Российская Православная Церковь

по благословенію Архіерейскаго Сѵнода Россійской Православной Церкви

Православный календарь

Ака́ѳістъ

А҆ка́ѳїстъ прпⷣбномꙋ а҆нтѡ́нїю вели́комꙋ.

Прп. Антония Великого Египетского, основателя пустынножительства (356) 30 января 2026

Конда́къ а҃

И҆збра́нный чꙋдотво́рче и҆ преди́вный ᲂу҆го́дниче хрⷭ҇то́въ, прпⷣбне ѻ҆́тче а҆нтѡ́нїе, любо́вїю восхвалѧ́юще бг҃оꙋго́дное житїѐ твоѐ, бл҃годаре́нїѧ пѣ́снь ѡ҆ тебѣ̀ бг҃ꙋ прино́симъ. Ты́ же, ꙗ҆́кѡ и҆мѣ́ѧй ве́лїе дерзнове́нїе ко гдⷭ҇ꙋ, ѿ всѧ́кихъ на́съ бѣ́дъ свободѝ, да съ ра́достїю зове́мъ тѝ:

Ра́дꙋйсѧ, прпⷣбне ѻ҆́тче а҆нтѡ́нїе, пꙋсты́ннагѡ житїѧ̀ нача́льниче.

І҆́косъ а҃

А҆́гг҃льское житїѐ ѿ ю҆́ности возлюби́вши, въ за́повѣдехъ бж҃їихъ ходи́ти вожделѣ́лъ є҆сѝ, прпⷣбне ѻ҆́тче, и҆ се́рдцемъ пламенѣ́ѧ ко гдⷭ҇ꙋ си̑лъ, ᲂу҆́мъ на бжⷭ҇твеннаѧ возве́лъ є҆сѝ, вре́меннаѧ и҆ земна́ѧ во ᲂу҆мє́ты вмѣнѧ́ѧ. Тѣ́мже, промышле́нїю бж҃їю ѡ҆ тебѣ̀ дивѧ́щесѧ, съ вѣ́рою зове́мъ тѝ:

Ра́дꙋйсѧ, бл҃гочести́выхъ роди́телей сы́не досто́йный: ра́дꙋйсѧ, во бл҃гоче́стїи и҆́ми воспита́нный.

Ра́дꙋйсѧ, ѿ ю҆́ности за хрⷭ҇то́мъ послѣ́довавый: ра́дꙋйсѧ, сꙋетꙋ̀ земнꙋ́ю ни во что́же вмѣни́вый.

Ра́дꙋйсѧ, вертогра́да хрⷭ҇то́ва дѣ́лателю ᲂу҆се́рдный: ра́дꙋйсѧ, пꙋстынножи́телей наста́вниче вели́кїй.

Ра́дꙋйсѧ, сп҃се́нїѧ всѣ̑мъ жела́вый: ра́дꙋйсѧ, пꙋ́ть и҆́стиннагѡ мона́шества показа́вый.

Ра́дꙋйсѧ, свѣти́льниче, ѻ҆гне́мъ бжⷭ҇твеннымъ возжже́нный: ра́дꙋйсѧ, ка́меню вѣ́ры во хрⷭ҇та̀ несокрꙋше́нный.

Ра́дꙋйсѧ, бл҃года́тїю дх҃а ст҃а́гѡ ѡ҆сїѧ́нный: ра́дꙋйсѧ, да́ромъ чꙋдотворе́нїй ѡ҆бл҃года́тствованный.

Ра́дꙋйсѧ, прпⷣбне ѻ҆́тче а҆нтѡ́нїе, пꙋсты́ннагѡ житїѧ̀ нача́льниче.

Конда́къ в҃

Ви́дѧ вра́гъ ро́да чл҃вѣ́ческагѡ тебѐ, бг҃оно́сне ѻ҆́тче, на высотꙋ̀ дꙋхо́внꙋю возне́сшагосѧ, восхотѣ̀ погꙋби́ти тѧ̀, но ᲂу҆стыди́сѧ ᲂу҆се́рдїѧ и҆ смире́нїѧ твоегѡ̀, ты́ бо непреста́ннѡ въ постѣ̀ и҆ мл҃твѣ подвиза́лсѧ є҆сѝ, главꙋ̀ неви́димагѡ ѕмі́ѧ сокрꙋша́ѧ, бг҃ꙋ же со ᲂу҆миле́нїемъ поѧ̀: А҆ллилꙋ́їа.

І҆́косъ в҃

Разꙋмѣ́вше се́рдцемъ и҆ ᲂу҆мо́мъ, ꙗ҆́кѡ всѧ̑ бл҃га̑ѧ мі́ра сегѡ̀ скороте́чни и҆ скоропреходѧ́щїѧ сꙋ́ть, въ пеще́рѣ те́мнѣй затвори́лъ є҆сѝ себѐ, стра́сти ᲂу҆мерщвлѧ́ѧ и҆ є҆ди́номꙋ гдⷭ҇еви рабо́таѧ. Сегѡ̀ ра́ди, похвалѧ́ѧ равноа́гг҃льное житїѐ твоѐ, вопїе́мъ тѝ:

Ра́дꙋйсѧ, ᲂу҆пова́нїе своѐ на бг҃а возложи́вый: ра́дꙋйсѧ, врага̀ безꙋ́мїе посрами́вый.

Ра́дꙋйсѧ, неꙋстраши́мый разрꙋши́телю ко́зней дїа́вольскихъ: ра́дꙋйсѧ, чистото́ю и҆ ст҃ы́нею а҆́гг҃лѡмъ ᲂу҆подо́бивыйсѧ.

Ра́дꙋйсѧ, пꙋсты́ню по́двиги твои́ми ѡ҆ст҃и́вый: ра́дꙋйсѧ, мно́гїѧ въ црⷭ҇твїе нбⷭ҇ное ᲂу҆пра́вивый.

Ра́дꙋйсѧ, презрѣ́ннꙋю го́рдость низлага́ѧй: ра́дꙋйсѧ, смиренномꙋ́дрїю наꙋча́ѧй.

Ра́дꙋйсѧ, свѣ́те, всѣ́хъ бг҃омꙋ́дрїемъ просвѣща́ѧй: ра́дꙋйсѧ, лꙋчеза́рнаѧ ѕвѣздо̀, сїѧ́нїемъ по́двигѡвъ твои́хъ всѣ́хъ ѡ҆зарѧ́ѧй.

Ра́дꙋйсѧ, во сла́вꙋ бж҃їю пожи́вый: ра́дꙋйсѧ, па́стырю до́брый и҆ долготерпѣли́вый.

Ра́дꙋйсѧ, прпⷣбне ѻ҆́тче а҆нтѡ́нїе, пꙋсты́ннагѡ житїѧ̀ нача́льниче.

Конда́къ г҃

Си́ла вы́шнѧгѡ ᲂу҆крѣплѧ́ше тѧ̀, а҆нтѡ́нїе пребл҃же́нне, ты́ бо въ постѣ̀, мл҃твѣ, неꙋста́нныхъ трꙋдѣ́хъ и҆ бдѣ́нїихъ пребыва́ѧ и҆ всѧ́кїѧ вра́жїѧ и҆скꙋшє́нїѧ побѣжда́ѧ, воспѣва́лъ є҆сѝ бл҃года́тїю покрыва́вшемꙋ тѧ̀ бг҃ꙋ: А҆ллилꙋ́їа.

І҆́косъ г҃

И҆мѣ́ѧ по́мыслъ чи́стъ и҆ дꙋ́шꙋ непоро́чнꙋ, бл҃же́нне ѻ҆́тче, ᲂу҆разꙋмѣ́лъ є҆сѝ мі́ра сегѡ̀ сꙋетꙋ̀ и҆ непостоѧ́нство, и҆ вѣ́чныхъ бла̑гъ вожделѣ́въ, бла̑гъ вре́менныхъ ѿре́клсѧ є҆сѝ. Тѣ́мже, ᲂу҆бл҃жа́юще тѧ̀, вопїе́мъ:

Ра́дꙋйсѧ, смире́нїѧ бл҃га́гѡ ревни́телю: ра́дꙋйсѧ, мꙋ́дрости дꙋхо́вныѧ и҆ска́телю.

Ра́дꙋйсѧ, на высотꙋ̀ безстра́стїѧ возше́дый: ра́дꙋйсѧ, всегѡ̀ себѐ бг҃ꙋ преда́вый.

Ра́дꙋйсѧ, гдⷭ҇ꙋ твоемꙋ̀ неѕло́бїемъ ᲂу҆подо́бивыйсѧ: ра́дꙋйсѧ, нището́ю твое́ю бога́тъ бы́вый.

Ра́дꙋйсѧ, пꙋсты́ни бл҃года́тное ᲂу҆краше́нїе: ра́дꙋйсѧ, мі́рови свѣти́льниче пресвѣ́тлый.

Ра́дꙋйсѧ, бѣсѡ́въ стра́шный прогони́телю: ра́дꙋйсѧ, пре́лести и҆̀хъ потреби́телю.

Ра́дꙋйсѧ, па́че мꙋдрецѡ́въ мі́ра сегѡ̀ мꙋдрѣ́йшїй: ра́дꙋйсѧ, подви́жниче всеꙋсе́рднѣйшїй.

Ра́дꙋйсѧ, прпⷣбне ѻ҆́тче а҆нтѡ́нїе, пꙋсты́ннагѡ житїѧ̀ нача́льниче.

Конда́къ д҃

Бꙋ́рю ѕлы́хъ напа́стей ᲂу҆тиша́ѧ, въ пꙋсты́ню всели́лсѧ є҆сѝ, а҆нтѡ́нїе пребл҃же́нне, въ не́йже многоско́рбный пꙋ́ть и҆́ноческагѡ житїѧ̀ проше́лъ є҆сѝ, всѧ̑ кѡ́зни вра́жєскїѧ попира́ѧ и҆ прельще́нїѧ є҆гѡ̀ ѿсѣка́ѧ, ᲂу҆крѣплѧ́ющемꙋ тѧ̀ хрⷭ҇тꙋ̀ поѧ̀: А҆ллилꙋ́їа.

І҆́косъ д҃

Слы́шавше ѡ҆ бг҃оꙋго́дномъ житїѝ твое́мъ, прпⷣбне, прихожда́хꙋ къ тебѣ̀ ѿ всѣ́хъ концє́въ и҆́щꙋщїи пра́вды бж҃їѧ, и҆̀хже ты̀ съ любо́вїю прїе́млѧ, ко сп҃се́нїю рꙋково́дствовалъ є҆сѝ. Мы́ же, ᲂу҆миле́нною дꙋше́ю восхвалѧ́ѧ тѧ̀, вопїе́мъ си́це:

Ра́дꙋйсѧ, пꙋстынножи́телей пра́вило и҆ ѡ҆снова́нїе: ра́дꙋйсѧ, до́брый ста́да хрⷭ҇то́ва наста́вниче.

Ра́дꙋйсѧ, цр҃кви хрⷭ҇то́вы ᲂу҆краше́нїе: ра́дꙋйсѧ, мона́шествꙋющихъ сла́во.

Ра́дꙋйсѧ, всегѡ̀ себѐ въ же́ртвꙋ гдⷭ҇еви принесы́й: ра́дꙋйсѧ, стра̑сти грѣхѡ́вныѧ въ себѣ̀ ᲂу҆мертви́вый.

Ра́дꙋйсѧ, а҆́гг҃лѡвъ весе́лїе: ра́дꙋйсѧ, де́монѡвъ всегꙋби́тельное попра́нїе.

Ра́дꙋйсѧ, пꙋсты́нный жи́телю: ра́дꙋйсѧ, безмо́лвїѧ рачи́телю.

Ра́дꙋйсѧ, на пꙋ́ть пра́вый наставлѧ́ѧй: ра́дꙋйсѧ, црⷭ҇твїе нбⷭ҇ное возвѣща́ѧй.

Ра́дꙋйсѧ, прпⷣбне ѻ҆́тче а҆нтѡ́нїе, пꙋсты́ннагѡ житїѧ̀ нача́льниче.

Конда́къ є҃

Бг҃оте́чнаѧ ѕвѣзда̀ чи́нꙋ и҆́ноческомꙋ ꙗ҆ви́лсѧ є҆сѝ, прпⷣбне ѻ҆́тче а҆нтѡ́нїе, ѻ҆́бразъ бы́въ сло́вомъ, житїе́мъ, любо́вїю, вѣ́рою, чистото́ю, воспѣва́ѧ гдⷭ҇ꙋ: А҆ллилꙋ́їа.

І҆́косъ є҃

Ви́дѧ вра́гъ ро́да чл҃вѣ́ческагѡ чи́стое и҆ ст҃о́е житїѐ твоѐ, ѻ҆́тче а҆нтѡ́нїе, мно́гажды ѡ҆полча́шесѧ на тѧ̀: ты́ же смире́нїемъ свои́мъ є҆гѡ̀ побѣжда́ѧ, ѿ пꙋтѝ сп҃си́тельнагѡ не ᲂу҆клони́лсѧ є҆сѝ. Мы́ же, вѣ́дꙋще сїѐ, пое́мъ тѝ:

Ра́дꙋйсѧ, вѣ́чныѧ жи́зни прича́стниче: ра́дꙋйсѧ, сп҃се́нїѧ вели́кїй наста́вниче.

Ра́дꙋйсѧ, житїе́мъ твои́мъ є҆ди́номꙋ бг҃ꙋ послꙋжи́вый: ра́дꙋйсѧ, и҆́го хрⷭ҇то́во воспрїѧ́вый.

Ра́дꙋйсѧ, кова́рство лꙋка́выхъ де́монѡвъ ѡ҆блича́ѧй: ра́дꙋйсѧ, на пꙋ́ть сп҃се́нїѧ наставлѧ́ѧй.

Ра́дꙋйсѧ, чистоты̀ храни́телю: ра́дꙋйсѧ, трⷪ҇ческагѡ свѣ́та зри́телю.

Ра́дꙋйсѧ, па́дшихъ воста́нїе: ра́дꙋйсѧ, бѣсо́вскїѧ си́лы прогна́нїе.

Ра́дꙋйсѧ, сто́лпе вѣ́ры ᲂу҆твержде́нный: ра́дꙋйсѧ, ᲂу҆чи́телю соверше́нный.

Ра́дꙋйсѧ, прпⷣбне ѻ҆́тче а҆нтѡ́нїе, пꙋсты́ннагѡ житїѧ̀ нача́льниче.

Конда́къ ѕ҃

Про́повѣди є҆ѵⷢ҇льскїѧ послꙋ́шавъ: а҆́ще хо́щеши соверше́нъ бы́ти, и҆дѝ, прода́ждь и҆мѣ́нїе твоѐ, и҆ да́ждь ни́щимъ, и҆ и҆мѣ́ти и҆́маши сокро́вище на нб҃сѝ: и҆ грѧдѝ въ слѣ́дъ менє̀, ѿрѣши́лъ є҆сѝ себѐ, ѻ҆́тче а҆нтѡ́нїе, ѿ бога́тствъ земны́хъ и҆, всели́всѧ въ пꙋсты́ню, житїѐ по́стническое пожи́лъ є҆сѝ, по́двиги твои́ми сокро́вище себѣ̀ на нб҃сѝ стѧжава́ѧ. Вразꙋмѝ и҆ на́съ, ѻ҆́тче бл҃госе́рдый, къ скороги́бнꙋщимъ вещє́мъ земны́мъ се́рдцемъ не прилѣплѧ́тисѧ, а҆ па́че ѡ҆ го́рнихъ помышлѧ́ти, вопїѧ̀ гдⷭ҇ꙋ си́лъ: А҆ллилꙋ́їа.

І҆́косъ ѕ҃

Возсїѧ́лъ є҆сѝ, ꙗ҆́кѡ бг҃освѣ́тлое свѣти́ло, въ пꙋсты́ни є҆гѵ́петстѣй, ѻ҆́тче а҆нтѡ́нїе, ѡ҆зарѧ́ѧ всѣ́хъ лꙋча́ми добродѣ́телей и҆ чꙋде́съ твои́хъ. Мы́ же, помина́ѧ по́двиги твоѧ̑, ᲂу҆бл҃жа́емъ тѧ̀, глаго́люще:

Ра́дꙋйсѧ, и҆́мже вѣнча́ютсѧ прпⷣбнїи: ра́дꙋйсѧ, и҆́мже сп҃са́ютсѧ чл҃вѣ́цы.

Ра́дꙋйсѧ, бл҃года́тное болѧ́щихъ посѣще́нїе: ра́дꙋйсѧ, лю́тѣ стра́ждꙋщихъ помо́щниче.

Ра́дꙋйсѧ, вражды̀ разрꙋши́телю: ра́дꙋйсѧ, врагѡ́въ и҆стреби́телю.

Ра́дꙋйсѧ, вѣ̑рнымъ ми́ръ и҆ ᲂу҆твержде́нїе: ра́дꙋйсѧ, ско́рое ѿ бѣ́дъ и҆збавле́нїе.

Ра́дꙋйсѧ, ѕло́бы и҆ кова́рства гꙋби́телю: ра́дꙋйсѧ, ѿча́ѧнныхъ посѣти́телю.

Ра́дꙋйсѧ, правосла́внымъ побо́рниче: ра́дꙋйсѧ, хрⷭ҇тїа́нѡмъ помо́щниче.

Ра́дꙋйсѧ, прпⷣбне ѻ҆́тче а҆нтѡ́нїе, пꙋсты́ннагѡ житїѧ̀ нача́льниче.

Конда́къ з҃

Хотѧ́й досто́йнѣ по́двигомъ до́брымъ подвиза́тисѧ, всѧ̑ вре́мєннаѧ во ᲂу҆мє́ты вмѣни́лъ є҆сѝ, и҆ ни́щъ и҆ ᲂу҆бо́гъ пребыва́ѧ, въ пꙋсты́ню всели́лсѧ є҆сѝ, да съ є҆ди́нымъ бг҃омъ бесѣ́дꙋеши, непреста́ннѡ поѧ̀ є҆мꙋ̀: А҆ллилꙋ́їа.

І҆́косъ з҃

Но́вагѡ вои́стиннꙋ наста́вника мона́хѡвъ ꙗ҆вѝ тѧ̀ гдⷭ҇ь, ѻ҆́тче а҆нтѡ́нїе: мно́зи бо позна́вше бг҃оꙋго́дное и҆ пра́ведное житїѐ твоѐ, и҆ высо́кꙋю мꙋ́дрость дꙋхо́внꙋю ᲂу҆разꙋмѣ́вше, послꙋ́шахꙋ слове́съ твои́хъ, ꙗ҆́кѡ слове́съ вели́кагѡ ᲂу҆го́дника бж҃їѧ, є҆мꙋ́же досто́итъ пѣ́ти такова̑ѧ:

Ра́дꙋйсѧ, вѣ́рѣ а҆враа́ма подража́вый: ра́дꙋйсѧ, кро́тостїю даві́дꙋ ᲂу҆подо́бивыйсѧ.

Ра́дꙋйсѧ, ре́вность и҆лїинꙋ̀ стѧжа́вый: ра́дꙋйсѧ, стезѧ́ми крⷭ҇ти́телѧ послѣ́довавый.

Ра́дꙋйсѧ, во́дꙋ въ пꙋсты́ни мл҃твою и҆сточи́вый: ра́дꙋйсѧ, разсла́бленныѧ ѿ ѻ҆дра̀ болѣ́зни воздви́гнꙋвый.

Ра́дꙋйсѧ, слѣпы́мъ прозрѣ́нїе дарова́вый: ра́дꙋйсѧ, мно́гїѧ болѧ́щїѧ и҆сцѣли́вый.

Ра́дꙋйсѧ, наста́вниче мона́хѡвъ преди́вный и҆ бг҃омꙋ́дрый: ра́дꙋйсѧ, хрⷭ҇та̀ бг҃а слꙋжи́телю ᲂу҆се́рдный.

Ра́дꙋйсѧ, прети́хое ско́рбныхъ ᲂу҆тѣше́нїе: ра́дꙋйсѧ, прелюби́мое и҆́нокѡвъ похвале́нїе.

Ра́дꙋйсѧ, прпⷣбне ѻ҆́тче а҆нтѡ́нїе, пꙋсты́ннагѡ житїѧ̀ нача́льниче.

Конда́къ и҃

Стра́нное и҆ пачеесте́ственное житїѐ прпⷣбнагѡ па́ѵла ви́дѣвъ, бл҃же́нне а҆нтѡ́нїе, диви́лсѧ є҆сѝ высотѣ̀ по́двигѡвъ и҆ добродѣ́телей є҆гѡ̀. Дꙋ́шꙋ же є҆гѡ̀, а҆́гг҃лы ѡ҆крꙋжа́емꙋ, на нб҃са̀ восходѧ́щꙋю ᲂу҆зрѣ́вши, бг҃ꙋ, ди́вномꙋ во ст҃ы́хъ свои́хъ, возгласи́лъ є҆сѝ: А҆ллилꙋ́їа.

І҆́косъ и҃

Ра́достїю ве́лїею возра́довалсѧ є҆сѝ, ѻ҆́тче а҆нтѡ́нїе, ви́дѧще восхожде́нїе на нб҃о дꙋшѝ прпⷣбнагѡ а҆ммѡ́нїа, є҆го́же прозорли́выма ѻ҆чи́ма зрѣ́лъ є҆сѝ. Сегѡ̀ ра́ди со мно́гимъ ᲂу҆дивле́нїемъ взыва́емъ тѝ си́це:

Ра́дꙋйсѧ, ѻ҆чеса̀ своѧ̑ вы́нꙋ на нб҃о возводи́вый: ра́дꙋйсѧ, сла́вꙋ нбⷭ҇нꙋю па́че всегѡ̀ возлюби́вый.

Ра́дꙋйсѧ, непреста́нными мл҃твами се́рдце своѐ ѡ҆ст҃и́вый: ра́дꙋйсѧ, мы́сль твою̀ въ бз҃ѣ ᲂу҆тверди́вый.

Ра́дꙋйсѧ, грѧдꙋ́щаѧ ꙗ҆́кѡ настоѧ́щаѧ прови́дѣвый: ра́дꙋйсѧ, смире́нїемъ твои́мъ высо́каѧ дарова́нїѧ стѧжа́вый.

Ра́дꙋйсѧ, стꙋжа́ємыѧ ѿ ѕлы́хъ дꙋхѡ́въ свободи́телю: ра́дꙋйсѧ, дꙋше́внагѡ и҆ тѣле́снагѡ здра́вїѧ пода́телю.

Ра́дꙋйсѧ, въ нꙋ́ждахъ и҆ бѣда́хъ пресла́вный застꙋ́пниче: ра́дꙋйсѧ, въ напа́стехъ и҆ ско́рбѣхъ ско́рый защи́тниче.

Ра́дꙋйсѧ, ꙗ҆́кѡ на́съ, на землѝ сꙋ́щихъ, не ѡ҆ставлѧ́еши: ра́дꙋйсѧ, ꙗ҆́кѡ ѡ҆ на́съ, грѣ́шныхъ, мольбы̑ бг҃ꙋ прино́сиши.

Ра́дꙋйсѧ, прпⷣбне ѻ҆́тче а҆нтѡ́нїе, пꙋсты́ннагѡ житїѧ̀ нача́льниче.

Конда́къ ѳ҃

Всѧ́кое є҆стество̀ а҆́гг҃льское ᲂу҆диви́сѧ высотѣ̀ по́двигѡвъ твои́хъ, прпⷣбне, ꙗ҆́кѡ въ немощнѣ́й чл҃вѣ́честѣй пло́ти сы́й, по всемꙋ̀ ᲂу҆подо́билсѧ є҆сѝ а҆́гг҃лѡмъ и҆, си́лою вы́шнѧгѡ ᲂу҆крѣплѧ́емь, во всѧ́кихъ добродѣ́телѣхъ дово́льнѣ и҆зѻби́ловалъ є҆сѝ. Сегѡ̀ ра́ди а҆́гг҃льскимъ чинѡ́мъ причте́нъ, пое́ши всеси́льномꙋ бг҃ꙋ: А҆ллилꙋ́їа.

І҆́косъ ѳ҃

Вѣті́йство чл҃вѣ́ческое не довлѣ́етъ къ досто́йномꙋ прославле́нїю житїѧ̀ твоегѡ̀, ѻ҆́тче а҆нтѡ́нїе: кто́ бо и҆сповѣ́сть всѧ̑ пощє́нїѧ и҆ бдѣ̑нїѧ, болѣ̑зни и҆ трꙋды̀ твоѧ̑; Кто̀ и҆зочте́тъ слє́зы и҆ воздыха̑нїѧ твоѧ̑ ꙗ҆́же къ бг҃ꙋ; Ѻ҆ба́че мы̀, любо́вїю къ тебѣ̀ подвиза́еми, дерза́емъ воспѣва́ти си́це:

Ра́дꙋйсѧ, вели́кїй пꙋстынножи́телю: ра́дꙋйсѧ, соверше́нства ᲂу҆чи́телю.

Ра́дꙋйсѧ, и҆́стиннагѡ бг҃а слꙋжи́телю: ра́дꙋйсѧ, бѣсѡ́въ и҆з̾ пꙋсты́ни прогони́телю.

Ра́дꙋйсѧ, гро́ме, дїа́вола поража́ѧй: ра́дꙋйсѧ, кова́рство є҆гѡ̀ и҆зѻблича́ѧй.

Ра́дꙋйсѧ, бл҃года́ти бж҃їѧ вмѣсти́лище: ра́дꙋйсѧ, дх҃а ст҃а́гѡ ѻ҆бита́лище.

Ра́дꙋйсѧ, по́стникѡвъ ᲂу҆краше́нїе: ра́дꙋйсѧ прпⷣбныхъ похвало̀.

Ра́дꙋйсѧ, мона́хѡвъ ѡ҆снова́нїе: ра́дꙋйсѧ, ѻ҆тцє́въ сла́во.

Ра́дꙋйсѧ, прпⷣбне ѻ҆́тче а҆нтѡ́нїе, пꙋсты́ннагѡ житїѧ̀ нача́льниче.

Конда́къ і҃

Сп҃сти́сѧ хотѧ́щимъ вѣ́рный наста́вникъ бы́лъ є҆сѝ, прпⷣбне, и҆ ны́нѣ на́мъ, грѣ̑шнымъ, сп҃се́нїѧ жела́ющымъ, помозѝ ст҃ы́ми твои́ми мл҃твами, да тобо́ю вспомоществꙋ́еми, дости́гнемъ црⷭ҇твїѧ нбⷭ҇нагѡ, и҆дѣ́же а҆́гг҃ли немо́лчнѡ пою́тъ: А҆ллилꙋ́їа.

І҆́косъ і҃

Стѣна̀ крѣ́пкаѧ и҆ неѡбори́маѧ бы́лъ є҆сѝ свои́мъ ᲂу҆ченикѡ́мъ, сохранѧ́ѧ и҆̀хъ ѿ стрѣлѧ́нїй бѣсо́вскихъ, и҆ ны́нѣ на́мъ бꙋ́ди стѣна̀ и҆ покро́въ ѿ всѣ́хъ ко́зней дїа́вольскихъ вопїю́щихъ тѝ такова̑ѧ:

Ра́дꙋйсѧ, а҆́гг҃ле земны́й: ра́дꙋйсѧ, чл҃вѣ́че нбⷭ҇ный.

Ра́дꙋйсѧ, ст҃ы́ни чⷭ҇тое и҆ чтⷭ҇но́е жили́ще: ра́дꙋйсѧ, вели́кихъ добродѣ́телей вмѣсти́лище.

Ра́дꙋйсѧ, бл҃гоче́стїѧ ревни́телю: ра́дꙋйсѧ, є҆ресе́й ѡ҆бличи́телю.

Ра́дꙋйсѧ, любвѐ хрⷭ҇то́вы и҆сполне́нїе: ра́дꙋйсѧ, и҆́нокѡвъ наꙋче́нїе.

Ра́дꙋйсѧ, тве́рдое вѣ́рныхъ прибѣ́жище: ра́дꙋйсѧ, крѣ́пкое па́дающихъ возведе́нїе.

Ра́дꙋйсѧ, ᲂу҆крѣпле́нїе немощны́хъ и҆ разсла́бленныхъ: ра́дꙋйсѧ, ᲂу҆тѣше́нїе ᲂу҆ныва́ющихъ и҆ безнаде́жныхъ.

Ра́дꙋйсѧ, прпⷣбне ѻ҆́тче а҆нтѡ́нїе, пꙋсты́ннагѡ житїѧ̀ нача́льниче.

Конда́къ а҃і

Пѣ́нїе ᲂу҆миле́нное, ѿ любвѝ и҆ ᲂу҆се́рдїѧ въ похвалꙋ̀ тебѣ̀ ѿ на́съ возноси́мое, прїимѝ, бл҃гоꙋтро́бне ѻ҆́тче а҆нтѡ́нїе, приклони́сѧ къ на́мъ ми́лостивѡ и҆ въ покаѧ́нїи преꙋспѣ́ти сподо́би, да мл҃твами твои́ми вы́нꙋ пое́мъ бг҃ꙋ: А҆ллилꙋ́їа.

І҆́косъ а҃і

Свѣтопрїе́мный свѣти́льникъ и҆́стиннагѡ свѣ́та сꙋ́щимъ на землѝ ꙗ҆ви́лсѧ є҆сѝ, прпⷣбне а҆нтѡ́нїе, просвѣща́еши бо сердца̀ вѣ́рныхъ по́двиги твои́ми и҆ чꙋдесы̀, наставлѧ́ѧ на пꙋ́ть добродѣ́тельнагѡ и҆ бг҃оꙋго́днагѡ житїѧ̀. Тѣ́мже слы́шиши ѿ всѣ́хъ такова̑ѧ:

Ра́дꙋйсѧ, наста́вниче премꙋ́дрый: ра́дꙋйсѧ, вождю̀ бл҃гонаде́жный.

Ра́дꙋйсѧ, всегѡ̀ себѐ во́лѣ бж҃їей преда́вый: ра́дꙋйсѧ, гдⷭ҇а і҆и҃са па́че всегѡ̀ возлюби́вый.

Ра́дꙋйсѧ, терпѣ́нїемъ скорбе́й многоразли́чныхъ просїѧ́вый: ра́дꙋйсѧ, во́льною нището́ю вѣ́чное бога́тство стѧжа́вый.

Ра́дꙋйсѧ, въ терпѣ́нїи и҆ ѕлострада́нїи житїѐ твоѐ проводи́вый: ра́дꙋйсѧ, пꙋсты́нное ѡ҆ѕлобле́нїе мꙋ́жески терпѣ́вый.

Ра́дꙋйсѧ, лѣни́выхъ къ по́двигѡмъ возбꙋди́телю: ра́дꙋйсѧ, и҆справле́нїѧ грѣ́шникѡвъ порꙋчи́телю.

Ра́дꙋйсѧ, а҆́гг҃лѡвъ и҆ всѣ́хъ ст҃ы́хъ собесѣ́дниче: ра́дꙋйсѧ, ѡ҆ все́мъ мі́рѣ ᲂу҆се́рдный мл҃твенниче.

Ра́дꙋйсѧ, прпⷣбне ѻ҆́тче а҆нтѡ́нїе, пꙋсты́ннагѡ житїѧ̀ нача́льниче.

Конда́къ в҃і

Блгⷣть да́ннꙋю тѝ ѿ бг҃а вѣ́дꙋще, бл҃гоговѣ́йнѡ лобыза́емъ ст҃олѣ́пное и҆зѡбраже́нїе ли́ка твоегѡ̀, ᲂу҆го́дниче бж҃їй, и҆ мо́лимсѧ: не ѡ҆ста́ви на́съ твои́мъ мл҃твеннымъ предста́тельствомъ ко хрⷭ҇тꙋ̀ бг҃ꙋ, є҆мꙋ́же бл҃года́рнѡ пое́мъ: А҆ллилꙋ́їа.

І҆́косъ в҃і

Пою́ще твоѐ житїѐ, восхвалѧ́емъ ми́рнꙋю кончи́нꙋ твою̀, прпⷣбне ѻ҆́тче а҆нтѡ́нїе, и҆ мо́лимъ ти сѧ: бꙋ́ди на́мъ во все́мъ ко бл҃гꙋ ско́рый помо́щникъ, зовꙋ́щымъ тѝ такова̑ѧ:

Ра́дꙋйсѧ, нбⷭ҇ный жи́телю: ра́дꙋйсѧ, трⷪ҇цы є҆диносꙋ́щныѧ предстоѧ́телю.

Ра́дꙋйсѧ, а҆́гг҃лѡвъ весе́лїе: ра́дꙋйсѧ, ст҃ы́хъ собесѣ́дниче.

Ра́дꙋйсѧ, и҆́стинный ᲂу҆го́дниче бж҃їй: ра́дꙋйсѧ, и҆збра́нный слꙋго̀ гдⷭ҇ень.

Ра́дꙋйсѧ, те́плый хода́таю ѡ҆ всѣ́хъ призыва́ющихъ и҆́мѧ твоѐ: ра́дꙋйсѧ, наста́вниче и҆ ᲂу҆пова́нїе почита́ющихъ тѧ̀.

Ра́дꙋйсѧ, бл҃года́тїю бж҃їею насыще́нный: ра́дꙋйсѧ, ѿ и҆сто́чника бжⷭ҇твеннагѡ напое́нный.

Ра́дꙋйсѧ, пото́комъ слє́зъ сп҃си́тельныхъ ѡ҆роше́нный: ра́дꙋйсѧ, ѻ҆де́ждою нетлѣ́нїѧ ѡ҆дѣ́ѧнный.

Ра́дꙋйсѧ, прпⷣбне ѻ҆́тче а҆нтѡ́нїе, пꙋсты́ннагѡ житїѧ̀ нача́льниче.

Конда́къ г҃і

Ѽ прпⷣбне ѻ҆́тче на́шъ вели́кїй а҆нтѡ́нїе, вѣ́чнѡ живы́й въ невече́рнѣмъ днѝ црⷭ҇твїѧ хрⷭ҇то́ва, ᲂу҆молѝ всѣ́хъ влⷣкꙋ и҆зба́витисѧ на́мъ ѿ бѣ́дъ, скорбе́й и҆ вѣ́чнагѡ мꙋче́нїѧ, да во вѣ́ки пое́мъ є҆мꙋ̀ во црⷭ҇твїи є҆гѡ̀: А҆ллилꙋ́їа.

Повто́ръ

Сей конда́къ глаго́лется три́жды, та́же і҆́косъ а҃-й и҆ конда́къ а҃-й.

І҆́косъ а҃

А҆́гг҃льское житїѐ ѿ ю҆́ности возлюби́вши, въ за́повѣдехъ бж҃їихъ ходи́ти вожделѣ́лъ є҆сѝ, прпⷣбне ѻ҆́тче, и҆ се́рдцемъ пламенѣ́ѧ ко гдⷭ҇ꙋ си̑лъ, ᲂу҆́мъ на бжⷭ҇твеннаѧ возве́лъ є҆сѝ, вре́меннаѧ и҆ земна́ѧ во ᲂу҆мє́ты вмѣнѧ́ѧ. Тѣ́мже, промышле́нїю бж҃їю ѡ҆ тебѣ̀ дивѧ́щесѧ, съ вѣ́рою зове́мъ тѝ:

Ра́дꙋйсѧ, бл҃гочести́выхъ роди́телей сы́не досто́йный: ра́дꙋйсѧ, во бл҃гоче́стїи и҆́ми воспита́нный.

Ра́дꙋйсѧ, ѿ ю҆́ности за хрⷭ҇то́мъ послѣ́довавый: ра́дꙋйсѧ, сꙋетꙋ̀ земнꙋ́ю ни во что́же вмѣни́вый.

Ра́дꙋйсѧ, вертогра́да хрⷭ҇то́ва дѣ́лателю ᲂу҆се́рдный: ра́дꙋйсѧ, пꙋстынножи́телей наста́вниче вели́кїй.

Ра́дꙋйсѧ, сп҃се́нїѧ всѣ̑мъ жела́вый: ра́дꙋйсѧ, пꙋ́ть и҆́стиннагѡ мона́шества показа́вый.

Ра́дꙋйсѧ, свѣти́льниче, ѻ҆гне́мъ бжⷭ҇твеннымъ возжже́нный: ра́дꙋйсѧ, ка́меню вѣ́ры во хрⷭ҇та̀ несокрꙋше́нный.

Ра́дꙋйсѧ, бл҃года́тїю дх҃а ст҃а́гѡ ѡ҆сїѧ́нный: ра́дꙋйсѧ, да́ромъ чꙋдотворе́нїй ѡ҆бл҃года́тствованный.

Ра́дꙋйсѧ, прпⷣбне ѻ҆́тче а҆нтѡ́нїе, пꙋсты́ннагѡ житїѧ̀ нача́льниче.

Конда́къ а҃

И҆збра́нный чꙋдотво́рче и҆ преди́вный ᲂу҆го́дниче хрⷭ҇то́въ, прпⷣбне ѻ҆́тче а҆нтѡ́нїе, любо́вїю восхвалѧ́юще бг҃оꙋго́дное житїѐ твоѐ, бл҃годаре́нїѧ пѣ́снь ѡ҆ тебѣ̀ бг҃ꙋ прино́симъ. Ты́ же, ꙗ҆́кѡ и҆мѣ́ѧй ве́лїе дерзнове́нїе ко гдⷭ҇ꙋ, ѿ всѧ́кихъ на́съ бѣ́дъ свободѝ, да съ ра́достїю зове́мъ тѝ:

Ра́дꙋйсѧ, прпⷣбне ѻ҆́тче а҆нтѡ́нїе, пꙋсты́ннагѡ житїѧ̀ нача́льниче.

Моли́твы

Ѽ прпⷣбне и҆ бг҃оно́сне ѻ҆́тче на́шъ а҆нтѡ́нїе. Вѣ́рꙋемъ, ꙗ҆́кѡ ты̀, предстоѧ̀ прⷭ҇то́лꙋ прест҃ы́ѧ трⷪ҇цы, ве́лїе и҆́маши дерзнове́нїе въ мл҃твахъ ко всемлⷭ҇тивомꙋ гдⷭ҇ꙋ бг҃ꙋ, и҆̀же всегда̀ послꙋ́шаетъ тебѣ̀, вѣ́рнагѡ раба̀ и҆ ᲂу҆го́дника своегѡ̀. Сегѡ̀ ра́ди со ᲂу҆миле́нїемъ смире́ннѡ припа́даемъ къ тебѣ̀, ст҃че бж҃їй: не премолчѝ ѡ҆ на́съ моли́тисѧ ко гдⷭ҇ꙋ бг҃ꙋ, въ трⷪ҇цѣ покланѧ́емомꙋ и҆ сла́вимомꙋ, да, млⷭ҇тивнѡ призрѣ́въ на ны̀, не попꙋ́ститъ на́мъ поги́бнꙋти во грѣсѣ́хъ на́шихъ, но да возста́витъ па́дшихъ, да пода́стъ и҆справле́нїе ѕло́мꙋ и҆ ѡ҆каѧ́нномꙋ на́шемꙋ житїю̀, ѿ грѧдꙋ́щихъ грѣхопаде́нїй восхища́ѧ, и҆ да прости́тъ на́мъ всѧ̑, є҆ли́ка согрѣши́хомъ мы́слїю, сло́вомъ и҆ дѣ́ломъ, ѿ рожде́нїѧ до сегѡ̀ часа̀. Ты̀, подви́жниче добродѣ́тели, вѣ́си не́мощь и҆ ско́рбь време́нъ настоѧ́щихъ, молѝ ᲂу҆́бѡ вы́нꙋ хрⷭ҇та̀ бг҃а, да николи́же на́съ ѡ҆ставлѧ́етъ є҆гѡ̀ неизрече́нное млⷭ҇рдїе, но да храни́тъ на́съ ѿ мїрски́хъ и҆скꙋше́нїй, ѿ дїа́вольскихъ сѣте́й и҆ ѿ плотски́хъ по́хотей, да прїи́мемъ ѿ негѡ̀ тобо́ю и҆ всѧ̑ потрє́бнаѧ къ жи́зни вре́меннѣй, ѡ҆свобожде́нїе ѿ бѣ́дъ и҆ напа́стей, и҆ неѡсла́бное терпѣ́нїе до конца̀. И҆спросѝ на́мъ въ ми́рѣ и҆ покаѧ́нїи сконча́ти живо́тъ на́шъ и҆ невозбра́ннѡ прейтѝ ѿ землѝ на нб҃о, мыта́рствъ же, и҆ бѣсѡ́въ воздꙋ́шныхъ, и҆ вѣ́чныѧ мꙋ́ки и҆зба́витисѧ, и҆ сподо́битисѧ црⷭ҇тва нбⷭ҇нагѡ съ тобо́ю и҆ со всѣ́ми ст҃ы́ми, ᲂу҆годи́вшими гдⷭ҇ꙋ бг҃ꙋ и҆ сп҃си́телю на́шемꙋ і҆и҃сꙋ хрⷭ҇тꙋ̀, є҆мꙋ́же подоба́етъ всѧ́каѧ сла́ва, че́сть и҆ поклоне́нїе, со безнача́льнымъ є҆гѡ̀ ѻ҆ц҃е́мъ и҆ съ прест҃ы́мъ и҆ бл҃ги́мъ и҆ животворѧ́щимъ є҆гѡ̀ дх҃омъ, ны́нѣ и҆ при́снѡ и҆ во вѣ́ки вѣкѡ́въ. А҆ми́нь.