Российская Православная Церковь

по благословенію Архіерейскаго Сѵнода Россійской Православной Церкви

Православный календарь

Ака́ѳістъ

А҆ка́ѳїстъ ст҃о́мꙋ прпⷣбномꙋ мака́рїю, и҆гꙋ́менꙋ калѧ́зинскомꙋ, чꙋдотво́рцꙋ.

Прп. Макария, игум. Калязинского (обрет. мощ.) (1521) 8 июня 2026

Конда́къ а҃

Возбра́нный чꙋдотво́рче, и҆ и҆зрѧ́дный ᲂу҆го́дниче хрⷭ҇то́въ, многоцѣле́бный и҆сто́чниче и҆ мл҃твенниче ѡ҆ дꙋша́хъ на́шихъ, прпⷣбне ѻ҆́тче мака́рїе, ꙗ҆́кѡ и҆мѣ́ѧй дерзнове́нїе ко гдⷭ҇ꙋ, мл҃твами твои́ми ѿ всѧ́кихъ на́съ бѣ́дъ свободѝ, да зове́мъ тѝ:

Ра́дꙋйсѧ, мака́рїе, ско́рый помо́щниче и҆ пресла́вный чꙋдотво́рче.

І҆́косъ а҃

А҆́гг҃ла тѧ̀ земна́гѡ и҆ человѣ́ка нбⷭ҇нагѡ, прпⷣбне ѻ҆́тче мака́рїе, кі́ими пѣ̑нїи и҆ пѣ́сньми восхва́лимъ, кі́ими вѣнцы̀ ᲂу҆вѧзе́мъ трꙋдолюби́вꙋю главꙋ̀ твою̀, и҆ кі́ими словесы̀ возвели́чимъ многоболѣ́знєнныѧ по́двиги твоѧ̑; тѣ́мже бл҃гоговѣ́йнѡ притека́юще къ ра́цѣ многоцѣле́бныхъ моще́й твои́хъ, ᲂу҆се́рднѡ припа́дающе, со ᲂу҆миле́нїемъ взыва́емъ тѝ:

Ра́дꙋйсѧ, ре́вностный хрⷭ҇то́въ подража́телю: ра́дꙋйсѧ, за́повѣдей є҆гѡ̀ и҆́стинный блюсти́телю.

Ра́дꙋйсѧ, а҆́гг҃ловъ собесѣ́дниче: ра́дꙋйсѧ, прпⷣбныхъ похвала̀.

Ра́дꙋйсѧ, вѣ́рныхъ слꙋго̀ гдⷭ҇ень: ра́дꙋйсѧ, ᲂу҆се́рдный чистоты̀ и҆ воздержа́нїѧ храни́телю.

Ра́дꙋйсѧ, сто́лпе терпѣ́нїѧ: ра́дꙋйсѧ, ѡ҆́бразе неѕло́бїѧ и҆ кро́тости.

Ра́дꙋйсѧ, смиренномꙋ́дрїѧ наста́вниче: ра́дꙋйсѧ, свѣти́льниче многосвѣ́тлый.

Ра́дꙋйсѧ, непосты́дное хрⷭ҇тїа́нъ прибѣ́жище: ра́дꙋйсѧ, безме́здный врачꙋ̀ немощствꙋ́ющихъ.

Ра́дꙋйсѧ, мака́рїе, ско́рый помо́щниче и҆ пресла́вный чꙋдотво́рче.

Конда́къ в҃

Ви́дѧще бл҃горо́днїи твоѝ роди́телїе во мла́дости тѧ̀, бг҃омꙋ́дре, совершє́ннаѧ мꙋ́дрствꙋюща, гдⷭ҇ꙋ, дарова́вшемꙋ тѝ такова̑ѧ, воспѣва́хꙋ благода́рственнꙋю пѣ́снь: А҆ллилꙋ́їа.

І҆́косъ в҃

Ра́зꙋмъ неꙋкло́нный и҆мѣ́лъ є҆сѝ, прпⷣбне мака́рїе, а҆́ще и҆ ю҆́нъ бы́въ тѣ́ломъ, но ста́ръ сы́й ᲂу҆мо́мъ: всѧ̑ бо мі́ра сегѡ̀ кра̑снаѧ ѿ ю҆́ности твоеѧ̀ пренебре́гъ, дѣ̑тскаѧ и҆гра̑лища презрѣ́лъ є҆сѝ, ѱалмы̀ же и҆ пѣ̑сни дꙋхѡ́вныѧ бг҃ꙋ сп҃си́телю се́рдцемъ и҆ ᲂу҆сты̀ непреста́ннѡ воспѣва́лъ є҆сѝ, наꙋчѝ и҆ на́съ та́ѧжде мꙋ́дрствовати и҆ дѣ́ѧти, вопїю́щихъ тѝ:

Ра́дꙋйсѧ, хрⷭ҇тїа́нскїѧ мꙋ́дрости и҆́стинное зерца́ло: ра́дꙋйсѧ, ꙗ҆́кѡ бжⷭ҇твенномꙋ жела́нїю ᲂу҆́мъ тво́й ѿ ю҆́ности впери́лъ є҆сѝ.

Ра́дꙋйсѧ, ꙗ҆́кѡ во мла́дости твое́й вре́мєннаѧ и҆ земна̑ѧ ᲂу҆ме́ты бы́ти вмѣни́лъ є҆сѝ: ра́дꙋйсѧ, ꙗ҆́кѡ є҆ди̑наѧ нбⷭ҇наѧ ѿ сосцꙋ̀ ма́тере твоеѧ̀ возлюби́лъ є҆сѝ.

Ра́дꙋйсѧ, ꙗ҆́кѡ ѿ ю҆́ности ꙗ҆ре́мъ гдⷭ҇ень на ра́мена своѧ̑ возложи́лъ є҆сѝ: ра́дꙋйсѧ, ꙗ҆́кѡ пло́ть порабо́тилъ є҆сѝ дꙋ́хꙋ.

Ра́дꙋйсѧ, ꙗ҆́кѡ проти́вꙋ ко́знемъ дїа́вѡльскимъ, є҆щѐ ю҆́нъ сы́й, ста́ти не ᲂу҆страши́лсѧ є҆сѝ: ра́дꙋйсѧ, ꙗ҆́кѡ ѿ младе́нчества чтє́нїѧ бжⷭ҇твенныхъ писа́нїй всѣ́мъ се́рдцемъ возлюби́лъ є҆сѝ.

Ра́дꙋйсѧ, ꙗ҆́кѡ де́нь и҆ но́щь въ чте́нїи и҆ пѣ́нїи бг҃одꙋхнове́нныхъ ѱалмѡ́въ пребыва́лъ є҆сѝ: ра́дꙋйсѧ, ꙗ҆́кѡ неплѣне́нный страстьмѝ ᲂу҆́мъ тво́й сло́вомъ бж҃їимъ просвѣти́лъ є҆сѝ.

Ра́дꙋйсѧ, ꙗ҆́кѡ хрⷭ҇та̀ є҆щѐ въ неви́ннѣй дꙋшѝ твое́й всели́лъ є҆сѝ: ра́дꙋйсѧ, ꙗ҆́кѡ непоро́чнымъ се́рдцемъ возжелѣ́лъ мїрска́го мѧте́жа ᲂу҆клони́тисѧ, и҆ въ пꙋсты́ню всели́тисѧ.

Ра́дꙋйсѧ, мака́рїе, ско́рый помо́щниче и҆ пресла́вный чꙋдотво́рче.

Конда́къ г҃

Си́лою дх҃а ст҃а́гѡ свы́ше ѡ҆блече́нъ бы́въ, и҆ ю҆́ности твое́й безси́льна врага̀ сотвори́лъ є҆сѝ: ᲂу҆крѣпѝ, бг҃обл҃же́нне мака́рїе, мл҃твами твои́ми и҆ на́съ, во всѣ́хъ бл҃ги́хъ и҆знемога́ющихъ, да сподо́бимсѧ съ тобо́ю воспѣва́ти вы́нꙋ пѣ́снь бг҃ꙋ: А҆ллилꙋ́їа.

І҆́косъ г҃

И҆мѣ́ѧ бога́тство чистоты̀ дꙋше́вныѧ, и҆ высотꙋ̀ смире́нїѧ, роди́тельское бога́тство и҆ рабѡ́въ послꙋже́нїе нивочто́же вмѣни́лъ є҆сѝ, и҆ по разрѣше́нїи плотска́гѡ соꙋ́за, и҆́мже на ма́лое вре́мѧ свѧ́занъ бы́лъ є҆сѝ, ꙗ҆́кѡ є҆ле́нь жа́ждꙋщїй на и҆сто́чники водны̑ѧ, ᲂу҆стреми́лсѧ є҆сѝ, всебл҃же́нне, въ пꙋсты́ню: въ не́йже твоѐ высокоро́дство на смиренномꙋ́дрїе, бога́тство на ᲂу҆бо́жество премѣни́лъ є҆сѝ, совлекі́йсѧ ѻ҆де́жды многосвѣ́тлыѧ и҆ ѡ҆блекі́йсѧ въ рꙋ́бище. тѣ́мже ᲂу҆дивлѧ́ющесѧ таково́мꙋ твоемꙋ̀ смиренномꙋ́дрїю, си́це ᲂу҆бл҃жа́емъ тѧ̀, вопїю́ще:

Ра́дꙋйсѧ, всѧ́кꙋ го́рдость мі́ра презрѣ́вый: ра́дꙋйсѧ, ꙗ҆́кѡ ѡ҆ста́вивъ вре́мєннаѧ, взыска́лъ є҆сѝ вѣ́чнаѧ.

Ра́дꙋйсѧ, ꙗ҆́кѡ до́мъ велелѣ́пный и҆ черто́ги ᲂу҆кра́шєны возненави́дѣлъ є҆сѝ: ра́дꙋйсѧ, ꙗ҆́кѡ возлюби́лъ є҆сѝ ᲂу҆бо́гꙋю хи́жинꙋ па́че черто́гѡвъ преизѧ́щныхъ.

Ра́дꙋйсѧ, ꙗ҆́кѡ рꙋ́бищи ᲂу҆краси́лсѧ є҆сѝ па́че ѻ҆дє́жды златотка́нныѧ: ра́дꙋйсѧ, ꙗ҆́кѡ вмѣ́стѡ бра́шенъ сластопита́тельныхъ, возлюби́лъ є҆сѝ и҆знꙋрѧ́ти пло́ть твою̀ посто́мъ и҆ мно́гимъ воздержа́нїемъ.

Ра́дꙋйсѧ, ꙗ҆́кѡ не пожела́лъ є҆сѝ ѿ рабѡ́въ послꙋже́нїѧ, но па́че са́мъ послꙋжи́ти всѣ̑мъ и҆зво́лилъ є҆сѝ: ра́дꙋйсѧ, ꙗ҆́кѡ возлюби́лъ є҆сѝ па́че ѻ҆дра̀ мѧ́гкагѡ на землѝ поверже́нїе.

Ра́дꙋйсѧ, ꙗ҆́кѡ вѣ́рою пра́вою, а҆́ки щито́мъ, защити́лсѧ є҆сѝ ѿ всѣ́хъ и҆скꙋше́нїй вра́жїихъ: ра́дꙋйсѧ, ꙗ҆́кѡ неистощи́мымъ терпѣ́нїемъ твои́мъ, па́че копїѧ̀ ѻ҆стрѣ́йшимъ, врага̀ на́шегѡ сп҃се́нїѧ смерте́льнѡ ᲂу҆ѧзви́лъ є҆сѝ.

Ра́дꙋйсѧ, ꙗ҆́кѡ неꙋсы́пными твои́ми мл҃твами, запина́телѧ на пꙋтѝ бл҃гоче́стїѧ безси́льна сотвори́лъ є҆сѝ: ра́дꙋйсѧ, ꙗ҆́кѡ сто́лпе и҆ ᲂу҆твержде́нїе добродѣ́тели на́мъ ꙗ҆ви́лсѧ є҆сѝ.

Ра́дꙋйсѧ, мака́рїе, ско́рый помо́щниче и҆ пресла́вный чꙋдотво́рче.

Конда́къ д҃

Бꙋ́рю сꙋмни́тельныхъ помышле́нїй ᲂу҆кроща́ѧ и҆ прелага́ѧ въ тишинꙋ̀ бжⷭ҇твенными ᲂу҆чє́нїи, и҆́миже ᲂу҆вѣрѧ́ѧ себѐ, ꙗ҆́же ѡ҆ црⷭ҇твїи нбⷭ҇нѣмъ, пребл҃же́нне мака́рїе, непреста́ннѡ воспѣва́лъ є҆сѝ пѣ́снь бг҃ꙋ: А҆ллилꙋ́їа.

І҆́косъ д҃

Слы́шавъ прпⷣбне мака́рїе въ є҆ѵⷢ҇лїи гла́съ сп҃си́телѧ взыва́ющъ: и҆́же хо́щетъ по мнѣ̀ и҆тѝ, ѿве́ржетсѧ себє̀, и҆ во́зметъ крⷭ҇тъ сво́й, и҆ по мнѣ̀ грѧде́тъ, ѿве́рглсѧ є҆сѝ себє̀, и҆ взе́мъ на ра́ма крⷭ҇тъ тво́й, ходи́лъ є҆сѝ по стопа́мъ хрⷭ҇то́вымъ невозвра́тнѡ. тѣ́мже мы̀, недосто́йнїи, восписꙋ́емъ тѝ такова̑ѧ, глаго́люще:

Ра́дꙋйсѧ, є҆ѵⷢ҇льскихъ велѣ́нїй вѣ́рный блюсти́телю: ра́дꙋйсѧ, хрⷭ҇то́выхъ слове́съ тве́рдый храни́телю.

Ра́дꙋйсѧ, крⷭ҇та̀ своегѡ̀ ᲂу҆се́рдный носи́телю: ра́дꙋйсѧ, и҆́го хрⷭ҇то́во и҆ бре́мѧ є҆гѡ̀ бл҃годꙋ́шнѡ под̾е́мый.

Ра́дꙋйсѧ, ꙗ҆́кѡ не ѡ҆брати́выйсѧ вспѧ́ть въ ше́ствїи къ го́рнемꙋ і҆ерⷭ҇ли́мꙋ: ра́дꙋйсѧ, неизсѧка́емый сосꙋ́де блгⷣти хрⷭ҇то́вы.

Ра́дꙋйсѧ, чи́стое прїѧ́телище дх҃а ст҃а́гѡ: ра́дꙋйсѧ, ꙗ҆́кѡ всѧ̑ стра̑сти плотскі́ѧ воздержа́нїемъ мно́гимъ ᲂу҆мертви́лъ є҆сѝ.

Ра́дꙋйсѧ, вертогра́да хрⷭ҇то́ва всеꙋсе́рдный насади́телю: ра́дꙋйсѧ, ꙗ҆́кѡ ᲂу҆́мъ тво́й къ безстра́стїю возвы́силъ є҆сѝ.

Ра́дꙋйсѧ, всѧ̑ блага̑ѧ землѝ, нбⷭ҇нагѡ ра́ди црⷭ҇твїѧ, за ᲂу҆мє́ты вмѣни́вый: ра́дꙋйсѧ, равноа́гг҃льное житїѐ до конца̀ возлюби́вый.

Ра́дꙋйсѧ, мака́рїе, ско́рый помо́щниче и҆ пресла́вный чꙋдотво́рче.

Конда́къ є҃

Бг҃омъ направлѧ́емь, всебл҃же́нне ѻ҆́тче, безмо́лвное въ пꙋсты́ни житїѐ ѡ҆брѣ́лъ є҆сѝ, и҆ ѱало́мски воспѣ́лъ є҆сѝ: сѐ поко́й мо́й въ вѣ́къ вѣ́ка, здѣ̀ вселю́сѧ: въ не́йже и҆ подвиза́лсѧ є҆сѝ до́бльственнѡ въ постѣ̀ и҆ бдѣ́нїи, и҆ ѿ ѻ҆́чїю мнѡ́ги слє́зы и҆злива́ѧ, непреста́ннѡ воспѣва́лъ є҆сѝ бг҃ꙋ: А҆ллилꙋ́їа.

І҆́косъ є҃

Ви́дѣвъ сꙋ́етныхъ и҆мѣ́нїй рачи́тель неꙋкло́нное твоѐ въ пꙋсты́ни пребыва́нїе, дїа́вѡльскимъ наꙋще́нїемъ возжига́емь, восхотѣ̀ ᲂу҆мертви́ти тѧ̀: но ра́ди пости́гшїѧ є҆гѡ̀ сме́ртныѧ болѣ́зни прише́лъ въ чꙋ́вство, падѐ пред̾ нога́ма твои́ма, просѧ̀ ᲂу҆ тебѣ̀ проще́нїѧ и҆ въ пꙋсты́ни съ тобо́ю пребыва́нїѧ. ты̀ же ꙗ҆́кѡ па́стырь до́брый и҆ неѕло́бивый, прїѧ́лъ є҆сѝ є҆го̀ съ ра́достїю, ꙗ҆́кѡ ѻ҆вча̀ поги́бшее, проща́ѧ є҆мꙋ̀ всѧ̑ и҆ причита́ѧ є҆го̀ къ и҆збра́нномꙋ твоемꙋ̀ ста́дꙋ. таково́е ᲂу҆́бѡ твоѐ неѕло́бїе, и҆ ѡ҆ сп҃се́нїи заблꙋ́ждшихъ мно́гое попече́нїе слы́шавше, по до́лгꙋ воспѣва́емъ тѝ си́це:

Ра́дꙋйсѧ, неѕло́бїѧ при́сный храни́телю: ра́дꙋйсѧ, смиренномꙋ́дрїѧ и҆́скреннїй люби́телю.

Ра́дꙋйсѧ, ѡ҆́бразе кро́тости и҆ терпѣ́нїѧ: ра́дꙋйсѧ, наста́вниче цѣломꙋ́дрїѧ.

Ра́дꙋйсѧ, свѣтоно́сный сто́лпе, просвѣща́ѧй сꙋ́щїѧ во тьмѣ̀: ра́дꙋйсѧ, ѡ҆би́тели и҆́нокѡвъ вели́кое ᲂу҆краше́нїе.

Ра́дꙋйсѧ, ꙗ҆́кѡ широ́кїй пꙋ́ть, ведꙋ́щїй въ па́гꙋбꙋ, ненави́дѣти поꙋча́лъ є҆сѝ: ра́дꙋйсѧ, ꙗ҆́кѡ тѣ́сною и҆ приско́рбною стезе́ю ше́ствовати бл҃гоискꙋ́снѡ внꙋша́лъ є҆сѝ.

Ра́дꙋйсѧ, дре́во бл҃гопло́дное, при и҆схо́дищахъ во́дъ бжⷭ҇твенныѧ блгⷣти насажде́нное, и҆ мнѡ́ги пита́ющее: ра́дꙋйсѧ, дре́во бл҃госѣнноли́ственное, мнѡ́ги ѿ зно́ѧ прохлажда́ющее.

Ра́дꙋйсѧ, и҆збра́ннагѡ твоегѡ̀ ста́да стра́жꙋ неꙋсы́пный: ра́дꙋйсѧ, бл҃гохо́тныхъ подража́телей твои́хъ житїе́мъ и҆ ᲂу҆че́нїемъ на нб҃о рꙋководи́телю и҆ сопꙋ́тствователю.

Ра́дꙋйсѧ, мака́рїе, ско́рый помо́щниче и҆ пресла́вный чꙋдотво́рче.

Конда́къ ѕ҃

Проповѣ́дницы бы́ша твоегѡ̀ неѕло́бїѧ и҆ прозорли́вости та́тїе, є҆гда̀ похи́щєннаѧ и҆́ми живѡ́тнаѧ къ тебѣ̀ возврати́ша, и҆ вмѣ́стѡ наказа́нїѧ прїѧ́ша ѿ тебѣ̀ ѻ҆те́ческое наставле́нїе, ви́дѣвше же тако́е твоѐ неѕло́бїе, со мно́гимъ ᲂу҆дивле́нїемъ ѿше́дше, воспѣ́ша пѣ́снь бг҃ꙋ: А҆ллилꙋ́їа.

І҆́косъ ѕ҃

Возсїѧ́лъ є҆сѝ въ пꙋсты́ни, ꙗ҆́кѡ зарѧ̀ пресвѣ́тлаѧ, прпⷣбне ѻ҆́ч҃е, просвѣща́ѧ и҆ наставлѧ́ѧ на пꙋ́ть сп҃се́нїѧ всѧ̑ къ тебѣ̀ притека́ющыѧ, сегѡ̀ ра́ди со мнѡ́гимъ ᲂу҆дивле́нїемъ взыва́емъ тѝ си́це:

Ра́дꙋйсѧ, зарѐ пресвѣ́тлаѧ, ѿ пꙋсты́ни восходѧ́щаѧ и҆ дꙋ́ши вѣ́рныхъ ѡ҆зарѧ́ющаѧ: ра́дꙋйсѧ, заблꙋ́ждшихъ и҆́стинный наста́вниче.

Ра́дꙋйсѧ, цѣломꙋ́дрїѧ зерца́ло: ра́дꙋйсѧ, и҆́стинный ѡ҆́бразе бл҃гоче́стїѧ.

Ра́дꙋйсѧ, а҆лтарѧ̀ гдⷭ҇нѧ бл҃гоговѣ́йный слꙋжи́телю: ра́дꙋйсѧ, и҆́ноческагѡ равноа́гг҃льнагѡ житїѧ̀ ревни́телю.

Ра́дꙋйсѧ, безмо́лвїѧ дре́внихъ бг҃оно́сныхъ ѻ҆тє́цъ подража́телю: ра́дꙋйсѧ, сто́лпе ѻ҆́гненный, наставлѧ́ѧй на пꙋ́ть сп҃се́нїѧ.

Ра́дꙋйсѧ, со́лнце свѣтоза́рное, ꙗ҆́кѡ свои́ми лꙋча́ми дꙋ́ши на̑ша, ѿ мра́за грѣхо́внагѡ погиба́ющыѧ, согрѣва́еши: ра́дꙋйсѧ, лꙋна̀ пресвѣ́тлаѧ, ꙗ҆́кѡ но́щь на́шегѡ неразꙋ́мїѧ прогонѧ́еши.

Ра́дꙋйсѧ, бжⷭ҇твеннагѡ ѡ҆ лю́дѧхъ промышле́нїѧ всеꙋсе́рдный слꙋже́бниче: ра́дꙋйсѧ, вѣ́чныѧ на́шеѧ ра́дости те́плый хода́таю.

Ра́дꙋйсѧ, мака́рїе, ско́рый помо́щниче и҆ пресла́вный чꙋдотво́рче.

Конда́къ з҃

Хотѧ̀ разсла́бленный заха́рїа соверше́нное полꙋчи́ти себѣ̀ здра́вїе, молѝ принестѝ себѐ и҆ положи́ти пред̾ нога́ма твои́ма, прпⷣбне ѻ҆́ч҃е, да твои́ми мл҃твами полꙋ́читъ и҆сцѣле́нїе. ты́ же ꙗ҆́кѡ вра́чъ премꙋ́дрый, ᲂу҆врачева́лъ недꙋ́ги є҆гѡ̀ тѣлє́сныѧ вкꙋ́пѣ же и҆ дꙋшє́вныѧ, воспѣ́лъ є҆сѝ гдⷭ҇ꙋ бл҃года́рственнꙋю пѣ́снь: А҆ллилꙋ́їа.

І҆́косъ з҃

Ди́вное и҆мѣ́лъ є҆сѝ житїѐ, и҆ ди́вныѧ чꙋдеса̀ сотвори́лъ є҆сѝ на землѝ, прпⷣбне ѻ҆́ч҃е мака́рїе, є҆гда̀ ᲂу҆зрѣ́въ є҆ди́наго ю҆́ношꙋ, мно́гое вре́мѧ бѣ́сомъ мꙋ́чима, ᲂу҆мили́всѧ прослези́лсѧ є҆сѝ, и҆ воздохнꙋ́въ сотвори́лъ є҆сѝ мл҃твꙋ къ бг҃ꙋ: а҆́бїе же и҆зы́де бѣ́съ и҆з̾ стра́ждꙋщагѡ, и҆ бы́сть здра́въ. мы̀ же такова́ѧ слы́шавше, съ ра́достїю взыва́емъ тѝ си́це:

Ра́дꙋйсѧ, лꙋка́выхъ дꙋхѡ́въ крѣ́пкїй побѣди́телю: ра́дꙋйсѧ, дꙋшепа́гꙋбныхъ волкѡ́въ прогони́телю.

Ра́дꙋйсѧ, во́ине хрⷭ҇то́въ непобѣди́мый: ра́дꙋйсѧ, ра́бе бж҃їй, бл҃гі́й и҆ вѣ́рный: ра́дꙋйсѧ, врачꙋ̀ ско́рый съ вѣ́рою тебѣ̀ призыва́ющихъ.

Ра́дꙋйсѧ, лозо̀ бл҃гоплодови́таѧ: ра́дꙋйсѧ, ꙗ҆́кѡ твои́мъ посо́бїемъ сокрꙋша́ютсѧ ко́зни вра̑жїѧ.

Ра́дꙋйсѧ, совои́телю премꙋ́дрый, ра́тꙋющымъ проти́вꙋ си́лъ а҆́довыхъ: ра́дꙋйсѧ, неѡскꙋ́дный пото́къ чꙋдесє́мъ.

Ра́дꙋйсѧ, ѻ҆би́льный бл҃года́тїю и҆сто́чниче и҆сцѣле́нїй: ра́дꙋйсѧ, трисл҃нечнагѡ свѣ́та пресвѣ́тлаѧ лꙋчѐ.

Ра́дꙋйсѧ, человѣ́че бж҃їй, прпⷣбїемъ и҆ и҆́стиною, а҆́ки по́ѧсомъ златы́мъ, препоѧ́санный.

Ра́дꙋйсѧ, мака́рїе, ско́рый помо́щниче и҆ пресла́вный чꙋдотво́рче.

Конда́къ и҃

Ди́вное и҆ неизрече́нное чꙋ́до блгⷣти нбⷭ҇ныѧ, ꙗ҆влѧ́етсѧ ны́нѣ во ѻ҆́чїю всѣ́хъ вѣ́рныхъ: долготерпѣли́вый бо и҆ многомлⷭ҇тивый гдⷭ҇ь не прогнѣ́валсѧ на ны̀ до конца̀ за беззакѡ́нїѧ на́ша, но, помѧнꙋ́въ щедрѡ́ты своѧ̑, дарова̀ на́мъ тебѐ, досточꙋ́дне ѻ҆́ч҃е, застꙋ́пника и҆зрѧ́дна, и҆ та́кѡ вознесѐ ро́гъ сп҃се́нїѧ на́шегѡ, да вы́нꙋ пое́мъ є҆мꙋ̀: А҆ллилꙋ́їа.

І҆́косъ и҃

Ве́сь є҆сѝ въ вы́шнихъ, но и҆ ни́жнихъ не ѡ҆ставлѧ́еши, прпⷣбне ѻ҆́ч҃е мака́рїе, при́снѡ со хрⷭ҇то́мъ ца́рствꙋеши, и҆ ѡ҆ на́съ, грѣ́шныхъ, мл҃твы къ немꙋ̀ возно́сиши: не то́чїю бо припа́дающихъ къ цѣльбонѡ́снымъ моще́мъ твои́мъ, но и҆ дале́че ѿстоѧ́щихъ, призыва́ющихъ же всечтⷭ҇но́е и҆́мѧ твоѐ, предста́тельствомъ твои́мъ соблюда́еши ѿ всѧ́кагѡ ѕла̀. тѣ́мже во ᲂу҆миле́нїи зове́мъ тѝ:

Ра́дꙋйсѧ, прибѣ́жище на́ше во всѣ́хъ ско́рбехъ: ра́дꙋйсѧ, ско́рый помо́щниче всѣ́хъ въ бѣда́хъ сꙋ́щихъ.

Ра́дꙋйсѧ, цѣли́телю болѣ́зней дꙋше́вныхъ вкꙋ́пѣ и҆ тѣле́сныхъ: ра́дꙋйсѧ, на неви̑димыѧ врагѝ на́ша си́льный побо́рниче.

Ра́дꙋйсѧ, посѣти́телю бл҃госе́рдый въ не́мощи лежа́щихъ: ра́дꙋйсѧ, ᲂу҆тѣ́шителю въ печа́ли сꙋ́щихъ.

Ра́дꙋйсѧ, ꙗ҆́кѡ тобо́ю престае́тъ рыда́нїе: ра́дꙋйсѧ, ꙗ҆́кѡ тобо́ю подае́тсѧ ра́дованїе.

Ра́дꙋйсѧ, ꙗ҆́кѡ хрⷭ҇тꙋ̀ до́бльственнѡ послѣ́довалъ є҆сѝ: ра́дꙋйсѧ, ꙗ҆́кѡ сладча́йшемꙋ і҆и҃сꙋ до конца̀ послꙋжи́лъ є҆сѝ.

Ра́дꙋйсѧ, ꙗ҆́кѡ наслажда́ешисѧ лицезрѣ́нїѧ бж҃їѧ: ра́дꙋйсѧ, ꙗ҆́кѡ сподо́билсѧ є҆сѝ зрѣ́ти невече́рнїй де́нь црⷭ҇твїѧ є҆гѡ̀.

Ра́дꙋйсѧ, мака́рїе, ско́рый помо́щниче и҆ пресла́вный чꙋдотво́рче.

Конда́къ ѳ҃

Всѧ́кїѧ скѡ́рби претерпѣ́лъ є҆сѝ, и҆ мнѡ́ги трꙋды̀ и҆ по́двиги до́бльственнѡ соверши́лъ є҆сѝ, ше́ствꙋѧ по пꙋтѝ сп҃се́нїѧ до масти́тыѧ ста́рости, ѡ҆блече́нъ во всеѡрꙋ́жїе бж҃їе, во пло́ти а҆́ки безпло́тенъ, ᲂу҆мерщвлѧ́ѧ стра́сти и҆ сокрꙋша́ѧ навѣ́ты мїродержи́телѧ тьмы̀ вѣ́ка сегѡ̀, тѣ́мже къ нбⷭ҇нымъ сопричи́сленъ си́ламъ, кꙋ́пнѡ съ ни́ми воспѣва́еши бг҃ꙋ: А҆ллилꙋ́їа.

І҆́косъ ѳ҃

Вѣті̑ѧ многовѣща̑нныѧ недоꙋмѣ́ютъ досто́йнѡ восхвали́ти тѧ̀, бг҃омꙋ́дре мака́рїе: кто̀ бо дово́ленъ разꙋмѣ́ти всѧ̑ борє́нїѧ твоѧ̑ съ мїродержи́тели тьмы̀ вѣ́ка сегѡ̀; и҆лѝ кто̀ и҆зочте́тъ трꙋды̀, болѣ̑зни и҆ по́двиги твоѧ̑, въ ни́хъ же пꙋстыннолю́бное житїѐ соверша́лъ є҆сѝ; ѻ҆ба́че мы̀, любо́вїю твое́ю побѣжда́еми, бл҃года́рнѡ тебѣ̀ зове́мъ:

Ра́дꙋйсѧ, зако́на бж҃їѧ и҆сполни́телю всеꙋсе́рдный: ра́дꙋйсѧ, чистото́ю и҆ цѣломꙋ́дрїемъ, многоцѣ́ннагѡ би́сера честнѣ́йшїй.

Ра́дꙋйсѧ, въ терпѣ́нїи и҆ борє́нїи проти́вꙋ пло́ти, а҆дама́нта твердѣ́йшїй: ра́дꙋйсѧ, смиренномꙋ́дрїемъ и҆ кро́тостїю па́че сла́вныхъ землѝ просла́вленный.

Ра́дꙋйсѧ, во пло́ти а҆́ки безпло́тенъ на землѝ пожи́вый: ра́дꙋйсѧ, живы́ми и҆ сп҃си́тельными слеза́ми ѻ҆́гнь по́хоти ᲂу҆гаси́вый.

Ра́дꙋйсѧ, борю́щымсѧ со страстьмѝ и҆ похотьмѝ помо́щниче бл҃гоꙋспѣ́шный: ра́дꙋйсѧ, въ трꙋдѣ́хъ, бдѣ́нїи и҆ воздержа́нїи вели́кимъ по́стникѡмъ подража́телю ре́вностнѣйшїй.

Ра́дꙋйсѧ, въ дꙋхо́внѣй мꙋ́дрости наста́вниче бл҃гоискꙋ́снѣйшїй: ра́дꙋйсѧ, подвигѡ́въ и҆́ноческихъ показа́телю рачи́тельнѣйшїй.

Ра́дꙋйсѧ, пꙋстынножи́телей красота̀: ра́дꙋйсѧ, го́рлицѣ пꙋстыннолю́бнаѧ и҆ доброви́днаѧ.

Ра́дꙋйсѧ, мака́рїе, ско́рый помо́щниче и҆ пресла́вный чꙋдотво́рче.

Конда́къ і҃

Хранѧ́й всѧ̑ кѡ́сти првⷣныхъ, ꙗ҆́кѡ ни є҆ди́нѣй ѿ ни́хъ сокрꙋши́тисѧ, гдⷭ҇ь и҆ бг҃ъ на́шъ і҆и҃съ хрⷭ҇то́съ ꙗ҆ви́лъ на́мъ твоѐ тѣ́ло нетлѣ́нное на землѝ, прпⷣбне ѻ҆́ч҃е, ꙗ҆́кѡ живоно́снꙋю кꙋпе́ль, врачꙋ́ющꙋю всѧ́кꙋ болѣ́знь и҆ всѧ́кꙋ ꙗ҆́зю въ лю́дехъ. тѣ́мже прїѧ́вше такова́го цѣле́бника и҆ мл҃твенника, бл҃года́рственнѡ вопїе́мъ є҆мꙋ̀: А҆ллилꙋ́їа.

І҆́косъ і҃

Стѣ́нꙋ тѧ̀ тве́рдꙋ и҆ мл҃твенника и҆зрѧ́дна стѧжа́въ ст҃а́ѧ ѡ҆би́тель твоѧ̀, и҆ всѝ страны̑ рѡссі́йстїи хва́лѧтсѧ застꙋпле́нїемъ твои́мъ. тѣ́мже и҆ мы̀ грѣ́шнїи, ꙗ҆́кѡ ча̑да ѻ҆тца̀ мо́лимъ: застꙋпѝ и҆ сохранѝ на́съ ѿ и҆скꙋше́нїй и҆ скорбе́й, бѣ́дъ и҆ напа́стей мл҃твами твои́ми, да взыва́емъ тѝ ра́достнѡ:

Ра́дꙋйсѧ, бл҃гово́нный крі́не ра́йскагѡ вертогра́да: ра́дꙋйсѧ, кѷпари́се, вѣ́рныхъ сердца̀ бл҃гово́нїемъ и҆сполнѧ́ѧй.

Ра́дꙋйсѧ, немощны́хъ цѣле́бниче: ра́дꙋйсѧ, же́зле, па́дающихъ подкрѣплѧ́ѧй.

Ра́дꙋйсѧ, наде́жде и҆ ѡ҆ти́шїе въ мо́ри житїѧ̀ сегѡ̀ пла́вающихъ: ра́дꙋйсѧ, тве́рдое ѡ҆гражде́нїе и҆ прибѣ́жище ᲂу҆се́рднѡ бг҃ꙋ рабо́тающихъ.

Ра́дꙋйсѧ, всѣ́хъ ᲂу҆се́рднѡ притека́ющихъ къ тебѣ̀, ѿ и҆скꙋше́нїй и҆ бѣ́дъ ско́рое и҆збавле́нїе: ра́дꙋйсѧ, всѣ́хъ ѡ҆бꙋрева́емыхъ покро́ве тве́рдый.

Ра́дꙋйсѧ, ꙗ҆́кѡ ѿ ѡ҆би́тели земны́ѧ въ ѡ҆би́тель нбⷭ҇нꙋю пресели́лсѧ є҆сѝ: ра́дꙋйсѧ, ꙗ҆́кѡ ѿ ѡ҆би́тели нбⷭ҇ныѧ въ ѡ҆би́тели земны̑ѧ бл҃готворѧ̀ нисхо́диши.

Ра́дꙋйсѧ, ꙗ҆́кѡ и҆ по ѿше́ствїи твое́мъ съ на́ми пребыва́еши: ра́дꙋйсѧ, ꙗ҆́кѡ и҆ по преставле́нїи твое́мъ, ᲂу҆мерщвлє́нныѧ грѣхмѝ дꙋ́шы на́шѧ мл҃твами твои́ми воскреша́еши.

Ра́дꙋйсѧ, мака́рїе, ско́рый помо́щниче и҆ пресла́вный чꙋдотво́рче.

Конда́къ а҃і

Пѣ̑нїѧ и҆ пѣ̑сни дꙋхѡ́вныѧ трⷪ҇це є҆диносꙋ́щнѣй, се́рдцемъ и҆ ᲂу҆сты̀ на землѝ вы́нꙋ приноси́лъ є҆сѝ, бл҃же́нне мака́рїе: тѣ́мже и҆ ны́нѣ на нб҃сѣ́хъ, съ а҆́гг҃льскими чи́нми трⷪ҇ческомꙋ предстоѧ̀ прⷭ҇то́лꙋ, непреста́ннѡ воспѣва́еши бжⷭ҇твеннꙋю пѣ́снь: А҆ллилꙋ́їа.

І҆́косъ а҃і

Свѣтопода́тельнаго свѣти́льника, просвѣща́ющаго дꙋ́шы на́шѧ, вѣ́рою ви́димъ тебѐ, пребл҃же́нне ѻ҆́ч҃е, пред̾ прⷭ҇то́ломъ бж҃їимъ стоѧ́ща, и҆ твои́мъ блиста́нїемъ ѡ҆зарѧ́еми, зове́мъ тѝ такова̑ѧ:

Ра́дꙋйсѧ, ѡ҆́блаче свѣтоза́рный, просвѣща́ѧй дꙋ́шы на́шѧ: ра́дꙋйсѧ, водо̀ сп҃си́тельнаѧ, всѣ́хъ напаѧ́ющаѧ.

Ра́дꙋйсѧ, па́стырю преди́вный: ра́дꙋйсѧ, ᲂу҆чи́телю премꙋ́дрый.

Ра́дꙋйсѧ, чистоты̀ селе́нїе: ра́дꙋйсѧ, печа́льныхъ ᲂу҆тѣше́нїе.

Ра́дꙋйсѧ, си́рыхъ пита́телю: ра́дꙋйсѧ, ѻ҆би́димыхъ предста́телю.

Ра́дꙋйсѧ, премꙋ́дрости бж҃їѧ прїѧ́телище: ра́дꙋйсѧ, неисчерпа́емый и҆сто́чниче бл҃года́ти и҆сцѣле́нїй.

Ра́дꙋйсѧ, провозвѣ́стниче бж҃їихъ велѣ́нїй: ра́дꙋйсѧ, сокро́вище милосе́рдїѧ бж҃їѧ неистощи́мое.

Ра́дꙋйсѧ, мака́рїе, ско́рый помо́щниче и҆ пресла́вный чꙋдотво́рче.

Конда́къ в҃і

Блгⷣть свы́ше тѝ да́ннꙋю позна́вше, бл҃гоговѣ́йнѡ лобыза́емъ честны̑ѧ мо́щи твоѧ̑, ꙗ҆́же гдⷭ҇ь бл҃говоли́лъ ди́внѡ ꙗ҆ви́ти на́мъ. тѣ́мже бл҃года́рственнѡ вопїе́мъ хрⷭ҇тꙋ̀ бг҃ꙋ на́шемꙋ: А҆ллилꙋ́їа.

І҆́косъ в҃і

Пою́ще твоѐ къ бг҃ꙋ ѿше́ствїе, прпⷣбне мака́рїе, почита́емъ сщ҃е́ннꙋю па́мѧть твою̀, велича́емъ твоѐ смиренномꙋ́дрїе, хва́лимъ твоѐ долготерпѣ́нїе, сла́вимъ неѕло́бїе твоѐ, ᲂу҆бл҃жа́емъ по́двиги твоѧ̑ и҆ кончи́нꙋ тече́нїѧ твоегѡ̀, ꙗ҆́кѡ вѣне́цъ пра́вды прїѧ́лъ є҆сѝ ѿ гдⷭ҇а, сꙋдїѝ пра́веднагѡ. тѣ́мже молѧ́щесѧ ᲂу҆се́рднѡ, ѡ҆ є҆́же сподо́битисѧ и҆ на́мъ неѡсꙋжде́ннѡ предста́ти стра́шномꙋ сꙋди́щꙋ хрⷭ҇то́вꙋ, взыва́емъ тѝ:

Ра́дꙋйсѧ, ᲂу҆ прⷭ҇то́ла бж҃їѧ те́плый ѡ҆ на́съ предста́телю: ра́дꙋйсѧ, мꙋ́жꙋ, просла́вивый бг҃а въ дꙋшѝ и҆ въ тѣлесѝ твое́мъ.

Ра́дꙋйсѧ, соверше́нный въ добродѣ́телѣхъ человѣ́че: ра́дꙋйсѧ, ди́вный подража́телю ѻ҆ц҃а̀ на́шегѡ нбⷭ҇нагѡ.

Ра́дꙋйсѧ, ᲂу҆строи́телю ѡ҆би́тели мона́шествꙋющихъ: ра́дꙋйсѧ, пребл҃гі́й и҆ до́брый наста́вниче и҆́нокѡвъ.

Ра́дꙋйсѧ, всѣ́хъ правосла́вныхъ ско́рый помо́щниче и҆ застꙋ́пниче: ра́дꙋйсѧ, цр҃ѧ̀ нбⷭ҇нагѡ и҆звѣ́стный ᲂу҆милостиви́телю.

Ра́дꙋйсѧ, мно́гажды застꙋпле́нїемъ твои́мъ прошє́нїѧ предварѧ́ѧй: ра́дꙋйсѧ, нбⷭ҇ный граждани́не.

Ра́дꙋйсѧ, ꙗ҆́кѡ съ прпⷣбными и҆ пра́ведными весели́шисѧ: ра́дꙋйсѧ, ꙗ҆́кѡ со всѣ́ми и҆збра́нными бж҃їими при́снѡ торжествꙋ́еши.

Ра́дꙋйсѧ, мака́рїе, ско́рый помо́щниче и҆ пресла́вный чꙋдотво́рче.

Конда́къ г҃і

Ѽ пресла́вный и҆ преди́вный ѻ҆́ч҃е мака́рїе, прїимѝ бл҃гоꙋтро́бнѡ сїѐ ма́лое моле́нїе на́ше, и҆ твои́мъ си́льнымъ и҆ бл҃гопрїѧ́тнымъ пред̾ бг҃омъ хода́тайствомъ, и҆зба́ви на́съ ѿ всѣ́хъ вра̑гъ ви́димыхъ и҆ неви́димыхъ, ѿ всѧ́кїѧ напа́сти и҆ ско́рби, ѿ внеза́пныѧ сме́рти и҆ бꙋ́дꙋщїѧ мꙋ́ки, да сподо́бимсѧ съ тобо́ю и҆ со всѣ́ми ст҃ы́ми во вѣ́ки воспѣва́ти бг҃ꙋ сп҃си́телю на́шемꙋ бл҃года́рнꙋю пѣ́снь: А҆ллилꙋ́їа.

Повто́ръ

Сей конда́къ глаго́лется три́жды, та́же і҆́косъ а҃-й и҆ конда́къ а҃-й.

І҆́косъ а҃

А҆́гг҃ла тѧ̀ земна́гѡ и҆ человѣ́ка нбⷭ҇нагѡ, прпⷣбне ѻ҆́тче мака́рїе, кі́ими пѣ̑нїи и҆ пѣ́сньми восхва́лимъ, кі́ими вѣнцы̀ ᲂу҆вѧзе́мъ трꙋдолюби́вꙋю главꙋ̀ твою̀, и҆ кі́ими словесы̀ возвели́чимъ многоболѣ́знєнныѧ по́двиги твоѧ̑; тѣ́мже бл҃гоговѣ́йнѡ притека́юще къ ра́цѣ многоцѣле́бныхъ моще́й твои́хъ, ᲂу҆се́рднѡ припа́дающе, со ᲂу҆миле́нїемъ взыва́емъ тѝ:

Ра́дꙋйсѧ, ре́вностный хрⷭ҇то́въ подража́телю: ра́дꙋйсѧ, за́повѣдей є҆гѡ̀ и҆́стинный блюсти́телю.

Ра́дꙋйсѧ, а҆́гг҃ловъ собесѣ́дниче: ра́дꙋйсѧ, прпⷣбныхъ похвала̀.

Ра́дꙋйсѧ, вѣ́рныхъ слꙋго̀ гдⷭ҇ень: ра́дꙋйсѧ, ᲂу҆се́рдный чистоты̀ и҆ воздержа́нїѧ храни́телю.

Ра́дꙋйсѧ, сто́лпе терпѣ́нїѧ: ра́дꙋйсѧ, ѡ҆́бразе неѕло́бїѧ и҆ кро́тости.

Ра́дꙋйсѧ, смиренномꙋ́дрїѧ наста́вниче: ра́дꙋйсѧ, свѣти́льниче многосвѣ́тлый.

Ра́дꙋйсѧ, непосты́дное хрⷭ҇тїа́нъ прибѣ́жище: ра́дꙋйсѧ, безме́здный врачꙋ̀ немощствꙋ́ющихъ.

Ра́дꙋйсѧ, мака́рїе, ско́рый помо́щниче и҆ пресла́вный чꙋдотво́рче.

Конда́къ а҃

Возбра́нный чꙋдотво́рче, и҆ и҆зрѧ́дный ᲂу҆го́дниче хрⷭ҇то́въ, многоцѣле́бный и҆сто́чниче и҆ мл҃твенниче ѡ҆ дꙋша́хъ на́шихъ, прпⷣбне ѻ҆́тче мака́рїе, ꙗ҆́кѡ и҆мѣ́ѧй дерзнове́нїе ко гдⷭ҇ꙋ, мл҃твами твои́ми ѿ всѧ́кихъ на́съ бѣ́дъ свободѝ, да зове́мъ тѝ:

Ра́дꙋйсѧ, мака́рїе, ско́рый помо́щниче и҆ пресла́вный чꙋдотво́рче.

Моли́твы

Ѽ сщ҃е́ннаѧ главо̀, прпⷣбне ѻ҆́тче, пребл҃же́нне а҆́вво мака́рїе! не забꙋ́ди ᲂу҆бо́гихъ свои́хъ до конца̀, но помина́й на́съ во ст҃ы́хъ свои́хъ и҆ бл҃гопрїѧ́тныхъ мл҃твахъ къ бг҃ꙋ. помѧнѝ ста́до своѐ, є҆́же са́мъ ᲂу҆па́слъ є҆сѝ, и҆ не забꙋ́ди посѣща́ти ча́дъ свои́хъ. молѝ за ны̀, ѻ҆́ч҃е сщ҃е́нный, за дѣ́ти своѧ̑ дꙋхѡ́вныѧ, ꙗ҆́кѡ и҆мѣ́ѧ дерзнове́нїе къ нбⷭ҇номꙋ цр҃ю̀. не премолчѝ за ны̀ ко гдⷭ҇ꙋ, и҆ не пре́зри на́съ, вѣ́рою и҆ любо́вїю чтꙋ́щихъ тѧ̀. помина́й на́съ, недосто́йныхъ, ᲂу҆ прⷭ҇то́ла вседержи́телева, и҆ не преста́й молѧ́сѧ ѡ҆ на́съ ко хрⷭ҇тꙋ̀ бг҃ꙋ: и҆́бо да́на тебѣ̀ бы́сть бл҃года́ть за ны̀ моли́тисѧ. не мни́мъ бо тѧ̀ сꙋ́ща ме́ртва: а҆́ще бо и҆ тѣ́ломъ преста́вилсѧ є҆сѝ ѿ на́съ, но и҆ по сме́рти жи́въ сы́й пребыва́еши. не ѿстꙋпа́й ѿ на́съ дꙋ́хомъ, сохранѧ́ѧ на́съ ѿ стрѣ́лъ вра́жїихъ, и҆ всѧ́кїѧ пре́лести бѣсѡ́вскїѧ, и҆ ко́зней дїа́вольскихъ, па́стырю на́шъ до́брый. а҆́ще бо и҆ моще́й твои́хъ ра́ка пред̾ ѻ҆чи́ма на́шима ви́дима є҆́сть всегда̀, но ст҃а́ѧ твоѧ̀ дꙋша̀ съ а҆́гг҃льскими во́инствы, съ безпло́тными ли́ки, съ нбⷭ҇ными си́лами ᲂу҆ прⷭ҇то́ла вседержи́телева предстоѧ́щи, досто́йнѡ весели́тсѧ. вѣ́дꙋще бо тѧ̀ вои́стиннꙋ и҆ по сме́рти жи́ва сꙋ́ща, тебѣ̀ припа́даемъ и҆ тебѣ̀ мо́лимсѧ: є҆́же моли́тисѧ ѡ҆ на́съ всеси́льномꙋ бг҃ꙋ ѡ҆ по́льзѣ дꙋ́шъ на́шихъ и҆ и҆спроси́ти вре́мѧ на покаѧ́нїе, и҆ ѡ҆ невозбра́нномъ преи́тїи ѿ землѝ на нб҃о, мыта́рствъ же го́рькихъ, бѣсѡ́въ воздꙋ́шныхъ кнѧзе́й и҆ вѣ́чныѧ мꙋ́ки и҆зба́витисѧ, и҆ нбⷭ҇номꙋ црⷭ҇твїю наслѣ́дникомъ бы́ти со всѣ́ми пра́ведными, ѿ вѣ́ка ᲂу҆годи́вшими гдⷭ҇ꙋ на́шемꙋ і҆и҃сꙋ хрⷭ҇тꙋ̀: є҆мꙋ́же подоба́етъ всѧ́каѧ сла́ва, че́сть и҆ поклоне́нїе со безнача́льнымъ є҆гѡ̀ ѻ҆ц҃е́мъ, и҆ прест҃ы́мъ и҆ бл҃ги́мъ и҆ животворѧ́щимъ є҆гѡ̀ дх҃омъ, ны́нѣ и҆ при́снѡ, и҆ во вѣ́ки вѣкѡ́въ. А҆ми́нь.