Кондак 1
Взбра́нной Воево́де, Влады́чице на́шей Богоро́дице, похва́льная пе́ния прино́сим Ти́ раби́ Твои́ о явле́нии чудотво́рныя ико́ны Твоея́. Ты́ же, я́ко иму́щая милосе́рдие неизрече́нное, соблюди́ и спаси́ от вся́ких бе́д рабы́ Твоя́, с ве́рою и любо́вию вопию́щия Ти́:
Ра́дуйся, Богоро́дице Де́во, ми́лостию Твое́ю при́сно на́с пита́ющая.
Икос 1
Арха́нгел Гаврии́л с Небесе́ прии́де к Тебе́, Богоро́дице, благовести́ти непостижи́мое рожде́ние от Тебе́ Бо́га Сло́ва, и рече́: ра́дуйся, Благода́тная, Госпо́дь с Тобо́ю. Те́мже и мы́, смире́ннии, дерза́ем вопи́ти к Тебе́ си́це:
Ра́дуйся, А́нгелов ра́досте; ра́дуйся, челове́ков спасе́ние.
Ра́дуйся, па́дшаго ми́ра обновле́ние; ра́дуйся, средосте́ния вражды́ разруше́ние.
Ра́дуйся, проро́ческих глаго́л исполне́ние; ра́дуйся, зако́на дре́вняго премене́ние.
Ра́дуйся, А́гнца и Па́стыря во чре́ве Твое́м упа́сшая; ра́дуйся, Творца́ Небесе́ и земли́ пло́тию ро́ждшая.
Ра́дуйся, Пита́теля вселе́нныя млекопита́вшая; ра́дуйся, млеко́м богопозна́ния ве́рных Пита́тельнице.
Ра́дуйся, пови́вшая Повива́ющаго не́бо о́блаки; ра́дуйся, дла́ньма нося́щая на Херуви́мех Носи́маго.
Ра́дуйся, Богоро́дице Де́во, ми́лостию Твое́ю при́сно на́с пита́ющая.
Кондак 2
Ви́дя Ио́сиф целому́дренный Чи́стую Де́ву непра́здну су́щу, восхоте́ та́й пусти́ти Ю́: уве́дев же во чре́ве иму́щу от Ду́ха Свя́та, удиви́ся непостижи́мей та́йне воплоще́ния, и до конца́ ве́рен храни́тель чистоты́ Ея́ пребы́сть; мы́ же, гре́шнии, сла́вяще е́же о на́с Госпо́дне смотре́ние, во умиле́нии серде́ц на́ших благогове́йно покланя́емся Ти́, Де́во Чи́стая, вопию́ще ро́ждшемуся от Тебе́ Бо́гу: Аллилу́иа.
Икос 2
Ра́зум челове́ческий недоразумева́ет пости́гнути ве́лие та́инство воплоще́ния от Тебе́, Пречи́стая, Христа́ Бо́га на́шего, и А́нгели Небе́снии недоуме́нно дивя́тся, ка́ко на́с ра́ди, челове́к, Влады́ки Христа́ с Небесе́ на зе́млю низхожде́ние и от Де́вы воплоще́ние бы́сть, мы́ же, земноро́днии, Тебе́ благодаре́ние принося́ще, ра́достно глаго́лем:
Ра́дуйся, пра́ведных Иоаки́ма и А́нны свято́е прозябе́ние; ра́дуйся, непло́дныя утро́бы пло́д благослове́нный.
Ра́дуйся, в зача́тии Твое́м чуде́снем просла́вленная; ра́дуйся, в рожде́нии Твое́м благода́тию Бо́жиею осене́нная.
Ра́дуйся, благове́щение Арха́нгелово во смире́нии ра́достно прие́мшая; ра́дуйся, де́вство и деторожде́ние пречу́дно в Себе́ сочета́вшая.
Ра́дуйся, Спаси́теля ми́ра нетле́нно ро́ждшая; ра́дуйся, Де́во Пренепоро́чная и Богоро́дице Пречи́стая.
Ра́дуйся, Бо́га я́ко Отроча́ мла́до па́стырем яви́вшая; ра́дуйся, Влады́ку, я́ко Пе́рвенца, пра́ведному Симео́ну прине́сшая.
Ра́дуйся, Киво́те Божества́ освяще́нный; ра́дуйся, вмести́лище Боже́ственных открове́ний.
Ра́дуйся, Богоро́дице Де́во, ми́лостию Твое́ю при́сно на́с пита́ющая.
Кондак 3
Си́ла Вы́шняго осени́ Тя, Мари́е Богоневе́стная, и Ду́х Святы́й на́йде на Тя́ по благове́стию Арха́нгелову. Те́мже благода́тию Свята́го Ду́ха осеня́ема, зачала́ еси́ во утро́бе Твое́й и яви́лася еси́ одушевле́нный Киво́т Сло́ва воплоще́ннаго, Ему́же прера́достно вопие́м: Аллилу́иа.
Икос 3
Иму́щи любо́вь к челове́ком, искупле́нным Кро́вию Сы́на Твоего́, Преблага́я Влады́чице, прия́ла еси́ от Бо́га благода́ть покрыва́ти ро́д христиа́нский, ему́же в утеше́ние ико́ну Твою́ сию́ святу́ю, чуде́с благода́тию просла́вленную, ми́лостивно дарова́ла еси́. Те́мже благода́рственно вопие́м Ти́:
Ра́дуйся, пресве́тлая звездо́, явля́ющая ми́рови Со́лнце пра́вды; ра́дуйся, пресла́вная пала́то, в ню́же всели́ся Христо́с.
Ра́дуйся, от все́х родо́в ублажа́емая; ра́дуйся, ве́лие дерзнове́ние к Сы́ну Твоему́ и Бо́гу стяжа́вшая.
Ра́дуйся, вы́ну хода́тайствующая пред Ни́м за ро́д христиа́нский; ра́дуйся, при́сно умоля́ющая Его́ за лю́ди согреши́вшия.
Ра́дуйся, ско́рая на́ша Помо́щнице; ра́дуйся, ми́лостивая на́ша Засту́пнице.
Ра́дуйся, гре́шников ка́ющихся Спору́чнице; ра́дуйся, су́щих в ско́рбех и напа́стех Изба́вительнице.
Ра́дуйся, тве́рдое на́ше огражде́ние от находя́щих на ны́ озлобле́ний; ра́дуйся, непосты́дная на́ша наде́ждо.
Ра́дуйся, Богоро́дице Де́во, ми́лостию Твое́ю при́сно на́с пита́ющая.
Кондак 4
Бу́рное мо́ре преплы́в, Са́вва святы́й, Се́рбския Це́ркве первосвяти́тель, за́поведь испо́лнь вели́каго Са́ввы Освяще́ннаго, прия́ благогове́йно чудотво́рную ико́ну Твою́, Млекопита́тельнице, от ру́к преподо́бных оте́ц Ла́вры его́ и ра́достно возопи́ к носи́мому на рука́х Твои́х Сы́ну Бо́жию: Аллилу́иа.
Икос 4
Слы́шавше и́ноцы Святы́я Горы́ Афо́нския, я́ко честна́я ико́на Твоя́, Богоро́дице, от Иерусали́ма к ни́м гряде́т, с ра́достию изыдо́ша в сре́тение ея́, и узре́вше ю́, рука́ма святи́теля Са́ввы носи́мую, благогове́йно поклони́шася и с весе́лием си́це Тебе́ вопия́ху:
Ра́дуйся, явля́ющая на́м ди́вное заступле́ние; ра́дуйся, сладча́йшее ду́ш на́ших утеше́ние.
Ра́дуйся, Го́ру Афо́нскую благода́тным покро́вом осени́вшая; ра́дуйся, ико́ны Твоя́ чудотво́рныя в не́й умно́жившая.
Ра́дуйся, от Иерусали́ма прише́ствием Твои́м но́вое зна́мение ми́лости Твоея́ на́м яви́вшая; ра́дуйся, ико́ною Твое́ю насе́льников Святы́я Горы́ благода́тно озари́вшая.
Ра́дуйся, стра́нствия на́шего ти́хое прибе́жище; ра́дуйся, спасе́ния на́шего немо́лчная Хода́таице.
Ра́дуйся, и́ноков прему́драя Учи́тельнице; ра́дуйся, Свята́го Афо́на богодарова́нная Влады́чице.
Ра́дуйся, затво́рников сла́дкая Собесе́днице; ра́дуйся, отше́льников наде́жная Покрови́тельнице.
Ра́дуйся, Богоро́дице Де́во, ми́лостию Твое́ю при́сно на́с пита́ющая.
Кондак 5
Боготе́чною звездо́ю води́мии волсви́ достиго́ша хра́мины, в не́йже узре́ша Отроча́ с Мари́ею, Ма́терию Его́, и па́дше поклони́шася Ему́. Сего́ ра́ди и мы́, гре́шнии, предстоя́ще честне́й ико́не Твое́й, Богома́ти, я́ко Само́й Ти́ су́щей с на́ми и держа́щей на объя́тиих Твои́х Богомладе́нца, со умиле́нием покланя́емся Ему́, непреста́нно вопию́ще: Аллилу́иа.
Икос 5
Ви́дяще, Влады́чице, святу́ю ико́ну Твою́ с Богомладе́нцем Иису́сом, Его́же, я́ко блаже́нная Ма́ти, от сосцу́ Твое́ю пита́еши, велича́ем ди́вное смотре́ние Его́ о на́с, гре́шных, и умиле́нно вопие́м Ти́ такова́я:
Ра́дуйся, Пода́тельнице духо́вныя ра́дости; ра́дуйся, А́гнице, ро́ждшая А́гнца Бо́жия, взе́млющаго грехи́ ми́ра.
Ра́дуйся, ле́ствице Иа́ковля, земна́я с Небе́сными соедини́вшая; ра́дуйся, в сле́д Тебе́ де́вы Царю́ приводя́щая.
Ра́дуйся, ско́рбных ма́терей утеше́ние; ра́дуйся, ча́д и́х благода́тное охране́ние.
Ра́дуйся, вдо́в непреме́нная Засту́пнице; ра́дуйся, си́рых ско́рая Уте́шительнице.
Ра́дуйся, а́лчущих ще́драя Пита́тельнице; ра́дуйся, боля́щих неча́емая Цели́тельнице.
Ра́дуйся, заблу́ждших Путеводи́тельнице; ра́дуйся, ю́ных целому́дрию Наста́внице.
Ра́дуйся, Богоро́дице Де́во, ми́лостию Твое́ю при́сно на́с пита́ющая.
Кондак 6
Пропове́дуем ми́лости, явле́нныя Тобо́ю Святе́й Горе́ Афо́нстей, Богома́ти, и о Покро́ве Твое́м всечестне́м при́сно ра́дуемся, ви́дим бо, я́ко и ны́не от ико́ны Твоея́ исцеле́ний мно́жество быва́ет все́м ве́рою прося́щим и умиле́нно вопию́щим Бо́гу: Аллилу́иа.
Икос 6
Возсия́ла еси́ луча́ми преди́вных чуде́с Твои́х, Богоро́дице Де́во, от ико́ны Твоея́ святы́я, на не́йже де́вственную ле́поту Твою́ созерца́юще, и рука́ма Твои́ма держи́маго красне́йшаго па́че сыно́в челове́ческих Богомладе́нца ви́дяще, к славосло́вию Твоему́ подвиза́емся и та́ко глаго́лем:
Ра́дуйся, цве́те де́вства неувяда́емый; ра́дуйся, ма́терей сла́во и похвало́.
Ра́дуйся, Мирополо́жнице благоуха́ния Христо́ва; ра́дуйся, алава́стре, на вся́к неду́г врачева́ния подаю́щий.
Ра́дуйся, Предста́тельнице у Престо́ла Пресвяты́я и Единосу́щныя Тро́ицы; ра́дуйся, ста́мно злата́я святы́х святе́йшаго Сло́ва.
Ра́дуйся, преукраше́нный черто́г Царя́ ца́рствующих; ра́дуйся, Горо́ Свята́я, низхожде́нием Бо́жиим просла́вленная.
Ра́дуйся, Це́ркве Христо́вы сия́ющая ле́пота; ра́дуйся, всего́ ми́ра удобре́ние.
Ра́дуйся, Небе́сная Цари́це, па́че со́лнца светле́йшая; ра́дуйся, Влады́чице, от все́х чино́в А́нгельских покланя́емая.
Ра́дуйся, Богоро́дице Де́во, ми́лостию Твое́ю при́сно на́с пита́ющая.
Кондак 7
Хотя́щим на́м, Богороди́тельнице, благогове́йно лобыза́ти чудотво́рный Тво́й о́браз, не возбрани́, Всеблага́я, грехо́в ра́ди на́ших, но, а́ще и недосто́йных, с любо́вию приими́ и вся́ проше́ния блага́я на́ша испо́лни; ве́мы бо, Цари́це, я́ко милосе́рдие Твое́ неисче́тно. Сего́ ра́ди с упова́нием неотсту́пным к Тебе́ прибега́ем и, сла́вяще чудеса́ Твоя́, пое́м Бо́гу: Аллилу́иа.
Икос 7
Но́вую ми́лость яви́ла еси́, Богоро́дице, егда́ неисчерпа́емый исто́чник исцеле́ний и благода́тную по́мощь все́м с ве́рою притека́ющим ко святе́й ико́не Твое́й дарова́ла еси́. Сего́ ра́ди, благодаря́ще Тя́ и пречу́дному о́бразу Твоему́ со умиле́нием припа́дающе, хвале́бно зове́м Ти́:
Ра́дуйся, от го́рних высо́т все́х на́с Ма́тернею любо́вию Твое́ю назира́ющая; ра́дуйся, юдо́ль земну́ю многоско́рбную милосе́рдием Твои́м посеща́ющая.
Ра́дуйся, усе́рдная спасе́ния на́шего Споспе́шнице; ра́дуйся, ди́вный сосу́д благода́тнаго врачева́ния.
Ра́дуйся, прославля́ющих Тя́ прославля́ющая; ра́дуйся, и не почита́ющих ико́ны Твоея́ на покая́ние призыва́ющая.
Ра́дуйся, во дни́ бра́ни правосла́вным во́ином кре́пость подаю́щая; ра́дуйся, во дни́ ми́ра сердца́ ве́рных веселя́щая.
Ра́дуйся, наги́х и безкро́вных при́сно покрыва́ющая; ра́дуйся, сиро́т и вдови́ц никогда́же оставля́ющая.
Ра́дуйся, хожде́ние хромы́м подаю́щая; ра́дуйся, о́чи слепы́м отверза́ющая.
Ра́дуйся, Богоро́дице Де́во, ми́лостию Твое́ю при́сно на́с пита́ющая.
Кондак 8
Стра́нствие на́ше земно́е многоско́рбное и многомяте́жное услажда́еши, Влады́чице, ико́ною Твое́ю свято́ю, к не́йже притека́юще с ве́рою и любо́вию, упова́ем, я́ко и́мамы Тя́ на Небеси́ Ма́терь и Покрови́тельницу Всеблагу́ю, при́сно споспешеству́ющую на́м в жи́зни се́й и по сме́рти на́с не оставля́ющую. О се́м ра́дующеся и из глубины́ се́рдца благодаря́ще Тя́, вопие́м Бо́гу: Аллилу́иа.
Икос 8
Вси́ ро́ди христиа́нстии при́сно блажа́т Тя́, Богоро́дицу су́щую, и на ли́к Тво́й Пречи́стый благогове́йно взира́юще, с ве́рою покланя́ются Тебе́, я́ко Честне́йшей Херуви́м и Сла́внейшей без сравне́ния Серафи́м. Те́мже и мы́, гре́шнии, с любо́вию вопие́м Ти́:
Ра́дуйся, Цари́це, я́ко пресла́вная глаго́лашася о Тебе́; ра́дуйся, Влады́чице, я́ко Небе́сная и земна́я пе́ти Тебе́ не умолка́ют.
Ра́дуйся, свеще́ неугаси́мая, ве́сь ми́р сия́нием Твои́м озаря́ющая; ра́дуйся, благоуха́нный кри́не де́вства и чистоты́.
Ра́дуйся, любве́ и ми́лости исто́чниче живоно́сный; ра́дуйся, Моли́твеннице благоприя́тная за ны́ гре́шныя ко Христу́ Бо́гу.
Ра́дуйся, гре́шных ко Творцу́ приводя́щая; ра́дуйся, пра́ведный гне́в Его́ на ми́лость прелага́ющая.
Ра́дуйся, Ни́во неора́нная, Кла́с спаси́тельный ми́ру израсти́вшая; ра́дуйся, Трапе́зо пресвята́я, живоно́сный Хле́б на́м дарова́вшая.
Ра́дуйся, ле́ствице, от тьмы́ грехо́вныя ко спасе́нию возводя́щая; ра́дуйся, звездо́ пресве́тлая, пу́ть к Небесе́м показу́ющая.
Ра́дуйся, Богоро́дице Де́во, ми́лостию Твое́ю при́сно на́с пита́ющая.
Кондак 9
Вся́кая похвала́ не довле́ет сла́ве Твое́й, Богоро́дице Де́во: Ты́ бо Сы́на от Ду́ха Свята́го зачала́ еси́ и невмести́маго Бо́га во чре́ве вмести́ла еси́; Тобо́ю спасе́ние ми́ра возвеща́ется, па́дший же ро́д челове́чь Пречестны́м Рождество́м Твои́м от ве́чныя сме́рти свобожда́ется. Сего́ ра́ди из глубины́ души́ возсыла́ем Ти́ благода́рственная хвале́ния и, я́ко изба́вленнии от злы́х, пое́м Бо́гу: Аллилу́иа.
Икос 9
Вети́и многовеща́ннии не мо́гут пости́гнути ве́лию та́йну Твоего́ присноде́вства, Богоро́дице, ка́ко в рождестве́ и по рождестве́ Де́ва пребыла́ еси́. Мы́ же, ве́рою правосла́вно велича́юще Тя́ я́ко Присноде́ву и Ма́терь Предве́чнаго Живота́, прино́сим Ти́ из глубины́ серде́ц испове́дание на́ше и любо́вию вопие́м Ти́:
Ра́дуйся, и́ноков и и́нокинь правосла́вных благо́е наставле́ние; ра́дуйся, ревну́ющих о чистоте́ и целому́дрии тве́рдое огражде́ние.
Ра́дуйся, де́вственных чино́в свята́я Предводи́тельнице; ра́дуйся, и бра́ка честна́го защи́то и покро́ве.
Ра́дуйся, в ложесна́х Твои́х Бо́га нете́сно вмести́вшая; ра́дуйся, Еди́на непоро́чная в жена́х.
Ра́дуйся, нетле́нная и неискусобра́чная А́гнца и Па́стыря Ма́ти; ра́дуйся, Ма́терним Твои́м к Нему́ дерзнове́нием спасе́ние ми́ру устроя́ющая.
Ра́дуйся, я́ко о Тебе́ ра́дуется А́нгельский собо́р; ра́дуйся, я́ко о Тебе́ торжеству́ет челове́ческий ро́д.
Ра́дуйся, все́ми доброде́тельми преукраше́нная; ра́дуйся, от все́х христиа́нских родо́в почита́емая и ублажа́емая.
Ра́дуйся, Богоро́дице Де́во, ми́лостию Твое́ю при́сно на́с пита́ющая.
Кондак 10
Спасти́ хотя́ ми́р, Предве́чное Сло́во избра́ Тя́, Пречи́стая, и из честны́х крове́й Твои́х истка́ Себе́ пло́ть, яви́ся на земли́ и спасе́ние ми́ру соде́ла. Те́мже песносло́вим Тя́ я́ко Всепе́тую Ма́терь Изба́вителя, благода́рственно вопию́ще Ему́: Аллилу́иа.
Икос 10
Сте́ну необори́му и покро́в неруши́м име́ют Тя́, Богоро́дице Де́во, во оби́телех и́ноческих подвиза́ющиися и Помо́щницу Держа́вну вси́, на Тя́ по Бо́зе все́ упова́ние свое́ возлага́ющии, Тебе́ бо даде́ся от Го́спода благода́ть моли́твеннаго заступле́ния, и Ты́ еси́ ве́рных в де́встве и чистоте́ утвержде́ние. Те́мже и мы́, гре́шнии, благооти́шие душе́вное в Тебе́ обрета́юще, усе́рдно взыва́ем:
Ра́дуйся, до́бре подвиза́ющимся Хода́таице блаже́ннаго упокое́ния; ра́дуйся, и́ноком, на пло́ть во́инствующим, Пода́тельнице ве́чнаго ра́дования.
Ра́дуйся, безмо́лвствующих благода́тное осене́ние; ра́дуйся, ста́рцев благогове́йных отра́до и утеше́ние.
Ра́дуйся, ста́риц боголюби́вых кре́посте и утвержде́ние; ра́дуйся, ю́ношей и де́в в де́вственном житии́ заступле́ние.
Ра́дуйся, ма́терей ражда́ющих и млеко́м пита́ющих от бе́д огражда́ющая; ра́дуйся, вся́к во́зраст ве́рных Ма́терняго благопопече́ния Твоего́ сподобля́ющая.
Ра́дуйся, благочести́вых домо́в покро́ве и благослове́ние; ра́дуйся, оби́димых и гони́мых гото́вое заступле́ние.
Ра́дуйся, оби́дящих гро́зное обличе́ние; ра́дуйся, вражду́ющих любвеоби́льное примире́ние.
Ра́дуйся, Богоро́дице Де́во, ми́лостию Твое́ю при́сно на́с пита́ющая.
Кондак 11
Пе́ние хвале́бное прино́сим Ти́, Христе́ Царю́, в верте́пе ро́ждшемуся и во я́слех возле́гшему спасе́ния на́шего ра́ди. Те́мже в пе́снех велича́ем и Пречи́стую Ма́терь Твою́, Присноде́ву Мари́ю, пред честно́ю ико́ною Ея́ возвеща́юще ми́лости и чудеса́, и́миже обогати́ся вся́ вселе́нная. Ты́ же, Всеблага́я, Сама́ научи́ на́с вы́ну взыва́ти Бо́гу: Аллилу́иа.
Икос 11
Све́тлыми луча́ми чуде́с Твои́х, Богоро́дице Де́во, мра́к грехо́вный отгоня́еши, все́х на́с на стезю́ спасе́ния наставля́ющи. Те́мже мо́лим Тя́, Всеблага́я, приведи́ на́с к ти́хому приста́нищу Твоему́, да со умиле́нием прино́сим Ти́ хвале́бная пе́ния сицева́я:
Ра́дуйся, Пренепоро́чная Влады́чице, Со́лнце Пра́вды ве́рным возсия́вшая; ра́дуйся, пла́чущим и скорбя́щим Небе́сное утеше́ние низпосыла́ющая.
Ра́дуйся, ни́щих и убо́гих бога́тство неоскудева́емое; ра́дуйся, подви́жников благоче́стия во бра́ни духо́вней укрепле́ние тве́рдое.
Ра́дуйся, предста́тельство к Бо́гу на́ше кре́пкое; ра́дуйся, в ча́с кончи́ны огражде́ние на́ше необори́мое.
Ра́дуйся, в ра́йских селе́ниих хода́тайством Твои́м на́с водворя́ющая; ра́дуйся, благоче́стно живу́щим Ма́тернее милосе́рдие явля́ющая.
Ра́дуйся, от восто́ка до за́пада непреста́нно сла́вимая; ра́дуйся, от А́нгел и челове́к в пе́снех ра́достно превозноси́мая.
Ра́дуйся, ру́к на́ших дела́ исправля́ющая; ра́дуйся, ско́рби лю́тыя в ра́дость претворя́ющая.
Ра́дуйся, Богоро́дице Де́во, ми́лостию Твое́ю при́сно на́с пита́ющая.
Кондак 12
Благода́ть и ми́лость испроси́, Преблагослове́нная Ма́ти, от Сы́на Твоего́, Христа́ Бо́га на́шего, и, воздева́ющи к Нему́ Богоприе́мнеи ру́це Твои́, умоли́ Его́ вся́ ны́ спасти́ и изба́вити от ги́бели ве́чныя: мно́го бо мо́жет моли́тва Твоя́ Ма́терняя ко благосе́рдию Влады́ки; те́мже ра́дующеся, пое́м Ро́ждшемуся из Тебе́: Аллилу́иа.
Икос 12
Пою́ще пресла́вная чудеса́ Твоя́, Богоро́дице Де́во, от ико́ны Твоея́ святы́я при́сно явля́емая, велича́ем Тя́, возвели́чившую ро́д на́ш. Ты́ же, Всеблага́я, освяти́ и спаси́ вопию́щия Ти́ сицева́я:
Ра́дуйся, Ма́ти, безму́жно Предве́чнаго Сы́на ро́ждшая пло́тию; ра́дуйся, я́ко Тобо́ю печа́ли на́ша утоля́ются.
Ра́дуйся, живоно́сный ми́лостей исто́чник все́м к Тебе́ прибега́ющим; ра́дуйся, лучеза́рный свети́льниче омраче́нных ду́ш на́ших.
Ра́дуйся, проро́ческая све́тлая похвало́; ра́дуйся, апо́стольская нетле́нная сла́во.
Ра́дуйся, му́чеников утеше́ние; ра́дуйся, святи́телей укрепле́ние.
Ра́дуйся, неотсту́пная Храни́тельнице и́ноческих оби́телей; ра́дуйся, пра́ведных непреста́нное ра́дование.
Ра́дуйся, ми́ра Влады́чице; ра́дуйся, я́ко Тобо́ю спасе́ние содева́ется.
Ра́дуйся, Богоро́дице Де́во, ми́лостию Твое́ю при́сно на́с пита́ющая.
Кондак 13
О Всепе́тая Ма́ти, Млекопита́тельнице Спа́са на́шего! Услы́ши серде́чная воздыха́ния на́ша, бу́ди те́плая Засту́пница и Моли́твенница за на́с пред Сы́ном Твои́м и Бо́гом, о е́же изба́витися на́м от гре́х на́ших, да не пребу́дем вне́ черто́га Его́, но сподо́бимся со все́ми святы́ми пе́ти Ему́: Аллилу́иа.
Повтор
Этот кондак читается трижды, затем икос 1-й и кондак 1-й.
Икос 1
Арха́нгел Гаврии́л с Небесе́ прии́де к Тебе́, Богоро́дице, благовести́ти непостижи́мое рожде́ние от Тебе́ Бо́га Сло́ва, и рече́: ра́дуйся, Благода́тная, Госпо́дь с Тобо́ю. Те́мже и мы́, смире́ннии, дерза́ем вопи́ти к Тебе́ си́це:
Ра́дуйся, А́нгелов ра́досте; ра́дуйся, челове́ков спасе́ние.
Ра́дуйся, па́дшаго ми́ра обновле́ние; ра́дуйся, средосте́ния вражды́ разруше́ние.
Ра́дуйся, проро́ческих глаго́л исполне́ние; ра́дуйся, зако́на дре́вняго премене́ние.
Ра́дуйся, А́гнца и Па́стыря во чре́ве Твое́м упа́сшая; ра́дуйся, Творца́ Небесе́ и земли́ пло́тию ро́ждшая.
Ра́дуйся, Пита́теля вселе́нныя млекопита́вшая; ра́дуйся, млеко́м богопозна́ния ве́рных Пита́тельнице.
Ра́дуйся, пови́вшая Повива́ющаго не́бо о́блаки; ра́дуйся, дла́ньма нося́щая на Херуви́мех Носи́маго.
Ра́дуйся, Богоро́дице Де́во, ми́лостию Твое́ю при́сно на́с пита́ющая.
Кондак 1
Взбра́нной Воево́де, Влады́чице на́шей Богоро́дице, похва́льная пе́ния прино́сим Ти́ раби́ Твои́ о явле́нии чудотво́рныя ико́ны Твоея́. Ты́ же, я́ко иму́щая милосе́рдие неизрече́нное, соблюди́ и спаси́ от вся́ких бе́д рабы́ Твоя́, с ве́рою и любо́вию вопию́щия Ти́:
Ра́дуйся, Богоро́дице Де́во, ми́лостию Твое́ю при́сно на́с пита́ющая.
Молитвы
О Пресвята́я Влады́чице Богоро́дице, Пречи́стая и Ми́лостивая Млекопита́тельнице! С любо́вию и благогове́нием припа́дающе ко свято́му и чудотво́рному о́бразу Твоему́, на не́мже ви́дяще все́х Творца́ и Го́спода, я́ко Младе́нца, пречи́стым млеко́м Твои́м пита́ема, благохвале́ния и поклоне́ние прино́сим Ти́ гре́шнии и недосто́йнии раби́ Твои́ и сле́зно мо́лим Тя́: не оста́ви на́с без Твоея́ по́мощи и заступле́ния! Се́ бо грехми́ и страстьми́ разсла́бленни есмы́ и гла́дом духо́вным погиба́юще, а́лчем и жа́ждем пи́щи Небе́сныя. Оскуде́ бо в на́с ве́ра, упова́ние благо́е, любо́вь и благоче́стие. Несмы́сленни и младоу́мни есмы́, зане́ при́сно умо́м и дея́ньми младе́нствуем, и во́ли Бо́жия не твори́м, ниже́ разуме́ем, что́ е́сть благо́е или́ зло́е. Ты́ же, о Цари́це Небе́сная, Пита́тельница жи́зни на́шея, покро́вом ми́лости Твоея́ покрыва́ющая вселе́нную всю́, напита́й на́с от исто́чника бла́гости Твоея́ млеко́м богопозна́ния, да возраста́ем в стра́се Бо́жии и смиренному́дрии. Ты́ еси́ ми́ро, излия́нное лю́бящим Тя́ рабо́м Твои́м, росо́ю моли́тв Твои́х Богома́терних ороси́ на́с, да принесе́м Бо́гу плоды́ покая́ния и житие́ нескве́рное. Укрепи́ на́с малоду́шных, омраче́нных грехми́ просвети́, воста́ние страсте́й на́ших утоли́, ко спасе́нию ве́чному окорми́, не́мощи естества́ на́шего исцели́ и не оста́ви до конца́ поги́бнути рабы́ Твоя́, Ты́ бо еси́ еди́на Засту́пница на́ша и упова́ние, и вси́ наде́ющиися на Тя́ не постыдя́тся, я́ко да Твои́ми те́плыми моли́твами в де́нь Стра́шнаго Суда́ Христо́ва изба́вимся бу́дущаго осужде́ния и несконча́емыя му́ки, сподо́бимся же избра́нных ра́дости и весе́лия ве́чнаго, во е́же со все́ми святы́ми воспева́ти Сы́на Твоего́, Христа́ Бо́га на́шего, Ему́же подоба́ет вся́кая сла́ва и благодаре́ние, че́сть и поклоне́ние со Безнача́льным Его́ Отце́м, и Пресвяты́м и Благи́м и Животворя́щим Его́ Ду́хом, ны́не и при́сно, и во ве́ки веко́в. Ами́нь.
Конда́къ а҃
Взбра́нной воево́дѣ, влⷣчцѣ на́шей бцⷣѣ, похва̑льнаѧ пѣ̑нїѧ прино́симъ тѝ рабѝ твоѝ ѡ҆ ꙗ҆вле́нїи чꙋдотво́рныѧ і҆кѡ́ны твоеѧ̀. Ты́ же ꙗ҆́кѡ и҆мꙋ́щаѧ млⷭ҇рдїе неизрече́нное, соблюдѝ и҆ сп҃сѝ ѿ всѧ́кихъ бѣ́дъ рабы̑ твоѧ̑, съ вѣ́рою и҆ любо́вїю вопїю́щыѧ тѝ:
Ра́дꙋйсѧ, бцⷣе дв҃о, млⷭ҇тїю твое́ю при́снѡ на́съ пита́ющаѧ.
І҆́косъ а҃
А҆рха́гг҃лъ гаврїи́лъ съ нб҃сѐ прїи́де къ тебѣ̀, бцⷣе, бл҃говѣсти́ти непостижи́мое рожде́нїе ѿ тебє̀ бг҃а сло́ва, и҆ речѐ: ра́дꙋйсѧ, бл҃года́тнаѧ, гдⷭ҇ь съ тобо́ю. Тѣ́мже и҆ мы̀ смире́ннїи дерза́емъ вопи́ти къ тебѣ̀ си́це:
Ра́дꙋйсѧ, а҆́гг҃лѡвъ ра́досте: ра́дꙋйсѧ, человѣ́кѡвъ сп҃се́нїе.
Ра́дꙋйсѧ, па́дшагѡ мі́ра ѡ҆бновле́нїе: ра́дꙋйсѧ, средостѣ́нїѧ вражды̀ разрꙋше́нїе.
Ра́дꙋйсѧ, прⷪ҇ро́ческихъ глагѡ́лъ и҆сполне́нїе: ра́дꙋйсѧ, зако́на дре́внѧгѡ премѣне́нїе.
Ра́дꙋйсѧ, а҆́гнца и҆ па́стырѧ во чре́вѣ твое́мъ ᲂу҆па́сшаѧ: ра́дꙋйсѧ, творца̀ нб҃сѐ и҆ землѝ пло́тїю ро́ждшаѧ.
Ра́дꙋйсѧ, пита́телѧ вселе́нныѧ млекопита́вшаѧ: ра́дꙋйсѧ, млеко́мъ бг҃опозна́нїѧ вѣ́рныхъ пита́тельнице.
Ра́дꙋйсѧ, пови́вшаѧ повива́ющаго не́бо ѻ҆́блаки: ра́дꙋйсѧ, дла́ньма носѧ́щаѧ на херꙋві́мѣхъ носи́маго.
Ра́дꙋйсѧ, бцⷣе дв҃о, млⷭ҇тїю твое́ю при́снѡ на́съ пита́ющаѧ.
Конда́къ в҃
Ви́дѧ і҆ѡ́сифъ цѣломꙋ́дренный чⷭ҇тꙋю дв҃ꙋ непра́зднꙋ сꙋ́щꙋ, восхотѣ̀ та́й пꙋсти́ти ю҆̀: ᲂу҆вѣ́дѣвъ же во чре́вѣ и҆мꙋ́щꙋ ѿ дх҃а ст҃а, ᲂу҆диви́сѧ непостижи́мѣй та́йнѣ воплоще́нїѧ, и҆ до конца̀ вѣ́ренъ храни́тель чⷭ҇тоты̀ є҆ѧ̀ пребы́сть: мы́ же грѣ́шнїи, сла́вѧще є҆́же ѡ҆ на́съ гдⷭ҇не смотре́нїе, во ᲂу҆миле́нїи серде́цъ на́шихъ бл҃гоговѣ́йнѡ покланѧ́емсѧ тѝ, дв҃о чⷭ҇таѧ, вопїю́ще ро́ждшемꙋсѧ ѿ тебє̀ бг҃ꙋ: А҆ллилꙋ́їа.
І҆́косъ в҃
Ра́зꙋмъ человѣ́ческїй недоразꙋмѣва́етъ пости́гнꙋти ве́лїе та́инство воплоще́нїѧ ѿ тебє̀, пречⷭ҇таѧ, хрⷭ҇та̀ бг҃а на́шегѡ, и҆ а҆́гг҃ли нбⷭ҇нїи недоꙋмѣ́ннѡ дивѧ́тсѧ, ка́кѡ на́съ ра́ди человѣ̑къ, влⷣки хрⷭ҇та̀ съ нб҃сѐ на зе́млю низхожде́нїе и҆ ѿ дв҃ы воплоще́нїе бы́сть, мы́ же земноро́днїи, тебѣ̀ бл҃годаре́нїе приносѧ́ще, ра́достнѡ глаго́лемъ:
Ра́дꙋйсѧ, првⷣныхъ і҆ѡакі́ма и҆ а҆́нны ст҃о́е прозѧбе́нїе: ра́дꙋйсѧ, непло́дныѧ ᲂу҆тро́бы пло́дъ бл҃гослове́нный.
Ра́дꙋйсѧ, въ зача́тїи твое́мъ чꙋде́снѣмъ просла́вленнаѧ: ра́дꙋйсѧ, въ рожде́нїи твое́мъ бл҃года́тїю бж҃їею ѡ҆сѣне́ннаѧ.
Ра́дꙋйсѧ, бл҃говѣ́щенїе а҆рха́гг҃лово во смире́нїи ра́достнѡ прїе́мшаѧ: ра́дꙋйсѧ, двⷭ҇тво и҆ дѣторожде́нїе пречꙋ́днѡ въ себѣ̀ сочета́вшаѧ.
Ра́дꙋйсѧ, сп҃си́телѧ мі́ра нетлѣ́ннѡ ро́ждшаѧ: ра́дꙋйсѧ, дв҃о пренепоро́чнаѧ и҆ бцⷣе пречⷭ҇таѧ.
Ра́дꙋйсѧ, бг҃а ꙗ҆́кѡ ѻ҆троча̀ мла́до па́стырємъ ꙗ҆ви́вшаѧ: ра́дꙋйсѧ, влⷣкꙋ, ꙗ҆́кѡ пе́рвенца, првⷣномꙋ сѷмеѡ́нꙋ прине́сшаѧ.
Ра́дꙋйсѧ, кївѡ́тѣ бжⷭ҇тва̀ ѡ҆сщ҃е́нный: ра́дꙋйсѧ, вмѣсти́лище бжⷭ҇твенныхъ ѿкрове́нїй.
Ра́дꙋйсѧ, бцⷣе дв҃о, млⷭ҇тїю твое́ю при́снѡ на́съ пита́ющаѧ.
Конда́къ г҃
Си́ла вы́шнѧгѡ ѡ҆сѣни́ тѧ, мр҃і́е бг҃оневѣ́стнаѧ, и҆ дх҃ъ ст҃ы́й на́йде на тѧ̀ по бл҃говѣ́стїю а҆рха́гг҃ловꙋ. Тѣ́мже бл҃года́тїю ст҃а́гѡ дх҃а ѡ҆сѣнѧ́ема, зачала̀ є҆сѝ во ᲂу҆тро́бѣ твое́й и҆ ꙗ҆ви́ласѧ є҆сѝ ѡ҆дꙋшевле́нный кївѡ́тъ сло́ва воплоще́ннагѡ, є҆мꙋ́же прера́достнѡ вопїе́мъ: А҆ллилꙋ́їа.
І҆́косъ г҃
И҆мꙋ́щи любо́вь къ человѣ́кѡмъ, и҆скꙋпле́ннымъ кро́вїю сн҃а твоегѡ̀, пребл҃га́ѧ влⷣчце, прїѧ́ла є҆сѝ ѿ бг҃а бл҃года́ть покрыва́ти ро́дъ хрⷭ҇тїа́нскїй, є҆мꙋ́же въ ᲂу҆тѣше́нїе і҆кѡ́нꙋ твою̀ сїю̀ ст҃ꙋ́ю, чꙋде́съ бл҃года́тїю просла́вленнꙋю, млⷭ҇тивнѡ дарова́ла є҆сѝ. Тѣ́мже бл҃года́рственнѡ вопїе́мъ тѝ:
Ра́дꙋйсѧ, пресвѣ́тлаѧ ѕвѣздо̀, ꙗ҆влѧ́ющаѧ мі́рови сл҃нце пра́вды: ра́дꙋйсѧ, пресла́внаѧ пала́то, въ ню́же всели́сѧ хрⷭ҇то́съ.
Ра́дꙋйсѧ, ѿ всѣ́хъ родѡ́въ ᲂу҆бл҃жа́емаѧ: ра́дꙋйсѧ, ве́лїе дерзнове́нїе къ сн҃ꙋ твоемꙋ̀ и҆ бг҃ꙋ стѧжа́вшаѧ.
Ра́дꙋйсѧ, вы́нꙋ хода́тайствꙋющаѧ пред̾ ни́мъ за ро́дъ хрⷭ҇тїа́нскїй: ра́дꙋйсѧ, при́снѡ ᲂу҆молѧ́ющаѧ є҆гѡ̀ за лю́ди согрѣши́вшыѧ.
Ра́дꙋйсѧ, ско́раѧ на́ша помо́щнице: ра́дꙋйсѧ, млⷭ҇тиваѧ на́ша застꙋ́пнице.
Ра́дꙋйсѧ, грѣ́шникѡвъ ка́ющихсѧ спорꙋ́чнице: ра́дꙋйсѧ, сꙋ́щихъ въ ско́рбехъ и҆ напа́стехъ и҆зба́вительнице.
Ра́дꙋйсѧ, тве́рдое на́ше ѡ҆гражде́нїе ѿ находѧ́щихъ на ны̀ ѡ҆ѕлобле́нїй: ра́дꙋйсѧ, непосты́днаѧ на́ша наде́ждо.
Ра́дꙋйсѧ, бцⷣе дв҃о, млⷭ҇тїю твое́ю при́снѡ на́съ пита́ющаѧ.
Конда́къ д҃
Бꙋ́рное мо́ре преплы́въ, са́вва ст҃ы́й, се́рбскїѧ цр҃кве первост҃и́тель, за́повѣдь и҆спо́лнь вели́кагѡ са́ввы ѡ҆сщ҃е́ннагѡ, прїѧ̀ бл҃гоговѣ́йнѡ чꙋдотво́рнꙋю і҆кѡ́нꙋ твою̀, млекопита́тельнице, ѿ рꙋ́къ прпⷣбныхъ ѻ҆тє́цъ ла́ѵры є҆гѡ̀ и҆ ра́достнѡ возопѝ къ носи́момꙋ на рꙋка́хъ твои́хъ сн҃ꙋ бж҃їю: А҆ллилꙋ́їа.
І҆́косъ д҃
Слы́шавше и҆́ноцы ст҃ы́ѧ горы̀ а҆ѳѡ́нскїѧ, ꙗ҆́кѡ чтⷭ҇на́ѧ і҆кѡ́на твоѧ̀, бцⷣе, ѿ і҆ерⷭ҇ли́ма къ ни́мъ грѧде́тъ, съ ра́достїю и҆зыдо́ша въ срѣ́тенїе є҆ѧ̀, и҆ ᲂу҆зрѣ́вше ю҆̀, рꙋка́ма ст҃и́телѧ са́ввы носи́мꙋю, бл҃гоговѣ́йнѡ поклони́шасѧ и҆ съ весе́лїемъ си́це тебѣ̀ вопїѧ́хꙋ:
Ра́дꙋйсѧ, ꙗ҆влѧ́ющаѧ на́мъ ди́вное застꙋпле́нїе: ра́дꙋйсѧ, сладча́йшее дꙋ́шъ на́шихъ ᲂу҆тѣше́нїе.
Ра́дꙋйсѧ, го́рꙋ а҆ѳѡ́нскꙋю бл҃года́тнымъ покро́вомъ ѡ҆сѣни́вшаѧ: ра́дꙋйсѧ, і҆кѡ̑ны твоѧ̑ чꙋдотвѡ́рныѧ въ не́й ᲂу҆мно́жившаѧ.
Ра́дꙋйсѧ, ѿ і҆ерⷭ҇ли́ма прише́ствїемъ твои́мъ но́вое зна́менїе млⷭ҇ти твоеѧ̀ на́мъ ꙗ҆ви́вшаѧ: ра́дꙋйсѧ, і҆кѡ́ною твое́ю насе́льникѡвъ ст҃ы́ѧ горы̀ бл҃года́тнѡ ѡ҆зари́вшаѧ.
Ра́дꙋйсѧ, стра́нствїѧ на́шегѡ ти́хое прибѣ́жище: ра́дꙋйсѧ, сп҃се́нїѧ на́шегѡ немѡ́лчнаѧ хода́таице.
Ра́дꙋйсѧ, и҆́нокѡвъ премꙋ́драѧ ᲂу҆чи́тельнице: ра́дꙋйсѧ, ст҃а́гѡ а҆ѳѡ́на бг҃одарова́ннаѧ влⷣчце.
Ра́дꙋйсѧ, затво́рникѡвъ сла́дкаѧ собесѣ́днице: ра́дꙋйсѧ, ѿше́льникѡвъ наде́жнаѧ покрови́тельнице.
Ра́дꙋйсѧ, бцⷣе дв҃о, млⷭ҇тїю твое́ю при́снѡ на́съ пита́ющаѧ.
Конда́къ є҃
Бг҃оте́чною ѕвѣздо́ю води́мїи волсвѝ достиго́ша хра́мины, въ не́йже ᲂу҆зрѣ́ша ѻ҆троча̀ съ мр҃і́ею, мт҃рїю є҆гѡ̀, и҆ па́дше поклони́шасѧ є҆мꙋ̀. Сегѡ̀ ра́ди и҆ мы̀ грѣ́шнїи, предстоѧ́ще чтⷭ҇нѣ́й і҆кѡ́нѣ твое́й, бг҃омт҃и, ꙗ҆́кѡ само́й тѝ сꙋ́щей съ на́ми и҆ держа́щей на ѡ҆б̾ѧ́тїихъ твои́хъ бг҃омлⷣнца, со ᲂу҆миле́нїемъ покланѧ́емсѧ є҆мꙋ̀, непреста́ннѡ вопїю́ще: А҆ллилꙋ́їа.
І҆́косъ є҃
Ви́дѧще, влⷣчце, ст҃ꙋ́ю і҆кѡ́нꙋ твою̀ съ бг҃омлⷣнцемъ і҆и҃сомъ, є҆го́же, ꙗ҆́кѡ бл҃же́ннаѧ мт҃и, ѿ сосцꙋ̑ твоє́ю пита́еши, велича́емъ ди́вное смотре́нїе є҆гѡ̀ ѡ҆ на́съ грѣ́шныхъ, и҆ ᲂу҆миле́ннѡ вопїе́мъ тѝ такова̑ѧ:
Ра́дꙋйсѧ, пода́тельнице дꙋхо́вныѧ ра́дости: ра́дꙋйсѧ, а҆́гнице, ро́ждшаѧ а҆́гнца бж҃їѧ, взе́млющаго грѣхѝ мі́ра.
Ра́дꙋйсѧ, лѣ́ствице і҆а́кѡвлѧ, земна̑ѧ съ нбⷭ҇ными соедини́вшаѧ: ра́дꙋйсѧ, въ слѣ́дъ тебє̀ дѣ̑вы цр҃ю̀ приводѧ́щаѧ.
Ра́дꙋйсѧ, ско́рбныхъ ма́терей ᲂу҆тѣше́нїе: ра́дꙋйсѧ, ча̑дъ и҆́хъ бл҃года́тное ѡ҆хране́нїе.
Ра́дꙋйсѧ, вдѡ́въ непремѣ́ннаѧ застꙋ́пнице: ра́дꙋйсѧ, си́рыхъ ско́раѧ ᲂу҆тѣ́шительнице.
Ра́дꙋйсѧ, а҆́лчꙋщихъ ще́драѧ пита́тельнице: ра́дꙋйсѧ, болѧ́щихъ неча́емаѧ цѣли́тельнице.
Ра́дꙋйсѧ, заблꙋ́ждшихъ пꙋтеводи́тельнице: ра́дꙋйсѧ, ю҆́ныхъ цѣломꙋ́дрїю наста́внице.
Ра́дꙋйсѧ, бцⷣе дв҃о, млⷭ҇тїю твое́ю при́снѡ на́съ пита́ющаѧ.
Конда́къ ѕ҃
Проповѣ́дꙋемъ млⷭ҇ти, ꙗ҆влє́нныѧ тобо́ю ст҃ѣ́й горѣ̀ а҆ѳѡ́нстѣй, бг҃омт҃и, и҆ ѡ҆ покро́вѣ твое́мъ всечⷭ҇тнѣ́мъ при́снѡ ра́дꙋемсѧ, ви́димъ бо, ꙗ҆́кѡ и҆ ны́нѣ ѿ і҆кѡ́ны твоеѧ̀ и҆сцѣле́нїй мно́жество быва́етъ всѣ̑мъ вѣ́рою просѧ́щымъ и҆ ᲂу҆миле́ннѡ вопїю́щымъ бг҃ꙋ: А҆ллилꙋ́їа.
І҆́косъ ѕ҃
Возсїѧ́ла є҆сѝ лꙋча́ми преди́вныхъ чꙋде́съ твои́хъ, бцⷣе дв҃о, ѿ і҆кѡ́ны твоеѧ̀ ст҃ы́ѧ, на не́йже двⷭ҇твеннꙋю лѣ́потꙋ твою̀ созерца́юще, и҆ рꙋка́ма твои́ма держи́маго краснѣ́йшаго па́че сынѡ́въ человѣ́ческихъ бг҃омлⷣнца ви́дѧще, къ славосло́вїю твоемꙋ̀ подвиза́емсѧ и҆ та́кѡ глаго́лемъ:
Ра́дꙋйсѧ, цвѣ́те дѣ́вства неꙋвѧда́емый: ра́дꙋйсѧ, ма́терей сла́во и҆ похвало̀.
Ра́дꙋйсѧ, мѷрополо́жнице бл҃гоꙋха́нїѧ хрⷭ҇то́ва: ра́дꙋйсѧ, а҆лава́стре, на всѧ́къ недꙋ́гъ врачева̑нїѧ подаю́щїй.
Ра́дꙋйсѧ, предста́тельнице ᲂу҆ прⷭ҇то́ла прест҃ы́ѧ и҆ є҆диносꙋ́щныѧ трⷪ҇цы: ра́дꙋйсѧ, ста́мно злата́ѧ ст҃ы́хъ ст҃ѣ́йшагѡ сло́ва.
Ра́дꙋйсѧ, преꙋкраше́нный черто́гъ цр҃ѧ̀ ца́рствꙋющихъ: ра́дꙋйсѧ, горо̀ ст҃а́ѧ, низхожде́нїемъ бж҃їимъ просла́вленнаѧ.
Ра́дꙋйсѧ, цр҃кве хрⷭ҇то́вы сїѧ́ющаѧ лѣ́пота: ра́дꙋйсѧ, всегѡ̀ мі́ра ᲂу҆добре́нїе.
Ра́дꙋйсѧ, нбⷭ҇наѧ цр҃и́це, па́че со́лнца свѣтлѣ́йшаѧ: ра́дꙋйсѧ, влⷣчце, ѿ всѣ́хъ чинѡ́въ а҆́гг҃льскихъ покланѧ́емаѧ.
Ра́дꙋйсѧ, бцⷣе дв҃о, млⷭ҇тїю твое́ю при́снѡ на́съ пита́ющаѧ.
Конда́къ з҃
Хотѧ́щымъ на́мъ, бг҃ороди́тельнице, бл҃гоговѣ́йнѡ лобыза́ти чꙋдотво́рный тво́й ѻ҆́бразъ, не возбранѝ, всебл҃га́ѧ, грѣхѡ́въ ра́ди на́шихъ, но а҆́ще и҆ недосто́йныхъ, съ любо́вїю прїимѝ и҆ всѧ̑ прошє́нїѧ бл҃га̑ѧ на̑ша и҆спо́лни: вѣ́мы бо, цр҃и́це, ꙗ҆́кѡ млⷭ҇рдїе твоѐ неисче́тно. Сегѡ̀ ра́ди съ ᲂу҆пова́нїемъ неѿстꙋ́пнымъ къ тебѣ̀ прибѣга́емъ, и҆ сла́вѧще чꙋдеса̀ твоѧ̑, пое́мъ бг҃ꙋ: А҆ллилꙋ́їа.
І҆́косъ з҃
Но́вꙋю млⷭ҇ть ꙗ҆ви́ла є҆сѝ, бцⷣе, є҆гда̀ неисчерпа́емый и҆сто́чникъ и҆сцѣле́нїй и҆ бл҃года́тнꙋю по́мощь всѣ̑мъ съ вѣ́рою притека́ющымъ ко ст҃ѣ́й і҆кѡ́нѣ твое́й дарова́ла є҆сѝ. Сегѡ̀ ра́ди бл҃годарѧ́ще тѧ̀ и҆ пречꙋ́дномꙋ ѻ҆́бразꙋ твоемꙋ̀ со ᲂу҆миле́нїемъ припа́дающе, хвале́бнѡ зове́мъ тѝ:
Ра́дꙋйсѧ, ѿ го́рнихъ высо́тъ всѣ́хъ на́съ мт҃рнею любо́вїю твое́ю назира́ющаѧ: ра́дꙋйсѧ, ю҆до́ль земнꙋ́ю многоско́рбнꙋю млⷭ҇рдїемъ твои́мъ посѣща́ющаѧ.
Ра́дꙋйсѧ, ᲂу҆се́рднаѧ сп҃се́нїѧ на́шегѡ споспѣ́шнице: ра́дꙋйсѧ, ди́вный сосꙋ́дъ бл҃года́тнагѡ врачева́нїѧ.
Ра́дꙋйсѧ, прославлѧ́ющихъ тѧ̀ прославлѧ́ющаѧ: ра́дꙋйсѧ, и҆ не почита́ющихъ і҆кѡ́ны твоеѧ̀ на покаѧ́нїе призыва́ющаѧ.
Ра́дꙋйсѧ, во дни̑ бра́ни правосла̑внымъ во́инѡмъ крѣ́пость подаю́щаѧ: ра́дꙋйсѧ, во дни̑ ми́ра сердца̀ вѣ́рныхъ веселѧ́щаѧ.
Ра́дꙋйсѧ, наги́хъ и҆ безкро́вныхъ при́снѡ покрыва́ющаѧ: ра́дꙋйсѧ, сиро́тъ и҆ вдови́цъ никогда́же ѡ҆ставлѧ́ющаѧ.
Ра́дꙋйсѧ, хожде́нїе хромы̑мъ подаю́щаѧ: ра́дꙋйсѧ, ѻ҆́чи слѣпы̑мъ ѿверза́ющаѧ.
Ра́дꙋйсѧ, бцⷣе дв҃о, млⷭ҇тїю твое́ю при́снѡ на́съ пита́ющаѧ.
Конда́къ и҃
Стра́нствїе на́ше земно́е многоско́рбное и҆ многомѧте́жное ᲂу҆слажда́еши, влⷣчце, і҆кѡ́ною твое́ю ст҃о́ю, къ не́йже притека́юще съ вѣ́рою и҆ любо́вїю, ᲂу҆пова́емъ, ꙗ҆́кѡ и҆́мамы тѧ̀ на нб҃сѝ мт҃рь и҆ покрови́тельницꙋ всебл҃гꙋ́ю, при́снѡ споспѣшествꙋ́ющꙋю на́мъ въ жи́зни се́й и҆ по сме́рти на́съ не ѡ҆ставлѧ́ющꙋю. Ѡ҆ се́мъ ра́дꙋющесѧ и҆ и҆з̾ глꙋбины̀ се́рдца бл҃годарѧ́ще тѧ̀, вопїе́мъ бг҃ꙋ: А҆ллилꙋ́їа.
І҆́косъ и҃
Всѝ ро́ди хрⷭ҇тїа́нстїи при́снѡ бл҃жа́тъ тѧ̀, бцⷣꙋ сꙋ́щꙋю, и҆ на ли́къ тво́й пречⷭ҇тый бл҃гоговѣ́йнѡ взира́юще, съ вѣ́рою покланѧ́ютсѧ тебѣ̀, ꙗ҆́кѡ чⷭ҇тнѣ́йшей херꙋві̑мъ и҆ сла́внѣйшей без̾ сравне́нїѧ серафі̑мъ. Тѣ́мже и҆ мы̀ грѣ́шнїи съ любо́вїю вопїе́мъ тѝ:
Ра́дꙋйсѧ, цр҃и́це, ꙗ҆́кѡ пресла̑внаѧ глаго́лашасѧ ѡ҆ тебѣ̀: ра́дꙋйсѧ, влⷣчце, ꙗ҆́кѡ нбⷭ҇наѧ и҆ земна̑ѧ пѣ́ти тебѐ не ᲂу҆молка́ютъ.
Ра́дꙋйсѧ, свѣщѐ неꙋгаси́маѧ, ве́сь мі́ръ сїѧ́нїемъ твои́мъ ѡ҆зарѧ́ющаѧ: ра́дꙋйсѧ, бл҃гоꙋха́нный крі́не двⷭ҇тва и҆ чⷭ҇тоты̀.
Ра́дꙋйсѧ, любвѐ и҆ млⷭ҇ти и҆сто́чниче живоно́сный: ра́дꙋйсѧ, мл҃твеннице бл҃гопрїѧ́тнаѧ за ны̀ грѣ̑шныѧ ко хрⷭ҇тꙋ̀ бг҃ꙋ.
Ра́дꙋйсѧ, грѣ́шныхъ ко творцꙋ̀ приводѧ́щаѧ: ра́дꙋйсѧ, првⷣный гнѣ́въ є҆гѡ̀ на млⷭ҇ть прелага́ющаѧ.
Ра́дꙋйсѧ, ни́во неѡра́ннаѧ, кла́съ сп҃си́тельный мі́рꙋ и҆зрасти́вшаѧ: ра́дꙋйсѧ, трапе́зо прест҃а́ѧ, живоно́сный хлѣ́бъ на́мъ дарова́вшаѧ.
Ра́дꙋйсѧ, лѣ́ствице, ѿ тьмы̀ грѣхо́вныѧ ко сп҃се́нїю возводѧ́щаѧ: ра́дꙋйсѧ, ѕвѣздо̀ пресвѣ́тлаѧ, пꙋ́ть къ нб҃сє́мъ показꙋ́ющаѧ.
Ра́дꙋйсѧ, бцⷣе дв҃о, млⷭ҇тїю твое́ю при́снѡ на́съ пита́ющаѧ.
Конда́къ ѳ҃
Всѧ́каѧ похвала̀ не довлѣ́етъ сла́вѣ твое́й, бцⷣе дв҃о: ты́ бо сн҃а ѿ дх҃а ст҃а́гѡ зачала̀ є҆сѝ и҆ невмѣсти́маго бг҃а во чре́вѣ вмѣсти́ла є҆сѝ: тобо́ю сп҃се́нїе мі́ра возвѣща́етсѧ, па́дшїй же ро́дъ человѣ́чь пречⷭ҇тны́мъ ржⷭ҇тво́мъ твои́мъ ѿ вѣ́чныѧ сме́рти свобожда́етсѧ. Сегѡ̀ ра́ди и҆з̾ глꙋбины̀ дꙋшѝ возсыла́емъ тѝ бл҃года́рствєннаѧ хвалє́нїѧ, и҆ ꙗ҆́кѡ и҆зба́вленнїи ѿ ѕлы́хъ, пое́мъ бг҃ꙋ: А҆ллилꙋ́їа.
І҆́косъ ѳ҃
Вѣті̑и многовѣща́ннїи не мо́гꙋтъ пости́гнꙋти ве́лїю та́йнꙋ твоегѡ̀ прⷭ҇нодв҃ства, бцⷣе, ка́кѡ въ ржⷭ҇твѣ̀ и҆ по ржⷭ҇твѣ̀ дв҃а пребыла̀ є҆сѝ. Мы́ же вѣ́рою правосла́внѡ велича́юще тѧ̀ ꙗ҆́кѡ приснодв҃ꙋ и҆ мт҃рь предвѣ́чнагѡ живота̀, прино́симъ тѝ и҆з̾ глꙋбины̀ серде́цъ и҆сповѣ́данїе на́ше и҆ любо́вїю вопїе́мъ тѝ:
Ра́дꙋйсѧ, и҆́нокѡвъ и҆ и҆́нокинь правосла́вныхъ бл҃го́е наставле́нїе: ра́дꙋйсѧ, ревнꙋ́ющихъ ѡ҆ чистотѣ̀ и҆ цѣломꙋ́дрїи тве́рдое ѡ҆гражде́нїе.
Ра́дꙋйсѧ, дѣ́вственныхъ чинѡ́въ ст҃а́ѧ предводи́тельнице: ра́дꙋйсѧ, и҆ бра́ка чтⷭ҇на́гѡ защи́то и҆ покро́ве.
Ра́дꙋйсѧ, въ ложесна́хъ твои́хъ бг҃а нетѣ́снѡ вмѣсти́вшаѧ: ра́дꙋйсѧ, є҆ди́на непоро́чнаѧ въ жена́хъ.
Ра́дꙋйсѧ, нетлѣ́ннаѧ и҆ неискꙋсобра́чнаѧ а҆́гнца и҆ па́стырѧ мт҃и: ра́дꙋйсѧ, мт҃рнимъ твои́мъ къ немꙋ̀ дерзнове́нїемъ сп҃се́нїе мі́рꙋ ᲂу҆строѧ́ющаѧ.
Ра́дꙋйсѧ, ꙗ҆́кѡ ѡ҆ тебѣ̀ ра́дꙋетсѧ а҆́гг҃льскїй собо́ръ: ра́дꙋйсѧ, ꙗ҆́кѡ ѡ҆ тебѣ̀ торжествꙋ́етъ человѣ́ческїй ро́дъ.
Ра́дꙋйсѧ, всѣ́ми добродѣ́тельми преꙋкраше́ннаѧ: ра́дꙋйсѧ, ѿ всѣ́хъ хрⷭ҇тїа́нскихъ родѡ́въ почита́емаѧ и҆ ᲂу҆бл҃жа́емаѧ.
Ра́дꙋйсѧ, бцⷣе дв҃о, млⷭ҇тїю твое́ю при́снѡ на́съ пита́ющаѧ.
Конда́къ і҃
Сп҃стѝ хотѧ̀ мі́ръ, предвѣ́чное сло́во и҆збра̀ тѧ̀, пречⷭ҇таѧ, и҆ и҆з̾ чтⷭ҇ны́хъ крове́й твои́хъ и҆стка̀ себѣ̀ пло́ть, ꙗ҆ви́сѧ на землѝ и҆ сп҃се́нїе мі́рꙋ содѣ́ла. Тѣ́мже пѣсносло́вимъ тѧ̀ ꙗ҆́кѡ всепѣ́тꙋю мт҃рь и҆зба́вителѧ, бл҃года́рственнѡ вопїю́ще є҆мꙋ̀: А҆ллилꙋ́їа.
І҆́косъ і҃
Стѣ́нꙋ неѡбори́мꙋ и҆ покро́въ нерꙋши́мъ и҆мѣ́ютъ тѧ̀, бцⷣе дв҃о, во ѻ҆би́телехъ и҆́ноческихъ подвиза́ющїисѧ и҆ помо́щницꙋ держа́внꙋ всѝ, на тѧ̀ по бз҃ѣ всѐ ᲂу҆пова́нїе своѐ возлага́ющїи, тебѣ́ бо даде́сѧ ѿ гдⷭ҇а бл҃года́ть мл҃твеннагѡ застꙋпле́нїѧ, и҆ ты̀ є҆сѝ вѣ́рныхъ въ дѣ́вствѣ и҆ чистотѣ̀ ᲂу҆твержде́нїе. Тѣ́мже и҆ мы̀ грѣ́шнїи, бл҃гоѡти́шїе дꙋше́вное въ тебѣ̀ ѡ҆брѣта́юще, ᲂу҆се́рднѡ взыва́емъ:
Ра́дꙋйсѧ, до́брѣ подвиза́ющымсѧ хода́таице бл҃же́ннагѡ ᲂу҆покое́нїѧ: ра́дꙋйсѧ, и҆́нокѡмъ, на пло́ть во́инствꙋющымъ, пода́тельнице вѣ́чнагѡ ра́дованїѧ.
Ра́дꙋйсѧ, безмо́лвствꙋющихъ бл҃года́тное ѡ҆сѣне́нїе: ра́дꙋйсѧ, ста́рцєвъ бл҃гоговѣ́йныхъ ѿра́до и҆ ᲂу҆тѣше́нїе.
Ра́дꙋйсѧ, ста́рицъ бг҃олюби́выхъ крѣ́посте и҆ ᲂу҆твержде́нїе: ра́дꙋйсѧ, ю҆́ношей и҆ дѣ́въ въ дѣ́вственномъ житїѝ застꙋпле́нїе.
Ра́дꙋйсѧ, ма́терей ражда́ющихъ и҆ млеко́мъ пита́ющихъ ѿ бѣ́дъ ѡ҆гражда́ющаѧ: ра́дꙋйсѧ, всѧ́къ во́зрастъ вѣ́рныхъ мт҃рнѧгѡ бл҃гопопече́нїѧ твоегѡ̀ сподоблѧ́ющаѧ.
Ра́дꙋйсѧ, бл҃гочести́выхъ домѡ́въ покро́ве и҆ бл҃гослове́нїе: ра́дꙋйсѧ, ѡ҆би́димыхъ и҆ гони́мыхъ гото́вое застꙋпле́нїе.
Ра́дꙋйсѧ, ѡ҆би́дѧщихъ гро́зное ѡ҆бличе́нїе: ра́дꙋйсѧ, враждꙋ́ющихъ любвеѻби́льное примире́нїе.
Ра́дꙋйсѧ, бцⷣе дв҃о, млⷭ҇тїю твое́ю при́снѡ на́съ пита́ющаѧ.
Конда́къ а҃і
Пѣ́нїе хвале́бное прино́симъ тѝ, хрⷭ҇тѐ цр҃ю̀, въ верте́пѣ ро́ждшемꙋсѧ и҆ во ꙗ҆́слехъ возле́гшемꙋ сп҃се́нїѧ на́шегѡ ра́ди. Тѣ́мже въ пѣ́снехъ велича́емъ и҆ пречⷭ҇тꙋю мт҃рь твою̀, приснодв҃ꙋ мр҃і́ю, пред̾ чтⷭ҇но́ю і҆кѡ́ною є҆ѧ̀ возвѣща́юще млⷭ҇ти и҆ чꙋдеса̀, и҆́миже ѡ҆богати́сѧ всѧ̀ вселе́ннаѧ. Ты́ же, всебл҃га́ѧ, сама̀ наꙋчѝ на́съ вы́нꙋ взыва́ти бг҃ꙋ: А҆ллилꙋ́їа.
І҆́косъ а҃і
Свѣ́тлыми лꙋча́ми чꙋде́съ твои́хъ, бцⷣе дв҃о, мра́къ грѣхо́вный ѿгонѧ́еши, всѣ́хъ на́съ на стезю̀ сп҃се́нїѧ наставлѧ́ющи. Тѣ́мже мо́лимъ тѧ̀, всебл҃га́ѧ, приведѝ на́съ къ ти́хомꙋ приста́нищꙋ твоемꙋ̀, да со ᲂу҆миле́нїемъ прино́симъ тѝ хвалє́бнаѧ пѣ̑нїѧ сицева̑ѧ:
Ра́дꙋйсѧ, пренепоро́чнаѧ влⷣчце, сл҃нце пра́вды вѣ̑рнымъ возсїѧ́вшаѧ: ра́дꙋйсѧ, пла́чꙋщымъ и҆ скорбѧ́щымъ нбⷭ҇ное ᲂу҆тѣше́нїе низпосыла́ющаѧ.
Ра́дꙋйсѧ, ни́щихъ и҆ ᲂу҆бо́гихъ бога́тство неѡскꙋдѣва́емое: ра́дꙋйсѧ, подви́жникѡвъ бл҃гоче́стїѧ во бра́ни дꙋхо́внѣй ᲂу҆крѣпле́нїе тве́рдое.
Ра́дꙋйсѧ, предста́тельство къ бг҃ꙋ на́ше крѣ́пкое: ра́дꙋйсѧ, въ ча́съ кончи́ны ѡ҆гражде́нїе на́ше неѡбори́мое.
Ра́дꙋйсѧ, въ ра́йскихъ селе́нїихъ хода́тайствомъ твои́мъ на́съ водворѧ́ющаѧ: ра́дꙋйсѧ, бл҃гоче́стнѡ живꙋ́щымъ мт҃рнее млⷭ҇рдїе ꙗ҆влѧ́ющаѧ.
Ра́дꙋйсѧ, ѿ восто́ка до за́пада непреста́ннѡ сла́вимаѧ: ра́дꙋйсѧ, ѿ а҆́гг҃лъ и҆ человѣ̑къ въ пѣ́снехъ ра́достнѡ превозноси́маѧ.
Ра́дꙋйсѧ, рꙋ́къ на́шихъ дѣла̀ и҆справлѧ́ющаѧ: ра́дꙋйсѧ, скѡ́рби лю̑тыѧ въ ра́дость претворѧ́ющаѧ.
Ра́дꙋйсѧ, бцⷣе дв҃о, млⷭ҇тїю твое́ю при́снѡ на́съ пита́ющаѧ.
Конда́къ в҃і
Бл҃года́ть и҆ млⷭ҇ть и҆спросѝ, пребл҃гослове́ннаѧ мт҃и, ѿ сн҃а твоегѡ̀, хрⷭ҇та̀ бг҃а на́шегѡ, и҆ воздѣва́ющи къ немꙋ̀ бг҃опрїе́мнѣи рꙋ́цѣ твоѝ, ᲂу҆молѝ є҆го̀ всѧ̑ ны̀ сп҃стѝ и҆ и҆зба́вити ѿ ги́бели вѣ́чныѧ: мно́гѡ бо мо́жетъ мл҃тва твоѧ̀ мт҃рнѧѧ ко бл҃госе́рдїю влⷣки: тѣ́мже ра́дꙋющесѧ, пое́мъ ро́ждшемꙋсѧ и҆з̾ тебѣ̀: А҆ллилꙋ́їа.
І҆́косъ в҃і
Пою́ще пресла̑внаѧ чꙋдеса̀ твоѧ̑, бцⷣе дв҃о, ѿ і҆кѡ́ны твоеѧ̀ ст҃ы́ѧ при́снѡ ꙗ҆влѧ́ємаѧ, велича́емъ тѧ̀, возвели́чившꙋю ро́дъ на́шъ. Ты́ же, всебл҃га́ѧ, ѡ҆ст҃ѝ и҆ сп҃сѝ вопїю́щыѧ тѝ сицева̑ѧ:
Ра́дꙋйсѧ, мт҃и, безмꙋ́жнѡ предвѣ́чнаго сн҃а ро́ждшаѧ пло́тїю: ра́дꙋйсѧ, ꙗ҆́кѡ тобо́ю печа̑ли на́шѧ ᲂу҆толѧ́ютсѧ.
Ра́дꙋйсѧ, живоно́сный млⷭ҇тей и҆сто́чникъ всѣ̑мъ къ тебѣ̀ прибѣга́ющымъ: ра́дꙋйсѧ, лꙋчеза́рный свѣти́льниче ѡ҆мраче́нныхъ дꙋ́шъ на́шихъ.
Ра́дꙋйсѧ, прⷪ҇ро́ческаѧ свѣ́тлаѧ похвало̀: ра́дꙋйсѧ, а҆пⷭ҇льскаѧ нетлѣ́ннаѧ сла́во.
Ра́дꙋйсѧ, мч҃нкѡвъ ᲂу҆тѣше́нїе: ра́дꙋйсѧ, ст҃и́телей ᲂу҆крѣпле́нїе.
Ра́дꙋйсѧ, неѿстꙋ́пнаѧ храни́тельнице и҆́ноческихъ ѻ҆би́телей: ра́дꙋйсѧ, првⷣныхъ непреста́нное ра́дованїе.
Ра́дꙋйсѧ, мі́ра влⷣчце: ра́дꙋйсѧ, ꙗ҆́кѡ тобо́ю сп҃се́нїе содѣва́етсѧ.
Ра́дꙋйсѧ, бцⷣе дв҃о, млⷭ҇тїю твое́ю при́снѡ на́съ пита́ющаѧ.
Конда́къ г҃і
Ѽ всепѣ́таѧ мт҃и, млекопита́тельнице сп҃са на́шегѡ! Оу҆слы́ши сердє́чнаѧ воздыха̑нїѧ на̑ша, бꙋ́ди те́плаѧ застꙋ́пница и҆ мл҃твенница за на́съ пред̾ сн҃омъ твои́мъ и҆ бг҃омъ, ѡ҆ є҆́же и҆зба́витисѧ на́мъ ѿ грѣ̑хъ на́шихъ, да не пребꙋ́демъ внѣ̀ черто́га є҆гѡ̀, но сподо́бимсѧ со всѣ́ми ст҃ы́ми пѣ́ти є҆мꙋ̀: А҆ллилꙋ́їа.
Повто́ръ
Сей конда́къ глаго́лется три́жды, та́же і҆́косъ а҃-й и҆ конда́къ а҃-й.
І҆́косъ а҃
А҆рха́гг҃лъ гаврїи́лъ съ нб҃сѐ прїи́де къ тебѣ̀, бцⷣе, бл҃говѣсти́ти непостижи́мое рожде́нїе ѿ тебє̀ бг҃а сло́ва, и҆ речѐ: ра́дꙋйсѧ, бл҃года́тнаѧ, гдⷭ҇ь съ тобо́ю. Тѣ́мже и҆ мы̀ смире́ннїи дерза́емъ вопи́ти къ тебѣ̀ си́це:
Ра́дꙋйсѧ, а҆́гг҃лѡвъ ра́досте: ра́дꙋйсѧ, человѣ́кѡвъ сп҃се́нїе.
Ра́дꙋйсѧ, па́дшагѡ мі́ра ѡ҆бновле́нїе: ра́дꙋйсѧ, средостѣ́нїѧ вражды̀ разрꙋше́нїе.
Ра́дꙋйсѧ, прⷪ҇ро́ческихъ глагѡ́лъ и҆сполне́нїе: ра́дꙋйсѧ, зако́на дре́внѧгѡ премѣне́нїе.
Ра́дꙋйсѧ, а҆́гнца и҆ па́стырѧ во чре́вѣ твое́мъ ᲂу҆па́сшаѧ: ра́дꙋйсѧ, творца̀ нб҃сѐ и҆ землѝ пло́тїю ро́ждшаѧ.
Ра́дꙋйсѧ, пита́телѧ вселе́нныѧ млекопита́вшаѧ: ра́дꙋйсѧ, млеко́мъ бг҃опозна́нїѧ вѣ́рныхъ пита́тельнице.
Ра́дꙋйсѧ, пови́вшаѧ повива́ющаго не́бо ѻ҆́блаки: ра́дꙋйсѧ, дла́ньма носѧ́щаѧ на херꙋві́мѣхъ носи́маго.
Ра́дꙋйсѧ, бцⷣе дв҃о, млⷭ҇тїю твое́ю при́снѡ на́съ пита́ющаѧ.
Конда́къ а҃
Взбра́нной воево́дѣ, влⷣчцѣ на́шей бцⷣѣ, похва̑льнаѧ пѣ̑нїѧ прино́симъ тѝ рабѝ твоѝ ѡ҆ ꙗ҆вле́нїи чꙋдотво́рныѧ і҆кѡ́ны твоеѧ̀. Ты́ же ꙗ҆́кѡ и҆мꙋ́щаѧ млⷭ҇рдїе неизрече́нное, соблюдѝ и҆ сп҃сѝ ѿ всѧ́кихъ бѣ́дъ рабы̑ твоѧ̑, съ вѣ́рою и҆ любо́вїю вопїю́щыѧ тѝ:
Ра́дꙋйсѧ, бцⷣе дв҃о, млⷭ҇тїю твое́ю при́снѡ на́съ пита́ющаѧ.
Моли́твы
Ѽ прест҃а́ѧ влⷣчце бцⷣе, пречⷭ҇таѧ и҆ млⷭ҇тиваѧ млекопита́тельнице! Съ любо́вїю и҆ бл҃гоговѣ́нїемъ припа́дающе ко ст҃о́мꙋ и҆ чꙋдотво́рномꙋ ѻ҆́бразꙋ твоемꙋ̀, на не́мже ви́дѧще всѣ́хъ творца̀ и҆ гдⷭ҇а, ꙗ҆́кѡ млⷣнца, пречⷭ҇тымъ млеко́мъ твои́мъ пита́ема, бл҃гохвалє́нїѧ и҆ поклоне́нїе прино́симъ тѝ грѣ́шнїи и҆ недосто́йнїи рабѝ твоѝ и҆ сле́знѡ мо́лимъ тѧ̀: не ѡ҆ста́ви на́съ без̾ твоеѧ̀ по́мощи и҆ застꙋпле́нїѧ! Се́ бо грѣхмѝ и҆ страстьмѝ разсла́бленни є҆смы̀ и҆ гла́домъ дꙋхо́внымъ погиба́юще, а҆́лчемъ и҆ жа́ждемъ пи́щи нбⷭ҇ныѧ. Ѡ҆скꙋдѣ́ бо въ на́съ вѣ́ра, ᲂу҆пова́нїе бл҃го́е, любо́вь и҆ бл҃гоче́стїе. Несмы́сленни и҆ младоꙋ́мни є҆смы̀, занѐ при́снѡ ᲂу҆мо́мъ и҆ дѣѧ́ньми младе́нствꙋемъ, и҆ во́ли бж҃їѧ не твори́мъ, нижѐ разꙋмѣ́емъ, что̀ є҆́сть бл҃го́е и҆лѝ ѕло́е. Ты́ же, ѽ цр҃и́це нбⷭ҇наѧ, пита́тельница жи́зни на́шеѧ, покро́вомъ млⷭ҇ти твоеѧ̀ покрыва́ющаѧ вселе́ннꙋю всю̀, напита́й на́съ ѿ и҆сто́чника бл҃гости твоеѧ̀ млеко́мъ бг҃опозна́нїѧ, да возраста́емъ въ стра́сѣ бж҃їи и҆ смиренномꙋ́дрїи. Ты̀ є҆сѝ мѵ́ро, и҆злїѧ́нное лю́бѧщымъ тѧ̀ рабѡ́мъ твои̑мъ, росо́ю мл҃твъ твои́хъ бг҃омт҃рнихъ ѡ҆росѝ на́съ, да принесе́мъ бг҃ꙋ плоды̀ покаѧ́нїѧ и҆ житїѐ нескве́рное. Оу҆крѣпѝ на́съ малодꙋ́шныхъ, ѡ҆мраче́нныхъ грѣхмѝ просвѣтѝ, воста́нїе страсте́й на́шихъ ᲂу҆толѝ, ко сп҃се́нїю вѣ́чномꙋ ѡ҆кормѝ, не́мѡщи є҆стества̀ на́шегѡ и҆сцѣлѝ и҆ не ѡ҆ста́ви до конца̀ поги́бнꙋти рабы̑ твоѧ̑, ты́ бо є҆сѝ є҆ди́на застꙋ́пница на́ша и҆ ᲂу҆пова́нїе, и҆ всѝ надѣ́ющїисѧ на тѧ̀ не постыдѧ́тсѧ, ꙗ҆́кѡ да твои́ми те́плыми мл҃твами въ де́нь стра́шнагѡ сꙋда̀ хрⷭ҇то́ва и҆зба́вимсѧ бꙋ́дꙋщагѡ ѡ҆сꙋжде́нїѧ и҆ несконча́емыѧ мꙋ́ки, сподо́бимсѧ же и҆збра́нныхъ ра́дости и҆ весе́лїѧ вѣ́чнагѡ, во є҆́же со всѣ́ми ст҃ы́ми воспѣва́ти сн҃а твоегѡ̀, хрⷭ҇та̀ бг҃а на́шегѡ, є҆мꙋ́же подоба́етъ всѧ́каѧ сла́ва и҆ бл҃годаре́нїе, че́сть и҆ поклоне́нїе со безнача́льнымъ є҆гѡ̀ ѻ҆ц҃е́мъ, и҆ прест҃ы́мъ и҆ бл҃ги́мъ и҆ животворѧ́щимъ є҆гѡ̀ дх҃омъ, ны́нѣ и҆ при́снѡ, и҆ во вѣ́ки вѣкѡ́въ. А҆ми́нь.