Канон преподобному Давиду, игумену Вознесенскому, Серпуховскому чудотворцу

Даждь ми, Христе́, мой Спа́се, проще́ние мно́гих мои́х согреше́ний, я́ко да и мы почита́ем па́мять Твоего́ уго́дника, преподо́бнаго Дави́да. Его́же моли́твами, Бо́же, спаси́ нас.

От младе́нства ты, блаже́нне Дави́де, позна́н бысть Бо́гом и, на Него́ наде́яся, преподо́бным Пафну́тием наставля́емь на спаси́тельныя Его́ повеле́ния. Ему́же ны́не предстоя́ со дерзнове́нием, о нас помоли́ся.

Священноукра́сил еси́ себе́, о́тче, ра́зумом и де́тельным виде́нием благода́ти, Богоглаго́ливе Дави́де, жела́я венца́ сла́вы Христо́вы, и твою́ наде́жду изря́дно, преблаже́нне, не погреши́л еси́.

Тьму и мрак любостра́стнаго ми́ра любо́вию ко Христу́ пыла́ющею непреткнове́нно преше́д и све́тлостию А́нгельскаго о́браза приче́тся, а́ки вне пло́ти был еси, сего́ ра́ди пое́ши Пода́вшему ти си́лу.

О́тче блаже́нне Дави́де, всенра́вно к Бо́гу, ра́дуяся, приступи́л еси́, вне пло́ти и ми́ра быв, и ум нему́тен, утвержде́н воздержа́нием, соблю́л еси́, Боже́ственным безстра́стием отсю́ду присвоя́яся.

Дово́льно исто́чника пив Ева́нгельскаго вод оби́льных, из чре́ва ны́не ре́ки чуде́с источа́еши, преподо́бне Дави́де, и напая́еши ве́рою к тебе́ притека́ющия.

Любо́вь немощны́м вы́ну явля́я, о́тче преподо́бне Дави́де, от Бо́га прия́л еси́ благода́ть мно́гу стра́сти цели́ти неисце́льныя.

Живоно́сный Крест на ра́мо взем, преподо́бне, распе́ншемуся на нем Христу́ после́довал еси́, о́тче Дави́де, и вра́жия полки́ прогна́л еси́, и нам проси́ ми́лости, торжеству́ющим твое́ пра́зднство, Богоно́се.

На Го́спода всю, преподо́бне, возложи́в наде́жду, ника́коже поколеба́вшись, е́же отпа́сти от лу́чшаго стоя́ния, но зако́нно соверши́л еси́ Боже́ственное тече́ние ума́ пра́востию.

Умертви́в я́же на земли́ мудрова́ния, преподо́бне Дави́де, умертви́вшемуся Сло́ву тебе́ ра́ди му́жественно после́довал еси́, и к жи́зни неги́бнущей преподо́бно премину́л еси́.

Юдо́ль сия́ гроб твой иму́щая, иде́же лежи́т честно́е те́ло твое́, благово́ние источа́ет, я́коже рай Бо́жий, облагоуха́я ве́рныя и служа́щия в оби́тели твое́й, те́мже, ра́дуяся, пресла́вне, не забу́ди и нас, о́тче Дави́де.

Предложе́ние твоего́ ума́ бе, а́ки лук напряже́н, о́тче, живы́й бо во юдо́ли сей плаче́вней, восхожде́ние име́л еси́ в се́рдце свое́м вы́ну к Бо́гу: и мне у́бо, жизнь свою́ веду́щу вы́ну в печа́лех, Дави́де, помози́, моля́ся о мне, да возвесели́тся о Го́споде се́рдце мое́.

А́нгелом Небе́сным был еси́ собесе́дник, о́тче преподо́бне, смире́ние, бде́ние, и спротяже́нную моли́тву, и любо́вь нелицеме́рну, и ве́ру, и наде́жду стяжа́в.

Лик страстоте́рпческий весели́тся и лику́ет святи́телей собо́р и пра́ведных, совсе́льника тя прие́мше, блаже́нне, с ни́миже в невече́рнем све́те лику́еши, венце́м преподо́бия све́тло украша́емь, моли́ о воспева́ющих ве́рою святу́ю па́мять твою́.

Умиле́нием мно́зем и стена́нием се́рдца жития́ по́прище преше́д, му́дре, в страну́ безстра́стия пресели́ себе́, в не́йже свет прие́м в се́рдцы твое́м, непреста́нно весели́шися, неизрече́ннаго Све́та Христа́ наслажда́ешися.

Поче́т до́брыми твои́ми нра́вы Бо́га Преблага́го, Дави́де. Те́мже изцеле́ний исто́чник излива́еши, зной отгоня́я боле́зней же и печа́лей, му́дре.

Ре́ки сле́зными пусты́ни напои́л еси́, блаже́нне, се́мя трудо́в твои́х се́я в них. Те́мже и стори́чный плод ра́достно пожа́л еси́, вопия́: сла́ва си́ле Твое́й, Го́споди.

Име́я во уме́ свое́м час сме́ртный, и неумы́тное суди́ще, и му́ки гре́шников, вы́ну от о́чию свое́ю сле́зы излива́я и моли́твы возсыла́я к Бо́гу, преподо́бне, да изба́вит ду́ши гре́шных ве́чнаго муче́ния и сподо́бит их Ца́рствия Своего́.

Обле́кся в Христо́во смире́ние и, я́ко а́гня незло́биво, Тому́ принесе́ себе́, тем и зе́млю кро́тких насле́дова, иде́же водворя́яся, сла́виши Го́спода.

Стра́сти попали́л еси́ огнем воздержа́ния, ду́шу озари́в Боже́ственными сия́нии, де́монов прогони́тель яви́лся еси́, Боже́ственным Ду́хом просвеща́емь.

И́же в жи́зни сей упа́сл еси́ благоче́стно, не забу́ди ста́да твоего́, е́же, му́дре, собра́л еси́, и ны́не потщи́ся, о́тче наш Дави́де, да привлече́ши во огра́ду Небе́сную.

Ты процве́л еси́, преподо́бне, в пусты́ни, дави́дски, я́коже фи́никс, сия́я доброде́тельми, отону́дуже и позна́н был еси́ я́ко со мно́гим приходя́щим ревнова́ти твоему́ е́же по Бо́гу житию́.

Позна́в Бо́га, преподо́бне, по вме́стному челове́ком, те́мже и позна́н был еси́ от Бо́га по и́мени про́чих оте́ц и душ па́стырь устро́ен был еси́, сия́ наставля́я к доброде́телем и приводя́ Бо́гу спаса́емы.

Ра́зныя боле́зни изцеля́я, Бо́га приле́жно моля́, больна́го нога́ма сотвори́л еси́ це́ла и Бо́жиим про́мыслом показа́л еси́ здра́ва. Преподо́бне Дави́де, моли́ся приле́жно о чадоро́дии безча́дных, мо́лим тя, преблаже́нне, приле́жно.

Па́стырь сый от Ду́ха Свята́го науче́нный, блаже́нне, наставля́л еси́ ста́до твое́ Небе́сная разумева́ти и страсте́й наше́ствия отгоня́ти, Ца́рствия же Бо́жия и пра́вды Его́ иска́ти.

О́бщник сый ада́мскаго ро́да и порожде́ние, бе́здну греха́ избе́гл еси́, не оскверни́вся ниже́ в ю́ности, Крест бо на ра́мо взем не в мо́ри погря́з, но на го́ру Вознесе́ния возше́л еси́.

Дави́де преподо́бне, ты я́звы Го́спода Иису́са и Крест Его́, я́ко вене́ц злат, с ра́достию прии́м, услы́шал еси́ вожделе́нный глас: до́брый ра́бе, благи́й и ве́рный, вни́ди в ра́дость Го́спода твоего́.

От ю́ности, блаже́нне, име́л еси́ житие́ свое́ чи́сто и, того́ ра́ди, Пречи́стому Влады́це прилепи́ся, предстои́ши ны́не со а́нгельскими ли́ки при́сно источа́еши пресла́вная чудеса́ и изцеле́ния с ве́рою приходя́щим к тебе́.

Благода́ть твоя́, преподо́бне Дави́де, озаря́ет ве́рныя, излия́нием чуде́с от Бо́га обогати́лся еси́, о́тче, те́мже приходя́щих облегча́еши боле́зни. Утверди́ у́бо и на́ша мы́сли приноси́ти Христу́ же́ртву хвале́ния.

Нощь, я́ко день, и день, я́ко нощь, тебе́ вменя́шеся, Дави́де о́тче наш: не дал бо еси́, по проро́ку, сна очи́ма твои́ма, не ве́ждома твои́ма дрема́ния, ниже́ поко́я телеси́ твоему́, до́ндеже сие́ чи́сто с душе́ю Бо́гу предста́вил еси́.

Да́ры светода́тельными озаре́н, преподо́бне, де́монский мрак всеце́ло отгна́л еси́ и свет возсия́л еси́ в се́ни сме́ртней седя́щим, те́мже тя, Дави́де, почита́ем.

Анто́ния и Феодо́сия, общежи́тия нача́льников, христоподража́тельному житию́ поревнова́л еси́ и, благослове́нием преподо́бнаго Пафну́тия укрепле́н, оби́тель созда́л еси́, в не́йже и́мя Госпо́дне непреста́нно сла́вится, Дави́де преподо́бне.

В поще́ниих непрекло́нное, во искуше́ниих неосла́бное, в терпе́ниих неотсту́пное име́л еси́ стяжа́ние, тем нетле́нными венцы́ от Бо́га венча́н еси́.

Истиннаго Бо́га песносло́вил еси́, Отца́ и Сы́на и Ду́ха Всесвята́го, Тро́ицу Неразде́льную, от нея́же де́йство прия́л еси́, е́же исцеля́ти неду́ги разли́чныя, прогоня́ти ду́хи лука́выя, те́мже па́мять твою́ почита́ем, досточу́дне.

Днесь мо́лим тя: непреста́нно моли́, Дави́де о́тче наш, о ста́де свое́м, его́же трудолю́бно собра́л еси́, и спаси́ и́же тя на моли́тву призыва́ющих и плоды́ принося́щих любо́вию.

У́треневав ко Христу́, от Него́ светлостьми́ озари́вся бога́тно, и све́та напо́лнился еси́ Боже́ственнейша, и просвеща́еши ве́рно чту́щия тя всегда́.

Его́же возлюби́л еси́ Христа́, ны́не ви́диши не се́нию ни привиде́нием, но незазо́рным зерца́лом, я́сно, Лице́м к лицу́ и па́че естества́ и́стинным явле́нием, преблаже́нне.

Ду́хом Святы́м укрепи́вся, духо́в зло́бы победи́л еси́ жезло́м ве́ры, жезло́м бо игу́менства твоего́ изцеля́ше неду́жныя, де́монское каменомета́ние му́жески отража́я, храня́ше бо тя И́же жезло́м мо́ре лю́дем раздели́вый.

Обре́те оби́тель Вознесе́нская тя пра́вило и изве́стнейший о́браз, всяк проше́дша доброде́тельных дея́ний вид, преподо́бных похвало́, му́дре Дави́де. Те́мже пожи́вше Боже́ственне, с тобо́ю лику́ют во ве́ки.

Стяжа́л еси́, преподо́бне Дави́де, воздержа́ние ди́вное и моли́тву непреста́нную, вознося́щее смире́ние и любо́вь и́стинную и безстра́стие, о́тче. Сего́ ра́ди Христо́с благода́ть тебе́ подаде́ чуде́с во ве́ки.

Твоя́ по́двиги воспе́ша Ангельския си́лы, Дави́де, и житие́ твое́ лик преподо́бных похвали́, све́тлое и укра́шенное мона́хов ра́дование. Тем и ны́не, сра́дуяся ему́, весели́шися, Христа́ поя́ во ве́ки.

Обы́чно соверши́в де́ло свое́ на земли́ мно́гими ле́ты, я́ко клас зре́лый, пожа́ тя рука́ А́нгела Бо́жия, и прия́ тя, я́ко стори́чный плод, в жи́тницу ве́чнаго воздая́ния Христо́с, препе́тый и превозноси́мый во ве́ки.

Ни́жняя оста́вль, отше́л еси́ к Вы́шним, те́ло же твое́ пренесе́но бысть в це́рковь собо́рную, иде́же пе́ньми и пе́сньми духо́вными почто́ша тя, о́тче преподо́бне, вопию́ще: се бо де́ти твои́, любо́вию к тебе́ горя́ще, при́сно тя помина́ем и велича́ем.

И́же оте́чествия твоего́ лю́дие, к ра́це моще́й твои́х святы́х прихо́дим и от се́рдца зове́м: поми́луй своя́ ча́да и от печа́ли избавля́й, ви́диши бо вся печа́льны и уны́лы, но моли́ Всеми́лостиваго Бо́га изба́вити нас вско́ре моли́твами твои́ми.

Изцеле́ния соде́лывают честны́я мо́щи твоя́, Дави́де преподо́бне, и отго́нят разли́чныя неду́ги от челове́к, и укрепля́ют ум их восхвали́ти труды́ твоя́, всече́стне.

Го́ры и хо́лми да взыгра́ют, и все мно́жество мона́шествующих да воспле́щет днесь, я́ко наста́ нам светоно́сный твой пра́здник, преподо́бне Дави́де, испо́лнь ра́дости и весе́лия духо́внаго. И ны́не, иму́ще тя поще́ния пра́вило и законополо́жника, ра́дуемся.

Ено́ха Бог просла́ви, и сей преста́вися во сла́ве еди́ножды; ты же преподо́бне, ки́йждый день преставля́лся еси́, сме́ртный час во уме́ помышля́я, и сло́вом Бо́жиим спаса́лся еси́. Та́кожде и нас помышля́ти вразумля́й, да сла́вим тя по до́лгу че́стно.

Распросте́р преподо́бнии твои́ ру́це, принеси́ моле́ние ко Всеми́лостивому Спа́су, о́тче Богому́дре Дави́де, сохрани́ти оби́тель твою́ невреди́му от ва́рварскаго наше́ствия и междоусо́бныя бра́ни и спасти́ нас, тебе́ велича́ющих.