Православный календарь
Размер шрифта:

Канѡ́нъ

Канѡ́нъ ст҃о́мꙋ сщ҃енномꙋ́ченикꙋ є҆рмоге́нꙋ, патрїа́рхꙋ моско́вскомꙋ и҆ всеѧ̀ рꙋсѝ

Свщмч. Ермогена, патр. Московского (1612) 2 марта 2026
Глас 8

Пѣ́снь а҃

І҆рмо́съ

Пѣ́снь возсле́мъ лю́дїе, чꙋ́дномꙋ бг҃ꙋ на́шемꙋ, свободи́вшемꙋ і҆и҃лѧ ѿ рабо́ты, пѣ́снь побѣ́днꙋю пою́ще и҆ вопїю́ще: пои́мъ тебѣ̀ є҆ди́номꙋ влⷣцѣ.

Тропа́рь

Вѣ́дꙋщїи воскликнове́нїе, по́йте и҆ велича́йте ст҃и́телѧ вели́каго, и҆ взира́юще на кончи́нꙋ є҆гѡ̀, подража́йте вѣ́рѣ є҆гѡ̀.

Тропа́рь

Ѻ҆би́лїе бл҃года́ти ѡ҆бита́етъ въ ра́цѣ моще́й твои́хъ, ст҃и́телю є҆рмоге́не, є҆ѧ́же ра́ди прославлѧ́емъ тѧ̀, ꙗ҆́кѡ новоѧвле́нна чꙋдотво́рца, и҆ про́симъ и҆сцѣле́нїй.

Тропа́рь

Нача́ло премꙋ́дрости стра́хъ гдⷭ҇нь, наꙋчи́вый и҆ тѧ̀, ст҃и́телю, рабо́тати гдⷭ҇еви съ тре́петомъ и҆ ра́доватисѧ пред̾ лице́мъ є҆гѡ̀. да́ждь и҆ на́мъ, по мл҃твѣ твое́й, положи́ти сїѐ нача́ло бл҃го́е.

Тропа́рь

Мнѡ́ги скѡ́рби првⷣнымъ и҆ ѿ всѣ́хъ и҆́хъ и҆зба́витъ ѧ҆̀ гдⷭ҇ь. по словесѝ семꙋ̀ бы́сть житїѐ твоѐ, ст҃и́телю. и҆ сѐ, ны́нѣ ра́дꙋешисѧ на нб҃сѣ́хъ и҆ ра́дꙋеши всѣ́хъ чтꙋ́щихъ па́мѧть твою̀.

Тропа́рь

И҆спыта́ѧй свидѣ̑нїѧ бж҃їѧ бы́лъ є҆сѝ, ст҃и́телю: въ зако́нѣ бо хрⷭ҇то́вѣ поꙋча́лсѧ є҆сѝ де́нь и҆ но́щь, и҆ ѡ҆правда̑нїѧ гдⷭ҇нѧ пра̑ва сꙋ́ть: въ селє́нїѧ бо првⷣныхъ всели́ тѧ гдⷭ҇ь.

Тропа́рь

За́пѡвѣди гдⷭ҇ни ѿ ю҆́ности возлюби́лъ є҆сѝ и҆ преда̑нїѧ ст҃ы́хъ ѻ҆тє́цъ да́же до сме́рти соблю́лъ є҆сѝ, ст҃и́телю, и҆ ны́нѣ съ ни́ми сопрославлѧ́еши бг҃а, є҆го́же молѝ, да сп҃се́тъ тобо́ю дꙋ́шы на́шѧ.

Тропа́рь

Є҆го́же возлюби́лъ є҆сѝ и҆ є҆мꙋ́же ре́вностнѡ порабо́талъ є҆сѝ, ны́нѣ съ ли́ки ст҃ы́хъ воспѣва́еши и҆ мо́лишисѧ за ны̀.

Богороди́ченъ

Мл҃твеннице те́плаѧ, застꙋ́пнице ро́да хрⷭ҇тїа́нскагѡ, прїимѝ мѡльбы̀ ѿ на́съ, приле́жнѡ призыва́ющихъ и҆ молѧ́щихсѧ тебѣ̀: покры́й странꙋ̀ на́шꙋ правосла́внꙋю покро́вомъ твоеѧ̀ бл҃гости.

Пѣ́снь г҃

І҆рмо́съ

Ты̀ є҆сѝ ᲂу҆твержде́нїе притека́ющихъ къ тебѣ̀, гдⷭ҇и: ты̀ є҆сѝ свѣ́тъ ѡ҆мраче́нныхъ, и҆ пое́тъ тѧ̀ дꙋ́хъ мо́й.

Тропа́рь

Лѣ̑та дрє́внѧѧ помѧнꙋ́хъ и҆ поꙋчи́хсѧ во всѣ́хъ дѣ́лѣхъ твои́хъ, ст҃и́телю, и҆ ѡ҆брѣто́хъ вѣ́дѣнїе, ка́кѡ жи́ти въ мі́рѣ се́мъ, ѿ ст҃ы́хъ ѻ҆тє́цъ и҆ ѿ житі́й ст҃ы́хъ вразꙋмлѧ́ѧсѧ.

Тропа́рь

Є҆пі́скопъ мꙋ́дрый лю́демъ и҆ ца́рствꙋ бы́лъ є҆сѝ, ст҃и́телю: ᲂу҆подо́билсѧ є҆сѝ мꙋ́жꙋ смотрѧ́щꙋ лицѐ бытїѧ̀ ца́рства правосла́внагѡ въ лѣ́тописехъ дре́внихъ, ꙗ҆́коже въ зерца́лѣ, поꙋча́ющꙋсѧ премꙋ́дрости правосла́вїѧ во дне́хъ дре́внихъ.

Тропа́рь

Гдⷭ҇и гдⷭ҇ь на́шъ, ꙗ҆́кѡ чꙋ́дно и҆́мѧ твоѐ по все́й рꙋсѝ. гдⷭ҇ь посмѣе́тсѧ врагѡ́мъ на́шымъ. гдⷭ҇ь застꙋ́пникъ на́шъ. сїю̀ пра́вдꙋ живописа́лъ є҆сѝ, ст҃и́телю, поꙋча́ѧ ро́ды родѡ́въ, ꙗ҆́кѡ лѣтопи́сецъ правосла́вныѧ рꙋсѝ.

Тропа́рь

Лю́дїе, поꙋчи́тесѧ, лю́дїе, ᲂу҆мили́тесѧ, вразꙋмлѧ́юще себѐ самѣ́хъ въ пѣ́нїихъ и҆ пѣ́снехъ дꙋхо́вныхъ, и҆́миже просла́вилъ є҆́сть ст҃и́тель є҆рмоге́нъ застꙋ́пницꙋ ро́да на́шегѡ.

Тропа́рь

А҆́ще не гдⷭ҇ь сози́ждетъ до́мъ, всꙋ́е трꙋди́шасѧ зи́ждꙋщїи. сїю̀ и҆́стинꙋ внꙋша́лъ є҆сѝ, ст҃и́телю, стра́жємъ землѝ на́шеѧ, да не ѡ҆сꙋетѧ́тсѧ помышлє́нїи свои́ми и҆ да не всꙋ́е мѧтꙋ́тсѧ.

Тропа́рь

Сщ҃е́нникъ цр҃кве ст҃и́телѧ нїкола́ѧ бы́лъ є҆сѝ, є҆рмоге́не, и҆ возгрѣва́ѧ да́ръ, живы́й въ тебѣ̀, ве́лїю любо́вь бг҃ома́тере стѧжа́лъ є҆сѝ, є҆́юже ѿ сла́вы въ сла́вꙋ да́же до нб҃сѐ влеко́мъ бы́лъ є҆сѝ и҆ въ селе́нїихъ првⷣныхъ всели́лсѧ є҆сѝ.

Тропа́рь

Оу҆подо́билсѧ є҆сѝ кꙋпцꙋ̀, многоцѣ́ненъ би́серъ ѡ҆брѣ́тшꙋ, є҆гда̀ і҆кѡ́нꙋ бг҃омт҃ре ѿ землѝ под̾ѧ́лъ є҆сѝ, ꙗ҆́кѡ сокро́вище бл҃года́ти, ни́щыѧ дꙋ́хомъ ѡ҆богаща́ющее.

Богороди́ченъ

Сказа́нїе чꙋде́съ твои́хъ, бцⷣе, є҆́же написа̀ ст҃и́тель є҆рмоге́нъ во сла́вꙋ і҆кѡ́ны твоеѧ̀ каза́нскїѧ, воздвиза́етъ всю̀ рꙋ́сь правосла́внꙋю при́снѡ прибѣга́ти къ тебѣ̀ во всѣ́хъ ѡ҆бстоѧ́нїихъ и҆ приле́жнѡ моли́ти: прест҃а́ѧ бцⷣе, помога́й на́мъ.

Пѣ́снь д҃

І҆рмо́съ

Оу҆слы́шахъ, гдⷭ҇и, смотре́нїѧ твоегѡ̀ та́инство, разꙋмѣ́хъ дѣла̀ твоѧ̑, и҆ просла́вихъ твоѐ бжⷭ҇тво̀.

Тропа́рь

Возвѣсти́те во ꙗ҆зы́цѣхъ дѣла̀ бж҃їѧ, ꙗ҆̀же ꙗ҆ви́лъ на́мъ є҆́сть гдⷭ҇ь вседержи́тель ѿ і҆кѡ́ны своеѧ̀ мт҃ре, ре́клъ є҆сѝ, ст҃и́телю: да не рекꙋ́тъ ꙗ҆зы́цы: гдѣ̀ є҆́сть бг҃ъ и҆́хъ, въ него́же вѣ́рꙋютъ; и҆ да заградѧ́тсѧ ᲂу҆ста̀ и҆́хъ.

Тропа́рь

Ꙗ҆́та бы́сть земле́ю, но не ᲂу҆держа́нна, і҆кѡ́на пречⷭ҇тыѧ, да бꙋ́детъ во ᲂу҆твержде́нїе новопросвѣщє́ннымъ, блꙋжда́ющымъ же во тьмѣ̀ невѣ́дѣнїѧ во ѿкрове́нїе свѣ́та и҆́стины, ꙗ҆́коже мꙋ́дрствꙋетъ ѡ҆ се́мъ ст҃и́тель є҆рмоге́нъ.

Тропа́рь

Ты̀ є҆сѝ и҆зрѧ́дное пѣ́нїе чꙋде́съ пренепоро́чныѧ, ты̀ є҆сѝ ᲂу҆твержде́нїе немощствꙋ́ющихъ въ вѣ́рѣ, ты̀ є҆сѝ просвѣще́нїе ѡ҆мраче́нныхъ тьмо́ю невѣ́рїѧ, и҆ пое́тъ тѧ̀ дꙋ́хъ мо́й.

Тропа́рь

И҆́го бл҃го́е и҆ бре́мѧ ле́гкое под̾ѧ́лъ є҆сѝ, є҆рмоге́не, є҆гда̀ ѻ҆́бразъ а҆́гг҃льскїй воспрїѧ́лъ є҆сѝ, да прїи́деши въ во́зрастъ мꙋ́жа соверше́нна.

Тропа́рь

Тебѐ, ѡ҆дѣ́ющагосѧ мл҃твою, ꙗ҆́кѡ ри́зою, добродѣ́телей подви́жника, сп҃сова ѡ҆би́тель ви́дѧ, ѕѣлѡ̀ ра́довасѧ: грѧде́тъ бо сщ҃е́нно-а҆рхїмандрі́тъ ѡ҆бнови́ти ѡ҆би́тель и҆ ᲂу҆тверди́ти бл҃гоче́стїе.

Тропа́рь

Є҆рмола́ю тезоимени́тый ᲂу҆соверши́лсѧ є҆сѝ: є҆рмоге́нꙋ же сожи́тельствꙋѧ ᲂу҆подо́билсѧ є҆сѝ: и҆ сѐ, ꙗ҆́кѡ свѣти́льникъ немерца́ѧй, поставлѧ́ешисѧ на свѣ́щницѣ каза́нскїѧ цр҃кве.

Тропа́рь

Лѣ́пѡ є҆́сть премꙋ́дромꙋ немꙋ̑дрыѧ просвѣща́ти, си́льномꙋ ѡ҆ гдⷭ҇ѣ немощны̑ѧ ᲂу҆крѣплѧ́ти: лѣ́пѡ є҆́сть свѧти́тельствовати є҆рмоге́нꙋ, всѧ̑ могꙋ́щемꙋ ѡ҆ хрⷭ҇тѣ̀ і҆и҃сѣ.

Богороди́ченъ

Ꙗ҆́кѡ гпⷭ҇жꙋ̀ цр҃и́цꙋ и҆ влⷣчцꙋ, застꙋпа́ющꙋ всѣ́хъ на́съ, въ держа́вный тво́й покро́въ прибѣга́ющихъ, пое́тъ тѧ̀ ст҃ы́й є҆рмоге́нъ, съ ни́мже прїимѝ и҆ на̑ша молє́нїѧ и҆ сп҃сѝ дꙋ́шы на́шѧ.

Пѣ́снь є҃

І҆рмо́съ

Оу҆́тренююще вопїе́мъ тѝ: гдⷭ҇и, сп҃си́ ны, ты́ бо є҆сѝ бг҃ъ на́шъ, ра́звѣ тебє̀ и҆но́гѡ не вѣ́мы.

Тропа́рь

Є҆гда̀ бы́лъ є҆сѝ въ каза́ни, невѣ́дꙋщыѧ и҆́стиннагѡ бг҃а просвѣща́лъ є҆сѝ и҆ рабо́тати є҆ди́номꙋ бг҃ꙋ наꙋча́лъ є҆сѝ. сегѡ̀ ра́ди со а҆пⷭ҇лы ра́дꙋешисѧ, прїе́млѧ награ́дꙋ бл҃говѣ́стника хрⷭ҇то́ва.

Тропа́рь

Ре́вностїю бж҃їею по сла́вѣ ди́вныхъ во ст҃ы́хъ: гꙋ́рїа, варсоно́фїа и҆ ге́рмана поревнова́лъ є҆сѝ, є҆рмоге́не, и҆ тѣ́хъ мл҃твами вспомоществꙋ́емый, въ ѡ҆би́тєли ст҃и́телей пресели́лсѧ є҆сѝ, предстоѧ̀ є҆ди́номꙋ пастыренача́льникꙋ, є҆го́же молѝ сп҃сти́сѧ всѣ̑мъ на́мъ.

Тропа́рь

Ми́лꙋѧ нака́зывалъ є҆сѝ и҆ наказꙋ́ѧ ми́ловалъ є҆сѝ, ст҃и́телю, и҆ се́ю мꙋ́дростїю ѡ҆гражда́лъ є҆сѝ ѿ волкѡ́въ хи́щныхъ новопросвѣщє́ннаѧ ча̑да твоѧ̑ и҆ всѧ̑ ѻ҆́вцы твоѧ̑.

Тропа́рь

Ѡ҆пло́томъ во́ли царе́вой, ревнꙋ́ющїѧ по правосла́вїю ца́рства, немощны̑ѧ въ вѣ́рѣ ѡ҆гражда́лъ є҆сѝ и҆ къ попече́нїю ѡ҆ сп҃се́нїи ца́рства во хрⷭ҇тѣ̀ і҆и҃сѣ царѧ̀ ѳео́дѡра призыва́лъ є҆сѝ, ᲂу҆казꙋ́ѧ ца́рствꙋ сп҃си́тельное преѡбраже́нїе.

Тропа́рь

Гра́дъ москва̀ и҆ съ ни́мъ всѧ̀ рꙋ́сь пла́касѧ го́рькѡ, самозва́ннꙋ повели́телю воцари́вшꙋсѧ и҆ въ нече́стїе ѡ҆бле́кшꙋсѧ, ты́ же є҆ди́нъ, ꙗ҆́кѡ крѣ́пкїй побо́рникъ, семꙋ̀ нече́стїю противоста́лъ є҆сѝ и҆ вѣ́рꙋ правосла́внꙋю со дерзнове́нїемъ и҆сповѣ́далъ є҆сѝ.

Тропа́рь

Є҆рмоге́на и҆сповѣ́дника, и҆́же не ᲂу҆боѧ́сѧ преще́нїѧ сме́ртнагѡ и҆ слове́съ жесто́кихъ ѿ нечести́вагѡ врага̀, пѣ́сньми ᲂу҆бл҃жа́емъ.

Тропа́рь

На него́же ра́дꙋющесѧ взира́ютъ чи́ни а҆́гг҃льстїи и҆ всѝ ст҃і́и, томꙋ̀ предстои́ши ны́нѣ, є҆рмоге́не, и҆ ꙗ҆́кѡ и҆сповѣ́дникъ хода́тайствꙋеши при́снѡ за рꙋ́сь правосла́внꙋю.

Богороди́ченъ

А҆да́мово воззва́нїе, пренепоро́чнаѧ дв҃о, съ тобо́ю гдⷭ҇ь и҆ тобо́ю съ на́ми бг҃ъ: разꙋмѣ́йте сїѐ, ꙗ҆зы́цы, и҆ покарѧ́йтесѧ.

Пѣ́снь ѕ҃

І҆рмо́съ

Ри́зꙋ мнѣ̀ пода́ждь свѣ́тлꙋ, ѡ҆дѣѧ́йсѧ свѣ́томъ ꙗ҆́кѡ ри́зою, многомлⷭ҇тиве хрⷭ҇тѐ бж҃е на́шъ.

Тропа́рь

Собо́ра ѡ҆сщ҃е́ннагѡ и҆збра́нїемъ и҆ повелѣ́нїемъ ца́рскимъ возше́лъ є҆сѝ, ст҃и́телю, на престо́лъ патрїа́ршїѧ вла́сти, да сп҃се́ши рꙋ́сь, напа́стьми мно́гими ѡ҆бꙋрева́емꙋ.

Тропа́рь

Вѣ́ры нелицемѣ́рныѧ и҆сповѣ́данїе непоколе́блемое начерта́лъ є҆сѝ, ст҃и́телю, рꙋко́ю твое́ю и҆ сїю̀ вѣ́рꙋ пред̾ лице́мъ всеѧ̀ цр҃кве въ собо́рѣ ᲂу҆спе́нїѧ пречⷭ҇тыѧ и҆сповѣ́далъ є҆сѝ, да ᲂу҆́зритъ всѧ̑ рꙋ́сь ка́мень и҆́стинныѧ вѣ́ры, на не́мже сози́ждетсѧ ца́рство и҆ ᲂу҆тверди́тсѧ въ правосла́вїи.

Тропа́рь

Ѧ҆зы́къ тво́й тро́сть кни́жника скоропи́сца, и҆́мже загради́шасѧ ᲂу҆ста̀ грѣ́шнича и҆ ᲂу҆ста̀ льсти́вагѡ и҆ ᲂу҆смири́сѧ мѧте́жъ нечести́выхъ.

Тропа́рь

Тьмꙋ̀ лжѝ, ꙗ҆́же бы́сть ѡ҆́крестъ престо́ла ца́рскагѡ, разгонѧ́ѧ сло́вомъ и҆́стины, и҆ на борьбꙋ̀ съ и҆змѣ́нниками правосла́вное во́инство бл҃гословлѧ́ѧ и҆зне́слъ є҆сѝ на стѡ́гна гра́да москвы̀ покро́въ ѿ чꙋдото́чныхъ моще́й цр҃е́вича дими́трїа, да возвѣсти́тсѧ пра́вда бж҃їѧ и҆ да ᲂу҆крѣпи́тсѧ страна̀ правосла́внаѧ.

Тропа́рь

А҆́ще ца́рь бл҃гочести́въ ре́клъ є҆сѝ, ст҃и́телю, и҆ по вѣ́рѣ правосла́внѣй побора́тель, бл҃гослови́те ѡ҆ не́мъ гдⷭ҇а, и҆ возлюби́те є҆го̀, и҆ въ стра́сѣ бж҃їи повинꙋ́йтесѧ є҆мꙋ̀ и҆ покарѧ́йтесѧ.

Тропа́рь

Ꙗ҆́кѡ дре́во при и҆схо́дищихъ во́дъ бы́лъ є҆сѝ ᲂу҆ престо́ла бл҃года́ти, ст҃и́телю, ѡ҆сѣнѧ́ѧ прохла́дою ᲂу҆тѣше́нїѧ и҆ многопло́дїемъ пра́вды царѧ̀ правосла́вныѧ рꙋсѝ.

Тропа́рь

И҆ проповѣ́дꙋеши, и҆ ѡ҆блича́еши, и҆ призыва́еши, и҆ мо́лишисѧ, и҆ моли́тисѧ во всѣ́хъ хра́мѣхъ повелѣва́еши, ст҃и́телю, ѡ҆ сп҃се́нїи и҆ ѡ҆ ᲂу҆мире́нїи страны̀ правосла́вныѧ.

Богороди́ченъ

Бцⷣе дв҃о, ᲂу҆пова́нїе хрⷭ҇тїа́нѡмъ, покры́й, соблюдѝ, сохранѝ и҆ сп҃сѝ рꙋ́сь, прибѣга́ющꙋ ко твоемꙋ̀ застꙋпле́нїю.

Пѣ́снь з҃

І҆рмо́съ

Ѻ҆́троцы бг҃очести́вїи въ вавѷлѡ́нѣ ѻ҆́бразꙋ злато́мꙋ не поклони́шасѧ: но посредѣ̀ пе́щи ѻ҆́гненныѧ ѡ҆роша́еми, пѣ́снь воспѣва́хꙋ, глаго́люще: превозноси́мый ѻ҆тцє́въ и҆ на́съ бж҃е, бл҃гослове́нъ є҆сѝ.

Тропа́рь

Ѻ҆гне́мъ лю́тыѧ ѕло́бы ѡ҆палѧ́ема, пе́щи ѻ҆́гненнѣй ᲂу҆подо́биласѧ є҆́сть правосла́внаѧ рꙋ́сь во днѝ разоре́нїѧ и҆ мѧте́жа лю́тагѡ, си́лою же слове́съ твои́хъ, ст҃и́телю, ѡ҆роша́ема и҆ до дне́сь пое́тъ правосла́внѡ: ѻ҆тцє́въ и҆ на́съ бж҃е, бл҃гослове́нъ є҆сѝ.

Тропа́рь

Гла́съ въ собо́рѣ ᲂу҆спе́нїѧ пречⷭ҇тыѧ слы́шанъ бы́сть: пока́йтесѧ ѡ҆ ѕло́бѣ ва́шей, вразѝ царю̀ правосла́вномꙋ и҆ бг҃ови, и҆́бо бг҃омъ вѣнча́нъ є҆́сть на ца́рство и҆ бг҃омъ ца́рствꙋетъ во ᲂу҆твержде́нїе хрⷭ҇то́вы пра́вды, пою́ще гдⷭ҇еви: ѻ҆тцє́въ бж҃е, бл҃гослове́нъ є҆сѝ.

Тропа́рь

Ѻ҆те́цъ всеѧ̀ рꙋсѝ въ дни̑ ско́рби и҆ ѡ҆бстоѧ́нїй ꙗ҆ви́лсѧ ст҃и́тель бж҃їй є҆рмоге́нъ: сегѡ̀ ра́ди призыва́йте є҆го̀ и҆ по́йте съ ни́мъ и҆́мени всевы́шнѧгѡ: ѻ҆тцє́въ и҆ на́съ бж҃е бл҃гослове́нъ є҆сѝ.

Тропа́рь

Моли́тесѧ и҆ пости́тесѧ и҆ и҆змѣни́тесѧ въ но́вагѡ человѣ́ка, ѡ҆дѣ́ѧна въ добродѣ́тєли бг҃олю́бїѧ и҆ бл҃гоче́стїѧ, да пода́стъ всѣ̑мъ на́мъ гдⷭ҇ь ми́ръ и҆ любо́вь, землѝ на́шей крѣ́пкое є҆дине́нїе, странѣ̀ побѣ́дꙋ на врагѝ и҆ ѡ҆долѣ́нїе.

Тропа́рь

Любо́вїю къ царю̀ согрѣва́ѧйсѧ и҆ ре́вностїю по вѣ́рѣ па́че ѻ҆гнѧ̀ разгора́ѧйсѧ, попалѧ́лъ є҆сѝ, ст҃и́телю, тє́рнїѧ грѣхолюби́вагѡ мѧте́жа, ѡ҆бновлѧ́ѧ и҆ ᲂу҆твержда́ѧ ѡ҆бветша́вшее ца́рство.

Тропа́рь

Ю҆нцы̀ тꙋ́чнїи: самозва́нцы мѧте́жнїи, ца́рїе и҆нозе́мнїи и҆ и҆змѣ̑нницы нечести́вїи ѡ҆держа́ша рꙋ́сь, пред̾ лице́мъ же твоеѧ̀ пра́вды, ст҃и́телю, и҆счезо́ша ꙗ҆́кѡ ды́мъ ѿ ѻ҆гнѧ̀, да весели́тсѧ правосла́внаѧ рꙋ́сь ѡ҆ гдⷭ҇ѣ и҆ да торжествꙋ́етъ правосла́вїе.

Тропа́рь

Бг҃ови рабѡ́тницы и҆ тебѣ̀ помѡ́щницы бы́ша ст҃и́тели хрⷭ҇тѡ́вы: фїларе́тъ рѡсто́вскїй, є҆фре́мъ каза́нскїй, ѳеокті́стъ тверскі́й и҆ галактїѡ́нъ сꙋ́здальскїй, и҆́миже во всю̀ зе́млю и҆зы́де сло́во твоѐ, є҆рмоге́не ст҃и́телю, и҆ въ концы̀ рꙋсѝ вѣща́нїе твоѐ.

Богороди́ченъ

И҆̀же въ напа́стехъ и҆ въ ско́рбехъ, и҆ въ болѣ́знехъ ѡ҆бремене́ннїи грѣхѝ мно́гими, прїиди́те къ застꙋ́пницѣ ᲂу҆се́рднѣй, мт҃ри гдⷭ҇а вы́шнѧгѡ: та́ бо и҆сцѣли́тъ вы̀ и҆ ᲂу҆тѣ́шитъ и҆ ᲂу҆поко́итъ.

Пѣ́снь и҃

І҆рмо́съ

Бг҃оглаго́ливїи ѻ҆́троцы въ пещѝ, со ѻ҆гне́мъ пла́мень попира́юще, поѧ́хꙋ: бл҃гослови́те, дѣла̀ гдⷭ҇нѧ, гдⷭ҇а.

Тропа́рь

Ми́лѡстыни мнѡ́ги твори́лъ є҆сѝ лю́демъ, ст҃и́телю, є҆гда̀ бога́тїи ѡ҆бнища́ша ми́лостїю и҆ сребролю́бїѧ ра́ди не внима́хꙋ є҆́же помощѝ неимꙋ́щымъ: ты́ же ре́клъ є҆сѝ ке́ларю се́ргїевой ѡ҆би́тели а҆враа́мїю, и҆ жи̑тницы ѿверзо́шасѧ и҆ а҆́лчꙋщїи насы́тишасѧ и҆ бл҃гослови́ша гдⷭ҇а.

Тропа́рь

А҆́ще и҆ пѣ́нитсѧ жите́йское мо́ре, а҆́ще и҆ бѣснꙋ́етсѧ воздвиза́емо напа́стей бꙋ́рею, не потопи́ти є҆мꙋ̀ кораблѧ̀ і҆и҃сова: на ка́мени бо вѣ́ры и҆ пра́вды стои́мъ. та́кѡ ре́клъ є҆сѝ, ст҃и́телю, и҆ бы́сть та́кѡ, и҆ сѐ, торжествꙋ́ютъ правосла́внїи и҆ бл҃гословѧ́тъ гдⷭ҇а.

Тропа́рь

Ꙗ҆́кѡ до́брый ко́рмчїй, приве́лъ є҆сѝ, ст҃и́телю, кора́бль рѡссі́йскїѧ держа́вы къ ти́хой при́стани правосла́вныѧ цр҃кве: и҆ сѐ, страна̀ на́ша ѡ҆солѧ́етсѧ бл҃года́тїю ст҃а́гѡ дх҃а и҆ бл҃гословлѧ́етъ гдⷭ҇а.

Тропа́рь

Ре́клъ є҆сѝ, ст҃и́телю, боѧ́щымсѧ гдⷭ҇а: не бо́йсѧ, ма́лое ста́до, ꙗ҆́кѡ бл҃гоизво́лилъ є҆́сть ѻ҆ц҃ъ нбⷭ҇ный дарова́ти на́мъ ца́рство. та́кѡ вѣ́ровалъ є҆сѝ и҆ та́кѡ по вѣ́рѣ воспрїѧ́лъ є҆сѝ. и҆ сѐ, ст҃а́ѧ цр҃ковь ра́дꙋетсѧ ѡ҆ правосла́вїи страны̀ на́шеѧ и҆ благословлѧ́етъ гдⷭ҇а.

Тропа́рь

Оу҆ничижи́ша тѧ̀ возстаю́щїи на тѧ̀, мета́юще пра́хъ и҆ песо́къ въ лицѐ твоѐ, да ѿрече́шисѧ ѿ бж҃їѧ пома́занника, ты́ же всѧ̑ претерпѣ́лъ є҆сѝ пра́вды ра́ди, бл҃гословлѧ́ѧ гдⷭ҇а.

Тропа́рь

Ст҃а́ѧ и҆ бг҃омъ люби́маѧ рꙋ́сь не поги́бнетъ, ре́клъ є҆сѝ, ст҃и́телю, и҆змѣ́нникѡмъ и҆ преда́телємъ и҆ всѣ̑мъ врагѡ́мъ на́шымъ: всꙋ́е трꙋжда́етесѧ, а҆́ще не гдⷭ҇ь созида́етъ, пока́йтесѧ и҆ бл҃гослови́те гдⷭ҇а.

Тропа́рь

Не вѣ́даемъ, ка́кѡ и҆ нарещѝ ва́съ, ре́клъ є҆сѝ, ст҃и́телю, мѧте́жникѡмъ и҆ и҆змѣ́нникѡмъ: ѿстꙋпи́ли бо є҆стѐ ѿ бг҃а, ѿпа́ли ѿ собо́рныѧ и҆ а҆пⷭ҇льскїѧ цр҃кве, ѿстꙋпи́ли ѿ бг҃омъ и҆ ст҃ы́мъ є҆ле́емъ пома́заннагѡ царѧ̀, забы́ли є҆стѐ ѡ҆бѣ́ты правосла́вныѧ вѣ́ры на́шеѧ: стоѧ́ти до сме́рти за до́мъ прест҃ы́ѧ бцⷣы и҆ за ца́рство правосла́вное. пока́йтесѧ и҆ ѡ҆брати́тесѧ и҆ бл҃гослови́те гдⷭ҇а.

Богороди́ченъ

Є҆́же ѡ҆ на́съ и҆спо́лнивъ смотре́нїе бж҃їе и҆ ꙗ҆̀же на землѝ соедини́въ небє́снымъ, носи́ла є҆сѝ во чре́вѣ ѿ дх҃а ст҃а, пренепоро́чнаѧ, и҆ родила̀ є҆сѝ на́мъ всѣ́хъ бг҃а, є҆го́же всѧ̑ дѣла̀ гдⷭ҇нѧ пою́тъ и҆ превозно́сѧтъ во всѧ̑ вѣ́ки.

Пѣ́снь ѳ҃

І҆рмо́съ

Вои́стинꙋ бцⷣꙋ тѧ̀ и҆сповѣ́дꙋемъ, сп҃се́нїи тобо́ю, дв҃о чⷭ҇таѧ, съ безпло́тными ли̑ки тѧ̀ велича́юще.

Тропа́рь

Пречⷭ҇тѣй влⷣчцѣ ввѣ́рилъ є҆сѝ, ст҃и́телю, правосла́вное во́инство, и҆ стоѧ́ти за вѣ́рꙋ неподви́жнѡ да́же до сме́рти бл҃гослови́лъ є҆сѝ, и҆ боѧ́тисѧ є҆ди́нагѡ на нб҃сѣ́хъ живꙋ́щагѡ наꙋчи́лъ є҆сѝ. сегѡ̀ ра́ди со и҆сповѣ́дники правосла́вныѧ пра́вды ра́дꙋешисѧ.

Тропа́рь

Ѡ҆каѧ̑нныѧ и҆змѣ́нники а҆наѳема́тствовалъ є҆сѝ, правосла̑внымъ же во́инѡмъ и҆ всѣ̑мъ ревни́телємъ правосла́внагѡ ца́рства млⷭ҇ть ѿ гдⷭ҇а бг҃а и҆ ѿ своегѡ̀ смире́нїѧ бл҃гослове́нїе препода́лъ є҆сѝ, ст҃и́телю, и҆́мже бы́сть побѣ́да и҆ ѡ҆долѣ́нїе на врагѝ и҆ всеѧ̀ рꙋсѝ сп҃се́нїе, тебѣ́ же вѣне́цъ ѿ бг҃а, ꙗ҆́кѡ строи́телю ст҃ы́ѧ жи́зни.

Тропа́рь

Гла́съ ѻ҆́гненныѧ ре́вности ѡ҆ сп҃се́нїи ѻ҆те́чества не вѧ́жетсѧ, а҆́ще и҆ заключа́етсѧ во хра́минѣ пꙋ́стѣ, ꙗ҆́кѡ во гро́бѣ: сегѡ̀ ра́ди и҆ заповѣ́далъ є҆сѝ ᲂу҆ченикꙋ̀ твоемꙋ̀ дїѡнѵ́сїю и҆гꙋ́менꙋ и҆ и҆́нокѡмъ ѡ҆би́тели ст҃а́гѡ се́ргїа ѡ҆гласи́ти всю̀ рꙋ́сь правосла́внꙋю, да воздви́жетсѧ сп҃си́тельнаѧ бра́нь во сла́вꙋ ст҃ы́ѧ цр҃кве и҆ во ᲂу҆твержде́нїе держа́вы рѡссі́йскїѧ, ю҆́же возлюби́лъ є҆сѝ и҆ ѡ҆ не́йже мо́лишисѧ бг҃ꙋ.

Тропа́рь

И҆ первопресто́льникъ а҆пⷭ҇льскїѧ цр҃кве, и҆ и҆сповѣ́дникъ правосла́вныѧ вѣ́ры, и҆ вторы́й златоꙋ́стъ во ѡ҆бличе́нїе грѣхолюби́выхъ и҆ мѧте́жныхъ, и҆ строи́тель правосла́внагѡ ца́рства бы́лъ є҆сѝ, ст҃и́телю, и҆ за сїѐ произволе́нїе темни́цею и҆ гла́домъ мꙋ́чимъ бы́лъ є҆сѝ и҆ прїѧ́въ ѿ бг҃а неꙋвѧда́емый вѣне́цъ, съ мч҃нки весели́шисѧ.

Тропа́рь

Бг҃ꙋ на́шемꙋ тобо́ю сла́ва, тебѣ́ же, сщ҃енномч҃нче є҆рмоге́не, довлѣ́етъ ра́доватисѧ во свѣ́тѣ лица̀ є҆гѡ̀ и҆ непреста́ннѡ моли́тисѧ, да не поги́бнетъ рꙋ́сь ст҃а́ѧ, но да бꙋ́детъ да́же до конца̀ свѣ́тъ во ѿкрове́нїе ꙗ҆зы́кѡмъ правосла́вныѧ пра́вды.

Тропа́рь

Ни́щь и҆ болѧ́й є҆́смь а҆́зъ, ст҃и́телю, и҆ во смире́нїи свое́мъ припа́даю къ цѣльбоно́снѣй ра́цѣ твое́й, и҆сцѣле́нїѧ тре́бꙋѧ.

Тропа́рь

Є҆го́же возлюби́лъ є҆сѝ, є҆мꙋ́же дꙋ́шꙋ свою̀ пре́далъ є҆сѝ и҆ ны́нѣ предстои́ши со дерзнове́нїемъ ꙗ҆́кѡ мч҃нкъ: молѝ бг҃а ѡ҆ на́съ, ст҃ы́й сщ҃енномч҃нче є҆рмоге́не.

Богороди́ченъ

Тѧ̀ и҆сповѣ́дꙋемъ, ꙗ҆́кѡ мт҃рь гдⷭ҇а вы́шнѧгѡ, и҆ невозвра́тнꙋ наде́ждꙋ и҆мꙋ́ще на тѧ̀, мо́лимсѧ тебѣ̀ ᲂу҆миле́нною дꙋше́ю и҆ сокрꙋше́ннымъ се́рдцемъ: всѣ́мъ полє́знаѧ да́рꙋй, и҆ всѧ̑ сп҃сѝ, бцⷣе дв҃о, ты́ бо є҆сѝ бжⷭ҇твенный покро́въ рабѡ́мъ твои̑мъ.