Акафист на Воздвижение Креста Господня

А́нгелов ли́цы, я́ко Бо́жии служи́телие, Кре́ст обстоя́ще, во́льную стра́сть Христа́ Жизнода́вца прославля́ют. Мы́ же страда́ньми Того́ ве́чныя сме́рти изба́вльшеся, подража́я го́рним си́лам, ра́достно взыва́ем:

Ра́дуйся, Кре́сте, я́ко на тебе́ Христо́с Бо́г на́ш, во́лею ру́це распросте́р, спасе́ние на́ше соде́ла; ра́дуйся, я́ко распросте́ршимся на тебе́ Христо́м преступле́ние Ада́ма и Е́вы, просте́рших ру́це ко дре́ву запреще́нному, упраздни́ся.

Ра́дуйся, я́ко воздви́жену бы́вшу на тебе́, а́ки престу́пну, Законода́вцу, дре́вняя кля́тва, я́же на на́с бы́вшая, потреби́ся; ра́дуйся, я́ко соде́явшимся на тебе́ стра́нным та́инством ро́д челове́ческий от тли́ сме́ртныя свободи́ся.

Ра́дуйся, я́ко Пострада́вшим и Уме́ршим на тебе́ жа́ло сме́рти сокруши́ся; ра́дуйся, того́ ра́ди страда́ния Бо́г с челове́ки примири́ся.

Ра́дуйся, Честны́й Кре́сте, всера́достное зна́мение на́шего искупле́ния.

Ра́зум челове́ч изнемога́ет в постиже́нии ве́лия та́йны Твоего́, Христе́, воплоще́ния и во́льнаго за ны́ страда́ния: ка́ко Ты́, Бо́г сы́й безстра́стный, стра́сть кре́стную, я́ко челове́к, претерпе́л еси́ и сие́ ору́дие сме́рти Твоея́ соде́лал еси́ исто́чником жи́зни и спасе́ния все́м благоче́стно в Тя́ ве́рующим и хвале́бно воспева́ющим:

Ра́дуйся, Кре́сте, на не́мже соде́яся та́инство, от ве́ка предопределе́нное; ра́дуйся, я́ко на тебе́ соверши́ся на́ше искупле́ние, многообра́зне во о́бразех и се́нех предъявле́нное.

Ра́дуйся, я́ко уме́рый на тебе́ Жизнода́вец, кро́вь и во́ду источи́, и́миже грехи́ на́ша омыва́ются; ра́дуйся, я́ко ка́плями святе́йшей кро́ве Его́ грехо́вныя стру́пы ду́ш на́ших очища́ются.

Ра́дуйся, Кре́сте, я́коже дре́во живо́тное, е́же е́сть посреде́ рая́ Бо́жия, христиа́ном вожделе́нный; ра́дуйся, плода́ми безсме́ртия у́мно на́с пита́ющий и наде́ждою жи́зни ве́чныя малоду́шие на́ше ободря́ющий.

Ра́дуйся, Честны́й Кре́сте, всера́достное зна́мение на́шего искупле́ния.

Иму́ще пред очи́ма на́шима Кре́ст пресвяты́й, святоле́пным поклоне́нием то́й почита́ем распе́ншагося ра́ди на не́м Спа́са Христа́, и лобыза́юще взыва́ем:

Ра́дуйся, Кре́сте, просла́вленный послуша́нием и страда́нием Христо́вым; ра́дуйся, возвели́ченный возвыше́нием на тебе́ Сы́на Бо́жия, И́же ве́сь ми́р от паде́ния Ада́мля воздви́же.

Ра́дуйся, я́ко сбы́вшагося на тебе́ ужа́снаго та́инства земли́ ужасе́ся и вострепета́, а́ки бы хотя́щи поглоти́ти законопресту́пныя; ра́дуйся, я́ко закла́вшуся на тебе́ А́гнцу Бо́жию заве́са хра́ма раздра́ся и же́ртва ветхозаве́тная упраздни́ся.

Ра́дуйся, Кре́сте, я́ко распа́дшуся под тобо́ю ка́мню, каменносерде́чнии ро́ди евре́йстии неве́рием от Бо́га отпадо́ша, благода́ти же свяще́нства и ца́рства лиши́шася; ра́дуйся, я́ко омрачи́вшуся со́лнцу в стра́сти Христо́вой но́щь многобо́жия пре́йде и све́т ве́ры возсия́.

Ра́дуйся, Честны́й Кре́сте, всера́достное зна́мение на́шего искупле́ния.

Ви́девше тогда́ христиа́нстии лю́дие честна́го Креста́ обре́тение, прославля́ху распе́ншагося на не́м Христа́ Бо́га, «Го́споди, поми́луй» взыва́юще. Мы́ же ны́не, подража́юще и́м, прославля́ем Кре́ст Его́ святы́й хвале́ньми сицевы́ми:

Ра́дуйся, Кре́сте, в зе́млю сокрове́нный и оскверне́нное греха́ми на́ше естество́ земно́е освяти́вый; ра́дуйся, явле́нием свои́м из не́др земны́х хули́телей воплоще́ния и Божества́ Христо́ва посрами́вый.

Ра́дуйся, я́ко Пострада́вый на тебе́ пло́тию прия́ вся́ку вла́сть на Небеси́ и на земли́, да все́х и вся́ к Бо́гу Отцу́ приведе́т; ра́дуйся, я́ко Уме́рый на тебе́ я́ко челове́к си́лою Божества́ Своего́ сокруши́ закле́пы а́да и изведе́ отту́да ду́ши пра́ведных.

Ра́дуйся, Кре́сте, я́ко разбо́йник благоразу́мный, Христу́ сраспя́выйся, Того́ испове́давый, тобо́ю, а́ки ле́ствицею, на Небеса́ взы́де; ра́дуйся, я́ко и все́х отсече́нием страсте́й Христу́ сраспина́ющихся возво́диши в Ца́рствие Небе́сное.

Ра́дуйся, Честны́й Кре́сте, всера́достное зна́мение на́шего искупле́ния.

Честна́го Креста́, Христе́, де́йство прообрази́в Моисе́й, победи́ Амали́ка в пусты́не Сина́йстей: егда́ бо простира́ше ру́це, креста́ о́браз творя́, укрепля́хуся лю́дие; ны́не же все́ веще́й сбытие́ в на́с испо́лнися: дне́сь Кре́ст воздвиза́ется, и де́мони бе́гают, дне́сь тва́рь вся́ от тли́ свободи́ся, я́ко вся́ Креста́ ра́ди возсия́ша на́м дарова́ния. Те́мже, ра́дующеся, вопие́м:

Ра́дуйся, Кре́сте, ору́жие Христо́во стра́шное, его́же де́мони трепе́щут; ра́дуйся, я́ко си́лою на тебе́ Распя́таго Христа́ бесо́встии по́лчища дале́че прогоня́ются.

Ра́дуйся, я́ко си́лою де́йствующия в тебе́ Боже́ственныя благода́ти побе́ды на сопроти́вныя христолюби́вым лю́дем да́руются; ра́дуйся, я́ко от тебе́, я́ко высокора́сленнаго и многоплодови́таго дре́ва Христо́ва на тебе́ страда́ния, плоды́ жи́зни и спасе́ния на́м произраста́ют.

Ра́дуйся, Честны́й Кре́сте, всера́достное зна́мение на́шего искупле́ния.

Я́коже дре́во ра́йское преве́лие, возвы́сися на Голго́фе честны́й Кре́ст Христо́в, отону́дуже во всю́ вселе́нную распростре́ мы́сленныя ве́тви благода́ти и Распе́ншагося на не́м: под его́же се́нию обрета́ют прохла́ду пали́мии зно́ем страсте́й и хотя́щии благоче́стно жи́ти о Христе́ Иису́се. Те́мже и мы́, благода́ти Того́ прича́стницы, ве́село взыва́ем:

Ра́дуйся, святы́й Кре́сте, дре́вом жи́зни, Ада́ма ра́ди в Еде́ме насажде́нным, проображе́нный; ра́дуйся, но́вым Ада́мом, ру́це на тебе́ распросте́ршим, ми́ру явле́нный.

Ра́дуйся, я́ко под се́нь благода́тнаго защище́ния твоего́ вси́ ве́рнии прибега́ют; ра́дуйся, я́ко милосе́рдием Дарова́вшаго на́м тебе́ ка́ющиися гре́шницы огня́ гее́нскаго избега́ют.

Ра́дуйся, Кре́сте, утеше́ние на́ше в ско́рбех и печа́лех; ра́дуйся, живи́тельная отра́до и по́мощь изнемога́ющим в борьбе́ с прило́гами страсте́й, ми́ра и диа́вола.

Ра́дуйся, Честны́й Кре́сте, всера́достное зна́мение на́шего искупле́ния.

Ди́вны дела́ яви́л еси́, Го́споди, Кресто́м Твои́м честны́м: распе́ншуся бо Ти́ на то́м пло́тию, вся́ тва́рь измени́ся: со́лнце лучи́ своя́ сокры́, основа́ния земли́ восколеба́хуся, а́д сокруши́ся держа́вою вла́сти Твоея́ и изведе́ ю́зники, я́же от ве́ка содержа́л е́сть. Сего́ ра́ди увяза́ем то́й си́ми пе́сненными цве́ты:

Ра́дуйся, Кре́сте, я́ко пострада́вшему на Тебе́ вся́ тва́рь сострада́ше, я́ко Творцу́ своему́ и Влады́це; ра́дуйся, я́ко си́лу Того́ и Божество́ свиде́тельствоваху со́лнце помраче́нием и земля́ колеба́нием.

Ра́дуйся, я́ко Уме́рый на тебе́ не удержа́н бы́сть в ме́ртвых, но, разруши́в держа́ву сме́рти, в тре́тий де́нь воскре́се; ра́дуйся, я́ко воскре́сшу Тому́ про́поведь ева́нгельская, от ли́ка апо́стольскаго наче́ншаяся, во вся́ концы́ земли́ изы́де.

Ра́дуйся, Кре́сте, я́ко тобо́ю кумирослуже́ние и многобо́жие язы́ческое упраздни́ся; ра́дуйся, я́ко тебе́ ра́ди пра́вая ве́ра во Еди́наго Бо́га, в Тро́ице сла́вимаго, по все́й земли́ утверди́ся.

Ра́дуйся, Честны́й Кре́сте, всера́достное зна́мение на́шего искупле́ния.

Дне́сь Ада́м со Е́вою весели́тся, предлежа́щий ви́дяще Кре́ст, и́мже пораже́н бы́сть супоста́т, и́же дре́вле в раи́ вкуше́нием запреще́ннаго пло́да те́х прельсти́вый и пле́нники себе́ сотвори́вый. Те́мже и мы́, сра́дующеся пра́отцем на́шим о избавле́нии от плене́ния на́шего душе́внаго, благогове́йно воспева́ем:

Ра́дуйся, Кре́сте, я́ко на тебе́ Па́стырь до́брый ду́шу Свою́ положи́ за о́вцы Своя́ и да́же до а́да сни́де, ища́ заблу́ждших; ра́дуйся, я́ко То́й не презре́ де́ло руку́ Свое́ю, Ада́ма со Е́вою, но со ине́ми пра́ведники исхити́ я́ из а́да, я́ко из че́люстей зве́ря кре́пкаго, и в ра́й всели́ и́х.

Ра́дуйся, я́ко на тебе́ пригвожде́нному Христу́ пла́менное ору́жие плещи́ даде́ и Херуви́м, Еде́м храня́щий, отступи́ от дре́ва жи́зни; ра́дуйся, я́ко мы́, ны́не Креще́нием возрожде́ннии, во Христе́ но́выя лю́дие, невозбра́нно причаща́емся ра́йския пи́щи.

Ра́дуйся, Кре́сте, же́зле си́лы Христо́вы, от Сио́на по́сланный, и́мже мы́ пасе́мся на па́житех ева́нгельских уче́ний; ра́дуйся, я́ко тобо́ю невреди́ми сохраня́емся от волко́в душегу́бных, я́ко льво́ве рыка́ющих и и́щущих, кого́ поглоти́ти.

Ра́дуйся, Честны́й Кре́сте, всера́достное зна́мение на́шего искупле́ния.

Вети́йство вся́кое земноро́дных не довле́ет к прославле́нию Креста́ Твоего́, Го́споди, на не́мже спасе́ние на́ше соде́лал еси́; те́мже, недоумева́юще восхвали́ти то́й по достоя́нию, взыва́ем си́це:

Ра́дуйся, Кре́сте, я́ко вознесе́нный на тебе́ Спа́с ми́ра мно́зи лю́ди в позна́ние Свое́ призва́ и до ны́не призыва́ет; ра́дуйся, я́ко возсия́вый на тебе́, а́ки на све́щнице, Све́т и́стинный вся́ концы́ земли́ све́том богове́дения озаря́ет.

Ра́дуйся, я́ко ны́не Восто́к и За́пад Пострада́вшаго на тебе́ прославля́ют; ра́дуйся, я́ко и тя́, я́ко подно́жие Христо́во, вси́ ве́рнии, вознося́ще, прославля́ют.

Ра́дуйся, я́ко от тебе́, я́ко от неизсяка́емаго исто́чника, христоимени́тии лю́дие оби́лие бла́г ве́чных почерпа́ют.

Ра́дуйся, Честны́й Кре́сте, всера́достное зна́мение на́шего искупле́ния.

Стена́ еси́, огражда́ющая на́с от бе́д и напа́стей, Кре́сте всечестны́й, и сто́лп кре́пкий проти́ву лица́ вра́жия, к нему́же неви́димии бори́телие приступи́ти не сме́ют, боя́щеся взира́ти на си́лу Твою́. Сего́ ра́ди с ве́рою огражда́емся святы́м твои́м зна́мением и ве́село воспева́ем:

Ра́дуйся, пречестны́й Кре́сте Христо́в, от нападе́ния духо́в зло́бы на́с защища́яй; ра́дуйся, от разли́чных стре́л и́х невреди́мы ны́ сохраня́яй.

Ра́дуйся, я́ко от зна́мения твоего́, с ве́рою благоче́стно твори́маго, вся́ си́лы а́да, я́ко ды́м от ве́тра, исчеза́ют; ра́дуйся, я́ко тобо́ю вся́ кре́пость и́х, я́ко во́ск от лица́ огня́, истаява́ет.

Ра́дуйся, я́ко святи́и му́ченицы, зна́мением твои́м огражда́шеся и и́мя Христо́во призва́вше, вся́кий, ви́д муче́ний му́жественно претерпе́ша; ра́дуйся, я́ко преподо́бнии отцы́ по́мощию си́лы Божества́, зна́мению твоему́ прису́щия, бесо́вская страхова́ния и страсте́й возста́ния победи́ша.

Ра́дуйся, Честны́й Кре́сте, всера́достное зна́мение на́шего искупле́ния.

Све́том благода́ти Бо́жией, та́инственне ти́ прису́щия, просвети́ на́ша душе́вная чу́вствия, Кре́сте пресвяты́й, да то́ю озаря́еми и наставля́еми, не по́ткнемся о ка́мень собла́зна, но да возмо́жем путе́м за́поведей Бо́жиих пра́во ше́ствовати во все́й жи́зни на́шей, воспева́юще ти́ си́це:

Ра́дуйся, непрестаю́щих чуде́с Христо́вых ве́стниче и милосе́рдия Его́ к ро́ду челове́ческому пропове́дниче; ра́дуйся. Кре́сте, ро́да челове́ча обновле́ние и Но́ваго Заве́та Христо́ва печа́ть и утвержде́ние.

Ра́дуйся, торжество́ ве́ры христиа́нския и благонаде́жный я́корю упова́ния на́шего; ра́дуйся, святы́х хра́мов Бо́жиих украше́ние и домо́в благочести́вых огражде́ние.

Ра́дуйся, поле́й и вертогра́дов благослове́ние; ра́дуйся все́х стихи́й освяще́ние.

Ра́дуйся, Честны́й Кре́сте, всера́достное зна́мение на́шего искупле́ния.

Пою́ще вели́чие твое́, всечестны́й Кре́сте, восхваля́ем тя́ вси́, я́ко победоно́сный ски́петр Царя́ Небе́снаго, на́шего же спасе́ния всера́достное зна́мение, те́мже и вопие́м:

Ра́дуйся, Кре́сте, правосла́вных христиа́н держа́во и несокруши́мое и́х огражде́ние; ра́дуйся, святи́телей украше́ние и все́х подви́жников ве́ры и благоче́стия си́ла и подкрепле́ние.

Ра́дуйся, Кре́сте, от колыбе́ли и до гро́ба на все́х путе́х жи́зни на́с огражда́яй и по сме́рти на возду́шных мыта́рствах от духо́в зло́бы на́с защища́яй; ра́дуйся, я́ко под зна́мением твои́м почива́ющии, уме́ршии в ве́ре и благоче́стии, в после́дний де́нь воскре́снут в жи́знь ве́чную.

Ра́дуйся, Кре́сте, явле́нием свои́м на Небеси́ предвари́ти имы́й сла́вное Второ́е прише́ствие Христо́во; ра́дуйся, я́ко распе́ншии Христа́ и вси́ неве́рнии у́зрят тя́ тогда́ и го́рце возрыда́ют, лю́бящии же Го́спода, зря́ще тя́, вельми́ возра́дуются.

Ра́дуйся, Честны́й Кре́сте, всера́достное зна́мение на́шего искупле́ния.

А҆́гг҃лѡвъ ли́цы, ꙗ҆́кѡ бж҃їи слꙋжи́телїе, крⷭ҇тъ ѡ҆бстоѧ́ще, во́льнꙋю стра́сть хрⷭ҇та̀ жизнода́вца прославлѧ́ютъ. Мы́ же страда́ньми тогѡ̀ вѣ́чныѧ сме́рти и҆зба́вльшесѧ, подража́ѧ го́рнимъ си́ламъ, ра́достнѡ взыва́емъ:

Ра́дꙋйсѧ, крⷭ҇те, ꙗ҆́кѡ на тебѣ̀ хрⷭ҇то́съ бг҃ъ на́шъ, во́лею рꙋ́цѣ распросте́ръ, сп҃се́нїе на́ше содѣ́ла: ра́дꙋйсѧ, ꙗ҆́кѡ распросте́ршимсѧ на тебѣ̀ хрⷭ҇то́мъ престꙋпле́нїе а҆да́ма и҆ є҆́ѵы, просте́ршихъ рꙋ́цѣ ко дре́вꙋ запреще́нномꙋ, ᲂу҆праздни́сѧ.

Ра́дꙋйсѧ, ꙗ҆́кѡ воздви́женꙋ бы́вшꙋ на тебѣ̀, а҆́ки престꙋ́пнꙋ, законода́вцꙋ, дре́внѧѧ клѧ́тва, ꙗ҆́же на на́съ бы́вшаѧ, потреби́сѧ: ра́дꙋйсѧ, ꙗ҆́кѡ содѣ́ѧвшимсѧ на тебѣ̀ стра́ннымъ та́инствомъ ро́дъ чл҃вѣ́ческїй ѿ тлѝ сме́ртныѧ свободи́сѧ.

Ра́дꙋйсѧ, ꙗ҆́кѡ пострада́вшимъ и҆ ᲂу҆ме́ршимъ на тебѣ̀ жа́ло сме́рти сокрꙋши́сѧ: ра́дꙋйсѧ, тогѡ̀ ра́ди страда́нїѧ бг҃ъ съ чл҃вѣ́ки примири́сѧ.

Ра́дꙋйсѧ, чтⷭ҇ны́й крⷭ҇те, всера́достное зна́менїе на́шегѡ и҆скꙋпле́нїѧ.

Ра́зꙋмъ чл҃вѣ́чъ и҆знемога́етъ въ постиже́нїи ве́лїѧ та́йны твоегѡ̀, хрⷭ҇тѐ, воплоще́нїѧ и҆ во́льнагѡ за ны̀ страда́нїѧ: ка́кѡ ты̀, бг҃ъ сы́й безстра́стный, стра́сть крⷭ҇тнꙋю, ꙗ҆́кѡ чл҃вѣ́къ, претерпѣ́лъ є҆сѝ и҆ сїѐ ѻ҆рꙋ́дїе сме́рти твоеѧ̀ содѣ́лалъ є҆сѝ и҆сто́чникомъ жи́зни и҆ сп҃се́нїѧ всѣ̑мъ бл҃гоче́стнѡ въ тѧ̀ вѣ́рꙋющымъ и҆ хвале́бнѡ воспѣва́ющымъ:

Ра́дꙋйсѧ, крⷭ҇те, на не́мже содѣ́ѧсѧ та́инство, ѿ вѣ́ка предѡпредѣле́нное: ра́дꙋйсѧ, ꙗ҆́кѡ на тебѣ̀ соверши́сѧ на́ше и҆скꙋпле́нїе, многоѻбра́знѣ во ѻ҆́бразѣхъ и҆ сѣ́нѣхъ пред̾ѧвле́нное.

Ра́дꙋйсѧ, ꙗ҆́кѡ ᲂу҆ме́рый на тебѣ̀ жизнода́вецъ, кро́вь и҆ во́дꙋ и҆сточѝ, и҆́миже грѣхѝ на̑ша ѡ҆мыва́ютсѧ: ра́дꙋйсѧ, ꙗ҆́кѡ ка́плѧми ст҃ѣ́йшей кро́вѣ є҆гѡ̀ грѣхѡ́вныѧ стрꙋ́пы дꙋ́шъ на́шихъ ѡ҆чища́ютсѧ.

Ра́дꙋйсѧ, крⷭ҇те, ꙗ҆́коже дре́во живо́тное, є҆́же є҆́сть посредѣ̀ раѧ̀ бж҃їѧ, хрⷭ҇тїа́нѡмъ вожделѣ́нный: ра́дꙋйсѧ, плода́ми безсме́ртїѧ ᲂу҆́мнѡ на́съ пита́ющїй и҆ наде́ждою жи́зни вѣ́чныѧ малодꙋ́шїе на́ше ѡ҆бодрѧ́ющїй.

Ра́дꙋйсѧ, чтⷭ҇ны́й крⷭ҇те, всера́достное зна́менїе на́шегѡ и҆скꙋпле́нїѧ.

И҆мꙋ́ще пред̾ ѻ҆чи́ма на́шима крⷭ҇тъ прест҃ы́й, ст҃олѣ́пнымъ поклоне́нїемъ то́й почита́емъ распе́ншагосѧ ра́ди на не́мъ сп҃са хрⷭ҇та̀, и҆ лобыза́юще взыва́емъ:

Ра́дꙋйсѧ, крⷭ҇те, просла́вленный послꙋша́нїемъ и҆ страда́нїемъ хрⷭ҇то́вымъ: ра́дꙋйсѧ, возвели́ченный возвыше́нїемъ на тебѣ̀ сн҃а бж҃їѧ, и҆́же ве́сь мі́ръ ѿ паде́нїѧ а҆да́млѧ воздви́же.

Ра́дꙋйсѧ, ꙗ҆́кѡ сбы́вшагосѧ на тебѣ̀ ᲂу҆жа́снагѡ та́инства землѝ ᲂу҆жасе́сѧ и҆ вострепета̀, а҆́ки бы хотѧ́щи поглоти́ти законопрестꙋ́пныѧ: ра́дꙋйсѧ, ꙗ҆́кѡ закла́вшꙋсѧ на тебѣ̀ а҆́гнцꙋ бж҃їю завѣ́са хра́ма раздра́сѧ и҆ же́ртва ветхозавѣ́тнаѧ ᲂу҆праздни́сѧ.

Ра́дꙋйсѧ, крⷭ҇те, ꙗ҆́кѡ распа́дшꙋсѧ под̾ тобо́ю ка́мню, каменносерде́чнїи ро́ди є҆вре́йстїи невѣ́рїемъ ѿ бг҃а ѿпадо́ша, бл҃года́ти же сщ҃е́нства и҆ ца́рства лиши́шасѧ: ра́дꙋйсѧ, ꙗ҆́кѡ ѡ҆мрачи́вшꙋсѧ со́лнцꙋ въ стра́сти хрⷭ҇то́вой но́щь многобо́жїѧ пре́йде и҆ свѣ́тъ вѣ́ры возсїѧ̀.

Ра́дꙋйсѧ, чтⷭ҇ны́й крⷭ҇те, всера́достное зна́менїе на́шегѡ и҆скꙋпле́нїѧ.

Ви́дѣвше тогда̀ хрⷭ҇тїа́нстїи лю́дїе чтⷭ҇на́гѡ крⷭ҇та̀ ѡ҆брѣ́тенїе, прославлѧ́хꙋ распе́ншагосѧ на не́мъ хрⷭ҇та̀ бг҃а, гдⷭ҇и, поми́лꙋй взыва́юще. Мы́ же ны́нѣ, подража́юще и҆́мъ, прославлѧ́емъ крⷭ҇тъ є҆гѡ̀ ст҃ы́й хвале́ньми сицевы́ми:

Ра́дꙋйсѧ, крⷭ҇те, въ зе́млю сокрове́нный и҆ ѡ҆скверне́нное грѣха́ми на́ше є҆стество̀ земно́е ѡ҆ст҃и́вый: ра́дꙋйсѧ, ꙗ҆вле́нїемъ свои́мъ и҆з̾ нѣ́дръ земны́хъ хꙋли́телей воплоще́нїѧ и҆ бжⷭ҇тва̀ хрⷭ҇то́ва посрами́вый.

Ра́дꙋйсѧ, ꙗ҆́кѡ пострада́вый на тебѣ̀ пло́тїю прїѧ̀ всѧ́кꙋ вла́сть на нб҃сѝ и҆ на землѝ, да всѣ́хъ и҆ всѧ̑ къ бг҃ꙋ ѻ҆ц҃ꙋ̀ приведе́тъ: ра́дꙋйсѧ, ꙗ҆́кѡ ᲂу҆ме́рый на тебѣ̀ ꙗ҆́кѡ чл҃вѣ́къ си́лою бжⷭ҇тва̀ своегѡ̀ сокрꙋшѝ закле́пы а҆́да и҆ и҆зведѐ ѿтꙋ́да дꙋ́ши пра́ведныхъ.

Ра́дꙋйсѧ, крⷭ҇те, ꙗ҆́кѡ разбо́йникъ бл҃горазꙋ́мный, хрⷭ҇тꙋ̀ сраспѧ́выйсѧ, тогѡ̀ и҆сповѣ́давый, тобо́ю, а҆́ки лѣ́ствицею, на нб҃са̀ взы́де: ра́дꙋйсѧ, ꙗ҆́кѡ и҆ всѣ́хъ ѿсѣче́нїемъ стрⷭ҇те́й хрⷭ҇тꙋ̀ сраспина́ющихсѧ возво́диши въ црⷭ҇твїе нбⷭ҇ное.

Ра́дꙋйсѧ, чтⷭ҇ны́й крⷭ҇те, всера́достное зна́менїе на́шегѡ и҆скꙋпле́нїѧ.

Чтⷭ҇на́гѡ крⷭ҇та̀, хрⷭ҇тѐ, дѣ́йство проѡбрази́въ мѡѷсе́й, побѣдѝ а҆мали́ка въ пꙋсты́нѣ сїна́йстѣй: є҆гда́ бо простира́ше рꙋ́цѣ, крⷭ҇та̀ ѻ҆́бразъ творѧ̀, ᲂу҆крѣплѧ́хꙋсѧ лю́дїе: ны́нѣ же всѐ веще́й сбытїѐ въ на́съ и҆спо́лнисѧ: дне́сь крⷭ҇тъ воздвиза́етсѧ, и҆ де́мони бѣ́гаютъ, дне́сь тва́рь всѧ̀ ѿ тлѝ свободи́сѧ, ꙗ҆́кѡ всѧ̑ крⷭ҇та̀ ра́ди возсїѧ́ша на́мъ дарова̑нїѧ. Тѣ́мже, ра́дꙋющесѧ, вопїе́мъ:

Ра́дꙋйсѧ, крⷭ҇те, ѻ҆рꙋ́жїе хрⷭ҇то́во стра́шное, є҆го́же де́мони трепе́щꙋтъ: ра́дꙋйсѧ, ꙗ҆́кѡ си́лою на тебѣ̀ распѧ́тагѡ хрⷭ҇та̀ бѣсо́встїи пѡ́лчища дале́че прогонѧ́ютсѧ.

Ра́дꙋйсѧ, ꙗ҆́кѡ си́лою дѣ́йствꙋющїѧ въ тебѣ̀ бжⷭ҇твенныѧ блгⷣти побѣ̑ды на сопроти̑вныѧ хрⷭ҇толюби̑вымъ лю́дємъ да́рꙋютсѧ: ра́дꙋйсѧ, ꙗ҆́кѡ ѿ тебє̀, ꙗ҆́кѡ высокора́сленнагѡ и҆ многоплодови́тагѡ дре́ва хрⷭ҇то́ва на тебѣ̀ страда́нїѧ, плоды̀ жи́зни и҆ сп҃се́нїѧ на́мъ произраста́ютъ.

Ра́дꙋйсѧ, чтⷭ҇ны́й крⷭ҇те, всера́достное зна́менїе на́шегѡ и҆скꙋпле́нїѧ.

Ꙗ҆́коже дре́во ра́йское преве́лїе, возвы́сисѧ на голго́ѳѣ чтⷭ҇ны́й крⷭ҇тъ хрⷭ҇то́въ, ѿѻнꙋ́дꙋже во всю̀ вселе́ннꙋю распрострѐ мы́слєнныѧ вѣ̑тви блгⷣти и҆ распе́ншагосѧ на не́мъ: под̾ є҆го́же сѣ́нїю ѡ҆брѣта́ютъ прохла́дꙋ пали́мїи зно́емъ страсте́й и҆ хотѧ́щїи бл҃гоче́стнѡ жи́ти ѡ҆ хрⷭ҇тѣ̀ і҆и҃сѣ. Тѣ́мже и҆ мы̀, блгⷣти тогѡ̀ прича́стницы, ве́село взыва́емъ:

Ра́дꙋйсѧ, ст҃ы́й крⷭ҇те, дре́вомъ жи́зни, а҆да́ма ра́ди въ є҆де́мѣ насажде́ннымъ, проѻбраже́нный: ра́дꙋйсѧ, но́вымъ а҆да́момъ, рꙋ́цѣ на тебѣ̀ распросте́ршимъ, мі́рꙋ ꙗ҆вле́нный.

Ра́дꙋйсѧ, ꙗ҆́кѡ под̾ сѣ́нь бл҃года́тнагѡ защище́нїѧ твоегѡ̀ всѝ вѣ́рнїи прибѣга́ютъ: ра́дꙋйсѧ, ꙗ҆́кѡ милосе́рдїемъ дарова́вшагѡ на́мъ тебѐ ка́ющїисѧ грѣ́шницы ѻ҆гнѧ̀ гее́нскагѡ и҆збѣга́ютъ.

Ра́дꙋйсѧ, крⷭ҇те, ᲂу҆тѣше́нїе на́ше въ ско́рбѣхъ и҆ печа́лѣхъ: ра́дꙋйсѧ, живи́тельнаѧ ѿра́до и҆ по́мощь и҆знемога́ющимъ въ борьбѣ̀ съ прило́гами страсте́й, мі́ра и҆ дїа́вола.

Ра́дꙋйсѧ, чтⷭ҇ны́й крⷭ҇те, всера́достное зна́менїе на́шегѡ и҆скꙋпле́нїѧ.

Ди́вны дѣла̀ ꙗ҆ви́лъ є҆сѝ, гдⷭ҇и, крⷭ҇то́мъ твои́мъ чтⷭ҇ны́мъ: распе́ншꙋсѧ бо тѝ на то́мъ пло́тїю, всѧ̀ тва́рь и҆змѣни́сѧ: со́лнце лꙋчѝ своѧ̑ сокры̀, ѡ҆снова̑нїѧ землѝ восколеба́хꙋсѧ, а҆́дъ сокрꙋши́сѧ держа́вою вла́сти твоеѧ̀ и҆ и҆зведѐ ю҆́зники, ꙗ҆́же ѿ вѣ́ка содержа́лъ є҆́сть. Сегѡ̀ ра́ди ᲂу҆вѧза́емъ то́й си́ми пѣ́сненными цвѣ́ты:

Ра́дꙋйсѧ, крⷭ҇те, ꙗ҆́кѡ пострада́вшемꙋ на тебѣ̀ всѧ̀ тва́рь сострада́ше, ꙗ҆́кѡ творцꙋ̀ своемꙋ̀ и҆ влⷣцѣ: ра́дꙋйсѧ, ꙗ҆́кѡ си́лꙋ тогѡ̀ и҆ бжⷭ҇тво̀ свидѣ́тельствовахꙋ со́лнце помраче́нїемъ и҆ землѧ̀ колеба́нїемъ.

Ра́дꙋйсѧ, ꙗ҆́кѡ ᲂу҆ме́рый на тебѣ̀ не ᲂу҆держа́нъ бы́сть въ ме́ртвыхъ, но, разрꙋши́въ держа́вꙋ сме́рти, въ тре́тїй де́нь воскре́се: ра́дꙋйсѧ, ꙗ҆́кѡ воскре́сшꙋ томꙋ̀ про́повѣдь є҆ѵⷢ҇льскаѧ, ѿ ли́ка а҆пⷭ҇льскагѡ наче́ншаѧсѧ, во всѧ̑ концы̀ землѝ и҆зы́де.

Ра́дꙋйсѧ, крⷭ҇те, ꙗ҆́кѡ тобо́ю кꙋмїрослꙋже́нїе и҆ многобо́жїе ꙗ҆зы́ческое ᲂу҆праздни́сѧ: ра́дꙋйсѧ, ꙗ҆́кѡ тебє̀ ра́ди пра́ваѧ вѣ́ра во є҆ди́нагѡ бг҃а, въ трⷪ҇цѣ сла́вимагѡ, по все́й землѝ ᲂу҆тверди́сѧ.

Ра́дꙋйсѧ, чтⷭ҇ны́й крⷭ҇те, всера́достное зна́менїе на́шегѡ и҆скꙋпле́нїѧ.

Дне́сь а҆да́мъ со є҆́ѵою весели́тсѧ, предлежа́щїй ви́дѧще крⷭ҇тъ, и҆́мже пораже́нъ бы́сть сꙋпоста́тъ, и҆̀же дре́вле въ раѝ вкꙋше́нїемъ запреще́ннагѡ пло́да тѣ́хъ прельсти́вый и҆ плѣ́нники себѣ̀ сотвори́вый. Тѣ́мже и҆ мы̀, сра́дꙋющесѧ пра́ѻтцємъ на́шимъ ѡ҆ и҆збавле́нїи ѿ плѣне́нїѧ на́шегѡ дꙋше́внагѡ, бл҃гоговѣ́йнѡ воспѣва́емъ:

Ра́дꙋйсѧ, крⷭ҇те, ꙗ҆́кѡ на тебѣ̀ па́стырь до́брый дꙋ́шꙋ свою̀ положѝ за ѻ҆́вцы своѧ̑ и҆ да́же до а҆́да сни́де, и҆ща̀ заблꙋ́ждшихъ: ра́дꙋйсѧ, ꙗ҆́кѡ то́й не презрѣ̀ дѣ́ло рꙋкꙋ̀ свое́ю, а҆да́ма со є҆́ѵою, но со и҆нѣ́ми пра́ведники и҆схитѝ ѧ҆̀ и҆з̾ а҆́да, ꙗ҆́кѡ и҆з̾ че́люстей ѕвѣ́рѧ крѣ́пкагѡ, и҆ въ ра́й вселѝ и҆̀хъ.

Ра́дꙋйсѧ, ꙗ҆́кѡ на тебѣ̀ пригвожде́нномꙋ хрⷭ҇тꙋ̀ пла́менное ѻ҆рꙋ́жїе плещѝ дадѐ и҆ херꙋві́мъ, є҆де́мъ хранѧ́щїй, ѿстꙋпѝ ѿ дре́ва жи́зни: ра́дꙋйсѧ, ꙗ҆́кѡ мы̀, ны́нѣ кр҃ще́нїемъ возрожде́ннїи, во хрⷭ҇тѣ̀ но́выѧ лю́дїе, невозбра́ннѡ причаща́емсѧ ра́йскїѧ пи́щи.

Ра́дꙋйсѧ, крⷭ҇те, же́зле си́лы хрⷭ҇то́вы, ѿ сїѡ́на по́сланный, и҆́мже мы̀ пасе́мсѧ на па́житехъ є҆ѵⷢ҇льскихъ ᲂу҆че́нїй: ра́дꙋйсѧ, ꙗ҆́кѡ тобо́ю невреди́ми сохранѧ́емсѧ ѿ волкѡ́въ дꙋшегꙋ́бныхъ, ꙗ҆́кѡ льво́ве рыка́ющихъ и҆ и҆́щꙋщихъ, когѡ̀ поглоти́ти.

Ра́дꙋйсѧ, чтⷭ҇ны́й крⷭ҇те, всера́достное зна́менїе на́шегѡ и҆скꙋпле́нїѧ.

Вѣті́йство всѧ́кое земноро́дныхъ не довлѣ́етъ къ прославле́нїю крⷭ҇та̀ твоегѡ̀, гдⷭ҇и, на не́мже сп҃се́нїе на́ше содѣ́лалъ є҆сѝ: тѣ́мже, недоꙋмѣва́юще восхвали́ти то́й по достоѧ́нїю, взыва́емъ си́це:

Ра́дꙋйсѧ, крⷭ҇те, ꙗ҆́кѡ вознесе́нный на тебѣ̀ сп҃съ мі́ра мнѡ́зи лю́ди въ позна́нїе своѐ призва̀ и҆ до ны́нѣ призыва́етъ.

Ра́дꙋйсѧ, ꙗ҆́кѡ возсїѧ́вый на тебѣ̀, а҆́ки на свѣ́щнице, свѣ́тъ и҆́стинный всѧ̑ концы̀ землѝ свѣ́томъ бг҃овѣ́дѣнїѧ ѡ҆зарѧ́етъ: ра́дꙋйсѧ, ꙗ҆́кѡ ны́нѣ восто́къ и҆ за́падъ пострада́вшагѡ на тебѣ̀ прославлѧ́ютъ.

Ра́дꙋйсѧ, ꙗ҆́кѡ и҆ тѧ̀, ꙗ҆́кѡ подно́жїе хрⷭ҇то́во, всѝ вѣ́рнїи, возносѧ́ще, прославлѧ́ютъ: ра́дꙋйсѧ, ꙗ҆́кѡ ѿ тебє̀, ꙗ҆́кѡ ѿ неизсѧка́емагѡ и҆сто́чника, хрⷭ҇тоимени́тїи лю́дїе ѻ҆би́лїе бл҃гъ вѣ́чныхъ почерпа́ютъ.

Ра́дꙋйсѧ, чтⷭ҇ны́й крⷭ҇те, всера́достное зна́менїе на́шегѡ и҆скꙋпле́нїѧ.

Стѣна̀ є҆сѝ, ѡ҆гражда́ющаѧ на́съ ѿ бѣ́дъ и҆ напа́стей, крⷭ҇те всечтⷭ҇ны́й, и҆ сто́лпъ крѣ́пкїй проти́вꙋ лица̀ вра́жїѧ, къ немꙋ́же неви́димїи бори́телїе пристꙋпи́ти не смѣ́ютъ, боѧ́щесѧ взира́ти на си́лꙋ твою̀. Сегѡ̀ ра́ди съ вѣ́рою ѡ҆гражда́емсѧ ст҃ы́мъ твои́мъ зна́менїемъ и҆ ве́селѡ воспѣва́емъ:

Ра́дꙋйсѧ, пречⷭ҇тны́й крⷭ҇те хрⷭ҇то́въ, ѿ нападе́нїѧ дꙋхѡ́въ ѕлѡ́бы на́съ защища́ѧй: ра́дꙋйсѧ, ѿ разли́чныхъ стрѣ́лъ и҆̀хъ невреди́мы ны̀ сохранѧ́ѧй.

Ра́дꙋйсѧ, ꙗ҆́кѡ ѿ зна́менїѧ твоегѡ̀, съ вѣ́рою бл҃гочⷭ҇тнѡ твори́магѡ, всѧ̑ си̑лы а҆́да, ꙗ҆́кѡ ды́мъ ѿ вѣ́тра, и҆счеза́ютъ: ра́дꙋйсѧ, ꙗ҆́кѡ тобо́ю всѧ̑ крѣ́пость и҆̀хъ, ꙗ҆́кѡ во́скъ ѿ лица̀ ѻ҆гнѧ̀, и҆стаѧва́етъ.

Ра́дꙋйсѧ, ꙗ҆́кѡ ст҃і́и мч҃ницы, зна́менїемъ твои́мъ ѡ҆гражда́шесѧ и҆ и҆́мѧ хрⷭ҇то́во призва́вше, всѧ́кїй, ви́дъ мꙋче́нїй мꙋ́жественнѡ претерпѣ́ша: ра́дꙋйсѧ, ꙗ҆́кѡ прпⷣбнїи ѻ҆тцы̀ по́мощїю си́лы бжⷭ҇тва̀, зна́менїю твоемꙋ̀ присꙋ́щїѧ, бѣсѡ́вскаѧ страхова́нїѧ и҆ страсте́й возста̑нїѧ побѣди́ша.

Ра́дꙋйсѧ, чтⷭ҇ны́й крⷭ҇те, всера́достное зна́менїе на́шегѡ и҆скꙋпле́нїѧ.

Свѣ́томъ блгⷣти бж҃їей, та́инственнѣ тѝ присꙋ́щїѧ, просвѣтѝ на̑ша дꙋшє́внаѧ чꙋ́вствїѧ, крⷭ҇те прест҃ы́й, да то́ю ѡ҆зарѧ́еми и҆ наставлѧ́еми, не по́ткнемсѧ ѡ҆ ка́мень собла́зна, но да возмо́жемъ пꙋте́мъ за́повѣдей бж҃їихъ пра́вѡ ше́ствовати во все́й жи́зни на́шей, воспѣва́юще тѝ си́це:

Ра́дꙋйсѧ, непрестаю́щихъ чꙋде́съ хрⷭ҇то́выхъ вѣ́стниче и҆ млⷭ҇рдїѧ є҆гѡ̀ къ ро́дꙋ чл҃вѣ́ческомꙋ проповѣ́дниче: ра́дꙋйсѧ, крⷭ҇те, ро́да чл҃вѣ́ча ѡ҆бновле́нїе и҆ но́вагѡ завѣ́та хрⷭ҇то́ва печа́ть и҆ ᲂу҆твержде́нїе.

Ра́дꙋйсѧ, торжество̀ вѣ́ры хрⷭ҇тїа́нскїѧ и҆ бл҃гонаде́жный ꙗ҆́корю ᲂу҆пова́нїѧ на́шегѡ: ра́дꙋйсѧ, ст҃ы́хъ хра́мѡвъ бж҃їихъ ᲂу҆краше́нїе и҆ домѡ́въ бл҃гочести́выхъ ѡ҆гражде́нїе.

Ра́дꙋйсѧ, поле́й и҆ вертогра́дѡвъ бл҃гослове́нїе: ра́дꙋйсѧ всѣ́хъ стїхі́й ѡ҆сщ҃е́нїе.

Ра́дꙋйсѧ, чтⷭ҇ны́й крⷭ҇те, всера́достное зна́менїе на́шегѡ и҆скꙋпле́нїѧ.

Пою́ще вели́чїе твоѐ, всечтⷭ҇ны́й крⷭ҇те, восхвалѧ́емъ тѧ̀ всѝ, ꙗ҆́кѡ побѣдоно́сный ски́петръ цр҃ѧ̀ нбⷭ҇нагѡ, на́шегѡ же сп҃се́нїѧ всера́достное зна́менїе, тѣ́мже и҆ вопїе́мъ:

Ра́дꙋйсѧ, крⷭ҇те, правосла́вныхъ хрⷭ҇тїа́нъ держа́во и҆ несокрꙋши́мое и҆̀хъ ѡ҆гражде́нїе: ра́дꙋйсѧ, ст҃и́телей ᲂу҆краше́нїе и҆ всѣ́хъ подви́жникѡвъ вѣ́ры и҆ бл҃гоче́стїѧ си́ла и҆ подкрѣпле́нїе.

Ра́дꙋйсѧ, крⷭ҇те, ѿ колыбе́ли и҆ до гро́ба на всѣ́хъ пꙋте́хъ жи́зни на́съ ѡ҆гражда́ѧй и҆ по сме́рти на воздꙋ́шныхъ мыта́рствахъ ѿ дꙋхѡ́въ ѕло́бы на́съ защища́ѧй: ра́дꙋйсѧ, ꙗ҆́кѡ под̾ зна́менїемъ твои́мъ почива́ющїи, ᲂу҆ме́ршїи въ вѣ́рѣ и҆ бл҃гоче́стїи, въ послѣ́днїй де́нь воскре́снꙋтъ въ жи́знь вѣ́чнꙋю.

Ра́дꙋйсѧ, крⷭ҇те, ꙗ҆вле́нїемъ свои́мъ на нб҃сѝ предвари́ти и҆мы́й сла́вное второ́е прише́ствїе хрⷭ҇то́во: ра́дꙋйсѧ, ꙗ҆́кѡ распе́ншїи хрⷭ҇та̀ и҆ всѝ невѣ́рнїи ᲂу҆́зрѧтъ тѧ̀ тогда̀ и҆ го́рцѣ возрыда́ютъ, лю́бѧщїи же гдⷭ҇а, зрѧ́ще тѧ̀, вельмѝ возра́дꙋютсѧ.

Ра́дꙋйсѧ, чтⷭ҇ны́й крⷭ҇те, всера́достное зна́менїе на́шегѡ и҆скꙋпле́нїѧ.