Российская Православная Церковь

по благословенію Архіерейскаго Сѵнода Россійской Православной Церкви

Православный календарь

Ака́ѳістъ

А҆ка́ѳїстъ ст҃и́телю ѳеофа́нꙋ, затво́рникꙋ вы́шенскомꙋ.

Свт. Феофана Вышенского затворника (1894) 19 января 2026

Конда́къ а҃

И҆збра́нный гдⷭ҇емъ цр҃кве рꙋ́сскїѧ свѣти́льниче, и҆зрѧ́дный подви́жниче и҆ и҆́стинный слꙋжи́телю хрⷭ҇то́въ, бг҃омꙋ́дре ст҃и́телю ѳеофа́не! Восхвалѧ́емъ тѧ̀ любо́вїю и҆ чти́мъ по́двиги и҆ трꙋды̀ твоѧ̑, и҆́миже вѣ̑рнымъ лю́демъ до́брѣ послꙋжи́лъ є҆сѝ, и҆ въ затво́рѣ пребыва́ѧ, бл҃года́тными ᲂу҆че́ньми пꙋ́ть сп҃се́нїѧ начерта́лъ є҆сѝ. Ны́нѣ же, прⷭ҇то́лꙋ бж҃їю предстоѧ̀, ѡ҆ на́съ моли́сѧ, зовꙋ́щихъ тѝ:

Ра́дꙋйсѧ, ст҃и́телю ѳеофа́не, премꙋ́дрый ᲂу҆чи́телю и҆ хрⷭ҇тїа́нскагѡ житїѧ̀ наста́вниче.

І҆́косъ а҃

А҆́гг҃льскїѧ чⷭ҇тоты̀ взыскꙋ́ѧ и҆ ве́лїю любо́вь ко гдⷭ҇ꙋ и҆мѣ́ѧ, по́двигъ и҆́ноческагѡ житїѧ̀ под̾ѧ́лъ є҆сѝ, ст҃и́телю преди́вный. Мꙋ́дрости же да́ръ, ѿ гдⷭ҇а тѝ да́нный, стори́цею ᲂу҆мно́живъ, лю́демъ во сп҃се́нїе послꙋжи́лъ є҆сѝ. Сегѡ̀ ра́ди и҆ мы̀ съ любо́вїю вопїе́мъ тѝ:

Ра́дꙋйсѧ, па́че всегѡ̀ земна́гѡ гдⷭ҇а возлюби́вый: ра́дꙋйсѧ, на него̀ є҆ди́наго всѐ ᲂу҆пова́нїе возложи́вый.

Ра́дꙋйсѧ, ѿ младе́нчества се́рдце своѐ гдⷭ҇еви преда́вый: ра́дꙋйсѧ, ѿ ю҆́ности ра́зꙋмъ сво́й бж҃їею премⷣростїю напита́вый.

Ра́дꙋйсѧ, а҆́гг҃льскагѡ житїѧ̀ ревни́телю: ра́дꙋйсѧ, дх҃а ст҃а́гѡ стѧжа́телю.

Ра́дꙋйсѧ, на лови́твꙋ человѣ́кѡвъ бг҃омъ пред̾избра́нный: ра́дꙋйсѧ, ꙗ҆́кѡ лꙋчеза́рный свѣти́льникъ, гдⷭ҇емъ возже́нный.

Ра́дꙋйсѧ, ст҃и́телю ѳеофа́не, премꙋ́дрый ᲂу҆чи́телю и҆ хрⷭ҇тїа́нскагѡ житїѧ̀ наста́вниче.

Конда́къ в҃

Ви́дѣвъ, ꙗ҆́кѡ всѧ́каѧ жите́йскаѧ сла́дость быва́етъ печа́ли прича́стна, ст҃че ѳеофа́не, сꙋетꙋ̀ сꙋє́тъ возненави́дѣлъ є҆сѝ и҆ кра̑снаѧ мі́ра сегѡ̀ ѿве́рглъ є҆сѝ, вседꙋ́шнѡ бг҃ꙋ себѐ преда́въ, поѧ̀ є҆мꙋ̀: А҆ллилꙋ́їа.

І҆́косъ в҃

Разꙋмѣ́нїемъ кни́жныѧ премꙋ́дрости ѻ҆би́льнѡ ѿ бг҃а и҆з̾мла́да ѡ҆даре́нный, ᲂу҆́мъ сво́й чте́нїемъ ст҃ы́хъ писа́нїй пита́лъ є҆сѝ, ѡ҆брѣта́ѧ въ ни́хъ си́лꙋ вели́кꙋ и҆ свѣ́тъ дꙋхо́вный. Мы́ же, вѣ́дꙋще сїѐ, со ᲂу҆миле́нїемъ къ тебѣ̀ взыва́емъ:

Ра́дꙋйсѧ, бл҃гочести́выхъ роди́телей ѻ҆троча̀ бг҃оизбра́нное: ра́дꙋйсѧ, сокро́вище цѣломꙋ́дрїѧ, бл҃года́тїю свы́ше и҆спо́лненное.

Ра́дꙋйсѧ, и҆здѣ́тска къ бг҃ꙋ любо́вїю пламенѣ́вый: ра́дꙋйсѧ, ѿ ю҆́ности къ послꙋша́нїю прилѣжа́вый.

Ра́дꙋйсѧ, кро́тостїю и҆ неѕло́бїемъ гдⷭ҇ꙋ подража́вый: ра́дꙋйсѧ, пꙋ́ть дѣ́вства и҆ чⷭ҇тоты̀ и҆збра́вый.

Ра́дꙋйсѧ, и҆́ноческагѡ житїѧ̀ всѣ́мъ се́рдцемъ возжела́вый: ра́дꙋйсѧ, всего̀ себѐ на слꙋже́нїе гдⷭ҇еви преда́вый.

Ра́дꙋйсѧ, ст҃и́телю ѳеофа́не, премꙋ́дрый ᲂу҆чи́телю и҆ хрⷭ҇тїа́нскагѡ житїѧ̀ наста́вниче.

Конда́къ г҃

Си́ла бж҃їѧ тѧ̀, ст҃и́телю ѳеофа́не, немощны́й сосꙋ́дъ человѣ́ческїй, и҆сто́чникъ премꙋ́дрости содѣ́ла и҆ па́стырѧ до́браго лю́демъ дарова̀, ѡ҆ сп҃се́нїи и҆́хъ дꙋ́шꙋ полага́ющаго и҆ гдⷭ҇ꙋ непреста́ннѡ вопїю́щаго: А҆ллилꙋ́їа.

І҆́косъ г҃

И҆мѣ́ѧй въ се́рдцѣ твое́мъ є҆ди́наго гдⷭ҇а, ты̀, ᲂу҆го́дниче бж҃їй, съ ра́достїю ве́лїею всѧ̑ сокрѡ́вища дꙋшѝ твоеѧ̀ и҆ ра́зꙋма на слꙋже́нїе цр҃кви ст҃ѣ́й ѿда́лъ є҆сѝ, ᲂу҆ча̀ и҆ наставлѧ́ѧ всѧ̑ прибѣга́ющыѧ къ тебѣ̀. Мы́ же, ᲂу҆бл҃жа́юще трꙋды̀ твоѧ̑, вопїе́мъ тѝ си́це:

Ра́дꙋйсѧ, ве́лїею мꙋ́дростїю гдⷭ҇емъ напое́нный: ра́дꙋйсѧ, въ трꙋдѣ́хъ подви́жничества и҆спыта́нный.

Ра́дꙋйсѧ, а҆рхїере́ю, бг҃омъ и҆збра́нный: ра́дꙋйсѧ, мл҃твенниче ѡ҆ на́съ ко гдⷭ҇ꙋ неꙋста́нный.

Ра́дꙋйсѧ, ст҃и́тельскагѡ са́на смире́нный носи́телю: ра́дꙋйсѧ, бг҃омꙋ́дрїѧ вѣ́рный ᲂу҆чи́телю.

Ра́дꙋйсѧ, дꙋшевре́дныхъ раско́лѡвъ и҆скорени́телю: ра́дꙋйсѧ, вѣ́ры правосла́вныѧ ревни́телю.

Ра́дꙋйсѧ, ст҃и́телю ѳеофа́не, премꙋ́дрый ᲂу҆чи́телю и҆ хрⷭ҇тїа́нскагѡ житїѧ̀ наста́вниче.

Конда́къ д҃

Бꙋ́рею смѧте́нїѧ и҆спо́лнишасѧ ча̑да па́ствы твоеѧ̀, хотѧ́щꙋ тѝ, ст҃и́телю ѳеофа́не, по́двигꙋ затво́ра себѐ посвѧти́ти, послѣди́ же возра́довашасѧ, ви́дѧще тѧ̀ наипа́че ѡ҆ сп҃се́нїи и҆́хъ пекꙋ́щасѧ, и҆ воспѣ́ша бг҃ꙋ: А҆ллилꙋ́їа.

І҆́косъ д҃

Слы́шавше лю́дїе ѡ҆ вселе́нїи твое́мъ въ пꙋ́стынь вы́шенскꙋю стека́хꙋсѧ къ тебѣ̀, и҆ почита́юще тѧ̀ па́стырѧ до́браго, проси́ша моли́тисѧ ѡ҆ ни́хъ и҆ ко сп҃се́нїю наста́вити. Мы́ же, вѣ́дѧще сїѐ, прино́симъ тѝ похвалы̑ сицєвы́ѧ:

Ра́дꙋйсѧ, ꙗ҆́кѡ ѻ҆те́цъ чадолюби́вый па́ствѣ твое́й бы́вый: ра́дꙋйсѧ, непреста́ннѡ ѡ҆ не́й попече́нїе и҆мѣ́вый.

Ра́дꙋйсѧ, па́стырю, дꙋ́шꙋ твою̀ за ѻ҆́вцы полага́вый: ра́дꙋйсѧ, неꙋста́ннѡ сп҃се́нїю и҆́хъ содѣ́йствовавый.

Ра́дꙋйсѧ, тишинꙋ̀ и҆ бг҃омы́слїе наипа́че возлюби́вый: ра́дꙋйсѧ, бл҃го́ю во́лею себѐ ѿ мі́ра затвори́вый.

Ра́дꙋйсѧ, и҆́нокѡвъ любвеѻби́льный наста́вниче: ра́дꙋйсѧ, ѻ҆би́тели вы́шенскїѧ неꙋгаси́мый свѣти́льниче.

Ра́дꙋйсѧ, ст҃и́телю ѳеофа́не, премꙋ́дрый ᲂу҆чи́телю и҆ хрⷭ҇тїа́нскагѡ житїѧ̀ наста́вниче.

Конда́къ є҃

Бг҃оте́чнаѧ ѕвѣзда̀ ꙗ҆ви́лсѧ є҆сѝ, ст҃и́телю досточꙋ́дне, во ѻ҆би́тели бо вы́шенстѣй въ по́двизѣхъ тѣле́сныхъ и҆ дꙋхо́вныхъ пребыва́ѧ, ѻ҆́бразъ до́брый бы́лъ є҆сѝ хрⷭ҇толюби́вой бра́тїи, на тѧ̀ взира́ющей, наꙋча́ѧ всѣ́хъ немо́лчнѡ пѣ́ти гдⷭ҇ꙋ: А҆ллилꙋ́їа.

І҆́косъ є҃

Ви́дѣвше бра̑тїѧ тѧ̀, во смире́нїи и҆ кро́тости по́двигъ и҆́ноческїй соверша́юща, прихожда́хꙋ къ тебѣ̀ и҆ назида́хꙋсѧ. Та́кожде и҆ мы̀, почита́юще тѧ̀ и҆́стиннаго и҆збра́нника бж҃їѧ, вопїе́мъ сицева̑ѧ:

Ра́дꙋйсѧ, и҆сто́чниче любвѐ ко гдⷭ҇ꙋ неизсѧка́емый: ра́дꙋйсѧ, кла́дезю смире́нїѧ и҆ кро́тости, жа́ждꙋщихъ напаѧ́ющїй.

Ра́дꙋйсѧ, жи́тнице, пи́щею дꙋхо́вною всѣ́хъ насыща́ющаѧ: ра́дꙋйсѧ, свѣщѐ, свѣ́томъ вѣ́ры ѡ҆зарѧ́ющаѧ.

Ра́дꙋйсѧ, воздержа́нїѧ до́брый рачи́телю: ра́дꙋйсѧ, сп҃се́нїѧ дꙋ́шъ ᲂу҆се́рдный попечи́телю.

Ра́дꙋйсѧ, правосла́вїѧ проповѣ́дниче неꙋста́нный: ра́дꙋйсѧ, крі́не ра́йскїй, въ пꙋсты́ни процвѣ́тшїй.

Ра́дꙋйсѧ, ст҃и́телю ѳеофа́не, премꙋ́дрый ᲂу҆чи́телю и҆ хрⷭ҇тїа́нскагѡ житїѧ̀ наста́вниче.

Конда́къ ѕ҃

Проповѣ́дникъ немо́лчный и҆ вѣща́тель и҆́стинъ бж҃їихъ бы́лъ є҆сѝ во ст҃и́тельстѣмъ слꙋже́нїи, просвѣща́ѧ и҆ наставлѧ́ѧ па́ствꙋ твою̀, досточꙋ́дне ѳеофа́не, и҆ въ затво́рѣ сы́й, не ѡ҆ста́вилъ є҆сѝ бл҃года́тными словесы̀ твои́ми всѣ́хъ притека́ющихъ къ тебѣ̀, подвиза́ѧ пѣ́ти бг҃ꙋ: А҆ллилꙋ́їа.

І҆́косъ ѕ҃

Возсїѧ̀, ꙗ҆́кѡ ѕвѣзда̀ пресвѣ́тлаѧ, мꙋ́дрость твоѧ̀, ди́вный слꙋжи́телю хрⷭ҇то́въ: бж҃їимъ бо и҆зволе́нїемъ и҆з̾ затво́ра, тѧ̀ сокры́вшагѡ, ꙗ҆ви́шасѧ пото́цы живы́хъ слове́съ твои́хъ и҆ ѿкры́сѧ цѣльбоно́сный и҆сто́чникъ бл҃года́тныхъ ᲂу҆че́нїй, ᲂу҆толѧ́ѧй всѧ́каго жа́ждꙋщаго и҆ съ вѣ́рою къ немꙋ̀ припа́дающаго. Мы́ же взыва́емъ тѝ си́це:

Ра́дꙋйсѧ, ᲂу҆стна́ми твои́ми мрⷣость бж҃їю вѣща́вый: ра́дꙋйсѧ, є҆́юже жа́ждꙋщыѧ напои́вый.

Ра́дꙋйсѧ, въ по́двизѣхъ и҆́ноческагѡ житїѧ̀ неꙋтоми́мый: ра́дꙋйсѧ, сто́лпе правосла́вїѧ непоколеби́мый.

Ра́дꙋйсѧ, ѻ҆бы́чаєвъ грѣхо́вныхъ мꙋ́дрый и҆скорени́телю: ра́дꙋйсѧ, къ добродѣ́тели неꙋста́нный води́телю.

Ра́дꙋйсѧ, дꙋ́шъ на́шихъ цѣли́телю: ра́дꙋйсѧ, бл҃гоче́стїѧ на́шегѡ ѡ҆корми́телю.

Ра́дꙋйсѧ, ст҃и́телю ѳеофа́не, премꙋ́дрый ᲂу҆чи́телю и҆ хрⷭ҇тїа́нскагѡ житїѧ̀ наста́вниче.

Конда́къ з҃

Хотѧ̀ црⷭ҇твїѧ бж҃їѧ дости́гнꙋти, ты̀, ст҃ы́й ѻ҆́тче, ѿре́клсѧ є҆сѝ мі́ра и҆ ѡ҆брѣ́лъ є҆сѝ бл҃года́ть дх҃а ст҃а́гѡ, и҆ съ любо́вїю слꙋжи́лъ є҆сѝ лю́демъ, подража́ѧ пастыренача́льникꙋ хрⷭ҇тꙋ̀ и҆ поѧ̀ томꙋ̀: А҆ллилꙋ́їа.

І҆́косъ з҃

Но́ваго подви́жника и҆ ᲂу҆го́дника хрⷭ҇то́ва, смире́нїѧ и҆ кро́тости и҆спо́лненнаго, ви́дѧще тѧ̀ лю́дїе, съ наде́ждою ᲂу҆стреми́шасѧ въ пꙋ́стынь вы́шенскꙋю, ча́юще твоеѧ̀ бл҃года́тныѧ по́мощи. Та́кожде и҆ мы̀, по́мощи ѿ тебє̀ просѧ́ще, вопїе́мъ такова̑ѧ:

Ра́дꙋйсѧ, кро́тостїю дꙋ́ха твоегѡ̀ мнѡ́гїѧ къ бг҃ꙋ ѡ҆брати́вый: ра́дꙋйсѧ, ᲂу҆мы̀ помрачє́нныѧ просвѣти́вый.

Ра́дꙋйсѧ, чⷭ҇тотꙋ̀ а҆́гг҃льскꙋю на землѝ стѧжа́вый: ра́дꙋйсѧ, стра́ждꙋщыѧ твое́ю любо́вїю ᲂу҆врачева́вый.

Ра́дꙋйсѧ, неѕло́бїѧ ди́вный наста́вниче: ра́дꙋйсѧ, бл҃гоче́стїѧ всесвѣ́тлый свѣти́льниче.

Ра́дꙋйсѧ, къ покаѧ́нїю всѣ́хъ призыва́ѧй: ра́дꙋйсѧ, по́мощи твоеѧ̀ просѧ́щихъ не ѡ҆ставлѧ́ѧй.

Ра́дꙋйсѧ, ст҃и́телю ѳеофа́не, премꙋ́дрый ᲂу҆чи́телю и҆ хрⷭ҇тїа́нскагѡ житїѧ̀ наста́вниче.

Конда́къ и҃

Стра́нный и҆ ди́вный по́двигъ ꙗ҆ви́лъ є҆сѝ, ст҃и́телю, въ житїѝ твое́мъ: въ трꙋдѣ́хъ и҆ непреста́нномъ бг҃омы́слїи пребыва́ѧй, ра́зꙋма дꙋхо́внагѡ сокро́вище стѧжа́лъ є҆сѝ и҆ писа́ньми твои́ми цр҃кви ᲂу҆се́рднѡ послꙋжи́лъ є҆сѝ. Мы́ же, ви́дѧще сїѐ, во ᲂу҆миле́нїи серде́цъ на́шихъ бл҃года́рнѡ пое́мъ бг҃ꙋ: А҆ллилꙋ́їа.

І҆́косъ и҃

Всѣ̑мъ всѧ̑ ꙗ҆влѧ́ешисѧ, ст҃и́телю бж҃їй: па́стырь и҆ ѻ҆те́цъ, ᲂу҆чи́тель и҆ наста́вникъ и҆ и҆́стинный проповѣ́дникъ, писа̑нїѧ бо твоѧ̑ во всѣ́хъ гра́дѣхъ и҆ ве́сехъ до ны́нѣ вопїю́тъ немо́лчнымъ бл҃говѣ́стїемъ. Сегѡ̀ ра́ди мы̀, ча̑да твоѧ̑ дꙋхѡ́внаѧ, съ любо́вїю глаго́лемъ тѝ:

Ра́дꙋйсѧ, росо́ю дх҃а ст҃а́гѡ напое́нный: ра́дꙋйсѧ, свѣ́томъ бл҃года́ти бж҃їѧ ѡ҆сѣне́нный.

Ра́дꙋйсѧ, сокро́вище нетлѣ́нное стѧжа́вый: ра́дꙋйсѧ, дѣѧ́нїємъ а҆пⷭ҇льскимъ поревнова́вый.

Ра́дꙋйсѧ, къ бг҃опозна́нїю пꙋ́ть ᲂу҆казꙋ́ющїй: ра́дꙋйсѧ, мꙋ́дрость бл҃года́тнꙋю взыскꙋ́ющїй.

Ра́дꙋйсѧ, цр҃кве рꙋ́сскїѧ процвѣте́нїе: ра́дꙋйсѧ, ст҃ы́хъ ѻ҆тє́цъ ᲂу҆краше́нїе.

Ра́дꙋйсѧ, ст҃и́телю ѳеофа́не, премꙋ́дрый ᲂу҆чи́телю и҆ хрⷭ҇тїа́нскагѡ житїѧ̀ наста́вниче.

Конда́къ ѳ҃

Всѧ́къ ча́съ привре́меннагѡ житїѧ̀ твоегѡ̀, ст҃и́телю, є҆ди́номꙋ на потре́бꙋ рабо́талъ є҆сѝ, и҆ дꙋ́шꙋ твою̀ хра́минꙋ чи́стꙋ дх҃а ст҃а́гѡ содѣ́лалъ є҆сѝ, возгрѣва́ѧ се́рдце твоѐ непреста́нною мл҃твою і҆и҃совою и҆ воспѣва́ѧ гдⷭ҇ꙋ: А҆ллилꙋ́їа.

І҆́косъ ѳ҃

Виті́ѧ златовѣща́нный, кро́ткїй и҆ мꙋ́дрый ꙗ҆ви́лсѧ є҆сѝ всѣ̑мъ внима́вшымъ тебѣ̀ съ вѣ́рою, и҆ си́лою слове́съ твои́хъ наꙋча́лъ є҆сѝ пра́вдѣ бж҃їей. Сегѡ̀ ра́ди прїимѝ ѿ на́съ, бл҃же́нне ѻ҆́тче, восхвалє́нїѧ сицева̑ѧ:

Ра́дꙋйсѧ, ст҃и́телю бж҃їй, смире́нный и҆ кро́ткїй: ра́дꙋйсѧ, па́стырю бл҃гі́й и҆ чадолюби́вый.

Ра́дꙋйсѧ, землѝ рѡссі́йскїѧ златоꙋ́сте: ра́дꙋйсѧ, бг҃оѧвле́нїю тезоимени́те.

Ра́дꙋйсѧ, дꙋ́шъ заблꙋ́ждшихъ и҆́стинный пꙋтеводи́телю: ра́дꙋйсѧ, печа́льныхъ ско́рый ᲂу҆тѣ́шителю.

Ра́дꙋйсѧ, немощны̑мъ въ вѣ́рѣ непоколеби́мое ᲂу҆твержде́нїе: ра́дꙋйсѧ, ᲂу҆ныва́ющымъ въ трꙋдѣ́хъ мно́зѣхъ ѡ҆бодре́нїе.

Ра́дꙋйсѧ, ст҃и́телю ѳеофа́не, премꙋ́дрый ᲂу҆чи́телю и҆ хрⷭ҇тїа́нскагѡ житїѧ̀ наста́вниче.

Конда́къ і҃

Сп҃се́нїѧ пꙋ́ть ѿ грѣхо́вныхъ тене́тъ ча́дѡмъ бж҃їимъ начерта́лъ є҆сѝ, ᲂу҆го́дниче хрⷭ҇то́въ, сказꙋ́ѧ ѡ҆ та́йнахъ бра́ни неви́димыѧ, и҆ вѣне́цъ вожделѣ́нный жа́ждꙋщымъ сп҃се́нїѧ показа́лъ є҆сѝ, призыва́ѧ бл҃года́рнѡ пѣ́ти бг҃ꙋ: А҆ллилꙋ́їа.

І҆́косъ і҃

Стѣна̀ и҆ защище́нїе ста́да хрⷭ҇то́ва ѿ волкѡ́въ, гꙋбѧ́щихъ є҆̀, ꙗ҆ви́шасѧ бг҃омꙋ̑драѧ писа̑нїѧ твоѧ̑, ст҃и́телю бж҃їй, и҆́миже ѡ҆гражда́еши вѣ́рныхъ на пꙋтѝ ко сп҃се́нїю. Мы́ же, просвѣща́емїи ᲂу҆че́ньми твои́ми, бл҃гоговѣ́йнѡ взыва́емъ тѝ си́це:

Ра́дꙋйсѧ, пра́вило вѣ́ры: ра́дꙋйсѧ, наста́вниче премꙋ́дрый.

Ра́дꙋйсѧ, ᲂу҆чи́телю бл҃гоче́стїѧ: ра́дꙋйсѧ, и҆скорени́телю нече́стїѧ.

Ра́дꙋйсѧ, свѣти́льниче пресвѣ́тлый: ра́дꙋйсѧ, проповѣ́дниче дерзнове́нный.

Ра́дꙋйсѧ, ꙗ҆́кѡ сѣ́ѧтель до́брый ни́вꙋ хрⷭ҇то́вꙋ воздѣ́лавый: ра́дꙋйсѧ, ꙗ҆́кѡ ко́кошъ, ча̑да твоѧ̑ ѡ҆хранѧ́ющїй.

Ра́дꙋйсѧ, ст҃и́телю ѳеофа́не, премꙋ́дрый ᲂу҆чи́телю и҆ хрⷭ҇тїа́нскагѡ житїѧ̀ наста́вниче.

Конда́къ а҃і

Пѣ́нїе всехва́льное прино́симъ тѝ, ст҃и́телю, и҆ ᲂу҆бл҃жа́емъ тѧ̀, просла́вившаго житїе́мъ и҆ пѡ́двиги твои́ми ст҃о́е и҆́мѧ творца̀ и҆ бг҃а на́шегѡ. Сподо́би и҆ на́съ мл҃твами твои́ми бл҃гонра́вное житїѐ препроводи́ти, да вкꙋ́пѣ съ тобо́ю воспои́мъ томꙋ̀: А҆ллилꙋ́їа.

І҆́косъ а҃і

Свѣтоза́рное житїѐ твоѐ, преди́вный затво́рниче, не скры́сѧ ѿ и҆́щꙋщихъ пра́вды бж҃їей. Бл҃гі́й же коне́цъ тво́й безмѧте́жный и҆ ми́рный показа́ тѧ и҆́стинный сосꙋ́дъ бж҃їей бл҃года́ти. Мы́ же є҆ди́ными ᲂу҆сты̀ со ᲂу҆миле́нїемъ глаго́лемъ тѝ:

Ра́дꙋйсѧ, чⷭ҇тоты̀ дꙋше́вныѧ и҆ тѣле́сныѧ сосꙋ́де бл҃гослове́нный: ра́дꙋйсѧ, до конца̀ гдⷭ҇ꙋ послꙋжи́вый.

Ра́дꙋйсѧ, по кончи́нѣ твое́й бл҃же́нства вѣ́чнагѡ ᲂу҆досто́ивыйсѧ: ра́дꙋйсѧ, црⷭ҇твїе бж҃їе наслѣ́довавый.

Ра́дꙋйсѧ, ѻ҆би́тели вы́шенскїѧ ди́вное ᲂу҆краше́нїе: ра́дꙋйсѧ, землѝ тамбо́вскїѧ и҆ ша́цкїѧ просвѣще́нїе.

Ра́дꙋйсѧ, па́ствы рѧза́нскїѧ похвало̀ и҆ ра́дованїе: ра́дꙋйсѧ, дꙋ́шъ на́шихъ попече́нїе.

Ра́дꙋйсѧ, ст҃и́телю ѳеофа́не, премꙋ́дрый ᲂу҆чи́телю и҆ хрⷭ҇тїа́нскагѡ житїѧ̀ наста́вниче.

Конда́къ в҃і

Бл҃года́тїю бж҃їею преизрѧ́днѡ ѡ҆заре́нный и҆ па́ствѣ твое́й мꙋ́дрѣ и҆ предо́брѡ послꙋжи́вый, ди́вный и҆ кро́ткїй ст҃и́телю, не преста́ни ѡ҆ на́съ хода́тайствовати пред̾ гдⷭ҇емъ на нб҃сѝ, и҆дѣ́же предстои́ши въ немо́лчномъ славосло́вїи, со а҆́гг҃лы взыва́ѧ томꙋ̀: А҆ллилꙋ́їа.

І҆́косъ в҃і

Пою́ще по́двиги твоѧ̑, со ᲂу҆пова́нїемъ припа́даемъ къ чтⷭ҇ны̑мъ моще́мъ твои̑мъ [и҆лѝ: чтⷭ҇нѣ́й і҆кѡ́нѣ твое́й], ст҃и́телю бж҃їй, и҆ мо́лимъ тѧ̀, нбⷭ҇наго покрови́телѧ на́шего и҆ вели́каго ѡ҆ на́съ предста́телѧ пред̾ прⷭ҇то́ломъ гдⷭ҇а сла́вы, ᲂу҆миле́ннѡ взыва́юще:

Ра́дꙋйсѧ, ᲂу҆го́дниче бж҃їй преизрѧ́дный: ра́дꙋйсѧ, подви́жниче хрⷭ҇то́въ преди́вный.

Ра́дꙋйсѧ, предста́телю крѣ́пкїй на тѧ̀ ᲂу҆пова́ющихъ: ра́дꙋйсѧ, застꙋ́пниче ско́рый тѧ̀ призыва́ющихъ.

Ра́дꙋйсѧ, дрꙋ́же хрⷭ҇то́въ и҆ люби́миче бж҃їй: ра́дꙋйсѧ, хода́таю те́плый сп҃се́нїѧ дꙋ́шъ на́шихъ.

Ра́дꙋйсѧ, цѣломꙋ́дренныхъ ᲂу҆се́рдный ѡ҆храни́телю: ра́дꙋйсѧ, въ ско́рбехъ на́шихъ ᲂу҆тѣ́шителю.

Ра́дꙋйсѧ, ст҃и́телю ѳеофа́не, премꙋ́дрый ᲂу҆чи́телю и҆ хрⷭ҇тїа́нскагѡ житїѧ̀ наста́вниче.

Конда́къ г҃і

Ѽ, бг҃омꙋ́дрый ᲂу҆чи́телю, землѝ рꙋ́сскїѧ похвало̀ и҆ ᲂу҆краше́нїе, ст҃и́телю ѻ҆́тче ѳеофа́не, кро́ткїй и҆ те́плый на́шъ застꙋ́пниче! Прїимѝ ѿ на́съ ма́лое сїѐ моле́нїе, тебѣ̀ приноси́мое, и҆ дꙋ́шъ на́шихъ бл҃года́рное восхвале́нїе. Не забꙋ́ди на́съ, грѣ́шныхъ, въ мл҃твахъ твои́хъ, да ᲂу҆пова́юще на тѧ̀ непреста́ннѡ взыва́емъ гдⷭ҇ꙋ си́лъ: А҆ллилꙋ́їа.

Повто́ръ

Сей конда́къ глаго́лется три́жды, та́же і҆́косъ а҃-й и҆ конда́къ а҃-й.

І҆́косъ а҃

А҆́гг҃льскїѧ чⷭ҇тоты̀ взыскꙋ́ѧ и҆ ве́лїю любо́вь ко гдⷭ҇ꙋ и҆мѣ́ѧ, по́двигъ и҆́ноческагѡ житїѧ̀ под̾ѧ́лъ є҆сѝ, ст҃и́телю преди́вный. Мꙋ́дрости же да́ръ, ѿ гдⷭ҇а тѝ да́нный, стори́цею ᲂу҆мно́живъ, лю́демъ во сп҃се́нїе послꙋжи́лъ є҆сѝ. Сегѡ̀ ра́ди и҆ мы̀ съ любо́вїю вопїе́мъ тѝ:

Ра́дꙋйсѧ, па́че всегѡ̀ земна́гѡ гдⷭ҇а возлюби́вый: ра́дꙋйсѧ, на него̀ є҆ди́наго всѐ ᲂу҆пова́нїе возложи́вый.

Ра́дꙋйсѧ, ѿ младе́нчества се́рдце своѐ гдⷭ҇еви преда́вый: ра́дꙋйсѧ, ѿ ю҆́ности ра́зꙋмъ сво́й бж҃їею премⷣростїю напита́вый.

Ра́дꙋйсѧ, а҆́гг҃льскагѡ житїѧ̀ ревни́телю: ра́дꙋйсѧ, дх҃а ст҃а́гѡ стѧжа́телю.

Ра́дꙋйсѧ, на лови́твꙋ человѣ́кѡвъ бг҃омъ пред̾избра́нный: ра́дꙋйсѧ, ꙗ҆́кѡ лꙋчеза́рный свѣти́льникъ, гдⷭ҇емъ возже́нный.

Ра́дꙋйсѧ, ст҃и́телю ѳеофа́не, премꙋ́дрый ᲂу҆чи́телю и҆ хрⷭ҇тїа́нскагѡ житїѧ̀ наста́вниче.

Конда́къ а҃

И҆збра́нный гдⷭ҇емъ цр҃кве рꙋ́сскїѧ свѣти́льниче, и҆зрѧ́дный подви́жниче и҆ и҆́стинный слꙋжи́телю хрⷭ҇то́въ, бг҃омꙋ́дре ст҃и́телю ѳеофа́не! Восхвалѧ́емъ тѧ̀ любо́вїю и҆ чти́мъ по́двиги и҆ трꙋды̀ твоѧ̑, и҆́миже вѣ̑рнымъ лю́демъ до́брѣ послꙋжи́лъ є҆сѝ, и҆ въ затво́рѣ пребыва́ѧ, бл҃года́тными ᲂу҆че́ньми пꙋ́ть сп҃се́нїѧ начерта́лъ є҆сѝ. Ны́нѣ же, прⷭ҇то́лꙋ бж҃їю предстоѧ̀, ѡ҆ на́съ моли́сѧ, зовꙋ́щихъ тѝ:

Ра́дꙋйсѧ, ст҃и́телю ѳеофа́не, премꙋ́дрый ᲂу҆чи́телю и҆ хрⷭ҇тїа́нскагѡ житїѧ̀ наста́вниче.

Моли́твы

Ѽ, ст҃и́телю ѻ҆́тче ѳеофа́не, а҆рхїере́ю пресла́вный и҆ преди́вный затво́рниче, бж҃їй и҆збра́нниче и҆ та̑инъ хрⷭ҇то́выхъ слꙋжи́телю, бг҃омꙋ́дрый ᲂу҆чи́телю и҆ а҆пⷭ҇льскихъ слове́съ и҆зрѧ́дный и҆з̾ѧсни́телю, ѻ҆те́ческихъ добротолю́бныхъ сказа́нїй списа́телю, хрⷭ҇тїа́нскагѡ бл҃гоче́стїѧ и҆зѧ́щный проповѣ́дниче и҆ жи́зни дꙋхо́вныѧ и҆скꙋ́сный наста́вниче, по́двигѡвъ мона́шескихъ ᲂу҆се́рдный ревни́телю и҆ всѣ̑мъ лю́демъ бл҃года́ти хода́таю! Ны́нѣ къ тебѣ̀, на нб҃сѣ́хъ бг҃ꙋ предстоѧ́щемꙋ и҆ ѡ҆ на́съ молѧ́щемꙋсѧ припа́даемъ и҆ си́це взыва́емъ: и҆спросѝ ᲂу҆ всеще́драгѡ бг҃а цр҃кви рѡссі́йстѣй и҆ странѣ̀ на́шей ми́ръ и҆ бл҃гостоѧ́нїе: ст҃и́телємъ хрⷭ҇тѡ́вымъ и҆́стины бжⷭ҇твенныѧ досто́йное ѡ҆хране́нїе, па́ствы до́брое ѡ҆кормле́нїе, лжеꙋчи́телей и҆ є҆ретїкѡ́въ и҆зрѧ́дное посрамле́нїе: подвиза́ющымсѧ смире́нїе, стра́хъ бж҃їй и҆ чⷭ҇тотꙋ̀ дꙋше́внꙋю и҆ тѣле́снꙋю: ᲂу҆чи́телємъ бг҃овѣ́дѣнїе и҆ мꙋ́дрость: ᲂу҆ча́щымсѧ ре́вность и҆ по́мощь бж҃їю. И҆ всѣ̑мъ правосла̑внымъ ᲂу҆твержде́нїе на пꙋтѝ ко сп҃се́нїю, да вкꙋ́пѣ съ тобо́ю просла́вимъ бж҃їю си́лꙋ и҆ премⷣрость гдⷭ҇а на́шегѡ і҆и҃са хрⷭ҇та̀, со безнача́льнымъ є҆гѡ̀ ѻ҆ц҃е́мъ, съ прест҃ы́мъ, бл҃ги́мъ и҆ животворѧ́щимъ є҆гѡ̀ дх҃омъ, ны́нѣ и҆ при́снѡ, и҆ во вѣ́ки вѣкѡ́въ. А҆ми́нь.