Кондак 1
Взбра́нному Воево́де и Го́споду Иису́су после́дствуя, моли́твою, посто́м и труды́ плотски́я стра́сти победи́л еси́: те́мже, я́ко до́бр во́ин, увенча́лся еси́ от Царя́ Христа́, Его́же непреста́й те́пле моли́ти о на́с, рабе́х твои́х, преподо́бне, да тобо́ю изба́вльшеся от бе́д, при́сно пое́м ти́:
Ра́дуйся, Ферапо́нте, уго́дниче Христо́в и чудотво́рче.
Икос 1
От младе́нчества твоего́ и да́же до престаре́ния, те́лом и душе́ю рабо́тал еси́ Го́споду Иису́су Христу́ и Пречи́стей Его́ Ма́тери, и се́ ны́не душа́ твоя́ ликовству́ет в Его́ небе́сных оби́телех, те́ло же твое́ зде́ почива́я, сия́ет чудесы́. Сего́ ра́ди вопие́м ти́ ра́достно:
Ра́дуйся, во сле́д Христа́ неукло́нно ше́дый; ра́дуйся, сло́во Его́ соблюда́вый тве́рдо.
Ра́дуйся, во сла́ву Христа́ Бо́га подвиза́выйся; ра́дуйся, Пречи́стую Христа́ Ма́терь неумо́лчно сла́вивый.
Ра́дуйся, от Христа́ и Ма́тери Его́ просла́вленный; ра́дуйся, имы́й дерзнове́ние ве́лие ко Христу́.
Ра́дуйся, защи́тниче оби́тели Лу́жецкия; ра́дуйся, храни́телю страны́ Можа́йския.
Ра́дуйся, побо́рниче кре́пкий за держа́ву Росси́йскую; ра́дуйся, добропобе́дный во́ине Правосла́вныя Це́ркве.
Ра́дуйся, все́м призыва́ющым тя́ подаю́щий ско́рую по́мощь от Христа́ Бо́га.
Ра́дуйся, Ферапо́нте, уго́дниче Христо́в и чудотво́рче.
Кондак 2
Пребыва́я в жите́йстей молве́, не услади́лся еси́ благи́ми, ниже́ опеча́лился еси́ злы́ми ми́ра сего́, но взира́я к по́чести вы́шняго зва́ния, под бре́менем мирски́х суе́т па́мятствовал еси́ всегда́ пе́ти Бо́гу: Аллилу́иа.
Икос 2
Усе́рдно де́лая дела́ мирска́го служе́ния твоего́, преподо́бне, еди́но то́чию име́л еси́ в се́рдце твое́м: да не осужде́н предста́неши на стра́шнем Суди́щи Го́спода Сла́вы, и ны́не благоче́стно к тому́ себе́ предугото́вав, слы́шиши от все́х:
Ра́дуйся, у́м тво́й впери́вый в го́рняя; ра́дуйся, от ми́ра тле́ннаго к нетле́нному о́чи возведы́й.
Ра́дуйся, па́че земны́х бла́г возлюби́вый нищету́ духо́вную; ра́дуйся, в печа́ли о гресе́х сниска́вый себе́ утеше́ние.
Ра́дуйся, кро́тостию благоукраси́выйся; ра́дуйся, взалка́вый пра́ведности пред Бо́гом.
Ра́дуйся, согреша́ющым благоснисходи́тельный; ра́дуйся, стра́ждущым сострада́вый те́пле.
Ра́дуйся, ко все́м благоприве́тливый; ра́дуйся, все́м ве́дущим тя́ прелюбе́зный.
Ра́дуйся, ми́лостыни подава́вый ще́дро.
Ра́дуйся, Ферапо́нте, уго́дниче Христо́в и чудотво́рче.
Кондак 3
Да не зло́ба измени́т твоего́ блага́го ра́зума, та́йно от при́сных твои́х отше́л еси́ во святу́ю оби́тель блаже́ннаго Фео́дора, да та́мо свобо́дь мирски́х суе́т, воспое́ши Бо́гу: Аллилу́иа.
Икос 3
От Бо́га науче́нный о тебе́ блаже́нный Фео́дор уразуме́ тя́, уже́ искуше́нна в посте́ и моли́тве, ра́достно прия́т тя́ во оби́тель свою́, и в де́нь прише́ствия твоего́ к нему́ облече́ тя́ в чи́н и́ноческий, со все́ми сподви́жники свои́ми вопия́ тебе́:
Ра́дуйся, вся́ кра́сная ми́ра презре́вый; ра́дуйся, от ми́ра льсти́ваго излете́вый, я́ко пти́ца от се́ти.
Ра́дуйся, па́че Бо́гу, не́жели челове́ком, рабо́тати избра́вый; ра́дуйся, и́ночество ра́ди до́браго Бо́гу де́лания прия́вый.
Ра́дуйся, я́ко уже́ в ми́ре и́нок иску́сен угото́вался еси́; ра́дуйся, всего́ ся́ Христу́, я́ко чи́стую же́ртву, принесы́й.
Ра́дуйся, ра́ди Христа́ отверги́йся себе́ сама́го; ра́дуйся, Христо́в Кре́ст подъя́вый и́стинно.
Ра́дуйся, со Христо́м бы́ти при́сно возжела́вый; ра́дуйся, Христа́ Бо́га все́ю душе́ю возлюби́вый.
Ра́дуйся, Христу́ Бо́гу возлю́бленный.
Ра́дуйся, Ферапо́нте, уго́дниче Христо́в и чудотво́рче.
Кондак 4
Ста́рцу, ему́же вруче́н бы́л еси́, я́ко отцу́ рабо́тал еси́, испове́дая же ему́ на вся́к де́нь грехи́ твоя́, прогоня́л еси́ от себе́ лука́выя по́мыслы, сего́ ра́ди с ни́м чи́стым се́рдцем вопия́л еси́ Бо́гу: Аллилу́иа.
Икос 4
По́двигом и́ночества до́бре подвиза́яся, не мни́л еси́ ся́ до́брое что́ сотво́рша, но мни́л ся́ непотре́бна бы́ти, и припа́дая стопа́м спо́стников твои́х, сле́зно моли́л еси́ и́х, умоли́ти Пречи́стую Богоро́дицу, да спасе́т тя́ от гее́нны о́гненныя. Сие́ ве́дяще, вопие́м ти́:
Ра́дуйся, слеза́ми покая́ния очи́стивый ду́шу свою́; ра́дуйся, низложи́вый в себе́ ду́ха горды́ни.
Ра́дуйся, научи́выйся зре́ти своя́ то́чию согреше́ния; ра́дуйся, не осужда́вый ни еди́наго от согреша́вших.
Ра́дуйся, братолю́бием утиша́вый прекосло́вия; ра́дуйся, ко все́м в послуша́нии вда́вый тя́ неукло́нно.
Ра́дуйся, моли́твами бра́тии подкрепле́нный; ра́дуйся, не на себе́ сама́го, а на Пречи́стую Богоро́дицу упова́вый.
Ра́дуйся, во все́х труде́х твои́х благослове́нный от Пречи́стыя Богоро́дицы; ра́дуйся, засту́пницу себе́ стяжа́вый Благослове́нную Ма́терь Христа́ Бо́га.
Ра́дуйся, Е́ю от ве́чныя му́ки свобожде́нный.
Ра́дуйся, Ферапо́нте, уго́дниче Христо́в и чудотво́рче.
Кондак 5
В то́й же оби́тели блаже́ннаго Фео́дора име́л еси́ равноле́тна тебе́ дру́га, спо́стника и сомоли́твенника, преподо́бнаго Кири́лла, с ни́мже, от преподо́бнаго Се́ргия науче́нный, еди́нем се́рдцем и еди́неми усты́, непреста́нно пе́л Бо́гу: Аллилу́иа.
Икос 5
Спо́стницы твои́, ви́девше тя́, зело́ преспева́юща в до́бром и́ноческом житии́, в смире́нии и послуша́нии, в целому́дрии и братолю́бии, сла́виша Бо́га и Пречи́стую, да́вших ти́ такову́ю благода́ть, мы́ же, уве́девше о се́м, вопие́м ти́:
Ра́дуйся, и́ноче, и́ноков похвало́; ра́дуйся, спо́стниче преподо́бнаго Кири́лла.
Ра́дуйся, ве́рный учениче́ преподо́бнаго Се́ргия; ра́дуйся, целому́дрия о́браз яви́вый собо́ю и́стинный.
Ра́дуйся, поще́нием укрепи́вый се́рдце твое́; ра́дуйся, бде́нием окрили́вый ду́шу твою́.
Ра́дуйся, моли́твами твои́ми благоуха́ющий Бо́гу; ра́дуйся, а́нгельския чистоты́ рачи́телю.
Ра́дуйся, херуви́мскаго богомы́слия подража́телю; ра́дуйся, серафи́мския к Бо́гу любве́ ревни́телю.
Ра́дуйся, Ферапо́нте, уго́дниче Христо́в и чудотво́рче.
Кондак 6
Обходя́ страну́ Белоезе́рскую, обре́л еси́ мно́гая ме́ста кра́сная и удо́бная, во е́же та́мо в коне́чнем безмо́лвии пребыва́ти. И возжа́ждал еси́ сего́ безмо́лвия, да в не́м вта́йне Бо́гу зове́ши: Аллилу́иа.
Икос 6
По гла́су Пречи́стыя прише́д в страну́ Белоезе́рскую со дру́гом твои́м, преподо́бным Кири́ллом, созда́л еси́ не дале́че от него́ в де́брех безмо́лвную ке́ллию, да в не́й вта́йне усугу́биши труды́ твоя́ пред Бо́гом. Мы́ же, уве́девше я́, вопие́м ти́:
Ра́дуйся, ра́ди Бо́га возжада́вый тиша́йшаго безмо́лвия; ра́дуйся, устрое́нием Пречи́стыя приведе́нный в пусты́ню со дру́гом твои́м.
Ра́дуйся, со еди́ным то́чию дру́гом твои́м разделя́вый безмо́лвие пусты́ни; ра́дуйся, и от сего́ дру́га разлучи́выйся, да с еди́ным Христо́м бу́деши.
Ра́дуйся, пусты́нною ке́ллиею па́че ца́рскаго черто́га весели́выйся; ра́дуйся, в не́й дни́ в труде́х, но́щи же в бде́ниих проводи́вый.
Ра́дуйся, ра́ди Христа́ от тя́жких к тяжча́йшим трудо́м устремля́выйся; ра́дуйся, та́йнаго де́лания пред Отце́м Небе́сным дости́гнувый.
Ра́дуйся, гла́сом твои́м моли́твенным огласи́вый де́бри пусты́нныя; ра́дуйся, немо́лчно твои́ми усты́ сла́вивый и́мя Христо́во.
Ра́дуйся, в уме́ и се́рдце име́вый Иису́са Сладча́йшаго.
Ра́дуйся, Ферапо́нте, уго́дниче Христо́в и чудотво́рче.
Кондак 7
Разбо́йников я́рость нището́ю и терпе́нием посрами́л еси́, нощны́х пти́ц кли́ки и звере́й шата́ние победи́л еси́ ве́рою во Христа́, труды́ же неусы́пными до конца́ сокруши́л еси́ по́хоти и не́мощи плотски́я, немо́лчно вопия́ Бо́гу: Аллилу́иа.
Икос 7
Дале́че зело́ слы́шано бы́сть богоуго́дное житие́ твое́, преподо́бне. И от коне́ц земли́ Ру́сския притеко́ша к тебе́ лю́бящии безмо́лвие. Ты́ же си́х прие́мляй с любо́вию, я́ко оте́ц о обраще́нии заблу́ждших ча́д ра́довался еси́. Те́мже и мы́ вопие́м ти́:
Ра́дуйся, дре́вних отце́в пустынножи́телей подража́телю; ра́дуйся, зно́й, хла́д и гла́д в пусты́ни с терпе́нием понесы́й.
Ра́дуйся, тяготу́ дневну́ю и стра́х нощны́й любо́вию ко Христу́ победи́вый; ра́дуйся, не устраши́выйся ни звере́й ди́виих, ни злы́х челове́ков.
Ра́дуйся, до́блий низложи́телю искуше́ний диа́вольских; ра́дуйся, за та́йныя твоя́ по́двиги в пусты́ни для Бо́га просла́вленный от Бо́га я́ве.
Ра́дуйся, я́ко и в пусты́ни Госпо́дь соде́ла тя́ вождя́ и́щущим спасе́ния; ра́дуйся, благоукраси́вый пусты́ню оби́телию и́ночествующих.
Ра́дуйся, неиску́сных и́ноков до́брый вождю́ ко Христу́; ра́дуйся, освяти́вый пусты́ню устрое́нием хра́ма Бо́жия.
Ра́дуйся, в хра́ме со ученики́ твои́ми воспева́вый Бо́гу ра́достно.
Ра́дуйся, Ферапо́нте, уго́дниче Христо́в и чудотво́рче.
Кондак 8
Слы́шав о тебе́ и о сподви́жниках твои́х, преподо́бне, благове́рный кня́зь Андре́й все́м се́рдцем вознесе́ хвалу́ Бо́гу, благослови́вшему о́тчину его́ таковы́ми обита́тельми, и воспе́ ра́достно Бо́гу: Аллилу́иа.
Икос 8
Возжела́ благове́рный кня́зь Андре́й прия́ти благослове́ние от святы́ни твоея́, преподо́бне, и пригласи́ тя́ во сво́й гра́д, ты́ же, моле́нию его́ и бра́тии повину́яся, ле́та ста́рости и тру́д далеча́йшаго пути́ презре́в, ско́ро ко кня́зю прите́кл еси́ слы́шай от него́:
Ра́дуйся, ле́ты, наипа́че же благому́дрием укра́шенный; ра́дуйся, подви́жниче Христо́в неизме́нный.
Ра́дуйся, Ду́ха Свята́го преиспо́лненный; ра́дуйся, Ма́терию Бо́га возлю́бленный.
Ра́дуйся, и́мени Ея́ оби́тель и́ноков созда́вый; ра́дуйся, ста́ду твоему́ о́браз и́стинный.
Ра́дуйся, чадолюби́вый о́тче и́ноков; ра́дуйся, и́ноки твои́ми люби́мый, я́ко оте́ц чадолюби́вейший.
Ра́дуйся, все́х притека́ющих к тебе́ исполня́яй ра́дости; ра́дуйся, все́м подая́й ско́рое утеше́ние.
Ра́дуйся, любве́ и ми́ра насади́телю.
Ра́дуйся, Ферапо́нте, уго́дниче Христо́в и чудотво́рче.
Кондак 9
Ра́достию возра́довася благове́рный кня́зь Андре́й, ви́дев твое́ к нему́ прише́ствие и, да не разлучи́тся с тобо́ю, моле́нием умоли́ тя́, бли́з него́ созда́ти но́вую оби́тель и́ноков, в не́йже бы вы́ну пе́ти Бо́гу: Аллилу́иа.
Икос 9
А́ще бо зело́ отрица́лся еси́, оба́че, не кня́зю то́чию, но Самому́ Бо́гу повину́яся, на ме́сте кра́снем бли́з гра́да Можа́йска созда́л еси́ хра́м Пречи́стыя и но́вую оби́тель и́ноков, и́мже са́м в наста́вника бы́л еси́ до конца́ дне́й твои́х, те́мже слы́шиши от все́х:
Ра́дуйся, благо́е жела́ние кня́зя благове́рнаго соверши́вый му́дре; ра́дуйся, вторы́я своея́ оби́тели и́ноков во и́мя Богома́тери учреди́телю.
Ра́дуйся, в сию́ оби́тель собра́вый мно́жество спаса́ющихся; ра́дуйся, насади́телю в не́й до́браго жития́.
Ра́дуйся, напои́вый ю́ твои́ми наставле́нии; ра́дуйся, возрасти́вый ю́ мно́гими слеза́ми твои́ми.
Ра́дуйся, я́ко мно́гими труды́ и благи́ми по́двиги твои́ми благоукраси́л еси́ ю́; ра́дуйся, я́ко моли́твами твои́ми твори́ши ю́ чи́сту неве́сту Христо́ву.
Ра́дуйся, ра́достно преда́вый в не́й Христу́ ду́шу твою́ чи́стую; ра́дуйся, те́лом твои́м пребыва́яй при́сно в се́й оби́тели твое́й.
Ра́дуйся, из нея́ сия́яй ми́рови чудесы́.
Ра́дуйся, Ферапо́нте, уго́дниче Христо́в и чудотво́рче.
Кондак 10
Чи́стая душа́ твоя́, преподо́бне, мно́гими по́двиги и скорбьми́ усугу́бившая своя́ тала́нты, принесе́ к Да́вшему я́ Бо́гу, и вни́де в ра́дость Го́спода своего́, ны́не вопию́щи Ему́ ра́достно: Аллилу́иа.
Икос 10
А́ще и до конца́ дне́й твои́х не престава́л еси́ жела́ти возвраще́ния твоего́ в пе́рвую твою́ оби́тель, Белоезе́рскую, но прите́кл же к пе́рвейшей и вожделе́ннейшей оби́тели небе́сней, оста́вил еси́ в покро́в и защи́ту вторы́я оби́тели твоея́, Лу́жецкия, свято́е те́ло твое́, и́мже храни́мии зове́м ти́:
Ра́дуйся, на земли́ пожи́вый равноа́нгельно; ра́дуйся, на небеси́ лику́ющий со а́нгелы.
Ра́дуйся, на Небеси́ вчине́нный со все́ми святы́ми; ра́дуйся, на земли́ чудесы́ просла́вленный.
Ра́дуйся, ве́рный храни́телю оби́тели, в не́йже почива́ет те́ло твое́; ра́дуйся, избавля́яй оби́тель сию́ от разруше́ния.
Ра́дуйся, смиря́яй в не́й враго́в иноплеме́нных; ра́дуйся, низлага́яй все́х ея́ ви́димых и неви́димых вра́г.
Ра́дуйся, вся́кия напа́сти от нея́ прогоня́яй; ра́дуйся, подая́й на́м моли́твами твои́ми вся́ благопотре́бная к ве́чней жи́зни.
Ра́дуйся, разруши́телю вражды́ и насади́телю братолю́бия.
Ра́дуйся, Ферапо́нте, уго́дниче Христо́в и чудотво́рче.
Кондак 11
О́браз бы́л еси́ ста́ду твоему́ во все́м и яви́лся еси́ все́м, гряду́щым с тобо́ю ко Христу́ по те́сному пути́, во́ждь к ве́чней сла́ве, в не́йже ны́не со все́ми святы́ми вопие́ши Бо́гу: Аллилу́иа.
Икос 11
Пе́ние на́ше тебе́ побежда́ется оби́лием и вели́чием по́двигов и вся́ких доброде́телей и чуде́с твои́х. Оба́че любо́вию к тебе́ горя́щии, молча́ти не могу́ще, мо́лим: приими́ от на́с сицевы́я, а́ще и вельми́ ску́дныя, похвалы́:
Ра́дуйся, о́бразе смире́ния, кро́тости и послуша́ния; ра́дуйся, похвало́ де́вствующым.
Ра́дуйся, в душе́вных по́двизех и в теле́сных труде́х помо́щниче на́ш; ра́дуйся, исцеля́яй на́с от страсте́й.
Ра́дуйся, врачу́ ско́рый в неду́зех и боле́знех; ра́дуйся, засту́пниче си́рых и все́х оби́димых.
Ра́дуйся, уте́шителю на́ш в ско́рбех и беда́х и вся́ких напа́стех; ра́дуйся, от огня́ и от потопле́ния избавля́яй на́с.
Ра́дуйся, пита́телю на́ш во дни́ гла́да и ску́дости; ра́дуйся, подая́й на́м оби́лие плодо́в и благорастворе́ние возду́хов.
Ра́дуйся, я́ко Бо́га твори́ши ко все́м на́м ми́лостива твои́ми хода́тайствы к Нему́.
Ра́дуйся, Ферапо́нте, уго́дниче Христо́в и чудотво́рче.
Кондак 12
Пою́ще твое́ по Бо́зе житие́, тво́й и́ночествующым о́браз, и все́м твою́, преподо́бне, по́мощь благодаря́ще, сла́вим просла́вльших тя́, Бо́га и пречи́стую Богоро́дицу, и вопие́м И́м с тобо́ю: Аллилу́иа.
Икос 12
Пропове́дник Правосла́вия яви́лся еси́, преподо́бне, гра́ду твоему́ и окре́стней стране́, и дале́че от ни́х моли́твами твои́ми упраздня́еши вся́кая уче́ния лжи́вая льсти́вых и лука́вых челове́ков, мы́ же с тобо́ю в пра́вой ве́ре утвержда́емии вопие́м ти́:
Ра́дуйся, пра́вило ве́ры Христо́вы; ра́дуйся, о́бразе и́стинный любве́ к Бо́гу.
Ра́дуйся, неусы́пный па́стырю ста́да Христо́ва; ра́дуйся, нече́стия обличи́телю.
Ра́дуйся, низложи́телю злове́рных; ра́дуйся, утвержде́ние ве́рных.
Ра́дуйся, все́м правосла́вным охрани́телю; ра́дуйся, все́м заблужда́ющым подая́й ско́рое исправле́ние.
Ра́дуйся, тму́ неве́рия разгоня́яй; ра́дуйся, все́х приводя́й ко Христу́ Бо́гу.
Ра́дуйся, Ферапо́нте, уго́дниче Христо́в и чудотво́рче.
Кондак 13
О преблаже́нне и досточу́дне о́тче на́ш Ферапо́нте! Все́х на́с, ны́не тебе́ усе́рдно моля́щихся, от бе́д и ве́чных му́к изба́ви, прия́тными Бо́гу твои́ми моли́твами, да пое́м с тобо́ю Бо́гу: Аллилу́иа.
Повтор
Этот кондак читается трижды, затем икос 1-й и кондак 1-й.
Икос 1
От младе́нчества твоего́ и да́же до престаре́ния, те́лом и душе́ю рабо́тал еси́ Го́споду Иису́су Христу́ и Пречи́стей Его́ Ма́тери, и се́ ны́не душа́ твоя́ ликовству́ет в Его́ небе́сных оби́телех, те́ло же твое́ зде́ почива́я, сия́ет чудесы́. Сего́ ра́ди вопие́м ти́ ра́достно:
Ра́дуйся, во сле́д Христа́ неукло́нно ше́дый; ра́дуйся, сло́во Его́ соблюда́вый тве́рдо.
Ра́дуйся, во сла́ву Христа́ Бо́га подвиза́выйся; ра́дуйся, Пречи́стую Христа́ Ма́терь неумо́лчно сла́вивый.
Ра́дуйся, от Христа́ и Ма́тери Его́ просла́вленный; ра́дуйся, имы́й дерзнове́ние ве́лие ко Христу́.
Ра́дуйся, защи́тниче оби́тели Лу́жецкия; ра́дуйся, храни́телю страны́ Можа́йския.
Ра́дуйся, побо́рниче кре́пкий за держа́ву Росси́йскую; ра́дуйся, добропобе́дный во́ине Правосла́вныя Це́ркве.
Ра́дуйся, все́м призыва́ющым тя́ подаю́щий ско́рую по́мощь от Христа́ Бо́га.
Ра́дуйся, Ферапо́нте, уго́дниче Христо́в и чудотво́рче.
Кондак 1
Взбра́нному Воево́де и Го́споду Иису́су после́дствуя, моли́твою, посто́м и труды́ плотски́я стра́сти победи́л еси́: те́мже, я́ко до́бр во́ин, увенча́лся еси́ от Царя́ Христа́, Его́же непреста́й те́пле моли́ти о на́с, рабе́х твои́х, преподо́бне, да тобо́ю изба́вльшеся от бе́д, при́сно пое́м ти́:
Ра́дуйся, Ферапо́нте, уго́дниче Христо́в и чудотво́рче.
Молитвы
О всечестны́й и преблаже́нный о́тче на́ш Ферапо́нте! Тебе́ даде́ся благода́ть моли́тися о на́с, и ве́мы, я́ко предстоя́ Престо́лу Го́спода, при́сно явля́еши любо́вь твою́ к на́м непреста́нными о на́с твои́ми хода́тайствы. Но поне́же мы́ ежеча́сно умножа́юще грехи́ на́ша, кра́йняго твоего́ отвраще́ния досто́йни сотвори́хомся, сего́ ра́ди в покая́нии, со слеза́ми припа́дающе, мо́лим тя́: не премени́ твоея́ ми́лости к на́м на гне́в за нече́стия и скве́рны на́ша, яви́ у́бо на́м ми́лость твою́ до конца́ и согреша́ющих на́с очи́сти твои́ми моли́твами, возведи́ к покая́нию, укрепи́ на дела́ блага́я, сохрани́ в правосла́вии и во вся́кой святы́ни. Да́руй на́м пребыва́ти в ми́ре, тишине́ и братолю́бии, испроси́ на́м времена́ безмяте́жна и изоби́лие плодо́в земны́х, изба́ви от огня́ и от потопле́ния и от лю́тых боле́зней и от смертоно́сныя я́звы. Посли́ тружда́ющымся благи́й успе́х, путеше́ствующым пу́ть безпреткнове́нный, в мо́ри пла́вающым приста́нище ти́хое, плене́нным осла́бу и освобожде́ние, си́рым по́мощь и заступле́ние. Умоли́ Бо́га: да изведе́т от поги́бели живо́т на́ш; да любо́вию твое́ю огражде́ннии, благода́рственная при́сно пое́м, просла́вившему тя́, Го́споду Иису́су Христу́, Ему́же подоба́ет вся́кая сла́ва и че́сть, со Безнача́льным Его́ Отце́м и с Пресвяты́м и Животворя́щим Его́ Ду́хом во ве́ки веко́в. Ами́нь.
Конда́къ а҃
Взбра́нномꙋ воево́дѣ и҆ гдⷭ҇ꙋ і҆и҃сꙋ послѣ́дствꙋѧ, мл҃твою, посто́мъ и҆ трꙋды̀ плотскі̑ѧ стра̑сти побѣди́лъ є҆сѝ: тѣ́мже, ꙗ҆́кѡ до́бръ во́инъ, ᲂу҆вѣнча́лсѧ є҆сѝ ѿ цр҃ѧ̀ хрⷭ҇та̀, є҆го́же непреста́й те́плѣ моли́ти ѡ҆ на́съ, рабѣ́хъ твои́хъ, прпⷣбне, да тобо́ю и҆зба́вльшесѧ ѿ бѣ́дъ, при́снѡ пое́мъ тѝ:
Ра́дꙋйсѧ, ѳерапо́нте, ᲂу҆го́дниче хрⷭ҇то́въ и҆ чꙋдотво́рче.
І҆́косъ а҃
Ѿ младе́нчества твоегѡ̀ и҆ да́же до престарѣ́нїѧ, тѣ́ломъ и҆ дꙋше́ю рабо́талъ є҆сѝ гдⷭ҇ꙋ і҆и҃сꙋ хрⷭ҇тꙋ̀ и҆ пречⷭ҇тѣй є҆гѡ̀ мт҃ри, и҆ сѐ ны́нѣ дꙋша̀ твоѧ̀ ликовствꙋ́етъ въ є҆гѡ̀ нбⷭ҇ныхъ ѡ҆би́телехъ, тѣ́ло же твоѐ здѣ̀ почива́ѧ, сїѧ́етъ чꙋдесы̑: сегѡ̀ ра́ди вопїе́мъ тѝ ра́достнѡ:
Ра́дꙋйсѧ, во слѣ́дъ хрⷭ҇та̀ неꙋкло́ннѡ ше́дый: ра́дꙋйсѧ, сло́во є҆гѡ̀ соблюда́вый тве́рдѡ.
Ра́дꙋйсѧ, во сла́вꙋ хрⷭ҇та̀ бг҃а подвиза́выйсѧ: ра́дꙋйсѧ, пречⷭ҇тꙋю хрⷭ҇та̀ мт҃рь неꙋмо́лчнѡ сла́вивый.
Ра́дꙋйсѧ, ѿ хрⷭ҇та̀ и҆ мт҃ри є҆гѡ̀ просла́вленный: ра́дꙋйсѧ, и҆мы́й дерзнове́нїе ве́лїе ко хрⷭ҇тꙋ̀.
Ра́дꙋйсѧ, защи́тниче ѡ҆би́тели лꙋ́жецкїѧ: ра́дꙋйсѧ, храни́телю страны̀ можа́йскїѧ.
Ра́дꙋйсѧ, побо́рниче крѣ́пкїй за держа́вꙋ рѡссі́йскꙋю: ра́дꙋйсѧ, добропобѣ́дный во́ине правосла́вныѧ цр҃кве.
Ра́дꙋйсѧ, всѣ̑мъ призыва́ющымъ тѧ̀ подаю́щїй ско́рꙋю по́мощь ѿ хрⷭ҇та̀ бг҃а.
Ра́дꙋйсѧ, ѳерапо́нте, ᲂу҆го́дниче хрⷭ҇то́въ и҆ чꙋдотво́рче.
Конда́къ в҃
Пребыва́ѧ въ жите́йстѣй молвѣ̀, не ᲂу҆слади́лсѧ є҆сѝ бл҃ги́ми, нижѐ ѡ҆печа́лилсѧ є҆сѝ ѕлы́ми мі́ра сегѡ̀, но взира́ѧ къ по́чести вы́шнѧгѡ зва́нїѧ, под̾ бре́менемъ мїрски́хъ сꙋе́тъ па́мѧтствовалъ є҆сѝ всегда̀ пѣ́ти бг҃ꙋ: А҆ллилꙋ́їа.
І҆́косъ в҃
Оу҆се́рднѡ дѣ́лаѧ дѣла̀ мїрска́гѡ слꙋже́нїѧ твоегѡ̀, прпⷣбне, є҆ди́но то́чїю и҆мѣ́лъ є҆сѝ въ се́рдцѣ твое́мъ: да не ѡ҆сꙋжде́нъ предста́неши на стра́шнѣмъ сꙋди́щи гдⷭ҇а сла́вы, и҆ ны́нѣ бл҃гоче́стнѡ къ томꙋ̀ себѣ̀ пред̾ꙋгото́вавъ, слы́шиши ѿ всѣ́хъ:
Ра́дꙋйсѧ, ᲂу҆́мъ тво́й впери́вый въ го́рнѧѧ: ра́дꙋйсѧ, ѿ мі́ра тлѣ́ннагѡ къ нетлѣ́нномꙋ ѻ҆́чи возведы́й.
Ра́дꙋйсѧ, па́че земны́хъ бла̑гъ возлюби́вый нищетꙋ̀ дꙋхо́внꙋю: ра́дꙋйсѧ, въ печа́ли ѡ҆ грѣсѣ́хъ сниска́вый себѣ̀ ᲂу҆тѣше́нїе.
Ра́дꙋйсѧ, кро́тостїю благоꙋкраси́выйсѧ: ра́дꙋйсѧ, взалка́вый пра́ведности пред̾ бг҃омъ.
Ра́дꙋйсѧ, согрѣша́ющымъ бл҃госнисходи́тельный: ра́дꙋйсѧ, стра́ждꙋщымъ сострада́вый те́плѣ.
Ра́дꙋйсѧ, ко всѣ̑мъ бл҃гопривѣ́тливый: ра́дꙋйсѧ, всѣ́мъ вѣ́дꙋщымъ тѧ̀ прелюбе́зный.
Ра́дꙋйсѧ, ми́лѡстыни подава́вый ще́дрѡ.
Ра́дꙋйсѧ, ѳерапо́нте, ᲂу҆го́дниче хрⷭ҇то́въ и҆ чꙋдотво́рче.
Конда́къ г҃
Да не ѕло́ба и҆змѣни́тъ твоегѡ̀ блага́гѡ ра́зꙋма, та́йнѡ ѿ при́сныхъ твои́хъ ѿше́лъ є҆сѝ во ст҃ꙋ́ю ѡ҆би́тель блаже́ннагѡ ѳео́дѡра, да та́мѡ свобо́дь мїрски́хъ сꙋе́тъ, воспое́ши бг҃ꙋ: А҆ллилꙋ́їа.
І҆́косъ г҃
Ѿ бг҃а наꙋче́нный ѡ҆ тебѣ̀ блаже́нный ѳео́дѡръ ᲂу҆разꙋмѣ̀ тѧ̀, ᲂу҆жѐ и҆скꙋше́нна въ постѣ̀ и҆ мл҃твѣ, ра́достнѡ прїѧ́тъ тѧ̀ во ѡ҆би́тель свою̀, и҆ въ де́нь прише́ствїѧ твоегѡ̀ къ немꙋ̀ ѡ҆блечѐ тѧ̀ въ чи́нъ и҆́ноческїй, со всѣ́ми сподви̑жники свои́ми вопїѧ̀ тебѣ̀:
Ра́дꙋйсѧ, всѧ̑ кра̑снаѧ мі́ра презрѣ́вый: ра́дꙋйсѧ, ѿ мі́ра льсти́вагѡ и҆злетѣ́вый, ꙗ҆́кѡ пти́ца ѿ сѣ́ти.
Ра́дꙋйсѧ, па́че бг҃ꙋ, не́жели человѣ́кѡмъ, рабо́тати и҆збра́вый: ра́дꙋйсѧ, и҆́ночество ра́ди до́брагѡ бг҃ꙋ дѣ́ланїѧ прїѧ́вый.
Ра́дꙋйсѧ, ꙗ҆́кѡ ᲂу҆жѐ въ мі́ре и҆́нокъ и҆скꙋ́сенъ ᲂу҆гото́валсѧ є҆сѝ: ра́дꙋйсѧ, всего̀ сѧ̀ хрⷭ҇тꙋ̀, ꙗ҆́кѡ чи́стꙋю же́ртвꙋ, принесы́й.
Ра́дꙋйсѧ, ра́ди хрⷭ҇та̀ ѿвергі́йсѧ себє̀ сама́го: ра́дꙋйсѧ, хрⷭ҇то́въ кре́стъ под̾ѧ́вый и҆́стиннѡ.
Ра́дꙋйсѧ, со хрⷭ҇то́мъ бы́ти при́снѡ возжела́вый: ра́дꙋйсѧ, хрⷭ҇та̀ бг҃а все́ю дꙋше́ю возлюби́вый.
Ра́дꙋйсѧ, хрⷭ҇тꙋ̀ бг҃ꙋ возлю́бленный.
Ра́дꙋйсѧ, ѳерапо́нте, ᲂу҆го́дниче хрⷭ҇то́въ и҆ чꙋдотво́рче.
Конда́къ д҃
Ста́рцꙋ, є҆мꙋ́же врꙋче́нъ бы́лъ є҆сѝ, ꙗ҆́кѡ ѻ҆тцꙋ̀ рабо́талъ є҆сѝ, и҆сповѣ́даѧ же є҆мꙋ̀ на всѧ́къ де́нь грѣхѝ твоѧ̑, прогонѧ́лъ є҆сѝ ѿ себє̀ лꙋка̑выѧ по́мыслы, сегѡ̀ ра́ди съ ни́мъ чи́стымъ се́рдцемъ вопїѧ́лъ є҆сѝ бг҃ꙋ: А҆ллилꙋ́їа.
І҆́косъ д҃
По́двигомъ и҆́ночества до́брѣ подвиза́ѧсѧ, не мни́лъ є҆сѝ сѧ̀ до́брое что̀ сотво́рша, но мни́лъ сѧ̀ непотре́бна бы́ти, и҆ припа́даѧ стопа́мъ спо́стникѡвъ твои́хъ, сле́знѡ моли́лъ є҆сѝ и҆̀хъ, ᲂу҆моли́ти пречⷭ҇тꙋю бцⷣꙋ, да спасе́тъ тѧ̀ ѿ гее́нны ѻ҆́гненныѧ. Сїѐ вѣ́дѧще, вопїе́мъ тѝ:
Ра́дꙋйсѧ, слеза́ми покаѧ́нїѧ ѡ҆чи́стивый дꙋ́шꙋ свою̀: ра́дꙋйсѧ, низложи́вый въ себѣ̀ дꙋ́ха горды́ни.
Ра́дꙋйсѧ, наꙋчи́выйсѧ зрѣ́ти своѧ̑ то́чїю согрѣшє́нїѧ: ра́дꙋйсѧ, не ѡ҆сꙋжда́вый ни є҆ди́нагѡ ѿ согрѣша́вшихъ.
Ра́дꙋйсѧ, братолю́бїемъ ᲂу҆тиша́вый прекослѡ́вїѧ: ра́дꙋйсѧ, ко всѣ́мъ въ послꙋша́нїи вда́вый тѧ̀ неꙋкло́ннѡ.
Ра́дꙋйсѧ, мл҃твами бра́тїи подкрѣпле́нный: ра́дꙋйсѧ, не на себѐ сама́го, а҆ на пречⷭ҇тꙋю бцⷣꙋ ᲂу҆пова́вый.
Ра́дꙋйсѧ, во всѣ́хъ трꙋдѣ́хъ твои́хъ бл҃гослове́нный ѿ пречⷭ҇тыѧ бцⷣы: ра́дꙋйсѧ, застꙋ́пницꙋ себѣ̀ стѧжа́вый бл҃гослове́ннꙋю мт҃рь хрⷭ҇та̀ бг҃а.
Ра́дꙋйсѧ, є҆́ю ѿ вѣ́чныѧ мꙋ́ки свобожде́нный.
Ра́дꙋйсѧ, ѳерапо́нте, ᲂу҆го́дниче хрⷭ҇то́въ и҆ чꙋдотво́рче.
Конда́къ є҃
Въ то́й же ѡ҆би́тели блаже́ннагѡ ѳео́дѡра и҆мѣ́лъ є҆сѝ равнолѣ́тна тебѣ̀ дрꙋ́га, спо́стника и҆ сомоли́твенника, прпⷣбнагѡ кѷрі́лла, съ ни́мже, ѿ прпⷣбнагѡ се́ргїа наꙋче́нный, є҆ди́нѣмъ се́рдцемъ и҆ є҆ди́нѣми ᲂу҆сты̑, непреста́ннѡ пѣ́лъ бг҃ꙋ: А҆ллилꙋ́їа.
І҆́косъ є҃
Спо́стницы твоѝ, ви́дѣвше тѧ̀, ѕѣлѡ̀ преспѣва́юща въ до́бромъ и҆́ноческомъ житїѝ, въ смире́нїи и҆ послꙋша́нїи, въ цѣломꙋ́дрїи и҆ братолю́бїи, сла́виша бг҃а и҆ пречⷭ҇тꙋю, да́вшихъ тѝ таковꙋ́ю бл҃года́ть, мы́ же, ᲂу҆вѣ́дѣвше ѡ҆ се́мъ, вопїе́мъ тѝ:
Ра́дꙋйсѧ, и҆́ноче, и҆́нокѡвъ похвало̀: ра́дꙋйсѧ, спо́стниче прпⷣбнагѡ кѷрі́лла.
Ра́дꙋйсѧ, вѣ́рный ᲂу҆ченичѐ прпⷣбнагѡ се́ргїа: ра́дꙋйсѧ, цѣломꙋ́дрїѧ ѡ҆́бразъ ꙗ҆ви́вый собо́ю и҆́стинный.
Ра́дꙋйсѧ, поще́нїемъ ᲂу҆крѣпи́вый се́рдце твоѐ: ра́дꙋйсѧ, бдѣ́нїемъ ѡ҆крили́вый дꙋ́шꙋ твою̀.
Ра́дꙋйсѧ, мл҃твами твои́ми бл҃гоꙋха́ющїй бг҃ꙋ: ра́дꙋйсѧ, а҆́гг҃льскїѧ чистоты̀ рачи́телю.
Ра́дꙋйсѧ, херꙋві́мскагѡ бг҃омы́слїѧ подража́телю: ра́дꙋйсѧ, серафі́мскїѧ къ бг҃ꙋ любвѐ ревни́телю.
Ра́дꙋйсѧ, ѳерапо́нте, ᲂу҆го́дниче хрⷭ҇то́въ и҆ чꙋдотво́рче.
Конда́къ ѕ҃
Ѡ҆бходѧ̀ странꙋ̀ бѣлоезе́рскꙋю, ѡ҆брѣ́лъ є҆сѝ мнѡ́гаѧ мѣ̑ста кра̑снаѧ и҆ ᲂу҆дѡ́бнаѧ, во є҆́же та́мѡ въ коне́чнѣмъ безмо́лвїи пребыва́ти. И҆ возжа́ждалъ є҆сѝ сегѡ̀ безмо́лвїѧ, да въ не́мъ вта́йнѣ бг҃ꙋ зове́ши: А҆ллилꙋ́їа.
І҆́косъ ѕ҃
По гла́сꙋ пречⷭ҇тыѧ прише́дъ въ странꙋ̀ бѣлоезе́рскꙋю со дрꙋ́гомъ твои́мъ, прпⷣбнымъ кѷрі́лломъ, созда́лъ є҆сѝ не дале́че ѿ негѡ̀ въ де́брѣхъ безмо́лвнꙋю ке́ллїю, да въ не́й вта́йнѣ ᲂу҆сꙋгꙋ́биши трꙋды̀ твоѧ̑ пред̾ бг҃омъ. Мы́ же, ᲂу҆вѣ́дѣвше ѧ҆̀, вопїе́мъ тѝ:
Ра́дꙋйсѧ, ра́ди бг҃а возжада́вый тиша́йшагѡ безмо́лвїѧ: ра́дꙋйсѧ, ᲂу҆строе́нїемъ пречⷭ҇тыѧ приведе́нный въ пꙋсты́ню со дрꙋ́гомъ твои́мъ.
Ра́дꙋйсѧ, со є҆ди́нымъ то́чїю дрꙋ́гомъ твои́мъ раздѣлѧ́вый безмо́лвїе пꙋсты́ни: ра́дꙋйсѧ, и҆ ѿ сего̀ дрꙋ́га разлꙋчи́выйсѧ, да съ є҆ди́нымъ хрⷭ҇то́мъ бꙋ́деши.
Ра́дꙋйсѧ, пꙋсты́нною ке́ллїею па́че ца́рскагѡ черто́га весели́выйсѧ: ра́дꙋйсѧ, въ не́й дни̑ въ трꙋдѣ́хъ, нѡ́щи же въ бдѣ́нїихъ проводи́вый.
Ра́дꙋйсѧ, ра́ди хрⷭ҇та̀ ѿ тѧ́жкихъ къ тѧжча́йшымъ трꙋдѡ́мъ ᲂу҆стремлѧ́выйсѧ: ра́дꙋйсѧ, та́йнагѡ дѣ́ланїѧ пред̾ ѻ҆ц҃е́мъ нбⷭ҇нымъ дости́гнꙋвый.
Ра́дꙋйсѧ, гла́сомъ твои́мъ мл҃твеннымъ ѡ҆гласи́вый дє́бри пꙋсты̑нныѧ: ра́дꙋйсѧ, немо́лчнѡ твои́ми ᲂу҆сты̑ сла́вивый и҆́мѧ хрⷭ҇то́во.
Ра́дꙋйсѧ, въ ᲂу҆мѣ̀ и҆ се́рдце и҆мѣ́вый і҆и҃са сладча́йшагѡ.
Ра́дꙋйсѧ, ѳерапо́нте, ᲂу҆го́дниче хрⷭ҇то́въ и҆ чꙋдотво́рче.
Конда́къ з҃
Разбо́йникѡвъ ꙗ҆́рость нището́ю и҆ терпѣ́нїемъ посрами́лъ є҆сѝ, нощны́хъ пти́цъ кли́ки и҆ ѕвѣре́й шата́нїе побѣди́лъ є҆сѝ вѣ́рою во хрⷭ҇та̀, трꙋды̑ же неꙋсы́пными до конца̀ сокрꙋши́лъ є҆сѝ по́хѡти и҆ не́мѡщи плѡтскі́ѧ, немо́лчнѡ вопїѧ̀ бг҃ꙋ: А҆ллилꙋ́їа.
І҆́косъ з҃
Дале́че ѕѣлѡ̀ слы́шанѡ бы́сть бг҃оꙋго́дное житїѐ твоѐ, прпⷣбне, и҆ ѿ конє́цъ землѝ рꙋ́сскїѧ притеко́ша къ тебѣ̀ лю́бѧщїи безмо́лвїе. Ты́ же си́хъ прїе́млѧй съ любо́вїю, ꙗ҆́кѡ ѻ҆те́цъ ѡ҆ ѡ҆браще́нїи заблꙋ́ждшихъ ча́дъ ра́довалсѧ є҆сѝ. Тѣ́мже и҆ мы̀ вопїе́мъ тѝ:
Ра́дꙋйсѧ, дре́внихъ ѻ҆тцє́въ пꙋстынножи́телей подража́телю: ра́дꙋйсѧ, зно́й, хла́дъ и҆ гла́дъ въ пꙋсты́ни съ терпѣ́нїемъ понесы́й.
Ра́дꙋйсѧ, тѧготꙋ̀ дневнꙋ́ю и҆ стра́хъ нощны́й любо́вїю ко хрⷭ҇тꙋ̀ побѣди́вый: ра́дꙋйсѧ, не ᲂу҆страши́выйсѧ ни ѕвѣре́й ди́вїихъ, ни ѕлы́хъ человѣ́кѡвъ.
Ра́дꙋйсѧ, до́блїй низложи́телю и҆скꙋше́нїй дїа́вольскихъ: ра́дꙋйсѧ, за та́йныѧ твоѧ̑ по́двиги въ пꙋсты́ни длѧ бг҃а просла́вленный ѿ бг҃а ꙗ҆́вѣ.
Ра́дꙋйсѧ, ꙗ҆́кѡ и҆ въ пꙋсты́ни гдⷭ҇ь содѣ́ла тѧ̀ вождѧ̀ и҆́щꙋщымъ сп҃се́нїѧ: ра́дꙋйсѧ, бл҃гоꙋкраси́вый пꙋсты́ню ѡ҆би́телїю и҆́ночествꙋющихъ.
Ра́дꙋйсѧ, неискꙋ́сныхъ и҆́нокѡвъ до́брый вождю̀ ко хрⷭ҇тꙋ̀: ра́дꙋйсѧ, ѡ҆ст҃и́вый пꙋсты́ню ᲂу҆строе́нїемъ хра́ма бж҃їѧ.
Ра́дꙋйсѧ, въ хра́мѣ со ᲂу҆ченикѝ твои́ми воспѣва́вый бг҃ꙋ ра́достнѡ.
Ра́дꙋйсѧ, ѳерапо́нте, ᲂу҆го́дниче хрⷭ҇то́въ и҆ чꙋдотво́рче.
Конда́къ и҃
Слы́шавъ ѡ҆ тебѐ и҆ ѡ҆ сподви́жникахъ твои́хъ, прпⷣбне, бл҃говѣ́рный кнѧ́зь а҆ндре́й все́мъ се́рдцемъ вознесѐ хвалꙋ̀ бг҃ꙋ, бл҃гослови́вшемꙋ ѻ҆́тчинꙋ є҆гѡ̀ таковы́ми ѡ҆бита́тельми, и҆ воспѣ̀ ра́достнѡ бг҃ꙋ: А҆ллилꙋ́їа.
І҆́косъ и҃
Возжела̀ бл҃говѣ́рный кнѧ́зь а҆ндре́й прїѧ́ти бл҃гослове́нїе ѿ ст҃ы́ни твоеѧ̀, прпⷣбне, и҆ пригласѝ тѧ̀ во сво́й гра́дъ, ты́ же, моле́нїю є҆гѡ̀ и҆ бра́тїи повинꙋ́ѧсѧ, лѣ̑та ста́рости и҆ трꙋ́дъ далеча́йшагѡ пꙋтѝ презрѣ́въ, ско́рѡ ко кнѧ́зю прите́клъ є҆сѝ слы́шай ѿ негѡ̀:
Ра́дꙋйсѧ, лѣ̑ты, наипа́че же бл҃гомꙋ́дрїемъ ᲂу҆кра́шенный: ра́дꙋйсѧ, подви́жниче хрⷭ҇то́въ неизмѣ́нный.
Ра́дꙋйсѧ, дх҃а ст҃а́гѡ преиспо́лненный: ра́дꙋйсѧ, мт҃рїю бг҃а возлю́бленный.
Ра́дꙋйсѧ, и҆́мени є҆ѧ̀ ѡ҆би́тель и҆́нокѡвъ созда́вый: ра́дꙋйсѧ, ста́дꙋ твоемꙋ̀ ѡ҆́бразъ и҆́стинный.
Ра́дꙋйсѧ, чадолюби́вый ѻ҆́тче и҆́нокѡвъ: ра́дꙋйсѧ, и҆́ноки твои́ми люби́мый, ꙗ҆́кѡ ѻ҆те́цъ чадолюби́вѣйшїй.
Ра́дꙋйсѧ, всѣ́хъ притека́ющихъ къ тебѣ̀ и҆сполнѧ́ѧй ра́дости: ра́дꙋйсѧ, всѣ̑мъ подаѧ́й ско́рое ᲂу҆тѣше́нїе.
Ра́дꙋйсѧ, любвѐ и҆ мі́ра насади́телю.
Ра́дꙋйсѧ, ѳерапо́нте, ᲂу҆го́дниче хрⷭ҇то́въ и҆ чꙋдотво́рче.
Конда́къ ѳ҃
Ра́достїю возра́довасѧ бл҃говѣ́рный кнѧ́зь а҆ндре́й, ви́дѣвъ твоѐ къ немꙋ̀ прише́ствїе и҆, да не разлꙋчи́тсѧ съ тобо́ю, моле́нїемъ ᲂу҆молѝ тѧ̀, бли́з̾ него̀ созда́ти но́вꙋю ѡ҆би́тель и҆́нокѡвъ, въ не́йже бы вы́нꙋ пѣ́ти бг҃ꙋ: А҆ллилꙋ́їа.
І҆́косъ ѳ҃
А҆́ще бо ѕѣлѡ̀ ѿрица́лсѧ є҆сѝ, ѻ҆ба́че, не кнѧ́зю то́чїю, но самомꙋ̀ бг҃ꙋ повинꙋ́ѧсѧ, на мѣ́стѣ кра́снѣмъ бли́з̾ гра́да можа́йска созда́лъ є҆сѝ хра́мъ пречⷭ҇тыѧ и҆ но́вꙋю ѡ҆би́тель и҆́нокѡвъ, и҆̀мже са́мъ въ наста́вника бы́лъ є҆сѝ до конца̀ дне́й твои́хъ, тѣ́мже слы́шиши ѿ всѣ́хъ:
Ра́дꙋйсѧ, бл҃го́е жела́нїе кнѧ́зѧ бл҃говѣ́рнагѡ соверши́вый мꙋ́дре: ра́дꙋйсѧ, вторы́ѧ своеѧ̀ ѡ҆би́тели и҆́нокѡвъ во и҆́мѧ бг҃ома́тери ᲂу҆чреди́телю.
Ра́дꙋйсѧ, въ сїю̀ ѡ҆би́тель собра́вый мно́жество спаса́ющихсѧ: ра́дꙋйсѧ, насади́телю въ не́й до́брагѡ житїѧ̀.
Ра́дꙋйсѧ, напои́вый ю҆̀ твои́ми наставлє́нїи: ра́дꙋйсѧ, возрасти́вый ю҆̀ мно́гими слеза́ми твои́ми.
Ра́дꙋйсѧ, ꙗ҆́кѡ мно́гими трꙋды̑ и҆ благи́ми пѡ́двиги твои́ми бл҃гоꙋкраси́лъ є҆сѝ ю҆̀: ра́дꙋйсѧ, ꙗ҆́кѡ мл҃твами твои́ми твори́ши ю҆̀ чи́стꙋ невѣ́стꙋ хрⷭ҇то́вꙋ.
Ра́дꙋйсѧ, ра́достнѡ преда́вый въ не́й хрⷭ҇тꙋ̀ дꙋ́шꙋ твою̀ чи́стꙋю: ра́дꙋйсѧ, тѣ́ломъ твои́мъ пребыва́ѧй при́снѡ въ се́й ѡ҆би́тели твое́й.
Ра́дꙋйсѧ, и҆з̾ неѧ̀ сїѧ́ѧй мі́рови чꙋдесы̑.
Ра́дꙋйсѧ, ѳерапо́нте, ᲂу҆го́дниче хрⷭ҇то́въ и҆ чꙋдотво́рче.
Конда́къ і҃
Чи́стаѧ дꙋша̀ твоѧ̀, прпⷣбне, мно́гими по́двиги и҆ скорбьмѝ ᲂу҆сꙋгꙋ́бившаѧ своѧ̑ тала́нты, принесѐ къ да́вшемꙋ ѧ҆̀ бг҃ꙋ, и҆ вни́де въ ра́дость гдⷭ҇а своегѡ̀, ны́нѣ вопїю́щи є҆мꙋ̀ ра́достнѡ: А҆ллилꙋ́їа.
І҆́косъ і҃
А҆́ще и҆ до конца̀ дне́й твои́хъ не престава́лъ є҆сѝ жела́ти возвраще́нїѧ твоего̀ въ пе́рвꙋю твою̀ ѡ҆би́тель, бѣлоезе́рскꙋю, но прите́клъ же къ пе́рвѣйшей и҆ вожделѣ́ннѣйшѣй ѡ҆би́тели нбⷭ҇нѣй, ѡ҆ста́вилъ є҆сѝ въ покро́въ и҆ защи́тꙋ вторы́ѧ ѡ҆би́тели твоеѧ̀, лꙋ́жецкїѧ, ст҃о́е тѣ́ло твоѐ, и҆́мже храни́мїи зове́мъ тѝ:
Ра́дꙋйсѧ, на землѝ пожи́вый равноа́гг҃льнѡ: ра́дꙋйсѧ, на нб҃сѝ ликꙋ́ющїй со а҆́гг҃лы.
Ра́дꙋйсѧ, на нб҃сѝ вчине́нный со всѣ́ми ст҃ы́ми: ра́дꙋйсѧ, на землѝ чꙋдесы̑ просла́вленный.
Ра́дꙋйсѧ, вѣ́рный храни́телю ѡ҆би́тели, въ не́йже почива́етъ тѣ́ло твоѐ: ра́дꙋйсѧ, и҆збавлѧ́ѧй ѡ҆би́тель сїю̀ ѿ разрꙋше́нїѧ.
Ра́дꙋйсѧ, смирѧ́ѧй въ не́й врагѡ́въ и҆ноплеме́нныхъ: ра́дꙋйсѧ, низлага́ѧй всѣ́хъ є҆ѧ̀ ви́димыхъ и҆ неви́димыхъ вра̑гъ.
Ра́дꙋйсѧ, всѧ̑кїѧ напа̑сти ѿ неѧ̀ прогонѧ́ѧй: ра́дꙋйсѧ, подаѧ́й на́мъ мл҃твами твои́ми всѧ̑ бл҃гопотрє́бнаѧ къ вѣ́чнѣй жи́зни.
Ра́дꙋйсѧ, разрꙋши́телю вражды̀ и҆ насади́телю братолю́бїѧ.
Ра́дꙋйсѧ, ѳерапо́нте, ᲂу҆го́дниче хрⷭ҇то́въ и҆ чꙋдотво́рче.
Конда́къ а҃і
Ѻ҆́бразъ бы́лъ є҆сѝ ста́дꙋ твоемꙋ̀ во все́мъ и҆ ꙗ҆ви́лсѧ є҆сѝ всѣ́мъ, грѧдꙋ́щымъ съ тобо́ю ко хрⷭ҇тꙋ̀ по тѣ́сномꙋ пꙋтѝ, во́ждь къ вѣ́чнѣй сла́вѣ, въ не́йже ны́нѣ со всѣ́ми ст҃ы́ми вопїе́ши бг҃ꙋ: А҆ллилꙋ́їа.
І҆́косъ а҃і
Пѣ́нїе на́ше тебѣ̀ побѣжда́етсѧ ѻ҆би́лїемъ и҆ вели́чїемъ по́двигѡвъ и҆ всѧ́кихъ добродѣ́телей и҆ чꙋде́съ твои́хъ. Ѻ҆ба́че любо́вїю къ тебѣ̀ горѧ́щїи, молча́ти не могꙋ́ще, мо́лимъ: прїимѝ ѿ на́съ сицєвы́ѧ, а҆́ще и҆ вельмѝ скꙋ́дныѧ, похвалы̀:
Ра́дꙋйсѧ, ѻ҆́бразе смире́нїѧ, кро́тости и҆ послꙋша́нїѧ: ра́дꙋйсѧ, похвало̀ дѣ́вствꙋющымъ.
Ра́дꙋйсѧ, въ дꙋше́вныхъ по́двизѣхъ и҆ въ тѣле́сныхъ трꙋдѣ́хъ помо́щниче на́шъ: ра́дꙋйсѧ, и҆сцѣлѧ́ѧй на́съ ѿ страсте́й.
Ра́дꙋйсѧ, врачꙋ̀ ско́рый въ недꙋ́зѣхъ и҆ болѣ́знехъ: ра́дꙋйсѧ, застꙋ́пниче си́рыхъ и҆ всѣ́хъ ѡ҆би́димыхъ.
Ра́дꙋйсѧ, ᲂу҆тѣ́шителю на́шъ въ ско́рбѣхъ и҆ бѣда́хъ и҆ всѧ́кихъ напа́стехъ: ра́дꙋйсѧ, ѿ ѻ҆гнѧ̀ и҆ ѿ потопле́нїѧ и҆збавлѧ́ѧй на́съ.
Ра́дꙋйсѧ, пита́телю на́шъ во днѝ гла́да и҆ скꙋ́дости: ра́дꙋйсѧ, подаѧ́й на́мъ ѡ҆би́лїе плодѡ́въ и҆ бл҃горастворе́нїе воздꙋ́хѡвъ.
Ра́дꙋйсѧ, ꙗ҆́кѡ бг҃а твори́ши ко всѣ̑мъ на́мъ ми́лостива твои́ми хода̑тайствы къ немꙋ̀.
Ра́дꙋйсѧ, ѳерапо́нте, ᲂу҆го́дниче хрⷭ҇то́въ и҆ чꙋдотво́рче.
Конда́къ в҃і
Пою́ще твоѐ по бз҃ѣ житїѐ, тво́й и҆́ночествꙋющымъ ѻ҆́бразъ, и҆ всѣ̑мъ твою̀, прпⷣбне, по́мощь бл҃годарѧ́ще, сла́вимъ просла́вльшихъ тѧ̀, бг҃а и҆ пречⷭ҇тꙋю бцⷣꙋ, и҆ вопїе́мъ и҆̀мъ съ тобо́ю: А҆ллилꙋ́їа.
І҆́косъ в҃і
Проповѣ́дникъ правосла́вїѧ ꙗ҆ви́лсѧ є҆сѝ, прпⷣбне, гра́дꙋ твоемꙋ̀ и҆ ѡ҆кре́стнѣй странѣ̀, и҆ дале́че ѿ ни́хъ мл҃твами твои́ми ᲂу҆празднѧ́еши всѧ̑каѧ ᲂу҆чє́нїѧ лжи̑ваѧ льсти́выхъ и҆ лꙋка́выхъ человѣ́кѡвъ, мы́ же съ тобо́ю въ пра́вой вѣ́рѣ ᲂу҆твержда́емїи вопїе́мъ тѝ:
Ра́дꙋйсѧ, пра́вило вѣ́ры хрⷭ҇то́вы: ра́дꙋйсѧ, ѻ҆́бразе и҆́стинный любвѐ къ бг҃ꙋ.
Ра́дꙋйсѧ, неꙋсы́пный па́стырю ста́да хрⷭ҇то́ва: ра́дꙋйсѧ, нече́стїѧ ѡ҆бличи́телю.
Ра́дꙋйсѧ, низложи́телю ѕловѣ́рныхъ: ра́дꙋйсѧ, ᲂу҆твержде́нїе вѣ́рныхъ.
Ра́дꙋйсѧ, всѣ̑мъ правосла̑внымъ ѡ҆храни́телю: ра́дꙋйсѧ, всѣ̑мъ заблꙋжда́ющымъ подаѧ́й ско́рое и҆справле́нїе.
Ра́дꙋйсѧ, тмꙋ̀ невѣ́рїѧ разгонѧ́ѧй: ра́дꙋйсѧ, всѣ́хъ приводѧ́й ко хрⷭ҇тꙋ̀ бг҃ꙋ.
Ра́дꙋйсѧ, ѳерапо́нте, ᲂу҆го́дниче хрⷭ҇то́въ и҆ чꙋдотво́рче.
Конда́къ г҃і
Ѽ преблаже́нне и҆ досточꙋ́дне ѻ҆́тче на́шъ ѳерапо́нте! Всѣ́хъ на́съ, ны́нѣ тебѣ̀ ᲂу҆се́рднѡ молѧ́щихсѧ, ѿ бѣ́дъ и҆ вѣ́чныхъ мꙋ́къ и҆зба́ви, прїѧ́тными бг҃ꙋ твои́ми мл҃твами, да пое́мъ съ тобо́ю бг҃ꙋ: А҆ллилꙋ́їа.
Повто́ръ
Сей конда́къ глаго́лется три́жды, та́же і҆́косъ а҃-й и҆ конда́къ а҃-й.
І҆́косъ а҃
Ѿ младе́нчества твоегѡ̀ и҆ да́же до престарѣ́нїѧ, тѣ́ломъ и҆ дꙋше́ю рабо́талъ є҆сѝ гдⷭ҇ꙋ і҆и҃сꙋ хрⷭ҇тꙋ̀ и҆ пречⷭ҇тѣй є҆гѡ̀ мт҃ри, и҆ сѐ ны́нѣ дꙋша̀ твоѧ̀ ликовствꙋ́етъ въ є҆гѡ̀ нбⷭ҇ныхъ ѡ҆би́телехъ, тѣ́ло же твоѐ здѣ̀ почива́ѧ, сїѧ́етъ чꙋдесы̑: сегѡ̀ ра́ди вопїе́мъ тѝ ра́достнѡ:
Ра́дꙋйсѧ, во слѣ́дъ хрⷭ҇та̀ неꙋкло́ннѡ ше́дый: ра́дꙋйсѧ, сло́во є҆гѡ̀ соблюда́вый тве́рдѡ.
Ра́дꙋйсѧ, во сла́вꙋ хрⷭ҇та̀ бг҃а подвиза́выйсѧ: ра́дꙋйсѧ, пречⷭ҇тꙋю хрⷭ҇та̀ мт҃рь неꙋмо́лчнѡ сла́вивый.
Ра́дꙋйсѧ, ѿ хрⷭ҇та̀ и҆ мт҃ри є҆гѡ̀ просла́вленный: ра́дꙋйсѧ, и҆мы́й дерзнове́нїе ве́лїе ко хрⷭ҇тꙋ̀.
Ра́дꙋйсѧ, защи́тниче ѡ҆би́тели лꙋ́жецкїѧ: ра́дꙋйсѧ, храни́телю страны̀ можа́йскїѧ.
Ра́дꙋйсѧ, побо́рниче крѣ́пкїй за держа́вꙋ рѡссі́йскꙋю: ра́дꙋйсѧ, добропобѣ́дный во́ине правосла́вныѧ цр҃кве.
Ра́дꙋйсѧ, всѣ̑мъ призыва́ющымъ тѧ̀ подаю́щїй ско́рꙋю по́мощь ѿ хрⷭ҇та̀ бг҃а.
Ра́дꙋйсѧ, ѳерапо́нте, ᲂу҆го́дниче хрⷭ҇то́въ и҆ чꙋдотво́рче.
Конда́къ а҃
Взбра́нномꙋ воево́дѣ и҆ гдⷭ҇ꙋ і҆и҃сꙋ послѣ́дствꙋѧ, мл҃твою, посто́мъ и҆ трꙋды̀ плотскі̑ѧ стра̑сти побѣди́лъ є҆сѝ: тѣ́мже, ꙗ҆́кѡ до́бръ во́инъ, ᲂу҆вѣнча́лсѧ є҆сѝ ѿ цр҃ѧ̀ хрⷭ҇та̀, є҆го́же непреста́й те́плѣ моли́ти ѡ҆ на́съ, рабѣ́хъ твои́хъ, прпⷣбне, да тобо́ю и҆зба́вльшесѧ ѿ бѣ́дъ, при́снѡ пое́мъ тѝ:
Ра́дꙋйсѧ, ѳерапо́нте, ᲂу҆го́дниче хрⷭ҇то́въ и҆ чꙋдотво́рче.
Моли́твы
Ѽ всечестны́й и҆ пребл҃же́нный ѻ҆́тче на́шъ ѳерапо́нте! тебѣ̀ даде́сѧ бл҃года́ть моли́тисѧ ѡ҆ на́съ, и҆ вѣ́мы, ꙗ҆́кѡ предстоѧ̀ престо́лꙋ гдⷭ҇а, при́снѡ ꙗ҆влѧ́еши любо́вь твою̀ къ на́мъ непреста́нными ѡ҆ на́съ твои́ми хода̑тайствы. Но поне́же мы̀ є҆жеча́снѡ ᲂу҆множа́юще грѣхѝ на́шѧ, кра́йнѧгѡ твоегѡ̀ ѿвраще́нїѧ досто́йни сотвори́хомсѧ, сегѡ̀ ра́ди въ покаѧ́нїи, со слеза́ми припа́дающе, мо́лимъ тѧ̀: не премѣнѝ твоеѧ̀ ми́лости къ на́мъ на гнѣ́въ за нечє́стїѧ и҆ сквє́рны на́шѧ, ꙗ҆вѝ ᲂу҆́бѡ на́мъ ми́лость твою̀ до конца̀ и҆ согрѣша́ющихъ на́съ ѡ҆чи́сти твои́ми мл҃твами, возведѝ къ покаѧ́нїю, ᲂу҆крѣпѝ на дѣла̀ блага̑ѧ, сохранѝ въ правосла́вїи и҆ во всѧ́кой ст҃ы́ни. Да́рꙋй на́мъ пребыва́ти въ ми́ре, тишинѣ̀ и҆ братолю́бїи, и҆спросѝ на́мъ времена̀ безмѧтє́жна и҆ и҆зѻби́лїе плодѡ́въ земны́хъ, и҆зба́ви ѿ ѻ҆гнѧ̀ и҆ ѿ потопле́нїѧ и҆ ѿ лю́тыхъ болѣ́зней и҆ ѿ смертоно́сныѧ ꙗ҆́звы. Послѝ трꙋжда́ющымсѧ благі́й ᲂу҆спѣ́хъ, пꙋтеше́ствꙋющымъ пꙋ́ть безпреткнове́нный, въ мо́ри пла́вающымъ приста́нище ти́хое, плѣнє́ннымъ ѡ҆сла́бꙋ и҆ ѡ҆свобожде́нїе, си̑рымъ по́мощь и҆ застꙋпле́нїе. Оу҆молѝ бг҃а: да и҆зведе́тъ ѿ поги́бели живо́тъ на́шъ: да любо́вїю твое́ю ѡ҆гражде́ннїи, бл҃года́рствєннаѧ при́снѡ пое́мъ, просла́вившемꙋ тѧ̀, гдⷭ҇ꙋ і҆и҃сꙋ хрⷭ҇тꙋ̀, є҆мꙋ́же подоба́етъ всѧ́каѧ сла́ва и҆ че́сть, со безнача́льнымъ є҆гѡ̀ ѻ҆ц҃е́мъ и҆ съ прест҃ы́мъ и҆ животворѧ́щимъ є҆гѡ̀ дх҃омъ во вѣ́ки вѣкѡ́въ. А҆ми́нь.