Российская Православная Церковь

по благословенію Архіерейскаго Сѵнода Россійской Православной Церкви

Православный календарь

Ака́ѳістъ

А҆ка́ѳїстъ сщ҃енномч҃нкꙋ і҆гна́тїю бг҃оно́сцꙋ

Свщмч. Игнатия Богоносца, патр. Антиохийского (107) 2 января 2026

Конда́къ а҃

И҆збра́нный страстоте́рпче и҆ и҆збра́нниче хрⷭ҇то́въ, ст҃и́телю і҆гна́тїе, похва́льнаѧ прино́симъ тѝ пѣ́нїѧ. ты̀ же, предстоѧ́й со а҆́гг҃лы ᲂу҆ прⷭ҇то́ла всевы́шнѧгѡ, не преста́й моли́тисѧ ѡ҆ на́съ, ᲂу҆се́рднѡ вопїю́щихъ тѝ:

Ра́дꙋйсѧ, бг҃оно́сный і҆гна́тїе, вели́кїй и҆ пресла́вный страстоте́рпче.

І҆́косъ а҃

А҆́гг҃лѡмъ ᲂу҆подо́билсѧ є҆сѝ, є҆гда̀ гдⷭ҇ь, прїе́мъ тѧ̀ на своѝ пречⷭ҇тыѧ рꙋ́цѣ, поста́ви тѧ̀ посредѣ̀ ᲂу҆чени̑къ свои́хъ, и҆ возло́жь рꙋ́кꙋ свою̀ на твою̀ главꙋ̀, речѐ и҆́мъ: а҆́ще не ѡ҆брати́тесѧ и҆ бꙋ́дите ꙗ҆́кѡ дѣ́ти, не вни́дите въ црⷭ҇твїе бж҃їе. сегѡ̀ ра́ди, прекло́ньше колѣ̑на, вопїе́мъ тѝ:

Ра́дꙋйсѧ, бг҃омъ носи́мый: ра́дꙋйсѧ, ꙗ҆́кѡ бг҃а вы́нꙋ въ се́рдце свое́мъ и҆мѣ́лъ є҆сѝ.

Ра́дꙋйсѧ, ра́бе благі́й и҆ вѣ́рный: ра́дꙋйсѧ, мꙋ́жꙋ жела́нїй.

Ра́дꙋйсѧ, ꙗ҆́кѡ ѿ ю҆́ности хрⷭ҇та̀ всѣ́мъ се́рдцемъ возлюби́лъ є҆сѝ: ра́дꙋйсѧ, ꙗ҆́кѡ всецѣ́лѡ є҆мꙋ̀ преда́лсѧ є҆сѝ.

Ра́дꙋйсѧ, бг҃оно́сный і҆гна́тїе, вели́кїй и҆ пресла́вный страстоте́рпче.

Конда́къ в҃

Ви́дѧще бл҃гоче́стное житїѐ ст҃а́гѡ і҆ѡа́нна бг҃осло́ва, ᲂу҆чи́телѧ твоегѡ̀, жела́нїемъ возжела́лъ є҆сѝ вкꙋ́пѣ съ ни́мъ послꙋжи́ти гдⷭ҇ꙋ, проповѣ́дꙋѧ ст҃о́е є҆ѵⷢ҇лїе лю́демъ, сѣдѧ́щымъ во тьмѣ̀ и҆ сѣ́ни сме́ртнѣй, и҆ наꙋча́ѧ и҆́хъ пѣ́ти є҆ди́номꙋ и҆́стинномꙋ бг҃ꙋ: А҆ллилꙋ́їа.

І҆́косъ в҃

Разꙋмѣ́въ дꙋ́хомъ, ꙗ҆́кѡ а҆́гг҃ли на нб҃сѝ сла́вѧтъ бг҃а во ст҃ѣ́й трⷪ҇це, творца̀ не́ба и҆ землѝ, дрꙋ́гъ ко дрꙋ́гꙋ взыва́юще: свѧ́тъ, свѧ́тъ, свѧ́тъ гдⷭ҇ь саваѡ́ѳъ, ты̀ и҆ въ земно́й це́ркви ᲂу҆ста́вилъ є҆сѝ та́кожде пѣ́ти. сегѡ̀ ра́ди, со ᲂу҆миле́нїемъ взыва́емъ тѝ:

Ра́дꙋйсѧ, цр҃кви бж҃їей сто́лпе и҆ ᲂу҆твержде́нїе: ра́дꙋйсѧ, свѣти́льниче правосла́вїѧ.

Ра́дꙋйсѧ, ꙗ҆́кѡ бы́лъ є҆сѝ є҆пⷭ҇копомъ цр҃кви, и҆дѣ́же пе́рвѣе и҆́мѧ хрⷭ҇тїа́нъ нарече́сѧ: ра́дꙋйсѧ, ꙗ҆́кѡ ѿ а҆пⷭ҇лѡвъ первоверхо́вныхъ рꙋкоположе́нїе прїѧ́ти сподо́билсѧ є҆сѝ.

Ра́дꙋйсѧ, ꙗ҆́кѡ ᲂу҆досто́илсѧ є҆сѝ зрѣ́ти ст҃ы́ѧ а҆́гг҃лы, сла́вѧщыѧ бг҃а: ра́дꙋйсѧ, ꙗ҆́кѡ ны́нѣ и҆ са́мъ со а҆́гг҃лы сла́виши гдⷭ҇а.

Ра́дꙋйсѧ, бг҃оно́сный і҆гна́тїе, вели́кїй и҆ пресла́вный страстоте́рпче.

Конда́къ г҃

Си́ла вы́шнѧгѡ ᲂу҆крѣпѝ тѧ̀, ст҃ы́й і҆гна́тїе, є҆гда̀ предста́въ траѧ́нꙋ, не ᲂу҆боѧ́лсѧ є҆сѝ преще́нїѧ царе́ва, но мꙋ́жественнѡ и҆сповѣ́далъ є҆сѝ хрⷭ҇та̀ бг҃а бы́ти и҆́стинна, и҆ нече́стїе ꙗ҆зы́ческое посрами́лъ є҆сѝ, вѣ́рныѧ же наꙋчи́лъ є҆сѝ бг҃ꙋ воспѣва́ти: А҆ллилꙋ́їа.

І҆́косъ г҃

И҆мѣ́ѧ блгⷣть ѿ гдⷭ҇а просвѣща́ти лю́ди бж҃їѧ, ты̀ наставлѧ́лъ є҆сѝ ѧ҆̀ къ ра́зꙋмꙋ бжⷭ҇твенномꙋ сло́вомъ, па́че же житїе́мъ, ѡ҆́бразъ бы́въ любо́вїю, дꙋ́хомъ, вѣ́рою, чистото́ю и҆ смире́нїемъ. сегѡ̀ ра́ди воспѣва́емъ тѝ:

Ра́дꙋйсѧ, ꙗ҆́кѡ и҆́мѧ бж҃їе проне́слъ є҆сѝ пред̾ царѝ и҆ ꙗ҆зы́ки: ра́дꙋйсѧ, ꙗ҆́кѡ до́брѣ ᲂу҆па́слъ є҆сѝ па́ствꙋ твою̀.

Ра́дꙋйсѧ, смире́нїемъ стѧжа́вый высо́каѧ: ра́дꙋйсѧ, нището́ю прїѡбрѣты́й бога́таѧ.

Ра́дꙋйсѧ, а҆пⷭ҇льскихъ преда́нїй храни́телю: ра́дꙋйсѧ, цр҃кви бж҃їей вѣ́рный стра́же и҆ мꙋ́дрый строи́телю.

Ра́дꙋйсѧ, бг҃оно́сный і҆гна́тїе, вели́кїй и҆ пресла́вный страстоте́рпче.

Конда́къ д҃

Бꙋ́рю ѕло́бы и҆мѣ́ѧ въ се́рдце свое́мъ траѧ́нъ, призва́въ тѧ̀, съ гнѣ́вомъ вопросѝ: ты̀ ли є҆сѝ бг҃оно́сецъ; почто̀ лю́ди моѧ̑ развраща́еши; ты̀ же ѿвѣща́лъ є҆сѝ: а҆́зъ є҆́смь бг҃оно́сецъ, но лю́ди твоѧ̑ не развраща́ю, а҆ спаса́ю. кто̀ не ᲂу҆бл҃жи́тъ сїѐ твоѐ и҆сповѣ́данїе вѣ́ры; мы̀ же, велича́юще тѧ̀, бг҃ꙋ воспѣва́емъ: А҆ллилꙋ́їа.

І҆́косъ д҃

Слы́шавше лю́дїе вѣ́рнїи твоѐ и҆сповѣ́данїе, сла́вѧхꙋ бг҃а, траѧ́нъ же, скреже́ща зꙋбы̑ свои́ми, па́ки вопросѝ тѧ̀: почто̀ зове́шисѧ бг҃оно́сецъ; ты̀ же ре́клъ є҆сѝ: ꙗ҆́кѡ бг҃а моегѡ̀ въ се́рдце свое́мъ ношꙋ̀. сегѡ̀ ра́ди воспѣва́емъ тѧ̀ си́це:

Ра́дꙋйсѧ, вѣ́рный во́ине цр҃ѧ̀ нбⷭ҇нагѡ: ра́дꙋйсѧ, побо́рниче вѣ́ры непобѣди́мый.

Ра́дꙋйсѧ, па́стырю до́брый: ра́дꙋйсѧ, мл҃твенниче ѡ҆ дꙋша́хъ на́шихъ.

Ра́дꙋйсѧ, ꙗ҆́кѡ бжⷭ҇твеннымъ дх҃омъ просвѣще́нъ, свирѣ́пство мꙋчи́телѧ па́стырскимъ дерзнове́нїемъ посрами́лъ є҆сѝ: ра́дꙋйсѧ, ꙗ҆́кѡ наставлѧ́ѧ ста́до хрⷭ҇то́во, мно́гихъ свѣ́томъ бг҃оразꙋ́мїѧ просвѣти́лъ є҆сѝ.

Ра́дꙋйсѧ, бг҃оно́сный і҆гна́тїе, вели́кїй и҆ пресла́вный страстоте́рпче.

Конда́къ є҃

Всѧ̑ кра̑снаѧ мі́ра въ ᲂу҆мє́ты вмѣнѧ́ѧ, да хрⷭ҇та̀ прїѡбрѧ́щеши, кто̀ ны̀ разлꙋчи́тъ ѿ любвѐ бж҃їѧ, вопїѧ́лъ є҆сѝ, і҆гна́тїе, сладка̀ мнѣ̀ ско́рбь, любе́зны ᲂу҆́зы за жела́емаго, гоне́нїѧ мѝ сла́ждша па́че ѻ҆те́чества, болѣ̑зни па́че здра̑вїѧ тѣле́снагѡ. мы̀ же, сла́внꙋю па́мѧть твою̀ чтꙋ́ще, пое́мъ бг҃ꙋ: А҆ллилꙋ́їа.

І҆́косъ є҃

Ви́дѧ тѧ̀ и҆сповѣ́дника вѣ́ры хрⷭ҇то́вы непобѣди́ма, ѡ҆сꙋдѝ тѧ̀ безбо́жный траѧ́нъ на сме́рть: ты̀ же, ра́дꙋѧсѧ, возопи́лъ є҆сѝ: сладка̀ мнѣ̀ сме́рть, мнѣ̀ є҆́же жи́ти хрⷭ҇то́съ, и҆ є҆́же ᲂу҆мре́ти прїѡбрѣ́тенїе є҆́сть: къ немꙋ̀ и҆дꙋ̀, того̀ люблю̀, того̀ полꙋчи́ти надѣ́юсѧ. сегѡ̀ ра́ди ᲂу҆блажа́емъ тѧ̀, ст҃ы́й і҆гна́тїе, си́це:

Ра́дꙋйсѧ, жела́нїе и҆мѣ́вый разрѣши́тисѧ и҆ со хрⷭ҇то́мъ бы́ти: ра́дꙋйсѧ, же́ртва бг҃ꙋ чи́ста.

Ра́дꙋйсѧ, подража́телю хрⷭ҇то́выхъ стрⷭ҇те́й: ра́дꙋйсѧ, ꙗ҆́кѡ хрⷭ҇то́ви сораспѧ́лсѧ є҆сѝ.

Ра́дꙋйсѧ, ꙗ҆́кѡ кро́вь за хрⷭ҇та̀ и҆злїѧ́лъ є҆сѝ: ра́дꙋйсѧ, ꙗ҆́кѡ кро́вїю свое́ю ст҃и́тельскꙋю ѡ҆де́ждꙋ ᲂу҆краси́лъ є҆сѝ.

Ра́дꙋйсѧ, бг҃оно́сный і҆гна́тїе, вели́кїй и҆ пресла́вный страстоте́рпче.

Конда́къ ѕ҃

Проповѣ́дникъ терпѣ́нїѧ, бг҃оно́сный і҆гна́тїе, ꙗ҆ви́лсѧ є҆сѝ, є҆гда̀ съ ра́достїю ᲂу҆слы́шалъ є҆сѝ ѡ҆сꙋжде́нїе своѐ на растерза́нїе лю́тыми ѕвѣрьмѝ. ᲂу҆блажа́ѧ твоѐ тве́рдое и҆ неꙋстраши́мое и҆сповѣ́данїе вѣ́ры, и҆ дивѧ́щесѧ ве́лїей блгⷣти, въ тебѣ̀ пребыва́ющей, пое́мъ бг҃ꙋ а҆́гг҃льскꙋю пѣ́снь: А҆ллилꙋ́їа.

І҆́косъ ѕ҃

Возсїѧ́лъ є҆сѝ ꙗ҆́кѡ со́лнце, ᲂу҆го́дниче бж҃їй, красото́ю дꙋшѝ твоеѧ̀, є҆гда̀ во́ины возлага́хꙋ на тѧ̀ ᲂу҆́зы, ты̀ же, ꙗ҆́кѡ ри́зꙋ сп҃се́нїѧ и҆ ѡ҆де́ждꙋ весе́лїѧ прїѧ́лъ є҆сѝ сїѐ но́вое мꙋче́нїе, и҆ на страда́нїе въ ри́мъ, а҆́ки на бра́чный пи́ръ ше́ствовалъ є҆сѝ. сегѡ̀ ра́ди воспѣва́емъ тѝ:

Ра́дꙋйсѧ, цр҃кви антїохі́йскїѧ сла́во: ра́дꙋйсѧ, бг҃омꙋ́дрыхъ ѻ҆ц҃є́въ красото̀ и҆ ᲂу҆добре́нїе.

Ра́дꙋйсѧ, цѣвни́це дх҃а ст҃а́гѡ: ра́дꙋйсѧ, во́ине хрⷭ҇то́въ непобѣди́мый.

Ра́дꙋйсѧ, ꙗ҆́кѡ го́рдость траѧ́новꙋ низложи́лъ є҆сѝ: ра́дꙋйсѧ, ꙗ҆́кѡ дїа́вола посрами́лъ є҆сѝ.

Ра́дꙋйсѧ, бг҃оно́сный і҆гна́тїе, вели́кїй и҆ пресла́вный страстоте́рпче.

Конда́къ з҃

Хотѧ̀, ст҃и́телю хрⷭ҇то́въ, и҆зы́ти ѿ а҆нтїохі́и, прилѣ́жнѡ моли́лъ є҆сѝ гдⷭ҇а не ѡ҆ста́вити па́ствы твоеѧ̀. лю́дїе же пла́кахꙋ и҆ рыда́хꙋ, зрѧ́ще тѧ̀ на сме́рть ведо́ма: ты̀ же, бл҃гословлѧ́ѧ и҆́хъ, воспѣва́лъ є҆сѝ бг҃ꙋ: А҆ллилꙋ́їа.

І҆́косъ з҃

Ди́вный во ст҃ы́хъ бг҃ъ ᲂу҆тѣ́ши тѧ̀, ст҃ы́й і҆гна́тїе, є҆гда̀ на пꙋтѝ въ ри́мъ, ведо́ма тѧ̀ десѧтїю̀ во́инами, срѣ́те вы̀ въ смѵ́рнѣ ст҃ы́й полѷка́рпъ, мꙋ́жъ првⷣный. ты̀ же, бесѣ́дꙋѧ съ ни́мъ, ра́довалсѧ є҆сѝ ѡ҆ бз҃ѣ сп҃сѣ твое́мъ. сегѡ̀ ра́ди ᲂу҆блажа́емъ тѧ̀:

Ра́дꙋйсѧ, ꙗ҆́кѡ вѣ́рꙋ во хрⷭ҇та̀ сохрани́лъ є҆сѝ: ра́дꙋйсѧ, ꙗ҆́кѡ наде́ждꙋ несꙋмнѣ́ннꙋ и҆мѣ́лъ є҆сѝ.

Ра́дꙋйсѧ, ꙗ҆́кѡ и҆́мѧ хрⷭ҇то́во во все́й вселе́ннѣй просла́вилъ є҆сѝ: ра́дꙋйсѧ, ꙗ҆́кѡ ᲂу҆гото́васѧ тебѣ̀ вѣне́цъ пра́вды.

Ра́дꙋйсѧ, вѣ́рный слꙋжи́телю гдⷭ҇ень: ра́дꙋйсѧ, свѣти́льниче бж҃їй, горѧ́й и҆ свѣтѧ́й.

Ра́дꙋйсѧ, бг҃оно́сный і҆гна́тїе, вели́кїй и҆ пресла́вный страстоте́рпче.

Конда́къ и҃

Стра́ннѡ и҆ чꙋ́днѡ бѣ̀ ше́ствїе твоѐ въ ри́мъ на мѣ́сто мꙋче́нїѧ: во́ини ꙗ҆́кѡ престꙋ́пника ведѧ́хꙋ тѧ̀, лю́дїе же бж҃їи со є҆пі́скопы и҆ пресвѵ́теры ꙗ҆́кѡ а҆́гг҃ла бж҃їѧ срѣта́хꙋ тѧ̀, и҆, сла́достнѡ послꙋ́шаѧ слове́съ твои́хъ, воспѣва́хꙋ бг҃ꙋ: А҆ллилꙋ́їа.

І҆́косъ и҃

Жела́нїе и҆мы́й разрѣши́тисѧ и҆ со хрⷭ҇то́мъ бы́ти, ты̀, ше́ствꙋѧ въ ри́мъ на страда̑нїѧ, ра́достнѡ воспѣва́лъ є҆сѝ: пшени́ца бж҃їѧ є҆́смь: да бꙋ́дꙋ зꙋбы̑ ѕвѣре́й сотре́нъ и҆ чи́стъ хлѣ́бъ бг҃ꙋ ꙗ҆влю́сѧ. сегѡ̀ ра́ди дивѧ́щесѧ терпѣ́нїю твоемꙋ̀ и҆ сла́вѧще бж҃їе ѡ҆ тебѣ̀ смотре́нїе, воспѣва́емъ си́це:

Ра́дꙋйсѧ, ѡ҆́бразе мꙋ́жества и҆ терпѣ́нїѧ: ра́дꙋйсѧ, непоколеби́мое пра́вило вѣ́ры и҆ бл҃гоче́стїѧ.

Ра́дꙋйсѧ, непобѣди́мый и҆сповѣ́дниче хрⷭ҇то́въ: ра́дꙋйсѧ, ꙗ҆́кѡ не ᲂу҆боѧ́лсѧ є҆сѝ ни ѻ҆гнѧ̀, ни меча̀, нижѐ зꙋбѡ́въ рыка́ющихъ львѡ́въ.

Ра́дꙋйсѧ, ꙗ҆́кѡ терпе́нїемъ свои́мъ а҆́гг҃лѡвъ бж҃їихъ возвесели́лъ є҆сѝ: ра́дꙋйсѧ, ꙗ҆́кѡ мꙋ́жествомъ свои́мъ и҆́мѧ хрⷭ҇тїа́нъ просла́вилъ є҆сѝ.

Ра́дꙋйсѧ, бг҃оно́сный і҆гна́тїе, вели́кїй и҆ пресла́вный страстоте́рпче.

Конда́къ ѳ҃

Всегѡ̀ себѐ преда́въ бг҃ꙋ, ты̀ страши́лсѧ є҆сѝ, да не терпѧ́щїи зрѣ́ти твои́хъ страда́нїй воспретѧ́тъ тебѣ̀ воспрїѧ́ти и҆́хъ. сегѡ̀ ра́ди писа́нїемъ ᲂу҆молѧ́лъ є҆сѝ: ѽ, возлю́бленнїи! помози́те мѝ сораспѧ́тисѧ хрⷭ҇тꙋ̀, пострада́ти и҆ ᲂу҆мре́ти за него̀, да и҆ ца́рствꙋю, и҆ живꙋ̀ съ ни́мъ во вѣ́ки, воспѣва́ѧ бг҃ꙋ: А҆ллилꙋ́їа.

І҆́косъ ѳ҃

Виті̑ѧ многовѣща̑нныѧ не мо́гꙋтъ по достоѧ́нїю воспѣ́ти твоѧ̑ страда̑нїѧ: сегѡ̀ ра́ди и҆ на́мъ ᲂу҆до́бѣе люби́ти молча́нїе, но побѣжда́еми любо́вїю твое́ю, ѿ и҆збы́тка се́рдца вопїе́мъ тѝ:

Ра́дꙋйсѧ, ꙗ҆́кѡ мно́гихъ ко хрⷭ҇тꙋ̀ приве́лъ є҆сѝ: ра́дꙋйсѧ, ꙗ҆́кѡ писа́нїѧми свои́ми пꙋ́ть ко сп҃се́нїю ᲂу҆ѧсни́лъ є҆сѝ.

Ра́дꙋйсѧ, ꙗ҆́кѡ жа́ждꙋщыѧ сп҃се́нїѧ напои́лъ є҆сѝ бл҃гоче́стїѧ вода́ми: ра́дꙋйсѧ, ꙗ҆́кѡ дꙋше́вными ѻ҆чи́ма ѡ҆слѣпле́нныхъ свѣ́томъ бг҃оразꙋ́мїѧ просвѣти́лъ є҆сѝ.

Ра́дꙋйсѧ, ꙗ҆́кѡ грѣхо́мъ разсла́бленныхъ воздви́глъ є҆сѝ на пꙋ́ть сп҃се́нїѧ: ра́дꙋйсѧ, ꙗ҆́кѡ скорбѧ́щыѧ и҆ пла́чꙋщыѧ ᲂу҆тѣ́шилъ є҆сѝ.

Ра́дꙋйсѧ, бг҃оно́сный і҆гна́тїе, вели́кїй и҆ пресла́вный страстоте́рпче.

Конда́къ і҃

Спастѝ хотѧ̀ дꙋ́шꙋ свою̀, ты̀, ст҃ы́й і҆гна́тїе, пламенѣ́лъ є҆сѝ серафі́мскою любо́вїю къ бг҃ꙋ: ѽ, бра́тїе, моли́лъ є҆сѝ хрⷭ҇тїа́ны, жела́йте мнѣ̀ сме́рти: ѻ҆на̀ приведе́тъ мѧ̀ ко хрⷭ҇тꙋ̀: ѕвѣ́ри мнѣ̀ ра́достни, ѻ҆́гнь роса̀ мнѣ̀, тщꙋ́сѧ ᲂу҆мре́ти, да живꙋ̀ со хрⷭ҇то́мъ. тѣ́мже всели́лсѧ є҆сѝ въ нбⷭ҇ныѧ ѡ҆би́тєли, и҆дѣ́же со а҆́гг҃лы бг҃ꙋ воспѣва́еши: А҆ллилꙋ́їа.

І҆́косъ і҃

Цр҃ь нбⷭ҇ный, ᲂу҆тѣ́шитель бл҃гі́й, дх҃ъ и҆́стины поста́ви тѧ̀ пастѝ цр҃ковь хрⷭ҇то́вꙋ, пра́во пра́вити сло́во и҆́стины, вѣ́рныѧ лю́ди поꙋча́ти, проти́вѧщыѧсѧ ѡ҆блича́ти. сегѡ̀ ра́ди зове́мъ тѝ:

Ра́дꙋйсѧ, ᲂу҆чи́телю бл҃гоче́стїѧ: ра́дꙋйсѧ, ѡ҆бличи́телю нече́стїѧ.

Ра́дꙋйсѧ, дꙋ́шꙋ свою̀ положи́вый за ѻ҆́вцы своѧ̑: ра́дꙋйсѧ, стѧжа́вый вѣне́цъ мч҃ничества.

Ра́дꙋйсѧ, непреста́ннѡ въ жи́зни моли́выйсѧ за хрⷭ҇тїа́ны: ра́дꙋйсѧ, и҆ по сме́рти за ны̀ молѧ́йсѧ.

Ра́дꙋйсѧ, бг҃оно́сный і҆гна́тїе, вели́кїй и҆ пресла́вный страстоте́рпче.

Конда́къ а҃і

Воспѣва́ѧ гдⷭ҇а и҆ непреста́ннѡ молѧ́сѧ є҆мꙋ̀, ты̀, ст҃ы́й і҆гна́тїе, поꙋча́лъ є҆сѝ и҆ ввѣ́рєнныѧ тебѣ̀ лю́ди твори́ти та́кожде: моли́тесѧ непреста́ннѡ, кро́тость ва́ша да бꙋ́детъ и҆звѣ́стна всѣ̑мъ. въ братолю́бїи пребыва́йте, да не бꙋ́дꙋтъ въ ва́съ ра́спри. подража́йте за ны̀ распѧ́томꙋ, вѣ́рꙋйте въ него̀, ѻ҆́нъ є҆́сть живо́тъ вѣ́чный: вѣ́рꙋѧй въ него̀, а҆́ще и҆ ᲂу҆́мретъ ѡ҆живе́тъ. мы̀ же, прославлѧ́ѧ бг҃а, дарова́вшаго на́мъ такова́го наста́вника, вопїе́мъ є҆мꙋ̀: А҆ллилꙋ́їа.

І҆́косъ а҃і

Ꙗ҆́кѡ со́лнце до́блестнѡ ѡ҆бте́клъ є҆сѝ зе́млю ѿ восто́къ до за́падъ, и҆ заше́дъ незаходи́мѡ ѿ землѝ ко хрⷭ҇тꙋ̀, просвѣща́ѧ мі́ръ свои́мъ ᲂу҆че́нїемъ. сегѡ̀ ра́ди взыва́емъ тѝ:

Ра́дꙋйсѧ, ᲂу҆го́дниче хрⷭ҇то́въ: ра́дꙋйсѧ, мꙋ́чениче и҆ па́стырю.

Ра́дꙋйсѧ, ско́рый въ бѣда́хъ помо́щниче: ра́дꙋйсѧ, гони́мыхъ за пра́вдꙋ защи́тниче.

Ра́дꙋйсѧ, немощны́хъ врачꙋ̀: ра́дꙋйсѧ, покро́въ и҆ застꙋпле́нїе притека́ющихъ къ тебѣ̀ съ вѣ́рою.

Ра́дꙋйсѧ, бг҃оно́сный і҆гна́тїе, вели́кїй и҆ пресла́вный страстоте́рпче.

Конда́къ в҃і

Блгⷣть ве́лїю и҆ бога́тꙋю млⷭ҇ть прїѧ́лъ є҆сѝ ѿ хрⷭ҇та̀ бг҃а на́шегѡ моли́тисѧ за всѣ́хъ, съ вѣ́рою призыва́ющихъ тѧ̀. тѣ́мже мо́лимъ тѧ̀: помозѝ на́мъ предста́тельствомъ твои́мъ ᲂу҆ гдⷭ҇а сохрани́ти въ се́рдце свое́мъ вѣ́рꙋ несꙋмнѣ́ннꙋ, ᲂу҆пова́нїе непрело́жнѡ, любо́вь къ бг҃ꙋ и҆ бли́жнемꙋ нелицемѣ́рнꙋ, по́двигомъ до́брымъ подвиза́тисѧ, воспѣва́ѧ сп҃си́телю на́шемꙋ: А҆ллилꙋ́їа.

І҆́косъ в҃і

Пою́ще по́двиги твоѧ̑, почита́емъ страда̑нїѧ твоѧ̑, восхвалѧ́емъ мꙋ́жество твоѐ, ᲂу҆бл҃жа́емъ ст҃ꙋ́ю кончи́нꙋ твою̀, и҆ прилѣ́жнѡ мо́лимъ тѧ̀: ᲂу҆слы́ши ны̀, взыва́ющыѧ тѝ:

Ра́дꙋйсѧ, тече́нїе жи́зни сла́внѡ сконча́вый: ра́дꙋйсѧ, кро́вїю свое́ю и҆́стинꙋ хрⷭ҇то́ва ᲂу҆че́нїѧ запечатлѣ́вый.

Ра́дꙋйсѧ, полꙋчи́вый ѿ хрⷭ҇та̀ вѣне́цъ пра́вды, ᲂу҆гото́ванный всѣ̑мъ возлюби́вшымъ ꙗ҆вле́нїе є҆гѡ̀: ра́дꙋйсѧ, во свѣ́тлостехъ ст҃ы́хъ всели́выйсѧ.

Ра́дꙋйсѧ, ꙗ҆́кѡ со а҆рха́гг҃лы ликовствꙋ́еши: ра́дꙋйсѧ, ꙗ҆́кѡ лицезрѣ́нїемъ бж҃їимъ наслажда́ешисѧ.

Ра́дꙋйсѧ, бг҃оно́сный і҆гна́тїе, вели́кїй и҆ пресла́вный страстоте́рпче.

Конда́къ г҃і

Ѽ многострада́льный и҆ преди́вный мч҃ниче, бг҃оно́сный і҆гна́тїе! прїимѝ ѿ на́съ недосто́йныхъ сїѐ ма́лое хвале́бное пѣ́нїе и҆ ᲂу҆молѝ бг҃а, да сохрани́тъ ны̀ и҆ защити́тъ свое́ю блгⷣтїю ѿ всѧ́кагѡ ѕла̑ въ се́й жи́зни, и҆ во вре́мѧ кончи́ны на́шеѧ не ѡ҆ста́витъ на́съ, и҆ по кончи́нѣ сподо́битъ црⷭ҇твїе нбⷭ҇ное наслѣ́довати и҆ вѣ́чнѡ воспѣва́ти є҆мꙋ̀: А҆ллилꙋ́їа.

Повто́ръ

Сей конда́къ глаго́лется три́жды, та́же і҆́косъ а҃-й и҆ конда́къ а҃-й.

І҆́косъ а҃

А҆́гг҃лѡмъ ᲂу҆подо́билсѧ є҆сѝ, є҆гда̀ гдⷭ҇ь, прїе́мъ тѧ̀ на своѝ пречⷭ҇тыѧ рꙋ́цѣ, поста́ви тѧ̀ посредѣ̀ ᲂу҆чени̑къ свои́хъ, и҆ возло́жь рꙋ́кꙋ свою̀ на твою̀ главꙋ̀, речѐ и҆́мъ: а҆́ще не ѡ҆брати́тесѧ и҆ бꙋ́дите ꙗ҆́кѡ дѣ́ти, не вни́дите въ црⷭ҇твїе бж҃їе. сегѡ̀ ра́ди, прекло́ньше колѣ̑на, вопїе́мъ тѝ:

Ра́дꙋйсѧ, бг҃омъ носи́мый: ра́дꙋйсѧ, ꙗ҆́кѡ бг҃а вы́нꙋ въ се́рдце свое́мъ и҆мѣ́лъ є҆сѝ.

Ра́дꙋйсѧ, ра́бе благі́й и҆ вѣ́рный: ра́дꙋйсѧ, мꙋ́жꙋ жела́нїй.

Ра́дꙋйсѧ, ꙗ҆́кѡ ѿ ю҆́ности хрⷭ҇та̀ всѣ́мъ се́рдцемъ возлюби́лъ є҆сѝ: ра́дꙋйсѧ, ꙗ҆́кѡ всецѣ́лѡ є҆мꙋ̀ преда́лсѧ є҆сѝ.

Ра́дꙋйсѧ, бг҃оно́сный і҆гна́тїе, вели́кїй и҆ пресла́вный страстоте́рпче.

Конда́къ а҃

И҆збра́нный страстоте́рпче и҆ и҆збра́нниче хрⷭ҇то́въ, ст҃и́телю і҆гна́тїе, похва́льнаѧ прино́симъ тѝ пѣ́нїѧ. ты̀ же, предстоѧ́й со а҆́гг҃лы ᲂу҆ прⷭ҇то́ла всевы́шнѧгѡ, не преста́й моли́тисѧ ѡ҆ на́съ, ᲂу҆се́рднѡ вопїю́щихъ тѝ:

Ра́дꙋйсѧ, бг҃оно́сный і҆гна́тїе, вели́кїй и҆ пресла́вный страстоте́рпче.

Моли́твы

Ѽ вели́кїй ст҃и́телю, бг҃оно́сный і҆гна́тїе! къ тебѣ̀ припа́даемъ и҆ мо́лимъ тѧ̀: при́зри на ны̀, грѣ́шныѧ, прибѣга́ющыѧ къ твоемꙋ̀ застꙋпле́нїю, и҆ ᲂу҆молѝ гдⷭ҇а, да прости́тъ на́мъ всѧ̑ согрѣше́нїѧ на̑ша. ты̀ мꙋ́ченически дꙋ́шꙋ твою̀ за вѣ́рꙋ положи́лъ є҆сѝ, да́рꙋй и҆ на́мъ мꙋ́жество во всѣ̑мъ подража́ти тебѣ̀. ничесѡ̀ въ жи́зни не возмогло̀ ѿлꙋчи́ти тѧ̀ ѿ любвѝ ко гдⷭ҇ꙋ: ни лє́стнаѧ ѡ҆бѣща́нїѧ, ни преще́нїѧ, ни ᲂу҆грѡ́зы, нижѐ са́мыѧ мꙋ̑ки. ты̀ съ ра́достїю предста́лъ є҆сѝ пред̾ ѕвѣрьмѝ на сме́рть лю́тꙋю, и҆ ꙗ҆́кѡ а҆́гг҃лъ возлетѣ́лъ є҆сѝ во ѡ҆би́тєли ѻ҆ц҃а̀ на́шегѡ нбⷭ҇нагѡ. сегѡ̀ ра́ди и҆ мл҃тва твоѧ̀ мно́гѡ мо́жетъ пред̾ гдⷭ҇емъ. бꙋ́ди же, ст҃ы́й ᲂу҆го́дниче, предста́телемъ за ны̀ пред̾ сп҃си́телемъ на́шимъ. помога́й всѣ̑мъ правосла̑внымъ хрⷭ҇тїа́нѡмъ ст҃ы́ми твои́ми мл҃твами ко всемогꙋ́щемꙋ бг҃ꙋ, да и҆зба́витъ ны̀ ѿ гла́да, трꙋ́са, гра́да, бездо́ждїѧ и҆ смертоно́сныхъ болѣ́зней, и҆ да да́рꙋетъ на́мъ здра́вїе и҆ сп҃се́нїе. бꙋ́ди же на́мъ помо́щникъ ско́рый во всѧ́кой ско́рби, наипа́че же въ ча́съ кончи́ны на́шеѧ ꙗ҆ви́сѧ на́мъ свѣ́тлымъ защи́тникомъ и҆ хода́таемъ, и҆ ᲂу҆молѝ гдⷭ҇а сподо́битисѧ всѣ̑мъ на́мъ, тебѣ̀ ны́нѣ те́плѣ молѧ́щымсѧ, полꙋчи́ти по хрⷭ҇тїа́нстѣй кончи́нѣ нбⷭ҇ное црⷭ҇твїе, и҆дѣ́же всѝ свѧті́и вкꙋ́пѣ съ тобо́ю сла́вѧтъ ѻ҆ц҃а̀ и҆ сн҃а и҆ ст҃а́гѡ дх҃а. А҆ми́нь.