Сей убо блаженный и приснопамятный отец Афанасий, которого града или веси отечество имяше, и рождение и воспитание, и какого чина и каких родителей, о сем известного ведения не обретается, долголетнего ради пришествия, понеже без писания быта; но токмо по повестим от некиих жителей древних сказуется о нем; яко в давних годах прииде сей святый от предел Великого Нова-Града, от страны Каргопольския в Важеские пределы, в весь, нарицаемую слободку Верхоледскую, и отиде оттуда из веси три версты и ту разболеся болезнию тяжкою и ляже ту и преставися в вечную жизнь, тело же его святое лежание ту на земли непогребенно и небрегомо и поврежденно никим (понеже то место пусто в лесе) 40 дней.

И явися он Праведный Афанасий неким четырем человеком разных весей, болящим различными болезнями, и исцели их явлением своим, и повеле им тело свое погребети ту, идеже лежаше; они же болящии прияша от недуг своих облегчение, и снидоша веи вкупе во един час, яко по согласию и погребоша его ту, идеже сам святой повеле им, и поставиша над ним часовню, и тако тии болящии цельбу получиша, возвратишася в домы своя радующеся, благодаряще Бога и угодника Его Праведного Афанасия, прославляюще повсюду, оттоле же убо не токмо окрест ту близ живущий человецы, иже в напастех и скорбех одержим ни молящеся ему и на помощь его призывающе и припадающе покланяются образу его, и персть от святых мощей у гроба его взимающе и тою яко миром помазующе вся болезни, и молитвами Его о Бозе здравие приемлют благодаряще Бога, и преславная чудеса его везде прославляюще, якоже писано явственно в чудесех его.