Канон индикта

Воспои́м вси́ Христу́, И́мже соста́вишася вся́ческая и в Не́мже соверши́шася неразлу́чна, я́ко из Безнача́льнаго ро́ждшуся Бо́га Отца́ Ипоста́сному Сло́ву, пе́снь побе́дную, я́ко просла́вися.

Воспои́м вси́ Христу́, О́тчим благоволе́нием я́вльшуся из Де́вы и пропове́давшу ле́то Госпо́дне прия́тно на́м на избавле́ние, пе́снь побе́дную, я́ко просла́вися.

В Назаре́т прише́д, Пода́тель Зако́на в де́нь суббо́тный уча́ше, законополага́я евре́ем прише́ствия Своего́ неизрече́ннаго, и́мже, я́ко Ми́лостив, спаса́ет ро́д на́ш.

Утверди́, Бла́же, его́же насади́ любо́вию на земли́ десни́ца Твоя́, плодови́т виногра́д, сохраня́я Твою́ Це́рковь, Всеси́льне.

В де́лех духо́вных богокра́сных крася́щияся наста́вшее, Го́споди, ле́то сие́ преведи́, Влады́ко, и́же ве́рою Тя́ песносло́вящия, Бо́же вся́ческих.

Ти́хий ми́, Христе́, ле́тный кру́г дава́й, Ще́дре, и насы́ти мя́ слове́с Боже́ственных Твои́х, я́же яви́лся еси́ глаго́ля иуде́ем в суббо́тах.

Нача́ло Тебе́ ле́та лю́дие Твои́ прино́сят, а́нгельскими пе́сньми славосло́вяще Тя́, Спа́се.

Я́ко Человеколю́бец сподо́би наче́ншим ле́то и сконча́ти Тебе́ благоуго́дно, Христе́.

Вседержи́телю, Еди́не Го́споди, ле́т обхожде́ния, ути́шив, ми́ру да́руй.

Исполня́яй вся́ческая бла́гости, Христе́, Ты́ благорастворе́нием и благопло́дием, благослове́ньми венча́емо, многокру́жное ле́то рабо́м Твои́м да́руй.

Ле́тное воздая́ние покажи́ на́м преложе́ние к лу́чшим, ми́рное же устрое́ние ве́дущим Тя́, Сло́ве Бо́жий, уподо́бльшася челове́ком.

На зе́млю прише́л еси́, Собезнача́льне Отцу́, пле́нником отпуще́ние, слепы́м же прозре́ние от Отца́ возвеща́я и вре́мя прия́тно.

Житие́ нача́ти благоуго́дно Тебе́, Влады́ко, с ле́тным начина́нием на́с сподо́би.

Дне́й духо́вных, в поуче́нии Зако́на Твоего́, покажи́ испо́лнены, ще́дре Спа́се, пою́щия Тя́.

Начина́ющии ле́то, и пе́сней нача́ток сотворя́ем ца́рствующему Христу́ Ца́рством безконе́чным, правосла́внии лю́дие, благоче́стно пою́ще: отце́в Бо́же, благослове́н еси́.

Сы́й пре́жде ве́к, на ве́к же и еще́ Госпо́дь, воспева́ющим Тя́, Христе́, Исто́чник бла́гости, благи́х Твои́х даро́в ле́то сие́ испо́лни: отце́в Бо́же, благослове́н еси́.

Я́ко Нача́льнику спасе́ния, Христе́, нача́ток Тебе́ прино́сит ле́тный честна́я Це́рковь, зову́щи: по́йте и превозноси́те Христа́ во ве́ки.

Из не су́щих вся́ческая му́дре обнови́вшаго Созда́теля и производя́щаго време́н обраще́ния хоте́нием, по́йте и превозноси́те Его́ во ве́ки.

Изводя́щему вся́ческая Бо́гу и времена́ изменя́ющему, на многообра́зное челове́ков управле́ние, пое́м: хвали́те и превозноси́те Христа́ во ве́ки.

Сло́во Бо́жие и Си́ла, и́стинная Му́дрость и ипоста́сная, содержа́щая и пра́вящая вся́ческая му́дре, и ны́не наста́вшее рабо́м Твои́м вре́мя во устрое́нии ти́се произведи́.

Вся́ дела́ Твоя́, Го́споди, небеса́, земля́, све́т и мо́ре, во́ды и вси́ исто́чницы, со́лнце же, луна́ и тьма́, зве́зды, о́гнь, челове́цы и ско́ти, со А́нгелы восхваля́ют Тя́.

Еди́н еси́ Преве́чный, я́ко Творе́ц веко́в, и ца́рствующее триипоста́сное Еди́но Божество́ неразде́льное, мольба́ми Чи́стыя Богома́тере ле́то плодоно́сно насле́дию Твоему́ покажи́.

Воспои́мъ всѝ хрⷭ҇тꙋ̀, и҆́мже соста́вишасѧ всѧ́чєскаѧ, и҆ въ не́мже соверши́шасѧ неразлꙋ̑чна, ꙗ҆́кѡ и҆зъ безнача́льнагѡ ро́ждшꙋсѧ бг҃а ѻ҆ц҃а̀ ѵ҆поста́сномꙋ сло́вꙋ, пѣ́снь побѣ́днꙋю, ꙗ҆́кѡ просла́висѧ.

Воспои́мъ всѝ хрⷭ҇тꙋ̀, ѻ҆́ч҃имъ бл҃говоле́нїемъ ꙗ҆́вльшꙋсѧ и҆зъ дв҃ы, и҆ проповѣ́давшꙋ лѣ́то гдⷭ҇не прїѧ́тно, на́мъ на и҆збавле́нїе, пѣ́снь побѣ́днꙋю, ꙗ҆́кѡ просла́висѧ.

Въ назаре́тъ прише́дъ пода́тель зако́на, въ де́нь сꙋббѡ́тный ᲂу҆ча́ше, законополага́ѧ є҆вре́ємъ прише́ствїѧ своегѡ̀ неизрече́ннагѡ: и҆́мже ꙗ҆́кѡ ми́лостивъ спаса́етъ ро́дъ на́шъ.

Оу҆твердѝ, бл҃же, є҆го́же насадѝ любо́вїю на землѝ десни́ца твоѧ̀, плодови́тъ вїногра́дъ, сохранѧ́ѧ твою̀ це́рковь, всеси́льне.

Въ дѣ́лѣхъ дꙋхо́вныхъ бг҃окра́сныхъ красѧ́щыѧсѧ, наста́вшее, гдⷭ҇и, лѣ́то сїѐ, преведѝ, влⷣко, и҆̀же вѣ́рою тѧ̀ пѣсносло́вѧщыѧ, бж҃е всѧ́ческихъ.

Ти́хїй мѝ, хрⷭ҇тѐ, лѣ́тный крꙋ́гъ дава́й, ще́дре, и҆ насы́ти мѧ̀ слове́съ бжⷭ҇твенныхъ твои́хъ, ꙗ҆̀же ꙗ҆ви́лсѧ є҆сѝ глаго́лѧ і҆ꙋде́ємъ въ сꙋббѡ́тахъ.

Нача́ло тебѣ̀ лѣ́та лю́дїе твоѝ прино́сѧтъ, а҆́гг҃льскими пѣ́сньми славосло́вѧще тѧ̀, сп҃се.

Ꙗ҆́кѡ чл҃вѣколю́бецъ сподо́би наче́ншымъ лѣ́то, и҆ сконча́ти тебѣ̀ благоꙋго́днѡ, хрⷭ҇тѐ.

Вседержи́телю є҆ди́не гдⷭ҇и, лѣ́тъ ѡ҆бхождє́нїѧ ᲂу҆ти́шивъ, мі́рꙋ да́рꙋй.

И҆сполнѧ́ѧй всѧ́чєскаѧ бл҃гости, хрⷭ҇тѐ, ты̀ благорастворе́нїемъ и҆ благопло́дїемъ, бл҃гослове́ньми вѣнча́емо, многокрꙋ́жное лѣ́то рабѡ́мъ твои̑мъ да́рꙋй.

Лѣ́тное воздаѧ́нїе покажѝ на́мъ, преложе́нїе къ лꙋ́чшымъ: ми́рное же ᲂу҆строе́нїе вѣ́дꙋщымъ тѧ̀, сло́ве бж҃їй, ᲂу҆подо́бльшасѧ человѣ́кѡмъ.

На зе́млю прише́лъ є҆сѝ, собезнача́льне ѻ҆ц҃ꙋ̀, плѣ́нникѡмъ ѿпꙋще́нїе, слѣпы̑мъ же прозрѣ́нїе ѿ ѻ҆ц҃а̀ возвѣща́ѧ, и҆ вре́мѧ прїѧ́тно.

Житїѐ нача́ти, благоꙋго́дно тебѣ̀, влⷣко, съ лѣ́тнымъ начина́нїемъ, на́съ сподо́би.

Дне́й дꙋхо́вныхъ, въ поꙋче́нїи зако́на твоегѡ̀, покажѝ и҆спо́лнены, ще́дре сп҃се, пою́щыѧ тѧ̀.

Начина́ющїи лѣ́то и҆ пѣ́сней нача́токъ сотворѧ́емъ ца́рствꙋющемꙋ хрⷭ҇тꙋ̀, црⷭ҇твомъ безконе́чнымъ, правосла́внїи лю́дїе, благоче́стнѡ пою́ще: ѻ҆тцє́въ бж҃е бл҃гослове́нъ є҆сѝ.

Сы́й пре́жде вѣ̑къ, на вѣ́къ же, и҆ є҆щѐ гдⷭ҇ь, воспѣва́ющымъ тѧ̀, хрⷭ҇тѐ, и҆сто́чникъ бла́гости, благи́хъ твои́хъ дарѡ́въ лѣ́то сїѐ и҆спо́лни: ѻ҆тцє́въ бж҃е, бл҃гослове́нъ є҆сѝ.

Ꙗ҆́кѡ нача́льникꙋ спасе́нїѧ, хрⷭ҇тѐ, нача́токъ тебѣ̀ прино́ситъ лѣ́тный, честна́ѧ цр҃ковь зовꙋ́щи: по́йте и҆ превозноси́те хрⷭ҇та̀ во вѣ́ки.

И҆зъ не сꙋ́щихъ всѧ́чєскаѧ мꙋ́дрѣ ѡ҆бнови́вшаго созда́телѧ, и҆ производѧ́щаго време́нъ ѡ҆бращє́нїѧ хотѣ́нїемъ, по́йте и҆ превозноси́те є҆го̀ во вѣ́ки.

И҆зводѧ́щемꙋ всѧ́чєскаѧ бг҃ꙋ, и҆ времена̀ и҆змѣнѧ́ющемꙋ, на многоѻбра́зное человѣ́кѡвъ ᲂу҆правле́нїе, пое́мъ: хвали́те и҆ превозноси́те хрⷭ҇та̀ во вѣ́ки.

Сло́во бж҃їе, и҆ си́ла, и҆́стиннаѧ мꙋ́дрость и҆ ѵ҆поста́снаѧ, содержа́щаѧ и҆ пра́вѧщаѧ всѧ́чєскаѧ мꙋ́дрѣ, и҆ ны́нѣ наста́вшее рабѡ́мъ твои̑мъ вре́мѧ, во ᲂу҆строе́нїи ти́сѣ произведѝ.

Всѧ̑ дѣла̀ твоѧ̑, гдⷭ҇и: небеса̀, землѧ̀, свѣ́тъ, и҆ мо́ре: во́ды, и҆ всѝ и҆сто́чницы: со́лнце же, лꙋна̀, и҆ тма̀, ѕвѣ́зды, ѻ҆́гнь, человѣ́цы и҆ ско́ти, со а҆́гг҃лы восхвалѧ́ютъ тѧ̀.

Є҆ди́нъ є҆сѝ превѣ́чный, ꙗ҆́кѡ творе́цъ вѣкѡ́въ: и҆ ца́рствꙋющее трїѷпоста́сное є҆ди́но бжⷭ҇тво̀ нераздѣ́льное, мольба́ми чⷭ҇тыѧ бг҃ома́тере, лѣ́то плодоно́сно наслѣ́дїю твоемꙋ̀ покажѝ.