Канѡ́нъ ст҃ы̑мъ мꙋ́ченикѡмъ 14000 младе́нцємъ, ѿ и҆́рѡда въ виѳлее́мѣ и҆збїє́ннымъ

Звезда́ возсия́ в Вифлее́ме и Еде́ма от мра́чныя разреши́ кля́твы, и спасе́ния де́нь да́руется родонача́льником, из де́вственна о́блака просия́вый Иису́с, су́щих во тме́ просвеще́ние.

Три́знище дне́сь младе́нцев отве́рзеся ве́рным за Христа́ и Бо́га, враго́в облича́я нача́ла и вла́сти и И́родов облича́я му́жески младоу́мный гне́в смы́сленно.

Де́вственною две́рию проше́д, Соде́тель и Бо́г на́ш плотски́й до́м Себе́ созда́ неизглаго́ланно, и Младе́нец бы́сть, и во я́слех восклони́ся.

Све́рстницы, де́ти — страда́льцы Христо́ва воплоще́ния, И́родово неразу́мное ослепи́ша неи́стовство и о́чи всесве́тлии Це́ркве яви́шася.

Де́ва и не́бо, небе́сныя и земны́я, Рождество́м хода́тайствовавши, па́че ума́ примири́ и вражды́ средосте́ние разори́.

Младе́нец мно́жество му́ченически, по Бо́зе все́х пострада́вше, по́чести страда́ния от Него́ прие́млет: и́хже ра́ди И́род весьма́ устыде́ся.

Чу́вственное у́бо со́лнце о́блаки покрыва́ется, У́мное же и Всеневеще́ственное, безме́рным благоутро́бием в пло́ть оде́явся, в верте́пе дне́сь пелена́ми повива́ется на́с ра́ди.

Скверноуби́йства кровьми́ И́род оскверня́ется: Влады́ку бо все́х, Бо́га и Царя́, уби́ти покуша́яся, на о́троки неи́стовствует и свире́пствует лю́те.

Боже́ственное воплоще́ния Сло́ва соверша́ется дне́сь та́инство, Богоро́дице: Тобо́ю бо яви́ся пло́тию Бо́г Преве́чный, да обожи́т прия́тие.

Рахи́ль, у́бо ча́д пла́чущи, дре́вле провозвести́ за Христа́ младе́нцев, прие́мших безго́дное заколе́ние; те́м и отрица́шеся, уте́шитися не хотя́щи.

Весели́тся дне́сь Вифлее́м с на́ми, Тя́ бо, Невмести́маго, в верте́пе прие́млет, — благослове́н еси́, — вопия́, — еди́н Бо́г оте́ц на́ших.

Незло́бива же́ртва и нескве́рная за Тя́ предзакала́ется, Бо́жий Сло́ве, вопию́ще: благослове́н еси́, Го́споди, Бо́же оте́ц на́ших.

А́нгели сла́вят вла́сть Ро́ждшагося, па́стырие чудя́тся, и волсви́ покланя́ются, небеса́ возвеща́ют звездо́ю Зижди́теля; с ни́миже вси́, воспева́юще, вопие́м: благослови́те, дела́ Госпо́дня, Го́спода.

Мно́жество неискусозло́бное во́инствует Влады́це дне́сь кро́вию и на И́рода тве́рдо вооружа́ется, Тебе́, Христе́, ро́ждшуся. Те́м вси́ вопие́м, воспева́юще: благослови́те, дела́ Госпо́дня, Го́спода.

Ве́сь в Тебе́ вмеща́ется, И́же в не́дрех сы́й Отца́, и зи́ждется Зижди́тель небесе́, и истощава́ется мене́ ра́ди, и, в пелена́х пови́вся, разреша́ет прегреше́ний плени́цы.

В Ра́ме слы́шася Рахи́ли го́рькое рыда́ние, пла́чь же, и увы́, и сокруше́ние: скверноуби́йца бо вра́г, на ча́да Вифлее́мская, И́род показа́ся.

Ѕвѣзда̀ возсїѧ̀ въ виѳлее́мѣ, и҆ є҆де́ма ѿ мра́чныѧ разрѣшѝ клѧ́твы: и҆ спасе́нїѧ де́нь да́рꙋетсѧ родонача́льникѡмъ, и҆зъ дѣ́вственна ѻ҆́блака просїѧ́вый і҆и҃съ, сꙋ́щихъ во тмѣ̀ просвѣще́нїе.

Три́знище дне́сь младе́нцєвъ ѿве́рзесѧ, вѣ̑рнымъ за хрⷭ҇та̀ и҆ бг҃а, врагѡ́въ ѡ҆блича́ѧ нача̑ла и҆ вла̑сти, и҆ и҆́рѡдовъ ѡ҆блича́ѧ мꙋ́жески младоꙋ́мный гнѣ́въ смы́сленнѡ.

Дѣ́вственною две́рїю проше́дъ содѣ́тель и҆ бг҃ъ на́шъ, плотскі́й до́мъ себѣ̀ созда̀ неизглаго́ланнѡ, и҆ млⷣнецъ бы́сть, и҆ во ꙗ҆́слехъ восклони́сѧ.

Свє́рстницы дѣ́ти страда́льцы хрⷭ҇то́ва воплоще́нїѧ, и҆́рѡдово неразꙋ́мное ѡ҆слѣпи́ша неи́стовство, и҆ ѻ҆́чи всесвѣ́тлїи цр҃кве ꙗ҆ви́шасѧ.

Дв҃а и҆ не́бо, нбⷭ҇ныѧ и҆ земны̑ѧ, ржⷭ҇тво́мъ хода́тайствовавши, па́че ᲂу҆ма̀ примирѝ, и҆ вражды̀ средостѣ́нїе разорѝ.

Младе́нєцъ мно́жество мꙋ́ченически, по бз҃ѣ всѣ́хъ пострада́вше, по́чєсти страда́нїѧ ѿ негѡ̀ прїе́млетъ: и҆́хже ра́ди и҆́рѡдъ весьма̀ ᲂу҆стыдѣ́сѧ.

Чꙋ́вственное ᲂу҆́бѡ со́лнце ѻ҆́блаки покрыва́етсѧ, ᲂу҆́мное же и҆ всеневеще́ственное безмѣ́рнымъ бл҃гоꙋтро́бїемъ въ пло́ть ѡ҆дѣ́ѧвсѧ, въ верте́пѣ дне́сь пелена́ми повива́етсѧ на́съ ра́ди.

Скверноꙋбі́йства кровьмѝ и҆́рѡдъ ѡ҆сквернѧ́етсѧ: влⷣкꙋ бо всѣ́хъ бг҃а и҆ цр҃ѧ̀ ᲂу҆би́ти покꙋша́ѧсѧ, на ѻ҆́троки неи́стовствꙋетъ и҆ свирѣ́пствꙋетъ лю́тѣ.

Бжⷭ҇твенное воплоще́нїѧ сло́ва соверша́етсѧ дне́сь та́инство, бцⷣе: тобо́ю бо ꙗ҆ви́сѧ пло́тїю бг҃ъ превѣ́чный, да ѡ҆божи́тъ прїѧ́тїе.

Рахи́ль ᲂу҆́бѡ ча̑дъ пла́чꙋщи, дре́вле провозвѣстѝ за хрⷭ҇та̀ младе́нцєвъ прїе́мшихъ безго́дное заколе́нїе. тѣ́мъ и҆ ѿрица́шесѧ, ᲂу҆тѣ́шитисѧ не хотѧ́щи.

Весели́тсѧ дне́сь виѳлее́мъ съ на́ми, тѧ́ бо невмѣсти́маго въ верте́пѣ прїе́млетъ, бл҃гослове́нъ є҆сѝ, вопїѧ̀, є҆ди́нъ бг҃ъ ѻ҆тє́цъ на́шихъ.

Неѕло́бива же́ртва и҆ нескве́рнаѧ за тѧ̀ предзакала́етсѧ, бж҃їй сло́ве, вопїю́ще: бл҃гослове́нъ є҆сѝ, гдⷭ҇и бж҃е ѻ҆ц҃ъ на́шихъ.

А҆́гг҃ли сла́вѧтъ вла́сть ро́ждшагѡсѧ, па́стырїе чꙋдѧ́тсѧ, и҆ волсвѝ покланѧ́ютсѧ, небеса̀ возвѣща́ютъ ѕвѣздо́ю зижди́телѧ: съ ни́миже всѝ воспѣва́юще, вопїе́мъ: благослови́те дѣла̀ гдⷭ҇нѧ, гдⷭ҇а.

Мно́жество неискꙋсоѕло́бное во́инствꙋетъ влⷣцѣ дне́сь кро́вїю, и҆ на и҆́рѡда тве́рдѡ воѡрꙋжа́етсѧ, тебѣ̀, хрⷭ҇тѐ, ро́ждшꙋсѧ. тѣ́мъ всѝ вопїе́мъ, воспѣва́юще: благослови́те дѣла̀ гдⷭ҇нѧ, гдⷭ҇а.

Ве́сь въ тебѣ̀ вмѣща́етсѧ, и҆́же въ нѣ́дрѣхъ сы́й ѻ҆ц҃а̀, и҆ зи́ждетсѧ зижди́тель небесѐ, и҆ и҆стощава́етсѧ менє̀ ра́ди: и҆ въ пелена́хъ пови́всѧ, разрѣша́етъ прегрѣше́нїй плени̑цы.

Въ ра́мѣ слы́шасѧ рахи́ли го́рькое рыда́нїе, пла́чь же, и҆ ᲂу҆вы̀, и҆ сокрꙋше́нїе: скверноꙋбі́йца бо вра́гъ, на ча̑да виѳлеє́мскаѧ, и҆́рѡдъ показа́сѧ.