Российская Православная Церковь

по благословенію Архіерейскаго Сѵнода Россійской Православной Церкви

Православный календарь

Ака́ѳістъ

А҆ка́ѳїстъ ст҃ѣ́й великомч҃нцѣ а҆настасі́и ᲂу҆зорѣши́тельницѣ.

Влкмчц. Анастасии Узорешительницы (ок. 304) 4 января 2026

Конда́къ а҃

И҆збра́ннѣй ᲂу҆го́дницѣ хрⷭ҇то́вой, всебл҃же́ннѣй великомч҃нцѣ а҆настасі́и похва́льное пѣ́нїе прино́симъ, ꙗ҆́кѡ и҆мꙋ́щей мно́гое дерзнове́нїе ко гдⷭ҇ꙋ є҆́же ѿ всѧ́кихъ бѣ́дъ, скорбе́й и҆ болѣ́зней свобожда́ти вѣ̑рныѧ, и҆ съ любо́вїю взыва́емъ си́це:

Ра́дꙋйсѧ, всебл҃же́ннаѧ великомч҃нце а҆настасі́е, ᲂу҆́зникѡвъ ст҃а́ѧ посѣти́тельнице и҆ мл҃твеннице ѡ҆ дꙋша́хъ на́шихъ.

І҆́косъ а҃

А҆́гг҃лѡмъ ᲂу҆подо́биласѧ є҆сѝ ра́зꙋмомъ чⷭ҇тымъ, позна́вши того̀, и҆́же є҆́сть всегѡ̀ ви́димагѡ и҆ неви́димагѡ вѣ́чное нача́ло и҆ є҆ди́ный коне́цъ жела́нїй всѣ́хъ бл҃гочести́выхъ: мы́ же, восхвалѧ́юще мꙋ́дрое ѡ҆бꙋче́нїе твоѐ ѿ ст҃а́гѡ мч҃ника хрѷсого́на, съ любо́вїю вопїе́мъ тѝ:

Ра́дꙋйсѧ, возлюби́вшаѧ вѣ́рꙋ хрⷭ҇то́вꙋ: ра́дꙋйсѧ, послѣ́довавшаѧ бл҃гоче́стїю ма́тере твоеѧ̀ фа́ѵсты.

Ра́дꙋйсѧ, соблю́дшаѧ чⷭ҇тотꙋ̀ дѣ́вства твоегѡ̀: ра́дꙋйсѧ, всегда̀ неви́димѡ ѡ҆хранѧ́емаѧ а҆́гг҃лами.

Ра́дꙋйсѧ, чⷭ҇тото́ю твое́ю къ бг҃ꙋ прибли́зившаѧсѧ.

Ра́дꙋйсѧ, всебл҃же́ннаѧ великомч҃нце а҆настасі́е, ᲂу҆́зникѡвъ ст҃а́ѧ посѣти́тельнице и҆ мл҃твеннице ѡ҆ дꙋша́хъ на́шихъ.

Конда́къ в҃

Ви́дѧщи ст҃а́ѧ а҆настасі́а, ꙗ҆́кѡ мно́зи хрⷭ҇тїа́не стра́ждꙋтъ въ темни́цѣхъ за и҆́мѧ и҆ ᲂу҆че́нїе і҆и҃съ хрⷭ҇то́во, нача́тъ со ᲂу҆се́рдїемъ слꙋжи́ти и҆̀мъ, ᲂу҆тѣша́ти же и҆ цѣли́ти ѧ҆̀, содѣ́йствꙋющꙋ бг҃ꙋ, со бл҃гоговѣ́нїемъ пою́щи: А҆ллилꙋ́їа.

І҆́косъ в҃

Оу҆разꙋмѣ̀ бг҃омꙋ́драѧ а҆настасі́а, ꙗ҆́кѡ всѧ̑ мі́ра сегѡ̀ кра̑снаѧ тлѣ́нїю прича̑стна сꙋ́ть, и҆ тогѡ̀ ра́ди презрѣ́вши свѣ̑тлыѧ ѻ҆дє́жды и҆ ᲂу҆́твари многоцѣ̑нны, та́йнѡ ѡ҆бо́лкшесѧ во ѻ҆дє́жды ни́щихъ, вхожда́ше въ темни̑цы послꙋжи́ти и҆сповѣ́дникѡмъ хрⷭ҇тѡ́вымъ: мы́ же мы́сленнѡ спослѣ́дствꙋюще є҆́й, взыва́емъ къ не́й съ любо́вїю:

Ра́дꙋйсѧ, подража́тельнице хрⷭ҇то́ва: ра́дꙋйсѧ, посѣти́тельнице заключе́нныхъ въ темни́цѣ.

Ра́дꙋйсѧ, ᲂу҆тѣ́шительнице и҆сповѣ́дникѡвъ хрⷭ҇то́выхъ: ра́дꙋйсѧ, зла́то и҆ сребро̀ твоѐ на ни́хъ расточи́вшаѧ.

Ра́дꙋйсѧ, тѣ́ми стѧжа́вшаѧ црⷭ҇твїе нбⷭ҇ное: ра́дꙋйсѧ, рꙋ́цѣ и҆ но́зѣ ст҃ы́хъ ѡ҆мыва́вшаѧ и҆ власы̑ и҆̀хъ ѡ҆чища́вшаѧ.

Ра́дꙋйсѧ, недꙋ̑ги и҆̀хъ врачева́вшаѧ и҆ тѣлеса̀ и҆̀хъ че́стнѣ погреба́вшаѧ.

Ра́дꙋйсѧ, всебл҃же́ннаѧ великомч҃нце а҆настасі́е, ᲂу҆́зникѡвъ ст҃а́ѧ посѣти́тельнице и҆ мл҃твеннице ѡ҆ дꙋша́хъ на́шихъ.

Конда́къ г҃

Си́лою ᲂу҆крѣплѧ́ема свы́ше, ст҃а́ѧ мч҃нице, послꙋжѝ бл҃гоче́стнѡ ст҃ы̑мъ и҆ посрамѝ ненави́стника всѧ́кїѧ добродѣ́тели дїа́вола, наꙋсти́вшаго рабы́ню ѡ҆клевета́ти ю҆̀ пред̾ мꙋ́жемъ невѣ́рнымъ: мы́ же, восхвалѧ́юще бл҃готворє́нїѧ твоѧ̑, а҆настасі́е, пое́мъ вкꙋ́пѣ съ тобо́ю: А҆ллилꙋ́їа.

І҆́косъ г҃

И҆мꙋ́щи вели́кꙋю любо́вь ѡ҆ гдⷭ҇ѣ ко всѣ̑мъ въ темни́цахъ стра́ждꙋщимъ за и҆́мѧ хрⷭ҇то́во, є҆ѧ́ же ра́ди мно́жицею бїе́на бы́вши ѿ невѣ́рнагѡ мꙋ́жа, напослѣ́докъ въ домꙋ̀ є҆гѡ̀ себѣ̀ темни́цꙋ ѡ҆брѣ́те: тѣ́мже мꙋ́жествꙋ є҆ѧ̀ дивѧ́щесѧ, вопїе́мъ къ не́й:

Ра́дꙋйсѧ, и҆збра́ннаѧ невѣ́сто хрⷭ҇то́ва: ра́дꙋйсѧ, за́повѣдей хрⷭ҇то́выхъ ᲂу҆се́рднаѧ храни́тельнице.

Ра́дꙋйсѧ, не сло́вомъ то́чїю, но и҆ дѣ́ломъ сїѧ̑ и҆спо́лнившаѧ: ра́дꙋйсѧ, дꙋ́шꙋ свою̀ за дрꙋ́ги твоѧ̑ положи́ти гото́ваѧ.

Ра́дꙋйсѧ, мно́гое ѡ҆ѕлобле́нїе за хрⷭ҇та̀ прїѧ́вшаѧ: ра́дꙋйсѧ, терпѣ́нїемъ свои́мъ а҆дама́нтꙋ крѣ́пкомꙋ ᲂу҆подо́бившаѧсѧ.

Ра́дꙋйсѧ, всебл҃же́ннаѧ великомч҃нце а҆настасі́е, ᲂу҆́зникѡвъ ст҃а́ѧ посѣти́тельнице и҆ мл҃твеннице ѡ҆ дꙋша́хъ на́шихъ.

Конда́къ д҃

Бꙋ́рю ꙗ҆́рости своеѧ̀ воздви́же на тѧ̀ нечести́вый мꙋчи́тель мꙋ́жъ тво́й, ꙗ҆́кѡ плѣ́нницꙋ и҆ рабꙋ̀ вмѣнѝ тѧ̀, ст҃а́ѧ а҆настасі́е: мы́ же, воспомина́юще ѡ҆ѕлоблє́нїѧ ѿ негѡ̀ и҆ страда̑нїѧ твоѧ̑, пое́мъ ᲂу҆крѣплѧ́вшемꙋ тѧ̀ гдⷭ҇ꙋ: А҆ллилꙋ́їа.

І҆́косъ д҃

Слы́ша бл҃же́ннаѧ а҆настасі́а, ꙗ҆́кѡ мно́гѡ претерпѣ̀ ст҃ы́й ᲂу҆чи́тель є҆ѧ̀ хрѷсого́нъ за хрⷭ҇та̀, є҆мꙋ́же и҆ послѣ́дова страда́ньми свои́ми и҆ та́йнѡ восписа̀ є҆мꙋ̀ си́це: ᲂу҆чи́телю, ча́ю ᲂу҆мре́ти, и҆ ничто́же и҆́но ѡ҆стае́тсѧ, то́чїю, да и҆спꙋсти́вши дꙋ́хъ, падꙋ̀ ме́ртва. Мы́ же, чꙋдѧ́щесѧ терпѣ́нїю твоемꙋ̀, глаго́лемъ си́це:

Ра́дꙋйсѧ, не пощади́вшаѧ пло́ти своеѧ̀ чтⷭ҇ны́ѧ: ра́дꙋйсѧ, во днѝ и҆ въ нощѝ поверга́вшаѧсѧ къ стопа́мъ хрⷭ҇то́вымъ.

Ра́дꙋйсѧ, жела́вшаѧ расточи́ти бога́тство твоѐ бг҃а ра́ди неимꙋ́щымъ: ра́дꙋйсѧ, мꙋ́дрѡ кꙋ́плю дѣ́ющаѧ.

Ра́дꙋйсѧ, є҆ди́но и҆мꙋ́щаѧ попече́нїе ѡ҆ стра́ждꙋщихъ во ᲂу҆́захъ: ра́дꙋйсѧ, невозбра́ннѡ вше́дшаѧ въ черто́гъ нбⷭ҇ный.

Ра́дꙋйсѧ, всебл҃же́ннаѧ великомч҃нце а҆настасі́е, ᲂу҆́зникѡвъ ст҃а́ѧ посѣти́тельнице и҆ мл҃твеннице ѡ҆ дꙋша́хъ на́шихъ.

Конда́къ є҃

Ꙗ҆́кѡ бг҃оте́чнаѧ ѕвѣзда̀ ꙗ҆ви́ласѧ є҆сѝ въ ри́мстѣй странѣ̀, великомч҃нце а҆настасі́е, посѣща́ющи стра́ждꙋщихъ за хрⷭ҇та̀ въ темни́цахъ и҆ сердца̀ и҆̀хъ въ вѣ́рѣ ᲂу҆твержда́ющи, да при́снѡ взыва́ютъ съ тобо́ю сп҃си́телю всѣ́хъ бг҃ꙋ: А҆ллилꙋ́їа.

І҆́косъ є҃

Ви́дѣ тѧ̀ бг҃оно́сный ᲂу҆чи́тель тво́й хрѷсого́нъ въ смꙋще́нїи и҆ волне́нїи мі́ра сегѡ̀ сꙋ́щꙋ, повелѣ̀ съ прⷪ҇ро́комъ взыва́ти тебѣ̀: вскꙋ́ю приско́рбна є҆сѝ, дꙋшѐ моѧ̀, и҆ вскꙋ́ю смꙋща́еши мѧ̀; ᲂу҆пова́й на бг҃а: мы́ же, помина́юще ско́рбь и҆ печа́ль твою̀ ꙗ҆́же по бз҃ѣ, зове́мъ тѝ:

Ра́дꙋйсѧ, возложи́вшаѧ всѐ ᲂу҆пова́нїе твоѐ на гдⷭ҇а: ра́дꙋйсѧ, претерпѣ́вшаѧ тѣснотꙋ̀ црⷭ҇твїѧ ра́ди нбⷭ҇нагѡ.

Ра́дꙋйсѧ, чⷭ҇тото́ю твое́ю со а҆́гг҃лы жи́ти на нб҃сѣ́хъ сподо́бившаѧсѧ: ра́дꙋйсѧ, скорбьмѝ твои́ми къ бг҃ꙋ прибли́зившаѧсѧ.

Ра́дꙋйсѧ, мл҃твами твои́ми и҆збавлѧ́ющаѧ на́съ ѿ мно́гихъ скорбе́й: ра́дꙋйсѧ, хода́тайствомъ твои́мъ свобожда́ющаѧ ѿ и҆скꙋше́нїй.

Ра́дꙋйсѧ, всебл҃же́ннаѧ великомч҃нце а҆настасі́е, ᲂу҆́зникѡвъ ст҃а́ѧ посѣти́тельнице и҆ мл҃твеннице ѡ҆ дꙋша́хъ на́шихъ.

Конда́къ ѕ҃

Проповѣ́дꙋетъ ве́сь мі́ръ хрⷭ҇тїа́нскїй чтⷭ҇ны́ѧ по́двиги твоѧ̑, великомч҃нце а҆настасі́е, и҆ страда̑нїѧ твоѧ̑ сла́витъ, мꙋ́ченическꙋю кончи́нꙋ твою̀ ᲂу҆бл҃жа́етъ и҆ пое́тъ бг҃ꙋ: А҆ллилꙋ́їа.

І҆́косъ ѕ҃

Возсїѧ́ла є҆сѝ па́че со́лнца добродѣ́тельми твои́ми въ вели́комъ гра́дѣ ри́мѣ, є҆гда̀ и҆спо́лнисѧ предрече́нїе ᲂу҆чи́телѧ твоегѡ̀ ст҃а́гѡ хрѷсого́на ѡ҆ поги́бели безбо́жнагѡ мꙋ́жа твоегѡ̀. Свобо́дна бо сꙋ́щи, съ вѧ́щшимъ ᲂу҆се́рдїемъ начала̀ є҆сѝ пещи́сѧ ѡ҆ мч҃ницѣхъ хрⷭ҇то́выхъ: мы́ же, взира́юще съ любо́вїю на дѣѧ̑нїѧ твоѧ̑, глаго́лемъ тѝ си́це:

Ра́дꙋйсѧ, ᲂу҆се́рднаѧ помо́щнице стра́ждꙋщимъ: ра́дꙋйсѧ, бжⷭ҇твенными словесы̀ ᲂу҆тѣша́вшаѧ дрꙋзе́й хрⷭ҇то́выхъ.

Ра́дꙋйсѧ, и҆мѣ́вшаѧ ве́лїе попече́нїе ѡ҆ тре́хъ дѣ́вахъ: а҆га́пїи, хїоні́и и҆ і҆ри́нѣ: ра́дꙋйсѧ, тѣ́хъ на по́двигъ мꙋ́ченичества ᲂу҆крѣпи́вшаѧ.

Ра́дꙋйсѧ, ᲂу҆́мъ тво́й горѣ̀ и҆мѣ́вшаѧ: ра́дꙋйсѧ, се́рдце твоѐ жили́ще ст҃а́гѡ дх҃а содѣ́лавшаѧ.

Ра́дꙋйсѧ, ѻ҆гне́мъ любвѐ къ бг҃ꙋ всецѣ́лѡ возгорѣ́вшаѧ: ра́дꙋйсѧ, въ кро́вѣ кри́лъ є҆гѡ̀ нбⷭ҇ный покро́въ ѡ҆брѣ́тшаѧ.

Ра́дꙋйсѧ, мꙋ́жествомъ твои́мъ врага̀ сп҃се́нїѧ до конца̀ низложи́вшаѧ.

Ра́дꙋйсѧ, всебл҃же́ннаѧ великомч҃нце а҆настасі́е, ᲂу҆́зникѡвъ ст҃а́ѧ посѣти́тельнице и҆ мл҃твеннице ѡ҆ дꙋша́хъ на́шихъ.

Конда́къ з҃

Хотѣ́нїе ст҃а́гѡ хрѷсого́на, є҆́же ᲂу҆мре́ти за хрⷭ҇та̀, и҆спо́лнисѧ бж҃їимъ про́мысломъ: є҆гда́ же ᲂу҆зрѣ́ла є҆сѝ чтⷭ҇ны́ѧ мо́щи своегѡ̀ ᲂу҆чи́телѧ страстоте́рпца, любе́знѡ и҆̀хъ лобыза́ющи, воспла́каласѧ є҆сѝ, и҆з̾ глꙋбины̀ дꙋшѝ и҆зносѧ́щи бг҃ꙋ пѣ́снь: А҆ллилꙋ́їа.

І҆́косъ з҃

Но́вꙋю бл҃года́ть и҆ си́лꙋ дарова̀ тебѣ̀ гдⷭ҇ь на́шъ, є҆гда̀ воспрїѧ́ла є҆сѝ по́двигъ преходи́ти и҆з̾ гра́да въ гра́дъ, посѣща́юще во ᲂу҆́захъ сѣдѧ́щихъ. Мы́ же, послѣ́дꙋюще стра́нствованїю твоемꙋ̀, ᲂу҆ми́льнѡ вопїе́мъ тѝ:

Ра́дꙋйсѧ, послѣ́довательнице стопа́мъ хрⷭ҇то́вымъ: ра́дꙋйсѧ, слꙋжи́тельнице мнѡ́гимъ ст҃ы̑мъ.

Ра́дꙋйсѧ, чⷭ҇тото́ю ᲂу҆невѣ́стившаѧсѧ хрⷭ҇тꙋ̀: ра́дꙋйсѧ, великомч҃нце просла́вленнаѧ.

Ра́дꙋйсѧ, ᲂу҆зорѣши́тельницею проименова́ннаѧ: ра́дꙋйсѧ, зла́томъ твои́мъ кꙋпꙋ́ющаѧ свобо́дꙋ вѣ̑рнымъ ѿ ᲂу҆́зъ темни́чныхъ.

Ра́дꙋйсѧ, мл҃твами твои́ми и҆збавлѧ́ющаѧ на́съ ᲂу҆́зъ грѣхо́вныхъ: ра́дꙋйсѧ, врачева́нїе больны̑мъ низпосыла́ющаѧ.

Ра́дꙋйсѧ, бж҃їимъ велѣ́нїемъ полꙋме́ртвыхъ возставлѧ́ющаѧ.

Ра́дꙋйсѧ, всебл҃же́ннаѧ великомч҃нце а҆настасі́е, ᲂу҆́зникѡвъ ст҃а́ѧ посѣти́тельнице и҆ мл҃твеннице ѡ҆ дꙋша́хъ на́шихъ.

Конда́къ и҃

Стра́нствованїе твоѐ со ст҃о́ю мч҃ницею ѳеодо́тїею мнѡ́гимъ ѡ҆сла́бꙋ подадѐ: болѧ́щимъ дарова̀ и҆сцѣле́нїе, мнѡ́гимъ ᲂу҆ме́ршымъ ᲂу҆гото́ва погребе́нїе, живы̑мъ на вѧ́щшїѧ по́двиги добродѣ́тели ᲂу҆крѣпле́нїе: на́съ же, недосто́йныхъ, сподо́би, ст҃а́ѧ, мл҃твами твои́ми пѣ́ти разꙋ́мнѡ бг҃ꙋ: А҆ллилꙋ́їа.

І҆́косъ и҃

Всѧ̀ хра́мина темни́цы и҆спо́лнисѧ мно́гимъ пла́чемъ и҆ рыда́нїѧми твои́ми, є҆гда̀ ра́нѡ прите́кши въ ню̀ по ѻ҆бы́чаю твоемꙋ̀, и҆ не є҆ди́нагѡ же ѡ҆брѣ́тши ѿ ᲂу҆́зникъ, за и҆́мѧ хрⷭ҇то́во всаждє́нныхъ, вси́ бо въ но́щь є҆ди́нꙋ повелѣ́нїемъ ѕлочести́вагѡ царѧ̀ сме́рти прє́даны бы́ша: мы́ же, вспомина́юще ско́рбь твою̀ ѡ҆ дрꙋзѣ́хъ бж҃їихъ, взыва́емъ та́кѡ:

Ра́дꙋйсѧ, со ᲂу҆се́рдїемъ поиска́вшаѧ въ темни́цахъ рабѡ́въ хрⷭ҇то́выхъ: ра́дꙋйсѧ, па́ки ѡ҆брѣ́тшаѧ тѣ́хъ въ нбⷭ҇ныхъ селе́нїихъ.

Ра́дꙋйсѧ, взе́мшаѧ съ любо́вїю на ра́мо своѐ крⷭ҇тъ гдⷭ҇ень: ра́дꙋйсѧ, сподо́бльшаѧсѧ всю́дꙋ зрѣ́ти разꙋ́мными ѻ҆чесы̀ гдⷭ҇а вседержи́телѧ.

Ра́дꙋйсѧ, за любо́вь твою̀ къ бли̑жнимъ ве́лїе дерзнове́нїе къ бг҃ꙋ стѧжа́вшаѧ.

Ра́дꙋйсѧ, всебл҃же́ннаѧ великомч҃нце а҆настасі́е, ᲂу҆́зникѡвъ ст҃а́ѧ посѣти́тельнице и҆ мл҃твеннице ѡ҆ дꙋша́хъ на́шихъ.

Конда́къ ѳ҃

Нечести́вїи мꙋчи́телїе совѣ́тъ сотвори́ша на тѧ̀, страстоте́рпице непобѣди́маѧ, хотѧ́ще преклони́ти тѧ̀ ко і҆́дѡльскомꙋ слꙋже́нїю: ты́ же небоѧ́зненнѡ взыва́ла є҆сѝ къ ни́мъ: раба̀ хрⷭ҇то́ва є҆́смь, и҆ пою̀ є҆мꙋ̀ де́нь и҆ но́щь: А҆ллилꙋ́їа.

І҆́косъ ѳ҃

Вѣті́йствова съ тобо́ю нача́льнѣйшїй жре́цъ і҆́дѡльскїй, хотѧ́й ле́стїю ᲂу҆лови́ти ст҃ꙋ́ю дꙋ́шꙋ твою̀: ты́ же, позна́вше всю̀ хи́трость вра́жїю, посрами́ла є҆сѝ мꙋчи́телѧ и҆ премѣни́ла всѧ̑ ѕла̑ѧ во блага̑ѧ, безтре́петнѡ взира́ющи на ѻ҆рꙋ̑дїѧ мꙋчи́тєльскїѧ и҆ на всѧ̑ мꙋ̑ки: мы́ же, дивѧ́щесѧ мꙋ́жествꙋ твоемꙋ̀, зове́мъ тѝ ᲂу҆миле́нными гла́сы:

Ра́дꙋйсѧ, доброво́льнѡ ѡ҆ста́вившаѧ всѧ̑ мі́ра сегѡ̀ кра̑снаѧ: ра́дꙋйсѧ, возжела́вшаѧ прїѧ́ти разли́чныѧ мꙋ́ки за хрⷭ҇та̀.

Ра́дꙋйсѧ, съ любо́вїю на сме́рть и҆дтѝ восхотѣ́вшаѧ: ра́дꙋйсѧ, и҆ самѣ́хъ мꙋчи́телей терпѣ́нїемъ твои́мъ ᲂу҆диви́вшаѧ.

Ра́дꙋйсѧ, страда́ньми твои́ми цр҃ковь хрⷭ҇то́вꙋ ᲂу҆краси́вшаѧ: ра́дꙋйсѧ, де́мѡны нога́ма твои́ма попра́вшаѧ.

Ра́дꙋйсѧ, всебл҃же́ннаѧ великомч҃нце а҆настасі́е, ᲂу҆́зникѡвъ ст҃а́ѧ посѣти́тельнице и҆ мл҃твеннице ѡ҆ дꙋша́хъ на́шихъ.

Конда́къ і҃

Сп҃сти́сѧ всѣ̑мъ хотѧ́щимъ лю́дємъ споспѣшествꙋ́й мл҃твами твои́ми, великомч҃нце, пред̾ гдⷭ҇емъ и҆ и҆спросѝ разрѣше́нїе грѣхѡ́въ почита́ющимъ страда̑нїѧ твоѧ̑, да вопїе́мъ съ тобо́ю: А҆ллилꙋ́їа.

І҆́косъ і҃

Цр҃ѧ̀ нбⷭ҇наго возлюбѝ всѣ́мъ се́рдцемъ свои́мъ ст҃а́ѧ а҆настасі́а и҆ въ темни́цꙋ вве́ржена бы́сть за сладча́йшаго і҆и҃са, надо́лзѣ гла́домъ и҆ жа́ждею и҆стаѧва́ющи и҆ мл҃твою ᲂу҆крѣплѧ́ющисѧ: тѣ́мже прославлѧ́юще тоѧ̀ чтⷭ҇на̑ѧ страда̑нїѧ, возсыла́емъ къ не́й пѣ́нїе таково́е:

Ра́дꙋйсѧ, послѣ́довательнице страстє́мъ хрⷭ҇то́вымъ: ра́дꙋйсѧ, ᲂу҆кра́сившаѧсѧ побѣдоно́сною сла́вою.

Ра́дꙋйсѧ, бл҃гочести̑вымъ жена́мъ похвало̀ и҆ велича́нїе: ра́дꙋйсѧ, земно́ю темни́цею въ нбⷭ҇ный черто́гъ восте́кшаѧ.

Ра́дꙋйсѧ, та́мѡ съ мч҃ники водвори́вшаѧсѧ: ра́дꙋйсѧ, мл҃твою твое́ю ᲂу҆ прⷭ҇то́ла бж҃їѧ воспомина́ющаѧ на́съ.

Ра́дꙋйсѧ, ᲂу҆́зы грѣхѡ́вныѧ ско́рѡ разрꙋша́ющаѧ: ра́дꙋйсѧ, де́мѡны ѿ чл҃вѣ̑къ прогонѧ́ющаѧ.

Ра́дꙋйсѧ, всебл҃же́ннаѧ великомч҃нце а҆настасі́е, ᲂу҆́зникѡвъ ст҃а́ѧ посѣти́тельнице и҆ мл҃твеннице ѡ҆ дꙋша́хъ на́шихъ.

Конда́къ а҃і

Пѣ́нїе всеꙋмиле́нное прино́симъ тѝ, прославлѧ́юще твоѧ̑ за хрⷭ҇та̀ страда̑нїѧ, и҆ мо́лимъ тѧ̀: ст҃а́ѧ страстоте́рпице, и҆спросѝ ᲂу҆ млⷭ҇тивагѡ гдⷭ҇а всѣ̑мъ лю́дємъ здра́вїе, долгоде́нствїе и҆ на врагѝ побѣ́дꙋ и҆ ѡ҆долѣ́нїе. На́мъ же, восхвалѧ́ющымъ мꙋчє́нїѧ твоѧ̑, пода́ждь ми́ръ и҆ сп҃се́нїе, да пое́мъ бг҃ꙋ во вѣ́ки: А҆ллилꙋ́їа.

І҆́косъ а҃і

Свѣ́тлымъ и҆ ра́достнымъ лице́мъ послѣ́довала є҆сѝ на страда́нїе, ᲂу҆гото́ванное тѝ ѿ мꙋчи́телей, є҆́же помышлѧ́юще съ ра́достїю зове́мъ:

Ра́дꙋйсѧ, ѿ потопле́нїѧ въ мо́ри бж҃їимъ смотрѣ́нїемъ и҆зба́вльшаѧсѧ: ра́дꙋйсѧ, протѧже́ннаѧ мꙋчи́тєли къ четы́ремъ столпо́мъ и҆ тѣ́мъ ᲂу҆подо́бльшаѧсѧ распѧ́томꙋ на крⷭ҇тѣ̀ сн҃ꙋ бж҃їю.

Ра́дꙋйсѧ, жего́маѧ ѻ҆гне́мъ да́же до сме́рти: ра́дꙋйсѧ, сокро́вищнице и҆сцѣле́нїй неѡскꙋ́днаѧ.

Ра́дꙋйсѧ, ча́ше дарѡ́въ бж҃їихъ преиз̾ѻби́льнаѧ: ра́дꙋйсѧ, всѣ́хъ бл҃ги́хъ жела́нїй ско́раѧ и҆сполни́тельнице.

Ра́дꙋйсѧ, всебл҃же́ннаѧ великомч҃нце а҆настасі́е, ᲂу҆́зникѡвъ ст҃а́ѧ посѣти́тельнице и҆ мл҃твеннице ѡ҆ дꙋша́хъ на́шихъ.

Конда́къ в҃і

Бл҃года́ть свы́ше низпослѝ всѣ̑мъ на́мъ, притека́ющымъ съ любо́вїю къ ра́цѣ моще́й твои́хъ, и҆ и҆спросѝ ᲂу҆ гдⷭ҇а проще́нїе согрѣше́нїй на́шихъ, болѧ́щимъ же и҆ стра́ждꙋщимъ и҆сцѣле́нїе, да бл҃года́рственнѡ всѝ вопїе́мъ ди́вномꙋ во ст҃ы́хъ бг҃ꙋ: А҆ллилꙋ́їа.

І҆́косъ в҃і

Пою́ще по́двиги твоегѡ̀ во́льнагѡ мꙋче́нїѧ за хрⷭ҇та̀, покланѧ́емсѧ страда́нїю твоемꙋ̀, великомч҃нце досточꙋ́днаѧ, почита́емъ ст҃ꙋ́ю кончи́нꙋ твою̀ и҆ мо́лимъ тѧ̀: прострѝ твою̀ съ нб҃сѐ по́мощь и҆ на на́съ, живꙋ́щихъ во тмѣ̀ страсте́й и҆ и҆скꙋше́нїй и҆ вопїю́щихъ тѝ:

Ра́дꙋйсѧ, великомч҃нце ст҃а́ѧ, прине́сшаѧ тѣ́ло своѐ въ бг҃опрїѧ́тнꙋю же́ртвꙋ во многоразли́чныхъ мꙋче́нїихъ: ра́дꙋйсѧ, го́рлице, возлетѣ́вшаѧ во і҆ерⷭ҇ли́мъ вы́шнїй.

Ра́дꙋйсѧ, чⷭ҇таѧ и҆ непоро́чнаѧ невѣ́сто хрⷭ҇то́ва: ра́дꙋйсѧ, кади́льнице дх҃о́внаѧ, ѳѷмїа́мъ мл҃твы ѡ҆ на́съ къ бг҃ꙋ приносѧ́щаѧ.

Ра́дꙋйсѧ, почита́ющимъ па́мѧть твою̀ и҆ страда́нїѧ твоѧ̑ бг҃оꙋго́днагѡ житїѧ̀ зерца́ло: ра́дꙋйсѧ, болѣ̑зни дꙋшє́вныѧ и҆ тѣлє́сныѧ ско́рѡ и҆сцѣлѧ́ющаѧ.

Ра́дꙋйсѧ, свѣ́тлый ѻ҆́бразе житїѧ̀ всѣ́мъ, ча́ющымъ ᲂу҆лꙋчи́ти хрⷭ҇тїа́нскꙋю кончи́нꙋ.

Ра́дꙋйсѧ, всебл҃же́ннаѧ великомч҃нце а҆настасі́е, ᲂу҆́зникѡвъ ст҃а́ѧ посѣти́тельнице и҆ мл҃твеннице ѡ҆ дꙋша́хъ на́шихъ.

Конда́къ г҃і

Ѽ, многострада́льнаѧ и҆ преди́внаѧ, ст҃а́ѧ великомч҃нце а҆настасі́е. Ны́нѣшнее на́ше ма́лое моле́нїе прїимѝ ѿ недосто́йныхъ ра̑бъ твои́хъ, съ любо́вїю приноси́мое тебѣ̀, и҆ и҆спросѝ на́мъ ᲂу҆ хрⷭ҇та̀ бг҃а грѣхо́вныхъ ᲂу҆́зъ разрѣше́нїе, да и҆зба́вимсѧ мл҃твами твои́ми гнѣ́ва бж҃їѧ и҆ вѣ́чнагѡ ѡ҆сꙋжде́нїѧ, и҆ да ᲂу҆досто́имсѧ въ нбⷭ҇нѣмъ црⷭ҇твїи кꙋ́пнѡ съ тобо́ю во вѣ́ки пѣ́ти бг҃ꙋ: А҆ллилꙋ́їа.

Повто́ръ

Сей конда́къ глаго́лется три́жды, та́же і҆́косъ а҃-й и҆ конда́къ а҃-й.

І҆́косъ а҃

А҆́гг҃лѡмъ ᲂу҆подо́биласѧ є҆сѝ ра́зꙋмомъ чⷭ҇тымъ, позна́вши того̀, и҆́же є҆́сть всегѡ̀ ви́димагѡ и҆ неви́димагѡ вѣ́чное нача́ло и҆ є҆ди́ный коне́цъ жела́нїй всѣ́хъ бл҃гочести́выхъ: мы́ же, восхвалѧ́юще мꙋ́дрое ѡ҆бꙋче́нїе твоѐ ѿ ст҃а́гѡ мч҃ника хрѷсого́на, съ любо́вїю вопїе́мъ тѝ:

Ра́дꙋйсѧ, возлюби́вшаѧ вѣ́рꙋ хрⷭ҇то́вꙋ: ра́дꙋйсѧ, послѣ́довавшаѧ бл҃гоче́стїю ма́тере твоеѧ̀ фа́ѵсты.

Ра́дꙋйсѧ, соблю́дшаѧ чⷭ҇тотꙋ̀ дѣ́вства твоегѡ̀: ра́дꙋйсѧ, всегда̀ неви́димѡ ѡ҆хранѧ́емаѧ а҆́гг҃лами.

Ра́дꙋйсѧ, чⷭ҇тото́ю твое́ю къ бг҃ꙋ прибли́зившаѧсѧ.

Ра́дꙋйсѧ, всебл҃же́ннаѧ великомч҃нце а҆настасі́е, ᲂу҆́зникѡвъ ст҃а́ѧ посѣти́тельнице и҆ мл҃твеннице ѡ҆ дꙋша́хъ на́шихъ.

Конда́къ а҃

И҆збра́ннѣй ᲂу҆го́дницѣ хрⷭ҇то́вой, всебл҃же́ннѣй великомч҃нцѣ а҆настасі́и похва́льное пѣ́нїе прино́симъ, ꙗ҆́кѡ и҆мꙋ́щей мно́гое дерзнове́нїе ко гдⷭ҇ꙋ є҆́же ѿ всѧ́кихъ бѣ́дъ, скорбе́й и҆ болѣ́зней свобожда́ти вѣ̑рныѧ, и҆ съ любо́вїю взыва́емъ си́це:

Ра́дꙋйсѧ, всебл҃же́ннаѧ великомч҃нце а҆настасі́е, ᲂу҆́зникѡвъ ст҃а́ѧ посѣти́тельнице и҆ мл҃твеннице ѡ҆ дꙋша́хъ на́шихъ.

Моли́твы

Ѽ, многострада́льнаѧ и҆ премꙋ́драѧ великомч҃нце хрⷭ҇то́ва а҆настасі́е. Ты̀ дꙋше́ю на нб҃сѝ ᲂу҆ прⷭ҇то́ла гдⷭ҇нѧ предстои́ши, на землѝ же, да́нною тебѣ̀ бл҃года́тїю, разли̑чнаѧ соверша́еши и҆сцѣлє́нїѧ. При́зри ᲂу҆́бѡ ми́лостивнѡ на предстоѧ́щыѧ лю́ди и҆ молѧ́щїисѧ пред̾ і҆кѡ́ною твое́ю (моща́ми твои́ми), просѧ́щыѧ твоеѧ̀ по́мощи, прострѝ ко гдⷭ҇ꙋ ст҃ы̑ѧ мл҃твы твоѧ̑ ѡ҆ на́съ и҆ и҆спросѝ на́мъ ѡ҆ставле́нїе согрѣше́нїй на́шихъ, недꙋ̑жнымъ и҆сцѣле́нїе, скорбѧ́щымъ и҆ бѣ́дствꙋющымъ ско́рꙋю по́мощь: ᲂу҆молѝ гдⷭ҇а, да пода́стъ всѣ̑мъ на́мъ хрⷭ҇тїа́нскꙋю кончи́нꙋ и҆ до́брый ѿвѣ́тъ на стра́шнѣмъ сꙋди́щи свое́мъ, да сподо́бимсѧ и҆ мы̀ кꙋ́пнѡ съ тобо́ю сла́вити ѻ҆ц҃а̀ и҆ сн҃а и҆ ст҃а́гѡ дх҃а во вѣ́ки вѣкѡ́въ. А҆ми́нь.