Кондак 1
Избра́нный от мно́жества учени́к Го́спода и Спа́са на́шего, я́ко испо́лненный ве́ры, Ду́ха Свя́та и прему́дрости, на служе́ние вдови́цам моли́твою и возложе́нием ру́к апо́стольских, яви́лся еси́ пе́рвый во диа́конех, и та́ко в се́м чи́не Го́споду да́же до сме́рти му́ченическия послужи́л еси́. Но я́ко име́яй ве́лие дерзнове́ние ко Го́споду, от вся́ких на́с смертоно́сных бе́д и скорбе́й свобожда́й, да с любо́вию зове́м ти́:
Ра́дуйся, апо́столе Христо́в, первому́чениче и архидиа́коне Стефа́не.
Икос 1
Ангелоподо́бная чистота́ твоя́, серафи́мская любо́вь и ве́ра в Го́спода Вседержи́теля соде́лаша тя́, свя́те Стефа́не, сосу́дом избра́нным и жили́щем Ду́ха Всесвята́го; сего́ ра́ди вси́ в Го́спода Иису́са Христа́ ве́рующии дивля́хуся свято́му житию́ твоему́ и возглаша́ху тебе́ со умиле́нием сицева́я:
Ра́дуйся, и́стинный учениче́ Христо́в; ра́дуйся, апо́столом единонра́вный.
Ра́дуйся, Ду́ха Свята́го испо́лненный; ра́дуйся, благода́тными дарова́ньми сия́ющий.
Ра́дуйся, па́че всего́ мирска́го Го́спода возлюби́вый; ра́дуйся, вся́ кра́сная ми́ра сего́ ра́ди Го́спода оста́вивый.
Ра́дуйся, Небе́сное Оте́чество взыска́вый; ра́дуйся, А́нгелом собесе́дниче.
Ра́дуйся, до́брый во́ине Царя́ Небе́снаго; ра́дуйся, не обяза́выйся ку́плями жите́йскими.
Ра́дуйся, и́стинный Христо́в служи́телю; ра́дуйся, от ю́ности до́брый и ве́рный ра́бе Христо́в.
Ра́дуйся, апо́столе Христо́в, первому́чениче и архидиа́коне Стефа́не.
Кондак 2
Ви́дел еси́ архиере́ев А́нну и Каиа́фу, Иоа́нна и Алекса́ндра, и про́чия, ели́цы бы́ша от ро́да архиере́йскаго, на сво́й нечести́вый су́д апо́столы Христо́вы позва́вшия, и озлобле́ние и́х на вся́ ученики́ Христа́ Го́спода ве́дал еси́, Стефа́не; сего́ ра́ди в се́рдце твое́м гото́вился еси́ стопа́ми апо́столов ше́ствовати, вся́кое безче́стие за Го́спода приима́ти, и Тому́ во ве́ки взыва́ти: Аллилу́иа.
Икос 2
Ра́зум богопросвеще́н име́я, о ди́вный первому́чениче, све́тло уразуме́л еси́, я́ко ве́ра во Христа́ Го́спода зове́т вся́ за и́мя Его́ безче́стие и ра́ны вся́кия от влады́к и князе́й ми́ра сего́ носи́ти, позо́р на со́нмищах и собо́рищах терпе́ти, и та́ко бы́л еси́ предугото́влен вся́кое поноше́ние за Христа́ ра́достно приима́ти. Сего́ ра́ди восхваля́ем тя́, глаго́люще:
Ра́дуйся, ю́ным и чи́стым се́рдцем твои́м Христа́ возлюби́вый; ра́дуйся, Того́ Еди́наго в житии́ твое́м возжела́вый.
Ра́дуйся, а́нгельскую непоро́чность стяжа́вый; ра́дуйся, скве́рн ми́ра сего́ не приобщи́выйся.
Ра́дуйся, в моли́тве пла́менный; ра́дуйся, в ско́рбех терпели́вый.
Ра́дуйся, за и́мя Христо́во вся́кое гоне́ние прия́ти себе́ угото́вавый; ра́дуйся, скорбьми́ мно́гими пу́ть в Ца́рствие Небе́сное себе́ устро́ивый.
Ра́дуйся, и на́м в ско́рбех помога́яй; ра́дуйся, от тя́жких искуше́ний на́с свобожда́яй.
Ра́дуйся, Престо́лу Госпо́дню предстоя́й; ра́дуйся, моли́твы о на́с гре́шных Го́сподеви принося́й.
Ра́дуйся, апо́столе Христо́в, первому́чениче и архидиа́коне Стефа́не.
Кондак 3
Си́лою свы́ше облече́н, по́двигом до́брым подвиза́лся еси́ во и́мя Го́спода, сла́вный во́ине Христо́в Стефа́не, уготовля́я себе́ бы́ти му́чеником за Христа́ Спаси́теля, Ему́же из глубины́ се́рдца твоего́ вы́ну взыва́л еси́: Аллилу́иа.
Икос 3
Име́я бога́тство Бо́жиих дарова́ний, свя́те Стефа́не, все́ми дара́ми Го́споду Христу́ рабо́тати восхоте́л еси́, и все́м ве́рным ве́дом бы́л еси́, я́ко до́брый учени́к Христа́ и Его́ сла́вных апо́столов. За сие́ твое́ благо́е изволе́ние ублажа́ем тя́ си́це:
Ра́дуйся, до́брая лоза́ виногра́да Христо́ва; ра́дуйся, си́лою Христо́вою вои́стинну плодоно́сен яви́выйся.
Ра́дуйся, Го́спода Христа́ путе́м ше́ствовати восхоте́вый; ра́дуйся, и́стине Христо́вой всего́ себе́ порабо́тивый.
Ра́дуйся, житию́ Христо́ву подража́вый; ра́дуйся, глаго́лы Христо́вы в се́рдце твое́м запечатле́вый.
Ра́дуйся, Ду́ха Свята́го жили́ще; ра́дуйся, кла́дезю му́дрости Боже́ственныя.
Ра́дуйся, я́ко из чре́ва твоего́ ре́ки воды́ жи́вы истеко́ша; ра́дуйся, я́ко струи́ воды́ сия́ мно́зем во спасе́ние послужи́ша.
Ра́дуйся, Боже́ственныя прему́дрости испо́лненный; ра́дуйся, уста́ми твои́ми Бо́га во Святе́й Тро́ице просла́вивый.
Ра́дуйся, апо́столе Христо́в, первому́чениче и архидиа́коне Стефа́не.
Кондак 4
Бу́ря смуще́ний порази́ ю́ную Це́рковь Христо́ву, егда́ бы́сть ропта́ние е́ллинов ко евре́ем, я́ко презира́еми быва́ху во вседне́вном служе́нии вдови́цы и́х. Ты́ же, свя́тче Бо́жий, ве́руя му́дрости апо́столов, усе́рдно взыва́л еси́ к Бо́гу чи́стыми уста́ми свои́ми: Аллилу́иа.
Икос 4
Слы́ша святи́и апо́столы ропта́ние е́ллинов, созва́ша мно́жество учени́к, ре́ша: «Не удо́бно е́сть на́м, оста́вльше сло́во Бо́жие, служи́ти трапе́зам». Ве́рнии же, зря́ще твою́ ве́рность и любо́вь ко апо́столом святы́м, единоду́шно возглаша́ху тебе́, свя́те Стефа́не, си́це:
Ра́дуйся, до́брый послу́шателю апо́стольских веща́ний; ра́дуйся, любо́вию ко апо́стольской про́поведи ду́х тво́й окрыли́вый.
Ра́дуйся, вся́кому сло́ву апо́стольскому всеусе́рдно внима́вый; ра́дуйся, апо́столы, устрои́тели Це́ркви Христо́вы, почита́вый.
Ра́дуйся, уста́ми Христо́выми апо́столов именова́вый; ра́дуйся, та́ин Бо́жиих строи́телей в ни́х ви́девый.
Ра́дуйся, я́ко самови́дцы Сло́ва и слуги́ Христо́вы те́х бы́ти ве́руяй; ра́дуйся, ника́коже проти́ву апо́стольских веща́ний глаго́лати дерза́вый.
Ра́дуйся, я́ко в ру́це апо́столов Це́рковь Христо́ва предана́, веща́вый; ра́дуйся, Апо́стольскою сию́ именова́вый.
Ра́дуйся, сто́лпе церко́вный; ра́дуйся, церко́вная красото́.
Ра́дуйся, апо́столе Христо́в, первому́чениче и архидиа́коне Стефа́не.
Кондак 5
Боготе́чныя зве́зды, святи́и апо́столи, ве́рующим во Христа́ реко́ша: «Усмотри́те, бра́тие, му́жи от ва́с свиде́тельствованы се́дмь, испо́лнены Ду́ха Свя́та и прему́дрости, и́х же поста́вим над слу́жбою се́ю: мы́ же в моли́тве и служе́нии сло́ва пребу́дем». Сия́ слы́шав святы́й Стефа́н, все́м се́рдцем ра́дующеся, возопи́ прему́дрому Го́споду: Аллилу́иа.
Икос 5
Ви́деша во Христа́ ве́рующии Стефа́на – му́жа испо́лнена прему́дрости, ве́ры и Ду́ха Свята́го, пе́рваго его́ нареко́ша бы́ти досто́йна слу́жбу диа́конскую пред лице́м апо́столов исправля́ти, и возгласи́ша ему́ сицева́я:
Ра́дуйся, до́брый сотру́дниче духоно́сных апо́столов; ра́дуйся, житию́ и́х подража́телю приле́жный.
Ра́дуйся, и е́ллинов и евре́ев еди́ною и то́южде любо́вию пита́вый; ра́дуйся, о вдови́цах му́дре пеки́йся.
Ра́дуйся, ни́щих корми́телю; ра́дуйся, любве́ Христо́вы живы́й пропове́дниче.
Ра́дуйся, по сло́ву Го́спода все́м служи́ти восхоте́вый; ра́дуйся, но́зе святы́х омы́вый.
Ра́дуйся, си́рых оте́ц чадолюби́вый; ра́дуйся, наги́х одея́ние.
Ра́дуйся, в печа́лех уте́шителю; ра́дуйся, от напра́сныя сме́рти изба́вителю.
Ра́дуйся, апо́столе Христо́в, первому́чениче и архидиа́коне Стефа́не.
Кондак 6
Пропове́дник сло́вом и де́лом и́стины Христо́вы яви́лся еси́, святы́й первому́чениче Стефа́не, егда́ святи́и апо́столы помоли́вшеся, возложи́ша ру́це свои́ на тя́ и на соизбра́нных с тобо́ю, и сло́во Бо́жие растя́ше и умножа́шеся число́ учени́к во Иерусали́ме зело́: мно́г же наро́д свяще́нников послу́шаху ве́ры. Ты́ же с про́чими диа́коны ра́достно взыва́л еси́ Го́споду Христу́: Аллилу́иа.
Икос 6
Возсия́ па́че со́лнца светле́йше сло́во твоея́ про́поведи, святы́й архидиа́коне Стефа́не, ты́ бо, испо́лнь ве́ры и си́лы, твори́л еси́ зна́мения и чудеса́ ве́лия в лю́дех, и́же позна́вше тобо́ю Христа́ распя́таго возглаша́ху тебе́ благода́рными усты́ со умиле́нием похвалы́ сицева́я:
Ра́дуйся, о́гненный пропове́дниче Ева́нгелия Христо́ва; ра́дуйся, чуде́с вели́ких ди́вный соверши́телю.
Ра́дуйся, иуде́йскаго злове́рия обличи́телю; ра́дуйся, та́ин Бо́жиих му́дрый изъясни́телю.
Ра́дуйся, Тро́ице Пресвяте́й покланя́тися научи́вый; ра́дуйся, серафи́мскую пе́снь во сла́ву Святы́я Тро́ицы во уме́, в се́рдце и усте́х твои́х име́вый.
Ра́дуйся, Ду́ха Свята́го свети́льниче пресве́тлый; ра́дуйся, того́жде Ду́ха Свята́го благода́ти но́выя лю́ди прича́стники сотвори́вый.
Ра́дуйся, златослове́сный учи́телю; ра́дуйся, неуста́нный пропове́дниче.
Ра́дуйся, Ца́рствия Бо́жия досто́йный насле́дниче; ра́дуйся, и на́м моли́твою твое́ю врата́ ра́йская отверза́ющий.
Ра́дуйся, апо́столе Христо́в, первому́чениче и архидиа́коне Стефа́не.
Кондак 7
Хотя́ Христо́ву и́стину яви́ти все́м иуде́ом, я́ко избра́нником Бо́жиим от всея́ земли́, и́мже и словеса́ Бо́жия вве́рена бы́ша, стяза́лся еси́, святы́й апо́столе, с мужа́ми от со́нма Либерти́нска, и Кирине́йска, и Алекса́ндрска, и от Килики́и и Аси́и, побежда́я и́х глаго́лами Ду́ха и прему́дрости, вопия́л еси́ исто́чнику ра́зума и прему́дрости, Спаси́телю ми́ра побе́дную пе́снь: Аллилу́иа.
Икос 7
Но́вую благода́ть и си́лу в твои́х прему́дрых словеса́х узре́ша и не возмо́гше противоста́ти Христо́вой и́стине, вели́кий первому́чениче, врази́ твои́ подучи́ша муже́й глаго́лати, я́ко слы́шаша от тебе́ глаго́лы ху́льныя на Моисе́я и на Бо́га изрека́юща. Сподвиго́ша же на тя́ лю́ди, и ста́рцы и кни́жники и, напа́дше на тя́, восхи́тиша и приведо́ша тя́ на со́нмище свое́ нечести́вое. Мы́ же, зря́ще тя́ на беззако́нное суди́лище влеко́ма, со слеза́ми в похвалу́ си́це тебе́ глаго́лем:
Ра́дуйся, неустраши́мый пропове́дниче Христо́вой ве́ры; ра́дуйся, наро́д тво́й ве́сь ко Христу́ привлещи́ жела́вый.
Ра́дуйся, вся́кая лжи́вая уче́ния в наро́де изра́ильском обличи́вый; ра́дуйся, проти́вящихся Бо́жией и́стине к молча́нию приведы́й.
Ра́дуйся, я́ко ло́жная проти́ву тебе́ свиде́тели обличи́вый; ра́дуйся, я́ко влеко́м на суди́лище, ра́достно за Христа́ позо́р приима́л еси́.
Ра́дуйся, я́ко за Го́спода Иису́са Христа́ безче́стие терпе́л еси́; ра́дуйся, я́ко за и́мя Его́ пресвято́е хулы́, и клеветы́, и вся́к зо́л глаго́л прия́л еси́.
Ра́дуйся, му́чениче Христо́в неодоле́нный; ра́дуйся, врага́ спасе́ния на́шего низложи́вый.
Ра́дуйся, христо́вой стра́сти подража́телю: ра́дуйся, побо́рниче ве́ры непоколеби́мый.
Ра́дуйся, апо́столе Христо́в, первому́чениче и архидиа́коне Стефа́не.
Кондак 8
Стра́нно бы́сть неве́рующим во Христа́, зло́бы сатани́нския служи́телем, ю́наго и свята́го Стефа́на на со́нмище свое́м лука́вом ви́дети: вси́ бо седя́щии в со́нмищи узре́ша лице́ его́, я́ко лице́ А́нгела. Мы́ же ве́рующе в Го́спода, досто́йне прославля́ющаго святы́я Своя́ и, восхваля́юще вели́каго апо́стола и первому́ченика, а́нгельским све́том све́тло озаре́ннаго, ра́достно вопие́м на́шему Спаси́телю пе́снь: Аллилу́иа.
Икос 8
Ве́сь любо́вию ко Христу́ Го́споду горя́, не убоя́лся еси́, первому́чениче, лука́ваго со́нмища иуде́йскаго, словеса́ же Го́спода и Спаси́теля своего́: «Егда́ приведу́т вы́ на собо́рища, и вла́сти, и влады́чества, не пецы́теся, ка́ко или́ что́ отвеща́ете или́ что́ рече́те: Святы́й бо Ду́х научи́т вы́ в то́й ча́с, я́же подоба́ет рещи́»,– па́мятуя, безбоя́зненно ожида́л еси́ беззако́ннаго судии́ зла́го вопроше́ния. Сего́ ра́ди и мы́, созерца́я лице́ твое́, я́ко лице́ А́нгела, свои́ми нечи́стыми уста́ми дерза́ем тебе́ глаго́лати:
Ра́дуйся, а́нгельским сия́нием осия́нный; ра́дуйся, о́гнь благода́ти Боже́ственной я́ве восприя́вый.
Ра́дуйся, му́дрый испове́дниче свята́го Ева́нгелия Христо́ва; ра́дуйся, провозве́стниче несказа́нныя Боже́ственныя благода́ти.
Ра́дуйся, я́ко кро́ткий а́гнец волко́м на съеде́ние отда́нный; ра́дуйся, на се́м суди́лище беззако́нном безгре́шному А́гнцу Бо́жию уподо́бивыйся.
Ра́дуйся, сия́нием лица́ твоего́ вся́ седя́щия в со́нмище осия́вый; ра́дуйся, ожесточе́ние серде́ц и́х я́ве уразуме́вый.
Ра́дуйся, му́жественный ра́бе Христо́в; ра́дуйся, похвало́ и глави́зно му́чеников добропобе́дных.
Ра́дуйся, кре́пкая наде́ждо к тебе́ прибега́ющих; ра́дуйся, непосты́дное упова́ние пра́вды ра́ди гони́мых.
Ра́дуйся, апо́столе Христо́в, первому́чениче и архидиа́коне Стефа́не.
Кондак 9
Вся́кое естество́ а́нгельское обра́довал еси́, святы́й первому́чениче, егда́ на лука́вое вопроша́ние первосвяще́нника не то́кмо не умолча́л еси́, но Ду́хом Святы́м води́мый, пла́менное испове́дание любве́ твоея́ к зако́ну Боже́ственному, в Ве́тхом Заве́те да́нному, изъясни́л еси́, проро́ка Моисе́я, зако́н и хра́м Иерусали́мский восхваля́я и вся́ ве́рныя науча́я еди́ному во обои́х заве́тех Законода́вцу Го́споду во ве́ки воспева́ти: Аллилу́иа.
Икос 9
Вети́й суему́дренных су́етным преда́ниям и злы́м измышле́ниям ста́рцев, па́че не́жели зако́ну Бо́жию и Моисе́ю ве́ровавших, посрами́л еси́, святы́й апо́столе, архидиа́коне и му́чениче Христо́в Стефа́не, вси́ бо су́щии в со́нмищи я́сно уразуме́ша лжу́ глаго́лавших о тебе́, я́ко ты́ словесы́ ху́льными Бо́га, Моисе́я, Зако́н и хра́м поноси́л еси́: изре́к бо еси́ в со́нмищи словеса́ похва́льная и Бо́жию зако́ну в Ве́тхом Заве́те да́нному, и пра́ведником, ра́ди Го́спода в зако́не се́ни и писа́ний подвиза́вшимся. Науча́емии тобо́ю почита́ти словеса́ Заве́та Ве́тхаго, я́ко вои́стинну словеса́ Бо́жия, а нече́стия иуде́йскаго отвраща́тися, си́це в похвалу́ тебе́ глаго́лем:
Ра́дуйся, все́х слове́с Заве́та Ве́тхаго почита́телю; ра́дуйся, я́ко се́й заве́т ко Христу́ детоводя́щий му́дре изъясни́л еси́.
Ра́дуйся, до́блести ве́ры патриа́рхов Авраа́ма, Исаа́ка и Иа́кова, я́ко рабо́в Бо́жиих послушли́вых, показа́вый; ра́дуйся, ско́рби Ио́сифа и му́дрость его́ в Еги́пте просла́вивый.
Ра́дуйся, тя́жкия и го́рькия рабо́ты фарао́новы наро́да твоего́ в Еги́пте жи́во описа́вый; ра́дуйся, моли́твы, труды́ и ско́рби проро́ка Моисе́я во избавле́ние наро́да изра́ильскаго досто́йно возвели́чивый.
Ра́дуйся, проро́чество Моисе́я о Христе́ Го́споде лука́вому со́нмищу изъясни́вый; ра́дуйся, его́же восхожде́ние на го́ру Сина́йскую и явле́ния ему́ Го́спода красно́ возвести́вый.
Ра́дуйся, Моисе́ево послуша́ние Го́споду в созида́нии ски́нии до́бре указа́вый; ра́дуйся, Иису́са Нави́на и Дави́да труды́ че́стне изобрази́вый.
Ра́дуйся, му́дрость Соломо́нову воспе́вый; ра́дуйся, до́брый и послу́шный ра́бе Христо́в.
Ра́дуйся, апо́столе Христо́в, первому́чениче и архидиа́коне Стефа́не.
Кондак 10
Спасе́ния все́м сыново́м Изра́илевым жела́я, я́сно учи́л еси́, святы́й первому́чениче, все́х седя́щих в со́нмищи, я́ко вси́ проро́цы и пра́ведницы сло́вом и де́лом в Ве́тхом Заве́те о Христе́ Го́споде прореко́ша и к ве́ре во Христа́ Спаси́теля вся́ ве́л еси́, да и вси́ изра́ильтяне, и вси́ лю́дие из глубины́ се́рдца своего́ возопию́т ко Го́споду, на́с ра́ди на кресте́ распя́тому: Аллилу́иа.
Икос 10
Стено́ю кре́пкою во испове́дании Христо́ва Ева́нгелия бы́л еси́, святы́й первому́чениче и архидиа́коне Стефа́не. Сего́ ра́ди и в лука́вом со́нмищи того́жде Христа́, я́ко Пра́ведника, злонра́вными иуде́ями убие́ннаго, безбоя́зненно пропове́дал еси́ и все́х беззако́нных уби́йц Го́спода – нече́стие обличи́л еси́. Таково́му твоему́ вели́кому дерзнове́нию дивя́щеся, вси́ христиа́нстии ро́ди велегла́сно восхваля́ют тя́:
Ра́дуйся, беззако́ннаго собо́рища иуде́йскаго я́вное обличе́ние; ра́дуйся, Христа́ Го́спода сему́ со́нмищу пропове́дниче неустраши́мый.
Ра́дуйся, я́ко коне́ц почита́ния хра́ма Иерусали́мскаго я́ве предре́кл еси́; ра́дуйся, я́ко все́х иуде́ев, во Христа́ неве́рующих, жестоковы́йными именова́л еси́.
Ра́дуйся, я́ко у те́х же неве́рующих необре́занное се́рдце и необре́занная ушеса́ узре́л еси́; ра́дуйся, и отце́в и́х, и и́х саме́х, я́ко Ду́ху Свято́му проти́вящихся, гне́вно обличи́вый.
Ра́дуйся, о́ных уби́йцами проро́ков наименова́вый; ра́дуйся, я́ко саме́х пе́рвых уби́йц Го́спода, А́нну и Каиа́фу, на се́м со́нмищи я́вно обличи́л еси́.
Ра́дуйся, я́ко ве́сь синедрио́н уби́йцами и преда́телями Го́спода дерзнове́нно наименова́л еси́; ра́дуйся, грехо́в людски́х обличи́телю.
Ра́дуйся, покая́ния пропове́дниче; ра́дуйся, братолю́бия наста́вниче.
Ра́дуйся, апо́столе Христо́в, первому́чениче и архидиа́коне Стефа́не.
Кондак 11
Пе́сни хвале́бныя приими́ от убо́гих серде́ц на́ших и у́ст на́ших, ди́вный му́чениче и апо́столе Христо́в Стефа́не, испо́лнь бо Ду́ха Свята́го, воззре́в на не́бо, ви́дел еси́ сла́ву Бо́жию и Иису́са одесну́ю Отца́ Своего́ стоя́ща, и ре́кл еси́: «Се́ ви́жу небеса́ отве́рста и Сы́на Челове́ча одесну́ю стоя́ща Бо́га». Таково́му виде́нию и гла́су твоему́ дивя́щеся, ра́достно воспису́ем Го́споду, даю́щему сла́дость лицезре́ния Своего́ святы́м Свои́м: Аллилу́иа.
Икос 11
Светоно́снаго зра́ка твоего́, небе́снаго виде́ния и гла́са ра́достнаго, испове́дающаго сла́ву Го́спода, с небе́с сше́дшаго во спасе́ние ро́да челове́ческаго, не возмо́гше понести́ облича́емии тобо́ю иуде́е, сердца́ми свои́ми зле́ распыха́хуся, зубы́ свои́ми скрежета́ху и устреми́вшеся единоду́шно на тя́, и извлеко́ша тя́, блаже́нне Стефа́не, из со́нмища вне́ же гра́да поста́вивше, ка́мением побива́ху тя́, злонра́внии. Мы́ же, му́чениче Христо́в пресла́вный, с любо́вию провожда́юще тя́ на ме́сто блаже́нныя кончи́ны твоея́, прославля́ем му́жество твое́, велегла́сно глаго́ля:
Ра́дуйся, пе́рвый в му́ченицех, кро́вию свое́ю ве́ру во Христа́ распя́таго запечатле́вый; ра́дуйся, свое́ю кро́вию зе́млю освяти́вый.
Ра́дуйся, я́ко и сами́х апо́столов по́двигом му́ченическим предвари́л еси́; ра́дуйся, я́ко за собо́ю ты́сящи и тьмы́ те́м му́ченик и му́чениц за сла́вное и́мя Христо́во приве́л еси́.
Ра́дуйся, я́ко за Го́сподом Иису́сом Христо́м безбоя́зненно ше́ствовал еси́ и поноше́ние Его́ сла́вно поне́сл еси́; ра́дуйся, све́том страда́ний твои́х блиста́яйся.
Ра́дуйся, те́мже све́том и на́м пу́ть ко Христу́ ве́рно показу́ющий; ра́дуйся, свети́льниче пресве́тлый, Бо́жиим несозда́нным све́том озаре́нный.
Ра́дуйся, тьму́ неве́рия и вся́кия нечистоты́ све́том ве́ры твоея́ разгоня́ющий; ра́дуйся, све́тлых селе́ний ра́йских обита́телю.
Ра́дуйся, потемне́нныя и спя́щия со́вести на́шея до́брый пробуди́телю; ра́дуйся, я́ко тобо́ю благоче́стно и́мя Христо́во прославля́ется.
Ра́дуйся, апо́столе Христо́в, первому́чениче и архидиа́коне Стефа́не.
Кондак 12
Благода́ть Бо́жия вои́стину спребыва́ше тебе́, сла́вный апо́столе и первому́чениче Христо́в Стефа́не, кре́стную бо сме́рть на Голго́фе Спа́са Го́спода, в ру́це Отца́ Своего́ ду́х Сво́й преда́вшаго, воспомина́я, моли́лся и глаго́лал еси́, ка́мением от ру́к беззако́нных побива́емь: «Го́споди Иису́се, приими́ ду́х мо́й». Моли́тву же Спаси́теля о распина́телех свои́х в се́рдце свое́м нося́, прекло́нь коле́на возопи́л еси́ гла́сом ве́лиим: «Го́споди, не поста́ви и́м греха́ сего́». И с се́ю моли́твою сла́вное земно́е по́прище твое́ сконча́л еси́. Мы́ же, восхваля́я таково́е све́тлое успе́ние твое́, Го́споду Бо́гу, да́вшему тебе́ благода́ть Сы́ну Бо́жию в кончи́не твое́й уподо́битися, из глубины́ души́ вопие́м: Аллилу́иа.
Икос 12
Пою́ще сла́вное житие́ твое́, восхваля́юще апо́стольския труды́ твоя́, уми́льно воспомина́юще блаже́нную во Христе́ кончи́ну твою́, до́блестный первому́чениче Христо́в и архидиа́коне Стефа́не, мо́лим тя́: ду́х непоколеби́мой ве́ры пра́вой испроси́ на́м от Го́спода и Спа́са на́шего, се́рдце чи́стое и сокруше́нное да пребу́дет в на́с вы́ну, апо́стольскую ре́вность в про́поведи Ева́нгелия возгрева́й в на́с, да та́ко бу́дем гото́вы вся́кия ско́рби за Сладча́йшаго Иису́са терпе́ти, и тебе́, сла́внаго первому́ченика, восхваля́ти си́це:
Ра́дуйся, вели́кий Христо́в апо́столе; ра́дуйся, па́стырем Це́ркви Христо́вы све́тлый о́бразе.
Ра́дуйся, ве́рный Христо́в свиде́телю; ра́дуйся, сла́вы Бо́жия пла́менный ревни́телю.
Ра́дуйся, до́брый вдови́ц пита́телю; ра́дуйся, неща́дный лицеме́рия искорени́телю.
Ра́дуйся, и́стины Христо́вы кре́пкий испове́дниче; ра́дуйся, в тя́жких оби́дах на́ш тве́рдый засту́пниче.
Ра́дуйся, Христу́ Го́споду всего́ себе́ посвяти́вый; ра́дуйся, в кончи́не твое́й вседу́шно Христо́в учени́к яви́выйся.
Ра́дуйся, страстоте́рпче незло́бивый; ра́дуйся, уби́йцам твои́м ми́лости Бо́жией и проще́ния ди́вный хода́таю.
Ра́дуйся, апо́столе Христо́в, первому́чениче и архидиа́коне Стефа́не.
Кондак 13
О вели́кий апо́столе Христо́в, первому́чениче и архидиа́коне Стефа́не! Приими́ сие́ ма́лое, в похвалу́ тебе́ соста́вленное, моле́ние на́ше и, я́ко ве́лий учени́к Сладча́йшаго Сы́на Челове́ческаго, Спаси́теля на́шего, святы́ми твои́ми моли́твами споспе́шествуй и на́м до́брыми ученика́ми Го́спода бы́ти, да о Его́ ве́чной сла́ве помышля́юще, вся́каго зла́ и в се́й, и в бу́дущей жи́зни избе́гнем, и вы́ну хвале́бную пе́снь Ему́ да воспева́ем: Аллилу́иа.
Повтор
Этот кондак читается трижды, затем икос 1-й и кондак 1-й.
Икос 1
Ангелоподо́бная чистота́ твоя́, серафи́мская любо́вь и ве́ра в Го́спода Вседержи́теля соде́лаша тя́, свя́те Стефа́не, сосу́дом избра́нным и жили́щем Ду́ха Всесвята́го; сего́ ра́ди вси́ в Го́спода Иису́са Христа́ ве́рующии дивля́хуся свято́му житию́ твоему́ и возглаша́ху тебе́ со умиле́нием сицева́я:
Ра́дуйся, и́стинный учениче́ Христо́в; ра́дуйся, апо́столом единонра́вный.
Ра́дуйся, Ду́ха Свята́го испо́лненный; ра́дуйся, благода́тными дарова́ньми сия́ющий.
Ра́дуйся, па́че всего́ мирска́го Го́спода возлюби́вый; ра́дуйся, вся́ кра́сная ми́ра сего́ ра́ди Го́спода оста́вивый.
Ра́дуйся, Небе́сное Оте́чество взыска́вый; ра́дуйся, А́нгелом собесе́дниче.
Ра́дуйся, до́брый во́ине Царя́ Небе́снаго; ра́дуйся, не обяза́выйся ку́плями жите́йскими.
Ра́дуйся, и́стинный Христо́в служи́телю; ра́дуйся, от ю́ности до́брый и ве́рный ра́бе Христо́в.
Ра́дуйся, апо́столе Христо́в, первому́чениче и архидиа́коне Стефа́не.
Кондак 1
Избра́нный от мно́жества учени́к Го́спода и Спа́са на́шего, я́ко испо́лненный ве́ры, Ду́ха Свя́та и прему́дрости, на служе́ние вдови́цам моли́твою и возложе́нием ру́к апо́стольских, яви́лся еси́ пе́рвый во диа́конех, и та́ко в се́м чи́не Го́споду да́же до сме́рти му́ченическия послужи́л еси́. Но я́ко име́яй ве́лие дерзнове́ние ко Го́споду, от вся́ких на́с смертоно́сных бе́д и скорбе́й свобожда́й, да с любо́вию зове́м ти́:
Ра́дуйся, апо́столе Христо́в, первому́чениче и архидиа́коне Стефа́не.
Молитвы
О вели́кий первому́чениче Христо́в, апо́столе и архидиа́коне Стефа́не! Тебе́, я́ко ве́рному Христо́ву подража́телю, прино́сим мы́ гре́шнии моли́твы своя́ недосто́йныя, твоему́ ми́лостивому предста́тельству о на́с пред престо́лом Бо́жиим те́пле ве́рующе. Ты́, еще́ жи́в, печа́ть Го́спода Иису́са Христа́ в себе́ всегда́ име́л еси́, не то́кмо свои́ми доброде́тельми, зна́меньми и чудеса́ми, изоби́льно тобо́ю соверша́емыми, сию́ показу́я, но я́вно на лице́ твое́м, сия́ющем, я́ко лице́ А́нгела, печа́ть благода́ти Бо́жия носи́л еси́. Сла́ву Бо́жию и Сладча́йшаго Иису́са, стоя́ща одесну́ю Бо́га, твои́ма теле́сныма очи́ма узре́л еси́, Ду́хом Святы́м осиява́емый. Еще́ же печа́ть Божества́, в тебе́ пребыва́ющую, я́вно показа́л еси́ все́й вселе́нней, егда́ в сме́ртный му́ченический ча́с тво́й не то́кмо о все́х лю́дех, но и о вразе́х усе́рдно моли́лся еси́, моли́тву Сы́на Бо́жия на Кресте́ воспомина́я. Сию́ печа́ть Божества́ в себе́ бога́то но́сиши, и скорбьми́ прибега́ющих к тебе́ ви́диши, и к престо́лу Бо́жию моли́тву о си́х усе́рдно прино́сиши. Пода́ждь и на́м, Богови́дче пресла́вный, Христа́ Спаси́теля на́шего все́м се́рдцем люби́ти, во́лю Его́ вседу́шно исполня́ти, во и́мя Христо́во вся́ ско́рби с терпе́нием носи́ти, и не то́кмо о при́сных, но и о все́х лю́дех, и о вразе́х свои́х усе́рдно моли́тися, да и на́ши грехи́ покры́ет Госпо́дь твои́ми те́плыми моли́твами, наипа́че же благода́тию и человеколю́бием и милосе́рдием Свои́м: я́ко Тому́ подоба́ет вся́кая сла́ва, че́сть и поклоне́ние Отцу́ и Сы́ну и Свято́му Ду́ху, ны́не и при́сно, и во ве́ки веко́в. Ами́нь.
Конда́къ а҃
И҆збра́нный ѿ мно́жєства ᲂу҆чени̑къ гдⷭ҇а и҆ сп҃са на́шегѡ, ꙗ҆́кѡ и҆спо́лненный вѣ́ры, дх҃а ст҃а и҆ премꙋ́дрости, на слꙋже́нїе вдови́цамъ: мл҃твою и҆ возложе́нїемъ рꙋ́къ а҆пⷭ҇льскихъ ꙗ҆ви́лсѧ є҆сѝ пе́рвый во дїа́конѣхъ, и҆ та́кѡ въ се́мъ чи́нѣ гдⷭ҇ꙋ да́же до сме́рти мч҃нческїѧ послꙋжи́лъ є҆сѝ. Но ꙗ҆́кѡ и҆мѣ́ѧй ве́лїе дерзнове́нїе ко гдⷭ҇ꙋ, ѿ всѧ́кихъ на́съ смертоно́сныхъ бѣ́дъ и҆ скорбе́й свобожда́й, да съ любо́вїю зове́мъ тѝ:
Ра́дꙋйсѧ, а҆пⷭ҇ле хрⷭ҇то́въ, первомꙋ́чениче и҆ а҆рхїдїа́коне стефа́не.
І҆́косъ а҃
А҆гг҃лоподо́бнаѧ чтⷭ҇ота̀ твоѧ̀, серафі́мскаѧ любо́вь, и҆ вѣ́ра въ гдⷭ҇а вседержи́телѧ, содѣ́лаша тѧ̀, ст҃е стефа́не, сосꙋ́домъ и҆збра́ннымъ и҆ жили́щемъ дх҃а всест҃а́гѡ: сегѡ̀ ра́ди всѝ въ гдⷭ҇а і҆и҃са хрⷭ҇та̀ вѣ́рꙋющїи дивлѧ́хꙋсѧ ст҃о́мꙋ житїю̀ твоемꙋ̀ и҆ возглаша́хꙋ тебѣ̀ со ᲂу҆миле́нїемъ сицева̑ѧ:
Ра́дꙋйсѧ, и҆́стинный ᲂу҆ч҃ничѐ хрⷭ҇то́въ: ра́дꙋйсѧ, а҆пⷭ҇лѡмъ є҆динонра́вный.
Ра́дꙋйсѧ, дх҃а ст҃а́гѡ и҆спо́лненный: ра́дꙋйсѧ, бл҃года́тными дарова́ньми сїѧ́ющїй.
Ра́дꙋйсѧ, па́че всегѡ̀ мїрска́гѡ гдⷭ҇а возлюби́вый: ра́дꙋйсѧ, всѧ̑ кра̑снаѧ мі́ра сегѡ̀ ра́ди гдⷭ҇а ѡ҆ста́вивый.
Ра́дꙋйсѧ, нбⷭ҇ное ѻ҆те́чество взыска́вый: ра́дꙋйсѧ, а҆́гг҃лѡмъ собесѣ́дниче.
Ра́дꙋйсѧ, до́брый во́ине цр҃ѧ̀ нбⷭ҇нагѡ: ра́дꙋйсѧ, не ѡ҆бѧза́выйсѧ кꙋ́плѧми жите́йскими.
Ра́дꙋйсѧ, и҆́стинный хрⷭ҇то́въ слꙋжи́телю: ра́дꙋйсѧ, ѿ ю҆́ности до́брый и҆ вѣ́рный ра́бе хрⷭ҇то́въ.
Ра́дꙋйсѧ, а҆пⷭ҇ле хрⷭ҇то́въ, первомꙋ́чениче и҆ а҆рхїдїа́коне стефа́не.
Конда́къ в҃
Ви́дѣлъ є҆сѝ а҆рхїере́євъ а҆́ннꙋ и҆ каїа́фꙋ, і҆ѡа́нна и҆ а҆леѯа́ндра, и҆ про́чыѧ, є҆ли́цы бы́ша ѿ ро́да а҆рхїере́йскагѡ, на сво́й нечести́вый сꙋ́дъ а҆пⷭ҇лы хрⷭ҇то́вы позва́вшыѧ, и҆ ѡ҆ѕлобле́нїе и҆́хъ на всѧ̑ ᲂу҆ч҃никѝ хрⷭ҇та̀ гдⷭ҇а вѣ́далъ є҆сѝ стефа́не: сегѡ̀ ра́ди въ се́рдцѣ твое́мъ гото́вилсѧ є҆сѝ стопа́ми а҆пⷭ҇лѡвъ ше́ствовати, всѧ́кое безче́стїе за гдⷭ҇а прїима́ти, и҆ томꙋ̀ во вѣ́ки взыва́ти: А҆ллилꙋ́їа.
І҆́косъ в҃
Ра́зꙋмъ бг҃опросвѣще́нъ и҆мѣ́ѧ, ѽ ди́вный первомꙋ́чениче, свѣ́тлѡ ᲂу҆разꙋмѣ́лъ є҆сѝ, ꙗ҆́кѡ вѣ́ра во хрⷭ҇та̀ гдⷭ҇а зове́тъ всѧ̑ за и҆́мѧ є҆гѡ̀ безче́стїе и҆ ра́ны всѧ̑кїѧ ѿ влады́къ и҆ кнѧзе́й мі́ра сегѡ̀ носи́ти, позо́ръ на со́нмищахъ и҆ собо́рищахъ терпѣ́ти, и҆ та́кѡ бы́лъ є҆сѝ пред̾ꙋгото́вленъ всѧ́кое поноше́нїе за хрⷭ҇та̀ ра́достнѡ прїима́ти. Сегѡ̀ ра́ди восхвалѧ́емъ тѧ̀, гл҃го́люще:
Ра́дꙋйсѧ, ю҆́нымъ и҆ чⷭ҇тымъ се́рдцемъ твои́мъ хрⷭ҇та̀ возлюби́вый: ра́дꙋйсѧ, того̀ є҆ди́наго въ житїѝ твое́мъ возжела́вый.
Ра́дꙋйсѧ, а҆́гг҃льскꙋю непоро́чность стѧжа́вый: ра́дꙋйсѧ, скве́рнъ мі́ра сегѡ̀ не прїѡбщи́выйсѧ.
Ра́дꙋйсѧ, въ мл҃твѣ пла́менный: ра́дꙋйсѧ, въ ско́рбѣхъ терпѣли́вый.
Ра́дꙋйсѧ, за и҆́мѧ хрⷭ҇то́во всѧ́кое гоне́нїе прїѧ́ти себѐ ᲂу҆гото́вавый: ра́дꙋйсѧ, скорбьмѝ мнѡ́гими пꙋ́ть въ црⷭ҇твїе нбⷭ҇ное себѣ̀ ᲂу҆стро́ивый.
Ра́дꙋйсѧ, и҆ на́мъ въ ско́рбѣхъ помога́ѧй: ра́дꙋйсѧ, ѿ тѧ́жкихъ и҆скꙋше́нїй на́съ свобожда́ѧй.
Ра́дꙋйсѧ, прⷭ҇то́лꙋ гдⷭ҇ню предстоѧ́й: ра́дꙋйсѧ, мл҃твы ѡ҆ на́съ грѣ́шныхъ гдⷭ҇еви приносѧ́й.
Ра́дꙋйсѧ, а҆пⷭ҇ле хрⷭ҇то́въ, первомꙋ́чениче и҆ а҆рхїдїа́коне стефа́не.
Конда́къ г҃
Си́лою свы́ше ѡ҆блече́нъ, по́двигомъ до́брымъ подвиза́лсѧ є҆сѝ во и҆́мѧ гдⷭ҇а, сла́вный во́ине хрⷭ҇то́въ стефа́не, ᲂу҆готовлѧ́ѧ себѐ бы́ти мꙋ́ченикомъ за хрⷭ҇та̀ сп҃си́телѧ: є҆мꙋ́же и҆з̾ глꙋбины̀ се́рдца твоегѡ̀ вы́нꙋ взыва́лъ є҆сѝ: А҆ллилꙋ́їа.
І҆́косъ г҃
И҆мѣ́ѧ бога́тство бж҃їихъ дарова́нїй, свѧ́те стеѳа́не, всѣ́ми дара́ми гдⷭ҇ꙋ хрⷭ҇тꙋ̀ рабо́тати восхотѣ́лъ є҆сѝ, и҆ всѣ̑мъ вѣ̑рнымъ вѣ́домъ бы́лъ є҆сѝ, ꙗ҆́кѡ до́брый ᲂу҆ч҃ни́къ хрⷭ҇та̀ и҆ є҆гѡ̀ сла́вныхъ а҆пⷭ҇лѡвъ. За сїѐ твоѐ бл҃го́е и҆зволе́нїе ᲂу҆блажа́емъ тѧ̀ си́це:
Ра́дꙋйсѧ, до́браѧ лоза̀ вїногра́да хрⷭ҇то́ва: ра́дꙋйсѧ, си́лою хрⷭ҇то́вою вои́стиннꙋ плодоно́сенъ ꙗ҆ви́выйсѧ.
Ра́дꙋйсѧ, гдⷭ҇а хрⷭ҇та̀ пꙋте́мъ ше́ствовати восхотѣ́вый: ра́дꙋйсѧ, и҆́стинѣ хрⷭ҇то́вой всего̀ себѐ порабо́тивый.
Ра́дꙋйсѧ, житїю̀ хрⷭ҇то́вꙋ подража́вый: ра́дꙋйсѧ, гл҃го́лы хрⷭ҇то́вы въ се́рдцѣ твое́мъ запечатлѣ́вый.
Ра́дꙋйсѧ, дх҃а ст҃а́гѡ жили́ще: ра́дꙋйсѧ, кла́дезю мꙋ́дрости бж҃е́ственныѧ.
Ра́дꙋйсѧ, ꙗ҆́кѡ и҆з̾ чре́ва твоегѡ̀ рѣ́ки воды̀ жи́вы и҆стеко́ша: Ра́дꙋйсѧ, ꙗ҆́кѡ стрꙋи̑ воды̀ сїѧ̀ мно́зѣмъ во сп҃се́нїе послꙋжи́ша.
Ра́дꙋйсѧ, бж҃е́ственныѧ премꙋ́дрости и҆спо́лненный: ра́дꙋйсѧ, ᲂу҆ста́ми твои́ми бг҃а во ст҃ѣ́й трⷪ҇цѣ просла́вивый.
Ра́дꙋйсѧ, а҆пⷭ҇ле хрⷭ҇то́въ, первомꙋ́чениче и҆ а҆рхїдїа́коне стефа́не.
Конда́къ д҃
Бꙋ́рѧ смꙋще́нїй поразѝ ю҆́нꙋю цр҃ковь хрⷭ҇то́вꙋ, є҆гда̀ бы́сть ропта́нїе є҆́ллинѡвъ ко є҆вре́ємъ, ꙗ҆́кѡ презира́еми быва́хꙋ во вседне́вномъ слꙋже́нїи вдови́цы и҆́хъ. Ты́ же, свѧ́тче бж҃їй, вѣ́рꙋѧ мꙋ́дрости а҆пⷭ҇лѡвъ, ᲂу҆се́рднѡ взыва́лъ є҆сѝ къ бг҃ꙋ чⷭ҇тыми ᲂу҆ста́ми свои́ми: А҆ллилꙋ́їа.
І҆́косъ д҃
Слы́ша ст҃і́и а҆пⷭ҇лы ропта́нїе є҆́ллинѡвъ, созва́ша мно́жество ᲂу҆чени̑къ, рѣ́ша: не ᲂу҆до́бнѡ є҆́сть на́мъ, ѡ҆ста́вльше сло́во бж҃їе, слꙋжи́ти трапе́замъ. Вѣ́рнїи же, зрѧ́ще твою̀ вѣ́рность и҆ любо́вь ко а҆пⷭ҇лѡмъ ст҃ы́мъ, є҆динодꙋ́шнѡ возглаша́хꙋ тебѣ̀ си́це:
Ра́дꙋйсѧ, до́брый послꙋ́шателю а҆пⷭ҇льскихъ вѣща́нїй: ра́дꙋйсѧ, любо́вїю ко а҆по́стольской про́повѣди дꙋ́хъ тво́й ѡ҆крыли́вый.
Ра́дꙋйсѧ, всѧ́комꙋ сло́вꙋ а҆пⷭ҇льскомꙋ всеꙋсе́рднѡ внима́вый: ра́дꙋйсѧ, а҆пⷭ҇лы ᲂу҆строи́тели цр҃кви хрⷭ҇то́вы почита́вый.
Ра́дꙋйсѧ, ᲂу҆ста́ми хрⷭ҇то́выми а҆пⷭ҇лѡвъ и҆менова́вый: ра́дꙋйсѧ, та̑инъ бж҃їихъ строи́телей въ ни́хъ ви́дѣвый.
Ра́дꙋйсѧ, ꙗ҆́кѡ самови́дцы сло́ва и҆ слꙋги̑ хрⷭ҇тѡ́вы тѣ́хъ бы́ти вѣ́рꙋѧй: ра́дꙋйсѧ, ника́коже проти́вꙋ а҆пⷭ҇льскихъ вѣща́нїй глаго́лати дерза́вый.
Ра́дꙋйсѧ, ꙗ҆́кѡ въ рꙋ́цѣ а҆пⷭ҇лѡвъ цр҃ковь хрⷭ҇то́ва предана̀, вѣща́вый: ра́дꙋйсѧ, а҆пⷭ҇льскою сїю̀ и҆менова́вый.
Ра́дꙋйсѧ, сто́лпе цр҃ко́вный: ра́дꙋйсѧ, цр҃ко́внаѧ красото̀.
Ра́дꙋйсѧ, а҆пⷭ҇ле хрⷭ҇то́въ, первомꙋ́чениче и҆ а҆рхїдїа́коне стефа́нѣ.
Конда́къ є҃
Бг҃отє́чныѧ ѕвѣ́зды, ст҃і́и а҆пⷭ҇ли, вѣ́рꙋющымъ во хрⷭ҇та̀ реко́ша: ᲂу҆смотри́те бра́тїе, мꙋ́жи ѿ ва́съ свидѣ́тельствованы се́дмь, и҆спо́лнены дх҃а ст҃а и҆ премꙋ́дрости, и҆̀хже поста́вимъ над̾ слꙋ́жбою се́ю, мы́ же въ мл҃твѣ и҆ слꙋже́нїи сло́ва пребꙋ́демъ. Сїѧ̑ слы́шавъ, ст҃ы́й стефа́нъ, всѣ́мъ се́рдцемъ ра́дꙋющесѧ, возопѝ премꙋ́дромꙋ гдⷭ҇ꙋ: А҆ллилꙋ́їа.
І҆́косъ є҃
Ви́дѣша во хрⷭ҇та̀ вѣ́рꙋющїи стефа́на, мꙋ́жа и҆спо́лнена премꙋ́дрости, вѣ́ры и҆ дх҃а ст҃а́гѡ, пе́рваго є҆го̀ нареко́ша бы́ти досто́йна слꙋ́жбꙋ дїа́конскꙋю пред̾ лице́мъ а҆пⷭ҇лѡвъ и҆справлѧ́ти, и҆ возгласи́ша є҆мꙋ̀ сицева̑ѧ:
Ра́дꙋйсѧ, до́брый сотрꙋ́дниче дх҃оно́сныхъ а҆пⷭ҇лѡвъ: ра́дꙋйсѧ, житїю̀ и҆́хъ подража́телю прилѣ́жный.
Ра́дꙋйсѧ, и҆ є҆́ллинѡвъ и҆ є҆вре́євъ є҆ди́ною и҆ то́южде любо́вїю пита́вый: ра́дꙋйсѧ, ѡ҆ вдови́цахъ мꙋ́дре пекі́йсѧ.
Ра́дꙋйсѧ, ни́щихъ корми́телю: ра́дꙋйсѧ, любвѐ хрⷭ҇то́вы живы́й проповѣ́дниче.
Ра́дꙋйсѧ, по сло́вꙋ гдⷭ҇а всѣ̑мъ слꙋжи́ти восхотѣ́вый: ра́дꙋйсѧ, но́зѣ ст҃ы́хъ ѡ҆мы́вый.
Ра́дꙋйсѧ, си́рыхъ ѻ҆те́цъ чадолюби́вый: ра́дꙋйсѧ, наги́хъ ѡ҆дѣѧ́нїе.
Ра́дꙋйсѧ, въ печа́лѣхъ ᲂу҆тѣ́шителю: ра́дꙋйсѧ, ѿ напра́сныѧ сме́рти и҆зба́вителю.
Ра́дꙋйсѧ, а҆пⷭ҇ле хрⷭ҇то́въ, первомꙋ́чениче и҆ а҆рхїдїа́коне стефа́не.
Конда́къ ѕ҃
Проповѣ́дникъ сло́вомъ и҆ дѣ́ломъ и҆́стины хрⷭ҇то́вы ꙗ҆ви́лсѧ є҆сѝ, ст҃ы́й первомч҃ниче стефа́не, є҆гда̀ ст҃і́и а҆пⷭ҇лы помоли́вшесѧ, возложи́ша рꙋ́цѣ своѝ на тѧ̀ и҆ на соизбра́нныхъ съ тобо́ю: и҆ сло́во бж҃їе растѧ́ше и҆ ᲂу҆множа́шесѧ число̀ ᲂу҆чени̑къ во і҆ерⷭ҇ли́мѣ ѕѣлѡ̀: мнѡ́гъ же наро́дъ сщ҃е́нникѡвъ послꙋ́шахꙋ вѣ́ры. Ты̀ же съ про́чими дїа́коны ра́достнѡ взыва́лъ є҆сѝ гдⷭ҇ꙋ хрⷭ҇тꙋ̀: А҆ллилꙋ́їа.
І҆́косъ ѕ҃
Возсїѧ̀ па́че со́лнца свѣтлѣ́йше сло́во твоеѧ̀ про́повѣди, ст҃ы́й а҆рхїдїа́коне стефа́не: ты́ бо, и҆спо́лнь вѣ́ры и҆ си́лы, твори́лъ є҆сѝ зна́мєнїѧ и҆ чꙋдеса̀ вє́лїѧ въ лю́дѣхъ, и҆̀же позна́вше тобо́ю хрⷭ҇та̀ распѧ́тагѡ возглаша́хꙋ тебѣ̀ благода́рными ᲂу҆сты̀ со ᲂу҆миле́нїемъ похвалы̑ сицева̑ѧ:
Ра́дꙋйсѧ, ѻ҆́гненный проповѣ́дниче є҆ѵⷢ҇лїа хрⷭ҇то́ва: ра́дꙋйсѧ, чꙋде́съ вели́кихъ ди́вный соверши́телю.
Ра́дꙋйсѧ, і҆ꙋде́йскагѡ ѕловѣ́рїѧ ѡ҆бличи́телю: ра́дꙋйсѧ, та̑инъ бж҃їихъ мꙋ́дрый и҆з̾ѧсни́телю.
Ра́дꙋйсѧ, трⷪ҇цѣ прест҃ѣ́й покланѧ́тисѧ наꙋчи́вый: ра́дꙋйсѧ, серафі́мскꙋю пѣ́снь во сла́вꙋ ст҃ы́ѧ трⷪ҇цы во ᲂу҆мѣ̀, въ се́рдцѣ и҆ ᲂу҆стѣ́хъ твои́хъ и҆мѣ́вый.
Ра́дꙋйсѧ, дх҃а ст҃а́гѡ свѣти́льниче пресвѣ́тлый: ра́дꙋйсѧ, того́жде дх҃а ст҃а́гѡ бл҃года́ти нѡ́выѧ лю́ди прича́стники сотвори́вый.
Ра́дꙋйсѧ, златослове́сный ᲂу҆чи́телю: ра́дꙋйсѧ, неꙋста́нный проповѣ́дниче.
Ра́дꙋйсѧ, црⷭ҇твїѧ бж҃їѧ досто́йный наслѣ́дниче: ра́дꙋйсѧ, и҆ на́мъ мл҃твою твое́ю врата̀ ра̑йскаѧ ѿверза́ющїй.
Ра́дꙋйсѧ, а҆пⷭ҇ле хрⷭ҇то́въ, первомꙋ́чениче и҆ а҆рхїдїа́коне стефа́не.
Конда́къ з҃
Хотѧ̀ хрⷭ҇то́вꙋ и҆́стинꙋ ꙗ҆ви́ти всѣ̑мъ і҆ꙋде́ѡмъ, ꙗ҆́кѡ и҆збра́нникѡмъ бж҃їимъ ѿ всеѧ̀ землѝ, и҆̀мже и҆ словеса̀ бж҃їѧ ввѣ́рена бы́ша: стѧза́лсѧ є҆сѝ ст҃ы́й а҆пⷭ҇ле съ мꙋжа́ми ѿ со́нма либерти́нска, и҆ кѷрине́йска, и҆ а҆леѯа́ндрска, и҆ ѿ кїлїкі́и и҆ а҆сі́и, побѣжда́ѧ и҆̀хъ гл҃гѡ́лами дх҃а и҆ премꙋ́дрости, вопїѧ́лъ є҆сѝ и҆сто́чникꙋ ра́зꙋма и҆ премꙋ́дрости, сп҃си́телю мі́ра побѣ́днꙋю пѣ́снь: А҆ллилꙋ́їа.
І҆́косъ з҃
Но́вꙋю блгⷣть и҆ си́лꙋ въ твои́хъ премꙋ́дрыхъ словеса́хъ ᲂу҆зрѣ́ша, и҆ не возмо́гше противоста́ти хрⷭ҇то́вой и҆́стинѣ, вели́кїй первомꙋ́чениче, вразѝ твоѝ подꙋчи́ша мꙋже́й глаго́лати: ꙗ҆́кѡ слы́шаша ѿ тебє̀ глаго́лы хꙋ́льныѧ на мѡѷсе́а и҆ на бг҃а и҆зрека́юща. сподвиго́ша на тѧ̀ лю́ди и҆ ста́рцы, и҆ кни́жники и҆, напа́дше на тѧ̀, восхи́тиша и҆ приведо́ша тѧ̀ на со́нмище своѐ нечести́вое. Мы̀ же, зрѧ́ще тѧ̀ на беззако́нное сꙋди́лищѣ влеко́ма, со слеза́ми въ похвалꙋ̀ си́це тебѣ̀ глаго́лемъ:
Ра́дꙋйсѧ, неꙋстраши́мый проповѣ́дниче хрⷭ҇то́вой вѣ́ры: ра́дꙋйсѧ, наро́дъ тво́й ве́сь ко хрⷭ҇тꙋ̀ привлещѝ жела́вый.
Ра́дꙋйсѧ, всѧ̑каѧ лжи̑ваѧ ᲂу҆чє́нїѧ въ наро́дѣ і҆и҃льскомъ ѡ҆бличи́вый: ра́дꙋйсѧ, проти́вѧщихсѧ бж҃їей и҆́стинѣ къ молча́нїю приведы́й.
Ра́дꙋйсѧ, ꙗ҆́кѡ лѡ́жнаѧ проти́вꙋ тебє̀ свидѣ́тели ѡ҆бличи́вый: ра́дꙋйсѧ, ꙗ҆́кѡ влеко́мъ на сꙋди́лищѣ, ра́достнѡ за хрⷭ҇та̀ позо́ръ прїима́лъ є҆сѝ.
Ра́дꙋйсѧ, ꙗ҆́кѡ за гдⷭ҇а і҆и҃са хрⷭ҇та̀ безче́стїе терпѣ́лъ є҆сѝ: ра́дꙋйсѧ, ꙗ҆́кѡ за и҆́мѧ є҆гѡ̀ прест҃о́е хꙋлы̑ и҆ клевєты̀, и҆ всѧ́къ ѕо́лъ глаго́лъ, прїѧ́лъ є҆сѝ.
Ра́дꙋйсѧ, мч҃ниче хрⷭ҇то́въ неѡдолѣ́нный: ра́дꙋйсѧ, врага̀ сп҃се́нїѧ на́шегѡ низложи́вый.
Ра́дꙋйсѧ, хрⷭ҇то́вой стрⷭ҇ти подража́телю: ра́дꙋйсѧ, побо́рниче вѣ́ры непоколеби́мый.
Ра́дꙋйсѧ, а҆пⷭ҇ле хрⷭ҇то́въ, первомꙋ́чениче и҆ а҆рхїдїа́коне стефа́не.
Конда́къ и҃
Стра́ннѡ бы́сть невѣ́рꙋющымъ во хрⷭ҇та̀, ѕло́бы сатани́нскїѧ слꙋжи́телємъ, ю҆́наго и҆ ст҃а́го стефа́на на со́нмищѣ свое́мъ лꙋка́вомъ ви́дѣти: вси́ бо сѣдѧ́щїи въ со́нмищи ᲂу҆зрѣ́ша лицѐ є҆гѡ̀, ꙗ҆́кѡ лицѐ а҆́гг҃ла. Мы̀ же вѣ́рꙋюще въ гдⷭ҇а, досто́йнѣ прославлѧ́ющаго ст҃ы̑ѧ своѧ̑, и҆ восхвалѧ́юще вели́каго а҆пⷭ҇ла и҆ первомꙋ́ченика, а҆́гг҃льскимъ свѣ́томъ свѣ́тлѡ ѡ҆заре́ннаго, ра́достнѡ вопїе́мъ на́шемꙋ сп҃си́телю пѣ́снь: А҆ллилꙋ́їа.
І҆́косъ и҃
Ве́сь любо́вїю ко хрⷭ҇тꙋ̀ гдⷭ҇ꙋ горѧ̀, не ᲂу҆боѧ́лсѧ є҆сѝ первомꙋ́чениче, лꙋка́вагѡ со́нмища і҆ꙋде́йскагѡ. Словеса̀ же гдⷭ҇а и҆ сп҃си́телѧ своегѡ̀: є҆гда̀ приведꙋ́тъ вы̀ на собѡ́рища, и҆ вла̑сти, и҆ влады́чєства, не пецы́тесѧ, ка́кѡ и҆лѝ, что̀ ѿвѣща́ете и҆лѝ что̀ рече́те: ст҃ы́й бо дх҃ъ наꙋчи́тъ вы̀ въ то́й ча́съ, ꙗ҆̀же подоба́етъ рещѝ. Сїѐ же па́мѧтꙋѧ, безбоѧ́зненнѡ ѡ҆жида́лъ є҆сѝ беззако́ннагѡ сꙋдїѝ ѕла́гѡ вопроше́нїѧ. Сегѡ̀ ра́ди и҆ мы̀, созерца́ѧ лицѐ твоѐ, ꙗ҆́кѡ лицѐ а҆́гг҃ла, свои́ми нечи́стыми ᲂу҆ста́ми дерза́емъ тебѣ̀ глаго́лати:
Ра́дꙋйсѧ, а҆́гг҃льскимъ сїѧ́нїемъ ѡ҆сїѧ́нный: ра́дꙋйсѧ, ѻ҆́гнь бл҃года́ти бж҃е́ственной ꙗ҆́вѣ воспрїѧ́вый.
Ра́дꙋйсѧ, мꙋ́дрый и҆сповѣ́дниче ст҃а́гѡ є҆ѵⷢ҇лїа хрⷭ҇то́ва: ра́дꙋйсѧ, провозвѣ́стниче несказа́нныѧ бж҃е́ственныѧ бл҃года́ти.
Ра́дꙋйсѧ, ꙗ҆́кѡ кро́ткїй а҆́гнецъ волкѡ́мъ на съеде́нїе ѿда́нный: ра́дꙋйсѧ, на се́мъ сꙋди́лищѣ беззако́нномъ безгрѣ́шномꙋ а҆́гнцꙋ бж҃їю ᲂу҆подо́бивыйсѧ.
Ра́дꙋйсѧ, сїѧ́нїемъ лица̀ твоегѡ̀ всѧ̑ сѣдѧ́щыѧ въ со́нмищѣ ѡ҆сїѧ́вый: ра́дꙋйсѧ, ѡ҆жесточе́нїе серде́цъ и҆́хъ ꙗ҆́вѣ ᲂу҆разꙋмѣ́вый.
Ра́дꙋйсѧ, мꙋ́жественный ра́бе хрⷭ҇то́въ: ра́дꙋйсѧ, похвало̀ и҆ глави́зно мꙋ́ченикѡвъ добропобѣ́дныхъ.
Ра́дꙋйсѧ, крѣ́пкаѧ наде́ждо къ тебѣ̀ прибѣга́ющихъ: ра́дꙋйсѧ, непосты́дное ᲂу҆пова́нїе пра́вды ра́ди гони́мыхъ.
Ра́дꙋйсѧ, а҆пⷭ҇ле хрⷭ҇то́въ, первомꙋ́чениче и҆ а҆рхїдїа́коне стефа́не.
Конда́къ ѳ҃
Всѧ́кое є҆стество̀ а҆́гг҃льское ѡ҆бра́довалъ є҆сѝ ст҃ы́й первомч҃ниче, є҆гда̀ на лꙋка́вое вопроша́нїе первосщ҃е́нника не то́кмѡ не ᲂу҆молча́лъ є҆сѝ, но дх҃омъ ст҃ы́мъ води́мый, пла́менное и҆сповѣ́данїе любвѐ твоеѧ̀ къ зако́нꙋ бж҃е́ственномꙋ, въ ве́тхомъ завѣ́тѣ да́нномꙋ, и҆з̾ѧсни́лъ є҆сѝ, прⷪ҇ро́ка мѡѷсе́а, зако́нъ и҆ хра́мъ і҆ерⷭ҇ли́мскїй восхвалѧ́ѧ, и҆ всѧ̑ вѣ̑рныѧ наꙋча́ѧ є҆ди́номꙋ во ѻ҆бои́хъ завѣ́тѣхъ законода́вцꙋ гдⷭ҇ꙋ во вѣ́ки воспѣва́ти: А҆ллилꙋ́їа.
І҆́косъ ѳ҃
Вѣті́й сꙋемꙋ́дренныхъ сꙋ́єтнымъ преда́нїѧмъ и҆ ѕлы̑мъ и҆змышле́нїѧмъ ста́рцєвъ, па́че не́жели зако́нꙋ бж҃їю и҆ мѡѷсе́ю вѣ́ровавшыхъ, посрами́лъ є҆сѝ ст҃ы́й а҆пⷭ҇ле, а҆рхїдїа́коне и҆ мч҃ниче хрⷭ҇то́въ стефа́не: всѝ бо сꙋ́щїи въ со́нмищи ꙗ҆́снѡ ᲂу҆разꙋмѣ́ша лжꙋ̀ глаго́лавшыхъ ѡ҆ тебѣ̀, ꙗ҆́кѡ ты̀ словесы̀ хꙋ́льными бг҃а, мѡѷсе́а, зако́нъ и҆ хра́мъ поноси́лъ є҆сѝ: и҆зре́къ бо є҆сѝ въ со́нмищи словеса̀ похва̑льнаѧ и҆ бж҃їю зако́нꙋ въ ве́тхомъ завѣ́тѣ да́нномꙋ, и҆ пра́ведникѡмъ, ра́ди гдⷭ҇а въ зако́нѣ сѣ́ни и҆ писа́нїй подвиза́вшымсѧ. Наꙋча́емїи тобо́ю почита́ти словеса̀ завѣ́та вѣ́тхагѡ, ꙗ҆́кѡ вои́стиннꙋ словеса̀ бж҃їѧ, а҆ нече́стїѧ і҆ꙋде́йскагѡ ѿвраща́тисѧ, си́це въ похвалꙋ̀ тебѣ̀ глаго́лемъ:
Ра́дꙋйсѧ, всѣ́хъ слове́съ завѣ́та вѣ́тхагѡ почита́телю: ра́дꙋйсѧ, ꙗ҆́кѡ се́й завѣ́тъ ко хрⷭ҇тꙋ̀ дѣтоводѧ́щїй мꙋ́дрѣ и҆з̾ѧсни́лъ є҆сѝ.
Ра́дꙋйсѧ, до́блєсти вѣ́ры патрїа́рхѡвъ а҆враа́ма, і҆саа́ка и҆ і҆а́кѡва, ꙗ҆́кѡ рабѡ́въ бж҃їихъ послꙋшли́выхъ, показа́вый: ра́дꙋйсѧ, скѡ́рби і҆ѡ́сифа и҆ мꙋ́дрость є҆гѡ̀ въ є҆гѵ́птѣ просла́вивый.
Ра́дꙋйсѧ, тѧ̑жкїѧ и҆ гѡ́рькїѧ рабѡ́ты фараѡ́новы наро́да твоегѡ̀ въ є҆гѵ́птѣ жи́вѡ ѡ҆писа́вый: ра́дꙋйсѧ, мл҃твы, трꙋды̀ и҆ скѡ́рби прⷪ҇ро́ка мѡѷсе́а во и҆збавле́нїе наро́да і҆и҃льскагѡ досто́йнѡ возвели́чивый.
Ра́дꙋйсѧ, прⷪ҇ро́чество мѡѷсе́а ѡ҆ хрⷭ҇тѣ̀ гдⷭ҇ѣ лꙋка́вомꙋ со́нмищꙋ и҆з̾ѧсни́вый: ра́дꙋйсѧ, є҆гѡ́же восхожде́нїе на го́рꙋ сїна́йскꙋю, и҆ ꙗ҆вле́нїѧ є҆мꙋ̀ гдⷭ҇а, краснѡ̀ возвѣсти́вый.
Ра́дꙋйсѧ, мѡѷсе́ево послꙋша́нїе гдⷭ҇ꙋ въ созида́нїи ски́нїи до́брѣ ᲂу҆каза́вый: ра́дꙋйсѧ, і҆исꙋ́са наѵи́на и҆ дв҃да трꙋды̀ че́стнѣ и҆зѡбрази́вый.
Ра́дꙋйсѧ, мꙋ́дрость соломѡ́новꙋ воспѣ́вый: ра́дꙋйсѧ, до́брый и҆ послꙋ́шный ра́бе хрⷭ҇то́въ.
Ра́дꙋйсѧ, а҆пⷭ҇ле хрⷭ҇то́въ, первомꙋ́чениче и҆ а҆рхїдїа́коне стефа́не.
Конда́къ і҃
Сп҃се́нїѧ всѣ̑мъ сыновѡ́мъ і҆и҃лєвымъ жела́ѧ, ꙗ҆́снѡ ᲂу҆чи́лъ є҆сѝ, ст҃ы́й первомꙋ́чениче, всѣ́хъ сѣдѧ́щыхъ въ со́нмищи: ꙗ҆́кѡ всѝ прⷪ҇ро́цы и҆ пра́вєдницы сло́вомъ и҆ дѣ́ломъ въ ве́тхомъ завѣ́тѣ ѡ҆ хрⷭ҇тѣ̀ гдⷭ҇ѣ прореко́ша, и҆ къ вѣ́рѣ во хрⷭ҇та̀ сп҃си́телѧ всѧ̑ ве́лъ є҆сѝ, да и҆ всѝ і҆и҃льтѧне и҆ всѝ лю́дїе и҆з̾ глꙋбины̀ се́рдца своегѡ̀ возопїю́тъ ко гдⷭ҇ꙋ на́съ ра́ди на крⷭ҇тѣ̀ распѧ́томꙋ: А҆ллилꙋ́їа.
І҆́косъ і҃
Стѣно́ю крѣ́пкою во и҆сповѣ́данїи хрⷭ҇то́ва є҆ѵⷢ҇лїа бы́лъ є҆сѝ ст҃ы́й первомꙋ́чениче и҆ а҆рхїдїа́коне стефа́не. Сегѡ̀ ра́ди и҆ въ лꙋка́вомъ со́нмищи того́жде хрⷭ҇та̀, ꙗ҆́кѡ првⷣника ѕлонра́вными і҆ꙋде́ѧми ᲂу҆бїе́ннагѡ, безбоѧ́зненнѡ проповѣ́далъ є҆сѝ, и҆ всѣ́хъ беззако́нныхъ ᲂу҆бі́йцъ гдⷭ҇а, нече́стїе ѡ҆бличи́лъ є҆сѝ. Таково́мꙋ твоемꙋ̀ вели́комꙋ дерзнове́нїю дивѧ́щесѧ всѝ хрⷭ҇тїа́нстїи ро́ди велегла́снѡ восхвалѧ́ютъ тѧ̀:
Ра́дꙋйсѧ, беззако́ннагѡ собо́рища і҆ꙋде́йскагѡ ꙗ҆́вное ѡ҆бличе́нїе: ра́дꙋйсѧ, хрⷭ҇та̀ гдⷭ҇а семꙋ̀ со́нмищꙋ проповѣ́дниче неꙋстраши́мый.
Ра́дꙋйсѧ, ꙗ҆́кѡ коне́цъ почита́нїѧ хра́ма і҆ерⷭ҇ли́мскагѡ ꙗ҆́вѣ предре́клъ є҆сѝ: ра́дꙋйсѧ, ꙗ҆́кѡ всѣ́хъ і҆ꙋде́євъ во хрⷭ҇та̀ невѣ́рꙋющихъ жестоковы́йными и҆менова́лъ є҆сѝ.
Ра́дꙋйсѧ, ꙗ҆́кѡ ᲂу҆ тѣ́хъ же невѣ́рꙋющихъ неѡбрѣ́занное се́рдце и҆ неѡбрѣ̑заннаѧ ᲂу҆шеса̀ ᲂу҆зрѣ́лъ є҆сѝ: ра́дꙋйсѧ, и҆ ѻ҆тцє́въ и҆́хъ, и҆ и҆̀хъ самѣ́хъ, ꙗ҆́кѡ дх҃ꙋ ст҃о́мꙋ проти́вѧщихсѧ, гнѣ́внѡ ѡ҆бличи́вый.
Ра́дꙋйсѧ, ѻ҆́ныхъ ᲂу҆бі́йцами прⷪ҇ро́кѡвъ наименова́вый: ра́дꙋйсѧ, ꙗ҆́кѡ самѣ́хъ пе́рвыхъ ᲂу҆бі́йцъ гдⷭ҇а: а҆́ннꙋ и҆ каїа́фꙋ, на се́мъ со́нмищи ꙗ҆́внѡ ѡ҆бличи́лъ є҆сѝ.
Ра́дꙋйсѧ, ꙗ҆́кѡ ве́сь синедрїо́нъ ᲂу҆бі́йцами и҆ преда́телѧми гдⷭ҇а дерзнове́ннѡ наименова́лъ є҆сѝ: ра́дꙋйсѧ, грѣхѡ́въ людски́хъ ѡ҆бличи́телю.
Ра́дꙋйсѧ, покаѧ́нїѧ проповѣ́дниче: ра́дꙋйсѧ, братолю́бїѧ наста́вниче.
Ра́дꙋйсѧ, а҆пⷭ҇ле хрⷭ҇то́въ, первомꙋ́чениче и҆ а҆рхїдїа́коне стефа́не.
Конда́къ а҃і
Пѣ̑сни хвалє́бныѧ прїимѝ ѿ ᲂу҆бо́гихъ серде́цъ на́шихъ и҆ ᲂу҆́стъ на́шихъ, ди́вный мч҃нче и҆ а҆пⷭ҇ле хрⷭ҇то́въ стефа́не, и҆спо́лнь бо дх҃а ст҃а́гѡ, воззрѣ́въ на не́бо, ви́дѣлъ є҆сѝ сла́вꙋ бж҃їю и҆ і҆и҃са ѡ҆деснꙋ́ю ѻ҆ц҃а̀ своегѡ̀ стоѧ́ща, и҆ ре́клъ є҆сѝ: сѐ ви́жꙋ небеса̀ ѿве́рста и҆ сн҃а чл҃вѣ́ча ѡ҆деснꙋ́ю стоѧ́ща бг҃а. Таково́мꙋ видѣ́нїю и҆ гла́сꙋ твоемꙋ̀ дивѧ́щесѧ, ра́достнѡ восписꙋ́емъ гдⷭ҇ꙋ, даю́щемꙋ сла́дость лицезрѣ́нїѧ своегѡ̀ ст҃ы̑мъ свои̑мъ: А҆ллилꙋ́їа.
І҆́косъ а҃і
Свѣтоно́снагѡ зра́ка твоегѡ̀, нбⷭ҇нагѡ видѣ́нїѧ и҆ гла́са ра́достнагѡ, и҆сповѣ́дающагѡ сла́вꙋ гдⷭ҇а, съ нб҃съ сше́дшагѡ во сп҃се́нїе ро́да человѣ́ческагѡ, не возмо́гше понестѝ ѡ҆блича́емїи тобо́ю і҆ꙋде́є, сердца́ми свои́ми ѕлѣ̀ распыха́хꙋсѧ, зꙋбы̀ свои́ми скрежета́хꙋ, и҆ ᲂу҆стреми́вшесѧ є҆динодꙋ́шнѡ на тѧ̀, и҆ и҆звлеко́ша тѧ̀ бл҃же́нне стефа́не и҆з̾ со́нмища, внѣ̀ гра́да поста́вивше, ка́менїємъ побива́хꙋ тѧ̀ ѕлонра́внїи. Мы́ же, мч҃ниче хрⷭ҇то́въ пресла́вный, съ любо́вїю провожда́юще тѧ̀ на мѣ́стѡ бл҃же́нныѧ кончи́ны твоеѧ̀, прославлѧ́емъ мꙋ́жество твоѐ, велегла́снѡ глаго́лѧ:
Ра́дꙋйсѧ, пе́рвый въ мꙋ́ченицѣхъ, кро́вїю свое́ю вѣ́рꙋ во хрⷭ҇та̀ распѧ́тагѡ запечатлѣ́вый: ра́дꙋйсѧ, свое́ю кро́вїю зе́млю ѡ҆ст҃и́вый.
Ра́дꙋйсѧ, ꙗ҆́кѡ и҆ сами́хъ а҆пⷭ҇лѡвъ по́двигомъ мꙋ́ченическимъ предвари́лъ є҆сѝ: ра́дꙋйсѧ, ꙗ҆́кѡ за собо́ю ты́сѧщи и҆ тьмы̀ те́мъ мꙋ́чєникъ и҆ мꙋ́ченицъ за сла́вное и҆́мѧ хрⷭ҇то́во приве́лъ є҆сѝ.
Ра́дꙋйсѧ, ꙗ҆́кѡ за гдⷭ҇омъ і҆и҃сомъ хрⷭ҇то́мъ безбоѧ́зненнѡ ше́ствовалъ є҆сѝ, и҆ поноше́нїе є҆гѡ̀ сла́внѡ поне́слъ є҆сѝ: ра́дꙋйсѧ, свѣ́томъ страда́нїй твои́хъ блиста́ѧйсѧ.
Ра́дꙋйсѧ, тѣ́мже свѣ́томъ и҆ на́мъ пꙋ́ть ко хрⷭ҇тꙋ̀ вѣ́рнѡ показꙋ́ющїй: ра́дꙋйсѧ, свѣти́льниче пресвѣ́тлый бж҃їимъ несозда́ннымъ свѣ́томъ ѡ҆заре́нный.
Ра́дꙋйсѧ, тьмꙋ̀ невѣ́рїѧ и҆ всѧ́кїѧ нечистоты̀ свѣ́томъ вѣ́ры твоеѧ̀ разгонѧ́ющїй: ра́дꙋйсѧ, свѣ́тлыхъ селе́нїй ра́йскихъ ѡ҆бита́телю.
Ра́дꙋйсѧ, потемне́нныѧ и҆ спѧ́щїѧ со́вѣсти на́шеѧ до́брый пробꙋди́телю: ра́дꙋйсѧ, ꙗ҆́кѡ тобо́ю бл҃гоче́стнѡ и҆́мѧ хрⷭ҇то́во прославлѧ́етсѧ.
Ра́дꙋйсѧ, а҆пⷭ҇ле хрⷭ҇то́въ, первомꙋ́чениче и҆ а҆рхїдїа́коне стефа́не.
Конда́къ в҃і
Блгⷣть бж҃їѧ вои́стиннꙋ спребыва́ше тебѣ̀ сла́вный а҆пⷭ҇ле и҆ первомꙋ́чениче хрⷭ҇то́въ стефа́не, крⷭ҇тнꙋю бо сме́рть на голго́ѳѣ сп҃са гдⷭ҇а, въ рꙋ́цѣ ѻ҆ц҃а̀ своегѡ̀ дх҃ъ сво́й преда́вшагѡ, воспомина́ѧ, моли́лсѧ и҆ глаго́лалъ є҆сѝ, ка́менїємъ ѿ рꙋ́къ беззако́нныхъ побива́емь: гдⷭ҇и і҆и҃се прїимѝ дх҃ъ мо́й. Мл҃твꙋ же сп҃си́телѧ ѡ҆ распина́телѣхъ свои́хъ въ се́рдцѣ свое́мъ носѧ̀, прекло́нь колѣ̑на возопи́лъ є҆сѝ гла́сомъ ве́лїимъ: гдⷭ҇и не поста́ви и҆̀мъ грѣха̀ сегѡ̀. И҆ съ се́ю мл҃твою сла́вное земно́е по́прище твоѐ сконча́лъ є҆сѝ. Мы́ же восхвалѧ́ѧ таково́е свѣ́тлое ᲂу҆спе́нїе твоѐ, гдⷭ҇ꙋ бг҃ꙋ да́вшемꙋ тебѣ̀ блгⷣть сн҃ꙋ бж҃їю въ кончи́нѣ твое́й ᲂу҆подо́битисѧ, и҆з̾ глꙋбины̀ дꙋшѝ вопїе́мъ: А҆ллилꙋ́їа.
І҆́косъ в҃і
Пою́ще сла́вное житїѐ твоѐ, восхвалѧ́юще а҆пⷭ҇льскїѧ трꙋды̀ твоѧ̑, ᲂу҆ми́льнѡ воспомина́юще бл҃же́ннꙋю во хрⷭ҇тѣ̀ кончи́нꙋ твою̀, до́блестный первомꙋ́чениче хрⷭ҇то́въ и҆ а҆рхїдїа́коне стефа́не, мо́лимъ тѧ̀: дх҃ъ непоколеби́мой вѣ́ры пра́вой и҆спросѝ на́мъ ѿ гдⷭ҇а и҆ сп҃са на́шегѡ, се́рдце чи́стое и҆ сокрꙋше́нное да пребꙋ́детъ въ на́съ вы́нꙋ, а҆пⷭ҇льскꙋю ре́вность въ про́повѣди є҆ѵⷢ҇лїа возгрѣва́й въ на́съ, да та́кѡ бꙋ́демъ гото́вы всѧ̑кїѧ скѡ́рби за сладча́йшагѡ і҆и҃са терпѣ́ти, и҆ тебѐ сла́внаго первомꙋ́ченика, восхвалѧ́ти си́це:
Ра́дꙋйсѧ, вели́кїй хрⷭ҇то́въ а҆пⷭ҇ле: ра́дꙋйсѧ, па́стырємъ цр҃кви хрⷭ҇то́вы свѣ́тлый ѡ҆́бразе.
Ра́дꙋйсѧ, вѣ́рный хрⷭ҇то́въ свидѣ́телю: ра́дꙋйсѧ, сла́вы бж҃їѧ пла́менный ревни́телю.
Ра́дꙋйсѧ, до́брый вдови́цъ пита́телю: ра́дꙋйсѧ, неща́дный лицемѣ́рїѧ и҆скорени́телю: ра́дꙋйсѧ, и҆́стины хрⷭ҇то́вы крѣ́пкїй и҆сповѣ́дниче.
Ра́дꙋйсѧ, въ тѧ́жкихъ ѡ҆би́дахъ на́шъ тве́рдый застꙋ́пниче: ра́дꙋйсѧ, хрⷭ҇тꙋ̀ гдⷭ҇ꙋ всего̀ себѐ посвѧти́вый.
Ра́дꙋйсѧ, въ кончи́нѣ твое́й вседꙋ́шнѡ хрⷭ҇то́въ ᲂу҆ч҃ни́къ ꙗ҆ви́выйсѧ: ра́дꙋйсѧ, стрⷭ҇тоте́рпче неѕло́бивый.
Ра́дꙋйсѧ, ᲂу҆бі́йцамъ твои́мъ млⷭ҇ти бж҃їей и҆ проще́нїѧ, ди́вный хода́таю. Ра́дꙋйсѧ, а҆пⷭ҇ле хрⷭ҇то́въ, первомꙋ́чениче и҆ а҆рхїдїа́коне стефа́не.
Конда́къ г҃і
Ѽ, вели́кїй а҆пⷭ҇ле хрⷭ҇то́въ первомꙋ́чениче и҆ а҆рхїдїа́коне стефа́не! Прїимѝ сїѐ ма́лое, въ похвалꙋ̀ тебѣ̀ соста́вленное, моле́нїе на́ше и҆, ꙗ҆́кѡ ве́лїй ᲂу҆ч҃ни́къ сладча́йшагѡ сн҃а человѣ́ческагѡ, сп҃си́телѧ на́шегѡ, ст҃ы́ми твои́ми мл҃твами споспѣ́шествꙋй и҆ на́мъ до́брыми ᲂу҆ченика́ми гдⷭ҇а бы́ти: да ѡ҆ є҆гѡ̀ вѣ́чной сла́вѣ помышлѧ́юще, всѧ́кагѡ ѕла̀ и҆ въ се́й и҆ въ бꙋ́дꙋщей жи́зни и҆збѣ́гнемъ, и҆ вы́нꙋ хвале́бнꙋю пѣ́снь є҆мꙋ̀ да воспѣва́емъ: А҆ллилꙋ́їа.
Повто́ръ
Сей конда́къ глаго́лется три́жды, та́же і҆́косъ а҃-й и҆ конда́къ а҃-й.
І҆́косъ а҃
А҆гг҃лоподо́бнаѧ чтⷭ҇ота̀ твоѧ̀, серафі́мскаѧ любо́вь, и҆ вѣ́ра въ гдⷭ҇а вседержи́телѧ, содѣ́лаша тѧ̀, ст҃е стефа́не, сосꙋ́домъ и҆збра́ннымъ и҆ жили́щемъ дх҃а всест҃а́гѡ: сегѡ̀ ра́ди всѝ въ гдⷭ҇а і҆и҃са хрⷭ҇та̀ вѣ́рꙋющїи дивлѧ́хꙋсѧ ст҃о́мꙋ житїю̀ твоемꙋ̀ и҆ возглаша́хꙋ тебѣ̀ со ᲂу҆миле́нїемъ сицева̑ѧ:
Ра́дꙋйсѧ, и҆́стинный ᲂу҆ч҃ничѐ хрⷭ҇то́въ: ра́дꙋйсѧ, а҆пⷭ҇лѡмъ є҆динонра́вный.
Ра́дꙋйсѧ, дх҃а ст҃а́гѡ и҆спо́лненный: ра́дꙋйсѧ, бл҃года́тными дарова́ньми сїѧ́ющїй.
Ра́дꙋйсѧ, па́че всегѡ̀ мїрска́гѡ гдⷭ҇а возлюби́вый: ра́дꙋйсѧ, всѧ̑ кра̑снаѧ мі́ра сегѡ̀ ра́ди гдⷭ҇а ѡ҆ста́вивый.
Ра́дꙋйсѧ, нбⷭ҇ное ѻ҆те́чество взыска́вый: ра́дꙋйсѧ, а҆́гг҃лѡмъ собесѣ́дниче.
Ра́дꙋйсѧ, до́брый во́ине цр҃ѧ̀ нбⷭ҇нагѡ: ра́дꙋйсѧ, не ѡ҆бѧза́выйсѧ кꙋ́плѧми жите́йскими.
Ра́дꙋйсѧ, и҆́стинный хрⷭ҇то́въ слꙋжи́телю: ра́дꙋйсѧ, ѿ ю҆́ности до́брый и҆ вѣ́рный ра́бе хрⷭ҇то́въ.
Ра́дꙋйсѧ, а҆пⷭ҇ле хрⷭ҇то́въ, первомꙋ́чениче и҆ а҆рхїдїа́коне стефа́не.
Конда́къ а҃
И҆збра́нный ѿ мно́жєства ᲂу҆чени̑къ гдⷭ҇а и҆ сп҃са на́шегѡ, ꙗ҆́кѡ и҆спо́лненный вѣ́ры, дх҃а ст҃а и҆ премꙋ́дрости, на слꙋже́нїе вдови́цамъ: мл҃твою и҆ возложе́нїемъ рꙋ́къ а҆пⷭ҇льскихъ ꙗ҆ви́лсѧ є҆сѝ пе́рвый во дїа́конѣхъ, и҆ та́кѡ въ се́мъ чи́нѣ гдⷭ҇ꙋ да́же до сме́рти мч҃нческїѧ послꙋжи́лъ є҆сѝ. Но ꙗ҆́кѡ и҆мѣ́ѧй ве́лїе дерзнове́нїе ко гдⷭ҇ꙋ, ѿ всѧ́кихъ на́съ смертоно́сныхъ бѣ́дъ и҆ скорбе́й свобожда́й, да съ любо́вїю зове́мъ тѝ:
Ра́дꙋйсѧ, а҆пⷭ҇ле хрⷭ҇то́въ, первомꙋ́чениче и҆ а҆рхїдїа́коне стефа́не.
Моли́твы
Ѽ, вели́кїй первомꙋ́чениче хрⷭ҇то́въ, а҆пⷭ҇ле и҆ а҆рхїдїа́коне стефа́не! Тебѣ̀, ꙗ҆́кѡ вѣ́рномꙋ хрⷭ҇то́вꙋ подража́телю, прино́симъ мы̀ грѣ́шнїи моли̑твы своѧ̑ недостѡ́йныѧ, твоемꙋ̀ ми́лостивомꙋ предста́тельствꙋ ѡ҆ на́съ пред̾ прⷭ҇то́ломъ бж҃їимъ те́плѣ вѣ́рꙋюще. Ты̀, є҆щѐ жи́въ, печа́ть гдⷭ҇а і҆и҃са хрⷭ҇та̀ въ себѣ̀ всегда̀ и҆мѣ́лъ є҆сѝ, не то́кмѡ свои́ми добродѣ́тельми, зна́меньми и҆ чꙋдеса́ми, и҆з̾ѡби́льнѡ тобо́ю соверша́емыми, сїю̀ показꙋ́ѧ, но ꙗ҆́внѡ на лицѣ̀ твое́мъ сїѧ́ющемъ, ꙗ҆́кѡ лицѐ а҆́гг҃ла, печа́ть блгⷣти бж҃їѧ носи́лъ є҆сѝ. Сла́вꙋ бж҃їю и҆ сладча́йшагѡ і҆и҃са, стоѧ́ща ѡ҆деснꙋ́ю бг҃а, твои́ма тѣле́сныма ѻ҆чи́ма ᲂу҆зрѣ́лъ є҆сѝ, дх҃омъ ст҃ы́мъ ѡ҆сїѧва́емый. Є҆ще́ же печа́ть бжⷭ҇тва̀, въ тебѣ̀ пребыва́ющꙋю, ꙗ҆́внѡ показа́лъ є҆сѝ все́й вселе́ннѣй, є҆гда̀ въ сме́ртный мꙋ́ченическїй ча́съ тво́й не то́кмѡ ѡ҆ всѣ́хъ лю́дѣхъ, но и҆ ѡ҆ вразѣ́хъ ᲂу҆се́рднѡ моли́лсѧ є҆сѝ, мл҃твꙋ сн҃а бж҃їѧ на крⷭ҇тѣ̀ воспомина́ѧ. Сїю̀ печа́ть бжⷭ҇тва̀ въ себѣ̀ бога́тѡ но́сиши, и҆ скорбьмѝ прибѣга́ющихъ къ тебѣ̀ ви́диши, и҆ къ прⷭ҇то́лꙋ бж҃їю мл҃твꙋ ѡ҆ си́хъ ᲂу҆се́рднѡ прино́сиши. Пода́ждь и҆ на́мъ, бг҃ови́дче пресла́вный, хрⷭ҇та̀ сп҃си́телѧ на́шегѡ всѣ́мъ се́рдцемъ люби́ти, во́лю є҆гѡ̀ вседꙋ́шнѡ и҆сполнѧ́ти, во и҆́мѧ хрⷭ҇то́во всѧ̑ скѡ́рби съ терпѣ́нїемъ носи́ти: и҆ не то́кмѡ ѡ҆ при́сныхъ, но и҆ ѡ҆ всѣ́хъ лю́дѣхъ, и҆ ѡ҆ вразѣ́хъ свои́хъ, ᲂу҆се́рднѡ моли́тисѧ: да и҆ на́ши грѣхѝ покры́етъ гдⷭ҇ь твои́ми те́плыми мл҃твами, наипа́че же бл҃года́тїю и҆ чл҃вѣколю́бїемъ и҆ млⷭ҇рдїемъ свои́мъ: ꙗ҆́кѡ томꙋ̀ подоба́етъ всѧ́каѧ сла́ва, че́сть и҆ поклоне́нїе, ѻ҆ц҃ꙋ̀ и҆ сн҃ꙋ и҆ ст҃о́мꙋ дх҃ꙋ, ны́нѣ и҆ при́снѡ, и҆ во вѣ́ки вѣкѡ́въ, а҆ми́нь.