Российская Православная Церковь

по благословенію Архіерейскаго Сѵнода Россійской Православной Церкви

Православный календарь

Ака́ѳістъ

А҆ка́ѳїстъ ст҃ѣ́й равноапⷭ҇льнѣй ні́нѣ, просвѣти́тельницѣ грꙋ́зїи

Равноап. Нины, просвет. Грузии (335) 27 января 2026

Конда́къ а҃

И҆збра́ннѣй слꙋжи́тельницѣ сло́ва бж҃їѧ и҆ по́двигѡмъ ст҃ы́хъ а҆пⷭ҇тѡлъ подража́тельницѣ, зало́гъ бл҃гослове́нїѧ ѿ бж҃їѧ мт҃ре, честны́й крⷭ҇тъ прїѧ́вшей и҆ во странѣ̀ і҆́верстѣй водрꙋзи́вшей, благода́рствєннаѧ хвалє́нїѧ восписꙋ́емъ тѝ, цѣвни́це дꙋхо́внаѧ, ст҃а́ѧ равноапⷭ҇льнаѧ ні́но. ты́ же, ꙗ҆́кѡ и҆мꙋ́щаѧ дерзнове́нїе ко гдⷭ҇ꙋ, не преста́й молѧ́щисѧ и҆зба́вити на́съ ѿ всѧ́кихъ бѣ́дъ и҆ скорбе́й, да со ᲂу҆миле́нїемъ благода́рственнѡ зове́мъ тѝ:

Ра́дꙋйсѧ, ст҃а́ѧ, равноапⷭ҇льнаѧ ні́но, просвѣти́тельнице грꙋ́зїи.

І҆́косъ а҃

А҆́гг҃ла ди́вна страны̀ і҆́верскїѧ ꙗ҆вѝ тѧ̀ всеѧ̀ тва́ри созда́тель, ѡ҆брати́ти наро́ды землѝ сеѧ̀, сѣдѧ́щыѧ во тмѣ̀ и҆ сѣ́ни сме́ртнѣй, ѿ пре́лести і҆́дѡльскїѧ и҆ призва́ти и҆́хъ во ꙗ҆зы́къ свѧ́тъ, въ лю́ди ѡ҆бновле́нїѧ. тѣ́мже мы̀, благодарѧ́ще бг҃а, прославлѧ́емъ тѧ̀ ꙗ҆́кѡ просвѣти́тельницꙋ и҆ моли́твенницꙋ на́шꙋ и҆ прилѣ́жнѡ зове́мъ тѝ:

Ра́дꙋйсѧ, пречꙋ́днаѧ и҆збра́ннице бжⷭ҇твеннагѡ про́мысла: ра́дꙋйсѧ, ди́внѡ процвѣ́тшаѧ розго̀ бл҃гочести́вагѡ ко́рене.

Ра́дꙋйсѧ, сосꙋ́де бл҃года́ти преизрѧ́дный: ра́дꙋйсѧ, вмѣсти́лище бл҃года́тныѧ си́лы.

Ра́дꙋйсѧ, прест҃ы́ѧ дв҃ы бцⷣы вѣ́рнаѧ посла́ннице: ра́дꙋйсѧ, прехва́льнаѧ а҆пⷭ҇лѡмъ подража́тельнице.

Ра́дꙋйсѧ, во благовѣ́стїи первозва́нномꙋ а҆ндре́ю поревнова́вшаѧ: ра́дꙋйсѧ, є҆́юже лжа̀ і҆́дѡльскаѧ попра́на бы́сть.

Ра́дꙋйсѧ, є҆́юже ст҃а́ѧ вѣ́ра насади́сѧ: ра́дꙋйсѧ, є҆́юже на́мъ земны̑мъ пꙋ́ть къ нб҃сє́мъ показꙋ́етсѧ.

Ра́дꙋйсѧ, ст҃а́ѧ, равноапⷭ҇льнаѧ ні́но, просвѣти́тельнице грꙋ́зїи.

Конда́къ в҃

Ви́дѧще и҆сполне́нїе бжⷭ҇твеннагѡ ѡ҆ лю́дехъ смотрѣ́нїѧ ѻ҆ц҃а̀ нбⷭ҇нагѡ, є҆диноро́днагѡ є҆гѡ̀ сн҃а и҆ ст҃а́гѡ дх҃а, воздви́гшагѡ прⷪ҇ро́ки и҆ а҆пⷭ҇лы ко сп҃си́тельномꙋ слꙋже́нїю, и҆ на́шегѡ ра́ди ѡ҆браще́нїѧ къ свѣ́тꙋ є҆ѵⷢ҇льскїѧ и҆́стины и҆збра́вшагѡ ст҃ꙋ́ю равноапⷭ҇льнꙋю ні́нꙋ, вопїе́мъ къ бг҃ꙋ: А҆ллилꙋ́їа.

І҆́косъ в҃

Ра́зꙋмъ бжⷭ҇твенный возжелѣ́вши ᲂу҆разꙋмѣ́ти ст҃а́ѧ ні́на, не є҆ди́ножды и҆спы́товаше ѿ наста́вницы своеѧ̀ нїанфо́ры, ꙗ҆́же и҆звѣ́стна бы́ша ѡ҆ гдⷭ҇ѣ сп҃си́телѣ на́шемъ и҆ є҆гѡ̀ ст҃ѣ́мъ хїтѡ́нѣ, наꙋче́ннаѧ же ѿ неѧ̀ и҆́стинными позна̑нїи, восхотѣ̀ поклони́тисѧ вседраго́мꙋ хїтѡ́нꙋ и҆ мѣ́стꙋ по́двигѡвъ ст҃ы́хъ а҆пⷭ҇тѡлъ. мы́ же, благоговѣ́нїѧ къ жи́зни ст҃ы́ѧ ні́ны и҆спо́лненнїи, прославлѧ́емъ ю҆̀ си́це:

Ра́дꙋйсѧ, и҆́стины црⷭ҇твїѧ бж҃їѧ ᲂу҆разꙋмѣ́ти и҆мꙋ́щаѧ: ра́дꙋйсѧ, ѿ ю҆́ности хрⷭ҇та̀ возлюби́вшаѧ.

Ра́дꙋйсѧ, ѿ мла́дости ма́терїю свое́ю сꙋса́нною бл҃гоче́стїю наꙋче́ннаѧ: ра́дꙋйсѧ, ѻ҆тца̀ своегѡ̀ завꙋлѡ́на ᲂу҆тѣше́нїе.

Ра́дꙋйсѧ, ст҃и́телемъ їꙋвена́лїемъ въ стра́сѣ бж҃їи ᲂу҆пасе́ннаѧ: ра́дꙋйсѧ, бж҃їимъ словесє́мъ ѡ҆бꙋче́ннаѧ.

Ра́дꙋйсѧ, во ст҃ѣ́мъ гра́дѣ і҆ерⷭ҇ли́ме возраще́ннаѧ: ра́дꙋйсѧ, тече́нїемъ свои́мъ къ сла́вѣ бж҃їей во мла́дости првⷣныхъ ᲂу҆диви́вшаѧ.

Ра́дꙋйсѧ, земны́мъ бла́гѡмъ нбⷭ҇наѧ предпоче́тшаѧ.

Ра́дꙋйсѧ, ст҃а́ѧ, равноапⷭ҇льнаѧ ні́но, просвѣти́тельнице грꙋ́зїи.

Конда́къ г҃

Си́ла вы́шнѧгѡ воздви́гши тѧ̀, ст҃а́ѧ ні́но, любо́вїю бл҃гоче́стїѧ, жела́нїемъ поклони́тисѧ хїтѡ́нꙋ гдⷭ҇ню и҆ ре́вностїю а҆пⷭ҇льскою, поста́ви тѧ̀ ꙗ҆́кѡ свѣти́льникъ лꙋчеза́ренъ, да прїе́млющїи ѿ тебє̀ свѣ́тъ бг҃оразꙋ́мїѧ взыва́ютъ къ бг҃ꙋ: А҆ллилꙋ́їа.

І҆́косъ г҃

И҆мꙋ́щи ст҃а́ѧ ні́на непоколеби́мꙋю ре́вность ко бл҃гоꙋгожде́нїю гдⷭ҇еви, возгара́шесѧ жела́нїемъ прїитѝ во странꙋ̀ і҆́верскꙋю и҆ поклони́тисѧ та́мѡ сокровє́ннымъ ст҃ы́нѧмъ. мы́ же, ви́дѧще въ не́й таково́е ст҃о́е ревнова́нїе, возопїи́мъ къ не́й:

Ра́дꙋйсѧ, и҆змла́да сꙋетꙋ̀ мі́ра презрѣ́вшаѧ: ра́дꙋйсѧ, и҆́стиннꙋю мꙋ́дрость возлюби́вшаѧ.

Ра́дꙋйсѧ, вѣ́рное сокро́вище бг҃омꙋ́дрїѧ въ бжⷭ҇твеннѣмъ ᲂу҆че́нїи ѡ҆брѣ́тшаѧ: ра́дꙋйсѧ, возлюби́вшихъ сꙋетꙋ̀ мі́ра добродѣ́тельнымъ житїе́мъ превозше́дшаѧ.

Ра́дꙋйсѧ, на непоколеби́мѣмъ ка́мени за́повѣдей хрⷭ҇то́выхъ ᲂу҆тверди́вшаѧсѧ: ра́дꙋйсѧ, пре́данностїю во́лѣ бж҃їей а҆́гг҃лы и҆ человѣ́ки ᲂу҆диви́вшаѧ.

Ра́дꙋйсѧ, посто́мъ и҆ мл҃твою пло́ть свою̀ дꙋ́хови покори́вшаѧ: ра́дꙋйсѧ, любо́вїю свое́ю ко хра́мꙋ бж҃їю томꙋ́жде мнѡ́ги наꙋчи́вшаѧ.

Ра́дꙋйсѧ, добро́тою нра́ва къ слꙋже́нїю а҆пⷭ҇льства ᲂу҆гото́вившаѧсѧ: ра́дꙋйсѧ, чрез̾ добродѣ́тельное житїѐ своѐ сосꙋ́домъ дх҃а ст҃а́гѡ содѣ́лавшаѧсѧ.

Ра́дꙋйсѧ, ст҃а́ѧ, равноапⷭ҇льнаѧ ні́но, просвѣти́тельнице грꙋ́зїи.

Конда́къ д҃

Бꙋ́рею жите́йскихъ страсте́й смꙋща́еми, недоꙋмѣ́емъ, ка́кѡ досто́йнѡ воспѣва́ти твоѐ ди́вное мꙋ́жество, ст҃а́ѧ бг҃оизбра́ннаѧ ні́но, не ᲂу҆страши́ла бо сѧ є҆сѝ и҆спо́лнити хотѣ́нїе своѐ, є҆́же ше́ствовати ѡ҆ и҆́мени хрⷭ҇то́вѣ во ꙗ҆зы́ческїй гра́дъ ри́мъ. пречⷭ҇таѧ же мт҃рь гдⷭ҇а на́шегѡ бл҃гоизво́ли да́ти тѝ честны́ма рꙋка́ма свои́ма ст҃ы́й крⷭ҇тъ и҆ призва́ти тѧ̀ ко бл҃говѣ́стїю спⷭ҇нїѧ во странѣ̀ і҆́верстѣй всѣ̑мъ хотѧ́щымъ взыва́ти бг҃ꙋ: А҆ллилꙋ́їа.

І҆́косъ д҃

Слы́шавъ ст҃и́тель гра́да гдⷭ҇нѧ і҆ꙋвена́лїй, ꙗ҆́кѡ прест҃а́ѧ бцⷣа призва̀ тѧ̀ проповѣ́дати сло́во бж҃їе во жре́бїи є҆ѧ̀, во странѣ̀ і҆́верстѣй, и҆ дарова́ тѝ въ видѣ́нїи крⷭ҇тъ, є҆го́же ты̀ ѡ҆бвила̀ є҆сѝ власы̀ свои́ми, нача̀ сла́вити бг҃а, сп҃са́ющагѡ человѣ́ки, и҆ зва́ти тебѣ̀ си́це:

Ра́дꙋйсѧ, блгⷣтїю бж҃їею приѡсѣне́ннаѧ: ра́дꙋйсѧ, смире́нїемъ дх҃а дерзнове́нїе ко гдⷭ҇ꙋ і҆и҃сꙋ и҆ пречⷭ҇тѣй є҆гѡ̀ мт҃ри приѡбрѣ́тшаѧ.

Ра́дꙋйсѧ, ѡ҆бра́дованнаѧ ꙗ҆вле́нїемъ бг҃омт҃ре: ра́дꙋйсѧ, пресла̑дкаѧ словеса̀ ѿ бж҃їѧ мт҃ре слы́шавшаѧ.

Ра́дꙋйсѧ, съ не́ю ꙗ҆́кѡ со дрꙋги́нею бесѣ́довавшаѧ: ра́дꙋйсѧ, бл҃гоговѣ́йнѡ і҆ерⷭ҇ли́мскою бра́тїею почте́ннаѧ.

Ра́дꙋйсѧ, ᲂу҆гото́ванїе ко просвѣще́нїю на́шемꙋ незаходи́мымъ свѣ́томъ: ра́дꙋйсѧ, свѣщѐ, бг҃омъ возжжє́ннаѧ, во є҆́же разгони́ти мра́къ нече́стїѧ.

Ра́дꙋйсѧ, честны́й крⷭ҇тъ зало́гъ твоегѡ̀ преꙋспѣ́ѧнїѧ во благовѣ́стїи прїи́мшаѧ.

Ра́дꙋйсѧ, ст҃а́ѧ, равноапⷭ҇льнаѧ ні́но, просвѣти́тельнице грꙋ́зїи.

Конда́къ є҃

Бг҃оте́чною ѕвѣздо́ю ꙗ҆ви́сѧ, ст҃а́ѧ ні́но, возсїѧ́вши на́мъ и҆зволе́нїемъ прест҃ы́ѧ влⷣчцы на́шеѧ бцⷣы и҆ просвѣти́вши на́съ благовѣ́стїемъ сло́ва бж҃їѧ. сїю̀ нбⷭ҇нꙋю пꙋтево́дницꙋ, сїѧ́ющꙋю сла́вою по́двигѡвъ бл҃гоче́стїѧ и҆ ᲂу҆тѣша́ющꙋю вы́нꙋ свое́ю по́мощїю всѣ́хъ на́съ, притека́ющихъ къ не́й съ мольба́ми, ᲂу҆блажа́юще, наипа́че восхва́лимъ бг҃а, ꙗ҆ви́вшаго ст҃ꙋ́ю ні́нꙋ хода́таицею ѡ҆ на́съ, и҆ возопїи́мъ є҆мꙋ̀: А҆ллилꙋ́їа.

І҆́косъ є҃

Ви́дѣвшѧ хрⷭ҇тѡ́вы невѣ̑сты, ꙗ҆̀же со ст҃о́ю ні́ною и҆ рїѱїмі́ею посто́мъ и҆ моли́твою сп҃са́хꙋсѧ, нечести̑ваѧ помышлє́нїѧ беззако́нновавшагѡ дїоклитїа́на, хотѧ́щагѡ рїѱїмі́ю поѧ́ти въ женꙋ̀ себѣ̀ и҆ і҆дѡлослꙋже́нїю наꙋчи́ти, всѧ̑ кꙋ́пнѡ бѣжа́ша та́йнѡ и҆з̾ і҆́дѡльнагѡ гра́да ри́ма во странꙋ̀ а҆рме́нскꙋю: та́можде пре́даны бѧ́хꙋ сме́рти повеле́нїемъ ꙗ҆зы́чествовавшагѡ царѧ̀ Тїрїда́та. ст҃ꙋ́ю же ні́нꙋ гдⷭ҇ь ѿ сѣте́й дїоклитїа́на и҆ тїрїда́та спасѐ и҆ приведѐ ю҆̀ благовѣ́стїѧ ра́ди сло́ва є҆ѵⷢ҇льскагѡ во і҆ве́рїю. тѣ́мже и҆ мы̀, ра́дꙋющесѧ семꙋ̀ промышле́нїю бж҃їю ѡ҆ спасе́нїи люді́й, восхвалѧ́емъ бж҃їю посла́нницꙋ, ст҃ꙋ́ю ні́нꙋ, зовꙋ́ще:

Ра́дꙋйсѧ, пребыва́нїемъ свои́мъ въ ри́мѣ пꙋ́ть благовѣ́стїѧ себѣ̀ ᲂу҆ѧсни́вшаѧ: ра́дꙋйсѧ, несокрꙋши́мостїю дꙋ́ха и҆ ди́внымъ мꙋ́жествомъ въ слꙋже́нїи сло́ва бж҃їѧ просла́вившаѧсѧ.

Ра́дꙋйсѧ, трꙋ́дный пꙋ́ть во і҆ве́рїю безро́потнѡ во сла́вꙋ бж҃їю проше́дшаѧ: ра́дꙋйсѧ, блгⷣтїю бж҃їею ѿ рꙋкѝ дїоклитїа́на и҆ тїрїда́та и҆зба́вленнаѧ.

Ра́дꙋйсѧ, сꙋ́щыѧ ᲂу҆ го́ръ трїале́тских гла́сомъ смире́нїѧ ѡ҆гласи́вшаѧ: ра́дꙋйсѧ, ѡ҆́бразомъ кро́тости ми́ръ въ дꙋша́хъ ᲂу҆тверди́вшаѧ.

Ра́дꙋйсѧ, воне́ю благоꙋха́нїѧ слове́съ хрⷭ҇то́выхъ мнѡ́гїѧ ѡ҆благоꙋха́вшаѧ: ра́дꙋйсѧ, ᲂу҆твержде́нїе на́ше на пꙋтѝ сп҃се́нїѧ.

Ра́дꙋйсѧ, ꙗ҆́кѡ тобо́ю сподоблѧ́емсѧ бла̑гъ вѣ́чныхъ.

Ра́дꙋйсѧ, ст҃а́ѧ равноапⷭ҇льнаѧ ні́но, просвѣти́тельнице грꙋ́зїи.

Конда́къ ѕ҃

Проповѣ́дница ве́лїѧ показа́сѧ ст҃а́ѧ ні́на, трꙋда́ми бо и҆ болѣ́зньми є҆ѧ̀ во і҆ве́рїи цр҃ковь хрⷭ҇то́ва насади́сѧ, мра́къ невѣ́дѣнїѧ ѿгна́сѧ, свѣ́тъ и҆́стины ꙗ҆ви́сѧ, на́мъ же, и҆зба́влєннымъ ст҃о́ю ні́ною ѿ тмы̀ і҆дѡлослꙋже́нїѧ, досто́йнѡ є҆́сть взыва́ти ко гдⷭ҇ꙋ: А҆ллилꙋ́їа.

І҆́косъ ѕ҃

Возсїѧ̀ странѣ̀ і҆́верстѣй просвѣще́нїе и҆́стины, є҆гда̀ ст҃а́ѧ ні́на ѡ҆гласѝ благовѣ́стїемъ гра́дъ ᲂу҆рбни́си, ѿню́дꙋже мно́зи хожда́хꙋ во грꙋзи́нскїй сто́льный гра́дъ мцхе́тъ кла́нѧтисѧ лжи́вымъ богѡ́мъ ѻ҆рмꙋ́здꙋ и҆ за́денꙋ: си́хъ і҆́дѡлѡвъ ст҃а́ѧ ні́на мл҃твами свои́ми сокрꙋшѝ и҆ низпрове́рже. тѣ́мже и҆ мы̀ ꙗ҆́кѡ побѣди́тельницꙋ де́мѡнѡвъ восхва́лимъ ю҆̀ си́це:

Ра́дꙋйсѧ, всемогꙋ́щꙋю си́лꙋ и҆́стиннагѡ бг҃а во странѣ̀ і҆́верстѣй пе́рвѣе показа́вшаѧ: ра́дꙋйсѧ, си́лою всевы́шнѧгѡ і҆́дѡла ѻрмꙋ́зда порази́вшаѧ.

Ра́дꙋйсѧ, го́рдость є҆гѡ̀ мольба́ми свои́ми посрами́вшаѧ: ра́дꙋйсѧ, ѡ҆ста́нками є҆гѡ̀ безси́лїе ѕла́гѡ дꙋ́ха ѿкры́вшаѧ.

Ра́дꙋйсѧ, де́мѡна за́дена и҆ є҆гѡ̀ а҆́ггелѡвъ попра́вшаѧ: ра́дꙋйсѧ, власти́телей тмы̀ ѿгна́вшаѧ.

Ра́дꙋйсѧ, безси́льное ца́рство и҆́хъ разрꙋши́вшаѧ: ра́дꙋйсѧ, бѣсо́вскїй пла́мень нече́стїѧ ᲂу҆гаси́вшаѧ.

Ра́дꙋйсѧ, бꙋ́рнымъ дыха́нїемъ и҆ ѻ҆гне́мъ нбⷭ҇нымъ слꙋже́нїе і҆́дѡлѡмъ низпрове́ргшаѧ: ра́дꙋйсѧ, ре́вностїю свое́ю и҆́мѧ и҆́стиннагѡ бг҃а во і҆ве́рїи просла́вившаѧ.

Ра́дꙋйсѧ, сыновѡ́мъ тмы̀ свѣ́тъ є҆ѵⷢ҇льский показа́вшаѧ.

Ра́дꙋйсѧ, ст҃а́ѧ, равноапⷭ҇льнаѧ ні́но, просвѣти́тельнице грꙋ́зїи.

Конда́къ з҃

Хотѧ̀ ца́рь Мирїа́нъ со слꙋги̑ свои́ми ᲂу҆разꙋмѣ́ти си́лꙋ и҆́стиннагѡ бг҃а, сокрꙋши́вшагѡ безси̑льныѧ і҆́дѡлы и҆́хъ, съ недоꙋмѣ́нїемъ глаго́лаше: что̀ ᲂу҆̀бо сїѐ бы́сть, ꙗ҆́кѡ бо́зи на́ши падо́ша; до́мъ же вертогра́дарѧ царе́ва со а҆вїаѳа́ромъ, і҆ере́емъ і҆ꙋде́йскимъ, дще́рїю є҆гѡ̀ сїдѡ́нїею и҆ и҆ны́ми дѣ́вами, благоговѣ́йнѡ приѧ́вшими благовѣ́стїе ст҃ы́ѧ ні́ны, позна́вше гдⷭ҇а хрⷭ҇та̀, возопи́ша къ бг҃ꙋ: А҆ллилꙋ́їа.

І҆́косъ з҃

Но́ваѧ жи́знь даде́сѧ сыновѡ́мъ і҆ве́рїи прїѧ́тїемъ ѿ ні́ны сло́ва и҆́стины, вси́ бо ѿ неѧ̀ крести́шасѧ ба́нею водно́ю во ѡ҆чище́нїе своѐ ѿ грѣхѡ́въ и҆ ѡ҆свѧще́нїе и҆ досто́йни содѣ́лашасѧ прїима́ти ѿ бг҃а и҆сцѣлє́нїѧ мольба́ми сеѧ̀ предста́тельницы: ца́рь мирїа́нъ, блгⷣтїю бж҃їею прозрѣ́въ ѿ слѣпоты̀, и҆́стиннагѡ бг҃а ᲂу҆разꙋмѣ̀ и҆ хрⷭ҇та̀ и҆сповѣ́да: цари́ца на́на возста̀ ѿ ѻ҆дра̀ болѣ́зни, ѻ҆́трокъ же и҆́хъ ѿ дꙋ́ха ѕла́гѡ свободи́сѧ, и҆ всѝ въ кꙋпѣ́ли пакибытїѧ̀ возроди́шасѧ. сегѡ̀ ра́ди всѝ наро́ди, ви́дѧще такѡва́ѧ, по до́лгꙋ прославлѧ́ютъ па́мѧть ст҃ы́ѧ ні́ны, воспѣва́юще є҆́й си́це:

Ра́дꙋйсѧ, невѣ́рїе царѧ̀ мирїа́на въ вѣ́рꙋ ѡ҆брати́вшаѧ: ра́дꙋйсѧ, вѣ́рное тогѡ̀ и҆сповѣда́нїе прїе́мшаѧ.

Ра́дꙋйсѧ, томꙋ́жде ѿ слѣпоты̀ и҆сцѣле́нїе пода́вшаѧ: ра́дꙋйсѧ, і҆́дѡлѡмъ поклоне́нїе ᲂу҆гаси́вшаѧ.

Ра́дꙋйсѧ, свобожде́нїе ѿ ꙗ҆зы́ческихъ заблꙋжде́нїй: ра́дꙋйсѧ, ѡ҆чище́нїе нра́вѡвъ.

Ра́дꙋйсѧ, и҆збавле́нїе ѿ и҆скꙋше́нїй: ра́дꙋйсѧ, дарова́нїе благодѣѧ́нїй тре́бꙋющымъ.

Ра́дꙋйсѧ, ст҃а́ѧ, равноапⷭ҇льнаѧ ні́но, просвѣти́тельнице грꙋ́зїи.

Конда́къ и҃

Стра́нное чꙋ́до показа́сѧ на́мъ ѿ бг҃а, ꙗ҆́кѡ то́й, по бл҃госе́рдїю своемꙋ̀, странꙋ̀ і҆ве́рїю содѣ́ла жре́бїемъ бг҃омт҃ре, и҆ въ зна́менїе своегѡ̀ бл҃говоле́нїѧ ѡ҆бита́ющымъ въ не́й, ѿ пе́рвыхъ же дні́й благовѣствова́нїѧ ѡ҆ сп҃се́нїи люді́й посла̀ честны́й хїтѡ́нъ гдⷭ҇а хрⷭ҇та̀ и҆ над̾ хїтѡ́номъ водрꙋзѝ живоно́сный сто́лпъ, ѿ негѡ́же и҆ подне́сь вѣ́рꙋющїи полꙋча́ютъ и҆сцѣлє́нїѧ: є҆щѐ же и҆ ꙗ҆вѝ въ не́й ди́внꙋю и҆ пресла́внꙋю бл҃говѣ́стницꙋ ст҃ꙋ́ю ні́нꙋ, и҆ кре́стъ со драги́ми є҆ѧ̀ власы̀ ко ᲂу҆твержде́нїю ст҃ы́ѧ своеѧ̀ вѣ́ры дарова́. сицєва́ѧ ᲂу҆тѣшє́нїѧ и҆мꙋ́ще, мы̀, земноро́днїи, вознесе́мъ ᲂу҆мы̀ и҆ сердца̀ своѧ̑ къ го́рнемꙋ црⷭ҇твїю и҆ просла́вимъ бл҃годѣ́ющаго на́мъ бг҃а, взыва́юще къ немꙋ̀ немо́лчнѡ: А҆ллилꙋ́їа.

І҆́косъ и҃

Всѧ̑ ѡ҆б̾ѧ́та была̀ є҆сѝ ты̀, ст҃а́ѧ ні́но, мы́слїю ѡ҆ го́рнѣмъ и҆ сегѡ̀ ра́ди призвала̀ є҆сѝ до́льнихъ, не вѣ́дꙋщихъ сп҃си́телѧ всѣ́хъ гдⷭ҇а і҆и҃са хрⷭ҇та̀, ко ѻ҆бще́нїю со наслѣ́дники нбⷭ҇нагѡ црⷭ҇твїѧ, да и҆ ті́и ᲂу҆вѣ́дѧтъ вели́чїе сла́вы є҆ди́нагѡ и҆́стиннагѡ па́стырѧ нб҃сѐ и҆ землѝ и҆ просла́вѧтъ є҆гѡ̀ кꙋ́пнѡ съ го́рними жи́тельми є҆ди́нѣми ᲂу҆сты̑ и҆ є҆ди́нѣмъ се́рдцемъ. тѣ́мже и҆ мы̀, взира́юще на ре́вность твою̀ ѡ҆ сп҃се́нїи на́шемъ, со ᲂу҆миле́нїемъ зове́мъ тѝ такѡва́ѧ:

Ра́дꙋйсѧ, ѿверзе́нїе две́рїй креще́нїѧ: ра́дꙋйсѧ, на́ше къ нб҃сє́мъ приведе́нїе.

Ра́дꙋйсѧ, ст҃ы́мъ креще́нїемъ грꙋ́зїи ве́лїею ра́достїю ст҃ы̑ѧ а҆́гг҃лы и҆спо́лнившаѧ: ра́дꙋйсѧ, царѧ̀ мирїа́на къ созида́нїю рꙋкотворе́ннагѡ хра́ма бг҃ꙋ и҆́стинномꙋ подви́гшаѧ.

Ра́дꙋйсѧ, честны́й кре́стъ ѿ ро́ждїй ло́зныхъ въ не́мъ водрꙋзи́вшаѧ: ра́дꙋйсѧ, зало́гъ сѣ́й любвѐ своеѧ̀ ко хрⷭ҇тꙋ̀ всѣ̑мъ ча́дѡмъ ст҃ы́ѧ цр҃кве ѡ҆ста́вившаѧ.

Ра́дꙋйсѧ, съ со́нмомъ подви́жницъ свои́хъ ко ст҃о́мꙋ креще́нїю всѣ́хъ призва́вшаѧ: ра́дꙋйсѧ, сынѡ́въ і҆ве́рїи ѿ кꙋпѣ́ли воспрїѧ́вшаѧ.

Ра́дꙋйсѧ, мнѡ́ги въ ра́зꙋмѣ просвѣти́вшаѧ.

Ра́дꙋйсѧ, ст҃а́ѧ, равноапⷭ҇льнаѧ ні́но, просвѣти́тельнице грꙋ́зїи.

Конда́къ ѳ҃

Всѧ́кое є҆стество̀ нбⷭ҇ныхъ си́лъ ра́довашесѧ, є҆гда̀ креща́хꙋсѧ сы́ны і҆ве́рїи: є҆ди́нъ бо ѿ небожи́телей во ѡ҆́бразѣ ди́внагѡ человѣ́ка ꙗ҆ви́сѧ и҆ ᲂу҆твердѝ чꙋдотво́рный сто́лпъ над̾ ри́зою гдⷭ҇нею, наꙋча́ѧ всѣ́хъ со ст҃о́ю ні́ною воспѣва́ти бг҃ꙋ: А҆ллилꙋ́їа.

І҆́косъ ѳ҃

Вѣті̑и многовѣща́ннїи ѧзы̑ки свои́ми не возмо́гꙋтъ и҆зрещѝ тебѣ̀ достѡ́йныѧ хвалы̑, равноапⷭ҇льнаѧ ні́но: сла́вы бо ра́ди бж҃їѧ и҆ сп҃се́нїѧ бли́жнихъ протекла̀ є҆сѝ ѿ мцхе́та картали́нскїѧ и҆ кахети́нскїѧ землѝ, и҆дѣ́же всѧ̑ племена̀ дѡ́лъ и҆ высо́тъ, ѿ тебє̀ слы́шавша словеса̀ бж҃їѧ, прїѧ́ша сп҃се́нїе. мы́ же, и҆спо́лненнїи ра́дости и҆ благодаре́нїѧ за толи́кꙋю любо́вь къ на́мъ, ѿ всегѡ̀ се́рдца взыва́емъ тѝ си́це:

Ра́дꙋйсѧ, ѡ҆блече́нїе на́ше багрѧни́цею креще́нїѧ: ра́дꙋйсѧ, пото́че сла́дости, напои́вый на́съ водо́ю бл҃гоче́стїѧ.

Ра́дꙋйсѧ, преди́внаѧ побо́рнице вѣ́ры хрⷭ҇то́вы: ра́дꙋйсѧ, насажде́нїе на землѝ раѧ̀ нбⷭ҇нагѡ.

Ра́дꙋйсѧ, свобожде́нїе на́ше ѿ ра́бства грѣхо́внагѡ: ра́дꙋйсѧ, сокрꙋше́нїе сѣте́й вра́жїихъ.

Ра́дꙋйсѧ, посѣче́нїе ѕлоче́стїѧ: ра́дꙋйсѧ, сла́внаѧ побѣ́до над̾ невѣ́рїемъ.

Ра́дꙋйсѧ, потребле́нїе ѕлы́хъ ѻ҆бы́чаєвъ и҆ сꙋевѣ́рїй: ра́дꙋйсѧ, сладкозвꙋ́чнаѧ свирѣ́ль вѣ́ры.

Ра́дꙋйсѧ, ст҃а́ѧ, равноапⷭ҇льнаѧ ні́но, просвѣти́тельнице грꙋ́зїи.

Конда́къ і҃

Сп҃стѝ хотѧ́щи ѿ вѣ́чныѧ поги́бели дꙋ́шꙋ свою̀ и҆ бли́жнихъ, равноапⷭ҇льнаѧ ні́но, ты̀ ре́вностїю поревнова́ла є҆сѝ ѡ҆ сла́вѣ бж҃їей и҆ под̾ѧ́ла є҆сѝ многотрꙋ́дный по́двигъ а҆пⷭ҇льскїй, тѣ́мже ᲂу҆̀бо и҆ вѣнце́мъ а҆пⷭ҇льскимъ ᲂу҆краси́ласѧ є҆сѝ ѿ гдⷭ҇а на нб҃сѣ́хъ, и҆дѣ́же со всѣ́ми ст҃ы́ми предстоѧ́щи, съ мольбо́ю ѡ҆ на́съ воспѣва́еши є҆мꙋ̀: А҆ллилꙋ́їа. І҆́косъ і҃.

І҆́косъ і҃

Стѣ́нꙋ нерꙋши́мꙋю воздви́же тѧ̀ гдⷭ҇ь, ст҃а́ѧ ні́но, и҆ показа̀ ѡ҆гражде́нїемъ на́шимъ ѿ всѧ́кихъ бѣ́дъ и҆ и҆сто́чникомъ и҆сцѣле́нїй нетлѣ́нное твоѐ тѣ́ло во странѣ̀ кѷзїкі́йстѣй, въ ве́си бо́дбе, и҆дѣ́же просвѣти́ла є҆сѝ ты̀ цари́цꙋ софі́ю и҆ наро́дъ є҆ѧ̀, да всѝ, предста́тельствомъ твои́мъ прїе́млюще ѿ бг҃а ми́лѡсти, воззове́мъ тѝ си́це:

Ра́дꙋйсѧ, стѣно̀ и҆ покро́ве, не кры́ющїйсѧ ѿ на́шегѡ притека́нїѧ: ра́дꙋйсѧ, гото́ваѧ по́моще и҆́щꙋщымъ сп҃се́нїѧ и҆ и҆́стиннагѡ просвѣще́нїѧ.

Ра́дꙋйсѧ, неѡскꙋдѣва́емый и҆сто́чниче бл҃гослове́нїй и҆ ми́лостей бж҃їихъ къ почита́ющымъ тѧ̀: ра́дꙋйсѧ, защи́тнице на́ша ѿ поги́бели и҆ напа́стей.

Ра́дꙋйсѧ, благочести̑вымъ прави́телємъ на́шимъ вѣ́рное поможе́нїе: ра́дꙋйсѧ, подчинє́ннымъ и҆̀мъ лю́демъ наде́ждо и҆ ᲂу҆строе́нїе тишины̀ и҆ благоде́нствїѧ.

Ра́дꙋйсѧ, и҆́стинное ᲂу҆мире́нїе мѧтꙋ́щейсѧ пло́ти: ра́дꙋйсѧ, ра́дованїе дꙋ́шъ на́шихъ.

Ра́дꙋйсѧ, ст҃а́ѧ, равноапⷭ҇льнаѧ ні́но, просвѣти́тельнице грꙋ́зїи.

Конда́къ а҃і

Пѣ́нїе всеꙋмиле́нное принесла̀ є҆сѝ прест҃ѣ́й трⷪ҇цѣ, ст҃а́ѧ ні́но, ᲂу҆мо́мъ и҆ дѣ́ломъ до конца̀ своеѧ̀ жи́зни трїеди́наго бг҃а возлюби́вши. прїими́ же ѿ прославлѧ́ющихъ тѧ̀ ᲂу҆миле́нное пѣ́нїе и҆ не пре́зри гла́са на́шегѡ, къ тебѣ́ бо въ напа́стѣхъ и҆ ско́рбехъ прибѣга́емъ по пребл҃гослове́ннѣй бг҃ома́тери и҆, на твоѐ предста́тельство ᲂу҆пова́юще, зове́мъ бг҃ꙋ: А҆ллилꙋ́їа.

І҆́косъ а҃і

Свѣтопрїе́мнаѧ свѣща̀, ст҃а́ѧ ні́но, свѣ́тъ во тмѣ̀ ꙗ҆́вльшаѧ, є҆гда̀ преселѧ́шесѧ ѿ землѝ на нб҃о, собра̀ вѣ̑рныѧ ча̑да своѧ̑ ѿ кꙋпѣ́ли, ꙗ҆́кѡ ѻ҆́трасли новосажде́нїѧ, и҆ ѿ ни́хъ нѣ̑кїѧ недꙋ́жныѧ и҆сцѣлѝ, и҆ предадѐ бг҃ꙋ непоро́чный дꙋ́хъ сво́й. ви́дѧще же бл҃же́ннꙋю є҆ѧ̀ кончи́нꙋ, ца́рь мирїа́нъ и҆ бли́жнїи є҆гѡ̀ го́рько пла́кахꙋ и҆, со слеза́ми ѿхѡ́дныѧ пѣ̑сни пою́ще, взыва́хꙋ къ не́й такѡва́ѧ:

Ра́дꙋйсѧ, нбⷭ҇ный а҆́гг҃ле, во ѡ҆́бразѣ земна́гѡ человѣ́ка ꙗ҆ви́выйсѧ: ра́дꙋйсѧ, невѣ́сто хрⷭ҇то́ва, ᲂу҆неве́стившаѧ нбⷭ҇номꙋ женихꙋ̀ цр҃ковь і҆вері́йскꙋю.

Ра́дꙋйсѧ, блага́ѧ просвѣти́тельнице на́ша, въ по́двизѣхъ дневны́хъ и҆ нощны́хъ тече́нїе соверши́вшаѧ: ра́дꙋйсѧ, неꙋста́ннаѧ корми́тельнице, пи́щею бжⷭ҇твенныхъ слове́съ на́съ пита́вшаѧ.

Ра́дꙋйсѧ, непоро́чнаѧ голꙋби́це, возлета́ющаѧ ѿ землѝ въ нбⷭ҇ныѧ ѡ҆би́тєли: ра́дꙋйсѧ, ꙗ҆́кѡ тѣ́ло твоѐ въ нетлѣ́нїе ѡ҆блече́сѧ.

Ра́дꙋйсѧ, ꙗ҆́кѡ ст҃ы́ѧ мо́щи твоѧ̑ бл҃гоꙋха́нїѧ и҆спо́лнишасѧ: ра́дꙋйсѧ, ꙗ҆́кѡ тѣ́хъ бл҃гоꙋха́нїемъ мы̀, ча̑да твоѧ̑, ны́нѣ наслажда́емсѧ.

Ра́дꙋйсѧ, ст҃а́ѧ, равноапⷭ҇льнаѧ ні́но, просвѣти́тельнице грꙋ́зїи.

Конда́къ в҃і

Блгⷣть, да́ннꙋю тѝ ѿ бг҃а, вѣ́дꙋще, по до́лгꙋ пра́зднꙋемъ всечестнꙋ́ю па́мѧть твою̀, ст҃а́ѧ равноапⷭ҇льнаѧ ні́но, и҆ со ᲂу҆миле́нїемъ се́рдца притека́юще ко ѡ҆́бразꙋ твоемꙋ̀, честны́мъ кресто́мъ ᲂу҆краше́нномꙋ, вседꙋ́шнѡ про́симъ: сохранѝ на́съ въ жи́зни се́й въ вѣ́рѣ правосла́внѣй и҆ во всѧ́комъ бл҃гоче́стїи и҆ чистотѣ̀, да и҆ въ сме́ртнѣмъ ᲂу҆спе́нїи на́шемъ ѡ҆брѧ́щемсѧ досто́йни воспѣва́ти бг҃ꙋ: А҆ллилꙋ́їа.

І҆́косъ в҃і

Пою́ще твоѐ къ бг҃ꙋ ѿше́ствїе, всехва́льнаѧ ні́но, почита́емъ тво́й по́двигъ а҆по́стольства, велича́емъ ре́вность по бз҃ѣ, хва́лимъ долготерпѣ́нїе, сла́вимъ смире́нїе и҆ ᲂу҆блажа́емъ кончи́нꙋ твою̀, чꙋдесы̀ бо мно́гими по ѿше́ствїи твое́мъ ди́внѡ просла́виласѧ є҆сѝ; ѡ҆ ни́хже дивѧ́щесѧ, вопїе́мъ тѝ си́це:

Ра́дꙋйсѧ, въ сожи́тельство а҆́гг҃льскихъ чинѡ́въ и҆ ст҃ы́хъ любе́знѣ прїѧ́таѧ: ра́дꙋйсѧ, собо́рꙋ а҆пⷭ҇льскомꙋ сопричте́ннаѧ.

Ра́дꙋйсѧ, съ ли́ки и҆збра́нныхъ бж҃їихъ въ черто́гъ нбⷭ҇ный все́льшаѧсѧ: ра́дꙋйсѧ, злата́ѧ кади́льнице, ѳѷмїа́мъ мл҃твы ѡ҆ на́съ бг҃ꙋ приносѧ́щаѧ.

Ра́дꙋйсѧ, лицезрѣ́нїемъ нбⷭ҇ныхъ вѣ́чное бл҃же́нство вкꙋша́ющаѧ: ра́дꙋйсѧ, съ равноапⷭ҇льными кѡнстанті́номъ и҆ є҆ле́ною сла́вимаѧ.

Ра́дꙋйсѧ, наро́домъ грꙋзи́нскимъ и҆ всѣ́ми правосла́вными велича́емаѧ: ра́дꙋйсѧ, чꙋде́съ хрⷭ҇то́выхъ сокро́вище.

Ра́дꙋйсѧ, ꙗ҆́кѡ ѿ честна́гѡ креста̀, власы̑ твои́ми пови́тагѡ, и҆сцѣле́нїе дꙋ́шъ и҆ тѣле́съ полꙋча́емъ: ра́дꙋйсѧ, ꙗ҆́кѡ ѿ ст҃ы́хъ моще́й твои́хъ бл҃гопотре́бнꙋю по́мощь ѡ҆брѣта́емъ.

Ра́дꙋйсѧ, ст҃а́ѧ, равноапⷭ҇льнаѧ ні́но, просвѣти́тельнице грꙋ́зїи.

Конда́къ г҃і

Ѽ пресла́внаѧ и҆ преди́внаѧ просвѣти́тельнице страны̀ і҆́верскїѧ, при́снаѧ мл҃твеннице на́ша пред̾ сп҃си́телемъ бг҃омъ и҆ є҆гѡ̀ пречⷭ҇тою мт҃рїю, ст҃а́ѧ равноапⷭ҇льнаѧ ні́но! ны́нѣшнее прїе́мши приноше́нїе на́ше, ᲂу҆молѝ гдⷭ҇а бг҃опрїѧ́тнымъ твои́мъ хода́тайствомъ и҆зба́вити на́съ ѿ всѧ́кїѧ напа́сти, бѣ́дъ и҆ скорбе́й, и҆ сподо́бити вѣ́чныхъ бла̑гъ на нб҃сѝ, да съ тобо́ю вы́нꙋ взыва́емъ бг҃ꙋ: А҆ллилꙋ́їа.

Повто́ръ

Сей конда́къ глаго́лется три́жды, та́же і҆́косъ а҃-й и҆ конда́къ а҃-й.

І҆́косъ а҃

А҆́гг҃ла ди́вна страны̀ і҆́верскїѧ ꙗ҆вѝ тѧ̀ всеѧ̀ тва́ри созда́тель, ѡ҆брати́ти наро́ды землѝ сеѧ̀, сѣдѧ́щыѧ во тмѣ̀ и҆ сѣ́ни сме́ртнѣй, ѿ пре́лести і҆́дѡльскїѧ и҆ призва́ти и҆́хъ во ꙗ҆зы́къ свѧ́тъ, въ лю́ди ѡ҆бновле́нїѧ. тѣ́мже мы̀, благодарѧ́ще бг҃а, прославлѧ́емъ тѧ̀ ꙗ҆́кѡ просвѣти́тельницꙋ и҆ моли́твенницꙋ на́шꙋ и҆ прилѣ́жнѡ зове́мъ тѝ:

Ра́дꙋйсѧ, пречꙋ́днаѧ и҆збра́ннице бжⷭ҇твеннагѡ про́мысла: ра́дꙋйсѧ, ди́внѡ процвѣ́тшаѧ розго̀ бл҃гочести́вагѡ ко́рене.

Ра́дꙋйсѧ, сосꙋ́де бл҃года́ти преизрѧ́дный: ра́дꙋйсѧ, вмѣсти́лище бл҃года́тныѧ си́лы.

Ра́дꙋйсѧ, прест҃ы́ѧ дв҃ы бцⷣы вѣ́рнаѧ посла́ннице: ра́дꙋйсѧ, прехва́льнаѧ а҆пⷭ҇лѡмъ подража́тельнице.

Ра́дꙋйсѧ, во благовѣ́стїи первозва́нномꙋ а҆ндре́ю поревнова́вшаѧ: ра́дꙋйсѧ, є҆́юже лжа̀ і҆́дѡльскаѧ попра́на бы́сть.

Ра́дꙋйсѧ, є҆́юже ст҃а́ѧ вѣ́ра насади́сѧ: ра́дꙋйсѧ, є҆́юже на́мъ земны̑мъ пꙋ́ть къ нб҃сє́мъ показꙋ́етсѧ.

Ра́дꙋйсѧ, ст҃а́ѧ, равноапⷭ҇льнаѧ ні́но, просвѣти́тельнице грꙋ́зїи.

Конда́къ а҃

И҆збра́ннѣй слꙋжи́тельницѣ сло́ва бж҃їѧ и҆ по́двигѡмъ ст҃ы́хъ а҆пⷭ҇тѡлъ подража́тельницѣ, зало́гъ бл҃гослове́нїѧ ѿ бж҃їѧ мт҃ре, честны́й крⷭ҇тъ прїѧ́вшей и҆ во странѣ̀ і҆́верстѣй водрꙋзи́вшей, благода́рствєннаѧ хвалє́нїѧ восписꙋ́емъ тѝ, цѣвни́це дꙋхо́внаѧ, ст҃а́ѧ равноапⷭ҇льнаѧ ні́но. ты́ же, ꙗ҆́кѡ и҆мꙋ́щаѧ дерзнове́нїе ко гдⷭ҇ꙋ, не преста́й молѧ́щисѧ и҆зба́вити на́съ ѿ всѧ́кихъ бѣ́дъ и҆ скорбе́й, да со ᲂу҆миле́нїемъ благода́рственнѡ зове́мъ тѝ:

Ра́дꙋйсѧ, ст҃а́ѧ, равноапⷭ҇льнаѧ ні́но, просвѣти́тельнице грꙋ́зїи.

Моли́твы

Ѽ всехва́льнаѧ и҆ преди́внаѧ равноапⷭ҇льнаѧ ні́но, вои́стиннꙋ вели́кое ᲂу҆краше́нїе цр҃кве правосла́вныѧ и҆ и҆зрѧ́днаѧ похвало̀ наро́дꙋ бж҃їю, просвѣти́вшаѧ всю̀ странꙋ̀ грꙋзи́нскꙋю бжⷭ҇твеннымъ ᲂу҆че́нїемъ и҆ пѡ́двиги а҆по́стольства побѣди́вшаѧ врага̀ на́шегѡ сп҃се́нїѧ, трꙋдо́мъ и҆ мл҃твами насади́вшаѧ здѣ̀ вертогра́дъ хрⷭ҇то́въ и҆ возра́щшаѧ є҆гѡ̀ въ пло́дъ мно́гъ! пра́зднꙋюще ст҃ꙋ́ю па́мѧть твою̀, притека́емъ къ честно́мꙋ ли́кꙋ твоемꙋ̀ и҆ бл҃гоговѣ́йнѡ лобыза́емъ всехва́льный да́ръ тебѣ̀ ѿ бж҃їѧ мт҃ре, чꙋдотво́рный кре́стъ, є҆го́же ты̀ ѡ҆бвила̀ є҆сѝ драги́ми власы̑ твои́ми, и҆ ᲂу҆ми́льнѡ про́симъ, ꙗ҆́кѡ при́снꙋю предста́тельницꙋ на́шꙋ: ѡ҆градѝ на́съ ѿ всѧ́кихъ ѕѡ́лъ и҆ скорбе́й, вразꙋмѝ врагѡ́въ ст҃ы́ѧ цр҃кви хрⷭ҇то́вы и҆ проти́вникѡвъ бл҃гоче́стїѧ, ѡ҆хранѧ́й твоѐ ста́до, ᲂу҆пасе́нное тобо́ю, и҆ молѝ всебл҃га́гѡ бг҃а, сп҃си́телѧ на́шего, є҆мꙋ́же ты̀ ны́нѣ предстои́ши, да да́рꙋетъ правосла́вномꙋ наро́дꙋ на́шемꙋ ми́ръ, долгоде́нствїе и҆ во всѧ́комъ до́брѣмъ начина́нїи поспѣше́нїе, и҆ да приведе́тъ гдⷭ҇ь на́съ въ нбⷭ҇ное своѐ црⷭ҇твїе, и҆дѣ́же всѝ ст҃і́и славосло́вѧтъ всест҃о́е є҆гѡ̀ и҆́мѧ ны́нѣ и҆ при́снѡ и҆ во вѣ́ки вѣкѡ́въ. А҆ми́нь.