Российская Православная Церковь

по благословенію Архіерейскаго Сѵнода Россійской Православной Церкви

Православный календарь

Ака́ѳістъ

А҆ка́ѳїстъ прпⷣбномꙋ ѻ҆ц҃ꙋ̀ на́шемꙋ нїки́тѣ сто́лпникꙋ, пересла́вскомꙋ чꙋдотво́рцꙋ

Прп. Никиты столпника, Переяславского (1186) 6 июня 2026

Конда́къ а҃

Взбра́нный чꙋдотво́рче и҆ вели́кїй хрⷭ҇то́въ ᲂу҆го́дниче! восхвалѧ́емъ тѧ̀ съ любо́вїю, ча̑да твоѧ̑, те́пла предста́телѧ къ бг҃ꙋ тебѐ стѧжа́вше. ты́ же молѝ просла́вившаго тѧ̀ гдⷭ҇а ѿ всѧ́кихъ на́мъ бѣ́дъ свободи́тисѧ, зовꙋ́щымъ:

Ра́дꙋйсѧ, нїки́то прпⷣбне, сто́лпниче и҆ чꙋдотво́рче.

І҆́косъ а҃

А҆́гг҃лѡвъ подо́бника и҆ бѣсѡ́въ противобо́рца прови́дѧ тѧ̀ всеѧ̀ тва́ри зижди́тель словесы̀ прⷪ҇ро́ческими: и҆змы́йтесѧ и҆ чи́сти бꙋ́дите, на покаѧ́нїе ѡ҆гласи́въ тѧ̀, ꙗ҆́кѡ втора́го па́ѵла, человѣколю́бнѡ къ себѣ̀ призва̀, на́съ же наꙋчѝ ᲂу҆блажа́ти тебѐ си́це:

Ра́дꙋйсѧ, сосꙋ́де и҆збра́нный, свы́ше бг҃омъ пред̾ꙋвѣ́данный: ра́дꙋйсѧ, въ хра́мъ дх҃а всест҃а́гѡ пред̾ꙋста́вленный.

Ра́дꙋйсѧ, сподо́бивыйсѧ бжⷭ҇твеннагѡ призва́нїѧ: ра́дꙋйсѧ, ᲂу҆досто́ивыйсѧ ѿ гдⷭ҇а ѡ҆правда́нїѧ.

Ра́дꙋйсѧ, блгⷣть бж҃їю, ᲂу҆мѧгча́ющꙋю се́рдце твоѐ, полꙋчи́вый: ра́дꙋйсѧ, ѡ҆чисти́тельнагѡ покаѧ́нїѧ тѡ́ки сле́зъ и҆сточи́вый.

Ра́дꙋйсѧ, вѣ́рꙋ въ призва́вшаго тѧ̀ гдⷭ҇а несꙋмнѣ́ннꙋ воспрїѧ́вый: ра́дꙋйсѧ, всего̀ себѐ води́тельствꙋ бж҃їю преда́вый.

Ра́дꙋйсѧ, сꙋпрꙋ́жницꙋ и҆ клевре́тѡвъ твои́хъ гдⷭ҇а ра́ди ѡ҆ста́вивый: ра́дꙋйсѧ, невозвра́тное твоѐ ше́ствїе къ сниска́нїю сп҃се́нїѧ напра́вивый.

Ра́дꙋйсѧ, црⷭ҇твїѧ нбⷭ҇нагѡ стѧжа́телю: ра́дꙋйсѧ, ѡ҆ всѣ́хъ къ тебѣ̀ притека́ющихъ те́плый ко гдⷭ҇ꙋ предста́телю.

Ра́дꙋйсѧ, нїки́то прпⷣбне, сто́лпниче и҆ чꙋдотво́рче.

Конда́къ в҃

Ви́дѧ сꙋпрꙋ́жницꙋ твою̀, дивѧ́щꙋюсѧ премѣне́нїю снѣ́дныхъ мѧ́съ ꙗ҆́кобы въ человѣ́чєскїѧ чле́ны и҆ недоꙋмѣва́ющꙋю ѡ҆ неисповѣди́мыхъ сꙋдьба́хъ бж҃їихъ, свы́ше ѡ҆заре́нъ, и҆сповѣ́далъ є҆сѝ, ꙗ҆́кѡ гдⷭ҇ь на покаѧ́нїе тѧ̀ призыва́етъ, и҆ а҆́бїе позна́лъ є҆сѝ сп҃са́ющемꙋ тѧ̀ бг҃ꙋ пѣ́ти: А҆ллилꙋ́їа.

І҆́косъ в҃

Ра́зꙋмъ недоразꙋмѣва́емый, въ ди́вномъ призва́нїи твое́мъ проѧвле́нный, разꙋмѣ́ти и҆ща̀, прпⷣбне ѻ҆́тче нїки́то, помышлѧ́лъ є҆сѝ, ка́кѡ ѡ҆ гдⷭ҇ѣ возмощѝ мі́ръ и҆ дїа́вола посрами́ти, къ ла́ѵрѣ ст҃а́гѡ великомч҃ника нїки́ты а҆́бїе поте́клъ є҆сѝ, и҆дѣ́же и҆ а҆́гг҃льскїй ѡ҆́бразъ на сѧ̀ воспрїи́мъ, до́бль во́инъ хрⷭ҇то́въ показа́лсѧ є҆сѝ. мы́ же, гдⷭ҇а, сп҃сшаго тѧ̀, прославлѧ́юще, ра́достнѡ вопїе́мъ тѝ:

Ра́дꙋйсѧ, ꙗ҆́кѡ мыта́рь, ко гдⷭ҇ꙋ ѡ҆ поми́лованїи вопїѧ́вый: ра́дꙋйсѧ, ꙗ҆́кѡ заблꙋ́ждшїй сы́нъ, ѻ҆ц҃а̀ нбⷭ҇нагѡ взыска́вый.

Ра́дꙋйсѧ, ꙗ҆́кѡ ханане́а, ѿ хрⷭ҇та̀ не ѿстꙋпа́вый: ра́дꙋйсѧ, ꙗ҆́кѡ блꙋдни́ца, ѡ҆ грѣсѣ́хъ рыда́вый.

Ра́дꙋйсѧ, ꙗ҆́кѡ є҆зекі́а, ᲂу҆ми́льнѡ моли́выйсѧ: ра́дꙋйсѧ, ꙗ҆́кѡ манассі́а, въ покаѧ́нїи смири́выйсѧ.

Ра́дꙋйсѧ, ꙗ҆́кѡ і҆́ѡвъ, и҆скꙋше́нїѧ крѣ́пкѡ терпѣ́вый: ра́дꙋйсѧ, ꙗ҆́кѡ данїи́лъ, премꙋ́дрость бж҃їю разꙋмѣ́ти вожделѣ́вый.

Ра́дꙋйсѧ, даві́дово раска́ѧнїе ꙗ҆ви́вый: ра́дꙋйсѧ, петрѡ́вы сле́зы и҆сточи́вый.

Ра́дꙋйсѧ, пꙋ́ть и҆́стинный къ животꙋ̀ вѣ́чномꙋ ѡ҆брѣты́й: ра́дꙋйсѧ, ꙗ҆́кѡ крі́нъ, любо́вїю бжⷭ҇твенною процвѣты́й.

Ра́дꙋйсѧ, нїки́то прпⷣбне, сто́лпниче и҆ чꙋдотво́рче.

Конда́къ г҃

Си́ла вы́шнѧгѡ ѡ҆сѣни́ тѧ, прпⷣбне ѻ҆́тче нїки́то, є҆гда̀ въ нача́лѣ не бы́лъ є҆сѝ ᲂу҆досто́енъ прїѧ́тїѧ въ ла́ѵрꙋ великомч҃ника нїки́ты, и҆ тридне́внымъ твои́мъ пред̾ враты̀ ѻ҆́ныѧ присѣдѣ́нїемъ и҆ всенаро́днымъ грѣхѡ́въ твои́хъ и҆сповѣ́данїемъ побѣди́телѧ на дїа́вола тѧ̀ ꙗ҆вѝ, наꙋча́ѧ на́съ даю́щемꙋ крѣ́пость лю́демъ свои̑мъ бг҃ꙋ пѣ́ти: А҆ллилꙋ́їа.

І҆́косъ г҃

И҆мѣ́ѧй бг҃опрїѧ́тное стремле́нїе во ст҃ѣ́й ла́ѵрѣ великомч҃ника нїки́ты водвори́тисѧ, но ѿ сеѧ̀ бы́въ ѿрѣва́емь, въ ти́нное бла́то на́гъ пове́рглсѧ є҆сѝ на терза́нїе мши́цємъ и҆ гадѡ́мъ. мы́ же толи́кѡ крѣ́пкомꙋ твоемꙋ̀ терпѣ́нїю дивѧ́щесѧ, вопїе́мъ тѝ:

Ра́дꙋйсѧ, мі́рꙋ є҆ди́ножды навсегда̀ ᲂу҆ме́рый: ра́дꙋйсѧ, нераска́ѧннѡ всѧ̑ кра̑снаѧ мі́ра сегѡ̀ презрѣ́вый.

Ра́дꙋйсѧ, тщесла́вныѧ по́мыслы смири́вый: ра́дꙋйсѧ, мы́сль въ бз҃ѣ ᲂу҆тверди́вый.

Ра́дꙋйсѧ, сребролю́бїе и҆зсꙋши́вый: ра́дꙋйсѧ, сластолю́бїе ᲂу҆мертви́вый.

Ра́дꙋйсѧ, всѧ́кїй гнѣ́въ и҆ и҆збы́токъ ѕло́бы ѿложи́вый: ра́дꙋйсѧ, смиренномꙋ́дрїе возлюби́вый.

Ра́дꙋйсѧ, дꙋ́шꙋ твою̀ по сло́вꙋ хрⷭ҇та̀ возненави́дѣвый: ра́дꙋйсѧ, дѣ́лы бл҃ги́ми велїа́ра преѡби́дѣвый.

Ра́дꙋйсѧ, пло́ть со страстьмѝ и҆ похотьмѝ распны́й: ра́дꙋйсѧ, по ѡ҆браще́нїи твое́мъ не себѐ, но є҆ди́номꙋ бг҃ꙋ живы́й.

Ра́дꙋйсѧ, нїки́то прпⷣбне, сто́лпниче и҆ чꙋдотво́рче.

Конда́къ д҃

Бꙋ́рю внꙋ́трь и҆мѣ́ѧ помышле́нїй сꙋмни́тельныхъ, ст҃ы́ѧ ла́ѵры и҆гꙋ́менъ смѧте́сѧ, зрѧ̀ тебѐ, грѣхолюби́ва бы́вша, на по́двиги и҆́ночествꙋющихъ толи́кѡ бо́дреннѡ дерза́юща, въ мѣ́стѣ тѣ́снѣ тѧ̀ затворѝ во и҆спыта́нїе бл҃га́гѡ твоегѡ̀ произволе́нїѧ: ты́ же на дїа́вола, ꙗ҆́кѡ даві́дъ на голїа́ѳа, є҆динобо́рствовати ра́достнѡ съ ка́менемъ вѣ́ры поте́клъ є҆сѝ, поѧ̀ гдⷭ҇ꙋ си́лъ: А҆ллилꙋ́їа.

І҆́косъ д҃

Слы́шавъ сказа̑нїѧ житі́й дре́внихъ подви́жникѡвъ, прпⷣбне, ка́кѡ ѿ гдⷭ҇а наставлѧ́еми и҆ ᲂу҆крѣплѧ́еми, трꙋды̀ ко трꙋдѡ́мъ прилага́хꙋ, тѣ́мъ подража́ти возревнова́лъ є҆сѝ, и҆ тѧ̑жкїѧ вери̑ги, по бл҃гослове́нїю и҆гꙋ́мена, на сѧ̀ возложи́въ, де́нь и҆ но́щь въ мл҃твахъ пребыва́лъ є҆сѝ. мы́ же, ди́вное твоѐ подви́жничество прославлѧ́ѧ, зове́мъ тѝ такова̑ѧ:

Ра́дꙋйсѧ, житїе́мъ ѻ҆тцє́въ пꙋсты́нныхъ плѣне́нный: ра́дꙋйсѧ, любо́вїю бжⷭ҇твенною распале́нный.

Ра́дꙋйсѧ, произво́льное ᲂу҆́зничество возлюби́вый: ра́дꙋйсѧ, во ᲂу҆мерщвле́нїе пло́ти желѣ̑за на себѐ возложи́вый.

Ра́дꙋйсѧ, въ по́двизѣхъ неꙋтоми́мый: ра́дꙋйсѧ, во благоче́стїи неѡхлади́мый.

Ра́дꙋйсѧ, во пло́ти безпло́тныхъ а҆́гг҃ловъ сожи́телю: ра́дꙋйсѧ, своегѡ̀ произволе́нїѧ во́ли бж҃їей покори́телю.

Ра́дꙋйсѧ, и҆справле́нїи твои́ми безпло́тныхъ ᲂу҆диви́вый: ра́дꙋйсѧ, равноа́гг҃льнагѡ житїѧ̀ ѡ҆́бразъ и҆́стинный на́мъ ꙗ҆ви́вый.

Ра́дꙋйсѧ, въ собесѣ́дованїе съ бг҃омъ вы́нꙋ ᲂу҆глꙋбле́нный: ра́дꙋйсѧ, блгⷣтїю бж҃їею преѡбогаще́нный.

Ра́дꙋйсѧ, нїки́то прпⷣбне, сто́лпниче и҆ чꙋдотво́рче.

Конда́къ є҃

Бг҃опѣ́сненнꙋю ѱалти́рь къ достиже́нїю нбⷭ҇нагѡ ѻ҆те́чества, ꙗ҆́кѡ свѣти́льникъ, во ᲂу҆мѣ̀ твое́мъ вы́нꙋ содержа̀, то́ю прославлѧ́лъ є҆сѝ нбⷭ҇нагѡ ѻ҆ц҃а̀, воспѣва́ѧ: А҆ллилꙋ́їа.

І҆́косъ є҃

Ви́дѣвше бли́жнїи и҆ да́льнїи, є҆́же по бз҃ѣ житїѐ твоѐ, прпⷣбне, чꙋ́дномꙋ твои́хъ нра́вѡвъ и҆змѣне́нїю ᲂу҆дивлѧ́хꙋсѧ, добродѣ́тєли же и҆ пѡ́двиги твоѧ̑ прославлѧ́хꙋ, съ ни́ми же и҆ мы̀ си́це вопїе́мъ тѝ:

Ра́дꙋйсѧ, ꙗ҆́кѡ въ ста́рости крѣ́пость мꙋ́жескꙋю показа́лъ є҆сѝ: ра́дꙋйсѧ, ꙗ҆́кѡ ѻ҆бѣ́тъ и҆́ночества дѣла́ми ѡ҆правда́лъ є҆сѝ.

Ра́дꙋйсѧ, въ многостра́стнѣй пло́ти подвиза́выйсѧ, ꙗ҆́кѡ безпло́тный: ра́дꙋйсѧ, благи́ми по́мыслы и҆ дѣ́лы многопло́дный.

Ра́дꙋйсѧ, твои́ми по́двиги ѿ ѡ҆блѣне́нїѧ на́съ возставлѧ́ѧй: ра́дꙋйсѧ, твое́ю жи́знїю пꙋ́ть ко сп҃се́нїю всѣ̑мъ из̾ѧвлѧ́ѧй.

Ра́дꙋйсѧ, любо́вь ве́лїю къ бг҃ꙋ показа́вый: ра́дꙋйсѧ, многоѡбра́знѣ по́мощь бж҃їю и҆спыта́вый.

Ра́дꙋйсѧ, бж҃їей любвѝ къ ка́ющымсѧ зерца́ло: ра́дꙋйсѧ, подвиза́ющымсѧ на дїа́вола крѣ́пкое забра́ло.

Ра́дꙋйсѧ, вы́нꙋ ѡ҆ на́съ съ мл҃твою бг҃ꙋ предстоѧ́щїй: ра́дꙋйсѧ, и҆ подне́сь ѡ҆би́тель твою̀ нерꙋши́мꙋ хранѧ́щїй.

Ра́дꙋйсѧ, нїки́то прпⷣбне, сто́лпниче и҆ чꙋдотво́рче.

Конда́къ ѕ҃

Проповѣ́даютъ тѧ̑жкїѧ твоѧ̑ вери̑ги, смиренномꙋ́дре нїки́то, трꙋды̀ и҆ болѣ̑зни, бг҃а ра́ди тобо́ю под̾ѧ́тыѧ, и҆́хже ра́ди ди́внѡ просла́ви тѧ̀ гдⷭ҇ь, ѻ҆би̑льныѧ и҆сцѣле́нїй стрꙋи̑ тобо́ю и҆сточа́ѧ на́мъ, да вы́нꙋ пое́мъ є҆мꙋ̀: А҆ллилꙋ́їа.

І҆́косъ ѕ҃

Возсїѧ́вшаѧ въ сокрꙋше́ннѣмъ се́рдцѣ твое́мъ блгⷣть всест҃а́гѡ дх҃а прови́дца бꙋ̑дꙋщихъ и҆ ско́раго навѣ́тꙋемымъ ѿ бѣсѡ́въ свободи́телѧ показа̀ тѧ̀, прпⷣбне, наꙋча́ѧ всѣ́хъ вопи́ти тебѣ̀ си́це:

Ра́дꙋйсѧ, прє́днѧѧ, ꙗ҆́кѡ настоѧ̑щаѧ прорека́вый: ра́дꙋйсѧ, да̑льнаѧ, ꙗ҆́кѡ бли́з̾ сꙋ̑щаѧ прозира́вый.

Ра́дꙋйсѧ, ꙗ҆́кѡ кнѧ́зю мїхаи́лꙋ винꙋ̀ разслабле́нїѧ є҆гѡ̀ тѣле́снагѡ ѡ҆б̾ѧсни́лъ є҆сѝ: ра́дꙋйсѧ, ꙗ҆́кѡ мꙋ́ченическꙋю кончи́нꙋ є҆мꙋ̀ и҆ болѧ́ринꙋ є҆гѡ̀ бы́ти предвѣсти́лъ є҆сѝ.

Ра́дꙋйсѧ, со прⷪ҇ро́ки просла́вленный: ра́дꙋйсѧ, чꙋдотво́рцємъ сопричи́сленный.

Ра́дꙋйсѧ, горды́ни дїа́волѣй низложи́телю: ра́дꙋйсѧ, бѣсѡ́въ прогони́телю.

Ра́дꙋйсѧ, си́лꙋ вра́жїю попра́вый: ра́дꙋйсѧ, въ си́лѣ бж҃їей преспѣва́вый.

Ра́дꙋйсѧ, ꙗ҆́кѡ црⷭ҇твїе бж҃їе внꙋ́трь себє̀ стѧжа́лъ є҆сѝ: ра́дꙋйсѧ, ꙗ҆́кѡ хрⷭ҇та̀ навѣ́ки въ тебѣ̀ жи́ти воспрїѧ́лъ є҆сѝ.

Ра́дꙋйсѧ, нїки́то прпⷣбне, сто́лпниче и҆ чꙋдотво́рче.

Конда́къ з҃

Хотѧ́щꙋ дїа́волꙋ ꙗ҆вле́нїемъ свои́мъ во ѡ҆́бразѣ драко́на ᲂу҆страши́ти тѧ̀, стоѧ́ща на мл҃твѣ, ѻ҆рꙋ́жїемъ креста̀ пораже́нїе всеконе́чное нане́слъ є҆сѝ, побѣди́телю бг҃ꙋ воспѣва́ѧ: А҆ллилꙋ́їа.

І҆́косъ з҃

Но́вꙋю тва́рь показа̀ тѧ̀ зижди́тель, ѿ миролю́бїѧ къ толи́комꙋ бг҃олю́бїю се́рдце твоѐ ѡ҆брати́въ, прпⷣбне ѻ҆́ч҃е, ꙗ҆́кѡ ты̀ на сто́лпъ, а҆́ки и҆лїа̀ на ѻ҆́гненнꙋю колесни́цꙋ возше́дъ, бдѣ́нїе, по́стъ и҆ мл҃твꙋ, а҆́ки ко́ни быстроте́чныѧ ѿ землѝ къ нб҃сѝ стѧжа́лъ є҆сѝ, и҆ та́кѡ ко хрⷭ҇тꙋ̀ предста́въ, вы́нꙋ хода́тайствꙋеши ѡ҆ на́съ, вопїю́щихъ тебѣ̀:

Ра́дꙋйсѧ, ꙗ҆́кѡ є҆́же по бз҃ѣ и҆́стинное житїѐ позна́лъ є҆сѝ: ра́дꙋйсѧ, ꙗ҆́кѡ то́е и҆́щꙋщымъ дѣла́ми показа́лъ є҆сѝ.

Ра́дꙋйсѧ, велемꙋ́дрѡвъ вѣ́ка сегѡ̀ ѡ҆бꙋи́вый: ра́дꙋйсѧ, и҆́стиннꙋю мꙋ́дрость въ смиренномꙋ́дрїи бы́ти ꙗ҆ви́вый.

Ра́дꙋйсѧ, и҆́го хрⷭ҇та̀ воспрїѧ́вый: ра́дꙋйсѧ, бл҃гость ѻ҆́нагѡ житїе́мъ ѡ҆правда́вый.

Ра́дꙋйсѧ, ꙗ҆́звы гдⷭ҇а і҆и҃са любе́знѣ на тѣ́лѣ твое́мъ понесы́й: ра́дꙋйсѧ, всегѡ̀ себѐ въ же́ртвꙋ гдⷭ҇еви принесы́й.

Ра́дꙋйсѧ, земны́й стра́нниче: ра́дꙋйсѧ, бж҃їй и҆збра́нниче.

Ра́дꙋйсѧ, мона́хѡвъ наста́вниче: ра́дꙋйсѧ, бг҃оприѧ́тный ѡ҆ на́съ мл҃твенниче.

Ра́дꙋйсѧ, нїки́то прпⷣбне, сто́лпниче и҆ чꙋдотво́рче.

Конда́къ и҃

Стра́нное и҆ пресла́вное чꙋ́до ви́дитсѧ всѣ̑мъ, притека́ющымъ къ тебѣ̀, ѻ҆́ч҃е нїки́то, ꙗ҆́кѡ и҆ вода̀ ѿ и҆зры́тыхъ тобо́ю кладенцє́въ, че́рплемаѧ съ вѣ́рою, тѣлє́сныѧ и҆ дꙋшє́вныѧ недꙋ́ги и҆сцѣлѧ́етъ, наꙋча́ѧ чꙋдодѣ́ющемꙋ бг҃ꙋ пѣ́ти: А҆ллилꙋ́їа.

І҆́косъ и҃

Ве́сь ѿ всест҃а́го бг҃а ѡ҆благода́тствованъ є҆сѝ, прпⷣбне ѻ҆́ч҃е, ꙗ҆́кѡ дꙋ́хомъ прⷭ҇то́лꙋ бж҃їю предстои́ши, тѣ́ломъ же въ нѣ́дрѣ землѝ почива́ѧ, ѿ гро́ба твоегѡ̀ подае́ши цѣльбы̀. сегѡ̀ ра́ди и҆ взыва́емъ тѝ такѡва́ѧ:

Ра́дꙋйсѧ, вѣ́рный ра́бе влⷣки всебл҃га́гѡ: ра́дꙋйсѧ, хра́мѣ преꙋкраше́нный дх҃а всест҃а́гѡ.

Ра́дꙋйсѧ, цр҃ѧ̀ нбⷭ҇нагѡ предстоѧ́телю: ра́дꙋйсѧ, ско́рый проше́нїй пода́телю.

Ра́дꙋйсѧ, и҆сто́чниче и҆сцѣле́нїй: ра́дꙋйсѧ, сокро́вищнице чꙋдотворе́нїй.

Ра́дꙋйсѧ, ви́димыми чꙋдесы̀ неви́димꙋю бл҃года́ть, въ тебѣ̀ сꙋ́щꙋю, ꙗ҆влѧ́ѧй: ра́дꙋйсѧ, вѣ́рныхъ дꙋ́шы зна́меньми въ вѣ́рѣ ᲂу҆твержда́ѧй.

Ра́дꙋйсѧ, ча́дѡмъ цр҃кви лꙋчеза́рный свѣти́льниче: ра́дꙋйсѧ, ди́вный хрⷭ҇то́въ ᲂу҆го́дниче.

Ра́дꙋйсѧ, ᲂу҆вѣнча́нный подви́жниче: ра́дꙋйсѧ, бг҃ꙋ при́сный люби́миче.

Ра́дꙋйсѧ, нїки́то прпⷣбне, сто́лпниче и҆ чꙋдотво́рче.

Конда́къ ѳ҃

Всѧ́кое є҆стество̀ а҆́гг҃льское ᲂу҆диви́сѧ вели́комꙋ свы́ше тебѣ̀ дарова́нїю, прпⷣбне нїки́то, ꙗ҆́кѡ и҆ древѧ́ный по́сохъ тво́й, стра́ждꙋщемꙋ тѣле́снымъ разслабле́нїемъ черни́говскомꙋ кнѧ́зю мїхаи́лꙋ по́сланный ѿ тебє̀ и҆ въ рꙋ́кꙋ и҆́мъ прїѧ́тый, а҆́бїе и҆сцѣле́нїе томꙋ̀ дарова̀ и҆ наꙋчѝ є҆го̀ пѣ́ти чꙋдодѣ́ющемꙋ тобо́ю бг҃ꙋ: А҆ллилꙋ́їа.

І҆́косъ ѳ҃

Вѣті́и многовѣща́ннїи недоꙋмѣ́ютъ по достоѧ́нїю восхвали́ти тѧ̀, достосла́вне ѻ҆́ч҃е, ꙗ҆́кѡ па́че є҆стества̀ си́лꙋ вра́жїю пресла́внѡ низлага́еши. є҆ще́ бо въ тѣлесѝ пребыва́ѧ, бѣ́са, ше́ствовавшꙋ къ тебѣ̀ кнѧ́зю мїхаи́лꙋ ꙗ҆́вльшасѧ во ѡ҆́бразѣ и҆́нока и҆ бл҃го́е кнѧ́же предпрїѧ́тїе воспѧща́вша, ви́димѡ къ столпꙋ̀ твоемꙋ̀ и҆́менемъ хрⷭ҇та̀ пригвозди́лъ є҆сѝ, и҆ подне́сь тꙋ́южде вла́сть на бѣ̑сы ꙗ҆влѧ́еши, разрꙋша́ѧ злоко́знєнныѧ дѣ̑йства и҆́хъ на человѣ́кѡвъ. сегѡ̀ ра́ди и҆ зове́мъ тѝ си́це:

Ра́дꙋйсѧ, лжѝ дїа́волѣй ѡ҆бличи́телю: ра́дꙋйсѧ, пре́лести бѣсо́вскїѧ посрами́телю.

Ра́дꙋйсѧ, вла́сть на дꙋ̑хи нечи̑стыѧ прїѧ́вый: ра́дꙋйсѧ, тꙋ́южде и҆ по сме́рти ᲂу҆держа́вый.

Ра́дꙋйсѧ, ꙗ҆́кѡ де́мѡни и҆ гро́ба твоегѡ̀ трепе́щꙋтъ: ра́дꙋйсѧ, ꙗ҆́кѡ на ни́хъ и҆ вери̑ги твоѧ̑ стрѣ̑лы палѧ́щыѧ ме́щꙋтъ.

Ра́дꙋйсѧ, ꙗ҆́кѡ бѣ̑сныѧ во ѡ҆би́тель твою̀ то́чїю нꙋ́ждею привлача́еми быва́ютъ: ра́дꙋйсѧ, ꙗ҆́кѡ ѻ҆́нїи здра́ви и҆ смы́слѧщїи тꙋ́ю ѡ҆ставлѧ́ютъ.

Ра́дꙋйсѧ, ꙗ҆́кѡ де́мѡни здѣ̀ и҆ не хотѧ́ще себѐ ѿкрыва́ютъ: ра́дꙋйсѧ, ꙗ҆́кѡ тобо́ю гони́ми, и҆з̾ ѡ҆держи́мыхъ и҆́ми ско́ро ᲂу҆бѣга́ютъ.

Ра́дꙋйсѧ, рѣко̀ и҆сцѣле́нїй быстроте́чнаѧ: ра́дꙋйсѧ, стра́же ѡ҆би́тели вѣ́чнаѧ.

Ра́дꙋйсѧ, нїки́то прпⷣбне, сто́лпниче и҆ чꙋдотво́рче.

Конда́къ і҃

Спастѝ хотѧ̀ дꙋ́шꙋ твою̀, бг҃омꙋ́дре ѻ҆́ч҃е, въ кро́тости и҆ смиренномꙋ́дрїи хрⷭ҇то́вѣ вы́нꙋ поꙋча́лсѧ и҆ ди́внѡ преꙋспѣ́лъ є҆сѝ. тѣ́мже и҆ рабѡ́мъ твои̑мъ, хотѧ́щымъ нꙋ́жднѡ и҆з̾ѧ́ти дꙋ́шꙋ твою̀, ничто́же прере́клъ, нижѐ возопи́лъ є҆сѝ: но, ꙗ҆́кѡ а҆́гнецъ неѕло́бивый, главꙋ̀ подклони́въ, сме́рть ѿ тѣ́хъ прїѧ́лъ є҆сѝ, поѧ̀ бг҃ꙋ: А҆ллилꙋ́їа.

І҆́косъ і҃

Стѣна̀ є҆сѝ всѣ̑мъ, воспѣва́ющымъ тѧ̀ и҆ притека́ющымъ съ вѣ́рою къ застꙋпле́нїю твоемꙋ̀, нїки́то сто́лпниче. тѣ́мже и҆ на́мъ, къ тебѣ̀ прибѣга́ющымъ, бꙋ́ди сто́лпъ непоколеби́мь, ѿ всѧ́кихъ на́съ бѣ́дъ и҆ напа́стей вы́нꙋ застѣнѧ́ѧ и҆ ѡ҆гражда́ѧ, за є҆́же и҆ пое́мъ тебѣ̀ такѡва́ѧ:

Ра́дꙋйсѧ, приста́нище ѡ҆бꙋрева́емыхъ: ра́дꙋйсѧ, по́моще ѡ҆ѕлоблѧ́емыхъ.

Ра́дꙋйсѧ, ско́рбныхъ ᲂу҆тѣ́шителю: ра́дꙋйсѧ, немощны́хъ ᲂу҆крѣпи́телю.

Ра́дꙋйсѧ, грѣ́шнымъ бг҃а ᲂу҆млⷭ҇тивлѧ́ѧй: ра́дꙋйсѧ, бл҃ги́хъ въ добрѣ̀ ᲂу҆твержда́ѧй.

Ра́дꙋйсѧ, ка́ющихсѧ свои́мъ приме́ромъ ѡ҆бодрѧ́ѧй: ра́дꙋйсѧ, ѡ҆ сп҃се́нїи подвиза́ющымсѧ спобора́ѧй.

Ра́дꙋйсѧ, мѧтꙋ́щихсѧ по́мыслами ᲂу҆мири́телю: ра́дꙋйсѧ, вра́жїихъ навѣ́тѡвъ ѿрази́телю.

Ра́дꙋйсѧ, на́шихъ царе́й держа́во и҆ похвало̀: ра́дꙋйсѧ, гра́да переѧсла́влѧ ᲂу҆твержде́нїе и҆ красото̀.

Ра́дꙋйсѧ, нїки́то прпⷣбне, сто́лпниче и҆ чꙋдотво́рче.

Конда́къ а҃і

Пѣ́нїе бл҃года́рственное гдⷭ҇ꙋ прино́сѧтъ всѝ, прїе́млющїи, ви́дѧщїи и҆ слы́шащїи многочи́слєннаѧ чꙋдеса̀, ѿ тѧ́жкихъ вери́гъ и҆ гро́ба твоегѡ̀ быва̑ющаѧ си́лою бж҃їею, ю҆́же ты̀ вы́нꙋ на нб҃сѣ́хъ прославлѧ́еши, поѧ̀ бг҃ꙋ: А҆ллилꙋ́їа.

І҆́косъ а҃і

Свѣтоза́рное свѣти́ло, на тве́рди цр҃ко́внѣй возсїѧ́вшее, прпⷣбне ѻ҆́ч҃е нїки́то, показа́ша тѧ̀ трѝ огневи̑дныѧ столпы̑, ꙗ҆́вльшыѧсѧ над̾ пове́рженными ѿ ᲂу҆бі́йцъ твои́хъ, и҆ ꙗ҆́кѡ дре́во, въ вода́хъ во́лжскихъ пла́вавшими твои́ми вери́гами, ꙗ҆̀же и҆ положи́ти здѣ̀ на гро́бѣ твое́мъ, ꙗ҆́кѡ по́честь трꙋдѡ́въ твои́хъ, въ нощнѣ́мъ видѣ̑нїи повелѣ́лъ є҆сѝ. чесѡ̀ ра́ди твоѐ водворе́нїе во свѣ́тлостехъ ст҃ы́хъ бы́ти ᲂу҆разꙋмѣ́вше, тѧ̀ воспѣва́емъ:

Ра́дꙋйсѧ, жи́телю бжⷭ҇твеннагѡ селе́нїѧ: ра́дꙋйсѧ, дости́гшїй вѣ́чнагѡ ᲂу҆покое́нїѧ.

Ра́дꙋйсѧ, бла̑гъ неизрече́нныхъ наслажда́ѧйсѧ: ра́дꙋйсѧ, лицезрѣ́нїѧ бж҃їѧ насыща́ѧйсѧ.

Ра́дꙋйсѧ, со а҆́гг҃лы при́снѡ ликꙋ́ющїй: ра́дꙋйсѧ, трист҃ꙋ́ю пѣ́снь немо́лчнѡ пою́щїй.

Ра́дꙋйсѧ, съ прпⷣбными ᲂу҆бл҃жа́емый: ра́дꙋйсѧ, съ мч҃никами ᲂу҆вѣнчава́емый.

Ра́дꙋйсѧ, ра́достїю вѣ́чною преисполнѧ́емый: ра́дꙋйсѧ, любо́вїю бжⷭ҇твенною преꙋслажда́емый.

Ра́дꙋйсѧ, ꙗ҆́кѡ тобо́ю вы́шнїй на нб҃сѝ и҆ на землѝ сла́витсѧ: ра́дꙋйсѧ, ꙗ҆́кѡ и҆ ты̀ сегѡ̀ ра́ди вы́шнимъ на нб҃сѝ и҆ на землѝ просла́вилсѧ є҆сѝ.

Ра́дꙋйсѧ, нїки́то прпⷣбне, сто́лпниче и҆ чꙋдотво́рче.

Конда́къ в҃і

Бл҃года́ть чꙋде́съ твои́хъ, прпⷣбне ѻ҆́ч҃е нїки́то, въ се́рдцѣ первост҃и́телѧ фѡ́тїа ве́лїе ко ѿ̾иска́нїю многоцѣле́бныхъ моще́й твои́хъ жела́нїе возжжѐ. ты́ же, бг҃омꙋ́дре, а҆́ще и҆ попꙋсти́лъ є҆сѝ ѿкопа́ти и҆ ви́дѣти нетлѣ́нное и҆ чꙋдесы̑ благоꙋха́ющее тѣ́ло твоѐ: ѻ҆ба́че ꙗ҆́кѡже и҆ пре́жде человѣ́ческїѧ сла́вы ᲂу҆бѣга́вшїй, всѣ́хъ и҆з̾ хра́ма, а҆́ки бꙋ́рею, и҆зри́нꙋвъ, па́ки себє̀ въ зе́млю скры́лъ є҆сѝ. чесѡ̀ ра́ди ди́вномꙋ во ст҃ы́хъ свои́хъ бг҃ꙋ і҆а́кѡвлю воспѣва́емъ: А҆ллилꙋ́їа.

І҆́косъ в҃і

Пою́ще пресла́внѡ дѣ́йствꙋющагѡ тобо́ю чꙋдеса̀ цр҃ѧ̀ нбⷭ҇нагѡ, тѧ̀, ѻ҆́ч҃е достосла́вне, восхвалѧ́емъ, а҆́ще и҆ недосто́йными ᲂу҆ста́ми, ѻ҆ба́че ᲂу҆се́рднѡ ᲂу҆бл҃жа́ѧ тѧ̀ си́це:

Ра́дꙋйсѧ, честно́е прест҃ы́ѧ трⷪ҇цы носи́ло и҆ похвале́нїе: ра́дꙋйсѧ, ст҃ы́ни дх҃а чи́стое и҆ непоро́чное селе́нїе.

Ра́дꙋйсѧ, чꙋде́съ пꙋчи́но, бг҃омъ и҆злїѧ́ннаѧ: ра́дꙋйсѧ, мѷрова́рнице, на всѧ̑ недꙋ̑ги врачева́нїѧми преиз̾ѻби́льнаѧ.

Ра́дꙋйсѧ, ѡ҆́бразе а҆́гнцемъ и҆ па́стырємъ: ра́дꙋйсѧ, преꙋкраше́нный всѧ́кимъ бжⷭ҇твеннымъ дарова́нїемъ.

Ра́дꙋйсѧ, пра́вило вѣ́ры и҆ ѡ҆́бразе кро́тости дꙋхо́вныѧ: ра́дꙋйсѧ, зри́телю красоты̀ бжⷭ҇твенныѧ неизрече́нныѧ.

Ра́дꙋйсѧ, мѵ́ра хрⷭ҇то́ва бл҃гоꙋха́нїе: ра́дꙋйсѧ, многоцвѣ́тный крі́не ра́йскагѡ прозѧбе́нїѧ.

Ра́дꙋйсѧ, ꙗ҆́кѡ а҆́гг҃ли ѡ҆ твои́хъ и҆справле́нїихъ ра́дꙋютсѧ: ра́дꙋйсѧ, ꙗ҆́кѡ мнѡ́зи человѣ́цы по твоемꙋ̀ примѣ́рꙋ и҆ предста́тельствꙋ спаса́ютсѧ.

Ра́дꙋйсѧ, нїки́то прпⷣбне, сто́лпниче и҆ чꙋдотво́рче.

Конда́къ г҃і

Ѽ пресла́вный чꙋдотво́рче и҆ вели́кїй хрⷭ҇то́въ ᲂу҆го́дниче, а҆́вво нїки́то прпⷣбномч҃нче! ны́нѣшнее на́ше хвале́бное приноше́нїе прїе́мь, не ѡ҆ста́ви при́снѡ хода́тайствовати ѡ҆ на́съ ᲂу҆ ѻ҆ц҃а̀ нбⷭ҇нагѡ, да въ житїѝ се́мъ сѣ́тей вра́жїихъ и҆ пре́лести бѣсо́вскїѧ и҆збы́вше, воздꙋ́шныхъ мыта́рствъ и҆ гее́нны всѝ и҆збѣ́гнемъ, и҆ все́льшесѧ въ го́рнїй і҆ерⷭ҇ли́мъ, сподо́бимсѧ съ тобо́ю пѣ́ти всебл҃го́мꙋ бг҃ꙋ на́шемꙋ вѣ́чнѡ немо́лчное: А҆ллилꙋ́їа.

Повто́ръ

Сей конда́къ глаго́лется три́жды, та́же і҆́косъ а҃-й и҆ конда́къ а҃-й.

І҆́косъ а҃

А҆́гг҃лѡвъ подо́бника и҆ бѣсѡ́въ противобо́рца прови́дѧ тѧ̀ всеѧ̀ тва́ри зижди́тель словесы̀ прⷪ҇ро́ческими: и҆змы́йтесѧ и҆ чи́сти бꙋ́дите, на покаѧ́нїе ѡ҆гласи́въ тѧ̀, ꙗ҆́кѡ втора́го па́ѵла, человѣколю́бнѡ къ себѣ̀ призва̀, на́съ же наꙋчѝ ᲂу҆блажа́ти тебѐ си́це:

Ра́дꙋйсѧ, сосꙋ́де и҆збра́нный, свы́ше бг҃омъ пред̾ꙋвѣ́данный: ра́дꙋйсѧ, въ хра́мъ дх҃а всест҃а́гѡ пред̾ꙋста́вленный.

Ра́дꙋйсѧ, сподо́бивыйсѧ бжⷭ҇твеннагѡ призва́нїѧ: ра́дꙋйсѧ, ᲂу҆досто́ивыйсѧ ѿ гдⷭ҇а ѡ҆правда́нїѧ.

Ра́дꙋйсѧ, блгⷣть бж҃їю, ᲂу҆мѧгча́ющꙋю се́рдце твоѐ, полꙋчи́вый: ра́дꙋйсѧ, ѡ҆чисти́тельнагѡ покаѧ́нїѧ тѡ́ки сле́зъ и҆сточи́вый.

Ра́дꙋйсѧ, вѣ́рꙋ въ призва́вшаго тѧ̀ гдⷭ҇а несꙋмнѣ́ннꙋ воспрїѧ́вый: ра́дꙋйсѧ, всего̀ себѐ води́тельствꙋ бж҃їю преда́вый.

Ра́дꙋйсѧ, сꙋпрꙋ́жницꙋ и҆ клевре́тѡвъ твои́хъ гдⷭ҇а ра́ди ѡ҆ста́вивый: ра́дꙋйсѧ, невозвра́тное твоѐ ше́ствїе къ сниска́нїю сп҃се́нїѧ напра́вивый.

Ра́дꙋйсѧ, црⷭ҇твїѧ нбⷭ҇нагѡ стѧжа́телю: ра́дꙋйсѧ, ѡ҆ всѣ́хъ къ тебѣ̀ притека́ющихъ те́плый ко гдⷭ҇ꙋ предста́телю.

Ра́дꙋйсѧ, нїки́то прпⷣбне, сто́лпниче и҆ чꙋдотво́рче.

Конда́къ а҃

Взбра́нный чꙋдотво́рче и҆ вели́кїй хрⷭ҇то́въ ᲂу҆го́дниче! восхвалѧ́емъ тѧ̀ съ любо́вїю, ча̑да твоѧ̑, те́пла предста́телѧ къ бг҃ꙋ тебѐ стѧжа́вше. ты́ же молѝ просла́вившаго тѧ̀ гдⷭ҇а ѿ всѧ́кихъ на́мъ бѣ́дъ свободи́тисѧ, зовꙋ́щымъ:

Ра́дꙋйсѧ, нїки́то прпⷣбне, сто́лпниче и҆ чꙋдотво́рче.

Моли́твы

ѡ҆ всечестна́ѧ главо̀, прпⷣбне ѻ҆́ч҃е пребл҃же́нне, вели́кїй а҆́вво нїки́то прпⷣбномч҃нче! не забꙋ́ди ни́щихъ твои́хъ до конца̀, но помина́й на́съ всегда̀ во ст҃ы́хъ свои́хъ и҆ бл҃гопрїѧ́тныхъ мл҃твахъ къ бг҃ꙋ и҆ не забꙋ́ди присѣща́ти ча́дъ свои́хъ. молѝ за ны̀, ѻ҆́ч҃е бл҃гі́й и҆ и҆збра́нниче хрⷭ҇то́въ, ꙗ҆́кѡ и҆мѣ́ѧй дерзнове́нїе къ нбⷭ҇номꙋ цр҃ю̀, и҆ не премолчѝ за ны̀ ко гдⷭ҇ꙋ, и҆ не пре́зри на́съ, вѣ́рою и҆ любо́вїю чтꙋ́щихъ тѧ̀. помина́й на́съ, недосто́йныхъ, ᲂу҆ прⷭ҇то́ла вседержи́телева и҆ не преста́й молѧ́сѧ за на́съ ко хрⷭ҇тꙋ̀ бг҃ꙋ: тебѣ̀ бо дана̀ бы́сть бл҃года́ть моли́тисѧ за ны̀. не мни́мъ бо тѧ̀ ме́ртва сꙋ́ща, а҆́ще бо и҆ тѣ́ломъ преста́вилсѧ є҆сѝ ѿ на́съ, но и҆ по сме́рти ᲂу҆́бѡ жи́въ пребыва́еши. не ѿстꙋпа́й ѿ на́съ дꙋ́хомъ, сохранѧ́ѧ и҆ соблюда́ѧ на́съ ѿ стрѣ́лъ вра́жїихъ и҆ всѧ́кїѧ пре́лести бѣсо́вскїѧ, застꙋ́пниче и҆ мл҃твенниче на́шъ до́брый. а҆́ще бо и҆ моще́й твои́хъ ра́ка пред̾ ѻ҆чи́ма на́шима ви́дима є҆́сть всегда̀, но ст҃а́ѧ твоѧ̀ дꙋша̀ со а҆́гг҃льскими во́инствы, со безпло́тными ли́ки, съ нбⷭ҇ными си́лами ᲂу҆ прⷭ҇то́ла вседержи́телѧ бг҃а досто́йнѡ весели́тсѧ. вѣ́дꙋще ᲂу҆́бѡ тѧ̀ вои́стиннꙋ и҆ по сме́рти жи́ва сꙋ́ща, тебѣ̀ припа́даемъ, и҆ тебѣ̀ мо́лимсѧ, и҆ ми́ли сѧ дѣ́емъ, є҆́же моли́тисѧ ѡ҆ на́съ всеси́льномꙋ бг҃ꙋ ѡ҆ по́льзѣ дꙋ́шъ на́шихъ, и҆ и҆спросѝ на́мъ вре́мѧ на покаѧ́нїе и҆ невозбра́ннѡ прейтѝ ѿ землѝ на нб҃о, и҆ го́рькихъ мыта́рствъ, и҆ воздꙋ́шныхъ кнѧзе́й, и҆ вѣ́чныѧ мꙋ́ки и҆зба́витисѧ на́мъ, и҆ нбⷭ҇номꙋ црⷭ҇твїю наслѣ́дникѡмъ бы́ти со всѣ́ми пра́ведными, ѿ вѣ́ка ᲂу҆годи́вшими є҆мꙋ̀, гдⷭ҇ꙋ на́шемꙋ і҆и҃сꙋ хрⷭ҇тꙋ̀. є҆мꙋ́же подоба́етъ всѧ́каѧ сла́ва, че́сть и҆ поклоне́нїе со безнача́льнымъ є҆гѡ̀ ѻ҆ц҃є́мъ и҆ ст҃ы́мъ дх҃омъ, ны́нѣ и҆ при́снѡ и҆ во вѣ́ки вѣкѡ́въ. А҆ми́нь.