Кондак 1
Избра́ннии от челове́ческаго ро́да прароди́телие Христо́вы, ро́ждшии Преблагослове́нную Богоотрокови́цу, из Нея́же по пло́ти Сы́н Бо́жий роди́ся, святи́и и пра́веднии Богоотцы́ Иоаки́ме и А́нно! Я́ко иму́щии дерзнове́ние ве́лие ко Христу́ Бо́гу и вы́ну предстоя́щии Престо́лу Его́ небе́сному, Тому́ приле́жно моли́теся от бе́д на́м изба́витися, да вы́ну зове́м ва́м:
Ра́дуйтеся, святи́и и пра́веднии Богоотцы́ Иоаки́ме и А́нно.
Икос 1
А́нгел предста́тель по́слан бы́сть к ва́м от Бо́га, святи́и и пра́веднии Богоотцы́ Иоаки́ме и А́нно, егда́ о безпло́дии свое́м о́в у́бо в пусты́ни, о́ва же в саду́ свое́м се́товасте, к Бо́гу моли́тву вознося́ще; и та́ко благове́стие ра́достное принесе́ безпло́тный, я́ко роди́ти и́мате Дще́рь Преблагослове́нную, о Не́йже возблагослови́тся ве́сь ро́д челове́ческий, с ни́мже и мы́ ва́м ра́достное прино́сим хвале́ние:
Ра́дуйтеся, ко́рене Дави́дова святопроцве́тшия ро́зги виногра́да живо́тнаго; ра́дуйтеся, ро́ждшии Дще́рь, от все́х родо́в Преблагослове́нную.
Ра́дуйтеся, вопло́щшагося Сы́на Бо́жия прароди́телие всечестни́и; ра́дуйтеся, та́инства, от ве́ка утае́ннаго, прояви́телие всеизря́днии.
Ра́дуйтеся, уте́хи Изра́илевы ближа́йшии по пло́ти сро́дницы; ра́дуйтеся, обетова́ннаго ми́ру Спаси́теля единокро́внии ю́жицы.
Ра́дуйтеся, святи́и и пра́веднии Богоотцы́ Иоаки́ме и А́нно.
Кондак 2
Ви́дев себе́ святы́й Иоаки́м, во хра́ме Иерусали́мстем безпло́дия ра́ди от архиере́я уничиже́на, зело́ опеча́лися, и в го́рести души́ своея́ в пусты́ню к свои́м стадо́м удали́ся, и та́мо со мно́гими слеза́ми те́пле ко Го́споду моля́шеся, да сподо́бит его́ отце́м своему́ ча́ду нарещи́ся, и та́ко к моли́тве же по́ст прилага́ше, и в сокруше́нии се́рдца Вседержи́телю Бо́гу взыва́ше: Аллилу́иа.
Икос 2
Си́лу го́рести му́жа своего́ свята́я А́нна уве́девши, в дому́ свое́м седя́ще, го́рце пла́кася и моля́шеся ко Го́споду, да поноше́ние безпло́дия от нея́ оты́мет. Мы́ же, толи́кое терпе́ние пра́ведных помина́юще, воззове́м:
Ра́дуйтеся, богоизбра́нная дво́ице, Еди́ному от Тро́ицы Ма́терь по пло́ти породи́вшая; ра́дуйтеся, Зижди́телю ва́шему Роди́тельницу непоро́чную произве́дшии.
Ра́дуйтеся, супру́зи благослове́ннии, Преблагослове́нную в жена́х Дще́рь воспита́вшии; ра́дуйтеся, в безпло́дии ва́шем от Го́спода услы́шаннии.
Ра́дуйтеся, я́ко сле́зныя моли́твы ва́ша пронико́ша не́бо и во у́шию Бо́га Изра́илева достиго́ша; ра́дуйтеся, я́ко поноше́ние ва́ше вре́менное во сла́ву ве́чную на небеси́ и на земли́ измени́ся.
Ра́дуйтеся, святи́и и пра́веднии Богоотцы́ Иоаки́ме и А́нно.
Кондак 3
Си́лою Бо́жиею преиспо́лнен, яви́ся А́нгел Госпо́день свято́му Иоаки́му в пусты́ни и рече́ ему́: «Услы́ша Бо́г моли́тву твою́ и изво́ли да́ти тебе́ благода́ть Свою́, се́ бо жена́ твоя́ А́нна зачне́т и породи́т тебе́ Дще́рь, о Не́йже всему́ ми́ру бу́дет ра́дость». Сия́ ре́к безпло́тный, повеле́ ему́ ко хра́му Иерусали́мскому па́ки отыдти́, иде́же о́н супру́гу свою́ моля́щуся обря́щет, с не́юже вку́пе да воспое́т та́мо хвале́бную пе́снь Бо́гу Изра́илеву: Аллилу́иа.
Икос 3
Иму́щи ско́рбь ве́лию в се́рдце свое́м А́нна свята́я и в вертогра́д до́ма своего́ вше́дши, ви́де гнездо́ пти́чие на дре́ве сооруже́но, птенцы́ ма́лыя в не́м лежа́щия, а́бие моле́ния к моле́ниям прилага́ти потща́ся, да сподо́бит ю́ Госпо́дь ма́терь ча́ду бы́ти. И се́ яви́ся е́й а́нгел Госпо́день, глаго́ля: «Услы́шана е́сть моли́тва твоя́ и воздыха́ния твоя́ проидо́ша о́блаки, сле́зы же твоя́ пред Бо́га внидо́ша: се́ зачне́ши и роди́ши Дще́рь Преблагослове́нную, о Не́йже возблагословя́тся вся́ коле́на земна́я, и То́ю да́стся спасе́ние всему́ ми́ру, нарече́тся же и́мя Е́й Мари́я». Таково́е а́нгельское всера́достное благове́щение помина́юще, воспои́м Богоотце́м такова́я:
Ра́дуйтеся, супру́зи пра́веднии, от Бо́га свы́ше предызбра́ннии; ра́дуйтеся, во все́х за́поведех Госпо́дних без поро́ка ходи́вшии.
Ра́дуйтеся, в ско́рби ва́шей вре́менней утеше́ние ве́чное получи́вшии; ра́дуйтеся, па́че ча́яния ва́шего десни́цею Бо́жиею превознесе́ннии.
Ра́дуйтеся, я́ко во смире́нии ва́шем и ско́рби помяну́ вы́ Госпо́дь; ра́дуйтеся, я́ко сподо́бистеся прароди́телие Сы́ну Бо́жию бы́ти.
Ра́дуйтеся, святи́и и пра́веднии Богоотцы́ Иоаки́ме и А́нно.
Кондак 4
Бу́рею сомне́ния Иоаки́м пра́ведный содержи́мь и о благове́стии ему́ а́нгела недоумева́я, а́бие во гра́д Иерусали́м оты́де, иде́же пред враты́ хра́ма святу́ю А́нну обре́те, Го́спода вельми́ славосло́вящую и ра́дость а́нгельскаго явле́ния и о ча́де прорече́ния ему́ возвеща́ющу, те́мже и о свое́м виде́нии супру́жнице благовести́в, вку́пе с не́ю возопи́ ко Го́споду: Аллилу́иа.
Икос 4
Слы́шавше сро́дницы и зна́емии о пресла́вном святы́я А́нны зача́тии, Бо́га Изра́илева сла́вляху, А́нна же богому́драя пло́д чре́ва своего́ на служе́ние Бо́гу обрече́, те́плое благодаре́ние Го́сподеви возноша́ше; мы́ же све́тло всесла́вное зача́тие Богоотрокови́цы Мари́и воспева́юще, Тоя́ святы́м роди́телем глаго́лем си́це:
Ра́дуйтеся, ра́достнии на́м гряду́щаго в ми́р Искупи́теля провозве́стницы; ра́дуйтеся, при́сно помина́емии ча́емаго Спаси́теля пра́отцы.
Ра́дуйтеся, чрез Дще́рь ва́шу благослове́нную Сло́ву Бо́жию пло́ть взаимода́вшии; ра́дуйтеся, Бо́га воплоще́нна Вну́ка себе́ нарица́ющии.
Ра́дуйтеся, ве́лией благоче́стия та́йны досто́йнии служи́телие; ра́дуйтеся, Бо́жия к челове́ком снисхожде́ния всеизря́днии посре́дницы.
Ра́дуйтеся, святи́и и пра́веднии Богоотцы́ Иоаки́ме и А́нно.
Кондак 5
Богосве́тлую звезду́ я́вльшую Со́лнце Пра́вды Христа́ Бо́га, Пресвяту́ю Богоро́дицу, пло́тию роди́ти сподо́бистеся, и вожделе́нное и́мя Богоотце́в прия́сте, Иоаки́ме и А́нно всеблаже́ннии, о Ея́же рождестве́ святе́м не́бо и земля́ возра́довашася, и ве́сь ро́д челове́ческий освяти́ся, вопия́ ди́вному во святы́х Свои́х Бо́гу Изра́илеву: Аллилу́иа.
Икос 5
Ви́девше роди́телие от ни́х ро́ждшуюся Богоотрокови́цу Мари́ю, Зижди́телеву же Ма́терь, я́ко киво́ту Бо́жию, благогове́йно То́й послужи́ша; те́мже и на́с, к ва́м моли́твенно припа́дающих, не отврати́теся, глаго́лющих:
Ра́дуйтеся, в рождестве́ Богоотрокови́цы Мари́и све́тло возликова́вшии; ра́дуйтеся, виде́нием Богоотрокови́цы услажде́ннии.
Ра́дуйтеся, слы́шанием Ея́ умиле́ннии; ра́дуйтеся, по си́х от архиере́я Бо́жия благослове́ннии и ублаже́ннии.
Ра́дуйтеся, А́гницу непоро́чную в дому́ свое́м до́бре упа́сшии; ра́дуйтеся, А́гнца и Па́стыря Ма́терь во Дще́рь себе́ прие́мшии.
Ра́дуйтеся, святи́и и пра́веднии Богоотцы́ Иоаки́ме и А́нно.
Кондак 6
Пропове́дницы чуде́с Бо́жиих яви́стеся святи́и, егда́ обе́т сво́й Бо́гови соверши́сте и триле́тнюю Богоотрокови́цу Мари́ю в хра́м Бо́жий со сла́вою введо́сте, да обита́ет та́мо во свята́я святы́х, о си́х у́бо ра́достно Бо́гу оте́ц ва́ших славосло́вия пе́снь воспева́ти потща́стеся: Аллилу́иа.
Икос 6
Возсия́ Богоотрокови́ца, я́ко луна́ по́лная, в честне́м Свое́м в хра́м Госпо́день вхожде́нии, Ея́же чистоте́ а́нгелы удивля́хуся, и архиере́й Бо́жий Заха́рия прие́м Ю́ от ру́к ва́ших, святи́и Иоаки́ме и А́нно, во вну́тренняя свята́я святы́х с че́стию введе́, я́ко вои́стину одушевле́нный Бо́жий киво́т, ва́с же по достоя́нию ублажи́ хвале́ньми таковы́ми:
Ра́дуйтеся, ра́дость всеми́рную ро́ду челове́ческому породи́вшии; ра́дуйтеся, Вино́вницу челове́ческаго обновле́ния воспита́вшии.
Ра́дуйтеся, в хра́м Госпо́день Киво́т одушевле́нный Бо́жий приве́дшии; ра́дуйтеся, Дще́рь ва́шу Святу́ю во свята́я святы́х вмести́вшии.
Ра́дуйтеся, Бо́гу, воплоти́тися хотя́щему, сро́дницы явля́ющиися; ра́дуйтеся, а́нгелом собесе́дницы бы́вшии.
Ра́дуйтеся, святи́и и пра́веднии Богоотцы́ Иоаки́ме и А́нно.
Кондак 7
Жела́ние души́ твоея́ испо́лнив и обе́т тво́й Бо́гови возда́в, Иоаки́ме преблаже́нне, в ста́рости до́брей свя́то и пра́ведно жи́знь земну́ю о Го́споде сконча́л еси́. Те́мже ны́не Тому́ и о на́с сотвори́ моли́тву, да благу́ю, ми́рную и непосты́дную кончи́ну получи́ти сподо́бимся, зову́ще Ему́: Аллилу́иа.
Икос 7
Но́вое и богоуго́дное житие́ во вдовстве́ твое́м, А́нно свята́я, провожда́ла еси́, у хра́ма Бо́жия примета́ющися и Святе́й и Преблагослове́нней Дще́ри твое́й сослужа́щи, те́мже я́ко и́стинную и богоуго́дную вдови́цу, Христо́ву же праба́бу, тя́ восхваля́ем, вку́пе же и му́жа твоего́, Богоотца́ Иоаки́ма, усе́рдно честву́ем и с любо́вию пе́сни таковы́я ва́м прино́сим:
Ра́дуйтеся, пра́ведницы, и́хже пра́вда, я́ко со́лнце, сия́ет во ве́ки; ра́дуйтеся, А́нгелом дру́зи, сожи́телие святы́м и при́снии Бо́гу.
Ра́дуйтеся, бли́жнии небе́снаго Престо́ла предстоя́телие; ра́дуйтеся, дерзнове́ние ве́лие ко Христу́ Бо́гу иму́щии.
Ра́дуйтеся, Це́ркве, на небеси́ торжеству́ющия, украше́ние; ра́дуйтеся, Це́ркве, во́инствующия на земли́, до́брое заступле́ние.
Ра́дуйтеся, святи́и и пра́веднии Богоотцы́ Иоаки́ме и А́нно.
Кондак 8
Стра́нствие земно́е соверши́в, свята́я и пра́ведная А́нно, на рука́х Пребоже́ственныя твоея́ Дще́ри, Богоро́дицы Мари́и, сно́м сме́ртным почи́ла еси́ и к Бо́гу со упова́нием преста́вилася еси́, те́мже свято́е успе́ние твое́ сла́вяще, мо́лим тя́, о Богопрама́терь всечестна́я, да егда́ и мы́ сно́м сме́ртным усыпа́ти начне́м, умоли́ Спа́са Христа́ кро́тко ду́шу на́шу от те́ла отдели́ти и бесо́вския вла́сти ю́ изба́вити, спасе́ния же ве́чнаго на́с удосто́ити, да зове́м Ему́ в ра́дости святы́х: Аллилу́иа.
Икос 8
Ве́сь ми́р христиа́нский блажи́т ва́с по достоя́нию, святи́и и пра́веднии Богоотцы́ Иоаки́ме и А́нно, и моли́твенно ва́ша честна́я имена́ прославля́ет, Це́рковь же Христо́ва све́тло па́мять ва́шу пра́зднует и пе́сни хвале́бныя ва́м прино́сит си́це:
Ра́дуйтеся, свети́льницы, мра́к ду́ш на́ших благода́тно озаря́ющии; ра́дуйтеся, от го́рних высо́т сла́вы ва́шея к земноро́дным ми́лостиво проница́ющии.
Ра́дуйтеся, Богоро́дице Мари́и сомоли́твенницы всегда́шнии; ра́дуйтеся, Христа́ Бо́га умилостиви́телие многомо́щнии.
Ра́дуйтеся, любо́вь и ве́ру к ва́м иму́щих от вся́ких бе́д спаса́ющии; ра́дуйтеся, моли́твенно на по́мощь ва́с призыва́ющих от напра́сныя и на́глыя сме́рти избавля́ющии.
Ра́дуйтеся, святи́и и пра́веднии Богоотцы́ Иоаки́ме и А́нно.
Кондак 9
Вси́ а́нгели Бо́жии и ли́цы святы́х Бо́жиих на небеси́ ва́с, святи́и и пра́веднии Богоотцы́ Иоаки́ме и А́нно, целу́ют, ро́ди же челове́честии на земли́ моли́твенными пе́сньми ва́с похваля́ют и о предста́тельстве ва́шем благода́рно вопию́т Бо́гу: Аллилу́иа.
Икос 9
Вити́йства на́ша не довле́ют к досто́йней ва́м похвале́, святи́и прароди́телие Христо́вы; оба́че вы́, ми́лостивы су́ще, и на́ша убо́гая хвале́ния не отврати́те, но бу́дите о на́с те́плии предста́тели и моли́твенницы ко Го́споду, ва́шими святы́ми моли́твами ску́дость ду́ш на́ших восполня́юще, да благода́рственне ва́м зове́м:
Ра́дуйтеся, ра́дости и сла́вы ве́чныя вожделе́ннии на́м хода́таи; ра́дуйтеся, бла́г вре́менных и ве́чных усе́рднии на́м пред Го́сподем хода́таи.
Ра́дуйтеся, от смертоно́сныя я́звы предста́тельством ва́шим ве́рныя сохраня́ющии; ра́дуйтеся, тлетво́рныя ве́тры моли́твами ва́шими разгоня́ющии.
Ра́дуйтеся, трясе́ние земли́ и бу́ри зе́льныя хода́тайством ва́шим установля́ющии и в тишину́ прелага́ющии; ра́дуйтеся, во вся́ких беда́х и злоключе́ниих на по́мощь к на́м ускоря́ющии.
Ра́дуйтеся, святи́и и пра́веднии Богоотцы́ Иоаки́ме и А́нно.
Кондак 10
Спасе́ния душе́внаго жела́ющим и о се́м усе́рдно подвиза́ющимся, помо́щницы блази́и, святи́и и пра́веднии Богоотцы́ Иоаки́ме и А́нно, яви́стеся, о́в у́бо и́ноком, о́ва же и́нокиням храни́тели имену́етеся, о́бщее моле́ние за все́х ве́рных Бо́гу принося́ще, да вси́ благода́рственно зову́т просла́вльшему ва́с во вселе́нней, Царю́ сла́вы Христу́: Аллилу́иа.
Икос 10
Стено́ю моли́тв ва́ших небе́сных, святи́и и пра́веднии Богоотцы́ Иоаки́ме и А́нно, сохраня́йте и огражда́йте на́с от искуше́ний врага́ диа́вола, и́щущаго душе́вней поги́бели на́шей: ве́мы бо, ве́мы, я́ко мно́го мо́жет моли́тва ва́ша пред лице́м Христа́ Бо́га на́шего, ва́шего же по пло́ти Вну́ка. Его́же умоля́ти не преста́йте о все́х, с любо́вию ва́с почита́ющих и вопию́щих:
Ра́дуйтеся, ма́слина благопло́дная, еле́й ми́лости Бо́жией оби́льно на́м источа́ющая; ра́дуйтеся, кипари́си дво́е благосенноли́ственнии, зно́й страсте́й на́ших в поко́й безстра́стия приводя́щии.
Ра́дуйтеся, виссо́не и багряни́це, из ни́хже Ски́ния Бо́жия селе́ния сооруди́ся; ра́дуйтеся, го́рлицы единосупру́жнии, Голуби́цу непоро́чную произве́дшии.
Ра́дуйтеся, со Дще́рию ва́шею, все́х Цари́цею, ве́чно ца́рствующии; ра́дуйтеся, в Сио́не го́рнем в оби́тели Ея́ небе́сней све́тло торжеству́ющии.
Ра́дуйтеся, святи́и и пра́веднии Богоотцы́ Иоаки́ме и А́нно.
Кондак 11
Пе́ние на́ше хвале́бное ми́лостивно приими́те и щедро́т ва́ших моли́твенных на́с не лиши́те, о святи́и прароди́телие Христо́вы Иоаки́ме и А́нно, а́ще и недосто́йнии есмы́, грехо́в ра́ди на́ших, ва́шего свята́го заступле́ния: оба́че я́ко бла́зи и всеще́дри су́ще, сие́ на́м подади́те, и помози́те на́м покая́нием очи́ститися от скве́рны грехо́вныя, да в чистоте́ серде́ц воспое́м Созда́телю на́шему хвале́бную пе́снь: Аллилу́иа.
Икос 11
Светопода́тельныя два́ свети́льника, всеми́рную Свещу́ возже́гшии, позна́ем святы́х Богооте́ц Иоаки́ма и А́нну, о бра́тие, и сия́нием те́х небе́сныя сла́вы озаря́еми, воспои́м и́м такова́я:
Ра́дуйтеся, сла́внейшую без сравне́ния Серафи́м воспита́ти удосто́ившиися; ра́дуйтеся, луча́ми благода́ти Бо́жия осия́ннии.
Ра́дуйтеся, благоуха́ния духо́внаго преиспо́лненнии; ра́дуйтеся, фимиа́м моли́тв ва́ших о все́м ми́ре христиа́нстем Бо́гу принося́щии.
Ра́дуйтеся, с Богоро́дицею Мари́ею и Предте́чею Иоа́нном у Престо́ла Христо́ва вы́ну предстоя́щии.
Ра́дуйтеся, святи́и и пра́веднии Богоотцы́ Иоаки́ме и А́нно.
Кондак 12
Благода́ть Бо́жию и ми́лость на́м пода́ти, проще́ние же грехо́в и исправле́ния жития́ ниспосла́ти проси́те на́м у Го́спода, святи́и Богоотцы́ Иоаки́ме и А́нно, и не преста́йте о на́с пред лице́м Вседержи́теля Бо́га моля́ще, я́ко стяжа́вшии к Нему́ дерзнове́ние мно́гое. О се́м усе́рдно к ва́м припа́дающе, я́ко при́сных предста́телей и засту́пников на́ших, про́сим и благоумиле́нно зове́м все́х Творцу́: Аллилу́иа.
Икос 12
Пою́ще многомо́щное предста́тельство ва́ше к Бо́гу, Иоаки́ме и А́нно пра́веднии, велича́ем возвели́чившаго ва́с Христа́ Го́спода, воспева́ем и рожде́нную от ва́с Пренепоро́чную Его́ Ма́терь, ва́м же от усе́рдия на́шего сия́ достодо́лжныя похвалы́ прино́сим:
Ра́дуйтеся, от восто́ка и до за́пада препросла́вленнии; ра́дуйтеся, стра́жие боже́ственнии, неусы́пно бдя́щии в моли́твах к Бо́гу о все́х ве́рных.
Ра́дуйтеся, по́мощь ва́шу благода́тную вся́цей душе́ христиа́нстей подаю́щии; ра́дуйтеся, во благи́х моле́ния и проше́ния благочести́вых исполня́ющии.
Ра́дуйтеся, душе́вных и теле́сных неду́гов преизря́днии и безме́зднии цели́тели; ра́дуйтеся, бла́г вре́менных и ве́чных всеусе́рднии и благоприя́тнии на́м хода́таи.
Ра́дуйтеся, святи́и и пра́веднии Богоотцы́ Иоаки́ме и А́нно.
Кондак 13
О святи́и и пра́веднии Богоотцы́ Иоаки́ме и А́нно! Мо́лим ва́с со усе́рдием и любо́вию, к подно́жию но́г ва́ших припа́дающе: умоли́те Го́спода Бо́га изба́вити на́с от поги́бели ве́чныя, гре́шником угото́ванныя, да милосе́рдием Бо́га на́шего спаса́еми и ва́шими святы́ми моли́твами споспешеству́еми, благода́рственно воспои́м Ему́ а́нгельскую пе́снь: Аллилу́иа.
Повтор
Этот кондак читается трижды, затем икос 1-й и кондак 1-й.
Икос 1
А́нгел предста́тель по́слан бы́сть к ва́м от Бо́га, святи́и и пра́веднии Богоотцы́ Иоаки́ме и А́нно, егда́ о безпло́дии свое́м о́в у́бо в пусты́ни, о́ва же в саду́ свое́м се́товасте, к Бо́гу моли́тву вознося́ще; и та́ко благове́стие ра́достное принесе́ безпло́тный, я́ко роди́ти и́мате Дще́рь Преблагослове́нную, о Не́йже возблагослови́тся ве́сь ро́д челове́ческий, с ни́мже и мы́ ва́м ра́достное прино́сим хвале́ние:
Ра́дуйтеся, ко́рене Дави́дова святопроцве́тшия ро́зги виногра́да живо́тнаго; ра́дуйтеся, ро́ждшии Дще́рь, от все́х родо́в Преблагослове́нную.
Ра́дуйтеся, вопло́щшагося Сы́на Бо́жия прароди́телие всечестни́и; ра́дуйтеся, та́инства, от ве́ка утае́ннаго, прояви́телие всеизря́днии.
Ра́дуйтеся, уте́хи Изра́илевы ближа́йшии по пло́ти сро́дницы; ра́дуйтеся, обетова́ннаго ми́ру Спаси́теля единокро́внии ю́жицы.
Ра́дуйтеся, святи́и и пра́веднии Богоотцы́ Иоаки́ме и А́нно.
Кондак 1
Избра́ннии от челове́ческаго ро́да прароди́телие Христо́вы, ро́ждшии Преблагослове́нную Богоотрокови́цу, из Нея́же по пло́ти Сы́н Бо́жий роди́ся, святи́и и пра́веднии Богоотцы́ Иоаки́ме и А́нно! Я́ко иму́щии дерзнове́ние ве́лие ко Христу́ Бо́гу и вы́ну предстоя́щии Престо́лу Его́ небе́сному, Тому́ приле́жно моли́теся от бе́д на́м изба́витися, да вы́ну зове́м ва́м:
Ра́дуйтеся, святи́и и пра́веднии Богоотцы́ Иоаки́ме и А́нно.
Молитвы
О присносла́внии Христо́вы пра́ведницы, святи́и Богоотцы́ Иоаки́ме и А́нно, предстоя́щии небе́сному Престо́лу Вели́каго Царя́ и ве́лие дерзнове́ние к Нему́ иму́щии, я́ко от Преблагослове́нныя Дще́ри ва́шея, Пречи́стыя Богоро́дицы и Присноде́вы Мари́и, воплоти́тися изво́лившему, к ва́м, я́ко многомо́щным предста́телем и усе́рдным о на́с моли́твенником, прибега́ем мы́, гре́шнии и недосто́йнии. Моли́те бла́гость Его́, я́ко да отврати́т от на́с гне́в Сво́й, по дело́м на́шим пра́ведно на ны́ дви́жимый, и да безчи́сленныя прегреше́ния на́ша презре́в, обрати́т на́с на пу́ть покая́ния и на стези́ за́поведей Свои́х да утверди́т на́с. Та́же моли́твами ва́шими в ми́ре живо́т на́ш сохрани́те и во все́х благи́х благо́е поспеше́ние испроси́те, вся́ я́же к животу́ и благоче́стию потре́бная на́м от Бо́га да́рующе, от вся́ких напа́стей и бе́д и напра́сныя сме́рти предста́тельством ва́шим на́с избавля́юще, и от все́х вра́г ви́димых и неви́димых защища́юще, я́ко да ти́хое и безмо́лвное житие́ поживе́м во вся́ком благоче́стии и чистоте́, и та́ко в ми́ре вре́менное сие́ житие́ преше́дше, в ве́чный дости́гнем поко́й, иде́же ва́шим святы́м умоле́нием да сподо́бимся Небе́снаго Ца́рствия Христа́ Бо́га на́шего, Ему́же со Отце́м и Пресвяты́м Ду́хом подоба́ет вся́кая сла́ва, че́сть и поклоне́ние во ве́ки веко́в. Ами́нь.
Конда́къ а҃
И҆збра́ннїи ѿ человѣ́ческагѡ ро́да прароди́телїе хрⷭ҇то́вы, ро́ждшїи пребл҃гослове́ннꙋю бг҃оѻтрокови́цꙋ, и҆з̾ неѧ́же по пло́ти сн҃ъ бж҃їй роди́сѧ, ст҃і́и и҆ првⷣнїи бг҃оѻтцы̀ і҆ѡакі́ме и҆ а҆́нно! ꙗ҆́кѡ и҆мꙋ́щїи дерзнове́нїе ве́лїе ко хрⷭ҇тꙋ̀ бг҃ꙋ, и҆ вы́нꙋ предстоѧ́щїи прⷭ҇то́лꙋ є҆гѡ̀ нбⷭ҇номꙋ, томꙋ̀ прилѣ́жнѡ моли́тесѧ ѿ бѣ́дъ на́мъ и҆зба́витисѧ, да вы́нꙋ зове́мъ ва́мъ:
Ра́дꙋйтесѧ, ст҃і́и и҆ првⷣнїи бг҃оѻтцы̀ і҆ѡакі́ме и҆ а҆́нно.
І҆́косъ а҃
А҆́гг҃лъ предста́тель по́сланъ бы́сть къ ва́мъ ѿ бг҃а, ст҃і́и и҆ првⷣнїи бг҃оѻтцы̀ і҆ѡакі́ме и҆ а҆́нно, є҆гда̀ ѡ҆ безпло́дїи свое́мъ ѻ҆́въ ᲂу҆́бѡ въ пꙋсты́ни, ѻ҆́ва же въ садꙋ̀ свое́мъ сѣ́товасте, къ бг҃ꙋ мл҃твꙋ возносѧ́ще: и҆ та́кѡ бл҃говѣ́стїе ра́достное принесѐ безпло́тный, ꙗ҆́кѡ роди́ти и҆́мате дще́рь пребл҃гослове́ннꙋю, ѡ҆ не́йже возбл҃гослови́тсѧ ве́сь ро́дъ человѣ́ческїй, съ ни́мже и҆ мы̀ ва́мъ ра́достное прино́симъ хвале́нїе:
Ра́дꙋйтесѧ, ко́рене даві́дѡва ст҃опроцвѣ́тшїѧ рѡ́зги вїногра́да живо́тнагѡ: ра́дꙋйтесѧ, ро́ждшїи дще́рь, ѿ всѣ́хъ родѡ́въ пребл҃гослове́ннꙋю.
Ра́дꙋйтесѧ, вопло́щшагѡсѧ сн҃а бж҃їѧ прароди́телїе всечестні́и: ра́дꙋйтесѧ, та́инства ѿ вѣ́ка ᲂу҆тае́ннагѡ проѧви́телїє всеизрѧ́днїи.
Ра́дꙋйтесѧ, ᲂу҆тѣ́хи і҆и҃левы ближа́йшїи по пло́ти срѡ́дницы: ра́дꙋйтесѧ, ѡ҆бѣтова́ннагѡ мі́рꙋ спⷭ҇телѧ є҆динокро́внїи ю҆́жицы.
Ра́дꙋйтесѧ, ст҃і́и и҆ првⷣнїи бг҃оѻтцы̀ і҆ѡакі́ме и҆ а҆́нно.
Конда́къ в҃
Ви́дѣвъ себѐ ст҃ы́й і҆ѡакі́мъ, во хра́мѣ і҆ерⷭ҇ли́мстѣмъ безпло́дїѧ ра́ди ѿ а҆рхїере́а ᲂу҆ничиже́на, ѕѣлѡ̀ ѡ҆печа́лисѧ, и҆ въ го́рести дꙋшѝ своеѧ̀ въ пꙋсты́ню къ свои́мъ стадѡ́мъ ᲂу҆дали́сѧ, и҆ та́мѡ со мно́гими слеза́ми те́плѣ ко гдⷭ҇ꙋ молѧ́шесѧ, да сподо́битъ є҆го̀ ѻ҆тце́мъ своемꙋ̀ ча́дꙋ нарещи́сѧ, и҆ та́кѡ къ мл҃твѣ же по́стъ прилага́ше, и҆ въ сокрꙋше́нїи се́рдца вседержи́телю бг҃ꙋ взыва́ше: А҆ллилꙋ́їа.
І҆́косъ в҃
Си́лꙋ го́рести мꙋ́жа своегѡ̀ ст҃а́ѧ а҆́нна ᲂу҆вѣ́дѣвши, въ домꙋ̀ свое́мъ сѣдѧ́ще, го́рцѣ пла́касѧ и҆ молѧ́шесѧ ко гдⷭ҇ꙋ, да поноше́нїе безпло́дїѧ ѿ неѧ̀ ѿи́метъ. мы̀ же, толи́кое терпѣ́нїе првⷣныхъ помина́юще, воззове́мъ:
Ра́дꙋйтесѧ, бг҃оизбра̑ннаѧ дво́ице, є҆ди́номꙋ ѿ трⷪ҇цы ма́терь по пло́ти породи́вшаѧ: ра́дꙋйтесѧ, зижди́телю ва́шемꙋ роди́тельницꙋ непоро́чнꙋю произве́дшїи.
Ра́дꙋйтесѧ, сꙋпрꙋ́зи бл҃гослове́ннїи, пребл҃гослове́ннꙋю въ жена́хъ дще́рь воспита́вшїи: ра́дꙋйтесѧ, въ безпло́дїи ва́шемъ ѿ гдⷭ҇а ᲂу҆слы́шаннїи.
Ра́дꙋйтесѧ, ꙗ҆́кѡ слє́зныѧ мл҃твы ва̑ша пронико́ша нб҃о и҆ во ᲂу҆́шїю бг҃а і҆и҃лева достиго́ша: ра́дꙋйтесѧ, ꙗ҆́кѡ поноше́нїе ва́ше вре́менное во сла́вꙋ вѣ́чнꙋю на нб҃сѝ и҆ на землѝ и҆змѣни́сѧ.
Ра́дꙋйтесѧ, ст҃і́и и҆ првⷣнїи бг҃оѻтцы̀ і҆ѡакі́ме и҆ а҆́нно.
Конда́къ г҃
Си́лою бж҃їею преиспо́лненъ, ꙗ҆ви́сѧ а҆́гг҃лъ гдⷭ҇ень ст҃о́мꙋ і҆ѡакі́мꙋ въ пꙋсты́ни и҆ речѐ є҆мꙋ̀: ᲂу҆слы́ша бг҃ъ моли́твꙋ твою̀ и҆ и҆зво́ли да́ти тебѣ̀ блгⷣть свою̀, сѐ бо жена̀ твоѧ̀ а҆́нна зачне́тъ, и҆ породи́тъ тебѣ̀ дще́рь, ѡ҆ не́йже всемꙋ̀ мі́рꙋ бꙋ́детъ ра́дость: сїѧ̑ ре́къ безпло́тный, повелѣ̀ є҆мꙋ̀ ко хра́мꙋ і҆ерⷭ҇ли́мскомꙋ па́ки ѿидтѝ, и҆дѣ́же ѻ҆́нъ сꙋпрꙋ́гꙋ свою̀ молѧ́щꙋсѧ ѡ҆брѧ́щетъ, съ не́юже вкꙋ́пѣ да воспое́тъ та́мѡ хвале́бнꙋю пѣ́снь бг҃ꙋ і҆и҃левꙋ: А҆ллилꙋ́їа.
І҆́косъ г҃
И҆мꙋ́щи ско́рбь ве́лїю въ се́рдцѣ свое́мъ, а҆́нна ст҃а́ѧ, и҆ въ вертогра́дъ до́ма своегѡ̀ вше́дши, ви́дѣ гнѣздо̀ пти́чїе на дре́ве соѻрꙋже́но, птенцы̀ ма́лыѧ въ не́мъ лежа́щыѧ, а҆́бїе молє́нїѧ къ моле́нїѧмъ прилага́ти потща́сѧ, да сподо́битъ ю҆̀ гдⷭ҇ь ма́терь ча́дꙋ бы́ти. и҆ сѐ ꙗ҆ви́сѧ є҆́й а҆́гг҃лъ гдⷭ҇ень глаго́лѧ: ᲂу҆слы́шана є҆́сть мл҃тва твоѧ̀ и҆ воздыха̑нїѧ твоѧ̑ проидо́ша ѡ҆́блаки, сле́зы же твоѧ̑ пред̾ бг҃а внидо́ша: сѐ зачне́ши и҆ роди́ши дще́рь пребл҃гослове́ннꙋю, ѡ҆ не́йже возбл҃гословѧ́тсѧ всѧ̑ колѣ̑на земна̑ѧ, и҆ то́ю да́стсѧ сп҃се́нїе всемꙋ̀ мі́рꙋ, нарече́тсѧ же и҆́мѧ є҆́й марі́а: таково́е а҆́гг҃льское всера́достное бл҃говѣ́щенїе помина́юще, воспои́мъ бг҃оѻтцє́мъ такова́ѧ:
Ра́дꙋйтесѧ, сꙋпрꙋ́зи првⷣнїи, ѿ бг҃а свы́ше пред̾избра́ннїи: ра́дꙋйтесѧ, во всѣ́хъ за́повѣдехъ гдⷭ҇нихъ без̾ поро́ка ходи́вшїи.
Ра́дꙋйтесѧ, въ ско́рби ва́шей вре́меннѣй ᲂу҆тѣше́нїе вѣ́чное полꙋчи́вшїи: ра́дꙋйтесѧ, па́че ча́ѧнїѧ ва́шегѡ десни́цею бж҃їею превознесе́ннїи.
Ра́дꙋйтесѧ, ꙗ҆́кѡ во смире́нїи ва́шемъ и҆ ско́рби, помѧнꙋ̀ вы̀ гдⷭ҇ь: ра́дꙋйтесѧ, ꙗ҆́кѡ сподо́бистесѧ прароди́телїе сн҃ꙋ бж҃їю бы́ти.
Ра́дꙋйтесѧ, ст҃і́и и҆ првⷣнїи бг҃оѻтцы̀ і҆ѡакі́ме и҆ а҆́нно.
Конда́къ д҃
Бꙋ́рею сомнѣ́нїѧ і҆ѡакі́мъ пра́ведный содержи́мь и҆ ѡ҆ бл҃говѣ́стїи є҆мꙋ̀ а҆́гг҃ла недоꙋмѣва́ѧ, а҆́бїе во гра́дъ і҆ерⷭ҇ли́мъ ѿи́де, и҆дѣ́же пред̾ враты̀ хра́ма ст҃ꙋ́ю а҆́ннꙋ ѡ҆брѣ́те, гдⷭ҇а вельмѝ славосло́вѧщꙋю и҆ ра́дость а҆́гг҃льскагѡ ꙗ҆вле́нїѧ и҆ ѡ҆ ча́дѣ прорече́нїѧ є҆мꙋ̀ возвѣща́ющꙋ, тѣ́мже и҆ ѡ҆ свое́мъ видѣ́нїи сꙋпрꙋ́жницѣ бл҃говѣсти́въ, вкꙋ́пѣ съ не́ю возопѝ ко гдⷭ҇ꙋ: А҆ллилꙋ́їа.
І҆́косъ д҃
Слы́шавше сро́дницы и҆ зна́емїи ѡ҆ пресла́вномъ ст҃ы́ѧ а҆́нны зача́тїи, бг҃а і҆и҃лева сла́влѧхꙋ, а҆́нна же бг҃омꙋ́драѧ, пло́дъ чре́ва своегѡ̀ на слꙋже́нїе бг҃ꙋ ѡ҆бречѐ, те́плое бл҃годаре́нїе гдⷭ҇еви возноша́ше, мы́ же свѣ́тлѡ всесла́вное зача́тїе бг҃оѻтрокови́цы марі́и воспѣва́юще, тоѧ̀ свѧты̑мъ роди́телємъ глаго́лемъ си́це:
Ра́дꙋйтесѧ, ра́достнїи на́мъ грѧдꙋ́щагѡ въ мі́ръ и҆скꙋпи́телѧ провозвѣ́стницы: ра́дꙋйтесѧ, при́снѡ помина́емїи ча́емагѡ спⷭ҇телѧ пра́ѻтцы.
Ра́дꙋйтесѧ, чрез̾ дще́рь ва́шꙋ бл҃гослове́ннꙋю, сло́вꙋ бж҃їю пло́ть взаимода́вшїи: ра́дꙋйтесѧ, бг҃а воплоще́нна внꙋ́ка себѣ̀ нарица́ющїи.
Ра́дꙋйтесѧ, ве́лїей бл҃гоче́стїѧ та́йны досто́йнїи слꙋжи́телїе: ра́дꙋйтесѧ, бж҃їѧ къ человѣ́кѡмъ снисхожде́нїѧ всеизрѧ́днїи посре́дницы.
Ра́дꙋйтесѧ, ст҃і́и и҆ првⷣнїи бг҃оѻтцы̀ і҆ѡакі́ме и҆ а҆́нно.
Конда́къ є҃
Бг҃освѣ́тлꙋю ѕвѣздꙋ̀ ꙗ҆́вльшꙋю сл҃нце пра́вды хрⷭ҇та̀ бг҃а, прест҃ꙋ́ю бцⷣꙋ, пло́тїю роди́ти сподо́бистесѧ, и҆ вожделѣ́нное и҆́мѧ бг҃оѻтцє́въ прїѧ́сте, і҆ѡакі́ме и҆ а҆́нно всебл҃же́ннїи, ѡ҆ є҆ѧ́же рождествѣ̀ ст҃ѣ́мъ нб҃о и҆ землѧ̀ возра́довашасѧ, и҆ ве́сь ро́дъ человѣ́ческїй ѡ҆ст҃и́сѧ, вопїѧ̀ ди́вномꙋ во ст҃ы́хъ свои́хъ бг҃ꙋ і҆и҃левꙋ: А҆ллилꙋ́їа.
І҆́косъ є҃
Ви́дѣвше роди́телїе ѿ ни́хъ ро́ждшꙋюсѧ бг҃оѻтрокови́цꙋ марі́ю, зижди́телевꙋ же ма́терь, ꙗ҆́кѡ кївѡ́тꙋ бж҃їю, бл҃гоговѣ́йнѡ то́й послꙋжи́ша, тѣ́мже и҆ на́съ, къ ва́мъ моли́твеннѡ припа́дающихъ, не ѿврати́тесѧ, глаго́лющихъ:
Ра́дꙋйтесѧ, въ рождествѣ̀ бг҃оѻтрокови́цы марі́и свѣ́тлѡ возликова́вшїи: ра́дꙋйтесѧ, видѣ́нїемъ бг҃оѻтрокови́цы ᲂу҆слажде́ннїи.
Ра́дꙋйтесѧ, слы́шанїемъ є҆ѧ̀ ᲂу҆миле́ннїи: ра́дꙋйтесѧ, по си́хъ ѿ а҆рхїере́а бж҃їѧ бл҃гослове́ннїи и҆ ᲂу҆бл҃же́ннїи.
Ра́дꙋйтесѧ, а҆́гницꙋ непоро́чнꙋю въ домꙋ̀ свое́мъ до́брѣ ᲂу҆па́сшїи: ра́дꙋйтесѧ, а҆́гнца и҆ па́стырѧ ма́терь во дще́рь себѣ̀ прїе́мшїи.
Ра́дꙋйтесѧ, ст҃і́и и҆ првⷣнїи бг҃оѻтцы̀ і҆ѡакі́ме и҆ а҆́нно.
Конда́къ ѕ҃
Проповѣ̑дницы чꙋде́съ бж҃їихъ ꙗ҆ви́стесѧ ст҃і́и, є҆гда̀ ѻ҆бѣ́тъ сво́й бг҃ови соверши́сте и҆ триле́тнюю бг҃оѻтрокови́цꙋ марі́ю въ хра́мъ бж҃їй со сла́вою введо́сте, да ѡ҆бита́етъ та́мѡ во ст҃а́ѧ ст҃ы́хъ, ѡ҆ си́хъ ᲂу҆̀бо ра́достнѡ бг҃ꙋ ѻ҆тє́цъ ва́шихъ славосло́вїѧ пѣ́снь воспѣва́ти потща́стесѧ: А҆ллилꙋ́їа.
І҆́косъ ѕ҃
Возсїѧ̀ бг҃оѻтрокови́ца ꙗ҆́кѡ лꙋна̀ по́лнаѧ въ честнѣ́мъ свое́мъ въ хра́мъ гдⷭ҇ень вхожде́нїи, є҆ѧ́же чистотѣ̀ а҆́гг҃лы ᲂу҆дивлѧ́хꙋсѧ, и҆ а҆рхїере́й бж҃їй заха́рїѧ прїе́мъ ю҆̀ ѿ рꙋ́къ ва́шихъ, ст҃і́и і҆ѡакі́ме и҆ а҆́нно, во внꙋ́трєннѧѧ ст҃а́ѧ ст҃ы́хъ съ че́стїю введѐ, ꙗ҆́кѡ вои́стиннꙋ ѡ҆дꙋшевле́нный бж҃їй кївѡ́тъ, ва́съ же по достоѧ́нїю ᲂу҆блажѝ хвале́ньми таковы́ми:
Ра́дꙋйтесѧ, ра́дость всемі́рнꙋю ро́дꙋ человѣ́ческомꙋ породи́вшїи: ра́дꙋйтесѧ, вино́вницꙋ человѣ́ческагѡ ѡ҆бновле́нїѧ воспита́вшїи.
Ра́дꙋйтесѧ, въ хра́мъ гдⷭ҇ень кївѡ́тъ ѡ҆дꙋшевле́нный бж҃їй приве́дшїи: ра́дꙋйтесѧ, дще́рь ва́шꙋ ст҃ꙋ́ю, во ст҃а́ѧ ст҃ы́хъ вмести́вшїи.
Ра́дꙋйтесѧ, бг҃ꙋ воплоти́тисѧ хотѧ́щемꙋ срѡ́дницы ꙗ҆влѧ́ющїисѧ: ра́дꙋйтесѧ, а҆́гг҃лѡмъ собесѣ́дницы бы́вшїи.
Ра́дꙋйтесѧ, ст҃і́и и҆ првⷣнїи бг҃оѻтцы̀ і҆ѡакі́ме и҆ а҆́нно.
Конда́къ з҃
Жела́нїе дꙋшѝ твоеѧ̀ и҆спо́лнивъ, и҆ ѻ҆бѣ́тъ тво́й бг҃ови возда́въ, і҆ѡакі́ме пребл҃же́нне, въ ста́рости до́брѣй свѧ́тѡ и҆ пра́веднѡ жи́знь земнꙋ́ю ѡ҆ гдⷭ҇ѣ сконча́лъ є҆сѝ. тѣ́мже ны́нѣ томꙋ̀ и҆ ѡ҆ на́съ сотворѝ мл҃твꙋ, да бл҃гꙋ́ю, ми́рнꙋю и҆ непосты́днꙋю кончи́нꙋ полꙋчи́ти сподо́бимсѧ, зовꙋ́ще є҆мꙋ̀: А҆ллилꙋ́їа.
І҆́косъ з҃
Но́вое и҆ бг҃оꙋго́дное житїѐ во вдовствѣ̀ твое́мъ а҆́нно ст҃а́ѧ, провожда́ла є҆сѝ, ᲂу҆ хра́ма бж҃їѧ примета́ющисѧ и҆ ст҃ѣ́й и҆ пребл҃гослове́ннѣй дще́ри твое́й сослꙋжа́щи, тѣ́мже ꙗ҆́кѡ и҆́стиннꙋю и҆ бг҃оꙋго́днꙋю вдови́цꙋ, хрⷭ҇то́вꙋ же праба́бꙋ тѧ̀ восхвалѧ́емъ, вкꙋ́пѣ же и҆ мꙋ́жа твоегѡ̀, бг҃оѻтца̀ і҆ѡакі́ма, ᲂу҆се́рднѡ чествꙋ́емъ и҆ съ любо́вїю пѣ̑сни таковы́ѧ ва́мъ прино́симъ:
Ра́дꙋйтесѧ, пра́вєдницы, и҆́хже пра́вда ꙗ҆́кѡ со́лнце сїѧ́етъ во вѣ́ки: ра́дꙋйтесѧ, а҆́гг҃лѡмъ дрꙋ́зи, сожи́телїе ст҃ы́мъ и҆ при́снїи бг҃ꙋ.
Ра́дꙋйтесѧ, бли́жнїи нбⷭ҇нагѡ прⷭ҇то́ла предстоѧ́телїе: ра́дꙋйтесѧ, дерзнове́нїе ве́лїе ко хрⷭ҇тꙋ̀ бг҃ꙋ и҆мꙋ́щїи.
Ра́дꙋйтесѧ, цр҃кве на нб҃сѝ торжествꙋ́ющїѧ ᲂу҆краше́нїе: ра́дꙋйтесѧ, цр҃кве во́инствꙋющїѧ на землѝ до́брое застꙋпле́нїе.
Ра́дꙋйтесѧ, ст҃і́и и҆ првⷣнїи бг҃оѻтцы̀ і҆ѡакі́ме и҆ а҆́нно.
Конда́къ и҃
Стра́нствїе земно́е соверши́въ, ст҃а́ѧ и҆ првⷣнаѧ а҆́нно, на рꙋка́хъ пребжⷭ҇твенныѧ твоеѧ̀ дще́ри, бцⷣы марі́и, сно́мъ сме́ртнымъ почи́ла є҆сѝ и҆ къ бг҃ꙋ со ᲂу҆пова́нїемъ преста́виласѧ є҆сѝ: тѣ́мже ст҃о́е ᲂу҆спе́нїе твоѐ сла́вѧще, мо́лимъ тѧ̀, ѡ҆ бг҃опрама́терь всечестна́ѧ, да є҆гда̀ и҆ мы̀ сно́мъ сме́ртнымъ ᲂу҆сыпа́ти начне́мъ, ᲂу҆молѝ сп҃са хрⷭ҇та̀, кро́ткѡ дꙋ́шꙋ на́шꙋ ѿ тѣ́ла ѿдели́ти и҆ бѣсо́вскїѧ вла́сти ю҆̀ и҆зба́вити, сп҃се́нїѧ же вѣ́чнагѡ на́съ ᲂу҆досто́ити, да зове́мъ є҆мꙋ̀ въ ра́дости ст҃ы́хъ: А҆ллилꙋ́їа.
І҆́косъ и҃
Ве́сь мі́ръ хрїстїа́нскїй блажи́тъ ва́съ по достоѧ́нїю, ст҃і́и и҆ првⷣнїи бг҃оѻтцы̀ і҆ѡакі́ме и҆ а҆́нно, и҆ моли́твеннѡ ва̑ша честна̑ѧ и҆мена̀ прославлѧ́етъ, цр҃ковь же хрⷭ҇то́ва свѣ́тлѡ па́мѧть ва́шꙋ пра́зднꙋетъ и҆ пѣ̑сни хвалє́бныѧ ва́мъ прино́ситъ си́це:
Ра́дꙋйтесѧ, свѣти̑льницы, мра́къ дꙋ́шъ на́шихъ бл҃года́тнѡ ѡ҆зарѧ́ющїи: ра́дꙋйтесѧ, ѿ го́рнихъ высо́тъ сла́вы ва́шеѧ къ земнорѡ́днымъ ми́лостивѡ проница́ющїи.
Ра́дꙋйтесѧ, бцⷣѣ марі́и сомоли̑твенницы всегда́шнїи: ра́дꙋйтесѧ, хрⷭ҇та̀ бг҃а ᲂу҆милостиви́телїе многомо́щнїи.
Ра́дꙋйтесѧ, любо́вь и҆ вѣ́рꙋ къ ва́мъ и҆мꙋ́щихъ ѿ всѧ́кихъ бѣ́дъ сп҃са́ющїи: ра́дꙋйтесѧ, моли́твеннѡ на по́мощь ва́съ призыва́ющихъ ѿ напра́сныѧ и҆ на́глыѧ сме́рти и҆збавлѧ́ющїи.
Ра́дꙋйтесѧ, ст҃і́и и҆ првⷣнїи бг҃оѻтцы̀ і҆ѡакі́ме и҆ а҆́нно.
Конда́къ ѳ҃
Всѝ а҆́гг҃ли бж҃їи и҆ ли́цы ст҃ы́хъ бж҃їихъ на нб҃сѝ ва́съ, ст҃і́и и҆ првⷣнїи бг҃оѻтцы̀ і҆ѡакі́ме и҆ а҆́нно, цѣлꙋ́ютъ, ро́ди же человѣ́честїи на землѝ моли́твенными пѣ́сньми ва́съ похвалѧ́ютъ и҆ ѡ҆ предста́тельствѣ ва́шемъ бл҃года́рнѡ вопїю́тъ бг҃ꙋ: А҆ллилꙋ́їа.
І҆́косъ ѳ҃
Виті̑йства на̑ша не довлѣ́ютъ къ досто́йнѣй ва́мъ похвалѣ̀, ст҃і́и прароди́телїе хрⷭ҇то́вы: ѻ҆ба́че вы̀, ми́лѡстивы сꙋ́щѣ, и҆ на́ша ᲂу҆бѡ́гаѧ хвалє́нїѧ не ѿврати́те, но бꙋ́дите ѡ҆ на́съ те́плїи предста́тели и҆ мл҃твєнницы ко гдⷭ҇ꙋ, ва́шими ст҃ы́ми мл҃твами скꙋ́дость дꙋ́шъ на́шихъ восполнѧ́юще, да бл҃года́рственнѣ ва́мъ зове́мъ:
Ра́дꙋйтесѧ, ра́дости и҆ сла́вы вѣ́чныѧ вожделѣ́ннїи на́мъ хода́таи: ра́дꙋйтесѧ, бла́гъ вре́менныхъ и҆ вѣ́чныхъ ᲂу҆се́рднїи на́мъ пред̾ гдⷭ҇емъ хода́таи.
Ра́дꙋйтесѧ, ѿ смертоно́сныѧ ꙗ҆́звы предста́тельствомъ ва́шимъ вѣ́рныѧ сохранѧ́ющїи: ра́дꙋйтесѧ, тлетво́рныѧ вѣ́тры мл҃твами ва́шими разгонѧ́ющїи.
Ра́дꙋйтесѧ, трѧсе́нїе землѝ и҆ бꙋ̑ри ѕѣ́льныѧ хода́тайствомъ ва́шимъ ᲂу҆становлѧ́ющїи и҆ въ тишинꙋ̀ прелага́ющїи: ра́дꙋйтесѧ, во всѧ́кихъ бѣда́хъ и҆ ѕлоключе́нїихъ на по́мощь къ на́мъ ᲂу҆скорѧ́ющїи.
Ра́дꙋйтесѧ, ст҃і́и и҆ првⷣнїи бг҃оѻтцы̀ і҆ѡакі́ме и҆ а҆́нно.
Конда́къ і҃
Сп҃се́нїѧ дꙋше́внагѡ жела́ющымъ и҆ ѡ҆ се́мъ ᲂу҆се́рднѡ подвиза́ющымсѧ помѡ́щницы блазі́и, ст҃і́и и҆ првⷣнїи бг҃оѻтцы̀ і҆ѡакі́ме и҆ а҆́нно ꙗ҆ви́стесѧ, ѻ҆́въ ᲂу҆́бѡ и҆́нокѡмъ, ѻ҆́ва же и҆́нѡкинѧмъ храни́тели и҆менꙋ́етесѧ, ѻ҆́бщее моле́нїе за всѣ́хъ вѣ́рныхъ бг҃ꙋ приносѧ́ще, да всѝ бл҃года́рственнѡ зовꙋ́тъ просла́вльшемꙋ ва́съ во вселе́ннѣй, цр҃ю̀ сла́вы хрⷭ҇тꙋ̀: А҆ллилꙋ́їа.
І҆́косъ і҃
Стѣно́ю мл҃твъ ва́шихъ нбⷭ҇ныхъ, ст҃і́и и҆ првⷣнїи бг҃оѻтцы̀ і҆ѡакі́ме и҆ а҆́нно, сохранѧ́йте и҆ ѡ҆гражда́йте на́съ ѿ и҆скꙋше́нїй врага̀ дїа́вола, и҆́щꙋщагѡ дꙋше́внѣй поги́бели на́шей: вѣ́мы бо, вѣ́мы, ꙗ҆́кѡ мно́гѡ мо́жетъ мл҃тва ва̑ша пред̾ лице́мъ хрⷭ҇та̀ бг҃а на́шегѡ, ва́шегѡ же по пло́ти внꙋ́ка. є҆го́же ᲂу҆молѧ́ти не преста́йте ѡ҆ всѣ́хъ, съ любо́вїю ва́съ почита́ющихъ и҆ вопїю́щихъ:
Ра́дꙋйтесѧ, ма́слина бл҃гопло́днаѧ, є҆ле́й ми́лости бж҃їей ѡ҆би́льнѡ на́мъ и҆сточа́ющаѧ: ра́дꙋйтесѧ, кѷпарі́си дво́е бл҃госѣнноли́ственнїи, зно́й страсте́й на́шихъ въ поко́й безстра́стїѧ приводѧ́щїи.
Ра́дꙋйтесѧ, вѷссо́не и҆ багрѧни́це, и҆з̾ ни́хже ски́нїа бж҃їѧ селе́нїѧ соорꙋди́сѧ: ра́дꙋйтесѧ, го́рлицы є҆диносꙋпрꙋ́жнїи, голꙋби́цꙋ непоро́чнꙋю произве́дшїи.
Ра́дꙋйтесѧ, со дще́рїю ва́шею, всѣ́хъ цр҃и́цею вѣ́чнѡ ца́рствꙋющїи: ра́дꙋйтесѧ, въ сїѡ́не го́рнѣмъ въ ѡ҆би́тели є҆ѧ̀ нбⷭ҇нѣй свѣ́тлѡ торжествꙋ́ющїи.
Ра́дꙋйтесѧ, ст҃і́и и҆ првⷣнїи бг҃оѻтцы̀ і҆ѡакі́ме и҆ а҆́нно.
Конда́къ а҃і
Пѣ́нїе на́ше хвале́бное ми́лостивнѡ прїими́те, и҆ щедрѡ́тъ ва́шихъ мл҃твенныхъ на́съ не лиши́те, ѡ҆ ст҃і́и прароди́телїе хрⷭ҇то́вы і҆ѡакі́ме и҆ а҆́нно, а҆́ще и҆ недосто́йнїи є҆смы̀ грѣхѡ́въ ра́ди на́шихъ, ва́шегѡ ст҃а́гѡ застꙋпле́нїѧ: ѻ҆ба́че ꙗ҆́кѡ бла́зи и҆ всеще́дри сꙋ́щѣ, сїѐ на́мъ подади́те, и҆ помози́те на́мъ покаѧ́нїемъ ѡ҆чи́ститисѧ ѿ скве́рны грѣхо́вныѧ, да въ чистотѣ̀ серде́цъ воспое́мъ созда́телю на́шемꙋ хвале́бнꙋю пѣ́снь: А҆ллилꙋ́їа.
І҆́косъ а҃і
Свѣтопода́тельныѧ два̀ свѣти̑льника, всемі́рнꙋю свѣщꙋ̀ возже́гшїи, позна́емъ ст҃ы́хъ бг҃оѻтє́цъ і҆ѡакі́ма и҆ а҆́ннꙋ, ѽ бра́тїе, и҆ сїѧ́нїемъ тѣ́хъ нбⷭ҇ныѧ сла́вы ѡ҆зарѧ́еми, воспои́мъ и҆́мъ такова́ѧ:
Ра́дꙋйтесѧ, сла́внѣйшꙋю без̾ сравне́нїѧ серафі́мъ воспита́ти ᲂу҆досто́ившїисѧ: ра́дꙋйтесѧ, лꙋча́ми бл҃года́ти бж҃їѧ ѡ҆сїѧ́ннїи.
Ра́дꙋйтесѧ, бл҃гоꙋха́нїѧ дꙋхо́внагѡ преиспо́лненнїи: ра́дꙋйтесѧ, ѳѷмїа́мъ мл҃твъ ва́шихъ ѡ҆ всѣ̑мъ мі́рѣ хрⷭ҇тїа́нстѣмъ бг҃ꙋ приносѧ́щїи.
Ра́дꙋйтесѧ, съ бцⷣею марі́ею и҆ прⷣте́чею і҆ѡа́нномъ ᲂу҆ прⷭ҇то́ла хрⷭ҇то́ва вы́нꙋ предстоѧ́щїи.
Ра́дꙋйтесѧ, ст҃і́и и҆ првⷣнїи бг҃оѻтцы̀ і҆ѡакі́ме и҆ а҆́нно.
Конда́къ в҃і
Блгⷣть бж҃їю и҆ млⷭ҇ть на́мъ пода́ти, проще́нїе же грѣхѡ́въ и҆ и҆справле́нїѧ житїѧ̀ ниспосла́ти проси́те на́мъ ᲂу҆ гдⷭ҇а, ст҃і́и бг҃оѻтцы̀ і҆ѡакі́ме и҆ а҆́нно, и҆ не преста́йте ѡ҆ на́съ пред̾ лице́мъ вседержи́телѧ бг҃а молѧ́ще, ꙗ҆́кѡ стѧжа́вшїи къ немꙋ̀ дерзнове́нїе мно́гое. ѡ҆ се́мъ ᲂу҆се́рднѡ къ ва́мъ припа́дающе, ꙗ҆́кѡ при́сныхъ предста́телей и҆ застꙋ́пникѡвъ на́шихъ, про́симъ и҆ бл҃гоꙋмиле́ннѡ зове́мъ всѣ́хъ творцꙋ̀: А҆ллилꙋ́їа.
І҆́косъ в҃і
Пою́ще многомо́щное предста́тельство ва́ше къ бг҃ꙋ, і҆ѡакі́ме и҆ а҆́нно првⷣнїи, велича́емъ возвели́чившаго ва́съ хрⷭ҇та̀ гдⷭ҇а, воспѣва́емъ и҆ рожде́ннꙋю ѿ ва́съ пренепоро́чнꙋю є҆гѡ̀ ма́терь, ва́мъ же ѿ ᲂу҆се́рдїѧ на́шегѡ сїѧ̑ достодо́лжныѧ похвалы̑ прино́симъ:
Ра́дꙋйтесѧ, ѿ восто́ка и҆ до за́пада препросла́вленнїи: ра́дꙋйтесѧ, стра́жїе бжⷭ҇твеннїи, неꙋсы́пнѡ бдѧ́щїи въ мл҃твахъ къ бг҃ꙋ ѡ҆ всѣ́хъ вѣ́рныхъ.
Ра́дꙋйтесѧ, по́мощь ва́шꙋ бл҃года́тнꙋю всѧ́цѣй дꙋшѣ̀ хрⷭ҇тїа́нстѣй подаю́щїи: ра́дꙋйтесѧ, во бл҃ги́хъ молє́нїѧ и҆ прошє́нїѧ бл҃гочести́выхъ и҆сполнѧ́ющїи.
Ра́дꙋйтесѧ, дꙋше́вныхъ и҆ тѣле́сныхъ недꙋ́гѡвъ преизрѧ́днїи и҆ безме́зднїи цѣли́тєли: ра́дꙋйтесѧ, бла́гъ вре́менныхъ и҆ вѣ́чныхъ всеꙋсе́рднїи и҆ бл҃гопрїѧ́тнїи на́мъ хода́таи.
Ра́дꙋйтесѧ, ст҃і́и и҆ првⷣнїи бг҃оѻтцы̀ і҆ѡакі́ме и҆ а҆́нно.
Конда́къ г҃і
Ѽ ст҃і́и и҆ првⷣнїи бг҃оѻтцы̀ і҆ѡакі́ме и҆ а҆́нно! мо́лимъ ва́съ со ᲂу҆се́рдїемъ и҆ любо́вїю, къ подно́жїю но́гъ ва́шихъ припа́дающе: ᲂу҆моли́те гдⷭ҇а бг҃а, и҆зба́вити на́съ ѿ поги́бели вѣ́чныѧ, грѣ́шникѡмъ ᲂу҆гото́ванныѧ, да милосе́рдїемъ бг҃а на́шегѡ сп҃са́еми, и҆ ва́шими ст҃ы́ми мл҃твами споспѣшествꙋ́еми, бл҃года́рственнѡ воспои́мъ є҆мꙋ̀ а҆́гг҃льскꙋю пѣ́снь: А҆ллилꙋ́їа.
Повто́ръ
Сей конда́къ глаго́лется три́жды, та́же і҆́косъ а҃-й и҆ конда́къ а҃-й.
І҆́косъ а҃
А҆́гг҃лъ предста́тель по́сланъ бы́сть къ ва́мъ ѿ бг҃а, ст҃і́и и҆ првⷣнїи бг҃оѻтцы̀ і҆ѡакі́ме и҆ а҆́нно, є҆гда̀ ѡ҆ безпло́дїи свое́мъ ѻ҆́въ ᲂу҆́бѡ въ пꙋсты́ни, ѻ҆́ва же въ садꙋ̀ свое́мъ сѣ́товасте, къ бг҃ꙋ мл҃твꙋ возносѧ́ще: и҆ та́кѡ бл҃говѣ́стїе ра́достное принесѐ безпло́тный, ꙗ҆́кѡ роди́ти и҆́мате дще́рь пребл҃гослове́ннꙋю, ѡ҆ не́йже возбл҃гослови́тсѧ ве́сь ро́дъ человѣ́ческїй, съ ни́мже и҆ мы̀ ва́мъ ра́достное прино́симъ хвале́нїе:
Ра́дꙋйтесѧ, ко́рене даві́дѡва ст҃опроцвѣ́тшїѧ рѡ́зги вїногра́да живо́тнагѡ: ра́дꙋйтесѧ, ро́ждшїи дще́рь, ѿ всѣ́хъ родѡ́въ пребл҃гослове́ннꙋю.
Ра́дꙋйтесѧ, вопло́щшагѡсѧ сн҃а бж҃їѧ прароди́телїе всечестні́и: ра́дꙋйтесѧ, та́инства ѿ вѣ́ка ᲂу҆тае́ннагѡ проѧви́телїє всеизрѧ́днїи.
Ра́дꙋйтесѧ, ᲂу҆тѣ́хи і҆и҃левы ближа́йшїи по пло́ти срѡ́дницы: ра́дꙋйтесѧ, ѡ҆бѣтова́ннагѡ мі́рꙋ спⷭ҇телѧ є҆динокро́внїи ю҆́жицы.
Ра́дꙋйтесѧ, ст҃і́и и҆ првⷣнїи бг҃оѻтцы̀ і҆ѡакі́ме и҆ а҆́нно.
Конда́къ а҃
И҆збра́ннїи ѿ человѣ́ческагѡ ро́да прароди́телїе хрⷭ҇то́вы, ро́ждшїи пребл҃гослове́ннꙋю бг҃оѻтрокови́цꙋ, и҆з̾ неѧ́же по пло́ти сн҃ъ бж҃їй роди́сѧ, ст҃і́и и҆ првⷣнїи бг҃оѻтцы̀ і҆ѡакі́ме и҆ а҆́нно! ꙗ҆́кѡ и҆мꙋ́щїи дерзнове́нїе ве́лїе ко хрⷭ҇тꙋ̀ бг҃ꙋ, и҆ вы́нꙋ предстоѧ́щїи прⷭ҇то́лꙋ є҆гѡ̀ нбⷭ҇номꙋ, томꙋ̀ прилѣ́жнѡ моли́тесѧ ѿ бѣ́дъ на́мъ и҆зба́витисѧ, да вы́нꙋ зове́мъ ва́мъ:
Ра́дꙋйтесѧ, ст҃і́и и҆ првⷣнїи бг҃оѻтцы̀ і҆ѡакі́ме и҆ а҆́нно.
Моли́твы
Ѽ присносла́внїи хрⷭ҇тѡ́вы пра́вєдницы, ст҃і́и бг҃оѻтцы̀ і҆ѡакі́ме и҆ а҆́нно, предстоѧ́щїи нбⷭ҇номꙋ прⷭ҇то́лꙋ вели́каго цр҃ѧ̀ и҆ ве́лїе дерзнове́нїе къ немꙋ̀ и҆мꙋ́щїи, ꙗ҆́кѡ ѿ преблгⷭ҇ве́нныѧ дще́ри ва́шеѧ, пречⷭ҇тыѧ бцⷣы и҆ прⷭ҇нодв҃ы мр҃і́и, воплоти́тисѧ и҆зво́лившемꙋ, къ ва́мъ, ꙗ҆́кѡ многомѡ́щнымъ предста́телємъ и҆ ᲂу҆сє́рднымъ ѽ на́съ мл҃твенникѡмъ, прибѣга́емъ мы̀, грѣ́шнїи и҆ недосто́йнїи! моли́те бл҃гость є҆гѡ̀, ꙗ҆́кѡ да ѿврати́тъ ѿ на́съ гнѣ́въ сво́й, по дѣлѡ́мъ на́шимъ пра́веднѡ на ны̀ дви́жимый, и҆ да безчи̑сленныѧ прегрѣшє́нїѧ на́ша презрѣ́въ, ѡ҆брати́тъ на́съ, на пꙋ́ть покаѧ́нїѧ, и҆ на стезѝ за́повѣдей свои́хъ да ᲂу҆тверди́тъ на́съ. та́же мл҃твами ва́шими въ мі́рѣ живо́тъ на́шъ сохрани́те, и҆ во всѣ́хъ благи́хъ благо́е поспѣше́нїе и҆спроси́те, всѧ̑ ꙗ҆̀же къ животꙋ̀ и҆ бл҃гоче́стїю потрє́бнаѧ на́мъ ѿ бг҃а да́рꙋюще, ѿ всѧ́кихъ напа́стей и҆ бѣ́дъ и҆ напра́сныѧ сме́рти предста́тельствомъ ва́шимъ на́съ и҆збавлѧ́юще и҆ ѿ всѣ́хъ вра̑гъ ви́димыхъ и҆ неви́димыхъ защища́юще, ꙗ҆́кѡ да ти́хое и҆ безмо́лвное житїѐ поживе́мъ во всѧ́комъ бл҃гоче́стїи и҆ чⷭ҇тотѣ̀, и҆ та́кѡ въ мі́рѣ вре́менное сїѐ житїѐ преше́дше въ вѣ́чный дости́гнемъ поко́й, и҆дѣ́же ва́шимъ свѧты́мъ ᲂу҆моле́нїемъ да сподо́бимсѧ нбⷭ҇нагѡ црⷭ҇твїѧ хрⷭ҇та̀ бг҃а на́шегѡ, є҆мꙋ́же со ѻ҆ц҃е́мъ и҆ прест҃ы́мъ дх҃омъ подоба́етъ всѧ́каѧ сла́ва, че́сть и҆ поклоне́нїе во вѣ́ки вѣкѡ́въ. А҆ми́нь.