Кондак 1
Избра́нный уго́дниче Христо́в и чудотво́рче преди́вный, в житии́ твое́м освяще́н от утро́бы ма́терни наставля́ти лю́ди на пу́ть Христо́ва смире́ния, и ны́не со А́нгелы предстоя́й Престо́лу Бо́жию, сподо́би на́с восхвали́ти тя́ пе́сньми с любо́вию, да моли́твами твои́ми от вся́ких бе́д и скорбе́й изба́влени, зове́м ти́:
Ра́дуйся, преподо́бне о́тче Авра́мие, Смоле́нский чудотво́рче.
Икос 1
А́нгелов сожи́тель и челове́ком засту́пник вои́стинну яви́лся еси́, преподо́бне о́тче Авра́мие, благоволе́нием все́х Творца́ Христа́ Бо́га, Его́же возлюби́л еси́ от ю́ности и за Него́же претерпе́л еси́ клеветы́ вра́жия. Те́мже приими́ от на́с сия́ хвале́ния:
Ра́дуйся, звездо́ пресве́тлая благоче́стия; ра́дуйся, свети́ло, во тме́ нече́стия пресла́вно возсия́вшее.
Ра́дуйся, клеветнико́в обличи́телю; ра́дуйся, Христо́вы ве́ры небоя́зненный пропове́дниче.
Ра́дуйся, ева́нгельскаго уче́ния до́блий после́дователю; ра́дуйся, зако́на Госпо́дня тепле́йший храни́телю.
Ра́дуйся, жи́знь вре́менную премени́вый на сокро́вище ве́чное Небе́сное; ра́дуйся, уче́ния Христо́ва би́сер многоце́нный стяжа́вый.
Ра́дуйся, Христо́вым уче́нием ду́шу твою́ просвети́вый; ра́дуйся, удосто́ивыйся благода́тнаго осене́ния свы́ше.
Ра́дуйся, яви́выйся доброде́телей жили́ще чистото́ю преукраше́нное; ра́дуйся, Ду́ха Свята́го оби́тель прекра́сная.
Ра́дуйся, преподо́бне о́тче Авра́мие, Смоле́нский чудотво́рче.
Кондак 2
Ви́дя Христо́с Госпо́дь ду́шу твою́ к прия́тию благода́ти чистото́ю и ми́лостынею предугото́ванную, све́том позна́ния Своего́ просвети́ тя от ю́ности и показа́ тя пропове́дника благоче́стия преизря́дна, и твоя́ доброде́тели помяну́в любомилосе́рдо, спаса́емых ча́сти сотвори́ тя о́бщника в Небе́снем Ца́рствии, иде́же со А́нгелы пое́ши: Аллилу́иа.
Икос 2
Ра́зум богопросвеще́нный дарова́ся тебе́, свя́те Авра́мие, и́мже я́сно проразуме́л еси́ тщету́ душепа́губную жития́ привре́меннаго и о́наго уклони́тися, Христа́ же взыска́ти потща́лся еси́. Вседу́шно те́мже взыва́ем ти́:
Ра́дуйся, блаже́нный после́дователю Христо́в; ра́дуйся, люби́телю за́поведей Его́ прии́скренний.
Ра́дуйся, кри́не благоуха́нный рая́ превы́шняго; ра́дуйся, цве́те прекра́сный вертогра́да Иису́сова.
Ра́дуйся, бога́тство земно́е ни во что́же вмени́вый; ра́дуйся, стяжа́ния тле́нная презре́вый.
Ра́дуйся, хра́мы Бо́жия и ни́щия удовля́вый; ра́дуйся, рука́ми убо́гих сокро́вища твоя́ горе́ предпосла́вый.
Ра́дуйся, я́ко не уклони́лся еси́ в се́ть любостяжа́ния; ра́дуйся, я́ко неулови́мь пребы́л еси́ мре́жею сребролю́бия.
Ра́дуйся, му́дрый ку́пче Ца́рствия Небе́снаго; ра́дуйся, ве́рный ра́бе, да́нный тебе́ тала́нт усугу́бивый.
Ра́дуйся, преподо́бне о́тче Авра́мие, Смоле́нский чудотво́рче.
Кондак 3
Си́ла Вы́шняго укрепи́ тя на по́двиг пропове́днический, блаже́нне Авра́мие: не терпя́ бо ви́дети па́губу ду́ш челове́ческих, ре́вностию разже́глся еси́ о Бо́зе жи́ве поуча́я приходя́щих к тебе́ благоче́стно проводи́ти житие́ и не отступа́ти от за́поведей Христа́ и зва́ти Ему́: Аллилу́иа.
Икос 3
Иму́ще ду́хом зло́бы помраче́нный у́м, не восхоте́ша лю́дие смоле́нския прини́кнути в ра́зум слове́с твои́х духоно́сных, но клеветы́ на тя́ воздви́гше, призва́ша тя́ на суди́ще. Мы́ же, ублажа́юще терпе́ние твое́, глаго́лем:
Ра́дуйся, Христа́ вседу́шно возлюби́вый; ра́дуйся, к Нему́ любо́вь во испове́дании яви́вый.
Ра́дуйся, апо́столом поревнова́вый; ра́дуйся, орга́н Свята́го Ду́ха бы́вый.
Ра́дуйся, благове́стия ева́нгельскаго уста́ богоглаго́ливыя; ра́дуйся, словеса́ жи́зни ве́чныя провеща́вый.
Ра́дуйся, поноше́ние за пресла́дкаго ти́ Иису́са веселя́ся претерпе́вый; ра́дуйся, поруга́ние и досажде́ние за Него́ благоду́шно со смире́нием восприя́вый.
Ра́дуйся, я́ко во испове́дании Христо́ве непоколеби́мь пребы́л еси́; ра́дуйся, наве́ты вра́жия я́ко паучи́ну потреби́вый.
Ра́дуйся, свя́тче Бо́жий, в му́жестве неодоле́нный; ра́дуйся, добропобе́дниче в терпе́нии непрекло́нный.
Ра́дуйся, преподо́бне о́тче Авра́мие, Смоле́нский чудотво́рче.
Кондак 4
Бу́рею зло́бы ды́шуще, не терпя́ще твоего́ обличе́ния, лю́дие смоле́нския всеча́сно терза́ху тя́, я́ко а́гнца незло́бива зве́рие ди́вии, покуша́ющеся отврати́ти жа́ждущих твоея́ про́поведи ева́нгельския, но ничто́же успе́ша омраче́ннии: си́лою бо свы́ше укрепля́емь, посрами́л еси́ о́ных ухищре́ние, немо́лчно пропове́дуя Христа́ и Еди́наго Творца́ Бо́га, и вопия́ Ему́: Аллилу́иа.
Икос 4
Слы́шавше увеща́тельныя твоя́ глаго́лы к лю́дем смоле́нским, Авра́мие свя́те, гони́тели твои́ беззако́ннии преща́ху стра́жею жа́ждущим слове́с твои́х послу́шати. Мы́ же, дивя́щеся вели́честву пропове́дания твоего́, зове́м ти́:
Ра́дуйся, учи́телю благоче́стия; ра́дуйся, посрами́телю нече́стия.
Ра́дуйся, словесы́ благода́ти, я́ко у́тварью многоце́нною Це́рковь украси́вый; ра́дуйся, ни во что́ же злоре́чие вмени́вый.
Ра́дуйся, твое́ю тве́рдостию гони́тели сокруши́вый; ра́дуйся, за прелюбе́знаго ти́ Иису́са вся́ вра́жия ухищре́ния разруши́вый.
Ра́дуйся, испове́данием на суде́ сочета́выйся Христу́ ра́спяту; ра́дуйся, ликовству́яй в черто́зе небе́снаго Домовлады́ки.
Ра́дуйся, у престо́ла Бо́жия предстоя́й с го́рними си́лами; ра́дуйся, открове́нным лице́м созерца́яй сла́ву Трисия́ннаго Божества́.
Ра́дуйся, от ра́йских высо́т приника́яй благосе́рдием твои́м к на́м земноро́дным; ра́дуйся, спаса́яй от бе́д ве́ру и любо́вь к тебе́ иму́щих.
Ра́дуйся, преподо́бне о́тче Авра́мие, Смоле́нский чудотво́рче.
Кондак 5
Богому́дрым пропове́дником апо́столом подража́л еси́, Авра́мие, вопия́: Христа́ чту́, Еди́наго же Его́ люблю́ и пропове́дати лю́дем прии́скренне жела́ю, се́рдцем и усты́ воспева́я Ему́: Аллилу́иа.
Икос 5
Ви́дяще тя́ непрекло́нна и непобеди́ма пропове́дника Христо́ва Ева́нгелия, устоя́вша проти́ву ко́зни вра́жия и до́блестно претерпе́вша преще́ния святи́теля, внегда́ удали́лся еси́ во оби́тель Богоро́дицы, вопие́м:
Ра́дуйся, испове́дниче Христо́в непобеди́мый; ра́дуйся, адама́нте терпе́ния крепча́йший.
Ра́дуйся, но́вый пропове́дниче благоче́стия; ра́дуйся, дре́вним подража́телю равноче́стный.
Ра́дуйся, чудотворе́ния благода́тию от Го́спода обогаще́нный; ра́дуйся, целе́б пода́телю всеблаги́й.
Ра́дуйся, во благоуха́нии святы́ни почива́яй; ра́дуйся, арома́ты ра́йскими облагоуха́яй ду́ши ве́рных.
Ра́дуйся, исто́чниче даро́в многоразли́чных; ра́дуйся, реко́ приснотеку́щая чуде́с.
Ра́дуйся, милосе́рдия к стра́ждущим сокро́вище неистощи́мое; ра́дуйся, боля́щих врачевство́ неоску́дное.
Ра́дуйся, преподо́бне о́тче Авра́мие, Смоле́нский чудотво́рче.
Кондак 6
О, неизрече́нная прему́дрость Бо́жия! И́хже Бо́г предуста́ви, те́х и призва́, си́х и оправда́, и́хже оправда́, си́х и просла́ви, — на тебе́, свя́тче Бо́жий, сбы́ся сие́ сло́во апо́стола. Ви́дя Госпо́дь, я́ко избра́н еси́ сосу́д и Сы́на Бо́жия Христа́ пропове́дал еси́, претерпе́л за Него́ клеветы́, сотвори́ тя́ сла́вна чудесы́, я́же показу́еши все́м чту́щим любо́вию па́мять твою́ и вопию́щим Бо́гу: Аллилу́иа.
Икос 6
Возсия́л еси́ пресла́вно чудотворе́ния луча́ми, умоли́в Го́спода, я́ко дре́вний Илия́, напои́ти дожде́м жа́ждущую зе́млю Смоле́нскую, и по явле́нии моще́й твои́х, свя́те Авра́мие, во гра́де Смоле́нске, показу́я лю́дем свое́ неизрече́нное милосе́рдие, прибега́ющим к твое́й многоцеле́бней ра́це и святе́й ико́не, ю́же обстоя́ще, вопие́м ти́:
Ра́дуйся, гра́да на́шего похвало́ и утвержде́ние; ра́дуйся, оби́тели Спа́совы, в не́йже почи́л еси́, при́сное заступле́ние.
Ра́дуйся, подвиза́ющимся в не́й благода́тное вспоможе́ние; ра́дуйся, о́ных покро́ве и защище́ние.
Ра́дуйся, неду́гующих ско́рый целе́бниче; ра́дуйся, уныва́ющих благонаде́жное возбужде́ние.
Ра́дуйся, скорбя́щих утеше́ние; ра́дуйся, ни́щих бога́тство.
Ра́дуйся, боля́щих исцеле́ние; ра́дуйся, изнемога́ющих укрепле́ние.
Ра́дуйся, ревну́ющих о благоче́стии помо́щниче; ра́дуйся, пребыва́ющих в посте́ и моли́тве споспе́шниче.
Ра́дуйся, преподо́бне о́тче Авра́мие, Смоле́нский чудотво́рче.
Кондак 7
Хотя́ Человеколю́бец Госпо́дь яви́ти оби́лие щедро́т Свои́х стране́ Смоле́нской, дарова́ на́м тебе́ уго́дника и моли́твенника богоприя́тнаго, чуде́с благода́ть источа́юща и неду́жных безме́здно врачу́юща. Те́мже благодари́м тобо́ю благоде́ющаго на́м Го́спода, и све́тло пра́зднуем па́мять твою́, с любо́вию к ра́це моще́й твои́х припа́дающе и Христу́ зову́ще: Аллилу́иа.
Икос 7
Но́ваго тя́ Христо́ва испове́дника и чудотво́рца сла́внаго любо́вию ублажа́ем и, ра́дующеся, глаго́лем:
Ра́дуйся, денни́це лучеза́рная земли́ Смоле́нския; ра́дуйся, луче́ немерца́ющий Со́лнца пра́вды Христа́.
Ра́дуйся, уго́дниче Госпо́день, преди́вный в чудесе́х; ра́дуйся, пра́ведниче, просла́вленный на небеси́ и на земли́.
Ра́дуйся, нетле́нием моще́й твои́х в и́стине воскресе́ния ме́ртвых уверя́яй; ра́дуйся, о́браз безсме́ртия в сме́ртнем телеси́ показу́яй.
Ра́дуйся, я́ко тебе́ дана́ бы́сть благода́ть за ны́ моли́тися и возбужда́ти на́с ко благи́м дело́м; ра́дуйся, я́ко по преставле́нии твое́м благодея́ния прося́щим подава́еши.
Ра́дуйся, от смертоно́сных я́зв и боле́зней притека́ющия к тебе́ сохраня́яй; ра́дуйся, бе́дствующим и оби́димым помога́яй.
Ра́дуйся, боголюби́вых ду́ш непосты́дное упова́ние; ра́дуйся, лю́бящих тя́ при́сное утеше́ние.
Ра́дуйся, преподо́бне о́тче Авра́мие, Смоле́нский чудотво́рче.
Кондак 8
Стра́нно е́сть ви́дети ме́ртвенное те́ло, жи́знь присносу́щную явля́ющее, во гро́бе лежа́щее и неду́ги врачу́ющее. Но ве́руем несумне́нно, уго́дниче Христо́в Авра́мие, я́ко мощьми́ твои́ми святы́ми, а́ще и сокрове́нными, почива́яй зде́ и ду́хом твои́м не отлуча́ешися от на́с недосто́йных, честну́ю па́мять твою́ с любо́вию почита́ющих и пред свято́ю твое́ю ико́ною Христу́ благода́рне зову́щих: Аллилу́иа.
Икос 8
Ве́сь в вы́шних еси́, свя́тче Бо́жий Авра́мие, во све́тлости святы́х торжеству́еши и наслажда́ешися неизрече́нных бла́г небе́сных. Ве́мы же, я́ко и на́с земны́х и пе́рстных не забыва́еши, но и от го́рних высо́т ми́лостивно к на́м приника́еши, подвиза́я на́с чествова́ти тя́ си́ми похвала́ми:
Ра́дуйся, благоче́стия утвержде́ние; ра́дуйся, правосла́вия похвало́.
Ра́дуйся, земли́ Росси́йския благода́тное осене́ние; ра́дуйся, гра́да Смоле́нска све́тлое ра́дование.
Ра́дуйся, многопло́дная розго́ виногра́да Христо́ва; ра́дуйся, граждани́не го́рняго гра́да Иерусали́ма Небе́снаго.
Ра́дуйся, в пресла́внем ли́це преподо́бных пребыва́яй; ра́дуйся, рая́ жи́телю всеблаже́нный.
Ра́дуйся, Ца́рствия Христо́ва насле́дниче; ра́дуйся, ве́чныя блаже́нныя жи́зни соприча́стниче.
Ра́дуйся, прибе́жище на́ше и защище́ние; ра́дуйся, ско́рое и безме́здное неду́гов врачева́ние.
Ра́дуйся, преподо́бне о́тче Авра́мие, Смоле́нский чудотво́рче.
Кондак 9
Вси́ а́нгели небе́снии ра́достно восприя́ша тя́ во оби́тели ра́йския, богому́дре о́тче Авра́мие, иде́же свята́я твоя́ душа́ по́честь побе́дную восприя́т от Христа́ Спаси́теля, пра́веднаго Мздовоздая́теля подвиза́ющихся за и́мя свято́е Его́ на земли́: прославля́я бо и́х на небеси́ с го́рними ли́ки, сподобля́ет предстоя́ния у престо́ла Своего́, да пою́т Ему́ немо́лчно: Аллилу́иа.
Икос 9
Вети́йством злочести́вым и прельще́нием лука́вым неуловле́н пребы́л еси́, о́тче Авра́мие, егда́ предста́л еси́ на су́д святи́тельский земли́ Смоле́нския, те́мже я́ко до́бляго испове́дника Христо́ва ублажа́ем тя́ и зове́м:
Ра́дуйся, просвеще́нный заре́ю Пресвята́го Ду́ха; ра́дуйся, я́ко стра́х малоду́шный пред суди́щем от себе́ отря́сл еси́.
Ра́дуйся, я́ко щито́м ве́ры огради́лся еси́; ра́дуйся, неумолка́ющий благове́стниче си́лы Бо́жия.
Ра́дуйся, неутоми́мый испове́дниче ева́нгельския и́стины; ра́дуйся, и́стинный покло́нниче, ду́хом и и́стиною кла́няяйся Творцу́.
Ра́дуйся, му́жу жела́ний духо́вных; ра́дуйся, взыска́вый Христа́, отри́нув мирску́ю пре́лесть.
Ра́дуйся, стра́нники и ни́щия пита́вый от трудо́в свои́х пра́ведных; ра́дуйся, еле́ем ми́лости умаще́нная главо́.
Ра́дуйся, горо́ доброде́телей.
Ра́дуйся, преподо́бне о́тче Авра́мие, Смоле́нский чудотво́рче.
Кондак 10
Спасти́ся на́м прии́скренне жела́я, мо́лишися за на́с горе́ у престо́ла Бо́жия, уго́дниче Христо́в Авра́мие, и твои́ми моли́твами посо́бствуеши на́м в стра́нствии многотру́днем земна́го жития́, е́же в покая́нии и благоче́стии сконча́ти, да сподо́бимся и с тобо́ю воспева́ти Христу́ и Бо́гу Отцу́ со Святы́м Ду́хом: Аллилу́иа.
Икос 10
Сте́ну защище́ния иму́ще твоя́ святы́я моли́твы, Авра́мие чу́дне, ра́дуемся, гре́шнии, и чте́м любо́вию па́мять твою́, зову́ще:
Ра́дуйся, великоимени́тый на́ш засту́пниче; ра́дуйся, небожи́телю богопросвеще́нный.
Ра́дуйся, чудотво́рче ди́вный и ми́лостивый; ра́дуйся, благи́й послу́шателю су́щих в ско́рбех.
Ра́дуйся, предваря́яй призыва́ющих тя́ в беда́х; ра́дуйся, приводя́щий гре́шныя ко исправле́нию.
Ра́дуйся, ми́ро враче́бное неду́гом многоразли́чным; ра́дуйся, не то́кмо теле́сных, но и душе́вных боле́зней цели́телю.
Ра́дуйся, духо́в нечи́стых от челове́ков прогони́телю; ра́дуйся, даро́в благода́тных незави́стный пода́телю.
Ра́дуйся, благоуха́нием святы́ни твоея́ услажда́яй ду́ши на́ша; ра́дуйся, чудесы́ твои́ми утвержда́яй на́с во и́стине святы́я правосла́вныя ве́ры.
Ра́дуйся, преподо́бне о́тче Авра́мие, Смоле́нский чудотво́рче.
Кондак 11
Пе́ние моле́бное и похвалу́ сию́ смире́нную не пре́зри, о́тче Авра́мие, се́ бо ве́рою и любо́вию к тебе́ подвиза́еми, собо́рне обстоя́ще о́браз тво́й святы́й, ублажа́ем тя́, засту́пника на́шего, и сле́зно про́сим: моли́ся за ны́ ко Го́споду, к Нему́же и́маши невозбра́нное дерзнове́ние и твои́х моли́тв благода́тное де́йство, да благода́рне зове́м Ему́, ди́вному во святы́х: Аллилу́иа.
Икос 11
Светоно́сным Тро́ическим сия́нием горе́ озаре́нный, Авра́мие свя́те, просвети́ и на́ша сердца́, тмо́ю грехо́вною покрове́нная, да еле́ем благи́х де́л возже́гше уга́сшия на́ша свети́льники, сподо́бимся бра́чнаго Христо́ва черто́га, иде́же ты́ вселя́ешися со святы́ми и слы́шиши от на́с сия́ благохвале́ния:
Ра́дуйся, от Бо́га да́нный покрови́телю на́м; ра́дуйся, ангелоподо́бный челове́че.
Ра́дуйся, устрои́телю оби́тели на́шея; ра́дуйся, пропове́дниче неутоми́мый.
Ра́дуйся, я́ко рука́ твоя́ изоби́льно помога́ше оби́тели твое́й ску́дней; ра́дуйся, я́ко му́дре расточа́л еси́ бога́тство тле́нное, теку́щее к тебе́.
Ра́дуйся, премени́вый о́ное на нетле́нная бла́га Небе́сная; ра́дуйся, наслажда́яйся блаже́нства ми́лостивых.
Ра́дуйся, предстоя́й А́гнцу в ли́це преподо́бных; ра́дуйся, ликовству́яй в селе́нии пра́ведных.
Ра́дуйся, в житии́ твое́м му́дрость чу́дную яви́вый; ра́дуйся, и́ноков оби́тели своея́ до́бре упра́вивый.
Ра́дуйся, преподо́бне о́тче Авра́мие, Смоле́нский чудотво́рче.
Кондак 12
Благода́ть и ми́лость испроси́ на́м у Христа́ и Спаси́теля на́шего, свя́те и сла́вне о́тче Авра́мие, ве́руем бо несумне́нно, я́ко е́же про́сиши, да́рует ти́ всеблаги́й Влады́ка. Те́мже и о на́с, гре́шных, не преста́й умоля́ти Его́ благосе́рдие и испроси́ на́м да́р коему́ждо благопотре́бен, да зове́м все́х благи́х Вино́внику и Пода́телю Бо́гу: Аллилу́иа.
Икос 12
Пое́м твоя́ апо́стольския труды́, велича́ем твое́ а́нгельское терпе́ние и незло́бие, сла́вим от сокрове́нных моще́й твои́х то́ки чуде́с, и́хже источа́еши непреста́нно, подвиза́я на́с зва́ти тебе́:
Ра́дуйся, Арха́нгелов и А́нгелов сослужи́телю; ра́дуйся, патриа́рхов и проро́ков спредстоя́телю.
Ра́дуйся, апо́столов единоревни́телю; ра́дуйся, подви́жников красото́.
Ра́дуйся, святи́телей и преподо́бных собесе́дниче; ра́дуйся, пра́ведных и все́х святы́х сожи́телю.
Ра́дуйся, я́ко свы́ше чуде́с де́йством украси́лся еси́; ра́дуйся, в честны́х и многоцеле́бных моще́х свои́х с на́ми пребыва́яй.
Ра́дуйся, и ду́хом твои́м николи́же от на́с разлуча́яйся; ра́дуйся, отра́до на́ша и в ско́рбех утеше́ние.
Ра́дуйся, неду́гующих исцеле́ние; ра́дуйся, согреша́ющих исправле́ние.
Ра́дуйся, преподо́бне о́тче Авра́мие, Смоле́нский чудотво́рче.
Кондак 13
О, пресла́вный уго́дниче Христо́в и чудотво́рче Смоле́нския земли́ Авра́мие! ми́лостиво прие́м сие́ ма́лое моле́ние на́ше, тебе́ приноси́мое, умоли́ Царя́ ца́рствующих и Го́спода госпо́дствующих — Христа́ Бо́га на́шего, изба́вити на́с от вся́кия ско́рби и ну́жды в жи́зни се́й и муче́ний ве́чных по кончи́не на́шей, да сподо́бимся в Ца́рствии Небе́снем вку́пе с тобо́ю пе́ти Бо́гу: Аллилу́иа.
Повтор
Этот кондак читается трижды, затем икос 1-й и кондак 1-й.
Икос 1
А́нгелов сожи́тель и челове́ком засту́пник вои́стинну яви́лся еси́, преподо́бне о́тче Авра́мие, благоволе́нием все́х Творца́ Христа́ Бо́га, Его́же возлюби́л еси́ от ю́ности и за Него́же претерпе́л еси́ клеветы́ вра́жия. Те́мже приими́ от на́с сия́ хвале́ния:
Ра́дуйся, звездо́ пресве́тлая благоче́стия; ра́дуйся, свети́ло, во тме́ нече́стия пресла́вно возсия́вшее.
Ра́дуйся, клеветнико́в обличи́телю; ра́дуйся, Христо́вы ве́ры небоя́зненный пропове́дниче.
Ра́дуйся, ева́нгельскаго уче́ния до́блий после́дователю; ра́дуйся, зако́на Госпо́дня тепле́йший храни́телю.
Ра́дуйся, жи́знь вре́менную премени́вый на сокро́вище ве́чное Небе́сное; ра́дуйся, уче́ния Христо́ва би́сер многоце́нный стяжа́вый.
Ра́дуйся, Христо́вым уче́нием ду́шу твою́ просвети́вый; ра́дуйся, удосто́ивыйся благода́тнаго осене́ния свы́ше.
Ра́дуйся, яви́выйся доброде́телей жили́ще чистото́ю преукраше́нное; ра́дуйся, Ду́ха Свята́го оби́тель прекра́сная.
Ра́дуйся, преподо́бне о́тче Авра́мие, Смоле́нский чудотво́рче.
Кондак 1
Избра́нный уго́дниче Христо́в и чудотво́рче преди́вный, в житии́ твое́м освяще́н от утро́бы ма́терни наставля́ти лю́ди на пу́ть Христо́ва смире́ния, и ны́не со А́нгелы предстоя́й Престо́лу Бо́жию, сподо́би на́с восхвали́ти тя́ пе́сньми с любо́вию, да моли́твами твои́ми от вся́ких бе́д и скорбе́й изба́влени, зове́м ти́:
Ра́дуйся, преподо́бне о́тче Авра́мие, Смоле́нский чудотво́рче.
Молитвы
О, вели́кий о́тче Авра́мие, до́блий подви́жниче Христо́в, в ско́рбех и напа́стех пресла́вный на́ш помо́щниче и защи́тниче! Ничто́же возмо́же отлучи́ти тя́ от любве́ ко Го́споду Иису́су: ни гоне́ния, ни клеветы́, ни преще́ния враго́в твои́х. Ты́, я́ко ле́в, на бра́нь проти́ву волко́в мы́сленных, духо́в зло́бы, исше́л еси́, и́же за до́брое твое́ испове́дание единоплеме́нный тебе́ наро́д смоле́нский на тя́ воздвиго́ша; но си́х, я́ко о́гненная стрела́, порази́л еси́, си́лою благода́ти Свята́го Ду́ха укрепля́емь, и, я́ко оре́л, в го́рния оби́тели Отца́ Небе́снаго воспари́л еси́, ве́чную жи́знь, сла́ву и блаже́нство неизрече́нное та́мо насле́довав. Ве́руем, свя́тче Бо́жий, я́ко, предстоя́ со а́нгелы и все́ми святы́ми престо́лу сла́вы Триипоста́снаго Бо́га, усе́рдныя и богоприя́тныя возно́сиши моли́твы не то́кмо о святе́й оби́тели се́й, тобо́ю устро́енней, и о гра́де на́шем, но и о все́й святе́й Христо́ве Це́ркви. Мо́лим тя́, моли́ся Го́сподеви: ве́рных рабо́в твои́х, в ско́рби и печа́ли де́нь и но́щь вопию́щих к тебе́, многоболе́зный во́пль да услы́шит, и да изведе́т от поги́бели живо́т на́ш. Ве́мы, пресла́вный чудотво́рче, ка́ко ты́, си́лою всемогу́щаго Го́спода Иису́са Христа́, еще́ жи́в сы́й, жа́ждущую за грехи́ люде́й зе́млю Смоле́нскую оби́льным дожде́м напои́ти умоли́л еси́, и по успе́нии твое́м оби́льныя да́ры благода́тныя по́мощи во спасе́ние все́м с ве́рою к тебе́ прибега́ющим источа́еши, наипа́че кончи́ну с покая́нием почита́ющим тя́ подае́ши, да вси́ единоду́шно неисповеди́мое вели́чие бла́гости Бо́жия прославля́ем. Те́мже с ве́рою и любо́вию припа́дающе и благогове́йно святу́ю ико́ну твою́ лобыза́юще, мо́лим тя́, до́брый на́ш на небеси́ моли́твенниче и засту́пниче: помога́й на́м, гре́шным и смире́нным, твои́ми моли́твами во все́х ско́рбех, ну́ждах и обстоя́ниих на́ших, сохраня́й на́с и святу́ю сию́ оби́тель твою́ и гра́д се́й Смоле́нск и вся́ правосла́вныя христиа́ны Росси́йския страны́ от вся́каго зла́ и вся́кия напа́сти, наипа́че же ве́чному на́шему спасе́нию споспешеству́й, и все́х прося́щих твоея́ по́мощи и заступле́ния сохраня́й. Та́же моли́ Христа́ Спаси́теля на́шего, да все́м правосла́вным христиа́ном ми́р и тишину́ да́рует, и да отврати́т от на́с вся́кий гне́в, на ны́ дви́жимый, да изба́вит на́с от сете́й вра́жиих, томле́ния во у́зах греха́ и муче́ний а́довых, и да сподо́бит на́с, недосто́йных и гре́шных, ста́ти одесну́ю Его́ на суде́ Его́ пра́веднем и вни́ти в ве́чный поко́й святы́х Его́, иде́же пра́зднующих гла́с непреста́нный и неизрече́нная сла́дость зря́щих добро́ту лица́ Его́. И та́ко да возмо́жем с тобо́ю и все́ми святы́ми безконе́чно сла́вити Тро́ицу Единосу́щную и Неразде́льную во ве́ки веко́в. Ами́нь.
Конда́къ а҃
И҆збра́нный ᲂу҆го́дниче хрⷭ҇то́въ и҆ чꙋдотво́рче преди́вный, въ житїѝ твое́мъ ѡ҆сщ҃е́нъ ѿ ᲂу҆тро́бы ма́терни наставлѧ́ти лю́ди на пꙋ́ть хрⷭ҇то́ва смире́нїѧ, и҆ ны́нѣ со а҆́гг҃лы предстоѧ́й престо́лꙋ бж҃їю, сподо́би на́съ восхвали́ти тѧ̀ пѣ́сньми съ любо́вїю, да моли́твами твои́ми ѿ всѧ́кихъ бѣ́дъ и҆ скорбе́й и҆зба́влени, зове́мъ тѝ:
Ра́дꙋйсѧ, прпⷣбне ѻ҆́тче а҆вра́мїе, смоле́нскїй чꙋдотво́рче.
І҆́косъ а҃
А҆́гг҃лѡвъ сожи́тель и҆ чл҃вѣ́кѡмъ застꙋ́пникъ вои́стиннꙋ ꙗ҆ви́лсѧ є҆сѝ, прпⷣбне ѻ҆́тче а҆вра́мїе, бл҃говоле́нїемъ всѣ́хъ творца̀ хрⷭ҇та̀ бг҃а, є҆го́же возлюби́лъ є҆сѝ ѿ ю҆́ности и҆ за него́же претерпѣ́лъ є҆сѝ клеветы̀ вра́жїѧ. Тѣ́мже прїимѝ ѿ на́съ сїѧ̑ хвалє́нїѧ:
Ра́дꙋйсѧ, ѕвѣздо̀ пресвѣ́тлаѧ бл҃гоче́стїѧ: ра́дꙋйсѧ, свѣти́ло, во тмѣ̀ нече́стїѧ пресла́внѡ возсїѧ́вшее.
Ра́дꙋйсѧ, клеветникѡ́въ ѡ҆бличи́телю: ра́дꙋйсѧ, хрⷭ҇то́вы вѣ́ры небоѧ́зненный проповѣ́дниче.
Ра́дꙋйсѧ, є҆ѵⷢ҇льскагѡ ᲂу҆че́нїѧ до́блїй послѣ́дователю: ра́дꙋйсѧ, зако́на гдⷭ҇нѧ теплѣ́йшїй храни́телю.
Ра́дꙋйсѧ, жи́знь вре́меннꙋю премѣни́вый на сокро́вище вѣ́чное нбⷭ҇ное: ра́дꙋйсѧ, ᲂу҆че́нїѧ хрⷭ҇то́ва би́серъ многоцѣ́нный стѧжа́вый.
Ра́дꙋйсѧ, хрⷭ҇то́вымъ ᲂу҆че́нїемъ дꙋ́шꙋ твою̀ просвѣти́вый: ра́дꙋйсѧ, ᲂу҆досто́ивыйсѧ бл҃года́тнагѡ ѡ҆сѣне́нїѧ свы́ше.
Ра́дꙋйсѧ, ꙗ҆ви́выйсѧ добродѣ́телей жили́ще чистото́ю преꙋкраше́нное: ра́дꙋйсѧ, дх҃а ст҃а́гѡ ѻ҆би́тель прекра́снаѧ.
Ра́дꙋйсѧ, прпⷣбне ѻ҆́тче а҆вра́мїе, смоле́нскїй чꙋдотво́рче.
Конда́къ в҃
Ви́дѧ хрⷭ҇то́съ гдⷭ҇ь дꙋ́шꙋ твою̀ къ прїѧ́тїю бл҃года́ти чистото́ю и҆ ми́лостынею предꙋгото́ваннꙋю, свѣ́томъ позна́нїѧ своегѡ̀ просвѣти́ тѧ ѿ ю҆́ности и҆ показа́ тѧ проповѣ́дника бл҃гоче́стїѧ преизрѧ́дна, и҆ твоѧ̑ добродѣ́тели помѧнꙋ́въ любомилосе́рдѡ, сп҃са́емыхъ ча́сти сотвори́ тѧ ѻ҆́бщника въ нбⷭ҇нѣмъ црⷭ҇твїи, и҆дѣ́же со а҆́гг҃лы пое́ши: А҆ллилꙋ́їа.
І҆́косъ в҃
Ра́зꙋмъ бг҃опросвѣще́нный дарова́сѧ тебѣ̀, свѧ́те а҆вра́мїе, и҆́мже ꙗ҆́снѡ проразꙋмѣ́лъ є҆сѝ тщетꙋ̀ дꙋшепа́гꙋбнꙋю житїѧ̀ привре́меннагѡ и҆ ѻ҆́нагѡ ᲂу҆клони́тисѧ, хрⷭ҇та́ же взыска́ти потща́лсѧ є҆сѝ. Вседꙋ́шнѡ тѣ́мже взыва́емъ тѝ:
Ра́дꙋйсѧ, бл҃же́нный послѣ́дователю хрⷭ҇то́въ: ра́дꙋйсѧ, люби́телю за́повѣдей є҆гѡ̀ прїи́скреннїй.
Ра́дꙋйсѧ, крі́не бл҃гоꙋха́нный раѧ̀ превы́шнѧгѡ: ра́дꙋйсѧ, цвѣ́те прекра́сный вертогра́да і҆и҃сова.
Ра́дꙋйсѧ, бога́тство земно́е ни во что́же вмѣни́вый: ра́дꙋйсѧ, стѧжа́нїѧ тлѣ̑ннаѧ презрѣ́вый.
Ра́дꙋйсѧ, хра́мы бж҃їѧ и҆ ни́щыѧ ᲂу҆довлѧ́вый: ра́дꙋйсѧ, рꙋка́ми ᲂу҆бо́гихъ сокро́вища твоѧ̑ горѣ̀ предпосла́вый.
Ра́дꙋйсѧ, ꙗ҆́кѡ не ᲂу҆клони́лсѧ є҆сѝ въ сѣ́ть любостѧжа́нїѧ: ра́дꙋйсѧ, ꙗ҆́кѡ неꙋлови́мь пребы́лъ є҆сѝ мре́жею сребролю́бїѧ.
Ра́дꙋйсѧ, мꙋ́дрый кꙋ́пче црⷭ҇твїѧ нбⷭ҇нагѡ: ра́дꙋйсѧ, вѣ́рный ра́бе, да́нный тебѣ̀ тала́нтъ ᲂу҆сꙋгꙋ́бивый.
Ра́дꙋйсѧ, прпⷣбне ѻ҆́тче а҆вра́мїе, смоле́нскїй чꙋдотво́рче.
Конда́къ г҃
Си́ла вы́шнѧгѡ ᲂу҆крѣпи́ тѧ на по́двигъ проповѣ́дническїй, бл҃же́нне а҆вра́мїе: не терпѧ́ бо ви́дѣти па́гꙋбꙋ дꙋ́шъ человѣ́ческихъ, ре́вностїю разже́глсѧ є҆сѝ ѡ҆ бз҃ѣ жи́вѣ поꙋча́ѧ приходѧ́щихъ къ тебѣ̀ бл҃гоче́стнѡ проводи́ти житїѐ и҆ не ѿстꙋпа́ти ѿ за́повѣдей хрⷭ҇та̀ и҆ зва́ти є҆мꙋ̀: А҆ллилꙋ́їа.
І҆́косъ г҃
И҆мꙋ́ще дꙋ́хомъ ѕло́бы помраче́нный ᲂу҆́мъ, не восхотѣ́ша лю́дїе смоле́нскїѧ прини́кнꙋти въ ра́зꙋмъ слове́съ твои́хъ дꙋхоно́сныхъ, но клеветы̀ на тѧ̀ воздви́гше, призва́ша тѧ̀ на сꙋди́ще. Мы́ же, ᲂу҆бл҃жа́юще терпѣ́нїе твоѐ, глаго́лемъ:
Ра́дꙋйсѧ, хрⷭ҇та̀ вседꙋ́шнѡ возлюби́вый: ра́дꙋйсѧ, къ немꙋ̀ любо́вь во и҆сповѣ́данїи ꙗ҆ви́вый.
Ра́дꙋйсѧ, а҆пⷭ҇ломъ поревнова́вый: ра́дꙋйсѧ, ѻ҆рга́нъ ст҃а́гѡ дх҃а бы́вый.
Ра́дꙋйсѧ, бл҃говѣ́стїѧ є҆ѵⷢ҇льскагѡ ᲂу҆ста̀ бг҃оглаго́ливыѧ: ра́дꙋйсѧ, словеса̀ жи́зни вѣ́чныѧ провѣща́вый.
Ра́дꙋйсѧ, поноше́нїе за пресла́дкагѡ тѝ і҆и҃са веселѧ́сѧ претерпѣ́вый: ра́дꙋйсѧ, порꙋга́нїе и҆ досажде́нїе за негѡ̀ бл҃годꙋ́шнѡ со смире́нїемъ воспрїѧ́вый.
Ра́дꙋйсѧ, ꙗ҆́кѡ во и҆сповѣ́данїи хрⷭ҇то́вѣ непоколеби́мь пребы́лъ є҆сѝ: ра́дꙋйсѧ, навѣ́ты вра́жїѧ ꙗ҆́кѡ паꙋчи́нꙋ потреби́вый.
Ра́дꙋйсѧ, свѧ́тче бж҃їй, въ мꙋ́жествѣ неѡдолѣ́нный: ра́дꙋйсѧ, добропобѣ́дниче въ терпѣ́нїи непрекло́нный.
Ра́дꙋйсѧ, прпⷣбне ѻ҆́тче а҆вра́мїе, смоле́нскїй чꙋдотво́рче.
Конда́къ д҃
Бꙋ́рею ѕло́бы ды́шꙋще, не терпѧ́ще твоегѡ̀ ѡ҆бличе́нїѧ, лю́дїе смоле́нскїѧ всеча́снѡ терза́хꙋ тѧ̀, ꙗ҆́кѡ а҆́гнца неѕло́бива ѕвѣ́рїе ди́вїи, покꙋша́ющесѧ ѿврати́ти жа́ждꙋщихъ твоеѧ̀ про́повѣди є҆ѵⷢ҇льскїѧ, но ничто́же ᲂу҆спѣ́ша ѡ҆мраче́ннїи: си́лою бо свы́ше ᲂу҆крѣплѧ́емь, посрами́лъ є҆сѝ ѻ҆́ныхъ ᲂу҆хищре́нїе, немо́лчнѡ проповѣ́дꙋѧ хрⷭ҇та̀ и҆ є҆ди́нагѡ творца̀ бг҃а, и҆ вопїѧ̀ є҆мꙋ̀: А҆ллилꙋ́їа.
І҆́косъ д҃
Слы́шавше ᲂу҆вѣща́тєльныѧ твоѧ̑ глаго́лы къ лю́дємъ смолє́нскимъ, а҆вра́мїе ст҃е, гони́тели твоѝ беззако́ннїи преща́хꙋ стра́жею жа́ждꙋщимъ слове́съ твои́хъ послꙋ́шати. Мы́ же, дивѧ́щесѧ вели́чествꙋ проповѣ́данїѧ твоегѡ̀, зове́мъ тѝ:
Ра́дꙋйсѧ, ᲂу҆чи́телю бл҃гоче́стїѧ: ра́дꙋйсѧ, посрами́телю нече́стїѧ.
Ра́дꙋйсѧ, словесы̀ бл҃года́ти, ꙗ҆́кѡ ᲂу҆́тварью многоцѣ́нною цр҃ковь ᲂу҆краси́вый: ра́дꙋйсѧ, ни во что́ же ѕлорѣ́чїе вмѣни́вый.
Ра́дꙋйсѧ, твое́ю тве́рдостїю гони́тели сокрꙋши́вый: ра́дꙋйсѧ, за прелюбе́знаго тѝ і҆и҃са всѧ̑ вра́жїѧ ᲂу҆хищрє́нїѧ разрꙋши́вый.
Ра́дꙋйсѧ, и҆сповѣ́данїемъ на сꙋдѣ̀ сочета́выйсѧ хрⷭ҇тꙋ̀ ра́спѧтꙋ: ра́дꙋйсѧ, ликовствꙋ́ѧй въ черто́зѣ нбⷭ҇нагѡ домовлады́ки.
Ра́дꙋйсѧ, ᲂу҆ прⷭ҇то́ла бж҃їѧ предстоѧ́й съ го́рними си́лами: ра́дꙋйсѧ, ѿкрове́ннымъ лице́мъ созерца́ѧй сла́вꙋ трисїѧ́ннагѡ бжⷭ҇тва̀.
Ра́дꙋйсѧ, ѿ ра́йскихъ высо́тъ приника́ѧй бл҃госе́рдїемъ твои́мъ къ на́мъ земнорѡ́днымъ: ра́дꙋйсѧ, сп҃са́ѧй ѿ бѣ́дъ вѣ́рꙋ и҆ любо́вь къ тебѣ̀ и҆мꙋ́щихъ.
Ра́дꙋйсѧ, прпⷣбне ѻ҆́тче а҆вра́мїе, смоле́нскїй чꙋдотво́рче.
Конда́къ є҃
Бг҃омꙋ́дрымъ проповѣ́дникомъ а҆пⷭ҇ломъ подража́лъ є҆сѝ, а҆вра́мїе, вопїѧ̀: хрⷭ҇та̀ чтꙋ̀, є҆ди́нагѡ же є҆гѡ̀ люблю̀ и҆ проповѣ́дати лю́дємъ прїи́скреннѣ жела́ю, се́рдцемъ и҆ ᲂу҆сты̀ воспѣва́ѧ є҆мꙋ̀: А҆ллилꙋ́їа.
І҆́косъ є҃
Ви́дѧще тѧ̀ непрекло́нна и҆ непобѣди́ма проповѣ́дника хрⷭ҇то́ва є҆ѵⷢ҇лїѧ, ᲂу҆стоѧ́вша проти́вꙋ кѡ́зни вра̑жїѧ и҆ до́блестнѡ претерпѣ́вша преще́нїѧ ст҃и́телѧ, внегда̀ ᲂу҆дали́лсѧ є҆сѝ во ѻ҆би́тель бцⷣы, вопїе́мъ:
Ра́дꙋйсѧ, и҆сповѣ́дниче хрⷭ҇то́въ непобѣди́мый: ра́дꙋйсѧ, а҆дама́нте терпѣ́нїѧ крѣпча́йшїй.
Ра́дꙋйсѧ, но́вый проповѣ́дниче бл҃гоче́стїѧ: ра́дꙋйсѧ, дрє́внимъ подража́телю равноче́стный.
Ра́дꙋйсѧ, чꙋдотворе́нїѧ бл҃года́тїю ѿ гдⷭ҇а ѡ҆богаще́нный: ра́дꙋйсѧ, цѣлє́бъ пода́телю всебл҃гі́й.
Ра́дꙋйсѧ, во бл҃гоꙋха́нїи ст҃ы́ни почива́ѧй: ра́дꙋйсѧ, а҆рѡма̑ты ра́йскими ѡ҆бл҃гоꙋха́ѧй дꙋ́ши вѣ́рныхъ.
Ра́дꙋйсѧ, и҆сто́чниче дарѡ́въ многоразли́чныхъ: ра́дꙋйсѧ, рѣко̀ приснотекꙋ́щаѧ чꙋде́съ.
Ра́дꙋйсѧ, млⷭ҇рдїѧ къ стра́ждꙋщимъ сокро́вище неистощи́мое: ра́дꙋйсѧ, болѧ́щихъ врачевство̀ неѡскꙋ́дное.
Ра́дꙋйсѧ, прпⷣбне ѻ҆́тче а҆вра́мїе, смоле́нскїй чꙋдотво́рче.
Конда́къ ѕ҃
Ѽ неизрече́ннаѧ премꙋ́дрость бж҃їѧ! И҆́хже бг҃ъ пред̾ꙋста́ви, тѣ́хъ и҆ призва̀, си́хъ и҆ ѡ҆правда̀, и҆́хже ѡ҆правда̀, си́хъ и҆ просла́ви, на тебѣ̀, свѧ́тче бж҃їй, сбы́сѧ сїѐ сло́во а҆пⷭ҇ла. Ви́дѧ гдⷭ҇ь, ꙗ҆́кѡ и҆збра́нъ є҆сѝ сосꙋ́дъ и҆ сн҃а бж҃їѧ хрⷭ҇та̀ проповѣ́далъ є҆сѝ, претерпѣ́лъ за негѡ̀ клеветы̀, сотворѝ тѧ̀ сла́вна чꙋдесы̀, ꙗ҆́же показꙋ́еши всѣ̑мъ чтꙋ́щымъ любо́вїю па́мѧть твою̀ и҆ вопїю́щымъ бг҃ꙋ: А҆ллилꙋ́їа.
І҆́косъ ѕ҃
Возсїѧ́лъ є҆сѝ пресла́внѡ чꙋдотворе́нїѧ лꙋча́ми, ᲂу҆моли́въ гдⷭ҇а, ꙗ҆́кѡ дре́внїй и҆лїа̀, напои́ти дожде́мъ жа́ждꙋщꙋю зе́млю смоле́нскꙋю, и҆ по ꙗ҆вле́нїи моще́й твои́хъ, свѧ́те а҆вра́мїе, во гра́дѣ смоле́нскѣ, показꙋ́ѧ лю́дємъ своѐ неизрече́нное милосе́рдїе, прибѣга́ющымъ къ твое́й многоцѣле́бнѣй ра́цѣ и҆ ст҃ѣ́й і҆кѡ́нѣ, ю҆́же ѡ҆бстоѧ́ще, вопїе́мъ тѝ:
Ра́дꙋйсѧ, гра́да на́шегѡ похвало̀ и҆ ᲂу҆твержде́нїе: ра́дꙋйсѧ, ѻ҆би́тели сп҃совы, въ не́йже почи́лъ є҆сѝ, при́сное застꙋпле́нїе.
Ра́дꙋйсѧ, подвиза́ющымсѧ въ не́й бл҃года́тное вспоможе́нїе: ра́дꙋйсѧ, ѻ҆́ныхъ покро́ве и҆ защище́нїе.
Ра́дꙋйсѧ, недꙋ́гꙋющихъ ско́рый цѣле́бниче: ра́дꙋйсѧ, ᲂу҆ныва́ющихъ бл҃гонаде́жное возбꙋжде́нїе.
Ра́дꙋйсѧ, скорбѧ́щихъ ᲂу҆тѣше́нїе: ра́дꙋйсѧ, ни́щихъ бога́тство.
Ра́дꙋйсѧ, болѧ́щихъ и҆сцѣле́нїе: ра́дꙋйсѧ, и҆знемога́ющихъ ᲂу҆крѣпле́нїе.
Ра́дꙋйсѧ, ревнꙋ́ющихъ ѡ҆ бл҃гоче́стїи помо́щниче: ра́дꙋйсѧ, пребыва́ющихъ въ постѣ̀ и҆ моли́твѣ споспѣ́шниче.
Ра́дꙋйсѧ, прпⷣбне ѻ҆́тче а҆вра́мїе, смоле́нскїй чꙋдотво́рче.
Конда́къ з҃
Хотѧ̀ чл҃вѣколю́бецъ гдⷭ҇ь ꙗ҆ви́ти ѻ҆би́лїе щедро́тъ свои́хъ странѣ̀ смоле́нской, дарова̀ на́мъ тебѐ ᲂу҆го́дника и҆ моли́твенника бг҃опрїѧ́тнагѡ, чꙋде́съ бл҃года́ть и҆сточа́юща и҆ недꙋ́жныхъ безме́зднѡ врачꙋ́юща. Тѣ́мже бл҃годари́мъ тобо́ю бл҃годѣ́ющаго на́мъ гдⷭ҇а, и҆ свѣ́тло пра́зднꙋемъ па́мѧть твою̀, съ любо́вїю къ ра́цѣ моще́й твои́хъ припа́дающе и҆ хрⷭ҇тꙋ̀ зовꙋ́ще: А҆ллилꙋ́їа.
І҆́косъ з҃
Но́вагѡ тѧ̀ хрⷭ҇то́ва и҆сповѣ́дника и҆ чꙋдотво́рца сла́внагѡ любо́вїю ᲂу҆бл҃жа́емъ и҆, ра́дꙋющесѧ, глаго́лемъ:
Ра́дꙋйсѧ, денни́це лꙋчеза́рнаѧ землѝ смоле́нскїѧ: ра́дꙋйсѧ, лꙋчѐ немерца́ющїй сл҃нца пра́вды хрⷭ҇та̀.
Ра́дꙋйсѧ, ᲂу҆го́дниче гдⷭ҇ень, преди́вный въ чꙋдесѣ́хъ: ра́дꙋйсѧ, пра́ведниче, просла́вленный на нб҃сѝ и҆ на землѝ.
Ра́дꙋйсѧ, нетлѣ́нїемъ моще́й твои́хъ въ и҆́стинѣ воскресе́нїѧ ме́ртвыхъ ᲂу҆вѣрѧ́ѧй: ра́дꙋйсѧ, ѻ҆́бразъ безсме́ртїѧ въ сме́ртнѣмъ тѣлесѝ показꙋ́ѧй.
Ра́дꙋйсѧ, ꙗ҆́кѡ тебѣ̀ дана̀ бы́сть бл҃года́ть за ны̀ моли́тисѧ и҆ возбꙋжда́ти на́съ ко бл҃ги́мъ дѣлѡ́мъ: ра́дꙋйсѧ, ꙗ҆́кѡ по преставле́нїи твое́мъ бл҃годѣѧ́нїѧ просѧ́щымъ подава́еши.
Ра́дꙋйсѧ, ѿ смертоно́сныхъ ꙗ҆́звъ и҆ болѣ́зней притека́ющыѧ къ тебѣ̀ сохранѧ́ѧй: ра́дꙋйсѧ, бѣ́дствꙋющымъ и҆ ѡ҆би̑димымъ помога́ѧй.
Ра́дꙋйсѧ, бг҃олюби́выхъ дꙋ́шъ непосты́дное ᲂу҆пова́нїе: ра́дꙋйсѧ, лю́бѧщихъ тѧ̀ при́сное ᲂу҆тѣше́нїе.
Ра́дꙋйсѧ, прпⷣбне ѻ҆́тче а҆вра́мїе, смоле́нскїй чꙋдотво́рче.
Конда́къ и҃
Стра́ннѡ є҆́сть ви́дѣти ме́ртвенное тѣ́ло, жи́знь присносꙋ́щнꙋю ꙗ҆влѧ́ющее, во гро́бѣ лежа́щее и҆ недꙋ́ги врачꙋ́ющее. Но вѣ́рꙋемъ несꙋмнѣ́ннѡ, ᲂу҆го́дниче хрⷭ҇то́въ а҆вра́мїе, ꙗ҆́кѡ мощьмѝ твои́ми ст҃ы́ми, а҆́ще и҆ сокрове́нными, почива́ѧй здѣ̀ и҆ дꙋ́хомъ твои́мъ не ѿлꙋча́ешисѧ ѿ на́съ недосто́йныхъ, честнꙋ́ю па́мѧть твою̀ съ любо́вїю почита́ющихъ и҆ пред̾ ст҃о́ю твое́ю і҆кѡ́ною хрⷭ҇тꙋ̀ бл҃года́рнѣ зовꙋ́щихъ: А҆ллилꙋ́їа.
І҆́косъ и҃
Ве́сь въ вы́шнихъ є҆сѝ, свѧ́тче бж҃їй а҆вра́мїе, во свѣ́тлости ст҃ы́хъ торжествꙋ́еши и҆ наслажда́ешисѧ неизрече́нныхъ бл҃гъ нбⷭ҇ныхъ. Вѣ́мы же, ꙗ҆́кѡ и҆ на́съ земны́хъ и҆ пе́рстныхъ не забыва́еши, но и҆ ѿ го́рнихъ высо́тъ ми́лостивнѡ къ на́мъ приника́еши, подвиза́ѧ на́съ чествова́ти тѧ̀ си́ми похвала́ми:
Ра́дꙋйсѧ, бл҃гоче́стїѧ ᲂу҆твержде́нїе: ра́дꙋйсѧ, правосла́вїѧ похвало̀.
Ра́дꙋйсѧ, землѝ рѡссі́йскїѧ бл҃года́тное ѡ҆сѣне́нїе: ра́дꙋйсѧ, гра́да смоле́нска свѣ́тлое ра́дованїе.
Ра́дꙋйсѧ, многопло́днаѧ розго̀ вїногра́да хрⷭ҇то́ва: ра́дꙋйсѧ, граждани́не го́рнѧгѡ гра́да і҆ерⷭ҇ли́ма нбⷭ҇нагѡ.
Ра́дꙋйсѧ, въ пресла́внѣмъ ли́цѣ прпⷣбныхъ пребыва́ѧй: ра́дꙋйсѧ, раѧ̀ жи́телю всебл҃же́нный.
Ра́дꙋйсѧ, црⷭ҇твїѧ хрⷭ҇то́ва наслѣ́дниче: ра́дꙋйсѧ, вѣ́чныѧ бл҃же́нныѧ жи́зни соприча́стниче.
Ра́дꙋйсѧ, прибѣ́жище на́ше и҆ защище́нїе: ра́дꙋйсѧ, ско́рое и҆ безме́здное недꙋ́гѡвъ врачева́нїе.
Ра́дꙋйсѧ, прпⷣбне ѻ҆́тче а҆вра́мїе, смоле́нскїй чꙋдотво́рче.
Конда́къ ѳ҃
Всѝ а҆́гг҃ли нбⷭ҇нїи ра́достнѡ воспрїѧ́ша тѧ̀ во ѻ҆би́тели ра́йскїѧ, бг҃омꙋ́дре ѻ҆́тче а҆вра́мїе, и҆дѣ́же ст҃а́ѧ твоѧ̀ дꙋша̀ по́честь побѣ́днꙋю воспрїѧ́тъ ѿ хрⷭ҇та̀ спⷭ҇телѧ, пра́веднагѡ мздовоздаѧ́телѧ подвиза́ющихсѧ за и҆́мѧ ст҃о́е є҆гѡ̀ на землѝ: прославлѧ́ѧ бо и҆̀хъ на нб҃сѝ съ го́рними ли́ки, сподоблѧ́етъ предстоѧ́нїѧ ᲂу҆ прⷭ҇то́ла своегѡ̀, да пою́тъ є҆мꙋ̀ немо́лчнѡ: А҆ллилꙋ́їа.
І҆́косъ ѳ҃
Вѣті́йствомъ ѕлочести́вымъ и҆ прельще́нїемъ лꙋка́вымъ неꙋловле́нъ пребы́лъ є҆сѝ, ѻ҆́тче а҆вра́мїе, є҆гда̀ предста́лъ є҆сѝ на сꙋ́дъ ст҃и́тельскїй землѝ смоле́нскїѧ, тѣ́мже ꙗ҆́кѡ до́блѧгѡ и҆сповѣ́дника хрⷭ҇то́ва ᲂу҆бл҃жа́емъ тѧ̀ и҆ зове́мъ:
Ра́дꙋйсѧ, просвѣще́нный заре́ю прест҃а́гѡ дх҃а: ра́дꙋйсѧ, ꙗ҆́кѡ стра́хъ малодꙋ́шный пред̾ сꙋди́щемъ ѿ себє̀ ѡ҆трѧ́слъ є҆сѝ.
Ра́дꙋйсѧ, ꙗ҆́кѡ щито́мъ вѣ́ры ѡ҆гради́лсѧ є҆сѝ: ра́дꙋйсѧ, неꙋмолка́ющїй бл҃говѣ́стниче си́лы бж҃їѧ.
Ра́дꙋйсѧ, неꙋтоми́мый и҆сповѣ́дниче є҆ѵⷢ҇льскїѧ и҆́стины: ра́дꙋйсѧ, и҆́стинный покло́нниче, дꙋ́хомъ и҆ и҆́стиною кла́нѧѧйсѧ творцꙋ̀.
Ра́дꙋйсѧ, мꙋ́жꙋ жела́нїй дꙋхо́вныхъ: ра́дꙋйсѧ, взыска́вый хрⷭ҇та̀, ѿри́нꙋвъ мїрскꙋ́ю пре́лесть.
Ра́дꙋйсѧ, стра́нники и҆ ни́щыѧ пита́вый ѿ трꙋдѡ́въ свои́хъ пра́ведныхъ: ра́дꙋйсѧ, є҆ле́емъ ми́лости ᲂу҆маще́ннаѧ главо̀.
Ра́дꙋйсѧ, горо̀ добродѣ́телей.
Ра́дꙋйсѧ, прпⷣбне ѻ҆́тче а҆вра́мїе, смоле́нскїй чꙋдотво́рче.
Конда́къ і҃
Сп҃сти́сѧ на́мъ прїи́скреннѣ жела́ѧ, мо́лишисѧ за на́съ горѣ̀ ᲂу҆ прⷭ҇то́ла бж҃їѧ, ᲂу҆го́дниче хрⷭ҇то́въ а҆вра́мїе, и҆ твои́ми моли́твами посо́бствꙋеши на́мъ въ стра́нствїи многотрꙋ́днѣмъ земна́гѡ житїѧ̀, є҆́же въ покаѧ́нїи и҆ бл҃гоче́стїи сконча́ти, да сподо́бимсѧ и҆ съ тобо́ю воспѣва́ти хрⷭ҇тꙋ̀ и҆ бг҃ꙋ ѻ҆ц҃ꙋ̀ со ст҃ы́мъ дх҃омъ: А҆ллилꙋ́їа.
І҆́косъ і҃
Стѣ́нꙋ защище́нїѧ и҆мꙋ́ще твоѧ̑ ст҃ы̑ѧ моли̑твы, а҆вра́мїе чꙋ́дне, ра́дꙋемсѧ, грѣ́шнїи, и҆ чте́мъ любо́вїю па́мѧть твою̀, зовꙋ́ще:
Ра́дꙋйсѧ, великоимени́тый на́шъ застꙋ́пниче: ра́дꙋйсѧ, нб҃ожи́телю бг҃опросвѣще́нный.
Ра́дꙋйсѧ, чꙋдотво́рче ди́вный и҆ ми́лостивый: ра́дꙋйсѧ, бл҃гі́й послꙋ́шателю сꙋ́щихъ въ ско́рбѣхъ.
Ра́дꙋйсѧ, предварѧ́ѧй призыва́ющихъ тѧ̀ въ бѣда́хъ: ра́дꙋйсѧ, приводѧ́щїй грѣ̑шныѧ ко и҆справле́нїю.
Ра́дꙋйсѧ, мѵ́ро враче́бное недꙋ́гомъ многоразли̑чнымъ: ра́дꙋйсѧ, не то́кмо тѣле́сныхъ, но и҆ дꙋше́вныхъ болѣ́зней цѣли́телю.
Ра́дꙋйсѧ, дꙋхѡ́въ нечи́стыхъ ѿ человѣ́кѡвъ прогони́телю: ра́дꙋйсѧ, дарѡ́въ бл҃года́тныхъ незави́стный пода́телю.
Ра́дꙋйсѧ, бл҃гоꙋха́нїемъ ст҃ы́ни твоеѧ̀ ᲂу҆слажда́ѧй дꙋ́ши на̑ша: ра́дꙋйсѧ, чꙋдесы̀ твои́ми ᲂу҆твержда́ѧй на́съ во и҆́стинѣ ст҃ы́ѧ правосла́вныѧ вѣ́ры.
Ра́дꙋйсѧ, прпⷣбне ѻ҆́тче а҆вра́мїе, смоле́нскїй чꙋдотво́рче.
Конда́къ а҃і
Пѣ́нїе моле́бное и҆ похвалꙋ̀ сїю̀ смире́ннꙋю не пре́зри, ѻ҆́тче а҆вра́мїе, се́ бо вѣ́рою и҆ любо́вїю къ тебѣ̀ подвиза́еми, собо́рнѣ ѡ҆бстоѧ́ще ѻ҆́бразъ тво́й ст҃ы́й, ᲂу҆бл҃жа́емъ тѧ̀, застꙋ́пника на́шегѡ, и҆ сле́знѡ про́симъ: моли́сѧ за ны̀ ко гдⷭ҇ꙋ, къ немꙋ́же и҆́маши невозбра́нное дерзнове́нїе и҆ твои́хъ моли́твъ бл҃года́тное дѣ́йство, да бл҃года́рнѣ зове́мъ є҆мꙋ̀, ди́вномꙋ во ст҃ы́хъ: А҆ллилꙋ́їа.
І҆́косъ а҃і
Свѣтоно́снымъ трⷪ҇ческимъ сїѧ́нїемъ горѣ̀ ѡ҆заре́нный, а҆вра́мїе свѧ́те, просвѣтѝ и҆ на̑ша сєрдца̀, тмо́ю грѣхо́вною покровє́ннаѧ, да є҆ле́емъ бл҃ги́хъ дѣ́лъ возже́гше ᲂу҆га́сшїѧ на̑ша свѣти́льники, сподо́бимсѧ бра́чнагѡ хрⷭ҇то́ва черто́га, и҆дѣ́же ты̀ вселѧ́ешисѧ со ст҃ы́ми и҆ слы́шиши ѿ на́съ сїѧ̀ бл҃гохвалє́нїѧ:
Ра́дꙋйсѧ, ѿ бг҃а да́нный покрови́телю на́мъ: ра́дꙋйсѧ, а҆гг҃лоподо́бный человѣ́че.
Ра́дꙋйсѧ, ᲂу҆строи́телю ѻ҆би́тели на́шеѧ: ра́дꙋйсѧ, проповѣ́дниче неꙋтоми́мый.
Ра́дꙋйсѧ, ꙗ҆́кѡ рꙋка̀ твоѧ̀ и҆зѻби́льнѡ помога́ше ѻ҆би́тели твое́й скꙋ́днѣй: ра́дꙋйсѧ, ꙗ҆́кѡ мꙋ́дрѣ расточа́лъ є҆сѝ бога́тство тлѣ́нное, текꙋ́щее къ тебѣ̀.
Ра́дꙋйсѧ, премѣни́вый ѻ҆́ное на нетлѣ̑ннаѧ бла̑га нбⷭ҇наѧ: ра́дꙋйсѧ, наслажда́ѧйсѧ бл҃же́нства ми́лостивыхъ.
Ра́дꙋйсѧ, предстоѧ́й а҆́гнцꙋ въ ли́цѣ прпⷣбныхъ: ра́дꙋйсѧ, ликовствꙋ́ѧй въ селе́нїи пра́ведныхъ.
Ра́дꙋйсѧ, въ житїѝ твое́мъ мꙋ́дрость чꙋ́днꙋю ꙗ҆ви́вый: ра́дꙋйсѧ, и҆́нокѡвъ ѻ҆би́тели своеѧ̀ до́брѣ ᲂу҆пра́вивый.
Ра́дꙋйсѧ, прпⷣбне ѻ҆́тче а҆вра́мїе, смоле́нскїй чꙋдотво́рче.
Конда́къ в҃і
Блгⷣть и҆ ми́лость и҆спросѝ на́мъ ᲂу҆ хрⷭ҇та̀ и҆ спⷭ҇телѧ на́шегѡ, свѧ́те и҆ сла́вне ѻ҆́тче а҆вра́мїе, вѣ́рꙋемъ бо несꙋмнѣ́ннѡ, ꙗ҆́кѡ є҆́же про́сиши, да́рꙋетъ тѝ всебл҃гі́й влⷣка. Тѣ́мже и҆ ѡ҆ на́съ, грѣ́шныхъ, не преста́й ᲂу҆молѧ́ти є҆гѡ̀ бл҃госе́рдїе и҆ и҆спросѝ на́мъ да́ръ коемꙋ́ждо бл҃гопотре́бенъ, да зове́мъ всѣ́хъ бл҃ги́хъ вино́вникꙋ и҆ пода́телю бг҃ꙋ: А҆ллилꙋ́їа.
І҆́косъ в҃і
Пое́мъ твоѧ̑ а҆пⷭ҇льскїѧ трꙋды̀, велича́емъ твоѐ а҆́гг҃льское терпѣ́нїе и҆ неѕло́бїе, сла́вимъ ѿ сокрове́нныхъ моще́й твои́хъ то́ки чꙋде́съ, и҆́хже и҆сточа́еши непреста́ннѡ, подвиза́ѧ на́съ зва́ти тебѣ̀:
Ра́дꙋйсѧ, а҆рха́гг҃лѡвъ и҆ а҆́гг҃лѡвъ сослꙋжи́телю: ра́дꙋйсѧ, патрїа́рхѡвъ и҆ прⷪ҇ро́кѡвъ спредстоѧ́телю.
Ра́дꙋйсѧ, а҆пⷭ҇лѡвъ є҆диноревни́телю: ра́дꙋйсѧ, подви́жникѡвъ красото̀.
Ра́дꙋйсѧ, ст҃и́телей и҆ прпⷣбныхъ собесѣ́дниче: ра́дꙋйсѧ, пра́ведныхъ и҆ всѣ́хъ ст҃ы́хъ сожи́телю.
Ра́дꙋйсѧ, ꙗ҆́кѡ свы́ше чꙋде́съ дѣ́йствомъ ᲂу҆краси́лсѧ є҆сѝ: ра́дꙋйсѧ, въ честны́хъ и҆ многоцѣле́бныхъ мощѣ́хъ свои́хъ съ на́ми пребыва́ѧй.
Ра́дꙋйсѧ, и҆ дꙋ́хомъ твои́мъ николи́же ѿ на́съ разлꙋча́ѧйсѧ: ра́дꙋйсѧ, ѿра́до на́ша и҆ въ ско́рбѣхъ ᲂу҆тѣше́нїе.
Ра́дꙋйсѧ, недꙋ́гꙋющихъ и҆сцѣле́нїе: ра́дꙋйсѧ, согрѣша́ющихъ и҆справле́нїе.
Ра́дꙋйсѧ, прпⷣбне ѻ҆́тче а҆вра́мїе, смоле́нскїй чꙋдотво́рче.
Конда́къ г҃і
Ѽ пресла́вный ᲂу҆го́дниче хрⷭ҇то́въ и҆ чꙋдотво́рче смоле́нскїѧ землѝ а҆вра́мїе! Ми́лостивѡ прїе́мъ сїѐ ма́лое моле́нїе на́ше, тебѣ̀ приноси́мое, ᲂу҆молѝ цр҃ѧ̀ ца́рствꙋющихъ и҆ гдⷭ҇а госпо́дствꙋющихъ хрⷭ҇та̀ бг҃а на́шегѡ, и҆зба́вити на́съ ѿ всѧ́кїѧ ско́рби и҆ нꙋ́жды въ жи́зни се́й и҆ мꙋче́нїй вѣ́чныхъ по кончи́нѣ на́шей, да сподо́бимсѧ въ црⷭ҇твїи нбⷭ҇нѣмъ вкꙋ́пѣ съ тобо́ю пѣ́ти бг҃ꙋ: А҆ллилꙋ́їа.
Повто́ръ
Сей конда́къ глаго́лется три́жды, та́же і҆́косъ а҃-й и҆ конда́къ а҃-й.
І҆́косъ а҃
А҆́гг҃лѡвъ сожи́тель и҆ чл҃вѣ́кѡмъ застꙋ́пникъ вои́стиннꙋ ꙗ҆ви́лсѧ є҆сѝ, прпⷣбне ѻ҆́тче а҆вра́мїе, бл҃говоле́нїемъ всѣ́хъ творца̀ хрⷭ҇та̀ бг҃а, є҆го́же возлюби́лъ є҆сѝ ѿ ю҆́ности и҆ за него́же претерпѣ́лъ є҆сѝ клеветы̀ вра́жїѧ. Тѣ́мже прїимѝ ѿ на́съ сїѧ̑ хвалє́нїѧ:
Ра́дꙋйсѧ, ѕвѣздо̀ пресвѣ́тлаѧ бл҃гоче́стїѧ: ра́дꙋйсѧ, свѣти́ло, во тмѣ̀ нече́стїѧ пресла́внѡ возсїѧ́вшее.
Ра́дꙋйсѧ, клеветникѡ́въ ѡ҆бличи́телю: ра́дꙋйсѧ, хрⷭ҇то́вы вѣ́ры небоѧ́зненный проповѣ́дниче.
Ра́дꙋйсѧ, є҆ѵⷢ҇льскагѡ ᲂу҆че́нїѧ до́блїй послѣ́дователю: ра́дꙋйсѧ, зако́на гдⷭ҇нѧ теплѣ́йшїй храни́телю.
Ра́дꙋйсѧ, жи́знь вре́меннꙋю премѣни́вый на сокро́вище вѣ́чное нбⷭ҇ное: ра́дꙋйсѧ, ᲂу҆че́нїѧ хрⷭ҇то́ва би́серъ многоцѣ́нный стѧжа́вый.
Ра́дꙋйсѧ, хрⷭ҇то́вымъ ᲂу҆че́нїемъ дꙋ́шꙋ твою̀ просвѣти́вый: ра́дꙋйсѧ, ᲂу҆досто́ивыйсѧ бл҃года́тнагѡ ѡ҆сѣне́нїѧ свы́ше.
Ра́дꙋйсѧ, ꙗ҆ви́выйсѧ добродѣ́телей жили́ще чистото́ю преꙋкраше́нное: ра́дꙋйсѧ, дх҃а ст҃а́гѡ ѻ҆би́тель прекра́снаѧ.
Ра́дꙋйсѧ, прпⷣбне ѻ҆́тче а҆вра́мїе, смоле́нскїй чꙋдотво́рче.
Конда́къ а҃
И҆збра́нный ᲂу҆го́дниче хрⷭ҇то́въ и҆ чꙋдотво́рче преди́вный, въ житїѝ твое́мъ ѡ҆сщ҃е́нъ ѿ ᲂу҆тро́бы ма́терни наставлѧ́ти лю́ди на пꙋ́ть хрⷭ҇то́ва смире́нїѧ, и҆ ны́нѣ со а҆́гг҃лы предстоѧ́й престо́лꙋ бж҃їю, сподо́би на́съ восхвали́ти тѧ̀ пѣ́сньми съ любо́вїю, да моли́твами твои́ми ѿ всѧ́кихъ бѣ́дъ и҆ скорбе́й и҆зба́влени, зове́мъ тѝ:
Ра́дꙋйсѧ, прпⷣбне ѻ҆́тче а҆вра́мїе, смоле́нскїй чꙋдотво́рче.
Моли́твы
Ѽ вели́кїй ѻ҆́тче а҆вра́мїе, до́блїй подви́жниче хрⷭ҇то́въ, въ ско́рбѣхъ и҆ напа́стехъ пресла́вный на́шъ помо́щниче и҆ защи́тниче! Ничто́же возмо́же ѿлꙋчи́ти тѧ̀ ѿ любвѐ ко гдⷭ҇ꙋ і҆и҃сꙋ: ни гонє́нїѧ, ни клеветы̀, ни прещє́нїѧ врагѡ́въ твои́хъ. Ты̀, ꙗ҆́кѡ ле́въ, на бра́нь проти́вꙋ волкѡ́въ мы́сленныхъ, дꙋхѡ́въ ѕло́бы, и҆сше́лъ є҆сѝ, и҆́же за до́брое твоѐ и҆сповѣ́данїе є҆диноплеме́нный тебѣ̀ наро́дъ смоле́нскїй на тѧ̀ воздвиго́ша: но си́хъ, ꙗ҆́кѡ ѻ҆́гненнаѧ стрѣла̀, порази́лъ є҆сѝ, си́лою бл҃года́ти ст҃а́гѡ дх҃а ᲂу҆крѣплѧ́емь, и҆, ꙗ҆́кѡ ѻ҆ре́лъ, въ го́рнїѧ ѻ҆би́тели ѻ҆ц҃а̀ нбⷭ҇нагѡ воспари́лъ є҆сѝ, вѣ́чнꙋю жи́знь, сла́вꙋ и҆ бл҃же́нство неизрече́нное та́мѡ наслѣ́довавъ. Вѣ́рꙋемъ, свѧ́тче бж҃їй, ꙗ҆́кѡ, предстоѧ̀ со а҆́гг҃лы и҆ всѣ́ми ст҃ы́ми прⷭ҇то́лꙋ сла́вы трїѷпоста́снагѡ бг҃а, ᲂу҆сє́рдныѧ и҆ бг҃опрїѧ̑тныѧ возно́сиши моли̑твы не то́кмо ѡ҆ ст҃ѣ́й ѻ҆би́тели се́й, тобо́ю ᲂу҆стро́еннѣй, и҆ ѡ҆ гра́дѣ на́шемъ, но и҆ ѡ҆ все́й ст҃ѣ́й хрⷭ҇то́вѣ це́ркви. Мо́лимъ тѧ̀, моли́сѧ гдⷭ҇еви: вѣ́рныхъ рабѡ́въ твои́хъ, въ ско́рби и҆ печа́ли де́нь и҆ но́щь вопїю́щихъ къ тебѣ̀, многоболѣ́зный во́пль да ᲂу҆слы́шитъ, и҆ да и҆зведе́тъ ѿ поги́бели живо́тъ на́шъ. Вѣ́мы, пресла́вный чꙋдотво́рче, ка́кѡ ты̀, си́лою всемогꙋ́щагѡ гдⷭ҇а і҆и҃са хрⷭ҇та̀, є҆щѐ жи́въ сы́й, жа́ждꙋщꙋю за грѣхѝ люде́й зе́млю смоле́нскꙋю ѻ҆би́льнымъ дожде́мъ напои́ти ᲂу҆моли́лъ є҆сѝ, и҆ по ᲂу҆спе́нїи твое́мъ ѻ҆би̑льныѧ да́ры бл҃года́тныѧ по́мощи во сп҃се́нїе всѣ̑мъ съ вѣ́рою къ тебѣ̀ прибѣга́ющымъ и҆сточа́еши, наипа́че кончи́нꙋ съ покаѧ́нїемъ почита́ющимъ тѧ̀ подае́ши, да всѝ є҆динодꙋ́шнѡ неисповѣди́мое вели́чїе бл҃гости бж҃їѧ прославлѧ́емъ. Тѣ́мже съ вѣ́рою и҆ любо́вїю припа́дающе и҆ бл҃гоговѣ́йнѡ ст҃ꙋ́ю і҆кѡ́нꙋ твою̀ лобыза́юще, мо́лимъ тѧ̀, до́брый на́шъ на нб҃сѝ моли́твенниче и҆ застꙋ́пниче: помога́й на́мъ, грѣ̑шнымъ и҆ смирє́ннымъ, твои́ми моли́твами во всѣ́хъ ско́рбѣхъ, нꙋ́ждахъ и҆ ѡ҆бстоѧ́нїихъ на́шихъ, сохранѧ́й на́съ и҆ ст҃ꙋ́ю сїю̀ ѻ҆би́тель твою̀ и҆ гра́дъ се́й смоле́нскъ и҆ всѧ̑ правосла̑вныѧ хрⷭ҇тїа́ны рѡссі́йскїѧ страны̀ ѿ всѧ́кагѡ ѕла̀ и҆ всѧ́кїѧ напа́сти, наипа́че же вѣ́чномꙋ на́шемꙋ сп҃се́нїю споспѣшествꙋ́й, и҆ всѣ́хъ просѧ́щихъ твоеѧ̀ по́мощи и҆ застꙋпле́нїѧ сохранѧ́й. Та́же молѝ хрⷭ҇та̀ сп҃си́телѧ на́шегѡ, да всѣ̑мъ правосла́внымъ хрⷭ҇тїа́нѡмъ ми́ръ и҆ тишинꙋ̀ да́рꙋетъ, и҆ да ѿврати́тъ ѿ на́съ всѧ́кїй гнѣ́въ, на ны̀ дви́жимый, да и҆зба́витъ на́съ ѿ сѣте́й вра́жїихъ, томле́нїѧ во ᲂу҆́захъ грѣха̀ и҆ мꙋче́нїй а҆́довыхъ, и҆ да сподо́битъ на́съ, недосто́йныхъ и҆ грѣ́шныхъ, ста́ти ѡ҆деснꙋ́ю є҆гѡ̀ на сꙋдѣ̀ є҆гѡ̀ пра́веднѣмъ и҆ вни́ти въ вѣ́чный поко́й ст҃ы́хъ є҆гѡ̀, и҆дѣ́же пра́зднꙋющихъ гла́съ непреста́нный и҆ неизрече́ннаѧ сла́дость зрѧ́щихъ добро́тꙋ лица̀ є҆гѡ̀. И҆ та́кѡ да возмо́жемъ съ тобо́ю и҆ всѣ́ми ст҃ы́ми безконе́чнѡ сла́вити трⷪ҇цꙋ є҆диносꙋ́щнꙋю и҆ нераздѣ́льнꙋю во вѣ́ки вѣкѡ́въ. А҆ми́нь.