Кано́нъ ст҃о́мꙋ преподо́бномꙋ є҆ѵѳѵ́мїю вели́комꙋ (пе́рвый)

Разреша́еши се́тование пресла́вно ро́ждшим тя́, от Бо́га обеща́н бы́в, и пре́жде рожде́ния твоего́ да́р, благоду́шия тезоимени́т.

Сла́ва, и ны́не: Вопие́т благода́рственное Це́рковь, преподо́бне, прие́мши тя́ прозябе́ние от Бо́га, ми́рнаго благоду́шия предвозвести́тельное.

Тя́ ро́ждшая, А́нне поревнова́вши, преподо́бнаго я́ко дре́вле Самуи́ла, же́ртву жи́ву приведе́ Бо́гу, просла́вившему и пре́жде зача́тия.

Сла́ва, и ны́не: Бога́тою к Бо́гу любо́вию воспаля́емь, по́мыслом всеблагочести́вым стра́сти удержа́л еси́, преподо́бне, те́мже Боже́ственная благода́ть на тебе́ воспочи́ла е́сть.

Сохрани́в у́м непрело́жен, от пеле́н житие́м восхожде́ние показа́л еси́ к Бо́гу, Ему́же приближа́яся, взима́лся еси́ от си́лы, о́тче, в си́лу.

Вожделе́л еси́ Христо́ва смире́ния, пресе́льник отсю́ду ко гра́ду богоприе́мному бы́в, сраспя́тися ра́зумом Кресто́м Тебе́ ра́ди Пострада́вшему.

Сла́ва, и ны́не: Зако́нне пострада́ти произволя́я, совле́клся еси́ жития́: на́г же, противобо́рцу сопле́тся Христо́вым подо́бием, в пусты́ни одоле́ние воздви́гл еси́.

Себе́ покори́л еси́ зако́ну Бо́жию, те́ло бо твое́ я́ко душе́вный, богоно́се, орга́н, порабо́тил еси́, пло́ти мудрова́ние повину́в Ду́ху.

Сла́ва, и ны́не: Веселя́ся, соверши́л еси́ стезю́ жи́зни и, Бо́жий стра́х в себе́ заче́н, спасе́ние роди́л еси́ заблужда́емым, возсия́вый, я́ко со́лнце, пусты́нею покрыва́емь.

Я́коже дре́вле отро́ды рабы́нины, пакибытия́ ба́нею и ны́не, сыноположи́в, твои́ми моли́твами, богоно́се, сокруши́ и́го рабо́ты на́шея.

Сла́ва, и ны́не: Положи́ тя прему́дра строи́теля и наказа́теля безу́мным, лука́вых же духо́в прогони́теля Бо́жия, богоно́се, благода́ть, де́йственне в тя́ все́льшаяся.

Ви́делся еси́ вну́трь о́блака, о́тче, преесте́ственным огне́м покрыва́емь, я́ко боже́ствен, вопия́, небеснотаи́нник: благослове́н еси́, Го́споди, Бо́же оте́ц на́ших.

Подае́т тебе́ преесте́ственная, о́тче, Соде́тель незави́стне естества́, ду́ш же зало́ги проявля́яй причаща́ющихся, преподо́бне, пло́ти Го́спода твоего́.

Сла́ва, и ны́не: Еди́наго и по Боже́ственном воплоще́нии Единоро́днаго, во двою́ естеству́, Евфи́мие, честву́я, вопия́л еси́: благослове́н еси́, Го́споди, Бо́же оте́ц на́ших.

Бо́гу себе́ освяти́в и вже́г со́вести пе́щь, всего́ тя́, Евфи́мие, ра́дуяся, всежже́гл еси́, я́ко же́ртву непоро́чну, житие́, поя́ Христу́: Го́спода по́йте, дела́, и превозноси́те Его́ во вся́ ве́ки.

Сла́ва, и ны́не: Сыноположе́н бы́в благода́тию Боже́ственною, я́ко насле́дие бу́дущих ве́дение прия́л еси́: естества́ бо удержа́в, естество́ превозше́л еси́, прозна́тельне к сбы́тию тща́ся, Евфи́мие. Го́спода по́йте, дела́, и превозноси́те Его́ во вся́ ве́ки.

Исцеле́ний тя́ исто́чника и пре́жде сме́рти, и в ра́це, преподо́бне, у́спша, це́ла обре́тше, я́ко победоно́сца страда́льца блажи́м.

Сла́ва, и ны́не: Земно́му царю́ И́же в вы́шних помо́щника соде́ла тя́ на ва́рвары и па́стве твое́й на разли́чныя искуше́ния, о́тче преподо́бне.

Разрѣша́еши сѣ́тованїе пресла́внѡ ро́ждшымъ тѧ̀, ѿ бг҃а ѡ҆бѣща́нъ бы́въ, и҆ пре́жде рожде́нїѧ твоегѡ̀ да́ръ, благодꙋ́шїѧ тезоимени́тъ.

Сла́ва, и҆ ны́нѣ: Вопїе́тъ благода́рственное цр҃ковь, преподо́бне, прїе́мши тѧ̀ прозѧбе́нїе ѿ бг҃а, ми́рнагѡ благодꙋ́шїѧ предвозвѣсти́тельное.

Тѧ̀ ро́ждшаѧ, а҆́ннѣ поревнова́вши, преподо́бнаго, ꙗ҆́кѡ дре́вле самꙋи́ла, же́ртвꙋ жи́вꙋ приведѐ бг҃ꙋ, просла́вившемꙋ и҆ пре́жде зача́тїѧ.

Сла́ва, и҆ ны́нѣ: Бога́тою къ бг҃ꙋ любо́вїю воспалѧ́емь, по́мысломъ всеблагочести́вымъ стра̑сти ᲂу҆держа́лъ є҆сѝ, преподо́бне. тѣ́мже бж҃е́ственнаѧ бл҃года́ть на тебѣ̀ воспочи́ла є҆́сть.

Сохрани́въ ᲂу҆́мъ непрело́женъ, ѿ пеле́нъ житїе́мъ восхожде́нїе показа́лъ є҆сѝ къ бг҃ꙋ: є҆мꙋ́же приближа́ѧсѧ взима́лсѧ є҆сѝ ѿ си́лы, ѻ҆́тче, въ си́лꙋ.

Вожделѣ́лъ є҆сѝ хрⷭ҇то́ва смире́нїѧ, пресе́льникъ ѿсю́дꙋ ко гра́дꙋ бг҃опрїе́мномꙋ бы́въ, сраспѧ́тисѧ ра́зꙋмомъ крⷭ҇то́мъ тебє̀ ра́ди пострада́вшемꙋ.

Сла́ва, и҆ ны́нѣ: Зако́ннѣ пострада́ти произволѧ́ѧ, совле́клсѧ є҆сѝ житїѧ̀: на́гъ же противобо́рцꙋ сопле́тсѧ хрⷭ҇то́вымъ подо́бїемъ, въ пꙋсты́ни ѡ҆долѣ́нїе воздви́глъ є҆сѝ.

Себѐ покори́лъ є҆сѝ зако́нꙋ бж҃їю, тѣ́ло бо твоѐ, ꙗ҆́кѡ дꙋше́вный, бг҃оно́се, ѻ҆рга́нъ порабо́тилъ є҆сѝ, пло́ти мꙋдрова́нїе повинꙋ́въ дꙋ́хꙋ.

Сла́ва, и҆ ны́нѣ: Веселѧ́сѧ соверши́лъ є҆сѝ стезю̀ жи́зни, и҆ бж҃їй стра́хъ въ себѣ̀ заче́нъ, спасе́нїе роди́лъ є҆сѝ заблꙋжда́ємымъ, возсїѧ́вый, ꙗ҆́кѡ со́лнце, пꙋсты́нею покрыва́емь.

Ꙗ҆́коже дре́вле ѿро́ды рабы́нины, пакибытїѧ̀ ба́нею и҆ ны́нѣ сыноположи́въ, твои́ми моли́твами, бг҃оно́се, сокрꙋшѝ и҆́го рабо́ты на́шеѧ.

Сла́ва, и҆ ны́нѣ: Положи́ тѧ премꙋ́дра строи́телѧ и҆ наказа́телѧ безꙋ̑мнымъ, лꙋка́выхъ же дꙋхѡ́въ прогони́телѧ, бж҃їѧ, бг҃оно́се, бл҃года́ть, дѣ́йственнѣ въ тѧ̀ все́льшаѧсѧ.

Ви́дѣлсѧ є҆сѝ внꙋ́трь ѻ҆́блака, ѻ҆́тче, преесте́ственнымъ ѻ҆гне́мъ покрыва́емь, ꙗ҆́кѡ бж҃е́ственъ вопїѧ̀ небеснотаи́нникъ: бл҃гослове́нъ є҆сѝ, гдⷭ҇и, бж҃е ѻ҆тє́цъ на́шихъ.

Подае́тъ тебѣ̀ преесте́ствєннаѧ, ѻ҆́тче содѣ́тель незави́стнѣ є҆стества̀, дꙋ́шъ же зало́ги проѧвлѧ́ѧй причаща́ющихсѧ, преподо́бне, пло́ти гдⷭ҇а твоегѡ̀.

Сла́ва, и҆ ны́нѣ: Є҆ди́наго и҆ по бж҃е́ственномъ воплоще́нїи є҆диноро́днаго, во двою̀ є҆стєствꙋ̀, є҆ѵѳѵ́мїе, чествꙋ́ѧ, вопїѧ́лъ є҆сѝ: бл҃гослове́нъ є҆сѝ, гдⷭ҇и, бж҃е ѻ҆тє́цъ на́шихъ.

Бг҃ꙋ себѐ ѡ҆свѧти́въ, и҆ вже́гъ со́вѣсти пе́щь, всего̀ тѧ̀, є҆ѵѳѵ́мїе, ра́дꙋѧсѧ всежже́глъ є҆сѝ ꙗ҆́кѡ же́ртвꙋ непоро́чнꙋ житїѐ, поѧ̀ хрⷭ҇тꙋ̀: гдⷭ҇а по́йте дѣла̀, и҆ превозноси́те є҆го̀ во всѧ̑ вѣ́ки.

Сла́ва, и҆ ны́нѣ: Сыноположе́нъ бы́въ бл҃года́тїю бж҃е́ственною, ꙗ҆́кѡ наслѣ́дїе бꙋ́дꙋщихъ вѣ́дѣнїе прїѧ́лъ є҆сѝ: є҆стєства́ бо ᲂу҆держа́въ, є҆стество̀ превозше́лъ є҆сѝ прозна́тельнѣ, къ сбы́тїю тща́сѧ, є҆ѵѳѵ́мїе. гдⷭ҇а по́йте дѣла̀, и҆ превозноси́те є҆го̀ во всѧ̑ вѣ́ки.

И҆сцѣле́нїй тѧ̀ и҆сто́чника и҆ пре́жде сме́рти, и҆ въ ра́цѣ, преподо́бне, ᲂу҆́спша цѣ́ла ѡ҆брѣ́тше, ꙗ҆́кѡ побѣдоно́сца страда́льца блажи́мъ.

Сла́ва, и҆ ны́нѣ: Земно́мꙋ царю̀, и҆́же въ вы́шнихъ помо́щника содѣ́ла тѧ̀ на ва́рвары, и҆ па́ствѣ твое́й, на разли̑чныѧ и҆скꙋшє́нїѧ, ѻ҆́тче преподо́бне.