Канѡ́нъ ст҃о́мꙋ прпⷣбномꙋ са́ввѣ стороже́вскомꙋ, звенигоро́дскомꙋ

Наста́ви мя́, Го́споди Бо́же мо́й, да возмогу́ благоче́стно уго́дника Твоего́, преподо́бнаго Са́ввы, сла́вное и честно́е восхвали́ти торжество́.

Му́жески подвиза́лся еси́ и, зарю́ духо́вную восприе́м, взя́лся еси́ к высоте́ небе́сней, и ны́не со а́нгелы прославля́ешися.

Ору́жием креста́ огражда́яся, преподо́бне, всю́ си́лу проти́внаго победи́л еси́ и до конца́ сего́ без ве́сти сотвори́л еси́.

Молча́нием язы́к обузда́л еси́ и немяте́жным житие́м во пло́ти а́нгельски, о́тче, пожи́л еси́.

Вои́стинну благи́я жи́зни сподо́бился еси́, преподо́бне, чистото́ю и поще́нием сию́ обре́т. И ны́не со безпло́тными вопие́ши: не́сть свя́т, па́че Тебе́, Го́споди.

Трисия́нным Све́том озаре́н, и благода́ть Ду́ха Свята́го всели́ся в тя́, преподо́бне, возлю́бльши чи́стую твою́ ду́шу, и непреста́нно вопие́ши: не́сть свя́т, па́че Тебе́, Го́споди.

Безме́рное смире́ние возлюби́в, своея́ мы́сли зри́тельное очи́стил еси́ и ны́не, в ра́йских селе́ниих водворя́яся, вопие́ши: сла́ва си́ле Твое́й, Го́споди.

Сле́зными пото́ки, преподо́бне, зе́млю се́рдца твоего́ напои́л еси́, предстоя́ в моли́тве неколе́блен, Творцу́ все́х взыва́л еси́: сла́ва си́ле Твое́й, Го́споди.

Не забу́ди ста́да твоего́, преподо́бне, е́же му́дре собра́л еси́ и в жи́зни се́й упа́сл еси́ благоче́стно: потщи́ся, о́тче на́ш Са́вво, ввести́ во огра́ду небе́сную.

Бо́дренными бде́нии, блаже́нне, и ча́стыми воздыха́нии, Благода́ть Ду́ха возрасте́ в тебе́, о́тче, и сла́вна тя́, Са́вво, показа́.

Влады́чне смире́ние восприи́м, во́ду почерпа́я, на ра́мех свои́х носи́ти изво́лил еси́: нача́льника трудополо́жна во все́м себе́ показа́л еси́.

Преблаже́нне, богоприя́тне о́тче на́ш Са́вво, непреста́нно ста́до твое́ вопие́т ти́: моли́твами твои́ми ко Го́споду спаси́ ны, мо́лимся.

Страда́нии по́двиг твои́х, преблаже́нне, кла́с боже́ственный возрасти́л еси́ и пита́еши благоче́стно восхваля́ющия тя́, Са́вво преподо́бне, о́тче на́ш.

Кня́зя проше́ние, о́тче, со тща́нием исполня́я, хра́м Богома́тере воздви́гл еси́, в не́мже пра́здничною ра́достию мона́хов мно́жества веселя́тся, па́мять твою́ прославля́юще.

Ка́плями по́тов твои́х, преподо́бне, враго́в ополче́ния попра́л еси́ и дости́гл еси́ а́нгельския невеще́ственныя ли́ки.

Пучи́ною сле́з твои́х, пребога́те, злонача́льнаго зми́я потопи́л еси́, я́ко победоно́сец изря́ден к небе́сным возлете́л еси́, непреста́нно вопие́ши: благослове́н Бо́г оте́ц на́ших.

Житие́ незло́биво име́л еси́, и непоро́чно, и укра́шено по́ты страда́ния, прехва́льне, Боже́ственнаго светоли́тия испо́лнився, взыва́л еси́: благослове́н Бо́г оте́ц на́ших.

Хва́лится, преподо́бне, гра́д тво́й, я́ко венце́м ца́рским обложи́ся, име́я мо́щи твоя́ в себе́, я́ко добра́ граждани́на от Бо́га прия́л е́сть.

Мудрова́ние плотско́е умертви́л еси́, че́сти и име́ния совле́клся еси́, от земли́ к небе́сным взы́ти тща́ся и вся́ пе́ти науча́я: Го́спода по́йте и превозноси́те его́ во ве́ки.

Се́рдца твоего́ бразды́, о́тче Са́вво, му́дре возде́лал еси́, сле́зными ту́чами сия́ напои́л еси́ и благоуха́нно ми́ро прине́слся еси́ Христу́, Ему́же вопие́ши: Го́спода по́йте и превозноси́те Его́ во ве́ки.

Христу́ принося́, блаже́нне, поще́ния, и сле́зы, и непоро́чную моли́тву, ри́зную ле́поту и мя́гкия оде́жды власяны́ми ру́бы премени́л еси́, си́м показу́я глубоча́йшее смире́ние.

Ви́дети сла́ву Вседержи́теля жела́я, обнови́л еси́ души́ кре́пость и сла́вою обогати́лся еси́ небе́сною.

Честно́е украше́ние благода́ти, о́тче преподо́бне Са́вво, испроси́ на́м во бране́х кре́пость и здра́вие телесе́, я́ко да непреста́нно тя́ велича́ем.

Чи́ни а́нгельстии тебе́, о́тче, срето́ша, и пра́ведных собо́ри возвесели́шася, и от вседержи́тельныя десни́цы Влады́чни венча́лся еси́, те́мже тя́ досто́йно велича́ем.

Наста́ви мѧ̀, гдⷭ҇и бж҃е мо́й, да возмогꙋ̀ благоче́стнѡ, ᲂу҆го́дника твоегѡ̀ прпⷣбнагѡ са́ввы сла́вное и҆ честно́е восхвали́ти торжество̀.

Мꙋ́жески подвиза́лсѧ є҆сѝ, и҆ зарю̀ дꙋхо́внꙋю воспрїе́мъ, взѧ́лсѧ є҆сѝ къ высотѣ̀ нбⷭ҇нѣй, и҆ ны́нѣ со а҆́гг҃лы прославлѧ́ешисѧ.

Ѻ҆рꙋ́жїемъ крⷭ҇та̀ ѡ҆гражда́ѧсѧ, прпⷣбне, всю̀ си́лꙋ проти́внагѡ побѣди́лъ є҆сѝ, и҆ до конца̀ сего̀ безъ вѣ́сти сотвори́лъ є҆сѝ.

Молча́нїемъ ѧ҆зы́къ ѡ҆бꙋзда́лъ є҆сѝ, и҆ немѧте́жнымъ житїе́мъ, во пло́ти а҆́гг҃льски, ѻ҆́тче, пожи́лъ є҆сѝ.

Вои́стиннꙋ бл҃гі́ѧ жи́зни сподо́билсѧ є҆сѝ, прпⷣбне, чистото́ю и҆ поще́нїемъ сїю̀ ѡ҆брѣ́тъ. и҆ ны́нѣ со безпло́тными вопїе́ши: нѣ́сть ст҃ъ па́че тебє̀, гдⷭ҇и.

Трисїѧ́ннымъ свѣ́томъ ѡ҆заре́нъ, и҆ бл҃года́ть дх҃а ст҃а́гѡ всели́сѧ въ тѧ̀, прпⷣбне, возлю́бльши чи́стꙋю твою̀ дꙋ́шꙋ, и҆ непреста́ннѡ вопїе́ши: нѣ́сть ст҃ъ па́че тебє̀, гдⷭ҇и.

Безмѣ́рное смире́нїе возлюби́въ, своеѧ̀ мы́сли зри́тельное ѡ҆чи́стилъ є҆сѝ, и҆ ны́нѣ, въ ра́йскихъ селе́нїихъ водворѧ́ѧсѧ, вопїе́ши: сла́ва си́лѣ твое́й, гдⷭ҇и.

Сле́зными потѡ́ки, прпⷣбне, зе́млю се́рдца твоегѡ̀ напои́лъ є҆сѝ, предстоѧ̀ въ моли́твѣ неколе́бленъ, творцꙋ̀ всѣ́хъ взыва́лъ є҆сѝ: сла́ва си́лѣ твое́й, гдⷭ҇и.

Не забꙋ́ди ста́да твоегѡ̀, прпⷣбне, є҆́же мꙋ́дрѣ собра́лъ є҆сѝ и҆ въ жи́зни се́й ᲂу҆па́слъ є҆сѝ благоче́стнѡ: потщи́сѧ, ѻ҆́тче на́шъ са́вво, ввестѝ во ѡ҆гра́дꙋ небе́снꙋю.

Бо́дренными бдѣ̑нїи, бл҃же́нне, и҆ ча́стыми воздыха̑нїи, бл҃года́ть дх҃а возрастѐ въ тебѣ̀, ѻ҆́тче, и҆ сла́вна тѧ̀, са́вво, показа̀.

Влⷣчне смире́нїе воспрїи́мъ, во́дꙋ почерпа́ѧ на ра́мѣхъ свои́хъ носи́ти и҆зво́лилъ є҆сѝ: нача́льника трꙋдополо́жна во все́мъ себѐ показа́лъ є҆сѝ.

Пребл҃же́нне, бг҃опрїѧ́тне ѻ҆́тче на́шъ са́вво, непреста́ннѡ ста́до твоѐ вопїе́тъ тѝ: моли́твами твои́ми ко гдⷭ҇ꙋ спаси́ ны, мо́лимсѧ.

Страда̑нїи пѡ́двигъ твои́хъ, пребл҃же́нне, кла́съ бжⷭ҇твенный возрасти́лъ є҆сѝ: и҆ пита́еши благоче́стнѡ восхвалѧ́ющыѧ тѧ̀, са́вво прпⷣбне, ѻ҆́тче на́шъ.

Кнѧ́зѧ проше́нїе, ѻ҆́тче, со тща́нїемъ и҆сполнѧ́ѧ, хра́мъ бг҃омт҃ре воздви́глъ є҆сѝ, въ не́мже пра́здничною ра́достїю мона́хѡвъ мно́жєства веселѧ́тсѧ, па́мѧть твою̀ прославлѧ́юще.

Ка́плѧми по́тѡвъ твои́хъ, прпⷣбне, врагѡ́въ ѡ҆полчє́нїѧ попра́лъ є҆сѝ, и҆ дости́глъ є҆сѝ а҆́гг҃льскїѧ невеще́ствєнныѧ ли́ки.

Пꙋчи́ною сле́зъ твои́хъ, пребога́те, ѕлонача́льнаго ѕмі́ѧ потопи́лъ є҆сѝ, ꙗ҆́кѡ побѣдоно́сецъ и҆зрѧ́денъ къ нбⷭ҇нымъ возлетѣ́лъ є҆сѝ, непреста́ннѡ вопїе́ши: бл҃гослове́нъ бг҃ъ ѻ҆тє́цъ на́шихъ.

Житїѐ неѕло́биво и҆мѣ́лъ є҆сѝ, и҆ непоро́чно, и҆ ᲂу҆кра́шено пѡ́ты страда́нїѧ, прехва́льне, бжⷭ҇твеннагѡ свѣтоли́тїѧ и҆спо́лнивсѧ, взыва́лъ є҆сѝ: бл҃гослове́нъ бг҃ъ ѻ҆тє́цъ на́шихъ.

Хва́литсѧ, прпⷣбне, гра́дъ тво́й, ꙗ҆́кѡ вѣнце́мъ ца́рскимъ ѡ҆бложи́сѧ, и҆мѣ́ѧ мо́щи твоѧ̑ въ себѣ̀, ꙗ҆́кѡ добра̀ граждани́на ѿ бг҃а прїѧ́лъ є҆́сть.

Мꙋдрова́нїе плотско́е ᲂу҆мертви́лъ є҆сѝ, че́сти и҆ и҆мѣ́нїѧ совле́клсѧ є҆сѝ, ѿ землѝ къ нбⷭ҇нымъ взы́ти тща́сѧ, и҆ всѧ̑ пѣ́ти наꙋча́ѧ: гдⷭ҇а по́йте, и҆ превозноси́те є҆го̀ во вѣ́ки.

Се́рдца твоегѡ̀ бразды̑, ѻ҆́тче са́вво, мꙋ́дрѣ воздѣ́лалъ є҆сѝ, сле́зными тꙋ́чами сїѧ̑ напои́лъ є҆сѝ, и҆ благоꙋха́нно мѵ́ро прине́слсѧ є҆сѝ хрⷭ҇тꙋ̀, є҆мꙋ́же вопїе́ши: гдⷭ҇а по́йте, и҆ превозноси́те є҆го̀ во вѣ́ки.

Хрⷭ҇тꙋ̀ приносѧ̀, бл҃же́нне, пощє́нїѧ и҆ сле́зы, и҆ непоро́чнꙋю моли́твꙋ, ри́знꙋю лѣ́потꙋ, и҆ мѧ̑гкїѧ ѻ҆дє́жды власѧны́ми рꙋ̑бы премѣни́лъ є҆сѝ, си́мъ показꙋ́ѧ глꙋбоча́йшее смире́нїе.

Ви́дѣти сла́вꙋ вседержи́телѧ жела́ѧ, ѡ҆бнови́лъ є҆сѝ дꙋшѝ крѣ́пость, и҆ сла́вою ѡ҆богати́лсѧ є҆сѝ нбⷭ҇ною.

Честно́е ᲂу҆краше́нїе бл҃года́ти, ѻ҆́тче прпⷣбне са́вво, и҆спросѝ на́мъ во бранѣ́хъ крѣ́пость, и҆ здра́вїе тѣлесѐ: ꙗ҆́кѡ да непреста́ннѡ тѧ̀ велича́емъ.

Чи́ни а҆́гг҃льстїи тебѐ, ѻ҆́тче, срѣто́ша, и҆ пра́ведныхъ собо́ри возвесели́шасѧ, и҆ ѿ вседержи́тельныѧ десни́цы влⷣчни вѣнча́лсѧ є҆сѝ. тѣ́мже тѧ̀ досто́йнѡ велича́емъ.