Преподо́бне о́тче наш И́ове, моли́твою твое́ю, и ве́рою, и любо́вию, и чистото́ю се́рдца еще́ на земли́ во оби́тель предве́чнаго Бо́га Сло́ва ду́шу твою́ устро́ивый, и ме́чным от разбо́йник усече́нием главы́ твоея́ житие́ запечатле́вый, по отше́ствии же твое́м от земны́х наипа́че к Бо́гу прибли́живыйся, но и от нас ду́хом любве́ твоея́ не отступи́вый, и честны́я твоя́ мо́щи, я́ко сосу́д благода́ти по́лный, нам оста́вивый. Ве́лие име́я дерзнове́ние ко Всеми́лостивому Влады́це, моли́ Его́ спасти́ ны ве́рующия и к тебе́ с любо́вию и те́плою моли́твою притека́ющия. Испроси́ нам от великодарови́таго Бо́га на́шего вся́кий дар, кому́ждо благопотре́бен во спасе́ние, ве́ры непоро́чны соблюде́ние, гра́дов на́ших утвержде́ние, ми́ра умире́ние, от наше́ствия иноплеме́нных избавле́ние, от гла́да и па́губы сохране́ние, младе́нцем воспита́ние, ю́ным наставле́ние, сирота́м и вдови́цам заступле́ние, скорбя́щим утеше́ние; по мо́рю пла́вающим, хла́дныя пусты́ни и те́мныя де́бри преходя́щим ве́рное ко прита́нищу приведе́ние; неду́гующим исцеле́ние, бесны́м от де́монскаго наше́ствия свобожде́ние, па́дшим во грехи́ покая́ние и возста́ние, от Це́ркве Христо́вы отпа́дшим вразумле́ние и на путь спасе́ния возвраще́ние, подвиза́ющимся укрепле́ние, благоде́лающим в де́лех благи́х преспе́яние и благослове́ние, отходя́щим от сего́ вре́меннаго жития́ к ве́чному благо́е напу́тствие, отше́дшим блаже́нное упокое́ние. О свяще́нная главо́! Посети́ ме́сто сие́ свято́е, дре́вле кро́вию твое́ю честно́ю обагре́нное и омове́нное; соблюди́ и укрепи́ моли́твами твои́ми оби́тель твою́, расшири́ ю́, украси́ доброде́тельми жи́тельствующих в ней, и вся притека́ющия к тебе́ до́бре сохрани́ во ве́ки веко́в. Ами́нь.

О преподо́бне и богоно́сне о́тче наш И́ове! Ве́лие име́я к Бо́гу дерзнове́ние, моли́ся непреста́нно о всех нас, зане́ бу́ря мно́гих бед и скорбе́й одержи́т ны: се бо неду́зи теле́сныи, боле́зни душе́вныя, прираже́ния вра́жия обурева́ют ны; хо́дит бо враг наш, и́щий кого́ поглоти́ти. Мы же о спасе́нии на́шем неради́ще, не́смы досто́йни ни́же воззре́ти на высоту́ Небе́сную, ни Го́спода в по́мощь свою́ призва́ти. Но ты бу́ди нам помо́щник во спасе́ние ско́рый, и от зол изба́витель неодоли́мый. Пода́ждь нам па́мять сме́ртную, сле́зы покая́ния и наде́жду спасе́ния, да не во отча́яние впаде́м, ни́же де́рзостным на милосе́рдие Бо́жие упова́нием, во гресе́х же пребыва́нием, в коне́ц себе́ погуби́м. Но да бу́дет нам па́мять грехо́в на́ших во исто́чник те́плых слез и сокруше́ния серде́чнаго; милосе́рдие же Бо́жие и благода́ть Его́ во спасе́ние на́ше моли́твами твои́ми да пода́стся нам, твои́м ча́дом, во ве́ки веко́в. Ами́нь.

О преподо́бне и богоно́сне о́тче наш И́ове! Предстоя́ Престо́лу Пресвяты́я Тро́ицы, моли́ся непреста́нно о вели́цей держа́ве Росси́йстей и наро́де ея́, о святе́й Це́ркви на́шей, и всех правосла́вных христиа́нех: да хо́дим ки́йждо досто́йно зва́ния на́шего, в не́мже зва́ни бы́хом; и да бу́дет земля́ на́ша земля́ добра́, и вси живу́щии на ней род избра́н, ца́рское свяще́ние, язы́к свят, лю́дие обновле́ния, ны́не и при́сно, и во ве́ки веко́в. Ами́нь.