Российская Православная Церковь

по благословенію Архіерейскаго Сѵнода Россійской Православной Церкви

Православный календарь

Ака́ѳістъ

А҆ка́ѳїстъ ст҃о́мꙋ прпⷣбномꙋ ѳеодо́сїю, то́темскомꙋ чꙋдотво́рцꙋ.

Прп. Феодосия Тотемского (1568) 10 февраля 2026

Конда́къ а҃

Возбра́нный чꙋдотво́рче, и҆ и҆зрѧ́дный ᲂу҆го́дниче хрⷭ҇то́въ, всѣ̑мъ съ вѣ́рою приходѧ́щымъ и҆сточа́ѧй многоцѣлє́бныѧ да́ры, пѡхва́льнаѧ восписꙋ́емъ тѝ творѧ́щїи всечестнꙋ́ю па́мѧть твою̀: ты́ же, ꙗ҆́кѡ и҆мѣ́ѧ дерзнове́нїе ко гдⷭ҇ꙋ, молѝ сп҃сти́сѧ дꙋша́мъ на́шымъ, да зове́мъ тѝ:

Ра́дꙋйсѧ, ѳеодо́сїе, вели́кїй чꙋдотво́рче.

І҆́косъ а҃

А҆́гг҃льское твоѐ во пло́ти житїѐ прови́дѣвъ всеѧ̀ тва́ри созда́тель, ѿ ю҆́ности ᲂу҆гото́ва тѧ̀ въ жили́ще себѣ̀, є҆гѡ̀ же тѧ̀ ѡ҆бита́лищемъ бы́ти ᲂу҆вѣ́дѣвше пѡхва́льнаѧ восписꙋ́емъ тѝ:

Ра́дꙋйсѧ, бл҃гочести́выхъ роди́телей бл҃гопрїѧ́тное и҆спроше́нїе: ра́дꙋйсѧ, ѿ бл҃гочести́вагѡ ко́рене ѿрасле ст҃ѣ́йшаѧ.

Ра́дꙋйсѧ, ѿ ю҆́ности твоеѧ̀ бг҃ꙋ послꙋжи́вый: ра́дꙋйсѧ, воздержа́нїемъ а҆́гг҃лѡвъ ᲂу҆диви́вый.

Ра́дꙋйсѧ, въ мл҃твахъ те́плый предста́телю: ра́дꙋйсѧ, скорбѧ́щихъ сла́дкое ᲂу҆тѣше́нїе.

Ра́дꙋйсѧ, просѧ́щымъ ско́рый помо́щниче: ра́дꙋйсѧ, болѧ́щымъ ско́рый и҆ безме́здный врачꙋ̀.

Ра́дꙋйсѧ, земны́й а҆́гг҃ле: ра́дꙋйсѧ, нбⷭ҇ный человѣ́че.

Ра́дꙋйсѧ, сосꙋ́де и҆збра́нный дх҃а ст҃а́гѡ: ра́дꙋйсѧ, тѣле́съ на́шихъ здра́вїѧ и҆ дꙋ́шъ сп҃се́нїѧ хода́тае.

Ра́дꙋйсѧ, ѳеодо́сїе, вели́кїй чꙋдотво́рче.

Конда́къ в҃

Ви́дѧ тщетꙋ̀ мїрски́хъ попече́нїй, бл҃же́нне ѳеодо́сїе, жи́знь твою̀ не мі́рови, но бг҃ꙋ посвѧти́лъ є҆сѝ: сегѡ̀ ра́ди ѡ҆ста́вилъ до́мъ роди́телей твои́хъ, водвори́лсѧ є҆сѝ съ рабо́тающими бг҃ꙋ во и҆́ноческомъ житїѝ, во є҆́же непреста́ннѡ и҆ бл҃гопрїѧ́тнѡ вопи́ти є҆мꙋ̀: А҆ллилꙋ́їа.

І҆́косъ в҃

Ра́зꙋмъ плотско́мꙋ человѣ́кꙋ неразꙋме́нный ѿ ю҆́ности твоеѧ̀ стѧжа́вый, прпⷣбне ѻ҆́ч҃е ѳеодо́сїе, гѡ́рнѧѧ мꙋ́дрствовалъ є҆сѝ, а҆ не земна̑ѧ, тѣ́мже взыва́емъ тѝ:

Ра́дꙋйсѧ, мꙋ́дрости нбⷭ҇ныѧ жили́ще: ра́дꙋйсѧ, терпѣ́нїѧ а҆дама́нте.

Ра́дꙋйсѧ, братолю́бїѧ зерца́ло: ра́дꙋйсѧ, и҆́нокѡвъ пра́вило.

Ра́дꙋйсѧ, на скрижа̑ли се́рдца твоегѡ̀ зако́нъ бж҃їй написа́вый: ра́дꙋйсѧ, са́мъ себѣ̀ и҆ ве́сь живо́тъ тво́й хрⷭ҇тꙋ̀ бг҃ꙋ преда́вый.

Ра́дꙋйсѧ, ᲂу҆́мъ тво́й къ нб҃сѝ впери́вый: ра́дꙋйсѧ, стра́хъ бж҃їй въ се́рдцѣ твое́мъ до конца̀ сохрани́вый.

Ра́дꙋйсѧ, вмѣ́стѡ тлѣ́нныхъ нетлѣ̑ннаѧ стѧжа́вый: ра́дꙋйсѧ, го́рдость мїрскꙋ́ю попра́вый.

Ра́дꙋйсѧ, дх҃омъ ст҃ы́мъ наꙋче́нный: ра́дꙋйсѧ, некни́жный па́че кни́жныхъ просвѣще́нный.

Ра́дꙋйсѧ, ѳеодо́сїе, вели́кїй чꙋдотво́рче.

Конда́къ г҃

Си́ла вы́шнѧгѡ ѡ҆сѣнѝ твоѐ се́рдце, прпⷣбне ѻ҆́ч҃е ѳеодо́сїе, ꙗ҆́кѡ тебѣ̀, въ сп҃си́телевой ѡ҆би́тели бг҃а ра́ди неꙋсы́пнѡ потрꙋди́вшасѧ, и҆ къ чꙋдотво́рнѣй ра́цѣ прпⷣбнагѡ дими́трїа нелѣ́ностнѡ прибѣга́вша, ꙗ҆вѝ соꙋча́стника ст҃ы́ни є҆гѡ̀, съ ни́мъ же и҆ ны́нѣ водворѧ́ешисѧ въ го́рнѣй ѡ҆би́тели, ди́вномꙋ во ст҃ы́хъ свои́хъ бг҃ꙋ всегда̀ вопїѧ̀: А҆ллилꙋ́їа.

І҆́косъ г҃

И҆мꙋ́ще тѧ̀, ѻ҆́ч҃е ѳеодо́сїе, прпⷣбный дими́трїй прилꙋ́цкїй, па́че про́чихъ и҆збра́нна и҆ любе́зна, пред̾ꙋгото́ва тѧ̀ къ вѧ́щшымъ по́двигѡмъ сп҃си́тельнымъ, є҆гда̀ ѿ междоꙋсо́бїѧ рѡссі́йскихъ вельмо́жъ, и҆ ѿ каза́нскихъ тата́ръ и҆ череми́съ, мнѡ́гїѧ скѡ́рби, и҆мꙋ́щыѧ бы́ти предрѣчѐ, та́же побѣ́дꙋ надъ ѻ҆́ными и҆ коне́чное разоре́нїе ца́рства каза́нскагѡ провозвѣстѝ, да и҆ ты̀ съ ни́мъ предста́неши ко гдⷭ҇ꙋ съ те́плымъ свои́мъ предста́тельствомъ. мы́ же вѣ́дꙋще всѧ̑ сбы́вшаѧсѧ, и҆ ᲂу҆разꙋмѣ́вше тѧ̀ крѣ́пка мл҃твенника ѡ҆ дꙋша́хъ на́шихъ, вопїе́мъ тѝ:

Ра́дꙋйсѧ, во пло́ти ᲂу҆досто́енный собесѣ́дованїѧ со ст҃ы́мъ дими́трїемъ: ра́дꙋйсѧ, вели́кїй бл҃гоче́стїѧ сто́лпе.

Ра́дꙋйсѧ, зерца́ло соверше́ннагѡ терпѣ́нїѧ: ра́дꙋйсѧ, мїролю́бцєвъ ѡ҆бличи́телю.

Ра́дꙋйсѧ, сластолю́бцєвъ наказа́телю: ра́дꙋйсѧ, вражде́бныхъ и҆спра́вителю.

Ра́дꙋйсѧ, малодꙋ́шныхъ ᲂу҆тѣ́шителю: ра́дꙋйсѧ, къ воздержа́нїю пꙋтеводи́телю.

Ра́дꙋйсѧ, тре́звеннагѡ житїѧ̀ наста́вниче: ра́дꙋйсѧ, во ᲂу҆ны́нїи закоснѣва́ющихъ и҆спра́вителю.

Ра́дꙋйсѧ, мно́гихъ ко гдⷭ҇ꙋ ѡ҆брати́вый: ра́дꙋйсѧ, ко́зни лꙋка́вагѡ побѣди́вый.

Ра́дꙋйсѧ, ѳеодо́сїе, вели́кїй чꙋдотво́рче.

Конда́къ д҃

Бꙋ́рѧ ꙗ҆́рѡсти и҆ ѕвѣ́рство безбо́жныхъ, мно́гихъ бра́тїи твоеѧ̀ ѕлѣ̀ и҆сторга́ѧ жи́знь при ѻ҆чесѣ́хъ твои́хъ, вє́лїѧ причинѝ тебѣ̀ ско́рби и҆ тѣснотꙋ̀: ѻ҆ба́че ты̀, ꙗ҆́кѡ до́блїй во́инъ хрⷭ҇то́въ, мꙋ́жественнѡ мл҃твою себѐ воѡрꙋжа́ѧ, под̾ ᲂу҆да́рами ѕло́бы не и҆змѣни́лсѧ є҆сѝ, всегда̀ вопїѧ̀ бг҃ꙋ: А҆ллилꙋ́їа.

І҆́косъ д҃

Слы́ша и҆гꙋ́менъ ѿ бра́тїи твоѐ терпеливодꙋ́шное въ безмо́лвїи житїѐ, пребл҃же́нне, по расхище́нїи пога́ными, а҆́ще и҆ не хотѧ́ща ѿлꙋчи́тисѧ ст҃ы́ѧ ѡ҆би́тели, восхотѣ̀ посла́ти тѧ̀ во гра́дъ то́тьмꙋ на строе́нїе солена́гѡ варе́нїѧ, ты́ же а҆пⷭ҇льскими стопа́ми послꙋша́нїѧ ра́ди ше́ствовавъ, пꙋ́ть тво́й до́брѣ соверши́лъ є҆сѝ, сегѡ̀ ра́ди срѣта́емъ тѧ̀ привѣ̑тствїи си́ми:

Ра́дꙋйсѧ, и҆́го хрⷭ҇то́во и҆ бре́мѧ є҆гѡ̀ понесы́й и҆змла́да: ра́дꙋйсѧ, не ѡ҆брати́выйсѧ вспѧ́ть въ ше́ствїи до го́рнѧгѡ гра́да.

Ра́дꙋйсѧ, во ᲂу҆мерщвле́нїи страсте́й до́брѣ подвиза́выйсѧ: ра́дꙋйсѧ, въ дꙋхо́вномъ мꙋ́жествѣ съ дре́вними ѻ҆тца́ми сравне́нный.

Ра́дꙋйсѧ, мл҃твами твои́ми ди́внаѧ сотвори́вый: ра́дꙋйсѧ, госпо́дствїю дꙋ́ха пло́ть покори́вый.

Ра́дꙋйсѧ, ми́ромъ нбⷭ҇нымъ прїѡсѣне́нный: ра́дꙋйсѧ, долготерпѣ́нїѧ и҆скꙋ́съ стѧжа́вый.

Ра́дꙋйсѧ, земна̑ѧ мꙋдрова̑нїѧ презрѣ́вый: ра́дꙋйсѧ, є҆ди́наго гдⷭ҇а вседꙋ́шнѡ поиска́вый.

Ра́дꙋйсѧ, невре́днѡ сохрани́вый цѣломꙋ́дрїе: ра́дꙋйсѧ, ꙗ҆́кѡ вѣ́рный ра́бъ пред̾ гдⷭ҇емъ во всѧ̑ дни̑ бл҃гоче́стнѡ ше́ствовавый.

Ра́дꙋйсѧ, ѳеодо́сїе, вели́кїй чꙋдотво́рче.

Конда́къ є҃

Бг҃оте́чнаѧ ѕвѣзда̀ ꙗ҆ви́лсѧ є҆сѝ во странѣ̀ то́темской, всебл҃же́нне, на пꙋ́ть сп҃си́тельный къ вѣ́чномꙋ нбⷭ҇номꙋ ѻ҆те́чествꙋ ведꙋ́щаѧ, є҆гда̀ примѣ́ромъ вѣ́рныхъ дꙋ́шы назида́ѧ, наꙋчи́лъ є҆сѝ ѧ҆̀ бл҃года́рнѡ пѣ́ти бг҃ꙋ: А҆ллилꙋ́їа.

І҆́косъ є҃

Ви́дѣвый, прпⷣбне ѻ҆́ч҃е, въ ва́рницахъ со́ли ѻ҆́гненный жа́ръ ве́лїй, мы́сленнѡ представлѧ́лъ є҆сѝ себѣ̀ жесто́кость ѻ҆гнѧ̀ въ грѧдꙋ́щемъ вѣ́цѣ, на грѣ́шникѡвъ нераска́ѧнныхъ ᲂу҆гото́ваннагѡ, и҆ внегда̀ пребыва́лъ при варе́нїи пи́щныѧ со́ли, и҆мѣ́ѧ слꙋжа́щыѧ лю́ди, ꙗ҆́кѡ при́сныѧ себѣ̀ ча̑да, всегда̀ внꙋша́лъ є҆сѝ и҆̀мъ стра́хъ бж҃їй, растворѧ́ѧ со́лїю сло́ва бж҃їѧ, са́мъ же на бо́льшыѧ по́двиги въ добродѣ́тели поꙋча́лсѧ є҆сѝ, тѣ́мже вопїе́мъ тѝ:

Ра́дꙋйсѧ, ѡ҆́бразе кро́тости дꙋхо́вныѧ: ра́дꙋйсѧ, ᲂу҆мертви́вый пло́ть твою̀ посто́мъ и҆ бдѣ́нїемъ.

Ра́дꙋйсѧ, ᲂу҆мертви́вый ѧ҆зы́къ тво́й на глаго́ланїе тщеты̀: ра́дꙋйсѧ, ᲂу҆мертви́вый ᲂу҆́шы твоѝ на слы́шанїе глаго́лъ дꙋшевре́дныхъ.

Ра́дꙋйсѧ, ᲂу҆мертви́вый рꙋ́цѣ на грабле́нїе и҆ творе́нїе ѕла̀: ра́дꙋйсѧ, ᲂу҆мертви́вый чре́во на ѡ҆б̾ѧде́нїе и҆ пїѧ́нство.

Ра́дꙋйсѧ, трꙋда́ми ме́ртва содѣ́лавый чресла̀ своѧ̑ на нечистотꙋ̀: ра́дꙋйсѧ, ᲂу҆мертви́вый нѡ́зѣ къ тече́нїю на совѣ́тъ нечести́выхъ.

Ра́дꙋйсѧ, на ка́мени хрⷭ҇то́вою вѣ́рою ᲂу҆твержде́нный: ра́дꙋйсѧ, бж҃їимъ свидѣ́тельствомъ возвы́шенный.

Ра́дꙋйсѧ, не пре́нїемъ, но вѣ́рою возмога́ти наꙋчи́вый: ра́дꙋйсѧ, некни́жный, мно́гихъ кни́жныхъ посрами́вый.

Ра́дꙋйсѧ, ѳеодо́сїе, вели́кїй чꙋдотво́рче.

Конда́къ ѕ҃

Проповѣ́дникъ немо́лчный ꙗ҆ви́лсѧ є҆сѝ всѣ̑мъ зрѧ́щымъ тѧ̀, прпⷣбне, премꙋ́дрости є҆ѵⷢ҇льскїѧ, всегда́шнїѧ чистоты̀ и҆ мꙋ́жественнагѡ терпѣ́нїѧ, а҆́ще и҆ въ безмо́лвїи храни́лъ є҆сѝ въ се́рдце твое́мъ сокро́вище вѣ́ры, наде́жды и҆ любвѝ, и҆ воспѣва́лъ є҆сѝ бг҃ꙋ: А҆ллилꙋ́їа.

І҆́косъ ѕ҃

Возсїѧ̀ бг҃охрани́мой дꙋшѝ твое́й и҆́стинный бг҃овѣ́дѣнїѧ свѣ́тъ, є҆гда̀ на́чалъ є҆сѝ помышлѧ́ти ѡ҆ созда́нїи но́выѧ ѡ҆би́тели при гра́дѣ то́тьмѣ, и҆ всели́тисѧ тꙋ̀, зна́менꙋѧ тѣ́мъ бж҃їе лю́демъ бл҃гослове́нїе, а҆ ѡ҆ бл҃годе́нственной и҆́хъ жи́зни могꙋ́щественное къ бг҃ꙋ предста́тельство. мы́ же, ви́дѣвше твоѐ, прпⷣбне, не то́чїю ѡ҆ себѣ̀, а҆ па́че ѡ҆ сп҃се́нїи бли́жнихъ попече́нїе, воспѣва́емъ тѧ̀ си́це:

Ра́дꙋйсѧ, сро́дники по пло́ти хрⷭ҇та̀ ра́ди ѡ҆ста́вивый: ра́дꙋйсѧ, всю̀ наде́ждꙋ на него̀ возложи́вый.

Ра́дꙋйсѧ, любвѐ нелицемѣ́рныѧ храни́телю: ра́дꙋйсѧ, слꙋжи́телю бж҃їй, ѡ҆ вѣ́рныхъ бг҃а ᲂу҆молѧ́ѧй.

Ра́дꙋйсѧ, наста́вниче, грѣ́шныхъ къ нбⷭ҇нымъ направлѧ́ѧй: ра́дꙋйсѧ, и҆ сло́вомъ и҆ житїе́мъ поꙋча́ѧй.

Ра́дꙋйсѧ, ѡ҆́бразе а҆́гнцємъ и҆ па́стырємъ: ра́дꙋйсѧ, бл҃же́нныѧ вѣ́чности и҆ска́телю.

Ра́дꙋйсѧ, непостижи́мыѧ сла́вы ст҃ы́хъ созерца́телю: ра́дꙋйсѧ, стрꙋѐ напаѧ́ющаѧ бл҃гоче́стїемъ цр҃ковь.

Ра́дꙋйсѧ, свѣти́льниче, непреста́ннымъ бг҃омы́слїемъ сїѧ́ющїй: ра́дꙋйсѧ, свѣ́щниче, любо́вїю къ бг҃ꙋ и҆ къ бли́жнемꙋ свѣтѧ́щїй.

Ра́дꙋйсѧ, ѳеодо́сїе, вели́кїй чꙋдотво́рче.

Конда́къ з҃

Хотѧ̀ ѡ҆бѣща́нное бг҃ꙋ и҆спо́лнити, прїѧ́лъ є҆сѝ пꙋ́ть ко и҆гꙋ́менꙋ и҆ бра́тїи, ѻ҆ни́ же, и҆ не хотѧ́ще разлꙋчи́тисѧ съ тобо́ю, съ че́стїю и҆з̾ ѡ҆би́тели тѧ̀ проводи́ша. ше́дъ ᲂу҆́бѡ въ пꙋ́ть сво́й ра́дꙋѧсѧ, є҆гда̀ дости́глъ є҆сѝ мѣ́ста къ соѡрꙋже́нїю ѡ҆би́тели, назнача́емагѡ на бре́гꙋ ко́вды рѣкѝ, водрꙋзи́въ кре́стъ, бг҃ꙋ съ ра́достными слеза́ми возопи́лъ є҆сѝ: А҆ллилꙋ́їа.

І҆́косъ з҃

Нѡ́выѧ ра́дѡсти и҆ бл҃годаре́нїѧ бг҃ꙋ и҆злїѧ́лъ є҆сѝ сле́зы, прпⷣбне ѻ҆́ч҃е, є҆гда̀ преше́дъ рѣкꙋ̀ и҆ возше́дъ на го́рꙋ, поста́вилъ є҆сѝ кꙋ́щꙋ и҆ водрꙋзи́въ кре́стъ на мѣ́стѣ, назнача́емомъ длѧ соѡрꙋже́нїѧ хра́ма, съ колѣнопреклоне́нїемъ и҆ со слеза́ми молѧ́сѧ, ре́клъ є҆сѝ: благослове́нъ бг҃ъ, и҆́же показа̀ мѝ мѣ́сто, и҆дѣ́же вселю́сѧ въ вѣ́къ вѣ́ка. сегѡ̀ ра́ди вопїе́мъ тѝ:

Ра́дꙋйсѧ, ѿ горы̀ сеѧ̀ возше́дый на го́рꙋ нбⷭ҇нꙋю: ра́дꙋйсѧ, дре́внимъ ѡ҆бщежи́тїѧ нача́льникѡмъ ᲂу҆подо́бивыйсѧ.

Ра́дꙋйсѧ, и҆́стинный бг҃ꙋ покло́нниче: ра́дꙋйсѧ, вели́кїй є҆мꙋ̀ ᲂу҆го́дниче.

Ра́дꙋйсѧ, дѣ́лателю вїногра́да хрⷭ҇то́ва нелѣ́ностный: ра́дꙋйсѧ, благі́й и҆ вѣ́рный є҆гѡ̀ ра́бе.

Ра́дꙋйсѧ, да́нный тѝ тала́нтъ бл҃гоче́стїѧ возрасти́вый: ра́дꙋйсѧ, въ ма́лѣ бы́въ вѣ́ренъ, надъ мно́гими ны́нѣ поста́вленный.

Ра́дꙋйсѧ, го́рлицѣ пꙋстыннолюби́ваѧ: ра́дꙋйсѧ, дре́во, посредѣ̀ происходѧ́щихъ во́дъ насажде́нное.

Ра́дꙋйсѧ, грѧдꙋ̑щаѧ ꙗ҆́кѡ настоѧ̑щаѧ предсказа́вый: ра́дꙋйсѧ, дꙋше́вныма ѻ҆чи́ма вы́нꙋ гдⷭ҇а созерца́ѧй.

Ра́дꙋйсѧ, ѳеодо́сїе, вели́кїй чꙋдотво́рче.

Конда́къ и҃

Стра́ннѡ бѣ̀ ви́дѣти, ка́кѡ ᲂу҆бо́гїй ста́рецъ є҆ди́нъ ѡ҆бита́етъ въ пꙋсты́ни на горѣ̀, презира́ѧ ви́димыхъ и҆ неви́димыхъ врагѡ́въ, возлю́бленный же и҆́мъ гра́дъ ѡ҆би́тель томꙋ̀ ᲂу҆стро́ити и҆ ст҃ы́нею ѡ҆богати́тисѧ тщи́тсѧ, мы́ же ѻ҆чи́ма на́шима всѧ̑ по во́ли ѿ бг҃а соверша̑емаѧ зрѧ́ще, благода́рнѡ є҆мꙋ̀ вопїе́мъ: А҆ллилꙋ́їа.

І҆́косъ и҃

Ве́сь, пречꙋ́дный ѳеодо́сїе, дꙋше́ю и҆ тѣ́ломъ посвѧти́лъ є҆сѝ себѐ бг҃ꙋ, пребыва́ѧ въ непреста́нныхъ трꙋдѣ́хъ, мл҃твахъ, постѣ́хъ и҆ бдѣ́нїихъ, є҆́же ви́дѣвше ѡ҆кре́стнїи лю́дїе, кро́тости и҆ терпѣ́нїю твоемꙋ̀ ᲂу҆дивлѧ́ющесѧ, нача́ша слꙋжи́ти потре́бными къ построе́нїю ст҃ы́ѧ ѡ҆би́тели: ѡ҆ чесо́мъ хода́тайствовати трꙋдолю́бнѡ поте́клъ є҆сѝ во гра́дъ ца́рствꙋющїй ко вели́комꙋ кнѧ́зю. мы́ же по́двиги твоѧ̑ восхвалѧ́емъ си́це:

Ра́дꙋйсѧ, соверше́нный въ добродѣ́телѣхъ человѣ́че: ра́дꙋйсѧ, лѣни́выхъ подви́гнꙋвый твои́ми нра́вы.

Ра́дꙋйсѧ, кро́тости навы́кнꙋвый ѿ а҆́гнца взе́млющагѡ грѣхѝ мі́ра: ра́дꙋйсѧ, за по́двиги полꙋчи́вый вѣ̑чнаѧ блага̑ѧ.

Ра́дꙋйсѧ, щито́мъ вѣ́ры стрѣ̑лы лꙋка́вагѡ разжжє́нныѧ ᲂу҆гаси́вый: ра́дꙋйсѧ, мл҃твою и҆ посто́мъ главꙋ̀ є҆мꙋ̀ сокрꙋши́вый.

Ра́дꙋйсѧ, предводи́телю до́брый въ пꙋтѝ сп҃се́нїѧ: ра́дꙋйсѧ, преспѣва́вый добродѣ́тельми и҆ трꙋды̀.

Ра́дꙋйсѧ, ᲂу҆мерщвле́нїемъ страсте́й мі́рꙋ ᲂу҆ме́рый: ра́дꙋйсѧ, воздѣ́лыванїемъ добродѣ́тели живы́й бг҃ови.

Ра́дꙋйсѧ, себѐ самаго̀, ꙗ҆́кѡ ю҆́нца въ же́ртвꙋ бг҃ꙋ посвѧти́вый: ра́дꙋйсѧ, свѣти́льниче, є҆ле́емъ бл҃года́ти кипѧ́щїй.

Ра́дꙋйсѧ, ѳеодо́сїе, вели́кїй чꙋдотво́рче.

Конда́къ ѳ҃

Всѧ́кое є҆стество̀ а҆́гг҃льское ᲂу҆диви́сѧ твои̑мъ по́двигѡмъ и҆ хрⷭ҇топодража́тельномꙋ житїю̀ твоемꙋ̀: почита́хꙋ бо тѧ̀ и҆ на землѝ во вре́мѧ трꙋдѡ́въ твои́хъ жи́вшїи, не ꙗ҆́кѡ про́ста человѣ́ка, но ꙗ҆́кѡ а҆́гг҃ла бж҃їѧ посредѣ̀ и҆́хъ свѣтѧ́щасѧ, и҆ премꙋ́дростїю ᲂу҆че́нїѧ въ добродѣ́тели всѣ́хъ превосходѧ́ща, мы́ же прославлѧ́ющемꙋсѧ чрез̾ тебѐ бг҃ꙋ взыва́емъ: А҆ллилꙋ́їа.

І҆́косъ ѳ҃

Виті́йство человѣ́ческое, твоѐ ѡ҆ хрⷭ҇тѣ̀ мꙋ́жество, всебл҃же́нне, и҆зрещѝ не мо́жетъ, ꙗ҆́кѡ преꙋспѣва́ѧ во бдѣ́нїихъ и҆ поще́нїихъ, вери́гами тѧ́жкими и҆ власѧни́цею ѡ҆бле́клсѧ є҆сѝ, претерпѣва́ѧ болѣ̑зни любвѐ ра́ди бж҃їѧ, пло́ть твою̀ дꙋ́хови порабо́тилъ є҆сѝ. сегѡ̀ ра́ди вопїе́мъ тѝ:

Ра́дꙋйсѧ, а҆лка́ѧ и҆ жажда́ѧ пра́вды, ны́нѣ насыща́ешисѧ: ра́дꙋйсѧ, въ послꙋша́нїе бг҃ꙋ ѻ҆ц҃ꙋ̀ себѐ ѿда́вый.

Ра́дꙋйсѧ, нището́ю твое́ю бг҃ꙋ сн҃ꙋ подража́вый: ра́дꙋйсѧ, чистотꙋ̀ твою̀ бг҃ꙋ дх҃ꙋ сохрани́вый.

Ра́дꙋйсѧ, во пло́ти а҆́гг҃льски пожи́вый: ра́дꙋйсѧ, во́ине хрⷭ҇то́въ непобѣди́мый.

Ра́дꙋйсѧ, кꙋ́плѧми жите́йскими не ѡ҆бѧза́выйсѧ, да воево́дѣ ᲂу҆го́денъ бꙋ́деши: ра́дꙋйсѧ, не восхотѣ́вый двѣма̀ господи́нома рабо́тати.

Ра́дꙋйсѧ, ѿ ю҆́ности на пло́ть, мі́ръ и҆ дїа́вола воѡрꙋжи́выйсѧ: ра́дꙋйсѧ, си́хъ врагѡ́въ сла́внѡ побѣди́вый.

Ра́дꙋйсѧ, ѻ҆те́цъ по дꙋ́хꙋ чадолюби́вый: ра́дꙋйсѧ, ѡ҆би́тель ди́внꙋ насади́вый.

Ра́дꙋйсѧ, ѳеодо́сїе, вели́кїй чꙋдотво́рче.

Конда́къ і҃

Сп҃стѝ хотѧ̀ дꙋ́шꙋ твою̀, сла́вы мїрскі́ѧ всемѣ́рнѡ бѣ́галъ є҆сѝ, и҆ є҆гда̀ ѡ҆кре́стнїи наро́ди нача́ша тѧ̀ ꙗ҆́кѡ ве́лїѧ ѡ҆ хрⷭ҇тѣ̀ подви́жника почита́ти, ты̀ во гра́дѣ пред̾ всѣ́ми ꙗ҆́внѡ сла́дкими пита́лсѧ є҆сѝ, и҆ ѿ безꙋ́мныхъ люде́й ᲂу҆корє́нїѧ и҆ бїє́нїѧ съ ра́достїю претерпѣва́лъ є҆сѝ, бг҃ꙋ ꙗ҆́кѡ въ тѷмпа́нѣ, во ᲂу҆мерщвле́нїи тѣлесѐ непреста́ннѡ вопїѧ̀: А҆ллилꙋ́їа.

І҆́косъ і҃

Стѣна̀ ѡ҆гражда́ющаѧ ѿ всѣ́хъ прило́гѡвъ дїа́вольскихъ бы́лъ є҆сѝ бра́тїи, па́че по кончи́нѣ твое́й, въ не́й же ѡ҆ прославле́нїи ѡ҆би́тели и҆ застꙋпле́нїи тре́бꙋющихъ твои́хъ моли́твъ предре́клъ є҆сѝ, ны́нѣ ᲂу҆̀бо, предрече́нїю и҆сполнѧ́ємаѧ зрѧ́ще, бл҃года́рнѡ вопїе́мъ тѝ:

Ра́дꙋйсѧ, дꙋ́шꙋ свою̀ за человѣ́ки положи́вый: ра́дꙋйсѧ, ѿ ѡ҆би́тели земны́ѧ въ нбⷭ҇нꙋю пресели́выйсѧ.

Ра́дꙋйсѧ, дꙋше́ю та́мѡ, тѣ́ломъ же здѣ̀ пребыва́ѧй: ра́дꙋйсѧ, ѿ моще́й твои́хъ недꙋ́гѡвъ цѣлє́нїѧ и҆сточа́ѧй.

Ра́дꙋйсѧ, въ вели́кихъ по́двизѣхъ тече́нїе соверши́вый: ра́дꙋйсѧ, розго̀ мнѡ́гъ плѡ́дъ ѡ҆ хрⷭ҇тѣ̀ сотво́ршаѧ.

Ра́дꙋйсѧ, гро́зде ві́нный пита́ющїй и҆ веселѧ́щїй на́съ: ра́дꙋйсѧ, ѡ҆мраче́нныѧ просвѣти́вый.

Ра́дꙋйсѧ, просвѣщє́нныѧ ᲂу҆тверди́вый: ра́дꙋйсѧ, ѿра́до къ тебѣ̀ прибѣга́ющымъ.

Ра́дꙋйсѧ, рѡссі́и на сопроти́вныѧ побѣ́дꙋ содѣва́ющїй: ра́дꙋйсѧ, всѣ̑мъ правовѣ́рнымъ прошє́нїѧ и҆сполнѧ́ющїй.

Ра́дꙋйсѧ, ѳеодо́сїе, вели́кїй чꙋдотво́рче.

Конда́къ а҃і

Пѣ́нїе немо́лчное приносѧ̀ ст҃ѣ́й трⷪ҇цѣ ѡ҆ сохране́нїи и҆ ᲂу҆крѣпле́нїи всерѡссі́йскагѡ госꙋда́рства, все́й держа́вѣ рѡссі́йстѣй ѿ си́лы въ си́лꙋ приходѧ́щей молѝ сп҃сти́сѧ, да съ ра́достїю вопїе́мъ бг҃ꙋ: А҆ллилꙋ́їа.

І҆́косъ а҃і

Свѣтоза́рный свѣти́льникъ ꙗ҆ви́лсѧ є҆сѝ, є҆гда̀ моще́й твои́хъ просвѣти́лсѧ є҆сѝ нетлѣ́нїемъ, и҆сточа́ѧ свѣ́тъ благода́ти бж҃їѧ цѣле́бными да̑ры твои́ми. Сегѡ̀ ра́ди мы̀ ꙗ҆́кѡ ча̑да цр҃кве хрⷭ҇то́вы стека́ющесѧ, бл҃года́рствєннаѧ приносѧ́ще бг҃ꙋ вопїе́мъ къ тебѣ̀:

Ра́дꙋйсѧ, преиспо́лненный всѧ́кїѧ благосты́ни: ра́дꙋйсѧ, ми́лѡсти превели̑кїѧ сокро́вище.

Ра́дꙋйсѧ, промышле́нїѧ ѡ҆ лю́дехъ прїѧ́телище: ра́дꙋйсѧ, крі́не ра́йскагѡ селе́нїѧ.

Ра́дꙋйсѧ, мѵ́ро хрⷭ҇то́ва бл҃гоꙋха́нїѧ: ра́дꙋйсѧ, дре́во чꙋдото́чное раѧ̀ і҆и҃сова.

Ра́дꙋйсѧ, ча́ше, и҆злива́ющаѧ то́ки млⷭ҇рдїѧ бж҃їѧ: ра́дꙋйсѧ, чꙋде́съ пꙋчи́но, свы́ше и҆злїѧ́ннаѧ.

Ра́дꙋйсѧ, и҆́нокѡвъ ᲂу҆добре́нїе: ра́дꙋйсѧ, всеѧ̀ рѡссі́и ᲂу҆крѣпле́нїе.

Ра́дꙋйсѧ, то́темскаѧ похвало̀: ра́дꙋйсѧ, всѣ́хъ смиренномꙋ́дрствꙋющихъ сла́во.

Ра́дꙋйсѧ, ѳеодо́сїе, вели́кїй чꙋдотво́рче.

Конда́къ в҃і

Бл҃года́ть цѣльбы̀ стѧжа́вшаго, прпⷣбнаго ѳеодо́сїа почти́мъ се́рдцемъ и҆ ᲂу҆сты̀, и҆ да вѧ́щшꙋю воздади́мъ по́честь ст҃ы̑мъ є҆гѡ̀ моща́мъ, потщи́мсѧ всемѣ́рнѡ подража́ти вѣ́рѣ є҆гѡ̀, всегда̀ вопїю́ще прославлѧ́ющемꙋ ст҃ы́хъ свои́хъ бг҃ꙋ: А҆ллилꙋ́їа.

І҆́косъ в҃і

Пою́ще твоѐ, свѧ́те ѳеодо́сїе, те́плое предста́тельство, ѿ врагѡ́въ ви́димыхъ и҆ неви́димыхъ ско́рое застꙋпле́нїе, призыва́юще тѧ̀ ᲂу҆ми́льнѡ про́симъ, не возгнꙋша́йсѧ на́съ грѣ́шныхъ, но ᲂу҆слы́ши вопїю́щихъ къ тебѣ̀:

Ра́дꙋйсѧ, всѧ́кїй недꙋ́гъ тѣле́сный и҆ дꙋше́вный врачꙋ́ющїй: ра́дꙋйсѧ, въ невече́рнемъ днѝ црⷭ҇твїѧ бж҃їѧ приснопочива́ющїй.

Ра́дꙋйсѧ, ѕлы́хъ по́мыслѡвъ прогони́телю: ра́дꙋйсѧ, бѣснꙋ́емыхъ ско́рый цѣли́телю.

Ра́дꙋйсѧ, закоснѣва́ющихъ грѣ́шникѡвъ и҆справле́нїе: ра́дꙋйсѧ, немо́лчный наста́вниче.

Ра́дꙋйсѧ, ломѡ́тныѧ и҆ ѻ҆пꙋ́хѡльныѧ болѣ̑зни ᲂу҆врачева́вый: ра́дꙋйсѧ, трѧса̑вичныѧ и҆ ѻ҆гне́вичныѧ недꙋ̑ги ѿгна́вый.

Ра́дꙋйсѧ, слепы̑мъ прозрѣ́нїе дарова́вый: ра́дꙋйсѧ, хрѡмы́мъ и҆ разсла́блєннымъ хожде́нїе и҆справлѧ́ѧй.

Ра́дꙋйсѧ, въ бз҃ѣ на́мъ потрє́бнаѧ созерца́ющїй: ра́дꙋйсѧ, мнѡ́гимъ проше́нїѧ предварѧ́ющїй.

Ра́дꙋйсѧ, ѳеодо́сїе, вели́кїй чꙋдотво́рче.

Конда́къ г҃і

Ѽ вели́кїй чꙋдотво́рче ѳеодо́сїе! моле́нїе на́ше прїе́мъ, ᲂу҆молѝ подвигополо́жника і҆и҃са, да и҆зба́витъ ца́рствꙋющыѧ гра́ды и҆ всѧ́кїй гра́дъ и҆ странꙋ̀ хрⷭ҇тїа́нскꙋю ѿ нахожде́нїѧ и҆ноплеме́нныхъ, ѿ є҆ресе́й и҆ раско́лѡвъ и҆ ѿ всѧ́кїѧ напа́сти, да съ тобо́ю въ селе́нїи пра́ведныхъ сподо́бимсѧ пѣ́ти трїѷпоста́сномꙋ бг҃ꙋ: А҆ллилꙋ́їа.

Повто́ръ

Сей конда́къ глаго́лется три́жды, та́же і҆́косъ а҃-й и҆ конда́къ а҃-й.

І҆́косъ а҃

А҆́гг҃льское твоѐ во пло́ти житїѐ прови́дѣвъ всеѧ̀ тва́ри созда́тель, ѿ ю҆́ности ᲂу҆гото́ва тѧ̀ въ жили́ще себѣ̀, є҆гѡ̀ же тѧ̀ ѡ҆бита́лищемъ бы́ти ᲂу҆вѣ́дѣвше пѡхва́льнаѧ восписꙋ́емъ тѝ:

Ра́дꙋйсѧ, бл҃гочести́выхъ роди́телей бл҃гопрїѧ́тное и҆спроше́нїе: ра́дꙋйсѧ, ѿ бл҃гочести́вагѡ ко́рене ѿрасле ст҃ѣ́йшаѧ.

Ра́дꙋйсѧ, ѿ ю҆́ности твоеѧ̀ бг҃ꙋ послꙋжи́вый: ра́дꙋйсѧ, воздержа́нїемъ а҆́гг҃лѡвъ ᲂу҆диви́вый.

Ра́дꙋйсѧ, въ мл҃твахъ те́плый предста́телю: ра́дꙋйсѧ, скорбѧ́щихъ сла́дкое ᲂу҆тѣше́нїе.

Ра́дꙋйсѧ, просѧ́щымъ ско́рый помо́щниче: ра́дꙋйсѧ, болѧ́щымъ ско́рый и҆ безме́здный врачꙋ̀.

Ра́дꙋйсѧ, земны́й а҆́гг҃ле: ра́дꙋйсѧ, нбⷭ҇ный человѣ́че.

Ра́дꙋйсѧ, сосꙋ́де и҆збра́нный дх҃а ст҃а́гѡ: ра́дꙋйсѧ, тѣле́съ на́шихъ здра́вїѧ и҆ дꙋ́шъ сп҃се́нїѧ хода́тае.

Ра́дꙋйсѧ, ѳеодо́сїе, вели́кїй чꙋдотво́рче.

Конда́къ а҃

Возбра́нный чꙋдотво́рче, и҆ и҆зрѧ́дный ᲂу҆го́дниче хрⷭ҇то́въ, всѣ̑мъ съ вѣ́рою приходѧ́щымъ и҆сточа́ѧй многоцѣлє́бныѧ да́ры, пѡхва́льнаѧ восписꙋ́емъ тѝ творѧ́щїи всечестнꙋ́ю па́мѧть твою̀: ты́ же, ꙗ҆́кѡ и҆мѣ́ѧ дерзнове́нїе ко гдⷭ҇ꙋ, молѝ сп҃сти́сѧ дꙋша́мъ на́шымъ, да зове́мъ тѝ:

Ра́дꙋйсѧ, ѳеодо́сїе, вели́кїй чꙋдотво́рче.

Моли́твы

Ѽ до́брый на́шъ па́стырю и҆ бг҃омꙋ́дрый наста́вниче, прпⷣбне ѻ҆́ч҃е ѳеодо́сїе! ᲂу҆слы́ши на́съ грѣ́шныхъ, молѧ́щихсѧ тебѣ̀, и҆ призыва́ющихъ въ по́мощь ско́рое предста́тельство твоѐ: ви́ждь на́съ грѣ́шныхъ въ толи́цѣхъ ѡ҆бстоѧ́нїихъ сꙋ́щихъ, ви́ждь на́съ немощны́хъ ѿвсю́дꙋ ᲂу҆ловлѧ́емыхъ, всѧ́кагѡ бл҃га лише́нныхъ и҆ ᲂу҆мо́мъ ѿ малодꙋ́шїѧ помраче́нныхъ: потщи́сѧ ᲂу҆го́дниче бж҃їй, не ѡ҆ста́вити на́съ въ грѣхо́внѣмъ плѣнꙋ̀ бы́ти, да не бꙋ́демъ въ ра́дость врагѡ́мъ на́шымъ, и҆ не ᲂу҆́мремъ въ лꙋка́выхъ дѣѧ́нїихъ на́шихъ. Молѝ ѡ҆ на́съ недосто́йныхъ сп҃са гдⷭ҇а, є҆мꙋ́же ты̀ со безпло́тными ли́ки предстои́ши. ми́лостива къ на́мъ сотворѝ содѣ́телѧ на́шего въ ны́нѣшнѣмъ вѣ́цѣ и҆ въ бꙋ́дꙋщѣмъ, да не возда́стъ на́мъ по дѣлѡ́мъ на́шымъ, и҆ по нечистотѣ̀ серде́цъ на́шихъ, но по свое́й бла́гости возда́стъ на́мъ: на твоѐ бо хода́тайство ᲂу҆пова́юще, твои́мъ предста́тельствомъ хва́лимсѧ, твоѐ застꙋпле́нїе на по́мощь призыва́емъ и҆ къ цѣльбоно́сномꙋ гро́бꙋ твоемꙋ̀ припа́дающе недосто́йнїи и҆сцѣле́нїѧ про́симъ: и҆зба́ви на́съ, ᲂу҆го́дниче хрⷭ҇то́въ, ѿ ѕлы́хъ находѧ́щихъ на на́съ, и҆ ᲂу҆кротѝ во́лны страсте́й и҆ бѣ́дъ востаю́щихъ на на́съ, да ра́ди ст҃ы́хъ твои́хъ мл҃твъ не ѡ҆б̾и́метъ на́съ напа́сть, и҆ не погрѧ́знемъ въ пꙋчи́нѣ грѣхо́внѣй и҆ въ ти́нѣ страсте́й на́шихъ. молѝ, прпⷣбне ѻ҆́ч҃е ѳеодо́сїе, хрⷭ҇та̀ бг҃а на́шего: да пода́стъ на́мъ ми́рное жи́тельство, ѡ҆ставле́нїе грѣхѡ́въ, дꙋша́мъ на́шымъ сп҃се́нїе и҆ ве́лїю ми́лость. А҆ми́нь.