нїе самоде́ржца кнѧ́зю ю҆́рїꙋ, и҆́же непови́ннѣ ѡ҆клевета́нъ под̾ стра́хомъ сме́ртнымъ бѧ́ше, и҆зба́вленъ же бы́въ въ ра́дости дꙋше́внѣй возопѝ бг҃ꙋ: А҆ллилꙋ́їа.
І҆́косъ ѳ҃
Бл҃года́ть бж҃е́ственнаѧ, привлека́емаѧ мл҃твами прпⷣбнагѡ, ꙗ҆́вѣ зна́менасѧ въ не́мъ дарова̑нїи чꙋдотворе́нїй и҆ вѣ́дѣнїемъ сокрове́нныхъ: ᲂу҆ме́рша бо бл҃гочести́ваго кнѧ́зѧ і҆ѡа́нна мл҃твою свое́ю возбꙋдѝ, да коне́чнѣ пред̾ꙋгото́витсѧ покаѧ́нїемъ и҆ воспрїи́метъ зало́гъ жи́зни вѣ́чныѧ, и҆ та́кѡ да ѿы́детъ ко гдⷭ҇ꙋ: тѣ́мже во грѣсѣ́хъ живꙋ́щїи и҆ дѣ́йственнагѡ возбꙋжде́нїѧ на покаѧ́нїе тре́бꙋющїи возопїи́мъ къ немꙋ̀:
Ра́дꙋйсѧ, бл҃гочести́выхъ ѿра́до и҆ ᲂу҆тѣше́нїе: ра́дꙋйсѧ, коле́блющихсѧ въ вѣ́рѣ тве́рдое ѡ҆гражде́нїе.
Ра́дꙋйсѧ, ѿчаѧва́ющихсѧ ᲂу҆твержда́ѧй во ᲂу҆пова́нїи: ра́дꙋйсѧ, просвѣти́вый мно́гихъ твои́ми писа̑нїи.
Ра́дꙋйсѧ, ми́ръ посредѣ̀ враждꙋ́ющихъ ᲂу҆строѧ́ѧй: ра́дꙋйсѧ, непови̑нныѧ ѿ сме́рти и҆збавлѧ́ѧй.
Ра́дꙋйсѧ, ᲂу҆мира́ющїѧ возставлѧ́ѧй на покаѧ́нїе: ра́дꙋйсѧ, всѣ̑мъ внꙋша́ѧй жи́зни вѣ́чныѧ взыска́нїе.
Ра́дꙋйсѧ, ше́ствовавый пꙋте́мъ трꙋ́днымъ и҆ тѣ́снымъ: ра́дꙋйсѧ, возводѧ́й дрꙋги́хъ къ ѡ҆би́телемъ нбⷭ҇нымъ.
Ра́дꙋйсѧ, прпⷣбне ѻ҆́ч҃е і҆ѡ́сифе, бг҃омꙋ́дре, чꙋдотво́рче.
Конда́къ і҃
Новоꙋстро́еннꙋ ѡ҆би́тель прпⷣбнаго і҆ѡ́сифа и҆спыта̀ гдⷭ҇ь посѣще́нїемъ гнѣ́ва своегѡ̀, кꙋ́пнѡ же и҆ ми́лости: за грѣхѝ бо людскі̑ѧ гла́дъ крѣ́покъ наведѐ на зе́млю волокола́мскꙋ и҆ на всѧ̑ ѡ҆крє́стныѧ вє́си, ꙗ҆́кѡ мнѡ́гимъ лю́демъ безго́днѡ погиба́ти. Прпⷣбный же, ᲂу҆вѣ́дѣвъ сїѧ̑, ᲂу҆сꙋгꙋ́би во ѡ҆би́тели моле́нїе и҆ ѿве́рзе жи̑тницы тоѧ̀ а҆́лчꙋщимъ: разда́въ же всѧ̑ сꙋ̑щаѧ и҆ не могі́й ктомꙋ̀ не то́чїю ты́сѧщъ прише́дшагѡ наро́да, но нижѐ бра́тїи своеѧ̀ препита́ти, посла̀ заимова́ти на ѡ҆би́тель сребро̀ и҆ кꙋ́плю дѣ́ѧй сѣ́менъ хлѣ́бныхъ, ника́коже ѡ҆ста́ви тре́бꙋющїѧ погиба́ти гла́домъ, дѣ́темъ же и҆̀хъ ма̑лымъ ѻ҆со́бь созда̀ до́мъ, до́ндеже держа́вный бл҃гочести́вый ца́рь васі́лїй, слы́шавъ сїѧ̑, внеза́пꙋ прїи́де во ѡ҆би́тель и҆ дарова̀ довѡ́льнаѧ ко призрѣ́нїю бѣ́дствꙋющихъ, и҆̀же, ви́дѧще въ се́мъ милосе́рдꙋющꙋю рꙋ́кꙋ бж҃їю, во ᲂу҆миле́нїи сердє́цъ вознесо́ша хвале́бный гла́съ бг҃ꙋ: А҆ллилꙋ́їа.
І҆́косъ і҃
Бл҃го́мꙋ и҆зволе́нїю держа́внагѡ послѣ́дꙋюще, мно́зи ѿ военача̑льникъ и҆ кнѧзе́й ᲂу҆дѣ́льныхъ и҆ и҆ны́хъ хрⷭ҇толю́бцєвъ бога̑таѧ даѧ̑нїѧ въ ѡ҆би́тель і҆ѡ́сифовꙋ приноша́хꙋ, ꙗ҆́кѡ всѣ̑мъ прише́дшымъ къ не́й гла́да ра́ди безбѣ́днѡ въ до́мы своѧ̑ возврати́тисѧ и҆ но́вымъ и҆з̾ѻби́лїемъ бл҃гослови́тисѧ ѡ҆би́тели прпⷣбнагѡ, къ немꙋ́же взыва́емъ ны́нѣ:
Ра́дꙋйсѧ, наде́ждо свѣ́тлаѧ въ нꙋ́ждѣ и҆ ѡ҆бстоѧ́нїи сꙋ́щихъ: ра́дꙋйсѧ, покрови́телю си́рыхъ и҆ кро́ва неимꙋ́щихъ.
Ра́дꙋйсѧ, гла́домъ погиба́ющихъ пита́телю: ра́дꙋйсѧ, ча́дѡмъ и҆̀хъ вита́лища созида́телю.
Ра́дꙋйсѧ, ми́лости и҆сто́чниче неистощи́мый: ра́дꙋйсѧ, скорбѧ́щихъ ᲂу҆тѣ́шителю незри́мый.
Ра́дꙋйсѧ, послѣ̑днѧѧ твоѧ̑ взаи́мъ бг҃ови да́вый: ра́дꙋйсѧ, до́брымъ расточе́нїемъ сꙋ́щихъ бога̑таѧ собра́вый.
Ра́дꙋйсѧ, прпⷣбне ѻ҆́ч҃е і҆ѡ́сифе, бг҃омꙋ́дре, чꙋдотво́рче.
Конда́къ а҃і
Вѣ́дый ѿ бж҃е́ственныхъ писа́нїй, ꙗ҆́кѡ є҆ди́нъ ᲂу҆пова́ющїй на гдⷭ҇а пожене́тъ ты́сѧщи, и҆ два̀ дви́гнета тмы̀, не ᲂу҆боѧ́лсѧ є҆сѝ, прпⷣбне, є҆ди́нъ со ст҃ы́мъ генна́дїемъ со́нмищꙋ си́льныхъ побо́рникѡвъ сꙋ́етныхъ лжеꙋче́нїй противꙋста́ти, и҆ ѡ҆рꙋ́жїемъ и҆́стины въ коне́цъ си́хъ порази́лъ є҆сѝ: вси́ бо разсѣ́ѧшасѧ, ꙗ҆́кѡ пра́хъ пред̾ лице́мъ вѣ́тра, тебѣ̀ же бл҃года́рственнѡ се́рдцемъ и҆ ᲂу҆сты̀ взыва́ющꙋ: А҆ллилꙋ́їа.
І҆́косъ а҃і
Вѣ́рꙋѧй въ мѧ̀, речѐ гдⷭ҇ь, рѣ́ки ѿ чре́ва є҆гѡ̀ и҆стекꙋ́тъ во́ды жи́вы. Сїѧ̑ ᲂу҆́бо въ тебѣ̀ ѡ҆правди́шасѧ, досточꙋ́дне і҆ѡ́сифе, не бо̀ сщ҃е́ннымъ догма́тѡмъ бг҃осло́вїѧ во ᲂу҆чи́лищи нѣ́коемъ наста́вленъ бы́лъ є҆сѝ, но са́мъ живо́ю вѣ́рою се́рдца взыскꙋ́ѧй бг҃а, и҆́стинꙋ ѡ҆брѣ́лъ є҆сѝ въ сло́вѣ бж҃їи и҆ писа́нїихъ ѻ҆те́ческихъ и҆ ꙗ҆ви́лсѧ є҆сѝ ѡ҆пло́тъ неѡбори́мъ правосла́вїѧ. Тѣ́мже взыва́емъ тѝ:
Ра́дꙋйсѧ, лжеꙋчи́телей ѕлы́хъ лꙋка́вство разори́вый: ра́дꙋйсѧ, сомнѧ́щихсѧ въ правосла́внѣй вѣ́рѣ ᲂу҆тверди́вый.
Ра́дꙋйсѧ, бо́дрый ᲂу҆че́нїѧ хрⷭ҇то́ва защи́тниче: ра́дꙋйсѧ, бг҃олюби́вою ре́вностїю возжже́нный свѣти́льниче.
Ра́дꙋйсѧ, бл҃гопотре́бнѣ во ѻ҆те́чествїи твое́мъ возсїѧ́вый: ра́дꙋйсѧ, вѣ́рꙋ въ дѣ́лѣхъ житїѧ̀ твоегѡ̀ показа́вый.
Ра́дꙋйсѧ, разꙋ́мныхъ и҆ препро́стыхъ бл҃гоискꙋ́сный ᲂу҆чи́телю: ра́дꙋйсѧ, бли́жнихъ и҆ да́льнихъ рѡссїѧ́нъ просвѣти́телю.
Ра́дꙋйсѧ, прпⷣбне ѻ҆́ч҃е і҆ѡ́сифе, бг҃омꙋ́дре, чꙋдотво́рче.
Конда́къ в҃і
Ми́рꙋ водвори́вшꙋсѧ въ цр҃кви дꙋ́хъ ѕло́бы па́ки, па́кѡсти дѣ́ѧ, подви́гнꙋ се́рдце волоцка́гѡ владѣ́телѧ коры̑сти ра́ди мнѡ́га смꙋщє́нїѧ и҆ ᲂу҆тѣснє́нїѧ твори́ти ѡ҆би́тели, є҆щѐ же и҆ ѡ҆сꙋжде́нїе непра́веднѡ воздви́гнꙋти на прпⷣбнаго, є҆́же и҆ падѐ на главꙋ̀ ѡ҆сꙋди́вшаго: собо́ромъ бо сщ҃е́ннымъ прпⷣбный і҆ѡ́сифъ съ вели́кою че́стїю ѡ҆правда́нъ бы́сть, при́снѡ воспѣва́ѧй бг҃ꙋ: А҆ллилꙋ́їа.
І҆́косъ в҃і
Тече́нїе житїѧ̀ скончава́ѧ въ трꙋдѣ́хъ и҆ мл҃твахъ, и҆ по́двизѣхъ бл҃гоче́стїѧ, завѣща̀ прпⷣбный неизмѣ́ннѡ храни́ти пре́данный и҆̀мъ ᲂу҆ста́въ знамена́тельнѣ прире́къ: а҆́ще полꙋчꙋ̀ ѿ бг҃а ми́лость, то̀ ѡ҆би́тель сїѧ̀ ничи́мже скꙋдна̀ бꙋ́детъ, и҆ та́кѡ, завѣ́сꙋ пло́ти ѿложи́въ, ѿы́де ко гдⷭ҇ꙋ и҆ по си́хъ и҆сцѣлє́нїѧ подава́ше больны̑мъ, приходѧ́щымъ съ мл҃твою къ є҆гѡ̀ моще́мъ. Сегѡ̀ ра́ди прино́симъ є҆мꙋ̀ похвалє́нїѧ такѡва́ѧ:
Ра́дꙋйсѧ, чистоты̀ дꙋше́вныѧ храни́телю нелицемѣ́рный: ра́дꙋйсѧ, и҆́стинный ра́бе хрⷭ҇то́въ благі́й и҆ вѣ́рный.
Ра́дꙋйсѧ, стрѣла́ми вра́жїихъ навѣ̑тъ неꙋѧзви́мый: ра́дꙋйсѧ, сп҃са́емыхъ вождю̀ непобѣди́мый.
Ра́дꙋйсѧ, досточꙋ́дный ѻ҆́бразе терпѣ́нїѧ: ра́дꙋйсѧ, наста́вниче неле́стнагѡ бл҃гоговѣ́нїѧ.
Ра́дꙋйсѧ, и҆ по ѿше́ствїи ѡ҆би́тель твою̀ соблюда́ѧй: ра́дꙋйсѧ, молѧ́щымсѧ бл҃гопотрє́бнаѧ подава́ѧй.
Ра́дꙋйсѧ, ѿ гдⷭ҇а вѣне́цъ пра́вды воспрїѧ́вый: ра́дꙋйсѧ, сла́вою чꙋдотворе́нїй просїѧ́вый.
Ра́дꙋйсѧ, прпⷣбне ѻ҆́ч҃е і҆ѡ́сифе, бг҃омꙋ́дре, чꙋдотво́рче.
Конда́къ г҃і
Ѽ, прпⷣбне и҆ бг҃оно́сне ѻ҆́ч҃е і҆ѡ́сифе! Воспомина́юще ны́нѣ по́двиги и҆ трꙋды̀ твоѧ̑, ꙗ҆́же ѡ҆ хрⷭ҇тѣ̀ содѣ̑ѧннаѧ, мы̀ грѣ́шнїи и҆ недосто́йнїи рабѝ твоѝ, смире́ннѡ про́симъ тѧ̀: молѝ млⷭ҇тиваго бг҃а, да да́рꙋетъ ми́ръ жи́тельствꙋ на́шемꙋ и҆ цр҃кви свое́й ст҃ѣ́й, да ѡ҆гради́тъ ю҆̀ ѿ всѣ́хъ дꙋшепа́гꙋбныхъ и҆ безбо́жныхъ ᲂу҆че́нїй, да пода́стъ же на́мъ всѧ̑ бл҃гопотрє́бнаѧ въ житїѝ се́мъ, и҆ въ бꙋ́дꙋщемъ вѣ́цѣ да сподо́битъ на́съ воспѣва́ти є҆мꙋ̀: А҆ллилꙋ́їа.
Повто́ръ
Сей конда́къ глаго́лется три́жды, та́же і҆́косъ а҃-й и҆ конда́къ а҃-й.
І҆́косъ а҃
А҆́гг҃ла во пло́ти тѧ̀ вѣ́дꙋще, прпⷣбне і҆ѡ́сифе, по́сланна ѿ бг҃а, да ꙗ҆ви́тъ тобо́ю въ чл҃вѣ́цѣхъ ѻ҆́бразъ и҆́стиннаго бл҃гоче́стїѧ и҆ до́брыхъ дѣ́лъ, чꙋдѧ́щесѧ пꙋтє́мъ є҆гѡ̀, во вре́меннѣмъ житїѝ твое́мъ ꙗ҆влє́ннымъ, и҆ вели́чїе бл҃гоꙋтро́бїѧ є҆гѡ̀ прославлѧ́юще, во ᲂу҆миле́нїи серде́чнѣмъ взыва́емъ тѝ си́це:
Ра́дꙋйсѧ, до́брагѡ ко́рене ѻ҆́трасле бл҃горо́днаѧ: ра́дꙋйсѧ, лозо̀ вїногра́да хрⷭ҇то́ва многопло́днаѧ.
Ра́дꙋйсѧ, ча́до моли́твы роди́телей бл҃гочести́выхъ: ра́дꙋйсѧ, наде́ждо и҆ ᲂу҆тѣше́нїе серде́цъ и҆́хъ бг҃олюби́выхъ.
Ра́дꙋйсѧ, и҆здѣ́тска стра́хъ гдⷭ҇нь стѧжа́вый: ра́дꙋйсѧ, сѣ́мѧ сло́ва бж҃їѧ ѿ ю҆́ности воспрїѧ́вый.
Ра́дꙋйсѧ, и҆змла́да смире́нїѧ и҆ молча́нїѧ храни́телю: ра́дꙋйсѧ, мл҃твы и҆ воздержа́нїѧ ревни́телю.
Ра́дꙋйсѧ, прпⷣбне ѻ҆́ч҃е і҆ѡ́сифе, бг҃омꙋ́дре, чꙋдотво́рче.
Конда́къ а҃
И҆збра́нный ᲂу҆го́дниче хрⷭ҇то́въ и҆ ди́вный бл҃гоче́стїѧ подви́жниче, прпⷣбне ѻ҆́ч҃е і҆ѡ́сифе, и҆́же сꙋгꙋ́бый свы́ше да́ръ прїе́мый бг҃овѣ́дѣнїѧ же и҆ и҆сцѣле́нїй, ꙗ҆́кѡ и҆мѣ́ѧй дерзнове́нїе ко ст҃ѣ́й трⷪ҇цѣ молѝ и҆зба́витисѧ на́мъ ѿ находѧ́щихъ бѣ́дъ и҆ скорбе́й и҆ болѣ́зней, да любо́вїю зове́мъ тѝ:
Ра́дꙋйсѧ, прпⷣбне ѻ҆́ч҃е і҆ѡ́сифе, бг҃омꙋ́дре, чꙋдотво́рче.
Моли́твы
Ѽ, вели́кїй наста́вниче, ревни́телю и҆ ᲂу҆чи́телю правосла́вныѧ вѣ́ры, ст҃е премꙋ́дре і҆ѡ́сифе! Прїимѝ моле́нїе на́съ, грѣ́шныхъ, тебѣ̀ приноси́мое, и҆ те́плымъ предста́тельствомъ ᲂу҆молѝ въ трⷪ҇цѣ сла́вимаго бг҃а, да ниспо́слетъ бога̑тыѧ своѧ̑ ми́лости на́мъ, грѣ̑шнымъ, да ᲂу҆тверди́тъ во ст҃ѣ́й свое́й правосла́внѣй це́ркви пра́вꙋю вѣ́рꙋ и҆ бл҃гоче́стїе: па́стырємъ є҆ѧ̀ да пода́стъ ст҃ꙋ́ю ре́вность ѡ҆ сп҃се́нїи слове́снагѡ ста́да, ꙗ҆́кѡ да вѣ́рꙋющихъ соблюдꙋ́тъ, невѣ́рꙋющихъ же и҆ ѿпа́дшихъ ѿ и҆́стинныѧ вѣ́ры вразꙋмѧ́тъ и҆ ѡ҆братѧ́тъ. Всѣ̑мъ же на́мъ и҆спросѝ всѧ̑ бл҃гопотрє́бнаѧ во вре́меннѣмъ се́мъ житїѝ и҆ полє́знаѧ къ вѣ́чномꙋ сп҃се́нїю на́шемꙋ. Помѧнѝ ста́до твоѐ, є҆́же собра́лъ є҆сѝ, не забꙋ́ди посѣща́ти ча́дъ твои́хъ и҆, ꙗ҆́кѡ чадолюби́вый ѻ҆те́цъ, не пре́зри, нижѐ ѿри́ни молє́нїѧ на̑ша, но воздѣжѝ рꙋ́цѣ твоѝ мл҃твеннѣи ко гдⷭ҇ꙋ бг҃ꙋ, да ѿложи́тъ пра́ведный гнѣ́въ сво́й, дви́жимый на ны̀, и҆ и҆зба́витъ на́съ ѿ вра̑гъ ви́димыхъ и҆ неви́димыхъ, ѿ гла́да, пото́па, меча̀, смертоно́сныѧ ꙗ҆́звы, наше́ствїѧ и҆ноплеме́нныхъ и҆ междоꙋсо́бныѧ бра́ни. Є҆́й, премилосе́рдый застꙋ́пниче на́шъ, пресла́вный чꙋдотво́рче, всѣ́хъ на́съ ᲂу҆пра́ви въ ми́рѣ и҆ покаѧ́нїи сконча́ти живо́тъ на́шъ и҆ пресели́тисѧ со ᲂу҆пова́нїемъ въ бл҃жє́ннаѧ селє́нїѧ ра̑йскїѧ, и҆дѣ́же непреста́ннѡ славосло́витсѧ всепѣ́тое и҆́мѧ ѻ҆ц҃а̀ и҆ сн҃а, и҆ ст҃а́гѡ дх҃а. А҆ми́нь.
Ѽ, пребл҃же́нне и҆ присносла́вне ѻ҆́ч҃е на́шъ і҆ѡ́сифе! Вѣ́дꙋще твоѐ ве́лїе къ бг҃ꙋ дерзнове́нїе и҆ къ твоемꙋ̀ застꙋпле́нїю прибѣга́юще, въ сокрꙋше́нїи се́рдца мо́лимъ тѧ̀, ѡ҆зарѝ на́съ свѣ́томъ дарова́нныѧ тебѣ̀ бл҃года́ти и҆ мл҃твами твои́ми помозѝ на́мъ бꙋ́рное мо́ре житїѧ̀ сегѡ̀ прейтѝ безмѧте́жнѡ и҆ приста́нища сп҃се́нїѧ небла́зненнѡ дости́гнꙋти: порабоще́ни бо сꙋ́ще сꙋ́етными, и҆ грѣхолюби́ви, и҆ не́мощни є҆́же ѿ ѡ҆быше́дшихъ на́съ ѕѡ́лъ возни́кнꙋти, къ комꙋ̀ прибѣ́гнемъ, а҆́ще не къ тебѣ̀, ꙗ҆ви́вшемꙋ неѡскꙋдѣва́емое бога́тство ми́лости въ земнѣ́мъ житїѝ твое́мъ; Вѣ́рꙋемъ же, ꙗ҆́кѡ и҆ по ѿше́ствїи твое́мъ мно́жайшее стѧжа́лъ є҆сѝ дарова́нїе милосе́рдовати бѣ́дствꙋющымъ. Тѣ́мже ᲂу҆́бѡ, припа́дающе ны́нѣ къ цѣльбоно́снѣй і҆кѡ́нѣ твое́й, ᲂу҆миле́ннѡ про́симъ тѧ̀, ст҃че бж҃їй: са́мъ и҆скꙋше́нъ бы́въ, помозѝ и҆ на́мъ, и҆скꙋша́ємымъ: посто́мъ и҆ бдѣ́нїемъ попра́вый си́лꙋ де́мѡнскꙋю, и҆ на́съ ѿ нападе́нїй вра́жїихъ защитѝ, препита́вый гла́домъ погиба́ющихъ, и҆ на́мъ и҆спросѝ ᲂу҆ гдⷭ҇а и҆з̾ѡби́лїе плодѡ́въ земны́хъ и҆ всѧ̑ ꙗ҆́же ко сп҃се́нїю потрє́бнаѧ: посрами́вый є҆реті́чєскаѧ мꙋдрова̑нїѧ, цр҃ковь ст҃ꙋ́ю ѿ є҆ресе́й и҆ раско́лѡвъ, и҆ смꙋще́нїй мл҃твами твои́ми ѡ҆градѝ: да то́жде мꙋ́дрствꙋемъ всѝ, є҆ди́нѣмъ се́рдцемъ сла́вѧще ст҃ꙋ́ю, є҆диносꙋ́щнꙋю, животворѧ́щꙋю и҆ нераздѣ́льнꙋю трⷪ҇цꙋ, ѻ҆ц҃а̀ и҆ сн҃а и҆ ст҃а́гѡ дх҃а, во всѧ̑ вѣ́ки. А҆ми́нь.