Российская Православная Церковь

по благословенію Архіерейскаго Сѵнода Россійской Православной Церкви

Православный календарь

Канѡ́нъ

Канѡ́нъ ст҃и́телю са́ввѣ, а҆рхїепⷭ҇копꙋ се́рбскомꙋ (вторы́й)

Свт. Саввы, I-го архиеп. Сербского (1236) 25 января 2026
Глас 8

Пѣ́снь а҃

І҆рмо́съ

Колесницегони́телѧ фараѡ́нѧ погрꙋзѝ, чꙋдотворѧ́й и҆ногда̀ мѡѷсе́йскїй же́злъ, крⷭ҇тоѻбра́знѡ порази́въ, и҆ раздѣли́въ мо́ре, і҆и҃лѧ же бѣглеца̀, пѣшехо́дца спасѐ, пѣ́снь бг҃ови воспѣва́юща.

Тропа́рь

Похвалѧ́ющꙋ мнѣ̀ твоѐ житїѐ, ко хрⷭ҇тꙋ̀ твоѐ дерзнове́нїе ꙗ҆́кѡ стѧжа́въ, ѿ бога́тыхъ дх҃а сокро́вищъ ка́плю ра́зꙋма, ѻ҆́тче, да́ти мѝ молю́сѧ, ꙗ҆́кѡ да досто́йнѡ похвали́ти тѧ̀ возмогꙋ̀, хвалы̀ досто́йнаго.

Тропа́рь

И҆зъ ко́рене бл҃га́гѡ бл҃жа́йшаѧ ѻ҆́трасль прозѧ́блъ є҆сѝ, бж҃їѧ ра́зꙋма вода́ми напаѧ́емь, и҆ пло́дъ бл҃гоꙋха́ненъ ꙗ҆ви́лсѧ є҆сѝ, житїе́мъ твои́мъ и҆зъ ю҆́ности, бг҃оно́се, сердца̀ и҆ дꙋ́шы весели́ши пою́щихъ тѧ̀.

Тропа́рь

Ѽ премꙋ́драгѡ твоегѡ̀ къ бг҃ꙋ ра́зꙋма! и҆́мже прехи́трилъ є҆сѝ ѻ҆тца̀ твоего̀, є҆ле́нѧ лови́твою хрⷭ҇тꙋ̀, ѻ҆́тче, в̾еле́нивъ дꙋ́шꙋ твою̀, є҆гѡ́же любо́вїю жго́мый, ко и҆сто́чникꙋ безсме́ртїѧ томꙋ̀ прите́клъ є҆сѝ.

Тропа́рь

Па́че ᲂу҆ма̀ сꙋ́щихъ любо́вїю нбⷭ҇ныхъ добро́тъ подви́жимь, земны́хъ малолѣ́пїѧ и҆збѣжа́въ, є҆ле́нѧ тече́нїемъ хрⷭ҇та̀ взыска́лъ є҆сѝ, ѿ негѡ́же жела́емыхъ, са́вво ѻ҆́тче, не погрѣши́лъ є҆сѝ.

Тропа́рь

Чистоты̀ любо́вїю ѡ҆держи́мь, бл҃горо́дїе дꙋшѝ плотолю́бїемъ не порабо́тивъ: тѣ́мъ ны́нѣ чистоты̀ вѣнцы̀ прїе́млѧ, со а҆́гг҃лы ᲂу҆ хрⷭ҇та̀ весели́шисѧ, къ немꙋ́же ѡ҆ на́съ, са́вво ѻ҆́тче, моли́сѧ.

Богороди́ченъ

Ꙗ҆́же ѿ землѝ до небе́съ досѧ́гшаѧ лѣ́ствица, показа́сѧ і҆а́кѡвꙋ, є҆́юже бг҃ъ чл҃вѣ́комъ сподо́бисѧ бы́ти, благослове́ннаѧ пречⷭ҇таѧ: неизрече́нно чꙋ́до, и҆ недоꙋмѣва́емо видѣ́нїе, спаса́й къ тебѣ̀ прибѣга́ющыѧ.

Пѣ́снь г҃

І҆рмо́съ

Оу҆твержде́й въ нача́лѣ нб҃са̀ ра́зꙋмомъ, и҆ зе́млю на вода́хъ ѡ҆снова́вый, на ка́мени мѧ̀, хрⷭ҇тѐ, за́повѣдей твои́хъ ᲂу҆твердѝ: ꙗ҆́кѡ нѣ́сть ст҃ъ, па́че тебє̀, є҆ди́не чл҃вѣколю́бче.

Тропа́рь

На го́рꙋ ра́зꙋма добродѣ́телей возше́дъ, въ чꙋ́вственнѣй же горѣ̀ а҆ѳѡ́нъ, ꙗ҆́кѡ и҆на́го і҆саа́ка подо́бнѡ сама́го себѐ возве́лъ є҆сѝ: и҆дѣ́же ꙗ҆́кѡ всесожже́нїѧ ѻ҆вча̀ се́рдце твоѐ мы́сленнѡ поже́рлъ є҆сѝ.

Тропа́рь

Свѣти́льникъ твою̀ дꙋ́шꙋ слеза́ми ᲂу҆краша́ѧ, ра́нѡ ко хрⷭ҇тꙋ̀ ᲂу҆́тренюѧ, рꙋ́къ же просте́ртїемъ въ моли́твахъ а҆мали́ка тѣ́ло ᲂу҆мертви́лъ є҆сѝ, и҆ на го́рꙋ безстра́стїѧ возше́лъ є҆сѝ.

Тропа́рь

Безстра́стїѧ любо́вїю пострѣка́емь, плотска̑ѧ взыгра̑нїѧ и҆зсꙋши́лъ є҆сѝ: дꙋ́шꙋ же твою̀ бжⷭ҇твенными сїѧ̑нїи просвѣти́въ, и҆ на́мъ ᲂу҆́бѡ свѣ́тъ разꙋ́мный, са́вво ѻ҆́тче, ᲂу҆лꙋчи́ти, моли́сѧ.

Тропа́рь

Ю҆́ности цвѣ́тъ гла́домъ ᲂу҆вѧди́въ, воздержа́нїемъ ᲂу҆́ды ᲂу҆мертви́въ, поще́нїемъ тѣ́ла ѿве́рглсѧ є҆сѝ, бдѣ́нїемъ и҆ моли́твами возмога́ѧ, ѡ҆ гдⷭ҇ѣ же любо́вїю верха̀ добродѣ́телей, са́вво, дости́глъ є҆сѝ.

Тропа́рь

Бл҃горо́дїемъ высо́къ, и҆ добродꙋ́шїемъ и҆зѧ́щенъ, ра́зꙋма мꙋ́дростїю ᲂу҆дивле́нъ бы́лъ є҆сѝ, цвѣ́тъ ꙗ҆́кѡ прекра́сный чисто́тою сїѧ́ѧ, и҆ свѣ́тлымъ смире́нїемъ, са́вво ѻ҆́тче, ᲂу҆краси́лсѧ є҆сѝ.

Богороди́ченъ

Мт҃и бж҃їѧ пречⷭ҇таѧ, бл҃гослове́ннаѧ и҆ всенепоро́чнаѧ, дꙋшѝ моеѧ̀ стрꙋ́пы и҆сцѣлѝ, и҆ стра̑сти плотскі̑ѧ ѿженѝ: и҆ свободѝ ᲂу҆́мъ мо́й ѿ всѧ́кагѡ вре́да, и҆ ѿ вра́жїѧ мѧ̀ напа́сти и҆змѝ, влⷣчце.

Пѣ́снь д҃

І҆рмо́съ

Ты̀ моѧ̀ крѣ́пость, гдⷭ҇и, ты̀ моѧ̀ и҆ си́ла, ты̀ мо́й бг҃ъ, ты̀ моѐ ра́дованїе, не ѡ҆ста́вль нѣ́дра ѻ҆́ч҃а, и҆ на́шꙋ нищетꙋ̀ посѣти́въ. тѣ́мъ съ прⷪ҇ро́комъ а҆ввакꙋ́момъ зовꙋ́ ти: си́лѣ твое́й сла́ва, чл҃вѣколю́бче.

Тропа́рь

Многочи́сленное зла́то со ѻ҆ц҃е́мъ разда́вше, ѻ҆́ба ꙗ҆́кѡ мꙋ́дрїи домовлады̑ки тлѣ́нными нетлѣ̑ннаѧ и҆змѣни́вше, ꙗ҆̀же ны́нѣ воспрїе́млюще ра́дꙋетесѧ, и҆ на́съ ко хрⷭ҇тꙋ̀ моли́твами ва́шими пою́щихъ вы̀ спаса́йте.

Тропа́рь

Человѣ́ка ѻ҆тца̀ призва́лъ є҆сѝ, а҆́гг҃ла же ко хрⷭ҇тꙋ̀ предпꙋсти́лъ є҆сѝ, є҆гѡ́же посто́мъ и҆ста́ѧвшыѧ ст҃ы̑ѧ мѡ́щи, мѷроточе́нїе мл҃твами твои́ми ᲂу҆стро́илъ є҆сѝ, въ кра́йнее и҆звѣще́нїе се́рдца твоегѡ̀ проше́нїѧ.

Тропа́рь

Сꙋемꙋ́дренный го́тѳинъ, братовоскормле́нїе ва́ше и҆ стра́хъ бж҃їй и҆ клѧ́твꙋ преѡби́дѣвъ, потща́сѧ ѻ҆те́чество твоѐ ѡ҆ѕло́бити: є҆гѡ́же такова́гѡ ᲂу҆́мысла премѣни́ти не возмо́гъ, бж҃їю сꙋдꙋ̀ того̀ пре́далъ є҆сѝ.

Тропа́рь

Похꙋ́ленъ и҆́же мꙋ́дръ ѡ҆ себѣ̀, ꙗ҆́кѡ и҆ се́й несмы́сленный, благосовѣ́тꙋюща тѧ̀ не прїе́мь, бж҃їю ме́сть на сѧ̀ привлечѐ: ме́чь бо, є҆го́же на па́ствꙋ твою̀, ѻ҆́тче, наѡстрѝ, а҆́гг҃ломъ всеконе́чнѡ въ се́рдце своѐ прїѧ́ше.

Тропа́рь

Просвѣща́еми бл҃года́тїю крⷭ҇та̀ твоегѡ̀ ст҃і́и твоѝ, влⷣко, странꙋ̀ люде́й свои́хъ тебѣ̀ вѣ́рою приведо́ша, сы́нъ со ѻ҆тце́мъ, са́вва и҆ сѷмеѡ́нъ бг҃омꙋ́дреннїи, и҆́хже моли́твами спасѝ ѿ пога́ныхъ нахо́да пою́щыѧ: си́лѣ твое́й сла́ва, милосе́рде.

Богороди́ченъ

Но́въ ꙗ҆́коже мѡѷсе́й ꙗ҆ви́всѧ, ᲂу҆стро́илъ є҆сѝ ꙗ҆́кѡ ѻ҆́нъ ски́нїю въ пꙋсты́ни, въ горѣ̀ ст҃ѣ́й ѡ҆гра́дꙋ, ю҆́же превозрасти́лъ є҆сѝ трꙋдѡ́въ твои́хъ пѡ́ты, и҆ возложи́лъ є҆сѝ бж҃їи мт҃ри, ю҆́же и҆ сохранѧ́й ко гдⷭ҇ꙋ съ не́ю моли́твами.

Пѣ́снь є҃

І҆рмо́съ

Вскꙋ́ю мѧ̀ ѿри́нꙋлъ є҆сѝ ѿ лица̀ твоегѡ̀, свѣ́те незаходи́мый, и҆ покры́ла мѧ̀ є҆́сть чꙋжда́ѧ тма̀ ѻ҆каѧ́ннаго, но ѡ҆брати́ мѧ, и҆ къ свѣ́тꙋ за́повѣдей твои́хъ пꙋти̑ моѧ̑ напра́ви, молю́сѧ.

Тропа́рь

Ꙗ҆́кѡ гдⷭ҇ень ᲂу҆чени́къ, влⷣки твоегѡ̀ бл҃гоꙋтро́бїе, ѻ҆́тче, подража́ѧ, разсла́бленнаго въ це́рковь не́слъ є҆сѝ: врачева́нїемъ же, ко хрⷭ҇тꙋ̀ моли́твами и҆ слеза́ми, ѡ҆бно́щнѡ прилѣжа́въ є҆мꙋ̀, здра́ва ѿ землѝ воздви́глъ є҆сѝ.

Тропа́рь

Ста́рцꙋ ст҃о́мꙋ, твоемꙋ̀ ѻ҆тцꙋ̀ въ животѣ̀ є҆гѡ̀ послꙋшли́въ бы́лъ є҆сѝ, ᲂу҆́меръ же ѻ҆́нъ, и҆ во гро́бѣ тебѐ є҆ди́наго послꙋ́ша: мѵ́ро бо є҆гѡ̀ мно́гими проси́мо и҆ не ᲂу҆лꙋчи́мо, твои́мъ, ѻ҆́тче, посла́нїемъ ѻ҆би́льнѡ лю́демъ свои̑мъ сїѐ и҆сточѝ.

Тропа́рь

Дрꙋгі́й и҆лїа̀ ты̀ ꙗ҆ви́лсѧ є҆сѝ, гра́дъ съ нб҃сѐ моли́твою, ꙗ҆́коже ѻ҆́нъ ѻ҆́гнь, све́лъ є҆сѝ, и҆ си́мъ царѧ̀ ᲂу҆диви́въ ᲂу҆жаси́лъ є҆сѝ, въ сла́вꙋ бж҃їю и҆ проти̑внымъ на ᲂу҆дивле́нїе сїѧ̑, ѻ҆́тче, сотвори́лъ є҆сѝ, ѡ҆ всѣ́хъ возмога́ющꙋ тѧ̀ хрⷭ҇тꙋ̀ бг҃ꙋ на́шемꙋ.

Тропа́рь

Сопоста́тъ ца́рь ᲂу҆́гринъ, на ѻ҆те́чество твоѐ подви́гсѧ, твои́ми словесы̀ свирѣ́пства премѣни́сѧ, дивѧ́сѧ сꙋ́щей въ тебѣ̀ свѧ́тости, ᲂу҆мили́всѧ возврати́сѧ: гра́дное же ка́менїе лобза́ѧ, глаго́лаше: ди́венъ бг҃ъ во ст҃ы́хъ свои́хъ.

Тропа́рь

Ка́мене краеꙋго́льна, и҆мꙋ́ща въ се́рдцы хрⷭ҇та̀ ᲂу҆твержде́нїе, пре́лести ᲂу҆твержде́нїе си́льно и҆спрове́ргша, цр҃кви же неѡбори́мое ѡ҆снова́нїе ꙗ҆ви́стесѧ: ю҆́же сохранѧ́йте непоколеби́мꙋ, са́вво свѧще́нне и҆ сѷмеѡ́не бг҃оно́се, моли́твами ва́шими.

Богороди́ченъ

Ко хрⷭ҇тꙋ̀ бг҃ꙋ вхо́да жела́юще, предводѧ́щꙋю тѧ̀ взыска́вше, сꙋ́щей тѝ нбⷭ҇нѣй бж҃їей цр҃кви, хра́мъ твоегѡ̀ вхо́да на землѝ твоѝ ᲂу҆гѡ́дницы, бг҃ома́ти, воздвиго́ша, въ не́мже не преста́й даю́щи по́мощь сла́вѧщымъ тѧ̀.

Пѣ́снь ѕ҃

І҆рмо́съ

Моли́твꙋ пролїю̀ ко гдⷭ҇ꙋ, и҆ томꙋ̀ возвѣщꙋ̀ печа̑ли моѧ̑, ꙗ҆́кѡ ѕѡ́лъ дꙋша̀ моѧ̀ и҆спо́лнисѧ, и҆ живо́тъ мо́й а҆́дꙋ прибли́жисѧ, и҆ молю́сѧ, ꙗ҆́кѡ і҆ѡ́на: ѿ тлѝ, бж҃е, возведи́ мѧ.

Тропа́рь

Пресвѣ́тлыѧ трⷪ҇цы пе́рвѣе же́ртвенникъ се́рдце твоѐ сотвори́лъ є҆сѝ, и҆ це́рковь бг҃ꙋ сп҃сꙋ во ѻ҆те́чествѣ твое́мъ воздви́глъ є҆сѝ, въ не́йже, ѻ҆́тче, первопресто́ленъ равноапⷭ҇льный ᲂу҆чи́тель ѿ хрⷭ҇та̀ ᲂу҆досто́илсѧ є҆сѝ, и҆ сло́во жи́зни лю́демъ твои̑мъ и҆сточи́лъ є҆сѝ.

Тропа́рь

Бра́та твоего̀ ᲂу҆ме́рша слы́шавъ, а҆́гг҃лꙋ, ко хрⷭ҇тꙋ̀ дерзнове́нїемъ, дꙋ́шꙋ є҆гѡ̀ возврати́ти повелѣ́лъ є҆сѝ, и҆ сего̀ вдꙋшевле́нна прише́дъ ѡ҆брѣ́лъ є҆сѝ. ѽле вѣ́ры! ѽле дерзнове́нїѧ! чꙋ́до, ѻ҆́тче, вои́стиннꙋ ᲂу҆жа́сно, зе́менъ сы́й, нбⷭ҇номꙋ повелѣ́лъ є҆сѝ.

Тропа́рь

Мы́сленное мо́ре страсте́й ᲂу҆спи́въ поще́нїемъ, чꙋ́вственное же бе́зднꙋ ми́лости призва́въ, свирѣ́пѡ волнꙋ́емо сло́вомъ ᲂу҆кроти́лъ є҆сѝ, кора́бль же спа́слъ ѿ потопле́нїѧ, и҆ въ не́мъ сꙋ́щыѧ въ вѣ́рꙋ приве́лъ є҆сѝ.

Тропа́рь

Є҆гѡ́же всѧ̑ боѧ́тсѧ и҆ трепе́щꙋтъ, ꙗ҆́кѡ творца̀ и҆ гдⷭ҇а, і҆и҃са хрⷭ҇та̀ всего̀ стѧжа́въ, хрⷭ҇та̀ въ се́рдцы твое́мъ носѧ̀, хрⷭ҇та̀ въ себѣ̀ и҆мѣ́ѧ глаго́люща, мо́рю и҆ вѣ́трѡмъ тогѡ̀ си́лою запрети́лъ є҆сѝ: и҆ всѧ̑, ѻ҆́тче, повинꙋ́шасѧ тебѣ̀, ꙗ҆́кѡ тогѡ̀ и҆зѧ́щнꙋ ᲂу҆ченикꙋ̀.

Пренача́льное є҆стество̀ и҆ трїѷпоста́сное є҆ди́нство, ѻ҆́тче и҆ сн҃е и҆ дш҃е прест҃ы́й, свѣ́те и҆ животѐ бг҃онача́льный, прїимѝ моли́твенники ѡ҆ на́съ твоѧ̑ ᲂу҆го́дники, спаса́й цр҃кви твоѧ̑, въ тѧ̀ вѣ́рꙋющыѧ, и҆ сподо́би ны̀ въ ми́рѣ сла́вити твою̀ держа́вꙋ.

Богороди́ченъ

Ви́дѣти жела́юще твоегѡ̀ сн҃а и҆ бг҃а, нбⷭ҇нагѡ сла́вꙋ црⷭ҇твїѧ, бцⷣе, са́вва и҆ сѷмеѡ́нъ преподо́бнїи, сла́вꙋ земна́гѡ ца́рствїѧ ѡ҆ста́вивше, и҆ сегѡ̀ крⷭ҇тъ на ра́мꙋ взе́мше, послѣ́доваша живонѡ́снымъ є҆гѡ̀ и҆ бжⷭ҇твєннымъ стопа́мъ.

Пѣ́снь з҃

І҆рмо́съ

Бж҃їѧ снизхожде́нїѧ ѻ҆́гнь ᲂу҆стыдѣ́сѧ въ вавѷлѡ́нѣ и҆ногда̀: сегѡ̀ ра́ди ѻ҆́троцы въ пещѝ ра́дованною ного́ю, ꙗ҆́кѡ во цвѣ́тницѣ ликꙋ́юще, поѧ́хꙋ: бл҃гослове́нъ є҆сѝ, бж҃е ѻ҆тє́цъ на́шихъ.

Тропа́рь

Хрⷭ҇та̀ на́съ ра́ди пло́тїю на землѝ во́лею стра́нствовавша, любо́вїю, ѻ҆́тче, побѣжда́емь, престо́ла высотꙋ̀ во́лею ѡ҆ста́вивъ, восто́кꙋ же и҆ за́падꙋ и҆ глꙋбина́мъ морски̑мъ ꙗ҆́кѡ со́лнце ѡ҆бхо́дно стра́нствовалъ є҆сѝ.

Тропа́рь

Ꙗ҆́кѡ хрⷭ҇то́въ ᲂу҆чени́къ, и҆ нача́льникъ ѿ негѡ̀ поста́вленъ, ѻ҆те́чєствїѧ чꙋжди́хъ ѡ҆бходѧ̀, прїе́млемь сы́й ѿ ни́хъ и҆ люби́мь, ᲂу҆дивле́нъ же, ѻ҆́тче, и҆ дароноси́мь: покарѧ́ше бо всѧ̑ сꙋ̑щаѧ въ тебѣ̀ бж҃їѧ любо́вь, кро́тость же и҆ безѕло́бїе.

Тропа́рь

И҆́же бе́зднꙋ сотвори́вый велѣ́нїемъ, тогѡ̀ ᲂу҆ченика̀ сїѧ̀ позна́вши тѧ̀, въ болѣ́зни твое́й тебѣ̀, ѻ҆́тче, послꙋжѝ, ры́бꙋ вели́кꙋ, ꙗ҆́кѡ рꙋка́ми, волно́ю взе́мши, и҆ въ кораблѝ тебѣ̀ возлежа́щꙋ, въ твоѝ рꙋ́цѣ предложѝ.

Тропа́рь

Въ кораблѝ пꙋчи́нꙋ съ тобо́ю пловꙋ́щїи, мо́ре повинꙋ́вшеесѧ тебѣ̀ и҆ дароноси́мо ви́дѣвше, ᲂу҆́жасомъ, ѻ҆́тче, ѡ҆держи́ми бы́вше, ѿ бездꙋ́шнагѡ наꙋчи́вшесѧ въ бж҃їй ра́зꙋмъ, ᲂу҆мили́вшесѧ поклони́шасѧ твое́й свѧ́тости.

Тропа́рь

Твоегѡ̀ се́рдца жела́нїе и҆сполнѧ́ѧ, є҆гѡ́же ра́ди по землѝ стра́нствовалъ є҆сѝ, въ чꙋжестра́нственнѣмъ гра́дѣ бг҃ъ дꙋ́хъ тво́й прїе́млетъ, и҆̀хже въ животѣ̀ чꙋдесы̀, и҆ по сме́рти пе́рстїю гро́ба и҆ гро́бомъ ᲂу҆диви́лъ є҆сѝ.

Богороди́ченъ

Стопа́мъ послѣ́дꙋѧ собо́ръ преподо́бныхъ и҆зъ чре́ва твоегѡ̀ неизрече́ннѡ возсїѧ́вшемꙋ, неизглаго́ланнымъ ржⷭ҇тво́мъ, дв҃о мт҃и, съ небе́сными ли́ки сочта́сѧ: съ ни́миже мо́лимсѧ, и҆спросѝ на́мъ, чтꙋ́щымъ тѧ̀, грѣхѡ́въ ѡ҆ставле́нїе.

Пѣ́снь и҃

І҆рмо́съ

Седмери́цею пе́щь халде́йскїй мꙋчи́тель бг҃очести̑вымъ неи́стовнѡ разжжѐ, си́лою же лꙋ́чшею спасє́ны сїѧ̑ ви́дѣвъ, творцꙋ̀ и҆ и҆зба́вителю вопїѧ́ше: ѻ҆́троцы, бл҃гослови́те, свѧще́нницы, воспо́йте, лю́дїе, превозноси́те во всѧ̑ вѣ́ки.

Тропа́рь

Землѧ̀ ѿ свои́хъ нѣ́дръ предаде́ тѧ свѧщеннолѣ́пна, цѣ́ла же и҆ неразрꙋши́ма, благоꙋха́нїемъ и҆ чꙋдесы̀ ᲂу҆дивлѧ́юща гра́да жи́тели, пе́рстїю гро́ба твоегѡ̀, прⷪ҇ро́чески вопїю́щыѧ: пра́вєдницы во вѣ́ки живꙋ́тъ.

Тропа́рь

Ка́мене сапфі́ра, ѡ҆блежа́щаѧ пе́рсть страда́льнагѡ твоегѡ̀ тѣ́ла, дража́йши, ѻ҆́тче, показа́сѧ: цѣле́бна бо и҆ чꙋдотвори́ва, и҃ па́че зла́та вѣ́рными раздѣлѧ́ема пою́щими досто́йнѡ: честна̀ пред̾ гдⷭ҇емъ сме́рть ст҃ы́хъ є҆гѡ̀.

Тропа́рь

Царе́й бл҃гочести́выхъ ст҃ы́ню и҆ бл҃гослове́нїе, твоѐ ст҃о́е и҆ честно́е тѣ́ло держа́щихъ, со́ннымъ ꙗ҆вле́нїемъ пода́ти ᲂу҆вѣщава́еши: є҆́же ча̑да твоѧ̑ со ст҃и́тєли и҆ свѧще́нными, ꙗ҆́кѡ пребога́тое сокро́вище во своѧ̑ принесо́ша.

Тропа́рь

Хрⷭ҇толюби́вый владисла́въ самоде́ржецъ, ꙗ҆́кѡ дре́вле дв҃дъ пред̾ кївѡ́томъ, предходѧ̀ пред̾ ст҃ы́мъ твои́мъ тѣ́ломъ, ра́довашесѧ поѧ̀: вели́читъ дꙋша̀ моѧ̀ гдⷭ҇а, ꙗ҆́кѡ дадѐ мнѣ̀ ѻ҆ц҃а̀ и҆ ᲂу҆чи́телѧ, и҆ въ це́ркви свое́й ра́дꙋѧсѧ положѝ.

Тропа́рь

Ꙗ҆́кѡ ны́нѣ прⷭ҇то́лꙋ влⷣки своегѡ̀ предстоѧ́ще, и҆ ѿѻнꙋ́дными зарѧ́ми ѡ҆сїѧ́еми, сѷмеѡ́не бг҃оно́се, са́вво бг҃омꙋ́дре, моли́твами ва́шими, ст҃і́и, страсте́й грѣха̀ на́съ и҆зба́вите, и҆ пога́ныхъ нахо́да, и҆ разли́чныхъ ѡ҆бстоѧ́нїй.

Богороди́ченъ

Плеща́ми херꙋві́мскими стра́шными носи́мый влⷣка, на прⷭ҇то́лѣ ꙗ҆́коже ѻ҆́гненнѣмъ, въ твою̀, чⷭ҇таѧ, всели́сѧ ᲂу҆тро́бꙋ, и҆ пло́ти прїѧ́тїемъ человѣ́ческое ѡ҆божѝ сꙋщество̀, къ немꙋ́же спасѝ мл҃твами твои́ми пою́щыѧ тѧ̀ мт҃рь є҆гѡ̀.

Пѣ́снь ѳ҃

І҆рмо́съ

Оу҆жасе́сѧ ѡ҆ се́мъ нб҃о, и҆ землѝ ᲂу҆диви́шасѧ концы̀, ꙗ҆́кѡ бг҃ъ ꙗ҆ви́сѧ человѣ́кѡмъ пло́тски, и҆ чре́во твоѐ бы́сть простра́ннѣйшее нб҃съ: тѣ́мъ тѧ̀ бцⷣꙋ, а҆́гг҃лѡвъ и҆ человѣ̑къ чинонача̑лїѧ велича́ютъ.

Тропа́рь

Мно́гъ въ терпѣ́нїи и҆ къ ѕло́бѣ благоѿда́тливъ, въ животѣ̀ и҆ по сме́рти, ѻ҆́тче, показа́лсѧ є҆сѝ: слꙋкі́й бо припо́лзъ, и҆ гро́ба твоегѡ̀ верхꙋ̀ возле́гъ, во ѿмще́нїѧ мѣ́сто здра́ва поста́вилъ є҆сѝ, и҆́же въ це́ркви ходѧ̀ велича́ше гдⷭ҇а.

Тропа́рь

Преизѧ́щнаѧ ко хрⷭ҇тꙋ̀ ва́ша любо́вь ны́нѣ ѡ҆б̾ѧви́сѧ бл҃года́тїю да́нною ва́мъ, сѷмеѡ́не и҆ са́вво: мѡ́щи ва́шѧ благоꙋха̑нны и҆ мѷроточи̑вы, па́мѧть сла́вна и҆ свѧтопочита́ема, и҆́миже ᲂу҆вѣрѧ́емїи глаго́лемъ: па́мѧть пра́ведникѡвъ съ похвала́ми быва́етъ.

Тропа́рь

Ны́нѣ ви́димыхъ глаго́лемъ, сꙋ́щихъ же ꙗ҆̀же лю́бѧщихъ бг҃а, и҆дѣ́же а҆́гг҃ли прини́кнꙋти жела́ютъ, ꙗ҆̀же ва́мъ досто́йнѡ ᲂу҆готѡ́ваннаѧ, ѻ҆́ко не ви́дѣ, и҆ ᲂу҆́хо не слы́ша, па́ѵелъ вѣща́етъ, и҆ кто̀ пости́жетъ си́хъ и҆зглаго́лати;

Тропа́рь

Зрѧ́ще а҆́гг҃льскїѧ и҆ бж҃е́ствєнныѧ свѣ́тлости, и҆ всѣ́хъ ст҃ы́хъ ли́ки, са́вво сщ҃е́нне и҆ сѷмеѡ́не бг҃оно́се, съ ни́ми моли́те чл҃вѣколю́бца, житїѧ̀ и҆справле́нїе и҆ грѣхѡ́въ ѡ҆ставле́нїе пода́ти хва́лѧщымъ вѣ́рою ва́шꙋ па́мѧть.

Тропа́рь

Ѻ҆́ба въ житїѝ є҆динодꙋ̑шна, ѻ҆́ба въ пꙋсты́ни спѡ́стника, ѻ҆́ба вы́ше ᲂу҆ма̀ бл҃ги́хъ полꙋчи̑вша, ѻ҆́ба трⷪ҇цѣ ны́нѣ предстоѧ̑ща, ѻ҆бѣ́ма ѻ҆́бщее хвалосло́вїе прино́симъ: є҆́же прїе́мше, ѻ҆ц҃ы̀, пѣвцы̀ ва́шѧ моли́твами ва́шими спаса́йте.

Богороди́ченъ

Є҆ди́на преимꙋ́щаѧ дерзнове́нїе, влⷣчце, за ве́сь мі́ръ сн҃ꙋ твоемꙋ̀ моли́сѧ. не помѧнѝ безчи́сленныхъ собла̑знъ на́шихъ, покры́й лю́ди вопїю́щыѧ тѝ ᲂу҆ми́льнымъ гла́сомъ: спасѝ, чⷭ҇таѧ бцⷣе, тебѐ досто́йнѡ велича́ющихъ.