Канѡ́нъ ст҃о́мꙋ прпⷣбномꙋ Марке́ллꙋ, и҆гꙋ́менꙋ ѡ҆би́тели «Неꙋсыпа́ющихъ»

Обновля́ется тва́рь, и земны́х естество́ новотвори́тся пло́тию Творца́ все́х, па́че ума́ Христа́ ражда́ема из Чи́стыя и Пресвяты́я Ма́тере.

Ра́зум прие́м, о́тче, от Бо́га и́стины, и непреста́нно взыска́в Его́ житие́м, Марке́лле, чи́стым, и боже́ственными доброде́тельми угоди́л еси́.

О́блацы, ка́плите на зе́млю сла́дость весе́лия: из о́блака бо све́тла возсия́ Христо́с, в верте́пе пло́тски па́че вся́кия мы́сли ражда́емь.

Тве́рдостию души́ на враги́ мы́сленныя вооружи́вся, богоно́се, посе́кл еси́ те́х ополче́ния держа́вно и побе́ды увя́злся еси́ венце́м.

Ви́девше, Го́споди, е́же в верте́пе Твое́ сни́тие, чи́нове мы́сленнии стра́хом ужасо́шася и воспе́ша, Христе́, недомы́сленную Твою́ ми́лость.

Боле́зни, преподо́бне, и по́ты твоя́ с кро́вными струя́ми младе́нцев сме́шени, Марке́лле, Ро́ждшемуся пло́тию да́ры че́стны принесо́шася.

Прелива́ется ча́ша благоутро́бия Твоего́, Христе́, во творе́ния вся́, и оби́льно сия́ ми́лости испо́лни, пло́тию я́вльшуся и ро́ждшуся Тебе́.

Ве́щнаго, преподо́бне, души́ помраче́ния и вся́кия земны́я и тле́нныя красоты́ боле́зньми очи́стив твоего́ по́стничества, равноа́нгелен показа́лся еси́ в ми́ре, Марке́лле.

Ми́ра благово́ннейшая издаде́ земля́ в себе́ па́че смы́сла, неистоще́ннаго ми́ра, от Чи́стыя пло́тию источи́вшаго и челове́ки благово́ния боже́ственнаго испо́лнившаго.

Жития́ привре́менное и нестоя́нное му́дре усмотри́в, Марке́лле, к присностоя́щим душе́вное возвы́сил еси́ жела́ние, е́же получи́л еси́ боле́зньми по́стничества.

Поколеба́вшуюся безбо́жием всю́ тва́рь И́же в верте́пе Рожде́йся утверди́ позна́нием Свои́м па́ки, непреста́нно зову́щую Ему́: благослове́н еси́, Бо́же оте́ц на́ших.

Огне́м у́бо по́стничества попали́л еси́, Марке́лле, плотски́я сла́сти, безстра́стия же росо́ю напои́л еси́ ду́шу, вопия́ Христу́ све́тло: благослове́н еси́, Бо́же оте́ц на́ших.

Светоно́сною тва́рь оде́ждею одева́ется, и пе́рвое се́тование все́ отложи́, Обнови́телю и Влады́це ро́ждшуся на земли́: Его́же превозно́сим во ве́ки.

Вооружи́вся доброде́тельми, преподо́бне Марке́лле, ополче́ния де́монов побори́л еси́, и я́ко победи́тель на ты́я взя́л еси́ одоле́ния, и чуде́с благода́ть от Бо́га прия́л еси́.

Позна́на показа́ся, Христе́, ми́лость, я́же па́че ума́, Твоего́ человеколю́бия язы́ком: пло́тию бо, Влады́ко, обнища́л еси́, да прича́стники бога́тства лу́чшаго, Го́споди, сотвори́ши ны́, я́ко Бла́г и Многоми́лостив.

Кре́ст на ра́мена взе́м, блаже́нне, Христо́в, и, Сего́ стра́сти подража́я, распя́лся еси́ ми́ру ве́сь, о́тче Марке́лле: прича́стник бо бы́л еси́ воскресе́ния и сла́вы лу́чшия, в не́йже на́с помина́й.

Ѡ҆бновлѧ́етсѧ тва́рь, и҆ земны́хъ є҆стество̀ новотвори́тсѧ, пло́тїю творца̀ всѣ́хъ па́че ᲂу҆ма̀ хрⷭ҇та̀ ражда́ема и҆зъ чⷭ҇тыѧ и҆ прест҃ы́ѧ мт҃ре.

Ра́зꙋмъ прїе́мъ, ѻ҆́ч҃е, ѿ бг҃а и҆́стины, и҆ непреста́ннѡ взыска́въ є҆го̀ житїе́мъ, марке́лле, чи́стымъ, и҆ бжⷭ҇твенными добродѣ́тельми ᲂу҆годи́лъ є҆сѝ.

Ѻ҆́блацы ка́плите на зе́млю сла́дость весе́лїѧ: и҆зъ ѻ҆́блака бо свѣ́тла возсїѧ̀ хрⷭ҇то́съ, въ верте́пѣ пло́тски па́че всѧ́кїѧ мы́сли ражда́емь.

Тве́рдостїю дꙋшѝ на врагѝ мы́слєнныѧ воѡрꙋжи́всѧ, бг҃оно́се, посѣ́клъ є҆сѝ тѣ́хъ ѡ҆полчє́нїѧ держа́внѡ, и҆ побѣ́ды ᲂу҆вѧ́злсѧ є҆сѝ вѣнце́мъ.

Ви́дѣвше, гдⷭ҇и, є҆́же въ верте́пѣ твоѐ сни́тїе, чи́нове мы́сленнїи стра́хомъ ᲂу҆жасо́шасѧ, и҆ воспѣ́ша, хрⷭ҇тѐ, недомы́сленнꙋю твою̀ ми́лость.

Болѣ́зни, прпⷣбне, и҆ по́ты твоѧ̑ съ кро́вными стрꙋѧ́ми младе́нцєвъ смѣ́шени, марке́лле: ро́ждшемꙋсѧ пло́тїю да́ры че́стны принесо́шасѧ.

Прелива́етсѧ ча́ша бл҃гоꙋтро́бїѧ твоегѡ̀, хрⷭ҇тѐ, во творє́нїѧ всѧ̑, и҆ ѻ҆би́льнѡ сїѧ̑ ми́лости и҆спо́лни, пло́тїю ꙗ҆́вльшꙋсѧ и҆ ро́ждшꙋсѧ тебѣ̀.

Ве́щнагѡ, преподо́бне, дꙋшѝ помраче́нїѧ, и҆ всѧ́кїѧ земны́ѧ и҆ тлѣ́нныѧ красоты̀, болѣ́зньми ѡ҆чи́стивъ твоегѡ̀ по́стничества, равноа́гг҃ленъ показа́лсѧ є҆сѝ въ мі́рѣ, марке́лле.

Мѵ̑ра благовѡ́ннѣйшаѧ и҆здадѐ землѧ̀ въ себѣ̀ па́че смы́сла, неистоще́ннагѡ мѵ́ра, ѿ чⷭ҇тыѧ пло́тїю и҆сточи́вшаго, и҆ человѣ́ки благово́нїѧ бжⷭ҇твеннагѡ и҆спо́лнившаго.

Житїѧ̀ привре́менное и҆ нестоѧ́нное мꙋ́дрѣ ᲂу҆смотри́въ, марке́лле, къ присностоѧ́щымъ дꙋше́вное возвы́силъ є҆сѝ жела́нїе є҆́же полꙋчи́лъ є҆сѝ болѣ́зньми по́стничества.

Поколеба́вшꙋюсѧ безбо́жїемъ всю̀ тва́рь, и҆́же въ верте́пѣ рожде́йсѧ, ᲂу҆твердѝ позна́нїемъ свои́мъ па́ки, непреста́ннѡ зовꙋ́щꙋю є҆мꙋ̀: бл҃гослове́нъ є҆сѝ, бж҃е ѻ҆тє́цъ на́шихъ.

Ѻ҆гне́мъ ᲂу҆́бѡ по́стничества попали́лъ є҆сѝ, марке́лле, плотскі̑ѧ сла̑сти: безстра́стїѧ же росо́ю напои́лъ є҆сѝ дꙋ́шꙋ, вопїѧ̀ хрⷭ҇тꙋ̀ свѣ́тлѡ, бл҃гослове́нъ є҆сѝ, бж҃е ѻ҆ц҃ъ на́шихъ.

Свѣтоно́сною тва́рь ѻ҆де́ждею ѡ҆дѣва́етсѧ, и҆ пе́рвое сѣ́тованїе всѐ ѿложѝ, ѡ҆бнови́телю и҆ влⷣцѣ ро́ждшꙋсѧ на землѝ: є҆го́же превозно́симъ во вѣ́ки.

Воѡрꙋжи́всѧ добродѣ́тельми, прпⷣбне марке́лле, ѡ҆полчє́нїѧ де́мѡнѡвъ побори́лъ є҆сѝ, и҆ ꙗ҆́кѡ побѣди́тель на ты́ѧ взѧ́лъ є҆сѝ ѡ҆долѣ̑нїѧ, и҆ чꙋде́съ бл҃года́ть ѿ бг҃а прїѧ́лъ є҆сѝ.

Позна́на показа́сѧ, хрⷭ҇тѐ, ми́лость, ꙗ҆́же па́че ᲂу҆ма̀ твоегѡ̀ человѣколю́бїѧ ꙗ҆зы́кѡмъ: пло́тїю бо, влⷣко, ѡ҆бнища́лъ є҆сѝ, да прича́стники бога́тства лꙋ́чшагѡ, гдⷭ҇и, сотвори́ши ны̀, ꙗ҆́кѡ бл҃гъ и҆ многоми́лостивъ.

Крⷭ҇тъ на ра́мена взе́мъ, блаже́нне, хрⷭ҇то́въ, и҆ сегѡ̀ стрⷭ҇ти подража́ѧ, распѧ́лсѧ є҆сѝ мі́рꙋ ве́сь, ѻ҆́ч҃е марке́лле: прича́стникъ бо бы́лъ є҆сѝ воскрⷭ҇нїѧ и҆ сла́вы лꙋ́чшїѧ, въ не́йже на́съ помина́й.