Российская Православная Церковь

по благословенію Архіерейскаго Сѵнода Россійской Православной Церкви

Православный календарь

Ака́ѳістъ

А҆ка́ѳїстъ прест҃ѣ́й бцⷣѣ пред̾ і҆кѡ́ною а҆ка́ѳїстнаѧ.

Икон Божией Матери, именуемых "Акафистная" и "Млекопитательница" 25 января 2026

Конда́къ а҃

И҆збра́ннѣй предвѣ́чнымъ цр҃е́мъ во сп҃се́нїе ро́дꙋ хрⷭ҇тїа́нскомꙋ нб҃сѐ и҆ землѝ цр҃и́цѣ, ꙗ҆́кѡ на́шей несꙋмнѣ́ннѣй предста́тельницѣ и҆ всемо́щнѣй застꙋ́пницѣ, съ любо́вїю и҆ ᲂу҆миле́нїемъ сїѐ а҆ка́ѳїстное пѣ́нїе прино́симъ:

Ра́дꙋйсѧ, прест҃а́ѧ бцⷣе, ра́дость дꙋхо́внꙋю на́мъ без̾ конца̀ подаю́щаѧ.

І҆́косъ а҃

А҆́гг҃лꙋ нбⷭ҇номꙋ житїе́мъ свои́мъ ᲂу҆подо́бившемꙋсѧ, нѣ́коемꙋ ста́рцꙋ, въ затво́рѣ на ст҃ѣ́й горѣ̀ а҆ѳѡ́нстѣй житїѐ своѐ проводѧ́щемꙋ и҆ пред̾ і҆кѡ́ною бж҃їей мт҃ри каждодне́внѡ а҆ка́ѳїстное пѣ́нїе со слова́ми: ра́дꙋйсѧ возносѧ́щемꙋ, бы́сть и҆ногда̀ гла́съ, ѿ і҆кѡ́ны тоѧ̀ и҆сходѧ́щїй: ра́дꙋйсѧ и҆ ты̀, ста́рче бж҃їй! Семꙋ̀ ди́вномꙋ гла́сꙋ внима́ѧ, и҆ мы̀ со бл҃гочести́вымъ ста́рцемъ влⷣчцѣ нбⷭ҇нѣй воспѣва́емъ:

Ра́дꙋйсѧ, ѿ сотворе́нїѧ мі́ра бг҃омъ въ невѣ́сты себѣ̀ предназна́ченнаѧ: ра́дꙋйсѧ, въ хра́мѣ ст҃о́мъ є҆гѡ̀ въ чистотѣ̀ неземно́й воспита́ннаѧ.

Ра́дꙋйсѧ, сп҃си́тельницею мі́ра є҆щѐ ѿ прⷪ҇ро́кѡвъ предсказа́ннаѧ: ра́дꙋйсѧ, мт҃рїю бж҃їею ста́ти ᲂу҆досто́ившаѧсѧ.

Ра́дꙋйсѧ, рождество́мъ пресла́внагѡ сн҃а своегѡ̀ на́мъ ра́дость и҆збавле́нїѧ ѿ вѣ́чной сме́рти прине́сшаѧ: ра́дꙋйсѧ, бы́ть мт҃рїю всемꙋ̀ ро́дꙋ хрⷭ҇тїа́нскомꙋ сн҃омъ свои́мъ предꙋгото́ваннаѧ.

Ра́дꙋйсѧ, прест҃а́ѧ бцⷣе, ра́дость дꙋхо́внꙋю на́мъ без̾ конца̀ подаю́щаѧ.

Конда́къ в҃

Ви́дѧ прест҃а́ѧ бцⷣа, ꙗ҆́кѡ ᲂу҆́жасомъ ве́лїимъ ста́рецъ ѡ҆б̾ѧ́тъ бы́сть, кро́ткимъ гла́сомъ глаго́ла є҆мꙋ̀: не ᲂу҆бо́йсѧ, ѻ҆ба́че во ѻ҆би́тель свою̀ поте́кши, ѡ҆б̾ѧвѝ бра́тїи и҆ и҆гꙋ́менꙋ ѡ҆ вразѣ́хъ, и҆̀же бли́зкѡ сꙋ́ть. А҆́ще кто̀ сла́бъ бѣ̀ въ дꙋ́сѣ терпѣ́нїѧ, да скрыва́етсѧ, до́ндеже про́йдетъ и҆скꙋше́нїе, ѻ҆ба́че и҆́щꙋщыѧ страда́льческихъ вѣнцє́въ да ѡ҆стаю́тсѧ и҆, прїи́мъ ѿ гдⷭ҇а награ́дꙋ, воспою́тъ є҆мꙋ̀ на нб҃ѣ: А҆ллилꙋ́їа.

І҆́косъ в҃

Ра́зꙋмомъ свои́мъ не возмо́же пости́гнꙋти ста́рецъ, ꙗ҆́кѡ і҆кѡ́на прест҃ы́ѧ бцⷣы, пред̾ не́ю же ѻ҆́нъ а҆ка́ѳїстъ въ ке́ллїи чита́ше, невѣ́домою си́лою къ врата́мъ ѻ҆би́тели перенесе́на бы́сть. Па́дше пред̾ ѻ҆́бразомъ съ бл҃гоговѣ́йною моли́твою, ста́рецъ та́же съ пречⷭ҇тымъ ѻ҆́бразомъ на рꙋка́хъ ко и҆гꙋ́менꙋ ꙗ҆ви́сѧ, воспѣва́ѧ дв҃ѣ чⷭ҇тѣй:

Ра́дꙋйсѧ, ѿ наше́ствїѧ вра́жїѧ ча̑да своѧ̀ защища́ющаѧ: ра́дꙋйсѧ, ми́лость свою̀ и҆́мъ неꙋста́ннѡ подаю́щаѧ.

Ра́дꙋйсѧ, ѿ поги́бели вѣ́чной дꙋ́ши на́ша ѿводѧ́щаѧ: ра́дꙋйсѧ, бѣды̑ вели̑кїѧ рꙋко́ю крѣ́пкою предѿвраща́ющаѧ.

Ра́дꙋйсѧ, ѡ҆ сп҃се́нїи на́шемъ постоѧ́ннѡ пекꙋ́щаѧсѧ: ра́дꙋйсѧ, къ го́рнемꙋ ца́рствїю дꙋ́ши првⷣныѧ возводѧ́щаѧ.

Ра́дꙋйсѧ, прест҃а́ѧ бцⷣе, ра́дость дꙋхо́внꙋю на́мъ без̾ конца̀ подаю́щаѧ.

Конда́къ г҃

Си́лою свы́ше ᲂу҆крѣпле́нныѧ и҆ къ твоемꙋ̀ всеми́лостивомꙋ застꙋпле́нїю съ вѣ́рою прите́кшїи, непреѡбори́маѧ защи́тнице на́ша, два́дцать ше́сть си́льныхъ дꙋ́хомъ и҆́нокѡвъ, въ числѣ̀ ко́ихъ бѣ̀ и҆ са́мъ настоѧ́тель, пребыва́хꙋ въ ѻ҆би́тели. Ста́рецъ, є҆мꙋ̀ же нбⷭ҇ное ѿкрове́нїе бы́сть, та́кожде пребыва́ше кꙋ́пнѡ съ ни́ми, бѣ́ бо длѧ ѻ҆́ныхъ ᲂу҆тѣ́шителемъ въ предстоѧ́щемъ и҆скꙋше́нїи, неꙋста́ннѡ вопїю́щымъ къ бг҃ꙋ: А҆ллилꙋ́їа.

І҆́косъ г҃

И҆мꙋ́щи намѣ́ренїе ѡ҆брати́ти въ католи́чество правосла́вныѧ хрⷭ҇тїа́ны, вразѝ во ѻ҆би́тель прїидо́ша и҆ къ ба́шнѣ, въ не́й же мꙋ́жественныѧ и҆́ноцы пребыва́хꙋ, пристꙋпи́вши, ле́стными ᲂу҆вѣща́нїѧми склони́ти и҆̀хъ ко ѿрече́нїю ѿ правосла́вїѧ потща́хꙋсѧ. Оу҆вѣщава́ѧ и҆̀хъ призна́ти па́пꙋ главо́ю вселе́нскїѧ це́ркви, латі́нѧне за сїѐ побо́рникѡмъ правосла́вїѧ всѧ́кїѧ ми́лости ѡ҆бѣща́хꙋ. Ѻ҆ба́че вѣ́рнїи сыны̀ своеѧ̀ правосла́вныѧ це́ркви непрекло́нными ѡ҆става́хꙋсѧ и҆ пред̾ і҆кѡ́ною мт҃ри бж҃їей та́кѡ молѧ́хꙋсѧ:

Ра́дꙋйсѧ, ѿ латі́нѧнъ на́ша несꙋмнѣ́ннаѧ защи́то: ра́дꙋйсѧ, въ вѣ́рѣ правосла́вной на́ше неѡбори́мое ᲂу҆крѣпле́нїе.

Ра́дꙋйсѧ, ѿ є҆ресе́й и҆ лжеꙋче́нїй на́ше крѣ́пкое ѡ҆гражде́нїе: ра́дꙋйсѧ, въ тѧ́жкихъ бѣда́хъ на́ше сла́достное ᲂу҆тѣше́нїе.

Ра́дꙋйсѧ, въ црⷭ҇твїе бж҃їе на́ша мꙋ́драѧ рꙋководи́тельнице: ра́дꙋйсѧ, пред̾ гдⷭ҇омъ на́ша ми́лостиваѧ застꙋ́пнице.

Ра́дꙋйсѧ, прест҃а́ѧ бцⷣе, ра́дость дꙋхо́внꙋю на́мъ без̾ конца̀ подаю́щаѧ.

Конда́къ д҃

Бꙋ́рею не́нависти къ вѣ́рѣ правосла́вной ѡ҆держи́мїи, правосла́вїѧ вразѝ ба́шню хвра́стїемъ и҆ дре́вомъ ѡ҆бложи́ша и҆, не ме́длѧ, запали́ша ю҆̀. Въ пла́меннѣй моли́твѣ гдⷭ҇ꙋ бл҃годаре́нїе возда́вше, ꙗ҆́коже сподо́би ѧ҆̀ прїѧ́ти мꙋ́ченичестїи свѣ́тлыѧ вѣнцы̀, и҆́ноцы поѧ́хꙋ бг҃ꙋ: А҆ллилꙋ́їа.

І҆́косъ д҃

Слы́шавше млⷭ҇ть твою̀, бцⷣе, чрез̾ чꙋдотво́рнꙋю і҆кѡ́нꙋ твою̀ ꙗ҆вле́ннꙋю, є҆́ю же ты̀ предвари́ла є҆сѝ ста́рца ѡ҆ бѣ́дствїи, вѣ́рнїи ѕѣлѡ̀ ѡ҆бра́довани бы́ша, ꙗ҆́кѡ і҆кѡ́на твоѧ̀ та́же бы́сть ѡ҆брѣ́тена невреди́мою под̾ разва́линами ѻ҆би́тели. Мы́ же, таковѣ́й ве́лїей млⷭ҇ти твоеѧ̀ дивѧ́шесѧ, вопїе́мъ тѝ:

Ра́дꙋйсѧ, ꙗ҆́кѡ па́ки на ра́дость лю́демъ въ і҆кѡ́нѣ свое́й ꙗ҆ви́ласѧ є҆сѝ: ра́дꙋйсѧ, ꙗ҆́кѡ то́ю і҆кѡ́ною чꙋдеса̀ ве́лїи и҆сточи́ла є҆сѝ.

Ра́дꙋйсѧ, тобо́ю бо мы̀ въ добродѣ́телѣхъ ᲂу҆крѣплѧ́емсѧ: ра́дꙋйсѧ, твои́мъ бо застꙋпле́нїемъ мы̀ пред̾ невѣ́рными похвалѧ́емсѧ.

Ра́дꙋйсѧ, тебѧ̀ бо мы̀ пред̾ всѣ́мъ мі́ромъ велича́емъ: ра́дꙋйсѧ, на тебѐ бо мы̀ всецѣ́ло ᲂу҆пова́емъ.

Ра́дꙋйсѧ, прест҃а́ѧ бцⷣе, ра́дость дꙋхо́внꙋю на́мъ без̾ конца̀ подаю́щаѧ.

Конда́къ є҃

Бг҃оте́чнѣй ѕвѣздѣ̀ подо́бна ꙗ҆ви́сѧ і҆кѡ́на твоѧ̀, приснодв҃о мр҃і́е, во ᲂу҆тѣше́нїе и҆ ᲂу҆крѣпле́нїе бра́тїи зогра́фскїѧ ѻ҆би́тели, пред̾ не́ю же лампа́да те́плитсѧ неꙋгаси́мо. И҆́ноцы за лїтꙋргі́ею а҆ка́ѳїстное пѣ́нїе пред̾ не́ю возглаша́ютъ, по семꙋ̀ ѻ҆на̀ наименова́на а҆ка́ѳїстнаѧ бы́сть. И҆ позна́вши си́лꙋ, въ не́й ꙗ҆вле́ннꙋю тобо́ю, пѣ́снь бл҃годаре́нїѧ возно́сѧтъ бг҃ꙋ: А҆ллилꙋ́їа.

І҆́косъ є҃

Проѧви́въ ве́лїю любо́вь къ лю́демъ, ты̀, ꙗ҆́кѡ не́жнаѧ и҆ забо́тливаѧ мт҃и, ꙗ҆ви́ла є҆сѝ є҆щѐ ѻ҆днꙋ̀ свою̀ і҆кѡ́нꙋ и҆менꙋ́емꙋю хїланда́рскаѧ, ꙗ҆́же бы́сть въ а҆ѳѡ́нстѣй хїланда́рстѣй ѻ҆би́тели, и҆дѣ́же пребыва́ютъ твоѝ і҆кѡ́ны млекопита́тельница и҆ по́пскаѧ. За таково́е твоѐ попече́нїе ѡ҆ лю́дѣхъ свои́хъ, восхвалѧ́емъ тѧ̀:

Ра́дꙋйсѧ, пꙋтеводи́тельнице подви́жникѡвъ бл҃гочести́выхъ къ го́рнемꙋ црⷭ҇твїю: ра́дꙋйсѧ, и҆́нокѡвъ пꙋстыннолюби́выхъ приводѧ́щаѧ къ нбⷭ҇номꙋ і҆ерⷭ҇ли́мꙋ.

Ра́дꙋйсѧ, го́рꙋ а҆ѳѡ́нскꙋю бл҃гоꙋха́нїемъ и҆спо́лнившаѧ: ра́дꙋйсѧ, на ѻ҆би́тели хїланда́рстѣй твоѐ бл҃говоле́нїемъ ꙗ҆ви́вшаѧ.

Ра́дꙋйсѧ, дꙋше́вныѧ и҆ тѣле́сныѧ болѣ́зни і҆кѡ́ною твое́ю ско́рѡ врачꙋ́ющаѧ: ра́дꙋйсѧ, въ зало́гъ ми́лости твоеѧ̀ і҆кѡ́нꙋ твою̀ дарова́вшаѧ.

Ра́дꙋйсѧ, прест҃а́ѧ бцⷣе, ра́дость дꙋхо́внꙋю на́мъ без̾ конца̀ подаю́щаѧ.

Конда́къ ѕ҃

Проповѣ́дꙋетъ цр҃ковь хрⷭ҇то́ва чꙋдеса̀ твоѧ̀, бцⷣе, наипа́че бо чрез̾ і҆кѡ́ны твоѧ̀ и҆злива́еши стрꙋѝ ми́лостей и҆ щедрѡ́тъ всѣ́мъ бѣ́дствꙋющымъ и҆ тре́бꙋющимъ по́мощи твоеѧ̀. Сегѡ̀ ра́ди, славосло́вѧще тѧ̀, сн҃ꙋ твоемꙋ̀ и҆ бг҃ꙋ на́шемꙋ вопїе́мъ: А҆ллилꙋ́їа.

І҆́косъ ѕ҃

Возсїѧ̀ на́мъ і҆кѡ́на твоѧ̀, прⷭ҇нодв҃о, чꙋ́домъ но́вымъ ѿ неѧ̀ и҆сте́кшимъ, є҆гда̀ возгоре́сѧ по нерадѣ́нїю є҆кклисїа́рха і҆кѡноста́съ, и҆́же бы́сть въ собо́рнѣмъ хра́мѣ и҆ въ не́мъ же бѧ́ше чꙋдотво́рнаѧ і҆кѡ́на твоѧ̀. И҆ а҆́ще і҆кѡноста́съ є҆два̀ не и҆спепели́сѧ ве́сь, ѻ҆ба́че ст҃ы́й ѻ҆́бразъ тво́й, бг҃ома́ти, не пострада̀ ѿ ѻ҆гнѧ̀, пребыва́ѧ невреди́мымъ къ ᲂу҆тѣше́нїю вѣ́рꙋющихъ, пою́щихъ тѝ:

Ра́дꙋйсѧ, і҆кѡ́нꙋ твою̀ чтⷭ҇нꙋ́ю несгара́емꙋ въ ѻ҆гнѝ содѣ́лавшаѧ: ра́дꙋйсѧ, си́лою бжⷭ҇твенною си́лꙋ ѻ҆́гненнꙋю погꙋби́вшаѧ.

Ра́дꙋйсѧ, і҆кѡ́ны твоѧ̀ чꙋдотво́рныѧ, ꙗ҆́кѡ ѕвѣ́зды въ землѣ̀ а҆ѳѡ́нстѣй ᲂу҆мно́жившаѧ: ра́дꙋйсѧ, ве́сь мі́ръ і҆кѡ́нами свои́ми ѡ҆ст҃и́вшаѧ.

Ра́дꙋйсѧ, мѵ́ра и҆злїѧ́нїемъ ѿ і҆кѡ́нъ твои́хъ млⷭ҇рдїе твоѐ къ на́мъ показꙋ́ющаѧ: ра́дꙋйсѧ, блгⷣтїю и҆ сла́вою чꙋде́съ преди́внѡ сїѧ́ющаѧ.

Ра́дꙋйсѧ, прест҃а́ѧ бцⷣе, ра́дость дꙋхо́внꙋю на́мъ без̾ конца̀ подаю́щаѧ.

Конда́къ з҃

Хотѧ̀ чл҃вѣколю́бецъ хрⷭ҇то́съ ꙗ҆ви́ти любо́вь свою̀ къ лю́демъ, чⷭ҇тно́ю є҆гѡ̀ кро́вїю и҆скꙋпле́ннымъ, дарова̀ тебѣ̀, мт҃рь свою̀, ро́дꙋ хрⷭ҇тїа́нскомꙋ въ покро́въ и҆ защище́нїе. Не лишѝ и҆ на́съ твоегѡ̀ те́плагѡ застꙋпле́нїѧ, сла́вѧщихъ пречестно́е и҆́мѧ твоѐ и҆ поклонѧ́ющихсѧ чꙋдотво́рномꙋ ѻ҆́бразꙋ твоемꙋ̀, сн҃ꙋ твоемꙋ̀ зовꙋ́щихъ: А҆ллилꙋ́їа.

І҆́косъ з҃

Но́вое и҆ преди́вное чꙋ́до ꙗ҆вѝ а҆ка́ѳїстнаѧ і҆кѡ́на твоѧ̀, прест҃а́ѧ бцⷣе, бы́сть бо ѿ неѧ̀ ѿкрове́нїе ст҃о́мꙋ са́ввѣ се́рбскомꙋ ѡ҆ сокро́вище, и҆́же бѣ̀ близ̾ ст҃ы́ѧ ѻ҆би́тели є҆гѡ̀. Сїѐ сокро́вище наше́дши, ѻ҆би́тель ста́рецъ благоꙋстроѧ́ше, сла́вѧ чꙋ́днꙋю помо́щницꙋ свою̀:

Ра́дꙋйсѧ, въ нꙋ́ждахъ на́шихъ ско́ро помога́ющаѧ: ра́дꙋйсѧ, на бл҃гоꙋстрое́нїе ѻ҆би́телей сре́дства ще́дро посыла́ющаѧ.

Ра́дꙋйсѧ, ѻ҆би́тели ст҃ы́ѧ попече́нїемъ твои́мъ не ѡ҆ставлѧ́ющаѧ: ра́дꙋйсѧ, недостаю́щее въ ни́хъ при́снѡ восполнѧ́ющаѧ.

Ра́дꙋйсѧ, на моли́твꙋ вѣ́рныхъ па́ки призыва́ющаѧ: ра́дꙋйсѧ, подвиза́тисѧ въ бл҃гоче́стїи и҆́мъ неꙋста́ннѡ помога́ющаѧ.

Ра́дꙋйсѧ, прест҃а́ѧ бцⷣе, ра́дость дꙋхо́внꙋю на́мъ без̾ конца̀ подаю́щаѧ.

Конда́къ и҃

Стра́нное чꙋ́до зри́мъ ѡ҆ тебѣ̀, бг҃ома́ти, ты́ бо ѿ чꙋдотво́рныѧ і҆кѡ́ны твоеѧ̀ ско́рꙋю по́мощь вѣ́рнымъ подае́ши. За сїѐ и҆́ноцы хїланда́рскїѧ ѻ҆би́тели, велича́ѧ і҆кѡ́нꙋ твою̀ а҆ка́ѳїстнꙋю є҆щѐ и҆ скоропослꙋ́шницею, гдⷭ҇ꙋ бл҃годаре́нїе возно́сѧтъ: А҆ллилꙋ́їа.

І҆́косъ и҃

Ве́сь мі́ръ любо́вїю твое́ю ѡ҆б̾е́млеши, прⷭ҇нодв҃о, въ і҆кѡ́нѣ твое́й приснѡпоклонѧ́емей всю̀ поднебе́снꙋю ѡ҆бтека́ющи. Ты́ бо, ꙗ҆́коже и҆ сн҃ъ тво́й, не хо́щеши сме́рти грѣ́шника, но є҆́же ѡ҆брати́тисѧ и҆ жи́вꙋ є҆мꙋ̀ бы́ти. За таково́е милосе́рдїе твоѐ взыва́емъ тебѣ̀ си́це:

Ра́дꙋйсѧ, вре́меннѡ наказꙋ́ющаѧ и҆ вѣ́чнѡ ми́лꙋющаѧ: ра́дꙋйсѧ, и҆́стинномꙋ покаѧ́нїю на́съ наꙋча́ющаѧ.

Ра́дꙋйсѧ, въ земно́мъ ᲂу҆дѣ́лѣ на́съ не ѡ҆ставлѧ́ющаѧ: ра́дꙋйсѧ, въ ѡ҆би́телехъ нбⷭ҇ныхъ на́съ ра́достнѡ встрѣча́ющаѧ.

Ра́дꙋйсѧ, сп҃си́тельною и҆́стиною на́съ вразꙋмлѧ́ющаѧ: ра́дꙋйсѧ, ѿ поги́бельнагѡ пꙋтѝ на́съ сохранѧ́ющаѧ.

Ра́дꙋйсѧ, прест҃а́ѧ бцⷣе, ра́дость дꙋхо́внꙋю на́мъ без̾ конца̀ подаю́щаѧ.

Конда́къ ѳ҃

Всѧ́кихъ ми́лостей и҆ щедрѡ́тъ пода́тельницꙋ, немо́лчнѡ тѧ̀ хва́лѧтъ сердца̀ на́ша, прест҃а́ѧ бцⷣе. Ты́ же бꙋ́ди на́мъ хода́таицею къ сн҃ꙋ твоемꙋ̀ въ де́нь стра́шнагѡ сꙋда̀, воспомѧнꙋ́въ тогда̀ грѣ́шныхъ моле́нїѧ и҆ сподо́бивъ пѣ́ти бг҃ꙋ: А҆ллилꙋ́їа.

І҆́косъ ѳ҃

Вѣті̑и многовѣща̑ннїи не возмо́гꙋтъ досто́йнѡ воспѣ́ти тво́й сла́достный ли́къ, нижѐ и҆з̾ѧсни́ти си́лꙋ чꙋде́съ твои́хъ на всѧ́кꙋю по́льзꙋ чл҃вѣ́кѡмъ ꙗ҆влѧ́емꙋю, мы́ же похва́льнаѧ воспѣва́емъ тебѣ̀ си́це:

Ра́дꙋйсѧ, бж҃їей во́ли на́мъ та́йны ѿкрыва́ющаѧ: ра́дꙋйсѧ, є҆гѡ̀ пра́ведный гнѣ́въ ми́лостивнѡ ᲂу҆мѧгча́ющаѧ.

Ра́дꙋйсѧ, лꙋча́ми чꙋде́съ свои́хъ на́съ просвѣща́ющаѧ: ра́дꙋйсѧ, вдѡ́въ и҆ сирѡ́тъ покро́вомъ свои́мъ покрыва́ющаѧ.

Ра́дꙋйсѧ, пресвѣ́тлаѧ бжⷭ҇твеннаѧ красото̀: ра́дꙋйсѧ, бг҃омꙋ́дрыхъ премꙋ́драѧ добро́то.

Ра́дꙋйсѧ, прест҃а́ѧ бцⷣе, ра́дость дꙋхо́внꙋю на́мъ без̾ конца̀ подаю́щаѧ.

Конда́къ і҃

Сп҃се́нїѧ и҆́щꙋще, къ твоемꙋ̀ ми́лостивомꙋ застꙋпле́нїю прибѣга́емъ, милосе́рднаѧ мт҃и, и҆ чꙋдотво́рныѧ і҆кѡ́ны твоѧ̀ со бл҃гоговѣ́нїемъ и҆ вѣ́рою чествꙋ́емъ. Тѣ́мже, воспомина́ѧ неисчє́тнаѧ чꙋдотворє́нїѧ твоѧ̀, вопїе́мъ всемогꙋ́щемꙋ бг҃ꙋ: А҆ллилꙋ́їа.

І҆́косъ і҃

Стѣно̀ неѡбори́маѧ всѣ́мъ лю́демъ ты̀ є҆сѝ, прест҃а́ѧ дв҃о. Ты́ бо слє́зы на́ша ѡ҆тира́еши, мі́ръ смꙋщє́ннымъ дꙋша́мъ на́шимъ подава́ѧ. Ты́ бо не ѡ҆ставлѧ́еши на́съ въ годи́ны лихи́хъ и҆спыта́нїй, си́лы дꙋше́вныѧ и҆ тѣле́сныѧ блгⷣтїю свое́ю на́мъ подкрѣплѧ́ѧ. Сегѡ̀ ра́ди ᲂу҆слы́ши на́съ, зовꙋ́щихъ тѝ:

Ра́дꙋйсѧ, на землѝ на́съ не ѡ҆ставлѧ́ющаѧ: ра́дꙋйсѧ, рꙋ́кꙋ по́мощи всѣ́мъ призыва́ющимъ тѧ̀ простира́ющаѧ.

Ра́дꙋйсѧ, тебѣ̀ мт҃рїю бж҃їею и҆менꙋ́ющимъ непреста́ннѡ помога́ющаѧ: ра́дꙋйсѧ, въ бѣда́хъ на на́съ находѧ́щихъ ны̀ ᲂу҆крѣплѧ́ющаѧ.

Ра́дꙋйсѧ, ꙗ҆́кѡ всѧ̑ возмо́жна тебѣ̀ на́мъ показꙋ́ющаѧ: ра́дꙋйсѧ, пꙋ́ть ко сп҃се́нїю на́мъ ᲂу҆казꙋ́ющаѧ.

Ра́дꙋйсѧ, прест҃а́ѧ бцⷣе, ра́дость дꙋхо́внꙋю на́мъ без̾ конца̀ подаю́щаѧ.

Конда́къ а҃і

Пѣ́нїе всеꙋмиле́нное пред̾ і҆кѡ́нами твои́ми прино́симъ тѝ рабѝ твоѝ, бцⷣе. Не пре́зри на́съ, гпⷭ҇жѐ всеми́лостиваѧ, но бл҃гопослꙋшли́ва бꙋ́ди къ на́мъ, съ вѣ́рою и҆ бл҃гоговѣ́нїемъ твоемꙋ̀ бжⷭ҇твенномꙋ ѻ҆́бразꙋ покланѧ́ющымсѧ и҆ сн҃а твоегѡ̀ восхвалѧ́ющымъ бг҃окра́сною пѣ́снїю: А҆ллилꙋ́їа.

І҆́косъ а҃і

Свѣ́тлыми лꙋча́ми чꙋде́съ твои́хъ, бцⷣе дв҃о, дꙋ́ши на́ша свѣ́тло просвѣща́еши, ѿ тмы̑ поги́бельныѧ и҆̀хъ и҆схища́ѧ. Мы́ же съ любо́вїю чтꙋ́ще тѧ̀, ꙗ҆́кѡ мт҃рь сн҃а бж҃їѧ и҆ ро́да хрⷭ҇тїа́нскагѡ, вопїе́мъ тѝ:

Ра́дꙋйсѧ, ꙗ҆́кѡ гдⷭ҇ь съ тобо́ю и҆ тобо́ю съ на́ми: ра́дꙋйсѧ, ꙗ҆́кѡ покро́въ тво́й ст҃ы́й простира́еши над̾ на́ми.

Ра́дꙋйсѧ, ꙗ҆́кѡ неѡпали́маѧ кꙋпина̀ нетлѣ́нною пребыва́еши: ра́дꙋйсѧ, ꙗ҆́кѡ живоно́сный и҆сто́чникъ жа́ждꙋ вѣ́чныѧ пра́вды въ лю́дѣхъ ᲂу҆толѧ́еши.

Ра́дꙋйсѧ, ꙗ҆́кѡ цвѣ́тъ неꙋвѧда́емый дꙋ́ши на́ша бл҃гоꙋха́нїемъ и҆сполнѧ́ющаѧ: ра́дꙋйсѧ, ꙗ҆́кѡ стѣна̀ нерꙋши́маѧ ѿ бꙋ́рь жите́йскихъ на́съ защища́ющаѧ.

Ра́дꙋйсѧ, прест҃а́ѧ бцⷣе, ра́дость дꙋхо́внꙋю на́мъ без̾ конца̀ подаю́щаѧ.

Конда́къ в҃і

Блгⷣть бжⷭ҇твеннꙋю ꙗ҆́внѡ въ чꙋдотво́рныхъ і҆кѡ́нахъ твои́хъ пребыва́ющꙋю не ѿимѝ ѿ на́съ, прест҃а́ѧ дв҃о, за грѣхѝ и҆ беззако́нїѧ на́ша. Не ѡ҆ста́ви на́съ свои́мъ чꙋ́днымъ застꙋпле́нїемъ и҆ на стра́шнѣмъ сꙋдѣ̀ сн҃а твоегѡ̀ проще́нїе ᲂу҆ гдⷭ҇а на́мъ и҆схода́тайствꙋй, да во сла́вѣ неизрече́ннѣй ᲂу҆́зримъ хрⷭ҇та̀ бг҃а на́шегѡ и҆ воспое́мъ є҆мꙋ̀: А҆ллилꙋ́їа.

І҆́косъ в҃і

Пою́ще пѣ́сни хвалы̀ и҆ бл҃годаре́нїѧ тебѣ̀, дв҃о всепѣ́таѧ, восхвалѧ́емъ тѧ̀ всѝ, ꙗ҆́кѡ тве́рдꙋю предста́тельницꙋ за на́съ, грѣ́шныхъ, и҆ покланѧ́емсѧ тебѣ̀ съ любо́вїю, ѡ҆ на́съ молѧ́щейсѧ пред̾ гдⷭ҇емъ, вѣ́рꙋемъ бо и҆ ᲂу҆пова́емъ, ꙗ҆́кѡ и҆спро́сиши на́мъ ᲂу҆ негѡ̀ сп҃се́нїе и҆ жи́знь вѣ́чнꙋю, вопїю́щымъ тѝ си́це:

Ра́дꙋйсѧ, бг҃а и҆ чл҃вѣ́ка соедини́вшаѧ: ра́дꙋйсѧ, сп҃се́нїе чл҃вѣ́ческое ᲂу҆стро́ившаѧ.

Ра́дꙋйсѧ, цвѣта́ми добродѣ́телей вѣ́рныхъ ᲂу҆краша́ющаѧ: ра́дꙋйсѧ, ри́зою свое́ю съ матери́нскою любо́вїю и҆̀хъ покрыва́ющаѧ.

Ра́дꙋйсѧ, ѿ дома́шнїѧ бра́ни и҆ вражды̀ є҆динокро́вныѧ ми́ромъ ѡ҆гражда́ющаѧ: ра́дꙋйсѧ, во бл҃ги́хъ намѣ́ренїѧхъ на́мъ при́снѡ помога́ющаѧ.

Ра́дꙋйсѧ, прест҃а́ѧ бцⷣе, ра́дость дꙋхо́внꙋю на́мъ без̾ конца̀ подаю́щаѧ.

Конда́къ г҃і

Ѽ всепѣ́таѧ мт҃и, нбⷭ҇наѧ цр҃и́це и҆ влⷣчце, дв҃о бцⷣе, ми́лостивнѡ принѧ́въ сїѐ а҆ка́ѳїстное пѣ́нїе, и҆зба́ви на́съ ѿ всѧ́кїѧ напа́сти, болѣ́зни и҆ внеза́пныѧ сме́рти, и҆ ꙗ҆́кѡ ста́рцꙋ бж҃їю нѣ́когда ра́дꙋйсѧ, возгласи́ла є҆сѝ, та́кѡ и҆ на́мъ возгласѝ: ра́дꙋйтесѧ и҆ вы̀, ча̑да бж҃їи, вопїю́щымъ сн҃ꙋ твоемꙋ̀ и҆ бг҃ꙋ на́шемꙋ: А҆ллилꙋ́їа.

Повто́ръ

Сей конда́къ глаго́лется три́жды, та́же і҆́косъ а҃-й и҆ конда́къ а҃-й.

І҆́косъ а҃

А҆́гг҃лꙋ нбⷭ҇номꙋ житїе́мъ свои́мъ ᲂу҆подо́бившемꙋсѧ, нѣ́коемꙋ ста́рцꙋ, въ затво́рѣ на ст҃ѣ́й горѣ̀ а҆ѳѡ́нстѣй житїѐ своѐ проводѧ́щемꙋ и҆ пред̾ і҆кѡ́ною бж҃їей мт҃ри каждодне́внѡ а҆ка́ѳїстное пѣ́нїе со слова́ми: ра́дꙋйсѧ возносѧ́щемꙋ, бы́сть и҆ногда̀ гла́съ, ѿ і҆кѡ́ны тоѧ̀ и҆сходѧ́щїй: ра́дꙋйсѧ и҆ ты̀, ста́рче бж҃їй! Семꙋ̀ ди́вномꙋ гла́сꙋ внима́ѧ, и҆ мы̀ со бл҃гочести́вымъ ста́рцемъ влⷣчцѣ нбⷭ҇нѣй воспѣва́емъ:

Ра́дꙋйсѧ, ѿ сотворе́нїѧ мі́ра бг҃омъ въ невѣ́сты себѣ̀ предназна́ченнаѧ: ра́дꙋйсѧ, въ хра́мѣ ст҃о́мъ є҆гѡ̀ въ чистотѣ̀ неземно́й воспита́ннаѧ.

Ра́дꙋйсѧ, сп҃си́тельницею мі́ра є҆щѐ ѿ прⷪ҇ро́кѡвъ предсказа́ннаѧ: ра́дꙋйсѧ, мт҃рїю бж҃їею ста́ти ᲂу҆досто́ившаѧсѧ.

Ра́дꙋйсѧ, рождество́мъ пресла́внагѡ сн҃а своегѡ̀ на́мъ ра́дость и҆збавле́нїѧ ѿ вѣ́чной сме́рти прине́сшаѧ: ра́дꙋйсѧ, бы́ть мт҃рїю всемꙋ̀ ро́дꙋ хрⷭ҇тїа́нскомꙋ сн҃омъ свои́мъ предꙋгото́ваннаѧ.

Ра́дꙋйсѧ, прест҃а́ѧ бцⷣе, ра́дость дꙋхо́внꙋю на́мъ без̾ конца̀ подаю́щаѧ.

Конда́къ а҃

И҆збра́ннѣй предвѣ́чнымъ цр҃е́мъ во сп҃се́нїе ро́дꙋ хрⷭ҇тїа́нскомꙋ нб҃сѐ и҆ землѝ цр҃и́цѣ, ꙗ҆́кѡ на́шей несꙋмнѣ́ннѣй предста́тельницѣ и҆ всемо́щнѣй застꙋ́пницѣ, съ любо́вїю и҆ ᲂу҆миле́нїемъ сїѐ а҆ка́ѳїстное пѣ́нїе прино́симъ:

Ра́дꙋйсѧ, прест҃а́ѧ бцⷣе, ра́дость дꙋхо́внꙋю на́мъ без̾ конца̀ подаю́щаѧ.

Моли́твы

Ѽ пречꙋ́днаѧ и҆ превы́сшаѧ всѣ́хъ тва́рей цр҃и́це и҆ бцⷣе, нбⷭ҇нагѡ цр҃ѧ̀ хрⷭ҇та̀ бг҃а на́шегѡ мт҃и, припа́даемъ и҆ покланѧ́емсѧ тебѣ̀ пред̾ ст҃о́ю и҆ пречтⷭ҇но́ю і҆кѡ́ною твое́ю, є҆́юже ди́вныѧ и҆ пресла́вныѧ чꙋдеса̀ содѣва́еши! Смире́ннѡ мо́лимъ тѧ̀, всеси́льнаѧ ро́да на́шегѡ застꙋ́пнице, ᲂу҆слы́ши на́съ и҆ ᲂу҆дивѝ на на́съ пребога́тыѧ ми́лости твоѧ̀, и҆ проше́нїѧ на́ша, приноси́маѧ тебѣ̀, ꙗ҆́кѡ бл҃га́ѧ скоропослꙋ́шница, и҆спо́лни. Блгⷣтїю твое́ю дꙋ́ши на́ша ѡ҆ст҃ѝ и҆ не ѿыма́й ѿ на́съ покро́ва своегѡ̀, под̾ ни́мъ же при́снѡ пребыва́ѧ, ꙗ҆́кѡ стѣно́ю нерꙋши́мою защище́ни пребꙋ́демъ ѿ всѣ́хъ бѣ́дъ и҆ напа́стей, ѿ всѧ́кагѡ врага̀ и҆ сꙋпоста́та, ѿ всѣ́хъ ѕлы́хъ ко́зней вра́жїихъ на на́съ при́снѡ находѧ́щихъ. Бл҃гоꙋха́нїемъ непоро́чнѣй дꙋшѝ своеѧ̀ напо́лни дꙋ́ши на́ша, да возвеселѧ́тсѧ сердца̀ на́ша, и҆́бо нѣ́сть никто̀ въ мі́рѣ се́мъ милѣ́е и҆ прекра́снѣе тебє̀, дв҃о прест҃а́ѧ! Ты̀ є҆сѝ на́ше бога́тство, ты̀ є҆сѝ на́ше сокро́вище, ты̀ є҆сѝ на́ше ᲂу҆пова́нїе и҆ на́ша защи́то! Къ тебѣ̀ є҆ди́нѣй въ печа́лѣхъ на́шихъ притека́емъ и҆ ᲂу҆ тебє̀ є҆ди́нѣй ᲂу҆тѣше́нїе полꙋчи́ти ча́емъ. ѽ всепѣ́таѧ дв҃о бцⷣе, не преста́й моли́тисѧ ѡ҆ на́съ, недосто́йныхъ рабѣ́хъ твои́хъ, сла́вѧщихъ тѧ̀ и҆ почита́ющихъ, и҆ наде́ждꙋ на тебѣ̀ и҆мꙋ́щихъ, ны́нѣ и҆ при́снѡ, и҆ во вѣ́ки вѣкѡ́въ. А҆ми́нь.