Кондак 1
Избра́нней от все́х родо́в Бо́жией Ма́тери, Небесе́ и земли́ Цари́це, освяти́вшей ро́д челове́ческий прише́ствием к на́м во всечестне́м рождестве́ Свое́м, благогове́йная пе́ния прино́сим Ти́ раби́ Твои́, Богоро́дице. Ты́ же, я́ко прише́дшая на утеше́ние и спасе́ние на́ше, от вся́ких на́с бе́д свободи́, да зове́м Ти́:
Ра́дуйся, Пречи́стая, ве́сь ми́р рождество́м Свои́м возвесели́вшая.
Икос 1
Арха́нгел Гаврии́л по́слан бы́сть к пра́ведней А́нне, егда́ та́ в ско́рби непло́дства своего́ возопи́ ко Го́споду из глубины́ серде́чныя, узре́вши в са́де свое́м гнездо́ пти́чие, птенцы́ ма́лыя иму́щее, и благовести́ е́й ра́дость ве́лию, глаго́ля: «Услы́шана моли́тва твоя́, сле́зы же твоя́ пред Бо́гом внидо́ша, и се́ роди́ши Дще́рь преблагослове́нную, о Не́йже возблагословя́тся вся́ коле́на земна́я, нарече́тся же и́мя Е́й — Мари́я». Сему́ ра́достному обетова́нию чудя́щеся, возопие́м Преблагослове́нней:
Ра́дуйся, от благоро́днейшаго ца́рскаго ко́рене Иоаки́мом произраще́нная; ра́дуйся, от свяще́ннейшаго архиере́йскаго ро́да А́нною рожде́нная.
Ра́дуйся, прароди́телей на́ших от тли́ сме́ртныя свободи́вшая; ра́дуйся, роди́телей Твои́х поноше́ния безча́дства разреши́вшая.
Ра́дуйся, свята́я врата́, на восто́к зря́щая, рождество́м Свои́м е́же от непло́дове отве́рзшая; ра́дуйся, де́вственная две́ре заключе́нная, вхо́да Святи́теля Вели́каго ожида́ющая.
Ра́дуйся, сле́з ма́тере Твоея́ на ра́дость премене́ние; ра́дуйся, тоя́ поноше́ния в лю́дех отъя́тие.
Ра́дуйся, вели́кое ро́ждшим Тя́ утеше́ние; ра́дуйся, всему́ ми́ру наслажде́ние.
Ра́дуйся, па́дшаго Ада́ма воззва́ние; ра́дуйся, сле́з Е́виных избавле́ние.
Ра́дуйся, Пречи́стая, ве́сь ми́р рождество́м Свои́м возвесели́вшая.
Кондак 2
Ви́дящи пра́ведная А́нна вели́каго Арха́нгела явле́ние, и слы́шавши глаго́лы его́, поклони́ся Бо́гу и рече́: «Жи́в Госпо́дь Бо́г, я́ко а́ще рожду́ отроча́, да́м е́ в слу́жбу Ему́, да бу́дет служа́ и хваля́ и́мя Его́ свято́е де́нь и но́щь во вся́ ле́та живота́ своего́». Испо́лнися же ра́дости неизглаго́ланныя и тече́ во Иерусали́м со тща́нием, да та́мо в це́ркви воспое́т Бо́гу благода́рственно: Аллилу́иа.
Икос 2
Ра́зум чи́ст имя́ше пред Бо́гом пра́ведный Иоаки́м, оба́че от люде́й отве́ржен бы́сть во хра́ме безча́дия ра́ди, и в ско́рби се́й и́де в пусты́ню, и та́мо моля́ся со слеза́ми, рече́: «Не вложу́ во уста́ моя́ пи́щи, ни в до́м мо́й возвращу́ся, но сле́зы моя́ пи́щею ми́ да бу́дут и пусты́ня — до́мом, до́ндеже посети́т мя́ Госпо́дь Бо́г Изра́илев». И се́ А́нгел Госпо́день яви́ся ему́ и благовести́, я́ко роди́тся ему́ Дще́рь, о Ея́же рождестве́ ра́дость бу́дет всему́ ми́ру. Се́ю ра́достию испо́лнився, и́де в Иерусали́м, и та́мо ку́пно с А́нною просла́виша Бо́га, глаго́люще Обетова́нней:
Ра́дуйся, от ле́т дре́вних все́ми ча́емая; ра́дуйся, от все́х проро́к я́ве предрече́нная.
Ра́дуйся, от сложе́ния ми́ра Бо́гом предызбра́нная; ра́дуйся, от паде́ния прароди́телей гре́шным обетова́нная.
Ра́дуйся, сове́те неизрече́нный предве́чнаго попече́ния; ра́дуйся, о́бразе благонапи́санный Боже́ственнаго Предве́дения.
Ра́дуйся, сви́тче одушевле́нный, в не́мже пе́рстом Бо́жиим написа́ся Сло́во; ра́дуйся, исто́чниче присноживо́тный, из него́же изоби́льно источи́ся благове́стие Христо́во.
Ра́дуйся, Боготка́нная порфи́ро, в ню́же облече́ся Предве́чное Сло́во; ра́дуйся, благоуха́нное ми́ро, в не́же всели́ся благода́ть Ду́ха Пресвята́го.
Ра́дуйся, па́че зла́та вся́каго блиста́ющая, нерукотворе́нная пала́то Прему́дрости Бо́жия; ра́дуйся, у́тра вся́каго со́лнечнаго светле́йшая, жили́ще Христо́во.
Ра́дуйся, Пречи́стая, ве́сь ми́р рождество́м Свои́м возвесели́вшая.
Кондак 3
Си́ла Вы́шняго осени́ тогда́ к зача́тию заматоре́вшую во дне́х свои́х пра́ведную А́нну, и непло́дная тоя́ ложесна́ я́ко ни́ву показа́ благопло́дную, да прозя́бнет от нея́ на ра́дость всему́ ми́ру, в ско́рби погиба́ющему, село́ сла́дкое, Преблагослове́нная Де́ва Мари́я, все́м хотя́щим жа́ти спасе́ние и воспева́ти из глубины́ душе́вныя: Аллилу́иа.
Икос 3
Иму́ще, Пречи́стая, роди́тели Твои́ житие́ непоро́чное, зача́ша Тя́ в ста́рости до́брей, не плотски́м сласте́м прилежа́ще, но в целому́дрии и воздержа́нии подвиза́ющеся, да яви́тся в рождестве́ Твое́м не естества́ произволе́ние, но благода́ти Бо́жия си́ла, естества́ чи́н побежда́ющая, и да позна́ют вси́, я́ко моли́тва вку́пе и воздыха́ние непло́дства прозябе́ Тя пло́д живоно́сен ми́ру. Сего́ ра́ди почита́юще всесла́вное зача́тие Твое́, пое́м Тебе́ сицева́я:
Ра́дуйся, непло́дныя ма́тере увеселе́ние; ра́дуйся, безча́дных роди́телей утеше́ние.
Ра́дуйся, от су́ха ко́рене Иессе́ова прозя́бшая; ра́дуйся, и цве́т от него́ Христа́ произрасти́вшая.
Ра́дуйся, я́ко еще́ в зача́тии Твое́м естества́ уста́вы побежда́ются; ра́дуйся, я́ко си́м Твоего́ де́вства в рождестве́ сохране́ние предвозвеща́ется.
Ра́дуйся, я́ко отто́ле возве́яша ве́три, спасе́ния провозве́стницы; ра́дуйся, я́ко отону́дуже пло́д ражда́ти благода́ть начина́ет.
Ра́дуйся, я́ко Тобо́ю естества́ на́шего непло́дство побежда́ется; ра́дуйся, я́ко Тобо́ю прама́терняя кля́тва разреша́ется.
Ра́дуйся, всеми́рныя ра́дости провозвеще́ние; ра́дуйся, нача́ло на́шего спасе́ния.
Ра́дуйся, Пречи́стая, ве́сь ми́р рождество́м Свои́м возвесели́вшая.
Кондак 4
Бу́рею печа́лей и скорбе́й мно́гих одержи́ми бы́вше пра́веднии роди́тели Твои́, Пречи́стая, я́ко до ста́рости безпло́дни бы́ша, мня́ху себе́ недосто́йны име́ти насле́дие во Ца́рствии Бо́жием. Сострада́ше же с ни́ми от ве́ка о непло́дстве естества́ на́шего вся́ тва́рь, суете́ повину́вшися: стене́т у́бо Ада́м, я́ко проклята́ бы́сть земля́ его́ ра́ди; рыда́ет же и Е́ва, я́ко умно́жишася печа́ли и боле́зни ея́; совоздыха́ет же с ни́ми и ве́сь ро́д челове́чь, тле́нию приобщи́вся. Егда́ же, о Богома́ти, рождество́м Твои́м разреши́ся дре́внее непло́дство и тле́ние потреби́ся, вся́ тва́рь благода́рственне о Тебе́ возопи́ Бо́гу: Аллилу́иа.
Икос 4
Услы́ша Госпо́дь Бо́г пра́ведных Иоаки́ма и А́нны воздыха́ния и дарова́ и́м, по обетова́нию Арха́нгелову, Дще́рь Пречи́стую и Преблагослове́нную, Де́ву Мари́ю, спасе́ния на́шего нача́ло и Хода́таицу, о Ея́же рождестве́ Не́бо и земля́ возра́довастася, А́нгели и Арха́нгели возвесели́шася, лю́дие же, просла́вивше Бо́га, воспе́ша си́це:
Ра́дуйся, Мари́е, вели́кое всея́ тва́ри чу́до; ра́дуйся, Дщи́ Дави́дова, Госпо́дня же Ма́ти.
Ра́дуйся, еди́ная в жена́х благослове́нная; ра́дуйся, от А́нгел на Небесе́х препросла́вленная.
Ра́дуйся, заре́ незаходи́мая, све́т ми́рови возсия́вшая; ра́дуйся, лампа́до неугаси́мая, но́щь скорбе́й просвети́вшая.
Ра́дуйся, я́ко виде́ние зра́ка Твоего́ А́нгелом пресла́достно; ра́дуйся, я́ко явле́ние Твое́ ми́ру челове́ком прера́достно.
Ра́дуйся, но́вый раю́, на земли́ насажде́нный; ра́дуйся, све́тлый черто́же, Небе́сному Царю́ преукраше́нный.
Ра́дуйся, пала́то Ду́ха Пресвята́го; ра́дуйся, ски́ния Бо́га с челове́ки.
Ра́дуйся, Пречи́стая, ве́сь ми́р рождество́м Свои́м возвесели́вшая.
Кондак 5
Боготе́чную звезду́, от Назаре́та возсия́вшую и ве́сь ми́р просвети́вшую, зри́м Тя́, Пресвята́я Де́во; ма́л бо бе́ гра́д, его́же освяти́ла еси́ рождество́м Твои́м, и презира́емь бе́ у люде́й, я́коже все́м глаго́лати: «От Назаре́та мо́жет ли что́ добро́ бы́ти?» — оба́че немощна́я и уничиже́нная избра́ Бо́г, да кре́пкая посрами́т, и яви́ от Назаре́та Тя́ всему́ ми́ру цве́т неувяда́емый, де́вством присноцвету́щий, все́х святы́х святе́йшую Де́ву, греха́ во все́м житии́ Свое́м ни еди́наго же позна́вшую, да вси́ о Тебе́ благода́рственно воспое́м Бо́гу: Аллилу́иа.
Икос 5
Ви́девше роди́тели Твои́ чу́дное рождество́ Твое́, Пречи́стая, принесо́ша Бо́гу да́ры вели́кия, и благослове́ни бы́ша от свяще́нник и от все́х люде́й, я́ко восприя́вшии благослове́ние Бо́жие, и сотвори́ша учрежде́ние ве́лие в дому́ свое́м, веселя́щеся ду́хом и прославля́юще Бо́га. Помина́юще же обетова́ние А́нгельское, почита́ху Тя́, я́ко Госпожу́ Свою́, и поклони́вшеся, воспе́ша Тебе́ си́це:
Ра́дуйся, пре́жде все́х ве́к пронарече́нная Ду́ха Свята́го Неве́сто; ра́дуйся, в после́дняя времена́ я́вльшаяся Сы́на Бо́жия Ма́ти, Де́во.
Ра́дуйся, Бо́гу Отцу́ Дще́рь от все́х родо́в избра́нная; ра́дуйся, Живонача́льныя Тро́ицы заря́ми ди́вно осия́нная.
Ра́дуйся, вся́ Небе́сныя Си́лы без разсужде́ния превосходя́щая; ра́дуйся, вся́ де́монския ра́ти посрамля́ющая и отгоня́ющая.
Ра́дуйся, всему́ ро́ду челове́ческому всемо́щная Засту́пнице; ра́дуйся, все́м ка́ющимся гре́шником всеми́лостивая Хода́таице.
Ра́дуйся, честны́х же́н похвало́; ра́дуйся, чи́стых де́в сла́во.
Ра́дуйся, от ма́лаго Назаре́та добро́ всему́ ми́ру прине́сшая; ра́дуйся, да́же до после́дних земли́ любо́вию Свое́ю все́х покры́вшая.
Ра́дуйся, Пречи́стая, ве́сь ми́р рождество́м Свои́м возвесели́вшая.
Кондак 6
Пропове́дница прише́ствия Христо́ва в ми́р Тобо́ю, Богоро́дице, бы́сть пра́ведная Елисаве́та, егда́, узре́вши Тя́, в до́м ея́ гряду́щую, изы́де на сре́тение Твое́ и возопи́ гла́сом ве́лиим: «Благослове́нна Ты́ в жена́х, и благослове́н Пло́д чре́ва Твоего́. И отку́ду мне́ сие́, да прии́де Ма́ти Го́спода моего́ ко мне́?» Си́це и мы́, пресла́вное рождество́ Твое́ я́ко посеще́ние земли́ на́шея пра́зднующе, срета́ем Тя́ приве́тствием си́м: благослове́нна Ты́ в жена́х, и благослове́н Пло́д чре́ва Твоего́, Ему́же вси́ благода́рственно да воспое́м: Аллилу́иа.
Икос 6
Возсия́ ра́дость рождества́ Твоего́, Пречи́стая, не то́чию пра́ведным роди́телем Твои́м, но и все́м бли́жним и дале́че су́щим, и да́же до коне́ц вселе́нныя: я́ко Бо́г на разу́мных Престо́лех почива́яй Престо́л Свя́т Себе́ предугото́ва уже́ на земли́, и Заря́ но́вая яви́ся, предвозвеща́ющи Со́лнца пра́вды Христа́ прише́ствие ско́рое. Сего́ ра́ди воспое́м Ти́, Чи́стая, си́це:
Ра́дуйся, заре́ светле́йшая, вели́каго Со́лнца Христа́ Провозве́стнице; ра́дуйся, луче́ незаходи́мая, Невече́рняго Све́та Роди́тельнице.
Ра́дуйся, огне́м Твои́х моли́тв челове́ки от страсте́й очища́ющая; ра́дуйся, росо́ю Твоея́ благода́ти пла́мень гее́нны охлажда́ющая.
Ра́дуйся, о́блаче Све́та Боже́ственнаго, вся́кое помраче́ние разоря́яй; ра́дуйся, благоуха́нное кади́ло, моли́твы ве́рных к Сы́ну Твоему́ вознося́щее.
Ра́дуйся, Небе́сный киво́те, от превы́шних к земны́м пренесе́нный; ра́дуйся, огнеобра́зный престо́ле, Небе́сному Царю́ на земли́ угото́ванный.
Ра́дуйся, ски́нию Дави́дову па́дшую возста́вившая; ра́дуйся, превы́шний Иерусали́м Небе́сный на земли́ яви́вшая.
Ра́дуйся, пречестну́ю багряни́цу от крове́й Твои́х А́гнцу Бо́жию приугото́вившая; ра́дуйся, Боготка́нную порфи́ру Сло́ву Бо́жию от пло́ти Твоея́ истка́вшая.
Ра́дуйся, Пречи́стая, ве́сь ми́р рождество́м Свои́м возвесели́вшая.
Кондак 7
Хотя́й долготерпели́вый Госпо́дь яви́ти бе́здну человеколю́бия Своего́ к па́дшему дре́вле в раи́ ро́ду челове́ческому, даде́ та́мо прароди́телем на́шим обетова́ние, я́ко се́мя жены́ сотре́т главу́ зми́я, в после́дняя же времена́ испо́лни на Тебе́, Пречи́стая, первообетова́ние Свое́, избра́в Тя́ Еди́ну от все́х родо́в в Ма́терь Себе́, да рождество́м Твои́м сотре́ши главу́ дре́вняго зми́я, сего́ ра́ди благода́рственно воспое́м Бо́гу: Аллилу́иа.
Икос 7
Но́вая стра́шная и чу́дная та́инства Твоя́, Богоро́дице, и но́вый яви́лся е́сть Исто́чник жи́зни вме́сто Е́вы чу́вственныя: та́ бо, повину́вшися зми́ю, нача́ло положи́ отвраще́ния лица́ Бо́жия от челове́к и печа́ль роди́ жена́м. Тво́й же Сы́н, о Де́во, И́же Е́вину утро́бу осуди́ ражда́ти ча́да в боле́знех, во Твое́ чре́во всели́ся безболе́зненно, ключи́ де́вства невреди́вый в рождестве́ Твое́м. Сего́ ра́ди Тобо́ю ра́дуется па́дшее челове́ческое естество́, вме́сто дре́вния кля́твы свобо́ду Христо́ву получи́вше: Тебе́ после́дующа, жены́ я́ве враги́ побежда́ти начина́ют, де́вства держа́щася и вопию́ща Тебе́ такова́я:
Ра́дуйся, Боже́ственною сла́вою преукраше́нная; ра́дуйся, чистото́ю де́вства превознесе́нная.
Ра́дуйся, па́дшее челове́ческое естество́ обожи́вшая; ра́дуйся, же́н от дре́вния печа́ли свободи́вшая.
Ра́дуйся, красото́ю де́вства Твоего́ Гаврии́ла удиви́вшая; ра́дуйся, пресве́тлою чистото́ю Твое́ю А́нгельския собо́ры неизмери́мо превозше́дшая.
Ра́дуйся, две́ре непроходи́мая, Еде́м заключе́нный отве́рзшая; ра́дуйся, кни́го запечатле́нная, недове́домыя та́йны Бо́жия вмести́вшая.
Ра́дуйся, благоуха́нный кри́не де́вства; ра́дуйся, неувяда́емый цве́те чистоты́.
Ра́дуйся, Небе́сное де́вство на земли́ насади́вшая; ра́дуйся, две́ри ра́йския па́дшим отве́рзшая.
Ра́дуйся, Пречи́стая, ве́сь ми́р рождество́м Свои́м возвесели́вшая.
Кондак 8
Стра́нное рождество́ Твое́ от непло́дове ви́дяще сла́сти неприча́стное, но от целому́дрия и воздержа́ния просия́вшее, устрани́мся су́етнаго ми́ра, и вся́каго нецелому́дрия душе́внаго и теле́снаго, умы́ и сердца́ на Небеса́ прело́жше. На сие́ бо пришла́ еси́ в ми́р, Ма́ти целому́дрия, да ни́жняя возведе́ши к го́рней высоте́, и да научи́ши все́х чи́стыми усты́ и нескве́рным се́рдцем воспева́ти Бо́гу: Аллилу́иа.
Икос 8
«Вся́ добра́ еси́, бли́жняя Моя́, и поро́ка не́сть в Тебе́. Воста́ни, прииди́, Голуби́це Моя́, яви́ Ми зра́к Тво́й и услы́шан сотвори́ Ми гла́с Тво́й, я́ко гла́с Тво́й сла́док и о́браз Тво́й красе́н. Еди́на еси́ ма́тере Твоея́, избра́нна еси́ роди́вшей Тя́», — та́ко глаго́лаше Сы́н Тво́й и Госпо́дь, Пречи́стая, срета́я е́же от непло́дове рождество́ Твое́. Сему́ Боже́ственному гла́су вне́млюще, дерза́ем воспева́ти Тебе́ такова́я:
Ра́дуйся, Цари́це, одесну́ю Царя́ Христа́ предста́вшая; ра́дуйся, Влады́чице, в ри́зы позлаще́ны де́вства оде́янная и преукраше́нная.
Ра́дуйся, Ея́же добро́ты возжела́ Ца́рь Небе́сный; ра́дуйся, И́мже бли́жнею и до́брою в жена́х нарече́на была́ еси́.
Ра́дуйся, восходя́щая от пусты́ни, я́ко о́блак ды́ма, сми́рну и лива́н кадя́й; ра́дуйся, ми́ро излия́нное, благоуха́ние от Небе́снаго Мирова́рца износя́щее.
Ра́дуйся, вертогра́де заключе́нный, в него́же никто́же возмо́жет взы́ти; ра́дуйся, кла́дезю запечатле́нный, от его́же глубины́ никто́же возмо́жет испи́ти.
Ра́дуйся, блиста́ющаяся, я́ко у́тро, во тьме́ седя́щим; ра́дуйся, восходя́щая, я́ко луна́, избра́нная, я́ко со́лнце.
Ра́дуйся, исто́чниче воды́ живо́тныя, приснотеку́щия от Престо́ла Бо́жия; ра́дуйся, дре́во жи́зни, присноцвету́щее посреде́ рая́.
Ра́дуйся, Пречи́стая, ве́сь ми́р рождество́м Свои́м возвесели́вшая.
Кондак 9
Вся́кое естество́ А́нгельское ра́достию возра́довася, прославля́юще Бо́га, егда́ по рождестве́ Твое́м, Пречи́стая, святи́тель вели́кий со иере́и и людьми́ избра́нными прии́де в до́м роди́телей Твои́х, моли́твы благода́рственныя возсыла́юще. Егда́ же благослови́ Тя, воздви́же гла́с сво́й, глаго́ля: «Бо́же оте́ц на́ших, благослови́ младе́нца сего́ и да́руй Е́й и́мя, да бу́дет просла́влено во вся́ ро́ды». И нарече́ Тебе́ и́мя Мари́я, вели́кое и благода́тное, лю́дем пресла́достное, де́моном же стра́ха испо́лнено, и возопи́ с весе́лием: Аллилу́иа.
Икос 9
Вети́и многовеща́ннии, я́ко ры́бы безгла́сныя, недоумева́ют, ка́ко воспе́ти Твою́ равноа́нгельскую от младе́нческих пеле́н чистоту́, Пречи́стая, ю́же дарова́ Ти Госпо́дь, да предста́вит Тя́ Ма́терь Свою́, не иму́щу скве́рны, или́ поро́ка, или́ не́что от таковы́х, но да бу́деши свя́та и непоро́чна. Сего́ ра́ди ма́ти Твоя́ со тща́нием соблюда́ше Тя́ в непоро́чней чистоте́, да ника́коже одушевле́нному киво́ту Бо́жию ко́снется рука́ скве́рных: та́ бо освяти́ ло́же Твое́ и себе́ саму́ отчужда́ше от вся́кия скве́рны и призва́ чи́стыя де́вы храни́ти поко́й Тво́й. И егда́ сосца́ми пита́ше Тя́, моли́тву де́яше, да с млеко́м ма́терним наипа́че напита́ешися Бо́жиим сло́вом. Такове́й непоро́чней чистоте́ Твое́й чудя́щеся, вопие́м Ти́ си́це:
Ра́дуйся, от младе́нчества Твоего́ ни еди́наго греха́ позна́вшая; ра́дуйся, от рождества́ Твоего́ все́х святы́х святе́йшая.
Ра́дуйся, моли́твою па́че млека́ отдое́ная; ра́дуйся, сло́вом Бо́жиим па́че хле́ба насыще́нная.
Ра́дуйся, Небе́сное произраста́ние, на земли́ насажде́нное; ра́дуйся, ра́йское прозябе́ние, от роди́телей Твои́х воспита́нное.
Ра́дуйся, чи́стая Голуби́це, Ея́же чистоты́ не бе́ досто́ин ми́р ве́сь; ра́дуйся, нескве́рная А́гнице, Ея́же непоро́чность яви́ Ю́ досто́йну Ма́терь Христу́.
Ра́дуйся, ма́нием Вседержи́теля от непло́дове пло́д возсия́вшая; ра́дуйся, досто́йное Твоея́ чистоты́ рождество́ восприя́вшая.
Ра́дуйся, я́ко от восто́к со́лнца до за́пад хва́льно и́мя Твое́; ра́дуйся, я́ко от все́х родо́в благослове́нна Ты́ в жена́х.
Ра́дуйся, Пречи́стая, ве́сь ми́р рождество́м Свои́м возвесели́вшая.
Кондак 10
Спасти́ хотя́й ми́р от пре́лести вра́жия, Человеколю́бец Госпо́дь избра́ Тя от земна́го ро́да, от ма́лаго гра́да и от непло́дныя утро́бы в Ма́терь Себе́, от ве́ка предопределе́нную, проро́ки же дре́вле пропове́данную, Хода́таицу бы́ти на́шего спасе́ния, да бу́деши печа́льным и в беда́х су́щим ско́рое утеше́ние и мирска́го непло́дства разреше́ние, все́м же во мра́це греха́ блужда́ющим да яви́ши Со́лнце пра́вды Христа́, во е́же пе́ти Ему́: Аллилу́иа.
Икос 10
Стена́ еси́ и прибе́жище все́м челове́ком, Богоро́дице Де́во, Твое́ рождество́ пра́зднующим: Ты́ бо от черто́га ма́лаго гра́д Бо́жий су́щая, е́же бы́ти начина́еши, и от утро́бы неражда́ющия исхо́д соверша́еши, да угото́ваеши вхо́д Святи́телю Вели́кому: Еди́н бо Бо́г Тобо́ю про́йде стра́нною стезе́ю, неопа́льну Тя́ сохрани́в. Сего́ ра́ди со дерзнове́нием зове́м Ти́, еди́ней чи́стей и благослове́нней, такова́я:
Ра́дуйся, на Небесе́х преблагослове́нная; ра́дуйся, на земли́ препросла́вленная.
Ра́дуйся, А́нгелов ра́досте и увеселе́ние; ра́дуйся, земноро́дным отра́до и утеше́ние.
Ра́дуйся, Го́рлице богогла́сная и незло́бивая; ра́дуйся, Ю́нице кро́ткая и ти́хая.
Ра́дуйся, Ду́ха Всесвята́го хра́ме святе́йший; ра́дуйся, Небе́снаго уневе́щения черто́же чисте́йший.
Ра́дуйся, росо́ Аермо́нская, на го́ры Сио́нския соше́дшая; ра́дуйся, алава́стре ми́ра многоце́ннаго, зе́млю облагоуха́вший.
Ра́дуйся, гра́де Бо́жий, от черто́га ма́лаго прозябе́ние; ра́дуйся, в Назаре́те гра́де от су́ха ко́рене произраста́ние.
Ра́дуйся, Пречи́стая, ве́сь ми́р рождество́м Свои́м возвесели́вшая.
Кондак 11
Пе́ние благода́рственное воспева́ют ду́хом Иоаки́м чу́дный и пра́ведная А́нна, я́ко ви́деша на земли́ Ма́терь Созда́теля, Ю́же роди́ша, Дще́рь Мари́ю. С ни́ми же и мы́, Влады́чице, равночи́сленныя песка́ морска́го пе́сни прино́сим Ти́, восхваля́юще пресла́вное от непло́дных ложе́сн рождество́ Твое́, благода́рственно воспева́юще Бо́гу: Аллилу́иа.
Икос 11
Светоприе́мную свещу́, в нощи́ богоневе́дения рождество́м Твои́м пресла́вно возжже́нную, ви́дим Тя́, Пресвята́я Де́во: все́м бо во тьме́ греха́ и се́ни сме́ртней седя́щим возсия́ла еси́ све́т, ра́дость, благода́ть и разреше́ние дре́вния кля́твы, Е́вы ра́ди бы́вшия: из Тебе́ бо возсия́ Со́лнце пра́вды Христо́с Бо́г на́ш, просвеща́яй су́щия во тьме́, вопию́щия в похвалу́ Тебе́ такова́я:
Ра́дуйся, заре́ дне́ невече́рняго, врата́ Ца́рствия Христо́ва отве́рзшая; ра́дуйся, денни́це светле́йшая, спасе́ние на́м возвести́вшая.
Ра́дуйся, звездо́ незаходи́мая, Вели́кое Со́лнце в ми́р се́й вводя́щая; ра́дуйся, свеще́ светоза́рная, дре́внюю тьму́ грехо́вную разгоня́ющая.
Ра́дуйся, исто́чниче живоно́сный, жи́знь все́м подаю́щий; ра́дуйся, свети́льниче, пре́жде со́лнца Све́т на́м источи́вший.
Ра́дуйся, еще́ су́щей тьме́, заря́ми благода́ти на́с просвети́вшая; ра́дуйся, Ма́ти Све́та у́мнаго, благода́тию всю́ вселе́нную озари́вшая.
Ра́дуйся, Неве́сто черто́га светосия́ннаго; ра́дуйся, сия́нием ри́зы Своея́ всю́ поднебе́сную облиста́вшая.
Ра́дуйся, Же́но, облече́нная в со́лнце, в ми́р на спасе́ние погиба́ющим я́вльшаяся; ра́дуйся, под нога́ма Свои́ма луну́ иму́щая, от двоюна́десяте зве́зд увенча́нная.
Ра́дуйся, Пречи́стая, ве́сь ми́р рождество́м Свои́м возвесели́вшая.
Кондак 12
Благода́ти тезоимени́тая блаже́нная А́нна весели́тся и хва́лящися вопие́т: «Непло́ды су́щи, роди́х Бо́жию Ма́терь, Ея́же ра́ди осужде́ние Е́вино разреши́ся и я́же в печа́лех боле́знь». И та́ко ра́дующися, даде́ обе́т привести́ Дще́рь свою́ ро́ждшуюся Бо́гови, да бу́дет Ему́ в да́р соверше́н от все́х родо́в земны́х, челове́ком же в ве́чное утеше́ние и ра́дование, во е́же пе́ти и́м вы́ну: Аллилу́иа.
Икос 12
Пое́м Твое́ пречи́стое рождество́, чти́м и несказа́нное зача́тие, покланя́емся са́мым пелена́м Твои́м, Неве́сто Богозва́нная и Де́во; славосло́вят же с на́ми вку́пе Твое́ в ми́р прише́ствие А́нгелов и Арха́нгелов чи́ни и ду́ш святы́х собо́ри: о́бщая бо ра́дость возсия́ на Небеси́ и на земли́ от пра́ведных Иоаки́ма и А́нны рождество́м Твои́м, Богоро́дице, его́же прославля́юще, вопие́м Ти́ такова́я:
Ра́дуйся, Всенепоро́чная, по Святе́й Тро́ице о́бщая все́х А́нгел и челове́к Влады́чице; ра́дуйся, Всеблагослове́нная, по Уте́шители о́бщая все́х на Небеси́ и на земли́ Уте́шительнице.
Ра́дуйся, красото́ в десни́це Госпо́дни, украша́ющая блажа́щих Тя́ все́х Небе́сных; ра́дуйся, утеше́ние Вседержи́телево, возвеселя́ющее призыва́ющих Тя́ все́х земны́х.
Ра́дуйся, не́бо небе́с, вся́ А́нгельския си́лы без сравне́ния превосходя́щее; ра́дуйся, чу́до чуде́с, все́х челове́ков пе́рсть в Те́ло Бо́жие созида́ющее.
Ра́дуйся, Цари́це цари́ц, все́й вселе́нней преде́л соде́ловавшая грехо́вному растле́нию; ра́дуйся, свята́я святы́х все́й Це́ркве Христо́вы, нача́ло положи́вшая на́шему спасе́нию.
Ра́дуйся, Боголе́пная Деви́це, все́х време́н и веко́в Бо́жие благослове́ние; ра́дуйся, Богоизбра́нная Отрокови́це, все́х язы́к и родо́в благода́тное примире́ние.
Ра́дуйся, сто́лпе де́вства, все́м де́вства жела́ющим добро́ту де́вства я́ве низпосыла́ющая; ра́дуйся, две́ре спасе́ния, все́м спасе́ния ча́ющим по́мощь вско́ре подаю́щая.
Ра́дуйся, Пречи́стая, ве́сь ми́р рождество́м Свои́м возвесели́вшая.
Кондак 13
О всепе́тая Ма́ти, от непло́дове ро́ждшаяся на спасе́ние ми́ру, ны́нешняя на́ша о всечестне́м рождестве́ Твое́м прие́мши приноше́ния, не оста́ви на́с во вре́мя живота́ на́шего, от вся́кия напа́сти и пле́на вра́жия изба́ви на́с и от непло́дства душе́внаго разреши́ все́х, о Тебе́ вопию́щих: Аллилу́иа.
Повтор
Этот кондак читается трижды, затем икос 1-й и кондак 1-й.
Икос 1
Арха́нгел Гаврии́л по́слан бы́сть к пра́ведней А́нне, егда́ та́ в ско́рби непло́дства своего́ возопи́ ко Го́споду из глубины́ серде́чныя, узре́вши в са́де свое́м гнездо́ пти́чие, птенцы́ ма́лыя иму́щее, и благовести́ е́й ра́дость ве́лию, глаго́ля: «Услы́шана моли́тва твоя́, сле́зы же твоя́ пред Бо́гом внидо́ша, и се́ роди́ши Дще́рь преблагослове́нную, о Не́йже возблагословя́тся вся́ коле́на земна́я, нарече́тся же и́мя Е́й — Мари́я». Сему́ ра́достному обетова́нию чудя́щеся, возопие́м Преблагослове́нней:
Ра́дуйся, от благоро́днейшаго ца́рскаго ко́рене Иоаки́мом произраще́нная; ра́дуйся, от свяще́ннейшаго архиере́йскаго ро́да А́нною рожде́нная.
Ра́дуйся, прароди́телей на́ших от тли́ сме́ртныя свободи́вшая; ра́дуйся, роди́телей Твои́х поноше́ния безча́дства разреши́вшая.
Ра́дуйся, свята́я врата́, на восто́к зря́щая, рождество́м Свои́м е́же от непло́дове отве́рзшая; ра́дуйся, де́вственная две́ре заключе́нная, вхо́да Святи́теля Вели́каго ожида́ющая.
Ра́дуйся, сле́з ма́тере Твоея́ на ра́дость премене́ние; ра́дуйся, тоя́ поноше́ния в лю́дех отъя́тие.
Ра́дуйся, вели́кое ро́ждшим Тя́ утеше́ние; ра́дуйся, всему́ ми́ру наслажде́ние.
Ра́дуйся, па́дшаго Ада́ма воззва́ние; ра́дуйся, сле́з Е́виных избавле́ние.
Ра́дуйся, Пречи́стая, ве́сь ми́р рождество́м Свои́м возвесели́вшая.
Кондак 1
Избра́нней от все́х родо́в Бо́жией Ма́тери, Небесе́ и земли́ Цари́це, освяти́вшей ро́д челове́ческий прише́ствием к на́м во всечестне́м рождестве́ Свое́м, благогове́йная пе́ния прино́сим Ти́ раби́ Твои́, Богоро́дице. Ты́ же, я́ко прише́дшая на утеше́ние и спасе́ние на́ше, от вся́ких на́с бе́д свободи́, да зове́м Ти́:
Ра́дуйся, Пречи́стая, ве́сь ми́р рождество́м Свои́м возвесели́вшая.
Молитвы
О Пресвята́я и Богоизбра́нная Де́во, Влады́чице на́ша Богоро́дице, Небеси́ и земли́ Цари́це, на ра́дость и утеше́ние всему́ ми́ру от безпло́дных и безча́дных роди́телей Бо́гом дарова́нная! Роди́вшися Бо́жиим Промышле́нием, Ты́ разреши́ла еси́ непло́дствие ро́ждшия Тя́, и ны́не непло́дная сердца́ на́ша плодоно́сна сотвори́ предста́тельством Твои́м у Престо́ла Вседержи́телева, непло́дствовати же соде́лай ны́ злы́ми де́лы, гнилы́ми словесы́ и нечи́стыми помышле́ньми. О Всеблаже́нная, да яви́мся ча́да Бо́жия, доброде́телей благопло́дие при́сно принося́щая. Ты́ утоли́ла еси́ пречи́стым рождество́м Твои́м пла́ч прама́тере на́шея Е́вы и пра́ведныя роди́тели Твоя́ изба́вила еси́ поноше́ния безча́дства, и ны́не утоли́ пла́ч и воздыха́ния многоболе́зненных ду́ш на́ших и изба́ви все́х на́с поноше́ния злы́х де́л на́ших, страсте́й безче́стия и вся́каго порабоще́ния вра́жескаго. Наипа́че же да́руй на́м, Пресвята́я Богоро́дице Де́во, во всесве́тлый де́нь Рождества́ Твоего́ чи́стым се́рдцем разуме́ти и па́мятовати, с коли́кою ра́достию и благодаре́нием непло́дная утро́ба святы́я пра́ведныя А́нны ноша́ше Тя́, да и мы́ не то́чию словесы́, но наипа́че де́лы свои́ми вы́ну бу́дем со умиле́нием серде́чным прославля́ти Тя́, вопию́ще: сла́ва рождеству́ Твоему́, Чи́стая; сла́ва де́вству Твоему́, Ма́ти Безневе́стная. Ку́пно же с Тобо́ю сподо́би на́с непреста́нно сла́вити и велича́ти Всесвяты́й Пло́д Тво́й, Сло́во воплоще́нно, Ему́же сла́ва подоба́ет, че́сть и поклоне́ние, со Безнача́льным Его́ Отце́м, и с Пресвяты́м, и Благи́м, и Животворя́щим Его́ Ду́хом, ны́не и при́сно, и во ве́ки веко́в. Ами́нь.
Конда́къ а҃
И҆збра́ннѣй ѿ всѣ́хъ родѡ́въ бж҃їей мт҃ри, нб҃сѐ и҆ землѝ цр҃и́цѣ, ѡ҆ст҃и́вшей ро́дъ человѣ́ческїй прише́ствїемъ къ на́мъ во всечⷭ҇тнѣ́мъ ржⷭ҇твѣ̀ свое́мъ, бл҃гоговѣ̑йнаѧ пѣ̑нїѧ прино́симъ тѝ рабѝ твоѝ, бцⷣе. Ты́ же, ꙗ҆́кѡ прише́дшаѧ на ᲂу҆тѣше́нїе и҆ сп҃се́нїе на́ше, ѿ всѧ́кихъ на́съ бѣ́дъ свободѝ, да зове́мъ тѝ:
Ра́дꙋйсѧ, пречⷭ҇таѧ, ве́сь мі́ръ ржⷭ҇тво́мъ свои́мъ возвесели́вшаѧ.
І҆́косъ а҃
А҆рха́гг҃лъ гаврїи́лъ по́сланъ бы́сть къ првⷣнѣй а҆́ннѣ, є҆гда̀ та̀ въ ско́рби непло́дства своегѡ̀ возопѝ ко гдⷭ҇ꙋ и҆з̾ глꙋбины̀ серде́чныѧ, ᲂу҆зрѣ́вши въ са́дѣ свое́мъ гнѣздо̀ пти́чїе, птенцы̀ ма̑лыѧ и҆мꙋ́щее, и҆ бл҃говѣстѝ є҆́й ра́дость ве́лїю, глаго́лѧ: ᲂу҆слы́шана мл҃тва твоѧ̀, сле́зы же твоѧ̑ пред̾ бг҃омъ внидо́ша, и҆ сѐ роди́ши дще́рь пребл҃гослове́ннꙋю, ѡ҆ не́йже возбл҃гословѧ́тсѧ всѧ̑ колѣ̑на земна̑ѧ, нарече́тсѧ же и҆́мѧ є҆́й мр҃і́а. Семꙋ̀ ра́достномꙋ ѡ҆бѣтова́нїю чꙋдѧ́щесѧ, возопїе́мъ пребл҃гослове́ннѣй:
Ра́дꙋйсѧ, ѿ бл҃горо́днѣйшагѡ ца́рскагѡ ко́рене і҆ѡакі́момъ произраще́ннаѧ: ра́дꙋйсѧ, ѿ сщ҃е́ннѣйшагѡ а҆рхїере́йскагѡ ро́да а҆́нною
рожде́ннаѧ.
Ра́дꙋйсѧ, прароди́телей на́шихъ ѿ тлѝ сме́ртныѧ свободи́вшаѧ: ра́дꙋйсѧ, роди́телей твои́хъ поноше́нїѧ безча́дства
разрѣши́вшаѧ.
Ра́дꙋйсѧ, ст҃а̑ѧ врата̀, на восто́къ зрѧ̑щаѧ, ржⷭ҇тво́мъ свои́мъ є҆́же ѿ непло́дове ѿве́рзшаѧ: ра́дꙋйсѧ, двⷭ҇твеннаѧ две́ре заключе́ннаѧ, вхо́да ст҃и́телѧ вели́кагѡ ѡ҆жида́ющаѧ.
Ра́дꙋйсѧ, сле́зъ ма́тере твоеѧ̀ на ра́дость премѣне́нїе: ра́дꙋйсѧ, тоѧ̀ поноше́нїѧ въ лю́дехъ ѿѧ́тїе.
Ра́дꙋйсѧ, вели́кое ро́ждшымъ тѧ̀ ᲂу҆тѣше́нїе: ра́дꙋйсѧ, всемꙋ̀ мі́рꙋ наслажде́нїе.
Ра́дꙋйсѧ, па́дшагѡ а҆да́ма воззва́нїе: ра́дꙋйсѧ, сле́зъ є҆́ѵиныхъ и҆збавле́нїе.
Ра́дꙋйсѧ, пречⷭ҇таѧ, ве́сь мі́ръ ржⷭ҇тво́мъ свои́мъ возвесели́вшаѧ.
Конда́къ в҃
Ви́дѧщи првⷣнаѧ а҆́нна вели́кагѡ а҆рха́гг҃ла ꙗ҆вле́нїе, и҆ слы́шавши глаго́лы є҆гѡ̀, поклони́сѧ бг҃ꙋ и҆ речѐ: жи́въ гдⷭ҇ь бг҃ъ, ꙗ҆́кѡ а҆́ще рождꙋ̀ ѻ҆троча̀, да́мъ є҆̀ въ слꙋ́жбꙋ є҆мꙋ̀, да бꙋ́детъ слꙋжа̀ и҆ хвалѧ̀ и҆́мѧ є҆гѡ̀ ст҃о́е де́нь и҆ но́щь во всѧ̑ лѣ̑та живота̀ своегѡ̀. И҆спо́лнисѧ же ра́дости неизглаго́ланныѧ и҆ течѐ во і҆ерⷭ҇ли́мъ со тща́нїемъ, да та́мѡ въ цр҃кви воспое́тъ бг҃ꙋ бл҃года́рственнѡ: А҆ллилꙋ́їа.
І҆́косъ в҃
Ра́зꙋмъ чи́стъ и҆мѧ́ше пред̾ бг҃омъ првⷣный і҆ѡакі́мъ, ѻ҆ба́че ѿ люде́й ѿве́рженъ бы́сть во хра́мѣ безча́дїѧ ра́ди, и҆ въ ско́рби се́й и҆́де въ пꙋсты́ню, и҆ та́мѡ молѧ́сѧ со слеза́ми, речѐ: не вложꙋ̀ во ᲂу҆ста̀ моѧ̑ пи́щи, ни въ до́мъ мо́й возвращꙋ́сѧ, но сле́зы моѧ̑ пи́щею мѝ да бꙋ́дꙋтъ и҆ пꙋсты́нѧ до́момъ, до́ндеже посѣти́тъ мѧ̀ гдⷭ҇ь бг҃ъ і҆и҃левъ. И҆ сѐ а҆́гг҃лъ гдⷭ҇ень ꙗ҆ви́сѧ є҆мꙋ̀ и҆ бл҃говѣстѝ, ꙗ҆́кѡ роди́тсѧ є҆мꙋ̀ дще́рь, ѡ҆ є҆ѧ́же ржⷭ҇твѣ̀ ра́дость бꙋ́детъ всемꙋ̀ мі́рꙋ. Се́ю ра́достїю и҆спо́лнивсѧ, и҆́де въ і҆ерⷭ҇ли́мъ, и҆ та́мѡ кꙋ́пнѡ съ а҆́нною просла́виша бг҃а, глаго́люще ѡ҆бѣтова́ннѣй:
Ра́дꙋйсѧ, ѿ лѣ́тъ дре́внихъ всѣ́ми ча́емаѧ: ра́дꙋйсѧ, ѿ всѣ́хъ прⷪ҇рѡ́къ ꙗ҆́вѣ предрече́ннаѧ.
Ра́дꙋйсѧ, ѿ сложе́нїѧ мі́ра бг҃омъ пред̾избра́ннаѧ: ра́дꙋйсѧ, ѿ паде́нїѧ прароди́телей грѣ̑шнымъ ѡ҆бѣтова́ннаѧ.
Ра́дꙋйсѧ, совѣ́те неизрече́нный предвѣ́чнагѡ попече́нїѧ: ра́дꙋйсѧ, ѻ҆́бразе бл҃гонапи́санный бжⷭ҇твеннагѡ предвѣ́дѣнїѧ.
Ра́дꙋйсѧ, сви́тче ѡ҆дꙋшевле́нный, въ не́мже пе́рстомъ бж҃їимъ написа́сѧ сло́во: ра́дꙋйсѧ, и҆сто́чниче присноживо́тный, и҆з̾ негѡ́же и҆з̾ѻби́льнѡ и҆сточи́сѧ бл҃говѣ́стїе хрⷭ҇то́во.
Ра́дꙋйсѧ, бг҃отка́ннаѧ порфѵ́ро, въ ню́же ѡ҆блече́сѧ предвѣ́чное сло́во: ра́дꙋйсѧ, бл҃гоꙋха́нное мѵ́ро, въ не́же всели́сѧ бл҃года́ть дх҃а прест҃а́гѡ.
Ра́дꙋйсѧ, па́че зла́та всѧ́кагѡ блиста́ющаѧ, нерꙋкотворе́ннаѧ пала́то премⷣрости бж҃їѧ: ра́дꙋйсѧ, ᲂу҆́тра всѧ́кагѡ со́лнечнагѡ свѣтлѣ́йшаѧ, жили́ще хрⷭ҇то́во.
Ра́дꙋйсѧ, пречⷭ҇таѧ, ве́сь мі́ръ ржⷭ҇тво́мъ свои́мъ возвесели́вшаѧ.
Конда́къ г҃
Си́ла вы́шнѧгѡ ѡ҆сѣнѝ тогда̀ къ зача́тїю заматорѣ́вшꙋю во дне́хъ свои́хъ првⷣнꙋю а҆́ннꙋ, и҆ неплѡ́днаѧ тоѧ̀ ложесна̀ ꙗ҆́кѡ ни́вꙋ показа̀ бл҃гопло́днꙋю, да прозѧ́бнетъ ѿ неѧ̀ на ра́дость всемꙋ̀ мі́рꙋ, въ ско́рби погиба́ющемꙋ, село̀ сла́дкое, пребл҃гослове́ннаѧ дв҃а мр҃і́а, всѣ̑мъ хотѧ́щымъ жа́ти сп҃се́нїе и҆ воспѣва́ти и҆з̾ глꙋбины̀ дꙋше́вныѧ: А҆ллилꙋ́їа.
І҆́косъ г҃
И҆мꙋ́ще, пречⷭ҇таѧ, роди́тєли твоѝ житїѐ непоро́чное, зача́ша тѧ̀ въ ста́рости до́брѣй, не плотски̑мъ сласте́мъ прилѣжа́ще, но въ цѣломꙋ́дрїи и҆ воздержа́нїи подвиза́ющесѧ, да ꙗ҆ви́тсѧ въ ржⷭ҇твѣ̀ твое́мъ не є҆стества̀ произволе́нїе, но бл҃года́ти бж҃їѧ си́ла, є҆стества̀ чи́нъ побѣжда́ющаѧ, и҆ да позна́ютъ всѝ, ꙗ҆́кѡ мл҃тва вкꙋ́пѣ и҆ воздыха́нїе непло́дства прозѧбе́ тѧ пло́дъ живоно́сенъ мі́рꙋ. Сегѡ̀ ра́ди почита́юще всесла́вное зача́тїе твоѐ, пое́мъ тебѣ̀ сицева̑ѧ:
Ра́дꙋйсѧ, непло́дныѧ ма́тере ᲂу҆веселе́нїе: ра́дꙋйсѧ, безча́дныхъ роди́телей ᲂу҆тѣше́нїе.
Ра́дꙋйсѧ, ѿ сꙋ́ха ко́рене і҆ессе́ова прозѧ́бшаѧ: ра́дꙋйсѧ, и҆ цвѣ́тъ ѿ негѡ̀ хрⷭ҇та̀ произрасти́вшаѧ.
Ра́дꙋйсѧ, ꙗ҆́кѡ є҆щѐ въ зача́тїи твое́мъ є҆стества̀ ᲂу҆ста́вы побѣжда́ютсѧ: ра́дꙋйсѧ, ꙗ҆́кѡ си́мъ твоегѡ̀ двⷭ҇тва въ ржⷭ҇твѣ̀ сохране́нїе предвозвѣща́етсѧ.
Ра́дꙋйсѧ, ꙗ҆́кѡ ѿто́лѣ возвѣ́ѧша вѣ́три, сп҃се́нїѧ провозвѣ̑стницы: ра́дꙋйсѧ, ꙗ҆́кѡ ѿѻнꙋ́дꙋже пло́дъ ражда́ти бл҃года́ть начина́етъ.
Ра́дꙋйсѧ, ꙗ҆́кѡ тобо́ю є҆стества̀ на́шегѡ непло́дство побѣжда́етсѧ: ра́дꙋйсѧ, ꙗ҆́кѡ тобо́ю прама́тернѧѧ клѧ́тва разрѣша́етсѧ.
Ра́дꙋйсѧ, всемі́рныѧ ра́дости провозвѣще́нїе: ра́дꙋйсѧ, нача́ло на́шегѡ сп҃се́нїѧ.
Ра́дꙋйсѧ, пречⷭ҇таѧ, ве́сь мі́ръ ржⷭ҇тво́мъ свои́мъ возвесели́вшаѧ.
Конда́къ д҃
Бꙋ́рею печа́лей и҆ скорбе́й мно́гихъ ѡ҆держи́ми бы́вше првⷣнїи роди́тєли твоѝ, пречⷭ҇таѧ, ꙗ҆́кѡ до ста́рости безпло́дни бы́ша, мнѧ́хꙋ себѐ недостѡ́йны и҆мѣ́ти наслѣ́дїе во црⷭ҇твїи бж҃їемъ. Сострада́ше же съ ни́ми ѿ вѣ́ка ѡ҆ непло́дствѣ є҆стества̀ на́шегѡ всѧ̀ тва́рь, сꙋетѣ̀ повинꙋ́вшисѧ: стене́тъ ᲂу҆́бѡ а҆да́мъ, ꙗ҆́кѡ проклѧта̀ бы́сть землѧ̀ є҆гѡ̀ ра́ди: рыда́етъ же и҆ є҆́ѵа, ꙗ҆́кѡ ᲂу҆мно́жишасѧ печа̑ли и҆ болѣ̑зни є҆ѧ̀: совоздыха́етъ же съ ни́ми и҆ ве́сь ро́дъ человѣ́чь, тлѣ́нїю прїѡбщи́всѧ. Є҆гда́ же, ѽ бг҃омт҃и, ржⷭ҇тво́мъ твои́мъ разрѣши́сѧ дре́внее непло́дство и҆ тлѣ́нїе потреби́сѧ, всѧ̀ тва́рь бл҃года́рственнѣ ѡ҆ тебѣ̀ возопѝ бг҃ꙋ: А҆ллилꙋ́їа.
І҆́косъ д҃
Оу҆слы́ша гдⷭ҇ь бг҃ъ првⷣныхъ і҆ѡакі́ма и҆ а҆́нны воздыха̑нїѧ и҆ дарова̀ и҆̀мъ, по ѡ҆бѣтова́нїю а҆рха́гг҃ловꙋ, дще́рь пречⷭ҇тꙋю и҆ пребл҃гослове́ннꙋю, дв҃ꙋ мр҃і́ю, сп҃се́нїѧ на́шегѡ нача́ло и҆ хода́таицꙋ, ѡ҆ є҆ѧ́же ржⷭ҇твѣ̀ нб҃о и҆ землѧ̀ возра́довастасѧ, а҆́гг҃ли и҆ а҆рха́гг҃ли возвесели́шасѧ, лю́дїе же, просла́вивше бг҃а, воспѣ́ша си́це:
Ра́дꙋйсѧ, мр҃і́е, вели́кое всеѧ̀ тва́ри чꙋ́до: ра́дꙋйсѧ, дщѝ дв҃дова, гдⷭ҇нѧ же мт҃и.
Ра́дꙋйсѧ, є҆ди́наѧ въ жена́хъ бл҃гослове́ннаѧ: ра́дꙋйсѧ, ѿ а҆́гг҃лъ на нб҃сѣ́хъ препросла́вленнаѧ.
Ра́дꙋйсѧ, зарѐ незаходи́маѧ, свѣ́тъ мі́рови возсїѧ́вшаѧ: ра́дꙋйсѧ, лампа́до неꙋгаси́маѧ, но́щь скорбе́й просвѣти́вшаѧ.
Ра́дꙋйсѧ, ꙗ҆́кѡ видѣ́нїе зра́ка твоегѡ̀ а҆́гг҃лѡмъ пресла́достно: ра́дꙋйсѧ, ꙗ҆́кѡ ꙗ҆вле́нїе твоѐ мі́рꙋ человѣ́кѡмъ прера́достно.
Ра́дꙋйсѧ, но́вый раю̀, на землѝ насажде́нный: ра́дꙋйсѧ, свѣ́тлый черто́же, нбⷭ҇номꙋ цр҃ю̀ преꙋкраше́нный.
Ра́дꙋйсѧ, пала́то дх҃а прест҃а́гѡ: ра́дꙋйсѧ, ски́нїѧ бг҃а съ человѣ̑ки.
Ра́дꙋйсѧ, пречⷭ҇таѧ, ве́сь мі́ръ ржⷭ҇тво́мъ свои́мъ возвесели́вшаѧ.
Конда́къ є҃
Бг҃оте́чнꙋю ѕвѣздꙋ̀, ѿ назаре́та возсїѧ́вшꙋю и҆ ве́сь мі́ръ просвѣти́вшꙋю, зри́мъ тѧ̀, прест҃а́ѧ дв҃о. ма́лъ бо бѣ̀ гра́дъ, є҆го́же ѡ҆ст҃и́ла є҆сѝ ржⷭ҇тво́мъ твои́мъ, и҆ презира́емь бѣ̀ ᲂу҆ люде́й, ꙗ҆́коже всѣ̑мъ глаго́лати: ѿ назаре́та мо́жетъ ли что̀ добро̀ бы́ти: ѻ҆ба́че немощна̑ѧ и҆ ᲂу҆ничижє́ннаѧ и҆збра̀ бг҃ъ, да крѣ̑пкаѧ посрами́тъ, и҆ ꙗ҆вѝ ѿ назаре́та тѧ̀ всемꙋ̀ мі́рꙋ цвѣ́тъ неꙋвѧда́емый, двⷭ҇твомъ присноцвѣтꙋ́щїй, всѣ́хъ ст҃ы́хъ ст҃ѣ́йшꙋю дв҃ꙋ, грѣха̀ во все́мъ житїѝ свое́мъ ни є҆ди́нагѡ же позна́вшꙋю, да всѝ ѡ҆ тебѣ̀ бл҃года́рственнѡ воспое́мъ бг҃ꙋ: А҆ллилꙋ́їа.
І҆́косъ є҃
Ви́дѣвше роди́тєли твоѝ чꙋ́дное ржⷭ҇тво̀ твоѐ, пречⷭ҇таѧ, принесо́ша бг҃ꙋ да́ры вели̑кїѧ, и҆ бл҃гослове́ни бы́ша ѿ сщ҃є́нникъ и҆ ѿ всѣ́хъ люде́й, ꙗ҆́кѡ воспрїѧ́вшїи бл҃гослове́нїе бж҃їе, и҆ сотвори́ша ᲂу҆чрежде́нїе ве́лїе въ домꙋ̀ свое́мъ, веселѧ́щесѧ дꙋ́хомъ и҆ прославлѧ́юще бг҃а. Помина́юще же ѡ҆бѣтова́нїе а҆́гг҃льское, почита́хꙋ тѧ̀, ꙗ҆́кѡ гпⷭ҇жꙋ̀ свою̀, и҆ поклони́вшесѧ, воспѣ́ша тебѣ̀ си́це:
Ра́дꙋйсѧ, пре́жде всѣ́хъ вѣ̑къ пронарече́ннаѧ дх҃а ст҃а́гѡ невѣ́сто: ра́дꙋйсѧ, въ послѣ̑днѧѧ времена̀ ꙗ҆́вльшаѧсѧ сн҃а бж҃їѧ мт҃и, дв҃о.
Ра́дꙋйсѧ, бг҃ꙋ ѻ҆ц҃ꙋ̀ дще́рь ѿ всѣ́хъ родѡ́въ и҆збра́ннаѧ: ра́дꙋйсѧ, живонача́льныѧ трⷪ҇цы зарѧ́ми ди́внѡ ѡ҆сїѧ́ннаѧ.
Ра́дꙋйсѧ, всѧ̑ нбⷭ҇ныѧ си̑лы без̾ разсꙋжде́нїѧ превосходѧ́щаѧ: ра́дꙋйсѧ, всѧ̑ де́мѡнскїѧ ра̑ти посрамлѧ́ющаѧ и҆ ѿгонѧ́ющаѧ.
Ра́дꙋйсѧ, всемꙋ̀ ро́дꙋ человѣ́ческомꙋ всемо́щнаѧ застꙋ́пнице: ра́дꙋйсѧ, всѣ̑мъ ка́ющымсѧ грѣ́шникѡмъ всемлⷭ҇тиваѧ хода́таице.
Ра́дꙋйсѧ, честны́хъ же́нъ похвало̀: ра́дꙋйсѧ, чи́стыхъ дѣ́въ сла́во.
Ра́дꙋйсѧ, ѿ ма́лагѡ назаре́та добро̀ всемꙋ̀ мі́рꙋ прине́сшаѧ: ра́дꙋйсѧ, да́же до послѣ́днихъ землѝ любо́вїю свое́ю всѣ́хъ покры́вшаѧ.
Ра́дꙋйсѧ, пречⷭ҇таѧ, ве́сь мі́ръ ржⷭ҇тво́мъ свои́мъ возвесели́вшаѧ.
Конда́къ ѕ҃
Проповѣ́дница прише́ствїѧ хрⷭ҇то́ва въ мі́ръ тобо́ю, бцⷣе, бы́сть првⷣнаѧ є҆лїсаве́та, є҆гда̀ ᲂу҆зрѣ́вши тѧ̀, въ до́мъ є҆ѧ̀ грѧдꙋ́щꙋю, и҆зы́де на срѣ́тенїе твоѐ и҆ возопѝ гла́сомъ ве́лїимъ: бл҃гослове́нна ты̀ въ жена́хъ, и҆ бл҃гослове́нъ пло́дъ чре́ва твоегѡ̀. И҆ ѿкꙋ́дꙋ мнѣ̀ сїѐ, да прїи́де мт҃и гдⷭ҇а моегѡ̀ ко мнѣ̀; си́це и҆ мы̀, пресла́вное ржⷭ҇тво̀ твоѐ ꙗ҆́кѡ посѣще́нїе землѝ на́шеѧ пра́зднꙋюще, срѣта́емъ тѧ̀ привѣ́тствїемъ си́мъ: бл҃гослове́нна ты̀ въ жена́хъ, и҆ бл҃гослове́нъ пло́дъ чре́ва твоегѡ̀, є҆мꙋ́же всѝ бл҃года́рственнѡ да воспое́мъ: А҆ллилꙋ́їа.
І҆́косъ ѕ҃
Возсїѧ̀ ра́дость ржⷭ҇тва̀ твоегѡ̀, пречⷭ҇таѧ, не то́чїю првⷣнымъ роди́телємъ твои̑мъ, но и҆ всѣ̑мъ бли̑жнимъ и҆ дале́че сꙋ́щымъ, и҆ да́же до конє́цъ вселе́нныѧ: ꙗ҆́кѡ бг҃ъ на разꙋ́мныхъ прⷭ҇то́лѣхъ почива́ѧй прⷭ҇то́лъ ст҃ъ себѣ̀ пред̾ꙋгото́ва ᲂу҆жѐ на землѝ, и҆ зарѧ̀ но́ваѧ ꙗ҆ви́сѧ, предвозвѣща́ющи сл҃нца пра́вды хрⷭ҇та̀ прише́ствїе ско́рое. Сегѡ̀ ра́ди воспое́мъ тѝ, чⷭ҇таѧ, си́це:
Ра́дꙋйсѧ, зарѐ свѣтлѣ́йшаѧ, вели́кагѡ сл҃нца хрⷭ҇та̀ провозвѣ́стнице: ра́дꙋйсѧ, лꙋчѐ незаходи́маѧ, невече́рнѧгѡ свѣ́та роди́тельнице.
Ра́дꙋйсѧ, ѻ҆гне́мъ твои́хъ мл҃твъ человѣ́ки ѿ страсте́й ѡ҆чища́ющаѧ: ра́дꙋйсѧ, росо́ю твоеѧ̀ бл҃года́ти пла́мень гее́нны ѡ҆хлажда́ющаѧ.
Ра́дꙋйсѧ, ѻ҆́блаче свѣ́та бжⷭ҇твеннагѡ, всѧ́кое помраче́нїе разорѧ́ѧй: ра́дꙋйсѧ, бл҃гоꙋха́нное кади́ло, мл҃твы вѣ́рныхъ къ сн҃ꙋ твоемꙋ̀ возносѧ́щее.
Ра́дꙋйсѧ, нбⷭ҇ный кївѡ́те, ѿ превы́шнихъ къ земны̑мъ пренесе́нный: ра́дꙋйсѧ, ѻ҆гнеѻбра́зный прⷭ҇то́ле, нбⷭ҇номꙋ цр҃ю̀ на землѝ ᲂу҆гото́ванный.
Ра́дꙋйсѧ, ски́нїю дв҃довꙋ па́дшꙋю возста́вившаѧ: ра́дꙋйсѧ, превы́шнїй і҆ерⷭ҇ли́мъ нбⷭ҇ный на землѝ ꙗ҆ви́вшаѧ.
Ра́дꙋйсѧ, пречтⷭ҇нꙋ́ю багрѧни́цꙋ ѿ крове́й твои́хъ а҆́гнцꙋ бж҃їю прїꙋгото́вившаѧ: ра́дꙋйсѧ, бг҃отка́ннꙋю порфѵ́рꙋ сло́вꙋ бж҃їю ѿ пло́ти твоеѧ̀ и҆стка́вшаѧ.
Ра́дꙋйсѧ, пречⷭ҇таѧ, ве́сь мі́ръ ржⷭ҇тво́мъ свои́мъ возвесели́вшаѧ.
Конда́къ з҃
Хотѧ́й долготерпѣли́вый гдⷭ҇ь ꙗ҆ви́ти бе́зднꙋ чл҃вѣколю́бїѧ своегѡ̀ къ па́дшемꙋ дре́вле въ раѝ ро́дꙋ человѣ́ческомꙋ, дадѐ та́мѡ прароди́телємъ на́шымъ ѡ҆бѣтова́нїе, ꙗ҆́кѡ сѣ́мѧ жены̀ сотре́тъ главꙋ̀ ѕмі́ѧ, въ послѣ̑днѧѧ же времена̀ и҆спо́лни на тебѣ̀, пречⷭ҇таѧ, первоѡбѣтова́нїе своѐ, и҆збра́въ тѧ̀ є҆ди́нꙋ ѿ всѣ́хъ родѡ́въ въ мт҃рь себѣ̀, да ржⷭ҇тво́мъ твои́мъ сотре́ши главꙋ̀ дре́внѧгѡ ѕмі́ѧ, сегѡ̀ ра́ди бл҃года́рственнѡ воспое́мъ бг҃ꙋ: А҆ллилꙋ́їа.
І҆́косъ з҃
Нѡ́ваѧ стра̑шнаѧ и҆ чꙋ̑днаѧ та̑инства твоѧ̑, бцⷣе, и҆ но́вый ꙗ҆ви́лсѧ є҆́сть и҆сто́чникъ жи́зни вмѣ́стѡ є҆́ѵы чꙋ́вственныѧ: та́ бо повинꙋ́вшисѧ ѕмі́ю, нача́ло положѝ ѿвраще́нїѧ лица̀ бж҃їѧ ѿ человѣ̑къ и҆ печа́ль родѝ жена́мъ.
Тво́й же сн҃ъ, ѽ дв҃о, и҆́же є҆́ѵинꙋ ᲂу҆тро́бꙋ ѡ҆сꙋдѝ ражда́ти ча̑да въ болѣ́знехъ, во твоѐ чре́во всели́сѧ безболѣ́зненнѡ, ключи̑ двⷭ҇тва невреди́вый въ ржⷭ҇твѣ̀ твое́мъ. Сегѡ̀ ра́ди тобо́ю ра́дꙋетсѧ па́дшее человѣ́ческое є҆стество̀, вмѣ́стѡ дре́внїѧ клѧ́твы свобо́дꙋ хрⷭ҇то́вꙋ полꙋчи́вше: тебѣ̀ послѣ́дꙋющѧ, жєны̀ ꙗ҆́вѣ врагѝ побѣжда́ти начина́ютъ, дѣ́вства держа́щѧсѧ и҆ вопїю́щѧ тебѣ̀ такова̑ѧ:
Ра́дꙋйсѧ, бжⷭ҇твенною сла́вою преꙋкраше́ннаѧ: ра́дꙋйсѧ, чⷭ҇тото́ю двⷭ҇тва превознесе́ннаѧ.
Ра́дꙋйсѧ, па́дшее человѣ́ческое є҆стество̀ ѡ҆божи́вшаѧ: ра́дꙋйсѧ, же́нъ ѿ дре́внїѧ печа́ли свободи́вшаѧ.
Ра́дꙋйсѧ, красото́ю двⷭ҇тва твоегѡ̀ гаврїи́ла ᲂу҆диви́вшаѧ: ра́дꙋйсѧ, пресвѣ́тлою чⷭ҇тото́ю твое́ю а҆́гг҃льскїѧ собо́ры неизмѣри́мѡ превозше́дшаѧ.
Ра́дꙋйсѧ, две́ре непроходи́маѧ, є҆де́мъ заключе́нный ѿве́рзшаѧ: ра́дꙋйсѧ, кни́го запечатлѣ́ннаѧ, недовѣ́дѡмыѧ та̑йны бж҃їѧ вмѣсти́вшаѧ.
Ра́дꙋйсѧ, бл҃гоꙋха́нный крі́не двⷭ҇тва: ра́дꙋйсѧ, неꙋвѧда́емый цвѣ́те чⷭ҇тоты̀.
Ра́дꙋйсѧ, нбⷭ҇ное дѣ́вство на землѝ насади́вшаѧ: ра́дꙋйсѧ, двє́ри ра̑йскїѧ па́дшымъ ѿве́рзшаѧ.
Ра́дꙋйсѧ, пречⷭ҇таѧ, ве́сь ми́ръ ржⷭ҇тво́мъ свои́мъ возвесели́вшаѧ.
Конда́къ и҃
Стра́нное ржⷭ҇тво̀ твоѐ ѿ непло́дове ви́дѧще сла́сти неприча́стное, но ѿ цѣломꙋ́дрїѧ и҆ воздержа́нїѧ просїѧ́вшее, ᲂу҆страни́мсѧ сꙋ́етнагѡ мі́ра, и҆ всѧ́кагѡ нецѣломꙋ́дрїѧ дꙋше́внагѡ и҆ тѣле́снагѡ, ᲂу҆мы̀ и҆ сердца̀ на нб҃са̀ прело́жше. На сїе́ бо пришла̀ є҆сѝ въ мі́ръ, мт҃и цѣломꙋ́дрїѧ, да ни̑жнѧѧ возведе́ши къ го́рнѣй высотѣ̀, и҆ да наꙋчи́ши всѣ́хъ чи́стыми ᲂу҆сты̀ и҆ нескве́рнымъ се́рдцемъ воспѣва́ти бг҃ꙋ: А҆ллилꙋ́їа.
І҆́косъ и҃
Всѧ̀ добра̀ є҆сѝ, бли́жнѧѧ моѧ̀, и҆ поро́ка нѣ́сть въ тебѣ̀: воста́ни, прїидѝ, голꙋби́це моѧ̀, ꙗ҆ви́ ми зра́къ тво́й и҆ ᲂу҆слы́шанъ сотвори́ ми гла́съ тво́й, ꙗ҆́кѡ гла́съ тво́й сла́докъ и҆ ѻ҆́бразъ тво́й красе́нъ: є҆ди́на є҆сѝ ма́тере твоеѧ̀, и҆збра́нна є҆сѝ роди́вшей тѧ̀, та́кѡ глаго́лаше сн҃ъ тво́й и҆ гдⷭ҇ь, пречⷭ҇таѧ, срѣта́ѧ є҆́же ѿ непло́дове ржⷭ҇тво̀ твоѐ. Семꙋ̀ бжⷭ҇твенномꙋ гла́сꙋ вне́млюще, дерза́емъ воспѣва́ти тебѣ̀ такова̑ѧ:
Ра́дꙋйсѧ, цр҃и́це, ѡ҆деснꙋ́ю цр҃ѧ̀ хрⷭ҇та̀ предста́вшаѧ: ра́дꙋйсѧ, влⷣчце, въ ри̑зы позлащє́ны двⷭ҇тва ѡ҆дѣ́ѧннаѧ и҆ преꙋкраше́ннаѧ.
Ра́дꙋйсѧ, є҆ѧ́же добро́ты возжела̀ цр҃ь нбⷭ҇ный: ра́дꙋйсѧ, и҆́мже бли́жнею и҆ до́брою въ жена́хъ нарече́на была̀ є҆сѝ.
Ра́дꙋйсѧ, восходѧ́щаѧ ѿ пꙋсты́ни, ꙗ҆́кѡ ѻ҆́блакъ ды́ма, смѵ́рнꙋ и҆ лїва́нъ кадѧ́й: ра́дꙋйсѧ, мѵ́ро и҆злїѧ́нное, бл҃гоꙋха́нїе ѿ нбⷭ҇нагѡ мѷрова́рца и҆зносѧ́щее.
Ра́дꙋйсѧ, вертогра́де заключе́нный, въ него́же никто́же возмо́жетъ взы́ти: ра́дꙋйсѧ, кла́дезю запечатлѣ́нный, ѿ є҆гѡ́же глꙋбины̀ никто́же возмо́жетъ и҆спи́ти.
Ра́дꙋйсѧ, блиста́ющаѧсѧ, ꙗ҆́кѡ ᲂу҆́тро, во тьмѣ̀ сѣдѧ́щымъ: ра́дꙋйсѧ, восходѧ́щаѧ, ꙗ҆́кѡ лꙋна̀, и҆збра́ннаѧ, ꙗ҆́кѡ со́лнце.
Ра́дꙋйсѧ, и҆сто́чниче воды̀ живо́тныѧ, приснотекꙋ́щїѧ ѿ прⷭ҇то́ла бж҃їѧ: ра́дꙋйсѧ, дре́во жи́зни, присноцвѣтꙋ́щее посредѣ̀ раѧ̀.
Ра́дꙋйсѧ, пречⷭ҇таѧ, ве́сь мі́ръ ржⷭ҇тво́мъ свои́мъ возвесели́вшаѧ.
Конда́къ ѳ҃
Всѧ́кое є҆стество̀ а҆́гг҃льское ра́достїю возра́довасѧ, прославлѧ́юще бг҃а, є҆гда̀ по ржⷭ҇твѣ̀ твое́мъ, пречⷭ҇таѧ, ст҃и́тель вели́кїй со і҆ерє́и и҆ людьмѝ и҆збра́нными прїи́де въ до́мъ роди́телей твои́хъ, мл҃твы бл҃года́рствєнныѧ возсыла́юще. Е҆гда́ же бл҃гослови́ тѧ, воздви́же гла́съ сво́й, глаго́лѧ: бж҃е ѻ҆тє́цъ на́шихъ, бл҃гословѝ младе́нца сего̀ и҆ да́рꙋй є҆́й и҆́мѧ, да бꙋ́детъ просла́влено во всѧ̑ ро́ды. И҆ наречѐ тебѣ̀ и҆́мѧ мр҃і́а, вели́кое и҆ бл҃года́тное, лю́демъ пресла́достное, де́монѡмъ же стра́ха и҆спо́лнено, и҆ возопѝ съ весе́лїемъ: А҆ллилꙋ́їа.
І҆́косъ ѳ҃
Вѣті̑и многовѣща́ннїи, ꙗ҆́кѡ ры̑бы безгла̑сныѧ, недоꙋмѣва́ютъ, ка́кѡ воспѣ́ти твою̀ равноа́гг҃льскꙋю ѿ младе́нческихъ пеле́нъ чⷭ҇тотꙋ̀, пречⷭ҇таѧ, ю҆́же дарова́ ти гдⷭ҇ь, да предста́витъ тѧ̀ мт҃рь свою̀, не и҆мꙋ́щꙋ скве́рны и҆лѝ поро́ка и҆лѝ нѣ́что ѿ таковы́хъ, но да бꙋ́деши ст҃а и҆ непоро́чна. Сегѡ̀ ра́ди ма́ти твоѧ̀ со тща́нїемъ соблюда́ше тѧ̀ въ непоро́чнѣй чⷭ҇тотѣ̀, да ника́коже ѡ҆дꙋшевле́нномꙋ кївѡ́тꙋ бж҃їю ко́снетсѧ рꙋка̀ скве́рныхъ: та́ бо ѡ҆ст҃ѝ ло́же твоѐ и҆ себѐ самꙋ̀ ѿчꙋжда́ше ѿ всѧ́кїѧ скве́рны и҆ призва̀ чи̑стыѧ дѣ̑вы храни́ти поко́й тво́й. И҆ є҆гда̀ сосца́ми пита́ше тѧ̀, мл҃твꙋ дѣ́ѧше, да съ млеко́мъ ма́тернимъ наипа́че напита́ешисѧ бж҃їимъ сло́вомъ. Таковѣ́й непоро́чнѣй чⷭ҇тотѣ̀ твое́й чꙋдѧ́щесѧ, вопїе́мъ тѝ си́це:
Ра́дꙋйсѧ, ѿ младе́нчества твоегѡ̀ ни є҆ди́нагѡ грѣха̀ позна́вшаѧ: ра́дꙋйсѧ, ѿ ржⷭ҇тва̀ твоегѡ̀ всѣ́хъ ст҃ы́хъ ст҃ѣ́йшаѧ.
Ра́дꙋйсѧ, мл҃твою па́че млека̀ ѿдое́наѧ: ра́дꙋйсѧ, сло́вомъ бж҃їимъ па́че хлѣ́ба насыще́ннаѧ.
Ра́дꙋйсѧ, нбⷭ҇ное произраста́нїе, на землѝ насажде́нное: ра́дꙋйсѧ, ра́йское прозѧбе́нїе, ѿ роди́телей твои́хъ воспита́нное.
Ра́дꙋйсѧ, чⷭ҇таѧ голꙋби́це, є҆ѧ́же чⷭ҇тоты̀ не бѣ̀ досто́инъ мі́ръ ве́сь: ра́дꙋйсѧ, нескве́рнаѧ а҆́гнице, є҆ѧ́же непоро́чность ꙗ҆вѝ ю҆̀ досто́йнꙋ мт҃рь хрⷭ҇тꙋ̀.
Ра́дꙋйсѧ, ма́нїемъ вседержи́телѧ ѿ непло́дове пло́дъ возсїѧ́вшаѧ: ра́дꙋйсѧ, досто́йное твоеѧ̀ чⷭ҇тоты̀ ржⷭ҇тво̀ воспрїѧ́вшаѧ.
Ра́дꙋйсѧ, ꙗ҆́кѡ ѿ востѡ́къ со́лнца до за̑падъ хва́льно и҆́мѧ твоѐ: ра́дꙋйсѧ, ꙗ҆́кѡ ѿ всѣ́хъ родѡ́въ бл҃гослове́нна ты̀ въ жена́хъ.
Ра́дꙋйсѧ, пречⷭ҇таѧ, ве́сь мі́ръ ржⷭ҇тво́мъ свои́мъ возвесели́вшаѧ.
Конда́къ і҃
Сп҃стѝ хотѧ́й мі́ръ ѿ пре́лести вра́жїѧ, чл҃вѣколю́бецъ гдⷭ҇ь и҆збра́ тѧ ѿ земна́гѡ ро́да, ѿ ма́лагѡ гра́да и҆ ѿ непло́дныѧ ᲂу҆тро́бы въ мт҃рь себѣ̀, ѿ вѣ́ка пред̾ѡпредѣле́ннꙋю, прⷪ҇рѡ́ки же дре́вле проповѣ́даннꙋю, хода́таицꙋ бы́ти на́шегѡ сп҃се́нїѧ, да бꙋ́деши печа̑льнымъ и҆ въ бѣда́хъ сꙋ́щымъ ско́рое ᲂу҆тѣше́нїе и҆ мїрска́гѡ непло́дства разрѣше́нїе, всѣ̑мъ же во мра́цѣ грѣха̀ блꙋжда́ющымъ да ꙗ҆ви́ши сл҃нце пра́вды хрⷭ҇та̀, во є҆́же пѣ́ти є҆мꙋ̀: А҆ллилꙋ́їа.
І҆́косъ і҃
Стѣна̀ є҆сѝ и҆ прибѣ́жище всѣ̑мъ человѣ́кѡмъ, бцⷣе дв҃о, твоѐ ржⷭ҇тво̀ пра́зднꙋющымъ: ты́ бо ѿ черто́га ма́лагѡ гра́дъ бж҃їй сꙋ́щаѧ, є҆́же бы́ти начина́еши, и҆ ѿ ᲂу҆тро́бы неражда́ющїѧ и҆схо́дъ соверша́еши, да ᲂу҆гото́ваеши вхо́дъ ст҃и́телю вели́комꙋ: є҆ди́нъ бо бг҃ъ тобо́ю про́йде стра́нною стезе́ю, неѡпа́льнꙋ тѧ̀ сохрани́въ. Сегѡ̀ ра́ди со дерзнове́нїемъ зове́мъ тѝ, є҆ди́нѣй чⷭ҇тѣй и҆ бл҃гослове́ннѣй, такова̑ѧ:
Ра́дꙋйсѧ, на нб҃сѣ́хъ пребл҃гослове́ннаѧ: ра́дꙋйсѧ, на землѝ препросла́вленнаѧ.
Ра́дꙋйсѧ, а҆́гг҃лѡвъ ра́досте и҆ ᲂу҆веселе́нїе: ра́дꙋйсѧ, земнорѡ́днымъ ѿра́до и҆ ᲂу҆тѣше́нїе.
Ра́дꙋйсѧ, го́рлице бг҃огла́снаѧ и҆ неѕло́биваѧ: ра́дꙋйсѧ, ю҆́нице кро́ткаѧ и҆ ти́хаѧ.
Ра́дꙋйсѧ, дх҃а всест҃а́гѡ хра́ме ст҃ѣ́йшїй: ра́дꙋйсѧ, нбⷭ҇нагѡ ᲂу҆невѣ́щенїѧ черто́же чⷭ҇тѣ́йшїй.
Ра́дꙋйсѧ, росо̀ а҆ермѡ́нскаѧ, на го́ры сїѡ̑нскїѧ соше́дшаѧ: ра́дꙋйсѧ, а҆лава́стре мѵ́ра многоцѣ́ннагѡ, зе́млю ѡ҆бл҃гоꙋха́вшїй.
Ра́дꙋйсѧ, гра́де бж҃їй, ѿ черто́га ма́лагѡ прозѧбе́нїе: ра́дꙋйсѧ, въ назаре́тѣ гра́дѣ ѿ сꙋ́ха ко́рене произраста́нїе.
Ра́дꙋйсѧ, пречⷭ҇таѧ, ве́сь мі́ръ ржⷭ҇тво́мъ свои́мъ возвесели́вшаѧ.
Конда́къ а҃і
Пѣ́нїе бл҃года́рственное воспѣва́ютъ дꙋ́хомъ і҆ѡакі́мъ чꙋ́дный и҆ првⷣнаѧ а҆́нна, ꙗ҆́кѡ ви́дѣша на землѝ мт҃рь созда́телѧ, ю҆́же роди́ша, дще́рь мр҃і́ю. Съ ни́ми же и҆ мы̀, влⷣчце, равночи́слєнныѧ песка̀ морска́гѡ пѣ̑сни прино́симъ тѝ, восхвалѧ́юще пресла́вное ѿ непло́дныхъ ложе́снъ ржⷭ҇тво̀ твоѐ, бл҃года́рственнѡ воспѣва́юще бг҃ꙋ: А҆ллилꙋ́їа.
І҆́косъ а҃і
Свѣтопрїе́мнꙋю свѣщꙋ̀, въ нощѝ бг҃оневѣ́дѣнїѧ ржⷭ҇тво́мъ твои́мъ пресла́внѡ возжже́ннꙋю, ви́димъ тѧ̀, прест҃а́ѧ дв҃о: всѣ̑мъ бо во тьмѣ̀ грѣха̀ и҆ сѣ́ни сме́ртнѣй сѣдѧ́щымъ возсїѧ́ла є҆сѝ свѣ́тъ, ра́дость, бл҃года́ть и҆ разрѣше́нїе дре́внїѧ клѧ́твы, є҆́ѵы ра́ди бы́вшїѧ: и҆з̾ тебє́ бо возсїѧ̀ сл҃нце пра́вды хрⷭ҇то́съ бг҃ъ на́шъ, просвѣща́ѧй сꙋ́щыѧ во тьмѣ̀, вопїю́щыѧ въ похвалꙋ̀ тебѣ̀ такова̑ѧ:
Ра́дꙋйсѧ, зарѐ днѐ невече́рнѧгѡ, врата̀ црⷭ҇твїѧ хрⷭ҇то́ва ѿве́рзшаѧ: ра́дꙋйсѧ, денни́це свѣтлѣ́йшаѧ, сп҃се́нїе на́мъ возвѣсти́вшаѧ.
Ра́дꙋйсѧ, ѕвѣздо̀ незаходи́маѧ, вели́кое сл҃нце въ мі́ръ се́й вводѧ́щаѧ: ра́дꙋйсѧ, свѣщѐ свѣтоза́рнаѧ, дре́внюю тьмꙋ̀ грѣхо́внꙋю разгонѧ́ющаѧ.
Ра́дꙋйсѧ, и҆сто́чниче живоно́сный, жи́знь всѣ̑мъ подаю́щїй: ра́дꙋйсѧ, свѣти́льниче, пре́жде со́лнца свѣ́тъ на́мъ и҆сточи́вшїй.
Ра́дꙋйсѧ, є҆щѐ сꙋ́щей тьмѣ̀, зарѧ́ми бл҃года́ти на́съ просвѣти́вшаѧ: ра́дꙋйсѧ, мт҃и свѣ́та ᲂу҆́мнагѡ, бл҃года́тїю всю̀ вселе́ннꙋю ѡ҆зари́вшаѧ.
Ра́дꙋйсѧ, невѣ́сто черто́га свѣтосїѧ́ннагѡ: ра́дꙋйсѧ, сїѧ́нїемъ ри́зы своеѧ̀ всю̀ поднебе́снꙋю ѡ҆блиста́вшаѧ.
Ра́дꙋйсѧ, же́но, ѡ҆блече́ннаѧ въ со́лнце, въ мі́ръ на сп҃се́нїе погиба́ющымъ ꙗ҆́вльшаѧсѧ: ра́дꙋйсѧ, под̾ нога́ма свои́ма лꙋнꙋ̀ и҆мꙋ́щаѧ, ѿ двоюна́десѧте ѕвѣ́здъ ᲂу҆вѣнча́ннаѧ.
Ра́дꙋйсѧ, пречⷭ҇таѧ, ве́сь мі́ръ ржⷭ҇тво́мъ свои́мъ возвесели́вшаѧ.
Конда́къ в҃і
Бл҃года́ти тезоимени́таѧ бл҃же́ннаѧ а҆́нна весели́тсѧ и҆ хва́лѧщисѧ вопїе́тъ: непло́ды сꙋ́щи, роди́хъ бж҃їю мт҃рь, є҆ѧ́же ра́ди ѡ҆сꙋжде́нїе є҆́ѵино разрѣши́сѧ и҆ ꙗ҆́же въ печа́лехъ болѣ́знь. И҆ та́кѡ ра́дꙋющисѧ, дадѐ ѡ҆бѣ́тъ привестѝ дще́рь свою̀ ро́ждшꙋюсѧ бг҃ови, да бꙋ́детъ є҆мꙋ̀ въ да́ръ соверше́нъ ѿ всѣ́хъ родѡ́въ земны́хъ, человѣ́кѡмъ же въ вѣ́чное ᲂу҆тѣше́нїе и҆ ра́дованїе, во є҆́же пѣ́ти и҆̀мъ вы́нꙋ: А҆ллилꙋ́їа.
І҆́косъ в҃і
Пое́мъ твоѐ пречⷭ҇тое ржⷭ҇тво̀, чти́мъ и҆ несказа́нное зача́тїе, покланѧ́емсѧ са̑мымъ пелена́мъ твои̑мъ, невѣ́сто бг҃озва́ннаѧ и҆ дв҃о: славосло́вѧтъ же съ на́ми вкꙋ́пѣ твоѐ въ мі́ръ прише́ствїе а҆́гг҃лѡвъ и҆ а҆рха́гг҃лѡвъ чи́ни и҆ дꙋ́шъ ст҃ы́хъ собо́ри: ѻ҆́бщаѧ бо ра́дость возсїѧ̀ на нб҃сѝ и҆ на землѝ ѿ првⷣныхъ і҆ѡакі́ма и҆ а҆́нны ржⷭ҇тво́мъ твои́мъ, бцⷣе, є҆го́же прославлѧ́юще, вопїе́мъ тѝ такова̑ѧ:
Ра́дꙋйсѧ, всенепоро́чнаѧ, по ст҃ѣ́й трⷪ҇цѣ ѻ҆́бщаѧ всѣ́хъ а҆́гг҃лъ и҆ человѣ̑къ влⷣчце: ра́дꙋйсѧ, всебл҃гослове́ннаѧ, по ᲂу҆тѣ́шители ѻ҆́бщаѧ всѣ́хъ на нб҃сѝ и҆ на землѝ ᲂу҆тѣ́шительнице.
Ра́дꙋйсѧ, красото̀ въ десни́цѣ гдⷭ҇ни, ᲂу҆краша́ющаѧ бл҃жа́щихъ тѧ̀ всѣ́хъ нбⷭ҇ныхъ: ра́дꙋйсѧ, ᲂу҆тѣше́нїе вседержи́телево, возвеселѧ́ющее призыва́ющихъ тѧ̀ всѣ́хъ земны́хъ.
Ра́дꙋйсѧ, не́бо небе́съ, всѧ̑ а҆́гг҃льскїѧ си̑лы без̾ сравне́нїѧ превосходѧ́щее: ра́дꙋйсѧ, чꙋ́до чꙋде́съ, всѣ́хъ человѣ́кѡвъ пе́рсть въ тѣ́ло бж҃їе созида́ющее.
Ра́дꙋйсѧ, цр҃и́це цари́цъ, все́й вселе́ннѣй предѣ́лъ содѣ́ловавшаѧ грѣхо́вномꙋ растлѣ́нїю: ра́дꙋйсѧ, ст҃а̑ѧ ст҃ы́хъ все́й цр҃кве хрⷭ҇то́вы, нача́ло положи́вшаѧ на́шемꙋ сп҃се́нїю.
Ра́дꙋйсѧ, бг҃олѣ́пнаѧ дв҃и́це, всѣ́хъ време́нъ и҆ вѣкѡ́въ бж҃їе бл҃гослове́нїе: ра́дꙋйсѧ, бг҃оизбра́ннаѧ ѻ҆трокови́це, всѣ́хъ ꙗ҆зы̑къ и҆ родѡ́въ бл҃года́тное примире́нїе.
Ра́дꙋйсѧ, сто́лпе двⷭ҇тва, всѣ̑мъ дѣ́вства жела́ющымъ добро́тꙋ дѣ́вства ꙗ҆́вѣ низпосыла́ющаѧ: ра́дꙋйсѧ, две́ре сп҃се́нїѧ, всѣ̑мъ сп҃се́нїѧ ча́ющымъ по́мощь вско́рѣ подаю́щаѧ.
Ра́дꙋйсѧ, пречⷭ҇таѧ, ве́сь мі́ръ ржⷭ҇тво́мъ свои́мъ возвесели́вшаѧ.
Конда́къ г҃і
Ѽ всепѣ́таѧ мт҃и, ѿ непло́дове ро́ждшаѧсѧ на сп҃се́нїе мі́рꙋ, ны̑нѣшнѧѧ на̑ша ѡ҆ всечтⷭ҇нѣ́мъ ржⷭ҇твѣ̀ твое́мъ прїе́мши приношє́нїѧ, не ѡ҆ста́ви на́съ во вре́мѧ живота̀ на́шегѡ, ѿ всѧ́кїѧ напа́сти и҆ плѣ́на вра́жїѧ и҆зба́ви на́съ и҆ ѿ непло́дства дꙋше́внагѡ разрѣшѝ всѣ́хъ, ѡ҆ тебѣ̀ вопїю́щихъ: А҆ллилꙋ́їа.
Повто́ръ
Сей конда́къ глаго́лется три́жды, та́же і҆́косъ а҃-й и҆ конда́къ а҃-й.
І҆́косъ а҃
А҆рха́гг҃лъ гаврїи́лъ по́сланъ бы́сть къ првⷣнѣй а҆́ннѣ, є҆гда̀ та̀ въ ско́рби непло́дства своегѡ̀ возопѝ ко гдⷭ҇ꙋ и҆з̾ глꙋбины̀ серде́чныѧ, ᲂу҆зрѣ́вши въ са́дѣ свое́мъ гнѣздо̀ пти́чїе, птенцы̀ ма̑лыѧ и҆мꙋ́щее, и҆ бл҃говѣстѝ є҆́й ра́дость ве́лїю, глаго́лѧ: ᲂу҆слы́шана мл҃тва твоѧ̀, сле́зы же твоѧ̑ пред̾ бг҃омъ внидо́ша, и҆ сѐ роди́ши дще́рь пребл҃гослове́ннꙋю, ѡ҆ не́йже возбл҃гословѧ́тсѧ всѧ̑ колѣ̑на земна̑ѧ, нарече́тсѧ же и҆́мѧ є҆́й мр҃і́а. Семꙋ̀ ра́достномꙋ ѡ҆бѣтова́нїю чꙋдѧ́щесѧ, возопїе́мъ пребл҃гослове́ннѣй:
Ра́дꙋйсѧ, ѿ бл҃горо́днѣйшагѡ ца́рскагѡ ко́рене і҆ѡакі́момъ произраще́ннаѧ: ра́дꙋйсѧ, ѿ сщ҃е́ннѣйшагѡ а҆рхїере́йскагѡ ро́да а҆́нною
рожде́ннаѧ.
Ра́дꙋйсѧ, прароди́телей на́шихъ ѿ тлѝ сме́ртныѧ свободи́вшаѧ: ра́дꙋйсѧ, роди́телей твои́хъ поноше́нїѧ безча́дства
разрѣши́вшаѧ.
Ра́дꙋйсѧ, ст҃а̑ѧ врата̀, на восто́къ зрѧ̑щаѧ, ржⷭ҇тво́мъ свои́мъ є҆́же ѿ непло́дове ѿве́рзшаѧ: ра́дꙋйсѧ, двⷭ҇твеннаѧ две́ре заключе́ннаѧ, вхо́да ст҃и́телѧ вели́кагѡ ѡ҆жида́ющаѧ.
Ра́дꙋйсѧ, сле́зъ ма́тере твоеѧ̀ на ра́дость премѣне́нїе: ра́дꙋйсѧ, тоѧ̀ поноше́нїѧ въ лю́дехъ ѿѧ́тїе.
Ра́дꙋйсѧ, вели́кое ро́ждшымъ тѧ̀ ᲂу҆тѣше́нїе: ра́дꙋйсѧ, всемꙋ̀ мі́рꙋ наслажде́нїе.
Ра́дꙋйсѧ, па́дшагѡ а҆да́ма воззва́нїе: ра́дꙋйсѧ, сле́зъ є҆́ѵиныхъ и҆збавле́нїе.
Ра́дꙋйсѧ, пречⷭ҇таѧ, ве́сь мі́ръ ржⷭ҇тво́мъ свои́мъ возвесели́вшаѧ.
Конда́къ а҃
И҆збра́ннѣй ѿ всѣ́хъ родѡ́въ бж҃їей мт҃ри, нб҃сѐ и҆ землѝ цр҃и́цѣ, ѡ҆ст҃и́вшей ро́дъ человѣ́ческїй прише́ствїемъ къ на́мъ во всечⷭ҇тнѣ́мъ ржⷭ҇твѣ̀ свое́мъ, бл҃гоговѣ̑йнаѧ пѣ̑нїѧ прино́симъ тѝ рабѝ твоѝ, бцⷣе. Ты́ же, ꙗ҆́кѡ прише́дшаѧ на ᲂу҆тѣше́нїе и҆ сп҃се́нїе на́ше, ѿ всѧ́кихъ на́съ бѣ́дъ свободѝ, да зове́мъ тѝ:
Ра́дꙋйсѧ, пречⷭ҇таѧ, ве́сь мі́ръ ржⷭ҇тво́мъ свои́мъ возвесели́вшаѧ.
Моли́твы
Ѽ прест҃а́ѧ и҆ бг҃оизбра́ннаѧ дв҃о, влⷣчце на́ша бцⷣе, нб҃сѝ и҆ землѝ цр҃и́це, на ра́дость и҆ ᲂу҆тѣше́нїе всемꙋ̀ мі́рꙋ ѿ безпло́дныхъ и҆ безча́дныхъ роди́телей бг҃омъ дарова́ннаѧ! Роди́вшисѧ бж҃їимъ промышле́нїемъ, ты̀ разрѣши́ла є҆сѝ непло́дствїе ро́ждшїѧ тѧ̀, и҆ ны́нѣ неплѡ́днаѧ сердца̀ на̑ша плодонѡ́сна сотворѝ предста́тельствомъ твои́мъ ᲂу҆ прⷭ҇то́ла вседержи́телева, непло́дствовати же содѣ́лай ны̀ ѕлы́ми дѣ́лы, гнилы́ми словесы̀ и҆ нечи́стыми помышле́ньми. Ѽ всебл҃же́ннаѧ, да ꙗ҆ви́мсѧ ча̑да бж҃їѧ, добродѣ́телей бл҃гопло́дїе при́снѡ приносѧ̑щаѧ. Ты̀ ᲂу҆толи́ла є҆сѝ пречⷭ҇тымъ ржⷭ҇тво́мъ твои́мъ пла́чь прама́тере на́шеѧ є҆́ѵы, и҆ првⷣныѧ роди́тєли твоѧ̑ и҆зба́вила є҆сѝ поноше́нїѧ безча́дства: и҆ ны́нѣ ᲂу҆толѝ пла́чь и҆ воздыха̑нїѧ многоболѣ́зненныхъ дꙋ́шъ на́шихъ и҆ и҆зба́ви всѣ́хъ на́съ поноше́нїѧ ѕлы́хъ дѣ́лъ на́шихъ, страсте́й безче́стїѧ и҆ всѧ́кагѡ порабоще́нїѧ вра́жескагѡ. Наипа́че же да́рꙋй на́мъ, прест҃а́ѧ бцⷣе дв҃о, во всесвѣ́тлый де́нь ржⷭ҇тва̀ твоегѡ̀ чи́стымъ се́рдцемъ разꙋмѣ́ти и҆ па́мѧтовати, съ коли́кою ра́достїю и҆ бл҃годаре́нїемъ непло́днаѧ ᲂу҆тро́ба ст҃ы́ѧ првⷣныѧ а҆́нны ноша́ше тѧ̀, да и҆ мы̀ не то́чїю словесы̀, но наипа́че дѣ́лы свои́ми вы́нꙋ бꙋ́демъ со ᲂу҆миле́нїемъ серде́чнымъ прославлѧ́ти тѧ̀, вопїю́ще: сла́ва ржⷭ҇твꙋ̀ твоемꙋ̀, чⷭ҇таѧ: сла́ва двⷭ҇твꙋ твоемꙋ̀, мт҃и безневѣ́стнаѧ. Кꙋ́пнѡ же съ тобо́ю сподо́би на́съ непреста́ннѡ сла́вити и҆ велича́ти всест҃ы́й пло́дъ тво́й, сло́во воплоще́нно, є҆мꙋ́же сла́ва подоба́етъ, че́сть и҆ поклоне́нїе, со безнача́льнымъ є҆гѡ̀ ѻ҆ц҃е́мъ, и҆ съ прест҃ы́мъ, и҆ бл҃ги́мъ, и҆ животворѧ́щимъ є҆гѡ̀ дх҃омъ, ны́нѣ и҆ при́снѡ, и҆ во вѣ́ки вѣкѡ́въ. А҆ми́нь.