Кондак 1
Изря́дный воево́до ратобо́рцев за ве́ру Христо́ву, те́плый уте́шителю все́х напа́ствуемых и обремене́нных скорбьми́ мно́гими, непоколеби́мый сто́лпе правосла́вныя ве́ры, ея́же ра́ди положи́л еси́ ду́шу твою́ за дру́ги своя́, и на́с свободи́л еси́ от ко́зней и сете́й вра́жиих. И ны́не от Го́спода просла́влен еси́ явле́нием чуде́с твои́х, и́миже собра́л еси́ на́с умиле́нною душе́ю пе́ти тебе́:
Ра́дуйся, святи́телю Ермоге́не, до́брый па́стырю и вели́кий засту́пниче Росси́йския земли́.
Икос 1
А́нгела храни́теля Росси́йския земли́ яви́ тя милосе́рдый Христо́с в дре́вния дни́ мяте́жа и нестрое́ния, да спасе́т ю́ от блужда́ния грехо́внаго. И ны́не яви́ тя моли́твенника те́пла и чудотво́рца, я́ко зна́мение жи́зни на́шея; да и ны́не гряду́т по тебе́ вси́ блужда́ющии, я́ко о́вцы не иму́щия па́стыря, и обре́тше тобо́ю спасе́ние, да пою́т тебе́ си́це:
Ра́дуйся, Це́ркве на́шея прему́дрое возглавле́ние; ра́дуйся, о ча́дех Це́ркве те́плое промышле́ние.
Ра́дуйся, страны́ на́шея церко́вное утвержде́ние; ра́дуйся, сыно́в ца́рства правосла́вное озаре́ние.
Ра́дуйся, па́стырем и пасо́мым до́брое поуче́ние; ра́дуйся, царе́м на́шим сове́те и утеше́ние.
Ра́дуйся, святи́телю Ермоге́не, до́брый па́стырю и вели́кий засту́пниче Росси́йския земли́.
Кондак 2
Ви́дя Ру́сь, я́ко вдови́цу, зе́льне пла́чущу о разоре́нии до́ма своего́, умилосе́рдився, на ра́мена своя́ подъя́л еси́ ско́рби ея́ и да́же до сме́рти поне́сл еси́ я́. Сего́ ра́ди ве́чно ра́дуешися на небесе́х, поя́ Бо́гу: Аллилу́иа.
Икос 2
Ра́зумом любве́, наказу́ющия и ми́лующия, управля́л еси́, святи́телю, Каза́нскою па́ствою твое́ю, я́ко корабле́м, в пучи́не зо́л потопля́емым, и приве́л еси́ его́ к ти́хой при́стани святы́я правосла́вныя Це́ркве, те́мже благода́рственно пое́м ти́:
Ра́дуйся, ума́ Христо́ва вмести́лище; ра́дуйся, ра́зума Це́ркве храни́лище.
Ра́дуйся, главо́, све́том и́стины все́х озаря́ющая; ра́дуйся, прему́дросте, нему́дрыя просвеща́ющая.
Ра́дуйся, благове́стниче правосла́вныя пра́вды; ра́дуйся, обличи́телю челове́ческаго суему́дрия и непра́вды.
Ра́дуйся, святи́телю Ермоге́не, до́брый па́стырю и вели́кий засту́пниче Росси́йския земли́.
Кондак 3
Си́лою ве́ры и ра́зума духо́внаго укрепля́я во гра́де Каза́ни новокреще́нную па́ству твою́, всеору́жием Бо́жия благода́ти победи́л еси́ ко́зни враго́в правосла́вныя ве́ры Христо́вы и поуча́л еси́ ча́д твои́х непреста́нно взыва́ти Бо́гу: Аллилу́иа.
Икос 3
Име́я благода́ть свяще́нства, до́бре носи́му в благоуха́ющем сосу́де души́ твоея́, сподо́бился еси́, о́тче Ермоге́не, взя́ти от земли́ святу́ю ико́ну Пречи́стыя Богома́тере, во гра́де Каза́ни чуде́сно явле́нную, и просла́вити ю́ по достоя́нию. Те́мже и подвиза́еши на́с взыва́ти тебе́ си́це:
Ра́дуйся, чудотво́рныя ико́ны Каза́нския пе́рвое прославле́ние; ра́дуйся, чуде́с от сея́ ико́ны нело́жное извеще́ние.
Ра́дуйся, сла́вы Богома́тере умиле́нный песнотво́рче; ра́дуйся, пред Не́ю о па́стве твое́й те́плый моли́твенниче.
Ра́дуйся, Ма́терь Бо́жию, я́ко Засту́пницу правосла́внаго ца́рства Росси́йскаго, почита́яй; ра́дуйся, о утвержде́нии сего́ ца́рства пред Пречи́стою сле́зы пролива́яй.
Ра́дуйся, святи́телю Ермоге́не, до́брый па́стырю и вели́кий засту́пниче Росси́йския земли́.
Кондак 4
Бу́рею помышле́ний сумни́тельных и стремле́ний мяте́жных волну́ема и в пучи́ну иносла́внаго суему́дрия погружа́ема, Ру́сь утопа́ше. Узре́в же тя́, святи́телю Бо́жий, я́ко «столпа́ непоколеби́ма и адама́нта тве́рда», возра́довася наде́ждею и, тобо́ю укрепля́ема, пое́т Бо́гу: Аллилу́иа.
Икос 4
Слы́шав беззако́нное умышле́ние самозва́ннаго царя́ поруга́тися над ве́рою правосла́вною, дерзнове́нно веща́л еси́ ему́, я́ко не подоба́ет царю́ правосла́вному ожени́тися ерети́чкою, и та́ко обличи́л еси́ его́ неве́рие и нече́стие. Сего́ ра́ди и воздви́же на тя́ гоне́ние и из престо́льнаго гра́да тя́, святи́телю, изве́рже. Мы́ же, почита́юще сие́ твое́ правдолю́бие, пое́м ти́, си́льному о Го́споде:
Ра́дуйся, кре́пкий побо́рниче проти́ву самозва́ннаго повели́теля; ра́дуйся, дерзнове́нный засту́пниче за правосла́вную ве́ру.
Ра́дуйся, суему́драго иносла́вия пра́ведное обличе́ние; ра́дуйся, спаси́тельнаго правосла́вия немо́лчное назида́ние.
Ра́дуйся, пра́вды ра́ди изгна́нный; ра́дуйся, от Го́спода ве́чною сла́вою на небесе́х венча́нный.
Ра́дуйся, святи́телю Ермоге́не, до́брый па́стырю и вели́кий засту́пниче Росси́йския земли́.
Кондак 5
Боготе́чную звезду́ показа́ тя на Небесе́х в со́нме священному́чеников Госпо́дь Вседержи́тель, зане́ и на земли́ бы́л еси́ звезда́ све́тлая, осиява́ющая царя́ и ца́рство све́том правосла́вия и путево́дствующая ко угожде́нию еди́ному Бо́гу, во е́же воспева́ти Ему́ непреста́нно: Аллилу́иа.
Икос 5
Ви́деша тя́ правосла́внии лю́дие, я́ко свети́ло церко́вное, безо́блачно сия́ющее в просвеще́ние омраче́нных страстьми́, призва́ша тя́ в ца́рствующий гра́д Москву́, егда́ нечести́вый самозва́нный повели́тель низве́ржен бы́сть, да на све́щнице первосвяти́тельскаго служе́ния освеща́еши пу́ть жи́зни но́вому царю́ и всему́ Росси́йскому ца́рству. Сего́ ра́ди и мы́, до сего́ дне́ озаря́емии све́том твои́м, неуста́нно взыва́ем ти́:
Ра́дуйся, почита́яй царя́, я́ко Бо́жие дарова́ние; ра́дуйся, мня́й бы́ти ему́ благочести́ву и побора́телю по ве́ре правосла́вней.
Ра́дуйся, новопоста́вленна царя́ Васи́лия тве́рдости учи́вый; ра́дуйся, в ра́дости и в го́ре дру́гом ему́ бы́вый.
Ра́дуйся, правосла́внаго царя́ на́шего пребыва́ющее благослове́ние; ра́дуйся, во все́х де́лех небе́сное ему́ поможе́ние.
Ра́дуйся, святи́телю Ермоге́не, до́брый па́стырю и вели́кий засту́пниче Росси́йския земли́.
Кондак 6
Пропове́дник бы́в спаси́тельнаго покая́ния, егда́ разгоре́ся но́вый мяте́ж на Руси́, призва́л еси́ во гра́д Москву́ дре́внего и немощна́го ста́рца первосвяти́теля И́ова и ку́пно с ни́м моли́лся еси́ в хра́ме Успе́ния Богома́тере о ча́дех твои́х, да отврати́т Госпо́дь от ни́х пра́ведный гне́в Сво́й, да пода́ст и́м ми́р и любо́вь, да устро́ит в ца́рстве дре́внее едине́ние, да благослови́т царя́ побе́дами над враги́, и та́ко да просла́вится в лю́дех росси́йских И́мя Госпо́дне пе́снию: Аллилу́иа.
Икос 6
Возсия́вый во гра́де Москве́ свети́льник пресве́тлый бы́л еси́, святи́телю Ермоге́не, все́м блужда́ющим во тьме́ грехо́вней, в твои́х богомо́льных посла́ниих пу́ть спасе́ния и́м показу́я и ду́х уны́ния и малоду́шия от серде́ц и́х отгоня́я. Сего́ ра́ди и мы́ гре́шнии, в дни́ ско́рби и блужда́ния грехо́внаго, припа́даем к тебе́, святи́телю Бо́жий, и сле́зно взыва́ем: охраня́й и ны́не оте́чество на́ше от шата́ния умо́в и серде́ц, бу́ди в жи́зни на́м во́ждь до́брый и благонаде́жный, да не поги́бнет, по словеси́ твоему́, Ру́сь правосла́вная и Бо́гом люби́мая и да не преста́нет велича́ти тя́ си́це:
Ра́дуйся, от потопле́ния бу́рями жите́йскими росси́йския лю́ди спаса́яй; ра́дуйся, уныва́ющих и мяту́щихся укрепля́яй и от заблужде́ний отвраща́яй.
Ра́дуйся, преступа́ющих кре́стное целова́ние со вла́стию облича́яй; ра́дуйся, за до́м Пречи́стыя Богоро́дицы и за Моско́вское ца́рство да́же до сме́рти стоя́ти науча́яй.
Ра́дуйся, зерца́ло со́вести нелицеприя́тныя; ра́дуйся, до́брый ко́рмчий корабля́ Христо́ва.
Ра́дуйся, святи́телю Ермоге́не, до́брый па́стырю и вели́кий засту́пниче Росси́йския земли́.
Кондак 7
Хотя́ бы́ти па́стырь до́брый, ему́же су́ть о́вцы своя́, ви́дев во́лка гряду́ща, не оставля́л еси́ о́вцы и не бе́гал еси́, но пред ни́ми ходи́л еси́ во всеору́жии си́лы и и́стины, поя́ Бо́гу: Аллилу́иа.
Икос 7
Но́ваго челове́ка, по о́бразу Созда́вшаго его́, а не но́ваго ца́рства иносла́внаго измышле́ния, возжеле́л еси́, святи́телю Ермоге́не. Сего́ ра́ди ополчи́лся еси́ на инозе́мное суему́дрие и ра́товал еси́ за ца́рство древлеправосла́вное, е́же тщи́тся во все́х лю́дех и во все́м житии́ и́х вообрази́ти Христа́ Бо́га. Пое́м и сла́вим сие́ правосла́вное ратобо́рство твое́ и благода́рственно вопие́м ти́:
Ра́дуйся, волко́в хи́щных неща́дное изгна́ние; ра́дуйся, кова́рства и́х му́дрое распозна́ние.
Ра́дуйся, все́х стоя́ти непоколеби́мо за правосла́вную ве́ру Христо́ву учи́вый; ра́дуйся, инове́рнаго царя́ возсе́сти на престо́л Росси́йский недопусти́вый.
Ра́дуйся, ста́да Христо́ва церко́вное огражде́ние; ра́дуйся, ца́рства правосла́внаго ве́рное спасе́ние.
Ра́дуйся, святи́телю Ермоге́не, до́брый па́стырю и вели́кий засту́пниче Росси́йския земли́.
Кондак 8
Стра́нно е́сть малове́рным и малоду́шным зре́ти, ка́ко святи́тель Ермоге́н, се́й вои́стину кре́пкий во́ин Христо́в, дерзнове́нно облича́ет изме́ну ве́ре Христо́вой и, егда́ устреми́ся на́нь нечести́вый изме́нник, имы́й но́ж в руце́, то́кмо зна́мением кре́стным огражда́ет себе́ от нападе́ния вра́жия, и та́ко побежда́ет его́ зло́бу и безу́мие, на́с же воздвиза́ет к пе́нию: Аллилу́иа.
Икос 8
Ве́сь бе́ испо́лнен ре́вностию Илии́ проро́ка, святи́телю Ермоге́не, егда́ узре́л еси́ запусте́ние ца́рства и поруга́ние святы́х хра́мов Бо́жиих, огне́м сея́ ре́вности воспламени́л еси́ и сердца́ ве́рных ча́д твои́х, му́жественне ста́ти за ве́ру правосла́вную и изгна́ти из престо́льнаго гра́да нечести́вых ля́хов, во спасе́ние Росси́йския земли́, пою́щия ти́ ны́не любо́вию:
Ра́дуйся, свято́ю ре́вностию о спасе́нии ца́рства Росси́йскаго пламене́вый; ра́дуйся, возжещи́ сию́ ре́вность и в ча́дех твои́х восхоте́вый.
Ра́дуйся, вся́ угро́зы и преще́ния враго́в твои́х презре́вый; ра́дуйся, изы́ти и́м из гра́да Москвы́ повеле́вый.
Ра́дуйся, росси́йское во́инство на освобожде́ние ца́рствующаго гра́да от нечести́вых враго́в благослови́вый; ра́дуйся, святы́ни его́ от поруга́ния те́м огради́ти жела́вый.
Ра́дуйся, святи́телю Ермоге́не, до́брый па́стырю и вели́кий засту́пниче Росси́йския земли́.
Кондак 9
Вся́кия труды́ подъя́л еси́, святи́телю Бо́жий, вся́кия лише́ния, оби́ды и боле́зни претерпе́л еси́, спасе́ния ра́ди ча́д твои́х; но и в терпе́нии и в труде́ мно́зем неуста́нно взыва́л еси́ Бо́гу: Аллилу́иа.
Икос 9
Вити́и ми́ра сего́ безмо́лвствуют, в стра́се и тре́пете ви́дяще разоре́ние ца́рства Росси́йскаго, громозву́чный же гла́с святи́теля Ермоге́на, уже́ в заточе́нии су́щаго, не престае́т пропове́дати покая́ние во отпуще́ние грехо́в, и́хже ра́ди излия́ся на Ру́сь пра́ведный гне́в Бо́жий, и мо́лит пасо́мых в чистоте́ ду́ши своя́ храни́ти и положи́ти я́ за Пречи́стыя до́м и за чудотво́рцев, и за ве́ру. И мы́ ве́руем, я́ко слеза́ми покая́ния, по глаго́лу святи́теля, согреши́вшая Ру́сь омы́ся, очи́стися и обнови́ся, и ны́не пое́т во сла́ву своего́ по Бо́зе наста́вника:
Ра́дуйся, гре́шныя к покая́нию призыва́яй; ра́дуйся, вла́стию от Бо́га грехи́ ца́рства разреша́яй.
Ра́дуйся, за грехи́ ча́д твои́х и в заточе́нии Бо́га моли́вый; ра́дуйся, сле́зными тече́ньми зе́млю темни́цы твоея́ ороси́вый.
Ра́дуйся, рыда́ньми покая́ния лице́ ца́рства обнови́вый; ра́дуйся, гне́в Бо́жий на ми́лость к на́м гре́шным преклони́вый.
Ра́дуйся, святи́телю Ермоге́не, до́брый па́стырю и вели́кий засту́пниче Росси́йския земли́.
Кондак 10
Спасти́ хотя́ Ру́сь от безнача́лия грехо́внаго, не к нечести́вому за́паду, но к богобоя́зненному до́му боля́р Рома́новых обрати́л еси́ о́чи твои́, святи́телю Ермоге́не, да бу́дет о́н вла́стию от Бо́га, во утвержде́ние Христо́ва зако́на, и да пою́т ца́рие и лю́дие еди́неми усты́ и еди́нем се́рдцем Спаси́телю Бо́гу: Аллилу́иа.
Икос 10
Стена́ неодоли́мая Це́ркве бы́л еси́, о́тче на́ш Ермоге́не, е́юже ца́рство на́ше огради́ся, в правосла́вии утверди́ся и от враго́в спасе́ся, и ны́не со благодаре́нием взыва́ем ти́:
Ра́дуйся, злы́я ко́зни нечести́ваго за́пада отве́ргнувый; ра́дуйся, правосла́вие в земли́ на́шей утверди́вый.
Ра́дуйся, святы́х преда́ний оте́ческих храни́телю; ра́дуйся, уста́вов Це́ркве Правосла́вныя ревни́телю.
Ра́дуйся, в до́ме боля́р Рома́новых благочести́вую о́трасль дре́вняго ца́рственнаго ро́да узре́вый; ра́дуйся, в не́м Бо́жиею ми́лостию Царя́ всея́ Руси́ указа́вый.
Ра́дуйся, святи́телю Ермоге́не, до́брый па́стырю и вели́кий засту́пниче Росси́йския земли́.
Кондак 11
Пе́ние исхо́дное и рыда́ние надгро́бное твори́т правосла́вная Ру́сь у гро́ба священному́ченика Ермоге́на, положи́вшаго ду́шу свою́ за дру́ги своя́. Не пла́чите, правосла́внии, не пла́чите, но па́че дерза́йте ве́рою, пра́ведник бо и по сме́рти жи́в бу́дет во ве́ки, поя́ Бо́гу: Аллилу́иа.
Икос 11
Свети́льник Христо́в, на верху́ горы́ стоя́й и все́й Руси́ светя́й бы́л еси́ в житии́ твое́м, святи́телю Ермоге́не. И се́ полага́ешися под спу́дом моги́льным пло́тию, да возсия́еши ду́хом, я́ко со́лнце в ца́рствии Отца́ Небе́снаго, на́с же да просвети́ши си́це воспева́ти боле́зни и труды́ твоя́:
Ра́дуйся, с престо́ла патриа́ршаго беззако́нно низве́рженный; ра́дуйся, в те́мное подземе́лие, я́ко во гро́б, вве́рженный.
Ра́дуйся, тра́вною пи́щею от враго́в пита́нный; ра́дуйся, гла́да муче́ньми да́же до сме́рти изнуре́нный.
Ра́дуйся, священному́чениче, за правосла́вие ца́рства пострада́вый; ра́дуйся, страстоте́рпче, в ру́це Го́споду ду́х сво́й преда́вый.
Ра́дуйся, святи́телю Ермоге́не, до́брый па́стырю и вели́кий засту́пниче Росси́йския земли́.
Кондак 12
Благода́ти Бо́жией сокро́вище яви́ся всечестна́я ра́ка моще́й твои́х, святи́телю о́тче Ермоге́не, и исто́чник приснотеку́щия си́лы, е́юже бе́си изгоня́ются, неду́жнии исцеля́ются, хроми́и хо́дят, глуси́и слы́шат, слепи́и прозира́ют, озло́бленнии умиря́ются, скорбя́щии утеша́ются и вси́ лику́ют о Го́споде и прославля́ют Бо́га, ди́внаго во святы́х Свои́х, пою́ще Ему́: Аллилу́иа.
Икос 12
Пою́ще твое́ прославле́ние, святи́телю Ермоге́не, сия́ пе́сни прино́сим ти́, чудотво́рче святы́й, я́ко благоуха́ние христиа́нския ра́дости: зри́м бо Бо́жию си́лу, во святы́х моще́х твои́х пребыва́ющую. И ны́не озаря́еши на́с светоизлия́нием твоея́ благода́ти, обвеселя́я сердца́ на́ша пе́ти ти́ со умиле́нием:
Ра́дуйся, ты́ бо Сладча́йшаго при́сно созерца́еши; ра́дуйся, ты́ бо лице́м к лицу́ Христа́ воспева́еши.
Ра́дуйся, ты́ бо Боже́ственною си́лою преобража́ешися от сла́вы в сла́ву; ра́дуйся, ты́ бо, я́ко со́лнце но́вое, украша́еши Госпо́дню держа́ву.
Ра́дуйся, твои́м бо сия́нием и мы́ незри́мо просветля́емся; ра́дуйся, твое́ю бо си́лою и мы́ чуде́сно оживотворя́емся.
Ра́дуйся, святи́телю Ермоге́не, до́брый па́стырю и вели́кий засту́пниче Росси́йския земли́.
Кондак 13
О пресла́вный уго́дниче Бо́жий, святи́телю о́тче на́ш Ермоге́не. Приими́ на́ше твое́й сла́ве сора́дование, я́ко воздыха́ние души́, жа́ждет бо неотъе́млемый ра́дости, и умоли́ венча́вшаго тя́ сла́вою Го́спода низпосла́ти и на́м от бе́д, скорбе́й и боле́зней, обдержа́щих ны́, ско́рое избавле́ние, дарова́ти же благода́ть утеше́ния и ра́дования, да с весе́лием вы́ну пое́м Бо́гу: Аллилу́иа.
Повтор
Этот кондак читается трижды, затем икос 1-й и кондак 1-й.
Икос 1
А́нгела храни́теля Росси́йския земли́ яви́ тя милосе́рдый Христо́с в дре́вния дни́ мяте́жа и нестрое́ния, да спасе́т ю́ от блужда́ния грехо́внаго. И ны́не яви́ тя моли́твенника те́пла и чудотво́рца, я́ко зна́мение жи́зни на́шея; да и ны́не гряду́т по тебе́ вси́ блужда́ющии, я́ко о́вцы не иму́щия па́стыря, и обре́тше тобо́ю спасе́ние, да пою́т тебе́ си́це:
Ра́дуйся, Це́ркве на́шея прему́дрое возглавле́ние; ра́дуйся, о ча́дех Це́ркве те́плое промышле́ние.
Ра́дуйся, страны́ на́шея церко́вное утвержде́ние; ра́дуйся, сыно́в ца́рства правосла́вное озаре́ние.
Ра́дуйся, па́стырем и пасо́мым до́брое поуче́ние; ра́дуйся, царе́м на́шим сове́те и утеше́ние.
Ра́дуйся, святи́телю Ермоге́не, до́брый па́стырю и вели́кий засту́пниче Росси́йския земли́.
Кондак 1
Изря́дный воево́до ратобо́рцев за ве́ру Христо́ву, те́плый уте́шителю все́х напа́ствуемых и обремене́нных скорбьми́ мно́гими, непоколеби́мый сто́лпе правосла́вныя ве́ры, ея́же ра́ди положи́л еси́ ду́шу твою́ за дру́ги своя́, и на́с свободи́л еси́ от ко́зней и сете́й вра́жиих. И ны́не от Го́спода просла́влен еси́ явле́нием чуде́с твои́х, и́миже собра́л еси́ на́с умиле́нною душе́ю пе́ти тебе́:
Ра́дуйся, святи́телю Ермоге́не, до́брый па́стырю и вели́кий засту́пниче Росси́йския земли́.
Молитвы
О вели́кий уго́дниче Христо́в, святи́телю о́тче на́ш Ермоге́не! К тебе́, моли́твеннику те́плому и предста́телю пред Бо́гом непосты́дному, усе́рдно притека́ем, в ну́ждах и ско́рбех на́ших утеше́ния и по́мощи прося́ще. В дре́внюю годи́ну искуше́ний, внегда́ обыше́дше обыдо́ша страну́ на́шу нечести́вии врази́, Госпо́дь яви́ тя це́ркви свое́й столпа́ непоколеби́ма и лю́дем росси́йским па́стыря до́бра, ду́шу свою́ за о́вцы положи́вша и лю́тыя во́лки дале́че отгна́вша. Ны́не у́бо при́зри и на ны́, недосто́йная ча́да твоя́, умиле́нною душе́ю и сокруше́нным се́рдцем тебе́ призыва́ющая. Кре́пость бо на́ша в на́с оскуде́, и вра́жия ловле́ния и се́ти обыдо́ша на́с. Помози́ на́м, засту́пниче на́ш! Утверди́ на́с в ве́ре святе́й: научи́ на́с всегда́ твори́ти за́поведи Бо́жия и вся́ преда́ния церко́вная, от оте́ц на́м запове́данная. Па́стырем на́шим бу́ди архипа́стырь, во́ином во́ждь духо́вный, боля́щим вра́ч, печа́льным уте́шитель, гони́мым засту́пник, ю́ным наста́вник, все́м же благосе́рдый оте́ц и за вся́ те́плый моли́твенник; я́ко да моли́твами твои́ми огражда́еми, непреста́нно воспое́м и просла́вим всесвято́е и́мя живонача́льныя Тро́ицы, Отца́ и Сы́на и Свята́го Ду́ха, во ве́ки веко́в. Ами́нь.
Конда́къ а҃
И҆зрѧ́дный воево́до ратобо́рцєвъ за вѣ́рꙋ хрⷭ҇то́вꙋ, те́плый ᲂу҆тѣ́шителю всѣ́хъ напа́ствꙋемыхъ и҆ ѡ҆бремене́нныхъ скорбьмѝ мно́гими, непоколеби́мый сто́лпе правосла́вныѧ вѣ́ры, є҆ѧ́же ра́ди положи́лъ є҆сѝ дꙋ́шꙋ твою̀ за дрꙋ́ги своѧ̑, и҆ на́съ свободи́лъ є҆сѝ ѿ ко́зней и҆ сѣте́й вра́жїихъ. И҆ ны́нѣ ѿ гдⷭ҇а просла́вленъ є҆сѝ ꙗ҆вле́нїемъ чꙋде́съ твои́хъ, и҆́миже собра́лъ є҆сѝ на́съ ᲂу҆миле́нною дꙋше́ю пѣ́ти тебѣ̀:
Ра́дꙋйсѧ, ст҃и́телю є҆рмоге́не, до́брый па́стырю и҆ вели́кїй застꙋ́пниче рѡссі́йскїѧ землѝ.
І҆́косъ а҃
А҆́гг҃ла храни́телѧ рѡссі́йскїѧ землѝ ꙗ҆ви́ тѧ млⷭ҇рдый хрⷭ҇то́съ въ дрє́внїѧ дни̑ мѧте́жа и҆ нестрое́нїѧ, да сп҃се́тъ ю҆̀ ѿ блꙋжда́нїѧ грѣхо́внагѡ. И҆ ны́нѣ ꙗ҆ви́ тѧ мл҃твенника те́пла и҆ чꙋдотво́рца, ꙗ҆́кѡ зна́менїе жи́зни на́шеѧ; да и҆ ны́нѣ грѧдꙋ́тъ по тебѣ̀ всѝ блꙋжда́ющїи, ꙗ҆́кѡ ѻ҆́вцы не и҆мꙋ́щїѧ па́стырѧ, и҆ ѡ҆брѣ́тше тобо́ю сп҃се́нїе, да пою́тъ тебѣ̀ си́це:
Ра́дꙋйсѧ, цр҃кве на́шеѧ премꙋ́дрое возглавле́нїе: ра́дꙋйсѧ, ѡ҆ ча́дѣхъ цр҃кве те́плое промышле́нїе.
Ра́дꙋйсѧ, страны̀ на́шеѧ церко́вное ᲂу҆твержде́нїе: ра́дꙋйсѧ, сынѡ́въ ца́рства правосла́вное ѡ҆заре́нїе.
Ра́дꙋйсѧ, па́стырємъ и҆ пасѡ́мымъ до́брое поꙋче́нїе: ра́дꙋйсѧ, царє́мъ на́шимъ совѣ́те и҆ ᲂу҆тѣше́нїе.
Ра́дꙋйсѧ, ст҃и́телю є҆рмоге́не, до́брый па́стырю и҆ вели́кїй застꙋ́пниче рѡссі́йскїѧ землѝ.
Конда́къ в҃
Ви́дѧ рꙋ́сь, ꙗ҆́кѡ вдови́цꙋ, ѕѣ́льнѣ пла́чꙋщꙋ ѡ҆ разоре́нїи до́ма своегѡ̀, ᲂу҆милосе́рдивсѧ, на ра́мена своѧ̑ под̾ѧ́лъ є҆сѝ скѡ́рби є҆ѧ̀ и҆ да́же до сме́рти поне́слъ є҆сѝ ѧ҆̀. Сегѡ̀ ра́ди вѣ́чнѡ ра́дꙋешисѧ на нб҃сѣ́хъ, поѧ̀ бг҃ꙋ: А҆ллилꙋ́їа.
І҆́косъ в҃
Ра́зꙋмомъ любвѐ, наказꙋ́ющїѧ и҆ ми́лꙋющїѧ, ᲂу҆правлѧ́лъ є҆сѝ, ст҃и́телю, каза́нскою па́ствою твое́ю, ꙗ҆́кѡ корабле́мъ, въ пꙋчи́нѣ ѕѡ́лъ потоплѧ́емымъ, и҆ приве́лъ є҆сѝ є҆го̀ къ ти́хой при́стани ст҃ы́ѧ правосла́вныѧ цр҃кве, тѣ́мже бл҃года́рственнѡ пое́мъ тѝ:
Ра́дꙋйсѧ, ᲂу҆ма̀ хрⷭ҇то́ва вмѣсти́лище: ра́дꙋйсѧ, ра́зꙋма цр҃кве храни́лище.
Ра́дꙋйсѧ, главо̀, свѣ́томъ и҆́стины всѣ́хъ ѡ҆зарѧ́ющаѧ: ра́дꙋйсѧ, премꙋ́дросте, немꙋ̑дрыѧ просвѣща́ющаѧ.
Ра́дꙋйсѧ, бл҃говѣ́стниче правосла́вныѧ пра́вды: ра́дꙋйсѧ, ѡ҆бличи́телю человѣ́ческагѡ сꙋемꙋ́дрїѧ и҆ непра́вды.
Ра́дꙋйсѧ, ст҃и́телю є҆рмоге́не, до́брый па́стырю и҆ вели́кїй застꙋ́пниче рѡссі́йскїѧ землѝ.
Конда́къ г҃
Си́лою вѣ́ры и҆ ра́зꙋма дꙋхо́внагѡ ᲂу҆крѣплѧ́ѧ во гра́дѣ каза́ни новокреще́ннꙋю па́ствꙋ твою̀, всеѻрꙋ́жїемъ бж҃їѧ бл҃года́ти побѣди́лъ є҆сѝ кѡ́зни врагѡ́въ правосла́вныѧ вѣ́ры хрⷭ҇то́вы и҆ поꙋча́лъ є҆сѝ ча́дъ твои́хъ непреста́ннѡ взыва́ти бг҃ꙋ: А҆ллилꙋ́їа.
І҆́косъ г҃
И҆мѣ́ѧ бл҃года́ть сщ҃е́нства, до́брѣ носи́мꙋ въ бл҃гоꙋха́ющемъ сосꙋ́де дꙋшѝ твоеѧ̀, сподо́билсѧ є҆сѝ, ѻ҆́тче є҆рмоге́не, взѧ́ти ѿ землѝ ст҃ꙋ́ю і҆кѡ́нꙋ пречⷭ҇тыѧ бг҃омт҃ре, во гра́де каза́ни чꙋде́снѡ ꙗ҆вле́ннꙋю, и҆ просла́вити ю҆̀ по достоѧ́нїю. Тѣ́мже и҆ подвиза́еши на́съ взыва́ти тебѣ̀ си́це:
Ра́дꙋйсѧ, чꙋдотво́рныѧ і҆кѡ́ны каза́нскїѧ пе́рвое прославле́нїе: ра́дꙋйсѧ, чꙋде́съ ѿ сеѧ̀ і҆кѡ́ны нело́жное и҆звѣще́нїе.
Ра́дꙋйсѧ, сла́вы бг҃омт҃ре ᲂу҆миле́нный пѣснотво́рче: ра́дꙋйсѧ, пред̾ не́ю ѡ҆ па́ствѣ твое́й те́плый мл҃твенниче.
Ра́дꙋйсѧ, мт҃рь бж҃їю, ꙗ҆́кѡ застꙋ́пницꙋ правосла́внагѡ ца́рства рѡссі́йскагѡ, почита́ѧй: ра́дꙋйсѧ, ѡ҆ ᲂу҆твержде́нїи сегѡ̀ ца́рства пред̾ пречⷭ҇тою сле́зы пролива́ѧй.
Ра́дꙋйсѧ, ст҃и́телю є҆рмоге́не, до́брый па́стырю и҆ вели́кїй застꙋ́пниче рѡссі́йскїѧ землѝ.
Конда́къ д҃
Бꙋ́рею помышле́нїй сꙋмни́тельныхъ и҆ стремле́нїй мѧте́жныхъ волнꙋ́ема и҆ въ пꙋчи́нꙋ и҆носла́внагѡ сꙋемꙋ́дрїѧ погрꙋжа́ема, рꙋ́сь ᲂу҆топа́ше. Оу҆зрѣ́въ же тѧ̀, ст҃и́телю бж҃їй, ꙗ҆́кѡ столпа̀ непоколеби́ма и҆ а҆дама́нта тве́рда, возра́довасѧ наде́ждею и҆, тобо́ю ᲂу҆крѣплѧ́ема, пое́тъ бг҃ꙋ: А҆ллилꙋ́їа.
І҆́косъ д҃
Слы́шавъ беззако́нное ᲂу҆мышле́нїе самозва́ннагѡ царѧ̀ порꙋга́тисѧ над̾ вѣ́рою правосла́вною, дерзнове́ннѡ вѣща́лъ є҆сѝ є҆мꙋ̀, ꙗ҆́кѡ не подоба́етъ царю̀ правосла́вномꙋ ѡ҆жени́тисѧ є҆реті́чкою, и҆ та́кѡ ѡ҆бличи́лъ є҆сѝ є҆гѡ̀ невѣ́рїе и҆ нече́стїе. Сегѡ̀ ра́ди и҆ воздви́же на тѧ̀ гоне́нїе и҆ и҆з̾ престо́льнагѡ гра́да тѧ̀, ст҃и́телю, и҆зве́рже. Мы́ же, почита́юще сїѐ твоѐ правдолю́бїе, пое́мъ тѝ, си́льномꙋ ѡ҆ гдⷭ҇ѣ:
Ра́дꙋйсѧ, крѣ́пкїй побо́рниче проти́вꙋ самозва́ннагѡ повели́телѧ: ра́дꙋйсѧ, дерзнове́нный застꙋ́пниче за правосла́внꙋю вѣ́рꙋ.
Ра́дꙋйсѧ, сꙋемꙋ́драгѡ и҆носла́вїѧ пра́ведное ѡ҆бличе́нїе: ра́дꙋйсѧ, сп҃си́тельнагѡ правосла́вїѧ немо́лчное назида́нїе.
Ра́дꙋйсѧ, пра́вды ра́ди и҆згна́нный: ра́дꙋйсѧ, ѿ гдⷭ҇а вѣ́чною сла́вою на нб҃сѣ́хъ вѣнча́нный.
Ра́дꙋйсѧ, ст҃и́телю є҆рмоге́не, до́брый па́стырю и҆ вели́кїй застꙋ́пниче рѡссі́йскїѧ землѝ.
Конда́къ є҃
Бг҃оте́чнꙋю ѕвѣздꙋ̀ показа́ тѧ на нб҃сѣ́хъ въ со́нмѣ сщ҃енномч҃нкѡвъ гдⷭ҇ь вседержи́тель, занѐ и҆ на землѝ бы́лъ є҆сѝ ѕвѣзда̀ свѣ́тлаѧ, ѡ҆сїѧва́ющаѧ царѧ̀ и҆ ца́рство свѣ́томъ правосла́вїѧ и҆ пꙋтево́дствꙋющаѧ ко ᲂу҆гожде́нїю є҆ди́номꙋ бг҃ꙋ, во є҆́же воспѣва́ти є҆мꙋ̀ непреста́ннѡ: А҆ллилꙋ́їа.
І҆́косъ є҃
Ви́дѣша тѧ̀ правосла́внїи лю́дїе, ꙗ҆́кѡ свѣти́ло цр҃ко́вное, безѡ́блачнѡ сїѧ́ющее въ просвѣще́нїе ѡ҆мраче́нныхъ страстьмѝ, призва́ша тѧ̀ въ ца́рствꙋющїй гра́дъ москвꙋ̀, є҆гда̀ нечести́вый самозва́нный повели́тель низве́рженъ бы́сть, да на свѣ́щницѣ первост҃и́тельскагѡ слꙋже́нїѧ ѡ҆свѣща́еши пꙋ́ть жи́зни но́вомꙋ царю̀ и҆ всемꙋ̀ рѡссі́йскомꙋ ца́рствꙋ. Сегѡ̀ ра́ди и҆ мы̀, до сегѡ̀ днѐ ѡ҆зарѧ́емїи свѣ́томъ твои́мъ, неꙋста́ннѡ взыва́емъ тѝ:
Ра́дꙋйсѧ, почита́ѧй царѧ̀, ꙗ҆́кѡ бж҃їе дарова́нїе: ра́дꙋйсѧ, мнѧ́й бы́ти є҆мꙋ̀ благочести́вꙋ и҆ побора́телю по вѣ́рѣ правосла́вней.
Ра́дꙋйсѧ, новопоста́вленна царѧ̀ васі́лїѧ тве́рдости ᲂу҆чи́вый: ра́дꙋйсѧ, въ ра́дости и҆ въ го́рѣ дрꙋ́гомъ є҆мꙋ̀ бы́вый.
Ра́дꙋйсѧ, правосла́внагѡ царѧ̀ на́шегѡ пребыва́ющее бл҃гослове́нїе: ра́дꙋйсѧ, во всѣ́хъ дѣ́лѣхъ нбⷭ҇ное є҆мꙋ̀ поможе́нїе.
Ра́дꙋйсѧ, ст҃и́телю є҆рмоге́не, до́брый па́стырю и҆ вели́кїй застꙋ́пниче рѡссі́йскїѧ землѝ.
Конда́къ ѕ҃
Проповѣ́дникъ бы́въ сп҃си́тельнагѡ покаѧ́нїѧ, є҆гда̀ разгоре́сѧ но́вый мѧте́жъ на рꙋсѝ, призва́лъ є҆сѝ во гра́дъ москвꙋ̀ дре́внѧго и҆ немощна́гѡ ста́рца первост҃и́телѧ і҆́ѡва, и҆ кꙋ́пнѡ съ ни́мъ моли́лсѧ є҆сѝ въ хра́мѣ ᲂу҆спе́нїѧ бг҃омт҃ре ѡ҆ ча́дѣхъ твои́хъ, да ѿврати́тъ гдⷭ҇ь ѿ ни́хъ пра́ведный гнѣ́въ сво́й, да пода́стъ и҆̀мъ ми́ръ и҆ любо́вь, да ᲂу҆стро́итъ въ ца́рствѣ дре́внее є҆дине́нїе, да бл҃гослови́тъ царѧ̀ побѣ́дами над̾ врагѝ, и҆ та́кѡ да просла́витсѧ въ лю́дехъ рѡссі́йскихъ и҆́мѧ гдⷭ҇не пѣ́снїю: А҆ллилꙋ́їа.
І҆́косъ ѕ҃
Возсїѧ́вый во гра́дѣ москвѣ̀ свѣти́льникъ пресвѣ́тлый бы́лъ є҆сѝ, ст҃и́телю є҆рмоге́не, всѣ̑мъ блꙋжда́ющимъ во тмѣ̀ грѣхо́внѣй, въ твои́хъ бг҃омо́льныхъ посла́нїихъ пꙋ́ть сп҃се́нїѧ и҆̀мъ показꙋ́ѧ и҆ дꙋ́хъ ᲂу҆ны́нїѧ и҆ малодꙋ́шїѧ ѿ серде́цъ и҆̀хъ ѿгонѧ́ѧ. Сегѡ̀ ра́ди и҆ мы̀ грѣ́шнїи, въ дни̑ ско́рби и҆ блꙋжда́нїѧ грѣхо́внагѡ, припа́даемъ къ тебѣ̀, ст҃и́телю бж҃їй, и҆ сле́знѡ взыва́емъ: ѡ҆хранѧ́й и҆ ны́нѣ ѻ҆те́чество на́ше ѿ шата́нїѧ ᲂу҆мѡ́въ и҆ серде́цъ, бꙋ́ди въ жи́зни на́мъ во́ждь до́брый и҆ бл҃гонаде́жный, да не поги́бнетъ, по словесѝ твоемꙋ̀, рꙋ́сь правосла́внаѧ и҆ бг҃омъ люби́маѧ и҆ да не преста́нетъ велича́ти тѧ̀ си́це:
Ра́дꙋйсѧ, ѿ потопле́нїѧ бꙋ́рѧми жите́йскими рѡссі̑йскїѧ лю́ди сп҃са́ѧй: ра́дꙋйсѧ, ᲂу҆ныва́ющихъ и҆ мѧтꙋ́щихсѧ ᲂу҆крѣплѧ́ѧй и҆ ѿ заблꙋжде́нїй ѿвраща́ѧй.
Ра́дꙋйсѧ, престꙋпа́ющихъ кре́стное цѣлова́нїе со вла́стїю ѡ҆блича́ѧй: ра́дꙋйсѧ, за до́мъ пречⷭ҇тыѧ бцⷣы и҆ за моско́вское ца́рство да́же до сме́рти стоѧ́ти наꙋча́ѧй.
Ра́дꙋйсѧ, зерца́ло со́вѣсти нелицепрїѧ́тныѧ: ра́дꙋйсѧ, до́брый ко́рмчїй кораблѧ̀ хрⷭ҇то́ва.
Ра́дꙋйсѧ, ст҃и́телю є҆рмоге́не, до́брый па́стырю и҆ вели́кїй застꙋ́пниче рѡссі́йскїѧ землѝ.
Конда́къ з҃
Хотѧ̀ бы́ти па́стырь до́брый, є҆мꙋ́же сꙋ́ть ѻ҆́вцы своѧ̑, ви́дѣвъ во́лка грѧдꙋ́ща, не ѡ҆ставлѧ́лъ є҆сѝ ѻ҆́вцы и҆ не бѣ́галъ є҆сѝ, но пред̾ ни́ми ходи́лъ є҆сѝ во всеѻрꙋ́жїи си́лы и҆ и҆́стины, поѧ̀ бг҃ꙋ: А҆ллилꙋ́їа.
І҆́косъ з҃
Но́вагѡ человѣ́ка, по ѡ҆́бразꙋ созда́вшагѡ є҆го̀, а҆ не но́вагѡ ца́рства и҆носла́внагѡ и҆змышле́нїѧ, возжелѣ́лъ є҆сѝ, ст҃и́телю є҆рмоге́не. Сегѡ̀ ра́ди ѡ҆полчи́лсѧ є҆сѝ на и҆нозе́мное сꙋемꙋ́дрїе и҆ ра́товалъ є҆сѝ за ца́рство древлеправосла́вное, є҆́же тщи́тсѧ во всѣ́хъ лю́дехъ и҆ во все́мъ житїѝ и҆̀хъ воѡбрази́ти хрⷭ҇та̀ бг҃а. Пое́мъ и҆ сла́вимъ сїѐ правосла́вное ратобо́рство твоѐ и҆ бл҃года́рственнѡ вопїе́мъ тѝ:
Ра́дꙋйсѧ, волкѡ́въ хи́щныхъ неща́дное и҆згна́нїе: ра́дꙋйсѧ, кова́рства и҆̀хъ мꙋ́дрое распозна́нїе.
Ра́дꙋйсѧ, всѣ́хъ стоѧ́ти непоколеби́мѡ за правосла́внꙋю вѣ́рꙋ хрⷭ҇то́вꙋ ᲂу҆чи́вый: ра́дꙋйсѧ, и҆новѣ́рнагѡ царѧ̀ возсѣ́сти на престо́лъ рѡссі́йскїй недопꙋсти́вый.
Ра́дꙋйсѧ, ста́да хрⷭ҇то́ва церко́вное ѡ҆гражде́нїе: ра́дꙋйсѧ, ца́рства правосла́внагѡ вѣ́рное сп҃се́нїе.
Ра́дꙋйсѧ, ст҃и́телю є҆рмоге́не, до́брый па́стырю и҆ вели́кїй застꙋ́пниче рѡссі́йскїѧ землѝ.
Конда́къ и҃
Стра́ннѡ є҆́сть маловѣ̑рнымъ и҆ малодꙋ̑шнымъ зрѣ́ти, ка́кѡ ст҃и́тель є҆рмоге́нъ, се́й вои́стиннꙋ крѣ́пкїй во́инъ хрⷭ҇то́въ, дерзнове́ннѡ ѡ҆блича́етъ и҆змѣ́нꙋ вѣ́рѣ хрⷭ҇то́вой и҆, є҆гда̀ ᲂу҆стреми́сѧ на́нь нечести́вый и҆змѣ́нникъ, и҆мы́й но́жъ въ рꙋцѣ̀, то́кмѡ зна́менїемъ кре́стнымъ ѡ҆гражда́етъ себѐ ѿ нападе́нїѧ вра́жїѧ, и҆ та́кѡ побѣжда́етъ є҆гѡ̀ ѕло́бꙋ и҆ безꙋ́мїе, на́съ же воздвиза́етъ къ пѣ́нїю: А҆ллилꙋ́їа.
І҆́косъ и҃
Ве́сь бѣ̀ и҆спо́лненъ ре́вностїю и҆лїѝ прⷪ҇ро́ка, ст҃и́телю є҆рмоге́не, є҆гда̀ ᲂу҆зрѣ́лъ є҆сѝ запꙋстѣ́нїе ца́рства и҆ порꙋга́нїе ст҃ы́хъ хра́мѡвъ бж҃їихъ, ѻ҆гне́мъ сеѧ̀ ре́вности воспламени́лъ є҆сѝ и҆ сердца̀ вѣ́рныхъ ча́дъ твои́хъ, мꙋ́жественнѣ ста́ти за вѣ́рꙋ правосла́внꙋю и҆ и҆згна́ти и҆з̾ престо́льнагѡ гра́да нечести́выхъ лѧ́хѡвъ, во сп҃се́нїе рѡссі́йскїѧ землѝ, пою́щїѧ тѝ ны́нѣ любо́вїю:
Ра́дꙋйсѧ, ст҃о́ю ре́вностїю ѡ҆ сп҃се́нїи ца́рства рѡссі́йскагѡ пламенѣ́вый: ра́дꙋйсѧ, возжещѝ сїю̀ ре́вность и҆ въ ча́дѣхъ твои́хъ восхотѣ́вый.
Ра́дꙋйсѧ, всѧ̑ ᲂу҆грѡ́зы и҆ прещє́нїѧ врагѡ́въ твои́хъ презрѣ́вый: ра́дꙋйсѧ, и҆зы́ти и҆̀мъ и҆з̾ гра́да москвы̀ повелѣ́вый.
Ра́дꙋйсѧ, рѡссі́йское во́инство на ѡ҆свобожде́нїе ца́рствꙋющагѡ гра́да ѿ нечести́выхъ врагѡ́въ бл҃гослови́вый: ра́дꙋйсѧ, ст҃ы̑ни є҆гѡ̀ ѿ порꙋга́нїѧ тѣ́мъ ѡ҆гради́ти жела́вый.
Ра́дꙋйсѧ, ст҃и́телю є҆рмоге́не, до́брый па́стырю и҆ вели́кїй застꙋ́пниче рѡссі́йскїѧ землѝ.
Конда́къ ѳ҃
Всѧ̑кїѧ трꙋды̀ под̾ѧ́лъ є҆сѝ, ст҃и́телю бж҃їй, всѧ̑кїѧ лишє́нїѧ, ѡ҆би̑ды и҆ болѣ̑зни претерпѣ́лъ є҆сѝ, сп҃се́нїѧ ра́ди ча́дъ твои́хъ; но и҆ въ терпѣ́нїи и҆ въ трꙋдѣ̀ мно́зѣмъ неꙋста́ннѡ взыва́лъ є҆сѝ бг҃ꙋ: А҆ллилꙋ́їа.
І҆́косъ ѳ҃
Виті̑и мі́ра сегѡ̀ безмо́лвствꙋютъ, въ стра́сѣ и҆ тре́петѣ ви́дѧще разоре́нїе ца́рства рѡссі́йскаго, громозвꙋ́чный же гла́съ ст҃и́телѧ є҆рмоге́на, ᲂу҆жѐ въ заточе́нїи сꙋ́щагѡ, не престае́тъ проповѣ́дати покаѧ́нїе во ѿпꙋще́нїе грѣхѡ́въ, и҆́хже ра́ди и҆злїѧ́сѧ на рꙋ́сь пра́ведный гнѣ́въ бж҃їй, и҆ мо́литъ пасо́мыхъ въ чистотѣ̀ дꙋ́ши своѧ̑ храни́ти и҆ положи́ти ѧ҆̀ за пречⷭ҇тыѧ до́мъ и҆ за чꙋдотво́рцєвъ, и҆ за вѣ́рꙋ. И҆ мы̀ вѣ́рꙋемъ, ꙗ҆́кѡ слеза́ми покаѧ́нїѧ, по глаго́лꙋ ст҃и́телѧ, согрѣши́вшаѧ рꙋ́сь ѡ҆мы́сѧ, ѡ҆чи́стисѧ и҆ ѡ҆бнови́сѧ, и҆ ны́нѣ пое́тъ во сла́вꙋ своегѡ̀ по бз҃ѣ наста́вника:
Ра́дꙋйсѧ, грѣ̑шныѧ къ покаѧ́нїю призыва́ѧй: ра́дꙋйсѧ, вла́стїю ѿ бг҃а грѣхѝ ца́рства разрѣша́ѧй.
Ра́дꙋйсѧ, за грѣхѝ ча́дъ твои́хъ и҆ въ заточе́нїи бг҃а моли́вый: ра́дꙋйсѧ, сле́зными тече́ньми зе́млю темни́цы твоеѧ̀ ѡ҆роси́вый.
Ра́дꙋйсѧ, рыда́ньми покаѧ́нїѧ лицѐ ца́рства ѡ҆бнови́вый: ра́дꙋйсѧ, гнѣ́въ бж҃їй на ми́лость къ на́мъ грѣ́шнымъ преклони́вый.
Ра́дꙋйсѧ, ст҃и́телю є҆рмоге́не, до́брый па́стырю и҆ вели́кїй застꙋ́пниче рѡссі́йскїѧ землѝ.
Конда́къ і҃
Спастѝ хотѧ̀ рꙋ́сь ѿ безнача́лїѧ грѣхо́внаго, не къ нечести́вомꙋ за́падꙋ, но къ бг҃обоѧ́зненномꙋ до́мꙋ болѧ́ръ рѡма́новыхъ ѡ҆брати́лъ є҆сѝ ѻ҆́чи твоѝ, ст҃и́телю є҆рмоге́не, да бꙋ́детъ ѻ҆́нъ вла́стїю ѿ бг҃а, во ᲂу҆твержде́нїе хрⷭ҇то́ва зако́на, и҆ да пою́тъ ца́рїе и҆ лю́дїе є҆ди́нѣми ᲂу҆сты̀ и҆ є҆ди́нѣмъ се́рдцемъ сп҃си́телю бг҃ꙋ: А҆ллилꙋ́їа.
І҆́косъ і҃
Стѣна̀ неѡдоли́маѧ цр҃кве бы́лъ є҆сѝ, ѻ҆́тче на́шъ є҆рмоге́не, є҆́юже ца́рство на́ше ѡ҆гради́сѧ, въ правосла́вїи ᲂу҆тверди́сѧ и҆ ѿ врагѡ́въ сп҃се́сѧ, и҆ ны́нѣ со бл҃годаре́нїемъ взыва́емъ тѝ:
Ра́дꙋйсѧ, ѕлы́ѧ кѡ́зни нечести́вагѡ за́пада ѿве́ргнꙋвый: ра́дꙋйсѧ, правосла́вїе въ землѝ на́шей ᲂу҆тверди́вый.
Ра́дꙋйсѧ, ст҃ы́хъ преда́нїй ѻ҆те́ческихъ храни́телю: ра́дꙋйсѧ, ᲂу҆ста́вѡвъ цр҃кве правосла́вныѧ ревни́телю.
Ра́дꙋйсѧ, въ до́мѣ болѧ́ръ рѡма́новыхъ бл҃гочести́вꙋю ѻ҆́трасль дре́внѧгѡ ца́рственнагѡ ро́да ᲂу҆зрѣ́вый: ра́дꙋйсѧ, въ не́мъ бж҃їею ми́лостїю царѧ̀ всеѧ̀ рꙋсѝ ᲂу҆каза́вый.
Ра́дꙋйсѧ, ст҃и́телю є҆рмоге́не, до́брый па́стырю и҆ вели́кїй застꙋ́пниче рѡссі́йскїѧ землѝ.
Конда́къ а҃і
Пѣ́нїе и҆схо́дное и҆ рыда́нїе надгро́бное твори́тъ правосла́внаѧ рꙋ́сь ᲂу҆ гро́ба сщ҃енномч҃ника є҆рмоге́на, положи́вшагѡ дꙋ́шꙋ свою̀ за дрꙋ́ги своѧ̑. Не пла́чите, правосла́внїи, не пла́чите, но па́че дерза́йте вѣ́рою, пра́ведникъ бо и҆ по сме́рти жи́въ бꙋ́детъ во вѣ́ки, поѧ̀ бг҃ꙋ: А҆ллилꙋ́їа.
І҆́косъ а҃і
Свѣти́льникъ хрⷭ҇то́въ, на верхꙋ̀ горы̀ стоѧ́й и҆ все́й рꙋсѝ свѣтѧ́й бы́лъ є҆сѝ въ житїѝ твое́мъ, ст҃и́телю є҆рмоге́не. И҆ сѐ полага́ешисѧ под̾ спꙋ́домъ моги́льнымъ пло́тїю, да возсїѧ́еши дꙋ́хомъ, ꙗ҆́кѡ со́лнце въ ца́рствїи ѻ҆ц҃а̀ нбⷭ҇нагѡ, на́съ же да просвѣти́ши си́це воспѣва́ти болѣ̑зни и҆ трꙋды̀ твоѧ̑:
Ра́дꙋйсѧ, съ престо́ла патрїа́ршагѡ беззако́ннѡ низве́рженный: ра́дꙋйсѧ, въ те́мное подземе́лїе, ꙗ҆́кѡ во гро́бъ, вве́рженный.
Ра́дꙋйсѧ, тра́вною пи́щею ѿ врагѡ́въ пита́нный: ра́дꙋйсѧ, гла́да мꙋче́ньми да́же до сме́рти и҆знꙋре́нный.
Ра́дꙋйсѧ, сщ҃енномч҃ниче, за правосла́вїе ца́рства пострада́вый: ра́дꙋйсѧ, стрⷭ҇тоте́рпче, въ рꙋ́цѣ гдⷭ҇ꙋ дꙋ́хъ сво́й преда́вый.
Ра́дꙋйсѧ, ст҃и́телю є҆рмоге́не, до́брый па́стырю и҆ вели́кїй застꙋ́пниче рѡссі́йскїѧ землѝ.
Конда́къ в҃і
Бл҃года́ти бж҃їей сокро́вище ꙗ҆ви́сѧ всечтⷭ҇на́ѧ ра́ка моще́й твои́хъ, ст҃и́телю ѻ҆́тче є҆рмоге́не, и҆ и҆сто́чникъ приснотекꙋ́щїѧ си́лы, є҆́юже бѣ́си и҆згонѧ́ютсѧ, недꙋ́жнїи и҆сцѣлѧ́ютсѧ, хромі́и хо́дѧтъ, глꙋсі́и слы́шатъ, слѣпі́и прозира́ютъ, ѡ҆ѕло́бленнїи ᲂу҆мирѧ́ютсѧ, скорбѧ́щїи ᲂу҆тѣша́ютсѧ и҆ всѝ ликꙋ́ютъ ѡ҆ гдⷭ҇ѣ и҆ прославлѧ́ютъ бг҃а, ди́внаго во ст҃ы́хъ свои́хъ, пою́ще є҆мꙋ̀: А҆ллилꙋ́їа.
І҆́косъ в҃і
Пою́ще твоѐ прославле́нїе, ст҃и́телю є҆рмоге́не, сїѧ̑ пѣ̑сни прино́симъ тѝ, чꙋдотво́рче ст҃ы́й, ꙗ҆́кѡ бл҃гоꙋха́нїе хрⷭ҇тїа́нскїѧ ра́дости: зри́мъ бо бж҃їю си́лꙋ, во ст҃ы́хъ моще́хъ твои́хъ пребыва́ющꙋю. И҆ ны́нѣ ѡ҆зарѧ́еши на́съ свѣтоизлїѧ́нїемъ твоеѧ̀ бл҃года́ти, ѡ҆бвеселѧ́ѧ сердца̀ на̑ша пѣ́ти тѝ со ᲂу҆миле́нїемъ:
Ра́дꙋйсѧ, ты́ бо сладча́йшагѡ при́снѡ созерца́еши: ра́дꙋйсѧ, ты́ бо лице́мъ къ лицꙋ̀ хрⷭ҇та̀ воспѣва́еши.
Ра́дꙋйсѧ, ты́ бо бж҃е́ственною си́лою преѡбража́ешисѧ ѿ сла́вы въ сла́вꙋ: ра́дꙋйсѧ, ты́ бо, ꙗ҆́кѡ со́лнце но́вое, ᲂу҆краша́еши гдⷭ҇ню держа́вꙋ.
Ра́дꙋйсѧ, твои́мъ бо сїѧ́нїемъ и҆ мы̀ незри́мѡ просвѣтлѧ́емсѧ: ра́дꙋйсѧ, твое́ю бо си́лою и҆ мы̀ чꙋде́снѡ ѡ҆животворѧ́емсѧ.
Ра́дꙋйсѧ, ст҃и́телю є҆рмоге́не, до́брый па́стырю и҆ вели́кїй застꙋ́пниче рѡссі́йскїѧ землѝ.
Конда́къ г҃і
Ѽ пресла́вный ᲂу҆го́дниче бж҃їй, ст҃и́телю ѻ҆́тче на́шъ є҆рмоге́не. Прїимѝ на́ше твое́й сла́вѣ сора́дованїе, ꙗ҆́кѡ воздыха́нїе дꙋшѝ, жа́ждетъ бо неѿе́млемый ра́дости, и҆ ᲂу҆молѝ вѣнча́вшаго тѧ̀ сла́вою гдⷭ҇а низпосла́ти и҆ на́мъ ѿ бѣ́дъ, скорбе́й и҆ болѣ́зней, ѡ҆бдержа́щихъ ны̀, ско́рое и҆збавле́нїе, дарова́ти же бл҃года́ть ᲂу҆тѣше́нїѧ и҆ ра́дованїѧ, да съ весе́лїемъ вы́нꙋ пое́мъ бг҃ꙋ: А҆ллилꙋ́їа.
Повто́ръ
Сей конда́къ глаго́лется три́жды, та́же і҆́косъ а҃-й и҆ конда́къ а҃-й.
І҆́косъ а҃
А҆́гг҃ла храни́телѧ рѡссі́йскїѧ землѝ ꙗ҆ви́ тѧ млⷭ҇рдый хрⷭ҇то́съ въ дрє́внїѧ дни̑ мѧте́жа и҆ нестрое́нїѧ, да сп҃се́тъ ю҆̀ ѿ блꙋжда́нїѧ грѣхо́внагѡ. И҆ ны́нѣ ꙗ҆ви́ тѧ мл҃твенника те́пла и҆ чꙋдотво́рца, ꙗ҆́кѡ зна́менїе жи́зни на́шеѧ; да и҆ ны́нѣ грѧдꙋ́тъ по тебѣ̀ всѝ блꙋжда́ющїи, ꙗ҆́кѡ ѻ҆́вцы не и҆мꙋ́щїѧ па́стырѧ, и҆ ѡ҆брѣ́тше тобо́ю сп҃се́нїе, да пою́тъ тебѣ̀ си́це:
Ра́дꙋйсѧ, цр҃кве на́шеѧ премꙋ́дрое возглавле́нїе: ра́дꙋйсѧ, ѡ҆ ча́дѣхъ цр҃кве те́плое промышле́нїе.
Ра́дꙋйсѧ, страны̀ на́шеѧ церко́вное ᲂу҆твержде́нїе: ра́дꙋйсѧ, сынѡ́въ ца́рства правосла́вное ѡ҆заре́нїе.
Ра́дꙋйсѧ, па́стырємъ и҆ пасѡ́мымъ до́брое поꙋче́нїе: ра́дꙋйсѧ, царє́мъ на́шимъ совѣ́те и҆ ᲂу҆тѣше́нїе.
Ра́дꙋйсѧ, ст҃и́телю є҆рмоге́не, до́брый па́стырю и҆ вели́кїй застꙋ́пниче рѡссі́йскїѧ землѝ.
Конда́къ а҃
И҆зрѧ́дный воево́до ратобо́рцєвъ за вѣ́рꙋ хрⷭ҇то́вꙋ, те́плый ᲂу҆тѣ́шителю всѣ́хъ напа́ствꙋемыхъ и҆ ѡ҆бремене́нныхъ скорбьмѝ мно́гими, непоколеби́мый сто́лпе правосла́вныѧ вѣ́ры, є҆ѧ́же ра́ди положи́лъ є҆сѝ дꙋ́шꙋ твою̀ за дрꙋ́ги своѧ̑, и҆ на́съ свободи́лъ є҆сѝ ѿ ко́зней и҆ сѣте́й вра́жїихъ. И҆ ны́нѣ ѿ гдⷭ҇а просла́вленъ є҆сѝ ꙗ҆вле́нїемъ чꙋде́съ твои́хъ, и҆́миже собра́лъ є҆сѝ на́съ ᲂу҆миле́нною дꙋше́ю пѣ́ти тебѣ̀:
Ра́дꙋйсѧ, ст҃и́телю є҆рмоге́не, до́брый па́стырю и҆ вели́кїй застꙋ́пниче рѡссі́йскїѧ землѝ.
Моли́твы
Ѽ вели́кїй ᲂу҆го́дниче хрⷭ҇то́въ, ст҃и́телю ѻ҆́тче на́шъ є҆рмоге́не! Къ тебѣ̀, мл҃твенникꙋ те́пломꙋ и҆ предста́телю пред̾ бг҃омъ непосты́дномꙋ, ᲂу҆се́рднѡ притека́емъ, въ нꙋ́ждахъ и҆ ско́рбехъ на́шихъ ᲂу҆тѣше́нїѧ и҆ по́мощи просѧ́ще. Въ дре́внюю годи́нꙋ и҆скꙋше́нїй, внегда̀ ѡ҆быше́дше ѡ҆быдо́ша странꙋ̀ на́шꙋ нечести́вїи вразѝ, гдⷭ҇ь ꙗ҆ви́ тѧ цр҃кви свое́й столпа̀ непоколеби́ма и҆ лю́демъ рѡссі̑йскимъ па́стырѧ до́бра, дꙋ́шꙋ свою̀ за ѻ҆́вцы положи́вша и҆ лю̑тыѧ во́лки дале́че ѿгна́вша. Ны́нѣ ᲂу҆́бѡ при́зри и҆ на ны̀, недосто́йнаѧ ча̑да твоѧ̑, ᲂу҆миле́нною дꙋше́ю и҆ сокрꙋше́ннымъ се́рдцемъ тебѐ призыва́ющаѧ. Крѣ́пость бо на́ша въ на́съ ѡ҆скꙋдѣ̀, и҆ вра̑жїѧ ловлє́нїѧ и҆ сѣ̑ти ѡ҆быдо́ша на́съ. Помозѝ на́мъ, застꙋ́пниче на́шъ! Оу҆твердѝ на́съ въ вѣ́рѣ ст҃ѣ́й: наꙋчѝ на́съ всегда̀ твори́ти за́пѡвѣди бж҃їѧ и҆ всѧ̑ преда̑нїѧ цр҃кѡ́внаѧ, ѿ ѻ҆тє́цъ на́мъ заповѣ̑даннаѧ. Па́стырємъ на́шимъ бꙋ́ди а҆рхїпа́стырь, во́инѡмъ во́ждь дꙋхо́вный, болѧ́щимъ вра́чъ, печа̑льнымъ ᲂу҆тѣ́шитель, гони̑мымъ застꙋ́пникъ, ю҆́нымъ наста́вникъ, всѣ̑мъ же бл҃госе́рдый ѻ҆те́цъ и҆ за всѧ̑ те́плый мл҃твенникъ: ꙗ҆́кѡ да мл҃твами твои́ми ѡ҆гражда́еми, непреста́ннѡ воспое́мъ и҆ просла́вимъ всест҃о́е и҆́мѧ живонача́льныѧ трⷪ҇цы, ѻ҆ц҃а̀ и҆ сн҃а и҆ ст҃а́гѡ дх҃а, во вѣ́ки вѣкѡ́въ. А҆ми́нь.