Российская Православная Церковь

по благословенію Архіерейскаго Сѵнода Россійской Православной Церкви

Православный календарь

Ака́ѳістъ

А҆ка́ѳїстъ ст҃и́телю васі́лїю вели́комꙋ, а҆рхїепⷭ҇кпꙋ кесарі́и каппадокі́йскїѧ

Свт. Василия Великого, архиеп. Кесарии Каппадокийской (379) 14 января 2026

Конда́къ а҃

Взбра́нный цр҃ѧ̀ нбⷭ҇нагѡ слꙋжи́телю и҆ вели́кїй цр҃кве хрⷭ҇то́вы ст҃и́телю, пра́выѧ вѣ́ры и҆сповѣ́данїемъ во всѣ́мъ мі́рѣ просїѧ́вый, ве́лїе и҆мѣ́ѧй дерзнове́нїе ко ст҃ѣ́й трⷪ҇цѣ, ѿ всѧ́кихъ на́съ бѣ́дъ ѡ҆гражда́й, со ᲂу҆миле́нїемъ тебѣ̀ вопїю́щихъ:

Ра́дꙋйсѧ, васі́лїе, вели́кїй і҆ера́рше, правосла́вїѧ всемі́рный свѣти́льниче.

І҆́косъ а҃

А҆́гг҃лѡвъ творе́цъ, ѿ вѣ́ка пред̾избра́вый тѧ̀, пребл҃же́нне ѻ҆́ч҃е васі́лїе, бы́ти вели́кагѡ свѣти́льника цр҃кве своеѧ̀, а҆гг҃лоподо́бна житїе́мъ ꙗ҆ви́ тѧ: вельми́ бо бг҃омы́слїемъ и҆ поще́ньми въ пꙋсты́ни подвиза́всѧ, на высотꙋ̀ добродѣ́тели возше́лъ є҆сѝ. Тѣ́мже, ве́лїю на нб҃сѣ́хъ сла́вꙋ стѧжа́вый, прїимѝ ѿ на́съ, смире́нныхъ, восхвалѧ́ти тѧ̀ дерза́ющихъ, сїѧ̑ хвалє́бныѧ глаго́лы:

Ра́дꙋйсѧ, васі́лїе, ца́рствїѧ тезоимени́тый: ра́дꙋйсѧ, і҆ера́рше хрⷭ҇то́въ вели́кїй.

Ра́дꙋйсѧ, цр҃кве непоколеби́мый сто́лпе: ра́дꙋйсѧ, ро́да ст҃а́гѡ пречⷭ҇тна́ѧ ѻ҆́трасле.

Ра́дꙋйсѧ, ѿ ю҆́ности цр҃ю̀ нбⷭ҇номꙋ всеꙋсе́рднѡ слꙋжи́вый: ра́дꙋйсѧ, все́ю земно́ю, наипа́че же нбⷭ҇ною, премꙋ́дростїю ᲂу҆́мъ сво́й ѡ҆богати́вый.

Ра́дꙋйсѧ, кꙋ́пнѡ со дрꙋ́гомъ твои́мъ григо́рїемъ бг҃осло́вомъ въ любомꙋ́дрїи преꙋспѣва́вый: ра́дꙋйсѧ, ᲂу҆чи́телѧ твоего̀ є҆ѵвꙋ́ла премꙋ́дрыми словесы̀ ко хрⷭ҇тꙋ̀ ѡ҆брати́вый.

Ра́дꙋйсѧ, чистоты̀ и҆ цѣломꙋ́дрїѧ преди́вный храни́телю: ра́дꙋйсѧ, ко сп҃се́нїю вѣ́рный пꙋтеводи́телю.

Ра́дꙋйсѧ, дꙋшепа́гꙋбныхъ є҆ресе́й разори́телю: ра́дꙋйсѧ, бг҃омꙋ́дрый вселе́нныѧ ᲂу҆чи́телю.

Ра́дꙋйсѧ, васі́лїе, вели́кїй і҆ера́рше, правосла́вїѧ всемі́рный свѣти́льниче.

Конда́къ в҃

Ви́дѧ цр҃ковь хрⷭ҇то́вꙋ а҆рїа́нскимъ ѕловѣ́рїемъ ѡ҆бꙋрева́емꙋ, и҆ бж҃їю призва́нїю повинꙋ́ѧсѧ, и҆зше́лъ є҆сѝ, прпⷣбне ѻ҆́тче, и҆з̾ пꙋсты́ни, ю҆́же возлюби́лъ є҆сѝ, во гра́дъ кесарі́ю, и҆дѣ́же бл҃года́ть сщ҃е́нства воспрїѧ́лъ є҆сѝ и҆ во а҆рхїепⷭ҇копа поста́вленъ бы́лъ є҆сѝ, сло́во сп҃се́нїѧ велегла́снѡ всѣ̑мъ концє́мъ землѝ бл҃говѣствꙋ́ѧ, вѣ́рныѧ же по всѧ̑ днѝ поꙋча́ѧ бг҃ꙋ, созда́телю всѣ́хъ, досто́йнѡ воспѣва́ти: А҆ллилꙋ́їа.

І҆́косъ в҃

Ра́зꙋмъ вѣ́рныхъ бг҃овѣ́дѣнїемъ просвѣща́ѧ, ст҃и́телю хрⷭ҇то́въ васі́лїе, є҆стество̀ сꙋ́щихъ и҆з̾ѧсни́лъ є҆сѝ, и҆ бг҃а неви́димаго въ творе́нїихъ рꙋкꙋ̀ є҆гѡ̀ познава́ти наꙋчи́лъ є҆сѝ. Тѣ́мже и҆ мы̀, твои́ми бг҃омꙋ́дрыми ᲂу҆че́ньми просвѣща́емїи, взыва́емъ си́це:

Ра́дꙋйсѧ, позна́нїемъ бг҃а, въ ше́сть дні́й всѧ̑ сотво́рша, вѣ́рныѧ ѡ҆зари́вый: ра́дꙋйсѧ, ди́вныѧ дѣла̀ є҆гѡ̀ досто́йнѡ восхвалѧ́ти наꙋчи́вый.

Ра́дꙋйсѧ, пала́то мꙋ́дрости преꙋкраше́ннаѧ: ра́дꙋйсѧ, сокро́вищница бг҃осло́вїѧ преиз̾ѻби́льнаѧ.

Ра́дꙋйсѧ, ꙗ҆́кѡ та́йны премꙋ́дрости бж҃їѧ во все́мъ мі́рѣ ви́дѣти наꙋча́лъ є҆сѝ: ра́дꙋйсѧ, ꙗ҆́кѡ и҆ въ ма́лыхъ ве́щехъ вели́чїе бж҃їе зрѣ́ти наставлѧ́лъ є҆сѝ.

Ра́дꙋйсѧ, свѣ́та первозда́ннагѡ красотꙋ̀ живописа́вый: ра́дꙋйсѧ, тве́рдꙋю си́лꙋ пе́рвагѡ гл҃го́ла бж҃їѧ во вселе́ннѣй показа́вый.

Ра́дꙋйсѧ, бы́лїемъ травны́мъ ско́рꙋю ги́бель сла́вы земны́ѧ и҆зѻбрази́вый: ра́дꙋйсѧ, во бл҃голѣ́пїи свѣти̑лъ нбⷭ҇ныхъ сл҃нце пра́вды хрⷭ҇та̀ зрѣ́ти ᲂу҆каза́вый.

Ра́дꙋйсѧ, трꙋдолю́бїемъ ма́лой тва́ри ѿ лѣ́ности люде́й ѿвраща́вый: ра́дꙋйсѧ, человѣ́кꙋ, царю̀ тва́рей, над̾ страстьмѝ ца́рствовати повелѣва́вый.

Ра́дꙋйсѧ, васі́лїе, вели́кїй і҆ера́рше, правосла́вїѧ всемі́рный свѣти́льниче.

Конда́къ г҃

Си́лою всевы́шнѧгѡ ᲂу҆крѣплѧ́емь, ѻ҆́тче ст҃ы́й васі́лїе, противобо́рствовалъ є҆сѝ бг҃оѿстꙋ́пникꙋ і҆ꙋлїа́нꙋ, и҆ ѕло́е є҆гѡ̀ на хрⷭ҇тїа́ны ᲂу҆мышле́нїе разрꙋши́ти ᲂу҆моли́лъ є҆сѝ гдⷭ҇а и҆ пречⷭ҇тꙋю є҆гѡ̀ мт҃рь, да всѝ є҆ди́номꙋ бг҃ꙋ бл҃года́рнѡ пою́тъ: А҆ллилꙋ́їа.

І҆́косъ г҃

И҆мѣ́ѧй ре́вность ве́лїю по бз҃ѣ вседержи́теле и҆ ме́чь сло́ва є҆гѡ̀ въ рꙋцѣ̀ воспрїи́мъ, пле́вєлы ꙗ҆зы́ческагѡ і҆ꙋлїа́нова нече́стїѧ ско́рѡ посѣ́клъ є҆сѝ, вѣ́рныѧ же во бл҃гоче́стїи ᲂу҆тверди́лъ є҆сѝ: наꙋчѝ и҆ на́съ, прпⷣбне ѻ҆́тче, є҆ди́номꙋ то́чїю бг҃ꙋ чⷭ҇тымъ житїе́мъ слꙋжи́ти, зовꙋ́щихъ тѝ си́це:

Ра́дꙋйсѧ, го́рдагѡ і҆ꙋлїа́на въ бг҃оѿстꙋ́пствѣ мꙋ́жественнѡ ѡ҆бличи́вый: ра́дꙋйсѧ, хрⷭ҇тоненави́стныѧ є҆гѡ̀ начина́нїѧ разрꙋши́вый.

Ра́дꙋйсѧ, мл҃твою сле́зною, ꙗ҆́кѡ копїе́мъ, того̀ порази́вый: ра́дꙋйсѧ, ско́рꙋю є҆гѡ̀ поги́бель предвозвѣсти́вый.

Ра́дꙋйсѧ, лю́ди бж҃їѧ, ꙗ҆́коже мѡѷсе́й дре́вле і҆и҃лѧ, ѿ і҆дѡлослꙋже́нїѧ свободи́вый: ра́дꙋйсѧ, пле́вєлы нече́стїѧ и҆стреби́вый.

Ра́дꙋйсѧ, пи́щею слове́съ бж҃їихъ вѣ́рныѧ и҆з̾ѻби́льнѡ насы́тивый: ра́дꙋйсѧ, стрꙋѧ́ми бл҃года́ти сердца̀ напои́вый.

Ра́дꙋйсѧ, скрижа́ли велѣ́нїй хрⷭ҇то́выхъ тве́рдѡ содержа́ти ᲂу҆вѣщева́вый: ра́дꙋйсѧ, ᲂу҆че́нїе ᲂу҆́стъ твои́хъ житїе́мъ ᲂу҆тверди́вый.

Ра́дꙋйсѧ, ра́бе бл҃гі́й и҆ вѣ́рный: ра́дꙋйсѧ, дѣ́лателю вертогра́да хрⷭ҇то́ва ᲂу҆се́рдный.

Ра́дꙋйсѧ, васі́лїе, вели́кїй і҆ера́рше, правосла́вїѧ всемі́рный свѣти́льниче.

Конда́къ д҃

Бꙋ́рю ꙗ҆́рости царѧ̀ ᲂу҆а́лента, а҆рїа́нскимъ ѕловѣ́рїемъ ѡ҆держи́ма, ты̀, свѧ́тче бж҃їй, си́лою дх҃а въ тебѣ̀ живꙋ́ща, ᲂу҆ти́шилъ є҆сѝ, и҆ ми́ръ цр҃кви ст҃ѣ́й дарова́лъ є҆сѝ, ст҃ы́ми трꙋда́ми твои́ми и҆ те́плыми къ бг҃ꙋ мл҃твами є҆мꙋ́же ра́дꙋѧсѧ воспѣ́лъ є҆сѝ: А҆ллилꙋ́їа.

І҆́косъ д҃

Слы́шавъ ѕлочести́вый ᲂу҆а́лентъ, ꙗ҆́кѡ ты̀, і҆ера́рше бж҃їй, во и҆́стинѣ стои́ши, и҆ всѝ вѣ́рнїи гла́сꙋ твоемꙋ̀ повинꙋ́ютсѧ, восхотѣ̀ ѿ пра́выѧ вѣ́ры тѧ̀ ѿврати́ти: сегѡ̀ ра́ди посла̀ къ тебѣ̀ є҆па́рха своегѡ̀ моде́ста, по́слѣжде же и҆ са́мъ прїи́де въ кесарі́ю. Но ты̀, бг҃оно́се ѻ҆́ч҃е, ни гнѣ́ва царе́ва, ни преще́нїй гро́знагѡ є҆гѡ̀ воево́ды не ᲂу҆страши́лсѧ є҆сѝ: мы́ же, прославлѧ́юще сицево́е твоѐ тве́рдое и҆сповѣ́данїе, вопїе́мъ тѝ:

Ра́дꙋйсѧ, побо́рниче пра́выѧ вѣ́ры непоколеби́мый: ра́дꙋйсѧ, па́стырю, дꙋ́шꙋ за вѣ̑рныѧ положи́ти гото́вый.

Ра́дꙋйсѧ, тве́рдое и҆сповѣ́данїе петро́во показа́вый: ра́дꙋйсѧ, и҆лїинꙋ̀ ре́вность ѡ҆ сла́вѣ ст҃ы́ѧ трⷪ҇цы ꙗ҆ви́вый.

Ра́дꙋйсѧ, гнѣ́въ царѧ̀ нечести́вагѡ бг҃олѣ́пїемъ сщ҃еннослꙋже́нїѧ ᲂу҆ти́шивый: ра́дꙋйсѧ, бг҃омꙋ́дрыми словесы̑ ᲂу҆ста̀ ѕловѣ́рнагѡ воево́ды загради́вый.

Ра́дꙋйсѧ, ꙗ҆́кѡ прещє́нїѧ и҆згна́нїемъ и҆ мꙋ́ками не ᲂу҆боѧ́лсѧ є҆сѝ: ра́дꙋйсѧ, ꙗ҆́кѡ и҆ сме́рть за хрⷭ҇та̀ воспрїѧ́ти жела́лъ є҆сѝ.

Ра́дꙋйсѧ, гоне́нїе за вѣ́рꙋ претерпѣ́вый: ра́дꙋйсѧ, скорбьмѝ мнѡ́гими въ ра́дость гдⷭ҇а вше́дый.

Ра́дꙋйсѧ, и҆́стинꙋ хрⷭ҇то́вꙋ пред̾ цари̑ и҆ влады̑ки небоѧ́зненнѡ вѣща́вый: ра́дꙋйсѧ, вѣ́рнагѡ слꙋжи́телѧ цр҃ѧ̀ нбⷭ҇нагѡ тве́рдымъ и҆сповѣ́данїемъ себѐ показа́вый.

Ра́дꙋйсѧ, васі́лїе, вели́кїй і҆ера́рше, правосла́вїѧ всемі́рный свѣти́льниче.

Конда́къ є҃

Бг҃оте́чнаѧ ѕвѣзда̀ ꙗ҆ви́лсѧ є҆сѝ, ст҃и́телю хрⷭ҇то́въ васі́лїе, пресвѣ́тлыми млⷭ҇рдїѧ лꙋча́ми но́щь скорбе́й мра́чнꙋю ѡ҆сїѧва́ющаѧ, мглꙋ̀ бѣ́дъ ѿгонѧ́ющаѧ, и҆ всѣ̑мъ, въ мо́ре житїѧ̀ бꙋ́рнѣмъ плывꙋ́щымъ, пꙋ́ть вѣ́рный къ црⷭ҇твꙋ нбⷭ҇номꙋ показꙋ́ющаѧ, да всѝ сп҃са́ющемꙋ бг҃ꙋ ра́дꙋющесѧ пою́тъ: А҆ллилꙋ́їа.

І҆́косъ є҃

Ви́дѣвше вси́ тѧ, ст҃и́телю бж҃їй, ꙗ҆́кѡ ѻ҆тца̀ чадолюби́ва, въ напа́стехъ и҆ ско́рбѣхъ ѿ тебє̀ по́мощи ᲂу҆се́рднѡ и҆ска́хꙋ: ты́ же ѡ҆ всѣ́хъ милосе́рдовалъ є҆сѝ, ѡ҆́бразъ вѣ́ры и҆́стинныѧ въ себѣ̀ си́мъ показꙋ́ѧ. бꙋ́ди, пребл҃гі́й ѻ҆́тче, ско́рый помо́щникъ и҆ на́мъ, грѣхмѝ и҆ скорбьмѝ ѡ҆бꙋрева́ємымъ, съ любо́вїю тѝ вопїю́щымъ:

Ра́дꙋйсѧ, свѣти́льниче любвѐ, ѿ хрⷭ҇та̀ возсїѧ́вый: ра́дꙋйсѧ, ѻ҆ц҃ꙋ̀ нбⷭ҇номꙋ въ млⷭ҇рдїи подража́вый.

Ра́дꙋйсѧ, неимꙋ́щихъ бога́тое сокро́вище: ра́дꙋйсѧ, въ нꙋ́ждахъ вѣ́рное прибѣ́жище.

Ра́дꙋйсѧ, гла̑дныѧ, ꙗ҆́коже і҆ѡ́сифъ дре́вле, препита́вый: ра́дꙋйсѧ, мно́ги ѡ҆би́тєли бездо́мнымъ и҆ ᲂу҆бо́гимъ въ кесарі́и ѡ҆снова́вый.

Ра́дꙋйсѧ, прокаже́нныхъ ра́ны свои́ма рꙋка́ма, ꙗ҆́кѡ самарѧни́нъ до́брый, врачева́вый: ра́дꙋйсѧ, гони́телѧ твоегѡ̀ моде́ста недꙋ́гꙋюща и҆сцѣли́вый и҆ ѿ наро́дныѧ ка́зни того̀ и҆зба́вивый.

Ра́дꙋйсѧ, вдови́цꙋ ᲂу҆бо́гꙋю ѿ ѻ҆би́ды є҆па́рха защити́вый: ра́дꙋйсѧ, женѣ̀ грѣ́шницѣ проще́нїе грѣхѡ́въ ᲂу҆ бг҃а и҆спроси́вый.

Ра́дꙋйсѧ, сиро́тъ ѻ҆́тче и҆ стра́ждꙋщихъ ᲂу҆тѣше́нїе: ра́дꙋйсѧ, во грѣсѣ́хъ погиба́ющихъ вразꙋмле́нїе и҆ и҆справле́нїе.

Ра́дꙋйсѧ, васі́лїе, вели́кїй і҆ера́рше, правосла́вїѧ всемі́рный свѣти́льниче.

Конда́къ ѕ҃

Проповѣ́дникъ всемꙋ̀ мі́рꙋ и҆́стины хрⷭ҇то́вы ꙗ҆ви́лсѧ є҆сѝ, ст҃и́телю ѻ҆́тче васі́лїе, си́лою бл҃года́тною сло́ва твоегѡ̀, ꙗ҆́кѡ ѻ҆́стрїемъ меча̀, грѣхѡ́вныѧ сєрдца̀ проница́ѧй и҆ къ покаѧ́нїю возбꙋжда́ѧй, да всѝ чи́стымъ се́рдцемъ трⷪ҇цѣ ст҃ѣ́й пою́тъ: А҆ллилꙋ́їа.

І҆́косъ ѕ҃

Возсїѧ́лъ є҆сѝ на тве́рди цр҃ко́внѣй, ꙗ҆́кѡ вели́кое свѣтоза́рное свѣти́ло, ѻ҆́тче васі́лїе, всю̀ поднбⷭ҇нꙋю разꙋмѣ́нїемъ вѣ́ры и҆́стинныѧ просвѣща́ющее, мра́къ же страсте́й грѣхо́вныхъ ѿгонѧ́ющее, ѿ ни́хже и҆ на́съ свободѝ, зовꙋ́щихъ тѝ си́це:

Ра́дꙋйсѧ, трⷪ҇цы ст҃ы́ѧ вѣ́рный слꙋжи́телю: ра́дꙋйсѧ, та́инъ вѣ́ры бг҃оѡзаре́нный и҆з̾ѧсни́телю.

Ра́дꙋйсѧ, ꙗ҆́кѡ ѻ҆ц҃ꙋ̀ сн҃а є҆диносꙋ́щна и҆ дх҃а сопрⷭ҇то́льна велегла́снѡ проповѣ́далъ є҆сѝ: ра́дꙋйсѧ, ꙗ҆́кѡ и҆́стинꙋ ѡ҆ свѣ́тѣ превѣ́чнѣмъ, ѿ свѣ́та превѣ́чна просїѧ́вшемъ, вѣ́рнымъ и҆з̾ѧсни́лъ є҆сѝ.

Ра́дꙋйсѧ, гдⷭ҇а спⷭ҇телѧ, ꙗ҆́кѡ бг҃а воплоще́нна и҆ творца̀ всѣ́хъ вѣ̑къ и҆сповѣ́давый: ра́дꙋйсѧ, та́инство двꙋ́хъ є҆сте́ствъ и҆ є҆ди́ной ѵ҆пѡста́си во хрⷭ҇тѣ̀ бз҃ѣ показа́вый.

Ра́дꙋйсѧ, си́лою ца́рственнагѡ сло́ва твоегѡ̀ бога́тымъ жи́тницы ѿкры́ти повелѣ́вый: ра́дꙋйсѧ, ѿ коры́сти непра́ведныѧ мно́ги ᲂу҆че́нїемъ ѿврати́вый.

Ра́дꙋйсѧ, дꙋшепа́гꙋбное пїѧ́нство сло́вомъ, ꙗ҆́кѡ гро́момъ, поража́вый: ра́дꙋйсѧ, жестокосе́рдїе и҆ за́висть и҆з̾ серде́цъ и҆стреблѧ́вый.

Ра́дꙋйсѧ, воздержа́нїѧ ревни́тельный наста́вниче: ра́дꙋйсѧ, покаѧ́нїѧ неꙋмо́лчный проповѣ́дниче.

Ра́дꙋйсѧ, васі́лїе, вели́кїй і҆ера́рше, правосла́вїѧ всемі́рный свѣти́льниче.

Конда́къ з҃

Хотѧ̀ вѣ́рныѧ ѿ собо́рищь а҆рїа́нскихъ ѡ҆гради́ти, ты̀, ст҃че бж҃їй васі́лїе, всѧ̑ въ цр҃кви бл҃гоꙋкраси́лъ є҆сѝ, и҆ чи́нъ ᲂу҆мили́тельный бжⷭ҇твенныѧ лїтꙋргі́и мꙋ́дрѣ сложи́лъ є҆сѝ, мнѡ́ги же моли̑твы, ꙗ҆́кѡ мѵ́ро бл҃гово́нное, ѿ ᲂу҆́стъ твои́хъ ѻ҆гнедохнове́нныхъ и҆злїѧ́шасѧ, и҆́миже во грѣсѣ́хъ проще́нїѧ себѣ̀ и҆ ᲂу҆со́пшымъ бра́тїѧмъ про́симъ, трⷪ҇цꙋ же прест҃ꙋ́ю сла́вимъ, пою́ще: А҆ллилꙋ́їа.

І҆́косъ з҃

Но́ваго а҆арѡ́на вѣ́рнїи зрѧ́хꙋ въ тебѣ̀, ѻ҆́тче ст҃ы́й васі́лїе, є҆гда̀ бг҃олѣ́пнѡ же́ртвꙋ безкро́внꙋ сщ҃еннодѣ́йствовалъ є҆сѝ, дарова̑нїи ст҃а́гѡ дх҃а, ꙗ҆́кѡ многоцѣ́нными ка́меньми свѣтѧ́щеюсѧ ѻ҆де́ждою, ᲂу҆кра́шенъ. Ны́нѣ же въ вы́шнѣмъ же́ртвенницѣ ѡ҆ цр҃кви предста́тельствꙋѧй, помина́й вы́нꙋ и҆ на́съ, тебѣ̀ ᲂу҆миле́ннѡ зовꙋ́щихъ:

Ра́дꙋйсѧ, а҆рхїере́ю бж҃їй, преизѡби́льнꙋю, ꙗ҆́коже и҆ а҆арѡ́нъ, бл҃года́ть сщ҃е́нства воспрїѧ́вый: ра́дꙋйсѧ, ве́лїе дерзнове́нїе въ моли́твѣ за лю́ди стѧжа́вый.

Ра́дꙋйсѧ, та́инъ бж҃їихъ мꙋ́дрый строи́телю: ра́дꙋйсѧ, чи́на цр҃ко́внагѡ бл҃гоꙋкраси́телю.

Ра́дꙋйсѧ, слꙋже́нїю лїтꙋргі́и ѿ сама́го хрⷭ҇та̀, ꙗ҆́коже и҆ і҆а́кѡвъ а҆пⷭ҇толъ, наꙋче́нный: ра́дꙋйсѧ, мл҃твенниче, дх҃омъ бж҃їимъ ѡ҆заре́нный.

Ра́дꙋйсѧ, нбⷭ҇нымъ свѣ́томъ, ꙗ҆́коже нѣ́цыи ви́дѣша, въ слꙋже́нїи ѡ҆сїѧва́емый: ра́дꙋйсѧ, а҆́гг҃лы, ꙗ҆́кѡ нѣ́кїими пресвѣ́тлыми мꙋжа́ми, ѡ҆крꙋжа́емый.

Ра́дꙋйсѧ, ꙗ҆́кѡ твое́ю пе́рвѣе мл҃твою къ воспрїѧ́тїю та́инъ хрⷭ҇то́выхъ себѐ ᲂу҆готовлѧ́емъ: ра́дꙋйсѧ, ꙗ҆́кѡ твои́ми словесы̑ въ ве́черъ пѧтидесѧ́тницы колѣнопоклѡ́ннаѧ прошє́нїѧ возсыла́емъ.

Ра́дꙋйсѧ, кесарі́йскагѡ ст҃и́тельскагѡ престо́ла сла́во и҆ ᲂу҆краше́нїе: ра́дꙋйсѧ, ꙗ҆́кѡ і҆ере́ѡмъ всеѧ̀ цр҃кве подае́ши ѿ бг҃а бл҃года́тное въ слꙋже́нїи ᲂу҆крѣпле́нїе.

Ра́дꙋйсѧ, васі́лїе, вели́кїй і҆ера́рше, правосла́вїѧ всемі́рный свѣти́льниче.

Конда́къ и҃

Стра́нное и҆ пресла́вное видѣ́нїе ѿкры́сѧ ѡ҆ тебѣ̀, ст҃и́телю васі́лїе, прпⷣбномꙋ є҆фре́мꙋ сѷрїа́нинꙋ: є҆ди́ножды бо показа̀ є҆мꙋ̀ тѧ̀ бг҃ъ, ꙗ҆́кѡ столпа̀ ѻ҆́гненна, высоты̀ нбⷭ҇ныѧ досѧза́юща, по́слѣжде же, прише́дъ въ кесарі́ю, прпⷣбный ᲂу҆зрѣ́ тѧ ѻ҆́гненнымъ ѧ҆зы́комъ лю́ди поꙋча́юща и҆ ᲂу҆миле́ннѡ возопѝ бг҃ꙋ: А҆ллилꙋ́їа.

І҆́косъ и҃

Ве́сь свѣ́томъ нбⷭ҇нымъ серафі́мскїѧ любвѐ пламенѣ́лъ є҆сѝ, бг҃оно́се васі́лїе: словеса́ бо твоѧ̑ бѣ́ша, ꙗ҆́кѡ мо́лнїѧ, є҆́реси попалѧ́ющаѧ, дꙋ́шы же вѣ́рныхъ пла́менемъ вѣ́ры и҆ любвѐ просвѣща́ющаѧ: да́ждь ᲂу҆̀бо и҆ на́мъ, ѻ҆́тче, мл҃твою твое́ю, и҆́скрꙋ хотѧ̀ ма́лꙋю твоеѧ̀ любвѐ и҆мѣ́ти, зовꙋ́щымъ сицєва́ѧ:

Ра́дꙋйсѧ, пламенови́дный сто́лпе, є҆́реси попалѧ́ѧй: ра́дꙋйсѧ, ѻ҆́гнь вѣ́ры и҆́стинныѧ и҆ любвѐ нелицемѣ́рныѧ возгрѣва́ѧй.

Ра́дꙋйсѧ, лжѝ а҆́рїевы є҆́реси тве́рдый ѡ҆бличи́телю: ра́дꙋйсѧ, и҆́стины хрⷭ҇то́вы пла́менный ревни́телю.

Ра́дꙋйсѧ, ꙗ҆́кѡ го́рдагѡ є҆ѵно́мїа, сн҃а бж҃їѧ хꙋ́ливша, посрами́лъ є҆сѝ: ра́дꙋйсѧ, ꙗ҆́кѡ македо́нїево хꙋле́нїе дх҃а ст҃а́гѡ препрѣ́лъ є҆сѝ.

Ра́дꙋйсѧ, сꙋемꙋ́дрїѧ нестѡ́рїева разори́телю: ра́дꙋйсѧ, че́сти прест҃ы́ѧ бг҃омт҃ре ᲂу҆се́рдный защи́тителю.

Ра́дꙋйсѧ, па́стырю, нбⷭ҇нымъ блиста́нїемъ любвѐ ѡ҆сїѧва́емый: ра́дꙋйсѧ, ᲂу҆чи́телю вѣ́ры, словеса̀ молнїено́снаѧ вѣща́вый.

Ра́дꙋйсѧ, бг҃онасажде́ннаѧ ма́слино, мно́гихъ ст҃ы́хъ цр҃кви произве́дшаѧ: ра́дꙋйсѧ, лозо̀, бг҃омꙋ́дрыхъ правосла́вїѧ побо́рникѡвъ и҆зрасти́вшаѧ.

Ра́дꙋйсѧ, васі́лїе, вели́кїй і҆ера́рше, правосла́вїѧ всемі́рный свѣти́льниче.

Конда́къ ѳ҃

Всѐ є҆реті́ческое собо́рище не возмо́же противостоѧ́ти бл҃года́тнѣй, ꙗ҆̀же въ тебѣ̀, ст҃ы́й ѻ҆́тче, ѡ҆бита́ше, си́лѣ: ю҆́ношꙋ бо нѣ́коего, во вла́сть сатаны̀ впа́дша, си́лою мл҃твы твоеѧ̀ ѿ сѣте́й вра́жїихъ ѿ̾ѧ́лъ є҆сѝ, пока́ѧвшасѧ же ко хрⷭ҇тꙋ̀ возврати́лъ є҆сѝ, бл҃года́рнѡ поѧ̀ сп҃си́телю бг҃ꙋ: А҆ллилꙋ́їа.

І҆́косъ ѳ҃

Виті́йствомъ бг҃одꙋхнове́ннымъ твои́мъ, ст҃и́телю васі́лїе, побѣжда́емїи и҆ ви́дѣвше пресла́вное на ю҆́ноше бы́вшее чꙋ́до, мно́зи ѿ є҆реті̑къ ко є҆ди́нѣй присоедини́шасѧ цр҃кви, є҆ѧ́же вѣ́рными и҆ послꙋ́шными ча́дами и҆ на́съ бы́ти сподо́би, зовꙋ́щихъ тѝ си́це:

Ра́дꙋйсѧ, всѧ̑ концы̀ землѝ нбⷭ҇нымъ ᲂу҆че́нїемъ ѡ҆сїѧ́вый: ра́дꙋйсѧ, бл҃года́тїю хрⷭ҇то́вою те́мныѧ си́лы а҆́да побѣжда́вый.

Ра́дꙋйсѧ, ю҆́ношꙋ ѿ сѣте́й сатаны̀ свободи́вый: ра́дꙋйсѧ, тѣ́ломъ и҆ кро́вїю хрⷭ҇то́вою того̀ насы́тивый.

Ра́дꙋйсѧ, ꙗ҆́кѡ дꙋшѐ, кро́вїю хрⷭ҇то́вою и҆скꙋпле́ннѣй, поги́бнꙋти не да́лъ є҆сѝ: ра́дꙋйсѧ, ꙗ҆́кѡ въ поги́бельный грѣ́хъ впа́дша, ю҆́ношꙋ прости́ти, хрⷭ҇та̀ ᲂу҆моли́лъ є҆сѝ.

Ра́дꙋйсѧ, ꙗ҆́кѡ пресла́внымъ чꙋ́домъ лю́ди ᲂу҆диви́лъ є҆сѝ: ра́дꙋйсѧ, ꙗ҆́кѡ ѡ҆браще́нїемъ заблꙋ́ждша а҆́гг҃лы возра́довалъ є҆сѝ.

Ра́дꙋйсѧ, проси́ти ᲂу҆ гдⷭ҇а а҆́гг҃лѡвъ ѡ҆гражде́нїѧ на́съ наꙋча́ѧй: ра́дꙋйсѧ, а҆́гг҃ла храни́телѧ мл҃твою твое́ю къ на́мъ приближа́ѧй.

Ра́дꙋйсѧ, ѿ навѣ́тѡвъ вра́жїихъ свободи́телю: ра́дꙋйсѧ, во и҆скꙋше́нїихъ ско́рый защи́тителю.

Ра́дꙋйсѧ, васі́лїе, вели́кїй і҆ера́рше, правосла́вїѧ всемі́рный свѣти́льниче.

Конда́къ і҃

Сп҃стѝ хотѧ̀ творе́цъ своѐ слове́сное созда́нїе, показа́ тѧ тве́рдагѡ вѣ́рныхъ защи́тителѧ, ѻ҆́тче васі́лїе, и҆ цр҃кве своеѧ̀ храни́телѧ, да свѣ́тъ правосла́вїѧ тобо́ю всемꙋ̀ мі́рꙋ ꙗ҆вле́нъ бꙋ́детъ, и҆ всѝ вѣ́рнїи бл҃года́рнѣ трⷪ҇цѣ ст҃ѣ́й воспѣва́ютъ: А҆ллилꙋ́їа.

І҆́косъ і҃

Стѣна̀ є҆сѝ цр҃кве, и҆ тве́рдое вѣ́рныхъ ѡ҆гражде́нїе ꙗ҆ви́лсѧ є҆сѝ, ѽ вели́кїй въ і҆ера́рсѣхъ васі́лїе, є҆гда̀ во гра́дѣ нїке́йстѣмъ врата̀ церко́внаѧ си́лою мл҃твы твоеѧ̀ ѿве́рзлъ є҆сѝ и҆ и҆́стинꙋ пра́выѧ вѣ́ры си́мъ ꙗ҆ви́лъ є҆сѝ, ᲂу҆ста̀ же хꙋ́лѧщихъ и҆́мѧ хрⷭ҇то́во загради́лъ є҆сѝ. на́мъ же, гдⷭ҇а сп҃си́телѧ правосла́внѡ и҆сповѣ́дающымъ, ѿве́рзи, ѻ҆́тче, млⷭ҇рдїѧ бж҃їѧ двє́ри, застꙋпле́нїемъ твои́мъ, да зове́мъ тѝ си́це:

Ра́дꙋйсѧ, а҆́гг҃ле земны́й, цр҃кве хрⷭ҇то́вы храни́телю: ра́дꙋйсѧ, бг҃омъ пред̾избра́нный вѣ́рныхъ защи́тителю.

Ра́дꙋйсѧ, врата̀ цр҃ко́внаѧ, ꙗ҆́коже и҆лїа̀ дре́вле нб҃о, мл҃твою ѿкры́вый: ра́дꙋйсѧ, хра́мъ ст҃ы́й, є҆ретїка́ми восхище́нный, па́ки вѣ́рнымъ возврати́вый.

Ра́дꙋйсѧ, вѣ́рныхъ ѿ є҆ресе́й ѡ҆гради́вый: ра́дꙋйсѧ, цр҃ковь хрⷭ҇то́вꙋ неврежде́ннꙋ ѿ лжеꙋче́нїй сохрани́вый.

Ра́дꙋйсѧ, превели́кое на нб҃сѝ и҆́мѧ хрⷭ҇то́во и҆ на землѝ чꙋдесы̑ возвели́чивый: ра́дꙋйсѧ, правосла́вїе во вселе́ннѣй ᲂу҆тверди́вый.

Ра́дꙋйсѧ, ꙗ҆́кѡ тобо́ю го́рдость нечести́выхъ низложи́сѧ: ра́дꙋйсѧ, ꙗ҆́кѡ тобо́ю смире́нїе вѣ́рныхъ вознесе́сѧ.

Ра́дꙋйсѧ, ꙗ҆́кѡ тобо́ю вѣ́ра ст҃а́ѧ прославлѧ́етсѧ: ра́дꙋйсѧ, ꙗ҆́кѡ тобо́ю цр҃ковь хрⷭ҇то́ва ди́внѡ красꙋ́етсѧ.

Ра́дꙋйсѧ, васі́лїе, вели́кїй і҆ера́рше, правосла́вїѧ всемі́рный свѣти́льниче.

Конда́къ а҃і

Пѣ́нїе подоба́ше возноси́мо бы́ти тебѣ̀ съ нб҃сѝ, а҆ не ѿ землѝ, Ѽ пречꙋ́дный васі́лїе, нб҃съ бо ꙗ҆вле́нїе на землѝ бы́лъ є҆сѝ, къ нб҃сѝ бг҃омꙋ́дрыми ᲂу҆че́ньми твои́ми ᲂу҆мы̀ вѣ́рныхъ возводи́лъ є҆сѝ, и҆ ны́нѣ съ нб҃съ на ны̀ млⷭ҇тивнѡ призира́еши и҆ преиз̾ѡби́льнꙋю всѣ̑мъ на́мъ блгⷣть подае́ши ѿ щедрода́телѧ хрⷭ҇та̀ бг҃а, є҆мꙋ́же со а҆́гг҃лы на нб҃сѣ́хъ вы́нꙋ пое́ши: А҆ллилꙋ́їа.

І҆́косъ а҃і

Свѣтоно́сный свѣти́льниче, ве́сь мно́гими дара́ми бж҃їими и҆ добродѣ́тельми сїѧ́ющъ, бы́лъ є҆сѝ, ст҃че бж҃їй васі́лїе, и҆́миже и҆ ны̀ просвѣтѝ, въ добродѣ́тели наста́ви и҆ ко црⷭ҇твїю нбⷭ҇номꙋ напра́ви, зовꙋ́щихъ тебѣ̀ си́це:

Ра́дꙋйсѧ, цр҃кве хрⷭ҇то́вы незаходи́мое сїѧ́нїе и҆ пресвѣ́тлое ᲂу҆краше́нїе: ра́дꙋйсѧ, ꙗ҆́кѡ подае́ши хрⷭ҇тїа́нѡмъ во всѧ̑ вѣ́ки въ вѣ́рѣ пра́вѣй ᲂу҆твержде́нїе.

Ра́дꙋйсѧ, тала́нты, бг҃омъ врꙋчє́нныѧ тебѣ̀, ᲂу҆соверши́вый: ра́дꙋйсѧ, ѿ земны́ѧ мꙋ́дрости всѧ̑ ко сп҃се́нїю полє́знаѧ собра́вый.

Ра́дꙋйсѧ, сы́нꙋ царе́вꙋ во сла́вꙋ правовѣ́рїѧ чꙋде́сное и҆сцѣле́нїе дарова́вый: ра́дꙋйсѧ, цѣломꙋ́дренное житїѐ а҆наста́сїа пресвѵ́тера и҆ сꙋпрꙋ́жницы є҆гѡ̀ прозрѣ́вый.

Ра́дꙋйсѧ, кро́ткѡ ѻ҆би́дѧщымъ тѧ̀ проща́вый: ра́дꙋйсѧ, смире́нїемъ и҆ терпѣ́нїемъ клеветы̑ на тѧ̀ побѣжда́вый.

Ра́дꙋйсѧ, ᲂу҆ста́въ соверше́ннагѡ житїѧ̀ и҆́нокѡмъ ᲂу҆чреди́вый: ра́дꙋйсѧ, мно́ги и҆́ноки въ ѻ҆би́телѣхъ собра́вый.

Ра́дꙋйсѧ, пра̑вила и҆ канѡ̑ны и҆ сп҃си́тєльнаѧ ᲂу҆чє́нїѧ въ наслѣ́дїе цр҃кви ѡ҆ста́вивый: ра́дꙋйсѧ, бг҃омꙋ́дрыми списа́ньми твои́ми многоцѣ́нное сокро́вище къ назида́нїю хрⷭ҇тїа́нѡмъ дарова́вый.

Ра́дꙋйсѧ, васі́лїе, вели́кїй і҆ера́рше, правосла́вїѧ всемі́рный свѣти́льниче.

Конда́къ в҃і

Блгⷣть вели́кꙋю дарова̀ тебѣ̀ хрⷭ҇то́съ бг҃ъ, ст҃и́телю ѻ҆́ч҃е васі́лїе, не то́чїю заблꙋ́ждшыѧ къ покаѧ́нїю приводи́ти, но и҆ мнѡ́ги невѣ̑рныѧ ко хрⷭ҇тꙋ̀ ѡ҆браща́ти: є҆гда́ бо ᲂу҆жѐ сме́ртнѡ болѣ́зновалъ є҆сѝ, ко бл҃же́ннѣй кончи́нѣ приближа́ѧсѧ, є҆вре́анина врача̀, съ жено́ю и҆ ча̑ды, ст҃ы́мъ кр҃ще́нїемъ просвѣти́лъ є҆сѝ и҆ трⷪ҇цѣ ст҃ѣ́й кꙋ́пнѡ съ ни́ми бл҃года́рственнꙋю воспѣ́лъ є҆сѝ пѣ́снь: А҆ллилꙋ́їа.

І҆́косъ в҃і

Пою́тъ тѝ вє́лїѧ похвалы̑ всѝ вѣ́рнїи, ѽ вели́кїй і҆ера́рше васі́лїе, вельми́ бо на землѝ до конца̀ житїѧ̀ твоегѡ̀ во сла́вꙋ правовѣ́рїѧ потрꙋди́всѧ, въ нбⷭ҇наѧ ст҃а́ѧ ст҃ы́хъ вше́лъ є҆сѝ, и҆ ꙗ҆́кѡ вѣ́рный бж҃їй слꙋжи́тель, трⷪ҇цѣ ст҃ѣ́й предста́лъ є҆сѝ, и҆дѣ́же и҆ ѡ҆ на́съ вы́нꙋ моли́сѧ, ѽ пребл҃гі́й ѻ҆́тче, вѣ́рою ча́дѣхъ твои́хъ, съ любо́вїю зовꙋ́щихъ тѝ си́це:

Ра́дꙋйсѧ, ца́рское сщ҃е́нїе, прехва́льне васі́лїе: ра́дꙋйсѧ, трⷪ҇цы ст҃ы́ѧ преꙋкраше́нное селе́нїе.

Ра́дꙋйсѧ, чꙋде́сными дѣѧ́ньми цр҃ѧ̀ нбⷭ҇наго просла́вивый: ра́дꙋйсѧ, ре́вности своеѧ̀ ѡ҆ сла́вѣ вѣ́ры и҆ въ болѣ́зни сме́ртнѣй не ѡ҆ста́вивый.

Ра́дꙋйсѧ, ра́ди ѻ҆браще́нїѧ невѣ́рна чꙋде́сное продле́нїе себѣ̀ житїѧ̀ ᲂу҆ бг҃а и҆спроси́вый: ра́дꙋйсѧ, свои́ма рꙋка́ма, возста́въ съ ѻ҆дра̀ сме́ртнагѡ, кр҃ще́нїемъ того̀ просвѣти́вый.

Ра́дꙋйсѧ, трꙋда́ми и҆ мꙋ́дростїю си́лꙋ ѕловѣ́рїѧ побѣди́вый: ра́дꙋйсѧ, благовѣ́рнымъ царє́мъ побѣ́ды на врагѝ и҆спроси́вый.

Ра́дꙋйсѧ, а҆пⷭ҇лѡмъ въ трꙋдѣ́хъ є҆динонра́вный: ра́дꙋйсѧ, со ст҃и́тєли григо́рїемъ бг҃осло́вомъ и҆ і҆ѡа́нномъ златоꙋ́стомъ, по повелѣ́нїю твоемꙋ̀, є҆диноче́стнѡ прославлѧ́емый.

Ра́дꙋйсѧ, нетлѣ́нїемъ моще́й просїѧ́вый и҆ сла́вою на нб҃сѣ́хъ ᲂу҆вѣнча́нный: ра́дꙋйсѧ, те́плый и҆ вели́кїй застꙋ́пниче, ѿ бг҃а на́мъ дарова́нный.

Ра́дꙋйсѧ, васі́лїе, вели́кїй і҆ера́рше, правосла́вїѧ всемі́рный свѣти́льниче.

Конда́къ г҃і

Ѽ прест҃ы́й и҆ вели́кїй і҆ера́рше хрⷭ҇то́въ васі́лїе, правосла́вїѧ свѣти́ло и҆ вѣ́рныхъ ѡ҆гражде́нїе! при́зри съ нб҃сѐ на сїѐ, приноси́мое тѝ на́ми, хвале́нїе, и҆ мл҃твами твои́ми ѿ страсте́й и҆ бѣ́дъ на́съ ѡ҆градѝ, въ пра́вѣй вѣ́рѣ соблюдѝ и҆ црⷭ҇твїѧ нбⷭ҇нагѡ сподо́би, да кꙋ́пнѡ съ тобо́ю и҆ всѣ́ми ст҃ы́ми трⷪ҇цѣ ст҃ѣ́й во вѣ́ки вѣкѡ́въ пое́мъ: А҆ллилꙋ́їа.

Повто́ръ

Сей конда́къ глаго́лется три́жды, та́же і҆́косъ а҃-й и҆ конда́къ а҃-й.

І҆́косъ а҃

А҆́гг҃лѡвъ творе́цъ, ѿ вѣ́ка пред̾избра́вый тѧ̀, пребл҃же́нне ѻ҆́ч҃е васі́лїе, бы́ти вели́кагѡ свѣти́льника цр҃кве своеѧ̀, а҆гг҃лоподо́бна житїе́мъ ꙗ҆ви́ тѧ: вельми́ бо бг҃омы́слїемъ и҆ поще́ньми въ пꙋсты́ни подвиза́всѧ, на высотꙋ̀ добродѣ́тели возше́лъ є҆сѝ. Тѣ́мже, ве́лїю на нб҃сѣ́хъ сла́вꙋ стѧжа́вый, прїимѝ ѿ на́съ, смире́нныхъ, восхвалѧ́ти тѧ̀ дерза́ющихъ, сїѧ̑ хвалє́бныѧ глаго́лы:

Ра́дꙋйсѧ, васі́лїе, ца́рствїѧ тезоимени́тый: ра́дꙋйсѧ, і҆ера́рше хрⷭ҇то́въ вели́кїй.

Ра́дꙋйсѧ, цр҃кве непоколеби́мый сто́лпе: ра́дꙋйсѧ, ро́да ст҃а́гѡ пречⷭ҇тна́ѧ ѻ҆́трасле.

Ра́дꙋйсѧ, ѿ ю҆́ности цр҃ю̀ нбⷭ҇номꙋ всеꙋсе́рднѡ слꙋжи́вый: ра́дꙋйсѧ, все́ю земно́ю, наипа́че же нбⷭ҇ною, премꙋ́дростїю ᲂу҆́мъ сво́й ѡ҆богати́вый.

Ра́дꙋйсѧ, кꙋ́пнѡ со дрꙋ́гомъ твои́мъ григо́рїемъ бг҃осло́вомъ въ любомꙋ́дрїи преꙋспѣва́вый: ра́дꙋйсѧ, ᲂу҆чи́телѧ твоего̀ є҆ѵвꙋ́ла премꙋ́дрыми словесы̀ ко хрⷭ҇тꙋ̀ ѡ҆брати́вый.

Ра́дꙋйсѧ, чистоты̀ и҆ цѣломꙋ́дрїѧ преди́вный храни́телю: ра́дꙋйсѧ, ко сп҃се́нїю вѣ́рный пꙋтеводи́телю.

Ра́дꙋйсѧ, дꙋшепа́гꙋбныхъ є҆ресе́й разори́телю: ра́дꙋйсѧ, бг҃омꙋ́дрый вселе́нныѧ ᲂу҆чи́телю.

Ра́дꙋйсѧ, васі́лїе, вели́кїй і҆ера́рше, правосла́вїѧ всемі́рный свѣти́льниче.

Конда́къ а҃

Взбра́нный цр҃ѧ̀ нбⷭ҇нагѡ слꙋжи́телю и҆ вели́кїй цр҃кве хрⷭ҇то́вы ст҃и́телю, пра́выѧ вѣ́ры и҆сповѣ́данїемъ во всѣ́мъ мі́рѣ просїѧ́вый, ве́лїе и҆мѣ́ѧй дерзнове́нїе ко ст҃ѣ́й трⷪ҇цѣ, ѿ всѧ́кихъ на́съ бѣ́дъ ѡ҆гражда́й, со ᲂу҆миле́нїемъ тебѣ̀ вопїю́щихъ:

Ра́дꙋйсѧ, васі́лїе, вели́кїй і҆ера́рше, правосла́вїѧ всемі́рный свѣти́льниче.

Моли́твы

Ѽ вели́кїй во і҆ера́рсѣхъ, вселе́нныѧ ᲂу҆чи́телю бг҃омꙋ́дрый, пребл҃же́нне ѻ҆́ч҃е васі́лїе! Ве́лїѧ пѡ́двиги и҆ трꙋды̑ твоѧ̑, ꙗ҆̀же во сла́вꙋ ст҃ы́ѧ цр҃кве соверши́лъ є҆сѝ. ты̀ и҆сповѣ́дникъ тве́рдый и҆ свѣти́льникъ вѣ́ры хрⷭ҇то́вы на землѝ бы́лъ є҆сѝ, свѣ́томъ бг҃овѣ́дѣнїѧ вѣ̑рныѧ ѡ҆зарѧ́ѧй, лѡ́жнаѧ ᲂу҆чє́нїѧ попалѧ́ѧй и҆ всемꙋ̀ мі́рꙋ сло́во сп҃си́тельныѧ и҆́стины возвѣща́ѧй. ны́нѣ же, ве́лїе на нб҃сѣ́хъ и҆мѣ́ѧй дерзнове́нїе ко ст҃ѣ́й трⷪ҇цѣ, помозѝ на́мъ, со смире́нїемъ къ тебѣ̀ припа́дающымъ, тве́рдѡ и҆ неизмѣ́ннѡ ст҃ꙋ́ю правосла́внꙋю вѣ́рꙋ до конца̀ житїѧ̀ на́шегѡ сохрани́ти, ѿ маловѣ́рїѧ же, сомнѣ́нїй и҆ колеба́нїѧ въ вѣ́рѣ соблюдѝ, да не прельще́ни бꙋ́демъ бг҃опроти́вныхъ и҆ дꙋшепа́гꙋбныхъ ᲂу҆че́нїй словєсы̀. дꙋ́хъ ре́вности ст҃ы́ѧ, є҆́юже ты̀ пламенѣ́лъ є҆сѝ, ѽ пресла́вный цр҃кве хрⷭ҇то́вы па́стырю, возгрѣ́й предста́тельствомъ твои́мъ и҆ въ на́съ, и҆̀хже хрⷭ҇то́съ поста́ви бы́ти па́стыри, да всеꙋсе́рднѡ просвѣща́емъ и҆ ᲂу҆твержда́емъ въ пра́вѣй вѣ́рѣ слове́сное ста́до хрⷭ҇то́во. ᲂу҆молѝ гдⷭ҇а, да возвы́ситсѧ страна̀ на́ша, и҆ да да́рꙋетъ всемꙋ̀ наро́дꙋ на́шемꙋ здра́вїе, долгоде́нствїе и҆ во всѣ́мъ бл҃го́е поспѣше́нїе. и҆спросѝ, ѽ млⷭ҇рдый ст҃и́телю, ѿ ѻ҆ц҃а̀ свѣ́тѡвъ и҆ все́мъ всѧ́кїй да́ръ, коемꙋ́ждо бл҃гопотре́бенъ: младе́нцємъ бл҃го́е въ стра́сѣ бж҃їи возраста́нїе, ю҆́нымъ цѣломꙋ́дрїе, ста̑рымъ и҆ немощны̑мъ ᲂу҆крѣпле́нїе, скорбѧ́щымъ ᲂу҆тѣше́нїе, недꙋ́гꙋющымъ и҆сцѣле́нїе, заблꙋ́ждшымъ вразꙋмле́нїе и҆ и҆справле́нїе, ѡ҆би̑димымъ застꙋпле́нїе, сирота́мъ и҆ вдови́цамъ защище́нїе, и҆скꙋша́ємымъ бл҃года́тное поможе́нїе, ѿше́дшымъ ѿ сегѡ̀ вре́меннагѡ житїѧ̀ ѻ҆тцє́мъ и҆ бра́тїѧмъ на́шымъ бл҃же́нное ᲂу҆покое́нїе. є҆́й, ст҃че бж҃їй, при́зри ми́лостивѡ ѿ ѡ҆би́телей го́рнихъ на на́съ, смире́нныхъ, мно́гими собла̑зны и҆ напа́стьми ѡ҆бꙋрева́емыхъ, и҆ къ землѝ приве́рженныхъ возведѝ къ высотѣ̀ нбⷭ҇нѣй. препода́ждь на́мъ, пребл҃гі́й ѻ҆́тче, твоѐ а҆рхїпа́стырское и҆ ст҃о́е бл҃гослове́нїе, да ѻ҆́нымъ ѡ҆сѣнѧ́емїи, въ сїѐ но́вое лѣ́то и҆ во всѐ про́чее вре́мѧ живота̀ на́шегѡ въ ми́рѣ, покаѧ́нїи и҆ послꙋша́нїи ст҃ѣ́й правосла́внѣй цр҃кви поживе́мъ, за́пѡвѣди хрⷭ҇тѡ́вы ᲂу҆се́рднѡ творѧ́ще, по́двигомъ до́брымъ вѣ́ры подвиза́ющесѧ, и҆ та́кѡ црⷭ҇твїѧ нбⷭ҇нагѡ дости́гнемъ, и҆дѣ́же съ тобо́ю и҆ всѣ́ми ст҃ы́ми сподо́би трⷪ҇цꙋ ст҃ꙋ́ю, є҆диносꙋ́щнꙋю и҆ нераздѣ́льнꙋю, пѣ́ти и҆ сла́вити во вѣ́ки вѣкѡ́въ. А҆ми́нь.

Ѽ вели́кїй и҆ прест҃ы́й ст҃и́телю ѻ҆́тче васі́лїе, пресла́вный вселе́нскїѧ цр҃кве ᲂу҆чи́телю, сла́вы прест҃ы́ѧ трⷪ҇цы всеꙋсе́рдный побо́рниче, мт҃ре бж҃їѧ и҆ є҆ѧ̀ пренепоро́чнагѡ двⷭ҇тва предызбра́нный и҆сповѣ́дниче, пресвѣ́тлый чⷭ҇тоты̀, смире́нїѧ и҆ терпѣ́нїѧ ѡ҆́бразе. сѐ а҆́зъ многогрѣ́шный и҆ недосто́йный на высотꙋ̀ нбⷭ҇нꙋю взира́ти, смире́ннѡ молю́ тѧ, ѽ премⷣрый цр҃кве хрⷭ҇то́вы ᲂу҆ч҃телю, наꙋчи́ мѧ та́кѡ бг҃обоѧ́зненнѡ житїѐ своѐ проводи́ти, да никогда́же на пꙋ́ть, бж҃їимъ повелѣ́нїємъ проти́венъ, ᲂу҆клоню́сѧ и҆лѝ совраще́нъ бꙋ́дꙋ. соблюдѝ и҆ и҆зба́ви мѧ̀ твои́мъ многомо́щнымъ предста́тельствомъ ѿ собла́знѡвъ мі́ра и҆ ко́зней дїа́вольскихъ, ꙗ҆́кѡже и҆зба́вилъ є҆сѝ ѿ ни́хъ ю҆́ношꙋ, ѿ сладча́йшагѡ спⷭ҇телѧ на́шегѡ ѿстꙋпи́вша и҆ во вла́сть сатаны̀ впа́дша. да́рꙋй мнѣ̀ си́лꙋ дꙋше́внꙋю ᲂу҆се́рднымъ бы́ти подража́телемъ добродѣ́телей твои́хъ высо́кихъ: содѣ́лай мѧ̀ въ вѣ́рѣ пра́вѣй тве́рда и҆ непоколеби́ма, ᲂу҆крѣпи́ мѧ малодꙋ́шнагѡ въ терпѣ́нїи и҆ ᲂу҆пова́нїи на гдⷭ҇а, возгрѣ́й въ се́рдцѣ мое́мъ и҆́стиннꙋю хрⷭ҇то́вꙋ любо́вь, да нбⷭ҇ныхъ бл҃гъ па́че всѣ́хъ жела́ю и҆ и҆́ми ᲂу҆слажда́юсѧ. и҆спросѝ мнѣ̀ ᲂу҆ гдⷭ҇а и҆́скреннее ѡ҆ грѣсѣ́хъ сокрꙋше́нїе, да про́чее вре́мѧ живота̀ моегѡ̀ въ ми́ре, покаѧ́нїи и҆ и҆сполне́нїи за́повѣдей хрⷭ҇то́выхъ провожда́ти бꙋ́дꙋ. є҆гда́ же ча́съ моегѡ̀ сконча́нїѧ прибли́зитсѧ, ты̀, ѽ пребл҃гі́й ѻ҆́тче, съ пребл҃гослове́нною дв҃ою мр҃і́ею, тогда̀ ᲂу҆скорѝ на по́мощь, защити́ мѧ ѿ ѕло́бныхъ навѣ́тѡвъ вра́жїихъ, и҆ сподо́би мѧ̀ наслѣ́дника бы́ти ра́йскихъ селе́нїй, да кꙋ́пнѡ съ тобо́ю и҆ со всѣ́ми ст҃ы́ми непристꙋ́пнагѡ бж҃їѧ вели́чества прⷭ҇то́лꙋ предста́нꙋ и҆ живонача́льнꙋю, є҆диносꙋ́щнꙋю же и҆ нераздѣ́льнꙋю трⷪ҇цꙋ прославлѧ́ю и҆ воспѣва́ю, прⷭ҇нѡ и҆ въ безконє́чныѧ вѣ́ки. А҆ми́нь.

Ѽ вели́кїй и҆ пресла́вный ст҃и́телю хрⷭ҇то́въ, всеѧ̀ вселе́нскїѧ цр҃кве ᲂу҆ч҃телю бг҃омꙋ́дрый, правосла́вїѧ тве́рдый и҆сповѣ́дниче и҆ побо́рниче, всеблаже́нне ѻ҆́тче васі́лїе! при́зри ѿ высо́тъ нбⷭ҇ныхъ на на́съ, смире́ннѡ къ тебѣ̀ припа́дающихъ, и҆ ᲂу҆молѝ гдⷭ҇а вседержи́телѧ, є҆гѡ́же вѣ́рный на землѝ слꙋжи́тель бы́лъ є҆сѝ, да да́рꙋетъ на́мъ вѣ́ры пра́выѧ тве́рдое и҆ неизмѣ́нное сохране́нїе, цр҃кви ст҃ѣ́й послꙋша́нїе, житїѧ̀ на́шегѡ и҆справле́нїе, и҆ во всѣ́хъ нꙋ́ждахъ, ско́рбѣхъ и҆ и҆скꙋше́нїихъ ско́рое поможе́нїе, терпѣ́нїе же и҆ ᲂу҆крѣпле́нїе. пода́ждь на́мъ твоѐ ст҃о́е блгⷭ҇ве́нїе, да ѻ҆́нымъ ѡ҆сѣнѧ́емїи, сїѐ но́вое лѣ́то и҆ во всѧ̑ дни̑ бг҃оꙋго́днѡ въ ми́рѣ и҆ покаѧ́нїи поживе́мъ и҆ во црⷭ҇твїи нбⷭ҇нѣмъ сподо́бимсѧ кꙋ́пнѡ съ тобо́ю и҆ со всѣ́ми ст҃ы́ми живонача́льнꙋю трⷪ҇цꙋ воспѣва́ти и҆ сла́вити, ѻ҆ц҃а̀ и҆ сн҃а и҆ ст҃а́гѡ дх҃а, во вѣ́ки вѣкѡ́въ. А҆ми́нь.