Кондак 1
Ко пречестно́му Богоро́дице боже́ственному по́ясу Твоему́, со благогове́нием притека́юще, исполня́емся просвеще́ния и благоуха́ния преми́рнаго, но я́ко пучи́но су́щи Де́во бла́гости, препоя́ши ны́ си́лою его́ Непоро́чная, зову́щия:
Ра́дуйся, по́ясе пречестны́й.
Икос 1
А́нгели неви́димо по́яс Тво́й святы́й со стра́хом обстоя́ще Отрокови́це, мы́ же во пло́ти су́щия, с ве́рою припа́даем к нему́, освяще́ние прие́млюще, и во благогове́нии вопие́м:
Ра́дуйся, по́ясе Богоро́дицы; ра́дуйся, сия́ние всему́ ми́ру.
Ра́дуйся, Непоро́чныя Де́вы препоя́сание; ра́дуйся, Це́ркве всея́ сокро́вище.
Ра́дуйся, по́ясе многоце́нный Влады́чицы небе́с; ра́дуйся, цве́те благоуха́нный благочести́вых христиа́н.
Ра́дуйся, я́ко те́ло Де́выя препоя́саеши; ра́дуйся, я́ко кре́пость льсти́ваго ослабля́еши.
Ра́дуйся, свети́льниче благода́ти всесве́тлый; ра́дуйся, исто́чниче чуде́с неизсяка́емый.
Ра́дуйся, и́мже ве́рнии светозаря́ются; ра́дуйся, и́мже врази́ упраздня́ются.
Ра́дуйся, по́ясе пречестны́й.
Кондак 2
Воззри́ Богороди́тельнице, о́ком благоутро́бным, ко и́же ве́рою ко свято́му Ти́ по́ясу, я́коже исто́чнику во́д освяще́нных че́стно припа́дающих, и прося́щих благода́ти Твоея́, необори́мую бо си́лу те́мже пода́ждь вопию́щим: Аллилу́ия.
Икос 2
Бы́сть Богоро́дице честна́го Ти́ по́яса принесе́ние во Ца́рский Гра́д, исто́чник весе́лия и́стиннаго, цари́цу бо ско́ро исцели́л еси́, на́м же благода́ть оби́льную при́сно подае́т вопию́щим:
Ра́дуйся, исто́чниче ра́дости ве́чныя; ра́дуйся, ча́ше душепи́щнаго бра́шна.
Ра́дуйся, и́мже Всечи́стая Де́во препоя́сася; ра́дуйся, и́же во Афо́не я́ко све́т возсия́.
Ра́дуйся, я́ко Зо́ю цари́цу исцели́л еси́; ра́дуйся, я́ко то́чиши все́м весе́лие у́мное.
Ра́дуйся, плени́це всесвята́я Чи́стыя Богоро́дицы; ра́дуйся, стрело́ огнено́сная на врага́ человекоуби́йцу.
Ра́дуйся, ра́дости вина́ и хода́таю; ра́дуйся, ти́хое душа́м приста́нище.
Ра́дуйся, Христу́ благоче́стно связу́ющий; ра́дуйся, страсте́й стремле́ния упраздня́ющий.
Ра́дуйся, по́ясе пречестны́й.
Кондак 3
По́яс Тво́й Фоме́ предаде́ Богоро́дице, к Сы́ну Твоему́ восходя́ще, и чрез о́наго же я́ко че́стен да́р и бла́г исполне́ние его́ на́м оста́вила еси́ Всепе́тая, пою́щим и вопию́щим Ти́: Аллилу́ия.
Икос 3
Име́ет свята́я Оби́тель Твоя́ Ватопе́дская, я́ко неотъе́млемо бога́тство Отрокови́це, и я́ко сто́лп Твоего́ заступле́ния, миродохнове́нный и всечестны́й Тво́й по́яс, ему́же благоче́стно припа́дающе, во умиле́нии зове́т:
Ра́дуйся, бога́тство нетле́ния; ра́дуйся, сто́лпе сострада́ния.
Ра́дуйся, пода́телю бла́г неисчерпа́емый; ра́дуйся, и́ноком водруже́ние незы́блемое.
Ра́дуйся, по́ясе всече́стне, А́нгелом ра́досте; ра́дуйся, мона́хом утвержде́ние и бе́д отринове́ние.
Ра́дуйся, Ватопе́ду хвало́ многоце́нная; ра́дуйся, благочести́вым побе́дное пе́ние.
Ра́дуйся, благово́нием небе́сным дыха́ющий; ра́дуйся, кре́пость непобеди́мую подаю́щий.
Ра́дуйся, тобо́ю бо мона́шествующия укрепля́ются; ра́дуйся, тобо́ю бо вражду́ющия упраздня́ются.
Ра́дуйся, по́ясе пречестны́й.
Кондак 4
Живоно́сный киво́т всечестна́го Ти́ по́яса, подае́т благоуха́ние Де́во, и злосмра́дие страсте́й отгоня́ет при́сно от ду́ш на́ших, те́мже вели́чию Твоему́ дивя́щеся вопие́м: Аллилу́ия.
Икос 4
По́яс Тво́й святы́й Всесвята́я Де́во, я́ко све́т сия́ет на горе́ Афо́нстей, и лучи́ златови́дными, вся́ облиста́ет твое́й благода́тию, те́мже чудеса́ того́ почита́юще, ве́рою вопие́м:
Ра́дуйся, чуде́с пода́телю; ра́дуйся, благода́тей светоли́тие.
Ра́дуйся, сокро́вищь сокро́вище свято́е; ра́дуйся, свеще́ серде́ц богому́дрых.
Ра́дуйся, по́ясе, его́же носи́ла еси́ Всенепоро́чная на земли́; ра́дуйся, вся́кую подаю́щий благода́ть и мно́гую кре́пость.
Ра́дуйся, я́ко показу́еши Де́выя сла́ву; ра́дуйся, я́ко отвраща́еши де́монския лу́ки.
Ра́дуйся, мно́гая исцеле́ния источа́ющий; ра́дуйся, ду́ши страсте́й свобожда́ющий.
Ра́дуйся, ве́рным ликова́ние боже́ственное; ра́дуйся, честна́я милосе́рдия кле́те.
Ра́дуйся, по́ясе пречестны́й.
Кондак 5
Богодарова́нный да́р и небе́сное бога́тство, по́яс Тво́й держа́ще Отрокови́це, на стра́сти си́лу непобеди́мую, е́юже препояса́емся, благода́ть бо и ми́лость при́сно подае́т вопию́щим: Аллилу́ия.
Икос 5
Исцеле́ние источа́ет по́яс Тво́й святы́й души́ и те́лу Отрокови́це, я́коже ро́су весне́ннюю, я́ко бо Иса́иа глаго́лет Всенепоро́чная, и сла́дость небе́сную благогове́йно тому́ вопию́щим:
Ра́дуйся, исто́чниче во́д невеще́ственных; ра́дуйся, пото́че мно́гих даро́в.
Ра́дуйся, Всечи́стыя по́яс всечестны́й; ра́дуйся, Це́ркви ра́дость небе́сная.
Ра́дуйся, сокро́вище свято́е дарова́ний духо́вных; ра́дуйся, ве́нче сла́вный христиа́н благочести́вых.
Ра́дуйся, Ватопе́ду стена́ неруши́мая; ра́дуйся, всему́ ми́ру сто́лпе кре́пости боже́ственныя.
Ра́дуйся, честно́е Де́выя опоя́сание; ра́дуйся, Бо́гом на́м да́нная ку́пля.
Ра́дуйся, Еди́ныя Де́выя по́ясе; ра́дуйся, ве́рным богодарова́нная си́ло.
Ра́дуйся, по́ясе пречестны́й.
Кондак 6
Стяжа́ Оби́тель Твоя́ Ватопе́дская, я́ко сокро́вище боже́ственное Отрокови́це, по́яс Тво́й ди́вный, и чудесы́ того́ хва́лится, и благода́рственныя пе́сни Тебе́ воспева́ет глаго́люще: Аллилу́ия.
Икос 6
Све́т сия́ющий зря́шеся по́яс Тво́й святы́й, внегда́ принесе́ся во о́стров Ти́ра, отону́дуже со благогове́нием мно́гим во Оби́тель Твою́ се́й принесо́ша, пою́ще Твое́ промышле́ние и ра́достию вопию́щи:
Ра́дуйся, по́ясе Богоро́дицы; ра́дуйся, Ватопе́ду сла́ва.
Ра́дуйся, его́же осеня́ет благода́ть Ду́ха Свята́го; ра́дуйся, его́же похваля́ет наро́д христоимени́тый.
Ра́дуйся, чредо́ всечестна́я дарова́ний небе́сных; ра́дуйся, песнопе́ние непреста́нное мона́хом и по́стником.
Ра́дуйся, я́ко струи́ исцеле́ний то́чиши; ра́дуйся, я́ко пла́мень страсте́й угаша́еши.
Ра́дуйся, честно́е Чи́стыя препоя́сание; ра́дуйся, все́м ве́рным спасе́ние.
Ра́дуйся, све́та заре́ облиста́ющая; ра́дуйся, страсте́й уставля́еши па́губу.
Ра́дуйся, по́ясе пречестны́й.
Кондак 7
Велича́ем вси́, мно́гая вели́чия, е́же о на́с Твоего́ попече́ния, и по́яс Тво́й свяще́нный ве́рою обстоя́ще Всепе́тая, освяще́ния исполня́емся, и Сы́ну Твоему́ взыва́ем: Аллилу́ия.
Икос 7
Я́ко о́блак мы́сленный, по́яс Тво́й святы́й, простри́ на ны́ Богоро́дице, и ду́ши на́ша испо́лни, освяще́ния и умиле́ния боже́ственнаго, к Тебе́ бо прибега́ем, и по́ясу Твоему́ взыва́ем:
Ра́дуйся, жили́ще благода́ти боже́ственныя; ра́дуйся, сострада́ния кла́дязе.
Ра́дуйся, даро́в богода́нных сокро́вище; ра́дуйся, Чи́стыя Богоро́дицы препоя́сание.
Ра́дуйся, тве́рдый соу́зе и ми́ра пода́телю; ра́дуйся, благочести́вым утвержде́ние незы́блемо и сла́дость.
Ра́дуйся, я́ко чуде́с лучи́ испуща́еши; ра́дуйся, я́ко свире́пства боле́зней разоря́еши.
Ра́дуйся, Бо́жией бла́гости луче́; ра́дуйся, кре́посте на́ша богодарова́нная.
Ра́дуйся, ра́дость и́стинную подаю́щий; ра́дуйся, тлю́ душе́вную умерщвля́ющий.
Ра́дуйся, по́ясе пречестны́й.
Кондак 8
Стра́нна твоя́ чудеса́, о по́ясе пречестны́й Всецари́цы Де́вы, пове́трия губи́тельнаго Ца́рский Гра́д свободи́л еси́, чудя́хубося и дивля́хуся во умиле́нии вопию́щия: Аллилу́ия.
Икос 8
Приста́нище обурева́емым, по́яс Тво́й святы́й показа́ся Богоро́дице Де́во, благода́ть бо Твоя́ я́же на не́м, де́йствует бо чудесы́ приходя́щим, те́мже к нему́ припа́дающе, с любо́вию взыва́ем:
Ра́дуйся, ра́ко до́брых небе́сных; ра́дуйся, чуде́с точе́ние разли́чных.
Ра́дуйся, Де́вы на́м посеще́ние; ра́дуйся, скорбя́щим душа́м засту́пниче.
Ра́дуйся, боже́ственное жили́ще де́йства боже́ственнаго; ра́дуйся, благода́ти Де́выя свято́е сокро́вище.
Ра́дуйся, я́ко холе́ры Гра́д Ца́рский спаса́еши; ра́дуйся, я́ко ско́рое все́м заступле́ние посыла́еши.
Ра́дуйся, у́гль погаша́ющий стра́сти; ра́дуйся, вся́ ны́ возвеселя́ющий.
Ра́дуйся, мно́гих даро́в пала́то; ра́дуйся, сла́вы боже́ственныя честно́е храни́лище.
Ра́дуйся, по́ясе пречестны́й.
Кондак 9
Испо́лнь сла́вы святы́я ви́дится, по́яса Ти́ киво́т вои́стину святы́й, Богоро́дице Де́во Чи́стая, ра́зум на́м удивля́ющий, благоуха́нием бо ды́шит преми́рным вопию́щим: Аллилу́ия.
Икос 9
Же́зл кре́пости боже́ственныя, по́яс Тво́й на́м даде́ся, ди́вная Богома́терь, у́мным бо того́ соде́йствием, от вся́кия беды́ избавля́емся и благода́ти исполня́емся, во благогове́нии вопию́ще:
Ра́дуйся, сосу́де свята́го благоуха́ния; ра́дуйся, диади́ма нетле́ния.
Ра́дуйся, мона́шествующым честно́е прибе́жище; ра́дуйся, и́мже во Афо́не дая́ние препе́тое.
Ра́дуйся, Чи́стыя Де́вы всечестно́е свяще́ние; ра́дуйся, Ея́ же вои́стину на́м да́р всесоверше́нный.
Ра́дуйся, Ватопе́ду весе́лие и́стинное; ра́дуйся, вся́кому се́рдцу благоче́стному ра́досте.
Ра́дуйся, цвето́в благода́ти благоуха́ние; ра́дуйся, го́рней красоты́ дыха́ние.
Ра́дуйся, фиа́ло арома́тов боже́ственных; ра́дуйся, святы́м боже́ственное пе́ние.
Ра́дуйся, по́ясе пречестны́й.
Кондак 10
Покро́в и предста́тельство, и Бо́жию по́мощь, при́сно плодя́ще Всесвята́я, от миродохнове́ннаго Ти́ по́яса, с ве́рою к нему́ приступа́ем, и благогове́йно припа́дающе, из Тебе́ Ро́ждшемуся вопие́м: Аллилу́ия.
Икос 10
Благода́тию свята́го Ти́ по́яса Богоро́дице, си́лу на́м препоя́ши на врага́ началозло́бнаго, я́ко ле́в на ны́ рыка́ющаго, я́коже да одоле́ем зло́бу того́ вопию́щия:
Ра́дуйся, Чи́стыя Де́вы по́ясе; ра́дуйся, ча́ше Госпо́дния кре́пости.
Ра́дуйся, связу́ющий ны́ и спаса́ющий; ра́дуйся, у́зы страсте́й разреша́ющий.
Ра́дуйся, по́ясе драгоце́ннейший Ро́ждшия Христа́; ра́дуйся, благоче́стному наро́ду дая́ние свяще́ннейшее.
Ра́дуйся, боже́ственныя на́м си́лы пода́телю; ра́дуйся, вра́жие неи́стовство отверга́ющий.
Ра́дуйся, о по́ясе Богома́тери; ра́дуйся, о сла́ва на́м и соу́зе.
Ра́дуйся, Це́ркви Христо́вой украше́ние; ра́дуйся, наро́ду правосла́вному утвержде́ние.
Ра́дуйся, по́ясе пречестны́й.
Кондак 11
Благода́рственными пе́сньми, по́ясе всепрече́стне все́х Зижди́теля Ро́ждшия, твою́ благода́ть воспева́ем при́сно, мно́гих чуде́с твои́х наслажда́ющеся, и сла́вим Чи́стую Всецари́цу, Христу́ вопию́ще: Аллилу́ия.
Икос 11
Светоприе́мную свещу́, по́яс Тво́й святы́й, иму́ще Оби́тель Ватопе́дская, светле́ется Де́во при́сно, и сла́вит е́же о не́й Твое́ промышле́ние, я́ко то́й дарова́ся по́яс Тво́й ве́рно вопию́щей:
Ра́дуйся, по́ясе Богоро́дицы; ра́дуйся, свети́льниче све́та трисве́тлаго.
Ра́дуйся, разделе́нным боже́ственное сочета́ние; ра́дуйся, неду́гующим богода́нная си́ло.
Ра́дуйся, по́ясе боже́ственный держа́ву ве́рным подаю́щий; ра́дуйся, всево́инства велиа́рова полки́ погубля́ющий.
Ра́дуйся, я́ко си́лы душа́м укрепля́еши; ра́дуйся, я́ко к восхожде́ниям до́брым направля́еши.
Ра́дуйся, я́звы ду́ш омыва́ющий; ра́дуйся, колесни́цы враго́в сокруша́ющий.
Ра́дуйся, и́стинное на́м весе́лие; ра́дуйся, ве́рным боже́ственное утеше́ние.
Ра́дуйся, по́ясе пречестны́й.
Кондак 12
Ра́дуется, Богоро́дице, Оби́тель Ватопе́дская, по́ясом боже́ственным Ти́ облада́юще, и ко славосло́вию вели́чий Твои́х оби́тели вся́ созыва́ет, сла́вяще сла́ву Твою́, Тро́ице же вопию́ще: Аллилу́ия.
Икос 12
Пою́ще по до́лгу, Богоро́дице Де́во, по́яса Ти́ благода́ть преоби́льную, и пропове́дуем я́сно Чи́стая, е́же о на́с бога́тное Ти́ попече́ние, и пресвято́му Ти́ по́ясу всеблагода́рно вопие́м:
Ра́дуйся, Де́выя честна́я плени́це; ра́дуйся, Ватопе́ду ра́досте.
Ра́дуйся, ве́рных к Бо́гу возводя́щий; ра́дуйся, ко и́стинней жи́зни влеку́щий.
Ра́дуйся, по́ясе всечестны́й; Це́ркви сокро́вище; ра́дуйся, ми́ру весе́лие и ми́ра пода́телю.
Ра́дуйся, благоче́ствующым прибе́жище спасе́ния; ра́дуйся, мона́шествующым бога́тство утеше́ния.
Ра́дуйся, и́мже страсте́й очища́юся; ра́дуйся, и́мже све́та исполня́юся.
Ра́дуйся, души́ моея́ ра́дость и́стинная; ра́дуйся, жи́зни моея́ приста́нище ве́рное.
Ра́дуйся, по́ясе пречестны́й.
Кондак 13
О пречестны́й по́ясе Пречи́стыя Богоро́дицы, препоя́савый те́ло непоро́чное, подава́й на́м от сокро́вища все́льшияся в тя́ благода́ти боже́ственныя, де́йство животворя́щее, я́ко да Христу́ при́сно вопие́м: Аллилу́ия.
Повтор
Этот кондак читается трижды, затем икос 1-й и кондак 1-й.
Икос 1
А́нгели неви́димо по́яс Тво́й святы́й со стра́хом обстоя́ще Отрокови́це, мы́ же во пло́ти су́щия, с ве́рою припа́даем к нему́, освяще́ние прие́млюще, и во благогове́нии вопие́м:
Ра́дуйся, по́ясе Богоро́дицы; ра́дуйся, сия́ние всему́ ми́ру.
Ра́дуйся, Непоро́чныя Де́вы препоя́сание; ра́дуйся, Це́ркве всея́ сокро́вище.
Ра́дуйся, по́ясе многоце́нный Влады́чицы небе́с; ра́дуйся, цве́те благоуха́нный благочести́вых христиа́н.
Ра́дуйся, я́ко те́ло Де́выя препоя́саеши; ра́дуйся, я́ко кре́пость льсти́ваго ослабля́еши.
Ра́дуйся, свети́льниче благода́ти всесве́тлый; ра́дуйся, исто́чниче чуде́с неизсяка́емый.
Ра́дуйся, и́мже ве́рнии светозаря́ются; ра́дуйся, и́мже врази́ упраздня́ются.
Ра́дуйся, по́ясе пречестны́й.
Кондак 1
Ко пречестно́му Богоро́дице боже́ственному по́ясу Твоему́, со благогове́нием притека́юще, исполня́емся просвеще́ния и благоуха́ния преми́рнаго, но я́ко пучи́но су́щи Де́во бла́гости, препоя́ши ны́ си́лою его́ Непоро́чная, зову́щия:
Ра́дуйся, по́ясе пречестны́й.
Молитвы
О, Благода́тная Богома́ти, Пренепоро́чная и Обра́дованная, да ра́дуемся и мы́, немощны́я лю́дие Твои́, я́ко Си́лою и Вла́стию Твое́ю сокруши́ши все́х враго́в на́ших ви́димых и неви́димых, да просла́вим и возвели́чим Тя́, я́ко Непобеди́мую Побе́ду Всеси́льную.
Цари́це моя́ преблага́я, наде́ждо моя́ Богоро́дице, прия́телище си́рых и стра́нных предста́тельнице, скорбя́щих ра́досте, оби́димых покрови́тельнице! Зри́ши мою́ беду́, зри́ши мою́ ско́рбь, помози́ ми́ я́ко не́мощну, окорми́ мя́ я́ко стра́нна. Оби́ду мою́ ве́си, разреши́ ту́, я́ко во́лиши: я́ко не и́мам ины́я по́мощи ра́зве Тебе́, ни ины́я предста́тельницы, ни благи́я уте́шительницы, то́кмо Тебе́, о Богома́ти, я́ко да сохрани́ши мя́ и покры́еши во ве́ки веко́в. Ами́нь.
Конда́къ а҃
Ко пречⷭ҇тно́мꙋ бцⷣе бжⷭ҇твенномꙋ по́ѧсꙋ твоемꙋ̀, со бл҃гоговѣ́нїемъ притека́юще, и҆сполнѧ́емсѧ просвѣще́нїѧ и҆ бл҃гоꙋха́нїѧ премі́рнагѡ, но ꙗ҆́кѡ пꙋчи́но сꙋ́щи дв҃о бл҃гости, препоѧ́ши ны̀ си́лою є҆гѡ̀ непоро́чнаѧ, зовꙋ́щыѧ:
Ра́дꙋйсѧ, по́ѧсе пречⷭ҇тны́й.
І҆́косъ а҃
А҆́гг҃ли неви́димо по́ѧсъ тво́й ст҃ы́й со стра́хомъ ѡ҆бстоѧ́ще ѻ҆трокови́це, мы́ же во пло́ти сꙋ́щыѧ, съ вѣ́рою припа́даемъ къ немꙋ̀, ѡ҆свѧще́нїе прїе́млюще, и҆ во бл҃гоговѣ́нїи вопїе́мъ:
Ра́дꙋйсѧ, по́ѧсе бцⷣы: ра́дꙋйсѧ, сїѧ́нїе всемꙋ̀ мі́рꙋ.
Ра́дꙋйсѧ, непоро́чныѧ дв҃ы препоѧ́санїе: ра́дꙋйсѧ, цр҃кве всеѧ̀ сокро́вище.
Ра́дꙋйсѧ, по́ѧсе многоцѣ́нный влⷣчцы небе́съ: ра́дꙋйсѧ, цвѣ́те бл҃гоꙋха́нный бл҃гочести́выхъ хрⷭ҇тїа́нъ.
Ра́дꙋйсѧ, ꙗ҆́кѡ тѣ́ло дв҃ыѧ препоѧ́саеши: ра́дꙋйсѧ, ꙗ҆́кѡ крѣ́пость льсти́вагѡ ѡ҆слаблѧ́еши.
Ра́дꙋйсѧ, свѣти́льниче бл҃года́ти всесвѣ́тлый: ра́дꙋйсѧ, и҆сто́чниче чꙋде́съ неизсѧка́емый.
Ра́дꙋйсѧ, и҆́мже вѣ́рнїи свѣтозарѧ́ютсѧ: ра́дꙋйсѧ, и҆́мже вразѝ ᲂу҆празднѧ́ютсѧ.
Ра́дꙋйсѧ, по́ѧсе пречⷭ҇тны́й.
Конда́къ в҃
Воззрѝ бг҃ороди́тельнице, ѻ҆́комъ бл҃гоꙋтро́бнымъ, ко и҆̀же вѣ́рою ко ст҃о́мꙋ тѝ по́ѧсꙋ, ꙗ҆́коже и҆сто́чникꙋ во́дъ ѡ҆сщ҃е́нныхъ че́стнѡ припа́дающихъ, и҆ просѧ́щихъ блгⷣти твоеѧ̀, неѡбори́мꙋю бо си́лꙋ тѣ́мже пода́ждь вопїю́щымъ: А҆ллилꙋ́їа.
І҆́косъ в҃
Бы́сть бцⷣе чⷭ҇тна́гѡ тѝ по́ѧса принесе́нїе во ца́рскїй гра́дъ, и҆сто́чникъ весе́лїѧ и҆́стиннагѡ, цари́цꙋ бо ско́рѡ и҆сцѣли́лъ є҆сѝ, на́мъ же блгⷣть ѻ҆би́льнꙋю при́снѡ подае́тъ вопїю́щымъ:
Ра́дꙋйсѧ, и҆сто́чниче ра́дости вѣ́чныѧ: ра́дꙋйсѧ, ча́ше дꙋшепи̑щнагѡ бра́шна.
Ра́дꙋйсѧ, и҆́мже всечⷭ҇таѧ дв҃о препоѧ́сасѧ: ра́дꙋйсѧ, и҆́же во а҆ѳѡ́не ꙗ҆́кѡ свѣ́тъ возсїѧ̀.
Ра́дꙋйсѧ, ꙗ҆́кѡ зѡ́ю цари́цꙋ и҆сцѣли́лъ є҆сѝ: ра́дꙋйсѧ, ꙗ҆́кѡ то́чиши всѣ̑мъ весе́лїе ᲂу҆́мное.
Ра́дꙋйсѧ, плени́це всест҃а́ѧ чⷭ҇тыѧ бцⷣы: ра́дꙋйсѧ, стрело̀ ѻ҆гнено́снаѧ на врага̀ человѣкоꙋбі́йцꙋ.
Ра́дꙋйсѧ, ра́дости вина̀ и҆ хода́таю: ра́дꙋйсѧ, ти́хое дꙋша́мъ приста́нище.
Ра́дꙋйсѧ, хрⷭ҇тꙋ̀ бл҃гочⷭ҇тнѡ свѧзꙋ́ющїй: ра́дꙋйсѧ, страсте́й стремле́нїѧ ᲂу҆празднѧ́ющїй.
Ра́дꙋйсѧ, по́ѧсе пречⷭ҇тны́й.
Конда́къ г҃
По́ѧсъ тво́й ѳѡмѣ̀ предадѐ бцⷣе, къ сы́нꙋ твоемꙋ̀ восходѧ́ще, и҆ чрезъ ѻ҆́наго же ꙗ҆́кѡ че́стенъ да́ръ и҆ бла́гъ и҆сполне́нїе є҆го̀ на́мъ ѡ҆ста́вила є҆сѝ всепѣ́таѧ, пою́щымъ и҆ вопїю́щымъ тѝ: А҆ллилꙋ́їа.
І҆́косъ г҃
И҆мѣ́етъ ст҃а́ѧ ѻ҆би́тель твоѧ̀ ватопе́дскаѧ, ꙗ҆́кѡ неѿе́млемо бога́тство ѻ҆трокови́це, и҆ ꙗ҆́кѡ сто́лпъ твоегѡ̀ застꙋпле́нїѧ, мѷродохнове́нный и҆ всечⷭ҇тны́й тво́й по́ѧсъ, є҆мꙋ́же бл҃гочⷭ҇тнѡ припа́дающе, во ᲂу҆миле́нїи зове́тъ:
Ра́дꙋйсѧ, бога́тство нетлѣ́нїѧ: ра́дꙋйсѧ, сто́лпе сострада́нїѧ.
Ра́дꙋйсѧ, пода́телю бла́гъ неисчерпа́емый, ра́дꙋйсѧ, и҆́нокѡмъ водрꙋже́нїе незы́блемое.
Ра́дꙋйсѧ, по́ѧсе всечⷭ҇тне, а҆́гг҃лѡмъ ра́досте: ра́дꙋйсѧ, мона́хѡмъ ᲂу҆твержде́нїе и҆ бѣ́дъ ѿринове́нїе.
Ра́дꙋйсѧ, ватопе́дꙋ хвало̀ многоцѣ́ннаѧ: ра́дꙋйсѧ, бл҃гочести́вымъ побѣ́дное пѣ́нїе.
Ра́дꙋйсѧ, бл҃гово́нїемъ нбⷭ҇нымъ дыха́ющїй: ра́дꙋйсѧ, крѣ́пость непобѣди́мꙋю подаю́щїй.
Ра́дꙋйсѧ, тобо́ю бо мона́шествꙋющыѧ ᲂу҆крѣплѧ́ютсѧ: ра́дꙋйсѧ, тобо́ю бо враждꙋ́ющыѧ ᲂу҆празднѧ́ютсѧ.
Ра́дꙋйсѧ, по́ѧсе пречⷭ҇тны́й.
Конда́къ д҃
Живоно́сный кївѡ́тъ всечⷭ҇тна́гѡ тѝ по́ѧса, подае́тъ бл҃гоꙋха́нїе дв҃о, и҆ ѕлосмра́дїе страсте́й ѿгонѧ́етъ при́снѡ ѿ дꙋ́шъ на́шихъ, тѣ́мже вели́чїю твоемꙋ̀ дивѧ́щесѧ вопїе́мъ: А҆ллилꙋ́їа.
І҆́косъ д҃
По́ѧсъ тво́й ст҃ы́й всест҃а́ѧ дв҃о, ꙗ҆́кѡ свѣ́тъ сїѧ́етъ на горѣ̀ а҆ѳѡ́нстѣй, и҆ лꙋчы̑ златови́дными, всѧ̑ ѡ҆блиста́етъ твое́й блгⷣтїю, тѣ́мже чꙋдеса̀ тогѡ̀ почита́юще, вѣ́рою вопїе́мъ:
Ра́дꙋйсѧ, чꙋде́съ пода́телю, ра́дꙋйсѧ: бл҃года́тей свѣтоли́тїе.
Ра́дꙋйсѧ, сокро́вищь сокро́вище ст҃о́е: ра́дꙋйсѧ, свѣщѐ серде́цъ бг҃омꙋ́дрыхъ.
Ра́дꙋйсѧ, по́ѧсе, є҆го́же носи́ла є҆сѝ всенепоро́чнаѧ на землѝ: ра́дꙋйсѧ, всѧ́кꙋю подаю́щїй блгⷣть и҆ мно́гꙋю крѣ́пость.
Ра́дꙋйсѧ, ꙗ҆́кѡ показꙋ́еши дв҃ыѧ сла́вꙋ: ра́дꙋйсѧ, ꙗ҆́кѡ ѿвраща́еши де́мѡнскїѧ лꙋ́ки.
Ра́дꙋйсѧ, мно́гаѧ и҆сцѣле́нїѧ и҆сточа́ющїй: ра́дꙋйсѧ, дꙋ́ши страсте́й свобожда́ющїй.
Ра́дꙋйсѧ, вѣ́рнымъ ликова́нїе бжⷭ҇твенное: ра́дꙋйсѧ, чⷭ҇тна́ѧ милосе́рдїѧ клѣ́те.
Ра́дꙋйсѧ, по́ѧсе пречⷭ҇тны́й.
Конда́къ є҃
Бг҃одарова́нный да́ръ и҆ небе́сное бога́тство, по́ѧсъ тво́й держа́ще ѻ҆трокови́це, на стра́сти си́лꙋ непобѣди́мꙋю, є҆́юже препоѧса́емсѧ, блгⷣть бо и҆ млⷭ҇ть при́снѡ подае́тъ вопїю́щымъ: А҆ллилꙋ́їа.
І҆́косъ є҃
И҆сцѣле́нїе и҆сточа́етъ по́ѧсъ тво́й ст҃ы́й дꙋшѝ и҆ тѣ́лꙋ ѻ҆трокови́це, ꙗ҆́коже ро́сꙋ весне́ннюю, ꙗ҆́кѡ бо и҆са́їа глаго́летъ всенепоро́чнаѧ, и҆ сла́дость небе́снꙋю бл҃гоговѣ́йнѡ томꙋ̀ вопїю́щымъ:
Ра́дꙋйсѧ, и҆сто́чниче во́дъ невеще́ственныхъ: ра́дꙋйсѧ, пото́че мно́гихъ дарѡ́въ.
Ра́дꙋйсѧ, всечи́стыѧ по́ѧсъ всечⷭ҇тны́й: ра́дꙋйсѧ, цр҃кви ра́дость небе́снаѧ.
Ра́дꙋйсѧ, сокро́вище ст҃о́е дарова́нїй дꙋхо́вныхъ: ра́дꙋйсѧ, вѣ́нче сла́вный хрїстїа́нъ бл҃гочести́выхъ.
Ра́дꙋйсѧ, ватопе́дꙋ стѣна̀ нерꙋши́маѧ: ра́дꙋйсѧ, всемꙋ̀ мі́рꙋ сто́лпе крѣ́пости бжⷭ҇твенныѧ.
Ра́дꙋйсѧ, чⷭ҇тно́е дв҃ыѧ ѻ҆поѧ́санїе: ра́дꙋйсѧ, бг҃омъ на́мъ да́ннаѧ кꙋ́плѧ.
Ра́дꙋйсѧ, є҆ди́ныѧ дв҃ыѧ по́ѧсе: ра́дꙋйсѧ, вѣ́рнымъ бг҃одарова́ннаѧ си́ло.
Ра́дꙋйсѧ, по́ѧсе пречⷭ҇тны́й.
Конда́къ ѕ҃
Стѧжа̀ ѻ҆би́тель твоѧ̀ ватопе́дскаѧ, ꙗ҆́кѡ сокро́вище бжⷭ҇твенное ѻ҆трокови́це, по́ѧсъ тво́й ди́вный, и҆ чꙋдесы̀ тогѡ̀ хва́литсѧ, и҆ бл҃года́рствєнныѧ пѣ̑сни тебѣ̀ воспѣва́етъ глаго́люще: А҆ллилꙋ́їа.
І҆́косъ ѕ҃
Свѣ́тъ сїѧ́ющїй зрѧ́шесѧ по́ѧсъ тво́й ст҃ы́й, внегда̀ принесе́сѧ во ѻ҆́стровъ тѵ́ра, ѿѻнꙋ́дꙋже со бл҃гоговѣ́нїемъ мно́гимъ во ѻ҆би́тель твою̀ се́й принесо́ша, пою́ще твоѐ промышле́нїе и҆ ра́достїю вопїю́щи:
Ра́дꙋйсѧ, по́ѧсе бцⷣы: ра́дꙋйсѧ, ватопе́дꙋ сла́ва.
Ра́дꙋйсѧ, є҆го́же ѡ҆сѣнѧ́етъ блгⷣть дх҃а ст҃а́гѡ: ра́дꙋйсѧ, є҆го́же похвалѧ́етъ наро́дъ хрⷭ҇тоимени́тый.
Ра́дꙋйсѧ, чредо̀ всечⷭ҇тна́ѧ дарова́нїй нбⷭ҇ныхъ: ра́дꙋйсѧ, пѣснопѣ́нїе непреста́нное мона́хѡмъ и҆ по́стникѡмъ.
Ра́дꙋйсѧ, ꙗ҆́кѡ стрꙋѝ и҆сцѣле́нїй то́чиши: ра́дꙋйсѧ, ꙗ҆́кѡ пла́мень страсте́й ᲂу҆гаша́еши.
Ра́дꙋйсѧ, чⷭ҇тно́е чⷭ҇тыѧ препоѧ́санїе: ра́дꙋйсѧ, всѣ̑мъ вѣ́рнымъ спасе́нїе.
Ра́дꙋйсѧ, свѣ́та зарѐ ѡ҆блиста́ющаѧ: ра́дꙋйсѧ, страсте́й ᲂу҆ставлѧ́еши па́гꙋбꙋ.
Ра́дꙋйсѧ, по́ѧсе пречⷭ҇тны́й.
Конда́къ з҃
Велича́емъ всѝ, мно́гаѧ вели́чїѧ, є҆́же ѡ҆ на́съ твоегѡ̀ попече́нїѧ, и҆ по́ѧсъ тво́й сщ҃е́нный вѣ́рою ѡ҆бстоѧ́ще всепѣ́таѧ, ѡ҆сщ҃е́нїѧ и҆сполнѧ́емсѧ, и҆ сн҃ꙋ твоемꙋ̀ взыва́емъ: А҆ллилꙋ́їа.
І҆́косъ з҃
Ꙗ҆́кѡ ѻ҆́блакъ мы́сленный, по́ѧсъ тво́й ст҃ы́й, прострѝ на ны̀ бцⷣе, и҆ дꙋ́шы на́шѧ и҆спо́лни, ѡ҆сщ҃е́нїѧ и҆ ᲂу҆миле́нїѧ бжⷭ҇твеннагѡ, къ тебѣ́ бо прибѣга́емъ, и҆ по́ѧсꙋ твоемꙋ̀ взыва́емъ:
Ра́дꙋйсѧ, жили́ще блгⷣти бжⷭ҇твенныѧ: ра́дꙋйсѧ, сострада́нїѧ кла́дѧзе.
Ра́дꙋйсѧ, дарѡ́въ бг҃ода́нныхъ сокро́вище: ра́дꙋйсѧ, чⷭ҇тыѧ бцⷣы препоѧ́санїе.
Ра́дꙋйсѧ, тве́рдый соꙋ́зе и҆ ми́ра пода́телю: ра́дꙋйсѧ, бл҃гочести́вымъ ᲂу҆твержде́нїе незы́блемо и҆ сла́дость.
Ра́дꙋйсѧ, ꙗ҆́кѡ чꙋде́съ лꙋчы̀ и҆спꙋща́еши: ра́дꙋйсѧ, ꙗ҆́кѡ свирѣ́пства болѣ́зней разорѧ́еши.
Ра́дꙋйсѧ, бж҃їей бл҃гости лꙋчѐ: ра́дꙋйсѧ, крѣ́посте на́ша бг҃одарова́ннаѧ.
Ра́дꙋйсѧ, ра́дость и҆́стиннꙋю подаю́щїй: ра́дꙋйсѧ, тлю̀ дꙋше́внꙋю ᲂу҆мерщвлѧ́ющїй.
Ра́дꙋйсѧ по́ѧсе пречⷭ҇тны́й.
Конда́къ и҃
Стра́нна твоѧ̀ чꙋдеса̀, ѽ по́ѧсе пречⷭ҇тны́й всецр҃и́цы дв҃ы, повѣ́трїѧ гꙋби́тельнагѡ ца́рскїй гра́дъ свободи́лъ є҆сѝ, чꙋдѧ́хꙋбосѧ и҆ дивлѧ́хꙋсѧ во ᲂу҆миле́нїи вопїю́щїѧ: А҆ллилꙋ́їа.
І҆́косъ и҃
Приста́нище ѡ҆бꙋрева́ємымъ, по́ѧсъ тво́й ст҃ы́й показа́сѧ бцⷣе дв҃о, блгⷣть бо твоѧ̀ ꙗ҆́же на не́мъ, дѣ́йствꙋетъ бо чꙋдесы̀ приходѧ́щымъ, тѣ́мже къ немꙋ̀ припа́дающе, съ любо́вїю взыва́емъ:
Ра́дꙋйсѧ, ра́ко до́брыхъ небе́сныхъ: ра́дꙋйсѧ, чꙋде́съ точе́нїе разли́чныхъ.
Ра́дꙋйсѧ, дв҃ы на́мъ посѣще́нїе: ра́дꙋйсѧ, скорбѧ́щимъ дꙋша́мъ застꙋ́пниче.
Ра́дꙋйсѧ, бжⷭ҇твенное жили́ще дѣ́йства бжⷭ҇твеннагѡ: ра́дꙋйсѧ, блгⷣти дв҃ыѧ ст҃о́е сокро́вище.
Ра́дꙋйсѧ, ꙗ҆́кѡ холе́ры гра́дъ ца́рскїй спаса́еши: ра́дꙋйсѧ, ꙗ҆́кѡ ско́рое всѣ̑мъ застꙋпле́нїе посыла́еши.
Ра́дꙋйсѧ, ᲂу҆́гль погаша́ющїй стра́сти: ра́дꙋйсѧ, всѧ̑ ны̀ возвеселѧ́ющїй.
Ра́дꙋйсѧ, мно́гихъ дарѡ́въ пала́то: ра́дꙋйсѧ, сла́вы бжⷭ҇твенныѧ чⷭ҇тно́е храни́лище.
Ра́дꙋйсѧ, по́ѧсе пречⷭ҇тны́й.
Конда́къ ѳ҃
И҆спо́лнь сла́вы ст҃ы́ѧ ви́дитсѧ, по́ѧса тѝ кївѡ́тъ вои́стиннꙋ ст҃ы́й, бцⷣе дв҃о чⷭ҇таѧ, ра́зꙋмъ на́мъ ᲂу҆дивлѧ́ющїй, бл҃гоꙋха́нїемъ бо ды́шитъ премі́рнымъ вопїю́щымъ: А҆ллилꙋ́їа.
І҆́косъ ѳ҃
Же́злъ крѣ́пости бжⷭ҇твенныѧ, по́ѧсъ тво́й на́мъ даде́сѧ, ди́внаѧ бг҃ома́терь, ᲂу҆́мнымъ бо тогѡ̀ содѣ́йствїемъ, ѿ всѧ́кїѧ бѣды̀ и҆збавлѧ́емсѧ и҆ блгⷣти и҆сполнѧ́емсѧ, во бл҃гоговѣ́нїи вопїю́ще:
Ра́дꙋйсѧ, сосꙋ́де ст҃а́гѡ бл҃гоꙋха́нїѧ: ра́дꙋйсѧ, дїади́ма нетлѣ́нїѧ.
Ра́дꙋйсѧ, мона́шествꙋющымъ чⷭ҇тно́е прибѣ́жище: ра́дꙋйсѧ, и҆̀мже во а҆ѳѡ́не даѧ́нїе препѣ́тое.
Ра́дꙋйсѧ, чⷭ҇тыѧ дв҃ы всечⷭ҇тно́е свѧще́нїе: ра́дꙋйсѧ, є҆ѧ́ же вои́стиннꙋ на́мъ да́ръ всесоверше́нный.
Ра́дꙋйсѧ, ватопе́дꙋ весе́лїе и҆́стинное: ра́дꙋйсѧ, всѧ́комꙋ срⷣцꙋ бл҃гочⷭ҇тномꙋ ра́досте.
Ра́дꙋйсѧ, цвѣтѡ́въ блгⷣти бл҃гоꙋха́нїе: ра́дꙋйсѧ, го́рней красоты̀ дыха́нїе.
Ра́дꙋйсѧ, фїа́ло а҆рѡма́тѡвъ бжⷭ҇твенныхъ: ра́дꙋйсѧ, ст҃ы́мъ бжⷭ҇твенное пѣ́нїе.
Ра́дꙋйсѧ, по́ѧсе пречⷭ҇тны́й.
Конда́къ і҃
Покро́въ и҆ предста́тельство, и҆ бж҃їю по́мощь, при́снѡ плодѧ́ще всест҃а́ѧ, ѿ мѷродохнове́ннагѡ тѝ по́ѧса, съ вѣ́рою къ немꙋ̀ пристꙋпа́емъ, и҆ бл҃гоговѣ́йнѡ припа́дающе, и҆зъ тебє̀ ро́ждшемꙋсѧ вопїе́мъ: А҆ллилꙋ́їа.
І҆́косъ і҃
Блгⷣтїю ст҃а́гѡ тѝ по́ѧса бцⷣе, си́лꙋ на́мъ препоѧ́ши на врага̀ началоѕло́бнаго, ꙗ҆́кѡ ле́въ на ны̀ рыка́ющаго, ꙗ҆́коже да ѡ҆долѣ́емъ ѕло́бꙋ тогѡ̀ вопїю́щїѧ:
Ра́дꙋйсѧ, чⷭ҇тыѧ дв҃ы по́ѧсе: ра́дꙋйсѧ, ча́ше гдⷭ҇нїѧ крѣ́пости.
Ра́дꙋйсѧ, свѧзꙋ́ющїй ны̀ и҆ спаса́ющїй: ра́дꙋйсѧ, ᲂу҆́зы страсте́й разрѣша́ющїй.
Ра́дꙋйсѧ, по́ѧсе драгоцѣ́ннѣйшїй ро́ждшыѧ хрⷭ҇та̀: ра́дꙋйсѧ, бл҃гочⷭ҇тномꙋ наро́дꙋ даѧ́нїе сщ҃е́ннѣйшее.
Ра́дꙋйсѧ, бжⷭ҇твенныѧ на́мъ си́лы пода́телю: ра́дꙋйсѧ, вра́жїе неи́стовство ѿверга́ющїй.
Ра́дꙋйсѧ, ѽ по́ѧсе бг҃ома́тери: ра́дꙋйсѧ, ѽ сла́ва на́мъ и҆ соꙋ́зе.
Ра́дꙋйсѧ, цр҃кви хрⷭ҇то́вой ᲂу҆краше́нїе: ра́дꙋйсѧ, наро́дꙋ правосла́вномꙋ ᲂу҆твержде́нїе.
Ра́дꙋйсѧ, по́ѧсе пречⷭ҇тны́й.
Конда́къ а҃і
Бл҃года́рственными пѣ́сньми, по́ѧсе всепрече́стне всѣ́хъ зижди́телѧ ро́ждшыѧ, твою̀ блгⷣть воспѣва́емъ при́снѡ, мно́гихъ чꙋде́съ твои́хъ наслажда́ющесѧ, и҆ сла́вимъ чⷭ҇тꙋю всецр҃и́цꙋ, хрⷭ҇тꙋ̀ вопїю́ще: А҆ллилꙋ́їа.
І҆́косъ а҃і
Свѣтопрїе́мнꙋю свѣщꙋ̀, по́ѧсъ тво́й ст҃ы́й, и҆мꙋ́ще ѻ҆би́тель ватопе́дскаѧ, свѣтлѣ́етсѧ дв҃о при́снѡ, и҆ сла́витъ є҆́же ѡ҆ не́й твоѐ промышле́нїе, ꙗ҆́кѡ то́й дарова́сѧ по́ѧсъ тво́й вѣ́рнѡ вопїю́щей:
Ра́дꙋйсѧ, по́ѧсе бцⷣы: ра́дꙋйсѧ, свѣти́льниче свѣ́та трисвѣ́тлагѡ.
Ра́дꙋйсѧ, раздѣлє́ннымъ бжⷭ҇твенное сочета́нїе: ра́дꙋйсѧ, недꙋ́гꙋющымъ бг҃ода́ннаѧ си́ло.
Ра́дꙋйсѧ, по́ѧсе бжⷭ҇твенный держа́вꙋ вѣ́рнымъ подаю́щїй: ра́дꙋйсѧ, всево́инства велїа́рѡва полкѝ погꙋблѧ́ющїй.
Ра́дꙋйсѧ, ꙗ҆́кѡ си́лы дꙋша́мъ ᲂу҆крѣплѧ́еши: ра́дꙋйсѧ, ꙗ҆́кѡ къ восхождє́нїѧмъ до́брымъ направлѧ́еши.
Ра́дꙋйсѧ, ꙗ҆́звы дꙋ́шъ ѡ҆мыва́ющїй: ра́дꙋйсѧ, колесни́цы врагѡ́въ сокрꙋша́ющїй.
Ра́дꙋйсѧ, и҆́стинное на́мъ весе́лїе: ра́дꙋйсѧ, вѣ́рнымъ бжⷭ҇твенное ᲂу҆тѣше́нїе.
Ра́дꙋйсѧ, по́ѧсе пречⷭ҇тны́й.
Конда́къ в҃і
Ра́дꙋетсѧ, бцⷣе, ѡ҆би́тель ватопе́дскаѧ, по́ѧсомъ бжⷭ҇твеннымъ тѝ ѡ҆блада́юще, и҆ ко славосло́вїю вели́чїй твои́хъ ѻ҆би́тели всѧ̑ созыва́етъ, сла́вѧще сла́вꙋ твою̀, трⷪ҇це же вопїю́ще: А҆ллилꙋ́їа.
І҆́косъ в҃і
Пою́ще по до́лгꙋ, бцⷣе дв҃о, по́ѧса тѝ блгⷣть преѡби́льнꙋю, и҆ проповѣ́дꙋемъ ꙗ҆́снѡ чⷭ҇таѧ, є҆́же ѡ҆ на́съ бога́тное тѝ попече́нїе, и҆ прест҃о́мꙋ тѝ по́ѧсꙋ всеблагода́рнѡ вопїе́мъ:
Ра́дꙋйсѧ, дв҃ыѧ чⷭ҇тна́ѧ плени́це: ра́дꙋйсѧ, ватопе́дꙋ ра́досте.
Ра́дꙋйсѧ, вѣ́рныхъ къ бг҃ꙋ возводѧ́щїй: ра́дꙋйсѧ, ко и҆́стиннѣй жи́зни влекꙋ́щїй.
Ра́дꙋйсѧ, по́ѧсе всечⷭ҇тны́й, цр҃кви сокро́вище: ра́дꙋйсѧ, мі́рꙋ весе́лїе и҆ ми́ра пода́телю.
Ра́дꙋйсѧ, благоче́ствꙋющымъ прибѣ́жище спасе́нїѧ: ра́дꙋйсѧ, мона́шествꙋющымъ бога́тство ᲂу҆тѣше́нїѧ.
Ра́дꙋйсѧ, и҆́мже страсте́й ѡ҆чища́юсѧ: ра́дꙋйсѧ, и҆́мже свѣ́та и҆сполнѧ́юсѧ.
Ра́дꙋйсѧ, дꙋшѝ моеѧ̀ ра́дость и҆́стиннаѧ: ра́дꙋйсѧ, жи́зни моеѧ̀ приста́нище вѣ́рное.
Ра́дꙋйсѧ, по́ѧсе пречⷭ҇тны́й.
Конда́къ г҃і
Ѽ пречⷭ҇тны́й по́ѧсе пречⷭ҇тыѧ бцⷣы, препоѧ́савый тѣ́ло непоро́чное, подава́й на́мъ ѿ сокро́вища все́льшїѧсѧ въ тѧ̀ блгⷣти бжⷭ҇твенныѧ, дѣ́йство животворѧ́щее, ꙗ҆́кѡ да хрⷭ҇тꙋ̀ при́снѡ вопїе́мъ: А҆ллилꙋ́їа.
Повто́ръ
Сей конда́къ глаго́лется три́жды, та́же і҆́косъ а҃-й и҆ конда́къ а҃-й.
І҆́косъ а҃
А҆́гг҃ли неви́димо по́ѧсъ тво́й ст҃ы́й со стра́хомъ ѡ҆бстоѧ́ще ѻ҆трокови́це, мы́ же во пло́ти сꙋ́щыѧ, съ вѣ́рою припа́даемъ къ немꙋ̀, ѡ҆свѧще́нїе прїе́млюще, и҆ во бл҃гоговѣ́нїи вопїе́мъ:
Ра́дꙋйсѧ, по́ѧсе бцⷣы: ра́дꙋйсѧ, сїѧ́нїе всемꙋ̀ мі́рꙋ.
Ра́дꙋйсѧ, непоро́чныѧ дв҃ы препоѧ́санїе: ра́дꙋйсѧ, цр҃кве всеѧ̀ сокро́вище.
Ра́дꙋйсѧ, по́ѧсе многоцѣ́нный влⷣчцы небе́съ: ра́дꙋйсѧ, цвѣ́те бл҃гоꙋха́нный бл҃гочести́выхъ хрⷭ҇тїа́нъ.
Ра́дꙋйсѧ, ꙗ҆́кѡ тѣ́ло дв҃ыѧ препоѧ́саеши: ра́дꙋйсѧ, ꙗ҆́кѡ крѣ́пость льсти́вагѡ ѡ҆слаблѧ́еши.
Ра́дꙋйсѧ, свѣти́льниче бл҃года́ти всесвѣ́тлый: ра́дꙋйсѧ, и҆сто́чниче чꙋде́съ неизсѧка́емый.
Ра́дꙋйсѧ, и҆́мже вѣ́рнїи свѣтозарѧ́ютсѧ: ра́дꙋйсѧ, и҆́мже вразѝ ᲂу҆празднѧ́ютсѧ.
Ра́дꙋйсѧ, по́ѧсе пречⷭ҇тны́й.
Конда́къ а҃
Ко пречⷭ҇тно́мꙋ бцⷣе бжⷭ҇твенномꙋ по́ѧсꙋ твоемꙋ̀, со бл҃гоговѣ́нїемъ притека́юще, и҆сполнѧ́емсѧ просвѣще́нїѧ и҆ бл҃гоꙋха́нїѧ премі́рнагѡ, но ꙗ҆́кѡ пꙋчи́но сꙋ́щи дв҃о бл҃гости, препоѧ́ши ны̀ си́лою є҆гѡ̀ непоро́чнаѧ, зовꙋ́щыѧ:
Ра́дꙋйсѧ, по́ѧсе пречⷭ҇тны́й.
Моли́твы
Ѽ, блгⷣтнаѧ бг҃омт҃и, пренепоро́чнаѧ и҆ ѡ҆бра́дованнаѧ, да ра́дꙋемсѧ и҆ мы̀, немощны̑ѧ лю́дїе твоѝ, ꙗ҆́кѡ си́лою и҆ вла́стїю твое́ю сокрꙋши́ши всѣ́хъ врагѡ́въ на́шихъ ви́димыхъ и҆ неви́димыхъ, да просла́вимъ и҆ возвели́чимъ тѧ̀, ꙗ҆́кѡ непобѣди́мꙋю побѣ́дꙋ всеси́льнꙋю.
Цр҃и́це моѧ̀ пребл҃га́ѧ, наде́ждо моѧ̀ бцⷣе, прїѧ́телище си́рыхъ и҆ стра́нныхъ предста́тельнице, скорбѧ́щихъ ра́досте, ѻ҆би́димыхъ покрови́тельнице! зри́ши мою̀ бѣдꙋ̀, зри́ши мою̀ ско́рбь, помозѝ мѝ ꙗ҆́кѡ не́мощнꙋ, ѡ҆кормѝ мѧ̀ ꙗ҆́кѡ стра́нна. ѻ҆би́дꙋ мою̀ вѣ́си, разрѣшѝ тꙋ̀, ꙗ҆́кѡ во́лиши: ꙗ҆́кѡ не и҆́мамъ и҆ны́ѧ по́мощи ра́звѣ тебѐ, ни и҆ны́ѧ предста́тельницы, ни бл҃гі́ѧ ᲂу҆тѣ́шительницы, то́кмо тебѐ, ѽ бг҃омт҃и, ꙗ҆́кѡ да сохрани́ши мѧ̀ и҆ покры́еши во вѣ́ки вѣкѡ́въ. А҆ми́нь.