Российская Православная Церковь

по благословенію Архіерейскаго Сѵнода Россійской Православной Церкви

Православный календарь

Канѡ́нъ

Канѡ́нъ ст҃о́мꙋ прпⷣбномꙋ мїхаи́лꙋ кло́пскомꙋ, но́вгородскомꙋ, хрⷭ҇та̀ ра́ди ю҆ро́дивомꙋ (вторы́й)

Прп. Михаила Клопского, Новгородского (1453) 24 января 2026
Глас 8

Пѣ́снь а҃

І҆рмо́съ

Колесницегони́телѧ фараѡ́нѧ погрꙋзѝ, чꙋдотворѧ́й и҆ногда̀ мѡѷсе́йскїй же́злъ, крⷭ҇тоѻбра́знѡ порази́въ и҆ раздѣли́въ мо́ре, і҆и҃лѧ же бѣглеца̀ пѣшехо́дца спасѐ, пѣ́снь бг҃ови воспѣва́юща.

Тропа́рь

Въ црⷭ҇тво нбⷭ҇ное ᲂу҆́зкимъ и҆ приско́рбнымъ пꙋте́мъ, по за́повѣди влⷣки своегѡ̀ хрⷭ҇та̀, прпⷣбне ѻ҆́тче мїхаи́ле, ше́дъ, широ́кїй и҆ простра́нный пꙋ́ть возненави́дѣлъ є҆сѝ. Распросте́ршїйсѧ мра́къ ᲂу҆ма̀ моегѡ̀ ѿженѝ: да возмогꙋ̀ ма́лое сїѐ моле́нїе принестѝ въ пресвѣ́тлꙋю па́мѧть твою̀.

Тропа́рь

Благочести́вагѡ ко́рене пресвѣ́тлаѧ ѻ҆́трасль, всю̀ мы́сль твою̀ бг҃ꙋ возложи́лъ є҆сѝ ѿ младе́нства: и҆ крⷭ҇тъ тво́й взе́мъ, невозвра́тнымъ пꙋте́мъ томꙋ̀ послѣ́довалъ є҆сѝ, и҆ по а҆пⷭ҇толꙋ дх҃о́внꙋю мꙋ́дрость стѧжа́въ, є҆́же є҆́сть бꙋ́йство хрⷭ҇та̀ ра́ди, всѧ́чески ѿрѣва́ѧ ѿ себє̀ тщесла́вїе.

Тропа́рь

Хрⷭ҇толюби́вагѡ царѧ̀ въ жи́зни се́й бг҃омо́лецъ бы́лъ є҆сѝ, ны́нѣ предстоѧ̀ ст҃ѣ́й трⷪ҇цѣ во мно́зѣ дерзнове́нїи, моли́сѧ, прпⷣбне ѻ҆́тче, ѡ҆ держа́вѣ є҆гѡ̀, и҆зба́витисѧ ѿ нахожде́нїѧ и҆ноплеме́нныхъ вели́кїѧ рѡссі́и хрⷭ҇толюби̑вымъ лю́демъ, пѣ́снь бг҃ꙋ возсыла́ющымъ.

Тропа́рь

І҆ѡа́нна списа́вшагѡ лѣ́ствицꙋ нра́вѡмъ ᲂу҆подо́билсѧ є҆сѝ, мона́шескїй чи́нъ возлюби́въ, на безстра́стїѧ го́рꙋ возше́дъ, и҆ сегѡ̀ ра́ди невозбра́ненъ восхо́дъ къ нб҃сѝ ѡ҆брѣ́лъ, є҆сѝ, и҆ въ нбⷭ҇наѧ врата̀ дости́гъ, въ го́рнемъ і҆ерⷭ҇ли́мѣ всели́лсѧ є҆сѝ, и҆дѣ́же веселѧ́щихсѧ всѣ́хъ жили́ще, пѣ́снь бг҃ꙋ возсыла́ющихъ.

Речє́нїѧ бж҃е́ствєннаѧ и҆ прⷪ҇ро́чєствїѧ, ꙗ҆̀же и҆здре́вле по́мнѧще ꙗ҆́вѣ, бг҃онача́льное є҆стество̀ є҆ди́нственное сла́вимъ, присносꙋ́щное, безнача́льное, въ тре́хъ ли́цѣхъ, ѻ҆ц҃ѣ̀, и҆ сн҃ѣ, и҆ дс҃ѣ, содѣ́тельное, всеси́льное.

Богороди́ченъ

Неискꙋсобра́чнѡ хрⷭ҇та̀ родила̀ є҆сѝ, є҆́же по на́мъ, на́съ ра́ди воспрїе́мша є҆стество̀, пречⷭ҇таѧ, и҆ непрело́жна во ѻ҆бою̀ пребы́вша: є҆го́же молѝ непреста́ннѡ, грѣхѡ́въ мои́хъ дарова́ти и҆ и҆скꙋше́нїй и҆збавле́нїе.

Пѣ́снь г҃

І҆рмо́съ

Оу҆твержде́й въ нача́лѣ нб҃са̀ ра́зꙋмомъ, и҆ зе́млю на вода́хъ ѡ҆снова́вый, на ка́мени мѧ̀, хрⷭ҇тѐ, за́повѣдей твои́хъ ᲂу҆твердѝ: ꙗ҆́кѡ нѣ́сть ст҃ъ па́че тебє̀, є҆ди́не чл҃вѣколю́бче.

Тропа́рь

Всеѧ̀ рѡссі́и ве́лїй чꙋдотво́рецъ, прпⷣбне, бы́лъ є҆сѝ, и҆ прⷪ҇ро́ческагѡ вели́кагѡ да́ра сподо́билсѧ є҆сѝ, сказа́въ безвѣ̑стнаѧ и҆ та̑йнаѧ: и҆зба́ви ны̀ ѿ та́йныхъ прегрѣше́нїй и҆ помышле́нїй лꙋка́выхъ, да чи́стымъ се́рдцемъ хрⷭ҇тꙋ̀ возопїе́мъ: ꙗ҆́кѡ нѣ́сть ст҃ъ па́че тебє̀, чл҃вѣколю́бче.

Тропа́рь

Самоде́ржца, ре́клъ є҆сѝ, благочести́вагѡ вели́кагѡ кнѧ́зѧ во́ли покори́тесѧ, прⷪ҇ро́чески вѣща́въ, блаже́нне, ѽ мꙋ́жїе вели́кагѡ нова́града! та́кѡ бо подоба́етъ, и҆ та́кѡ ᲂу҆годи́сѧ сꙋдьба́мъ бж҃їимъ бы́ти: а҆́ще же не послꙋ́шаете, ѕлѣ̀ поги́бнете, є҆́же и҆ бы́сть, ѿ бг҃а на́мъ въ наказа́нїе.

Тропа́рь

Повелѣ́нїємъ влⷣки хрⷭ҇та̀, ѻ҆́тче, послѣ́дствꙋѧ, кро́токъ и҆ смире́нъ, и҆ всѣ̑мъ всѧ́къ бы́лъ є҆сѝ подо́бникъ, вселе́нныѧ ᲂу҆чи́телю: и҆ пред̾ кнѧ́зи не стыдѧ́сѧ є҆́же ѡ҆ благоче́стїи, и҆ є҆́же сꙋдьба́мъ бж҃їимъ го́дѣ, предвари́въ бꙋ́дꙋщее ꙗ҆́снѡ сказа́лъ є҆сѝ.

Тропа́рь

Благослове́нїемъ твои́мъ то́щыѧ жи̑тницы и҆спо́лнилъ є҆сѝ жи́та, и҆ ктомꙋ̀ про́чее не и҆стощи́шасѧ: и҆ ѡ҆лѧденѣ́вшыѧ и҆ногда̀ люде́й ни̑вы дꙋшє́вныѧ ѡ҆чи́стилъ є҆сѝ, и҆ плодонѡ́сны сотвори́лъ є҆сѝ: и҆ непло́дный ᲂу҆́мъ мо́й плодоно́сенъ сотворѝ.

Ѿ є҆ди́нагѡ ѻ҆ц҃а̀, ꙗ҆́кѡ ѿ ᲂу҆ма̀ рожде́ннаго сло́ва, и҆ дх҃а происходѧ́ща неизглаго́ланнѡ, по коемꙋ́ждо помышле́нїи и҆ пи́сменными ᲂу҆чє́нїи пости́гше, є҆ди́наго бг҃а трисо́лнечнаго почита́емъ.

Богороди́ченъ

Хра́мъ ꙗ҆ви́ласѧ є҆сѝ чи́стъ, дв҃о мт҃и мр҃і́е, всѧ̑ всеси́льнѡ и҆ мꙋдрососта́вльшагѡ хрⷭ҇та̀, и҆ въ чинꙋ̀ поло́жшагѡ и҆ носѧ́щагѡ: є҆го́же ми́лостива мнѣ̀ сотворѝ, ма́терними твои́ми моли́твами.

Пѣ́снь д҃

І҆рмо́съ

Ты̀ моѧ̀ крѣ́пость, гдⷭ҇и, ты̀ моѧ̀ и҆ си́ла, ты̀ мо́й бг҃ъ, ты̀ моѐ ра́дованїе, не ѡ҆ста́вль нѣ́дра ѻ҆́ч҃а, и҆ на́шꙋ нищетꙋ̀ посѣти́въ. тѣ́мъ съ прⷪ҇ро́комъ а҆ввакꙋ́момъ зовꙋ́ ти: си́лѣ твое́й сла́ва, чл҃вѣколю́бче.

Тропа́рь

Мака́рїа вели́кагѡ, па́че є҆стества̀ а҆́гг҃льское житїѐ на землѝ пожи́вшагѡ, сегѡ̀ постꙋ̀ и҆ бдѣ́нїю, и҆ на землѝ лега́нїю, и҆ прѡ́чимъ добродѣ́телемъ, ѻ҆́тче мїхаи́ле, поревнова́лъ є҆сѝ, и҆ ꙗ҆́кѡ со́лнце въ рѡссі́йстѣй землѝ возсїѧ́лъ є҆сѝ: молѝ ѡ҆ на́съ є҆ди́наго чл҃вѣколю́бца.

Тропа́рь

Свѧтѣ́йшагѡ а҆рхїепⷭ҇кпа є҆ѵѳѵ́мїа поꙋче́нїємъ и҆ дх҃ѡ́внымъ наказа́нїємъ вельмѝ внима́ѧ, но скрыва́ѧсѧ ю҆ро́дствомъ хрⷭ҇та̀ ра́ди въ жи́зни се́й, бл҃же́нне, ра́зꙋма дх҃о́внагѡ и҆спо́лненный хрⷭ҇тꙋ̀ взыва́лъ є҆сѝ: си́лѣ твое́й сла́ва, чл҃вѣколю́бче.

Тропа́рь

Бг҃оспаса́емыхъ хрⷭ҇толюби́выхъ люде́й, и҆ мона́хѡвъ мно́жєства ра́дости и҆спо́лнилъ є҆сѝ, и҆ дх҃о́внагѡ весе́лїѧ, твои́мъ ди́внымъ и҆ чрез̾есте́ственнымъ, ꙗ҆́кѡ во є҆ди́номъ часѣ̀ прихожде́нїемъ во ѻ҆би́тель ст҃ы́ѧ трⷪ҇цы, бг҃оно́сный мїхаи́ле, хрⷭ҇тꙋ̀ взыва́ѧ: си́лѣ твое́й сла́ва, чл҃вѣколю́бче.

Тропа́рь

Градѡ́въ высоча́йшагѡ вели́кагѡ нова́града наро́ди, моли́твенника тѧ̀ те́пла и҆мꙋ́ще, и҆ ско́раго помо́щника, и҆ ꙗ҆́кѡ стѣ́нꙋ тве́рдꙋ, и҆ забра́ло неѡбори́мо, и҆ воево́дꙋ крѣ́пка и҆ непобѣди́ма мо́лѧтъ: не забꙋ́ди моли́твєнникъ твои́хъ, и҆збавлѧ́ѧ ны̀ ѿ всѧ́кїѧ нꙋ́жды и҆ печа́ли.

Содержи́тельнаѧ всѣ́хъ сꙋ́щихъ, неви́димаѧ, всеще́драѧ, благоꙋтро́бнаѧ, человѣколюби́ваѧ, трⷪ҇це честна́ѧ и҆ бг҃онача́льнаѧ, не забꙋ́ди менє̀ твоегѡ̀ раба̀, бж҃е, вконе́цъ, нижѐ разорѝ и҆́же завѣща́лъ є҆сѝ твои̑мъ рабѡ́мъ завѣ́тъ, за неизрече́ннꙋю ми́лость.

Богороди́ченъ

Кра́снꙋю тѧ̀, всечи́стаѧ, є҆ди́нꙋ ѡ҆брѣ́тъ ѿ вѣ́ка добро́тꙋ і҆а́кѡвлю, пребезнача́льное сло́во, и҆ всели́всѧ въ тѧ̀ бл҃гоꙋтро́бїѧ ра́ди, ѡ҆бновѝ человѣ́ческое є҆стество̀: є҆го́же молѝ непреста́ннѡ, ѿ всѧ́кїѧ мнѣ̀ и҆зба́витисѧ ско́рби.

Пѣ́снь є҃

І҆рмо́съ

Вскꙋ́ю мѧ̀ ѿри́нꙋлъ є҆сѝ ѿ лица̀ твоегѡ̀, свѣ́те незаходи́мый, и҆ покры́ла мѧ̀ є҆́сть чꙋжда́ѧ тма̀ ѻ҆каѧ́ннаго; но ѡ҆брати́ мѧ, и҆ къ свѣ́тꙋ за́повѣдей твои́хъ пꙋти̑ моѧ̑ напра́ви, молю́сѧ.

Тропа́рь

Вели́кагѡ нова́града наро́ди, въ пречестнꙋ́ю па́мѧть бг҃оно́снагѡ ѻ҆ц҃а̀ мїхаи́ла, моли̑твы со слеза́ми пролива́юще глаго́лютъ: ѽ пречестны́й ѻ҆́тче, ꙗ҆́коже не да́лъ є҆сѝ въ расхище́нїе ѻ҆би́тели, та́кѡ и҆ ѡ҆клевета́ющыѧ на́съ смирѝ, и҆ пꙋти̑ на́шѧ напра́ви, мо́лимсѧ.

Тропа́рь

І҆ѡа́нна крести́телѧ ᲂу҆́зкимъ и҆ приско́рбнымъ пꙋте́мъ ходи́ти произво́лилъ є҆сѝ, жесто́кое на землѝ житїѐ пожи́въ, ꙗ҆́кѡ безпло́тенъ: во ю҆ро́дство преложи́лсѧ є҆сѝ хрⷭ҇та̀ ра́ди, є҆го́же молѝ, прпⷣбне, во тмѣ̀ грѣха̀ низлежа́щаго мѧ̀ воздви́гнꙋти.

Тропа́рь

Преподо́бно и҆ свѧ́то на землѝ житїѐ пожи́въ, посто́мъ и҆ бдѣ́нїемъ, и҆ на землѝ лега́нїемъ, и҆ про́чими добродѣ́тельми мона́шеское житїѐ проше́дъ, ѻ҆́бразъ бы́лъ є҆сѝ ꙗ҆ре́мъ гдⷭ҇ень на сѧ̀ взе́мшымъ, и҆ хрⷭ҇тꙋ̀ послѣ́довавшымъ: пꙋ́ть мо́й напра́ви, молю́сѧ.

Тропа́рь

Ско́ростїю, бг҃оно́сный ѻ҆́тче, ꙗ҆влѧ́ѧсѧ, ѿ бѣ́дъ и҆збавлѧ́ѧ, подо́бѧсѧ свѣтоза́рномꙋ со́лнцꙋ, на безмѣ́рной высотѣ̀ сїѧ́ющꙋ, и҆ ѡ҆бходѧ́щꙋ всю̀ вселе́ннꙋю во є҆ди́номъ днѝ. ты̀, прпⷣбне, па́че человѣ́ка въ жи́зни се́й, бг҃ꙋ сꙋ́щемꙋ въ вы́шнихъ, тва́рь всю̀ созда́вшемꙋ послꙋжи́лъ є҆сѝ.

Дрема́нїемъ ѡ҆тѧгче́на мѧ̀ грѣхо́внымъ и҆ порѣва́ема въ со́нъ сме́ртный, ꙗ҆́кѡ человѣколюби́ваѧ, и҆ всебл҃га́ѧ, и҆ всеми́лостиваѧ, бг҃онача́льнаѧ трⷪ҇це ст҃а́ѧ, ᲂу҆ще́дри и҆ возста́ви мѧ̀.

Богороди́ченъ

Мт҃и дв҃о ѻ҆трокови́це, пречⷭ҇таѧ всенепоро́чнаѧ бг҃облагода́тнаѧ, твои́ми моли́твами сн҃а и҆ бг҃а и҆ гдⷭ҇а ми́лостива сотворѝ мнѣ̀: и҆ страсте́й и҆ прегрѣше́нїй твоего̀ раба̀ и҆зба́ви вско́рѣ.

Пѣ́снь ѕ҃

І҆рмо́съ

Бе́здна грѣхѡ́въ и҆ прегрѣше́нїй бꙋ́рѧ мѧ̀ смꙋща́етъ, и҆ во глꙋбинꙋ̀ нꙋ́жднагѡ рѣ́етъ мѧ̀ ѿча́ѧнїѧ: но твою̀ крѣ́пкꙋю рꙋ́кꙋ мнѣ̀ прострѝ, ꙗ҆́кѡ петро́ви, ѽ ᲂу҆пра́вителю! и҆ спасѝ.

Тропа́рь

Васі́лїа вели́кагѡ поꙋче́нїе въ се́рдцы твое́мъ воспрїѧ́лъ є҆сѝ, бꙋ́рею грѣха̀ не погрꙋзи́всѧ, и҆ въ ти́хое приста́нище дости́гъ црⷭ҇твїѧ нбⷭ҇нагѡ, кора́бль дꙋше́вный съ некра́домымъ бога́тствомъ соблю́лъ є҆сѝ, ѻ҆́тче, и҆ на́съ ѿ сме́ртныѧ глꙋбины̀ возведѝ.

Тропа́рь

Благода́рное сїѐ пѣ́нїе, приноси́мое тебѣ̀ не пре́зри, ѻ҆́тче, но па́че прїимѝ, и҆ ра́дости дх҃о́вныѧ и҆спо́лни на́съ: да безъ закоснѣ́нїѧ поклони́мсѧ ра́цѣ, и҆дѣ́же лежа́тъ честны̑ѧ мо́щи твоѧ̑, и҆сцѣле́нїе всѣ̑мъ да́рꙋюще.

Тропа́рь

Принесе́сѧ моли́тва твоѧ̀ и҆ сле́зы къ бг҃ꙋ, ꙗ҆́кѡ бл҃гоꙋха́нный ѳѷмїа́мъ, и҆ же́ртва непоро́чна и҆ благопрїѧ́тна, и҆ менє̀ не забꙋ́ди хода́тайствомъ твои́мъ ко прест҃ѣ́й трⷪ҇цѣ, и҆ да́ждь ми́лость ненави́дѧщымъ мѧ̀, и҆ враждꙋ́ющымъ мѝ, и҆ ѿ сме́ртныѧ глꙋбины̀ и҆зба́ви ны̀.

Тропа́рь

Всепрпⷣбномꙋ житїю̀ поревнова́лъ бг҃оно́сныхъ ѻ҆ц҃є́въ, ѿ вѣ́ка бг҃оꙋго́днѡ пожи́вшихъ, ѻ҆́тче мїхаи́ле, и҆ во ю҆ро́дствѣ хрⷭ҇та̀ ра́ди всю̀ жи́знь твою̀ мꙋ́ченически сконча́вый, бꙋ́йство нелѣ́пое ѿ менє̀ ѿженѝ.

Вседержи́телю бж҃е, и҆ є҆ди́не неѡпредѣле́нный, всели́сѧ въ мѧ̀ за неизрече́ннꙋю ми́лость, трисо́лнечный влⷣко: и҆ ѡ҆зари́ мѧ, и҆ вразꙋмѝ, ꙗ҆́кѡ бл҃гоꙋтро́бенъ.

Богороди́ченъ

Хра́мъ ꙗ҆ви́ласѧ є҆сѝ бг҃а невмѣсти́магѡ, пречи́стаѧ, хра́мъ и҆ менѐ тогѡ̀ покажѝ бжⷭ҇твенныѧ благода́ти, прест҃а́ѧ влⷣчце, твои́ми мольба́ми, и҆ соблюдѝ невреди́ма.

Пѣ́снь з҃

І҆рмо́съ

На по́ли деи́рѣ и҆ногда̀ мꙋчи́тель пе́щь поста́ви на мꙋче́нїе бг҃оно́сныхъ, въ не́йже трѝ ѻ҆́троки пѣсносло́вѧхꙋ є҆ди́наго бг҃а, трⷪ҇чнѡ воспѣва́хꙋ глаго́люще: ѻ҆тє́цъ бж҃е, бл҃гослове́нъ є҆сѝ.

Тропа́рь

Мїхаи́ла, вели́кагѡ а҆рхїстрати́га, первостоѧ́телѧ престо́лꙋ прест҃ы́ѧ трⷪ҇цы, тезоиме́нство стѧжа́въ, всѣ̑мъ нбⷭ҇нымъ невеще́ствєннымъ си́ламъ соѡбща́ешисѧ, прпⷣбне ѻ҆́тче, съ ни́ми хрⷭ҇тꙋ̀ взыва́ѧ: ѻ҆ц҃є́въ бж҃е, благослове́нъ є҆сѝ.

Тропа́рь

Кло́потъ де́мѡнскїй крⷭ҇та̀ зна́менїемъ неѧ́вственъ сотвори́лъ є҆сѝ, и҆ клоко́щꙋщеесѧ мо́ре жите́йское волна́ми сꙋе́тъ скорѣ́е є҆ле́нскїѧ бо́рзости прескочи́лъ є҆сѝ, и҆ въ прꙋ́дныхъ мѣ́стѣхъ грѣха̀ не потопи́лсѧ є҆сѝ, бг҃оно́сный ѻ҆́тче, поѧ̀ хрⷭ҇тꙋ̀: ѻ҆ц҃є́въ бж҃е, благослове́нъ є҆сѝ.

Тропа́рь

Хрⷭ҇толюби́вомꙋ кнѧ́зю, прише́дшꙋ во ѻ҆би́тель ст҃ы́ѧ трⷪ҇цы, и҆ мы́сль свою̀ и҆сповѣ́давшꙋ тѝ, є҆́же воздви́гнꙋти хра́мъ ст҃ы́ѧ трⷪ҇цы во ѻ҆би́тели твое́й, є҆мꙋ́же, ѻ҆́тче, ꙗ҆́снѡ сказа́лъ є҆сѝ: а҆́ще сотвори́ши сїѐ, всѧ́кое жела́нїе благо́е полꙋчи́ши, є҆́же и҆ бы́сть. Тѣ́мже хрⷭ҇тꙋ̀ взыва́лъ є҆сѝ: ѻ҆ц҃є́въ бж҃е, благослове́нъ є҆сѝ.

Тропа́рь

Ско́ръ помо́щникъ бы́лъ є҆сѝ, прпⷣбне, є҆щѐ въ жи́зни се́й во ѻ҆би́тели ст҃ы́ѧ трⷪ҇цы: дале́че бо въ мо́ри кꙋпцꙋ̀ съ корабле́мъ потоплѧ́емꙋ, и҆ тебѐ призва́вшꙋ на по́мощь, и҆ ꙗ҆́кѡ мо́лнїѧ ско́ростїю по вода́мъ ходѧ̀, сего̀ и҆зба́вилъ є҆сѝ ѿ потопле́нїѧ.

Оу҆́мъ нерожде́нный ѻ҆ц҃ъ, и҆ ѿ негѡ̀ сло́во ро́ждшеесѧ, и҆ дх҃ъ бжⷭ҇твенный непости́жнѣ и҆схо́денъ сы́й, бж҃е є҆динонача́льне трисо́лнечне, пою̀ тебѣ̀: благослове́нъ є҆сѝ, бж҃е ѻ҆тє́цъ на́шихъ.

Богороди́ченъ

Оу҆мерщвле́нъ бы́хъ, пречⷭ҇таѧ, грѣхо́внымъ ꙗ҆́домъ напое́нъ, и҆ притека́ю къ тебѣ̀ вѣ́рою, ро́ждшей нача́льника живота̀. Твои́ми моли́твами раба̀ твоего̀ ѡ҆живѝ, и҆ и҆скꙋше́нїй и҆ страсте́й и҆зба́ви, є҆ди́на чⷭ҇таѧ.

Пѣ́снь и҃

І҆рмо́съ

Покрыва́ѧй вода́ми превы́спрєннѧѧ своѧ̑, полага́ѧй мо́рю предѣ́лъ песо́къ, и҆ содержа́й всѧ̑, тѧ̀ пое́тъ со́лнце, тѧ̀ сла́витъ лꙋна̀, тебѣ̀ прино́ситъ пѣ́снь всѧ̀ тва́рь, ꙗ҆́кѡ содѣ́телю всѣ́хъ, во вѣ́ки.

Тропа́рь

Волнꙋ́ющїйсѧ мо́й ᲂу҆́мъ нелѣ́пыми страстьмѝ и҆ помышлє́нїи и҆сцѣлѝ, прпⷣбне, и҆ коле́блющеесѧ се́рдце моѐ ᲂу҆твердѝ, и҆ смꙋща́ющыѧ вѣ́тры дꙋ́шꙋ мою̀ ᲂу҆ти́ши, да сла́влю хрⷭ҇та̀, содѣ́телѧ всѣ́хъ, во вѣ́ки.

Тропа́рь

Рꙋко́ю содержа́щагѡ всю̀ тва́рь бг҃а, и҆ человѣ́ка созда́вшагѡ честнѣ́йша всеѧ̀ тва́ри за́пѡвѣди, преподо́бне, соверши́лъ є҆сѝ, бг҃оꙋго́днѡ на землѝ жи́знь твою̀ живѧ̀, и҆ во ю҆ро́дство хрⷭ҇та̀ ра́ди во́лею преложи́всѧ, го́рдость и҆ тщесла́вїе ѿ себє̀ ѿри́нꙋлъ є҆сѝ, пѣ́снь воспѣва́ѧ содѣ́телю всѣ́хъ во вѣ́ки.

Тропа́рь

Пресвѵ́тера ди́внаго ѻ҆́наго во ᲂу҆́жасъ приве́лъ є҆сѝ, твои́мъ ди́внымъ и҆ чрез̾есте́ственнымъ прехожде́нїемъ, во ѻ҆би́тель ст҃ы́ѧ трⷪ҇цы. ѽ чꙋ́до! ка́кѡ ѡ҆брѣ́лсѧ є҆сѝ внꙋ́трь хра́ма со всѧ́кимъ ᲂу҆твержде́нїемъ заключе́на, дх҃ꙋ ст҃о́мꙋ сїѧ̑ дѣ́йствꙋющꙋ;

Тропа́рь

И҆лїѝ ѻ҆гнено́сномꙋ, и҆зрѧ́дномꙋ прⷪ҇ро́кꙋ, ѻ҆гнедохнове́нномꙋ ᲂу҆мꙋ̀, начерта́вшемꙋ трⷪ҇ческꙋю си́лꙋ, ᲂу҆подо́билсѧ є҆сѝ, прпⷣбне ѻ҆́тче мїхаи́ле, бл҃гоче́стїѧ ре́вностїю всѧ́чески, и҆ па́ки во ю҆ро́дство хрⷭ҇та̀ ра́ди преложи́сѧ: но добродѣ́тель ᲂу҆таи́тисѧ не возмо́же.

Гдⷭ҇онача́лїе безнача́льное, всеси́льнꙋ и҆ пребл҃гꙋ, совершеннонача́льнꙋ, бл҃годѣ́йственнꙋ, неѡпредѣ́льнꙋ, винꙋ̀ невино́внꙋ, твори́тельнꙋ, присносꙋ́щнꙋ, промысли́тельнꙋ и҆ спаси́тельнꙋю всѣ́хъ, є҆ди́ницꙋ по сꙋществꙋ̀, и҆ трⷪ҇цꙋ ли́цы сла́влю тѧ̀, бж҃е мо́й, вѣ́рнѡ во вѣ́ки.

Богороди́ченъ

На землѝ возсїѧ̀ невече́рнее сл҃нце, ржⷭ҇тво́мъ є҆́же и҆з̾ тебє̀ дѣ́вственнымъ, пречⷭ҇таѧ влⷣчце, и҆ человѣ́ки и҆зба́ви ѿ і҆́дѡльскагѡ помраче́ннагѡ мра́ка. Тѣ́мже и҆ ны́нѣ мѧ̀ па́че тогѡ̀ бг҃онача́лїѧ ѡ҆зарѝ лꙋча́ми, и҆ соблюдѝ твоего̀ раба̀.

Пѣ́снь ѳ҃

І҆рмо́съ

Бл҃гослове́нъ гдⷭ҇ь бг҃ъ і҆и҃левъ, воздви́гнꙋвый ро́гъ спасе́нїѧ на́мъ въ домꙋ̀ дв҃довѣ ѻ҆́трока своегѡ̀, въ ни́хже посѣтѝ на́съ восто́къ съ высоты̀, и҆ напра́вилъ ны̀ є҆́сть на пꙋ́ть ми́ра.

Тропа́рь

Мы́сленное мо́ре страсте́й ᲂу҆спи́въ поще́нїемъ, и҆ чꙋ́вственныѧ воды̀ разлива̑нїѧ мнѡ́га, є҆́зера и҆льме́нѧ свирѣ́пѡ волнꙋ́ємы во́лны, и҆ жестокодыха́ющыѧ вѣ́тры сло́вомъ ᲂу҆кроти́лъ є҆сѝ, и҆ на пꙋ́ть ми́ра напра́ви ны̀.

Тропа́рь

Жи́лами слове́съ твои́хъ ᲂу҆дави́лъ є҆сѝ ѕмі́ѧ, хва́лѧщагосѧ ве́сь мі́ръ поглоти́ти, и҆ те́плыми слеза́ми твои́ми къ бг҃ꙋ ѻ҆́гненное є҆гѡ̀ дыха́нїе погаси́лъ є҆сѝ, и҆ безъ вѣ́сти сотвори́лъ є҆сѝ: тогѡ̀ зїѧ́нїѧ, преподо́бне, и҆зба́ви, и҆ на пꙋ́ть ми́ра напра́ви ны̀.

Тропа́рь

Ꙗ҆́кѡ мѡѷсе́й бг҃ови́децъ чꙋдодѣ́йствꙋѧ, преподо́бне, мл҃твою во́дꙋ и҆з̾ землѝ и҆зве́лъ є҆сѝ, ꙗ҆́же ꙗ҆́коже рѣка̀ ѻ҆би́льнѡ всю̀ ѻ҆би́тель напаѧ́ше, и҆ съ плі́нѳами и҆ ка́менїемъ ладїи̑ пловꙋ́щыѧ на созда́нїе це́ркве ст҃ы́ѧ трⷪ҇цы, въ ти́хое приста́нище приве́лъ є҆сѝ, и҆ на пꙋ́ть ми́ра напра́ви ны̀.

Тропа́рь

Прпⷣбне бг҃оно́сне ѻ҆́тче мїхаи́ле, ꙗ҆́коже не да́лъ є҆сѝ мꙋжє́мъ кро́ве и҆ льстѝ въ расхище́нїе ѻ҆би́тели, въ не́йже мона́шеское житїѐ проходи́лъ є҆сѝ: та́кѡ ѡ҆клевета́ющыѧ на́съ смирѝ, и҆ грѣхо́внꙋю печа́ль ѿженѝ, и҆ сердца̀ на̑ша ра́дости и҆спо́лни, и҆ на пꙋ́ть ми́ра напра́ви ны̀.

Є҆ди́но гдⷭ҇ство и҆ трисїѧ́нное, є҆ди́нственное бг҃онача́лїе трисо́лнечное, пѣвцы̀ прїимѝ твоѧ̑ бг҃олѣ́пнѡ, и҆ прегрѣше́нїй и҆зба́ви, и҆ и҆скꙋше́нїй лю́тыхъ, и҆ вско́рѣ ми́ръ пода́ждь человѣколю́бнѡ, и҆ цр҃кве́й соедине́нїе, и҆ на пꙋ́ть ми́ра напра́ви ны̀.

Богороди́ченъ

Во ᲂу҆тро́бꙋ, хрⷭ҇тѐ сп҃се мо́й, двⷭ҇твеннꙋю всели́всѧ, ꙗ҆ви́лсѧ є҆сѝ мі́рꙋ всемꙋ̀ бг҃омꙋ́жнѡ, неизмѣ́ненъ, неслїѧ́ненъ вои́стиннꙋ: и҆ ѡ҆бѣща́лъ є҆сѝ всегда̀ съ твои́ми рабы̑ бы́ти ꙗ҆́вѣ. Тѣ́мже тебѐ ро́ждшїѧ моли́твами, ми́ръ мі́рꙋ твоемꙋ̀ ᲂу҆стро́й, и҆ на пꙋ́ть ми́ра напра́ви ны̀.