Российская Православная Церковь

по благословенію Архіерейскаго Сѵнода Россійской Православной Церкви

Православный календарь

Ака́ѳістъ

А҆ка́ѳїстъ ст҃о́мꙋ прпⷣбномꙋ са́ввѣ, и҆гꙋ́менꙋ стороже́вскомꙋ, звенигоро́дскомꙋ чꙋдотво́рцꙋ.

Прп. Саввы, игум. Сторожевского (Звенигородского) (обрет. мощей) (1652) 1 февраля 2026

Конда́къ а҃

И҆збра́нный ѿ воево́ды и҆ гдⷭ҇а во́инствъ нбⷭ҇ныхъ, прпⷣбне ѻ҆́ч҃е на́шъ са́вво, си́лою крⷭ҇та̀ гдⷭ҇нѧ побѣди́вый напа̑сти, ꙗ҆́же ѿ дїа́вола, мі́ра и҆ пло́ти, ꙗ҆́кѡ и҆мѣ́ѧ дерзнове́нїе ко гдⷭ҇ꙋ, ѿ всѧ́кихъ и҆скꙋше́нїй, бѣ́дъ и҆ навѣ́тѡвъ вра́жїихъ мл҃твами твои́ми сохранѧ́й на́съ, похва̑льнаѧ съ любо́вїю тебѣ̀ воспѣва́ющихъ:

Ра́дꙋйсѧ, ѻ҆́ч҃е на́шъ са́вво, чꙋдотво́рче пресла́вный.

І҆́косъ а҃

А҆́гг҃лъ во пло́ти ꙗ҆ви́лсѧ є҆сѝ на землѝ, прпⷣбне са́вво: ѿ ю҆́ности бо возлюби́въ бг҃а, равноа́гг҃льномꙋ поревнова́лъ є҆сѝ житїю̀ ᲂу҆чи́телѧ твоегѡ̀, пребл҃же́ннагѡ се́ргїа и҆ послꙋжи́въ гдⷭ҇еви въ пра́вдѣ и҆ прпⷣбїи во всѧ̑ дни̑ живота̀ своегѡ̀, по и҆схо́дѣ нетлѣ́нїемъ тѣлесѐ сїѧ́еши. Всѝ ᲂу҆̀бо бл҃гоговѣ́йнѡ чтꙋ́ще тѧ̀, воспѣва́емъ си́це:

Ра́дꙋйсѧ, и҆́стинный ст҃а́гѡ ᲂу҆чи́телѧ твоегѡ̀ ревни́телю: ра́дꙋйсѧ, земны́й а҆́гг҃ле и҆ нбⷭ҇ный чл҃вѣ́че.

Ра́дꙋйсѧ, вѣ́рный слꙋго̀ гдⷭ҇нь: ра́дꙋйсѧ, ᲂу҆се́рдный чистоты̀ и҆ воздержа́нїѧ храни́телю.

Ра́дꙋйсѧ, зерца́ло вѣ́ры бл҃гочести́выѧ: ра́дꙋйсѧ, ѡ҆́бразе кро́тости дꙋхо́вныѧ.

Ра́дꙋйсѧ, пꙋстынножи́телей красото̀: ра́дꙋйсѧ, и҆́нокѡвъ наста́вниче.

Ра́дꙋйсѧ, мнѡ́гимъ ко сп҃се́нїю пꙋтеводи́телю: ра́дꙋйсѧ, ско́рый помо́щниче притека́ющымъ къ тебѣ̀ съ вѣ́рою.

Ра́дꙋйсѧ, ѻ҆́ч҃е на́шъ са́вво, чꙋдотво́рче пресла́вный.

Конда́къ в҃

Ви́дѧ, ꙗ҆́кѡ въ мі́рѣ се́мъ всѧ́чєскаѧ сꙋета̀ и҆ тлѣ́нїе, потща́лсѧ є҆сѝ тѣ́снымъ и҆ приско́рбнымъ пꙋте́мъ тече́нїе жи́зни сеѧ̀ соверши́ти; всели́всѧ во ѡ҆би́тели прпⷣбнагѡ се́ргїа и҆ ѿ негѡ̀ прїѧ́въ а҆́гг҃льскїй ѡ҆́бразъ, поревнова́лъ є҆сѝ бг҃омꙋ́дромꙋ є҆гѡ̀ смире́нїю и҆ трꙋдолю́бїю, и҆ кꙋ́пнѡ съ ни́мъ де́нь и҆ но́щь воспѣва́лъ є҆сѝ сп҃си́телю, всѣ́хъ бг҃ꙋ: А҆ллилꙋ́їа.

І҆́косъ в҃

Ра́зꙋмъ и҆ се́рдце покори́въ хрⷭ҇тꙋ̀ сп҃си́телю, глаго́лющꙋ: и҆́же хо́щетъ по мнѣ̀ и҆тѝ, да ѿве́ржетсѧ себє̀, и҆ во́зметъ кре́стъ сво́й, и҆ по мнѣ̀ грѧде́тъ, невозвра́тнѡ ѿврати́лъ є҆сѝ лицѐ своѐ ѿ мі́ра сегѡ̀, ꙗ҆́кѡ ѿ вавѷлѡ́на грѣхо́внагѡ, и҆ презрѣ́въ всѧ̑ кра̑снаѧ и҆ блага̑ѧ є҆гѡ̀, водвори́лсѧ є҆сѝ въ пꙋсты́ни, ча́ѧ бг҃а, сп҃са́ющаго вои́телей свои́хъ. Ны́нѣ же предстои́ши прⷭ҇то́лꙋ бж҃їю, наслажда́ѧсѧ нбⷭ҇ныхъ бл҃гъ, и҆ ве́лїе дерзнове́нїе и҆мѣ́ѧ ко гдⷭ҇ꙋ, не забꙋ́ди на́съ, къ ра́цѣ моще́й твои́хъ ᲂу҆се́рднѡ притека́ющихъ и҆ восхвалѧ́ющихъ тѧ̀:

Ра́дꙋйсѧ, жите́йскихъ сꙋе́тъ и҆ мїрски́хъ собла́знѡвъ и҆збѣжа́вый: ра́дꙋйсѧ, и҆́ноческое безстра́стїе и҆ безмо́лвїе стѧжа́вый.

Ра́дꙋйсѧ, всѧ̑ блага̑ѧ землѝ, нбⷭ҇нагѡ ра́ди црⷭ҇твїѧ, за ᲂу҆ме́ты вмѣни́вый: ра́дꙋйсѧ, равноа́гг҃льное житїѐ до конца̀ возлюби́вый.

Ра́дꙋйсѧ, возненави́дѣвый мі́ра сегѡ̀ грѣхо́внꙋю сла́дость: ра́дꙋйсѧ. воспрїе́мый ѡ҆бѣтова́нїе непрестаю́щїѧ жи́зни.

Ра́дꙋйсѧ, ѡ҆блече́нный сла́вою нбⷭ҇нагѡ црⷭ҇твїѧ: ра́дꙋйсѧ, сокро́вище некра́домое и҆ нетлѣ́нное ѡ҆брѣты́й.

Ра́дꙋйсѧ, ѡ҆ цр҃кви хрⷭ҇то́вой, на землѝ во́инствꙋющей, мл҃твенниче нбⷭ҇ный: ра́дꙋйсѧ, ѡ҆ всѣ́хъ вѣ́рныхъ, на поклоне́нїе къ тебѣ̀ притека́ющихъ, предста́телю.

Ра́дꙋйсѧ, ѻ҆́ч҃е на́шъ са́вво, чꙋдотво́рче пресла́вный.

Конда́къ г҃

Си́лою, и҆злїѧ́нною на тѧ̀ свы́ше, возше́дъ на высотꙋ̀ добродѣ́телей, посто́мъ и҆ бдѣ́нїемъ, мл҃твами и҆ цѣломⷣрїемъ, ꙗ҆́кѡ многоцѣ́ннымъ вѣнце́мъ бл҃гоꙋстрое́нїѧ и҆́ноческагѡ, повсю́дꙋ просїѧ́лъ є҆сѝ: сегѡ̀ ра́ди всѝ вели́ка и҆ пресла́вна тѧ̀ почита́хꙋ. Ты́ же, бѣ́гаѧ сла́вы ѿ человѣ̑къ, пребыва́лъ є҆сѝ ꙗ҆́кѡ є҆ди́нъ ѿ просты́хъ, трꙋжда́ѧсѧ па́че всѣ́хъ и҆ поѧ̀ хвалꙋ̀ є҆ди́номꙋ, въ трⷪ҇цѣ сла́вимомꙋ бг҃ꙋ: А҆ллилꙋ́їа.

І҆́косъ г҃

И҆мѣ́ѧй дꙋ́шꙋ смиренномꙋ́дрїѧ и҆спо́лненꙋ, а҆́ще и҆ ᲂу҆страша́ѧсѧ бре́мене нача́льства, ѻ҆ба́че не преслꙋ́шавъ во́ли бж҃їѧ, прїѧ́лъ є҆сѝ порꙋче́нное тебѣ̀ ста́до хрⷭ҇то́во и҆ до́брѣ въ пасе́нїи є҆гѡ̀ пребы́лъ є҆сѝ. Ны́нѣ же, вы́нꙋ предстоѧ̀ прⷭ҇то́лꙋ бж҃їю, бл҃госпоспѣ́шествꙋй мл҃твами твои́ми всѣ̑мъ, взыва́ющымъ къ тебѣ̀:

Ра́дꙋйсѧ, безпрекосло́вный во́ли ᲂу҆чи́телѧ твоегѡ̀ и҆сполни́телю: ра́дꙋйсѧ, до́брый ста́да хрⷭ҇то́ва наста́вниче.

Ра́дꙋйсѧ, возлю́бленный па́че мно́гихъ и҆збра́нникомъ бж҃їимъ се́ргїемъ, ѿ негѡ́же не ᲂу҆таи́сѧ ст҃ы́нѧ твоѧ̀: ра́дꙋйсѧ, бл҃гово́нный крі́не вертогра́да цр҃ко́внагѡ.

Ра́дꙋйсѧ, свѣ́тлый сосꙋ́де бжⷭ҇твенныѧ блгⷣти: ра́дꙋйсѧ, свѣти́льниче, не сокры́выйсѧ под̾ спꙋ́домъ, но на свѣ́щницѣ поста́вленный.

Ра́дꙋйсѧ, чⷭ҇тно́е ст҃а́гѡ дх҃а селе́нїе: ра́дꙋйсѧ, прпⷣбныхъ свѣ́тлое ᲂу҆краше́нїе.

Ра́дꙋйсѧ, и҆́нокѡвъ въ по́двизѣхъ по́стническихъ ᲂу҆крѣплѧ́ѧй: ра́дꙋйсѧ, заблꙋ́ждшымъ пꙋ́ть спасе́нїѧ показꙋ́ѧй.

Ра́дꙋйсѧ, ѻ҆́ч҃е на́шъ са́вво, чꙋдотво́рче пресла́вный.

Конда́къ д҃

Бꙋ́рю страсте́й и҆ и҆скꙋше́нїй вра́жїихъ, препобѣжда́ѧ посто́мъ, бдѣ́нїемъ и҆ мл҃твами, ᲂу҆толи́лъ є҆сѝ до конца̀. Ны́нѣ ᲂу҆́бѡ причаща́ѧсѧ сла́вы нбⷭ҇ныѧ со всѣ́ми ст҃ы́ми, предстои́ши цр҃ю̀ сла́вы и҆ пое́ши кꙋ́пнѡ съ ни́ми: А҆ллилꙋ́їа.

І҆́косъ д҃

Слы́шаще бли́жнїи и҆ да́льнїи бг҃оꙋго́дное твоѐ житїѐ, стека́хꙋсѧ ѿ ѡ҆кре́стныхъ стра́нъ къ тебѣ̀, по́льзы ра́ди: ты́ же всѣ́хъ любе́знѡ прїе́млѧ, согрѣва́лъ є҆сѝ сердца̀ и҆̀хъ бжⷭ҇твенною любо́вїю. Къ тебѣ̀ ᲂу҆̀бо и҆ мы̀ припа́дающе, мо́лимъ: наста́ви ны̀, ꙗ҆́кѡ ѻ҆те́цъ ча̑да своѧ̑, на стези̑ сп҃се́нїѧ; и҆ не забꙋ́ди взыва́ющихъ къ тебѣ̀:

Ра́дꙋйсѧ, всѣ̑мъ прибѣга́ющымъ къ тебѣ̀ наста́вниче предо́брый: ра́дꙋйсѧ, и҆́щꙋщымъ ᲂу҆спокое́нїѧ со́вѣсти собесѣ́дниче прети́хїй.

Ра́дꙋйсѧ, ᲂу҆ныва́ющихъ дꙋ́шъ ᲂу҆тѣ́шителю пресла́дкїй: ра́дꙋйсѧ, ка́ющихсѧ со ᲂу҆миле́нїемъ хода́таю преꙋсе́рдный.

Ра́дꙋйсѧ, заблꙋжда́ющихъ и҆справи́телю прекро́ткїй: ра́дꙋйсѧ, беззако́нныхъ ѡ҆бличи́телю неѕло́бивый.

Ра́дꙋйсѧ, къ воздержа́нїю и҆ цѣломꙋ́дрїю пꙋтеводи́телю неѡсла́бный: ра́дꙋйсѧ, борю́щымсѧ со страстьмѝ помо́щниче неꙋтоми́мый.

Ра́дꙋйсѧ, пра́вагѡ пꙋтѝ вѣ́ры и҆ бл҃гоче́стїѧ ᲂу҆каза́телю нело́жный: ра́дꙋйсѧ, молѧ́щимсѧ тебѣ̀ ѿ гнѣ́ва бж҃їѧ защи́тниче неѿстꙋ́пный.

Ра́дꙋйсѧ, ѻ҆́ч҃е на́шъ са́вво, чꙋдотво́рче пресла́вный.

Конда́къ є҃

Бг҃оте́чнаѧ ѕвѣзда̀ ꙗ҆ви́лсѧ є҆сѝ, прпⷣбне ѻ҆́ч҃е са́вво, ѿ мра́ка грѣхо́внагѡ хотѧ́щымъ прейтѝ къ сл҃нцꙋ пра́вды, ꙗ҆́снѡ пꙋ́ть показꙋ́ющаѧ. Тѣ́мже мо́лимъ тѧ̀: просвѣтѝ и҆ на̑ша сердца̀, страстьмѝ жите́йскими ѡ҆мрачє́ннаѧ, и҆ спосо́бствꙋй на́мъ досто́йнѡ воспѣва́ти бг҃ꙋ: А҆ллилꙋ́їа.

І҆́косъ є҃

Ви́дѧ бл҃говѣ́рный кн҃зь геѡ́ргїй смиренномꙋ́дрїе твоѐ, ꙗ҆́кѡ ᲂу҆клони́лсѧ є҆сѝ ѿ нача́льственныѧ вла́сти во ѡ҆би́тели ᲂу҆чи́телѧ твоегѡ̀, ᲂу҆стремлѧ́ѧсѧ къ пꙋсты́нномꙋ безмо́лвїю, то́й ᲂу҆молѝ тѧ̀, да всели́шисѧ на гора́хъ, глаго́лемыхъ сторо́жи. Ты́ же, и҆зволѧ́ѧ бл҃го́мꙋ жела́нїю, и҆ ѡ҆би́тель и҆́ноческꙋю здѣ̀ соста́вити хотѧ̀, ре́клъ є҆сѝ со прⷪ҇ро́комъ: сѐ поко́й мо́й, здѣ̀ вселю́сѧ, ꙗ҆́кѡ и҆зво́лихъ и҆̀. И҆ ско́рѡ на мѣ́стѣ се́мъ хра́мъ прест҃ы́ѧ бцⷣы созда́сѧ, въ не́мже ны́нѣ нетлѣ́нїемъ моще́й твои́хъ бл҃гоꙋха́еши и҆ немо́лчнѡ ко гдⷭ҇ꙋ вопїе́ши ѡ҆ возглаша́ющихъ къ тебѣ̀ сицєва́ѧ:

Ра́дꙋйсѧ, го́рлице пꙋстыннолюби́ваѧ и҆ доброви́днаѧ: ра́дꙋйсѧ, пꙋсты́ни до́брое прозѧбе́нїе

Ра́дꙋйсѧ, цвѣ́те присноцвѣтꙋ́щїй: ра́дꙋйсѧ, смиренномꙋ́дрїемъ и҆ всѧ́кими добродѣ́тельми странꙋ̀ сїю̀ ѡ҆благоꙋха́вшїй.

Ра́дꙋйсѧ, бл҃гополе́знѡ и҆ мꙋ́дрѡ проше́нїе кн҃зѧ соверши́вый: ра́дꙋйсѧ, цр҃ковь прекра́снꙋ здѣ̀ во сла́вꙋ ржⷭ҇тва̀ бцⷣы соѡрꙋди́вый

Ра́дꙋйсѧ, пꙋсты́ню во ѡ҆би́тель и҆́ночества претвори́вый: ра́дꙋйсѧ, ста́дꙋ твоемꙋ̀ вѣ́рный наста́вниче.

Ра́дꙋйсѧ, всѣ̑мъ притека́ющымъ къ тебѣ̀ ми́ръ и҆ бл҃гослове́нїе ѿ гдⷭ҇а мл҃твами твои́ми низводѧ́ѧй: ра́дꙋйсѧ, ѡ҆ всѣ́хъ градѣ́хъ и҆ вє́сѣхъ рѡссі́йскихъ мл҃твенниче неꙋсыпа́ющїй.

Ра́дꙋйсѧ, ѻ҆́ч҃е на́шъ са́вво, чꙋдотво́рче пресла́вный.

Конда́къ ѕ҃

Про́повѣди є҆ѵⷢ҇льскїѧ послꙋ́шавъ: не пецы́тесѧ дꙋше́ю ва́шею, что̀ ꙗ҆́сте, и҆лѝ что̀ пїе́те: ни тѣ́ломъ ва́шимъ, во что̀ ѡ҆блече́тесѧ, ᲂу҆праздни́лъ є҆сѝ се́рдце твоѐ ѿ жите́йскихъ забѡ́тъ, пита́ѧсѧ бы́лїемъ пꙋсты́ннымъ и҆ малоцѣ̑нныѧ ри̑зы носѧ̀. Сегѡ̀ ра́ди нетлѣ́нїѧ ѡ҆де́ждою ѡ҆дѣ́ѧлсѧ є҆сѝ по преставле́нїи твое́мъ, ю҆́же ѿ хрⷭ҇та̀ бг҃а полꙋчи́ти и҆ на́мъ и҆спросѝ, вопїю́щымъ є҆мꙋ̀: А҆ллилꙋ́їа.

І҆́косъ ѕ҃

Возсїѧ́лъ є҆сѝ, ꙗ҆́кѡ бг҃освѣ́тлое свѣти́ло, во странѣ̀ рѡссі́йстѣй, всебл҃же́нне ѻ҆́ч҃е са́вво, ѡ҆зарѧ́ѧ на́съ лꙋча́ми добродѣ́телей и҆ чꙋде́съ твои́хъ. Тѣ́мже вопїе́мъ тѝ:

Ра́дꙋйсѧ, дарова́ньми ст҃а́гѡ дх҃а сїѧ́ющїй чле́не цр҃кве хрⷭ҇то́вы: ра́дꙋйсѧ, преизоби́лꙋѧй и҆́стиннымъ къ бг҃ꙋ ᲂу҆миле́нїемъ.

Ра́дꙋйсѧ, подража́телю прпⷣбныхъ въ соверше́нномъ терпѣ́нїи: ра́дꙋйсѧ, по́двигѡвъ и҆́ноческихъ ревни́телю.

Ра́дꙋйсѧ, стра̑сти грѣхѡ́вныѧ, си́лою бл҃года́ти, въ себѣ̀ ᲂу҆мертви́вый: ра́дꙋйсѧ, нищеты̀ и҆ нестѧжа́нїѧ ѡ҆́бразе.

Ра́дꙋйсѧ, свѣ́тлое ст҃ы́ни зерца́ло: ра́дꙋйсѧ, всѣ́хъ добродѣ́телей рачи́телю.

Ра́дꙋйсѧ, немощны́хъ цѣле́бниче: ра́дꙋйсѧ, же́зле, па́дающихъ подкрѣплѧ́ющїй.

Ра́дꙋйсѧ, ѻ҆́ч҃е на́шъ са́вво, чꙋдотво́рче пресла́вный.

Конда́къ з҃

Хотѧ́щꙋ бл҃говѣ́рномꙋ кн҃зю геѡ́ргїю во́инствовати на сꙋпоста́ты, бл҃гослове́нїе препо́далъ є҆сѝ, ѻ҆́ч҃е, на ѡ҆долѣ́нїе, глаго́лѧ прⷪ҇ро́чески: и҆зы́ди, бл҃говѣ́рный кн҃же, гдⷭ҇ь тѝ помо́жетъ, и҆ врагѡ́въ твои́хъ ѡ҆долѣ́еши, и҆ бл҃года́тїю бж҃їею здра́въ возврати́шисѧ въ ѻ҆те́чество твоѐ! є҆́же и҆ бы́сть по глаго́лꙋ твоемꙋ̀. Ѻ҆́нъ ᲂу҆̀бо, возврати́всѧ ѿ бра́ни съ побѣ́дою и҆ сла́вою, и҆ мно́гими дармѝ снабдѣва́ѧ ѡ҆би́тель твою̀, воспѣва́ше бл҃года́рственнѡ ди́вномꙋ во ст҃ы́хъ свои́хъ бг҃ꙋ: А҆ллилꙋ́їа.

І҆́косъ з҃

Но́вый подража́тель дре́внихъ ратобо́рцєвъ на стра̑сти плѡтскі́ѧ ꙗ҆ви́лсѧ є҆сѝ, ѻ҆́ч҃е са́вво: ѿ ю҆́ности бо ᲂу҆́мъ тво́й впери́въ къ бг҃ꙋ, ꙗ҆́кѡ сто́лпъ вѣ́ры непоколеби́мый, да́же до ста́рости масти́тыѧ пребы́лъ є҆сѝ въ распина́нїи пло́ти своеѧ̀, со страстьмѝ и҆ похотьмѝ. Сегѡ̀ ра́ди не можа́хꙋ си̑лы бѣсѡ́вскїѧ запина́ти нога́ма твои́ма, нижѐ ᲂу҆спѣва́хꙋ ᲂу҆страша́ти тѧ̀ и҆здале́ча, ѿ и҆́хже навѣ́тѡвъ и҆ напа́стей соблюдѝ неврежде́нныхъ и҆ на́съ, торже́ственнѡ воспѣва́ющихъ тебѣ̀:

Ра́дꙋйсѧ, ли́кꙋ дре́внихъ по́стникѡвъ сопричте́нный: ра́дꙋйсѧ, всено́щными мл҃твами и҆ бдѣ́нїемъ всю̀ пре́лесть бѣсо́вскꙋю посрами́вый.

Ра́дꙋйсѧ, чистоты̀ и҆ воздержа́нїѧ храни́телю: ра́дꙋйсѧ, страсте́й дꙋше́вныхъ и҆ тѣле́сныхъ побѣди́телю.

Ра́дꙋйсѧ, во́ине хрⷭ҇то́въ неꙋстраши́мый: ра́дꙋйсѧ, ѡ҆бдержи́мымъ бѣсо́вскою си́лою наде́жный врачꙋ̀.

Ра́дꙋйсѧ, надме́нныхъ мꙋдрова́нїемъ пло́ти къ покоре́нїю глаго́ломъ бж҃їимъ приводѧ́й: ра́дꙋйсѧ, всѣ̑мъ напа́ствꙋемымъ ѿ дꙋ́ха льстѝ дх҃о́вное зрѣ́нїе и҆ трезвѣ́нїе подава́ѧй.

Ра́дꙋйсѧ, дꙋ́ха вражды̀ и҆ любонача́лїѧ ѿ притека́ющихъ къ тебѣ̀ прогонѧ́ѧй: ра́дꙋйсѧ, ꙗ҆́кѡ хода́тайствомъ твои́мъ дарѡ́въ ст҃а́гѡ дх҃а, въ во́инствованїи хрⷭ҇то́вомъ ᲂу҆крѣплѧ́ющихъ, сподоблѧ́емсѧ.

Ра́дꙋйсѧ, ѻ҆́ч҃е на́шъ са́вво, чꙋдотво́рче пресла́вный.

Конда́къ и҃

Стра́нное чꙋ́до сотвори́лъ є҆сѝ, преди́вный ѻ҆́ч҃е са́вво, є҆гда̀ нечести́вїи хотѧ́хꙋ расхи́тити достоѧ́нїе цр҃кве твоеѧ̀. Ѻ҆нѝ, ꙗ҆́кѡ та́тїе, ᲂу҆стремлѧ́хꙋсѧ ѻ҆ко́нцемъ, є҆́же бѣ́ ᲂу҆ гро́ба твоегѡ̀: здѣ́ же ве́лїѧ гора̀, показа́сѧ и҆̀мъ, на ню́же взы́ти нѣ́сть мо́щно. Со стꙋдо́мъ ᲂу҆́бѡ возвра́щшесѧ ѿсю́дꙋ, послѣди́ же раска́ѧвшесѧ, съ во́племъ и҆ слеза́ми, грѣ́хъ сво́й и҆сповѣ́даша пред̾ всѣ́ми, и҆ ско́рѡ пꙋ́ть непра́вды ѡ҆ста́вльше, въ покаѧ́нїи про́чее пожи́ша, съ вѣ́рою вопїю́ще бг҃ꙋ: А҆ллилꙋ́їа.

І҆́косъ и҃

Ве́сь бы́лъ є҆сѝ въ бз҃ѣ, є҆щѐ сы́й на землѝ, въ по́двизѣхъ и҆́ноческагѡ житїѧ̀: предстоѧ́щꙋ бо тѝ пред̾ лице́мъ гдⷭ҇нимъ на бжⷭ҇твенной слꙋ́жбѣ, зри́мо быва́ше воспламене́нїе чꙋ́дное въ лицѣ̀ твое́мъ ѿ мл҃твеннагѡ въ дꙋ́сѣ горѣ́нїѧ къ бг҃ꙋ. Ѻ҆вогда́ же въ толи́комъ бѣ̀ ᲂу҆миле́нїи дꙋша̀ твоѧ̀, ꙗ҆́кѡ и҆сточа́тисѧ пото́кѡмъ сле́знымъ ѿ ѻ҆че́съ твои́хъ неꙋдержи́мѡ, и҆́хже ра́ди є҆динонра́вна тѧ̀ зрѧ́хꙋ бы́ти со прⷪ҇ро́комъ, глаго́лющымъ: бы́ша сле́зы моѧ̑ мнѣ̀ хлѣ́бъ де́нь и҆ но́щь. Ѻ҆ба́че, ве́лїе стѧжа́въ дерзнове́нїе къ бг҃ꙋ, не забꙋ́ди и҆ на́съ, со слеза́ми печа́ли ѡ҆ грѣсѣ́хъ свои́хъ къ твоемꙋ̀ застꙋпле́нїю притека́ющихъ и҆ вопїю́щихъ къ тебѣ̀:

Ра́дꙋйсѧ, ѻ҆гне́мъ бжⷭ҇твенныѧ любвѐ ве́тхагѡ человѣ́ка въ себѣ̀ попали́вый: ра́дꙋйсѧ, во пло́ти, а҆́ки безпло́тенъ, на землѝ пожи́вый.

Ра́дꙋйсѧ, живы́ми и҆ сп҃си́тельными слеза́ми ѻ҆́гнь по́хоти ᲂу҆гаси́вый: ра́дꙋйсѧ, го́рнїѧ ра́дости и҆ бл҃же́нства а҆́гг҃льскагѡ соприча́стниче.

Ра́дꙋйсѧ, за премно́гꙋю любо́вь твою̀ къ бг҃ꙋ ѻ҆ц҃ꙋ̀ сла́вою и҆ че́стїю препросла́вленный: ра́дꙋйсѧ, за глꙋбо́кое смире́нїе твоѐ ѿ хрⷭ҇та̀, сн҃а бж҃їѧ, вѣнце́мъ нетлѣ́нїѧ ᲂу҆вѣнча́нный.

Ра́дꙋйсѧ, за чистотꙋ̀ и҆ безстра́стїе а҆́гг҃льское ѿ прест҃а́гѡ дх҃а ѡ҆сїѧ́нный: ра́дꙋйсѧ, пречⷭ҇тна́ѧ ѻ҆би́теле ст҃ы́ѧ трⷪ҇цы.

Ра́дꙋйсѧ, бж҃їѧ мт҃ре слꙋжи́телю вѣ́рный и҆ неꙋсыпа́ѧй: ра́дꙋйсѧ, въ хра́мѣ є҆ѧ̀ горѣ̀ возноси́выйсѧ дх҃омъ, и҆ ны́нѣ тѣ́ломъ па́ки пребыва́ѧй.

Ра́дꙋйсѧ, ѻ҆́ч҃е на́шъ са́вво, чꙋдотво́рче пресла́вный.

Конда́къ ѳ҃

Всѧ́кїѧ бѣды̀ и҆ ско́рби и҆зба́ви на́съ, прпⷣбне ѻ҆́ч҃е са́вво, твои́ми те́плыми къ бг҃ꙋ мл҃твами, и҆ и҆спросѝ на́мъ всѧ̑ ко вре́менной и҆ вѣ́чной жи́зни потрє́бнаѧ, да сподо́бимсѧ го́рнѧгѡ і҆ерⷭ҇ли́ма дости́гнꙋти и҆ кꙋ́пнѡ съ тобо́ю воспѣва́ти бг҃ꙋ: А҆ллилꙋ́їа.

І҆́косъ ѳ҃

Вѣті̑ѧ многовѣща́ннїи недоꙋмѣ́ютъ досто́йнѡ восхвали́ти тѧ̀, бг҃омꙋ́дре са́вво: кто́ бо дово́ленъ разꙋмѣ́ти всѧ̀ борє́нїѧ твоѧ̑ съ мїродержи́тели тьмы̀ вѣ́ка сегѡ̀, и҆лѝ кто̀ и҆зочте́тъ трꙋды̀, болѣ́зни и҆ по́двиги твоѧ̑, въ ни́хже пꙋстыннолю́бное житїѐ соверша́лъ є҆сѝ. Ѻ҆ба́че мы̀, любо́вїю твое́ю побѣжда́еми, бл҃года́рнѣ тебѣ̀ зове́мъ:

Ра́дꙋйсѧ, зако́на бж҃їѧ и҆сполни́телю всеꙋсе́рдный: ра́дꙋйсѧ, чⷭ҇тото́ю и҆ цѣломꙋ́дрїемъ многоцѣ́ннагѡ би́сера честнѣ́йшїй.

Ра́дꙋйсѧ, въ терпѣ́нїи и҆ боре́нїи проти́вꙋ пло́ти а҆дама́нта твердѣ́йшїй: ра́дꙋйсѧ, смиренномꙋ́дрїемъ и҆ кро́тостїю па́че сла́вныхъ землѝ просла́вленный.

Ра́дꙋйсѧ, борю́щымсѧ со страстьмѝ и҆ похотьмѝ помо́щниче непобѣди́мый: ра́дꙋйсѧ, въ трꙋдѣ́хъ, бдѣ́нїи и҆ воздержа́нїи вели̑кимъ по́стникѡмъ подража́телю ре́вностнѣйшїй.

Ра́дꙋйсѧ, въ дꙋхо́вной мꙋ́дрости наста́вниче бл҃гоискꙋ́снѣйшїй: ра́дꙋйсѧ, по́двигѡвъ и҆́ноческихъ показа́телю рачи́тельнѣйшїй.

Ра́дꙋйсѧ, дрꙋ́гꙋ бж҃їю прпⷣбномꙋ се́ргїю є҆динонра́вный: ра́дꙋйсѧ, къ ли́кꙋ дрꙋгѡ́въ бж҃їихъ на нб҃са̀ пресели́выйсѧ.

Ра́дꙋйсѧ, ѻ҆́ч҃е на́шъ са́вво, чꙋдотво́рче пресла́вный.

Конда́къ і҃

Сп҃сти́сѧ хотѧ́ще вѣ́рнїи ѿ разли́чныхъ напа́стей и҆ бѣ́дъ мі́ра сегѡ̀, тебѣ̀ те́плагѡ предста́телѧ и҆ мл҃твенника къ бг҃ꙋ предлага́емъ. Не тще́тнꙋ сотворѝ на́шꙋ наде́ждꙋ на мл҃твы твоѧ̑, но хода́тайствомъ твои́мъ и҆зба́ви на́съ ѿ лю́тыхъ бѣ́дъ, напа́стей, и҆скꙋше́нїй и҆ скорбе́й, да несмꙋще́ннѡ, ѿ и҆збы́тка се́рдца, глаго́лемъ всегда̀ бг҃ꙋ: А҆ллилꙋ́їа.

І҆́косъ і҃

Стѣ́нꙋ тѧ̀ тве́рдꙋ и҆ мл҃твенника и҆зрѧ́дна стѧжа́въ, ст҃а́ѧ ѡ҆би́тель твоѧ̀ и҆ всѝ страны̑ рѡссі́йскїѧ застꙋпле́нїемъ твои́мъ хва́лѧтсѧ. Тѣ́мже и҆ мы̀ грѣ́шнїи, ко гро́бꙋ твоемꙋ̀ прите́кше, ꙗ҆́кѡ ча̑да ѻ҆тца̀, мо́лимъ: застꙋпѝ и҆ сохранѝ на́съ ѿ и҆скꙋше́нїй и҆ скорбе́й, бѣ́дъ и҆ напа́стей мл҃твами твои́ми, да взыва́емъ тѝ ра́достнѡ:

Ра́дꙋйсѧ, бл҃гово́нный крі́не ра́йскагѡ вертогра́да: ра́дꙋйсѧ, кѷпарі́се, вѣ́рныхъ сердца̀ бл҃гово́нїемъ ᲂу҆слажда́ющїй.

Ра́дꙋйсѧ, дре́во бл҃госѣнноли́ственное, и҆́мже ѡ҆би́тель твоѧ̀ покрыва́етсѧ: ра́дꙋйсѧ, неꙋсы́пный мл҃твенниче, жела̑нїѧ вѣ́рныхъ во бл҃ги́хъ и҆сполнѧ́ѧй.

Ра́дꙋйсѧ, наде́ждо и҆ ѡ҆ти́шїе въ мо́ри житїѧ̀ сегѡ̀ пла́вающихъ: ра́дꙋйсѧ, тве́рдое ѡ҆гражде́нїе и҆ прибѣ́жище ᲂу҆се́рднѡ бг҃ꙋ рабо́тающихъ.

Ра́дꙋйсѧ, неисчерпа́емый и҆сто́чниче и҆сцѣле́нїй: ра́дꙋйсѧ, стрꙋѐ, напаѧ́ющаѧ и҆ веселѧ́щаѧ жа́ждꙋщихъ пра́вды.

Ра́дꙋйсѧ, ꙗ҆́кѡ въ ско́рбехъ жите́йскихъ и҆ ѡ҆бстоѧ́нїихъ сподоблѧ́емсѧ твоегѡ̀ застꙋпле́нїѧ: ра́дꙋйсѧ, всѣ́хъ ᲂу҆се́рднѡ притека́ющихъ къ тебѣ̀ ѿ и҆скꙋше́нїй и҆ бѣ́дъ ско́рое и҆збавле́нїе.

Ра́дꙋйсѧ, ѻ҆́ч҃е на́шъ са́вво, чꙋдотво́рче пресла́вный.

Конда́къ а҃і

Пѣ́нїе всеꙋмиле́нное прино́симъ тѝ, пребл҃же́нне ѻ҆́ч҃е са́вво, и҆ со дерзнове́нїемъ мо́лимъ: вознесѝ ко гдⷭ҇ꙋ ѡ҆ сп҃се́нїи дꙋ́шъ на́шихъ твою̀ ст҃ꙋ́ю мл҃твꙋ, да сподо́бимсѧ вѣ́чнѡ въ ра́дости бл҃же́ннѣй воспѣва́ти бг҃ꙋ: А҆ллилꙋ́їа.

І҆́косъ а҃і

Свѣтопода́тельными лꙋча́ми блиста́етъ житїѐ твоѐ, ѻ҆́ч҃е на́шъ са́вво: всѧ́кїѧ бо добродѣ́тели є҆ѵⷢ҇льскїѧ ꙗ҆влѧ́етсѧ въ тебѣ̀ и҆сполне́нїе, тѣ́мже и҆ глаго́лемъ:

Ра́дꙋйсѧ, сꙋгꙋ́быѧ ра́ди нищеты̀ бога́тство нбⷭ҇ное ѡ҆брѣты́й: ра́дꙋйсѧ, пла́чемъ и҆ ᲂу҆миле́нїѧ слеза́ми ᲂу҆тѣше́нїе вѣ́чное прїѧ́вый.

Ра́дꙋйсѧ, а҆лка́вый и҆ жажда́вый пра́вды, ны́нѣ же насыща́ѧйсѧ ра́йскимъ бл҃же́нствомъ: ра́дꙋйсѧ, ми́лостивымъ ѡ҆бѣща́нное воздаѧ́нїе ᲂу҆лꙋчи́вый.

Ра́дꙋйсѧ, чⷭ҇тото́ю се́рдца твоегѡ̀ лицезрѣ́нїѧ бж҃їѧ дости́гнꙋвый: ра́дꙋйсѧ, миротворє́нїѧми мно́гими въ ли́цѣ сынѡ́въ бж҃їихъ бы́ти сподо́бивыйсѧ.

Ра́дꙋйсѧ, терпѣ́нїемъ пра́вды ра́ди въ црⷭ҇тво нбⷭ҇ное водвори́выйсѧ: ра́дꙋйсѧ, ѡ҆́бразомъ кро́тости, ти́хости и҆ неѕло́бїѧ поꙋче́нїе сꙋ́щымъ въ ѡ҆ѕлобле́нїи подава́ѧй.

Ра́дꙋйсѧ, примѣ́ромъ братолю́бїѧ ко и҆ска́нїю не свои́хъ сѝ, но ꙗ҆́же бли́жнѧгѡ, и҆ на̑ша сердца̀ ᲂу҆твержда́ѧй: ра́дꙋйсѧ, всѣ́хъ со стра́хомъ рабо́тающихъ гдⷭ҇еви ра́досте.

Ра́дꙋйсѧ, ѻ҆́ч҃е на́шъ са́вво, чꙋдотво́рче пресла́вный.

Конда́къ в҃і

Бл҃года́ть, да́ннаѧ тѝ ѿ бг҃а, цѣли́ти недꙋ́ги дꙋшє́вныѧ и҆ тѣлє́сныѧ, созыва́етъ вѣ́рныхъ ко всечⷭ҇тны̑мъ моще́мъ твои̑мъ: при ни́хже и҆ ма́лое моле́нїе приносѧ́щымъ ве́лїѧ бл҃года́ть ѿ бг҃а подае́тсѧ, ю҆́же прїе́млюще, дрꙋ́гъ со дрꙋ́гомъ ра́достнѡ бг҃ꙋ возглаша́емъ: А҆ллилꙋ́їа.

І҆́косъ в҃і

Пою́ще вє́лїѧ твоѧ̑, досточꙋ́дне ѻ҆́ч҃е, по́двиги и҆ трꙋды̀, ᲂу҆бл҃жа́емъ приснопа́мѧтное ᲂу҆спе́нїе твоѐ: а҆́ще бо и҆ преста́вилсѧ є҆сѝ ѿ на́съ, но жи́въ сы́й и҆ по сме́рти, не ѿстꙋпа́еши ѿ на́съ дꙋ́хомъ: ѻ҆ба́че и҆ моще́й твои́хъ ра́ка пред̾ ѻ҆чи́ма на́шима ви́дима є҆́сть всегда̀. Къ тебѣ̀ ᲂу҆́бѡ припа́даемъ, тебѣ̀ мо́лимсѧ и҆ восхвалѧ́емъ тѧ̀ си́це:

Ра́дꙋйсѧ, въ вѣ́рѣ и҆ любвѝ бжⷭ҇твенной бл҃гоговѣ́йнѡ ѿ ю҆́ности и҆ бл҃гоче́стнѡ до масти́тыѧ ста́рости пожи́вый: ра́дꙋйсѧ, многотрꙋ̑дныѧ и҆ разноѡбра̑зныѧ во и҆́ночествѣ по́двиги до́брѣ соверши́вый.

Ра́дꙋйсѧ, ꙗ҆́кѡ соверше́ннагѡ ѡ҆сщ҃е́нїѧ ѿ дх҃а ст҃а́гѡ и҆спо́лненъ є҆сѝ: ра́дꙋйсѧ, чꙋ́дномꙋ ᲂу҆ч҃телю твоемꙋ̀ ᲂу҆подо́бивыйсѧ всецѣ́лою чистото́ю и҆ ст҃остїю.

Ра́дꙋйсѧ, ꙗ҆́кѡ съ бг҃омꙋ́дрымъ се́ргїемъ на нб҃сѣ́хъ при́снѡ ликꙋ́еши: ра́дꙋйсѧ, ꙗ҆́кѡ съ ни́мъ кꙋ́пнѡ бг҃а ѡ҆ на́съ грѣ́шныхъ ᲂу҆молѧ́еши.

Ра́дꙋйсѧ, ꙗ҆́кѡ нетлѣ́нїемъ моще́й твои́хъ, а҆́ки трꙋбо́ю, проповѣ́дꙋетсѧ бꙋ́дꙋщее всѣ́хъ воскрⷭ҇нїе: ра́дꙋйсѧ, странѣ̀ се́й и҆ всемꙋ̀ ѻ҆те́чествꙋ на́шемꙋ многоцѣ́нное ᲂу҆краше́нїе.

Ра́дꙋйсѧ, ꙗ҆́кѡ тобо́ю мона́хѡвъ мно́жєства въ по́двизѣхъ свои́хъ ᲂу҆крѣпле́нїе прїе́млютъ: ра́дꙋйсѧ, ꙗ҆́кѡ хода́тайствомъ твои́мъ вѣ́рнїи и҆ въ молва́хъ жите́йскихъ сп҃са́ютсѧ.

Ра́дꙋйсѧ, ѻ҆́ч҃е на́шъ са́вво, чꙋдотво́рче пресла́вный.

Конда́къ г҃і

Ѽ пресла́вный чꙋдотво́рче и҆ ско́рый застꙋ́пниче на́шъ, бл҃же́нне ѻ҆́ч҃е са́вво! Ма́лое сїѐ ѿ на́съ приноше́нїе ны́нѣ прїи́мъ, и҆спросѝ на́мъ ᲂу҆ хрⷭ҇та̀ бг҃а ᲂу҆твержде́нїе въ вѣ́рѣ и҆ братолю́бїи, є҆́же бы́ти невреждє́ннымъ ѿ всѧ́кихъ и҆скꙋше́нїй, бѣ́дъ и҆ напа́стей, и҆ во грѧдꙋ́щемъ вѣ́цѣ мꙋ́къ вѣ́чныхъ и҆зба́витисѧ всѣ̑мъ, вопїю́щымъ є҆мꙋ̀: А҆ллилꙋ́їа.

Повто́ръ

Сей конда́къ глаго́лется три́жды, та́же і҆́косъ а҃-й и҆ конда́къ а҃-й.

І҆́косъ а҃

А҆́гг҃лъ во пло́ти ꙗ҆ви́лсѧ є҆сѝ на землѝ, прпⷣбне са́вво: ѿ ю҆́ности бо возлюби́въ бг҃а, равноа́гг҃льномꙋ поревнова́лъ є҆сѝ житїю̀ ᲂу҆чи́телѧ твоегѡ̀, пребл҃же́ннагѡ се́ргїа и҆ послꙋжи́въ гдⷭ҇еви въ пра́вдѣ и҆ прпⷣбїи во всѧ̑ дни̑ живота̀ своегѡ̀, по и҆схо́дѣ нетлѣ́нїемъ тѣлесѐ сїѧ́еши. Всѝ ᲂу҆̀бо бл҃гоговѣ́йнѡ чтꙋ́ще тѧ̀, воспѣва́емъ си́це:

Ра́дꙋйсѧ, и҆́стинный ст҃а́гѡ ᲂу҆чи́телѧ твоегѡ̀ ревни́телю: ра́дꙋйсѧ, земны́й а҆́гг҃ле и҆ нбⷭ҇ный чл҃вѣ́че.

Ра́дꙋйсѧ, вѣ́рный слꙋго̀ гдⷭ҇нь: ра́дꙋйсѧ, ᲂу҆се́рдный чистоты̀ и҆ воздержа́нїѧ храни́телю.

Ра́дꙋйсѧ, зерца́ло вѣ́ры бл҃гочести́выѧ: ра́дꙋйсѧ, ѡ҆́бразе кро́тости дꙋхо́вныѧ.

Ра́дꙋйсѧ, пꙋстынножи́телей красото̀: ра́дꙋйсѧ, и҆́нокѡвъ наста́вниче.

Ра́дꙋйсѧ, мнѡ́гимъ ко сп҃се́нїю пꙋтеводи́телю: ра́дꙋйсѧ, ско́рый помо́щниче притека́ющымъ къ тебѣ̀ съ вѣ́рою.

Ра́дꙋйсѧ, ѻ҆́ч҃е на́шъ са́вво, чꙋдотво́рче пресла́вный.

Конда́къ а҃

И҆збра́нный ѿ воево́ды и҆ гдⷭ҇а во́инствъ нбⷭ҇ныхъ, прпⷣбне ѻ҆́ч҃е на́шъ са́вво, си́лою крⷭ҇та̀ гдⷭ҇нѧ побѣди́вый напа̑сти, ꙗ҆́же ѿ дїа́вола, мі́ра и҆ пло́ти, ꙗ҆́кѡ и҆мѣ́ѧ дерзнове́нїе ко гдⷭ҇ꙋ, ѿ всѧ́кихъ и҆скꙋше́нїй, бѣ́дъ и҆ навѣ́тѡвъ вра́жїихъ мл҃твами твои́ми сохранѧ́й на́съ, похва̑льнаѧ съ любо́вїю тебѣ̀ воспѣва́ющихъ:

Ра́дꙋйсѧ, ѻ҆́ч҃е на́шъ са́вво, чꙋдотво́рче пресла́вный.

Моли́твы

Ѽ пречⷭ҇тна́ѧ и҆ сщ҃е́ннаѧ главо̀, нбⷭ҇нагѡ і҆ерⷭ҇ли́ма граждани́не, прест҃ы́ѧ трⷪ҇цы ѡ҆бита́лище, прпⷣбне ѻ҆́ч҃е са́вво! Ве́лїе и҆мѣ́ѧ дерзнове́нїе ко всемлⷭ҇тивомꙋ влⷣцѣ, моли́сѧ ѡ҆ ста́дѣ ѡ҆гра́ды твоеѧ̀, и҆ ѡ҆ всѣ́хъ, по дꙋ́хꙋ, ча́дѣхъ твои́хъ. Не премолчѝ за ны̀ ко гдⷭ҇ꙋ, и҆ не пре́зри, вѣ́рою и҆ любо́вїю чтꙋ́щихъ тѧ̀. И҆спросѝ, предста́тельствомъ твои́мъ, ᲂу҆ цр҃ѧ̀ ца́рствꙋющихъ ми́ръ цр҃кви, под̾ зна́менемъ крⷭ҇та̀ во́инствꙋющей, а҆рхїере́ѡмъ ст҃и́тельства бл҃голѣ́пїе, мона́шествꙋющымъ до́брое въ по́двизѣхъ тече́нїе: ст҃ѣ́й ѡ҆би́тели се́й, гра́дꙋ семꙋ̀ и҆ всѣ̑мъ градѡ́мъ и҆ страна́мъ ѡ҆хране́нїе; мі́рꙋ безмѧте́жїе и҆ ми́ръ, гла́да и҆ па́гꙋбы и҆збавле́нїе: ста̑рымъ и҆ немѡщны́мъ ᲂу҆тѣше́нїе и҆ подкрѣпле́нїе, ю҆́нымъ и҆ младе́нцємъ бл҃го́е въ вѣ́рѣ возраста́нїе, въ є҆ѵⷢ҇льскомъ ᲂу҆че́нїи тве́рдое ѡ҆бꙋче́нїе, и҆ въ чⷭ҇тотѣ̀ и҆ цѣломꙋ́дрїи пребыва́нїе; вдови́цамъ и҆ сирота́мъ ми́лость и҆ застꙋпле́нїе: плѣнє́ннымъ ѿра́дꙋ и҆ возвраще́нїе, болѧ́щымъ и҆сцѣле́нїе, малодꙋ́шнымъ ᲂу҆покое́нїе, заблꙋ́ждшымъ и҆справле́нїе, согрѣша́ющымъ дꙋ́хъ сокрꙋше́нїѧ: бѣ́дствꙋющымъ и҆ всѣ̑мъ, бл҃года́тнѣй по́мощи тре́бꙋющымъ, бл҃говре́меннꙋ по́мощь. Не посрамѝ на́съ, къ тебѣ̀ съ вѣ́рою притека́ющихъ: споспѣшествꙋ́й, ꙗ҆́кѡ чадолюби́вый ѻ҆те́цъ ча́дѡмъ, и҆ на́мъ понестѝ и҆́го хрⷭ҇то́во во бл҃годꙋ́шїи и҆ терпѣ́нїи; и҆ всѣ́хъ ᲂу҆пра́ви, въ ми́рѣ и҆ покаѧ́нїи сконча́ти живо́тъ сво́й непосты́днѡ и҆ пресели́тисѧ со ᲂу҆пова́нїемъ во ѡ҆би́тєли нбⷭ҇ныѧ; и҆дѣ́же ты̀, по трꙋдѣ́хъ и҆ по́двизѣхъ, ны́нѣ водворѧ́ешисѧ со а҆́гг҃лы и҆ ст҃ы́ми, зрѧ̀ и҆ прославлѧ́ѧ бг҃а, въ трⷪ҇цѣ сла́вимагѡ, ѻ҆ц҃а̀ и҆ сн҃а и҆ ст҃а́го дх҃а. А҆ми́нь.