Российская Православная Церковь

по благословенію Архіерейскаго Сѵнода Россійской Православной Церкви

Православный календарь

Ака́ѳістъ

А҆ка́ѳїстъ прпⷣбномꙋ и҆ бг҃оно́сномꙋ ѻ҆тцꙋ̀ на́шемꙋ а҆нато́лїю, ста́рцꙋ и҆ и҆сѷха́стꙋ ѻ҆́птинскомꙋ.

Прп. Анатолия (старшего) Оптинского (1894) 7 февраля 2026

Конда́къ а҃

И҆зрѧ́дномꙋ дѣ́лателю моли́твы ᲂу҆́мныѧ, бг҃одохнове́нномꙋ ᲂу҆чи́телю мона́шескихъ чинѡ́въ, ста́рцꙋ а҆нато́лїю похва́льнаѧ восписꙋ́емъ. Ты́ же, ѻ҆́тче, наста́ви на́съ на стези̑ бг҃оꙋгѡ́дныѧ, да въ ра́дости зове́мъ тѝ:

Ра́дꙋйсѧ, а҆нато́лїе, зерца́ло мл҃твы ᲂу҆́мныѧ.

І҆́косъ а҃

Мїрска́гѡ треволне́нїѧ и҆збѣжа́въ, прпⷣбне, бг҃ꙋ посщ҃е́нъ бы́въ ѿ роди́телей, ꙗ҆́коже самꙋи́лъ. Сегѡ̀ ра́ди ю҆́ношеское твоѐ бл҃гоче́стїе похвалѧ́юще, вопїе́мъ тѝ:

Ра́дꙋйсѧ, бл҃гочести́вое бг҃ꙋ приноше́нїе: ра́дꙋйсѧ, бг҃олюби́вымъ роди́телємъ твои́мъ похвале́нїе.

Ра́дꙋйсѧ, ѿ ю҆́ности твоеѧ̀ проти́вꙋ грѣха̀ подвиза́выйсѧ. Ра́дꙋйсѧ, въ зрѣ́лости твое́й вѣнце́мъ побѣ́ды вѣнча́выйсѧ.

Ра́дꙋйсѧ, моли́твами дѣ́тскими ᲂу҆краси́вый дꙋ́шꙋ твою̀. Ра́дꙋйсѧ, слеза́ми чи́стыми ѡ҆роси́вый лани̑ты твоѧ̑.

Ра́дꙋйсѧ, дѣ́вство соблю́лъ є҆сѝ, ꙗ҆́кѡ ѕѣ́ницꙋ ѻ҆́ка. Ра́дꙋйсѧ, мл҃твꙋ стѧжа́лъ є҆сѝ, ꙗ҆́кѡ херꙋві̑мскїѧ ѻ҆́чи.

Ра́дꙋйсѧ, а҆нато́лїе, зерца́ло мл҃твы ᲂу҆́мныѧ.

Конда́къ в҃

Ꙗ҆́кѡ є҆ле́нь бл҃горо́денъ прите́клъ є҆сѝ на па́жить ста́рческагѡ ѡ҆кормле́нїѧ, вы́ю твою̀ повинꙋ́въ бг҃омꙋ́дромꙋ ста́рцꙋ мака́рїю, и҆́же ѕла́кѡмъ дꙋхо́вныхъ рече́нїй тѧ̀ напита̀. Ты́ же бл҃года́рнѡ бг҃ꙋ воззва́въ: А҆ллилꙋ́їа.

І҆́косъ в҃

И҆́ноческимъ житїе́мъ вдохнови́выйсѧ, бг҃омꙋ́дре ѻ҆́тче, по́стничество, послꙋша́нїѧ, трꙋды̀ и҆ бдѣ́нїѧ стро́гѡ держа̀. Сегѡ̀ ра́ди ѡ҆кова́нный мꙋ́жествомъ сосꙋ́дъ дꙋшѝ твоеѧ̀ содѣ́лалъ є҆сѝ. Тѣ́мже прїимѝ похвалы̑ сїѧ̑:

Ра́дꙋйсѧ, послꙋ́шниче приле́жный. Ра́дꙋйсѧ, и҆́ноче бл҃гоговѣ́йный.

Ра́дꙋйсѧ, мона́шескагѡ чи́на ᲂу҆краше́нїе. Ра́дꙋйсѧ, а҆́гг҃льскомꙋ ликостоѧ́нїю соревнова́телю.

Ра́дꙋйсѧ, добродѣ́тельми ꙗ҆́кѡ ѕвѣзда́ми ᲂу҆ѧсни́лъ є҆сѝ житїѐ твоѐ. Ра́дꙋйсѧ, ꙗ҆́кѡ ѿ тмы̀ страсте́й ѡ҆чи́стилъ є҆сѝ дꙋ́шꙋ твою̀.

Ра́дꙋйсѧ, свѣ́тлаѧ во хрⷭ҇тѣ̀ со́вѣсте. Ра́дꙋйсѧ, чⷭ҇тое ѡ҆ бз҃ѣ се́рдце.

Ра́дꙋйсѧ, а҆нато́лїе, зерца́ло мл҃твы ᲂу҆́мныѧ.

Конда́къ г҃

І҆ѡ́сифомъ прекра́снымъ тѧ̀ ст҃и́тель і҆гна́тїй наре́клъ є҆́сть, ѻ҆́тче а҆нато́лїе, є҆гда̀ ѡ҆ мл҃твѣ ᲂу҆́мнѣй тѧ̀ вопросѝ. Ты́ же ꙗ҆́снѡ ᲂу҆че́нїе ст҃оѻте́ческое возвѣсти́лъ є҆сѝ є҆мꙋ̀. Тѣ́мже ᲂу҆диви́выйсѧ ѿвѣ́тꙋ твоемꙋ̀, возопѝ: А҆ллилꙋ́їа.

І҆́косъ г҃

Смире́нїемъ ꙗ҆́кѡ покро́вомъ бж҃їимъ тѧ̀ ѡ҆хранѧ́ше бг҃омꙋ́дрый ста́рецъ мака́рїй и҆ проти́вꙋ похва́лъ ѡ҆бличе́ньми тѧ̀ наставлѧ́ше. Ты́ же ᲂу҆коре́нїѧ ѿ ста́рца ꙗ҆́кѡ во́дꙋ чисти́тельнꙋю прїима́лъ є҆сѝ. Сегѡ̀ ра́ди чⷭ҇тотѣ̀ дꙋшѝ твоеѧ̀ дивѧ́щесѧ, си́це тебѣ̀ вопїе́мъ:

Ра́дꙋйсѧ, бл҃годꙋ́шное ᲂу҆кори́зны терпѣ́нїе. Ра́дꙋйсѧ, доблемꙋ́дрое къ трꙋда́мъ понꙋжде́нїе.

Ра́дꙋйсѧ, ѿ мїрски́хъ похва́лъ ᲂу҆дале́нїе. Ра́дꙋйсѧ, нищеты̀ и҆́ноческїѧ взыска́нїе.

Ра́дꙋйсѧ, ꙗ҆́кѡ ста́рцꙋ твоемꙋ̀ всѧ́кїй по́мыслъ ѿкрыва́лъ є҆сѝ. Ра́дꙋйсѧ, ꙗ҆́кѡ всѧ́кꙋю стра́сть мече́мъ разсꙋжде́нїѧ закла́лъ є҆сѝ.

Ра́дꙋйсѧ, послꙋша́нїемъ животво́рнымъ во́лю свою̀ ᲂу҆мертви́вый. Ра́дꙋйсѧ, нечꙋ́вствїе ꙗ҆́кѡ ка́мень ѿ се́рдца твоегѡ̀ ѿвали́вый.

Ра́дꙋйсѧ, а҆нато́лїе, зерца́ло мл҃твы ᲂу҆́мныѧ.

Конда́къ д҃

Оу҆́мнꙋю мл҃твꙋ ꙗ҆́кѡ ме́чь ѻ҆боюдоѻ́стрый воспрїѧ́лъ є҆сѝ, ѻ҆́тче а҆нато́лїе, ꙗ҆́коже въ чи́нѣ по́стрига мона́шескагѡ ѡ҆ се́мъ глаго́летсѧ, и҆́мже посѣ́клъ є҆сѝ пле́велы страсте́й и҆ всѧ́кое вра́жїе прираже́нїе ѿрази́въ, прⷭ҇нѡ взыва́ѧй бг҃ꙋ: А҆ллилꙋ́їа.

І҆́косъ д҃

Со смиренномꙋ́дрїемъ сочета́лъ є҆сѝ мл҃твенное дѣ́ланїе, ѻ҆́тче мꙋ́дре, ꙗ҆́кѡ проти́въ го́рдыхъ де́монѡвъ бра́нь под̾ѧ́лъ є҆сѝ, въ не́йже побѣ́дꙋ зако́ннꙋю полꙋчи́лъ є҆сѝ. Сегѡ̀ ра́ди пѣ́сенныѧ тебѣ̀ и҆сплета́ютсѧ вѣнцы̀:

Ра́дꙋйсѧ, мл҃твы сто́лпе. Ра́дꙋйсѧ, смире́нїѧ высото̀.

Ра́дꙋйсѧ, го́рдыхъ де́монѡвъ попалѧ́ѧй. Ра́дꙋйсѧ, моли́твеннымъ биче́мъ и҆̀хъ погонѧ́ѧй.

Ра́дꙋйсѧ, свѣ́тлыхъ а҆́гг҃лѡвъ ᲂу҆́мнымъ созерца́нїемъ привлека́ѧй. Ра́дꙋйсѧ, и҆́ноческїѧ чи̑ны серде́чнымъ ᲂу҆миле́нїемъ вдохновлѧ́ѧй.

Ра́дꙋйсѧ, і҆и҃совꙋ мл҃твꙋ ꙗ҆́кѡ дыха́нїе стѧжа́лъ є҆сѝ. Ра́дꙋйсѧ, вѣ́тромъ дх҃а ст҃а́гѡ въ при́стань безстра́стїѧ дости́глъ є҆сѝ.

Ра́дꙋйсѧ, а҆нато́лїе, зерца́ло мл҃твы ᲂу҆́мныѧ.

Конда́къ є҃

Ѻ҆́птинскихъ ста́рцєвъ ꙗ҆ви́лсѧ є҆сѝ досто́йный прїе́мниче, ꙗ҆́кѡ степє́ни добродѣ́телей проше́лъ є҆сѝ под̾ води́тельствомъ бг҃омꙋ́дрыхъ ѻ҆тцє́въ. Сегѡ̀ ра́ди да́ръ сыноположе́нїѧ ѿ дх҃а ст҃а́гѡ прїѧ́лъ є҆сѝ, бг҃ꙋ ѻ҆тцє́въ на́шихъ вопїю́ще: А҆ллилꙋ́їа.

І҆́косъ є҃

Вво́инилсѧ є҆сѝ въ по́лкъ ста́рцєвъ ѻ҆́птинскихъ, ѻ҆́тче а҆нато́лїе, бронѧ́ми блгⷣти ѡ҆бложе́нъ и҆ дара́ми многоразли́чными ѡ҆крꙋже́нъ дх҃а ст҃а́гѡ. Сегѡ̀ ра́ди сп҃са́еши ѿ бѣ́дъ къ тебѣ̀ прибѣга́ющыѧ и҆ въ бл҃года́рности зовꙋ́щыѧ:

Ра́дꙋйсѧ, равностоѧ́телю ѻ҆тцє́въ ѻ҆́птинскихъ. Ра́дꙋйсѧ, є҆диномы́сленниче ст҃ы́хъ ѻ҆тцє́въ.

Ра́дꙋйсѧ, цр҃ко́внагѡ преда́нїѧ непоколеби́мое ᲂу҆твержде́нїе. Ра́дꙋйсѧ, цѣвни́це бл҃гозвꙋ́чнаѧ мꙋ́дрыхъ и҆зрече́нїй.

Ра́дꙋйсѧ, дарѡ́въ многоразли́чныѧ блгⷣти сокро́вище. Ра́дꙋйсѧ, ско́рый пода́телю многоѻбра́зныѧ по́мощи.

Ра́дꙋйсѧ, ꙗ҆́кѡ ᲂу҆наслѣ́довалъ є҆сѝ а҆мвро́сїевꙋ любо́вь бг҃оподража́тельнꙋю. Ра́дꙋйсѧ, ꙗ҆́кѡ мака́рїево воспрїѧ́лъ є҆сѝ бг҃омꙋ́дрїе.

Ра́дꙋйсѧ, а҆нато́лїе, зерца́ло мл҃твы ᲂу҆́мныѧ.

Конда́къ ѕ҃

Ѻ҆́бразъ мона́шескагѡ соверше́нствованїѧ ꙗ҆ви́лъ є҆сѝ твое́й па́ствѣ, ѻ҆́тче а҆нато́лїе, ꙗ҆́кѡ на дщи́цѣ дꙋшѝ твоеѧ̀ начерта́лъ є҆сѝ и҆зѧ̑щныѧ цвѣ̑ты мно́гихъ добродѣ́телей, наипа́че же мл҃твꙋ непреста́ннꙋю въ се́рдцѣ стѧжа́въ, бг҃ꙋ пою́щꙋю: А҆ллилꙋ́їа.

І҆́косъ ѕ҃

Терпѣ́нїемъ стѧжа́лъ є҆сѝ дꙋ́шꙋ твою̀, по сло́вꙋ хрⷭ҇та̀ гдⷭ҇а, въ ᲂу҆́мнѣмъ дѣ́ланїи пребыва́ѧ де́нь и҆ но́щь, при́снѡ взыскꙋ́ѧ гдⷭ҇а, и҆ ѡ҆брѣ́лъ є҆сѝ вхо́дъ въ клѣ́ти серде́чнѣй въ црⷭ҇твїе бж҃їе. Сегѡ̀ ра́ди пѣснопѣ̑нїи тѧ̀ велича́емъ славосло́вными:

Ра́дꙋйсѧ, дѣ́лателю мл҃твы ᲂу҆мносерде́чныѧ. Ра́дꙋйсѧ, храни́телю сокро́вища бг҃одарова́ннагѡ.

Ра́дꙋйсѧ, лѣ́ствице а҆́гг҃льскагѡ восхожде́нїѧ. Ра́дꙋйсѧ, мо́сте преходѧ́й страсте́й мо́ре.

Ра́дꙋйсѧ, ꙗ҆́кѡ блгⷣти причасти́лсѧ є҆сѝ та́мошнѧгѡ бл҃же́нства. Ра́дꙋйсѧ, ꙗ҆́кѡ на землѝ живы́й граждани́номъ бы́лъ є҆сѝ бꙋ́дꙋщагѡ вѣ́ка.

Ра́дꙋйсѧ, и҆́мже восхожде́нїе въ мл҃твѣ ѡ҆брѣта́емъ. Ра́дꙋйсѧ, и҆́мже нерадѣ́нїе дꙋхо́вное побѣжда́емъ.

Ра́дꙋйсѧ, а҆нато́лїе, зерца́ло мл҃твы ᲂу҆́мныѧ.

Конда́къ з҃

Восхожде́нїе положи́лъ є҆сѝ ѻ҆́тче въ се́рдцѣ твое́мъ, въ го́рнее ᲂу҆стремлѧ́ѧсѧ бг҃одарова́нною твое́ю мл҃твою, а҆́може дости́глъ є҆сѝ а҆гг҃лоподо́бнагѡ соверше́нства, съ ли́ки безпло́тными прⷭ҇нѡ поѧ̀ бг҃ꙋ: А҆ллилꙋ́їа.

І҆́косъ з҃

Ѻ҆́птинскїй ста́рецъ а҆мвро́сїй, ꙗ҆́кѡ ви́дѣ тѧ̀, ѻ҆́тче а҆нато́лїе, въ во́зрастъ хрⷭ҇то́въ прише́дша, граждани́на тѧ̀ го́рнѧгѡ і҆ерⷭ҇ли́ма наре́клъ є҆́сть, є҆щѐ на землѝ живꙋ́щагѡ. Мы́ же соверше́нствꙋ твоемꙋ̀ чꙋдѧ́щесѧ, си́це тебѣ̀ зове́мъ:

Ра́дꙋйсѧ, земны́й нб҃ожи́телю. Ра́дꙋйсѧ, го́рнѧгѡ і҆ерⷭ҇ли́ма слꙋжи́телю.

Ра́дꙋйсѧ, мона́шествꙋющихъ бг҃омꙋ́дрый наста́вниче. Ра́дꙋйсѧ, моли́твенникѡмъ дх҃оно́сный ᲂу҆чи́телю.

Ра́дꙋйсѧ, непари́тельное пребыва́нїе въ мл҃твѣ. Ра́дꙋйсѧ, созерца́тельное ᲂу҆строе́нїе ᲂу҆ма̀.

Ра́дꙋйсѧ, чⷭ҇тое зрѣ́нїе невече́рнѧгѡ свѣ́та. Ра́дꙋйсѧ, ꙗ҆́сное ви́дѣнїе сокрове́нныхъ та́инъ.

Ра́дꙋйсѧ, а҆нато́лїе, зерца́ло мл҃твы ᲂу҆́мныѧ.

Конда́къ и҃

Ꙗ҆́коже ѿ ко́рене бл҃га́гѡ произрастѐ близ̾ ѻ҆́птиной ѻ҆би́тель ша́мординскаѧ, ю҆́же насадѝ бг҃омꙋ́дрый а҆мвро́сїй, є҆ѧ́же ᲂу҆правле́нїе дꙋхо́вное тебѣ̀ порꙋчѝ, ѻ҆́тче а҆нато́лїе, да наста́виши сестры̑ бг҃ꙋ досто́йнѡ слꙋжи́ти, вопїю́щїѧ є҆мꙋ̀ непреста́ннѡ: А҆ллилꙋ́їа.

І҆́косъ и҃

Свѣти́льникъ ꙗ҆ви́лсѧ є҆сѝ бг҃оза́рный, ѻ҆́тче а҆нато́лїе, свѣтоводѧ́й къ невече́рнемꙋ дню̀ ча̑да твоѧ̑, ѿ но́щи невѣ́дѣнїѧ и҆збавлѧ́ѧй и҆ ѿ страсте́й и҆зыма́ѧй, вопїю́щихъ тебѣ̀ сїѧ̑:

Ра́дꙋйсѧ, свѣти́льникъ под̾ спꙋ́домъ жите́йскїѧ толстоты̀ не сокры́тый. Ра́дꙋйсѧ, гра́де на верхꙋ̀ горы̀ добродѣ́телей стоѧ́й соѡрꙋже́нный.

Ра́дꙋйсѧ, на тве́рдѣ ᲂу҆́мнѣй незаходи́мое свѣти́ло. Ра́дꙋйсѧ, на высотѣ̀ дꙋхо́внѣй разсꙋжде́нїѧ ѕвѣздо̀.

Ра́дꙋйсѧ, сла́дкимъ и҆́менемъ і҆и҃совымъ пита́ѧй ча̑да твоѧ̑. Ра́дꙋйсѧ, мече́мъ ѻ҆боюдоѻ́стрымъ сло́ва бж҃їѧ посѣца́ѧй врагѝ твоѧ̑.

Ра́дꙋйсѧ, невѣстово́децъ цр҃ко́вный дꙋ́шъ бг҃ꙋ посвѧще́нныхъ. Ра́дꙋйсѧ, ѡ҆брꙋ́чникъ мона́шескихъ чинѡ́въ цр҃кви невѣ́стѣ хрⷭ҇то́вой.

Ра́дꙋйсѧ, а҆нато́лїе, зерца́ло мл҃твы ᲂу҆́мныѧ.

Конда́къ ѳ҃

Лїтꙋргі́и бжⷭ҇твенныѧ бы́лъ є҆сѝ бл҃гоговѣ́йный слꙋжи́телю, ѻ҆́тче а҆нато́лїе, ꙗ҆́кѡ къ и҆́стиннѣй лозѣ̀ дꙋ́хомъ твои́мъ приви́лсѧ є҆сѝ, тѣ́мже и҆сточи́лъ є҆сѝ ꙗ҆́кѡ сла́дкое вїно̀ поꙋче́нїѧ твоѧ̑ веселѧ́щїѧ сердца̀, и҆ къ трапе́зѣ хрⷭ҇то́вой привлека́ющїѧ ча̑да твоѧ̑, бл҃года́рнѡ пою́щїѧ бг҃ꙋ: А҆ллилꙋ́їа.

І҆́косъ ѳ҃

А҆́гг҃лѡвъ сослꙋжа́щихъ тебѣ̀ бжⷭ҇твеннꙋю лїтꙋргі́ю сподо́билсѧ є҆сѝ и҆мѣ́ти, ѻ҆́тче а҆нато́лїе, є҆гда̀ съ пра́веднымъ і҆ѡа́нномъ па́стыремъ кроншта́дтскимъ сослꙋжи́лъ є҆сѝ. Сегѡ̀ ра́ди а҆гг҃лоподо́бномꙋ твоемꙋ̀ житїю̀ чꙋдѧ́щесѧ, а҆гг҃лолѣ́пнꙋю тебѣ̀ прино́симъ хвалꙋ̀:

Ра́дꙋйсѧ, бжⷭ҇твенныѧ ча́ши ᲂу҆миле́нный прича́стниче. Ра́дꙋйсѧ, безкро́вныѧ же́ртвы тре́петный соверши́телю.

Ра́дꙋйсѧ, нб҃о ѿве́рзый мл҃твами твои́ми. Ра́дꙋйсѧ, ꙗ҆́кѡ славосло́виши и҆ ны́нѣ съ а҆́гг҃льскими чи́нми.

Ра́дꙋйсѧ, а҆́гг҃лѡвъ ꙗ҆́кѡ дїа́конѡвъ и҆мѣ́лъ є҆сѝ тебѣ̀ слꙋжа́щими. Ра́дꙋйсѧ, а҆гг҃лоре́вностномꙋ і҆ѡа́ннꙋ примѣ́ромъ бы́въ длѧ подража́нїѧ.

Ра́дꙋйсѧ, ꙗ҆́кѡ тебѐ ра́ди та́йнамъ хрⷭ҇то́вымъ съ тре́петомъ прїѡбща́емсѧ. Ра́дꙋйсѧ, ꙗ҆́кѡ тебѐ ра́ди на лїтꙋргі́ю ꙗ҆́кѡ къ а҆́гг҃льскомꙋ слꙋже́нїю поспѣша́емъ.

Ра́дꙋйсѧ, а҆нато́лїе, зерца́ло мл҃твы ᲂу҆́мныѧ.

Конда́къ і҃

Возрасти́лъ є҆сѝ са́дъ въ дꙋшѝ твое́й добродѣ́телей неꙋвѧда́емыхъ, ѻ҆́тче а҆нато́лїе, по́стъ и҆ бдѣ́нїе, цѣломꙋ́дрїе и҆ чⷭ҇тотꙋ̀, любы̀ є҆ѵⷢ҇льскꙋю и҆ мл҃твꙋ дꙋходви́жнꙋю, за ны̀ бг҃а ᲂу҆молѧ́ющꙋю, є҆́юже и҆ пое́ши прⷭ҇нѡ: А҆ллилꙋ́їа.

І҆́косъ і҃

А҆рома́тами мл҃твы твоеѧ̀ бг҃одарова́нныѧ прⷭ҇нѡ ᲂу҆веселѧ́еши ча́дъ твои́хъ, ѻ҆́тче бг҃оно́сне, є҆́юже и҆ посѣща́еши и҆ просвѣща́еши и҆ сп҃са́еши ѿ бѣ́дъ и҆ напа́стей многоразли́чныхъ, вопїю́щихъ тебѣ̀ сицева̑ѧ:

Ра́дꙋйсѧ, мл҃твы бг҃овдохнове́ннаѧ цѣвни́це. Ра́дꙋйсѧ, ѻ҆рга́не ѱалмопѣ́нїѧ, дви́жимый дх҃омъ ст҃ы́мъ.

Ра́дꙋйсѧ, чⷭ҇тоты̀ серде́чныѧ стро́гое соблюде́нїе. Ра́дꙋйсѧ, па́мѧти ѡ҆ бз҃ѣ бы́строе воспламене́нїе.

Ра́дꙋйсѧ, ѿ мл҃твы дѣ́ѧтельное рожде́нїе любвѐ ꙗ҆влѧ́еши. Ра́дꙋйсѧ, ѿ хране́нїѧ ᲂу҆ма̀ дꙋхо́вный пло́дъ созерца́нїѧ показꙋ́еши.

Ра́дꙋйсѧ, и҆́мже плѣне́нїй ᲂу҆ма̀ свобожда́емсѧ. Ра́дꙋйсѧ, и҆́мже непреста́ннѡ моли́тисѧ наꙋча́емсѧ.

Ра́дꙋйсѧ, а҆нато́лїе, зерца́ло мл҃твы ᲂу҆́мныѧ.

Конда́къ а҃і

Ѻ҆́птинскагѡ ста́рчества свѣтоно́сное ᲂу҆краше́нїе ꙗ҆ви́лсѧ є҆сѝ, ѻ҆́тче а҆нато́лїе, добродѣ́тельми ꙗ҆́кѡ ѕвѣзда́ми просвѣти́вый житїѐ твоѐ, и҆́миже тве́рдь дꙋшѝ твоеѧ̀ лѣ́потнꙋ содѣ́лавъ, бг҃ꙋ ᲂу҆краси́вшемꙋ нб҃о ѕвѣзда́ми взыва́ѧ: А҆ллилꙋ́їа.

І҆́косъ а҃і

Тве́рдь цр҃ко́внꙋю ѡ҆зари́лъ є҆сѝ ѻ҆́тче сїѧ́нїемъ мл҃твы твоеѧ̀ и҆ ꙗ҆́коже со́лнце бг҃окра́сное прогна́лъ є҆сѝ тмꙋ̀ бѣсо́вскꙋю, лꙋча́ми любвѐ согрѣва́ѧй ча̑да твоѧ̑, дє́мѡнскаѧ попалѧ́ѧй пѡ́лчища. Сегѡ̀ ра́ди во свѣ́тѣ дѣѧ́нїй твои́хъ ꙗ҆́коже во днѝ ходѧ́ще си́це тебѣ̀ вопїе́мъ:

Ра́дꙋйсѧ, солнцезра́чный проповѣ́дниче. Ра́дꙋйсѧ, мл҃твы бг҃осїѧ́нный свѣти́льниче.

Ра́дꙋйсѧ, теплото́ю любвѐ согрѣва́ѧй ча̑да твоѧ̑. Ра́дꙋйсѧ, свѣ́томъ смире́нїѧ попалѧ́ѧй де́моны.

Ра́дꙋйсѧ, во тмѣ̀ невѣ́дѣнїѧ возсїѧ́лъ є҆сѝ ꙗ҆́кѡ разсꙋжде́нїѧ ѕвѣздо̀. Ра́дꙋйсѧ, се́рдце твоѐ ꙗ҆ви́сѧ ꙗ҆́кѡ нб҃о невмѣсти́мое.

Ра́дꙋйсѧ, сы́не невече́рнѧгѡ днѣ̀. Ра́дꙋйсѧ, трисо́лнечнагѡ бжⷭ҇тва̀ таи́нниче.

Ра́дꙋйсѧ, а҆нато́лїе, зерца́ло мл҃твы ᲂу҆́мныѧ.

Конда́къ в҃і

Черто́гъ ᲂу҆зрѣ́лъ є҆сѝ, ѻ҆́тче а҆нато́лїе, хрⷭ҇то́въ ᲂу҆краше́нный, гото́вый прїѧ́ти дꙋ́шꙋ твою̀ ѡ҆блече́ннꙋю въ ри́зꙋ бра́чнꙋю. Тѣ́мже ѿ ѻ҆дра̀ сме́ртнагѡ возста́лъ, крестꙋ̀ поклони́лсѧ є҆сѝ и҆ рꙋ́ки воздѣ́въ, возопи́лъ є҆сѝ: ѽ, трⷪ҇це, прїимѝ дꙋ́шꙋ мою̀, тебѣ̀ вопїю́щꙋю: А҆ллилꙋ́їа.

І҆́косъ в҃і

Є҆стество̀ понꙋ́дилъ є҆сѝ трꙋда́ми по́стническими и҆ вышеесте́ственнꙋю свѣ́тлость и҆ а҆гг҃лоподо́бнꙋю добродѣ́тель стѧжа́лъ є҆сѝ, ѻ҆́тче а҆нато́лїе, ко гдⷭ҇ꙋ преста́вилсѧ є҆сѝ, по́честей вѣне́цъ ѿ негѡ̀ прїе́мъ. Сегѡ̀ ра́ди мы̀, ча̑да твоѧ̑, слове́сный вѣне́цъ похва́лъ тебѣ̀ прино́симъ:

Ра́дꙋйсѧ, моли́твеннаѧ похвало̀ ѻ҆́птинскагѡ ста́рчества. Ра́дꙋйсѧ, созерца́тельнаѧ высото̀ трꙋднодостижи́маѧ а҆́гг҃лѡмъ.

Ра́дꙋйсѧ, ꙗ҆́кѡ чⷭ҇тотꙋ̀ ᲂу҆ма̀ стѧжа́лъ є҆сѝ присносїѧ́тельнꙋю. Ра́дꙋйсѧ, ꙗ҆́кѡ трⷪ҇чнымъ свѣ́томъ ѡ҆зари́лсѧ є҆сѝ бг҃озри́тельнѡ.

Ра́дꙋйсѧ, ѻ҆гнезра́чнымъ серафі́мѡмъ подо́бниче. Ра́дꙋйсѧ, шестокры́лымъ херꙋві́мѡмъ слико́вниче.

Ра́дꙋйсѧ, ᲂу҆́мныѧ мл҃твы тихогла́сное произведе́нїе. Ра́дꙋйсѧ, є҆ѧ́же та́инственномꙋ сердцевраще́нїю на́съ наꙋче́нїе.

Ра́дꙋйсѧ, а҆нато́лїе, зерца́ло мл҃твы ᲂу҆́мныѧ.

Конда́къ г҃і

Ѽ возлю́бленне а҆́вво а҆нато́лїе, вѣ́рꙋемъ, ꙗ҆́кѡ чⷭ҇тою дꙋше́ю соверши́лъ є҆сѝ пꙋ́ть и҆́стины пра́вый, и҆ предстои́ши ны́нѣ пред̾ гдⷭ҇емъ сла́вы, въ вѣ́чнѣмъ свѣ́тѣ нбⷭ҇ныхъ ѻ҆би́телей, въ ли́цѣ є҆гѡ̀ вѣ́рныхъ слꙋжи́телей. Тѣ́мже на́съ ᲂу҆томле́нныхъ дꙋше́вною борьбо́ю, помѧнѝ въ мл҃твѣ ст҃ѣ́й, вопїю́щихъ хрⷭ҇тꙋ̀: А҆ллилꙋ́їа.

Повто́ръ

Сей конда́къ глаго́лется три́жды, та́же і҆́косъ а҃-й и҆ конда́къ а҃-й.

І҆́косъ а҃

Мїрска́гѡ треволне́нїѧ и҆збѣжа́въ, прпⷣбне, бг҃ꙋ посщ҃е́нъ бы́въ ѿ роди́телей, ꙗ҆́коже самꙋи́лъ. Сегѡ̀ ра́ди ю҆́ношеское твоѐ бл҃гоче́стїе похвалѧ́юще, вопїе́мъ тѝ:

Ра́дꙋйсѧ, бл҃гочести́вое бг҃ꙋ приноше́нїе: ра́дꙋйсѧ, бг҃олюби́вымъ роди́телємъ твои́мъ похвале́нїе.

Ра́дꙋйсѧ, ѿ ю҆́ности твоеѧ̀ проти́вꙋ грѣха̀ подвиза́выйсѧ. Ра́дꙋйсѧ, въ зрѣ́лости твое́й вѣнце́мъ побѣ́ды вѣнча́выйсѧ.

Ра́дꙋйсѧ, моли́твами дѣ́тскими ᲂу҆краси́вый дꙋ́шꙋ твою̀. Ра́дꙋйсѧ, слеза́ми чи́стыми ѡ҆роси́вый лани̑ты твоѧ̑.

Ра́дꙋйсѧ, дѣ́вство соблю́лъ є҆сѝ, ꙗ҆́кѡ ѕѣ́ницꙋ ѻ҆́ка. Ра́дꙋйсѧ, мл҃твꙋ стѧжа́лъ є҆сѝ, ꙗ҆́кѡ херꙋві̑мскїѧ ѻ҆́чи.

Ра́дꙋйсѧ, а҆нато́лїе, зерца́ло мл҃твы ᲂу҆́мныѧ.

Конда́къ а҃

И҆зрѧ́дномꙋ дѣ́лателю моли́твы ᲂу҆́мныѧ, бг҃одохнове́нномꙋ ᲂу҆чи́телю мона́шескихъ чинѡ́въ, ста́рцꙋ а҆нато́лїю похва́льнаѧ восписꙋ́емъ. Ты́ же, ѻ҆́тче, наста́ви на́съ на стези̑ бг҃оꙋгѡ́дныѧ, да въ ра́дости зове́мъ тѝ:

Ра́дꙋйсѧ, а҆нато́лїе, зерца́ло мл҃твы ᲂу҆́мныѧ.

Моли́твы

Ѽ прпⷣбне, бг҃омꙋ́дре и҆ бг҃опросвѣще́нне ѻ҆́тче на́шъ а҆нато́лїе, ста́рчества ѻ҆́птинскагѡ свѣтоно́сное ᲂу҆краше́нїе! Ты̀ пе́рвѣе понꙋ́дилъ є҆сѝ ᲂу҆́мъ тво́й тѣ́сными враты̀ внꙋ́трь се́рдца входи́ти и҆ долготерпѣли́вымъ по́двигомъ та́мѡ ѡ҆ и҆́мени і҆и҃съ хрⷭ҇то́вѣ црⷭ҇твїе бж҃їе и҆ска́ти. Сегѡ̀ ра́ди не по мно́зѣмъ вре́мени дости́глъ є҆сѝ пред̾ враты̀ вожделѣ́ннагѡ безстра́стїѧ и҆ є҆щѐ на землѝ тебѣ̀ сꙋ́щꙋ нбⷭ҇ный граждани́нъ бꙋ́дꙋщагѡ бл҃же́ннагѡ црⷭ҇твїѧ сподо́билсѧ є҆сѝ бы́ти. Тѣ́мже ᲂу҆́бѡ, ѻ҆́тче приснопа́мѧтне, къ тебѣ̀ прибѣга́емъ, ꙗ҆́кѡ къ наста́вникꙋ и҆скꙋ́сномꙋ и҆ про́симъ и҆ мо́лимъ: наꙋчѝ ны̀, ча̑да твоѧ̑, семꙋ̀ сп҃си́тельномꙋ дѣ́ланїю є҆́же внꙋ́трь се́рдца своегѡ̀ неѿстꙋ́пнѡ пребыва́ти и҆ нелѣ́ностнѡ гдⷭ҇а і҆и҃са хрⷭ҇та̀ всѣ́мъ помышле́нїемъ свои́мъ, все́ю крѣ́постїю свое́ю люби́ти и҆ та́мѡ призыва́ти. Сохранѝ ны̀ невреди́мы ѿ всѣ́хъ навѣ̑тъ вра́жїихъ, ѿ всѣ́хъ преле́стныхъ сѣте́й дїа́вольскихъ. Пода́ждь на́мъ ра́зꙋмъ со смиренномꙋ́дрїемъ се́й по́двигъ проходи́ти, да не прельсти́тъ на́съ сꙋпоста́тъ, но да сокрꙋши́тсѧ є҆гѡ̀ ѕло́ба ѡ҆ тве́рдѣмъ ка́мени и҆́мене хрⷭ҇то́ва, на́мъ же да ꙗ҆ви́тсѧ се́й ка́мень незы́блемѡ ѡ҆снова́нїе зда́нїѧ всѣ́хъ добродѣ́телей.

Є҆́й, ѻ҆́тче, пода́ждь на́мъ, ꙗ҆́кѡ ᲂу҆чи́тель ᲂу҆ченикѡ́мъ, мл҃твꙋ молѧ́щымсѧ ю҆́же вдохнꙋ̀ въ тѧ̀ дх҃ъ ст҃ы́й, да предста́тельствомъ твои́мъ и҆ мы̀ ᲂу҆лꙋчи́мъ прⷭ҇нодви́жнꙋю моли́твꙋ ко гдⷭ҇ꙋ і҆и҃сꙋ хрⷭ҇тꙋ̀. Є҆мꙋ́же че́сть и҆ поклоне́нїе и҆ моли́твенное славосло́вїе возсыла́емъ со безнача́льнымъ є҆гѡ̀ ѻ҆ц҃е́мъ и҆ прест҃ы́мъ и҆ бл҃ги́мъ и҆ животворѧ́щимъ є҆гѡ̀ дх҃омъ, ны́нѣ и҆ при́снѡ и҆ во вѣ́ки вѣкѡ́въ. А҆ми́нь.