Кондак 1
Взбра́нной Воево́де не умолчи́м никогда́ глаго́лати, недосто́йнии: Всесвята́я Де́во, ро́ждшая на спасе́ние на́ше Ра́дость ве́чную, вся́кое уны́ние и печа́ль отжени́ от на́с, да зове́м Ти́:
Ра́дуйся, ра́досте на́ша, во объя́тиих Свои́х Ра́дость всего́ ми́ра носи́вшая.
Икос 1
Та́йну от ве́ка открыва́я Тебе́, Пренепоро́чная Де́во, Гаврии́л, безпло́тных Архистрати́г, со стра́хом вопия́ше: «Ра́дуйся, благода́тная, Госпо́дь с Тобо́ю!». Мы́ же, гре́шнии, нечи́стыми усты́ дерза́ем вопи́ти Тебе́ си́це:
Ра́дуйся, Благослове́нная в жена́х; ра́дуйся, Неве́сто Неискусобра́чная.
Ра́дуйся, виногра́дная лозо́; ра́дуйся, Пресла́вная Богоневе́сто.
Ра́дуйся, цве́те неувяда́емый; ра́дуйся, купино́ неопали́мая.
Ра́дуйся, кади́ло благово́нное; ра́дуйся, ми́ро многоце́нное.
Ра́дуйся, одушевле́нная трапе́зо; ра́дуйся, Све́та Невече́рняго жили́ще.
Ра́дуйся, всего́ ми́ра очище́ние; ра́дуйся, ду́ш на́ших освяще́ние.
Ра́дуйся, ра́досте на́ша, во объя́тиих Свои́х Ра́дость всего́ ми́ра носи́вшая.
Кондак 2
Ви́дящи печа́ль на́шу, испо́лни весе́лия сердца́ на́ша, Пресвята́я Де́во! Просвети́ све́том нетле́нныя ра́дости ско́рбныя ду́ши, да взыва́ем Созда́телю вы́ну: Аллилу́иа.
Икос 2
Ра́зум челове́чь не мо́жет уразуме́ти, ка́ко Ты́, Неискусобра́чная Де́во, име́ла еси́ во утро́бе над все́ми Бо́га и родила́ еси́ Безле́тнаго Сы́на, те́мже со стра́хом взыва́ем Ти́:
Ра́дуйся, село́ ненасе́янное; ра́дуйся, две́ре непроходи́мая.
Ра́дуйся, стено́ и покро́ве притека́ющих к Тебе́; ра́дуйся, мо́сте, к Небесе́м преводя́й.
Ра́дуйся, ле́ствице высо́кая, ю́же Иа́ков ви́де; ра́дуйся, ста́мно ма́нны Боже́ственныя.
Ра́дуйся, разреше́ние кля́твы; ра́дуйся, наде́ждо убо́гих.
Ра́дуйся, тьму́ грехо́вную разсе́явшая; ра́дуйся, врата́ а́дова сокруши́вшая.
Ра́дуйся, Ада́мово воззва́ние; ра́дуйся, сле́з Е́виных избавле́ние.
Ра́дуйся, ра́досте на́ша, во объя́тиих Свои́х Ра́дость всего́ ми́ра носи́вшая.
Кондак 3
Си́лою свы́ше осени́ на́с, Богороди́тельнице, Ты́ бо еси́ предста́тельство и покро́в жи́зни, наде́жда и утвержде́ние все́х челове́к. Исцели́, Всепе́тая, ду́ши на́ша, пораже́нныя прока́зою грехо́вною, да воспое́м Небе́сному Жениху́: Аллилу́иа.
Икос 3
Иму́щи богоприя́тную, Де́во, утро́бу, Вы́шняго бы́сть освяще́нное боже́ственное селе́ние. Ра́дуйся, Тобо́ю бо даде́ся ра́дость, Богоро́дице, зову́щим:
Ра́дуйся, вы́шшая Небе́с; ра́дуйся, чисте́йшая све́тлостей со́лнечных.
Ра́дуйся, честне́йшая Херуви́м; ра́дуйся, сла́внейшая без сравне́ния Серафи́м.
Ра́дуйся, хра́мино Творца́ Не́ба и земли́; ра́дуйся, покро́ве ми́ру благи́й.
Ра́дуйся, на́м стено́ и защи́то; ра́дуйся, де́монов пораже́ние и ослепле́ние.
Ра́дуйся, две́ри ра́йския на́м отверза́ющая; ра́дуйся, ра́дость все́й вселе́нней даю́щая.
Ра́дуйся, А́нгелов ра́досте; ра́дуйся, Мари́е, все́х на́с Госпоже́.
Ра́дуйся, ра́досте на́ша, во объя́тиих Свои́х Ра́дость всего́ ми́ра носи́вшая.
Кондак 4
Уны́нием и скорбьми́ мно́гими смуща́ется се́рдце челове́че. К кому́ возопие́м, Влады́чице, к кому́ прибе́гнем в го́рести, кому́ возвести́м печа́ль, ра́зве Тебе́, ро́ждшия на ра́дость Не́бу и земли́ Христа́ Бо́га на́шего? Да испроси́вше Тобо́ю ми́лости, воспое́м Царю́ все́х с Херуви́мы и Серафи́мы: Аллилу́иа.
Икос 4
Слы́шавше Твоя́ чудеса́, не умолчи́м никогда́ си́лы Твоя́ глаго́лати, Влады́чице, Твоя́ бо рабы́ спаса́еши при́сно от вся́ких лю́тых. Те́мже припа́даем к Тебе́ и со умиле́нием пое́м:
Ра́дуйся, все́х скорбя́щих ра́досте; ра́дуйся, взыска́ние поги́бших.
Ра́дуйся, печа́лей на́ших утоле́ние; ра́дуйся, оби́димых Засту́пнице.
Ра́дуйся, а́лчущих Пита́тельнице; ра́дуйся, стра́нных утеше́ние.
Ра́дуйся, обурева́емых приста́нище; ра́дуйся, больны́х исцеле́ние.
Ра́дуйся, немощны́х покро́ве и Помо́щнице; ра́дуйся, же́зле ста́рости.
Ра́дуйся, ро́ждшая Исто́чника ра́дости; ра́дуйся, чистоты́ сокро́вище.
Ра́дуйся, ра́досте на́ша, во объя́тиих Свои́х Ра́дость всего́ ми́ра носи́вшая.
Кондак 5
Боготе́чная звездо́, ра́досте ми́ра, возвесели́ и просвети́ все́х, прибега́ющих к Тебе́; све́тлым Твои́м омофо́ром защити́ на́с от вся́ких бе́д, напа́стей, скорбе́й и боле́зней, да пое́м Бо́гу: Аллилу́иа.
Икос 5
Моле́ние те́плое, стено́ необори́мая, ми́лости исто́чниче, все́х правосла́вных прибе́жище, Богоро́дице Де́во! А́нгельское воспева́ем Ти́ пе́ние:
Ра́дуйся, ра́досте и сла́во ве́рных; ра́дуйся, чу́до чуде́с.
Ра́дуйся, все́х святы́х непрело́жное упова́ние; ра́дуйся, ско́рое в беда́х избавле́ние.
Ра́дуйся, в ну́ждах укрепле́ние; ра́дуйся, боговмести́мое жили́ще.
Ра́дуйся, бе́здно щедро́т и благосты́ни; ра́дуйся, одушевле́нный хра́ме.
Ра́дуйся, сиро́т и вдови́ц сла́достное весе́лие; ра́дуйся, неистощи́мое и́х бога́тство.
Ра́дуйся, Де́во све́тлая, Со́лнце возсия́вшая; ра́дуйся, пло́тию ро́ждшая пло́ть Созда́вшаго.
Ра́дуйся, ра́досте на́ша, во объя́тиих Свои́х Ра́дость всего́ ми́ра носи́вшая.
Кондак 6
Пропове́дуем Тебе́, Ма́ти Бо́жия, ско́рую в беда́х Засту́пницу; во вре́мя живота́ не оста́ви ны́ и и́же по кончи́не отве́т благи́й получи́ти сподо́би, да взыва́ем Спаси́телю Бо́гу: Аллилу́иа.
Икос 6
Возсия́й, Всенепоро́чная, све́т избавле́ния от искуше́ний и страсте́й, уще́дри, спаси́, возвесели́ ны и от лю́тых вра́г изба́ви и защити́ на́с, с любо́вию пою́щих Ти́:
Ра́дуйся, кре́пкое и непоколеби́мое упова́ние на́ше; ра́дуйся, все́х Цари́це и Влады́чице.
Ра́дуйся, всея́ вселе́нныя ве́лие сокро́вище; ра́дуйся, все́х ве́рных кре́пкое утвержде́ние.
Ра́дуйся, Засту́пнице усе́рдная ро́да христиа́нскаго; ра́дуйся, ро́ждшая все́х святы́х святе́йшее Сло́во.
Ра́дуйся, Небе́сный престо́ле; ра́дуйся, исто́чниче неизсяка́емый воды́ живы́я.
Ра́дуйся, огражде́ние и прибе́жище на Тя́ наде́ющихся; ра́дуйся, предста́тельство христиа́н непосты́дное.
Ра́дуйся, в рождестве́ и по рождестве́ Де́во; ра́дуйся, смотре́ния Зижди́телева исполне́ние.
Ра́дуйся, ра́досте на́ша, во объя́тиих Свои́х Ра́дость всего́ ми́ра носи́вшая.
Кондак 7
Хотя́щи все́м спасти́ся, Всеблага́я, в ча́с кончи́ны умилосе́рди о на́с Сы́на Своего́ и Бо́га на́шего, во е́же обра́довати ду́ши на́ша во исхо́де от бре́ннаго телесе́, да воспое́м Победи́телю сме́рти и а́да: Аллилу́иа.
Икос 7
Ди́внаго лица́ Твоего́ ра́достнаго не отврати́, Богороди́тельнице! Услы́ши мольбы́ на́ша, и во́пль на́ш к Тебе́ да прии́дет, Де́во Пресвята́я! Во́ньже а́ще де́нь призове́м Тя́, ско́ро услы́ши пою́щих Ти́ сицева́я:
Ра́дуйся, торже́ственное пе́ние А́нгелов; ра́дуйся, покро́ве и защище́ние челове́ков.
Ра́дуйся, неудобозри́мая глубино́; ра́дуйся, апо́столов похвало́.
Ра́дуйся, пресви́теров красото́; ра́дуйся, страда́льцев венча́ние.
Ра́дуйся, сто́лпе де́вства; ра́дуйся, по́стников воздержа́ние.
Ра́дуйся, мона́хов умиле́ние; ра́дуйся, святи́телей удобре́ние.
Ра́дуйся, Тобо́ю бо су́щим Вездесу́щий яви́ся; ра́дуйся, ро́ждшая Зижди́теля.
Ра́дуйся, ра́досте на́ша, во объя́тиих Свои́х Ра́дость всего́ ми́ра носи́вшая.
Кондак 8
Стра́нствие земно́е соверши́вши и де́лу спасе́ния послужи́вши, со све́тлою свеще́ю доброде́телей Твои́х изшла́ еси́, Пречи́стая, в сре́тение Жениха́ Небе́снаго. Да́руй и на́м бо́дренным се́рдцем и тре́звенною мы́слию но́щь настоя́щаго жития́ прейти́ и в ра́достный черто́г сла́вы Его́ совни́ти и пе́ти Судии́ все́х Бо́гу: Аллилу́иа.
Икос 8
Вси́ есмы́ в ни́жних, но Небе́снаго весе́лия со все́ми святы́ми улучи́ти жела́ем. Всеси́льными Твои́ми моли́твами, Пречи́стая, сподо́би ны́ и сро́дники на́ша, и дру́ги, и зна́емыя по преставле́нии на́шем всели́тися в ме́сте све́тле, иде́же не́сть боле́знь, ни печа́ль, ни воздыха́ние, но жи́знь безконе́чная. Да прости́т на́м Госпо́дь вся́кое согреше́ние, соде́янное от ю́ности до сме́ртнаго часа́, да взыва́ем вси́ ку́пно:
Ра́дуйся, во успе́нии Свое́м ми́р не оста́вльшая; ра́дуйся, Ма́ти су́щи живота́.
Ра́дуйся, избавля́ющая от сме́рти ду́ши на́ша; ра́дуйся, в моли́твах неусыпа́ющая Богоро́дице.
Ра́дуйся, ра́йския ра́дости на́с приобща́ющая; ра́дуйся, Бо́га пло́тию ро́ждшая.
Ра́дуйся, от ро́ва поги́бели на́с спаса́ющая; ра́дуйся, милосе́рдия две́ри на́м отверза́ющая.
Ра́дуйся, ра́достное упокое́ние все́х, в ве́ре и наде́жде сконча́вшихся; ра́дуйся, наде́ждо ненаде́жных.
Ра́дуйся, непреста́нная о на́с Предста́тельнице; ра́дуйся, милосе́рдая гре́шных Засту́пнице.
Ра́дуйся, ра́досте на́ша, во объя́тиих Свои́х Ра́дость всего́ ми́ра носи́вшая.
Кондак 9
Вся́кия му́ки а́дския, гее́нны о́гненныя, тьмы́ несвети́мыя изба́ви гре́шных рабо́в Твои́х, Богороди́тельнице; сподо́би ны́ жи́зни нестаре́ющияся, да пое́м всегда́ Сладча́йшему Иису́су: Аллилу́иа.
Икос 9
Вети́йства доброхудо́жнаго не возмога́ем возда́ти Ти́, Пречи́стая Де́во, оба́че Свои́м хода́тайством пред Престо́лом Всевы́шняго освяти́ на́ш у́м и се́рдце, ду́шу и те́ло; обнови́ ны, украси́, уцелому́дри, спаси́, просвети́ и благослови́ Свои́м Небе́сным благослове́нием, да неосужде́нно прино́сим Ти́ неиску́сное моле́ние на́ше:
Ра́дуйся, Неневе́стная Ма́ти и Неискусобра́чная; ра́дуйся, я́ко Тобо́ю Сы́на Бо́жия позна́хом.
Ра́дуйся, неруши́мая стено́; ра́дуйся, ду́ш на́ших всесоверше́нное спасе́ние.
Ра́дуйся, Ма́ти Изба́вителя от ве́чныя сме́рти; ра́дуйся, грехо́вную отъе́млющая скве́рну.
Ра́дуйся, я́ко вои́стину из Тебе́ произы́де в ле́поту Облече́нный; ра́дуйся, свире́пую бу́рю страсте́й челове́ческих укроща́ющая.
Ра́дуйся, А́нгелов святы́х святе́йшая; ра́дуйся, у́тра весе́нняго светле́йшая.
Ра́дуйся, на Небесе́х благослове́нная; ра́дуйся, на земли́ славосло́вимая.
Ра́дуйся, ра́досте на́ша, во объя́тиих Свои́х Ра́дость всего́ ми́ра носи́вшая.
Кондак 10
Спасти́ся все́м хотя́щи, утверди́, Богоро́дице Де́во, в Правосла́вии лю́ди земли́ Ру́сския, покры́й на́с Твои́м честны́м омофо́ром от вся́каго зла́, да пое́м в Тро́ице Еди́ному Бо́гу: Аллилу́иа.
Икос 10
Стена́ еси́ все́м, боголюби́вая Де́во Мари́е, Госпоже́ Богоро́дице Безневе́стная, ве́рных спасе́ние и наде́жда, я́ко иму́щи мно́гое дерзнове́ние к Небе́сному Царю́, вопло́щшемуся из Тебе́, изба́ви ны́ скорбе́й и печа́лей. Утеше́ния и ра́дости взыску́юще у Тебе́, ра́досте на́ша, наипа́че же спасе́ния ве́чнаго тре́бующе, умиле́нно взыва́ем:
Ра́дуйся, Боже́ственнаго А́гнца ро́ждшая; ра́дуйся, лозо́, возрасти́вшая на́м Пло́д Живота́.
Ра́дуйся, вино́м Небе́сныя ра́дости на́с напая́ющая; ра́дуйся, святы́х Небе́сных Та́ин ве́рных сподобля́ющая.
Ра́дуйся, Таи́ннице неизрече́нная Све́та Невече́рняго; ра́дуйся, све́те помраче́нных ду́ш на́ших.
Ра́дуйся, покро́ве и наде́ждо все́х челове́к; ра́дуйся, ра́дование ми́ра.
Ра́дуйся, утеше́ние безуте́шных; ра́дуйся, прибе́жище безприю́тных.
Ра́дуйся, земноро́дных спасе́ние; ра́дуйся, Бо́га на́шего Ма́ти.
Ра́дуйся, ра́досте на́ша, во объя́тиих Свои́х Ра́дость всего́ ми́ра носи́вшая.
Кондак 11
Пе́ние на́ше умиле́нное приими́, Богоро́дице, и покая́ния две́ри отве́рзи на́м, да поми́лует Пра́веднейший Судия́ рабо́в Свои́х, врата́ Небе́сная ве́рным отверза́яй, и не посрами́т пред А́нгелы Свои́ми, во е́же пе́ти Ему́ во ве́ки: Аллилу́иа.
Икос 11
Светоза́рно просвети́ на́м о́чи серде́чныя, пода́ждь па́мять сме́ртную, сохрани́ се́рдце от по́хотей лука́вых, очи́сти, Пречи́стая, от вся́кия скве́рны пло́ти и ду́ха, отжени́ от на́с уны́ние и услы́ши вопию́щих Ти́:
Ра́дуйся, Цари́це Преблага́я; ра́дуйся, Засту́пнице Преблагослове́нная.
Ра́дуйся, Помо́щнице тружда́ющихся; ра́дуйся, отра́до пла́чущих.
Ра́дуйся, оби́димых Засту́пнице; ра́дуйся, все́х христиа́н утеше́ние.
Ра́дуйся, весе́лие ду́ш на́ших; ра́дуйся, просвеще́ние ума́.
Ра́дуйся, ро́ждшая Творца́ Твоего́ и Го́спода; ра́дуйся, к Бо́гу Моли́твеннице и Предста́тельнице кре́пкая.
Ра́дуйся, ро́ждшая спасе́ние заблу́ждшим; ра́дуйся, ро́ждшая сме́рть Победи́вшаго.
Ра́дуйся, ра́досте на́ша, во объя́тиих Свои́х Ра́дость всего́ ми́ра носи́вшая.
Кондак 12
Благода́тную све́тлую ри́зу Креще́ния оскверни́вше, во све́тлостех святы́х Твои́х ка́ко вни́дем, недосто́йнии? Бо́же, Бо́же на́ш! А́ще бо дерзне́м совни́ти в черто́г, оде́жда ны́ облича́ет, я́ко не́сть бра́чна. Просвети́ одея́ние ду́ш на́ших, Светода́вче, моли́твами Богоро́дицы, да пое́м Ти́: Аллилу́иа.
Икос 12
Пою́ще ми́лости Твоя́, Де́во Богоро́дице, взыва́ем: о Небе́снаго, о любе́знаго, о сладча́йшаго Твоего́ гла́са, веселя́щаго сердца́ на́ша! С на́ми бо нело́жно обеща́лася еси́ бы́ти до сконча́ния ве́ка. Моли́твами Твои́ми слепи́и ви́дят, глуси́и слы́шат, хроми́и хо́дят, прокаже́ннии очища́ются, а́лчущии пита́ются, нази́и одева́ются, вдови́цы утеша́ются, сироты́ ра́дуются, ни́щии веселя́тся, убо́зии лику́ют, гре́шницы спаса́ются, воспева́юще:
Ра́дуйся, одушевле́нный Бо́жий киво́те; ра́дуйся, боголюби́вая Цари́це и Влады́чице.
Ра́дуйся, от гла́да и губи́тельства, тру́са и пото́па на́с спаса́ющая; ра́дуйся, от огня́, меча́, наше́ствия иноплеме́нных и междоусо́бныя бра́ни на́с защища́ющая.
Ра́дуйся, бу́рныя во́лны жите́йскаго мо́ря укроща́ющая; ра́дуйся, вся́кую сле́зу от оче́с на́ших отира́ющая.
Ра́дуйся, любо́вию Ма́тернею лю́ди возлюби́вшая; ра́дуйся, во чре́ве Свое́м Ра́дость Ве́чную носи́вшая.
Ра́дуйся, Пода́тельнице Боже́ственныя бла́гости; ра́дуйся, все́х родо́в несконча́емое весе́лие.
Ра́дуйся, вмести́вшая в Себе́ Невмести́маго; ра́дуйся, сподо́бльшаяся бы́ти Ма́ти Бо́жия.
Ра́дуйся, ра́досте на́ша, во объя́тиих Свои́х Ра́дость всего́ ми́ра носи́вшая.
Кондак 13
О Всепе́тая Ма́ти, Пречи́стая Госпоже́ Де́во Богоро́дице! Приими́ моле́ние на́ше, Засту́пнице кре́пкая су́щих в ско́рбех и печа́лех; мо́лим Тя́, пода́ждь на́м ду́ха сокруше́ние, се́рдца смире́ние, сле́зы умиле́ния, мно́гих согреше́ний на́ших проще́ние и ра́дость неувяда́емую, да пое́м в го́рнем Иерусали́ме Спаси́телю Бо́гу: Аллилу́иа.
Повтор
Этот кондак читается трижды, затем икос 1-й и кондак 1-й.
Икос 1
Та́йну от ве́ка открыва́я Тебе́, Пренепоро́чная Де́во, Гаврии́л, безпло́тных Архистрати́г, со стра́хом вопия́ше: «Ра́дуйся, благода́тная, Госпо́дь с Тобо́ю!». Мы́ же, гре́шнии, нечи́стыми усты́ дерза́ем вопи́ти Тебе́ си́це:
Ра́дуйся, Благослове́нная в жена́х; ра́дуйся, Неве́сто Неискусобра́чная.
Ра́дуйся, виногра́дная лозо́; ра́дуйся, Пресла́вная Богоневе́сто.
Ра́дуйся, цве́те неувяда́емый; ра́дуйся, купино́ неопали́мая.
Ра́дуйся, кади́ло благово́нное; ра́дуйся, ми́ро многоце́нное.
Ра́дуйся, одушевле́нная трапе́зо; ра́дуйся, Све́та Невече́рняго жили́ще.
Ра́дуйся, всего́ ми́ра очище́ние; ра́дуйся, ду́ш на́ших освяще́ние.
Ра́дуйся, ра́досте на́ша, во объя́тиих Свои́х Ра́дость всего́ ми́ра носи́вшая.
Кондак 1
Взбра́нной Воево́де не умолчи́м никогда́ глаго́лати, недосто́йнии: Всесвята́я Де́во, ро́ждшая на спасе́ние на́ше Ра́дость ве́чную, вся́кое уны́ние и печа́ль отжени́ от на́с, да зове́м Ти́:
Ра́дуйся, ра́досте на́ша, во объя́тиих Свои́х Ра́дость всего́ ми́ра носи́вшая.
Молитвы
О Пресвята́я Де́во, Всеблага́го Сы́на Ма́ти Всеблага́я, первопресто́льнаго гра́да и свята́го хра́ма сего́ покро́ве, все́м же су́щим во гресе́х, ско́рбех, беда́х и боле́знех ве́рная Предста́тельнице и Засту́пнице! Не пре́зри моле́ния недосто́йных ра́б Твои́х, но умоли́ Сы́на Твоего́ и Бо́га на́шего, да все́м на́м, с ве́рою и умиле́нием покланя́ющимся пред чудотво́рным о́бразом Твои́м си́м, да́рует по коего́ждо потре́бе ра́дость: су́щим в ско́рбех и печа́лех – утеше́ние; в беда́х и озлобле́ниих пребыва́ющим – соверше́нное си́х избы́тие; малоду́шным и ненаде́жным – наде́жду и терпе́ние; в ра́дости и изоби́лии живу́щим – непреста́нное Бо́гу благодаре́ние; су́щим в многонеду́жии – неча́емое исцеле́ние и укрепле́ние; все́м на́м – вседе́йственное вразумле́ние, покая́ние же и спасе́ние.
О Госпоже́ Пресвята́я, умилосе́рдися о все́х, чту́щих всечестно́е и́мя Твое́, и яви́ на́м всемо́щный покро́в Тво́й и заступле́ние. Вся́кому де́лу, Сы́ну Твоему́ уго́дному, споспе́шествуй; вся́кое де́ло зло́е разруши́; в недоуме́нии и тру́дных и опа́сных обстоя́ниих обрета́ющимся незри́мую по́мощь и вразумле́ние с Небесе́ низпосли́. И все́м на́м да́ждь любо́вь дру́г ко дру́гу, благоче́стие и здра́вие с долгоде́нствием. Преста́вльшихся в ве́ре и покая́нии от жития́ сего́ со А́нгелы и все́ми святы́ми жи́ти сотвори́, да вси́ на земли́, я́ко на Небеси́, ве́дуще Тя́ тве́рдую и непосты́дную Предста́тельницу ро́да христиа́нскаго, сла́вят Безнача́льнаго Отца́ со Единоро́дным Его́ Сы́ном и Всесвяты́м и Животворя́щим Его́ Ду́хом ны́не и при́сно и во ве́ки веко́в. Ами́нь.
Конда́къ а҃
Взбра́нной воево́дѣ не ᲂу҆молчи́мъ никогда̀ глаго́лати, недосто́йнїи: всест҃а́ѧ дв҃о, ро́ждшаѧ на сп҃се́нїе на́ше ра́дость вѣ́чнꙋю, всѧ́кое ᲂу҆ны́нїе и҆ печа́ль ѿженѝ ѿ на́съ, да зове́мъ тѝ:
Ра́дꙋйсѧ, ра́досте на́ша, во ѡ҆б̾ѧ́тїихъ свои́хъ ра́дость всегѡ̀ мі́ра носи́вшаѧ.
І҆́косъ а҃
Та́йнꙋ ѿ вѣ́ка ѿкрыва́ѧ тебѣ̀, пренепоро́чнаѧ дв҃о, гаврїи́лъ, безпло́тныхъ а҆рхїстрати́гъ, со стра́хомъ вопїѧ́ше: ра́дꙋйсѧ, бл҃года́тнаѧ, гдⷭ҇ь съ тобо́ю! Мы́ же грѣ́шнїи нечи́стыми ᲂу҆сты̀ дерза́емъ вопи́ти тебѣ̀ си́це:
Ра́дꙋйсѧ, бл҃гослове́ннаѧ въ жена́хъ: ра́дꙋйсѧ, невѣ́сто неискꙋсобра́чнаѧ.
Ра́дꙋйсѧ, вїногра́днаѧ лозо̀: ра́дꙋйсѧ, пресла́внаѧ бг҃оневѣ́сто.
Ра́дꙋйсѧ, цвѣ́те неꙋвѧда́емый: ра́дꙋйсѧ, кꙋпино̀ неѡпали́маѧ.
Ра́дꙋйсѧ, кади́ло бл҃гово́нное: ра́дꙋйсѧ, мѵ́ро многоцѣ́нное.
Ра́дꙋйсѧ, ѡ҆дꙋшевле́ннаѧ трапе́зо: ра́дꙋйсѧ, свѣ́та невече́рнѧгѡ жили́ще.
Ра́дꙋйсѧ, всегѡ̀ мі́ра ѡ҆чище́нїе: ра́дꙋйсѧ, дꙋ́шъ на́шихъ ѡ҆сщ҃е́нїе.
Ра́дꙋйсѧ, ра́досте на́ша, во ѡ҆б̾ѧ́тїихъ свои́хъ ра́дость всегѡ̀ мі́ра носи́вшаѧ.
Конда́къ в҃
Ви́дѧщи печа́ль на́шꙋ, и҆спо́лни весе́лїѧ сердца̀ на̑ша, прест҃а́ѧ дв҃о! Просвѣтѝ свѣ́томъ нетлѣ́нныѧ ра́дости скѡ́рбныѧ дꙋ́шы, да взыва́емъ созда́телю вы́нꙋ: А҆ллилꙋ́їа.
І҆́косъ в҃
Ра́зꙋмъ человѣ́чь не мо́жетъ ᲂу҆разꙋмѣ́ти, ка́кѡ ты̀, неискꙋсобра́чнаѧ дв҃о, и҆мѣ́ла є҆сѝ во ᲂу҆тро́бѣ над̾ всѣ́ми бг҃а и҆ родила̀ є҆сѝ безлѣ́тнаго сн҃а, тѣ́мже со стра́хомъ взыва́емъ тѝ:
Ра́дꙋйсѧ, село̀ ненасѣ́ѧнное: ра́дꙋйсѧ, две́ре непроходи́маѧ.
Ра́дꙋйсѧ, стѣно̀ и҆ покро́ве притека́ющихъ къ тебѣ̀: ра́дꙋйсѧ, мо́сте, къ нб҃сє́мъ преводѧ́й.
Ра́дꙋйсѧ, лѣ́ствице высо́каѧ, ю҆́же і҆а́кѡвъ ви́дѣ: ра́дꙋйсѧ, ста́мно ма́нны бжⷭ҇твенныѧ.
Ра́дꙋйсѧ, разрѣше́нїе клѧ́твы: ра́дꙋйсѧ, наде́ждо ᲂу҆бо́гихъ.
Ра́дꙋйсѧ, тьмꙋ̀ грѣхо́внꙋю разсѣ́ѧвшаѧ: ра́дꙋйсѧ, врата̀ а҆́дѡва сокрꙋши́вшаѧ.
Ра́дꙋйсѧ, а҆да́мово воззва́нїе: ра́дꙋйсѧ, сле́зъ є҆́ѵиныхъ и҆збавле́нїе.
Ра́дꙋйсѧ, ра́досте на́ша, во ѡ҆б̾ѧ́тїихъ свои́хъ ра́дость всегѡ̀ мі́ра носи́вшаѧ.
Конда́къ г҃
Си́лою свы́ше ѡ҆сѣнѝ на́съ, бг҃ороди́тельнице, ты́ бо є҆сѝ предста́тельство и҆ покро́въ жи́зни, наде́жда и҆ ᲂу҆твержде́нїе всѣ́хъ человѣ̑къ. И҆сцѣлѝ, всепѣ́таѧ, дꙋ́шы на́шѧ, поражє́нныѧ прока́зою грѣхо́вною, да воспое́мъ нбⷭ҇номꙋ женихꙋ̀: А҆ллилꙋ́їа.
І҆́косъ г҃
И҆мꙋ́щи бг҃опрїѧ́тнꙋю, дв҃о, ᲂу҆тро́бꙋ, вы́шнѧгѡ бы́сть ѡ҆сщ҃е́нное бжⷭ҇твенное селе́нїе. Ра́дꙋйсѧ, тобо́ю бо даде́сѧ ра́дость, бцⷣе, зовꙋ́щымъ:
Ра́дꙋйсѧ, вы́шшаѧ нб҃съ: ра́дꙋйсѧ, чⷭ҇тѣ́йшаѧ свѣ́тлостей со́лнечныхъ.
Ра́дꙋйсѧ, чтⷭ҇нѣ́йшаѧ херꙋві̑мъ: ра́дꙋйсѧ, сла́внѣйшаѧ без̾ сравне́нїѧ серафі̑мъ.
Ра́дꙋйсѧ, хра́мино творца̀ нб҃а и҆ землѝ: ра́дꙋйсѧ, покро́ве мі́рꙋ бл҃гі́й.
Ра́дꙋйсѧ, на́мъ стѣно̀ и҆ защи́то: ра́дꙋйсѧ, де́монѡвъ пораже́нїе и҆ ѡ҆слѣпле́нїе.
Ра́дꙋйсѧ, двє́ри ра̑йскїѧ на́мъ ѿверза́ющаѧ: ра́дꙋйсѧ, ра́дость все́й вселе́ннѣй даю́щаѧ.
Ра́дꙋйсѧ, а҆́гг҃лѡвъ ра́досте: ра́дꙋйсѧ, мр҃і́е, всѣ́хъ на́съ гпⷭ҇жѐ.
Ра́дꙋйсѧ, ра́досте на́ша, во ѡ҆б̾ѧ́тїихъ свои́хъ ра́дость всегѡ̀ мі́ра носи́вшаѧ.
Конда́къ д҃
Оу҆ны́нїемъ и҆ скорбьмѝ мно́гими смꙋща́етсѧ се́рдце человѣ́че.
Къ комꙋ̀ возопїе́мъ, влⷣчце, къ комꙋ̀ прибѣ́гнемъ въ го́рести, комꙋ̀ возвѣсти́мъ печа́ль, ра́звѣ тебє̀, ро́ждшїѧ на ра́дость нб҃ꙋ и҆ землѝ хрⷭ҇та̀ бг҃а на́шего; Да и҆спроси́вше тобо́ю млⷭ҇ти, воспое́мъ цр҃ю̀ всѣ́хъ съ херꙋві̑мы и҆ серафі̑мы: А҆ллилꙋ́їа.
І҆́косъ д҃
Слы́шавше твоѧ̑ чꙋдеса̀, не ᲂу҆молчи́мъ никогда̀ си̑лы твоѧ̑ глаго́лати, влⷣчце, твоѧ̑ бо рабы̑ сп҃са́еши при́снѡ ѿ всѧ́кихъ лю́тыхъ. Тѣ́мже припа́даемъ къ тебѣ̀ и҆ со ᲂу҆миле́нїемъ пое́мъ:
Ра́дꙋйсѧ, всѣ́хъ скорбѧ́щихъ ра́досте: ра́дꙋйсѧ, взыска́нїе поги́бшихъ.
Ра́дꙋйсѧ, печа́лей на́шихъ ᲂу҆толе́нїе: ра́дꙋйсѧ, ѡ҆би́димыхъ застꙋ́пнице.
Ра́дꙋйсѧ, а҆́лчꙋщихъ пита́тельнице: ра́дꙋйсѧ, стра́нныхъ ᲂу҆тѣше́нїе.
Ра́дꙋйсѧ, ѡ҆бꙋрева́емыхъ приста́нище: ра́дꙋйсѧ, больны́хъ и҆сцѣле́нїе.
Ра́дꙋйсѧ, немощны́хъ покро́ве и҆ помо́щнице: ра́дꙋйсѧ, же́зле ста́рости.
Ра́дꙋйсѧ, ро́ждшаѧ и҆сто́чника ра́дости: ра́дꙋйсѧ, чⷭ҇тоты̀ сокро́вище.
Ра́дꙋйсѧ, ра́досте на́ша, во ѡ҆б̾ѧ́тїихъ свои́хъ ра́дость всегѡ̀ мі́ра носи́вшаѧ.
Конда́къ є҃
Бг҃оте́чнаѧ ѕвѣздо̀, ра́досте мі́ра, возвеселѝ и҆ просвѣтѝ всѣ́хъ, прибѣга́ющихъ къ тебѣ̀: свѣ́тлымъ твои́мъ ѡ҆мофо́ромъ защитѝ на́съ ѿ всѧ́кихъ бѣ́дъ, напа́стей, скорбе́й и҆ болѣ́зней, да пое́мъ бг҃ꙋ: А҆ллилꙋ́їа.
І҆́косъ є҃
Моле́нїе те́плое, стѣно̀ неѡбори́маѧ, млⷭ҇ти и҆сто́чниче, всѣ́хъ правосла́вныхъ прибѣ́жище, бцⷣе дв҃о! А҆́гг҃льское воспѣва́емъ тѝ пѣ́нїе:
Ра́дꙋйсѧ, ра́досте и҆ сла́во вѣ́рныхъ: ра́дꙋйсѧ, чꙋ́до чꙋде́съ.
Ра́дꙋйсѧ, всѣ́хъ ст҃ы́хъ непрело́жное ᲂу҆пова́нїе: ра́дꙋйсѧ, ско́рое въ бѣда́хъ и҆збавле́нїе.
Ра́дꙋйсѧ, въ нꙋ́ждахъ ᲂу҆крѣпле́нїе: ра́дꙋйсѧ, бг҃овмѣсти́мое жили́ще.
Ра́дꙋйсѧ, бе́здно щедро́тъ и҆ бл҃госты́ни: ра́дꙋйсѧ, ѡ҆дꙋшевле́нный хра́ме.
Ра́дꙋйсѧ, сиро́тъ и҆ вдови́цъ сла́достное весе́лїе: ра́дꙋйсѧ, неистощи́мое и҆́хъ бога́тство.
Ра́дꙋйсѧ, дв҃о свѣ́тлаѧ, сл҃нце возсїѧ́вшаѧ: ра́дꙋйсѧ, пло́тїю ро́ждшаѧ пло́ть созда́вшаго.
Ра́дꙋйсѧ, ра́досте на́ша, во ѡ҆б̾ѧ́тїихъ свои́хъ ра́дость всегѡ̀ мі́ра носи́вшаѧ.
Конда́къ ѕ҃
Проповѣ́дꙋемъ тебѐ, мт҃и бж҃їѧ, ско́рꙋю въ бѣда́хъ застꙋ́пницꙋ: во вре́мѧ живота̀ не ѡ҆ста́ви ны̀ и҆ и҆́же по кончи́нѣ ѿвѣ́тъ бл҃гі́й полꙋчи́ти сподо́би, да взыва́емъ сп҃си́телю бг҃ꙋ: А҆ллилꙋ́їа.
І҆́косъ ѕ҃
Возсїѧ́й, всенепоро́чнаѧ, свѣ́тъ и҆збавле́нїѧ ѿ и҆скꙋше́нїй и҆ страсте́й, ᲂу҆ще́дри, сп҃сѝ, возвесели́ ны и҆ ѿ лю́тыхъ вра̑гъ и҆зба́ви и҆ защитѝ на́съ, съ любо́вїю пою́щихъ тѝ:
Ра́дꙋйсѧ, крѣ́пкое и҆ непоколеби́мое ᲂу҆пова́нїе на́ше: ра́дꙋйсѧ, всѣ́хъ цр҃и́це и҆ влⷣчце.
Ра́дꙋйсѧ, всеѧ̀ вселе́нныѧ ве́лїе сокро́вище: ра́дꙋйсѧ, всѣ́хъ вѣ́рныхъ крѣ́пкое ᲂу҆твержде́нїе.
Ра́дꙋйсѧ, застꙋ́пнице ᲂу҆се́рднаѧ ро́да хрⷭ҇тїа́нскагѡ: ра́дꙋйсѧ, ро́ждшаѧ всѣ́хъ ст҃ы́хъ ст҃ѣ́йшее сло́во.
Ра́дꙋйсѧ, нбⷭ҇ный прⷭ҇то́ле: ра́дꙋйсѧ, и҆сто́чниче неизсѧка́емый воды̀ живы́ѧ.
Ра́дꙋйсѧ, ѡ҆гражде́нїе и҆ прибѣ́жище на тѧ̀ надѣ́ющихсѧ: ра́дꙋйсѧ, предста́тельство хрⷭ҇тїа́нъ непосты́дное.
Ра́дꙋйсѧ, въ ржⷭ҇твѣ̀ и҆ по ржⷭ҇твѣ̀ дв҃о: ра́дꙋйсѧ, смотре́нїѧ зижди́телева и҆сполне́нїе.
Ра́дꙋйсѧ, ра́досте на́ша, во ѡ҆б̾ѧ́тїихъ свои́хъ ра́дость всегѡ̀ мі́ра носи́вшаѧ.
Конда́къ з҃
Хотѧ́щи всѣ̑мъ сп҃сти́сѧ, всебл҃га́ѧ, въ ча́съ кончи́ны ᲂу҆млⷭ҇рди ѡ҆ на́съ сн҃а своего̀ и҆ бг҃а на́шего, во є҆́же ѡ҆бра́довати дꙋ́шы на́шѧ во и҆схо́дѣ ѿ бре́ннагѡ тѣлесѐ, да воспое́мъ побѣди́телю сме́рти и҆ а҆́да: А҆ллилꙋ́їа.
І҆́косъ з҃
Ди́внагѡ лица̀ твоегѡ̀ ра́достнагѡ не ѿвратѝ, бг҃ороди́тельнице! Оу҆слы́ши мольбы̑ на́шѧ, и҆ во́пль на́шъ къ тебѣ̀ да прїи́детъ, дв҃о прест҃а́ѧ! Во́ньже а҆́ще де́нь призове́мъ тѧ̀, ско́рѡ ᲂу҆слы́ши пою́щихъ тѝ сицева̑ѧ:
Ра́дꙋйсѧ, торже́ственное пѣ́нїе а҆́гг҃лѡвъ: ра́дꙋйсѧ, покро́ве и҆ защище́нїе человѣ́кѡвъ.
Ра́дꙋйсѧ, неꙋдобозри́маѧ глꙋбино̀: ра́дꙋйсѧ, а҆пⷭ҇лѡвъ похвало̀.
Ра́дꙋйсѧ, пресвѵ́терѡвъ красото̀: ра́дꙋйсѧ, страда́льцєвъ вѣнча́нїе.
Ра́дꙋйсѧ, сто́лпе дѣ́вства: ра́дꙋйсѧ, по́стникѡвъ воздержа́нїе.
Ра́дꙋйсѧ, мона́хѡвъ ᲂу҆миле́нїе: ра́дꙋйсѧ, ст҃и́телей ᲂу҆добре́нїе.
Ра́дꙋйсѧ, тобо́ю бо сꙋ́щымъ вездѣсꙋ́щїй ꙗ҆ви́сѧ: ра́дꙋйсѧ, ро́ждшаѧ зижди́телѧ.
Ра́дꙋйсѧ, ра́досте на́ша, во ѡ҆б̾ѧ́тїихъ свои́хъ ра́дость всегѡ̀ мі́ра носи́вшаѧ.
Конда́къ и҃
Стра́нствїе земно́е соверши́вши и҆ дѣ́лꙋ сп҃се́нїѧ послꙋжи́вши, со свѣ́тлою свѣще́ю добродѣ́телей твои́хъ и҆зшла̀ є҆сѝ, пречⷭ҇таѧ, въ срѣ́тенїе жениха̀ нбⷭ҇нагѡ. Да́рꙋй и҆ на́мъ бо́дреннымъ се́рдцемъ и҆ тре́звенною мы́слїю но́щь настоѧ́щагѡ житїѧ̀ прейтѝ и҆ въ ра́достный черто́гъ сла́вы є҆гѡ̀ совни́ти, и҆ пѣ́ти сꙋдїѝ всѣ́хъ бг҃ꙋ: А҆ллилꙋ́їа.
І҆́косъ и҃
Всѝ є҆смы̀ въ ни́жнихъ, но нбⷭ҇нагѡ весе́лїѧ со всѣ́ми ст҃ы́ми ᲂу҆лꙋчи́ти жела́емъ. Всеси́льными твои́ми мл҃твами, пречⷭ҇таѧ, сподо́би ны̀ и҆ сро́дники на́шѧ, и҆ дрꙋ́ги, и҆ зна́ємыѧ по преставле́нїи на́шемъ всели́тисѧ въ мѣ́стѣ свѣ́тлѣ, и҆дѣ́же нѣ́сть болѣ́знь, ни печа́ль, ни воздыха́нїе, но жи́знь безконе́чнаѧ. Да прости́тъ на́мъ гдⷭ҇ь всѧ́кое согрѣше́нїе, содѣ́ѧнное ѿ ю҆́ности до сме́ртнагѡ часа̀, да взыва́емъ всѝ кꙋ́пнѡ:
Ра́дꙋйсѧ, во ᲂу҆спе́нїи свое́мъ мі́ръ не ѡ҆ста́вльшаѧ: ра́дꙋйсѧ, мт҃и сꙋ́щи живота̀.
Ра́дꙋйсѧ, и҆збавлѧ́ющаѧ ѿ сме́рти дꙋ́шы на́шѧ: ра́дꙋйсѧ, въ мл҃твахъ неꙋсыпа́ющаѧ бцⷣе.
Ра́дꙋйсѧ, ра́йскїѧ ра́дости на́съ прїѡбща́ющаѧ: ра́дꙋйсѧ, бг҃а пло́тїю ро́ждшаѧ.
Ра́дꙋйсѧ, ѿ ро́ва поги́бели на́съ сп҃са́ющаѧ: ра́дꙋйсѧ, млⷭ҇рдїѧ двє́ри на́мъ ѿверза́ющаѧ.
Ра́дꙋйсѧ, ра́достное ᲂу҆покое́нїе всѣ́хъ, въ вѣ́рѣ и҆ наде́ждѣ сконча́вшихсѧ: ра́дꙋйсѧ, наде́ждо ненаде́жныхъ.
Ра́дꙋйсѧ, непреста́ннаѧ ѡ҆ на́съ предста́тельнице: ра́дꙋйсѧ, млⷭ҇рдаѧ грѣ́шныхъ застꙋ́пнице.
Ра́дꙋйсѧ, ра́досте на́ша, во ѡ҆б̾ѧ́тїихъ свои́хъ ра́дость всегѡ̀ мі́ра носи́вшаѧ.
Конда́къ ѳ҃
Всѧ́кїѧ мꙋ́ки а҆́дскїѧ, гее́нны ѻ҆́гненныѧ, тьмы̀ несвѣти́мыѧ и҆зба́ви грѣ́шныхъ рабѡ́въ твои́хъ, бг҃ороди́тельнице: сподо́би ны̀ жи́зни нестарѣ́ющїѧсѧ, да пое́мъ всегда̀ сладча́йшемꙋ і҆и҃сꙋ: А҆ллилꙋ́їа.
І҆́косъ ѳ҃
Вѣті́йства доброхꙋдо́жнагѡ не возмога́емъ возда́ти тѝ, пречⷭ҇таѧ дв҃о, ѻ҆ба́че свои́мъ хода́тайствомъ пред̾ прⷭ҇то́ломъ всевы́шнѧгѡ ѡ҆ст҃ѝ на́шъ ᲂу҆́мъ и҆ се́рдце, дꙋ́шꙋ и҆ тѣ́ло: ѡ҆бнови́ ны, ᲂу҆красѝ, ᲂу҆цѣломꙋ́дри, сп҃сѝ, просвѣтѝ и҆ бл҃гословѝ свои́мъ нбⷭ҇нымъ бл҃гослове́нїемъ, да неѡсꙋжде́ннѡ прино́симъ тѝ неискꙋ́сное моле́нїе на́ше:
Ра́дꙋйсѧ, неневѣ́стнаѧ мт҃и и҆ неискꙋсобра́чнаѧ: ра́дꙋйсѧ, ꙗ҆́кѡ тобо́ю сн҃а бж҃їѧ позна́хомъ.
Ра́дꙋйсѧ, нерꙋши́маѧ стѣно̀: ра́дꙋйсѧ, дꙋ́шъ на́шихъ всесоверше́нное сп҃се́нїе.
Ра́дꙋйсѧ, мт҃и и҆зба́вителѧ ѿ вѣ́чныѧ сме́рти: ра́дꙋйсѧ, грѣхо́внꙋю ѿе́млющаѧ скве́рнꙋ.
Ра́дꙋйсѧ, ꙗ҆́кѡ вои́стиннꙋ и҆з̾ тебє̀ произы́де въ лѣ́потꙋ ѡ҆блече́нный: ра́дꙋйсѧ, свирѣ́пꙋю бꙋ́рю страсте́й человѣ́ческихъ ᲂу҆кроща́ющаѧ.
Ра́дꙋйсѧ, а҆́гг҃лѡвъ ст҃ы́хъ ст҃ѣ́йшаѧ: ра́дꙋйсѧ, ᲂу҆́тра весе́ннѧгѡ свѣтлѣ́йшаѧ.
Ра́дꙋйсѧ, на нб҃сѣ́хъ бл҃гослове́ннаѧ: ра́дꙋйсѧ, на землѝ славосло́вимаѧ.
Ра́дꙋйсѧ, ра́досте на́ша, во ѡ҆б̾ѧ́тїихъ свои́хъ ра́дость всегѡ̀ мі́ра носи́вшаѧ.
Конда́къ і҃
Сп҃сти́сѧ всѣ̑мъ хотѧ́щи, ᲂу҆твердѝ, бцⷣе дв҃о, въ правосла́вїи лю́ди землѝ рꙋ́сскїѧ, покры́й на́съ твои́мъ чтⷭ҇ны́мъ ѡ҆мофо́ромъ ѿ всѧ́кагѡ ѕла̀, да пое́мъ въ трⷪ҇цѣ є҆ди́номꙋ бг҃ꙋ: А҆ллилꙋ́їа.
І҆́косъ і҃
Стѣна̀ є҆сѝ всѣ̑мъ, бг҃олюби́ваѧ дв҃о мр҃і́е, гпⷭ҇жѐ бцⷣе безневѣ́стнаѧ, вѣ́рныхъ сп҃се́нїе и҆ наде́жда, ꙗ҆́кѡ и҆мꙋ́щи мно́гое дерзнове́нїе къ нбⷭ҇номꙋ цр҃ю̀, вопло́щшемꙋсѧ и҆з̾ тебє̀, и҆зба́ви ны̀ скорбе́й и҆ печа́лей. Оу҆тѣше́нїѧ и҆ ра́дости взыскꙋ́юще ᲂу҆ тебє̀, ра́досте на́ша, наипа́че же сп҃се́нїѧ вѣ́чнагѡ тре́бꙋюще, ᲂу҆миле́ннѡ взыва́емъ:
Ра́дꙋйсѧ, бжⷭ҇твеннаго а҆́гнца ро́ждшаѧ: ра́дꙋйсѧ, лозо̀, возрасти́вшаѧ на́мъ пло́дъ живота̀.
Ра́дꙋйсѧ, вїно́мъ нбⷭ҇ныѧ ра́дости на́съ напаѧ́ющаѧ: ра́дꙋйсѧ, ст҃ы́хъ нбⷭ҇ныхъ та̑инъ вѣ́рныхъ сподоблѧ́ющаѧ.
Ра́дꙋйсѧ, таи́ннице неизрече́ннаѧ свѣ́та невече́рнѧгѡ: ра́дꙋйсѧ, свѣ́те помраче́нныхъ дꙋ́шъ на́шихъ.
Ра́дꙋйсѧ, покро́ве и҆ наде́ждо всѣ́хъ человѣ̑къ: ра́дꙋйсѧ, ра́дованїе мі́ра.
Ра́дꙋйсѧ, ᲂу҆тѣше́нїе без̾ꙋтѣ́шныхъ: ра́дꙋйсѧ, прибѣ́жище безпрїю́тныхъ.
Ра́дꙋйсѧ, земноро́дныхъ сп҃се́нїе: ра́дꙋйсѧ, бг҃а на́шегѡ мт҃и.
Ра́дꙋйсѧ, ра́досте на́ша, во ѡ҆б̾ѧ́тїихъ свои́хъ ра́дость всегѡ̀ мі́ра носи́вшаѧ.
Конда́къ а҃і
Пѣ́нїе на́ше ᲂу҆миле́нное прїимѝ, бцⷣе, и҆ покаѧ́нїѧ двє́ри ѿве́рзи на́мъ, да поми́лꙋетъ пра́веднѣйшїй сꙋдїѧ̀ рабѡ́въ свои́хъ, врата̀ нбⷭ҇наѧ вѣ̑рнымъ ѿверза́ѧй, и҆ не посрами́тъ пред̾ а҆́гг҃лы свои́ми, во є҆́же пѣ́ти є҆мꙋ̀ во вѣ́ки: А҆ллилꙋ́їа.
І҆́косъ а҃і
Свѣтоза́рнѡ просвѣтѝ на́мъ ѻ҆́чи сердє́чныѧ, пода́ждь па́мѧть сме́ртнꙋю, сохранѝ се́рдце ѿ по́хотей лꙋка́выхъ, ѡ҆чи́сти, пречⷭ҇таѧ, ѿ всѧ́кїѧ скве́рны пло́ти и҆ дꙋ́ха, ѿженѝ ѿ на́съ ᲂу҆ны́нїе и҆ ᲂу҆слы́ши вопїю́щихъ тѝ:
Ра́дꙋйсѧ, цр҃и́це пребл҃га́ѧ: ра́дꙋйсѧ, застꙋ́пнице пребл҃гослове́ннаѧ.
Ра́дꙋйсѧ, помо́щнице трꙋжда́ющихсѧ: ра́дꙋйсѧ, ѿра́до пла́чꙋщихъ.
Ра́дꙋйсѧ, ѡ҆би́димыхъ застꙋ́пнице: ра́дꙋйсѧ, всѣ́хъ хрⷭ҇тїа́нъ ᲂу҆тѣше́нїе.
Ра́дꙋйсѧ, весе́лїе дꙋ́шъ на́шихъ: ра́дꙋйсѧ, просвѣще́нїе ᲂу҆ма̀.
Ра́дꙋйсѧ, ро́ждшаѧ творца̀ твоего̀ и҆ гдⷭ҇а: ра́дꙋйсѧ, къ бг҃ꙋ мл҃твеннице и҆ предста́тельнице крѣ́пкаѧ.
Ра́дꙋйсѧ, ро́ждшаѧ сп҃се́нїе заблꙋ́ждшымъ: ра́дꙋйсѧ, ро́ждшаѧ сме́рть побѣди́вшаго.
Ра́дꙋйсѧ, ра́досте на́ша, во ѡ҆б̾ѧ́тїихъ свои́хъ ра́дость всегѡ̀ мі́ра носи́вшаѧ.
Конда́къ в҃і
Бл҃года́тнꙋю свѣ́тлꙋю ри́зꙋ кр҃ще́нїѧ ѡ҆скверни́вше, во свѣ́тлостехъ ст҃ы́хъ твои́хъ ка́кѡ вни́демъ недосто́йнїи; Бж҃е, бж҃е на́шъ! А҆́ще бо дерзне́мъ совни́ти въ черто́гъ, ѻ҆де́жда ны̀ ѡ҆блича́етъ, ꙗ҆́кѡ нѣ́сть бра́чна. Просвѣтѝ ѡ҆дѣѧ́нїе дꙋ́шъ на́шихъ, свѣтода́вче, мл҃твами бцⷣы, да пое́мъ тѝ: А҆ллилꙋ́їа.
І҆́косъ в҃і
Пою́ще млⷭ҇ти твоѧ̑, дв҃о бцⷣе, взыва́емъ: ѽ нбⷭ҇нагѡ, ѽ любе́знагѡ, ѽ сладча́йшагѡ твоегѡ̀ гла́са, веселѧ́щагѡ сердца̀ на̑ша! Съ на́ми бо нело́жнѡ ѡ҆бѣща́ласѧ є҆сѝ бы́ти до сконча́нїѧ вѣ́ка. Мл҃твами твои́ми слѣпі́и ви́дѧтъ, глꙋсі́и слы́шатъ, хромі́и хо́дѧтъ, прокаже́ннїи ѡ҆чища́ютсѧ, а҆́лчꙋщїи пита́ютсѧ, назі́и ѡ҆дѣва́ютсѧ, вдови̑цы ᲂу҆тѣша́ютсѧ, сироты̑ ра́дꙋютсѧ, ни́щїи веселѧ́тсѧ, ᲂу҆бо́зїи ликꙋ́ютъ, грѣ̑шницы сп҃са́ютсѧ, воспѣва́юще:
Ра́дꙋйсѧ, ѡ҆дꙋшевле́нный бж҃їй кївѡ́те: ра́дꙋйсѧ, бг҃олюби́ваѧ цр҃и́це и҆ влⷣчце.
Ра́дꙋйсѧ, ѿ гла́да и҆ гꙋби́тельства, трꙋ́са и҆ пото́па на́съ спаса́ющаѧ: ра́дꙋйсѧ, ѿ ѻ҆гнѧ̀, меча̀, наше́ствїѧ и҆ноплеме́нныхъ и҆ междоꙋсо́бныѧ бра́ни на́съ защища́ющаѧ.
Ра́дꙋйсѧ, бꙋ̑рныѧ во́лны жите́йскагѡ мо́рѧ ᲂу҆кроща́ющаѧ: ра́дꙋйсѧ, всѧ́кꙋю сле́зꙋ ѿ ѻ҆че́съ на́шихъ ѡ҆тира́ющаѧ.
Ра́дꙋйсѧ, любо́вїю мт҃рнею лю́ди возлюби́вшаѧ: ра́дꙋйсѧ, во чре́вѣ свое́мъ ра́дость вѣ́чнꙋю носи́вшаѧ.
Ра́дꙋйсѧ, пода́тельнице бжⷭ҇твенныѧ бл҃гости: ра́дꙋйсѧ, всѣ́хъ родѡ́въ несконча́емое весе́лїе.
Ра́дꙋйсѧ, вмѣсти́вшаѧ въ себѣ̀ невмѣсти́маго: ра́дꙋйсѧ, сподо́бльшаѧсѧ бы́ти мт҃и бж҃їѧ.
Ра́дꙋйсѧ, ра́досте на́ша, во ѡ҆б̾ѧ́тїихъ свои́хъ ра́дость всегѡ̀ мі́ра носи́вшаѧ.
Конда́къ г҃і
ѽ всепѣ́таѧ мт҃и, пречⷭ҇таѧ гпⷭ҇жѐ дв҃о бцⷣе! Прїимѝ моле́нїе на́ше, застꙋ́пнице крѣ́пкаѧ сꙋ́щихъ въ ско́рбехъ и҆ печа́лехъ: мо́лимъ тѧ̀, пода́ждь на́мъ дꙋ́ха сокрꙋше́нїе, се́рдца смире́нїе, слє́зы ᲂу҆миле́нїѧ, мно́гихъ согрѣше́нїй на́шихъ проще́нїе и҆ ра́дость неꙋвѧда́емꙋю, да пое́мъ въ го́рнѣмъ і҆ерⷭ҇ли́мѣ сп҃си́телю бг҃ꙋ: А҆ллилꙋ́їа.
Повто́ръ
Сей конда́къ глаго́лется три́жды, та́же і҆́косъ а҃-й и҆ конда́къ а҃-й.
І҆́косъ а҃
Та́йнꙋ ѿ вѣ́ка ѿкрыва́ѧ тебѣ̀, пренепоро́чнаѧ дв҃о, гаврїи́лъ, безпло́тныхъ а҆рхїстрати́гъ, со стра́хомъ вопїѧ́ше: ра́дꙋйсѧ, бл҃года́тнаѧ, гдⷭ҇ь съ тобо́ю! Мы́ же грѣ́шнїи нечи́стыми ᲂу҆сты̀ дерза́емъ вопи́ти тебѣ̀ си́це:
Ра́дꙋйсѧ, бл҃гослове́ннаѧ въ жена́хъ: ра́дꙋйсѧ, невѣ́сто неискꙋсобра́чнаѧ.
Ра́дꙋйсѧ, вїногра́днаѧ лозо̀: ра́дꙋйсѧ, пресла́внаѧ бг҃оневѣ́сто.
Ра́дꙋйсѧ, цвѣ́те неꙋвѧда́емый: ра́дꙋйсѧ, кꙋпино̀ неѡпали́маѧ.
Ра́дꙋйсѧ, кади́ло бл҃гово́нное: ра́дꙋйсѧ, мѵ́ро многоцѣ́нное.
Ра́дꙋйсѧ, ѡ҆дꙋшевле́ннаѧ трапе́зо: ра́дꙋйсѧ, свѣ́та невече́рнѧгѡ жили́ще.
Ра́дꙋйсѧ, всегѡ̀ мі́ра ѡ҆чище́нїе: ра́дꙋйсѧ, дꙋ́шъ на́шихъ ѡ҆сщ҃е́нїе.
Ра́дꙋйсѧ, ра́досте на́ша, во ѡ҆б̾ѧ́тїихъ свои́хъ ра́дость всегѡ̀ мі́ра носи́вшаѧ.
Конда́къ а҃
Взбра́нной воево́дѣ не ᲂу҆молчи́мъ никогда̀ глаго́лати, недосто́йнїи: всест҃а́ѧ дв҃о, ро́ждшаѧ на сп҃се́нїе на́ше ра́дость вѣ́чнꙋю, всѧ́кое ᲂу҆ны́нїе и҆ печа́ль ѿженѝ ѿ на́съ, да зове́мъ тѝ:
Ра́дꙋйсѧ, ра́досте на́ша, во ѡ҆б̾ѧ́тїихъ свои́хъ ра́дость всегѡ̀ мі́ра носи́вшаѧ.
Моли́твы
ѽ прест҃а́ѧ дв҃о, всебл҃га́гѡ сн҃а мт҃и всебл҃га́ѧ, первопресто́льнагѡ гра́да и҆ ст҃а́гѡ хра́ма сегѡ̀ покро́ве, всѣ̑мъ же сꙋ́щымъ во грѣсѣ́хъ, ско́рбехъ, бѣда́хъ и҆ болѣ́знехъ вѣ́рнаѧ предста́тельнице и҆ застꙋ́пнице! Не пре́зри моле́нїѧ недосто́йныхъ ра̑бъ твои́хъ, но ᲂу҆молѝ сн҃а твоего̀ и҆ бг҃а на́шего, да всѣ̑мъ на́мъ, съ вѣ́рою и҆ ᲂу҆миле́нїемъ покланѧ́ющымсѧ пред̾ чꙋдотво́рнымъ ѻ҆́бразомъ твои́мъ си́мъ, да́рꙋетъ по коегѡ́ждо потре́бѣ ра́дость: сꙋ́щымъ въ ско́рбехъ и҆ печа́лехъ ᲂу҆тѣше́нїе: въ бѣда́хъ и҆ ѡ҆ѕлобле́нїихъ пребыва́ющымъ соверше́нное си́хъ и҆збы́тїе: малодꙋ̑шнымъ и҆ ненадє́жнымъ наде́ждꙋ и҆ терпѣ́нїе: въ ра́дости и҆ и҆з̾ѻби́лїи живꙋ́щымъ непреста́нное бг҃ꙋ бл҃годаре́нїе: сꙋ́щымъ въ многонедꙋ́жїи неча́емое и҆сцѣле́нїе и҆ ᲂу҆крѣпле́нїе: всѣ̑мъ на́мъ вседѣ́йственное вразꙋмле́нїе, покаѧ́нїе же и҆ сп҃се́нїе.
ѽ гпⷭ҇жѐ прест҃а́ѧ, ᲂу҆млⷭ҇рдисѧ ѡ҆ всѣ́хъ, чтꙋ́щихъ всечтⷭ҇но́е и҆́мѧ твоѐ, и҆ ꙗ҆вѝ на́мъ всемо́щный покро́въ тво́й и҆ застꙋпле́нїе. Всѧ́комꙋ дѣ́лꙋ, сн҃ꙋ твоемꙋ̀ ᲂу҆го́дномꙋ, споспѣ́шествꙋй: всѧ́кое дѣ́ло ѕло́е разрꙋшѝ: въ недоꙋмѣ́нїи и҆ трꙋ́дныхъ и҆ ѻ҆па́сныхъ ѡ҆бстоѧ́нїихъ ѡ҆брѣта́ющымсѧ незри́мꙋю по́мощь и҆ вразꙋмле́нїе съ нб҃сѐ низпослѝ. И҆ всѣ̑мъ на́мъ да́ждь любо́вь дрꙋ́гъ ко дрꙋ́гꙋ, бл҃гоче́стїе и҆ здра́вїе съ долгоде́нствїемъ. Преста́вльшихсѧ въ вѣ́рѣ и҆ покаѧ́нїи ѿ житїѧ̀ сегѡ̀ со а҆́гг҃лы и҆ всѣ́ми ст҃ы́ми жи́ти сотворѝ, да всѝ на землѝ, ꙗ҆́кѡ на нб҃сѝ, вѣ́дꙋще тѧ̀ тве́рдꙋю и҆ непосты́днꙋю предста́тельницꙋ ро́да хрⷭ҇тїа́нскагѡ, сла́вѧтъ безнача́льнаго ѻ҆ц҃а̀ со є҆диноро́днымъ є҆гѡ̀ сн҃омъ, и҆ всест҃ы́мъ и҆ животворѧ́щимъ є҆гѡ̀ дх҃омъ, ны́нѣ и҆ при́снѡ, и҆ во вѣ́ки вѣкѡ́въ. А҆ми́нь.