Песнь 3
Ирмос
Утвержде́й сло́вом Небеса́ и зе́млю основа́вый, Бо́же, и мене́ утверди́, вопию́ща Тебе́ пе́снь: Свя́т еси́, Го́споди.
Преподо́бне о́тче Ферапо́нте, моли́ Бо́га о на́с.
Тропарь
Твоя́ моли́твы вознеси́ о на́с к Бо́гу, преподо́бне, и разруши́ ко́вы враго́в на́ших на на́с.
Тропарь
Вы́ну пода́вый на́м благопотре́бная, преподо́бне, да не изнемо́жем, а́лчуще, но да пое́м тя́ все́ю кре́постию на́шею.
Тропарь
Умерщвле́ннии грехи́ на́шими, ны́не мо́лим тя́, преподо́бне: изба́ви на́с а́да моли́твами твои́ми и приведи́ с тобо́ю к Престо́лу Сла́вы.
Богородичен
На́шего ра́ди спасе́ния ро́ждшая Бо́га, Пречи́стая, отжени́ от на́с вся́каго врага́.
Песнь 4
Ирмос
Слу́х Тво́й, Го́споди, услы́шах и убоя́хся, дела́ Твоя́ разуме́х и ужасо́хся, я́ко Бо́г, пре́жде ве́к Сы́й, от Де́вы рожде́йся, бы́сть Челове́к.
Преподо́бне о́тче Ферапо́нте, моли́ Бо́га о на́с.
Тропарь
А́нгел храни́тель на́м бу́ди и да́ждь отра́ду на́м в де́нь ско́рби на́шея, о́тче Ферапо́нте.
Тропарь
Ше́ствуй с на́ми сия́нием све́та твоего́, преподо́бне, и украси́ на́с цвета́ми до́брых де́л.
Тропарь
Уми́льно к тебе́ припа́даем: огради́ на́с, о́тче, да не сожже́т на́с со́лнце, ниже́ ве́тр губи́тельный.
Богородичен
К Тебе́ прибега́ем, Ма́ти Де́во Пречи́стая, бу́ди на́м тве́рдое и изве́стное заступле́ние.
Песнь 5
Ирмос
Тво́й ми́р да́ждь на́м, Сы́не Бо́жий: ино́го бо, ра́зве Тебе́, бо́га не зна́ем, И́мя Твое́ имену́ем, я́ко Бо́г живы́х и ме́ртвых еси́.
Преподо́бне о́тче Ферапо́нте, моли́ Бо́га о на́с.
Тропарь
Тя́ мо́лим, о́тче: да́ждь ми́р Це́ркви, гра́ду и все́м лю́дем твои́м.
Тропарь
Ели́ко роса́ зла́ку, толи́ко и ты́ на́м исцеле́ние бу́ди моли́твами твои́ми.
Тропарь
Бе́дне боле́знями сме́ртными стра́ждем, возве́й на на́с ду́х спасе́ния, о́тче.
Богородичен
Седя́й на Херуви́мех вочелове́чися Тобо́ю, Де́во, Его́же моли́ за стра́ждущия челове́ки.
Песнь 6
Ирмос
Со Ио́ною вопие́м Ти́, Го́споди, со гла́сом хвале́ния моля́щеся: возведи́ от тли́ живо́т на́ш.
Преподо́бне о́тче Ферапо́нте, моли́ Бо́га о на́с.
Тропарь
Се́ бе́здна грехо́в потопля́ет на́с, ускори́, преподо́бне, изъя́ти на́с от ни́х.
Тропарь
Ио́не спасе́ние да́вшаго Бо́га умоли́, преподо́бне, дарова́ти на́м спасе́ние от бе́д, обыше́дших на́с.
Тропарь
Ю́же в ско́рбех, и слеза́х, и в беззако́ниих иждива́емую жи́знь на́шу изведи́, преподо́бне, от истле́ния.
Богородичен
Помози́ на́м, Пречи́стая, греси́ бо и беды́ одолева́ют на́с и умерщвля́ют.
Песнь 7
Ирмос
По мно́жеству ми́лости Твоея́, Человеколю́бче, сотвори́ с на́ми, да Тебе́ ве́рно вси́ воспева́юще, пои́м, я́коже о́троцы: благослове́н еси́, Бо́же оте́ц на́ших.
Преподо́бне о́тче Ферапо́нте, моли́ Бо́га о на́с.
Тропарь
Разжже́ние страсте́й на́ших угаси́, преподо́бне, дожде́м моли́тв твои́х о на́с к Бо́гу, да зове́м: Бо́же, благослове́н еси́.
Тропарь
Иису́са Го́спода умоли́, преподо́бне, я́ко да посра́мятся вси́, де́лающии зла́я на́м, рабо́м твои́м, мы́ же да зове́м Ему́: Бо́же, благослове́н еси́.
Тропарь
И́стинно благослове́нный ны́не от Отца́ Небе́снаго, помози́ и на́м бы́ти благослове́нными от Него́ и воспева́ти: Бо́же, благослове́н еси́.
Богородичен
Милосе́рдая Влады́чице на́ша, соде́лай Влады́ку Го́спода ми́лостива к на́м, гре́шным, да зове́м вы́ну: Бо́же, благослове́н еси́.
Песнь 8
Ирмос
Пе́снь Тебе́ прино́сим Безпло́тных, я́коже о́троцы в пещи́, и, пою́ще, глаго́лем: благослови́те, вся́ дела́ Госпо́дня, Го́спода.
Преподо́бне о́тче Ферапо́нте, моли́ Бо́га о на́с.
Тропарь
Исцели́ на́ша неду́ги, препита́й си́рых и вдови́ц, да вси́ ра́достно Го́спода пое́м и превозно́сим во ве́ки.
Тропарь
Опали́, я́ко мо́лния, вся́ вражды́ и нестрое́ния о́крест на́с, да единомы́сленно пое́м Го́спода и превозно́сим во ве́ки.
Тропарь
Твои́м хода́тайством да́руй плодоро́дие земли́ на́шей и цельбу́ исто́чником во́д, да благослови́м Го́спода и превозно́сим во ве́ки.
Богородичен
Чи́ни а́нгельстии Тя́ сла́вят, Пречи́стая, не пре́зри гла́сы и на́с, гре́шных, пою́щих Тя́ и превознося́щих во ве́ки.
Песнь 9
Ирмос
Светоно́сный о́блак, в о́ньже все́х Влады́ка, я́ко до́ждь с небесе́ на руно́, сни́де и воплоти́ся на́с ра́ди, бы́в Челове́к, Безнача́льный, велича́ем вси́, я́ко Ма́терь Бо́га на́шего Чи́стую.
Преподо́бне о́тче Ферапо́нте, моли́ Бо́га о на́с.
Тропарь
Еди́не Ще́дре Го́споди, посети́ на́с ми́лостями Твои́ми ра́ди уго́дника Твоего́, преподо́бнаго Ферапо́нта.
Тропарь
Не отступа́й от на́с, о́тче, во вся́ дни́ вре́меннаго сего́ жития́ на́шего, но огражда́й на́с ми́ром и ве́лиею ми́лостию.
Тропарь
А́да и ве́чныя му́ки изба́витися на́м моли́, о́тче, и да взы́дут ду́ши на́ша от земли́ в Небе́сная селе́ния.
Богородичен
Шата́ния враго́в на́ших низложи́, Всепе́тая, и ниспосли́ на́м проще́ние грехо́в и спасе́ние ве́чное.