Кондак 1
Взбра́нное на́м и ди́вное избавле́ние дарова́ся, Тво́й о́браз честны́й, Преблагослове́нная Де́во Влады́чице Богоро́дице, я́ко изба́вльшеся от злы́х явле́нием его́ и к нему́ взира́юще, воспису́ем Ти́ благода́рственная раби́ Твои́, Богоро́дице; но я́ко иму́щая держа́ву непобеди́мую, от вся́ких на́с бе́д свободи́, да зове́м Ти́:
Ра́дуйся, Ра́досте на́ша, изба́ви на́с от вся́каго зла́ и утоли́ на́ша печа́ли.
Икос 1
А́нгел мно́жество и вся́ Небе́сная Во́инства сла́вят Тебе́, Цари́цу все́х Богоро́дицу, Ты́ же испо́лнила еси́ ра́дости ду́ши на́ша ми́лостивым явле́нием на́м о́браза Твоего́ свята́го, Богоизбра́нная Де́во Влады́чице, к нему́же кла́няющеся, Тебе́ умиле́нная моле́ния возсыла́ем, милосе́рдому Твоему́ к на́м заступле́нию со стра́хом зову́ще такова́я:
Ра́дуйся, Отца́ Безнача́льнаго благослове́ние; ра́дуйся, Сы́на Преве́чнаго жили́ще.
Ра́дуйся, Ду́ха Свята́го пребыва́ние; ра́дуйся, я́ко Тебе́ сла́вят многоочи́тии херуви́ми.
Ра́дуйся, я́ко Тебе́ похва́льная прино́сят шестокрила́тии серафи́ми; ра́дуйся, я́ко Тебе́ вся́ небе́сная во́инства велича́ют.
Ра́дуйся, я́ко Тебе́ вся́ коле́на земна́я Ма́терь Бо́жию испове́дуют; ра́дуйся, я́ко Тобо́ю вся́ вселе́нная весе́лия исполня́ется.
Ра́дуйся, я́ко Тобо́ю вся́ боле́зни на́ша исцеля́ются; ра́дуйся, Твои́ми бо моли́твами печа́ли на́ша утоля́ются.
Ра́дуйся, Твои́ми бо хода́тайствы вся́ проше́ния на́ша исполня́ются; ра́дуйся, я́ко Тебе́ и Сы́ну Твоему́ в Твое́й честне́й ико́не благода́рно покланя́емся.
Ра́дуйся, Ра́досте на́ша, изба́ви на́с от вся́каго зла́ и утоли́ на́ша печа́ли.
Кондак 2
Ви́дят Тя́, Богоизбра́нная Отрокови́це, вся́ небе́сныя си́лы предстоя́щу всегда́ Престо́лу Сла́вы Небе́снаго Царя́ и за христиа́ны к Сы́ну и Бо́гу моля́щуюся, Небе́сная Цари́це; мы́ же гре́шнии на земли́, зря́ще Твою́ святу́ю ико́ну и к не́й припа́дающе, Тебе́ ра́достно покланя́емся, зову́ще: Аллилу́иа.
Икос 2
Ра́зум пода́ждь на́м, Всеусе́рдная Предста́тельнице на́ша, Небе́сная Цари́це, из у́ст бо на́с скве́рных, ка́ко мо́щно пе́ти Твоему́ и́мени? Я́ко благи́х еси́ на́м Хода́таица, си́льна еси́ вспомоществова́ти во вся́кой на́ми тре́буемой по́мощи, да Тебе́ со умиле́нием зове́м си́це:
Ра́дуйся, моли́твы о на́с к Сы́ну и Бо́гу во утеше́ние принося́щая; ра́дуйся, Твои́ми моли́твами о́чи на́ша от ве́чнаго рыда́ния избавля́ющая.
Ра́дуйся, Твои́ми Ма́терними моли́твами Сы́на и Бо́га на ми́лость к на́м преклоня́ющая; ра́дуйся, Твои́ми моли́твами пра́ведный на на́с гне́в Бо́жий утоля́ющая.
Ра́дуйся, Твои́ми хода́тайствы грехи́ на́ша проща́ющая; ра́дуйся, Твое́ю по́мощию стра́сти на́ша истребля́ющая.
Ра́дуйся, Твои́м предста́тельством вре́менная на́ша ско́рби разруша́ющая; ра́дуйся, Ты́ во вся́ких беда́х и ну́ждах на́м помога́ющая.
Ра́дуйся, Тя́ сла́вящих всегда́ прославля́ющая; ра́дуйся, Твое́ю ра́достию печа́ли на́ша утоля́ющая.
Ра́дуйся, непреста́нное на́м весе́лие подава́ющая; ра́дуйся, на́м ра́йския две́ри отверза́ющая.
Ра́дуйся, Ра́досте на́ша, изба́ви на́с от вся́каго зла́ и утоли́ на́ша печа́ли.
Кондак 3
Си́ла Вы́шняго осени́ Тя к ско́рому и те́плому заступле́нию ве́рно притека́ющих к Тебе́ и честно́му Твоему́ о́бразу покланя́ющихся, еди́ней бо то́кмо Тебе́, нетле́нней и Пречи́стей Богома́тери, даде́ся да́р вся́кое благо́е на́ше проше́ние исполня́ти, и еди́на Ты́ мо́жеши на́м помощи́, ели́ко хо́щеши. Те́м вся́к во́зраст славосло́вит Сы́на Твоего́ и Бо́га на́шего, зовы́й: Аллилу́иа.
Икос 3
Иму́щи бога́тство милосе́рдия неоску́дное, все́м конце́м земны́м простира́еши ру́ку по́мощи и подае́ши боля́щим исцеле́ние, стра́ждущим осла́бу, слепы́м прозре́ние и все́м вся́ по потре́бе исполня́еши. Мы́ же Тебе́ благода́рно си́це пое́м:
Ра́дуйся, еди́на Ма́ти, милосе́рдие на́м явля́ющая; ра́дуйся, ми́лости сокро́вище многоце́нное на́м открыва́ющая.
Ра́дуйся, безчи́сленныя щедро́ты все́м подава́ющая; ра́дуйся, сло́во прему́дрости прося́щим да́рующая.
Ра́дуйся, преспе́яние ра́зума ю́ным подава́ющая; ра́дуйся, ра́ны на́ша грехо́вныя истребля́ющая.
Ра́дуйся, пра́ведных в ра́йских селе́ниях насажда́ющая; ра́дуйся, отча́янным бу́дущих бла́г Наде́ждо и Укрепле́ние.
Ра́дуйся, все́х па́дших ско́ро к благода́ти возставля́ющая; ра́дуйся, все́м вся́кую тре́буемую от Тебе́ по́мощь подава́ющая.
Ра́дуйся, Ра́досте на́ша, изба́ви на́с от вся́каго зла́ и утоли́ на́ша печа́ли.
Кондак 4
Бу́рею мно́гих бе́д одержи́мым на́м всегда́ помога́еши, Небе́сная Цари́це, с ве́рою прибега́ющим к Тебе́ и покланя́ющимся цельбоно́сней Твое́й ико́не, е́йже первопи́санней иногда́ рекла́ еси́: «С си́м о́бразом благода́ть Моя́ и си́ла». И мы́ и́стинно ве́руем, я́ко послу́шаеши проше́ния призыва́ющих и́мя свято́е Твое́ и Сы́ну Твоему́ зову́щих: Аллилу́иа.
Икос 4
Слы́ша Госпо́дь Твоя́ на небеси́ о на́с хода́тайства, избра́нная Пала́то Ду́ха Свята́го, исполня́ет Твоя́ проше́ния, мы́ же гре́шнии на земли́, ви́девше святу́ю Твою́ ико́ну, я́ко светоза́рное со́лнце на́м светя́щуюся, Тебе́, я́ко Бо́жией Ма́тери, дерза́ем глаго́лати:
Ра́дуйся, Со́лнце мы́сленное на́м явля́ющая; ра́дуйся, Све́том немерца́ющим на́с просвеща́ющая.
Ра́дуйся, умерщвле́нных греха́ми на́с оживля́ющая; ра́дуйся, непло́дным ма́терем ложесна́ разреша́ющая.
Ра́дуйся, неча́янно находя́щих на на́с злы́х враго́в ско́ро прогоня́ющая; ра́дуйся, жела́емых бла́г всегда́ на́с наслажда́ющая.
Ра́дуйся, ско́ро в беда́х и в печа́лех на́с утеша́ющая; ра́дуйся, ве́рою и́мя Твое́ призыва́ющих от неча́янныя сме́рти спаса́ющая.
Ра́дуйся, на Тя́ упова́ющим безконе́чный живо́т да́рующая; ра́дуйся, ве́ру и любо́вь к Тебе́ иму́щих к небеси́ возводя́щая.
Ра́дуйся, Предста́тельство на́ше кре́пкое; ра́дуйся, во вся́ких обстоя́тельствах на́с защища́ющая.
Ра́дуйся, Ра́досте на́ша, изба́ви на́с от вся́каго зла́ и утоли́ на́ша печа́ли.
Кондак 5
Боготе́чную звезду́, честну́ю Твою́ ико́ну, Ты́ на́м показа́ла еси́, Влады́чице ми́ра, к не́йже мы́ зря́ще и ве́рою серде́чною моля́щеся, Тебе́, Богоро́дице, глаго́лем: Ты́ еси́ на́м щи́т непобеди́мый и стена́ необори́мая, вопию́щим Бо́гу: Аллилу́иа.
Икос 5
Ви́деша си́лы небе́сныя на руку́ Твое́ю Созда́вшаго Свои́ма рука́ма челове́ки и Влады́ку разумева́юще Его́. Мы́ же гре́шнии на земли́, зря́ще изображе́нную Тебе́, Пречи́стую Ма́терь Его́, любе́зно Свои́ ру́це к на́м простира́ющую, к Тебе́ уми́льно зове́м:
Ра́дуйся, на руку́ Твое́ю О́гнь Боже́ственный неопа́льно держа́щая, И́мже грехи́ на́ша попаля́ются; ра́дуйся, на руку́ Твое́ю Све́та Неприкоснове́ннаго носи́вшая, И́мже ду́ши на́ша просвеща́ются.
Ра́дуйся, враго́в на́ших ви́димых и неви́димых побежда́ющая; ра́дуйся, любо́вь и милосе́рдие к на́м явля́ющая.
Ра́дуйся, ру́це Твои́ в поруче́ние о на́с к Бо́гу принося́щая; ра́дуйся, вхо́д в Ца́рствие Небе́сное на́м отверза́ющая.
Ра́дуйся, Твое́ю по́мощию на́с защища́ющая; ра́дуйся, Твои́м хода́тайством грехи́ на́ша проща́ющая.
Ра́дуйся, Твои́м моле́нием печа́ли на́ша утоля́ющая; ра́дуйся, я́ко Твои́м предста́тельством вся́ких бла́г наслажда́емся.
Ра́дуйся, я́ко Тобо́ю вся́ во благи́х жела́ния на́ша исполня́ются; ра́дуйся, я́ко во́лю Сы́на Твоего́ твори́ти на́с подвиза́еши.
Ра́дуйся, Ра́досте на́ша, изба́ви на́с от вся́каго зла́ и утоли́ на́ша печа́ли.
Кондак 6
Пропове́дницы Богоно́снии апо́столи, по Вознесе́нии Госпо́дни, при освяще́нии хра́ма Твоего́, неви́димою руко́ю изображе́нный шаро́вными подо́бии на стене́ обре́тше о́браз Тво́й, Влады́чице, рожде́нному от Тебе́ Бо́гу воспе́ша: Аллилу́иа.
Икос 6
Возсия́ла еси́ прему́дростию от И́стиннаго Со́лнца Пра́вды, Богоизбра́нная Отрокови́це, и, лучи́ и́стиннаго Богоразу́мия испуща́ющи, те́ми освеща́еши все́х ве́рою испове́дающих Тя́ и́стинную Ма́терь Бо́жию бы́ти, вопию́щих си́це:
Ра́дуйся, все́х на небеси́ сла́вою Твое́ю просвеща́ющая; ра́дуйся, нача́ло челове́ческаго спасе́ния устроя́ющая.
Ра́дуйся, ковче́же жи́зни на́шея, от пото́па сме́ртнаго на́с сохраня́ющий; ра́дуйся, в ра́йских селе́ниих жи́ти на́м да́рующая.
Ра́дуйся, Предста́тельнице на́ша к Бо́гу, ми́р спаса́ющая; ра́дуйся, в беда́х су́щих ско́ро заступа́ющая.
Ра́дуйся, вся́кия боле́зни челове́ческия, теле́сныя и душе́вныя, исцеля́ющая; ра́дуйся, немы́м и косноязы́чным словеса́ отверза́ющая.
Ра́дуйся, вся́каго бла́га прося́щим у Тебе́ Пода́тельнице; ра́дуйся, уче́ние благода́ти все́м источа́ющая.
Ра́дуйся, те́м вся́кий чи́н и во́зраст дово́льно услажда́ющая; ра́дуйся, все́х благи́я жела́ния исполня́ющая.
Ра́дуйся, Ра́досте на́ша, изба́ви на́с от вся́каго зла́ и утоли́ на́ша печа́ли.
Кондак 7
Хотя́ долготерпели́вый Всеви́дец Госпо́дь яви́ти Своего́ человеколю́бия и щедро́т бе́здну, избра́ Тебе́ Себе́ в Ма́терь, ми́лости неисчерпа́емый Исто́чниче, да а́ще кто́ пра́ведным судо́м Бо́жиим осужде́ния досто́ин, Твои́м всемо́щным хода́тайством сохране́н бу́дет и Сы́ну Твоему́ и Бо́гу на́шему велегла́сно зове́т: Аллилу́иа.
Икос 7
Ди́вна показа́л еси́ дела́ Твоя́ в Пречи́стей Ма́тери Твое́й, Го́споди, и ди́вну дарова́л еси́ на́м Ея́ ико́ну, па́че луче́й со́лнечных просвеща́ющую люде́й, я́ко Са́мую зря́щих Богоро́дицу и ве́рою серде́чною от души́ любо́вию вопию́щих такова́я:
Ра́дуйся, ико́ну Твою́ на земли́, я́ко о́блак, все́м распростира́ющая; ра́дуйся, то́ю па́че наде́яния милосе́рдое к на́м заступле́ние явля́ющая.
Ра́дуйся, Твое́ю ико́ною исто́чники чуде́с всю́ду источа́ющая; ра́дуйся, явле́нием Твоея́ ико́ны вся́ лю́ди просвеща́ющая.
Ра́дуйся, то́ю но́вое зна́мение благода́ти в Це́ркви явля́ющая; ра́дуйся, я́ко, на ико́ну Твою́ взира́юще, Само́й Тебе́, и́стинней Богоро́дице, покланя́емся.
Ра́дуйся, ико́ною Твое́ю, я́ко столпо́м о́гненным, мра́к греха́ отгоня́ющая; ра́дуйся, то́ю печа́ли на́ша утоля́ющая.
Ра́дуйся, Це́рковь освяти́вшая тоя́ явле́нием; ра́дуйся, я́ко мы́, гре́шнии, сохраня́емся Твои́м заступле́нием.
Ра́дуйся, вре́тище ско́рби на́шея растерза́ющая; ра́дуйся, ве́чною ра́достию на́с одева́ющая.
Ра́дуйся, Ра́досте на́ша, изба́ви на́с от вся́каго зла́ и утоли́ на́ша печа́ли.
Кондак 8
Стра́нну и пресла́вну в Це́ркви я́вльшуюся святу́ю Твою́ ико́ну а́нгели воспе́ша, апо́столи просла́виша, ли́к святи́телей поклони́шася, мы́ же, гре́шнии, припа́дающе, ожида́ем Твоея́ вели́кия и бога́тыя ми́лости, с весе́лием вопию́ще: Аллилу́иа.
Икос 8
Все́ми вы́шними и ни́жними влады́чествуяй Госпо́дь, ви́дев Тя́, Ма́терь Свою́, всегда́ предстоя́щу Ему́ и со умиле́нием Ему́ принося́щу моле́ние о на́с гре́шных, обеща́ испо́лнити вся́ проше́ния Твоя́. Мы́ же, гре́шнии, наде́ющеся на Твоя́ Ма́терния о на́с моли́твы, благода́рственная Тебе́ прино́сим си́це:
Ра́дуйся, с Сы́ном Твои́м и Бо́гом ве́чно ца́рствующая; ра́дуйся, Ему́же всегда́ о на́с моле́ния принося́щая.
Ра́дуйся, все́х к Тебе́ прибега́ющих Твое́ю ми́лостию покрыва́ющая; ра́дуйся, все́х Ра́досте, печа́ли на́ша утоля́ющая.
Ра́дуйся, примире́ние на́ше с Бо́гом соде́лавшая; ра́дуйся, Бо́га и челове́ка соедини́вшая.
Ра́дуйся, спасе́ние челове́ческое устро́ившая; ра́дуйся, прароди́тельнаго греха́ кля́тву разруши́вшая.
Ра́дуйся, сме́ртное на́ше естество́ безсме́ртием просвети́вшая; ра́дуйся, жесто́кость се́рдца на́шего умили́вшая.
Ра́дуйся, отча́янных к Бо́гу возводя́щая; ра́дуйся, сосу́ды сме́ртныя, на на́с угото́ванныя, сокруши́вшая.
Ра́дуйся, Ра́досте на́ша, изба́ви на́с от вся́каго зла́ и утоли́ на́ша печа́ли.
Кондак 9
Все́ естество́ а́нгельское похва́льныя пе́сни прино́сит Тебе́, Бо́жией Ма́тери и Засту́пнице все́х припа́дающих Тебе́ и прося́щих Твоея́ по́мощи, я́ко тве́рдым и кре́пким Твои́м предста́тельством пра́ведных весели́ши, гре́шных заступа́еши и от бе́д избавля́еши, и печа́ли утоля́еши, и мо́лишися о все́х ве́рою зову́щих: Аллилу́иа.
Икос 9
Вети́я многовеща́нныя, я́ко ры́бы безгла́сныя, недоуме́ют хвали́ти сла́вный, Влады́чице, ико́ны Твоея́ пра́здник, ниже́ от скве́рных усте́н на́ших приноси́мыя Ти́ похвалы́ досто́йны, оба́че неисче́тныя благодея́ния, ико́ною Твое́ю на́м явля́емыя, ви́девше, душе́ю и се́рдцем ра́дующеся, Тебе́ глаго́лем:
Ра́дуйся, от гла́да на́с Хле́бом жи́зни пита́ющая; ра́дуйся, от губи́тельства сме́ртнаго безсме́ртием на́с соблюда́ющая.
Ра́дуйся, от тру́са грехо́внаго на́с сохраня́ющая; ра́дуйся, от пото́па сме́ртнаго руко́ю Твое́ю кре́пкою на́с избавля́ющая.
Ра́дуйся, от огня́ росо́ю моли́тв Твои́х на́с восхища́ющая; ра́дуйся, от бе́д си́льным Твои́м предста́тельством на́с защища́ющая.
Ра́дуйся, от меча́ си́лою Твое́ю на́с охраня́ющая; ра́дуйся, от наше́ствия иноплеме́нник на́с спаса́ющая.
Ра́дуйся, от междоусо́бныя бра́ни и́стинным ми́ром на́с огражда́ющая; ра́дуйся, от смертоно́сныя ра́ны прибега́ющих к Тебе́ исцеля́ющая.
Ра́дуйся, от належа́щаго пра́веднаго преще́ния Бо́жия Твои́м моле́нием на́с свобожда́ющая; ра́дуйся, от вся́кия на́с я́звы Твои́м честны́м хода́тайством изыма́ющая.
Ра́дуйся, Ра́досте на́ша, изба́ви на́с от вся́каго зла́ и утоли́ на́ша печа́ли.
Кондак 10
Спасти́ хотя́ ро́д челове́ческий от пре́лести вра́жия, Человеколю́бец Госпо́дь Тебе́, Ма́терь Свою́, дарова́ земны́м на по́мощь, глаго́ля: сы́нове челове́честии, се́ Ма́ти Моя́ Покро́в и Прибе́жище ва́м да бу́дет, печа́льным Утеше́ние, скорбя́щим Ра́дование, оби́димым Засту́пница, да все́х из глубины́ грехо́вныя воздви́гнет, вопию́щих: Аллилу́иа.
Икос 10
Царю́ Небе́сный, — та́ко мо́лит за ны́ всегда́ Небе́сная Цари́ца, — приими́ вся́каго челове́ка, сла́вящаго Тя́ и призыва́ющаго и́мя Твое́, иде́же быва́ет па́мять свято́му и́мени Твоему́, и прославля́ющих Мя́ и́мене Твоего́ ра́ди, и не отри́ни и́х от лица́ Твоего́, но благоволи́ в ни́х и приими́ от ни́х вся́кое моле́ние, и все́х от бе́д изба́ви. Мы́ же, гре́шнии, наде́ющеся на Твоя́ Ма́терния моли́твы, зове́м си́це:
Ра́дуйся, Моли́твеннице на́ша к Бо́гу те́плая; ра́дуйся, я́ко Твоя́ Ма́терняя моли́тва мно́го мо́жет, Влады́ку умилостивля́ющая.
Ра́дуйся, отча́янных Наде́ждо, печа́ли и́х утоля́ющая; ра́дуйся, Твое́ю благода́тию на́ше недосто́инство осиява́ющая.
Ра́дуйся, на́шу скве́рну Твое́ю чистото́ю очища́ющая; ра́дуйся, моле́ния на́ша Твои́м благоуха́нием исправля́ющая.
Ра́дуйся, бре́ние на́ше тле́нное в нетле́ние обраща́ющая; ра́дуйся, неможе́ние на́ше врачу́ющая.
Ра́дуйся, вся́ на́ша боле́зни душе́вныя и теле́сныя исцеля́ющая; ра́дуйся, наше́дший на на́с о́блак страсте́й, скорбе́й и печа́лей ско́ро разгоня́ющая.
Ра́дуйся, си́льным Твои́м проше́нием вся́ поле́зная да́рующая; ра́дуйся, пред Престо́лом Сы́на Твоего́ за моля́щих Ти́ ся́ хода́тайствующая.
Ра́дуйся, Ра́досте на́ша, изба́ви на́с от вся́каго зла́ и утоли́ на́ша печа́ли.
Кондак 11
Пе́ние всеумиле́нное приими́ от на́с, Небе́сная Цари́це, и моли́тву, приноси́мую Тебе́, Де́во Богоро́дице, услы́ши, к Тебе́ бо в напа́стех, ско́рбех и печа́лех прибега́ем и пред Тобо́ю в беда́х на́ших сле́зы пролива́ем и мо́лим: утоли́ на́ша печа́ли и приими́ сию́ же́ртву Твои́х рабо́в, зову́щих: Аллилу́иа.
Икос 11
Светоприе́мная Свеща́ и́стиннаго Све́та су́щим на земли́ я́вльшися, ду́ши просвеща́еши чту́щих Твоея́ ико́ны явле́ние и к ра́зуму Боже́ственному наставля́еши пою́щих Ти́ сицева́я:
Ра́дуйся, Свеще́ неугаси́мая Огня́ невеще́ственнаго, на́с просвеща́ющая; ра́дуйся, Заре́ незаходи́маго Све́та Боже́ственнаго, на́с озаря́ющая.
Ра́дуйся, Со́лнце пра́вды на́м явля́ющая; ра́дуйся, Исто́чник жи́зни ра́йския на́м источа́ющая.
Ра́дуйся, Ма́ти Све́та И́стиннаго, благочести́вых ду́ши просвеща́ющая; ра́дуйся, Ма́ти все́х Бо́га, озло́бленных все́х ду́ши утеша́ющая.
Ра́дуйся, Тя́ на по́мощь призыва́ющих и и́мя Твое́ сла́вящих спаса́ющая; ра́дуйся, упова́ющим на Тя́ живота́ непосты́дный коне́ц да́рующая.
Ра́дуйся, все́м родо́м, Тя́ Ма́терь Бо́жию почита́ющим и Богоро́дицу имену́ющим, непреста́нно помога́ющая; ра́дуйся, осене́нием святы́я Твоея́ ико́ны злы́х духо́в мечта́ния от на́с прогоня́ющая.
Ра́дуйся, во внеза́пных на на́с находя́щих ско́рбех и печа́лех ско́ро на́с утеша́ющая; ра́дуйся, всему́ ми́ру ра́дость да́рующая.
Ра́дуйся, Ра́досте на́ша, изба́ви на́с от вся́каго зла́ и утоли́ на́ша печа́ли.
Кондак 12
Благода́ть Боже́ственную испроси́ на́м у Небе́снаго Влады́ки, Сы́на Твоего́ и Бо́га, и простри́ на́м ру́ку по́мощи, и моли́твами Твои́ми утоли́ на́ша печа́ли, покры́й на́с кро́вом крилу́ Твое́ю, отжени́ от на́с вся́каго врага́ и супоста́та, умири́ на́шу жи́знь, да не поги́бнем лю́те, но приими́ на́с в ве́чныя кро́вы, Покрови́тельнице на́ша, да, ра́дующеся Тебе́, зове́м: Аллилу́иа.
Икос 12
Пою́ще Тя́, держа́вную Помо́щницу, хва́лим Тя́ и, моля́щеся Тебе́ со умиле́нием, ве́руем и испове́дуем, я́ко испро́сиши блага́я вре́менная и ве́чная воспева́ющим Ти́:
Ра́дуйся, моли́твами Твои́ми ве́сь ми́р спаса́ющая; ра́дуйся, всю́ вселе́нную хода́тайством Твои́м заступа́ющая.
Ра́дуйся, правосла́вным на ва́рвары побе́ды подава́ющая; ра́дуйся, наше́ствия на христиа́ны иноплеме́нных побежда́ющая.
Ра́дуйся, в ве́ре благочести́выя сохраня́ющая; ра́дуйся, не почита́ющих ико́ны Твоя́ святы́я, я́ко пра́х, от лица́ земли́ развева́ющая.
Ра́дуйся, поклоня́ющимся ико́не Твое́й и Тя́ на по́мощь призыва́ющим, и в печа́лех бе́дствующим ско́ро помога́ющая; ра́дуйся, на́с гре́шных ко спасе́нию и восприя́тию бла́г ве́чных наставля́ющая.
Ра́дуйся, безконе́чнаго Ца́рствия у Сы́на Твоего́ и Бо́га на́шего все́м на́м испроша́ющая; ра́дуйся, ве́рным безконе́чную жи́знь да́рующая.
Ра́дуйся, все́м во вся́кой потре́бе вся́ поле́зная и блага́я подава́ющая; ра́дуйся, нетле́нная стяжа́ти науча́ющая.
Ра́дуйся, Ра́досте на́ша, изба́ви на́с от вся́каго зла́ и утоли́ на́ша печа́ли.
Кондак 13
О Всепе́тая Ма́ти, Небе́сная Цари́це и Влады́чице, Де́во Богоро́дице, ро́ждшая все́х святы́х Святе́йшее Сло́во, ны́нешнее прие́мши приноше́ние, утоли́ на́ша печа́ли и изба́ви на́с от вся́ких напа́стей, бе́д, скорбе́й и ве́чнаго осужде́ния и гряду́щаго изми́ муче́ния, и сподо́би на́с, рабо́в Твои́х, в ве́чных ра́йских селе́ниях водвори́тися, зову́щих: Аллилу́иа.
Повтор
Этот кондак читается трижды, затем икос 1-й и кондак 1-й.
Икос 1
А́нгел мно́жество и вся́ Небе́сная Во́инства сла́вят Тебе́, Цари́цу все́х Богоро́дицу, Ты́ же испо́лнила еси́ ра́дости ду́ши на́ша ми́лостивым явле́нием на́м о́браза Твоего́ свята́го, Богоизбра́нная Де́во Влады́чице, к нему́же кла́няющеся, Тебе́ умиле́нная моле́ния возсыла́ем, милосе́рдому Твоему́ к на́м заступле́нию со стра́хом зову́ще такова́я:
Ра́дуйся, Отца́ Безнача́льнаго благослове́ние; ра́дуйся, Сы́на Преве́чнаго жили́ще.
Ра́дуйся, Ду́ха Свята́го пребыва́ние; ра́дуйся, я́ко Тебе́ сла́вят многоочи́тии херуви́ми.
Ра́дуйся, я́ко Тебе́ похва́льная прино́сят шестокрила́тии серафи́ми; ра́дуйся, я́ко Тебе́ вся́ небе́сная во́инства велича́ют.
Ра́дуйся, я́ко Тебе́ вся́ коле́на земна́я Ма́терь Бо́жию испове́дуют; ра́дуйся, я́ко Тобо́ю вся́ вселе́нная весе́лия исполня́ется.
Ра́дуйся, я́ко Тобо́ю вся́ боле́зни на́ша исцеля́ются; ра́дуйся, Твои́ми бо моли́твами печа́ли на́ша утоля́ются.
Ра́дуйся, Твои́ми бо хода́тайствы вся́ проше́ния на́ша исполня́ются; ра́дуйся, я́ко Тебе́ и Сы́ну Твоему́ в Твое́й честне́й ико́не благода́рно покланя́емся.
Ра́дуйся, Ра́досте на́ша, изба́ви на́с от вся́каго зла́ и утоли́ на́ша печа́ли.
Кондак 1
Взбра́нное на́м и ди́вное избавле́ние дарова́ся, Тво́й о́браз честны́й, Преблагослове́нная Де́во Влады́чице Богоро́дице, я́ко изба́вльшеся от злы́х явле́нием его́ и к нему́ взира́юще, воспису́ем Ти́ благода́рственная раби́ Твои́, Богоро́дице; но я́ко иму́щая держа́ву непобеди́мую, от вся́ких на́с бе́д свободи́, да зове́м Ти́:
Ра́дуйся, Ра́досте на́ша, изба́ви на́с от вся́каго зла́ и утоли́ на́ша печа́ли.
Молитвы
Наде́ждо все́х конце́в земли́, Пречи́стая Де́во, Госпоже́ Богоро́дице, утеше́ние мое́! Не гнуша́йся мене́, гре́шнаго, на Твою́ бо ми́лость упова́ю: угаси́ ми́ пла́мень грехо́вный и покая́нием ороси́ изсо́хшее мое́ се́рдце, очи́сти у́м мо́й от грехо́вных по́мыслов, приими́ мольбу́, от души́ и се́рдца со воздыха́нием приноси́мую Тебе́. Бу́ди о мне́ Хода́таица к Сы́ну Твоему́ и Бо́гу и укроти́ гне́в Его́ ма́терними Твои́ми моли́твами, душе́вныя и теле́сныя я́звы исцели́, Госпоже́ Влады́чице, утоли́ боле́зни души́ и те́ла, утиши́ бу́рю злы́х нападе́ний вра́жеских, отыми́ бре́мя грехо́в мои́х, и не оста́ви мене́ до конца́ поги́бнути, и печа́лию сокруше́нное се́рдце мое́ уте́ши, да сла́влю Тя́ до после́дняго издыха́ния моего́. Ами́нь.
Конда́къ а҃
Взбра́нное на́мъ и҆ ди́вное и҆збавле́нїе дарова́сѧ, тво́й ѡ҆́бразъ честны́й, преблгⷭ҇ве́ннаѧ дв҃о влⷣчце бцⷣе: ꙗ҆́кѡ и҆зба́вльшесѧ ѿ ѕлы́хъ ꙗ҆вле́нїемъ є҆гѡ̀, и҆ къ немꙋ̀ взира́юще, восписꙋ́емъ тѝ бл҃года́рствєннаѧ рабѝ твоѝ, бцⷣе: но ꙗ҆́кѡ и҆мꙋ́щаѧ держа́вꙋ непобѣди́мꙋю, ѿ всѧ́кихъ на́съ бѣ́дъ свободѝ, да зове́мъ тѝ:
Ра́дꙋйсѧ, ра́досте на́ша, и҆зба́ви на́съ ѿ всѧ́кагѡ ѕла̀, и҆ ᲂу҆толѝ на́шѧ печа̑ли.
І҆́косъ а҃
А҆́гг҃лъ мно́жество, и҆ всѧ̑ нбⷭ҇наѧ вѡ́инства сла́вѧтъ тебѐ, цр҃и́цꙋ всѣ́хъ бцⷣꙋ, ты́ же и҆спо́лнила є҆сѝ ра́дости дꙋ́шы на́шѧ ми́лостивымъ ꙗ҆вле́нїемъ на́мъ ѻ҆́браза твоегѡ̀ ст҃а́гѡ, бг҃оизбра́ннаѧ дв҃о влⷣчце, къ немꙋ́же кла́нѧющесѧ, тебѣ̀ ᲂу҆милє́ннаѧ молє́нїѧ возсыла́емъ, млⷭ҇рдомꙋ твоемꙋ̀ къ на́мъ застꙋпле́нїю со стра́хомъ зовꙋ́ще такѡва́ѧ:
Ра́дꙋйсѧ, ѻ҆ц҃а̀ безнача́льнагѡ бл҃гослове́нїе: ра́дꙋйсѧ, сн҃а превѣ́чнагѡ жили́ще.
Ра́дꙋйсѧ, дх҃а ст҃а́гѡ пребыва́нїе: ра́дꙋйсѧ, ꙗ҆́кѡ тебѐ сла́вѧтъ многоѻчи́тїи херꙋві́ми.
Ра́дꙋйсѧ, ꙗ҆́кѡ тебѣ̀ похва̑льнаѧ прино́сѧтъ шестокрила́тїи серафі́ми: ра́дꙋйсѧ, ꙗ҆́кѡ тебѐ всѧ̑ небє́снаѧ вѡ́инства велича́ютъ.
Ра́дꙋйсѧ, ꙗ҆́кѡ тебѐ всѧ̑ кѡлѣ́на земна̑ѧ мт҃рь бж҃їю и҆сповѣ́дꙋютъ: ра́дꙋйсѧ, ꙗ҆́кѡ тобо́ю всѧ̀ вселе́ннаѧ весе́лїѧ и҆сполнѧ́етсѧ.
Ра́дꙋйсѧ, ꙗ҆́кѡ тобо́ю всѧ̑ бѡлѣ́зни на́шѧ и҆сцѣлѧ́ютсѧ: ра́дꙋйсѧ, твои́ми бо моли́твами печа̑ли на́шѧ ᲂу҆толѧ́ютсѧ.
Ра́дꙋйсѧ, твои́ми бо хода́тайствы всѧ̑ прошє́нїѧ на̑ша и҆сполнѧ́ютсѧ: ра́дꙋйсѧ, ꙗ҆́кѡ тебѣ̀ и҆ сн҃ꙋ твоемꙋ̀ въ твое́й честнѣ́й і҆кѡ́нѣ бл҃года́рнѡ покланѧ́емсѧ.
Ра́дꙋйсѧ, ра́досте на́ша, и҆зба́ви на́съ ѿ всѧ́кагѡ ѕла̀, и҆ ᲂу҆толѝ на́шѧ печа̑ли.
Конда́къ в҃
Ви́дѧтъ тѧ̀, бг҃оизбра́ннаѧ ѻ҆трокови́це, всѧ̑ небє́сныѧ си̑лы предстоѧ́щꙋ всегда̀ прⷭ҇то́лꙋ сла́вы нбⷭ҇нагѡ цр҃ѧ̀, и҆ за хрⷭ҇тїа́ны къ сн҃ꙋ и҆ бг҃ꙋ молѧ́щꙋюсѧ, нбⷭ҇наѧ цр҃и́це: мы́ же, грѣ́шнїи, на землѝ зрѧ́ще твою̀ ст҃ꙋ́ю і҆кѡ́нꙋ и҆ къ не́й припа́дающе, тебѣ̀ ра́достнѡ покланѧ́емсѧ, зовꙋ́ще: А҆ллилꙋ́їа.
І҆́косъ в҃
Ра́зꙋмъ пода́ждь на́мъ, всеꙋсе́рднаѧ предста́тельнице на́ша, нбⷭ҇наѧ цр҃и́це, и҆з̾ ᲂу҆́стъ бо на́съ скве́рныхъ ка́кѡ мо́щно пѣ́ти твоемꙋ̀ и҆́мени; ꙗ҆́кѡ бл҃ги́хъ є҆сѝ на́мъ хода́таица, си́льна є҆сѝ вспомоществова́ти во всѧ́кой на́ми тре́бꙋемой по́мощи, да тебѣ̀ со ᲂу҆миле́нїемъ зове́мъ си́це:
Ра́дꙋйсѧ, моли̑твы ѡ҆ на́съ къ сн҃ꙋ и҆ бг҃ꙋ во ᲂу҆тѣше́нїе приносѧ́щаѧ: ра́дꙋйсѧ, твои́ми моли́твами ѻ҆́чи на́шѧ ѿ вѣ́чнагѡ рыда́нїѧ и҆збавлѧ́ющаѧ.
Ра́дꙋйсѧ, твои́ми ма́терними моли́твами сн҃а и҆ бг҃а на ми́лость къ на́мъ преклонѧ́ющаѧ: ра́дꙋйсѧ, твои́ми моли́твами пра́ведный на на́съ гнѣ́въ бж҃їй ᲂу҆толѧ́ющаѧ.
Ра́дꙋйсѧ, твои́ми хода́тайствы грѣхѝ на́шѧ проща́ющаѧ: ра́дꙋйсѧ, твое́ю по́мощїю стра̑сти на́шѧ и҆стреблѧ́ющаѧ.
Ра́дꙋйсѧ, твои́мъ предста́тельствомъ вре́мєннаѧ на́шѧ скѡ́рби разрꙋша́ющаѧ: ра́дꙋйсѧ, ты̀ во всѧ́кихъ бѣда́хъ и҆ нꙋ́ждахъ на́мъ помога́ющаѧ.
Ра́дꙋйсѧ, тѧ̀ сла́вѧщихъ всегда̀ прославлѧ́ющаѧ: ра́дꙋйсѧ, твое́ю ра́достїю печа̑ли на́шѧ ᲂу҆толѧ́ющаѧ.
Ра́дꙋйсѧ, непреста́нное на́мъ весе́лїе подава́ющаѧ: ра́дꙋйсѧ, на́мъ ра̑йскїѧ двє́ри ѿверза́ющаѧ.
Ра́дꙋйсѧ, ра́досте на́ша, и҆зба́ви на́съ ѿ всѧ́кагѡ ѕла̀, и҆ ᲂу҆толѝ на́шѧ печа̑ли.
Конда́къ г҃
Си́ла вы́шнѧгѡ ѡ҆сѣни́ тѧ къ ско́ромꙋ и҆ те́пломꙋ застꙋпле́нїю вѣ́рнѡ притека́ющихъ къ тебѣ̀, и҆ честно́мꙋ твоемꙋ̀ ѻ҆́бразꙋ покланѧ́ющихсѧ, є҆ди́нѣй бо то́кмѡ тебѣ̀, нетлѣ́ннѣй и҆ пречи́стѣй бг҃омт҃ри, даде́сѧ да́ръ всѧ́кое бл҃го́е на́ше проше́нїе и҆сполнѧ́ти, и҆ є҆ди́на ты̀ мо́жеши на́мъ помощѝ, є҆ли́кѡ хо́щеши: тѣ́мъ всѧ́къ во́зрастъ славосло́витъ сн҃а твоего̀ и҆ бг҃а на́шего, зовы́й: А҆ллилꙋ́їа.
І҆́косъ г҃
И҆мꙋ́щи бога́тство млⷭ҇рдїѧ неѡскꙋ́дное, всѣ̑мъ концє́мъ земны̑мъ простира́еши рꙋ́кꙋ по́мощи, и҆ подае́ши болѧ́щымъ и҆сцѣле́нїе, стра́ждꙋщымъ ѡ҆сла́бꙋ, слѣпы̑мъ прозрѣ́нїе, и҆ всѣ̑мъ всѧ̑ по потре́бѣ и҆сполнѧ́еши: мы́ же тебѣ̀ благода́рнѡ си́це пое́мъ:
Ра́дꙋйсѧ, є҆ди́на мт҃и, млⷭ҇рдїе на́мъ ꙗ҆влѧ́ющаѧ: ра́дꙋйсѧ, ми́лости сокро́вище многоцѣ́нное на́мъ ѿкрыва́ющаѧ.
Ра́дꙋйсѧ, безчи́слєнныѧ щедрѡ́ты всѣ̑мъ подава́ющаѧ: ра́дꙋйсѧ, сло́во премꙋ́дрости просѧ́щымъ да́рꙋющаѧ.
Ра́дꙋйсѧ, преспѣ́ѧнїе ра́зꙋма ю҆́нымъ подава́ющаѧ: ра́дꙋйсѧ, ра̑ны на́шѧ грѣхѡ́вныѧ и҆стреблѧ́ющаѧ.
Ра́дꙋйсѧ, пра́ведныхъ въ ра́йскихъ селе́нїѧхъ насажда́ющаѧ: ра́дꙋйсѧ, ѿча̑ѧннымъ бꙋ́дꙋщихъ бла̑гъ наде́ждо и҆ ᲂу҆крѣпле́нїе.
Ра́дꙋйсѧ, всѣ́хъ па́дшихъ ско́рѡ къ благода́ти возставлѧ́ющаѧ: ра́дꙋйсѧ, всѣ̑мъ всѧ́кꙋю тре́бꙋемꙋю ѿ тебє̀ по́мощь подава́ющаѧ.
Ра́дꙋйсѧ, ра́досте на́ша, и҆зба́ви на́съ ѿ всѧ́кагѡ ѕла̀, и҆ ᲂу҆толѝ на́шѧ печа̑ли.
Конда́къ д҃
Бꙋ́рею мно́гихъ бѣ́дъ ѡ҆держи̑мымъ на́мъ всегда̀ помога́еши, нбⷭ҇наѧ цр҃и́це, съ вѣ́рою прибѣга́ющымъ къ тебѣ̀, и҆ покланѧ́ющымсѧ цѣльбоно́снѣй твое́й і҆кѡ́нѣ, є҆́йже первопи́саннѣй и҆ногда̀ рекла̀ є҆сѝ: съ си́мъ ѻ҆́бразомъ благода́ть моѧ̀ и҆ си́ла, и҆ мы̀ и҆́стиннѡ вѣ́рꙋемъ, ꙗ҆́кѡ послꙋ́шаеши прошє́нїѧ призыва́ющихъ и҆́мѧ ст҃о́е твоѐ, и҆ сн҃ꙋ твоемꙋ̀ зовꙋ́щихъ: А҆ллилꙋ́їа.
І҆́косъ д҃
Слы́ша гдⷭ҇ь твоѧ̑ на небесѝ ѡ҆ на́съ хода̑тайства, и҆збра́ннаѧ пала́то дх҃а ст҃а́гѡ, и҆сполнѧ́етъ твоѧ̑ прошє́нїѧ, мы́ же грѣ́шнїи на землѝ, ви́дѣвше ст҃ꙋ́ю твою̀ і҆кѡ́нꙋ, ꙗ҆́кѡ свѣтоза́рное сл҃нце на́мъ свѣтѧ́щꙋюсѧ, тебѣ̀ ꙗ҆́кѡ бж҃їей мт҃ри дерза́емъ гл҃ати:
Ра́дꙋйсѧ, со́лнце мы́сленное на́мъ ꙗ҆влѧ́ющаѧ: ра́дꙋйсѧ, свѣ́томъ немерца́ющимъ на́съ просвѣща́ющаѧ.
Ра́дꙋйсѧ, ᲂу҆мерщвле́нныхъ грѣха́ми на́съ ѡ҆живлѧ́ющаѧ: ра́дꙋйсѧ, неплѡ́днымъ ма́теремъ ложесна̀ разрѣша́ющаѧ.
Ра́дꙋйсѧ, неча́ѧннѡ находѧ́щихъ на на́съ ѕлы́хъ врагѡ́въ ско́рѡ прогонѧ́ющаѧ: ра́дꙋйсѧ, жела́емыхъ бла̑гъ всегда̀ на́съ наслажда́ющаѧ.
Ра́дꙋйсѧ, ско́рѡ въ бѣда́хъ и҆ въ печа́лехъ на́съ ᲂу҆тѣша́ющаѧ: ра́дꙋйсѧ, вѣ́рою и҆́мѧ твоѐ призыва́ющихъ ѿ неча́ѧнныѧ сме́рти спаса́ющаѧ.
Ра́дꙋйсѧ, на тѧ̀ ᲂу҆пова́ющымъ безконе́чный живо́тъ да́рꙋющаѧ: ра́дꙋйсѧ, вѣ́рꙋ и҆ любо́вь къ тебѣ̀ и҆мꙋ́щихъ къ небесѝ возводѧ́щаѧ.
Ра́дꙋйсѧ, предста́тельство на́ше крѣ́пкое: ра́дꙋйсѧ, во всѧ́кихъ ѡ҆бстоѧ́тельствахъ на́съ защища́ющаѧ.
Ра́дꙋйсѧ, ра́досте на́ша, и҆зба́ви на́съ ѿ всѧ́кагѡ ѕла̀, и҆ ᲂу҆толѝ на́шѧ печа̑ли.
Конда́къ є҃
Боготе́чнꙋю ѕвѣздꙋ̀, честнꙋ́ю твою̀ і҆кѡ́нꙋ ты̀ на́мъ показа́ла є҆сѝ, влⷣчце мі́ра, къ не́йже мы̀ зрѧ́ще, и҆ вѣ́рою серде́чною молѧ́щесѧ тебѣ̀, бцⷣе, глаго́лемъ: ты̀ є҆сѝ на́мъ щи́тъ непобѣди́мый и҆ стѣна̀ неѡбори́маѧ, вопїю́щымъ бг҃ꙋ: А҆ллилꙋ́їа.
І҆́косъ є҃
Ви́дѣша си̑лы небє́сныѧ на рꙋкꙋ̀ твоє́ю созда́вшаго свои́ма рꙋка́ма человѣ́ки, и҆ влⷣкꙋ разꙋмѣва́юще є҆го̀: мы́ же грѣ́шнїи на землѝ зрѧ́ще и҆зѡбраже́ннꙋю тебѐ пречи́стꙋю мт҃рь є҆гѡ̀, любе́знѡ своѝ рꙋ́цѣ къ на́мъ простира́ющꙋю, къ тебѣ̀ ᲂу҆ми́льнѡ зове́мъ:
Ра́дꙋйсѧ, на рꙋкꙋ̀ твоє́ю ѻ҆́гнь бж҃е́ственный неѡпа́льнѡ держа́щаѧ, и҆́мже грѣхѝ на́шѧ попалѧ́ютсѧ: ра́дꙋйсѧ, на рꙋкꙋ̀ твоє́ю свѣ́та неприкоснове́ннаго носи́вшаѧ, и҆́мже дꙋ́ши на́шѧ просвѣща́ютсѧ.
Ра́дꙋйсѧ, врагѡ́въ на́шихъ ви́димыхъ и҆ неви́димыхъ побѣжда́ющаѧ: ра́дꙋйсѧ, любо́вь и҆ милосе́рдїе къ на́мъ ꙗ҆влѧ́ющаѧ.
Ра́дꙋйсѧ, рꙋ́цѣ твоѝ въ порꙋче́нїе ѡ҆ на́съ къ бг҃ꙋ приносѧ́щаѧ: ра́дꙋйсѧ, вхо́дъ въ црⷭ҇твїе небе́сное на́мъ ѿверза́ющаѧ.
Ра́дꙋйсѧ, твое́ю по́мощїю на́съ защища́ющаѧ: ра́дꙋйсѧ, твои́мъ хода́тайствомъ грѣхѝ на́шѧ проща́ющаѧ.
Ра́дꙋйсѧ, твои́мъ моле́нїемъ печа̑ли на́шѧ ᲂу҆толѧ́ющаѧ: ра́дꙋйсѧ, ꙗ҆́кѡ твои́мъ предста́тельствомъ всѧ́кихъ бла̑гъ наслажда́емсѧ.
Ра́дꙋйсѧ, ꙗ҆́кѡ тобо́ю всѧ̑ во благи́хъ жела̑нїѧ на̑ша и҆сполнѧ́ютсѧ: ра́дꙋйсѧ, ꙗ҆́кѡ во́лю сн҃а твоегѡ̀ твори́ти на́съ подвиза́еши.
Ра́дꙋйсѧ, ра́досте на́ша, и҆зба́ви на́съ ѿ всѧ́кагѡ ѕла̀, и҆ ᲂу҆толѝ на́шѧ печа̑ли.
Конда́къ ѕ҃
Проповѣ̑дницы бг҃оно́снїи а҆пⷭ҇толи по вознесе́нїи гдⷭ҇ни, при ѡ҆сщ҃е́нїи хра́ма твоегѡ̀ неви́димою рꙋко́ю и҆зѡбраже́нный шаро́вными подѡ́бїи на стѣнѣ̀ ѡ҆брѣ́тше ѻ҆́бразъ тво́й, влⷣчце, рожде́нномꙋ ѿ тебє̀ бг҃ꙋ воспѣ́ша: А҆ллилꙋ́їа.
І҆́косъ ѕ҃
Возсїѧ́ла є҆сѝ премꙋ́дростїю ѿ и҆́стиннагѡ со́лнца пра́вды, бг҃оизбра́ннаѧ ѻ҆трокови́це, и҆ лꙋчѝ и҆́стиннагѡ бг҃оразꙋ́мїѧ и҆спꙋща́ющи, тѣ́ми ѡ҆свѣща́еши всѣ́хъ вѣ́рою и҆сповѣ́дающихъ тѧ̀ и҆́стиннꙋю мт҃рь бж҃їю бы́ти, вопїю́щихъ си́це:
Ра́дꙋйсѧ, всѣ́хъ на нб҃сѝ сла́вою твое́ю просвѣща́ющаѧ: ра́дꙋйсѧ, нача́ло человѣ́ческагѡ спасе́нїѧ ᲂу҆строѧ́ющаѧ.
Ра́дꙋйсѧ, ковче́же жи́зни на́шеѧ, ѿ пото́па сме́ртнагѡ на́съ сохранѧ́ющїй: ра́дꙋйсѧ, въ ра́йскихъ селе́нїихъ жи́ти на́мъ да́рꙋющаѧ.
Ра́дꙋйсѧ, предста́тельнице на́ша къ бг҃ꙋ, мі́ръ спаса́ющаѧ: ра́дꙋйсѧ, въ бѣда́хъ сꙋ́щихъ ско́рѡ застꙋпа́ющаѧ.
Ра́дꙋйсѧ, всѧ̑кїѧ болѣ̑зни человѣ́чєскїѧ тѣлє́сныѧ и҆ дꙋшє́вныѧ и҆сцѣлѧ́ющаѧ: ра́дꙋйсѧ, нѣмы̑мъ и҆ косноѧзы̑чнымъ словеса̀ ѿверза́ющаѧ.
Ра́дꙋйсѧ, всѧ́кагѡ бла́га просѧ́щымъ ᲂу҆ тебє̀ пода́тельнице: ра́дꙋйсѧ, ᲂу҆че́нїе благода́ти всѣ̑мъ и҆сточа́ющаѧ.
Ра́дꙋйсѧ, тѣ́мъ всѧ́кїй чи́нъ и҆ во́зрастъ дово́льнѡ ᲂу҆слажда́ющаѧ: ра́дꙋйсѧ, всѣ́хъ бл҃гі̑ѧ жела̑нїѧ и҆сполнѧ́ющаѧ.
Ра́дꙋйсѧ, ра́досте на́ша, и҆зба́ви на́съ ѿ всѧ́кагѡ ѕла̀, и҆ ᲂу҆толѝ на́шѧ печа̑ли.
Конда́къ з҃
Хотѧ̀ долготерпѣли́вый всеви́децъ гдⷭ҇ь ꙗ҆ви́ти своегѡ̀ человѣколю́бїѧ и҆ щедрѡ́тъ бе́зднꙋ, и҆збра̀ тебѐ себѣ̀ въ мт҃рь, ми́лости неисчерпа́емый и҆сто́чниче, да а҆́ще кто̀ пра́веднымъ сꙋдо́мъ бж҃їимъ ѡ҆сꙋжде́нїѧ досто́инъ, твои́мъ всемо́щнымъ хода́тайствомъ сохране́нъ бꙋ́детъ, и҆ сн҃ꙋ твоемꙋ̀ и҆ бг҃ꙋ на́шемꙋ велегла́снѡ зове́тъ: А҆ллилꙋ́їа.
І҆́косъ з҃
Ди̑вна показа́лъ є҆сѝ дѣла̀ твоѧ̑ въ пречи́стѣй мт҃ри твое́й, гдⷭ҇и, и҆ ди́внꙋ дарова́лъ є҆сѝ на́мъ є҆ѧ̀ і҆кѡ́нꙋ, па́че лꙋче́й со́лнечныхъ просвѣща́ющꙋю люде́й, ꙗ҆́кѡ са́мꙋю зрѧ́щихъ бцⷣꙋ, и҆ вѣ́рою серде́чною ѿ дꙋшѝ любо́вїю вопїю́щихъ такѡва́ѧ:
Ра́дꙋйсѧ, і҆кѡ́нꙋ твою̀ на землѝ ꙗ҆́кѡ ѻ҆́блакъ всѣ̑мъ распростира́ющаѧ: ра́дꙋйсѧ, то́ю па́че надѣ́ѧнїѧ милосе́рдое къ на́мъ застꙋпле́нїе ꙗ҆влѧ́ющаѧ.
Ра́дꙋйсѧ, твое́ю і҆кѡ́ною и҆сто́чники чꙋде́съ всю́дꙋ и҆сточа́ющаѧ: ра́дꙋйсѧ, ꙗ҆вле́нїемъ твоеѧ̀ і҆кѡ́ны всѧ̑ лю́ди просвѣща́ющаѧ.
Ра́дꙋйсѧ, то́ю но́вое зна́менїе благода́ти въ це́ркви ꙗ҆влѧ́ющаѧ: ра́дꙋйсѧ, ꙗ҆́кѡ на і҆кѡ́нꙋ твою̀ взира́юще, само́й тебѣ̀ и҆́стиннѣй бцⷣѣ покланѧ́емсѧ.
Ра́дꙋйсѧ, і҆кѡ́ною твое́ю, ꙗ҆́кѡ столпо́мъ ѻ҆́гненнымъ мра́къ грѣха̀ ѿгонѧ́ющаѧ: ра́дꙋйсѧ, то́ю печа̑ли на́шѧ ᲂу҆толѧ́ющаѧ.
Ра́дꙋйсѧ, цр҃ковь ѡ҆свѧти́вшаѧ тоѧ̀ ꙗ҆вле́нїемъ: ра́дꙋйсѧ, ꙗ҆́кѡ мы̀ грѣ́шнїи сохранѧ́емсѧ твои́мъ застꙋпле́нїемъ.
Ра́дꙋйсѧ, вре́тище ско́рби на́шеѧ растерза́ющаѧ: ра́дꙋйсѧ, вѣ́чною ра́достїю на́съ ѡ҆дѣва́ющаѧ.
Ра́дꙋйсѧ, ра́досте на́ша, и҆зба́ви на́съ ѿ всѧ́кагѡ ѕла̀, и҆ ᲂу҆толѝ на́шѧ печа̑ли.
Конда́къ и҃
Стра́ннꙋ и҆ пресла́внꙋ въ це́ркви ꙗ҆́вльшꙋюсѧ ст҃ꙋ́ю твою̀ і҆кѡ́нꙋ а҆́гг҃ли воспѣ́ша, а҆пⷭ҇толи просла́виша, ли́къ ст҃и́телей поклони́шасѧ, мы́ же грѣ́шнїи, припа́дающе ѡ҆жида́емъ твоеѧ̀ вели́кїѧ и҆ бога́тыѧ ми́лости, съ весе́лїемъ вопїю́ще: А҆ллилꙋ́їа.
І҆́косъ и҃
Всѣ́ми вы́шними и҆ ни́жними влады́чествꙋѧй гдⷭ҇ь, ви́дѣвъ тѧ̀ мт҃рь свою̀ всегда̀ предстоѧ́щꙋ є҆мꙋ̀ и҆ со ᲂу҆миле́нїемъ є҆мꙋ̀ приносѧ́щꙋ моле́нїе ѡ҆ на́съ грѣ́шныхъ, ѡ҆бѣща̀ и҆спо́лнити всѧ̑ прошє́нїѧ твоѧ̑: мы́ же грѣ́шнїи надѣ́ющесѧ на твоѧ̑ ма́тєрнїѧ ѡ҆ на́съ моли̑твы, благода́рствєннаѧ тебѣ̀ прино́симъ си́це:
Ра́дꙋйсѧ, съ сн҃омъ твои́мъ и҆ бг҃омъ вѣ́чнѡ ца́рствꙋющаѧ: ра́дꙋйсѧ, є҆мꙋ́же всегда̀ ѡ҆ на́съ молє́нїѧ приносѧ́щаѧ.
Ра́дꙋйсѧ, всѣ́хъ къ тебѣ̀ прибѣга́ющихъ твое́ю ми́лостїю покрыва́ющаѧ: ра́дꙋйсѧ, всѣ́хъ ра́досте, печа̑ли на́шѧ ᲂу҆толѧ́ющаѧ.
Ра́дꙋйсѧ, примире́нїе на́ше съ бг҃омъ содѣ́лавшаѧ: ра́дꙋйсѧ, бг҃а и҆ человѣ́ка соедини́вшаѧ.
Ра́дꙋйсѧ, спасе́нїе человѣ́ческое ᲂу҆стро́ившаѧ: ра́дꙋйсѧ, прароди́тельнагѡ грѣха̀ клѧ́твꙋ разрꙋши́вшаѧ.
Ра́дꙋйсѧ, сме́ртное на́ше є҆стество̀ безсме́ртїемъ просвѣти́вшаѧ: ра́дꙋйсѧ, жесто́кость се́рдца на́шегѡ ᲂу҆мили́вшаѧ.
Ра́дꙋйсѧ, ѿча́ѧнныхъ къ бг҃ꙋ возводѧ́щаѧ: ра́дꙋйсѧ, сосꙋ́ды смє́ртныѧ на на́съ ᲂу҆готѡ́ванныѧ сокрꙋши́вшаѧ.
Ра́дꙋйсѧ, ра́досте на́ша, и҆зба́ви на́съ ѿ всѧ́кагѡ ѕла̀, и҆ ᲂу҆толѝ на́шѧ печа̑ли.
Конда́къ ѳ҃
Всѐ є҆стество̀ а҆́гг҃льское похва̑льныѧ пѣ̑сни прино́ситъ тебѣ̀, бж҃їей ма́тери и҆ застꙋ́пницѣ всѣ́хъ припа́дающихъ тебѣ̀ и҆ просѧ́щихъ твоеѧ̀ по́мощи, ꙗ҆́кѡ тве́рдымъ и҆ крѣ́пкимъ твои́мъ предста́тельствомъ првⷣныхъ весели́ши, грѣ́шныхъ застꙋпа́еши и҆ ѿ бѣ́дъ и҆збавлѧ́еши и҆ печа̑ли ᲂу҆толѧ́еши, и҆ мо́лишисѧ ѡ҆ всѣ́хъ вѣ́рою зовꙋ́щихъ: А҆ллилꙋ́їа.
І҆́косъ ѳ҃
Вѣті̑ѧ многовѣща̑нныѧ, ꙗ҆́кѡ ры̑бы безгла̑сныѧ, недоꙋмѣ́ютъ хвали́ти сла́вный, влⷣчце, і҆кѡ́ны твоеѧ̀ пра́здникъ, нижѐ ѿ скве́рныхъ ᲂу҆сте́нъ на́шихъ приноси̑мыѧ тѝ похвалы̑ достѡ́йны, ѻ҆ба́че, неисчє́тныѧ бл҃годѣѧ̑нїѧ і҆кѡ́ною твое́ю на́мъ ꙗ҆влѧ́ємыѧ ви́дѣвше, дꙋше́ю и҆ се́рдцемъ ра́дꙋющесѧ тебѣ̀ глаго́лемъ:
Ра́дꙋйсѧ, ѿ гла́да на́съ хлѣ́бомъ жи́зни пита́ющаѧ: ра́дꙋйсѧ, ѿ гꙋби́тельства сме́ртнагѡ безсме́ртїемъ на́съ соблюда́ющаѧ.
Ра́дꙋйсѧ, ѿ трꙋ́са грѣхо́внагѡ на́съ сохранѧ́ющаѧ: ра́дꙋйсѧ, ѿ пото́па сме́ртнагѡ рꙋко́ю твое́ю крѣ́пкою на́съ и҆збавлѧ́ющаѧ.
Ра́дꙋйсѧ, ѿ ѻ҆гнѧ̀ росо́ю моли́твъ твои́хъ на́съ восхища́ющаѧ: ра́дꙋйсѧ, ѿ бѣ́дъ си́льнымъ твои́мъ предста́тельствомъ на́съ защища́ющаѧ.
Ра́дꙋйсѧ, ѿ меча̀ си́лою твое́ю на́съ ѡ҆хранѧ́ющаѧ: ра́дꙋйсѧ, ѿ наше́ствїѧ и҆ноплемє́нникъ на́съ спаса́ющаѧ.
Ра́дꙋйсѧ, ѿ междоꙋсо́бныѧ бра́ни и҆́стиннымъ ми́ромъ на́съ ѡ҆гражда́ющаѧ: ра́дꙋйсѧ, ѿ смертоно́сныѧ ра́ны прибѣга́ющихъ къ тебѣ̀ и҆сцѣлѧ́ющаѧ.
Ра́дꙋйсѧ, ѿ належа́щагѡ пра́веднагѡ преще́нїѧ бж҃їѧ твои́мъ моле́нїемъ на́съ свобожда́ющаѧ: ра́дꙋйсѧ, ѿ всѧ́кїѧ на́съ ꙗ҆́звы твои́мъ чⷭ҇тны́мъ хода́тайствомъ и҆з̾има́ющаѧ.
Ра́дꙋйсѧ, ра́досте на́ша, и҆зба́ви на́съ ѿ всѧ́кагѡ ѕла̀, и҆ ᲂу҆толѝ на́шѧ печа̑ли.
Конда́къ і҃
Спастѝ хотѧ̀ ро́дъ человѣ́ческїй ѿ пре́лести вра́жїѧ, человѣколю́бецъ гдⷭ҇ь, тебѐ мт҃рь свою̀ дарова̀ земны̑мъ на по́мощь, глаго́лѧ: сы́нове чл҃вѣ́честїи, сѐ мт҃и моѧ̀ покро́въ и҆ прибѣ́жище ва́мъ да бꙋ́детъ, печа̑льнымъ ᲂу҆тѣше́нїе, скорбѧ́щымъ ра́дованїе, ѡ҆би̑димымъ застꙋ́пница, да всѣ́хъ и҆з̾ глꙋбины̀ грѣхо́вныѧ воздви́гнетъ, вопїю́щихъ: А҆ллилꙋ́їа.
І҆́косъ і҃
Цр҃ю̀ нбⷭ҇ный, та́кѡ мо́литъ за ны̀ всегда̀ небе́снаѧ цр҃и́ца, прїимѝ всѧ́каго человѣ́ка сла́вѧщаго тѧ̀ и҆ призыва́ющаго и҆́мѧ твоѐ, и҆дѣ́же быва́етъ па́мѧть свѧто́мꙋ и҆́мени твоемꙋ̀, и҆ прославлѧ́ющихъ мѧ̀ и҆́мене твоегѡ̀ ра́ди, и҆ не ѿри́ни и҆́хъ ѿ лица̀ твоегѡ̀, но бл҃говолѝ въ ни́хъ, и҆ прїимѝ ѿ ни́хъ всѧ́кое моле́нїе, и҆ всѣ́хъ ѿ бѣ́дъ и҆зба́ви: мы́ же грѣ́шнїи, надѣ́ющесѧ на твоѧ̑ ма́тєрнїѧ мл҃твы, зове́мъ си́це:
Ра́дꙋйсѧ, моли́твеннице на́ша къ бг҃ꙋ те́плаѧ: ра́дꙋйсѧ, ꙗ҆́кѡ твоѧ̀ ма́тернѧѧ моли́тва мно́гѡ мо́жетъ, влⷣкꙋ ᲂу҆милостивлѧ́ющаѧ.
Ра́дꙋйсѧ, ѿча́ѧнныхъ наде́ждо, печа̑ли и҆́хъ ᲂу҆толѧ́ющаѧ: ра́дꙋйсѧ, твое́ю благода́тїю на́ше недосто́инство ѡ҆сїѧва́ющаѧ.
Ра́дꙋйсѧ, на́шꙋ скве́рнꙋ твое́ю чистото́ю ѡ҆чища́ющаѧ: ра́дꙋйсѧ, молє́нїѧ на̑ша твои́мъ благоꙋха́нїемъ и҆справлѧ́ющаѧ.
Ра́дꙋйсѧ, бре́нїе на́ше тлѣ́нное въ нетлѣ́нїе ѡ҆браща́ющаѧ: ра́дꙋйсѧ, неможе́нїе на́ше врачꙋ́ющаѧ.
Ра́дꙋйсѧ, всѧ̑ на́шѧ болѣ̑зни дꙋшє́вныѧ и҆ тѣлє́сныѧ и҆сцѣлѧ́ющаѧ: ра́дꙋйсѧ, наше́дшїй на на́съ ѻ҆́блакъ страсте́й, скорбе́й и҆ печа́лей ско́рѡ разгонѧ́ющаѧ.
Ра́дꙋйсѧ, си́льнымъ твои́мъ проше́нїемъ всѧ̑ полє́знаѧ да́рꙋющаѧ: ра́дꙋйсѧ, пред̾ прⷭ҇то́ломъ сн҃а твоегѡ̀ за молѧ́щихъ тѝ сѧ̀ хода́тайствꙋющаѧ.
Ра́дꙋйсѧ, ра́досте на́ша, и҆зба́ви на́съ ѿ всѧ́кагѡ ѕла̀, и҆ ᲂу҆толѝ на́шѧ печа̑ли.
Конда́къ а҃і
Пѣ́нїе всеꙋмиле́нное прїимѝ ѿ на́съ, небе́снаѧ цр҃и́це, и҆ моли́твꙋ приноси́мꙋю тебѣ̀, дв҃о бцⷣе, ᲂу҆слы́ши: къ тебѣ́ бо въ напа́стехъ, ско́рбехъ и҆ печа́лехъ прибѣга́емъ, и҆ пред̾ тобо́ю въ бѣда́хъ на́шихъ сле́зы пролива́емъ, и҆ мо́лимъ, ᲂу҆толѝ на́шѧ печа̑ли, и҆ прїимѝ сїю̀ же́ртвꙋ твои́хъ рабѡ́въ, зовꙋ́щихъ: А҆ллилꙋ́їа.
І҆́косъ а҃і
Свѣтопрїе́мнаѧ свѣща̀ и҆́стиннагѡ свѣ́та сꙋ́щихъ на землѝ ꙗ҆́вльшисѧ, дꙋ́ши просвѣща́еши чтꙋ́щихъ твоеѧ̀ і҆кѡ́ны ꙗ҆вле́нїе, и҆ къ ра́зꙋмꙋ бж҃е́ственномꙋ наставлѧ́еши пою́щихъ тѝ сицєва́ѧ:
Ра́дꙋйсѧ, свѣщѐ неꙋгаси́маѧ ѻ҆гнѧ̀ невеще́ственнагѡ, на́съ просвѣща́ющаѧ: ра́дꙋйсѧ, зарѐ незаходи́магѡ свѣ́та бж҃е́ственнагѡ, на́съ ѡ҆зарѧ́ющаѧ.
Ра́дꙋйсѧ, со́лнце пра́вды, на́мъ ѡ҆блиста́ющее: ра́дꙋйсѧ, и҆сто́чникъ жи́зни ра́йскїѧ на́мъ и҆сточа́ющаѧ.
Ра́дꙋйсѧ, ма́ти свѣ́та и҆́стиннагѡ, бл҃гочести́выхъ дш҃ы просвѣща́ющаѧ: ра́дꙋйсѧ, мт҃и всѣ́хъ бг҃а, ѡ҆ѕло́бленныхъ всѣ́хъ дꙋ́ши ᲂу҆тѣша́ющаѧ.
Ра́дꙋйсѧ, тѧ̀ на по́мощь призыва́ющихъ и҆ и҆́мѧ твоѐ сла́вѧщихъ спаса́ющаѧ: ра́дꙋйсѧ, ᲂу҆пова́ющымъ на тѧ̀ живота̀ непосты́дный коне́цъ да́рꙋющаѧ.
Ра́дꙋйсѧ, всѣ̑мъ родѡ́мъ, тѧ̀ мт҃рь бж҃їю почита́ющымъ и҆ бцⷣꙋ и҆менꙋ́ющымъ, непреста́ннѡ помога́ющаѧ: ра́дꙋйсѧ, ѡ҆сѣне́нїемъ ст҃ы́ѧ твоеѧ̀ і҆кѡ́ны ѕлы́хъ дꙋхѡ́въ мечта̑нїѧ ѿ на́съ прогонѧ́ющаѧ.
Ра́дꙋйсѧ, во внеза́пныхъ на на́съ находѧ́щихъ ско́рбехъ и҆ печа́лехъ ско́рѡ на́съ ᲂу҆тѣша́ющаѧ: ра́дꙋйсѧ, всемꙋ̀ мі́рꙋ ра́дость да́рꙋющаѧ.
Ра́дꙋйсѧ, ра́досте на́ша, и҆зба́ви на́съ ѿ всѧ́кагѡ ѕла̀, и҆ ᲂу҆толѝ на́шѧ печа̑ли.
Конда́къ в҃і
Благода́ть бж҃е́ственнꙋю и҆спросѝ на́мъ ᲂу҆ нбⷭ҇нагѡ влⷣки, сн҃а твоегѡ̀ и҆ бг҃а, и҆ прострѝ на́мъ рꙋ́кꙋ по́мощи, и҆ моли́твами твои́ми ᲂу҆толѝ на́шѧ печа̑ли, покры́й на́съ кро́вомъ крилꙋ̑ твоє́ю, ѿженѝ ѿ на́съ всѧ́каго врага̀ и҆ сꙋпоста́та, ᲂу҆мирѝ на́шꙋ жи́знь, да не поги́бнемъ лю́тѣ: но прїимѝ на́съ въ вѣ̑чныѧ кро́вы, покрови́тельнице на́ша, да ра́дꙋющесѧ тебѣ̀ зове́мъ: А҆ллилꙋ́їа.
І҆́косъ в҃і
Пою́ще тѧ̀ держа́внꙋю помо́щницꙋ, хва́лимъ тѧ̀, и҆ молѧ́щесѧ тебѣ̀ со ᲂу҆миле́нїемъ, вѣ́рꙋемъ и҆ и҆сповѣ́дꙋемъ, ꙗ҆́кѡ и҆спро́сиши блага̑ѧ и҆ вре́мєннаѧ и҆ вѣ̑чнаѧ воспѣва́ющымъ тѝ:
Ра́дꙋйсѧ, моли́твами твои́ми ве́сь мі́ръ спаса́ющаѧ: ра́дꙋйсѧ, всю̀ вселе́ннꙋю хода́тайствомъ твои́мъ застꙋпа́ющаѧ.
Ра́дꙋйсѧ, правосла̑внымъ на ва́рвары побѣ̑ды подава́ющаѧ: ра́дꙋйсѧ, нашє́ствїѧ на хрїстїа́ны и҆ноплеме́нныхъ побѣжда́ющаѧ.
Ра́дꙋйсѧ, въ вѣ́рѣ бл҃гочести̑выѧ сохранѧ́ющаѧ: ра́дꙋйсѧ, не почита́ющихъ і҆кѡ́ны твоѧ̀ ст҃ы́ѧ, ꙗ҆́кѡ пра́хъ ѿ лица̀ землѝ развѣва́ющаѧ.
Ра́дꙋйсѧ, покланѧ́ющымсѧ і҆кѡ́нѣ твое́й, и҆ тѧ̀ на по́мощь призыва́ющымъ, и҆ въ печа́лехъ бѣ́дствꙋющымъ ско́рѡ помога́ющаѧ: ра́дꙋйсѧ, на́съ грѣ́шныхъ ко спасе́нїю и҆ воспрїѧ́тїю бла̑гъ вѣ́чныхъ наставлѧ́ющаѧ.
Ра́дꙋйсѧ, безконе́чнагѡ ца́рствїѧ ᲂу҆ сн҃а твоегѡ̀ и҆ бг҃а на́шегѡ всѣ̑мъ на́мъ и҆спроша́ющаѧ: ра́дꙋйсѧ, вѣ̑рнымъ безконе́чнꙋю жи́знь да́рꙋющаѧ.
Ра́дꙋйсѧ, всѣ̑мъ во всѧ́кой потре́бѣ всѧ̑ полє́знаѧ и҆ блага̑ѧ подава́ющаѧ: ра́дꙋйсѧ, нетлѣ̑ннаѧ стѧжа́ти наꙋча́ющаѧ.
Ра́дꙋйсѧ, ра́досте на́ша, и҆зба́ви на́съ ѿ всѧ́кагѡ ѕла̀, и҆ ᲂу҆толѝ на́шѧ печа̑ли.
Конда́къ г҃і
Ѽ всепѣ́таѧ мт҃и, небе́снаѧ цр҃и́це и҆ влⷣчце, дв҃о бцⷣе, ро́ждшаѧ всѣ́хъ свѧты́хъ ст҃ѣ́йшее сло́во, ны́нѣшнее прїе́мши приноше́нїе, ᲂу҆толѝ на́шѧ печа̑ли, и҆ и҆зба́ви на́съ ѿ всѧ́кихъ напа́стей, бѣ́дъ, скорбе́й и҆ вѣ́чнагѡ ѡ҆сꙋжде́нїѧ, и҆ грѧдꙋ́щагѡ и҆змѝ мꙋче́нїѧ, и҆ сподо́би на́съ рабѡ́въ твои́хъ въ вѣ́чныхъ ра́йскихъ селе́нїѧхъ водвори́тисѧ, зовꙋ́щихъ: А҆ллилꙋ́їа.
Повто́ръ
Сей конда́къ глаго́лется три́жды, та́же і҆́косъ а҃-й и҆ конда́къ а҃-й.
І҆́косъ а҃
А҆́гг҃лъ мно́жество, и҆ всѧ̑ нбⷭ҇наѧ вѡ́инства сла́вѧтъ тебѐ, цр҃и́цꙋ всѣ́хъ бцⷣꙋ, ты́ же и҆спо́лнила є҆сѝ ра́дости дꙋ́шы на́шѧ ми́лостивымъ ꙗ҆вле́нїемъ на́мъ ѻ҆́браза твоегѡ̀ ст҃а́гѡ, бг҃оизбра́ннаѧ дв҃о влⷣчце, къ немꙋ́же кла́нѧющесѧ, тебѣ̀ ᲂу҆милє́ннаѧ молє́нїѧ возсыла́емъ, млⷭ҇рдомꙋ твоемꙋ̀ къ на́мъ застꙋпле́нїю со стра́хомъ зовꙋ́ще такѡва́ѧ:
Ра́дꙋйсѧ, ѻ҆ц҃а̀ безнача́льнагѡ бл҃гослове́нїе: ра́дꙋйсѧ, сн҃а превѣ́чнагѡ жили́ще.
Ра́дꙋйсѧ, дх҃а ст҃а́гѡ пребыва́нїе: ра́дꙋйсѧ, ꙗ҆́кѡ тебѐ сла́вѧтъ многоѻчи́тїи херꙋві́ми.
Ра́дꙋйсѧ, ꙗ҆́кѡ тебѣ̀ похва̑льнаѧ прино́сѧтъ шестокрила́тїи серафі́ми: ра́дꙋйсѧ, ꙗ҆́кѡ тебѐ всѧ̑ небє́снаѧ вѡ́инства велича́ютъ.
Ра́дꙋйсѧ, ꙗ҆́кѡ тебѐ всѧ̑ кѡлѣ́на земна̑ѧ мт҃рь бж҃їю и҆сповѣ́дꙋютъ: ра́дꙋйсѧ, ꙗ҆́кѡ тобо́ю всѧ̀ вселе́ннаѧ весе́лїѧ и҆сполнѧ́етсѧ.
Ра́дꙋйсѧ, ꙗ҆́кѡ тобо́ю всѧ̑ бѡлѣ́зни на́шѧ и҆сцѣлѧ́ютсѧ: ра́дꙋйсѧ, твои́ми бо моли́твами печа̑ли на́шѧ ᲂу҆толѧ́ютсѧ.
Ра́дꙋйсѧ, твои́ми бо хода́тайствы всѧ̑ прошє́нїѧ на̑ша и҆сполнѧ́ютсѧ: ра́дꙋйсѧ, ꙗ҆́кѡ тебѣ̀ и҆ сн҃ꙋ твоемꙋ̀ въ твое́й честнѣ́й і҆кѡ́нѣ бл҃года́рнѡ покланѧ́емсѧ.
Ра́дꙋйсѧ, ра́досте на́ша, и҆зба́ви на́съ ѿ всѧ́кагѡ ѕла̀, и҆ ᲂу҆толѝ на́шѧ печа̑ли.
Конда́къ а҃
Взбра́нное на́мъ и҆ ди́вное и҆збавле́нїе дарова́сѧ, тво́й ѡ҆́бразъ честны́й, преблгⷭ҇ве́ннаѧ дв҃о влⷣчце бцⷣе: ꙗ҆́кѡ и҆зба́вльшесѧ ѿ ѕлы́хъ ꙗ҆вле́нїемъ є҆гѡ̀, и҆ къ немꙋ̀ взира́юще, восписꙋ́емъ тѝ бл҃года́рствєннаѧ рабѝ твоѝ, бцⷣе: но ꙗ҆́кѡ и҆мꙋ́щаѧ держа́вꙋ непобѣди́мꙋю, ѿ всѧ́кихъ на́съ бѣ́дъ свободѝ, да зове́мъ тѝ:
Ра́дꙋйсѧ, ра́досте на́ша, и҆зба́ви на́съ ѿ всѧ́кагѡ ѕла̀, и҆ ᲂу҆толѝ на́шѧ печа̑ли.
Моли́твы
Наде́ждо всѣ́хъ конце́въ землѝ, пречⷭ҇таѧ дв҃о, госпожѐ бцⷣе, ᲂу҆тѣше́нїе моѐ! Не гнꙋша́йсѧ менѐ грѣ́шнаго, на твою̀ бо ми́лость ᲂу҆пова́ю, ᲂу҆гасѝ мѝ пла́мень грѣхо́вный и҆ покаѧ́нїемъ ѡ҆росѝ и҆зсо́хшее моѐ се́рдце, ѡ҆чи́сти ᲂу҆́мъ мо́й ѿ грѣхо́вныхъ по́мыслѡвъ, прїимѝ мольбꙋ̀, ѿ дꙋшѝ и҆ се́рдца со воздыха́нїемъ приноси́мꙋю тебѣ̀. бꙋ́ди ѡ҆ мнѣ̀ хода́таица къ сн҃ꙋ твоемꙋ̀ и҆ бг҃ꙋ, и҆ ᲂу҆кротѝ гнѣ́въ є҆гѡ̀ ма́терними твои́ми мл҃твами, дꙋшє́вныѧ и҆ тѣлє́сныѧ ꙗ҆́звы и҆сцѣлѝ, госпожѐ влⷣчце, ᲂу҆толѝ болѣ́зни дꙋшѝ и҆ тѣ́ла, ᲂу҆тишѝ бꙋ́рю ѕлы́хъ нападе́нїй вра́жескихъ, ѿимѝ бре́мѧ грѣхѡ́въ мои́хъ, и҆ не ѡ҆ста́ви менѐ до конца̀ поги́бнꙋти, и҆ печа́лїю сокрꙋше́нное се́рдце моѐ ᲂу҆тѣ́ши, да сла́влю тѧ̀ до послѣ́днѧгѡ и҆здыха́нїѧ моегѡ̀. А҆ми́нь.