Кондак 1
Взбра́нному воево́де и августа́лию страны́ Еги́петския, царе́м земны́м че́стию превознесе́нному, последи́ же от Юлиа́на злочести́ваго му́чимому и во главу́ усече́нному, я́ко зе́льне страда́вшему и победи́тельне вся́ претерпе́вшему, от Бо́га же прия́вшему нетле́ние и благода́ть чудотворе́ния, дне́сь ве́рнии в похва́льная возопии́м:
Ра́дуйся, святы́й Арте́мие, пресла́вный Христо́в великому́чениче.
Икос 1
Антиохи́йстии лю́дие диви́шася святе́й ре́вности твое́й о и́мени Христо́ве, сла́вне Арте́мие, не терпя́ бо зре́ти муче́ния святы́х и хулы́ слы́шати на Го́спода, Юлиа́ном изрыга́емыя; а́ще и че́сть ему́ возда́ти от Александри́и прише́л, оба́че и обличи́ти того́ не устраши́лся еси́. Те́мже, и чи́на своего́ во́инскаго изве́рженный за дерзнове́ние свое́, осужде́ние на ра́ны и сме́рть прия́л еси́. Мы́ же ны́не, а́ки обстоя́ще ти́ на позо́рищи му́чимому, вопие́м ти́ си́це:
Ра́дуйся, безсла́вие и муче́ние от Юлиа́на претерпе́вый; ра́дуйся, в сла́ву и осия́ние от Бо́га облече́нный.
Ра́дуйся, лю́тая страда́ния подъя́вый; ра́дуйся, вели́чие ве́ры показа́вый.
Ра́дуйся, блиста́яйся сла́вою терпе́ния; ра́дуйся, кре́посте на́ша в ско́рбех и изнеможе́нии.
Ра́дуйся, святы́й Арте́мие, пресла́вный Христо́в великому́чениче.
Кондак 2
Бу́ди ве́рен царю́, преща́ше святы́й Арте́мий нечести́вому Юлиа́ну: «Я́ко су́етны твоя́ начина́ния и не́мощна е́сть го́рдость твоя́ истреби́ти христиа́ны: отне́леже бо прии́де Христо́с, и водрузи́ся Кре́ст, и воздви́жеся на не́м Госпо́дь – паде́ злочести́вых горды́ня и попра́на бы́сть лука́ваго кре́пость, Христо́ва же непобеди́ма и непреодоле́нна е́сть си́ла, е́юже огражда́ющеся, возмо́жем устоя́ти проти́ву ко́зней вра́жиих, побе́дне вопия́ Бо́гу: Аллилу́иа».
Икос 2
Во́инствуя за вели́каго царя́ Константи́на, кре́пкою си́лою кре́стною побежда́л еси́ враги́, оружебо́рче Арте́мие; то́ю же си́лою и мучи́теля своего́ Юлиа́на одоле́л еси́. Виде́нием бо креста́ овогда́ на небеси́ в ве́ре Христо́вей утверди́лся, ле́сть и́дольскую и по́чести во́инскаго зва́ния презре́в, за христиа́ны пред отсту́пником му́жественно ра́товал еси́, и во́инов началовождя́ ве́ры на́шея, Го́спода Христа́, себе́ наре́к, живо́т сво́й за Того́ до́блественно положи́л еси́. Те́мже и притяжа́л еси́ себе́ от на́с зва́ния такова́я:
Ра́дуйся, зна́мена и́дольская ке́саря отсту́пника отри́нувый; ра́дуйся, зна́мению Креста́ после́довавый.
Ра́дуйся, и ны́не си́лы борю́щихся под стя́гом ве́ры укрепля́яй; ра́дуйся, упова́ние изнемога́ющих утвержда́яй.
Ра́дуйся, до́брый Христо́в ору́жниче; ра́дуйся, святы́я ве́ры тве́рдый защи́тниче.
Ра́дуйся, святы́й Арте́мие, пресла́вный Христо́в великому́чениче.
Кондак 3
«Го́споди, дале́че е́смь от терпе́ния и незло́бия Твоего́»,– вопия́л еси́, свя́те Арте́мие, пе́рвая муче́ния претерпе́в,– «Ты́ бо, Го́споди, за мене́, грешне́йшаго, по всему́ телеси́ содробле́н бы́л еси́ ра́нами, от но́г до главы́ не бе́ в Тебе́ це́лости. Молю́ у́бо Тя́, Влады́ко, я́ко Твои́ми страда́ньми венча́л мя́ еси́, да и соверши́ши тече́ние мое́ во испове́дании Тебе́ с пе́снию: Аллилу́иа».
Икос 3
Даде́ злочести́вый ца́рь повеле́ние оружено́сцем свои́м восхи́тити тя́, сла́внаго во́инскаго вождя́, Арте́мие, и сано́вный по́яс тво́й отъе́мше, и ри́зы совле́кше, на́га истяза́ти. Ти́и же, связа́вше ру́це и но́зе твои́, растяго́ша те́ло твое́ на че́тверо и бия́ху воло́вьими жи́лами по хребту́ и чре́ву толи́ко, я́ко оскуде́ти си́лам и́х. Ты́ же а́ки нечу́вствен пребыва́л еси́, я́ко все́м, о́крест стоя́щим, и самому́ Юлиа́ну чуди́теся зело́. Приими́ у́бо и от на́с похва́льная удивле́ния сицева́я:
Ра́дуйся, в ве́ре непобеди́мый; ра́дуйся, в упова́нии непреодоли́мый.
Ра́дуйся, на ка́мени терпе́ния но́зе свои́ поста́вивый; ра́дуйся, му́жественне стопы́ своя́ испра́вивый.
Ра́дуйся, ра́довавыйся в страда́ниях; ра́дуйся, просла́вленный в поруга́ниях.
Ра́дуйся, святы́й Арте́мие, пресла́вный Христо́в великому́чениче.
Кондак 4
Егда́ святи́и испове́дницы Евге́ний и Мака́рий му́чими бя́ху, тогда́ и ты́, блаже́нне Арте́мие, ре́вностию по Бо́зе дви́жим, моли́тву твори́л еси́, да не пока́жет Бо́г тебе́ не то́чию недосто́йна страда́льческаго начина́ния, но да испра́вится пред Ни́м и твоя́ исхо́дная пе́снь: Аллилу́иа.
Икос 4
Жи́лами воло́вьими бие́мый и по земле́ протяза́емый ничто́же малоду́шествовал еси́, но ра́дуяся и веселя́ся, страда́ньми Христо́выми просвеща́ем, по́двиг му́ченичества до конца́ соверши́л еси́ до́бре. Те́мже и досто́ин яви́лся еси́ ублаже́ния сицева́го:
Ра́дуйся, скуде́льный сосу́д пло́ти своея́ сокруши́вый; ра́дуйся, све́т ве́ры и си́лу му́жества из него́ яви́вый.
Ра́дуйся, в его́же не́мощи си́ла Госпо́дня соверши́ся; ра́дуйся, его́же терпе́нию мучи́тель почуди́ся.
Ра́дуйся, я́ко Бо́г прия́т твою́ же́ртву муче́ния; ра́дуйся, я́ко Благи́й даде́ тебе́ жре́бий спасе́ния.
Ра́дуйся, святы́й Арте́мие, пресла́вный Христо́в великому́чениче.
Кондак 5
«За Мене́ стра́ждеши, Арте́мие, дерза́й и ра́дуйся»,– глаго́ла Христо́с, яви́вся свято́му в темни́це,– «Со Мно́ю бу́деши во Ца́рствии Мое́м». Сия́ слы́шав му́ченик, а́бие от ра́н исцеле́, и душе́ю испо́лнився Боже́ственнаго утеше́ния, пребыва́ше в темни́це, благословля́я Бо́га и поя́ Ему́: Аллилу́иа.
Икос 5
И гла́дом, и жа́ждею му́чиша тя́ в темни́це, блаже́нне Арте́мие. Ты́ же, на щедро́ты Преблага́го Го́спода себе́ возве́рг, еди́наго проси́л еси́, да и са́мую ду́шу твою́, я́ко же́ртву живу́ю прии́мет Влады́ка Христо́с от тебе́ с еще́ оста́вшеюся кро́вию твое́ю. И не вотще́ бы́сть раче́ние твое́: запове́да бо Госпо́дь А́нгелом Свои́м в темни́це пита́ти и сохраня́ти тя́, пото́м же и Са́м яви́ся, укрепля́я тебе́, на́с же возглаша́ти тебе́ науча́я:
Ра́дуйся, от руки́ А́нгел в темни́це пита́выйся; ра́дуйся, хле́бом живо́тным с небесе́ укрепля́выйся.
Ра́дуйся, от ра́н Госпо́дним посеще́нием во у́зах исцели́выйся; ра́дуйся, явле́нием Христо́вым утеше́ния испо́лнивыйся.
Ра́дуйся, Го́сподем в темни́це обра́дованный; ра́дуйся, восше́дый к Нему́ прия́ти вене́ц сла́вы тебе́ угото́ванный.
Ра́дуйся, святы́й Арте́мие, пресла́вный Христо́в великому́чениче.
Кондак 6
«Ко́ль мно́га су́ть Влады́ки моего́ страда́ния и что́ бо́лее Его́ претерпе́х а́з, недосто́йный»,– вопия́ше блаже́нный Арте́мий,– «То́й ко Кресту́ пригвожде́н бы́сть греха́ ра́ди моего́, Са́м не позна́в греха́, ниже́ ле́сть во усте́х соде́ла. Ра́дуюся и веселю́ся просвеща́емый Го́спода моего́ страда́ньми, я́же облегчева́ют ми́ боле́зни моя́». Та́ко святы́й в себе́ бесе́дуя, чрез всю́ но́щь ку́пно со страда́льцами Евге́нием и Мака́рием воспева́ше Бо́гу: Аллилу́иа.
Икос 6
Люте́йшим му́кам предаде́ тя́, страда́льче Арте́мие, нечести́вый ца́рь, егда́ со студо́м от Аполло́на Дафни́йскаго возврати́ся и от тебе́ посмея́ние и прорече́ние поги́бели своея́ слы́шав, зе́льною я́ростию распали́ся. Те́мже и мы́ за о́ныя страда́ния мно́жайшими ликостоя́нии ублажа́ем тя́ си́це:
Ра́дуйся, я́ко тобо́ю Бо́г, ди́вный во святы́х Свои́х, язы́ком яви́ся; ра́дуйся, я́ко тобо́ю сладча́йшее и́мя Христо́во просла́вися.
Ра́дуйся, я́рости мучи́телевы не устраши́выйся; ра́дуйся, в Христо́вем упова́нии над и́долы посмея́выйся.
Ра́дуйся, в ду́се проро́честем бу́дущих предзри́телю; ра́дуйся, Ду́ха Госпо́дня до́блий носи́телю.
Ра́дуйся, святы́й Арте́мие, пресла́вный Христо́в великому́чениче.
Кондак 7
Мно́га досажде́ния творя́ше нечести́вый Юлиа́н христиа́ном, лжу́ще на ня́, я́ко сожго́ша хра́м Аполло́на Дафни́йскаго. Егда́ же се́й лже́ц пред Арте́мием мно́жайшия преще́ния изрека́ше на христиа́ны, святы́й Арте́мий отвеща́: «Богопу́стный гне́в и о́гнь с небесе́ пояде́ и́дола твоего́ и ка́пище его́ сожже́; посмева́юся безу́мию ва́шему, я́ко слу́жите безду́шному бо́гу, утеша́юся о паде́нии его́ и ра́дуюся о все́х си́х, я́же Христо́с чудоде́йствова, Ему́же досто́ит пе́ти велегла́сно: Аллилу́иа».
Икос 7
Не терпя́ слы́шати пра́ведных сло́в твои́х, свя́те Арте́мие, беззако́нный Юлиа́н, разгне́вався зело́, повеле́ каменосе́чцем разсещи́ вели́кий ка́мень, да посреде́ часте́й его́ согнете́н бу́деши. И сему́ угото́ванному, па́дший ка́мень все́ те́ло твое́ сотре́, и вну́тренняя твоя́ распадо́шася, и сломи́шася вся́ чле́ны твоя́. И бе́ зре́ти чу́до ве́лие, я́ко в таково́м согнете́нии посреде́ ка́мней ты́ жи́в оста́ся. Мы́ же Бо́жией си́ле, укрепля́вшей тя́, удивля́яся, вопие́м:
Ра́дуйся, гро́зде виногра́да Христо́ва в точи́ле исто́птанная; ра́дуйся, же́ртво жива́я, Го́споду верху́ ка́мене кро́вию возлия́нная.
Ра́дуйся, му́чениче, его́же все́ те́ло а́ки дска́ согнете́ся; ра́дуйся, скрижа́ле жива́я, на не́йже испове́дание ве́ры кро́вию написа́ся.
Ра́дуйся, кровьми́ свои́ми, а́ки бре́нием ка́мение смеси́вый; ра́дуйся, себе́ самаго́ жи́ва в созида́ние Це́ркве Христо́вы положи́вый.
Ра́дуйся, святы́й Арте́мие, пресла́вный Христо́в великому́чениче.
Кондак 8
О́чи твои́ от му́к искочи́ша, свя́те, и лице́ бе́ сотре́но, душа́ же еще́ бе́ держа́щися и язы́к до́бре веща́ющ, и́мже и в согнете́нии призва́л еси́ Бо́га, Помо́щника своего́, и во упова́нии на Него́ взыва́л еси́: Аллилу́иа.
Икос 8
Привиде́нием почте́ тя́ ца́рь, егда́ узре́ ви́дом стра́шна и естество́ челове́ческое происходя́ща; оба́че и увеща́ тебе́ еще́ поклони́тися и́долом, да поми́луют тя́ и поне́ я́же во а́де му́кам не предадя́т. Ты́ же, посмея́вся царю́, отвеща́л еси́: «Я́ко и́доли и са́ми огня́ не мо́гут избежа́ти, с ни́миже и ты́, царю́, безконе́чному огню́ пре́дан бу́деши». За е́же, я́ко ху́льника, ца́рь на сме́рть осуди́ тя́. Мы́ же, сше́ствуя тебе́ на ме́сто усече́ния, увяза́ем главу́ твою́ похва́льными венцы́ та́ко:
Ра́дуйся, страда́льче, посреде́ ка́мений согнете́нный; ра́дуйся, испове́дниче, в кре́пости ве́ры не одоле́нный.
Ра́дуйся, и́стину без стра́ха пред цари́ веща́вый; ра́дуйся, за сие́ последи́ все́х злострада́ний усече́ние ме́чное прия́вый.
Ра́дуйся, главу́ свою́ свяще́нную под ме́ч самово́льне подклони́вый; ра́дуйся, терпе́нием свои́м главы́ неви́димых враго́в сокруши́вый.
Ра́дуйся, святы́й Арте́мие, пресла́вный Христо́в великому́чениче.
Кондак 9
Ра́нами содробле́н бы́л еси́ по всему́ телеси́, я́ко лю́дем на тя́ зре́ти бе́ стра́шно: согнете́нный а́ки дска́, ко́сти сокруше́нны и вся́ вну́тренняя испадо́ша. Таково́е злострада́ние за ма́лую боле́знь почита́л еси́, наде́яся у Го́спода, за Него́же страда́л еси́, име́ти поко́й ве́чный, науча́я в злострада́нии не малоду́шествовати, но па́ки возсыла́ти Бо́гу благода́рне: Аллилу́иа.
Икос 9
«Се́ я́звы Христо́вы на те́ле твое́м начерта́ны су́ть», - глаго́ла к себе́ святы́й, - «оста́лося у́бо, да и са́мую ду́шу за Христа́ отда́м с оста́вшеюся во мне́ кро́вию». И на щедро́ты Госпо́дни себе́ возве́рг, небоя́зненно Христа́ испове́дал пред челове́ки, за Него́же и усече́ние с ра́достию прия́л еси́. Сего́ ра́ди, за превосходя́щую любо́вь твою́ к Бо́гу, похваля́ем тя́ си́це:
Ра́дуйся, Христо́ва Ева́нгелия ско́рый послу́шателю; ра́дуйся, вели́кия за́поведи Его́ гото́вый исполни́телю.
Ра́дуйся, кре́пкую любо́вь ко Го́споду Христу́ показа́вый; ра́дуйся, и ду́шу свою́ с кро́вию ра́достно за Того́ преда́вый.
Ра́дуйся, содробле́нием свои́м на́ше разслабле́ние укрепля́яй; ра́дуйся, я́звами свои́ми на́ша боле́зни исцеля́яй.
Ра́дуйся, святы́й Арте́мие, пресла́вный Христо́в великому́чениче.
Кондак 10
Тве́рдою ве́рою вооружи́вся, неи́стовство мучи́телево презре́л еси́, и осужде́ние на усече́ние ме́чное с ра́дованием прия́л еси́, и ведо́мый на сме́рть, ше́ствовал еси́ весе́лыми нога́ми, вопия́ Христу́ Бо́гу: Аллилу́иа.
Икос 10
Усече́нием главы́ по́двиг сво́й му́ченический запечатле́вый, утверди́ моли́твами твои́ми и на́с, главы́ своя́ под и́го Христо́во подклони́вших, чрез все́ житие́ по́двигом до́брым подвиза́тися, люби́ти Го́спода у тебе́ поуча́тися, вопия́ тебе́ си́це:
Ра́дуйся, си́льне, на одоле́ние мучи́телей ме́ч ве́ры при бедре́ препоя́савый; ра́дуйся, шле́мом спасе́ния от Го́спода защище́нный.
Ра́дуйся, по́ясом сла́вы от Него́ до́бре украше́нный; ра́дуйся, щито́м моли́тв свои́х все́х прибега́ющих к тебе́ охраня́яй.
Ра́дуйся, за страда́льцев Госпо́дних во всеору́жии ополча́яйся; ра́дуйся, ше́ствующих у́зким путе́м в Ца́рствие Небе́сное неукло́нно провожда́яй.
Ра́дуйся, святы́й Арте́мие, пресла́вный Христо́в великому́чениче.
Кондак 11
Фиа́л злострада́ния уготовля́яся до конца́ испи́ти, на ме́сте усече́ния преклони́вся до земли́, моли́твою к Бо́гу ду́х сво́й укрепля́л еси́. И слы́шав гла́с с не́ба глаго́лющ: «Вни́ди со святы́ми прия́ти воздая́ние тебе́ угото́ванное»,– преклони́л еси́ главу́ под ме́ч, с ра́достию вознося́ Бо́гу: Аллилу́иа.
Икос 11
Хва́лим тя́ вси́, страстоте́рпче святы́й, и почита́ем честна́я страда́ния твоя́, я́же па́че естества́ челове́ческаго претерпе́л еси́, и Ца́рствие Небе́сное притяжа́л еси́. Те́мже воздвиза́емся вопи́ти тебе́ та́ко:
Ра́дуйся, изможде́ния и членоврежде́ния прия́вый; ра́дуйся, высоту́ ду́ха в му́ках яви́вый.
Ра́дуйся, щито́м упова́ния себе́ огради́вый; ра́дуйся, тве́рдостию свое́ю де́рзость мучи́телей истощи́вый.
Ра́дуйся, его́же муче́нию А́нгели предстоя́ху со удивле́нием; ра́дуйся, его́же страда́ния лю́дие почита́ют со умиле́нием.
Ра́дуйся, святы́й Арте́мие, пресла́вный Христо́в великому́чениче.
Кондак 12
Цено́ю кро́ви твоея́ притяжа́л еси́ Ца́рствие Небе́сное, великострада́льче Христо́в Арте́мие. Упра́ви и на́с твои́м предста́тельством во оби́тели небе́сныя, да, наслажда́яся с тобо́ю ча́сти пра́ведных, вы́ну сла́вим с тобо́ю Бо́га пе́снию: Аллилу́иа.
Икос 12
Черто́г небе́сный отве́рзе ти́ Страстополо́жник Христо́с и даде́ ти́ досто́йно вене́ц сла́вы: и ны́не на небесе́х со А́нгельскими чи́нми ра́дуешися. Те́мже и мы́, благода́рнии лю́дие и любому́ченицы, пе́сньми вопие́м ти́:
Ра́дуйся, воево́до, ники́миже в му́жестве одоле́нный; ра́дуйся, ратобо́рче за Христа́, в си́ле неоскуде́емый.
Ра́дуйся, великострада́льче, му́ками твои́ми естество́ челове́ческое удиви́вый; ра́дуйся, несокруши́мость ду́ха в теле́снем содробле́нии яви́вый.
Ра́дуйся, во упова́нии на Бо́га Жи́ва не усумне́выйся; ра́дуйся, ча́сти пра́ведных на небесе́х наслажда́яйся.
Ра́дуйся, святы́й Арте́мие, пресла́вный Христо́в великому́чениче.
Кондак 13
О пресла́вне великому́чениче Христо́в Арте́мие! Пое́м страда́ния твоя́, чти́м до́блюю кончи́ну твою́, с усе́рдным моле́нием к тебе́ притека́юще: укрепи́ и на́с с терпе́нием в по́двизе крестоноше́ния пребыва́ти, испыта́ния и злострада́ния чрез все́ житие́ до конца́ понести́ не уныва́юще, но бо́дренне пребыва́юще в пе́нии Бо́гу: Аллилу́иа.
Повтор
Этот кондак читается трижды, затем икос 1-й и кондак 1-й.
Икос 1
Антиохи́йстии лю́дие диви́шася святе́й ре́вности твое́й о и́мени Христо́ве, сла́вне Арте́мие, не терпя́ бо зре́ти муче́ния святы́х и хулы́ слы́шати на Го́спода, Юлиа́ном изрыга́емыя; а́ще и че́сть ему́ возда́ти от Александри́и прише́л, оба́че и обличи́ти того́ не устраши́лся еси́. Те́мже, и чи́на своего́ во́инскаго изве́рженный за дерзнове́ние свое́, осужде́ние на ра́ны и сме́рть прия́л еси́. Мы́ же ны́не, а́ки обстоя́ще ти́ на позо́рищи му́чимому, вопие́м ти́ си́це:
Ра́дуйся, безсла́вие и муче́ние от Юлиа́на претерпе́вый; ра́дуйся, в сла́ву и осия́ние от Бо́га облече́нный.
Ра́дуйся, лю́тая страда́ния подъя́вый; ра́дуйся, вели́чие ве́ры показа́вый.
Ра́дуйся, блиста́яйся сла́вою терпе́ния; ра́дуйся, кре́посте на́ша в ско́рбех и изнеможе́нии.
Ра́дуйся, святы́й Арте́мие, пресла́вный Христо́в великому́чениче.
Кондак 1
Взбра́нному воево́де и августа́лию страны́ Еги́петския, царе́м земны́м че́стию превознесе́нному, последи́ же от Юлиа́на злочести́ваго му́чимому и во главу́ усече́нному, я́ко зе́льне страда́вшему и победи́тельне вся́ претерпе́вшему, от Бо́га же прия́вшему нетле́ние и благода́ть чудотворе́ния, дне́сь ве́рнии в похва́льная возопии́м:
Ра́дуйся, святы́й Арте́мие, пресла́вный Христо́в великому́чениче.
Молитвы
Святы́й уго́дниче Бо́жий, Арте́мие пра́ведный! При́зри ми́лостивно на усе́рдную моли́тву на́с, гре́шных (имена́), и твои́м благомо́щным предста́тельством проще́ние согреше́ний на́ших у Го́спода испроси́, преспе́яние же в ве́ре и благоче́стии и от ко́зней диа́вольских огражде́ние исхода́тайствуй на́м. Наипа́че же моли́ Го́спода, да сподо́бит все́х на́с по христиа́нской кончи́не Небе́сное Ца́рствие получи́ти, иде́же вси́ пра́веднии ку́пно с тобо́ю сла́вят Отца́ и Сы́на и Свята́го Ду́ха во ве́ки веко́в.
Святы́й му́чениче Арте́мие! При́зри с небе́снаго черто́га на тре́бующих твоея́ по́мощи и не отве́ргни проше́ний на́ших, но, я́ко при́сный благоде́тель и хода́тай на́ш, моли́ Христа́ Бо́га, да, человеколюби́в и многоми́лостив сы́й, сохрани́т на́с от вся́каго лю́таго обстоя́ния: от тру́са, пото́па, огня́, меча́, наше́ствия иноплеме́нников и междоусо́бныя бра́ни. Да не осу́дит на́с гре́шных по беззако́нием на́шим, и да не во зло́ обрати́м блага́я, дару́емая на́м от Всеще́драго Бо́га, но во сла́ву свята́го и́мене Его́ и в прославле́ние кре́пкаго твоего́ заступле́ния. Да моли́твами твои́ми да́ст на́м Госпо́дь ми́р по́мыслов, воздержа́ние от па́губных страсте́й и от вся́кия скве́рны и да укрепи́т во все́м ми́ре Свою́ Еди́ну Святу́ю, Собо́рную и Апо́стольскую Це́рковь, ю́же стяжа́л е́сть честно́ю Свое́ю Кро́вию. Моли́ся приле́жно, святы́й му́чениче, да благослови́т Христо́с Бо́г держа́ву, да утверди́т во святе́й Свое́й Правосла́вней Це́ркви живы́й ду́х пра́выя ве́ры и благоче́стия, да вси́ чле́ны ея́, чи́стии от суему́дрия и суеве́рия, ду́хом и и́стиною покланя́ются Ему́ и усе́рдно пеку́тся о соблюде́нии Его́ за́поведей, да мы́ вси́ в ми́ре и благоче́стии поживе́м в настоя́щем ве́це и дости́гнем блаже́нныя ве́чныя жи́зни на небеси́, благода́тию Го́спода на́шего Иису́са Христа́, Ему́же подоба́ет вся́кая сла́ва, че́сть и держа́ва со Отце́м и Святы́м Ду́хом, ны́не и при́сно и во ве́ки веко́в. Ами́нь.
О всехва́льный великому́чениче Арте́мие, Госпо́день во́инственниче и все́м на́м кре́пкий побо́рниче! Ско́р бу́ди предста́тельством твои́м у Человеколю́бца Христа́, да да́ст правове́рным лю́дем, почита́ющим тя́ и на поклоне́ние моще́м твои́м приходя́щим, ми́лость и благи́х проше́ний ско́рое исполне́ние. Предстоя́й Престо́лу Бо́жию в ли́це му́ченик, помина́й все́х на́с, беда́ми, напа́стьми и скорбьми́ обстои́мых, и в житии́ се́м мно́го стра́ждущих: да твое́ю по́мощию и кре́пким побо́рством преста́нут приходя́щая на на́с зла́я. Мы́ же, твои́ми злострада́ньми назида́еми, си́лою благода́ти Христо́вы чрез тебе́ исполня́еми, в терпе́нии крестоноше́ния жи́ти начне́м, во е́же Го́споду покая́нием благоугоди́ти и неизрече́нная блага́я насле́довати, я́же угото́вана лю́бящим Бо́га и прославля́ющим свято́е и́мя Его́, Отца́ и Сы́на и Свята́го Ду́ха, ны́не и при́сно, и во ве́ки веко́в. Ами́нь.
Конда́къ а҃
Взбра́нномꙋ воево́дѣ и҆ а҆ѵгꙋста́лїю страны̀ є҆гѵ́петскїѧ, царе́мъ земны́мъ че́стїю превознесе́нномꙋ, послѣди́ же ѿ ю҆лїа́на ѕлочести́вагѡ мꙋ́чимомꙋ и҆ во главꙋ̀ ᲂу҆сѣче́нномꙋ, ꙗ҆́кѡ ѕѣ́льнѣ страда́вшемꙋ и҆ побѣди́тельнѣ всѧ̑ претерпѣ́вшемꙋ, ѿ бг҃а же прїѧ́вшемꙋ нетлѣ́нїе и҆ бл҃года́ть чꙋдотворе́нїѧ, дне́сь вѣ́рнїи въ похва́льнаѧ возопїи́мъ:
Ра́дꙋйсѧ, ст҃ы́й а҆рте́мїе, пресла́вный хрⷭ҇то́въ великомꙋ́чениче.
І҆́косъ а҃
А҆нтїохі́йстїи лю́дїе диви́шасѧ ст҃ѣ́й ре́вности твое́й ѡ҆ и҆́мени хрⷭ҇то́вѣ, сла́вне а҆рте́мїе, не терпѧ́ бо зрѣ́ти мꙋче́нїѧ ст҃ы́хъ и҆ хꙋлы̀ слы́шати на гдⷭ҇а, ю҆лїа́номъ и҆зрыга́емыѧ: а҆́ще и҆ че́сть є҆мꙋ̀ возда́ти ѿ а҆леѯандрі́и прише́лъ, ѻ҆ба́че и҆ ѡ҆бличи́ти тогѡ̀ не ᲂу҆страши́лсѧ є҆сѝ. Тѣ́мже, и҆ чи́на своегѡ̀ во́инскагѡ и҆зве́рженный за дерзнове́нїе своѐ, ѡ҆сꙋжде́нїе на ра̑ны и҆ сме́рть прїѧ́лъ є҆сѝ. Мы́ же ны́нѣ, а҆́ки ѡ҆бстоѧ́ще тѝ на позо́рищи мꙋ́чимомꙋ, вопїе́мъ тѝ си́це:
Ра́дꙋйсѧ, безсла́вїе и҆ мꙋче́нїе ѿ ю҆лїа́на претерпѣ́вый: ра́дꙋйсѧ, въ сла́вꙋ и҆ ѡ҆сїѧ́нїе ѿ бг҃а ѡ҆блече́нный.
Ра́дꙋйсѧ, лю̑таѧ страда̑нїѧ под̾ѧ́вый: ра́дꙋйсѧ, вели́чїе вѣ́ры показа́вый.
Ра́дꙋйсѧ, блиста́ѧйсѧ сла́вою терпѣ́нїѧ: ра́дꙋйсѧ, крѣ́посте на́ша въ ско́рбѣхъ и҆ и҆знеможе́нїи.
Ра́дꙋйсѧ, ст҃ы́й а҆рте́мїе, пресла́вный хрⷭ҇то́въ великомꙋ́чениче.
Конда́къ в҃
Бꙋ́ди вѣ́ренъ царю̀, преща́ше ст҃ы́й а҆рте́мїй нечести́вомꙋ ю҆лїа́нꙋ: ꙗ҆́кѡ сꙋ́етны твоѧ̑ начина̑нїѧ и҆ не́мѡщна є҆́сть го́рдость твоѧ̀ и҆стреби́ти хрⷭ҇тїа́ны: ѿне́лѣже бо прїи́де хрⷭ҇то́съ, и҆ водрꙋзи́сѧ крⷭ҇тъ, и҆ воздви́жесѧ на не́мъ гдⷭ҇ь, падѐ ѕлочести́выхъ горды́нѧ и҆ попра́на бы́сть лꙋка́вагѡ крѣ́пость, хрⷭ҇то́ва же непобѣди́ма и҆ непреѡдолѣ́нна є҆́сть си́ла, є҆́юже ѡ҆гражда́ющесѧ, возмо́жемъ ᲂу҆стоѧ́ти проти́вꙋ ко́зней вра́жїихъ, побѣ́днѣ вопїѧ̀ бг҃ꙋ: А҆ллилꙋ́їа.
І҆́косъ в҃
Во́инствꙋѧ за вели́кагѡ царѧ̀ кѡнстанті́на, крѣ́пкою си́лою крⷭ҇тною побѣжда́лъ є҆сѝ врагѝ, ѻ҆рꙋжебо́рче а҆рте́мїе: то́ю же си́лою и҆ мꙋчи́телѧ своегѡ̀ ю҆лїа́на ѡ҆долѣ́лъ є҆сѝ. Видѣ́нїемъ бо крⷭ҇та̀ ѻ҆вогда̀ на нб҃сѝ въ вѣ́рѣ хрⷭ҇то́вѣй ᲂу҆тверди́лсѧ, ле́сть і҆́дѡльскꙋю и҆ по́чести во́инскагѡ зва́нїѧ презрѣ́въ, за хрⷭ҇тїа́ны пред̾ ѿстꙋ́пникомъ мꙋ́жественнѡ ра́товалъ є҆сѝ, и҆ во́инѡвъ началовождѧ̀ вѣ́ры на́шеѧ, гдⷭ҇а хрⷭ҇та̀, себѐ наре́къ, живо́тъ сво́й за того̀ до́блественнѡ положи́лъ є҆сѝ. Тѣ́мже и҆ притѧжа́лъ є҆сѝ себѣ̀ ѿ на́съ зва́нїѧ такова̑ѧ:
Ра́дꙋйсѧ, зна́мена і҆́дѡльскаѧ ке́сарѧ ѿстꙋ́пника ѿри́нꙋвый: ра́дꙋйсѧ, зна́менїю крⷭ҇та̀ послѣ́довавый.
Ра́дꙋйсѧ, и҆ ны́нѣ си́лы борю́щихсѧ под̾ стѧ́гомъ вѣ́ры ᲂу҆крѣплѧ́ѧй: ра́дꙋйсѧ, ᲂу҆пова́нїе и҆знемога́ющихъ ᲂу҆твержда́ѧй.
Ра́дꙋйсѧ, до́брый хрⷭ҇то́въ ѻ҆рꙋ́жниче: ра́дꙋйсѧ, ст҃ы́ѧ вѣ́ры тве́рдый защи́тниче.
Ра́дꙋйсѧ, ст҃ы́й а҆рте́мїе, пресла́вный хрⷭ҇то́въ великомꙋ́чениче.
Конда́къ г҃
Гдⷭ҇и, дале́че є҆́смь ѿ терпѣ́нїѧ и҆ неѕло́бїѧ твоегѡ̀: вопїѧ́лъ є҆сѝ, ст҃е а҆рте́мїе, пє́рваѧ мꙋчє́нїѧ претерпѣ́въ, ты́ бо, гдⷭ҇и, за менѐ, грѣшнѣ́йшаго, по всемꙋ̀ тѣлесѝ содробле́нъ бы́лъ є҆сѝ ра́нами, ѿ но́гъ до главы̀ не бѣ̀ въ тебѣ̀ цѣ́лости. Молю̀ ᲂу҆́бѡ тѧ̀, влⷣко, ꙗ҆́кѡ твои́ми страда́ньми вѣнча́лъ мѧ̀ є҆сѝ, да и҆ соверши́ши тече́нїе моѐ во и҆сповѣ́данїи тебѣ̀ съ пѣ́снїю: А҆ллилꙋ́їа.
І҆́косъ г҃
Дадѐ ѕлочести́вый ца́рь повелѣ́нїе ѻ҆рꙋжено́сцємъ свои́мъ восхи́тити тѧ̀, сла́внагѡ во́инскагѡ вождѧ̀, а҆рте́мїе, и҆ сано́вный по́ѧсъ тво́й ѿе́мше, и҆ ри́зы совле́кше, на́га и҆стѧза́ти. Ті́и же, свѧза́вше рꙋ́цѣ и҆ но́зѣ твоѝ, растѧго́ша тѣ́ло твоѐ на че́тверѡ и҆ бїѧ́хꙋ воло́вьими жи́лами по хребтꙋ̀ и҆ чре́вꙋ толи́кѡ, ꙗ҆́кѡ ѡ҆скꙋдѣ́ти си́ламъ и҆̀хъ. Ты́ же а҆́ки нечꙋ́вственъ пребыва́лъ є҆сѝ, ꙗ҆́кѡ всѣ̑мъ, ѡ҆́крестъ стоѧ́щимъ, и҆ самомꙋ̀ ю҆лїа́нꙋ чꙋди́тесѧ ѕѣлѡ̀. Прїимѝ ᲂу҆́бѡ и҆ ѿ на́съ похва̑льнаѧ ᲂу҆дивлє́нїѧ сицева̑ѧ:
Ра́дꙋйсѧ, въ вѣ́рѣ непобѣди́мый: ра́дꙋйсѧ, въ ᲂу҆пова́нїи непреѡдоли́мый.
Ра́дꙋйсѧ, на ка́мени терпѣ́нїѧ но́зѣ своѝ поста́вивый: ра́дꙋйсѧ, мꙋ́жественнѣ стѡпы̀ своѧ̑ и҆спра́вивый.
Ра́дꙋйсѧ, ра́довавыйсѧ въ страда́нїѧхъ: ра́дꙋйсѧ, просла́вленный въ порꙋга́нїѧхъ.
Ра́дꙋйсѧ, ст҃ы́й а҆рте́мїе, пресла́вный хрⷭ҇то́въ великомꙋ́чениче.
Конда́къ д҃
Є҆гда̀ ст҃і́и и҆сповѣ́дницы є҆ѵге́нїй и҆ мака́рїй мꙋ́чими бѧ́хꙋ, тогда̀ и҆ ты̀, бл҃же́нне а҆рте́мїе, ре́вностїю по бз҃ѣ дви́жимъ, мл҃твꙋ твори́лъ є҆сѝ, да не пока́жетъ бг҃ъ тебѣ̀ не то́чїю недосто́йна страда́льческагѡ начина́нїѧ, но да и҆спра́витсѧ пред̾ ни́мъ и҆ твоѧ̀ и҆схо́днаѧ пѣ́снь: А҆ллилꙋ́їа.
І҆́косъ д҃
Жи́лами воло́вьими бїе́мый и҆ по землѣ̀ протѧза́емый ничто́же малодꙋ́шествовалъ є҆сѝ, но ра́дꙋѧсѧ и҆ веселѧ́сѧ, страда́ньми хрⷭ҇то́выми просвѣща́емъ, по́двигъ мꙋ́ченичества до конца̀ соверши́лъ є҆сѝ до́брѣ. Тѣ́мже и҆ досто́инъ ꙗ҆ви́лсѧ є҆сѝ ᲂу҆блаже́нїѧ сицева́гѡ:
Ра́дꙋйсѧ, скꙋде́льный сосꙋ́дъ пло́ти своеѧ̀ сокрꙋши́вый: ра́дꙋйсѧ, свѣ́тъ вѣ́ры и҆ си́лꙋ мꙋ́жества и҆з̾ негѡ̀ ꙗ҆ви́вый.
Ра́дꙋйсѧ, въ є҆го́же не́мощи си́ла гдⷭ҇нѧ соверши́сѧ: ра́дꙋйсѧ, є҆го́же терпѣ́нїю мꙋчи́тель почꙋди́сѧ.
Ра́дꙋйсѧ, ꙗ҆́кѡ бг҃ъ прїѧ́тъ твою̀ же́ртвꙋ мꙋче́нїѧ: ра́дꙋйсѧ, ꙗ҆́кѡ бл҃гі́й дадѐ тебѣ̀ жре́бїй сп҃се́нїѧ.
Ра́дꙋйсѧ, ст҃ы́й а҆рте́мїе, пресла́вный хрⷭ҇то́въ великомꙋ́чениче.
Конда́къ є҃
За менѐ стра́ждеши, а҆рте́мїе, дерза́й и҆ ра́дꙋйсѧ: глаго́ла хрⷭ҇то́съ, ꙗ҆ви́всѧ ст҃о́мꙋ въ темни́цѣ, со мно́ю бꙋ́деши во црⷭ҇твїи мое́мъ. Сїѧ̑ слы́шавъ мꙋ́ченикъ, а҆́бїе ѿ ра́нъ и҆сцѣлѣ̀, и҆ дꙋше́ю и҆спо́лнивсѧ бжⷭ҇твеннагѡ ᲂу҆тѣше́нїѧ, пребыва́ше въ темни́цѣ, бл҃гословлѧ́ѧ бг҃а и҆ поѧ̀ є҆мꙋ̀: А҆ллилꙋ́їа.
І҆́косъ є҃
И҆ гла́домъ, и҆ жа́ждею мꙋ́чиша тѧ̀ въ темни́цѣ, бл҃же́нне а҆рте́мїе. Ты́ же, на щедрѡ́ты пребл҃га́гѡ гдⷭ҇а себє̀ возве́ргъ, є҆ди́нагѡ проси́лъ є҆сѝ, да и҆ са́мꙋю дꙋ́шꙋ твою̀, ꙗ҆́кѡ же́ртвꙋ живꙋ́ю прїи́метъ влⷣка хрⷭ҇то́съ ѿ тебє̀ съ є҆щѐ ѡ҆ста́вшеюсѧ кро́вїю твое́ю. И҆ не вотщѐ бы́сть раче́нїе твоѐ: заповѣ́да бо гдⷭ҇ь а҆́гг҃лѡмъ свои́мъ въ темни́цѣ пита́ти и҆ сохранѧ́ти тѧ̀, пото́мъ же и҆ са́мъ ꙗ҆ви́сѧ, ᲂу҆крѣплѧ́ѧ тебѐ, на́съ же возглаша́ти тебѣ̀ наꙋча́ѧ:
Ра́дꙋйсѧ, ѿ рꙋкѝ а҆́гг҃лъ въ темни́цѣ пита́выйсѧ: ра́дꙋйсѧ, хлѣ́бомъ живо́тнымъ съ нб҃сѐ ᲂу҆крѣплѧ́выйсѧ.
Ра́дꙋйсѧ, ѿ ра́нъ гдⷭ҇нимъ посѣще́нїемъ во ᲂу҆́захъ и҆сцѣли́выйсѧ: ра́дꙋйсѧ, ꙗ҆вле́нїемъ хрⷭ҇то́вымъ ᲂу҆тѣше́нїѧ и҆спо́лнивыйсѧ.
Ра́дꙋйсѧ, гдⷭ҇емъ въ темни́цѣ ѡ҆бра́дованный: ра́дꙋйсѧ, восше́дый къ немꙋ̀ прїѧ́ти вѣне́цъ сла́вы тебѣ̀ ᲂу҆гото́ванный.
Ра́дꙋйсѧ, ст҃ы́й а҆рте́мїе, пресла́вный хрⷭ҇то́въ великомꙋ́чениче.
Конда́къ ѕ҃
Ко́ль мнѡ́га сꙋ́ть влⷣки моегѡ̀ страда́нїѧ и҆ что̀ бо́лѣе є҆го̀ претерпѣ́хъ а҆́зъ, недосто́йный: вопїѧ́ше бл҃же́нный а҆рте́мїй. То́й ко крⷭ҇тꙋ̀ пригвожде́нъ бы́сть грѣха̀ ра́ди моегѡ̀, са́мъ не позна́въ грѣха̀, нижѐ ле́сть во ᲂу҆стѣ́хъ содѣ́ла. Ра́дꙋюсѧ и҆ веселю́сѧ просвѣща́емый гдⷭ҇а моегѡ̀ страда́ньми, ꙗ҆́же ѡ҆блегчева́ютъ мѝ болѣ̑зни моѧ̑. Та́кѡ ст҃ы́й въ себѣ̀ бесѣ́дꙋѧ, чрез̾ всю̀ но́щь кꙋ́пнѡ со страда́льцами є҆ѵге́нїемъ и҆ мака́рїемъ воспѣва́ше бг҃ꙋ: А҆ллилꙋ́їа.
І҆́косъ ѕ҃
Лютѣ́йшимъ мꙋ́камъ предадѐ тѧ̀, страда́льче а҆рте́мїе, нечести́вый ца́рь, є҆гда̀ со стꙋдо́мъ ѿ а҆поллѡ́на дафні́йскагѡ возврати́сѧ и҆ ѿ тебє̀ посмѣѧ́нїе и҆ прорече́нїе поги́бели своеѧ̀ слы́шавъ, ѕѣ́льною ꙗ҆́ростїю распали́сѧ. Тѣ́мже и҆ мы̀ за ѻ҆́ныѧ страда́нїѧ мно́жайшими ликостоѧ́нїи ᲂу҆бл҃жа́емъ тѧ̀ си́це:
Ра́дꙋйсѧ, ꙗ҆́кѡ тобо́ю бг҃ъ, ди́вный во ст҃ы́хъ свои́хъ, ꙗ҆зы́кѡмъ ꙗ҆ви́сѧ: ра́дꙋйсѧ, ꙗ҆́кѡ тобо́ю сладча́йшее и҆́мѧ хрⷭ҇то́во просла́висѧ.
Ра́дꙋйсѧ, ꙗ҆́рости мꙋчи́телевы не ᲂу҆страши́выйсѧ: ра́дꙋйсѧ, въ хрⷭ҇то́вѣмъ ᲂу҆пова́нїи над̾ і҆́дѡлы посмѣѧ́выйсѧ.
Ра́дꙋйсѧ, въ дꙋ́сѣ прⷪ҇ро́честѣмъ бꙋ́дꙋщихъ предзри́телю: ра́дꙋйсѧ, дх҃а гдⷭ҇нѧ до́блїй носи́телю.
Ра́дꙋйсѧ, ст҃ы́й а҆рте́мїе, пресла́вный хрⷭ҇то́въ великомꙋ́чениче.
Конда́къ з҃
Мнѡ́га досажде́нїѧ творѧ́ше нечести́вый ю҆лїа́нъ хрⷭ҇тїа́нѡмъ, лжꙋ́ще на нѧ̀, ꙗ҆́кѡ сожго́ша хра́мъ а҆поллѡ́на дафні́йскагѡ. Е҆гда́ же се́й лже́цъ пред̾ а҆рте́мїемъ мно́жайшїѧ прещє́нїѧ и҆зрека́ше на хрⷭ҇тїа́ны, ст҃ы́й а҆рте́мїй ѿвѣща̀: бг҃опꙋ́стный гнѣ́въ и҆ ѻ҆́гнь съ нб҃сѐ поѧдѐ і҆́дѡла твоего̀ и҆ ка́пище є҆гѡ̀ сожжѐ: посмѣва́юсѧ безꙋ́мїю ва́шемꙋ, ꙗ҆́кѡ слꙋ́жите бездꙋ́шномꙋ бг҃ꙋ, ᲂу҆тѣша́юсѧ ѡ҆ паде́нїи є҆го̀ и҆ ра́дꙋюсѧ ѡ҆ всѣ́хъ си́хъ, ꙗ҆́же хрⷭ҇то́съ чꙋдодѣ́йствова, є҆мꙋ́же досто́итъ пѣ́ти велегла́снѡ: А҆ллилꙋ́їа.
І҆́косъ з҃
Не терпѧ̀ слы́шати пра́ведныхъ сло́въ твои́хъ, ст҃е а҆рте́мїе, беззако́нный ю҆лїа́нъ, разгнѣ́вавсѧ ѕѣлѡ̀, повелѣ̀ каменосѣ́чцємъ разсѣщѝ вели́кїй ка́мень, да посредѣ̀ часте́й є҆гѡ̀ согнѣте́нъ бꙋ́деши. И҆ семꙋ̀ ᲂу҆гото́ванномꙋ, па́дшїй ка́мень всѐ тѣ́ло твоѐ сотрѐ, и҆ внꙋ́трєннѧѧ твоѧ̑ распадо́шасѧ, и҆ сломи́шасѧ всѧ̑ чле́ны твоѧ̑. И҆ бѣ̀ зрѣ́ти чꙋ́до ве́лїе, ꙗ҆́кѡ въ таково́мъ согнѣте́нїи посредѣ̀ ка́мней ты̀ жи́въ ѡ҆ста́сѧ. Мы́ же бж҃їей си́лѣ, ᲂу҆крѣплѧ́вшей тѧ̀, ᲂу҆дивлѧ́ѧсѧ, вопїе́мъ:
Ра́дꙋйсѧ, гро́зде вїногра́да хрⷭ҇то́ва въ точи́лѣ и҆сто́птаннаѧ: ра́дꙋйсѧ, же́ртво жива́ѧ, гдⷭ҇ꙋ верхꙋ̀ ка́менѣ кро́вїю возлїѧ́ннаѧ.
Ра́дꙋйсѧ, мꙋ́чениче, є҆го́же всѐ тѣ́ло а҆́ки дска̀ согнѣте́сѧ: ра́дꙋйсѧ, скрижа́ле жива́ѧ, на не́йже и҆сповѣ́данїе вѣ́ры кро́вїю написа́сѧ.
Ра́дꙋйсѧ, кровьмѝ свои́ми, а҆́ки бре́нїемъ ка́менїе смѣси́вый: ра́дꙋйсѧ, себѣ̀ самагѡ̀ жи́ва въ созида́нїе цр҃кве хрⷭ҇то́вы положи́вый.
Ра́дꙋйсѧ, ст҃ы́й а҆рте́мїе, пресла́вный хрⷭ҇то́въ великомꙋ́чениче.
Конда́къ и҃
Ѻ҆́чи твоѝ ѿ мꙋ́къ и҆скочи́ша, ст҃е, и҆ лицѐ бѣ̀ сотре́нѡ, дꙋша́ же є҆щѐ бѣ̀ держа́щисѧ и҆ ѧ҆зы́къ до́брѣ вѣща́ющъ, и҆́мже и҆ въ согнѣте́нїи призва́лъ є҆сѝ бг҃а, помо́щника своегѡ̀, и҆ во ᲂу҆пова́нїи на негѡ̀ взыва́лъ є҆сѝ: А҆ллилꙋ́їа.
І҆́косъ и҃
Привидѣ́нїемъ почтѐ тѧ̀ ца́рь, є҆гда̀ ᲂу҆зрѣ̀ ви́домъ стра́шна и҆ є҆стество̀ чл҃вѣ́ческое происходѧ́ща: ѻ҆ба́че и҆ ᲂу҆вѣща̀ тебѣ̀ є҆щѐ поклони́тисѧ і҆́дѡлѡмъ, да поми́лꙋютъ тѧ̀ и҆ понѐ ꙗ҆́же во а҆́дѣ мꙋ́камъ не предадѧ́тъ. Ты́ же, посмѣѧ́всѧ царю̀, ѿвѣща́лъ є҆сѝ: ꙗ҆́кѡ і҆́дѡли и҆ са́ми ѻ҆гнѧ̀ не мо́гꙋтъ и҆збѣжа́ти, съ ни́миже и҆ ты̀, царю̀, безконе́чномꙋ ѻ҆гню̀ пре́данъ бꙋ́деши. За є҆́же, ꙗ҆́кѡ хꙋ́льника, ца́рь на сме́рть ѡ҆сꙋдѝ тѧ̀. Мы́ же, сше́ствꙋѧ тебѣ̀ на мѣ́сто ᲂу҆сѣче́нїѧ, ᲂу҆вѧза́емъ главꙋ̀ твою̀ похва́льными вѣнцы̑ та́кѡ:
Ра́дꙋйсѧ, страда́льче, посредѣ̀ ка́мєнїй согнѣте́нный: ра́дꙋйсѧ, и҆сповѣ́дниче, въ крѣ́пости вѣ́ры не ѡ҆долѣ́нный.
Ра́дꙋйсѧ, и҆́стинꙋ без̾ стра́ха пред̾ царѝ вѣща́вый: ра́дꙋйсѧ, за сїѐ послѣдѝ всѣ́хъ ѕлострада́нїй ᲂу҆сѣче́нїе ме́чное прїѧ́вый.
Ра́дꙋйсѧ, главꙋ̀ свою̀ сщ҃е́ннꙋю под̾ ме́чь самово́льнѣ подклони́вый: ра́дꙋйсѧ, терпѣ́нїемъ свои́мъ главы̀ неви́димыхъ врагѡ́въ сокрꙋши́вый.
Ра́дꙋйсѧ, ст҃ы́й а҆рте́мїе, пресла́вный хрⷭ҇то́въ великомꙋ́чениче.
Конда́къ ѳ҃
Ра́нами содробле́нъ бы́лъ є҆сѝ по всемꙋ̀ тѣлесѝ, ꙗ҆́кѡ лю́демъ на тѧ̀ зрѣ́ти бѣ̀ стра́шнѡ: согнѣте́нный а҆́ки дска̀, ко́сти сокрꙋше́нны и҆ всѧ̑ внꙋ́трєннѧѧ и҆спадо́ша. Таково́е ѕлострада́нїе за ма́лꙋю болѣ́знь почита́лъ є҆сѝ, надѣ́ѧсѧ ᲂу҆ гдⷭ҇а, за него́же страда́лъ є҆сѝ, и҆мѣ́ти поко́й вѣ́чный, наꙋча́ѧ въ ѕлострада́нїи не малодꙋ́шествовати, но па́ки возсыла́ти бг҃ꙋ бл҃года́рнѣ: А҆ллилꙋ́їа.
І҆́косъ ѳ҃
Сѐ ꙗ҆́звы хрⷭ҇то́вы на тѣ́лѣ твое́мъ начерта́ны сꙋ́ть: глаго́ла къ себѣ̀ ст҃ы́й, ѡ҆ста́лосѧ ᲂу҆́бѡ, да и҆ са́мꙋю дꙋ́шꙋ за хрⷭ҇та̀ ѿда́мъ съ ѡ҆ста́вшеюсѧ во мнѣ̀ кро́вїю. И҆ на щедрѡ́ты гдⷭ҇ни себє̀ возве́ргъ, небоѧ́зненнѡ хрⷭ҇та̀ и҆сповѣ́далъ пред̾ чл҃вѣ́ки, за него́же и҆ ᲂу҆сѣче́нїе съ ра́достїю прїѧ́лъ є҆сѝ. Сегѡ̀ ра́ди, за превосходѧ́щꙋю любо́вь твою̀ къ бг҃ꙋ, похвалѧ́емъ тѧ̀ си́це:
Ра́дꙋйсѧ, хрⷭ҇то́ва є҆ѵⷢ҇лїа ско́рый послꙋ́шателю: ра́дꙋйсѧ, вели́кїѧ за́повѣди є҆гѡ̀ гото́вый и҆сполни́телю.
Ра́дꙋйсѧ, крѣ́пкꙋю любо́вь ко гдⷭ҇ꙋ хрⷭ҇тꙋ̀ показа́вый: ра́дꙋйсѧ, и҆ дꙋ́шꙋ свою̀ съ кро́вїю ра́достнѡ за того̀ преда́вый.
Ра́дꙋйсѧ, содробле́нїемъ свои́мъ на́ше разслабле́нїе ᲂу҆крѣплѧ́ѧй: ра́дꙋйсѧ, ꙗ҆́звами свои́ми на̑ша болѣ̑зни и҆сцѣлѧ́ѧй.
Ра́дꙋйсѧ, ст҃ы́й а҆рте́мїе, пресла́вный хрⷭ҇то́въ великомꙋ́чениче.
Конда́къ і҃
Тве́рдою вѣ́рою воѻрꙋжи́всѧ, неи́стовство мꙋчи́телево презрѣ́лъ є҆сѝ, и҆ ѡ҆сꙋжде́нїе на ᲂу҆сѣче́нїе ме́чное съ ра́дованїемъ прїѧ́лъ є҆сѝ, и҆ ведо́мый на сме́рть, ше́ствовалъ є҆сѝ весе́лыми нога́ми, вопїѧ̀ хрⷭ҇тꙋ̀ бг҃ꙋ: А҆ллилꙋ́їа.
І҆́косъ і҃
Оу҆сѣче́нїемъ главы̀ по́двигъ сво́й мꙋ́ченическїй запечатлѣ́вый, ᲂу҆твердѝ мл҃твами твои́ми и҆ на́съ, главы̑ своѧ̑ под̾ и҆́го хрⷭ҇то́во подклони́вшихъ, чрез̾ всѐ житїѐ по́двигомъ до́брымъ подвиза́тисѧ, люби́ти гдⷭ҇а ᲂу҆ тебє̀ поꙋча́тисѧ, вопїѧ̀ тебѣ̀ си́це:
Ра́дꙋйсѧ, си́льнѣ, на ѡ҆долѣ́нїе мꙋчи́телей ме́чь вѣ́ры при бедрѣ̀ препоѧ́савый: ра́дꙋйсѧ, шле́момъ сп҃се́нїѧ ѿ гдⷭ҇а защище́нный.
Ра́дꙋйсѧ, по́ѧсомъ сла́вы ѿ негѡ̀ до́брѣ ᲂу҆краше́нный: ра́дꙋйсѧ, щито́мъ мл҃твъ свои́хъ всѣ́хъ прибѣга́ющихъ къ тебѣ̀ ѡ҆хранѧ́ѧй.
Ра́дꙋйсѧ, за страда́льцєвъ гдⷭ҇нихъ во всеѡрꙋ́жїи ѡ҆полча́ѧйсѧ: ра́дꙋйсѧ, ше́ствꙋющихъ ᲂу҆́зкимъ пꙋте́мъ въ црⷭ҇твїе нбⷭ҇ное неꙋкло́ннѡ провожда́ѧй.
Ра́дꙋйсѧ, ст҃ы́й а҆рте́мїе, пресла́вный хрⷭ҇то́въ великомꙋ́чениче.
Конда́къ а҃і
Фїа́лъ ѕлострада́нїѧ ᲂу҆готовлѧ́ѧсѧ до конца̀ и҆спи́ти, на мѣ́стѣ ᲂу҆сѣче́нїѧ преклони́всѧ до землѝ, мл҃твою къ бг҃ꙋ дꙋ́хъ сво́й ᲂу҆крѣплѧ́лъ є҆сѝ. И҆ слы́шавъ гла́съ съ нб҃а глаго́лющъ: вни́ди со ст҃ы́ми прїѧ́ти воздаѧ́нїе тебѣ̀ ᲂу҆гото́ванное: преклони́лъ є҆сѝ главꙋ̀ под̾ ме́чь, съ ра́достїю возносѧ̀ бг҃ꙋ: А҆ллилꙋ́їа.
І҆́косъ а҃і
Хва́лимъ тѧ̀ всѝ, страстоте́рпче ст҃ы́й, и҆ почита́емъ чтⷭ҇на́ѧ страда̑нїѧ твоѧ̑, ꙗ҆́же па́че є҆стества̀ чл҃вѣ́ческагѡ претерпѣ́лъ є҆сѝ, и҆ црⷭ҇твїе нбⷭ҇ное притѧжа́лъ є҆сѝ. Тѣ́мже воздвиза́емсѧ вопи́ти тебѣ̀ та́кѡ:
Ра́дꙋйсѧ, и҆змождє́нїѧ и҆ членовреждє́нїѧ прїѧ́вый: ра́дꙋйсѧ, высотꙋ̀ дꙋ́ха въ мꙋ́кахъ ꙗ҆ви́вый.
Ра́дꙋйсѧ, щито́мъ ᲂу҆пова́нїѧ себє̀ ѡ҆гради́вый: ра́дꙋйсѧ, тве́рдостїю свое́ю де́рзость мꙋчи́телей и҆стощи́вый.
Ра́дꙋйсѧ, є҆го́же мꙋче́нїю а҆́гг҃ли предстоѧ́хꙋ со ᲂу҆дивле́нїемъ: ра́дꙋйсѧ, є҆го́же страда́нїѧ лю́дїе почита́ютъ со ᲂу҆миле́нїемъ.
Ра́дꙋйсѧ, ст҃ы́й а҆рте́мїе, пресла́вный хрⷭ҇то́въ великомꙋ́чениче.
Конда́къ в҃і
Цѣно́ю кро́ви твоеѧ̀ притѧжа́лъ є҆сѝ црⷭ҇твїе нбⷭ҇ное, великострада́льче хрⷭ҇то́въ а҆рте́мїе. Оу҆пра́ви и҆ на́съ твои́мъ предста́тельствомъ во ѻ҆би́тели нбⷭ҇ныѧ, да, наслажда́ѧсѧ съ тобо́ю ча́сти пра́ведныхъ, вы́нꙋ сла́вимъ съ тобо́ю бг҃а пѣ́снїю: А҆ллилꙋ́їа.
І҆́косъ в҃і
Черто́гъ нбⷭ҇ный ѿве́рзе тѝ страстополо́жникъ хрⷭ҇то́съ и҆ дадѐ тѝ досто́йнѡ вѣне́цъ сла́вы: и҆ ны́нѣ на нб҃сѣ́хъ со а҆́гг҃льскими чи́нми ра́дꙋешисѧ. Тѣ́мже и҆ мы̀, бл҃года́рнїи лю́дїе и҆ любомꙋ́чєницы, пѣ́сньми вопїе́мъ тѝ:
Ра́дꙋйсѧ, воево́до, ники́миже въ мꙋ́жествѣ ѡ҆долѣ́нный: ра́дꙋйсѧ, ратобо́рче за хрⷭ҇та̀, въ си́лѣ неѡскꙋдѣ́емый.
Ра́дꙋйсѧ, великострада́льче, мꙋ́ками твои́ми є҆стество̀ чл҃вѣ́ческое ᲂу҆диви́вый: ра́дꙋйсѧ, несокрꙋши́мость дꙋ́ха въ тѣле́снѣмъ содробле́нїи ꙗ҆ви́вый.
Ра́дꙋйсѧ, во ᲂу҆пова́нїи на бг҃а жи́ва не ᲂу҆сꙋмнѣ́выйсѧ: ра́дꙋйсѧ, ча́сти пра́ведныхъ на нб҃сѣ́хъ наслажда́ѧйсѧ.
Ра́дꙋйсѧ, ст҃ы́й а҆рте́мїе, пресла́вный хрⷭ҇то́въ великомꙋ́чениче.
Конда́къ г҃і
Ѽ, пресла́вне великомꙋ́чениче хрⷭ҇то́въ а҆рте́мїе. Пое́мъ страда̑нїѧ твоѧ̑, чти́мъ до́блюю кончи́нꙋ твою̀, съ ᲂу҆се́рднымъ моле́нїемъ къ тебѣ̀ притека́юще: ᲂу҆крѣпѝ и҆ на́съ съ терпѣ́нїемъ въ по́двизѣ крⷭ҇тоноше́нїѧ пребыва́ти, и҆спыта̑нїѧ и҆ ѕлострада̑нїѧ чрез̾ всѐ житїѐ до конца̀ понестѝ не ᲂу҆ныва́юще, но бо́дреннѣ пребыва́юще въ пѣ́нїи бг҃ꙋ: А҆ллилꙋ́їа.
Повто́ръ
Сей конда́къ глаго́лется три́жды, та́же і҆́косъ а҃-й и҆ конда́къ а҃-й.
І҆́косъ а҃
А҆нтїохі́йстїи лю́дїе диви́шасѧ ст҃ѣ́й ре́вности твое́й ѡ҆ и҆́мени хрⷭ҇то́вѣ, сла́вне а҆рте́мїе, не терпѧ́ бо зрѣ́ти мꙋче́нїѧ ст҃ы́хъ и҆ хꙋлы̀ слы́шати на гдⷭ҇а, ю҆лїа́номъ и҆зрыга́емыѧ: а҆́ще и҆ че́сть є҆мꙋ̀ возда́ти ѿ а҆леѯандрі́и прише́лъ, ѻ҆ба́че и҆ ѡ҆бличи́ти тогѡ̀ не ᲂу҆страши́лсѧ є҆сѝ. Тѣ́мже, и҆ чи́на своегѡ̀ во́инскагѡ и҆зве́рженный за дерзнове́нїе своѐ, ѡ҆сꙋжде́нїе на ра̑ны и҆ сме́рть прїѧ́лъ є҆сѝ. Мы́ же ны́нѣ, а҆́ки ѡ҆бстоѧ́ще тѝ на позо́рищи мꙋ́чимомꙋ, вопїе́мъ тѝ си́це:
Ра́дꙋйсѧ, безсла́вїе и҆ мꙋче́нїе ѿ ю҆лїа́на претерпѣ́вый: ра́дꙋйсѧ, въ сла́вꙋ и҆ ѡ҆сїѧ́нїе ѿ бг҃а ѡ҆блече́нный.
Ра́дꙋйсѧ, лю̑таѧ страда̑нїѧ под̾ѧ́вый: ра́дꙋйсѧ, вели́чїе вѣ́ры показа́вый.
Ра́дꙋйсѧ, блиста́ѧйсѧ сла́вою терпѣ́нїѧ: ра́дꙋйсѧ, крѣ́посте на́ша въ ско́рбѣхъ и҆ и҆знеможе́нїи.
Ра́дꙋйсѧ, ст҃ы́й а҆рте́мїе, пресла́вный хрⷭ҇то́въ великомꙋ́чениче.
Конда́къ а҃
Взбра́нномꙋ воево́дѣ и҆ а҆ѵгꙋста́лїю страны̀ є҆гѵ́петскїѧ, царе́мъ земны́мъ че́стїю превознесе́нномꙋ, послѣди́ же ѿ ю҆лїа́на ѕлочести́вагѡ мꙋ́чимомꙋ и҆ во главꙋ̀ ᲂу҆сѣче́нномꙋ, ꙗ҆́кѡ ѕѣ́льнѣ страда́вшемꙋ и҆ побѣди́тельнѣ всѧ̑ претерпѣ́вшемꙋ, ѿ бг҃а же прїѧ́вшемꙋ нетлѣ́нїе и҆ бл҃года́ть чꙋдотворе́нїѧ, дне́сь вѣ́рнїи въ похва́льнаѧ возопїи́мъ:
Ра́дꙋйсѧ, ст҃ы́й а҆рте́мїе, пресла́вный хрⷭ҇то́въ великомꙋ́чениче.
Моли́твы
Ст҃ы́й ᲂу҆го́дниче бж҃їй, а҆рте́мїе првⷣный! при́зри млⷭ҇тивнѡ на ᲂу҆се́рднꙋю мл҃твꙋ на́съ, грѣ́шныхъ (и҆́мⷬ҇къ), и҆ твои́мъ бл҃гомо́щнымъ предста́тельствомъ проще́нїе согрѣше́нїй на́шихъ ᲂу҆ гдⷭ҇а и҆спросѝ, преспѣ́ѧнїе же въ вѣ́рѣ и҆ бл҃гоче́стїи и҆ ѿ ко́зней дїа́вольскихъ ѡ҆гражде́нїе и҆схода́тайствꙋй на́мъ. Наипа́че же молѝ гдⷭ҇а, да сподо́битъ всѣ́хъ на́съ по хрїстїа́нской кончи́нѣ нбⷭ҇ное црⷭ҇твїе полꙋчи́ти, и҆дѣ́же всѝ првⷣнїи кꙋ́пнѡ съ тобо́ю сла́вѧтъ ѻ҆ц҃а̀ и҆ сн҃а и҆ ст҃а́гѡ дх҃а во вѣ́ки вѣкѡ́въ.
Ст҃ы́й мꙋ́чениче а҆рте́мїе! при́зри съ нбⷭ҇наго черто́га на тре́бꙋющихъ твоеѧ̀ по́мощи и҆ не ѿве́ргни проше́нїй на́шихъ, но, ꙗ҆́кѡ при́сный бл҃годѣ́тель и҆ хода́тай на́шъ, молѝ хрⷭ҇та̀ бг҃а, да, чл҃вѣколюби́въ и҆ многомлⷭ҇тивъ сы́й, сохрани́тъ на́съ ѿ всѧ́кагѡ лю́таго ѡ҆бстоѧ́нїѧ: ѿ трꙋ́са, пото́па, ѻ҆гнѧ̀, меча̀, наше́ствїѧ и҆ноплеме́нникѡвъ и҆ междоꙋсо́бныѧ бра́ни. Да не ѡ҆сꙋ́дитъ на́съ грѣ́шныхъ по беззако́нїємъ на́шимъ, и҆ да не во ѕло̀ ѡ҆брати́мъ бл҃га̑ѧ, дарꙋ́ємаѧ на́мъ ѿ всеще́драго бг҃а, но во сла́вꙋ ст҃а́гѡ и҆́мене є҆гѡ̀ и҆ въ прославле́нїе крѣ́пкагѡ твоегѡ̀ застꙋпле́нїѧ. Да моли́твами твои́ми да́стъ на́мъ гдⷭ҇ь ми́ръ по́мыслѡвъ, воздержа́нїе ѿ па́гꙋбныхъ страсте́й и҆ ѿ всѧ́кїѧ скве́рны и҆ да ᲂу҆крѣпи́тъ во всѣ̑мъ мі́рѣ свою̀ є҆ди́нꙋ ст҃ꙋ́ю, собо́рнꙋю и҆ а҆пⷭ҇льскꙋю цр҃ковь, ю҆́же стѧжа́лъ є҆́сть честно́ю свое́ю кро́вїю. Моли́сѧ прилѣ́жнѡ, ст҃ы́й мꙋ́чениче, да бл҃гослови́тъ хрⷭ҇то́съ бг҃ъ держа́вꙋ, да ᲂу҆тверди́тъ во ст҃ѣ́й свое́й правосла́внѣй цр҃кви живы́й дх҃ъ пра́выѧ вѣ́ры и҆ бл҃гоче́стїѧ, да всѝ чле́ны є҆ѧ̀, чи́стїи ѿ сꙋемꙋ́дрїѧ и҆ сꙋевѣ́рїѧ, дх҃омъ и҆ и҆́стиною покланѧ́ютсѧ є҆мꙋ̀ и҆ ᲂу҆се́рднѡ пекꙋ́тсѧ ѡ҆ соблюде́нїи є҆гѡ̀ за́повѣдей, да мы̀ всѝ въ ми́ре и҆ бл҃гоче́стїи поживе́мъ въ настоѧ́щемъ вѣ́цѣ и҆ дости́гнемъ бл҃же́нныѧ вѣ́чныѧ жи́зни на нб҃сѝ, бл҃года́тїю гдⷭ҇а на́шегѡ і҆и҃са хрⷭ҇та̀, є҆мꙋ́же подоба́етъ всѧ́каѧ сла́ва, че́сть и҆ держа́ва со ѻ҆ц҃е́мъ и҆ ст҃ы́мъ дх҃омъ, ны́нѣ и҆ при́снѡ и҆ во вѣ́ки вѣкѡ́въ. А҆ми́нь.
Ѽ, всехва́льный великомꙋ́чениче а҆рте́мїе, гдⷭ҇ень во́инственниче и҆ всѣ̑мъ на́мъ крѣ́пкїй побо́рниче. Ско́ръ бꙋ́ди предста́тельствомъ твои́мъ ᲂу҆ чл҃вѣколю́бца хрⷭ҇та̀, да да́стъ правовѣ́рнымъ лю́дємъ, почита́ющымъ тѧ̀ и҆ на поклоне́нїе моще́мъ твои́мъ приходѧ́щымъ, млⷭ҇ть и҆ бл҃ги́хъ проше́нїй ско́рое и҆сполне́нїе. Предстоѧ́й прⷭ҇то́лꙋ бж҃їю въ ли́цѣ мꙋ́чєникъ, помина́й всѣ́хъ на́съ, бѣда́ми, напа́стьми и҆ скорбьмѝ ѡ҆бстои́мыхъ, и҆ въ житїѝ се́мъ мно́гѡ стра́ждꙋщихъ: да твое́ю по́мощїю и҆ крѣ́пкимъ побо́рствомъ преста́нꙋтъ приходѧ́щаѧ на на́съ ѕла́ѧ. Мы́ же, твои́ми ѕлострада́ньми назида́еми, си́лою бл҃года́ти хрⷭ҇то́вы чрез̾ тебѐ и҆сполнѧ́еми, въ терпѣ́нїи крⷭ҇тоноше́нїѧ жи́ти начне́мъ, во є҆́же гдⷭ҇ꙋ покаѧ́нїемъ бл҃гоꙋгоди́ти и҆ неизрече́ннаѧ бл҃га́ѧ наслѣ́довати, ꙗ҆́же ᲂу҆гото́вана лю́бѧщимъ бг҃а и҆ прославлѧ́ющымъ ст҃о́е и҆́мѧ є҆гѡ̀, ѻ҆ц҃а̀ и҆ сн҃а и҆ ст҃а́гѡ дх҃а, ны́нѣ и҆ при́снѡ, и҆ во вѣ́ки вѣкѡ́въ. А҆ми́нь.