Канѡ́нъ ст҃о́мꙋ прпⷣбномꙋ маѯі́мꙋ и҆сповѣ́дникꙋ (вторы́й)

Вы́шния прему́дрости сокро́вище стяжа́в в се́рдцы, преподо́бне, тоя́ ра́ди обогати́л еси́ ми́р уче́нии.

А́нгельское показа́л еси́ житие́, на земли́ живы́й, и бы́л еси́ хра́м Бо́гу, христопропове́дниче преподо́бне, те́мже и возложи́лся Ему́.

Еди́но мы́сляще дру́г ко дру́гу, во еди́ну Твою́ ве́ру, Христе́, преподо́бнии пропове́даху Тя́ в безъязы́чных усте́х, я́ко трубы́ боговеща́нныя.

Кро́ви ка́плют честны́я твоея́ руки́, и уче́ния теку́т целому́дреннаго язы́ка твоего́, изве́стно вопию́ща по отсече́нии его́, Христа́ во двою́ естеству́.

Рука́ твоя́ писа́ньми не преста́ вопия́, и язы́к уче́нии тру́бит ве́ру твою́, богоглаго́ливе треблаже́нне: Бо́г бо бе́ обоя́ движа́, слага́я глаго́лати.

Треми́ у́бо телесы́, во еди́ной же души́, единому́дренно сопроти́вистеся, отцы́ чу́днии, зле́ отъе́млющим Христо́вы стра́сти и сугу́бое де́йство.

Ты́ Моисе́ю подо́бяся, богому́дре, скрижа́ли разу́мно прия́т уче́ний: во мра́к бо вше́л еси́ виде́ний, и обогати́лся еси́ ра́зума све́том.

Ты́ Авраа́му поревнова́в, богому́дре, друга́го Исаа́ка приве́л еси́ Го́сподеви, твое́ же́ртвовав, о́тче, се́рдце во огни́ со́вестне.

Еди́наго Христа́ пропове́давше, отцы́, еди́наго Сы́на во двою́ существу́ испове́дасте, хотя́ща по существу́ и де́йствующа обоя́.

Не усече́ твоего́, о́тче, ме́чь дерзнове́ния, не угаси́, преподо́бне, заточе́ние ве́ры твоея́.

Пропове́дует у́бо Ри́м ре́вность твою́, богоно́се, тру́бит же, преподо́бне, Це́рковь словеса́ твоя́.

Пред кня́зи пропове́давше Спа́са, му́ченицы бы́сте произволе́нием, богому́дрии.

Удиви́ твое́, треблаже́нне, испове́дание, в тебе́ веща́вый Иису́с, со стра́ждущими тебе́.

Ни князе́й киче́ния, ни меча́, ни огня́, претя́щаго тебе́, убоя́ся, преподо́бне, ве́рою бы́л еси́ кре́пок.

Не поколеба́ твоего́ столпа́ правосла́вия вселука́вый вра́г, но победи́ся и поги́бе.

Треплете́нною твое́ю пра́щею преще́ние А́риево мы́сленно стреля́ется, стрела́ми та́ин Христо́вых.

Ты́ оде́жду есте́ственнаго досто́инства кро́вию твое́ю украси́л еси́, богому́дре, молча́щ язы́к, о́тче, и веща́ющь, явле́ние подава́я се́ю слове́с твои́х.

Гро́б ва́ших не уста́ви язы́ков, земля́ же да́льная не скры́ словеса́, я́коже пи́шет Дави́д в пе́снех, во всю́ вои́стинну зе́млю пропове́дашася.

Я́коже зла́то, трие́ искуси́вшеся во огни́ искуше́ний о́нех, чисте́йшу ве́ру ва́шу возрасти́сте Христу́, отцы́ честни́и.

Зарю́ боже́ственнаго уче́ния в се́рдцы прие́м, богому́дре, просвеще́нием ра́зума обогати́лся еси́, и прему́дрости сокро́вище вложи́л еси́ в ду́шу твою́, о́тче.

Уче́ния предложи́в, богоблаже́нне, е́реси отгна́л еси́ от среды́, и Христо́вым поревнова́в страсте́м, бы́л еси́ же́ртва чиста́ и прия́тна Бо́гу произволе́нием.

В чистоте́ соблю́дше житие́ и ве́рою украси́вше дела́, небе́сныя сла́вы сподо́бистеся, честни́и отцы́, те́мже воспева́ете Христа́ во ве́ки.

Ты́ безстра́стием и виде́нием, треблаже́нне, научи́л еси́ словесы́ на́с жи́зни ве́чныя, сто́лп одушевле́н Правосла́вия ми́рови, испове́дание твое́ оста́вил еси́.

Ты́, Финее́су подо́бяся, богоно́се, я́ко ине́м копие́м, мече́м сло́ва новонасажде́нную посека́еши ве́ру, отрева́я ху́лящия Христа́.

Вои́стинну просла́вистеся, богоно́снии отцы́, ра́нами и бие́нии, гоне́нии и беда́ми, во у́зах же, и темни́цах, и желе́зах, и в заточе́ниих пострада́вше.

Вы́шнїѧ премꙋ́дрости сокро́вище стѧжа́въ въ се́рдцы, прпⷣбне, тоѧ̀ ра́ди ѡ҆богати́лъ є҆сѝ мі́ръ ᲂу҆чє́нїи.

А҆́гг҃льское показа́лъ є҆сѝ житїѐ на землѝ живы́й: и҆ бы́лъ є҆сѝ хра́мъ бг҃ꙋ, хрⷭ҇топроповѣ́дниче прпⷣбне, тѣ́мже и҆ возложи́лсѧ є҆мꙋ̀.

Є҆ди́но мы́слѧще дрꙋ́гъ ко дрꙋ́гꙋ, во є҆ди́нꙋ твою̀ вѣ́рꙋ, хрⷭ҇тѐ, прпⷣбнїи проповѣ́дахꙋ тѧ̀ въ без̾ѧзы́чныхъ ᲂу҆стѣ́хъ, ꙗ҆́кѡ трꙋбы̑ бг҃овѣща̑нныѧ.

Крѡ́ви ка́плютъ честны́ѧ твоеѧ̀ рꙋкѝ, и҆ ᲂу҆чє́нїѧ текꙋ́тъ цѣломꙋ́дреннагѡ ѧ҆зы́ка твоегѡ̀, и҆звѣ́стнѡ вопїю́ща по ѿсѣче́нїи є҆гѡ̀, хрⷭ҇та̀ во двою̀ є҆стєствꙋ̀.

Рꙋка̀ твоѧ̀ писа́ньми не преста̀ вопїѧ̀, и҆ ѧ҆зы́къ ᲂу҆чє́нїи трꙋ́битъ вѣ́рꙋ твою̀, бг҃оглаго́ливе треблаже́нне: бг҃ъ бо бѣ̀ ѻ҆боѧ̀ движѧ̀, слага́ѧ глаго́лати.

Тремѝ ᲂу҆́бѡ тѣлесы̀, во є҆ди́ной же дꙋшѝ, є҆диномꙋ́дреннѡ сопроти́вистесѧ, ѻ҆тцы̀ чꙋ́днїи, ѕлѣ̀ ѿе́млющымъ хрⷭ҇то́вы стрⷭ҇ти, и҆ сꙋгꙋ́бое дѣ́йство.

Ты̀ мѡѷсе́ю подо́бѧсѧ, бг҃омꙋ́дре, скрижа̑ли разꙋ́мнѡ прїѧ́тъ ᲂу҆че́нїй: во мра́къ бо вше́лъ є҆сѝ видѣ́нїй, и҆ ѡ҆богати́лсѧ є҆сѝ ра́зꙋма свѣ́томъ.

Ты̀ а҆враа́мꙋ поревнова́въ, бг҃омꙋ́дре, дрꙋга́го і҆саа́ка приве́лъ є҆сѝ гдⷭ҇еви, твоѐ же́ртвовавъ, ѻ҆́тче, се́рдце, во ѻ҆гнѝ со́вѣстнѣ.

Є҆ди́наго хрⷭ҇та̀ проповѣ́давше ѻ҆тцы̀, є҆ди́наго сн҃а во двою̀ сꙋщєствꙋ̀ и҆сповѣ́дасте, хотѧ́ща по сꙋществꙋ̀, и҆ дѣ́йствꙋюща ѻ҆боѧ̀.

Не ᲂу҆сѣчѐ твоегѡ̀, ѻ҆́тче, ме́чь дерзнове́нїѧ, не ᲂу҆гасѝ, прпⷣбне, заточе́нїе вѣ́ры твоеѧ̀.

Проповѣ́дꙋетъ ᲂу҆́бѡ ри́мъ ре́вность твою̀, бг҃оно́се, трꙋ́битъ же, прпⷣбне, цр҃ковь словеса̀ твоѧ̑.

Предъ кнѧ̑зи проповѣ́давше сп҃са, мꙋ́чєницы бы́сте произволе́нїемъ бг҃омꙋ́дрїи.

Оу҆дивѝ твоѐ, треблаже́нне, и҆сповѣ́данїе, въ тебѣ̀ вѣща́вый і҆и҃съ, со стра́ждꙋщими тебѣ̀.

Ни кнѧзе́й киче́нїѧ, ни меча̀, ни ѻ҆гнѧ̀ претѧ́щагѡ тебѣ̀ ᲂу҆боѧ́сѧ, прпⷣбне, вѣ́рою бы́лъ є҆сѝ крѣ́покъ.

Не поколеба̀ твоегѡ̀ столпа̀ правосла́вїѧ, вселꙋка́вый вра́гъ, но побѣди́сѧ и҆ поги́бе.

Треплете́нною твое́ю пра́щею, преще́нїе а҆́рїево мы́сленнѡ стрѣлѧ́етсѧ, стрѣла́ми та̑инъ хрⷭ҇то́выхъ.

Ты̀ ѻ҆де́ждꙋ є҆сте́ственнагѡ досто́инства кро́вїю твое́ю ᲂу҆краси́лъ є҆сѝ, бг҃омꙋ́дре, молча́щъ ѧ҆зы́къ, ѻ҆́тче, и҆ вѣща́ющь ꙗ҆вле́нїе подава́ѧ се́ю слове́съ твои́хъ.

Гро́бъ ва́шихъ не ᲂу҆ста́ви ѧ҆зы́кѡвъ, землѧ́ же да́льнаѧ не скры̀ словеса̀, ꙗ҆́коже пи́шетъ дв҃дъ въ пѣ́снехъ, во всю̀ вои́стиннꙋ зе́млю проповѣ́дашасѧ.

Ꙗ҆́коже зла́то трїѐ и҆скꙋси́вшесѧ во ѻ҆гнѝ и҆скꙋше́нїй ѻ҆́нѣхъ, чистѣ́йшꙋ вѣ́рꙋ ва́шꙋ возрасти́сте хрⷭ҇тꙋ̀, ѻ҆тцы̀ честні́и.

Зарю̀ бжⷭ҇твеннагѡ ᲂу҆че́нїѧ въ се́рдцы прїе́мъ, бг҃омꙋ́дре, просвѣще́нїемъ ра́зꙋма ѡ҆богати́лсѧ є҆сѝ, и҆ премꙋ́дрости сокро́вище вложи́лъ є҆сѝ въ дꙋ́шꙋ твою̀, ѻ҆́тче.

Оу҆чє́нїѧ предложи́въ, бг҃облаже́нне, є҆́рєси ѿгна́лъ є҆сѝ ѿ среды̀, и҆ хрⷭ҇тѡ́вымъ поревнова́въ стрⷭ҇те́мъ, бы́лъ є҆сѝ же́ртва чиста̀ и҆ прїѧ́тна бг҃ꙋ произволе́нїемъ.

Въ чистотѣ̀ соблю́дше житїѐ, и҆ вѣ́рою ᲂу҆краси́вше дѣла̀, нбⷭ҇ныѧ сла́вы сподо́бистесѧ, честні́и ѻ҆тцы̀: тѣ́мже воспѣва́ете хрⷭ҇та̀ во вѣ́ки.

Ты̀ безстра́стїемъ и҆ видѣ́нїемъ, треблаже́нне, наꙋчи́лъ є҆сѝ словесы̀ на́съ жи́зни вѣ́чныѧ, сто́лпъ ѡ҆дꙋшевле́нъ правосла́вїѧ мі́рови, и҆сповѣ́данїе твоѐ ѡ҆ста́вилъ є҆сѝ.

Ты̀ фїнее́сꙋ подо́бѧсѧ, бг҃оно́се, ꙗ҆́кѡ и҆нѣ́мъ копїе́мъ мече́мъ сло́ва, новонасажде́ннꙋю посѣка́еши вѣ́рꙋ, ѿрѣва́ѧ хꙋ́лѧщыѧ хрⷭ҇та̀.

Вои́стиннꙋ просла́вистесѧ бг҃оно́снїи ѻ҆тцы̀, ра́нами и҆ бїе́нїи, гоне́нїи и҆ бѣда́ми, во ᲂу҆́захъ же и҆ темни́цахъ и҆ желѣ́захъ, и҆ въ заточе́нїихъ пострада́вше.