Российская Православная Церковь

по благословенію Архіерейскаго Сѵнода Россійской Православной Церкви

Православный календарь

Ака́ѳістъ

А҆ка́ѳїстъ ст҃о́мꙋ прпⷣбномꙋ ні́лꙋ, столобе́нскомꙋ чꙋдотво́рцꙋ.

Прп. Нила Столобенского, Новгородского (1667) 9 июня 2026

Конда́къ а҃

И҆збра́нномꙋ ѿ пеле́нъ въ во́инство хрⷭ҇то́во и҆ впи́санномꙋ ѿ ю҆́ности въ кни́гꙋ живота̀ вѣ́чнагѡ, ди́вномꙋ въ чꙋдесѣ́хъ, прпⷣбномꙋ ѻ҆ц҃ꙋ̀ на́шемꙋ ні́лꙋ, всѝ, насыща́ющїисѧ чрез̾ него̀ подава́емыхъ неѡскꙋ́днѡ бж҃їихъ дарова́нїй, соше́дшесѧ воспои́мъ є҆мꙋ̀, ꙗ҆́кѡ хода́таю и҆ мл҃твенникꙋ ѡ҆ дꙋша́хъ на́шихъ, въ весе́лїи глаго́люще:

Ра́дꙋйсѧ, прпⷣбне ѻ҆́ч҃е ні́ле, столобе́нскїй чꙋдотво́рче.

І҆́косъ а҃

А҆́гг҃ла гдⷭ҇ь своего̀ посла̀ къ тебѣ̀, прпⷣбне ѻ҆́ч҃е, возвѣсти́ти, є҆гда̀ ᲂу҆зрѣ̀ твоѐ мꙋдрова́нїе ѡ҆ нбⷭ҇ныхъ, дабы̀ преше́лъ є҆сѝ и҆з̾ пре́жнїѧ пꙋсты́ни во ѻ҆́нꙋю, въ не́йже подвиза́лсѧ є҆сѝ; ты̀ же ни мѣ́ста, ни страны̀ ѻ҆́ныѧ вѣ́даѧ, но па́че на посла́вшаго тѧ̀ гдⷭ҇а ᲂу҆пова́ѧ и҆ вѣ́рꙋѧ, ꙗ҆́кѡ перна́тый поте́клъ є҆сѝ въ ню̀. Мы̀ же, ча̑да твоѧ̑, а҆́ки на пꙋтѝ тѧ̀ срѣта́юще, привѣ́тствꙋемъ, си́це возглаша́юще:

Ра́дꙋйсѧ, послꙋша́нїѧ на́мъ ѡ҆́бразъ ѡ҆ста́вивый: ра́дꙋйсѧ, любвѐ ра́ди хрⷭ҇то́вы всѧ̑ кра̑снаѧ мі́ра сегѡ̀ за ᲂу҆ме́ты вмѣни́вый.

Ра́дꙋйсѧ, мелхїседе́кꙋ подо́бенъ ꙗ҆ви́выйсѧ: ра́дꙋйсѧ, ꙗ҆́кѡ ты̀ роди́телей земны́хъ ᲂу҆таи́лъ є҆сѝ ѿ на́съ, да нбⷭ҇номꙋ ѻ҆ц҃ꙋ̀ въ сыновство̀ причте́шисѧ.

Ра́дꙋйсѧ, ꙗ҆́кѡ за лише́нїе сро́дства и҆ дрꙋ́жества стѧжа́лъ є҆сѝ съ нбⷭ҇ными содрꙋ́жество: ра́дꙋйсѧ, прпⷣбне, возненави́дѣвый мі́ра сегѡ̀ всѧ́кое наслажде́нїе.

Ра́дꙋйсѧ, ꙗ҆́кѡ за сїѐ воспрїѧ́лъ є҆сѝ нбⷭ҇ныѧ жи́зни ᲂу҆чрежде́нїе: ра́дꙋйсѧ, прпⷣбне, послꙋжи́вый гдⷭ҇ꙋ преподо́бїемъ и҆ пра́вдою.

Ра́дꙋйсѧ, за сїѐ ѿ негѡ̀ почте́нный че́стїю и҆ сла́вою вѣ́чною: ра́дꙋйсѧ, въ по́двизѣхъ дневны́хъ и҆ нощны́хъ тече́нїе жи́зни вре́менныѧ соверши́вый.

Ра́дꙋйсѧ, въ невече́рнемъ днѝ црⷭ҇твїѧ бж҃їѧ при́снѡ пребыва́ѧй: ра́дꙋйсѧ, тѣ́хъ бл҃ги́хъ, и҆́хже ѻ҆́ко не ви́дѣ и҆ ᲂу҆́хо не слы́ша, вѣ́чный наслѣ́дниче.

Ра́дꙋйсѧ, прпⷣбне ѻ҆́ч҃е ні́ле, столобе́нскїй чꙋдотво́рче.

Конда́къ в҃

Ви́дѣвъ пока́занное тѝ бг҃омъ мѣ́сто, прпⷣбне ѻ҆́ч҃е ні́ле, возра́довалсѧ є҆сѝ ѡ҆ красотѣ̀ є҆гѡ̀; ѿ ра́дости же, ꙗ҆́кѡ не презрѣ̀ гдⷭ҇ь бг҃ъ трꙋдѡ́въ твои́хъ, сїѧ̀ благода́рнымъ гла́сомъ восклица́лъ є҆сѝ: ѽ трⷪ҇це прест҃а́ѧ, є҆ди́на въ бжⷭ҇твѣ̀ въ трїе́хъ ли́цахъ нераздѣ́льнаѧ, бж҃е ѻ҆́ч҃е всемогꙋ́щїй, бж҃е сн҃е є҆диноро́дный, бж҃е дш҃е ᲂу҆тѣ́шителю, свѣтоза́рный мі́рꙋ свѣ́те, наста́вниче и҆ промысли́телю всѣ́хъ сп҃се́нїѧ, да́рꙋй мнѣ̀ до конца̀ жи́зни моеѧ̀ на се́мъ мѣ́стѣ вы́нꙋ воспѣва́ти тебѣ̀ пѣ́снь: А҆ллилꙋ́їа.

І҆́косъ в҃

Ра́зꙋмъ ве́сь ᲂу҆глꙋбле́нъ и҆мѣ́ѧ, прпⷣбне ѻ҆́ч҃е, въ поꙋче́нїи ѡ҆ бл҃же́ннѣй вѣ́чности и҆ въ ню̀ водвори́тисѧ жела́ѧ, непреста́ннѡ со дв҃домъ вопи́лъ є҆сѝ: ᲂу҆вы̀ мнѣ̀, ꙗ҆́кѡ прише́льствїе моѐ продолжи́сѧ, бы́ша бо сле́зы моѧ̑ мнѣ̀, ꙗ҆́кѡ хлѣ́бъ, де́нь и҆ но́щь. Мы̀ же таково́мꙋ мꙋдрова́нїю твоемꙋ̀ дивѧ́щесѧ, вопїе́мъ:

Ра́дꙋйсѧ, прпⷣбне, земно́е мꙋдрова́нїе бж҃е́ственнѣй во́ли повинꙋ́вый: ра́дꙋйсѧ, жела́нїе твоѐ ко влⷣце, хрⷭ҇тꙋ̀ гдⷭ҇ꙋ, всѧ́чески ᲂу҆твержде́ннѡ и҆мѣ́вый.

Ра́дꙋйсѧ, крила́ми бг҃омы́слїѧ сѣ̑ти вра̑жїѧ сокрꙋши́вый: ра́дꙋйсѧ, всѧ̑ є҆гѡ̀ ѕлѡ́бнаѧ на тѧ̀ ᲂу҆мышлє́нїѧ до конца̀ посрами́вый.

Ра́дꙋйсѧ, ѡ҆ста́вивый приврє́менныѧ и҆мѣ̑нїѧ и҆ возлюби́вый нищетꙋ̀ хрⷭ҇то́вꙋ: ра́дꙋйсѧ, ꙗ҆́кѡ ны́нѣ за сїѐ дости́глъ є҆сѝ къ вѣ́чномꙋ и҆ неистощи́момꙋ є҆гѡ̀ бога́тствꙋ.

Ра́дꙋйсѧ, во ᲂу҆мерщвле́нїи страсте́й да́же до конца̀ жи́зни твоеѧ̀ неꙋсы́пно бо́дрствовавый: ра́дꙋйсѧ, сме́ртїю вре́менною къ вѣ́чномꙋ безсме́ртїю преше́дый.

Ра́дꙋйсѧ, за глꙋбо́кое смире́нїе въ вѣ̑чныѧ кро́вы вознесе́нный: ра́дꙋйсѧ, въ непристꙋ́пнѣй сла́вѣ полꙋчи́вый прича́стїе.

Ра́дꙋйсѧ, всѧ́кїѧ добродѣ́тели себѐ сама́го ѡ҆́бразъ на́мъ ꙗ҆ви́вый: ра́дꙋйсѧ, ꙗ҆́кѡ за сїѐ ны́нѣ во црⷭ҇твїи нбⷭ҇нѣмъ ве́лїй нарече́нъ є҆сѝ.

Ра́дꙋйсѧ, прпⷣбне ѻ҆́ч҃е ні́ле, столобе́нскїй чꙋдотво́рче.

Конда́къ г҃

Си́льна и҆ непреѡбори́ма тебѣ̀ показа́лъ є҆сѝ, прпⷣбне ѻ҆́ч҃е, дре́внемꙋ врагꙋ̀ и҆ зави́стникꙋ бл҃же́нства на́шегѡ: є҆гда̀ бо, зрѧ̀ тебѣ̀ ѻ҆́нъ, ꙗ҆́кѡ де́нь ѿ днѐ лѣ́ствицꙋ добродѣ́телей къ нб҃сѝ незы́блемꙋ ᲂу҆твержда́еши, и҆ чл҃вѣ́къ пло́тѧнъ, но ꙗ҆́кѡ а҆́гг҃лъ безпло́тный житїѐ прохо́диши, ᲂу҆мы́сли ѿ бл҃гослове́ннагѡ тѝ бг҃омъ мѣ́ста ѿдали́ти, разли́чными привидѣ̑нїи ᲂу҆страша́ше тѧ̀: ты̀ же всѧ̑ є҆гѡ̀ кова̑рства, а҆́ки паꙋчи̑нныѧ сѣ̑ти, бо́дренною мл҃твою разгна́лъ є҆сѝ, ꙗ҆́кѡ не смѣ́ти є҆мꙋ̀ и҆ и҆здале́ча на тѧ̀ взира́ти, є҆гда̀ слы́ша тѧ̀ пою́ща: А҆ллилꙋ́їа.

І҆́косъ г҃

И҆мѣ́ѧ несꙋмнѣ́ннꙋю наде́ждꙋ ѡ҆ спасе́нїи твое́мъ, прпⷣбне ѻ҆́ч҃е ні́ле, ко и҆схо́дꙋ ѿ жи́зни сеѧ̀ всегда̀ гото́въ бы́лъ є҆сѝ, и҆ вы́нꙋ и҆мѣ́ѧ въ па́мѧти сме́рть, пре́жде ѻ҆́ныѧ многотрꙋ́дномꙋ своемꙋ̀ тѣ́лꙋ мѣ́сто свои́ма рꙋка́ма и҆згото́вилъ є҆сѝ. Мы̀ же, ча̑да твоѧ̑, а҆́ки надгро́бнꙋю пѣ́снь пое́мъ тѝ, си́це глаго́люще:

Ра́дꙋйсѧ, трꙋды̑ твоѧ̑ и҆ по́двиги и҆́ночєскїѧ и҆змѣни́вый вѣ́чнымъ ᲂу҆покое́нїемъ: ра́дꙋйсѧ, страсте́й мглꙋ̀ и҆стреби́вый.

Ра́дꙋйсѧ, ѡ҆блече́нный ны́нѣ въ ри́зꙋ безстра́стїѧ: ра́дꙋйсѧ, а҆́гг҃льски на землѝ житїѐ пожи́вый.

Ра́дꙋйсѧ, ко гра́дꙋ нетлѣ́ннагѡ є҆де́ма преше́дый: ра́дꙋйсѧ, предстоѧ́нїѧ ᲂу҆ стра́шнагѡ прⷭ҇то́ла влⷣчнѧ сподо́бивыйсѧ во сла́вѣ вѣ́чнѣй.

Ра́дꙋйсѧ, ᲂу҆се́рднѡ возлюби́вый за́пѡвѣди хрⷭ҇та̀ гдⷭ҇а: ра́дꙋйсѧ, ꙗ҆́кѡ дрꙋ́гъ че́стенъ и҆ са́мъ ѿ негѡ̀ возлю́бленъ є҆сѝ.

Ра́дꙋйсѧ, мнѡ́ги скѡ́рби съ вели́кимъ благодаре́нїемъ претерпѣ́вый: ра́дꙋйсѧ, въ неизглаго́ланнꙋю ра́дость гдⷭ҇а своегѡ̀ воспрїѧ́тый.

Ра́дꙋйсѧ, ꙗ҆́кѡ дарова́сѧ тебѣ̀ ѿ бг҃а во бл҃гослове́нїихъ прославлѧ́емꙋ бы́ти: ра́дꙋйсѧ, ꙗ҆́кѡ сла́ва твоѧ̀ ѿ человѣ̑къ всегда̀ ᲂу҆бл҃жа́етсѧ.

Ра́дꙋйсѧ, прпⷣбне ѻ҆́ч҃е ні́ле, столобе́нскїй чꙋдотво́рче.

Конда́къ д҃

Бꙋ́рею помышле́нїй невѣ́рныхъ ѡ҆ тебѣ̀, прпⷣбне ѻ҆́ч҃е, неи́стовїи чл҃вѣ́цы смѧто́шасѧ, мнѧ́ще, а҆́ки бы не ра́ди любвѐ хрⷭ҇то́вы то́ль жесто́кїй пꙋсты́нный пꙋ́ть проходи́лъ є҆сѝ, но вы́нꙋ ᲂу҆едине́ннагѡ житїѧ̀ твоегѡ̀ непщева́хꙋ бы́ти стѧжа́нїе и҆мѣ́нїѧ, чесѡ̀ ра́ди и҆ ѡ҆кра́сти тѧ̀ ᲂу҆мы́слиша: но вмѣ́стѡ ча́емагѡ сокро́вища ѡ҆брѣто́ша є҆ди́нъ ѡ҆́бразъ пречⷭ҇тыѧ бг҃омт҃ре съ предвѣ́чнымъ младе́нцемъ, на рꙋкꙋ̀ є҆ѧ̀ держи́мымъ, гдⷭ҇омъ і҆и҃сомъ, къ немꙋ́же ты̀ де́ннѡ и҆ но́щнѡ воспѣва́лъ є҆сѝ: А҆ллилꙋ́їа.

І҆́косъ д҃

Слы́шимъ и҆ вѣ́рꙋемъ, прпⷣбне ѻ҆́ч҃е ні́ле, ꙗ҆́кѡ бг҃ъ тебѣ̀, лю́бѧщемꙋ є҆го̀, да́рствꙋетъ толи̑каѧ воздаѧ̑нїѧ, и҆́хже ѻ҆́ко не ви́дѣ и҆ ᲂу҆́хо не слы́ша, и҆ ꙗ҆́же на се́рдце чл҃вѣ́кꙋ не взыдо́ша. Жела́юще же и҆ мы̀ твои́ми бг҃опрїѧ́тными мл҃твами та̑ѧжде полꙋчи́ти, вопїе́мъ тѝ:

Ра́дꙋйсѧ, жела́нїѧ твоегѡ̀ соверше́нное полꙋчи́вый и҆сполне́нїе: ра́дꙋйсѧ, на є҆́же вѣ́рою взира́лъ є҆сѝ, ны́нѣ лице́мъ къ лицꙋ̀ непристꙋ́пнагѡ бжⷭ҇тва̀ сла́вꙋ созерца́еши.

Ра́дꙋйсѧ, ꙗ҆́кѡ ѿтꙋ́дꙋ неизрече́нныѧ ра́дости и҆ весе́лїѧ почерпа́еши и҆сполне́нїе: ра́дꙋйсѧ, ꙗ҆́кѡ ктомꙋ̀ не приключи́тсѧ что̀ тебѣ̀ жела́ти и҆ хотѣ́ти во вѣ́ки.

Ра́дꙋйсѧ, ꙗ҆́кѡ ктомꙋ̀ не прирази́тсѧ къ дꙋшѣ̀ твое́й прило́гъ вра́жїихъ навѣ́тѡвъ и҆ и҆скꙋше́нїй: ра́дꙋйсѧ, ꙗ҆́кѡ кора́бль тво́й ᲂу҆пра́вилъ є҆сѝ на мѣ́сто вои́стиннꙋ до́брое.

Ра́дꙋйсѧ, ꙗ҆́кѡ ста́лъ є҆сѝ и҆́мъ, а҆́ки на гора́хъ а҆рара́тскихъ, на са́мыхъ гора́хъ нбⷭ҇ныхъ: ра́дꙋйсѧ, ꙗ҆́кѡ ктомꙋ̀ ᲂу҆жѐ ѻ҆́нъ не бои́тсѧ потопле́нїѧ.

Ра́дꙋйсѧ, ꙗ҆́кѡ ᲂу҆́мъ тво́й ᲂу҆крѣпле́нъ є҆́сть во вѣ́ки бл҃года́тнымъ ᲂу҆крѣпле́нїемъ: радꙋйсѧ, ꙗ҆́кѡ ѡ҆богати́лсѧ є҆сѝ преиз̾ѻби́льнѡ дара́ми бж҃е́ственными.

Ра́дꙋйсѧ, ꙗ҆́кѡ до возглаше́нїѧ а҆рха́гг҃льскихъ трꙋ́бъ и҆́маши дꙋше́вное бг҃овидѣ́нїе: ра́дꙋйсѧ, ꙗ҆́кѡ є҆гда̀ по возглаше́нїю и҆̀хъ ме́ртвїи ѿ гробѡ́въ воскре́снꙋтъ, и҆ ты̀ воста́неши съ тѣ́ломъ си́мъ къ лицезрѣ́нїю бж҃їю.

Ра́дꙋйсѧ, прпⷣбне ѻ҆́ч҃е ні́ле, столобе́нскїй чꙋдотво́рче.

Конда́къ є҃

Бг҃оте́чнаѧ ꙗ҆́кѡ ѕвѣзда̀ ꙗ҆ви́лсѧ є҆сѝ, прпⷣбне, во ѻ҆́стровѣ селиге́ра є҆́зера: и҆́бо всѧ̑ ѡ҆крє́стнаѧ страны̑ да́нною тѝ ѿ со́лнца пра́вды, хрⷭ҇та̀ бг҃а, бл҃года́тїю ѡ҆зарѧ́еши, и҆ на мо́ри стра́стнагѡ сегѡ̀ житїѧ̀ ѡ҆бꙋрева́емыхъ наставлѧ́еши посо́бїемъ мл҃твъ твои́хъ на пꙋ́ть спасе́нїѧ, къ нбⷭ҇номꙋ ѻ҆те́чествꙋ ведꙋ́щъ, и҆ наꙋча́еши є҆ди́нѣми ᲂу҆сты̀ и҆ є҆ди́нѣмъ се́рдцемъ съ тобо́ю воспѣва́ти въ трⷪ҇цѣ сла́вимомꙋ бг҃ꙋ: А҆ллилꙋ́їа.

І҆́косъ є҃

Ви́дѣлъ є҆сѝ, прпⷣбне, ꙗ҆́кѡ въ мі́рѣ се́мъ всѧ́чєскаѧ сꙋ́ть сꙋета̀ и҆ всѧ̑ тлѣ́нїю прича̑стна: прехо́дитъ бо мі́ръ и҆ по́хоть є҆гѡ̀: ᲂу҆разꙋмѣ́лъ же є҆сѝ, ꙗ҆́кѡ творѧ́й и҆ во́лю бж҃їю, то́ю є҆ди́нъ пребыва́етъ во вѣ́ки: сегѡ̀ ра́ди, бѣ́гаѧ мі́ра и҆ срѡ́дникъ твои́хъ, вседꙋ́шнѡ потща́лсѧ є҆сѝ бл҃гоꙋгоди́ти превѣ́чномꙋ бг҃ꙋ. Тѣ́мже за толи́кое твоѐ ᲂу҆се́рдїе ᲂу҆слы́ши на́съ, при́снѡ глаго́лющихъ тебѣ̀ сицєва́ѧ:

Ра́дꙋйсѧ, ѻ҆рлѐ небопа́рный, крила́ми бг҃омы́слїѧ возлетѣ́вый зрѣ́ти немерца́ющꙋю свѣ́тлость со́лнца пра́вды, і҆и҃са хрⷭ҇та̀: ра́дꙋйсѧ, ᲂу҆́ме чистѣ́йшїй, не ѡ҆скверни́выйсѧ пре́лестьми мїрски́ми.

Ра́дꙋйсѧ, крі́не чи́стагѡ ѡ҆бонѧ́нїѧ: ра́дꙋйсѧ, по́стникѡвъ воздержа́нїе.

Ра́дꙋйсѧ, бл҃гоче́стїѧ сто́лпе непобори́мый: ра́дꙋйсѧ, честно́е дꙋхо́вное сокро́вище.

Ра́дꙋйсѧ, свѣ́тлое добродѣ́телей прїѧ́телище: ра́дꙋйсѧ, дража́йшїй сосꙋ́де бл҃года́тнагѡ сокрове́нїѧ.

Ра́дꙋйсѧ, скорбѧ́щихъ ра́досте и҆ ᲂу҆тѣше́нїе: ра́дꙋйсѧ, пꙋтеше́ствꙋющихъ пꙋтеводи́телю.

Ра́дꙋйсѧ, безме́здный врачꙋ̀ болѣ́зней всѧ́кихъ: ра́дꙋйсѧ, ско́рый застꙋ́пниче ѡ҆би́димыхъ.

Ра́дꙋйсѧ, прпⷣбне ѻ҆́ч҃е ні́ле, столобе́нскїй чꙋдотво́рче.

Конда́къ ѕ҃

Проповѣ́дꙋетъ са́мое мѣ́сто пꙋсты́нное, прпⷣбне ѻ҆́ч҃е ні́ле, на не́мже до конца̀ жи́зни твоеѧ̀ подвиза́лсѧ є҆сѝ, какѡвы̀ бѧ́хꙋ твоѝ трꙋды̑, по́двизи и҆ терпѣ́нїе, ꙗ҆́кѡ во всю̀ жи́знь твою̀ не и҆мѣ́лъ є҆сѝ ни когѡ́же соскорбѧ́щагѡ и҆ ᲂу҆тѣша́ющагѡ тѧ̀ въ терпѣ́нїи, но па́че ѿвсю́дꙋ належа́хꙋ тѝ ѡ҆ѕлоблє́нїѧ, воздвиза́емаѧ ѿ врага̀ неви́димагѡ: не терпѧ́ бо зави́стникъ бг҃оꙋго́днагѡ житїѧ̀ твоегѡ̀ зрѣ́ти, нѣ́когда наꙋстѝ подо́бныхъ себѣ̀ ке́ллїю твою̀ сожещѝ и҆ съ тобо́ю, но ты̀, ꙗ҆́кѡже на него̀ сама́го, та́кѡ и҆ на всѧ̑ є҆гѡ̀ ѕлоко́знєнныѧ сѣ̑ти, и҆мѣ́лъ є҆сѝ поража́ющь ка́мыкъ, ꙗ҆́кѡ дв҃дъ на голїа́ѳа, непреста́ннꙋю ко гдⷭ҇ꙋ бг҃ꙋ пѣ́снь: А҆ллилꙋ́їа.

І҆́косъ ѕ҃

Возсїѧ̀ всемꙋ̀ мі́рꙋ добродѣ́телей твои́хъ просвѣще́нїе, прпⷣбне ѻ҆́ч҃е, ѡ҆ ни́хже благодарѧ́ще, прославлѧ́емъ ѻ҆ц҃а̀ нбⷭ҇наго, да́вшаго тѝ толи́кꙋю бл҃года́ть вели́чїѧ своегѡ̀, и҆ тебѣ̀, ꙗ҆́кѡ те́пломꙋ ѡ҆ на́съ мл҃твенникꙋ, ра́достнаѧ воспѣва́емъ си́це:

Ра́дꙋйсѧ, ᲂу҆се́рдный и҆сполни́телю бж҃їихъ велѣ́нїй: ра́дꙋйсѧ, терпѣ́нїемъ твои́мъ ᲂу҆диви́вый а҆́гг҃лѡвъ и҆ чл҃вѣ́кѡвъ.

Ра́дꙋйсѧ, притека́ющымъ под̾ кро́въ тво́й сла́дкое ᲂу҆покое́нїе: ра́дꙋйсѧ, и҆знемога́ющимъ ѿ трꙋдѡ́въ возстановле́нїе.

Ра́дꙋйсѧ, и҆сто́чниче чꙋде́съ ѡ҆би́льный: ра́дꙋйсѧ, во всѧ́кихъ нꙋ́ждахъ призыва́ющимъ тѧ̀ ско́рый помо́щниче.

Ра́дꙋйсѧ, надѣ́ющымсѧ на тѧ̀ защище́нїе непосты́дное: ра́дꙋйсѧ, всѣ̑мъ притека́ющымъ къ тебѣ̀ приста́нище небꙋ́рное.

Ра́дꙋйсѧ, хотѧ́щимъ твоемꙋ̀ непоро́чномꙋ житїю̀ послѣ́довати ᲂу҆крѣпи́телю: ра́дꙋйсѧ, свѣ́щниче, горѧ́й свѣ́томъ бл҃гоче́стїѧ.

Ра́дꙋйсѧ, пꙋтевождю̀ во тмѣ̀ невѣ́рїѧ блꙋдѧ́щымъ: ра́дꙋйсѧ, пода́телю ра́зꙋма бꙋ̑їимъ.

Ра́дꙋйсѧ, прпⷣбне ѻ҆́ч҃е ні́ле, столобе́нскїй чꙋдотво́рче.

Конда́къ з҃

Хотѧ̀, прпⷣбне, ѿ здѣ́шнѧгѡ вѣ́ка преста́витисѧ преле́стнагѡ, на всѧ́къ де́нь и҆сходѧ̀ слези́лъ и҆ рыда́лъ є҆сѝ над̾ гро́бомъ твои́мъ, не а҆́ки боѧ́сѧ сме́рти, ꙗ҆́же таковы́мъ ᲂу҆го́дникѡмъ бж҃їимъ, ꙗ҆́кѡ ты̀ є҆сѝ, є҆ди́нымъ є҆́сть прохожде́нїемъ ѿ трꙋдѡ́въ на ᲂу҆покое́нїе, ѿ скорбе́й и҆ болѣ́зней на вѣ́чнꙋю ра́дость и҆ весе́лїе: но па́че жела́ѧ разрѣши́тисѧ ѿ ю҆́зъ плотски́хъ и҆ предста́ти прⷭ҇то́лꙋ бг҃а вседержи́телѧ со а҆рха́гг҃лы и҆ а҆́гг҃лы, и҆ вкꙋ́пѣ съ ни́ми торже́ственнѡ воспѣва́ти пѣ́снь: А҆ллилꙋ́їа.

І҆́косъ з҃

Нѡ́ва всѧ̑ ꙗ҆ви́шасѧ тебѣ̀, прпⷣбне, є҆гда̀ разлꙋчи́лсѧ є҆сѝ повелѣ́нїемъ гдⷭ҇нимъ ѿ привре́менныхъ: нб҃о но́во, землѧ̀ но́ва и҆ гра́дъ і҆ерⷭ҇ли́мъ но́въ пред̾ꙋгото́ванъ ѿ бг҃а, ꙗ҆́кѡ невѣ́ста ᲂу҆краше́ннаѧ мꙋ́жꙋ своемꙋ̀, въ него́же съ неизрече́ннымъ весе́лїемъ воспрїѧ́лсѧ є҆сѝ въ сожи́тїе вѣ́чное а҆́гг҃лѡмъ и҆ всѣ̑мъ ст҃ы́мъ. Мы̀ же, ѡ҆ таковѣ́мъ твое́мъ преселе́нїи веселѧ́щесѧ, ᲂу҆ми́льнѡ глаго́лемъ си́це:

Ра́дꙋйсѧ, є҆ди́нагѡ бг҃а въ трїе́хъ ли́цахъ сподо́бивыйсѧ лицезрѣ́нїѧ: ра́дꙋйсѧ, въ число̀ прїѧ́тый и҆́стинныхъ є҆гѡ̀ покло́нникѡвъ.

Ра́дꙋйсѧ, ꙗ҆́кѡ не ктомꙋ̀ съ земны́ми, но и҆ съ нбⷭ҇ными си́лами на прⷭ҇то́лѣ непристꙋ́пныѧ сла́вы сѣдѧ́щемꙋ пое́ши: ст҃ъ, ст҃ъ, ст҃ъ гдⷭ҇ь саваѡ́ѳъ: ра́дꙋйсѧ, ꙗ҆́кѡ ѿ негѡ̀ почерпа́еши преиз̾ѻби́льнаѧ бл҃года́ти и҆сполне́нїе.

Ра́дꙋйсѧ, и҆ на землѝ бг҃омъ со́браннагѡ твоегѡ̀ ста́да бо́дрый храни́телю: ра́дꙋйсѧ, всѣ̑мъ подража́ющымъ житїю̀ твоемꙋ̀ ст҃о́мꙋ наста́вниче.

Ра́дꙋйсѧ, ꙗ҆́кѡ ᲂу҆крѣплѧ́еши послѣ́дꙋющихъ тѝ къ мꙋ́жественномꙋ со враго́мъ боре́нїю: ра́дꙋйсѧ, ꙗ҆́кѡ хода́тайствꙋеши и҆̀мъ вѣнцы̀, достѡ́йныѧ трꙋдѡ́въ и҆ по́двигѡвъ, ѿ хрⷭ҇та̀ бг҃а.

Ра́дꙋйсѧ, наде́ждо и҆̀мъ и҆звѣ́стнаѧ, ꙗ҆́кѡ не всꙋ́е тещѝ и҆ ни вотщѐ трꙋди́тисѧ и҆̀мъ подоба́етъ: ра́дꙋйсѧ, ꙗ҆́кѡ и҆ въ тече́нїи слꙋ́жиши и҆̀мъ прохла́дою и҆ ᲂу҆тѣше́нїемъ.

Ра́дꙋйсѧ, ꙗ҆́кѡ са́мъ пра̑вы стезѝ гдⷭ҇ни содѣ́лалъ є҆сѝ: ра́дꙋйсѧ, ꙗ҆́кѡ и҆ всѣ́хъ тѣ́миже стезѧ́ми ше́ствовати наꙋча́еши.

Ра́дꙋйсѧ, прпⷣбне ѻ҆́ч҃е ні́ле, столобе́нскїй чꙋдотво́рче.

Конда́къ и҃

Стра́нное слы́шанїе во ᲂу҆́шїю на́шєю ѡ҆бно́ситсѧ ѡ҆ тебѣ̀, прпⷣбне ѻ҆́ч҃е ні́ле: сѐ бо толи́къ да́ръ и҆мѣ́лъ є҆сѝ во пло́ти ѿ бг҃а, ꙗ҆́кѡ є҆́же и҆ вта́йнѣ содѣ́ѧнное ѿ чл҃вѣ́къ разꙋмѣ́лъ є҆сѝ, и҆ ѡ҆калѧ́нна грѣхо́вною нечистото́ю а҆́бїе ѡ҆бличи́лъ є҆сѝ, поꙋча́ѧ не твори́ти тогѡ̀ бо́лѣе. Мы̀ же, сицево́мꙋ твоемꙋ̀ прозрѣ́нїю дивѧ́щесѧ, прославлѧ́емъ бг҃а, прославлѧ́ющагѡ такѡвы́ѧ вѣ̑рныѧ своѧ̑ рабы̑, и҆ вопїе́мъ є҆мꙋ̀: А҆ллилꙋ́їа.

І҆́косъ и҃

Всего̀ себѐ, є҆ли́кѡ мо́щно, повинꙋ́лъ є҆сѝ во́ли бж҃їей, прпⷣбне ѻ҆́ч҃е: тѣ́мже и҆ ѿ бг҃а всѧ̑ є҆ли̑ка жела́лъ, воспрїѧ́лъ є҆сѝ, ѿ на́съ же, ꙗ҆́кѡ ѻ҆те́цъ и҆ наста́вникъ на́шъ, ᲂу҆слы́ши и҆ прїимѝ похва́льное сїѐ пѣ́нїе:

Ра́дꙋйсѧ, прпⷣбне, ꙗ҆́кѡ дꙋша̀ твоѧ̀ ст҃а́ѧ по жела́нїю твоемꙋ̀ ны́нѣ въ нбⷭ҇ныхъ ски́нїѧхъ ѡ҆брѣта́етсѧ: ра́дꙋйсѧ, ꙗ҆́кѡ во мздꙋ̀ прїе́млетъ ᲂу҆покое́нїе и҆ ѿра́дꙋ.

Ра́дꙋйсѧ, ꙗ҆́кѡ во странѣ̀ ѻ҆́нагѡ весе́лїѧ неизрече́ннꙋю сла́дость вкꙋша́еши: ра́дꙋйсѧ, ꙗ҆́кѡ то́й сла́дости чл҃вѣ́кꙋ сме́ртномꙋ не лѣ́ть є҆́сть и҆ глаго́лати.

Ра́дꙋйсѧ, ꙗ҆́кѡ тоѧ̀ добро́ты и҆ бл҃гости ѻ҆́ко человѣ́чо не ви́дѣ и҆ ᲂу҆́хо не слы́ша: ра́дꙋйсѧ, ꙗ҆́кѡ съ преиз̾ѻби́лїемъ па́че жела́нїѧ и҆ хотѣ́нїѧ полꙋчи́лъ є҆сѝ ᲂу҆тѣшє́нїѧ.

Ра́дꙋйсѧ, тѣ́хже бл҃ги́хъ и҆ на́мъ хода́таю при́сный: ра́дꙋйсѧ, ѿ твои́хъ бл҃года́тныхъ дарѡ́въ и҆ на́мъ пода́телю незави́стный.

Ра́дꙋйсѧ, ꙗ҆́кѡ промышлѧ́еши ѡ҆ на́шемъ спасе́нїи: ра́дꙋйсѧ, ꙗ҆́кѡ ты̀ пече́шисѧ ѡ҆ добродѣ́тельнѣмъ на́шемъ соверше́нїи.

Ра́дꙋйсѧ, ꙗ҆́кѡ тобо́ю ᲂу҆́мъ на́шъ въ бг҃омы́слїи наꙋча́етсѧ: ра́дꙋйсѧ, ꙗ҆́кѡ тобо́ю мра́къ невѣ́дѣнїѧ прогонѧ́етсѧ.

Ра́дꙋйсѧ, прпⷣбне ѻ҆́ч҃е ні́ле, столобе́нскїй чꙋдотво́рче.

Конда́къ ѳ҃

Всѧ́ко сло́во къ похвале́нїю а҆гг҃лоподо́бнагѡ житїѧ̀ твоегѡ̀ недово́льно зри́мъ бы́ти, прпⷣбне ѻ҆́ч҃е: ка́кѡ бо мо́жемъ того̀ по достоѧ́нїю ᲂу҆блажи́ти, є҆го́же са́мъ бг҃ъ ди́внѡ прославлѧ́етъ. Тѣ́ло бо є҆гѡ̀, на землѝ тлѣ́нїю неприча́стное, чꙋде́съ рѣ́ки и҆сточа́етъ, всѧ̑кїѧ цѣли́тъ болѣ̑зни и҆ бѣ́сы прогонѧ́етъ, дꙋша̀ же є҆гѡ̀ ст҃а́ѧ съ два́десѧть четы́рьми ста́рцы пое́тъ вѣ́чнѡ въ нб҃сѝ сѣдѧ́щемꙋ на прⷭ҇то́лѣ: А҆ллилꙋ́їа.

І҆́косъ ѳ҃

Вѣті́й краснослове́сныхъ не мо́жетъ бы́ти та́кѡ дѣйстви́тельно, є҆́же бы возбꙋди́ти какова́гѡ грѣ́шника къ покаѧ́нїю, ꙗ҆́коже твоѐ си́льно и҆ дѣ́йственно бы́сть, прпⷣбне, є҆ди́но ма́нїе: є҆гда̀ бо ᲂу҆зрѣ́лъ є҆сѝ грѧдꙋ́ща къ тебѣ̀ чл҃вѣ́ка, ᲂу҆глѣ́бнꙋвша въ плотски́хъ нечистота́хъ, а҆́бїе затвори́лъ є҆сѝ ѿ негѡ̀ ѻ҆ко́нце ке́ллїи твоеѧ̀, не а҆́ки гнꙋша́ѧсѧ грѣ́шника, но ꙗ҆влѧ́ѧ, ко́ль мерзи́тъ дх҃ꙋ ст҃о́мꙋ дꙋша̀, пови́ннаѧ грѣхꙋ̀: то́йже ᲂу҆мили́всѧ пока́ѧсѧ и҆ ѡ҆бѣща́сѧ ктомꙋ̀ дꙋ́шꙋ и҆ тѣ́ло чи́сто соблюда́ти. Мы̀ же, ра́дꙋющесѧ, ꙗ҆́кѡ и҆мѣ́емъ тѧ̀ ѡ҆ покаѧ́нїи на́шемъ ᲂу҆се́рднагѡ промысли́телѧ, взыва́емъ тѝ такѡва́ѧ:

Ра́дꙋйсѧ, на́шъ и҆́стинный наста́вниче: ра́дꙋйсѧ, ꙗ҆́кѡ чесомꙋ̀ ᲂу҆чи́лъ є҆сѝ, та̑ и҆ са́мъ нелѣ́ностнѡ твори́лъ є҆сѝ.

Ра́дꙋйсѧ, ꙗ҆́кѡ за сїѐ ве́лїй во црⷭ҇твїи нбⷭ҇номъ нарече́нъ є҆сѝ: ра́дꙋйсѧ, ꙗ҆́кѡ ᲂу҆досто́енъ є҆сѝ вни́ти въ число̀ дѣ́вствꙋющихъ и҆ послѣ́дꙋющихъ а҆́гнцꙋ на горѣ̀ сїѡ́нстѣй.

Ра́дꙋйсѧ, сто́лпе бл҃гоче́стїѧ и҆ ᲂу҆твержде́нїе: ра́дꙋйсѧ, тве́рдое правосла́вїѧ пра́вило.

Ра́дꙋйсѧ, всѧ̑ за́пѡвѣди гдⷭ҇ни соверше́ннѡ сохрани́вый: ра́дꙋйсѧ, хрⷭ҇та̀ ра́ди всѧ̑ ѡ҆ста́вивый и҆ всѧ̑ въ не́мъ ѡ҆брѣты́й.

Ра́дꙋйсѧ, ꙗ҆́кѡ по́льзою твои́хъ дѣ́лъ, а҆́ки пресла́дкими плоды̀, вѣ́рныхъ дꙋ́ши пита́еши: ра́дꙋйсѧ, ꙗ҆́кѡ въ мѣ́рꙋ добродѣ́телей твои́хъ текꙋ́щихъ наставлѧ́еши.

Ра́дꙋйсѧ, житїю̀ нестѧжа́тельномꙋ хрⷭ҇та̀ ра́ди наꙋчи́выйсѧ: ра́дꙋйсѧ, за́повѣдь хрⷭ҇то́вꙋ: не мо́жете рабо́тати бг҃ꙋ и҆ мамѡ́нѣ, до́брѣ и҆спо́лнивый.

Ра́дꙋйсѧ, прпⷣбне ѻ҆́ч҃е ні́ле, столобе́нскїй чꙋдотво́рче.

Конда́къ і҃

Спастѝ хотѧ̀ дꙋ́шꙋ твою̀, прпⷣбне, всѧ́чески ѡ҆ тѣлесѝ небре́глъ є҆сѝ: не и҆мѣ́ѧше бо ѻ҆́но ᲂу҆ тебѣ̀ во всю̀ жи́знь твою̀ ᲂу҆покое́нїѧ ни сѣдѣ́нїемъ, ни на землѝ лежа́нїемъ: но вмѣ́стѡ ᲂу҆покое́нїѧ бѧ́хꙋ тѣле́снꙋю сла́бость подде́рживающе жезлѝ, и҆ та́кѡ пꙋ́ть многоско́рбнагѡ житїѧ̀ сегѡ̀ соверши́лъ є҆сѝ: чесѡ̀ ра́ди тѣ́ло твоѐ ѡ҆ста́вилъ є҆сѝ на́мъ нетлѣ́нно и҆ многочꙋде́сно въ подража́нїе твои́хъ по́двигѡвъ, дꙋше́ю же предста́лъ є҆сѝ прⷭ҇то́лꙋ влⷣчню, съ ли́ки ст҃ы́хъ воспѣва́ти: А҆ллилꙋ́їа.

І҆́косъ і҃

Стѣна̀ ꙗ҆ви́лсѧ є҆сѝ, прпⷣбне ѻ҆́ч҃е ні́ле, во и҆скꙋше́нїихъ вра́жїихъ на́съ ᲂу҆твержда́ющаѧ: ꙗ҆́коже бо дре́вле і҆и҃льтѧнѡмъ повелѣ̀ бг҃ъ вознестѝ ѕмїю̀ въ пꙋсты́ни на дре́во, да ᲂу҆ѧ́звеннїи ѿ ѕмїє́въ, на ню̀ взира́юще, и҆сцѣлѧ́ютсѧ: та́кѡ и҆ ты̀ предложи́лъ є҆сѝ себѐ на́мъ, да є҆гда̀ кото́рый бра́тъ по навѣ́тꙋ вра́жїю каково́ю-ли́бо стра́стїю побѣжде́нъ бꙋ́детъ, а҆́бїе взира́лъ бы на твоѐ чꙋдесы̀ ѡ҆богаще́нное тѣ́ло и҆ и҆сцѣлѣва́лсѧ: и҆́бо и҆ ты̀ таковꙋ́ю же пло́ть и҆ тѣ̑мже страсте́мъ подлежа́щꙋю и҆мѣ́лъ є҆сѝ, ꙗ҆́коже и҆ мы̀, но бл҃года́тїю бж҃їею побѣди́тель всѣ́хъ страсте́й ꙗ҆ви́лсѧ є҆сѝ. Сегѡ̀ ра́ди торжествꙋ́юще па́мѧть твою̀, воспѣва́емъ си́це:

Ра́дꙋйсѧ, прпⷣбне, дре́внѧго врага̀ человѣкоꙋбі́йцꙋ дїа́вола со всѣ́ми є҆гѡ̀ хитростьмѝ посрами́вый: ра́дꙋйсѧ, во всю̀ жи́знь твою̀ малѣ́йшагѡ ᲂу҆гожде́нїѧ пло́ти не ꙗ҆ви́вый.

Ра́дꙋйсѧ, ни каковы́ѧже дрꙋ́жбы съ мі́ромъ не и҆мѣ́вый: ра́дꙋйсѧ, пресла́внꙋю над̾ ѻ҆́нымъ побѣ́дꙋ ѡ҆держа́вый.

Ра́дꙋйсѧ, воздꙋ̑шнаѧ мыта̑рства кнѧ́зѧ тмы̀ безбѣ́днѡ проше́дый: ра́дꙋйсѧ, ла́ѧнїѧ мы́сленныхъ псѡ́въ не слы́шавый.

Ра́дꙋйсѧ, ꙗ҆́кѡ сꙋпоста́тъ на́шъ дїа́волъ не ѡ҆брѣ́те, что̀ на тѧ̀ клевета́ти: ра́дꙋйсѧ, ꙗ҆́кѡ всѧ̀ є҆гѡ̀ си́ла на воздꙋ́сѣхъ прише́ствїемъ твои́мъ посрами́сѧ и҆ ᲂу҆ничижи́сѧ.

Ра́дꙋйсѧ, ꙗ҆́кѡ восходѧ́ща тѧ̀ въ нбⷭ҇ное ѻ҆те́чество срѣто́ша нбⷭ҇нїи а҆́гг҃ли и҆ а҆рха́гг҃ли: ра́дꙋйсѧ, ꙗ҆́кѡ ᲂу҆зрѣ́вше тѧ̀ всѝ ст҃і́и возра́довашасѧ.

Ра́дꙋйсѧ, ꙗ҆́кѡ сподо́билсѧ є҆сѝ ᲂу҆слы́шати прелюбе́зный се́й глаго́лъ: прїидѝ, сы́не бл҃гослове́нный, наслѣ́дꙋѧй ᲂу҆гото́ванное тѝ црⷭ҇тво: ра́дꙋйсѧ, сегѡ̀ вожделѣ́ннагѡ жре́бїѧ и҆ на́мъ при́сный хода́таю.

Ра́дꙋйсѧ, прпⷣбне ѻ҆́ч҃е ні́ле, столобе́нскїй чꙋдотво́рче.

Конда́къ а҃і

Пѣ́нїе всепрїѧ́тное приноси́лъ є҆сѝ бг҃ꙋ, прпⷣбне ѻ҆́ч҃е ні́ле, па́че же́ртвъ и҆ всесожже́нїй, ѿ се́рдца сокрꙋше́нна и҆ смире́нна, пла́менемъ любвѐ воспарѧ́ющее въ мл҃твѣ, ꙗ҆́же вы́нꙋ восхожда́ше во ᲂу҆́ши гдⷭ҇а саваѡ́ѳа, ꙗ҆́кѡ и҆ тебѣ̀ сама́го си́льна ꙗ҆ви́сѧ вознестѝ на нб҃о и҆ поста́вити пред̾ прⷭ҇то́ломъ сла́вы є҆гѡ̀, и҆дѣ́же вѣ́чнѡ воспѣва́еши є҆мꙋ̀: А҆ллилꙋ́їа.

І҆́косъ а҃і

Свѣ́та безвино́внагѡ прича́стїемъ наслади́выйсѧ, прпⷣбне ѻ҆́ч҃е ні́ле, свѣти́льникъ мы́сленный ꙗ҆ви́лсѧ є҆сѝ на́мъ, блꙋдѧ́щымъ во грѣхо́внѣй тмѣ̀, наставлѧ́ѧй пра́выми стезѧ́ми ше́ствовати ко свѣ́тꙋ самобы́тномꙋ, хрⷭ҇тꙋ̀ бг҃ꙋ на́шемꙋ. Мы̀ же, є҆ли́кѡ мо́щно, ше́ствꙋюще по тебѣ̀, ꙗ҆́кѡ предводи́тели и҆ рꙋково́дцѣ на́шемъ, бл҃года́рствєннаѧ восклица́емъ си́це:

Ра́дꙋйсѧ, цр҃ко́вный неꙋгаси́мый свѣти́льниче: ра́дꙋйсѧ, ко свѣ́тꙋ бг҃ꙋ ѻ҆ц҃ꙋ̀ въ сыновство̀ причте́нный.

Ра́дꙋйсѧ, ко свѣ́тꙋ бг҃ꙋ сн҃ꙋ бра́тство бл҃года́тїю є҆гѡ̀ стѧжа́вый: ра́дꙋйсѧ, ѿ свѣ́та бг҃а дх҃а ст҃а́гѡ воспрїѧ́вый ѡ҆брꙋче́нїе живота̀ вѣ́чнагѡ.

Ра́дꙋйсѧ, ꙗ҆́кѡ всѧ̑, є҆ли̑ка хо́щеши, ѿ ѻ҆́нагѡ трїѷпоста́снагѡ свѣ́та заи́мствꙋеши: ра́дꙋйсѧ, ꙗ҆́кѡ и҆ на́съ бл҃года́тнымъ свѣ́томъ просвѣща́еши.

Ра́дꙋйсѧ, ꙗ҆́кѡ ра́ди твои́хъ за на́съ пред̾ прⷭ҇то́ломъ бж҃їимъ мл҃твъ, и҆ мы̀ при и҆схо́дѣ ѿ жи́зни сеѧ̀ надѣ́емсѧ и҆збѣжа́ти зрѣ́нїѧ мра́чнагѡ лица̀ де́мѡнскагѡ: ра́дꙋйсѧ, ꙗ҆́кѡ при твое́мъ свѣтѣ́нїи и҆ мы̀ безбѣ́днѡ прїитѝ ᲂу҆пова́емъ до горы̀ нбⷭ҇ныѧ.

Ра́дꙋйсѧ, ꙗ҆́кѡ тебѣ̀, на́съ рꙋково́дствꙋюща, ᲂу҆страши́тсѧ кнѧ́зь тмы̀, не терпѧ̀ зрѣ́ти свѣ́тлости лица̀ твоегѡ̀: ра́дꙋйсѧ, ꙗ҆́кѡ ѿ свѣ́та твоегѡ̀ всѧ̑ простє́ртыѧ на на́съ сѣ̑ти є҆гѡ̀, а҆́ки паꙋчи́на, и҆сче́знꙋтъ.

Ра́дꙋйсѧ, ꙗ҆́кѡ мы̀, тобо́ю рꙋководи́ми, надѣ́емсѧ прїитѝ ко ѻ҆́номꙋ незаходи́момꙋ свѣ́тꙋ, хрⷭ҇тꙋ̀ гдⷭ҇ꙋ: ра́дꙋйсѧ, ꙗ҆́кѡ тобо́ю наставлѧ́еми, и҆ мы̀ вѣ́рꙋемъ бы́ти прича́стницы сла́вы є҆гѡ̀.

Ра́дꙋйсѧ, прпⷣбне ѻ҆́ч҃е ні́ле, столобе́нскїй чꙋдотво́рче.

Конда́къ в҃і

Бл҃года́ть не преста́й и҆злива́ти, прпⷣбне ѻ҆́ч҃е ні́ле, на мѣ́сто, и҆дѣ́же по́стническагѡ житїѧ̀ твоегѡ̀ тече́нїе соверши́лъ є҆сѝ, и҆ и҆дѣ́же пре́жде кончи́ны твоеѧ̀ возвѣсти́лъ є҆сѝ дꙋ́хомъ прⷪ҇ро́ческимъ бы́ти и҆́ночествꙋющымъ вселе́нїю: сѐ бо, по предрече́нїю твоемꙋ̀, мы̀ здѣ̀ всели́хомсѧ, здѣ̀ и҆ поко́й на́шъ. Ты̀ же, ꙗ҆́кѡ ѻ҆те́цъ и҆ наста́вникъ, ᲂу҆крѣплѧ́й ны̀ и҆ помога́й на́мъ до конца̀ жи́зни на́шеѧ дꙋшеспаси́тельнꙋю пѣ́снь воспѣва́ти гдⷭ҇ꙋ бг҃ꙋ: А҆ллилꙋ́їа.

І҆́косъ в҃і

Пою́ще твоѧ̑ и҆́ночєскїѧ по́двиги, ᲂу҆блажа́емъ бдѣ́нїѧ, непреста̑нныѧ мл҃твы, по́стъ, смире́нїе и҆ терпѣ́нїе, прпⷣбне ѻ҆́ч҃е ні́ле: но ѻ҆ба́че вѣ́мы, ꙗ҆́кѡ, а҆́ще бы и҆ тмочи́сленными ᲂу҆стна́ми моглѝ тѧ̀ ᲂу҆блажи́ти, нико́еже сло́во дово́льно бꙋ́детъ на похвалꙋ̀ твои́хъ пресла́вныхъ добродѣ́телей. То́йже бо є҆ди́нъ си́ленъ тѧ̀ по достоѧ́нїю просла́вити и҆ ᲂу҆блажи́ти, и҆́же глаго́летъ: прославлѧ́ющыѧ мѧ̀ просла́влю. И҆ ны́нѣ ᲂу҆̀бо, ꙗ҆́кѡ торже́ственный побѣди́тель врагѡ́въ спасе́нїѧ, прославлѧ́ѧйсѧ и҆ сѣдѝ на прⷭ҇то́лѣ съ двоюна́десѧтьми ста́рцы, ѿ на́съ же ча́дъ твои́хъ, а҆́ще и҆ ма́лое, ѻ҆ба́че прїимѝ приноше́нїе сїѐ:

Ра́дꙋйсѧ, гото́внѣйшїй защи́тниче во ѡ҆би́дахъ сꙋ́щимъ: ра́дꙋйсѧ, крѣ́пкїй щи́те ѿ льсти́вагѡ и҆ клеветли́вагѡ ѧ҆зы́ка.

Ра́дꙋйсѧ, ѿврати́телю ѿ грѣ́шникѡвъ пра́веднагѡ гнѣ́ва бж҃їѧ: ра́дꙋйсѧ, ка́ющихсѧ грѣ́шникѡвъ ско́рый пред̾ бг҃омъ застꙋ́пниче.

Ра́дꙋйсѧ, въ послѣ́дней бѣдѣ̀ сме́ртнѣй па́че наде́жды помо́щниче: ра́дꙋйсѧ, до́брый па́стырю ѻ҆ве́цъ хрⷭ҇то́выхъ.

Ра́дꙋйсѧ, ꙗ҆́кѡ мл҃твами твои́ми воспѧща́еши дре́внемꙋ человѣкоꙋбі́йцѣ дїа́волꙋ въ ко́знехъ є҆гѡ̀ проти́вꙋ рабѡ́въ бж҃їихъ: ра́дꙋйсѧ, ꙗ҆́кѡ, и҆̀хже ѻ҆́нъ мни́тсѧ и҆мѣ́ти во свое́й вла́сти, и҆ тѣ́хъ и҆сторга́еши.

Ра́дꙋйсѧ, ꙗ҆́кѡ посо́бїемъ твои́хъ мл҃твъ безнаде́жнїи и҆ ѿча́ѧннїи наде́жнїи быва́ютъ: ра́дꙋйсѧ, ꙗ҆́кѡ тебѣ̀, и҆̀хъ рꙋково́дствꙋющꙋ, и҆ ѻ҆нѝ црⷭ҇твїе нбⷭ҇ное ᲂу҆лꙋчи́ти ча́ютъ.

Ра́дꙋйсѧ, ꙗ҆́кѡ тебѣ̀, и҆̀хъ защища́ющꙋ, вра́жїѧ стрѣ́лы тѣ́хъ не ᲂу҆ѧзвлѧ́ютъ: ра́дꙋйсѧ, ꙗ҆́кѡ при твое́й по́мощи ѻ҆нѝ са́ми врага̀ ᲂу҆страша́ютъ.

Ра́дꙋйсѧ, прпⷣбне ѻ҆́ч҃е ні́ле, столобе́нскїй чꙋдотво́рче.

Конда́къ г҃і

Ѽ вели́кїй ᲂу҆го́дниче хрⷭ҇то́въ, прпⷣбне ѻ҆́ч҃е ні́ле! Во мно́гихъ потре́бныхъ на́мъ недоста́точни є҆смы̀, ѻ҆ба́че мнѡ́гаѧ и҆ нꙋ́жднаѧ ѡ҆ста́вивше, ѡ҆ є҆ди́нѣмъ тебѣ̀ ны́нѣ мо́лимъ и҆ про́симъ: хода́тайствꙋй и҆ молѝ ѡ҆ на́съ гдⷭ҇а на́шего бг҃а, да въ де́нь всемі́рнагѡ сꙋда̀ сподо́битъ ны̀ десна́гѡ стоѧ́нїѧ и҆ сопричте́тъ ли́кꙋ торжествꙋ́ющихъ воспѣва́ти вѣ́чнѡ є҆мꙋ̀ пѣ́снь: А҆ллилꙋ́їа.

Повто́ръ

Сей конда́къ глаго́лется три́жды, та́же і҆́косъ а҃-й и҆ конда́къ а҃-й.

І҆́косъ а҃

А҆́гг҃ла гдⷭ҇ь своего̀ посла̀ къ тебѣ̀, прпⷣбне ѻ҆́ч҃е, возвѣсти́ти, є҆гда̀ ᲂу҆зрѣ̀ твоѐ мꙋдрова́нїе ѡ҆ нбⷭ҇ныхъ, дабы̀ преше́лъ є҆сѝ и҆з̾ пре́жнїѧ пꙋсты́ни во ѻ҆́нꙋю, въ не́йже подвиза́лсѧ є҆сѝ; ты̀ же ни мѣ́ста, ни страны̀ ѻ҆́ныѧ вѣ́даѧ, но па́че на посла́вшаго тѧ̀ гдⷭ҇а ᲂу҆пова́ѧ и҆ вѣ́рꙋѧ, ꙗ҆́кѡ перна́тый поте́клъ є҆сѝ въ ню̀. Мы̀ же, ча̑да твоѧ̑, а҆́ки на пꙋтѝ тѧ̀ срѣта́юще, привѣ́тствꙋемъ, си́це возглаша́юще:

Ра́дꙋйсѧ, послꙋша́нїѧ на́мъ ѡ҆́бразъ ѡ҆ста́вивый: ра́дꙋйсѧ, любвѐ ра́ди хрⷭ҇то́вы всѧ̑ кра̑снаѧ мі́ра сегѡ̀ за ᲂу҆ме́ты вмѣни́вый.

Ра́дꙋйсѧ, мелхїседе́кꙋ подо́бенъ ꙗ҆ви́выйсѧ: ра́дꙋйсѧ, ꙗ҆́кѡ ты̀ роди́телей земны́хъ ᲂу҆таи́лъ є҆сѝ ѿ на́съ, да нбⷭ҇номꙋ ѻ҆ц҃ꙋ̀ въ сыновство̀ причте́шисѧ.

Ра́дꙋйсѧ, ꙗ҆́кѡ за лише́нїе сро́дства и҆ дрꙋ́жества стѧжа́лъ є҆сѝ съ нбⷭ҇ными содрꙋ́жество: ра́дꙋйсѧ, прпⷣбне, возненави́дѣвый мі́ра сегѡ̀ всѧ́кое наслажде́нїе.

Ра́дꙋйсѧ, ꙗ҆́кѡ за сїѐ воспрїѧ́лъ є҆сѝ нбⷭ҇ныѧ жи́зни ᲂу҆чрежде́нїе: ра́дꙋйсѧ, прпⷣбне, послꙋжи́вый гдⷭ҇ꙋ преподо́бїемъ и҆ пра́вдою.

Ра́дꙋйсѧ, за сїѐ ѿ негѡ̀ почте́нный че́стїю и҆ сла́вою вѣ́чною: ра́дꙋйсѧ, въ по́двизѣхъ дневны́хъ и҆ нощны́хъ тече́нїе жи́зни вре́менныѧ соверши́вый.

Ра́дꙋйсѧ, въ невече́рнемъ днѝ црⷭ҇твїѧ бж҃їѧ при́снѡ пребыва́ѧй: ра́дꙋйсѧ, тѣ́хъ бл҃ги́хъ, и҆́хже ѻ҆́ко не ви́дѣ и҆ ᲂу҆́хо не слы́ша, вѣ́чный наслѣ́дниче.

Ра́дꙋйсѧ, прпⷣбне ѻ҆́ч҃е ні́ле, столобе́нскїй чꙋдотво́рче.

Конда́къ а҃

И҆збра́нномꙋ ѿ пеле́нъ въ во́инство хрⷭ҇то́во и҆ впи́санномꙋ ѿ ю҆́ности въ кни́гꙋ живота̀ вѣ́чнагѡ, ди́вномꙋ въ чꙋдесѣ́хъ, прпⷣбномꙋ ѻ҆ц҃ꙋ̀ на́шемꙋ ні́лꙋ, всѝ, насыща́ющїисѧ чрез̾ него̀ подава́емыхъ неѡскꙋ́днѡ бж҃їихъ дарова́нїй, соше́дшесѧ воспои́мъ є҆мꙋ̀, ꙗ҆́кѡ хода́таю и҆ мл҃твенникꙋ ѡ҆ дꙋша́хъ на́шихъ, въ весе́лїи глаго́люще:

Ра́дꙋйсѧ, прпⷣбне ѻ҆́ч҃е ні́ле, столобе́нскїй чꙋдотво́рче.

Моли́твы

Ѽ вели́кїй ᲂу҆го́дниче, пресла́вный чꙋдотво́рче, со́браннагѡ здѣ̀ ѡ҆ тебѣ̀ ста́да хрⷭ҇то́ва бо́дрый па́стырю и҆ ѡ҆би́тели сеѧ̀ бг҃омъ да́нный нача́льниче, ні́ле всебл҃же́нне! Дꙋше́ю на нб҃сѝ прⷭ҇то́лꙋ бж҃їю предстоѧ́й и҆ трⷪ҇чныѧ сла́вы наслажда́ѧйсѧ, тѣ́ломъ же на землѝ въ бж҃е́ственномъ хра́мѣ се́мъ почива́ѧй и҆ ѿ негѡ̀ да́нною тѝ свы́ше бл҃года́тїю разли̑чнаѧ и҆сточа́ѧй чꙋдеса̀, при́зри ми́лостивымъ ѻ҆́комъ на предстоѧ́щыѧ честнѣ́й твое́й ра́це лю́ди и҆ просѧ́щыѧ си́льныѧ твоеѧ̀ по́мощи. Сѐ бо мы̀ въ безмѣ́рныхъ согрѣше́нїихъ ѡ҆скверни́вшїисѧ и҆ въ ти́нѣ страсте́й при́снѡ валѧ́ющїисѧ, пра́ведный гнѣ́въ бж҃їй на себѐ наведо́хомъ и҆ всѧ́кїѧ ми́лости недостѡ́йны сотвори́хомсѧ: тѣ́мже и҆ не смѣ́юще возвестѝ ѻ҆че́съ на́шихъ къ высотѣ̀ нбⷭ҇нѣй, нижѐ вознестѝ моле́бный гла́съ, се́рдцемъ сокрꙋше́ннымъ и҆ дꙋ́хомъ смире́ннымъ тебѣ̀ въ хода́тайство и҆ посо́бїе призыва́емъ. Ты̀ ᲂу҆̀бо, ꙗ҆́кѡ стѧжа́вый дерзнове́нїе, воздви́гни горѣ̀ прпⷣбныѧ твоѧ̑ рꙋ́цѣ, ꙗ҆́коже и҆ногда̀ чꙋ́дный ѻ҆́ный мѡѷсе́й бг҃ови́децъ а҆мали́ка побѣжда́ѧй, и҆ просте́ръ къ гдⷭ҇ꙋ творцꙋ̀ всѣ́хъ и҆ бг҃ꙋ те́плꙋю свою̀ мл҃твꙋ, и҆спросѝ цр҃кви бл҃гостоѧ́нїе, воздꙋ́ха бл҃горастворе́нїе, землѝ плодоно́сїе. И҆зба́ви же всѣ́хъ, вѣ́рою несꙋмне́нною къ бг҃ꙋ приходѧ́щихъ и҆ многоцѣлє́бныѧ мо́щи твоѧ̑ бл҃гоговѣ́йнѡ почита́ющихъ, ѿ всѧ́кихъ бѣ́дъ дꙋше́вныхъ и҆ тѣле́сныхъ, ѿ всѣ́хъ томле́нїй и҆ прило́гѡвъ дїа́вольскихъ. Бꙋ́ди печа̑льнымъ ᲂу҆тѣ́шитель, недꙋ́гꙋющымъ вра́чъ, напа́ствꙋємымъ помо́щникъ, наги̑мъ покрови́тель, вдови́цамъ застꙋ́пникъ, си̑рымъ защи́тникъ, младе́нцємъ пита́тель, ста̑рымъ ᲂу҆крѣпи́тель, стра́нствꙋющимъ пꙋтево́ждь, пла́вающимъ ко́рмчїй и҆ и҆схода́тайствꙋй всѣ̑мъ, крѣ́пкїѧ по́мощи твоеѧ̀ ᲂу҆се́рднѣ тре́бꙋющимъ, всѧ̑ ꙗ҆́же ко спасе́нїю полє́знаѧ. Ꙗ҆́кѡ да твои́ми мл҃твами наставлѧ́еми, пꙋ́ть на землѝ маловре́меннагѡ житїѧ̀ на́шегѡ безбѣ́днѣ соверши́мъ, ᲂу҆лꙋчи́мъ же на нб҃сѝ несконча́емый поко́й и҆ просла́вимъ кꙋ́пнѡ съ тобо́ю всѣ́хъ бл҃ги́хъ да́телѧ, є҆ди́наго въ трⷪ҇цѣ сла́вимагѡ бг҃а ѻ҆ц҃а̀ и҆ сн҃а и҆ ст҃а́гѡ дх҃а, ны́нѣ и҆ при́снѡ, и҆ во вѣ́ки вѣкѡ́въ. А҆ми́нь.

Ѽ прпⷣбне и҆ бг҃обл҃же́нне, па́стырю и҆ нача́льниче, ѻ҆́тче ні́ле! ты̀ ᲂу҆̀бо, ꙗ҆́кѡ и҆мѣ́ѧ ко влⷣцѣ хрⷭ҇тꙋ̀ дерзнове́нїе и҆ ко пречⷭ҇тѣй є҆гѡ̀ мт҃ри, прест҃ѣ́й бцⷣѣ, бꙋ́ди мл҃твенникъ и҆ помо́щникъ и҆ хода́тай ѡ҆ на́съ, недосто́йныхъ рабѣ́хъ твои́хъ, живꙋ́щихъ во ст҃ѣ́й ѻ҆би́тели се́й, є҆́йже ты̀ нача́льникъ бг҃оизбра́нной дрꙋжи́нѣ бра́тствꙋ семꙋ̀, и҆ ѡ҆ приходѧ́щихъ съ вѣ́рою къ цѣльбонѡ́снымъ мощє́мъ твои́мъ. Бꙋ́ди помога́ѧ и҆ застꙋпа́ѧ ѿ ѕла́гѡ на́шего сопроти́вника, ꙗ҆́кѡ, да твои́ми мл҃твами пребыва́ющїи на мѣ́стѣ се́мъ и҆ приходѧ́щїи съ вѣ́рою къ ра́цѣ моще́й твои́хъ и҆ на всѧ́комъ мѣ́стѣ призыва́ющїи тѧ̀ на по́мощь невреди́ми бꙋ́демъ ѿ бѣсѡ́въ и҆ ѕлы́хъ человѣ̑къ, сла́вꙋ и҆ бл҃годаре́нїе возсыла́юще ѻ҆ц҃ꙋ̀, сн҃ꙋ и҆ ст҃о́мꙋ дх҃ꙋ, ны́нѣ и҆ прⷭ҇нѡ и҆ во вѣ́ки вѣкѡ́въ. А҆ми́нь.