Кондак 1
Избра́нному от младе́нчества свети́льнику ми́ра и цели́телю неду́гов душе́вных и теле́сных, преподо́бному отцу́ на́шему Симео́ну смире́нно притека́юще, я́ко могу́щему на́с свободи́ти от страсте́й и вся́ких бе́д, из глубины́ души́ прино́сим хвале́ние и моли́тву, усе́рдно зову́ще:
Ра́дуйся, Симео́не, ди́вный сто́лпниче и вели́кий чудотво́рче.
Икос 1
А́нгел храни́тель да́н бы́сть тебе́ от Бо́га, егда́ пло́д моли́твы усе́рдныя дарова́н бы́л еси́ роди́телем твои́м. То́й бе́ тя́ сохраня́я, па́че же в му́дрости духо́вней поуча́я, егда́ снегосве́тлою оде́ждею оде́ялся еси́ при креще́нии твое́м. Мы́ же, ве́дуще тя́ чу́днаго избра́нника Бо́жия бы́ти, сия́ похвалы́ тебе́ я́ко до́лжныя дерза́ем принести́:
Ра́дуйся, роди́телей твои́х пло́д моли́твы богодарова́нный; ра́дуйся, даро́в Свята́го Ду́ха во святе́м Креще́нии сподо́бивыйся.
Ра́дуйся, Бо́жия благода́ти сосу́де избра́нный; ра́дуйся, любве́ Бо́жия к челове́ком явле́ние.
Ра́дуйся, земне́й му́дрости не науче́нный; ра́дуйся, Небе́сною сугу́бо обогаще́нный.
Ра́дуйся, Те́лом и Кро́вию Христо́выми та́инственно воспита́нный; ра́дуйся, те́плою моли́твою изде́тска возраще́нный.
Ра́дуйся, Симео́не, ди́вный сто́лпниче и вели́кий чудотво́рче.
Кондак 2
Ви́дя Госпо́дь смире́ние и простоту́ се́рдца твоего́, избра́ тя во ору́жие Свое́, дабы́ посрами́ти лука́вое мудрова́ние мудрецо́в ве́ка сего́, и от ове́ц о́тчих сотвори́ тя па́стыря ове́ц слове́сных ста́да Христо́ва, да ку́пно с ни́ми пое́ши Бо́гу: Аллилу́иа.
Икос 2
Ра́зум тво́й име́я а́лчущий и жа́ждущий пра́вды Христо́вы, не усумне́лся еси́ вопроси́ти честна́го ста́рца о словесе́х свята́го Ева́нгелия. И, поучи́вся его́ богонауче́нных глаго́лов, в то́м же часе́ тве́рдо возжеле́л еси́ оста́вити до́м о́тчий и вся́ кра́сная ми́ра сего́ и те́сным путе́м, веду́щим в живо́т ве́чный, поити́. Сего́ ра́ди вопие́м ти́:
Ра́дуйся, во хра́ме пребыва́ние от ю́ности возлюби́вый; ра́дуйся, из до́ма о́тча изше́дый.
Ра́дуйся, ми́ра убега́ющих покро́ве; ра́дуйся, богоугожде́ния о́бразе.
Ра́дуйся, благо́е и́го Христо́во на себе́ восприя́вый; ра́дуйся, пло́ти вся́ по́хоти благода́тию Бо́жиею а́ки мече́м посеки́й.
Ра́дуйся, заблу́ждших исправля́яй; ра́дуйся, до́бре жи́тельствующих утвержда́яй.
Ра́дуйся, Симео́не, ди́вный сто́лпниче и вели́кий чудотво́рче.
Кондак 3
Си́лою Бо́жиею бы́сть тебе́ во сне́ виде́ние: основа́ние зда́нию полага́я, ро́в копа́л еси́ и гла́с слы́шал еси́ трикра́ты па́че углубля́тися, и, дости́гшу ти́ мно́гия глубины́, повеле́ ти́ Госпо́дь со все́м усе́рдием твои́м созида́ти. И сбы́стся чу́дное виде́ние сие́ над тобо́ю: глубино́ю смире́ния твоего́ положи́л еси́ тве́рдое основа́ние доброде́телем все́м, и́миже укра́шен, непреста́нно Го́споду взыва́л еси́: Аллилу́иа.
Икос 3
Име́я жела́ние кре́пкое жития́ и́ноческаго, к не́коей оби́тели прише́л еси́. Смире́ния же ра́ди се́дмь дни́й без я́стия и пития́ пред враты́ ея́ па́д на земли́ пребы́л еси́, дерзнове́ния не имы́й в ту́ю вни́ти. Блаже́нный же игу́мен тоя́ оби́тели, прови́дя тя́ Бо́жия избра́нника бы́ти, мину́вшим дне́м те́м, испыта́ тя, я́ко хо́щеши Го́сподеви рабо́тати, и ли́ку бра́тии своея́ сопричте́. Сего́ ра́ди вопие́м ти́:
Ра́дуйся, и́стинный послу́шателю веле́ний Христо́вых; ра́дуйся, чистоте́ жития́ равноа́нгельнаго поревнова́вый.
Ра́дуйся, вся́ кра́сная ми́ра сего́ оста́вивый; ра́дуйся, жития́ и́ноческаго пла́менне возжеле́вый.
Ра́дуйся, воздержа́нием на стра́сти вооружи́выйся; ра́дуйся, до́брый во́ине Христо́в.
Ра́дуйся, во смире́нии себе́ на послуша́ние покори́вый; ра́дуйся, тща́ние вели́кое ко уче́нию монасты́рскому яви́вый.
Ра́дуйся, Симео́не, ди́вный сто́лпниче и вели́кий чудотво́рче.
Кондак 4
Бу́рю страсте́й утиша́я, я́ко а́гнец кро́ток отце́в и бра́тий духо́вных всегда́ послу́шал еси́ и, за смире́ние твое́, еще́ ю́н сы́й, о́браза а́нгельскаго сподо́бися, в не́мже воздержа́ние и труды́ усугубля́я, пло́ть умерщвля́л еси́, да ду́шу живи́ши и да зове́ши немо́лчно Бо́гу: Аллилу́иа.
Икос 4
Слы́ша игу́мен оби́тели о́ныя бра́тию пове́дающу, я́ко смра́д от тебе́ исхо́дит и че́рви спа́дают с телесе́ твоего́, вопроси́ тя, чесого́ ра́ди бы́сть ти́ та́ко. Ты́ же, главу́ преклони́вый, в молча́нии предстоя́л еси́. Тогда́ взя́ша оде́жду с тебе́ и, кро́вию обагре́нное те́ло твое́ узре́вше, с ве́рвием же́стоким вонзе́нным в не́, со у́жасом мно́гим страда́ния твоя́ помышля́ху. Мы́ же, на ня́ взира́юще, зове́м ти́:
Ра́дуйся, Свята́го Ду́ха жили́ще освяще́нное; ра́дуйся, о́браз Бо́жий имы́й в себе́ не помраче́нный.
Ра́дуйся, терпе́нием свои́м бра́тию удиви́вый; ра́дуйся, вели́кое му́жество в себе́ яви́вый.
Ра́дуйся, лампа́до еле́я благово́ннаго; ра́дуйся, ревни́телю и́стины.
Ра́дуйся, растле́нныя хра́мины ду́ш на́ших обновля́яй; ра́дуйся, куми́ры по́хотей на́ших низпроверга́яй.
Ра́дуйся, Симео́не, ди́вный сто́лпниче и вели́кий чудотво́рче.
Кондак 5
Благода́тною си́лою укрепля́емь, но́выя по́двиги во умерщвле́ние пло́ти твоея́ восприя́л еси́. Опа́сство же имы́й игу́мен, да не ка́ко про́чии от бра́тии, подража́юще тебе́, по́двиги не по си́ле и́х восприи́мут, повеле́ ти́ отыти́ от ни́х. Ты́ же, незло́биве, во́лю его́ исполня́я, в пусты́ни в кла́дязи безво́днем всели́лся еси́, да и та́мо воспева́еши Христу́ Бо́гу пе́снь: Аллилу́иа.
Икос 5
Ви́дя блаже́нный игу́мен Тимофе́й виде́ние во сне́, я́ко мно́жество наро́да оби́тель его́ обстои́т и о рабе́ Бо́жием Симео́не вопроша́ет, у́жасом одержи́м бе́ и, воспряну́в от сна́, бра́тии пове́да сие́. А́бие же ку́пно с ни́ми и́де в пусты́ню и во кла́дязи обре́т, воззва́ тя. Те́мже, почита́юще по́двиги твоя́, и мы́ по до́лгу зове́м ти́:
Ра́дуйся, кре́ст тво́й безро́потно понесы́й; ра́дуйся, ве́лия по́двиги Христа́ ра́ди восприя́вый.
Ра́дуйся, пра́вды Бо́жия ди́вный служи́телю; ра́дуйся, Це́ркве Христо́вы украше́ние.
Ра́дуйся, па́стырю на́ш до́брый; ра́дуйся, наста́вниче на́ш усе́рдный.
Ра́дуйся, пра́вило ве́ры благочести́выя; ра́дуйся, о́бразе кро́тости духо́вныя.
Ра́дуйся, Симео́не, ди́вный сто́лпниче и вели́кий чудотво́рче.
Кондак 6
Пропове́дник сло́ва Бо́жия епи́скоп Ва́сс во́лею Бо́жиею прии́де, егда́ в ке́ллии пусты́нней водвори́лся еси́, преподо́бне, ве́лиею бо ре́вностию о Моисе́и и Илии́ возревнова́в, четыредесятодне́внаго поста́ возжеле́л еси́. Но да не приобщи́шися бра́шна во вре́мя сие́, моля́ше святи́теля невхо́дну ке́ллию твою́ устро́ити, е́же и сотвори́, и оты́де, Го́сподеви поя́: Аллилу́иа.
Икос 6
Возсия́л еси́, преподо́бне, чу́дным воздержа́нием твои́м, егда́ преше́дшим дне́м поста́ твоего́ обре́те тя́ святи́тель Бо́жий я́ко ме́ртва, на земли́ лежа́ща, воздви́же тя́ и Та́ин безсме́ртных Христо́вых прича́стия сподо́би. Посе́м мно́гим бра́тиям пове́да о ди́внем воздержа́нии твое́м, да и ти́и по́льзу мно́гую духо́вную улуча́т, Го́сподеви, ди́вная дела́ Своя́ во святы́х Свои́х показу́ющу, пою́ще, тебе́ же, уго́днику Его́, си́це глаго́люще:
Ра́дуйся, земны́й пу́ть тво́й по стопа́м Христо́вым ше́ствовавый; ра́дуйся, посто́м Моисе́ю и Илии́ подража́вый.
Ра́дуйся, на Го́спода упова́ние твое́ возложи́вый; ра́дуйся, во упова́нии се́м пи́щи и пития́ не приобщи́выйся.
Ра́дуйся, я́ко си́лою Бо́жиею укрепля́лся еси́; ра́дуйся, я́ко и на́с изнемога́ющих моли́твами твои́ми укрепля́еши.
Ра́дуйся, я́ко в посте́ Безпло́тным уподо́бился еси́; ра́дуйся, я́ко поще́нием неви́димых враго́в победи́л еси́.
Ра́дуйся, Симео́не, ди́вный сто́лпниче и вели́кий чудотво́рче.
Кондак 7
Хотя́ по́двиги твоя́ па́че усугу́бити, я́ко на ле́ствицу, возводя́щую к Небеси́, на ве́рх горы́ возше́л еси́: да не сни́деши отту́ду, око́вами себе́ на не́й утверди́. Глаго́лов же святи́теля Меле́тия послу́шав, не пло́ть, но ра́зум в Христо́во послуша́ние плени́в, веще́ственныя у́зы себе́ разреши́л еси́, и до конца́ живота́ своего́ взыва́л еси́: Аллилу́иа.
Икос 7
Но́вая Вифесда́ яви́ся гора́, на не́йже подвиза́лся еси́, преподо́бне: не то́кмо еди́ною в ле́то и пе́рвее входя́щим исцеле́ния от тебе́ на то́й подава́хуся, но и всегда́ и все́м в беда́х, боле́знех и ско́рбех су́щим и с ве́рою притека́ющим блага́я по́мощь твоя́ дарова́шеся, и вси́ возвраща́хуся от тебе́, сла́вяще Бо́га, и тебе́, уго́дника Его́, велича́ху, зову́ще:
Ра́дуйся, свеще́, Боже́ственным пла́менем возжже́нная; ра́дуйся, свети́льниче горя́й и светя́й.
Ра́дуйся, цели́телю боле́зней душе́вных; ра́дуйся, врачу́ неду́гов теле́сных.
Ра́дуйся, пита́телю а́лчущих пра́вды; ра́дуйся, исто́чниче жа́ждущим и́стины.
Ра́дуйся, моли́твенниче о душа́х на́ших; ра́дуйся, хода́таю на́м и бла́г земны́х.
Ра́дуйся, Симео́не, ди́вный сто́лпниче и вели́кий чудотво́рче.
Кондак 8
Стра́нно житие́ свое́ сотвори́л еси́, блаже́нне, егда́ ви́дя наро́д мно́г, гряду́щ к тебе́, уразуме́, я́ко чту́т и прославля́ют тя́. Но да убежи́ши сла́вы, смире́ние же возлю́биши, от ни́х на сто́лп высо́кий возше́д, пребыва́ти на не́м благоволи́л еси́ и, я́ко по степе́нем ле́ствицы к Небе́сней высоте́ восходя́, и мра́з, и до́ждь, и зно́й паля́щий претерпева́я, Го́сподеви непреста́нно пе́л еси́: Аллилу́иа.
Икос 8
Ве́сь испо́лнися послуша́ния, егда́ испытова́ху тя́ святи́и пусты́ннии отцы́. Я́ко Бо́жию, веле́нию и́х повину́яся, потща́лся еси́ сни́ти со столпа́ твоего́ на зе́млю, е́же и ви́дяще ти́и, уразуме́ша, я́ко от Бо́га де́ло твое́, и да пребу́деши на столпе́ твое́м невозбра́нно. Тогда́ вра́г ро́да челове́ча умы́сли искуси́ти тя́: во о́бразе А́нгела све́тла предста́ ти́, ты́ же не уразуме́л еси́, блаже́нне, ле́сти вра́жия, и то́кмо зна́мением честна́го креста́ победи́л еси́ того́ кова́рство. По́слежде покая́ние ве́лие Го́споду прине́сл еси́, ему́же поучи́вшеся, хва́лим тя́ си́це:
Ра́дуйся, непобеди́мою си́лою кре́стною вооружи́выйся; ра́дуйся, щито́м ве́ры стре́лы лука́ваго разжже́нныя угаси́вый.
Ра́дуйся, кова́рство врага́ победи́вый; ра́дуйся, лжу́ огне́м и́стины попали́вый.
Ра́дуйся, моли́твою, я́ко мече́м вооруже́нный; ра́дуйся, шле́мом спасе́ния венча́нный.
Ра́дуйся, сугу́бое покая́ние Бо́гу принесы́й; ра́дуйся, на Бо́жие милосе́рдие наде́жду возложи́вый.
Ра́дуйся, Симео́не, ди́вный сто́лпниче и вели́кий чудотво́рче.
Кондак 9
Вся́каго гре́шника ка́ющагося прие́мляй Госпо́дь и твое́ покая́ние не то́кмо прия́т, но и па́ки просла́ви тя́. Диа́вол же, по́двига твоего́ не терпя́, я́звою лю́тою порази́ тя, и бы́сть в нозе́ твое́й лю́тый гно́й с червьми́. По мно́зе вре́мени уве́дев о тебе́, ма́ти твоя́ прии́де ко столпу́ твоему́ и пла́кася го́рько. Ты́ же, блаже́нне, на во́лю Госпо́дню упова́я, в бу́дущем ве́це усре́сти тя́ е́й обеща́л еси́ и, над преда́вшею ду́х сво́й в ру́це Госпо́дни моли́тву сотвори́в, Го́сподеви воспе́л еси́: Аллилу́иа.
Икос 9
Вети́и суему́дреннии не возмо́гут изъясни́ти си́лу чудотворе́ний твои́х, я́же во сла́ву Бо́жию и чу́дным и́менем Госпо́дним соверша́л еси́. Воды́ не име́вшу ме́сту тому́, моли́твою твое́ю, свя́те, земля́ потрясе́ся и во́ду оби́льно даде́. Жена́ не́кая, змию́ ма́лую в воде́ во чре́во свое́ прие́мшая, водо́ю твое́ю напои́вшися, исцеле́ а́бие. И и́ни мно́зи исцелева́ху у столпа́ твоего́ святы́ми твои́ми моли́твами. Лю́дие же, ви́дяще ве́лия чудеса́ твоя́, прославля́ху тя́ си́це:
Ра́дуйся, Небе́снаго Царя́ ра́бе благи́й и ве́рный; ра́дуйся, прия́тый от Него́ тала́нт усугу́бивый.
Ра́дуйся, житие́м свои́м Небеса́ возвесели́вый; ра́дуйся, чудесы́ твои́ми вселе́нную удиви́вый.
Ра́дуйся, помо́щниче на́ш и моли́твенниче; ра́дуйся, от искуше́ний вра́жиих защи́тниче.
Ра́дуйся, я́ко тобо́ю стра́сти на́ша утоля́ются; ра́дуйся, я́ко тобо́ю блага́я жела́ния на́ша исполня́ются.
Ра́дуйся, Симео́не, ди́вный сто́лпниче и вели́кий чудотво́рче.
Кондак 10
Спасти́ хотя́ гре́шныя и к покая́нию призва́ти, стопа́м после́дуя Го́спода на́шего Иису́са Христа́, прибе́гшаго под кро́в тво́й разбо́йника Ионафа́на хотя́щим уби́ти его́ не пре́дал еси́, но покая́ние ве́лие прине́сша, отыти́ с ми́ром ко Го́споду умоли́л еси́, да блаже́нства ра́йскаго сподо́бивыйся восхва́лит Всеще́драго Человеколю́бца Бо́га хвалебноблагода́рственною пе́снию: Аллилу́иа.
Икос 10
Царя́ Небе́снаго и Го́спода благи́й ра́б и ве́рный служи́тель бы́л еси́, ча́дом же твои́м духо́вным оте́ц и наста́вник многоми́лостивый. На еди́нем ме́сте, на столпе́ тебе́ обита́ющу, мно́жество наро́да, ве́рнии и неве́рнии, к тебе́ прихожда́ху, и все́м ско́рый помо́щник явля́лся еси́, вся́кия боле́зни душе́вныя и теле́сныя врачу́я, наипа́че же неве́рующия све́том Христо́ва Ева́нгелия просвеща́л еси́, да креще́ннии во и́мя Пресвяты́я Тро́ицы Го́спода восхва́лят и тебе́, до́брому па́стырю своему́, воззову́т:
Ра́дуйся, зерца́ло трисия́ннаго све́та; ра́дуйся, Небе́снаго озаре́ния испо́лненный.
Ра́дуйся, от бога́тства ду́ха своего́ бли́жния просвеща́яй; ра́дуйся, стра́ху Бо́жию науча́яй.
Ра́дуйся, во́ли Госпо́дни безро́потный исполни́телю; ра́дуйся, о сла́ве Его́ ревни́телю.
Ра́дуйся, учи́телю на́ш прему́дрый; ра́дуйся, о́тче ми́лостивый и кро́ткий.
Ра́дуйся, Симео́не, ди́вный сто́лпниче и вели́кий чудотво́рче.
Кондак 11
Пе́ние непреста́нное Христу́ в житии́ твое́м принося́, да́ра проро́чествия сподо́бился еси́, гряду́щую за́суху, гла́д и мо́р предвозвеща́я, наше́ствие неве́рных предре́кл еси́ и то́кмо мно́гими слеза́ми и непреста́нною моли́твою Го́спода уми́лостивил еси́, да отврати́т гне́в Сво́й, пра́ведно дви́жимый, и не попу́стит язы́ком победи́ти христиа́ны, да благода́рни су́ще Го́споду за вели́кия ми́лости Его́, непреста́нно пою́т Ему́: Аллилу́иа.
Икос 11
Све́та Небе́снаго земно́е прия́телище показа́лся еси́, егда́ приспе́ ча́с тво́й, да от ми́ра сего́ в селе́ния возлю́бленная и жела́емая пре́йдеши. Егда́ же учени́к тво́й Анто́ний узре́ тя со главо́ю пони́кшею до́лу и ру́це на пе́рсех иму́ща, воспла́кася го́рько, и, приступи́в, облобыза́ тя, глаго́ля: на кого́ оставля́еши на́с, о́тче? И мы́ гре́шнии про́сим тя́ не оста́вити на́с твои́ми благоприя́тными ко Го́споду моли́твами, да из глубины́ души́ зове́м ти́:
Ра́дуйся, от младе́нчества всего́ себе́ Го́сподеви преда́вый; ра́дуйся, любо́вь к Бо́гу в сокро́вище се́рдца своего́ прие́мый.
Ра́дуйся, благослове́нием ра́йским облагоуха́нный; ра́дуйся, све́том моли́твы просвеще́нный.
Ра́дуйся, во Христа́ облече́нный; ра́дуйся, ри́зою нетле́ния укра́шенный.
Ра́дуйся, бли́жних я́коже себе́ возлюби́вый; ра́дуйся, кра́сная ми́ра сего́ ни во что́же вмени́вый.
Ра́дуйся, Симео́не, ди́вный сто́лпниче и вели́кий чудотво́рче.
Кондак 12
Благода́ти да́р испроси́ на́м у Го́спода, тебе́, о́тче, ве́рно хва́лящим; вонми́ воздыха́нием на́шим, и сле́з на́ших не пре́зри, и не оста́ви на́с, я́коже обеща́лся еси́ не оставля́ти столпа́ твоего́, ни горы́, тобо́ю избра́нныя, во благодея́ние прибега́ющим к тебе́ челове́ком, да под кро́вом твои́м сохраня́еми, Го́сподеви пое́м: Аллилу́иа.
Икос 12
Пою́ще тебе́, богоблаже́нне о́тче, прославля́ем па́мять святу́ю твою́, и я́коже на погребе́ние твое́ стеко́шася ко гро́бу твоему́ святи́тели, и иере́и, и мирсти́и со слеза́ми и моли́твами мно́гими, свещи́ и фимиа́м нося́ще, та́ко и мы́, соше́дшеся в де́нь па́мяти твоея́, усе́рдно от любве́ серде́чныя хвалы́ и моле́ния прино́сим ти́:
Ра́дуйся, от ю́ности ми́ру уме́рый; ра́дуйся, нико́его и́га кроме́ Иису́сова понесы́й.
Ра́дуйся, от бре́ннаго телесе́ к лу́чшему житию́ ра́достно изше́дый; ра́дуйся, лицезре́нием Боже́ственнаго све́та наслажда́яйся.
Ра́дуйся, я́ко непреста́нно предстои́ши Пресвяте́й Тро́ице; ра́дуйся, я́ко непреста́нно моли́твы о на́с возсыла́еши.
Ра́дуйся, ро́да христиа́нскаго помо́щниче; ра́дуйся, во блага́я на́м поспе́шниче.
Ра́дуйся, Симео́не, ди́вный сто́лпниче и вели́кий чудотво́рче.
Кондак 13
О вели́кий и преди́вный уго́дниче Бо́жий, преподо́бне о́тче на́ш Симео́не! Ны́не Престо́лу Бо́жию предстоя́й и проше́ния на́ша Го́споду принося́й, и сия́ ма́лая моле́ния от на́с гре́шных приими́, и, я́коже не отри́нул еси́ разбо́йника, прибе́гшаго к твоему́ столпу́ и покая́ние ве́лие прине́сша, но и от земны́х бе́д изба́вил еси́ того́, и во́ждь бы́л еси́ ему́ в Ца́рство Небе́сное, та́ко и на́с гре́шных не оста́ви твои́м заступле́нием, но и во вре́менней жи́зни се́й помога́й на́м, и в бу́дущем ве́це Ца́рствия Бо́жия моли́твами твои́ми получи́ти сподо́би, да ку́пно с тобо́ю Бо́гу Спаси́телю на́шему воззове́м: Аллилу́иа.
Повтор
Этот кондак читается трижды, затем икос 1-й и кондак 1-й.
Икос 1
А́нгел храни́тель да́н бы́сть тебе́ от Бо́га, егда́ пло́д моли́твы усе́рдныя дарова́н бы́л еси́ роди́телем твои́м. То́й бе́ тя́ сохраня́я, па́че же в му́дрости духо́вней поуча́я, егда́ снегосве́тлою оде́ждею оде́ялся еси́ при креще́нии твое́м. Мы́ же, ве́дуще тя́ чу́днаго избра́нника Бо́жия бы́ти, сия́ похвалы́ тебе́ я́ко до́лжныя дерза́ем принести́:
Ра́дуйся, роди́телей твои́х пло́д моли́твы богодарова́нный; ра́дуйся, даро́в Свята́го Ду́ха во святе́м Креще́нии сподо́бивыйся.
Ра́дуйся, Бо́жия благода́ти сосу́де избра́нный; ра́дуйся, любве́ Бо́жия к челове́ком явле́ние.
Ра́дуйся, земне́й му́дрости не науче́нный; ра́дуйся, Небе́сною сугу́бо обогаще́нный.
Ра́дуйся, Те́лом и Кро́вию Христо́выми та́инственно воспита́нный; ра́дуйся, те́плою моли́твою изде́тска возраще́нный.
Ра́дуйся, Симео́не, ди́вный сто́лпниче и вели́кий чудотво́рче.
Кондак 1
Избра́нному от младе́нчества свети́льнику ми́ра и цели́телю неду́гов душе́вных и теле́сных, преподо́бному отцу́ на́шему Симео́ну смире́нно притека́юще, я́ко могу́щему на́с свободи́ти от страсте́й и вся́ких бе́д, из глубины́ души́ прино́сим хвале́ние и моли́тву, усе́рдно зову́ще:
Ра́дуйся, Симео́не, ди́вный сто́лпниче и вели́кий чудотво́рче.
Молитвы
О святы́й Симео́не, устремле́нный к Небеси́ в жи́зни твое́й, и по кончи́не твое́й на Небеси́ пребыва́яй! Ты́ основа́ние сто́лпничества бы́сть и о́браз высо́каго и неизрече́ннаго благоче́стия яви́ся. Води́м Ду́хом Святы́м, ты́ пе́рвый созда́ сто́лп и взы́де на него́, да денноно́щно мо́лишися Бо́гу. О́смьдесят ле́т стоя́ше ты́ на не́м, до́ждь и ве́тр, сту́дь и зно́й претерпева́я, моли́твенная воздыха́ния о очище́нии души́ своея́ от грехо́в и страсте́й вознося́, наипа́че же моля́ся Бо́гу о все́х ну́ждных и немощны́х, во гресе́х к тебе́ приходя́щих. Те́мже награди́ тя́ Бо́г во Ца́рствии Свое́м ра́достию, не сказа́нною челове́ческими словесы́, и дарова́ ти́ благода́ть чудеса́ твори́ти и по сме́рти и помога́ти все́м, те́пле ти́ моля́щимся.
Се́ и мы́, гре́шнии и недосто́йнии, стои́м у подно́жия столпа́ доброде́телей твои́х, и́миже вознесе́н бы́сть на Небеса́, и смире́нно мо́лим тя́ помяну́ти и на́с в моли́твах твои́х ко Го́споду. Поели́ку же не ве́мы, о че́м до́лжно е́сть моли́тися (а е́же ве́мы, не твори́м), предае́м себе́ в ру́це твои́, да сохрани́ши ны́, я́ко де́ти ма́лыя, благода́тию Христо́вою, да оживу́т ду́ши на́ша для ве́чнаго блаже́нства. И́бо а́ще и жела́ем спаса́тися, во́ля на́ша слаба́ е́сть: я́ко соло́ма бо ско́ро пламене́ем, но ско́ро и угаса́ем, и па́ки душа́ми на́шими мра́к овладева́ет. Помози́ на́м, свя́тче Бо́жий, бы́ти тве́рды в ве́ре и де́лании за́поведей Христо́вых и в покая́нии и смире́нии кончи́ны на́шего земна́го жития́ доити́.
Ты́, преподо́бне, естество́ челове́ческое победи́л еси́ и А́нгелом уподо́бился еси́, Бо́гу непреста́нно взыва́я, да прости́т ти́ грехи́. На́м же, в пучи́не греха́ пребыва́ющим, и мно́гая ле́та не довле́ют опла́кати беззако́ния своя́. Но безме́рное человеколю́бие Бо́жие ве́дуще, припа́даем ти́, ве́рному рабу́ Его́, да поми́лует на́с твои́м заступле́нием и прии́мет на́с я́ко де́ти Своя́, не ра́ди до́брых де́л на́ших, но ра́ди покая́ния, и я́ко Всемоги́й Человеколю́бец введе́т на́с во Ца́рствие Свое́, да непреста́нно сла́вим всесвято́е и́мя Отца́ и Сы́на и Свята́го Ду́ха во ве́ки веко́в. Ами́нь.
Конда́къ а҃
И҆збра́нномꙋ ѿ младе́нчества свѣти́льникꙋ мі́ра и҆ цѣли́телю недꙋ́гѡвъ дꙋше́вныхъ и҆ тѣле́сныхъ, прпⷣбномꙋ ѻ҆тцꙋ̀ на́шемꙋ сѷмеѡ́нꙋ смире́ннѡ притека́юще, ꙗ҆́кѡ могꙋ́щемꙋ на́съ свободи́ти ѿ страсте́й и҆ всѧ́кихъ бѣ́дъ, и҆з̾ глꙋбины̀ дꙋшѝ прино́симъ хвале́нїе и҆ мл҃твꙋ, ᲂу҆се́рднѡ зовꙋ́ще:
Ра́дꙋйсѧ, сѷмеѡ́не, ди́вный сто́лпниче и҆ вели́кїй чꙋдотво́рче.
І҆́косъ а҃
А҆́гг҃лъ храни́тель да́нъ бы́сть тебѣ̀ ѿ бг҃а, є҆гда̀ пло́дъ мл҃твы ᲂу҆се́рдныѧ дарова́нъ бы́лъ є҆сѝ роди́телємъ твои̑мъ. То́й бѣ̀ тѧ̀ сохранѧ́ѧ, па́че же въ мꙋ́дрости дꙋхо́внѣй поꙋча́ѧ, є҆гда̀ снѣгосвѣ́тлою ѻ҆де́ждею ѡ҆дѣ́ѧлсѧ є҆сѝ при кр҃ще́нїи твое́мъ. Мы́ же вѣ́дꙋще тѧ̀ чꙋ́днаго и҆збра́нника бж҃їѧ бы́ти, сїѧ̑ похвалы̑ тебѣ̀ ꙗ҆́кѡ дѡ́лжныѧ дерза́емъ принестѝ:
Ра́дꙋйсѧ, роди́телей твои́хъ пло́дъ мл҃твы бг҃одарова́нный: ра́дꙋйсѧ, дарѡ́въ ст҃а́гѡ дх҃а во ст҃ѣ́мъ крщ҃е́нїи сподо́бивыйсѧ.
Ра́дꙋйсѧ, бж҃їѧ бл҃года́ти сосꙋ́де и҆збра́нный: ра́дꙋйсѧ, любвѐ бж҃їѧ къ человѣ́кѡмъ ꙗ҆вле́нїе.
Ра́дꙋйсѧ, земнѣ́й мꙋ́дрости не наꙋче́нный: ра́дꙋйсѧ, нбⷭ҇ною сꙋгꙋ́бѡ ѡ҆богаще́нный.
Ра́дꙋйсѧ, тѣ́ломъ и҆ кро́вїю хрⷭ҇то́выми та́инственнѡ воспита́нный: ра́дꙋйсѧ, те́плою мл҃твою и҆здѣ́тска возраще́нный.
Ра́дꙋйсѧ, сѷмеѡ́не, ди́вный сто́лпниче и҆ вели́кїй чꙋдотво́рче.
Конда́къ в҃
Ви́дѧ гдⷭ҇ь смире́нїе и҆ простотꙋ̀ се́рдца твоегѡ̀, и҆збра́ тѧ во ѻ҆рꙋ́жїе своѐ, дабы̀ посрами́ти лꙋка́вое мꙋдрова́нїе мꙋдрецѡ́въ вѣ́ка сегѡ̀, и҆ ѿ ѻ҆ве́цъ ѻ҆́тчихъ сотвори́ тѧ па́стырѧ ѻ҆ве́цъ слове́сныхъ ста́да хрⷭ҇то́ва, да кꙋ́пнѡ съ ни́ми пое́ши бг҃ꙋ: А҆ллилꙋ́їа.
І҆́косъ в҃
Ра́зꙋмъ тво́й и҆мѣ́ѧ а҆́лчꙋщїй и҆ жа́ждꙋщїй пра́вды хрⷭ҇то́вы, не ᲂу҆сꙋмнѣ́лсѧ є҆сѝ вопроси́ти честна́го ста́рца ѡ҆ словесѣ́хъ ст҃а́гѡ є҆ѵⷢ҇лїа. И҆ поꙋчи́всѧ є҆гѡ̀ бг҃онаꙋче́нныхъ глаго́лѡвъ, въ то́мъ же часѣ̀ тве́рдѡ возжелѣ́лъ є҆сѝ ѡ҆ста́вити до́мъ ѻ҆́тчїй и҆ всѧ̑ кра̑снаѧ мі́ра сегѡ̀, и҆ тѣ́снымъ пꙋте́мъ, ведꙋ́щимъ въ живо́тъ вѣ́чный, поитѝ. Сегѡ̀ ра́ди вопїе́мъ тѝ:
Ра́дꙋйсѧ, во хра́мѣ пребыва́нїе ѿ ю҆́ности возлюби́вый: ра́дꙋйсѧ, и҆з̾ до́ма ѻ҆́тча и҆зше́дый.
Ра́дꙋйсѧ, мі́ра ᲂу҆бѣга́ющихъ покро́ве: ра́дꙋйсѧ, бг҃оꙋгожде́нїѧ ѻ҆́бразе.
Ра́дꙋйсѧ, бл҃го́е и҆́го хрⷭ҇то́во на себѐ воспрїѧ́вый: ра́дꙋйсѧ, пло́ти всѧ̑ по́хѡти бл҃года́тїю бж҃їею, а҆́ки мече́мъ, посѣкі́й.
Ра́дꙋйсѧ, заблꙋ́ждшихъ и҆справлѧ́ѧй: ра́дꙋйсѧ, до́брѣ жи́тельствꙋющихъ ᲂу҆твержда́ѧй.
Ра́дꙋйсѧ, сѷмеѡ́не, ди́вный сто́лпниче и҆ вели́кїй чꙋдотво́рче.
Конда́къ г҃
Си́лою бж҃їею бы́сть тебѣ̀ во снѣ̀ видѣ́нїе: ѡ҆снова́нїе зда́нїю полага́ѧ, ро́въ копа́лъ є҆сѝ и҆ гла́съ слы́шалъ є҆сѝ трикра́ты, па́че ᲂу҆глꙋблѧ́тисѧ, и҆ дости́гшꙋ тѝ мно́гїѧ глꙋбины̀, повелѣ̀ тѝ гдⷭ҇ь со всѣ́мъ ᲂу҆се́рдїемъ твои́мъ созида́ти. И҆ сбы́стсѧ чꙋ́дное видѣ́нїе сїѐ над̾ тобо́ю: глꙋбино́ю смире́нїѧ твоегѡ̀ положи́лъ є҆сѝ тве́рдое ѡ҆снова́нїе добродѣ́телемъ всѣ̑мъ: и҆́миже ᲂу҆кра́шенъ, непреста́ннѡ гдⷭ҇ꙋ взыва́лъ є҆сѝ: А҆ллилꙋ́їа.
І҆́косъ г҃
И҆мѣ́ѧ жела́нїе крѣ́пкое житїѧ̀ и҆́ноческагѡ, къ нѣ́коей ѻ҆би́тели прише́лъ є҆сѝ. Смире́нїѧ же ра́ди се́дмь дні́й без̾ ꙗ҆́стїѧ и҆ питїѧ̀, пред̾ враты̀ є҆ѧ̀ па́дъ на землѝ пребы́лъ є҆сѝ, дерзнове́нїѧ не и҆мы́й въ тꙋ́ю вни́ти. Бл҃же́нный же и҆гꙋ́менъ тоѧ̀ ѻ҆би́тели, прови́дѧ тѧ̀ бж҃їѧ и҆збра́нника бы́ти, минꙋ́вшымъ днє́мъ тѣ̑мъ, и҆спыта́ тѧ, ꙗ҆́кѡ хо́щеши гдⷭ҇еви рабо́тати, и҆ ли́кꙋ бра́тїи своеѧ̀ сопричтѐ. Сегѡ̀ ра́ди вопїе́мъ тѝ:
Ра́дꙋйсѧ, и҆́стинный послꙋ́шателю велѣ́нїй хрⷭ҇то́выхъ: ра́дꙋйсѧ, чистотѣ̀ житїѧ̀ равноа́гг҃льнагѡ поревнова́вый.
Ра́дꙋйсѧ, всѧ̑ кра̑снаѧ мі́ра сегѡ̀ ѡ҆ста́вивый: ра́дꙋйсѧ, житїѧ̀ и҆́ноческагѡ пла́меннѣ возжелѣ́вый.
Ра́дꙋйсѧ, воздержа́нїемъ на стра̑сти воѡрꙋжи́выйсѧ: ра́дꙋйсѧ, до́брый во́ине хрⷭ҇то́въ.
Ра́дꙋйсѧ, во смире́нїи себѐ на послꙋша́нїе покори́вый: ра́дꙋйсѧ, тща́нїе вели́кое ко ᲂу҆че́нїю монасты́рскомꙋ ꙗ҆ви́вый.
Ра́дꙋйсѧ, сѷмеѡ́не, ди́вный сто́лпниче и҆ вели́кїй чꙋдотво́рче.
Конда́къ д҃
Бꙋ́рю страсте́й ᲂу҆тиша́ѧ, ꙗ҆́кѡ а҆́гнецъ кро́токъ, ѻ҆тцє́въ и҆ бра́тїй дꙋхо́вныхъ всегда̀ послꙋ́шалъ є҆сѝ, и҆ за смире́нїе твоѐ, є҆щѐ ю҆́нъ сы́й, ѻ҆́браза а҆́гг҃льскагѡ сподо́бисѧ, въ не́мже воздержа́нїе и҆ трꙋды̀ ᲂу҆сꙋгꙋблѧ́ѧ, пло́ть ᲂу҆мерщвлѧ́лъ є҆сѝ, да дꙋ́шꙋ живи́ши и҆ да зове́ши немо́лчнѡ бг҃ꙋ: А҆ллилꙋ́їа.
І҆́косъ д҃
Слы́ша и҆гꙋ́менъ ѻ҆би́тели ѻ҆́ныѧ бра́тїю повѣ́дающꙋ, ꙗ҆́кѡ смра́дъ ѿ тебє̀ и҆схо́дитъ, и҆ че́рви спа́даютъ съ тѣлесѐ твоегѡ̀, вопроси́ тѧ, чесогѡ̀ ра́ди бы́сть тѝ та́кѡ. Ты́ же главꙋ̀ преклони́вый, въ молча́нїи предстоѧ́лъ є҆сѝ. Тогда̀ взѧ́ша ѻ҆де́ждꙋ съ тебє̀, и҆ кро́вїю ѡ҆багре́нное тѣ́ло твоѐ ᲂу҆зрѣ́вше, съ ве́рвїемъ же́стокимъ вонзе́ннымъ въ нѐ, со ᲂу҆́жасомъ мно́гимъ страда̑нїѧ твоѧ̑ помышлѧ́хꙋ. Мы́ же на нѧ̀ взира́юще, зове́мъ тѝ:
Ра́дꙋйсѧ, ст҃а́гѡ дх҃а жили́ще ѡ҆сщ҃е́нное: ра́дꙋйсѧ, ѻ҆́бразъ бж҃їй и҆мы́й въ себѣ̀ не помраче́нный.
Ра́дꙋйсѧ, терпѣ́нїемъ свои́мъ бра́тїю ᲂу҆диви́вый: ра́дꙋйсѧ, вели́кое мꙋ́жество въ себѣ̀ ꙗ҆ви́вый.
Ра́дꙋйсѧ, лампа́до є҆ле́а бл҃гово́ннагѡ: ра́дꙋйсѧ, ревни́телю и҆́стины.
Ра́дꙋйсѧ, растлѣ̑нныѧ хра̑мины дꙋ́шъ на́шихъ ѡ҆бновлѧ́ѧй: ра́дꙋйсѧ, кꙋмі́ры по́хотей на́шихъ низпроверга́ѧй.
Ра́дꙋйсѧ, сѷмеѡ́не, ди́вный сто́лпниче и҆ вели́кїй чꙋдотво́рче.
Конда́къ є҃
Бл҃года́тною си́лою ᲂу҆крѣплѧ́емь, нѡ́выѧ по́двиги во ᲂу҆мерщвле́нїе пло́ти твоеѧ̀ воспрїѧ́лъ є҆сѝ. Ѻ҆па́сство же и҆мы́й и҆гꙋ́менъ, да не ка́кѡ про́чїи ѿ бра́тїи, подража́юще тебѣ̀, по́двиги не по си́лѣ и҆́хъ воспрїи́мꙋтъ, повелѣ̀ тѝ ѿитѝ ѿ ни́хъ. Ты́ же, неѕло́биве, во́лю є҆гѡ̀ и҆сполнѧ́ѧ, въ пꙋсты́ни въ кла́дѧзи безво́днѣмъ всели́лсѧ є҆сѝ, да и҆ та́мѡ воспѣва́еши хрⷭ҇тꙋ̀ бг҃ꙋ пѣ́снь: А҆ллилꙋ́їа.
І҆́косъ є҃
Ви́дѧ бл҃же́нный и҆гꙋ́менъ тїмоѳе́й видѣ́нїе во снѣ̀, ꙗ҆́кѡ мно́жество наро́да ѻ҆би́тель є҆гѡ̀ ѡ҆бстои́тъ и҆ ѡ҆ рабѣ̀ бж҃їемъ сѷмеѡ́нѣ вопроша́етъ, ᲂу҆́жасомъ ѡ҆держи́мь бѣ̀, и҆ воспрѧнꙋ́въ ѿ сна̀, бра́тїи повѣ́да сїѐ. А҆́бїе же кꙋ́пнѡ съ ни́ми и҆́де въ пꙋсты́ню, и҆ во кла́дѧзи ѡ҆брѣ́тъ, воззва́ тѧ. Тѣ́мже почита́юще по́двиги твоѧ̑, и҆ мы̀ по до́лгꙋ зове́мъ тѝ:
Ра́дꙋйсѧ, крⷭ҇тъ тво́й безро́потнѡ понесы́й: ра́дꙋйсѧ, вє́лїѧ по́двиги хрⷭ҇та̀ ра́ди воспрїѧ́вый.
Ра́дꙋйсѧ, пра́вды бж҃їѧ ди́вный слꙋжи́телю: ра́дꙋйсѧ, цр҃кве хрⷭ҇то́вы ᲂу҆краше́нїе.
Ра́дꙋйсѧ, па́стырю на́шъ до́брый: ра́дꙋйсѧ, наста́вниче на́шъ ᲂу҆се́рдный.
Ра́дꙋйсѧ, пра́вило вѣ́ры бл҃гочести́выѧ: ра́дꙋйсѧ, ѻ҆́бразе кро́тости дꙋхо́вныѧ.
Ра́дꙋйсѧ, сѷмеѡ́не, ди́вный сто́лпниче и҆ вели́кїй чꙋдотво́рче.
Конда́къ ѕ҃
Проповѣ́дникъ сло́ва бж҃їѧ є҆пⷭ҇кпъ ва́ссъ во́лею бж҃їею прїи́де, є҆гда̀ въ ке́ллїи пꙋсты́ннѣй водвори́лсѧ є҆сѝ, прпⷣбне, ве́лїею бо ре́вностїю ѡ҆ мѡѷсе́и и҆ и҆лїѝ возревнова́въ, четыредесѧтодне́внагѡ поста̀ возжелѣ́лъ є҆сѝ. Но да не прїѡбщи́шисѧ бра́шна во вре́мѧ сїѐ, молѧ́ше ст҃и́телѧ невхо́днꙋ ке́ллїю твою̀ ᲂу҆стро́ити, є҆́же и҆ сотворѝ, и҆ ѿи́де, гдⷭ҇еви поѧ̀: А҆ллилꙋ́їа.
І҆́косъ ѕ҃
Возсїѧ́лъ є҆сѝ, прпⷣбне, чꙋ́днымъ воздержа́нїемъ твои́мъ, є҆гда̀, преше́дшымъ днє́мъ поста̀ твоегѡ̀, ѡ҆брѣ́те тѧ̀ ст҃и́тель бж҃їй, ꙗ҆́кѡ ме́ртва, на землѝ лежа́ща, воздви́же тѧ̀ и҆ та̑инъ безсме́ртныхъ хрⷭ҇то́выхъ прича́стїѧ сподо́би. Посе́мъ мнѡ́гимъ бра́тїѧмъ повѣ́да ѡ҆ ди́внѣмъ воздержа́нїи твое́мъ, да и҆ ті́и по́льзꙋ мно́гꙋю дꙋхо́внꙋю ᲂу҆лꙋча́тъ, гдⷭ҇еви, ди̑внаѧ дѣла̀ своѧ̑ во ст҃ы́хъ свои́хъ показꙋ́ющꙋ, пою́ще, тебѣ́ же, ᲂу҆го́дникꙋ є҆гѡ̀, си́це глаго́люще:
Ра́дꙋйсѧ, земны́й пꙋ́ть тво́й по стопа́мъ хрⷭ҇тѡ́вымъ ше́ствовавый: ра́дꙋйсѧ, посто́мъ мѡѷсе́ю и҆ и҆лїѝ подража́вый.
Ра́дꙋйсѧ, на гдⷭ҇а ᲂу҆пова́нїе твоѐ возложи́вый: ра́дꙋйсѧ, во ᲂу҆пова́нїи се́мъ пи́щи и҆ питїѧ̀ не прїѡбщи́выйсѧ.
Ра́дꙋйсѧ, ꙗ҆́кѡ си́лою бж҃їею ᲂу҆крѣплѧ́лсѧ є҆сѝ: ра́дꙋйсѧ, ꙗ҆́кѡ и҆ на́съ и҆знемога́ющихъ мл҃твами твои́ми ᲂу҆крѣплѧ́еши.
Ра́дꙋйсѧ, ꙗ҆́кѡ въ постѣ̀ безплѡ́тнымъ ᲂу҆подо́билсѧ є҆сѝ: ра́дꙋйсѧ, ꙗ҆́кѡ поще́нїемъ неви́димыхъ врагѡ́въ побѣди́лъ є҆сѝ.
Ра́дꙋйсѧ, сѷмеѡ́не, ди́вный сто́лпниче и҆ вели́кїй чꙋдотво́рче.
Конда́къ з҃
Хотѧ̀ по́двиги твоѧ̑ па́че ᲂу҆сꙋгꙋ́бити, ꙗ҆́кѡ на лѣ́ствицꙋ, возводѧ́щꙋю къ нб҃сѝ, на ве́рхъ горы̀ возше́лъ є҆сѝ: да не сни́деши ѿтꙋ́дꙋ, ѡ҆ко́вами себѐ на не́й ᲂу҆твердѝ. Глаго́лѡвъ же ст҃и́телѧ меле́тїа послꙋ́шавъ, не пло́ть, но ра́зꙋмъ въ хрⷭ҇то́во послꙋша́нїе плѣни́въ, веще́ствєнныѧ ᲂу҆́зы себѣ̀ разрѣши́лъ є҆сѝ, и҆ до конца̀ живота̀ своегѡ̀ взыва́лъ є҆сѝ: А҆ллилꙋ́їа.
І҆́косъ з҃
Но́ваѧ виѳесда̀ ꙗ҆ви́сѧ гора̀, на не́йже подвиза́лсѧ є҆сѝ, прпⷣбне: не то́кмѡ є҆ди́ною въ лѣ́то и҆ пе́рвѣе входѧ́щымъ и҆сцѣлє́нїѧ ѿ тебє̀ на то́й подава́хꙋсѧ, но и҆ всегда̀ и҆ всѣ̑мъ, въ бѣда́хъ, болѣ́знехъ и҆ ско́рбехъ сꙋ́щымъ и҆ съ вѣ́рою притека́ющымъ, бл҃га́ѧ по́мощь твоѧ̀ дарова́шесѧ, и҆ всѝ возвраща́хꙋсѧ ѿ тебє̀, сла́вѧще бг҃а, и҆ тебѐ, ᲂу҆го́дника є҆гѡ̀, велича́хꙋ, зовꙋ́ще:
Ра́дꙋйсѧ, свѣщѐ, бжⷭ҇твеннымъ пла́менемъ возжже́ннаѧ: ра́дꙋйсѧ, свѣти́льниче горѧ́й и҆ свѣтѧ́й.
Ра́дꙋйсѧ, цѣли́телю болѣ́зней дꙋше́вныхъ: ра́дꙋйсѧ, врачꙋ̀ недꙋ́гѡвъ тѣле́сныхъ.
Ра́дꙋйсѧ, пита́телю а҆́лчꙋщихъ пра́вды: ра́дꙋйсѧ, и҆сто́чниче жа́ждꙋщымъ и҆́стины.
Ра́дꙋйсѧ, мл҃твенниче ѡ҆ дꙋша́хъ на́шихъ: ра́дꙋйсѧ, хода́таю на́мъ и҆ бла̑гъ земны́хъ.
Ра́дꙋйсѧ, сѷмеѡ́не, ди́вный сто́лпниче и҆ вели́кїй чꙋдотво́рче.
Конда́къ и҃
Стра́нно житїѐ своѐ сотвори́лъ є҆сѝ, бл҃же́нне, є҆гда̀ ви́дѧ наро́дъ мно́гъ, грѧдꙋ́щъ къ тебѣ̀, ᲂу҆разꙋмѣ̀, ꙗ҆́кѡ чтꙋ́тъ и҆ прославлѧ́ютъ тѧ̀. Но да ᲂу҆бѣжи́ши сла́вы, смире́нїе же возлю́биши, ѿ ни́хъ на сто́лпъ высо́кїй возше́дъ, пребыва́ти на не́мъ бл҃говоли́лъ є҆сѝ, и҆ ꙗ҆́кѡ по степе́нємъ лѣ́ствицы къ нбⷭ҇нѣй высотѣ̀ восходѧ̀, и҆ мра́зъ, и҆ до́ждь, и҆ зно́й палѧ́щїй претерпѣва́ѧ, гдⷭ҇еви непреста́ннѡ пѣ́лъ є҆сѝ: А҆ллилꙋ́їа.
І҆́косъ и҃
Ве́сь и҆спо́лнисѧ послꙋша́нїѧ, є҆гда̀ и҆спытова́хꙋ тѧ̀ ст҃і́и пꙋсты́ннїи ѻ҆тцы̀. Ꙗ҆́кѡ бж҃їю, велѣ́нїю и҆́хъ повинꙋ́ѧсѧ, потща́лсѧ є҆сѝ сни́ти со столпа̀ твоегѡ̀ на зе́млю, є҆́же и҆ ви́дѧще ті́и ᲂу҆разꙋмѣ́ша, ꙗ҆́кѡ ѿ бг҃а дѣ́ло твоѐ, и҆ да пребꙋ́деши на столпѣ̀ твое́мъ невозбра́ннѡ. Тогда̀ вра́гъ ро́да человѣ́ча ᲂу҆мы́сли и҆скꙋси́ти тѧ̀: во ѻ҆́бразѣ а҆́гг҃ла свѣ́тла предста̀ тѝ, ты́ же не ᲂу҆разꙋмѣ́лъ є҆сѝ, бл҃же́нне, ле́сти вра́жїѧ, и҆ то́кмѡ зна́менїемъ чтⷭ҇на́гѡ крⷭ҇та̀ побѣди́лъ є҆сѝ тогѡ̀ кова́рство. По́слѣжде покаѧ́нїе ве́лїе гдⷭ҇ꙋ прине́слъ є҆сѝ, є҆мꙋ́же поꙋчи́вшесѧ, хва́лимъ тѧ̀ си́це:
Ра́дꙋйсѧ, непобѣди́мою си́лою крⷭ҇тною воѡрꙋжи́выйсѧ: ра́дꙋйсѧ, щито́мъ вѣ́ры стрѣ́лы лꙋка́вагѡ разжжє́нныѧ ᲂу҆гаси́вый.
Ра́дꙋйсѧ, кова́рство врага̀ побѣди́вый: ра́дꙋйсѧ, лжꙋ̀ ѻ҆гне́мъ и҆́стины попали́вый.
Ра́дꙋйсѧ, мл҃твою, ꙗ҆́кѡ мече́мъ, воѡрꙋже́нный: ра́дꙋйсѧ, шле́момъ сп҃се́нїѧ вѣнча́нный.
Ра́дꙋйсѧ, сꙋгꙋ́бое покаѧ́нїе бг҃ꙋ принесы́й: ра́дꙋйсѧ, на бж҃їе млⷭ҇рдїе наде́ждꙋ возложи́вый.
Ра́дꙋйсѧ, сѷмеѡ́не, ди́вный сто́лпниче и҆ вели́кїй чꙋдотво́рче.
Конда́къ ѳ҃
Всѧ́каго грѣ́шника ка́ющагосѧ прїе́млѧй гдⷭ҇ь и҆ твоѐ покаѧ́нїе не то́кмѡ прїѧ́тъ, но и҆ па́ки просла́ви тѧ̀. Дїа́волъ же по́двига твоегѡ̀ не терпѧ̀, ꙗ҆́звою лю́тою порази́ тѧ, и҆ бы́сть въ нозѣ̀ твое́й лю́тый гно́й съ червьмѝ. По мно́зѣ вре́мени ᲂу҆вѣ́дѣвъ ѡ҆ тебѣ̀, ма́ти твоѧ̀ прїи́де ко столпꙋ̀ твоемꙋ̀ и҆ пла́касѧ го́рькѡ. Ты́ же, бл҃же́нне, на во́лю гдⷭ҇ню ᲂу҆пова́ѧ, въ бꙋ́дꙋщемъ вѣ́цѣ ᲂу҆срѣ́сти тѧ̀ є҆́й ѡ҆бѣща́лъ є҆сѝ, и҆ над̾ преда́вшею дꙋ́хъ сво́й въ рꙋ́цѣ гдⷭ҇ни мл҃твꙋ сотвори́въ, гдⷭ҇еви воспѣ́лъ є҆сѝ: А҆ллилꙋ́їа.
І҆́косъ ѳ҃
Вѣті̑и сꙋемꙋ́дреннїи не возмо́гꙋтъ и҆з̾ѧсни́ти си́лꙋ чꙋдотворе́нїй твои́хъ, ꙗ҆̀же во сла́вꙋ бж҃їю и҆ чꙋ́днымъ и҆́менемъ гдⷭ҇нимъ соверша́лъ є҆сѝ. Воды̀ не и҆мѣ́вшꙋ мѣ́стꙋ томꙋ̀, мл҃твою твое́ю, ст҃е, землѧ̀ потрѧсе́сѧ и҆ во́дꙋ ѻ҆би́льнѡ дадѐ. Жена̀ нѣ́каѧ, ѕмїю̀ ма́лꙋю въ водѣ̀ во чре́во своѐ прїе́мшаѧ, водо́ю твое́ю напои́вшисѧ, и҆сцѣлѣ̀ а҆́бїе. И҆ и҆́ни мно́зи и҆сцѣлѣва́хꙋ ᲂу҆ столпа̀ твоегѡ̀ ст҃ы́ми твои́ми мл҃твами. Лю́дїе же ви́дѧще вє́лїѧ чꙋдеса̀ твоѧ̑, прославлѧ́хꙋ тѧ̀ си́це:
Ра́дꙋйсѧ, нбⷭ҇нагѡ цр҃ѧ̀ ра́бе бл҃гі́й и҆ вѣ́рный: ра́дꙋйсѧ, прїѧ́тый ѿ негѡ̀ тала́нтъ ᲂу҆сꙋгꙋ́бивый.
Ра́дꙋйсѧ, житїе́мъ свои́мъ нб҃са̀ возвесели́вый: ра́дꙋйсѧ, чꙋдесы̀ твои́ми вселе́ннꙋю ᲂу҆диви́вый.
Ра́дꙋйсѧ, помо́щниче на́шъ и҆ мл҃твенниче: ра́дꙋйсѧ, ѿ и҆скꙋше́нїй вра́жїихъ защи́тниче.
Ра́дꙋйсѧ, ꙗ҆́кѡ тобо́ю стра̑сти на́шѧ ᲂу҆толѧ́ютсѧ: ра́дꙋйсѧ, ꙗ҆́кѡ тобо́ю бл҃га̑ѧ жела̑нїѧ на̑ша и҆сполнѧ́ютсѧ.
Ра́дꙋйсѧ, сѷмеѡ́не, ди́вный сто́лпниче и҆ вели́кїй чꙋдотво́рче.
Конда́къ і҃
Сп҃стѝ хотѧ̀ грѣ̑шныѧ и҆ къ покаѧ́нїю призва́ти, стопа́мъ послѣ́дꙋѧ гдⷭ҇а на́шегѡ і҆и҃са хрⷭ҇та̀, прибѣ́гшаго под̾ кро́въ тво́й разбо́йника і҆ѡнаѳа́на хотѧ́щымъ ᲂу҆би́ти є҆го̀ не пре́далъ є҆сѝ, но покаѧ́нїе ве́лїе прине́сша ѿитѝ съ ми́ромъ ко гдⷭ҇ꙋ ᲂу҆моли́лъ є҆сѝ, да бл҃же́нства ра́йскагѡ сподо́бивыйсѧ восхва́литъ всеще́драго чл҃вѣколю́бца бг҃а хвалебнобл҃года́рственною пѣ́снїю: А҆ллилꙋ́їа.
І҆́косъ і҃
Цр҃ѧ̀ нбⷭ҇нагѡ и҆ гдⷭ҇а бл҃гі́й ра́бъ и҆ вѣ́рный слꙋжи́тель бы́лъ є҆сѝ, ча́дѡмъ же твои̑мъ дꙋхѡ́внымъ ѻ҆те́цъ и҆ наста́вникъ многомлⷭ҇тивый. На є҆ди́нѣмъ мѣ́стѣ, на столпѣ̀ тебѣ̀ ѡ҆бита́ющꙋ, мно́жество наро́да, вѣ́рнїи и҆ невѣ́рнїи, къ тебѣ̀ прихожда́хꙋ, и҆ всѣ̑мъ ско́рый помо́щникъ ꙗ҆влѧ́лсѧ є҆сѝ, всѧ̑кїѧ болѣ̑зни дꙋшє́вныѧ и҆ тѣлє́сныѧ врачꙋ́ѧ, наипа́че же невѣ́рꙋющыѧ свѣ́томъ хрⷭ҇то́ва є҆ѵⷢ҇лїа просвѣща́лъ є҆сѝ, да кр҃ще́ннїи во и҆́мѧ прест҃ы́ѧ трⷪ҇цы гдⷭ҇а восхва́лѧтъ и҆ тебѣ̀, до́бромꙋ па́стырю своемꙋ̀, воззовꙋ́тъ:
Ра́дꙋйсѧ, зерца́ло трисїѧ́ннагѡ свѣ́та: ра́дꙋйсѧ, нбⷭ҇нагѡ ѡ҆заре́нїѧ и҆спо́лненный.
Ра́дꙋйсѧ, ѿ бога́тства дꙋ́ха своегѡ̀ бли̑жнїѧ просвѣща́ѧй: ра́дꙋйсѧ, стра́хꙋ бж҃їю наꙋча́ѧй.
Ра́дꙋйсѧ, во́ли гдⷭ҇ни безро́потный и҆сполни́телю: ра́дꙋйсѧ, ѡ҆ сла́вѣ є҆гѡ̀ ревни́телю.
Ра́дꙋйсѧ, ᲂу҆чи́телю на́шъ премꙋ́дрый: ра́дꙋйсѧ, ѻ҆́тче млⷭ҇тивый и҆ кро́ткїй.
Ра́дꙋйсѧ, сѷмеѡ́не, ди́вный сто́лпниче и҆ вели́кїй чꙋдотво́рче.
Конда́къ а҃і
Пѣ́нїе непреста́нное хрⷭ҇тꙋ̀ въ житїѝ твое́мъ приносѧ̀, да́ра прⷪ҇ро́чествїѧ сподо́билсѧ є҆сѝ, грѧдꙋ́щꙋю за́сꙋхꙋ, гла́дъ и҆ мо́ръ предвозвѣща́ѧ, наше́ствїе невѣ́рныхъ предре́клъ є҆сѝ, и҆ то́кмѡ мно́гими слеза́ми и҆ непреста́нною мл҃твою гдⷭ҇а ᲂу҆млⷭ҇тивилъ є҆сѝ, да ѿврати́тъ гнѣ́въ сво́й, првⷣнѡ дви́жимый, и҆ не попꙋ́ститъ ꙗ҆зы́кѡмъ побѣди́ти хрⷭ҇тїа́ны, да бл҃года́рни сꙋ́ще гдⷭ҇ꙋ за вели̑кїѧ млⷭ҇ти є҆гѡ̀, непреста́ннѡ пою́тъ є҆мꙋ̀: А҆ллилꙋ́їа.
І҆́косъ а҃і
Свѣ́та нбⷭ҇нагѡ земно́е прїѧ́телище показа́лсѧ є҆сѝ, є҆гда̀ приспѣ̀ ча́съ тво́й, да ѿ мі́ра сегѡ̀ въ селє́нїѧ возлю́блєннаѧ и҆ жела́ємаѧ пре́йдеши. Є҆гда́ же ᲂу҆чени́къ тво́й а҆нтѡ́нїй ᲂу҆зрѣ́ тѧ со главо́ю пони́кшею до́лꙋ и҆ рꙋ́цѣ на пе́рсехъ и҆мꙋ́ща, воспла́касѧ го́рькѡ, и҆ пристꙋпи́въ, ѡ҆блобыза́ тѧ, глаго́лѧ: на кого̀ ѡ҆ставлѧ́еши на́съ, ѻ҆́тче: И҆ мы̀ грѣ́шнїи про́симъ тѧ̀ не ѡ҆ста́вити на́съ твои́ми бл҃гопрїѧ́тными ко гдⷭ҇ꙋ мл҃твами, да и҆з̾ глꙋбины̀ дꙋшѝ зове́мъ тѝ:
Ра́дꙋйсѧ, ѿ младе́нчества всего̀ себѐ гдⷭ҇еви преда́вый: ра́дꙋйсѧ, любо́вь къ бг҃ꙋ въ сокро́вище се́рдца своегѡ̀ прїе́мый.
Ра́дꙋйсѧ, бл҃гослове́нїемъ ра́йскимъ ѡ҆бл҃гоꙋха́нный: ра́дꙋйсѧ, свѣ́томъ мл҃твы просвѣще́нный.
Ра́дꙋйсѧ, во хрⷭ҇та̀ ѡ҆блече́нный: ра́дꙋйсѧ, ри́зою нетлѣ́нїѧ ᲂу҆кра́шенный.
Ра́дꙋйсѧ, бли́жнихъ ꙗ҆́коже себѐ возлюби́вый: ра́дꙋйсѧ, кра̑снаѧ мі́ра сегѡ̀ нивочто́же вмѣни́вый.
Ра́дꙋйсѧ, сѷмеѡ́не, ди́вный сто́лпниче и҆ вели́кїй чꙋдотво́рче.
Конда́къ в҃і
Бл҃года́ти да́ръ и҆спросѝ на́мъ ᲂу҆ гдⷭ҇а, тебѐ, ѻ҆́тче, вѣ́рнѡ хва́лѧщымъ: вонмѝ воздыха́нїємъ на́шымъ, и҆ сле́зъ на́шихъ не пре́зри, и҆ не ѡ҆ста́ви на́съ, ꙗ҆́коже ѡ҆бѣща́лсѧ є҆сѝ не ѡ҆ставлѧ́ти столпа̀ твоегѡ̀, ни горы̀, тобо́ю и҆збра́нныѧ, во бл҃годѣѧ́нїе прибѣга́ющымъ къ тебѣ̀ человѣ́кѡмъ, да под̾ кро́вомъ твои́мъ сохранѧ́еми, гдⷭ҇еви пое́мъ: А҆ллилꙋ́їа.
І҆́косъ в҃і
Пою́ще тебѣ̀, бг҃обл҃же́нне ѻ҆́тче, прославлѧ́емъ па́мѧть ст҃ꙋ́ю твою̀, и҆ ꙗ҆́коже на погребе́нїе твоѐ стеко́шасѧ ко гро́бꙋ твоемꙋ̀ ст҃и́тєли, и҆ і҆ерє́и, и҆ мїрсті́и со слеза́ми и҆ мл҃твами мно́гими, свѣщы̀ и҆ ѳѷмїа́мъ носѧ́ще, та́кѡ и҆ мы̀, соше́дшесѧ въ де́нь па́мѧти твоеѧ̀, ᲂу҆се́рднѡ ѿ любвѐ серде́чныѧ хвалы̑ и҆ молє́нїѧ прино́симъ тѝ:
Ра́дꙋйсѧ, ѿ ю҆́ности мі́рꙋ ᲂу҆ме́рый: ра́дꙋйсѧ, нико́егѡ и҆́га кромѣ̀ і҆и҃сова понесы́й.
Ра́дꙋйсѧ, ѿ бре́ннагѡ тѣлесѐ къ лꙋ́чшемꙋ житїю̀ ра́достнѡ и҆зше́дый: ра́дꙋйсѧ, лицезрѣ́нїемъ бжⷭ҇твеннагѡ свѣ́та наслажда́ѧйсѧ.
Ра́дꙋйсѧ, ꙗ҆́кѡ непреста́ннѡ предстои́ши прест҃ѣ́й трⷪ҇цѣ: ра́дꙋйсѧ, ꙗ҆́кѡ непреста́ннѡ мл҃твы ѡ҆ на́съ возсыла́еши.
Ра́дꙋйсѧ, ро́да хрⷭ҇тїа́нскагѡ помо́щниче: ра́дꙋйсѧ, во бл҃га̑ѧ на́мъ поспѣ́шниче.
Ра́дꙋйсѧ, сѷмеѡ́не, ди́вный сто́лпниче и҆ вели́кїй чꙋдотво́рче.
Конда́къ г҃і
ѽ вели́кїй и҆ преди́вный ᲂу҆го́дниче бж҃їй, прпⷣбне ѻ҆́тче на́шъ сѷмеѡ́не! Ны́нѣ прⷭ҇то́лꙋ бж҃їю предстоѧ́й и҆ прошє́нїѧ на̑ша гдⷭ҇ꙋ приносѧ́й, и҆ сїѧ̑ ма̑лаѧ молє́нїѧ ѿ на́съ грѣ́шныхъ прїимѝ, и҆ ꙗ҆́коже не ѿри́нꙋлъ є҆сѝ разбо́йника, прибѣ́гшаго къ твоемꙋ̀ столпꙋ̀ и҆ покаѧ́нїе ве́лїе прине́сша, но и҆ ѿ земны́хъ бѣ́дъ и҆зба́вилъ є҆сѝ того̀, и҆ во́ждь бы́лъ є҆сѝ є҆мꙋ̀ въ црⷭ҇тво нбⷭ҇ное, та́кѡ и҆ на́съ грѣ́шныхъ не ѡ҆ста́ви твои́мъ застꙋпле́нїемъ, но и҆ во вре́меннѣй жи́зни се́й помога́й на́мъ, и҆ въ бꙋ́дꙋщемъ вѣ́цѣ црⷭ҇твїѧ бж҃їѧ мл҃твами твои́ми полꙋчи́ти сподо́би, да кꙋ́пнѡ съ тобо́ю бг҃ꙋ сп҃си́телю на́шемꙋ воззове́мъ: А҆ллилꙋ́їа.
Повто́ръ
Сей конда́къ глаго́лется три́жды, та́же і҆́косъ а҃-й и҆ конда́къ а҃-й.
І҆́косъ а҃
А҆́гг҃лъ храни́тель да́нъ бы́сть тебѣ̀ ѿ бг҃а, є҆гда̀ пло́дъ мл҃твы ᲂу҆се́рдныѧ дарова́нъ бы́лъ є҆сѝ роди́телємъ твои̑мъ. То́й бѣ̀ тѧ̀ сохранѧ́ѧ, па́че же въ мꙋ́дрости дꙋхо́внѣй поꙋча́ѧ, є҆гда̀ снѣгосвѣ́тлою ѻ҆де́ждею ѡ҆дѣ́ѧлсѧ є҆сѝ при кр҃ще́нїи твое́мъ. Мы́ же вѣ́дꙋще тѧ̀ чꙋ́днаго и҆збра́нника бж҃їѧ бы́ти, сїѧ̑ похвалы̑ тебѣ̀ ꙗ҆́кѡ дѡ́лжныѧ дерза́емъ принестѝ:
Ра́дꙋйсѧ, роди́телей твои́хъ пло́дъ мл҃твы бг҃одарова́нный: ра́дꙋйсѧ, дарѡ́въ ст҃а́гѡ дх҃а во ст҃ѣ́мъ крщ҃е́нїи сподо́бивыйсѧ.
Ра́дꙋйсѧ, бж҃їѧ бл҃года́ти сосꙋ́де и҆збра́нный: ра́дꙋйсѧ, любвѐ бж҃їѧ къ человѣ́кѡмъ ꙗ҆вле́нїе.
Ра́дꙋйсѧ, земнѣ́й мꙋ́дрости не наꙋче́нный: ра́дꙋйсѧ, нбⷭ҇ною сꙋгꙋ́бѡ ѡ҆богаще́нный.
Ра́дꙋйсѧ, тѣ́ломъ и҆ кро́вїю хрⷭ҇то́выми та́инственнѡ воспита́нный: ра́дꙋйсѧ, те́плою мл҃твою и҆здѣ́тска возраще́нный.
Ра́дꙋйсѧ, сѷмеѡ́не, ди́вный сто́лпниче и҆ вели́кїй чꙋдотво́рче.
Конда́къ а҃
И҆збра́нномꙋ ѿ младе́нчества свѣти́льникꙋ мі́ра и҆ цѣли́телю недꙋ́гѡвъ дꙋше́вныхъ и҆ тѣле́сныхъ, прпⷣбномꙋ ѻ҆тцꙋ̀ на́шемꙋ сѷмеѡ́нꙋ смире́ннѡ притека́юще, ꙗ҆́кѡ могꙋ́щемꙋ на́съ свободи́ти ѿ страсте́й и҆ всѧ́кихъ бѣ́дъ, и҆з̾ глꙋбины̀ дꙋшѝ прино́симъ хвале́нїе и҆ мл҃твꙋ, ᲂу҆се́рднѡ зовꙋ́ще:
Ра́дꙋйсѧ, сѷмеѡ́не, ди́вный сто́лпниче и҆ вели́кїй чꙋдотво́рче.
Моли́твы
Ѽ ст҃ы́й сѷмеѡ́не, ᲂу҆стремле́нный къ нб҃сѝ въ жи́зни твое́й, и҆ по кончи́нѣ твое́й на нб҃сѝ пребыва́ѧй! Ты̀ ѡ҆снова́нїе сто́лпничества бы́сть и҆ ѻ҆́бразъ высо́кагѡ и҆ неизрече́ннагѡ бл҃гоче́стїѧ ꙗ҆ви́сѧ. Води́мь дх҃омъ ст҃ы́мъ, ты̀ пе́рвый созда̀ сто́лпъ и҆ взы́де на него̀, да денноно́щнѡ мо́лишисѧ бг҃ꙋ.
Ѻ҆́смьдесѧтъ лѣ́тъ стоѧ́ше ты̀ на не́мъ, до́ждь и҆ вѣ́тръ, стꙋ́дь и҆ зно́й претерпѣва́ѧ, мл҃твєннаѧ воздыха̑нїѧ ѡ҆ ѡ҆чище́нїи дꙋшѝ своеѧ̀ ѿ грѣхѡ́въ и҆ страсте́й возносѧ̀, наипа́че же молѧ́сѧ бг҃ꙋ ѡ҆ всѣ́хъ нꙋ́ждныхъ и҆ немощны́хъ, во грѣсѣ́хъ къ тебѣ̀ приходѧ́щихъ. Тѣ́мже наградѝ тѧ̀ бг҃ъ во црⷭ҇твїи свое́мъ ра́достїю, не сказа́нною человѣ́ческими словесы̀, и҆ дарова̀ тѝ бл҃года́ть чꙋдеса̀ твори́ти и҆ по сме́рти, и҆ помога́ти всѣ̑мъ, те́плѣ тѝ молѧ́щымсѧ.
Сѐ и҆ мы̀, грѣ́шнїи и҆ недосто́йнїи, стои́мъ ᲂу҆ подно́жїѧ столпа̀ добродѣ́телей твои́хъ, и҆́миже вознесе́нъ бы́сть на нб҃са̀, и҆ смире́ннѡ мо́лимъ тѧ̀ помѧнꙋ́ти и҆ на́съ въ мл҃твахъ твои́хъ ко гдⷭ҇ꙋ. Поели́кꙋ же не вѣ́мы, ѡ҆ че́мъ до́лжно є҆́сть моли́тисѧ, а҆ є҆́же вѣ́мы, не твори́мъ: предае́мъ себѐ въ рꙋ́цѣ твоѝ, да сохрани́ши ны̀, ꙗ҆́кѡ дѣ́ти ма̑лыѧ, бл҃года́тїю хрⷭ҇то́вою, да ѡ҆живꙋ́тъ дꙋ́шы на́шѧ длѧ вѣ́чнагѡ бл҃же́нства. И҆́бо а҆́ще и҆ жела́емъ сп҃са́тисѧ, во́лѧ на́ша слаба̀ є҆́сть: ꙗ҆́кѡ соло́ма бо ско́рѡ пламенѣ́емъ, но ско́рѡ и҆ ᲂу҆гаса́емъ, и҆ па́ки дꙋша́ми на́шими мра́къ ѡ҆владѣва́етъ. Помозѝ на́мъ, ст҃че бж҃їй, бы́ти твє́рды въ вѣ́рѣ и҆ дѣ́ланїи за́повѣдей хрⷭ҇то́выхъ, и҆ въ покаѧ́нїи и҆ смире́нїи кончи́ны на́шегѡ земна́гѡ житїѧ̀ доитѝ.
Ты̀, прпⷣбне, є҆стество̀ человѣ́ческое побѣди́лъ є҆сѝ и҆ а҆́гг҃лѡмъ ᲂу҆подо́билсѧ є҆сѝ, бг҃ꙋ непреста́ннѡ взыва́ѧ, да прости́тъ тѝ грѣхѝ. На́мъ же, въ пꙋчи́нѣ грѣха̀ пребыва́ющымъ, и҆ мнѡ́гаѧ лѣ̑та не довлѣ́ютъ ѡ҆пла́кати беззакѡ́нїѧ своѧ̑. Но безмѣ́рное чл҃вѣколю́бїе бж҃їе вѣ́дꙋще, припа́даемъ тѝ, вѣ́рномꙋ рабꙋ̀ є҆гѡ̀, да поми́лꙋетъ на́съ твои́мъ застꙋпле́нїемъ и҆ прїи́метъ на́съ ꙗ҆́кѡ дѣ́ти своѧ̑, не ра́ди до́брыхъ дѣ́лъ на́шихъ, но ра́ди покаѧ́нїѧ, и҆ ꙗ҆́кѡ всемогі́й чл҃вѣколю́бецъ, введе́тъ на́съ во црⷭ҇твїе своѐ, да непреста́ннѡ сла́вимъ всест҃о́е и҆́мѧ ѻ҆ц҃а̀, и҆ сн҃а, и҆ ст҃а́гѡ дх҃а, во вѣ́ки вѣкѡ́въ. А҆ми́нь.