Кондак 1
Взбра́нной Воево́де, Пренепоро́чней Де́ве Богоро́дице, земли́ Калу́жския изба́вительнице, хвале́бныя пе́сни прино́сим Ти́, раби́ Твои́, я́ко ико́ны Твоея́ явле́нием дарова́вшей на́м стра́жа неусы́пна. Ты́ же моле́ния на́шего, пред ико́ною Твое́ю возноси́маго, не отве́ржи, но защити́ ны, Влады́чице, от все́х враго́в ви́димых и неви́димых и изба́ви ны́ от вся́ких боле́зней душе́вных и теле́сных, да во умиле́нии се́рдца зове́м Ти́:
Ра́дуйся, Влады́чице, ми́лость Свою́ и заступле́ние на́м явля́ющая.
Икос 1
А́нгелов мно́жество сла́вят Тя́, Цари́цу все́х и Богоро́дицу, Ты́ бо испо́лнила еси́ ра́дости сердца́ на́ша явле́нием на́м чудотво́рныя ико́ны Твоея́ в Тинько́ве и чудесы́ во хра́ме и́мене Рождества́ Твоего́ в ве́си Калу́жке; се́й у́бо ико́не Твое́й покланя́ющеся, Тебе́, богоизбра́нная Де́во, моле́ние возно́сим, со стра́хом и любо́вию глаго́люще:
Ра́дуйся, от патриа́рхов прообразова́нная и от проро́ков предвозвеще́нная; ра́дуйся, ро́ждшая А́гнца, взе́мшаго грехи́ ми́ра.
Ра́дуйся, Ада́ма и Е́ву от дре́вняго прокля́тия свободи́вшая; ра́дуйся, чудотво́рною ико́ною Твое́ю всю́ зе́млю Калу́жскую озаря́ющая.
Ра́дуйся, ико́ну Твою́ во зна́мение ми́лости на́м да́вшая; ра́дуйся, я́ко на ико́ну Твою́ взира́юще, Само́й Тебе́, и́стинней Богоро́дице, покланя́емся.
Ра́дуйся, Влады́чице, ми́лость Свою́ и заступле́ние на́м явля́ющая.
Кондак 2
Ви́дящи начерта́ние ли́ка Твоего́, деви́ца Евдоки́я в развраще́нии се́рдца своего́ дерзнове́нно оплева́нием поруга́ся ему́, не ве́дущи, я́ко се́й Тво́й ли́к е́сть, Пресвята́я Де́во; Ты́ же вразумле́ния ра́ди вдала́ еси́ ю́ в разслабле́ние всего́ телесе́, смягче́ние руку́ и ногу́, ослепле́ние о́чию и язы́ка немотствова́ние, и си́м показа́ла еси́, я́ко начерта́ние ли́ка сего́ е́сть ико́на Твоя́ чудотво́рная, да вси́ лю́дие вопию́т к ро́ждшемуся от Тебе́ Бо́гу Сло́ву: Аллилу́иа.
Икос 2
Ра́зум челове́ческий не мо́жет пости́гнути вели́каго Твоего́ милосе́рдия, Пресвята́я Богоро́дице, я́ко и́скреннее покая́ние боля́щия деви́цы прия́ла еси́ и соверше́нное исцеле́ние е́й дарова́ла еси́, да моли́тву прино́сит пред ико́ною Твое́ю, взыва́ющи си́це:
Ра́дуйся, ле́ствице небе́сная, Иа́ковом предви́денная; ра́дуйся, та́йну воплоще́ния Бо́жия, пре́жде ве́к в Бо́зе сокрове́нную, откры́вшая.
Ра́дуйся, веду́щим бра́нь проти́ву ми́ра и диа́вола до́брая споспе́шнице; ра́дуйся, от грехопаде́ний на́ших, и́мже не́сть числа́, избавля́ющая.
Ра́дуйся, я́ко призыва́ющия и́мя Твое́ от паде́ния стра́стнаго возставля́ющая; ра́дуйся, благода́тное безстра́стие и́щущим сие́ усе́рдно подаю́щая.
Ра́дуйся, Влады́чице, ми́лость Свою́ и заступле́ние на́м явля́ющая.
Кондак 3
Си́лою, да́нною Ти́ свы́ше, чудотво́рную Твою́ ико́ну, Пречи́стая Богоро́дице, дарова́ла еси́ на́м в зна́мение ми́лости Твоея́, я́вльшися роди́телем тоя́ деви́цы, и рекла́ еси́ и́м: Бу́ду хода́тайствовати о гра́де Калу́ге и о все́х лю́дех его́. Мы́ же, взира́юще на ико́ну Твою́ и мно́жество чуде́с от нея́ ве́дуще, с ра́достию к не́й припа́даем и из глубины́ се́рдца благодари́м Тя́, ди́вную Засту́пницу, взыва́юще Бо́гу: Аллилу́иа.
Икос 3
Иму́щи при́сное милосе́рдое попече́ние о е́же лю́дем согре́шшим не до конца́ поги́бнути, роди́телем тоя́ деви́цы повеле́ла еси́, Пресвята́я Богоро́дице, да сверше́но бу́дет моле́бствие пред Твое́ю ико́ною со освяще́нием воды́ и да окропи́т иере́й дще́рь и́х, боле́знию пораже́нную, я́ко да исцеле́ет от неду́га своего́. На́с же спаси́, Госпоже́, ве́рою и любо́вию воспева́ющих Ти́:
Ра́дуйся, две́ре, Иезеки́илем прорече́нная; ра́дуйся, вочелове́чению Еди́наго от Святы́я Тро́ицы непоро́чно послужи́вшая.
Ра́дуйся, рожде́нием Сы́на Твоего́ спасе́ние ми́ру я́вльшая; ра́дуйся, с ве́рою и́мя Твое́ призыва́ющих от сме́рти спаса́ющая.
Ра́дуйся, святи́телей весе́лие и благогове́йных иере́ев похвало́; ра́дуйся, и́ноков и и́нокинь благочести́вых изря́дная Покрови́тельнице.
Ра́дуйся, Влады́чице, ми́лость Свою́ и заступле́ние на́м явля́ющая.
Кондак 4
Бу́рю напа́стей прови́дя, угрожа́вших кра́ю Калу́жскому от Наполео́на, святи́тель Евла́мпий моля́шеся пред Твое́ю ико́ною, Богоро́дице, о избавле́нии от враго́в; ве́сть же прие́мь, я́ко во́инство вра́жие пораже́но бы́сть на реце́ Черну́шце, благода́рственно Спа́су Христу́ возопи́: Аллилу́иа.
Икос 4
Слы́шавше ми́лость Твою́, Богоро́дице, чрез Твою́ ико́ну на по́ли бра́ни бли́з ве́си Тару́тино на́м низпо́сланную, егда́ яви́ла еси́ ю́ на возду́се иноплеме́нником, я́коже свиде́тельствоваша плене́ннии от ни́х; и та́ко дарова́ла еси́ побе́ду во́ем росси́йским, ра́дуемся о Твое́й, Влады́чице, по́мощи и со упова́нием воспева́ем Ти́ си́це:
Ра́дуйся, купино́ неопали́мая, богови́дцем Моисе́ем предзри́мая; ра́дуйся, от пото́па грехо́внаго на́с спаса́ющая.
Ра́дуйся, кади́льнице злата́я, я́ко фимиа́м благоуха́нный моли́твы Твоя́ к Бо́гу, Сы́ну Твоему́, при́сно вознося́щая; ра́дуйся, пра́ведно дви́жимый гне́в Бо́жий на ны́ моле́нием Свои́м ско́ро утоля́ющая.
Ра́дуйся, явле́нием на возду́се ико́ны Твоея́ стра́х и тре́пет на враги́ наве́дшая; ра́дуйся, во́инству росси́йскому побе́ду во бра́ни пода́вшая.
Ра́дуйся, Влады́чице, ми́лость Свою́ и заступле́ние на́м явля́ющая.
Кондак 5
Боготе́чная звезда́ яви́лася еси́ на́м, Богоро́дице, смы́слы на́ша озаря́ющая и на пу́ть спаси́тельный наставля́ющая, враго́м же на́шим была́ еси́, я́ко мо́лния, устраша́ющи и́х и отража́ющи от на́с, егда́ Наполео́н, порази́в бли́з гра́да Малояросла́вца ра́ть на́шу, пону́ди ю́ отыти́ ко гра́ду Калу́ге, са́м же, услы́шав сие́, по Твоему́ ми́лостивому, Засту́пнице, повеле́нию, неве́домыя ра́ди вины́, вме́сто е́же ко гра́ду Калу́ге ити́, и́де по пути́, его́же са́м разори́ и опустоши́, ко гра́ду Гжа́тску, и та́ко ра́ть свою́ погуби́. Сего́ ра́ди, Твое́ кре́пкое заступле́ние ве́дуще, со умиле́нием глаго́лем Бо́гу: Аллилу́иа.
Икос 5
Проя́вльши ве́лию любо́вь к лю́дем, живу́щим во стране́ Калу́жстей, Пресвята́я Богоро́дице, зе́млю на́шу сохрани́ла еси́ и мно́жество враго́в, обыше́дших ю́, дале́че от нея́ отгна́ла еси́, си́и же врази́ на́ши уве́деша, ко́ль крепка́ е́сть по́мощь Бо́жия Ма́тере. Мы́ же, Твое́ всемо́щное заступле́ние, на́м бы́вшее, до́бре ве́дуще, в ра́дости се́рдца воспева́ем Ти́ си́це:
Ра́дуйся, клеще́ та́инственная, Иса́ием прови́денная; ра́дуйся, примире́ние на́ше с Бо́гом соде́лавшая.
Ра́дуйся, Спаси́теля па́дшему челове́честву ро́ждшая; ра́дуйся, в годи́ну бра́ни по́мощию Твое́ю упова́ющих на Тя́ не оставля́ющая.
Ра́дуйся, всемо́щным заступле́нием Твои́м от меча́ иноплеме́нных на́с избавля́ющая; ра́дуйся, без проли́тия кро́ве одоле́ние правосла́вным во́ем дарова́вшая.
Ра́дуйся, Влады́чице, ми́лость Свою́ и заступле́ние на́м явля́ющая.
Кондак 6
Пропове́дница богознамени́таго чудесе́ яви́ся не́кая жена́ во гра́де Бо́ровске, ю́же вра́чеве ника́коже возмого́ша исцели́ти, и реко́ша, я́ко належи́т е́й не по мно́зе вре́мени умре́ти. Она́ же, ве́ру иму́щи, я́ко си́ла Бо́жия всемогу́щая е́сть, не закосне́ проси́ти, да в ве́си Калу́жке пред Твое́ю, Богоро́дице, ико́ною сверше́но бу́дет о здра́вии ея́ моле́бствие, и по ве́ре свое́й а́бие от неду́га своего́ исцеле́на бы́сть. Те́мже и мы́, благода́рственно прославля́юще Бо́га, вопие́м Ему́: Аллилу́иа.
Икос 6
Возсия́ла е́сть ико́на Твоя́, Богоро́дице, чуде́снаго исцеле́ния ра́ди жены́, живу́щия во гра́де Бо́ровске, да́же и посреде́ жи́телей его́, в раско́ле пребыва́ющих и не чту́щих о́браз Тво́й. Сего́ ра́ди и синкли́т гра́дский, в не́мже по преизбы́точеству бя́ху лю́дие, в раско́ле упо́рствующии, уста́ви, да бу́дет сверше́но на сто́гнах гра́да моле́бное пе́ние пред ико́ною Твое́ю, во гра́д се́й принесе́нною. Те́мже, я́ко блага́я Влады́чица, научи́ ны разуме́ти промышле́ние Бо́жие о спасе́нии люде́й, да взыва́ем Ти́ ра́достно:
Ра́дуйся, в защи́ту Це́ркве Правосла́вныя чудеса́ показу́ющая; ра́дуйся, хули́тели и́стинныя ве́ры неви́димо наказу́ющая.
Ра́дуйся, догма́тов ве́ры огражде́ние и утвержде́ние; ра́дуйся, я́ко боже́ственную ве́ру просла́вила еси́.
Ра́дуйся, раско́льники на пу́ть благи́й обраща́ющая; ра́дуйся, пре́лесть же раско́ла посрамля́ющая.
Ра́дуйся, Влады́чице, ми́лость Свою́ и заступле́ние на́м явля́ющая.
Кондак 7
Хотя́щи возгре́ти в сердца́х люде́й земли́ Калу́жския любо́вь к ико́не Твое́й, Засту́пнице на́ша, то́ки чуде́с излива́еши от нея́: моли́твою бо, к Тебе́ возноси́мою, глухо́му внеза́пу слу́х дарова́ся, осле́пшему зре́ние откры́ся, разсла́бленному кре́пость во удесе́х его́ возврати́ся, здра́вие душе́ю стра́ждущей и бе́сом одержи́мей даде́ся, лю́те боля́щей и врачми́ оста́вленней житие́ во здра́вии на мно́гая ле́та продолжи́ся; те́мже и мы́, с любо́вию ко ико́не Твое́й припа́дающе и прославля́юще Бо́га, вопие́м Ему́: Аллилу́иа.
Икос 7
Необори́мая еси́ огра́да, охраня́ющая ны́ от вся́ких боле́зней душе́вных и теле́сных, Пресвята́я Богоро́дице, и заступа́ющая все́х, к Тебе́ прибега́ющих с моли́твою. Те́мже и мы́, припа́дающе ко ико́не Твое́й, мо́лим Тя́, Влады́чице: от вся́ких боле́зней душе́вных и теле́сных изба́ви ны́, вопию́щия Ти́ из глубины́ се́рдца:
Ра́дуйся, со́лнце селе́ния Христо́ва, псалмопе́вцем предъявле́нное; ра́дуйся, ро́ждшая Изба́вителя, беззако́ния на́ша ту́не очища́ющаго.
Ра́дуйся, ста́мно пресвята́я, в не́йже а́лчущим пра́вды соблюда́ется Хле́б жи́зни ве́чныя; ра́дуйся, я́ко приходя́щих с ве́рою к чудотво́рней Твое́й ико́не от боле́зней душе́вных и теле́сных ми́лостивно врачу́еши.
Ра́дуйся, боле́знующих, оста́вленных врачми́, от сме́рти избавля́ющая; ра́дуйся, я́ко моли́твами Твои́ми престаю́т тлетво́рнии ве́три и смертоно́сныя я́звы.
Ра́дуйся, Влады́чице, ми́лость Свою́ и заступле́ние на́м явля́ющая.
Кондак 8
Вели́кое и уму́ челове́ческому неудобопости́жное чу́до яви́ла еси́, Влады́чице ми́ра, егда́ внеза́пу исцели́ла и укрепи́ла еси́ в тре́звенном житии́ не́кую жену́, в о́бласти гра́да Жи́здры жи́вшую, я́же пия́нству предана́ бе́; со́вестию свое́ю терза́шеся, я́ко стра́стию поро́ка порабоще́на бы́сть, и сея́ ра́ди вины́ обрати́ся с ве́рою к Тебе́, Влады́чице, моля́щися пред Твое́ю ико́ною и от Тебе́ исцеле́ние жела́ющи получи́ти. Сего́ ра́ди и мы́, на ми́лость Твою́ упова́юще, восхваля́ем Твое́ милосе́рдие, взыва́юще Бо́гу: Аллилу́иа.
Икос 8
Ви́дят и слы́шат жи́тели Калу́жския земли́ но́вую купе́ль Силоа́мскую, па́че о́ныя дре́вния я́вльшуюся, Пресвята́я Богоро́дице, в хра́ме Рождества́ Твоего́ в ве́си Калу́жке, в не́мже покланя́ются чудотво́рней ико́не Твое́й; не еди́ножды бо в ле́то и не то́чию пе́рвее входя́й здра́вие прие́млет, но вы́ну вся́к неду́г врачу́еши все́х с ве́рою к Тебе́ прибега́ющих. Сего́ ра́ди вопие́м Ти́:
Ра́дуйся, Ея́же ра́ди а́д стене́т и ду́си зло́бы трепе́щут; ра́дуйся, Ея́же ра́ди врата́ рая́ все́м на́м отверза́ются.
Ра́дуйся, по́мощь Твою́ святу́ю благовре́менно подаю́щая вся́цей души́, ве́рно Тебе́ моля́щейся; ра́дуйся, от стра́сти пия́нства обрати́вшихся к Тебе́ с моли́твою избавля́ющая.
Ра́дуйся, от ро́ва поги́бельнаго безнаде́жных извлача́ющая; ра́дуйся, притека́ющих к покро́ву Твоему́ сла́дкое успокое́ние.
Ра́дуйся, Влады́чице, ми́лость Свою́ и заступле́ние на́м явля́ющая.
Кондак 9
Вси́ горды́нею одержи́мии стра́х Бо́жий ско́ро забыва́ют. Си́це две́ жены́, в стране́ Калу́жстей живу́щия, горды́нею преиспо́лненныя, я́сно явля́ху сомне́ние свое́, я́ко ико́на Твоя́ цельбоно́сна е́сть, Влады́чице, и си́м толи́ко прогне́ваша Бо́га, я́ко пра́ведным судо́м Его́ тя́жкими неду́ги наказа́ние прия́ша. Мы́ же, таково́е вразумле́ние ви́дяще, с любо́вию покланя́емся Твоему́ о́бразу, взыва́юще Бо́гу: Аллилу́иа.
Икос 9
Вети́и ве́ка сего́ отрица́ют поклоне́ние ико́не Твое́й, Пречи́стая Де́во, не разуме́ют бо в свое́м суему́дрии, я́ко че́сть, ико́не воздава́емая, на первообра́зное восхо́дит. Мы́ же, не то́кмо сие́ ве́дуще, но и благодея́ния, ико́ною Твое́ю на́м явля́емая, душе́ю ра́дующеся, Тебе́, Богоро́дице, глаго́лем:
Ра́дуйся, ста́мно всезлата́я, в не́йже пло́ть и кро́вь Боже́ственнаго А́гнца угото́вашася; ра́дуйся, трапе́зо свята́я, Хле́бом жи́зни на́с пита́ющая.
Ра́дуйся, су́етную му́дрость нечести́вых вети́й посрамля́ющая и ослепле́нных е́ю на пу́ть пра́вый наставля́ющая; ра́дуйся, я́ко по благосты́ни Свое́й угаша́еши в на́с о́гнь нече́стия пла́менем огня́ Боже́ственнаго.
Ра́дуйся, вразумля́ющая зна́меньми и чудесы́ коле́блемых в ве́ре; ра́дуйся, Богоблагода́тная, стра́х Бо́жий и смире́ние в сердца́ на́ша вселя́ющая.
Ра́дуйся, Влады́чице, ми́лость Свою́ и заступле́ние на́м явля́ющая.
Кондак 10
Спасти́ хотя́щи лю́ди, покланя́ющияся Твое́й ико́не, от бе́д, благоволи́ла еси́, Богоро́дице, яви́тися не́коей деви́це, в Лу́жецком, бли́з гра́да Можа́йска, монастыри́ жи́тельствовавшей, и предвари́ти, да не и́мать обще́ния с жено́ю развраще́нною, и те́м сохрани́ла еси́ деви́цу о́ную от гряду́щия беды́. Те́мже и мы́ прославля́ем Го́спода Бо́га, да́вшаго благода́ть такову́ю ико́не Твое́й, и вопие́м Ему́: Аллилу́иа.
Икос 10
Стена́ еси́ кре́пкая, огражда́ющая ро́д челове́ческий от бе́д, Пресвята́я Богоро́дице, ско́рую по́мощь явля́ющая от Твоея́ ико́ны все́м чту́щим ю́ во гра́дех, ве́сех и оби́телех. Сего́ ра́ди и мы́, осеня́емии Твои́м, Богома́ти, заступле́нием, на Тво́й взира́юще пречи́стый о́браз, мо́лим Тя́, да изба́виши ны́ от вся́ких клеве́т, бе́д и скорбе́й, вопию́щих Ти́:
Ра́дуйся, я́вльшая ми́ру обетова́ннаго Сокруши́теля главы́ зми́евы; ра́дуйся, ра́дость ве́чную, Спаси́теля ми́ру, ро́ждшая.
Ра́дуйся, рожде́нием Сы́на Бо́жия две́ри Ца́рствия Христо́ва на́м отве́рзшая; ра́дуйся, ка́знь Бо́жию за беззако́ния на́ша от гла́в на́ших отводя́щая.
Ра́дуйся, лю́бящих и чту́щих Тя́ от вся́ких бе́д и скорбе́й избавля́ющая; ра́дуйся, ра́досте всего́ ми́ра, Е́юже сле́зы скорбя́щих отъе́млются.
Ра́дуйся, Влады́чице, ми́лость Свою́ и заступле́ние на́м явля́ющая.
Кондак 11
Пе́ние непреста́нно приноша́ше Ти́, Пресвята́я Богоро́дице, не́кий жи́тель Жи́здринския ве́си, с ве́рою пред Твое́ю ико́ною моля́ся, да ему́ дще́рь да́руеши. Ты́ же, Богоро́дице, благоволи́ла еси́ вня́ти мольба́м его́ и испо́лнити проше́ние его́. Мы́ же, зря́ще на Твою́ ико́ну и ви́дяще то́ки чуде́с, от нея́ излива́емыя, блага́я Богороди́тельнице, из глубины́ се́рдца благодари́м Тя́, Цари́цу на́шу ди́вную, воспева́юще Бо́гу: Аллилу́иа.
Икос 11
Све́тлыми луча́ми чуде́с ико́на Твоя́ сия́ет, Богома́ти Пречи́стая, и прогоня́ет си́лою Бо́жиею вся́кое вра́жие де́йство; те́мже и мы́, гре́шнии, иму́ще таково́е зна́мение Твоего́ к на́м благоволе́ния, ра́дуемся, глаго́люще: О, Пресвята́я Богоро́дице! Умоли́ Го́спода, да спасе́т ны́ и́миже ве́сть судьба́ми, да не поги́бнем в нераска́янии о на́ших грехопаде́ниих, и услы́ши похвалы́ сия́, Тебе́ возноси́мыя:
Ра́дуйся, Творца́ небесе́ и земли́ безсе́менно воплоти́вшая; ра́дуйся, осене́нием святы́я ико́ны Твоея́ вся́кое вра́жие де́йство от на́с отгоня́ющая.
Ра́дуйся, проше́ния на́ша на по́льзу исполня́ющая; ра́дуйся, неоскудева́емый исто́чниче благослове́ний и ми́лостей Бо́жиих к лю́дем Твои́м.
Ра́дуйся, благочести́вых супру́жеств незри́мое огражде́ние; ра́дуйся, моли́тв ра́ди усе́рдных пло́д безча́дным низпосыла́ющая.
Ра́дуйся, Влады́чице, ми́лость Свою́ и заступле́ние на́м явля́ющая.
Кондак 12
Благода́ть умиле́ния моли́твеннаго от Твоея́, Влады́чице, ико́ны источа́емая, да испо́лнит ду́ши на́ша, а́ще и гре́х ра́ди в безчу́вствие впа́даем. Пробуди́ на́ше душе́вное усыпле́ние, да не поги́бнем лю́те без покая́ния, и приими́ на́с в ве́чныя кро́вы, Богороди́тельнице, да, ра́дующеся, пое́м Бо́гу, Тобо́ю на́с спаса́ющему: Аллилу́иа.
Икос 12
Пою́ще чудеса́, явля́емая от Твоея́ ико́ны, Ма́ти Христа́ Бо́га на́шего, и припа́дающе к не́й, мо́лим Тя́, Влады́чице: бу́ди на́м защище́ние в де́нь кончи́ны на́шея, егда́ и́мамы предста́ти на су́д пред стра́шным Престо́лом сла́вы Сы́на Твоего́, Го́спода на́шего, да вопие́м Ти́:
Ра́дуйся, от вла́сти лю́таго мироде́ржца упова́ющих на Тя́ избавля́ющая; ра́дуйся, гне́в Бо́жий от ро́да правосла́внаго отводя́щая.
Ра́дуйся, благу́ю христиа́нскую кончи́ну ублажа́ющим Тя́ подаю́щая; ра́дуйся, сла́вящия Тя́ на возду́шных мыта́рствах заступа́ющая.
Ра́дуйся, кре́пкая наде́ждо ве́чнаго спасе́ния; ра́дуйся, две́ри ра́йския отверза́ющая при́сно Тя́ блажа́щим.
Ра́дуйся, Влады́чице, ми́лость Свою́ и заступле́ние на́м явля́ющая.
Кондак 13
О, всепе́тая Ма́ти Христа́ Бо́га на́шего! Приими́ ми́лостивно сие́ моле́ние на́ше, е́же прино́сим пред Твое́ю ико́ною, и в ча́с сме́ртный яви́ся на́м Сама́, Пречи́стая, простира́ющи ру́ку по́мощи, отгоня́ющи ду́хи зло́бы, и́щущия поглоти́ти ду́ши на́ша при разлуче́нии от телесе́, и умоли́ приснопокланя́емую Тро́ицу изба́вити ны́ муче́ния ве́чнаго, да предста́тельством Твои́м насле́дуем Ца́рствие Небе́сное и сподо́бимся со святы́ми пе́ти Бо́гу: Аллилу́иа.
Повтор
Этот кондак читается трижды, затем икос 1-й и кондак 1-й.
Икос 1
А́нгелов мно́жество сла́вят Тя́, Цари́цу все́х и Богоро́дицу, Ты́ бо испо́лнила еси́ ра́дости сердца́ на́ша явле́нием на́м чудотво́рныя ико́ны Твоея́ в Тинько́ве и чудесы́ во хра́ме и́мене Рождества́ Твоего́ в ве́си Калу́жке; се́й у́бо ико́не Твое́й покланя́ющеся, Тебе́, богоизбра́нная Де́во, моле́ние возно́сим, со стра́хом и любо́вию глаго́люще:
Ра́дуйся, от патриа́рхов прообразова́нная и от проро́ков предвозвеще́нная; ра́дуйся, ро́ждшая А́гнца, взе́мшаго грехи́ ми́ра.
Ра́дуйся, Ада́ма и Е́ву от дре́вняго прокля́тия свободи́вшая; ра́дуйся, чудотво́рною ико́ною Твое́ю всю́ зе́млю Калу́жскую озаря́ющая.
Ра́дуйся, ико́ну Твою́ во зна́мение ми́лости на́м да́вшая; ра́дуйся, я́ко на ико́ну Твою́ взира́юще, Само́й Тебе́, и́стинней Богоро́дице, покланя́емся.
Ра́дуйся, Влады́чице, ми́лость Свою́ и заступле́ние на́м явля́ющая.
Кондак 1
Взбра́нной Воево́де, Пренепоро́чней Де́ве Богоро́дице, земли́ Калу́жския изба́вительнице, хвале́бныя пе́сни прино́сим Ти́, раби́ Твои́, я́ко ико́ны Твоея́ явле́нием дарова́вшей на́м стра́жа неусы́пна. Ты́ же моле́ния на́шего, пред ико́ною Твое́ю возноси́маго, не отве́ржи, но защити́ ны, Влады́чице, от все́х враго́в ви́димых и неви́димых и изба́ви ны́ от вся́ких боле́зней душе́вных и теле́сных, да во умиле́нии се́рдца зове́м Ти́:
Ра́дуйся, Влады́чице, ми́лость Свою́ и заступле́ние на́м явля́ющая.
Молитвы
О, Пресвята́я Де́во, Ма́ти Христа́ Бо́га на́шего, ди́вная Цари́це Небесе́ и земли́! Вонми́ многоболе́зненному воздыха́нию серде́ц на́ших, при́зри с высоты́ святы́я Твоея́ на на́с, с ве́рою и любо́вию предстоя́щих пред чудотво́рною Твое́ю ико́ною и со умиле́нием моля́щихся Тебе́, Влады́чице! Не преда́ждь умале́нию Це́рковь Правосла́вную, помози́ на́м, Пресвята́я Богоро́дице, святооте́ческую правосла́вную ве́ру до конца́ дне́й на́ших непоро́чно сохрани́ти, во все́х за́поведех Госпо́дних неукло́нно ходи́ти и изба́ви ны́ от па́губных душевре́дных уче́ний.
На Твою́, ди́вная Цари́це, ми́лость упова́ем раби́ Твои́: очи́сти умы́ на́ша от грехо́вных по́мыслов, ду́ши – от разслабле́ния, обурева́ния страсте́й, искуше́ний, собла́знов и грехопаде́ний, Ты́ бо еси́, Влады́чице, кре́пкое прибе́жище гре́шников ка́ющихся. Воздви́гни на́с из глубины́ грехо́вныя и и́стинным покая́нием ороси́ изсо́хшая сердца́ на́ша, просвети́ серде́чныя о́чи на́ша к зре́нию спасе́ния и прельще́нных бесо́вскою пре́лестию на пу́ть пра́вый наста́ви; вся́кое де́ло зло́е и богопроти́вное разруши́, вся́кому же благо́му и богоуго́дному де́лу научи́ и споспе́шествуй; вложи́, Влады́чице, в сердца́ на́ша ду́х стра́ха Бо́жия, ду́х благоче́стия, ду́х кро́тости, смире́ния, терпе́ния, незло́бия; умягчи́ зла́я сердца́ на́ша и злы́я бла́ги сотвори́, низпосли́ на́м ре́вность о спасе́нии.
Вразуми́ и научи́ ны, о Всеми́лостивая Засту́пнице на́ша, ка́ко безгре́шно ходи́ти по пути́ земна́го сего́ жития́, я́ко Ты́, Пресвята́я, ве́си и ве́ру на́шу, и упова́ние на́ше ви́диши. О Влады́чице ми́ра! Скорбя́щих уте́ши, бе́дствующим помози́; сохрани́ от молниено́снаго гро́ма, тлетво́рных ве́тров, лю́тых боле́зней, смертоно́сныя я́звы, междоусо́бныя бра́ни, наше́ствия враго́в иноплеме́нных.
О Пресвята́я Богоро́дице! Изба́ви ны́ от внеза́пныя и наси́льственныя сме́рти; все́м на́м да́руй обраще́ние на пу́ть и́стинный и христиа́нскую кончи́ну живота́ на́шего, безболе́зненну, непосты́дну, ми́рну, Святы́х Та́ин прича́стну. Во вре́мя исхо́да на́шего предста́ни на́м, Де́во Богоро́дице, и изба́ви ны́ от вла́сти бесо́вския, возду́шных го́рьких мыта́рств и огня́ ве́чнаго. Сконча́вшимся внеза́пною сме́ртию ми́лостива бы́ти Сы́на Твоего́ умоли́ и о все́х усо́пших, и́же не и́мут сро́дников, о упокое́нии и́х Сы́на Твоего́ умоля́ющих, Сама́ бу́ди непреста́нная и те́плая Моли́твенница и Хода́таица. Преста́вльшияся же в ве́ре и покая́нии от вре́меннаго жития́ сего́ отцы́, бра́тию и сестры́ на́ша сподо́би Твои́м хода́тайством всели́тися во оби́телех Небе́сных со А́нгелы и со все́ми святы́ми, иде́же не престаю́т гла́си пра́зднующих и ра́достно сла́вящих Пресвяту́ю Тро́ицу, Отца́ и Сы́на и Свята́го Ду́ха, ны́не и при́сно и во ве́ки веко́в. Ами́нь.
О, Пресвята́я Влады́чице Богоро́дице, Цари́це Небесе́ и земли́, к Тебе́ прибега́ем и к Твое́й по́мощи взыва́ем: сохрани́ зе́млю на́шу от наше́ствия враго́в иноплеме́нных и междоусо́бныя бра́ни, и на́с от вся́кия боле́зни душе́вныя и теле́сныя, и от смертоно́сныя я́звы: да всегда́ пое́м, велича́ем и сла́вим Тя́, Пресвяту́ю Богоро́дицу, я́ко благу́ю и ди́вную Засту́пницу на́шу во ве́ки веко́в. Ами́нь.
Конда́къ а҃
Взбра́нной воево́дѣ, пренепоро́чнѣй дв҃ѣ бцⷣѣ, землѝ калꙋ́жскїѧ и҆зба́вительнице, хвалє́бныѧ пѣ̑сни прино́симъ тѝ рабѝ твоѝ, ꙗ҆́кѡ і҆кѡ́ны твоеѧ̀ ꙗ҆вле́нїемъ дарова́вшей на́мъ стра́жа неꙋсы́пна. Ты́ же моле́нїѧ на́шегѡ, пред̾ і҆кѡ́ною твое́ю возноси́магѡ, не ѿве́ржи, но защити́ ны, влⷣчце, ѿ всѣ́хъ врагѡ́въ ви́димыхъ и҆ неви́димыхъ и҆ и҆зба́ви ны̀ ѿ всѧ́кихъ болѣ́зней дꙋше́вныхъ и҆ тѣле́сныхъ, да во ᲂу҆миле́нїи се́рдца зове́мъ тѝ:
Ра́дꙋйсѧ, влⷣчце, млⷭ҇ть свою̀ и҆ застꙋпле́нїе на́мъ ꙗ҆влѧ́ющаѧ.
І҆́косъ а҃
А҆́гг҃лѡвъ мно́жество сла́вѧтъ тѧ̀, цр҃и́цꙋ всѣ́хъ и҆ бцⷣꙋ, ты́ бо и҆спо́лнила є҆сѝ ра́дости сердца̀ на̑ша ꙗ҆вле́нїемъ на́мъ чꙋдотво́рныѧ і҆кѡ́ны твоеѧ̀ въ тинько́вѣ и҆ чꙋдесы̀ во хра́мѣ и҆́мене ржⷭ҇тва̀ твоегѡ̀ въ ве́си калꙋ́жкѣ: се́й ᲂу҆́бѡ і҆кѡ́нѣ твое́й покланѧ́ющесѧ, тебѣ̀, бг҃оизбра́ннаѧ дв҃о, моле́нїе возно́симъ, со стра́хомъ и҆ любо́вїю глаго́люще:
Ра́дꙋйсѧ, ѿ патрїа́рхѡвъ проѡбразова́ннаѧ и҆ ѿ прⷪ҇ро́кѡвъ предвозвѣще́ннаѧ: ра́дꙋйсѧ, ро́ждшаѧ а҆́гнца, взе́мшаго грѣхѝ мі́ра.
Ра́дꙋйсѧ, а҆да́ма и҆ є҆́ѵꙋ ѿ дре́внѧгѡ проклѧ́тїѧ свободи́вшаѧ: ра́дꙋйсѧ, чꙋдотво́рною і҆кѡ́ною твое́ю всю̀ зе́млю калꙋ́жскꙋю ѡ҆зарѧ́ющаѧ.
Ра́дꙋйсѧ, і҆кѡ́нꙋ твою̀ во зна́менїе млⷭ҇ти на́мъ да́вшаѧ: ра́дꙋйсѧ, ꙗ҆́кѡ на і҆кѡ́нꙋ твою̀ взира́юще, само́й тебѣ̀, и҆́стиннѣй бцⷣѣ, покланѧ́емсѧ.
Ра́дꙋйсѧ, влⷣчце, млⷭ҇ть свою̀ и҆ застꙋпле́нїе на́мъ ꙗ҆влѧ́ющаѧ.
Конда́къ в҃
Ви́дѧщи начерта́нїе ли́ка твоегѡ̀, дѣви́ца є҆ѵдокі́а въ развраще́нїи се́рдца своегѡ̀ дерзнове́ннѡ ѡ҆плева́нїемъ порꙋга́сѧ є҆мꙋ̀, не вѣ́дꙋщи, ꙗ҆́кѡ се́й тво́й ли́къ є҆́сть, прест҃а́ѧ дв҃о: ты́ же вразꙋмле́нїѧ ра́ди вдала̀ є҆сѝ ю҆̀ въ разслабле́нїе всегѡ̀ тѣлесѐ, смѧгче́нїе рꙋкꙋ̀ и҆ ногꙋ̀, ѡ҆слѣпле́нїе ѻ҆́чїю и҆ ѧ҆зы́ка нѣмотствова́нїе, и҆ си́мъ показа́ла є҆сѝ, ꙗ҆́кѡ начерта́нїе ли́ка сегѡ̀ є҆́сть і҆кѡ́на твоѧ̀ чꙋдотво́рнаѧ, да всѝ лю́дїе вопїю́тъ къ ро́ждшемꙋсѧ ѿ тебє̀ бг҃ꙋ сло́вꙋ: А҆ллилꙋ́їа.
І҆́косъ в҃
Ра́зꙋмъ человѣ́ческїй не мо́жетъ пости́гнꙋти вели́кагѡ твоегѡ̀ млⷭ҇рдїѧ, прест҃а́ѧ бцⷣе, ꙗ҆́кѡ и҆́скреннее покаѧ́нїе болѧ́щїѧ дѣви́цы прїѧ́ла є҆сѝ и҆ соверше́нное и҆сцѣле́нїе є҆́й дарова́ла є҆сѝ, да мл҃твꙋ прино́ситъ пред̾ і҆кѡ́ною твое́ю, взыва́ющи си́це:
Ра́дꙋйсѧ, лѣ́ствице нбⷭ҇наѧ, і҆а́кѡвомъ предви́дѣннаѧ: ра́дꙋйсѧ, та́йнꙋ воплоще́нїѧ бж҃їѧ, пре́жде вѣ̑къ въ бз҃ѣ сокрове́ннꙋю, ѿкры́вшаѧ.
Ра́дꙋйсѧ, ведꙋ́щымъ бра́нь проти́вꙋ мі́ра и҆ дїа́вола до́браѧ споспѣ́шнице: ра́дꙋйсѧ, ѿ грѣхопаде́нїй на́шихъ, и҆̀мже нѣ́сть числа̀, и҆збавлѧ́ющаѧ.
Ра́дꙋйсѧ, ꙗ҆́кѡ призыва́ющыѧ и҆́мѧ твоѐ ѿ паде́нїѧ стра́стнагѡ возставлѧ́ющаѧ: ра́дꙋйсѧ, бл҃года́тное безстра́стїе и҆́щꙋщымъ сїѐ ᲂу҆се́рднѡ подаю́щаѧ.
Ра́дꙋйсѧ, влⷣчце, млⷭ҇ть свою̀ и҆ застꙋпле́нїе на́мъ ꙗ҆влѧ́ющаѧ.
Конда́къ г҃
Си́лою, да́нною тѝ свы́ше, чꙋдотво́рнꙋю твою̀ і҆кѡ́нꙋ, пречⷭ҇таѧ бцⷣе, дарова́ла є҆сѝ на́мъ въ зна́менїе млⷭ҇ти твоеѧ̀, ꙗ҆́вльшисѧ роди́телємъ тоѧ̀ дѣви́цы, и҆ рекла̀ є҆сѝ и҆̀мъ: бꙋ́дꙋ хода́тайствовати ѡ҆ гра́дѣ калꙋ́гѣ и҆ ѡ҆ всѣ́хъ лю́дехъ є҆гѡ̀. Мы́ же взира́юще на і҆кѡ́нꙋ твою̀ и҆ мно́жество чꙋде́съ ѿ неѧ̀ вѣ́дꙋще, съ ра́достїю къ не́й припа́даемъ и҆ и҆з̾ глꙋбины̀ се́рдца бл҃годари́мъ тѧ̀, ди́внꙋю застꙋ́пницꙋ, взыва́юще бг҃ꙋ: А҆ллилꙋ́їа.
І҆́косъ г҃
И҆мꙋ́щи при́сное млⷭ҇рдое попече́нїе ѡ҆ є҆́же лю́демъ согрѣ́шшымъ не до конца̀ поги́бнꙋти, роди́телємъ тоѧ̀ дѣви́цы повелѣ́ла є҆сѝ, прест҃а́ѧ бцⷣе, да сверше́но бꙋ́детъ моле́бствїе пред̾ твое́ю і҆кѡ́ною со ѡ҆сщ҃е́нїемъ воды̀ и҆ да ѡ҆кропи́тъ і҆ере́й дще́рь и҆́хъ, болѣ́знїю пораже́ннꙋю, ꙗ҆́кѡ да и҆сцѣлѣ́етъ ѿ недꙋ́га своегѡ̀. На́съ же сп҃сѝ, гпⷭ҇жѐ, вѣ́рою и҆ любо́вїю воспѣва́ющихъ тѝ:
Ра́дꙋйсѧ, две́ре, і҆езекі́илемъ прорече́ннаѧ: ра́дꙋйсѧ, вочл҃вѣ́ченїю є҆ди́наго ѿ ст҃ы́ѧ трⷪ҇цы непоро́чнѡ послꙋжи́вшаѧ.
Ра́дꙋйсѧ, рожде́нїемъ сн҃а твоегѡ̀ сп҃се́нїе мі́рꙋ ꙗ҆́вльшаѧ: ра́дꙋйсѧ, съ вѣ́рою и҆́мѧ твоѐ призыва́ющихъ ѿ сме́рти сп҃са́ющаѧ.
Ра́дꙋйсѧ, ст҃и́телей весе́лїе и҆ бл҃гоговѣ́йныхъ і҆ере́євъ похвало̀: ра́дꙋйсѧ, и҆́нокѡвъ и҆ и҆́нокинь бл҃гочести́выхъ и҆зрѧ́днаѧ покрови́тельнице.
Ра́дꙋйсѧ, влⷣчце, млⷭ҇ть свою̀ и҆ застꙋпле́нїе на́мъ ꙗ҆влѧ́ющаѧ.
Конда́къ д҃
Бꙋ́рю напа́стей прови́дѧ, ᲂу҆грожа́вшихъ кра́ю калꙋ́жскомꙋ ѿ наполеѡ́на, ст҃и́тель є҆ѵла́мпїй молѧ́шесѧ пред̾ твое́ю і҆кѡ́ною, бцⷣе, ѡ҆ и҆збавле́нїи ѿ врагѡ́въ: вѣ́сть же прїе́мъ, ꙗ҆́кѡ во́инство вра́жїе пораже́но бы́сть на рѣцѣ̀ чернꙋ́шцѣ, бл҃года́рственнѡ сп҃сꙋ хрⷭ҇тꙋ̀ возопѝ: А҆ллилꙋ́їа.
І҆́косъ д҃
Слы́шавше млⷭ҇ть твою̀, бцⷣе, чрез̾ твою̀ і҆кѡ́нꙋ на по́ли бра́ни бли́з̾ ве́си тарꙋ́тино на́мъ низпо́сланнꙋю, є҆гда̀ ꙗ҆ви́ла є҆сѝ ю҆̀ на воздꙋ́сѣ и҆ноплеме́нникѡмъ, ꙗ҆́коже свидѣ́тельствоваша плѣне́ннїи ѿ ни́хъ: и҆ та́кѡ дарова́ла є҆сѝ побѣ́дꙋ во́ємъ рѡссі̑йскимъ, ра́дꙋемсѧ ѡ҆ твое́й, влⷣчце, по́мощи и҆ со ᲂу҆пова́нїемъ воспѣва́емъ тѝ си́це:
Ра́дꙋйсѧ, кꙋпино̀ неѡпали́маѧ, бг҃ови́дцемъ мѡѷсе́емъ предзри́маѧ: ра́дꙋйсѧ, ѿ пото́па грѣхо́внагѡ на́съ сп҃са́ющаѧ.
Ра́дꙋйсѧ, кади́льнице злата́ѧ, ꙗ҆́кѡ ѳѷмїа́мъ бл҃гоꙋха́нный мл҃твы твоѧ̑ къ бг҃ꙋ, сн҃ꙋ твоемꙋ̀, при́снѡ возносѧ́щаѧ: ра́дꙋйсѧ, пра́веднѡ дви́жимый гнѣ́въ бж҃їй на ны̀ моле́нїемъ свои́мъ ско́рѡ ᲂу҆толѧ́ющаѧ.
Ра́дꙋйсѧ, ꙗ҆вле́нїемъ на воздꙋ́сѣ і҆кѡ́ны твоеѧ̀ стра́хъ и҆ тре́петъ на врагѝ наве́дшаѧ: ра́дꙋйсѧ, во́инствꙋ рѡссі́йскомꙋ побѣ́дꙋ во бра́ни пода́вшаѧ.
Ра́дꙋйсѧ, влⷣчце, млⷭ҇ть свою̀ и҆ застꙋпле́нїе на́мъ ꙗ҆влѧ́ющаѧ.
Конда́къ є҃
Бг҃оте́чнаѧ ѕвѣзда̀ ꙗ҆ви́ласѧ є҆сѝ на́мъ, бцⷣе, смы́слы на́шѧ ѡ҆зарѧ́ющаѧ и҆ на пꙋ́ть сп҃си́тельный наставлѧ́ющаѧ, врагѡ́мъ же на́шымъ была̀ є҆сѝ ꙗ҆́кѡ мо́лнїѧ, ᲂу҆страша́ющи и҆̀хъ и҆ ѿража́ющи ѿ на́съ, є҆гда̀ наполеѡ́нъ, порази́въ бли́з̾ гра́да малоѧросла́вца ра́ть на́шꙋ, понꙋ́ди ю҆̀ ѿитѝ ко гра́дꙋ калꙋ́гѣ, са́мъ же ᲂу҆слы́шавъ сїѐ, по твоемꙋ̀ млⷭ҇тивомꙋ, застꙋ́пнице, повелѣ́нїю, невѣ́домыѧ ра́ди вины̀, вмѣ́стѡ є҆́же ко гра́дꙋ калꙋ́гѣ и҆тѝ, и҆́де по пꙋтѝ, є҆го́же са́мъ разорѝ и҆ ѡ҆пꙋстошѝ, ко гра́дꙋ гжа́тскꙋ, и҆ та́кѡ ра́ть свою̀ погꙋбѝ. Сегѡ̀ ра́ди, твоѐ крѣ́пкое застꙋпле́нїе вѣ́дꙋще, со ᲂу҆миле́нїемъ глаго́лемъ бг҃ꙋ: А҆ллилꙋ́їа.
І҆́косъ є҃
Проѧ́вльши ве́лїю любо́вь къ лю́демъ, живꙋ́щымъ во странѣ̀ калꙋ́жстѣй, прест҃а́ѧ бцⷣе, зе́млю на́шꙋ сохрани́ла є҆сѝ и҆ мно́жество врагѡ́въ, ѡ҆быше́дшихъ ю҆̀, дале́че ѿ неѧ̀ ѿгна́ла є҆сѝ, сі́и же вразѝ на́ши ᲂу҆вѣ́дѣша, ко́ль крѣпка̀ є҆́сть по́мощь бж҃їѧ мт҃ре. Мы́ же твоѐ всемо́щное застꙋпле́нїе, на́мъ бы́вшее, до́брѣ вѣ́дꙋще, въ ра́дости се́рдца воспѣва́емъ тѝ си́це:
Ра́дꙋйсѧ, клещѐ та́инственнаѧ, и҆са́їемъ прови́деннаѧ: ра́дꙋйсѧ, примире́нїе на́ше съ бг҃омъ содѣ́лавшаѧ.
Ра́дꙋйсѧ, сп҃си́телѧ па́дшемꙋ человѣ́чествꙋ ро́ждшаѧ: ра́дꙋйсѧ, въ годи́нꙋ бра́ни по́мощїю твое́ю ᲂу҆пова́ющихъ на тѧ̀ не ѡ҆ставлѧ́ющаѧ.
Ра́дꙋйсѧ, всемо́щнымъ застꙋпле́нїемъ твои́мъ ѿ меча̀ и҆ноплеме́нныхъ на́съ и҆збавлѧ́ющаѧ: ра́дꙋйсѧ, без̾ проли́тїѧ кро́ве ѡ҆долѣ́нїе правосла̑внымъ во́ємъ дарова́вшаѧ.
Ра́дꙋйсѧ, влⷣчце, млⷭ҇ть свою̀ и҆ застꙋпле́нїе на́мъ ꙗ҆влѧ́ющаѧ.
Конда́къ ѕ҃
Проповѣ́дница бг҃ознамени́тагѡ чꙋдесѐ ꙗ҆ви́сѧ нѣ́каѧ жена̀ во гра́дѣ бо́ровскѣ, ю҆́же вра́чеве ника́коже возмого́ша и҆сцѣли́ти и҆ реко́ша, ꙗ҆́кѡ належи́тъ є҆́й не по мно́зѣ вре́мени ᲂу҆мре́ти. Ѻ҆на́ же вѣ́рꙋ и҆мꙋ́щи, ꙗ҆́кѡ си́ла бж҃їѧ всемогꙋ́щаѧ є҆́сть, не закоснѣ̀ проси́ти, да въ ве́си калꙋ́жкѣ пред̾ твое́ю, бцⷣе, і҆кѡ́ною сверше́но бꙋ́детъ ѡ҆ здра́вїи є҆ѧ̀ моле́бствїе, и҆ по вѣ́рѣ свое́й а҆́бїе ѿ недꙋ́га своегѡ̀ и҆сцѣле́на бы́сть. Тѣ́мже и҆ мы̀ бл҃года́рственнѡ прославлѧ́юще бг҃а, вопїе́мъ є҆мꙋ̀: А҆ллилꙋ́їа.
І҆́косъ ѕ҃
Возсїѧ́ла є҆́сть і҆кѡ́на твоѧ̀, бцⷣе, чꙋде́снагѡ и҆сцѣле́нїѧ ра́ди жены̀, живꙋ́щїѧ во гра́дѣ бо́ровскѣ, да́же и҆ посредѣ̀ жи́телей є҆гѡ̀, въ раско́лѣ пребыва́ющихъ и҆ не чтꙋ́щихъ ѻ҆́бразъ тво́й. Сегѡ̀ ра́ди и҆ сѷгкли́тъ гра́дскїй, въ не́мже по преизбы́точествꙋ бѧ́хꙋ лю́дїе, въ раско́лѣ ᲂу҆по́рствꙋющїи, ᲂу҆ста́ви, да бꙋ́детъ сверше́но на сто́гнахъ гра́да моле́бное пѣ́нїе пред̾ і҆кѡ́ною твое́ю, во гра́дъ се́й принесе́нною. Тѣ́мже ꙗ҆́кѡ бл҃га́ѧ влⷣчца, наꙋчи́ ны разꙋмѣ́ти промышле́нїе бж҃їе ѡ҆ сп҃се́нїи люде́й, да взыва́емъ тѝ ра́достнѡ:
Ра́дꙋйсѧ, въ защи́тꙋ цр҃кве правосла́вныѧ чꙋдеса̀ показꙋ́ющаѧ: ра́дꙋйсѧ, хꙋли́тєли и҆́стинныѧ вѣ́ры неви́димѡ наказꙋ́ющаѧ.
Ра́дꙋйсѧ, догма́тѡвъ вѣ́ры ѡ҆гражде́нїе и҆ ᲂу҆твержде́нїе: ра́дꙋйсѧ, ꙗ҆́кѡ бжⷭ҇твеннꙋю вѣ́рꙋ просла́вила є҆сѝ.
Ра́дꙋйсѧ, раско́льники на пꙋ́ть бл҃гі́й ѡ҆браща́ющаѧ: ра́дꙋйсѧ, пре́лесть же раско́ла посрамлѧ́ющаѧ.
Ра́дꙋйсѧ, влⷣчце, млⷭ҇ть свою̀ и҆ застꙋпле́нїе на́мъ ꙗ҆влѧ́ющаѧ.
Конда́къ з҃
Хотѧ́щи возгрѣ́ти въ сердца́хъ люде́й землѝ калꙋ́жскїѧ любо́вь къ і҆кѡ́нѣ твое́й, застꙋ́пнице на́ша, то́ки чꙋде́съ и҆злива́еши ѿ неѧ̀: мл҃твою бо, къ тебѣ̀ возноси́мою, глꙋхо́мꙋ внеза́пꙋ слꙋ́хъ дарова́сѧ, ѡ҆слѣ́пшемꙋ зрѣ́нїе ѿкры́сѧ, разсла́бленномꙋ крѣ́пость во ᲂу҆десѣ́хъ є҆гѡ̀ возврати́сѧ, здра́вїе дꙋше́ю стра́ждꙋщей и҆ бѣ́сомъ ѡ҆держи́мѣй даде́сѧ, лю́тѣ болѧ́щей и҆ врачмѝ ѡ҆ста́вленнѣй житїѐ во здра́вїи на мнѡ́гаѧ лѣ̑та продолжи́сѧ: тѣ́мже и҆ мы̀ съ любо́вїю ко і҆кѡ́нѣ твое́й припа́дающе и҆ прославлѧ́юще бг҃а, вопїе́мъ є҆мꙋ̀: А҆ллилꙋ́їа.
І҆́косъ з҃
Неѡбори́маѧ є҆сѝ ѡ҆гра́да, ѡ҆хранѧ́ющаѧ ны̀ ѿ всѧ́кихъ болѣ́зней дꙋше́вныхъ и҆ тѣле́сныхъ, прест҃а́ѧ бцⷣе, и҆ застꙋпа́ющаѧ всѣ́хъ, къ тебѣ̀ прибѣга́ющихъ съ мл҃твою. Тѣ́мже и҆ мы̀ припа́дающе ко і҆кѡ́нѣ твое́й, мо́лимъ тѧ̀, влⷣчце: ѿ всѧ́кихъ болѣ́зней дꙋше́вныхъ и҆ тѣле́сныхъ и҆зба́ви ны̀, вопїю́щыѧ тѝ и҆з̾ глꙋбины̀ се́рдца:
Ра́дꙋйсѧ, со́лнце селе́нїѧ хрⷭ҇то́ва, ѱалмопѣ́вцемъ пред̾ѧвле́нное: ра́дꙋйсѧ, ро́ждшаѧ и҆зба́вителѧ, беззакѡ́нїѧ на̑ша тꙋ́не ѡ҆чища́ющаго.
Ра́дꙋйсѧ, ста́мно прест҃а́ѧ, въ не́йже а҆́лчꙋщымъ пра́вды соблюда́етсѧ хлѣ́бъ жи́зни вѣ́чныѧ: ра́дꙋйсѧ, ꙗ҆́кѡ приходѧ́щихъ съ вѣ́рою къ чꙋдотво́рнѣй твое́й і҆кѡ́нѣ ѿ болѣ́зней дꙋше́вныхъ и҆ тѣле́сныхъ млⷭ҇тивнѡ врачꙋ́еши.
Ра́дꙋйсѧ, болѣ́знꙋющихъ, ѡ҆ста́вленныхъ врачмѝ, ѿ сме́рти и҆збавлѧ́ющаѧ: ра́дꙋйсѧ, ꙗ҆́кѡ мл҃твами твои́ми престаю́тъ тлетво́рнїи вѣ́три и҆ смертонѡ́сныѧ ꙗ҆́звы.
Ра́дꙋйсѧ, влⷣчце, млⷭ҇ть свою̀ и҆ застꙋпле́нїе на́мъ ꙗ҆влѧ́ющаѧ.
Конда́къ и҃
Вели́кое и҆ ᲂу҆мꙋ̀ человѣ́ческомꙋ неꙋдобопости́жное чꙋ́до ꙗ҆ви́ла є҆сѝ, влⷣчце мі́ра, є҆гда̀ внеза́пꙋ и҆сцѣли́ла и҆ ᲂу҆крѣпи́ла є҆сѝ въ тре́звенномъ житїѝ нѣ́кꙋю женꙋ̀, въ ѻ҆́бласти гра́да жи́здры жи́вшꙋю, ꙗ҆́же пїѧ́нствꙋ предана̀ бѣ̀: со́вѣстїю свое́ю терза́шесѧ, ꙗ҆́кѡ стра́стїю поро́ка порабоще́на бы́сть, и҆ сеѧ̀ ра́ди вины̀ ѡ҆брати́сѧ съ вѣ́рою къ тебѣ̀, влⷣчце, молѧ́щисѧ пред̾ твое́ю і҆кѡ́ною и҆ ѿ тебє̀ и҆сцѣле́нїе жела́ющи полꙋчи́ти. Сегѡ̀ ра́ди и҆ мы̀ на млⷭ҇ть твою̀ ᲂу҆пова́юще, восхвалѧ́емъ твоѐ млⷭ҇рдїе, взыва́юще бг҃ꙋ: А҆ллилꙋ́їа.
І҆́косъ и҃
Ви́дѧтъ и҆ слы́шатъ жи́тєли калꙋ́жскїѧ землѝ но́вꙋю кꙋпѣ́ль сїлѡа́мскꙋю, па́че ѻ҆́ныѧ дре́внїѧ ꙗ҆́вльшꙋюсѧ, прест҃а́ѧ бцⷣе, въ хра́мѣ ржⷭ҇тва̀ твоегѡ̀ въ ве́си калꙋ́жкѣ, въ не́мже покланѧ́ютсѧ чꙋдотво́рнѣй і҆кѡ́нѣ твое́й: не є҆ди́ножды бо въ лѣ́то и҆ не то́чїю пе́рвѣе входѧ́й здра́вїе прїе́млетъ, но вы́нꙋ всѧ́къ недꙋ́гъ врачꙋ́еши всѣ́хъ, съ вѣ́рою къ тебѣ̀ прибѣга́ющихъ. Сегѡ̀ ра́ди вопїе́мъ тѝ:
Ра́дꙋйсѧ, є҆ѧ́же ра́ди а҆́дъ стене́тъ и҆ дꙋ́си ѕло́бы трепе́щꙋтъ: ра́дꙋйсѧ, є҆ѧ́же ра́ди врата̀ раѧ̀ всѣ̑мъ на́мъ ѿверза́ютсѧ.
Ра́дꙋйсѧ, по́мощь твою̀ ст҃ꙋ́ю бл҃говре́меннѡ подаю́щаѧ всѧ́цѣй дꙋшѝ, вѣ́рнѡ тебѣ̀ молѧ́щейсѧ: ра́дꙋйсѧ, ѿ стра́сти пїѧ́нства ѡ҆брати́вшихсѧ къ тебѣ̀ съ мл҃твою и҆збавлѧ́ющаѧ.
Ра́дꙋйсѧ, ѿ ро́ва поги́бельнагѡ безнаде́жныхъ и҆звлача́ющаѧ: ра́дꙋйсѧ, притека́ющихъ къ покро́вꙋ твоемꙋ̀ сла́дкое ᲂу҆спокое́нїе.
Ра́дꙋйсѧ, влⷣчце, млⷭ҇ть свою̀ и҆ застꙋпле́нїе на́мъ ꙗ҆влѧ́ющаѧ.
Конда́къ ѳ҃
Всѝ горды́нею ѡ҆держи́мїи стра́хъ бж҃їй ско́рѡ забыва́ютъ. Си́це двѣ̀ жєны̀, въ странѣ̀ калꙋ́жстѣй живꙋ́щыѧ, горды́нею преиспо́лнєнныѧ, ꙗ҆́снѡ ꙗ҆влѧ́хꙋ сомнѣ́нїе своѐ, ꙗ҆́кѡ і҆кѡ́на твоѧ̀ цѣльбоно́сна є҆́сть, влⷣчце, и҆ си́мъ толи́кѡ прогнѣ́ваша бг҃а, ꙗ҆́кѡ првⷣнымъ сꙋдо́мъ є҆гѡ̀ тѧ́жкими недꙋ̑ги наказа́нїе прїѧ́ша. Мы́ же таково́е вразꙋмле́нїе ви́дѧще, съ любо́вїю покланѧ́емсѧ твоемꙋ̀ ѻ҆́бразꙋ, взыва́юще бг҃ꙋ: А҆ллилꙋ́їа.
І҆́косъ ѳ҃
Вѣті̑и вѣ́ка сегѡ̀ ѿрица́ютъ поклоне́нїе і҆кѡ́нѣ твое́й, пречⷭ҇таѧ дв҃о, не разꙋмѣ́ютъ бо въ свое́мъ сꙋемꙋ́дрїи, ꙗ҆́кѡ че́сть, і҆кѡ́нѣ воздава́емаѧ, на первоѻбра́зное восхо́дитъ. Мы́ же не то́кмѡ сїѐ вѣ́дꙋще, но и҆ бл҃годѣѧ̑нїѧ, і҆кѡ́ною твое́ю на́мъ ꙗ҆влѧ́ємаѧ, дꙋше́ю ра́дꙋющесѧ, тебѣ̀, бцⷣе, глаго́лемъ:
Ра́дꙋйсѧ, ста́мно всезлата́ѧ, въ не́йже пло́ть и҆ кро́вь бжⷭ҇твеннагѡ а҆́гнца ᲂу҆гото́вашасѧ: ра́дꙋйсѧ, трапе́зо ст҃а́ѧ, хлѣ́бомъ жи́зни на́съ пита́ющаѧ.
Ра́дꙋйсѧ, сꙋ́етнꙋю мꙋ́дрость нечести́выхъ вѣті́й посрамлѧ́ющаѧ и҆ ѡ҆слѣпле́нныхъ є҆́ю на пꙋ́ть пра́вый наставлѧ́ющаѧ: ра́дꙋйсѧ, ꙗ҆́кѡ по бл҃госты́ни свое́й ᲂу҆гаша́еши въ на́съ ѻ҆́гнь нече́стїѧ пла́менемъ ѻ҆гнѧ̀ бжⷭ҇твеннагѡ.
Ра́дꙋйсѧ, вразꙋмлѧ́ющаѧ зна́меньми и҆ чꙋдесы̀ коле́блемыхъ въ вѣ́рѣ: ра́дꙋйсѧ, бг҃обл҃года́тнаѧ, стра́хъ бж҃їй и҆ смире́нїе въ сердца̀ на̑ша вселѧ́ющаѧ.
Ра́дꙋйсѧ, влⷣчце, млⷭ҇ть свою̀ и҆ застꙋпле́нїе на́мъ ꙗ҆влѧ́ющаѧ.
Конда́къ і҃
Сп҃стѝ хотѧ́щи лю́ди, покланѧ́ющыѧсѧ твое́й і҆кѡ́нѣ, ѿ бѣ́дъ, бл҃говоли́ла є҆сѝ, бцⷣе, ꙗ҆ви́тисѧ нѣ́коей дѣви́цѣ, въ лꙋ́жецкомъ, бли́з̾ гра́да можа́йска, монастырѝ жи́тельствовавшей, и҆ предвари́ти, да не и҆́мать ѻ҆бще́нїѧ съ жено́ю развраще́нною, и҆ тѣ́мъ сохрани́ла є҆сѝ дѣви́цꙋ ѻ҆́нꙋю ѿ грѧдꙋ́щїѧ бѣды̀. Тѣ́мже и҆ мы̀ прославлѧ́емъ гдⷭ҇а бг҃а, да́вшаго бл҃года́ть таковꙋ́ю і҆кѡ́нѣ твое́й, и҆ вопїе́мъ є҆мꙋ̀: А҆ллилꙋ́їа.
І҆́косъ і҃
Стѣна̀ є҆сѝ крѣ́пкаѧ, ѡ҆гражда́ющаѧ ро́дъ человѣ́ческїй ѿ бѣ́дъ, прест҃а́ѧ бцⷣе, ско́рꙋю по́мощь ꙗ҆влѧ́ющаѧ ѿ твоеѧ̀ і҆кѡ́ны всѣ̑мъ чтꙋ́щымъ ю҆̀ во гра́дѣхъ, ве́сехъ и҆ ѻ҆би́телехъ. Сегѡ̀ ра́ди и҆ мы̀, ѡ҆сѣнѧ́емїи твои́мъ, бг҃омт҃и, застꙋпле́нїемъ, на тво́й взира́юще пречи́стый ѻ҆́бразъ, мо́лимъ тѧ̀, да и҆зба́виши ны̀ ѿ всѧ́кихъ клеве́тъ, бѣ́дъ и҆ скорбе́й, вопїю́щыѧ тѝ:
Ра́дꙋйсѧ, ꙗ҆́вльшаѧ мі́рꙋ ѡ҆бѣтова́ннаго сокрꙋши́телѧ главы̀ ѕмі́евы: ра́дꙋйсѧ, ра́дость вѣ́чнꙋю, сп҃си́телѧ мі́рꙋ, ро́ждшаѧ.
Ра́дꙋйсѧ, рожде́нїемъ сн҃а бж҃їѧ двє́ри црⷭ҇твїѧ хрⷭ҇то́ва на́мъ ѿве́рзшаѧ: ра́дꙋйсѧ, ка́знь бж҃їю за беззакѡ́нїѧ на̑ша ѿ гла́въ на́шихъ ѿводѧ́щаѧ.
Ра́дꙋйсѧ, лю́бѧщихъ и҆ чтꙋ́щихъ тѧ̀ ѿ всѧ́кихъ бѣ́дъ и҆ скорбе́й и҆збавлѧ́ющаѧ: ра́дꙋйсѧ, ра́досте всегѡ̀ мі́ра, є҆́юже сле́зы скорбѧ́щихъ ѿ̾е́млютсѧ.
Ра́дꙋйсѧ, влⷣчце, млⷭ҇ть свою̀ и҆ застꙋпле́нїе на́мъ ꙗ҆влѧ́ющаѧ.
Конда́къ а҃і
Пѣ́нїе непреста́ннѡ приноша́ше тѝ, прест҃а́ѧ бцⷣе, нѣ́кїй жи́тель жи́здринскїѧ ве́си, съ вѣ́рою пред̾ твое́ю і҆кѡ́ною молѧ́сѧ, да є҆мꙋ̀ дще́рь да́рꙋеши. Ты́ же, бцⷣе, бл҃говоли́ла є҆сѝ внѧ́ти мольба́мъ є҆гѡ̀ и҆ и҆спо́лнити проше́нїе є҆гѡ̀. Мы́ же зрѧ́ще на твою̀ і҆кѡ́нꙋ и҆ ви́дѧще то́ки чꙋде́съ, ѿ неѧ̀ и҆злива́ємыѧ, бл҃га́ѧ бг҃ороди́тельнице, и҆з̾ глꙋбины̀ се́рдца бл҃годари́мъ тѧ̀, цр҃и́цꙋ на́шꙋ ди́внꙋю, воспѣва́юще бг҃ꙋ: А҆ллилꙋ́їа.
І҆́косъ а҃і
Свѣ́тлыми лꙋча́ми чꙋде́съ і҆кѡ́на твоѧ̀ сїѧ́етъ, бг҃омт҃и пречⷭ҇таѧ, и҆ прогонѧ́етъ си́лою бж҃їею всѧ́кое вра́жїе дѣ́йство: тѣ́мже и҆ мы̀ грѣ́шнїи, и҆мꙋ́ще таково́е зна́менїе твоегѡ̀ къ на́мъ бл҃говоле́нїѧ, ра́дꙋемсѧ глаго́люще: ѽ прест҃а́ѧ бцⷣе! Оу҆молѝ гдⷭ҇а, да сп҃се́тъ ны̀ и҆́миже вѣ́сть сꙋдьба́ми, да не поги́бнемъ въ нераска́ѧнїи ѡ҆ на́шихъ грѣхопаде́нїихъ, и҆ ᲂу҆слы́ши похвалы̑ сїѧ̑, тебѣ̀ возноси̑мыѧ:
Ра́дꙋйсѧ, творца̀ нб҃сѐ и҆ землѝ безсѣ́меннѡ воплоти́вшаѧ: ра́дꙋйсѧ, ѡ҆сѣне́нїемъ ст҃ы́ѧ і҆кѡ́ны твоеѧ̀ всѧ́кое вра́жїе дѣ́йство ѿ на́съ ѿгонѧ́ющаѧ.
Ра́дꙋйсѧ, прошє́нїѧ на̑ша на по́льзꙋ и҆сполнѧ́ющаѧ: ра́дꙋйсѧ, неѡскꙋдѣва́емый и҆сто́чниче бл҃гослове́нїй и҆ млⷭ҇тей бж҃їихъ къ лю́демъ твои̑мъ.
Ра́дꙋйсѧ, бл҃гочести́выхъ сꙋпрꙋ́жествъ незри́мое ѡ҆гражде́нїе: ра́дꙋйсѧ, мл҃твъ ра́ди ᲂу҆се́рдныхъ пло́дъ безча̑днымъ низпосыла́ющаѧ.
Ра́дꙋйсѧ, влⷣчце, млⷭ҇ть свою̀ и҆ застꙋпле́нїе на́мъ ꙗ҆влѧ́ющаѧ.
Конда́къ в҃і
Бл҃года́ть ᲂу҆миле́нїѧ мл҃твеннагѡ ѿ твоеѧ̀, влⷣчце, і҆кѡ́ны источа́емаѧ, да и҆спо́лнитъ дꙋ́шы на́шѧ, а҆́ще и҆ грѣ̑хъ ра́ди въ безчꙋ́вствїе впа́даемъ. Пробꙋдѝ на́ше дꙋше́вное ᲂу҆сыпле́нїе, да не поги́бнемъ лю́тѣ без̾ покаѧ́нїѧ, и҆ прїимѝ на́съ въ вѣ̑чныѧ кро́вы, бг҃ороди́тельнице, да ра́дꙋющесѧ пое́мъ бг҃ꙋ, тобо́ю на́съ сп҃са́ющемꙋ: А҆ллилꙋ́їа.
І҆́косъ в҃і
Пою́ще чꙋдеса̀, ꙗ҆влѧ́ємаѧ ѿ твоеѧ̀ і҆кѡ́ны, мт҃и хрⷭ҇та̀ бг҃а на́шегѡ, и҆ припа́дающе къ не́й, мо́лимъ тѧ̀, влⷣчце: бꙋ́ди на́мъ защище́нїе въ де́нь кончи́ны на́шеѧ, є҆гда̀ и҆́мамы предста́ти на сꙋ́дъ пред̾ стра́шнымъ прⷭ҇то́ломъ сла́вы сн҃а твоегѡ̀, гдⷭ҇а на́шегѡ, да вопїе́мъ тѝ:
Ра́дꙋйсѧ, ѿ вла́сти лю́тагѡ мїроде́ржца ᲂу҆пова́ющихъ на тѧ̀ и҆збавлѧ́ющаѧ: ра́дꙋйсѧ, гнѣ́въ бж҃їй ѿ ро́да правосла́внагѡ ѿводѧ́щаѧ.
Ра́дꙋйсѧ, бл҃гꙋ́ю хрⷭ҇тїа́нскꙋю кончи́нꙋ ᲂу҆бл҃жа́ющымъ тѧ̀ подаю́щаѧ: ра́дꙋйсѧ, сла́вѧщыѧ тѧ̀ на воздꙋ́шныхъ мыта́рствахъ застꙋпа́ющаѧ.
Ра́дꙋйсѧ, крѣ́пкаѧ наде́ждо вѣ́чнагѡ сп҃се́нїѧ: ра́дꙋйсѧ, двє́ри ра̑йскїѧ ѿверза́ющаѧ при́снѡ тѧ̀ бл҃жа́щымъ.
Ра́дꙋйсѧ, влⷣчце, млⷭ҇ть свою̀ и҆ застꙋпле́нїе на́мъ ꙗ҆влѧ́ющаѧ.
Конда́къ г҃і
Ѽ всепѣ́таѧ мт҃и хрⷭ҇та̀ бг҃а на́шегѡ! Прїимѝ млⷭ҇тивнѡ сїѐ моле́нїе на́ше, є҆́же прино́симъ пред̾ твое́ю і҆кѡ́ною, и҆ въ ча́съ сме́ртный ꙗ҆ви́сѧ на́мъ сама̀, пречⷭ҇таѧ, простира́ющи рꙋ́кꙋ по́мощи, ѿгонѧ́ющи дꙋ́хи ѕло́бы, и҆́щꙋщыѧ поглоти́ти дꙋ́шы на́шѧ при разлꙋче́нїи ѿ тѣлесѐ, и҆ ᲂу҆молѝ приснопокланѧ́емꙋю трⷪ҇цꙋ и҆зба́вити ны̀ мꙋче́нїѧ вѣ́чнагѡ, да предста́тельствомъ твои́мъ наслѣ́дꙋемъ црⷭ҇твїе нбⷭ҇ное и҆ сподо́бимсѧ со ст҃ы́ми пѣ́ти бг҃ꙋ: А҆ллилꙋ́їа.
Повто́ръ
Сей конда́къ глаго́лется три́жды, та́же і҆́косъ а҃-й и҆ конда́къ а҃-й.
І҆́косъ а҃
А҆́гг҃лѡвъ мно́жество сла́вѧтъ тѧ̀, цр҃и́цꙋ всѣ́хъ и҆ бцⷣꙋ, ты́ бо и҆спо́лнила є҆сѝ ра́дости сердца̀ на̑ша ꙗ҆вле́нїемъ на́мъ чꙋдотво́рныѧ і҆кѡ́ны твоеѧ̀ въ тинько́вѣ и҆ чꙋдесы̀ во хра́мѣ и҆́мене ржⷭ҇тва̀ твоегѡ̀ въ ве́си калꙋ́жкѣ: се́й ᲂу҆́бѡ і҆кѡ́нѣ твое́й покланѧ́ющесѧ, тебѣ̀, бг҃оизбра́ннаѧ дв҃о, моле́нїе возно́симъ, со стра́хомъ и҆ любо́вїю глаго́люще:
Ра́дꙋйсѧ, ѿ патрїа́рхѡвъ проѡбразова́ннаѧ и҆ ѿ прⷪ҇ро́кѡвъ предвозвѣще́ннаѧ: ра́дꙋйсѧ, ро́ждшаѧ а҆́гнца, взе́мшаго грѣхѝ мі́ра.
Ра́дꙋйсѧ, а҆да́ма и҆ є҆́ѵꙋ ѿ дре́внѧгѡ проклѧ́тїѧ свободи́вшаѧ: ра́дꙋйсѧ, чꙋдотво́рною і҆кѡ́ною твое́ю всю̀ зе́млю калꙋ́жскꙋю ѡ҆зарѧ́ющаѧ.
Ра́дꙋйсѧ, і҆кѡ́нꙋ твою̀ во зна́менїе млⷭ҇ти на́мъ да́вшаѧ: ра́дꙋйсѧ, ꙗ҆́кѡ на і҆кѡ́нꙋ твою̀ взира́юще, само́й тебѣ̀, и҆́стиннѣй бцⷣѣ, покланѧ́емсѧ.
Ра́дꙋйсѧ, влⷣчце, млⷭ҇ть свою̀ и҆ застꙋпле́нїе на́мъ ꙗ҆влѧ́ющаѧ.
Конда́къ а҃
Взбра́нной воево́дѣ, пренепоро́чнѣй дв҃ѣ бцⷣѣ, землѝ калꙋ́жскїѧ и҆зба́вительнице, хвалє́бныѧ пѣ̑сни прино́симъ тѝ рабѝ твоѝ, ꙗ҆́кѡ і҆кѡ́ны твоеѧ̀ ꙗ҆вле́нїемъ дарова́вшей на́мъ стра́жа неꙋсы́пна. Ты́ же моле́нїѧ на́шегѡ, пред̾ і҆кѡ́ною твое́ю возноси́магѡ, не ѿве́ржи, но защити́ ны, влⷣчце, ѿ всѣ́хъ врагѡ́въ ви́димыхъ и҆ неви́димыхъ и҆ и҆зба́ви ны̀ ѿ всѧ́кихъ болѣ́зней дꙋше́вныхъ и҆ тѣле́сныхъ, да во ᲂу҆миле́нїи се́рдца зове́мъ тѝ:
Ра́дꙋйсѧ, влⷣчце, млⷭ҇ть свою̀ и҆ застꙋпле́нїе на́мъ ꙗ҆влѧ́ющаѧ.
Моли́твы
Ѽ прест҃а́ѧ дв҃о, мт҃и хрⷭ҇та̀ бг҃а на́шегѡ, ди́внаѧ цр҃и́це нб҃сѐ и҆ землѝ! Вонмѝ многоболѣ́зненномꙋ воздыха́нїю серде́цъ на́шихъ, при́зри съ высоты̀ ст҃ы́ѧ твоеѧ̀ на на́съ, съ вѣ́рою и҆ любо́вїю предстоѧ́щихъ пред̾ чꙋдотво́рною твое́ю і҆кѡ́ною и҆ со ᲂу҆миле́нїемъ молѧ́щихсѧ тебѣ̀, влⷣчце! Не преда́ждь ᲂу҆мале́нїю цр҃ковь правосла́внꙋю, помозѝ на́мъ, прест҃а́ѧ бцⷣе, ст҃оѻте́ческꙋю правосла́внꙋю вѣ́рꙋ до конца̀ дне́й на́шихъ непоро́чнѡ сохрани́ти, во всѣ́хъ за́повѣдехъ гдⷭ҇нихъ неꙋкло́ннѡ ходи́ти и҆ и҆зба́ви ны̀ ѿ па́гꙋбныхъ дꙋшевре́дныхъ ᲂу҆че́нїй.
На твою̀, ди́внаѧ цр҃и́це, млⷭ҇ть ᲂу҆пова́емъ рабѝ твоѝ: ѡ҆чи́сти ᲂу҆мы̀ на́шѧ ѿ грѣхо́вныхъ по́мыслѡвъ, дꙋ́шы ѿ разслабле́нїѧ, ѡ҆бꙋрева́нїѧ страсте́й, и҆скꙋше́нїй, собла́знѡвъ и҆ грѣхопаде́нїй, ты́ бо є҆сѝ, влⷣчце, крѣ́пкое прибѣ́жище грѣ́шникѡвъ ка́ющихсѧ. Воздви́гни на́съ и҆з̾ глꙋбины̀ грѣхо́вныѧ и҆ и҆́стиннымъ покаѧ́нїемъ ѡ҆росѝ и҆зсѡ́хшаѧ сердца̀ на̑ша, просвѣтѝ сердє́чныѧ ѻ҆́чи на́ши къ зрѣ́нїю сп҃се́нїѧ, и҆ прельще́нныхъ бѣсо́вскою пре́лестїю на пꙋ́ть пра́вый наста́ви: всѧ́кое дѣ́ло ѕло́е и҆ бг҃опроти́вное разрꙋшѝ, всѧ́комꙋ же бл҃го́мꙋ и҆ бг҃оꙋго́дномꙋ дѣ́лꙋ наꙋчѝ и҆ споспѣ́шествꙋй: вложѝ, влⷣчце, въ сердца̀ на̑ша дꙋ́хъ стра́ха бж҃їѧ, дꙋ́хъ бл҃гоче́стїѧ, дꙋ́хъ кро́тости, смире́нїѧ, терпѣ́нїѧ, неѕло́бїѧ: ᲂу҆мѧгчѝ ѕла̑ѧ сердца̀ на̑ша и҆ ѕлы̑ѧ бла̑ги сотворѝ, низпослѝ на́мъ ре́вность ѡ҆ сп҃се́нїи.
Вразꙋмѝ и҆ наꙋчи́ ны, ѽ всемлⷭ҇тиваѧ застꙋ́пнице на́ша, ка́кѡ безгрѣ́шнѡ ходи́ти по пꙋтѝ земна́гѡ сегѡ̀ житїѧ̀, ꙗ҆́кѡ ты̀, прест҃а́ѧ, вѣ́си и҆ вѣ́рꙋ на́шꙋ, и҆ ᲂу҆пова́нїе на́ше ви́диши. Ѽ влⷣчце мі́ра! Скорбѧ́щихъ ᲂу҆тѣ́ши, бѣ́дствꙋющымъ помозѝ: сохранѝ ѿ молнїено́снагѡ гро́ма, тлетво́рныхъ вѣ́трѡвъ, лю́тыхъ болѣ́зней, смертоно́сныѧ ꙗ҆́звы, междоꙋсо́бныѧ бра́ни, наше́ствїѧ врагѡ́въ и҆ноплеме́нныхъ.
Ѽ прест҃а́ѧ бцⷣе! И҆зба́ви ны̀ ѿ внеза́пныѧ и҆ наси́льственныѧ сме́рти: всѣ̑мъ на́мъ да́рꙋй ѡ҆браще́нїе на пꙋ́ть и҆́стинный и҆ хрⷭ҇тїа́нскꙋю кончи́нꙋ живота̀ на́шегѡ, безболѣ́зненнꙋ, непосты́днꙋ, ми́рнꙋ, ст҃ы́хъ та̑инъ прича́стнꙋ. Во вре́мѧ и҆схо́да на́шегѡ предста́ни на́мъ, дв҃о бцⷣе, и҆ и҆зба́ви ны̀ ѿ вла́сти бѣсо́вскїѧ, воздꙋ́шныхъ го́рькихъ мыта́рствъ и҆ ѻ҆гнѧ̀ вѣ́чнагѡ. Сконча́вшымсѧ внеза́пною сме́ртїю млⷭ҇тива бы́ти сн҃а твоего̀ ᲂу҆молѝ и҆ ѡ҆ всѣ́хъ ᲂу҆со́пшихъ, и҆̀же не и҆́мꙋтъ сро́дникѡвъ, ѡ҆ ᲂу҆покое́нїи и҆́хъ сн҃а твоего̀ ᲂу҆молѧ́ющихъ, сама̀ бꙋ́ди непреста́ннаѧ и҆ те́плаѧ мл҃твенница и҆ хода́таица. Преста́вльшыѧсѧ же въ вѣ́рѣ и҆ покаѧ́нїи ѿ вре́меннагѡ житїѧ̀ сегѡ̀ ѻ҆тцы̀, бра́тїю и҆ сєстры̀ на́шѧ сподо́би твои́мъ хода́тайствомъ всели́тисѧ во ѻ҆би́телехъ нбⷭ҇ныхъ со а҆́гг҃лы и҆ со всѣ́ми ст҃ы́ми, и҆дѣ́же не престаю́тъ гла́си пра́зднꙋющихъ и҆ ра́достнѡ сла́вѧщихъ прест҃ꙋ́ю трⷪ҇цꙋ, ѻ҆ц҃а̀ и҆ сн҃а и҆ ст҃а́го дх҃а, ны́нѣ и҆ при́снѡ, и҆ во вѣ́ки вѣкѡ́въ. А҆ми́нь.
Ѽ прест҃а́ѧ влⷣчце бцⷣе, цр҃и́це нб҃сѐ и҆ землѝ, къ тебѣ̀ прибѣга́емъ и҆ къ твое́й по́мощи взыва́емъ: сохранѝ зе́млю на́шꙋ ѿ наше́ствїѧ врагѡ́въ и҆ноплеме́нныхъ и҆ междоꙋсо́бныѧ бра́ни, и҆ на́съ ѿ всѧ́кїѧ болѣ́зни дꙋше́вныѧ и҆ тѣле́сныѧ, и҆ ѿ смертоно́сныѧ ꙗ҆́звы: да всегда̀ пое́мъ, велича́емъ и҆ сла́вимъ тѧ̀, прест҃ꙋ́ю бцⷣꙋ, ꙗ҆́кѡ бл҃гꙋ́ю и҆ ди́внꙋю застꙋ́пницꙋ на́шꙋ во вѣ́ки вѣкѡ́въ. А҆ми́нь.