Кондак 1
Избра́ннаго испове́дника Христо́ва и чудотво́рца преди́внаго, побо́рника святы́я ве́ры правосла́вныя, Ру́сскою земле́ю рожде́ннаго и в земли́ Елла́ды возсия́вшаго, свята́го пра́веднаго Иоа́нна похва́льными пе́сньми почти́м; ты́ же, уго́дниче Бо́жий, я́ко предстоя́й пред Престо́лом Царя́ Сла́вы, от вся́ких на́с бе́д свободи́, с любо́вию и благодаре́нием зову́щих ти́:
Ра́дуйся, страда́льче пра́ведный Иоа́нне, терпе́нию и кро́тости на́с науча́яй.
Икос 1
А́нгелов Творе́ц и всея́ тва́ри Созда́тель избра́ тя, пра́ведне Иоа́нне, во е́же наро́ды Святы́я Руси́ и Елла́ды духо́вно соедини́ти, и яви́ тя Це́ркви Свое́й Святе́й вели́каго чудотво́рца, иму́щаго к Нему́ дерзнове́ние моли́тися о исцеле́нии неду́гов душе́вных и теле́сных, о избавле́нии от вся́ких бе́д и скорбе́й. Те́мже мы́, сы́нове ру́сскии, благогове́йне преклоня́ем пред тобо́ю коле́на серде́ц на́ших и умиле́нно глаго́лем:
Ра́дуйся, земны́й а́нгеле и челове́че небе́сный; ра́дуйся, благода́ти тезоимени́тый.
Ра́дуйся, кро́тости и послуша́ния о́бразе; ра́дуйся, моли́твы благоуха́нное кади́ло.
Ра́дуйся, терпе́нием зло́бу ми́ра сего́ победи́вый; ра́дуйся, венце́м испове́дническим от Го́спода украше́нный.
Ра́дуйся, зе́мли Аси́и по́двиги свои́ми озари́вый; ра́дуйся, чудесы́ твои́ми зе́млю Елла́ды напо́лнивый.
Ра́дуйся, Ру́сская звездо́, зе́мли вся́ просвеща́яй; ра́дуйся, оте́чество земно́е моли́твами твои́ми не оставля́яй.
Ра́дуйся, Христа́ ра́ди на земли́ пострада́вый; ра́дуйся, с Ни́м на Небесе́х воцари́выйся.
Ра́дуйся, страда́льче пра́ведный Иоа́нне, терпе́нию и кро́тости на́с науча́яй.
Кондак 2
Ви́дя Христо́с Госпо́дь благо́е наме́рение се́рдца твоего́, Иоа́нне блаже́нне, предначерта́ ти терни́стый и многотру́дный пу́ть спасе́ния: егда́ бы́л еси́ с во́инством царя́ Петра́, плени́ша тя́ ага́ряне и в раба́ прода́ша в зе́млю Аси́и во гра́д Проко́пион, иде́же ты́ пребы́л еси́ непоколеби́мь в ве́ре правосла́вней и жи́знь твою́ посвяти́л еси́ Бо́гу, непреста́нно усты́ и се́рдцем воспева́я Ему́: Аллилу́иа.
Икос 2
Ра́зум богопросвеще́нный и ве́ру несумне́нную име́л еси́, свя́тче Бо́жий, егда́ гне́ва ага́рян не устраши́вся, испове́да себе́ христиа́нина бы́ти и ра́достно восприя́л еси́ бие́ния, у́зы желе́зныя, огне́м жже́ние и мно́ги му́ки нестерпи́мыя. Те́мже вси́, таково́му твоему́ дерзнове́нию и му́жеству дивя́щеся, глаго́лем:
Ра́дуйся, во стра́се Бо́жии до́бре воспита́нный; ра́дуйся, зако́ну Госпо́дню ве́рно науче́нный.
Ра́дуйся, от ю́ности твоея́ всего́ себе́ Бо́гу преда́вый; ра́дуйся, в моли́тве утеше́ние духо́вное обрета́вый.
Ра́дуйся, зло́бы ага́рян не устраши́выйся; ра́дуйся, му́ки нестерпи́мыя побе́дно претерпе́вый.
Ра́дуйся, за Го́спода распя́таго огне́м от мучи́телей опале́нный; ра́дуйся, Христо́вым Страсте́м в телеси́ твое́м приобщи́выйся.
Ра́дуйся, терпе́ние кре́пкое во страда́ниих яви́вый; ра́дуйся, от ве́ры правосла́вныя не отступи́вый.
Ра́дуйся, Христа́ еди́наго все́м се́рдцем возлюби́вый; ра́дуйся, во́ине Христо́в непобеди́мый.
Ра́дуйся, страда́льче пра́ведный Иоа́нне, терпе́нию и кро́тости на́с науча́яй.
Кондак 3
Си́лою Вы́шняго укрепля́емь, со дерзнове́нием пропове́дал еси́ Еди́наго И́стиннаго Бо́га пред мучи́тели твои́ми. Злочести́вый господи́н тво́й, наде́яся улови́ти тя́ и к ве́ре свое́й привлещи́, те́ло твое́ нача́т истяза́ти. Ты́ же, страстоте́рпче Христо́в, жесто́кая бие́ния от него́ претерпева́я, укрепля́ющему тя́ Бо́гу из глубины́ се́рдца воспева́л еси́: Аллилу́иа.
Икос 3
Име́я в души́ свое́й пла́менное жела́ние после́довати А́гнцу Бо́жию, пострада́вшему спасе́ния на́шего ра́ди, пра́ведне Иоа́нне, не убоя́лся еси́ муче́ний и моли́лся еси́ за враги́ твоя́ и мучи́тели, и от ве́ры во Христа́ ника́коже отступи́л еси́, вопия́ Ему́: «Ничто́же мя́ разлучи́т от любве́ Твоея́, Христе́ Бо́же». Сего́ ра́ди велича́ем тя́ си́це:
Ра́дуйся, ве́ры Христо́вы адама́нте несокруши́мый; ра́дуйся, о ми́ре се́м моли́твенниче усе́рдный.
Ра́дуйся, да́же до кро́ве за Христа́ пострада́вый; ра́дуйся, в му́жестве непоколеби́мем пребы́вый.
Ра́дуйся, в муче́ниих благода́тию свы́ше укрепле́нный; ра́дуйся, свире́пство мучи́телей победи́вый.
Ра́дуйся, Страсте́м Христо́вым подража́телю; ра́дуйся, враго́в Це́ркве посрами́телю.
Ра́дуйся, ве́ру, наде́жду и любо́вь к Бо́гу до конца́ сохрани́вый; ра́дуйся, по́двигом твои́м христиа́н Проко́пиона возвесели́вый.
Ра́дуйся, в се́рдце твое́м о́браз Христа́ носи́вый; ра́дуйся, страда́ньми за Него́ Ца́рство Небе́сное насле́дивый.
Ра́дуйся, страда́льче пра́ведный Иоа́нне, терпе́нию и кро́тости на́с науча́яй.
Кондак 4
Бу́ря лю́тых му́к и страсте́й ми́ра сего́ не потопи́ корабля́ души́ твоея́, пра́ведне Иоа́нне, ты́ бо в теле́снем плене́нии благоду́шие и кро́тость, незло́бие и смире́ние яви́л еси́, и я́коже А́нгел, на земли́ пожи́л еси́, в труде́х, посте́ и моли́тве подвиза́яся, ке́сарю ке́сарево, а Бо́жие Бо́гови отдава́я, по сло́ву Го́спода, но́щию же без сна́ пребыва́я, о проще́нии свои́х согреше́ний, наипа́че же о творя́щих ти́ оби́ды и озлобле́ния моля́ся, с любо́вию поя́ Бо́гу: Аллилу́иа.
Икос 4
Слы́шавше и ви́девше ди́вное твое́ житие́, смире́ние и премно́гую доброде́тель, гони́тели твои́ удиви́шася и прославля́ху тебе́ я́ко челове́ка пра́ведна. Егда́ же лю́тый господи́н тво́й узре́ в дому́ свое́м моли́тв твои́х ра́ди изоби́лие во все́м и даде́ тебе́ осла́бу, ты́, огне́м любве́ ко Го́споду окриля́емь, умно́жил еси́ труды́ подви́жническия, на вся́ку но́щь тече́нием сле́з помо́ст притво́ра церко́внаго в моли́тве ороша́я. Помози́ у́бо и на́м подража́ти тебе́, укрепи́ на́с, от мглы́ страсте́й изба́ви и да́руй му́жество духо́вное все́м прибега́ющим ко предста́тельству твоему́ и вопию́щим тебе́ такова́я:
Ра́дуйся, уничиже́нием твои́м убо́гому Ла́зарю уподо́бивыйся; ра́дуйся, терпе́нием твои́м с многострада́льным И́овом сравни́выйся.
Ра́дуйся, смире́нием Христу́ усе́рдно подража́вый; ра́дуйся, по́двигом твои́м А́нгелов удиви́вый;
Ра́дуйся, тру́дниче приле́жный, земно́му господи́ну ве́рно послужи́вый; ра́дуйся, кро́тостию и бла́гостию свое́ю се́рдце его́ умягчи́вый.
Ра́дуйся, за твори́вших ти́ оби́ды моли́твы возноси́вый; ра́дуйся, зло́бу и́х на ми́лость преложи́вый.
Ра́дуйся, на па́перти церко́вней но́щи в моли́твах проводи́вый; ра́дуйся, среди́ мра́ка злове́рия благоче́стием просия́вый.
Ра́дуйся, я́ко за ненави́дящих и оби́дящих на́с моли́тися подвиза́еши; ра́дуйся, я́ко любве́ и милосе́рдия ко все́м лю́дем исполня́еши.
Ра́дуйся, страда́льче пра́ведный Иоа́нне, терпе́нию и кро́тости на́с науча́яй.
Кондак 5
Боготе́чная звезда́, от Святы́я Руси́ возсия́вшая, яви́лся еси́, блаже́нне Иоа́нне, блиста́я чистото́ю а́нгельскою, и луча́ми доброде́телей твои́х зе́мли Аси́и и Елла́ды озари́в. Егда́ же ты́ бо́лен бе́, и де́нь своея́ кончи́ны от Бо́га ве́дая, восхоте́л еси́ причасти́тися Святы́х Христо́вых Та́ин, иере́й, Бо́гом вразумле́нный, принесе́ тебе́ Святы́я Да́ры во я́блоце, и́хже прие́м, пра́ведную ду́шу твою́ в ру́це Бо́жии пре́дал еси́, и свети́льник нося́, по́лн еле́я до́брых де́л, вше́л еси́ в Ца́рствие Небе́сное, во е́же непреста́нно со все́ми святы́ми воспева́ти все́х святы́х Святе́йшему Сло́ву: Аллилу́иа.
Икос 5
Ви́девше лю́дие гра́да Проко́пиона богоуго́дное житие́ твое́ и блаже́нную кончи́ну, со слеза́ми и благогове́нием погребо́ша те́ло твое́ во хра́ме свята́го великому́ченика Гео́ргия. По кончи́не же твое́й мно́зи неду́жнии, не то́кмо правосла́внии, но и лати́няне, и ага́ряне, получа́ху исцеле́ния у гро́ба твоего́, благодаре́ние Бо́гу принося́ще. Сего́ ра́ди тебе́ я́ко те́плому моли́твеннику о все́х стра́ждущих взыва́ем та́ко:
Ра́дуйся, се́рдце твое́ покая́нными слеза́ми омы́вый; ра́дуйся, пла́чем и моли́твами к сме́рти себе́ приугото́вивый.
Ра́дуйся, я́ко все́х оби́дящих тя́ прости́л еси́; ра́дуйся, я́ко незло́бием Христо́вым ду́ха зло́бы победи́л еси́.
Ра́дуйся, в чистоте́ ду́шу и те́ло сохрани́вый; ра́дуйся, кончи́ну свою́ предуве́девый.
Ра́дуйся, пра́ведно жи́знь земну́ю сконча́вый; ра́дуйся, возлюби́вшему тя́ Го́споду ду́шу преда́вый.
Ра́дуйся, я́ко венце́м безсме́ртия от Го́спода венча́лся еси́; ра́дуйся, я́ко ве́чней ра́дости по сме́рти приобщи́лся еси́.
Ра́дуйся, я́ко це́рковь великому́ченика Гео́ргия прия́т честно́е те́ло твое́; ра́дуйся, я́ко во оби́телех Небе́сных водвори́ся свята́я душа́ твоя́.
Ра́дуйся, страда́льче пра́ведный Иоа́нне, терпе́нию и кро́тости на́с науча́яй.
Кондак 6
Пропове́дник чуде́с и сла́вы Бо́жия яви́ся кли́рик не́кий гра́да Проко́пиона, егда́ узре́ в со́ннем виде́нии блаже́ннаго Иоа́нна, повелева́ющаго откры́ти гро́б, в не́мже обрета́ются нетле́нныя мо́щи его́. Те́мже ве́рнии моли́твенно возопи́ша ко Го́споду, да яви́т О́н лю́дем мо́щи Своего́ избра́нника, зову́ще со благодаре́нием Ему́: Аллилу́иа.
Икос 6
Возсия́л еси́, я́ко но́вое свети́ло всему́ христиа́нскому ро́ду, пра́ведне Иоа́нне, егда́ Бо́жиим изволе́нием обре́тено бы́сть нетле́нное и благоуха́нное те́ло твое́, источа́ющее оби́лие чуде́с все́м с ве́рою к твоему́ заступле́нию прибега́ющим. Те́мже уврачу́й и возвесели́ на́с, ве́рою и любо́вию тебе́ взыва́ющих:
Ра́дуйся, на земли́, я́ко безпло́тен, пожи́вый; ра́дуйся, пра́ведниче Бо́жий, в чудесе́х просия́вый.
Ра́дуйся, иере́ю це́ркве свята́го Гео́ргия яви́выйся; ра́дуйся, святы́я мо́щи твоя́ тому́ откры́ти повеле́вый.
Ра́дуйся, я́ко Христо́с с Небесе́ на святы́я мо́щи твоя́ зна́мением указа́; ра́дуйся, я́ко сто́лп о́гненный над ни́ми Госпо́дь чу́дно яви́.
Ра́дуйся, я́ко нетле́нием те́ло твое́ Госпо́дь прославля́ет; ра́дуйся, я́ко благоуха́нием от него́ То́й ве́рных возвеселя́ет.
Ра́дуйся, я́ко моще́й твои́х де́мони трепе́щут; ра́дуйся, сосу́де Боже́ственныя благода́ти.
Ра́дуйся, я́ко во Ца́рствии Небе́снем со святы́ми пребыва́еши; ра́дуйся, я́ко и на́с гре́шных на земли́ не оставля́еши.
Ра́дуйся, страда́льче пра́ведный Иоа́нне, терпе́нию и кро́тости на́с науча́яй.
Кондак 7
Хотя́щим враго́м гра́д тво́й разори́ти и мо́щи твоя́ огню́ преда́ти, яви́ся стра́шное и пресла́вное чу́до: во́ини уви́деша тя́, Иоа́нне, стоя́ща посреде́ огня́ и оста́вити гра́д гро́зно и́м повелева́юща. Ти́и же о виде́нии ужасо́шася и во́н бежа́ша и никоего́же зла́ сотвори́ша. Ве́рнии же лю́дие па́ки обрето́ша мо́щи твоя́, к ни́мже и мы́ припа́дающе, вопие́м Бо́гу побе́дную пе́снь: Аллилу́иа.
Икос 7
Но́ваго тя́ чудотво́рца и моли́твенника во времена́ после́дняя дарова́ на́м Человеколю́бец Госпо́дь, егда́ ве́ра оскуде́, любы́ охладе́, наде́жда поколеба́ся. Те́мже мо́лим тя́, пра́ведне Иоа́нне, не оста́ви на́с, гре́шных и сла́бых, в годи́ну испыта́ний, укрепи́ моли́твами твои́ми все́х лю́бящих тя́ и вопию́щих ти́ такова́я:
Ра́дуйся, ве́рных наде́ждо и заступле́ние; ра́дуйся, неве́рных стра́х и посрамле́ние.
Ра́дуйся, я́ко по́двиги твои́ми гра́д Проко́пион освяти́л еси́; ра́дуйся, я́ко моли́твами твои́ми зе́млю Елла́ды облагоуха́л еси́.
Ра́дуйся, све́т Христо́в в се́рдце твое́м носи́вый; ра́дуйся, тьму́ жи́зни на́шея све́том о́ным озаря́яй.
Ра́дуйся, о лю́дех страны́ Гре́ческия моли́твенниче неусы́пный; ра́дуйся, помо́щниче лю́дем ру́сским богодарова́нный.
Ра́дуйся, градо́м и хра́мом от разоре́ния защище́ние; ра́дуйся, правосла́вных христиа́н ско́рое прибе́жище.
Ра́дуйся, я́ко ны́не со все́ми святы́ми Престо́лу Бо́жию предстои́ши; ра́дуйся, я́ко неизрече́нную Сла́ву Госпо́дню созерца́еши.
Ра́дуйся, страда́льче пра́ведный Иоа́нне, терпе́нию и кро́тости на́с науча́яй.
Кондак 8
Стра́нник и пришле́ц бы́л еси́ в стране́ плене́ния твоего́, уго́дниче Бо́жий, взыску́яй Го́рняго Иерусали́ма, и та́ко бу́ее мирски́м лю́дем, прему́дрое же о Христе́ житие́ пожи́в, доброде́тельми мно́гими к Бо́гу прибли́зился еси́, науча́я все́х ве́рных иска́ти еди́наго на потре́бу. Сего́ ра́ди Са́м Госпо́дь, ви́дя смире́ние твое́, возвели́чи тя́ благода́тию Свое́ю, Его́же восхваля́юще, пое́м А́нгельскую пе́снь: Аллилу́иа.
Икос 8
Ве́сь бы́л еси́ любве́ Боже́ственныя испо́лнен, блаже́нне, све́том благода́ти Бо́жия сия́я пред челове́ки, и святы́я мо́щи твоя́ исто́чник е́сть исцеле́ний, сокро́вище чуде́с, небе́сных арома́т вмести́лище. Сего́ ра́ди, дерзнове́ние ве́лие ко Го́споду име́я, мо́лишися за христиа́ны, во все́м ми́ре живу́щия, и ве́рою тя́ на по́мощь призыва́ющим посо́бствуеши. Не оста́ви у́бо и на́с благода́тною твое́ю по́мощию и заступле́нием, да благода́рно тебе́ зове́м:
Ра́дуйся, да́ром любве́ к Бо́гу и бли́жним испо́лненный; ра́дуйся, ве́рою чудоде́йственною озаре́нный;
Ра́дуйся, в моли́твах и бде́ниих преди́вный на́ш учи́телю; ра́дуйся, все́х приходя́щих к тебе́ ско́рый уте́шителю.
Ра́дуйся, ро́су исцеле́ний ве́рным источа́яй; ра́дуйся, неду́ги лю́тыя прогоня́яй.
Ра́дуйся, ми́лости сокро́вище неистощи́мое; ра́дуйся, правосла́вных приста́нище ти́хое.
Ра́дуйся, в со́ниих и виде́ниих стра́ждущих посеща́яй; ра́дуйся, в беда́х и напа́стех по́мощь и́м подава́яй.
Ра́дуйся, стра́нниче, во Оте́чество Небе́сное вше́дый; ра́дуйся, во все́м ми́ре христиа́нстем просла́вленный.
Ра́дуйся, страда́льче пра́ведный Иоа́нне, терпе́нию и кро́тости на́с науча́яй.
Кондак 9
Вся́кое естество́ челове́ческое удиви́ся, ви́девше чудеса́ пресла́вная, от моще́й пра́веднаго Иоа́нна истека́ющая, мно́зи у́бо восхоте́ша ча́сти и́х во ины́я места́ и гра́ды отдели́ти, оба́че все́м хотя́щим взя́ти и́х ты́, уго́дниче Бо́жий, возбраня́л еси́. Егда́ же святого́рцы ру́сскаго монастыря́ моля́хуся, да ча́сть моще́й твои́х да́руется и́м, благоволи́л еси́ е́же принести́ и́м в вертогра́д Богома́тере десну́ю ру́ку твою́ в благослове́ние и утеше́ние. И бы́сть ве́лие торжество́: вси́ и́ноцы оби́тели Пантелеи́моновы, коле́на прикло́ньше, срето́ша десну́ю ру́ку твою́, от гра́да Проко́пиона принесе́нную, воспева́юще Бо́гу благода́рственную пе́снь: Аллилу́иа.
Икос 9
Вети́и многовеща́ннии не возмо́гут изрещи́ си́лу любве́ правосла́вных е́ллинов, и́же изгна́ни бы́вше от Проко́пиона неве́рными, изнесо́ша многоцеле́бныя мо́щи твоя́, пра́ведне Иоа́нне, на о́стров Е́ввию, иде́же воздвиго́ша ве́лий благоле́пный хра́м во и́мя твое́, в не́мже и положи́ша и́х. Те́мже и мы́, моля́щеся во хра́ме се́м и предстоя́ще пред ра́кою твое́ю, чудесы́ благоуха́ющею, приле́жно мо́лим тя́: услы́ши на́с, твоего́ предста́тельства прося́щих и благогове́йне вопию́щих:
Ра́дуйся, ве́рных и неве́рных в беда́х уте́шителю; ра́дуйся, хра́му, во и́мя твое́ созда́нному, Боже́ственный покро́ве.
Ра́дуйся, страну́ Гре́ческую и лю́ди ея́ возлюби́вый; ра́дуйся, я́ко моща́ми твои́ми во Елла́ду приити́ изво́ливый.
Ра́дуйся, гра́да Но́ваго Проко́пиона святы́й покрови́телю; ра́дуйся, все́й стране́ Гре́честей незаходи́мое свети́ло.
Ра́дуйся, моща́ми твои́ми Го́ру Афо́нскую посети́вый; ра́дуйся, нетле́нною десни́цею оби́тель Пантелеи́монову благослови́вый.
Ра́дуйся, я́ко бра́тии Афо́нскаго вертогра́да в по́двизех ско́ро помога́еши; ра́дуйся, я́ко и оте́чество твое́, Ру́сь Святу́ю, не оставля́еши.
Ра́дуйся, я́ко и́мя твое́ по все́й вселе́нней призыва́ется; ра́дуйся, я́ко ве́ра христиа́нская тобо́ю прославля́ется.
Ра́дуйся, страда́льче пра́ведный Иоа́нне, терпе́нию и кро́тости на́с науча́яй.
Кондак 10
Спасе́ние в беда́х и напа́стех восхоте́в да́ти Госпо́дь ве́рным ча́дом Свои́м, яви́ на́м тя́, уго́дниче Бо́жий, прия́л бо еси́ благода́ть цели́ти неду́ги все́м притека́ющим к тебе́ с моли́твою: кровоточи́вии бо и прокаже́ннии прикоснове́нием к ра́це моще́й твои́х очища́ются, глуси́и слы́шат, разсла́бленнии здра́ви быва́ют, слепи́и прозрева́ют. Мы́ же, помина́юще ско́рое заступле́ние твое́, благода́рным гла́сом восхваля́ем Бо́га, пою́ще Ему́ пе́снь: Аллилу́иа.
Икос 10
Стена́ еси́ стране́ Гре́честей и наро́ду ея́ благочести́вому, пра́ведне Иоа́нне, и необори́мый засту́пник все́м призыва́ющим и́мя твое́, зане́ та́ко благоволи́ Са́м Госпо́дь бы́ти тебе́ защи́тнику христиа́н не то́кмо земли́ Елла́ды, но все́х лю́бящих и чту́щих тя́ люде́й правосла́вных. Те́мже Елла́дския Це́ркве лю́дие, Афо́нских оте́ц собо́ри, Руси́ Святы́я ве́рнии и во вся́кой стране́ чту́щии Бо́га восхваля́ют тя́ си́це:
Ра́дуйся, стра́жу земли́ Елла́ды, нечести́выя отгоня́яй; ра́дуйся, все́х благочести́вых люде́й ея́ от бе́д избавля́яй.
Ра́дуйся, я́ко все́м христиа́ном благода́тную по́мощь подае́ши; ра́дуйся, я́ко целе́бныя да́ры повсю́ду то́чиши.
Ра́дуйся, от Го́спода вла́сть на ду́хи нечи́стыя прие́мый; ра́дуйся, си́лою Бо́жиею и́х изгоня́яй.
Ра́дуйся, оста́вленным врача́ми преди́вное поможе́ние; ра́дуйся, от смертоно́сных я́зв мно́гим свобожде́ние.
Ра́дуйся, боля́щих младе́нцев благонаде́жный врачева́телю; ра́дуйся, скорбя́щих и́х роди́телей благи́й уте́шителю.
Ра́дуйся, пропове́дниче покая́ния и хода́таю о на́шем спасе́нии; ра́дуйся, учи́телю смиренному́дрия и долготерпе́ния.
Ра́дуйся, страда́льче пра́ведный Иоа́нне, терпе́нию и кро́тости на́с науча́яй.
Кондак 11
Пе́ние всеумиле́нное прино́сим Христу́ Бо́гу, просла́вльшему тя́, пра́ведне Иоа́нне, я́ко дарова́ на́м вели́каго засту́пника, уте́шителя и моли́твенника о спасе́нии правосла́вных христиа́н, по всему́ лицу́ земли́ обита́ющих. Те́мже сла́вим тя́, прося́ще твоего́ предста́тельства пред Го́сподем о стране́ на́шей Ру́сской, да изба́вимся от наше́ствий иноплеме́нных и междоусо́бныя бра́ни, и возмо́жем в ми́ре и тишине́ воспева́ти Христу́ Бо́гу пе́снь: Аллилу́иа.
Икос 11
Светоза́рный свети́льник Бо́жия благода́ти яви́лся еси́, пра́ведне Иоа́нне, духо́вным сия́нием по́двигов твои́х и чуде́с просвети́вый зе́мли Аси́и и Елла́ды. Ты́ бо, Ру́сскою земле́ю рожде́нный, повсю́ду источа́еши чуде́с мно́жество и мо́лишися о все́х лю́бящих и чту́щих тя́. Те́мже у́бо моли́ Христа́ Бо́га оте́честву твоему́ и все́й стране́ Гре́честей непоколеби́мым и безмяте́жным бы́ти, от наве́т вра́жиих и от ага́рянскаго наше́ствия и́х огради́, во́инству правосла́вному побе́ды на враги́ да́руй, да к тебе́ я́ко кре́пкому о на́с моли́твеннику взыва́ем си́це:
Ра́дуйся, Це́ркве Вселе́нския пресла́вное украше́ние; ра́дуйся, о лю́дех правосла́вных пред Бо́гом предста́телю.
Ра́дуйся, а́нгеле земли́ на́шея, во стране́ Гре́честей просия́вый; ра́дуйся, и во оте́честве свое́м благогове́йне почита́емый.
Ра́дуйся, во дни́ бе́д и испыта́ний чту́щим тя́ защи́тниче; ра́дуйся, о лю́бящих тя́ те́плый моли́твенниче.
Ра́дуйся, свети́льниче, омраче́нныя ду́ши просвеща́яй; ра́дуйся, лампа́до злата́я, еле́ем ми́лости испо́лненная.
Ра́дуйся, ра́дости духо́вныя чту́щим тя́ пода́телю; ра́дуйся, спаси́тельное все́м христиа́ном прибе́жище.
Ра́дуйся, ко очище́нию от страсте́й путеводи́телю; ра́дуйся, у Престо́ла Бо́жия о на́с недосто́йных хода́таю.
Ра́дуйся, страда́льче пра́ведный Иоа́нне, терпе́нию и кро́тости на́с науча́яй.
Кондак 12
Благода́ть Ду́ха Свята́го, живу́щая в тебе́, блаже́нне, ди́вно показа́ся в чудесе́х и исцеле́ниих от нетле́нных твои́х честны́х моще́й, и́хже любо́вию лобыза́юще, сла́вим о тебе́ Христа́ Бо́га, ди́внаго во святы́х Свои́х. Сего́ ра́ди не забу́ди и на́с, усе́рдно призыва́ющих тя́ во времена́ тя́жких бе́д и напа́стей, от ни́хже моли́твами твои́ми изба́ви и не преста́ни хода́тайствовати пред Бо́гом о дарова́нии все́м на́м душе́внаго спасе́ния и теле́снаго здра́вия, со благогове́нием пою́щим Ему́: Аллилу́иа.
Икос 12
Пою́ще по́двиги многоболе́зненнаго жития́ твоего́, почита́ем страда́ния, хва́лим долготерпе́ние, сла́вим кро́тость и смире́ние, ублажа́ем святу́ю твою́ кончи́ну и чти́м тя́, я́ко Небе́снаго предста́теля на́шего, ты́ бо от бе́д и скорбе́й избавля́еши, неду́ги врачу́еши, печа́ли утоля́еши все́х почита́ющих тя́. Благодари́м и велича́ем просла́вившаго тя́ Го́спода, дарова́вшаго на́м ди́внаго моли́твенника и чудотво́рца, Его́же умоли́ спасти́ся все́м пою́щим ти́ такова́я:
Ра́дуйся, Царя́ Небе́снаго добропобе́дный во́ине; ра́дуйся, вели́кий Христо́в уго́дниче.
Ра́дуйся, я́ко пла́чем и скорбьми́ утеше́ния ве́чнаго сподо́бился еси́; ра́дуйся, я́ко кро́тостию свое́ю и смире́нием зе́млю пра́ведных насле́довал еси́.
Ра́дуйся, чистото́ю и целому́дрием от Бо́га украше́нный; ра́дуйся, цве́том неувяда́емым на Небеси́ почте́нный.
Ра́дуйся, А́нгельских во́инств собесе́дниче; ра́дуйся, лико́м преподо́бных и пра́ведных совсе́льниче.
Ра́дуйся, ми́лостивое заступле́ние Бо́жия Ма́тере к на́м приклоня́яй; ра́дуйся, со все́ми святы́ми Престо́лу Бо́жию ны́не предстоя́й.
Ра́дуйся, все́х святы́х земли́ Ру́сския сонасле́дниче; ра́дуйся, на́с освеща́яй, любве́ свети́льниче.
Ра́дуйся, страда́льче пра́ведный Иоа́нне, терпе́нию и кро́тости на́с науча́яй.
Кондак 13
О пречу́дный и пресла́вный чудотво́рче, святы́й пра́ведный Иоа́нне, земли́ Ру́сския благода́тное рожде́ние, подви́жников Елла́ды похвало́ и украше́ние. Приими́ от лю́бящих тя́ ма́лое сие́ моле́ние и принеси́ е́ ко Христу́ Бо́гу на́шему, да сохрани́т на́с от вра́г ви́димых и неви́димых, от неду́га и гла́да, от вся́кия ско́рби и внеза́пныя сме́рти, и сподо́бит вку́пе с тобо́ю во Ца́рствии Небе́снем непреста́нно пе́ти Ему́: Аллилу́иа.
Повтор
Этот кондак читается трижды, затем икос 1-й и кондак 1-й.
Икос 1
А́нгелов Творе́ц и всея́ тва́ри Созда́тель избра́ тя, пра́ведне Иоа́нне, во е́же наро́ды Святы́я Руси́ и Елла́ды духо́вно соедини́ти, и яви́ тя Це́ркви Свое́й Святе́й вели́каго чудотво́рца, иму́щаго к Нему́ дерзнове́ние моли́тися о исцеле́нии неду́гов душе́вных и теле́сных, о избавле́нии от вся́ких бе́д и скорбе́й. Те́мже мы́, сы́нове ру́сскии, благогове́йне преклоня́ем пред тобо́ю коле́на серде́ц на́ших и умиле́нно глаго́лем:
Ра́дуйся, земны́й а́нгеле и челове́че небе́сный; ра́дуйся, благода́ти тезоимени́тый.
Ра́дуйся, кро́тости и послуша́ния о́бразе; ра́дуйся, моли́твы благоуха́нное кади́ло.
Ра́дуйся, терпе́нием зло́бу ми́ра сего́ победи́вый; ра́дуйся, венце́м испове́дническим от Го́спода украше́нный.
Ра́дуйся, зе́мли Аси́и по́двиги свои́ми озари́вый; ра́дуйся, чудесы́ твои́ми зе́млю Елла́ды напо́лнивый.
Ра́дуйся, Ру́сская звездо́, зе́мли вся́ просвеща́яй; ра́дуйся, оте́чество земно́е моли́твами твои́ми не оставля́яй.
Ра́дуйся, Христа́ ра́ди на земли́ пострада́вый; ра́дуйся, с Ни́м на Небесе́х воцари́выйся.
Ра́дуйся, страда́льче пра́ведный Иоа́нне, терпе́нию и кро́тости на́с науча́яй.
Кондак 1
Избра́ннаго испове́дника Христо́ва и чудотво́рца преди́внаго, побо́рника святы́я ве́ры правосла́вныя, Ру́сскою земле́ю рожде́ннаго и в земли́ Елла́ды возсия́вшаго, свята́го пра́веднаго Иоа́нна похва́льными пе́сньми почти́м; ты́ же, уго́дниче Бо́жий, я́ко предстоя́й пред Престо́лом Царя́ Сла́вы, от вся́ких на́с бе́д свободи́, с любо́вию и благодаре́нием зову́щих ти́:
Ра́дуйся, страда́льче пра́ведный Иоа́нне, терпе́нию и кро́тости на́с науча́яй.
Молитвы
О вели́кий уго́дниче Бо́жий, святы́й пра́ведный Иоа́нне Ру́сский, просия́вый в земли́ Аси́и равноа́нгельным житие́м твои́м, ре́вностию о Го́споде и по́двиги во испове́дании ве́ры Христо́вы, гра́да Проко́пиона Но́ваго и всея́ Елла́ды пресве́тлое украше́ние, богохрани́мей стране́ Ру́сской, лю́дем ея́ и во все́м ми́ре живу́щим правосла́вным христиа́ном по́моще и кре́пкое заступле́ние! Благодари́м Го́спода, ди́внаго во святы́х Свои́х, в ве́ре и́стинней непоколеби́мо тя́ утверди́вшаго, в стоя́нии за испове́дание ея́ укрепи́вшаго и до́брое сконча́ние по́двига многотру́днаго дарова́вшаго, последи́ же мно́гая и вели́кая чудеса́ на́м яви́вшаго чрез многоцеле́бную ра́ку моще́й твои́х. Ны́не, предстоя́ Небе́сному Царю́, испроси́ у Него́ изба́вити вся́ гра́ды и ве́си страны́ Ру́сския и земли́ Елла́дския от гла́да, тру́са, огня́, смертоно́сных боле́зней, от наше́ствий иноплеме́нных и междоусо́бныя бра́ни, исхода́тайствуй христолюби́вому во́инству на́шему во бра́нех с врага́ми оте́чества на́шего побе́ду и одоле́ние. Помози́ все́м путеше́ствующим, боля́щим, в заточе́нии су́щим, ско́рби и гоне́ния за святу́ю ве́ру правосла́вную терпя́щим. Соедини́ все́х правосла́вных люде́й любо́вию ко Христу́ Бо́гу на́шему и Це́ркви Его́ Святе́й, да́руй на́м ду́х любве́ и ми́ра к бра́тскому едине́нию все́х ве́рных. Умоли́ Го́спода, да пода́ст на́м ду́х покая́ния и сокруше́ния о гресе́х на́ших и всеси́льною Свое́ю благода́тию да помо́жет и укрепи́т в борьбе́ со страстьми́ и похотьми́, да да́рует на́м ду́х смире́ния и кро́тости, ду́х братолю́бия и незло́бия, ду́х ре́вности по Бо́зе о спасе́нии бли́жних. Помяни́ и на́с гре́шных, моля́щихся тебе́: стра́ждущих и боля́щих исцели́, скорбя́щих уте́ши, бе́дствующим ско́рую по́мощь пода́ждь, все́м же чту́щим и лю́бящим тя́ испроси́ христиа́нскую кончи́ну живота́, безболе́зненну, непосты́дну, ми́рну и до́брый отве́т на Стра́шнем Суди́щи Христо́ве. Бу́ди на́м помо́щник и покрови́тель во спасе́ние, да твои́ми моли́твами сподо́бимся в ны́нешнем и бу́дущем ве́це прославля́ти в Тро́ице покланя́емаго Бо́га, Отца́, и Сы́на, и Свята́го Ду́ха, ны́не и при́сно, и во ве́ки веко́в. Ами́нь.
О всеблаже́нный испове́дниче Христо́в и вели́кий чудотво́рче Иоа́нне, Е́ввии сокро́вище, Гре́ческия страны́ похвало́ и люде́й Ру́сских сро́дниче! Ты́ в плене́нии ага́рянстем лю́тая муче́ния за Христа́ претерпе́л еси́, благоче́стием же свои́м по́двиги и чудесы́ ве́рныя премно́го укрепи́л еси́, неве́рныя же умягчи́л еси́ и просвети́л еси́, по кончи́не же безчи́сленными чудесы́ и исцеле́ньми просиява́еши. Ве́мы, уго́дниче Бо́жий, я́ко ве́лие дерзнове́ние и́маши ко Го́споду, на́м же, бе́дствующим, состра́ждеши та́ко те́пле, я́ко не терпи́ши и зре́ти ны́ в лю́тых неду́зех или́ тя́жких ско́рбех су́щих, и сего́ ра́ди и непризыва́емый ско́ро притека́еши, телеса́ и ду́ши врачу́я, бе́сы изгоня́я, заблу́ждшия обраща́я, наипа́че же от младе́нец вся́кую боле́знь и го́ресть отгоня́я. Се́ бо и ны́не греси́ мно́зи отяготи́ша ны́ и изнуря́ющими скорбьми́ ду́ши на́ша сотро́шася, си́лы же теле́сныя оскуде́ша, и ка́ко уны́нию и тя́гостней печа́ли противоста́ти возмо́жем, а́ще не ты́ са́м, свя́тче Бо́жий, воста́неши по на́с и проти́ву враго́в на́ших благода́тне ополчи́шися! Испроси́ же, благоприя́тными твои́ми ко Го́споду моли́твами, соверше́нное исцеле́ние теле́сными неду́ги стра́ждущим, все́м же спаси́тельное терпе́ние и благодаре́ние; ско́рби, бесо́вския наве́ты и искуше́ния отврати́; вся́ же, ели́ка попу́стит Госпо́дь, научи́ во очище́ние понести́ благоразу́мне; на́с же, во тьме́ неве́дения и забве́ния за́поведей Бо́жиих су́щих, просвети́, вы́ну неукло́нне твори́ти во́лю Бо́жию наста́ви, безпло́дия духо́внаго разреши́, очище́ние, освяще́ние и просвеще́ние душа́м на́шим да́руй; да с тобо́ю вку́пе просла́вим Всеблага́го Бо́га и Пречи́стую Богоро́дицу во ве́ки веко́в. Ами́нь.
Конда́къ а҃
И҆збра́ннаго и҆сповѣ́дника хрⷭ҇то́ва и҆ чꙋдотво́рца преди́внаго, побо́рника ст҃ы́ѧ вѣ́ры правосла́вныѧ, рꙋ́сскою земле́ю рожде́ннаго и҆ въ землѝ є҆лла́ды возсїѧ́вшаго, ст҃а́го првⷣнаго і҆ѡа́нна похва́льными пѣ́сньми почти́мъ: ты́ же, ᲂу҆го́дниче бж҃їй, ꙗ҆́кѡ предстоѧ́й пред̾ прⷭ҇то́ломъ цр҃ѧ̀ сла́вы, ѿ всѧ́кихъ на́съ бѣ́дъ свободѝ, съ любо́вїю и҆ бл҃годаре́нїемъ зовꙋ́щихъ тѝ:
Ра́дꙋйсѧ, страда́льче првⷣный і҆ѡа́нне, терпѣ́нїю и҆ кро́тости на́съ наꙋча́ѧй.
І҆́косъ а҃
А҆́гг҃лѡвъ творе́цъ и҆ всеѧ̀ тва́ри созда́тель и҆збра́ тѧ, првⷣне і҆ѡа́нне, во є҆́же наро́ды ст҃ы́ѧ рꙋсѝ и҆ є҆лла́ды дꙋхо́внѡ соедини́ти, и҆ ꙗ҆ви́ тѧ цр҃кви свое́й ст҃ѣ́й вели́каго чꙋдотво́рца, и҆мꙋ́щаго къ немꙋ̀ дерзнове́нїе моли́тисѧ ѡ҆ и҆сцѣле́нїи недꙋ́гѡвъ дꙋше́вныхъ и҆ тѣле́сныхъ, ѡ҆ и҆збавле́нїи ѿ всѧ́кихъ бѣ́дъ и҆ скорбе́й. Тѣ́мже мы̀, сы́нове рꙋ́сскїи, бл҃гоговѣ́йнѣ преклонѧ́емъ пред̾ тобо́ю колѣ̑на серде́цъ на́шихъ и҆ ᲂу҆миле́ннѡ глаго́лемъ:
Ра́дꙋйсѧ, земны́й а҆́гг҃ле и҆ человѣ́че нбⷭ҇ный: ра́дꙋйсѧ, бл҃года́ти тезоимени́тый.
Ра́дꙋйсѧ, кро́тости и҆ послꙋша́нїѧ ѻ҆́бразе: ра́дꙋйсѧ, мл҃твы бл҃гоꙋха́нное кади́ло.
Ра́дꙋйсѧ, терпѣ́нїемъ ѕло́бꙋ мі́ра сегѡ̀ побѣди́вый: ра́дꙋйсѧ, вѣнце́мъ и҆сповѣ́дническимъ ѿ гдⷭ҇а ᲂу҆краше́нный.
Ра́дꙋйсѧ, зе́мли а҆сі́и пѡ́двиги свои́ми ѡ҆зари́вый: ра́дꙋйсѧ, чꙋдесы̀ твои́ми зе́млю є҆лла́ды напо́лнивый.
Ра́дꙋйсѧ, рꙋ́сскаѧ ѕвѣздо̀, зе́мли всѧ̑ просвѣща́ѧй: ра́дꙋйсѧ, ѻ҆те́чество земно́е мл҃твами твои́ми не ѡ҆ставлѧ́ѧй.
Ра́дꙋйсѧ, хрⷭ҇та̀ ра́ди на землѝ пострада́вый: ра́дꙋйсѧ, съ ни́мъ на нб҃сѣ́хъ воцари́выйсѧ.
Ра́дꙋйсѧ, страда́льче првⷣный і҆ѡа́нне, терпѣ́нїю и҆ кро́тости на́съ наꙋча́ѧй.
Конда́къ в҃
Ви́дѧ хрⷭ҇то́съ гдⷭ҇ь бл҃го́е намѣ́ренїе се́рдца твоегѡ̀, і҆ѡа́нне бл҃же́нне, предначерта́ ти терни́стый и҆ многотрꙋ́дный пꙋ́ть сп҃се́нїѧ: є҆гда̀ бы́лъ є҆сѝ съ во́инствомъ царѧ̀ петра̀, плѣни́ша тѧ̀ а҆га́рѧне и҆ въ раба̀ прода́ша въ зе́млю а҆сі́и во гра́дъ проко́пїонъ, и҆дѣ́же ты̀ пребы́лъ є҆сѝ непоколеби́мь въ вѣ́рѣ правосла́внѣй и҆ жи́знь твою̀ посвѧти́лъ є҆сѝ бг҃ꙋ, непреста́ннѡ ᲂу҆сты̑ и҆ се́рдцемъ воспѣва́ѧ є҆мꙋ̀: А҆ллилꙋ́їа.
І҆́косъ в҃
Ра́зꙋмъ бг҃опросвѣще́нный и҆ вѣ́рꙋ несꙋмнѣ́ннꙋю и҆мѣ́лъ є҆сѝ, ст҃че бж҃їй, є҆гда̀ гнѣ́ва а҆га́рѧнъ не ᲂу҆страши́всѧ, и҆сповѣ́да себѐ хрⷭ҇тїа́нина бы́ти и҆ ра́достнѡ воспрїѧ́лъ є҆сѝ бїє́нїѧ, ᲂу҆́зы желѣ̑зныѧ, ѻ҆гне́мъ жже́нїе и҆ мнѡ́ги мꙋ̑ки нестерпи̑мыѧ. Тѣ́мже всѝ, таково́мꙋ твоемꙋ̀ дерзнове́нїю и҆ мꙋ́жествꙋ дивѧ́щесѧ, глаго́лемъ:
Ра́дꙋйсѧ, во стра́сѣ бж҃їи до́брѣ воспита́нный: ра́дꙋйсѧ, зако́нꙋ гдⷭ҇ню вѣ́рнѡ наꙋче́нный.
Ра́дꙋйсѧ, ѿ ю҆́ности твоеѧ̀ всего̀ себѐ бг҃ꙋ преда́вый: ра́дꙋйсѧ, въ мл҃твѣ ᲂу҆тѣше́нїе дꙋхо́вное ѡ҆брѣта́вый.
Ра́дꙋйсѧ, ѕло́бы а҆га́рѧнъ не ᲂу҆страши́выйсѧ: ра́дꙋйсѧ, мꙋ̑ки нестерпи̑мыѧ побѣ́днѡ претерпѣ́вый.
Ра́дꙋйсѧ, за гдⷭ҇а распѧ́таго ѻ҆гне́мъ ѿ мꙋчи́телей ѡ҆пале́нный: ра́дꙋйсѧ, хрⷭ҇тѡ́вымъ стрⷭ҇те́мъ въ тѣлесѝ твое́мъ прїѡбщи́выйсѧ.
Ра́дꙋйсѧ, терпѣ́нїе крѣ́пкое во страда́нїихъ ꙗ҆ви́вый: ра́дꙋйсѧ, ѿ вѣ́ры правосла́вныѧ не ѿстꙋпи́вый.
Ра́дꙋйсѧ, хрⷭ҇та̀ є҆ди́наго всѣ́мъ се́рдцемъ возлюби́вый: ра́дꙋйсѧ, во́ине хрⷭ҇то́въ непобѣди́мый.
Ра́дꙋйсѧ, страда́льче првⷣный і҆ѡа́нне, терпѣ́нїю и҆ кро́тости на́съ наꙋча́ѧй.
Конда́къ г҃
Си́лою вы́шнѧгѡ ᲂу҆крѣплѧ́емь, со дерзнове́нїемъ проповѣ́далъ є҆сѝ є҆ди́наго и҆́стиннаго бг҃а пред̾ мꙋчи́тєли твои́ми. Ѕлочести́вый господи́нъ тво́й, надѣ́ѧсѧ ᲂу҆лови́ти тѧ̀ и҆ къ вѣ́рѣ свое́й привлещѝ, тѣ́ло твоѐ нача́тъ и҆стѧза́ти. Ты́ же, стрⷭ҇тоте́рпче хрⷭ҇то́въ, жестѡ́каѧ бїє́нїѧ ѿ негѡ̀ претерпѣва́ѧ, ᲂу҆крѣплѧ́ющемꙋ тѧ̀ бг҃ꙋ и҆з̾ глꙋбины̀ се́рдца воспѣва́лъ є҆сѝ: А҆ллилꙋ́їа.
І҆́косъ г҃
И҆мѣ́ѧ въ дꙋшѝ свое́й пла́менное жела́нїе послѣ́довати а҆́гнцꙋ бж҃їю, пострада́вшемꙋ сп҃се́нїѧ на́шегѡ ра́ди, првⷣне і҆ѡа́нне, не ᲂу҆боѧ́лсѧ є҆сѝ мꙋче́нїй и҆ моли́лсѧ є҆сѝ за врагѝ твоѧ̑ и҆ мꙋчи́тєли, и҆ ѿ вѣ́ры во хрⷭ҇та̀ ника́коже ѿстꙋпи́лъ є҆сѝ, вопїѧ̀ є҆мꙋ̀: ничто́же мѧ̀ разлꙋчи́тъ ѿ любвѐ твоеѧ̀, хрⷭ҇тѐ бж҃е. Сегѡ̀ ра́ди велича́емъ тѧ̀ си́це:
Ра́дꙋйсѧ, вѣ́ры хрⷭ҇то́вы а҆дама́нте несокрꙋши́мый: ра́дꙋйсѧ, ѡ҆ мі́рѣ се́мъ мл҃твенниче ᲂу҆се́рдный.
Ра́дꙋйсѧ, да́же до кро́ве за хрⷭ҇та̀ пострада́вый: ра́дꙋйсѧ, въ мꙋ́жествѣ непоколеби́мѣмъ пребы́вый.
Ра́дꙋйсѧ, въ мꙋче́нїихъ бл҃года́тїю свы́ше ᲂу҆крѣпле́нный: ра́дꙋйсѧ, свирѣ́пство мꙋчи́телей побѣди́вый.
Ра́дꙋйсѧ, стрⷭ҇те́мъ хрⷭ҇тѡ́вымъ подража́телю: ра́дꙋйсѧ, врагѡ́въ цр҃кве посрами́телю.
Ра́дꙋйсѧ, вѣ́рꙋ, наде́ждꙋ и҆ любо́вь къ бг҃ꙋ до конца̀ сохрани́вый: ра́дꙋйсѧ, по́двигомъ твои́мъ хрⷭ҇тїа́нъ проко́пїона возвесели́вый.
Ра́дꙋйсѧ, въ се́рдцѣ твое́мъ ѻ҆́бразъ хрⷭ҇та̀ носи́вый: ра́дꙋйсѧ, страда́ньми за негѡ̀ црⷭ҇тво нбⷭ҇ное наслѣ́дивый.
Ра́дꙋйсѧ, страда́льче првⷣный і҆ѡа́нне, терпѣ́нїю и҆ кро́тости на́съ наꙋча́ѧй.
Конда́къ д҃
Бꙋ́рѧ лю́тыхъ мꙋ́къ и҆ страсте́й мі́ра сегѡ̀ не потопѝ кораблѧ̀ дꙋшѝ твоеѧ̀, првⷣне і҆ѡа́нне, ты́ бо въ тѣле́снѣмъ плѣне́нїи бл҃годꙋ́шїе и҆ кро́тость, неѕло́бїе и҆ смире́нїе ꙗ҆ви́лъ є҆сѝ, и҆ ꙗ҆́коже а҆́гг҃лъ, на землѝ пожи́лъ є҆сѝ, въ трꙋдѣ́хъ, постѣ̀ и҆ мл҃твѣ подвиза́ѧсѧ, ке́сарю ке́сарево, а҆ бж҃їе бг҃ови ѿдава́ѧ, по сло́вꙋ гдⷭ҇а, но́щїю же без̾ сна̀ пребыва́ѧ, ѡ҆ проще́нїи свои́хъ согрѣше́нїй, наипа́че же ѡ҆ творѧ́щихъ тѝ ѻ҆би̑ды и҆ ѡ҆ѕлоблє́нїѧ молѧ́сѧ, съ любо́вїю поѧ̀ бг҃ꙋ: А҆ллилꙋ́їа.
І҆́косъ д҃
Слы́шавше и҆ ви́дѣвше ди́вное твоѐ житїѐ, смире́нїе и҆ премно́гꙋю добродѣ́тель, гони́тєли твоѝ ᲂу҆диви́шасѧ и҆ прославлѧ́хꙋ тебѐ ꙗ҆́кѡ человѣ́ка првⷣна. Е҆гда́ же лю́тый господи́нъ тво́й ᲂу҆зрѣ̀ въ домꙋ̀ свое́мъ мл҃твъ твои́хъ ра́ди и҆з̾ѻби́лїе во все́мъ и҆ дадѐ тебѣ̀ ѡ҆сла́бꙋ, ты̀ ѻ҆гне́мъ любвѐ ко гдⷭ҇ꙋ ѡ҆крилѧ́емь, ᲂу҆мно́жилъ є҆сѝ трꙋды̀ подви́жничєскїѧ, на всѧ́кꙋ но́щь тече́нїемъ сле́зъ помо́стъ притво́ра цр҃ко́внагѡ въ мл҃твѣ ѡ҆роша́ѧ. Помозѝ ᲂу҆́бѡ и҆ на́мъ подража́ти тебѣ̀, ᲂу҆крѣпѝ на́съ, ѿ мглы̀ страсте́й и҆зба́ви и҆ да́рꙋй мꙋ́жество дꙋхо́вное всѣ̑мъ прибѣга́ющымъ ко предста́тельствꙋ твоемꙋ̀ и҆ вопїю́щымъ тебѣ̀ такова̑ѧ:
Ра́дꙋйсѧ, ᲂу҆ничиже́нїемъ твои́мъ ᲂу҆бо́гомꙋ ла́зарю ᲂу҆подо́бивыйсѧ: ра́дꙋйсѧ, терпѣ́нїемъ твои́мъ съ многострада́льнымъ і҆́ѡвомъ сравни́выйсѧ.
Ра́дꙋйсѧ, смире́нїемъ хрⷭ҇тꙋ̀ ᲂу҆се́рднѡ подража́вый: ра́дꙋйсѧ, по́двигомъ твои́мъ а҆́гг҃лѡвъ ᲂу҆диви́вый.
Ра́дꙋйсѧ, трꙋ́дниче прилѣ́жный, земно́мꙋ господи́нꙋ вѣ́рнѡ послꙋжи́вый: ра́дꙋйсѧ, кро́тостїю и҆ бл҃гостїю свое́ю се́рдце є҆гѡ̀ ᲂу҆мѧгчи́вый.
Ра́дꙋйсѧ, за твори́вшихъ тѝ ѻ҆би̑ды мл҃твы возноси́вый: ра́дꙋйсѧ, ѕло́бꙋ и҆́хъ на млⷭ҇ть преложи́вый.
Ра́дꙋйсѧ, на па́перти цр҃ко́внѣй нѡ́щи въ мл҃твахъ проводи́вый: ра́дꙋйсѧ, средѝ мра́ка ѕловѣ́рїѧ бл҃гоче́стїемъ просїѧ́вый.
Ра́дꙋйсѧ, ꙗ҆́кѡ за ненави́дѧщихъ и҆ ѡ҆би́дѧщихъ на́съ моли́тисѧ подвиза́еши: ра́дꙋйсѧ, ꙗ҆́кѡ любвѐ и҆ млⷭ҇рдїѧ ко всѣ̑мъ лю́демъ и҆сполнѧ́еши.
Ра́дꙋйсѧ, страда́льче првⷣный і҆ѡа́нне, терпѣ́нїю и҆ кро́тости на́съ наꙋча́ѧй.
Конда́къ є҃
Бг҃оте́чнаѧ ѕвѣзда̀, ѿ ст҃ы́ѧ рꙋсѝ возсїѧ́вшаѧ, ꙗ҆ви́лсѧ є҆сѝ, бл҃же́нне і҆ѡа́нне, блиста́ѧ чистото́ю а҆́гг҃льскою, и҆ лꙋча́ми добродѣ́телей твои́хъ зе́мли а҆сі́и и҆ є҆лла́ды ѡ҆зари́въ. Е҆гда́ же ты̀ бо́лѣнъ бѣ̀, и҆ де́нь своеѧ̀ кончи́ны ѿ бг҃а вѣ́даѧ, восхотѣ́лъ є҆сѝ причасти́тисѧ ст҃ы́хъ хрⷭ҇то́выхъ та́инъ, і҆ере́й, бг҃омъ вразꙋмле́нный, принесѐ тебѣ̀ ст҃ы̑ѧ да́ры во ꙗ҆́блоцѣ, и҆̀хже прїе́мъ, првⷣнꙋю дꙋ́шꙋ твою̀ въ рꙋ́цѣ бж҃їи пре́далъ є҆сѝ, и҆ свѣти́льникъ носѧ̀, по́лнъ є҆ле́ѧ до́брыхъ дѣ́лъ, вше́лъ є҆сѝ въ црⷭ҇твїе нбⷭ҇ное, во є҆́же непреста́ннѡ со всѣ́ми ст҃ы́ми воспѣва́ти всѣ́хъ ст҃ы́хъ ст҃ѣ́йшемꙋ сло́вꙋ: А҆ллилꙋ́їа.
І҆́косъ є҃
Ви́дѣвше лю́дїе гра́да проко́пїона бг҃оꙋго́дное житїѐ твоѐ и҆ бл҃же́ннꙋю кончи́нꙋ, со слеза́ми и҆ бл҃гоговѣ́нїемъ погребо́ша тѣ́ло твоѐ во хра́мѣ ст҃а́гѡ великомч҃нка геѡ́ргїа. По кончи́нѣ же твое́й мно́зи недꙋ́жнїи не то́кмѡ правосла́внїи, но и҆ латі́нѧне, и҆ а҆га́рѧне полꙋча́хꙋ и҆сцѣлє́нїѧ ᲂу҆ гро́ба твоегѡ̀, бл҃годаре́нїе бг҃ꙋ приносѧ́ще. Сегѡ̀ ра́ди тебѣ̀ ꙗ҆́кѡ те́пломꙋ мл҃твенникꙋ ѡ҆ всѣ́хъ стра́ждꙋщихъ взыва́емъ та́кѡ:
Ра́дꙋйсѧ, се́рдце твоѐ покаѧ́нными слеза́ми ѡ҆мы́вый: ра́дꙋйсѧ, пла́чемъ и҆ мл҃твами къ сме́рти себѐ прїꙋгото́вивый.
Ра́дꙋйсѧ, ꙗ҆́кѡ всѣ́хъ ѡ҆би́дѧщихъ тѧ̀ прости́лъ є҆сѝ: ра́дꙋйсѧ, ꙗ҆́кѡ неѕло́бїемъ хрⷭ҇то́вымъ дꙋ́ха ѕло́бы побѣди́лъ є҆сѝ.
Ра́дꙋйсѧ, въ чистотѣ̀ дꙋ́шꙋ и҆ тѣ́ло сохрани́вый: ра́дꙋйсѧ, кончи́нꙋ свою̀ пред̾ꙋвѣ́дѣвый.
Ра́дꙋйсѧ, првⷣнѡ жи́знь земнꙋ́ю сконча́вый: ра́дꙋйсѧ, возлюби́вшемꙋ тѧ̀ гдⷭ҇ꙋ дꙋ́шꙋ преда́вый.
Ра́дꙋйсѧ, ꙗ҆́кѡ вѣнце́мъ безсме́ртїѧ ѿ гдⷭ҇а вѣнча́лсѧ є҆сѝ: ра́дꙋйсѧ, ꙗ҆́кѡ вѣ́чнѣй ра́дости по сме́рти прїѡбщи́лсѧ є҆сѝ.
Ра́дꙋйсѧ, ꙗ҆́кѡ цр҃ковь великомч҃нка геѡ́ргїа прїѧ́тъ чтⷭ҇но́е тѣ́ло твоѐ: ра́дꙋйсѧ, ꙗ҆́кѡ во ѻ҆би́телехъ нбⷭ҇ныхъ водвори́сѧ ст҃а́ѧ дꙋша̀ твоѧ̀.
Ра́дꙋйсѧ, страда́льче првⷣный і҆ѡа́нне, терпѣ́нїю и҆ кро́тости на́съ наꙋча́ѧй.
Конда́къ ѕ҃
Проповѣ́дникъ чꙋде́съ и҆ сла́вы бж҃їѧ ꙗ҆ви́сѧ кли́рїкъ нѣ́кїй гра́да проко́пїона, є҆гда̀ ᲂу҆зрѣ̀ въ со́ннѣмъ видѣ́нїи бл҃же́ннаго і҆ѡа́нна, повелѣва́ющаго ѿкры́ти гро́бъ, въ не́мже ѡ҆брѣта́ютсѧ нетлѣ̑нныѧ мо́щи є҆гѡ̀. Тѣ́мже вѣ́рнїи мл҃твеннѡ возопи́ша ко гдⷭ҇ꙋ, да ꙗ҆ви́тъ ѻ҆́нъ лю́демъ мо́щи своегѡ̀ и҆збра́нника, зовꙋ́ще со бл҃годаре́нїемъ є҆мꙋ̀: А҆ллилꙋ́їа.
І҆́косъ ѕ҃
Возсїѧ́лъ є҆сѝ, ꙗ҆́кѡ но́вое свѣти́ло всемꙋ̀ хрⷭ҇тїа́нскомꙋ ро́дꙋ, првⷣне і҆ѡа́нне, є҆гда̀ бж҃їимъ и҆зволе́нїемъ ѡ҆брѣ́тено бы́сть нетлѣ́нное и҆ бл҃гоꙋха́нное тѣ́ло твоѐ, и҆сточа́ющее ѻ҆би́лїе чꙋде́съ всѣ̑мъ съ вѣ́рою къ твоемꙋ̀ застꙋпле́нїю прибѣга́ющымъ. Тѣ́мже ᲂу҆врачꙋ́й и҆ возвеселѝ на́съ, вѣ́рою и҆ любо́вїю тебѣ̀ взыва́ющихъ:
Ра́дꙋйсѧ, на землѝ, ꙗ҆́кѡ безпло́тенъ, пожи́вый: ра́дꙋйсѧ, првⷣниче бж҃їй, въ чꙋдесѣ́хъ просїѧ́вый.
Ра́дꙋйсѧ, і҆ере́ю цр҃кве ст҃а́гѡ геѡ́ргїа ꙗ҆ви́выйсѧ: ра́дꙋйсѧ, ст҃ы̑ѧ мо́щи твоѧ̑ томꙋ̀ ѿкры́ти повелѣ́вый.
Ра́дꙋйсѧ, ꙗ҆́кѡ хрⷭ҇то́съ съ нб҃сѐ на ст҃ы̑ѧ мо́щи твоѧ̑ зна́менїемъ ᲂу҆каза̀: ра́дꙋйсѧ, ꙗ҆́кѡ сто́лпъ ѻ҆́гненный над̾ ни́ми гдⷭ҇ь чꙋ́днѡ ꙗ҆вѝ.
Ра́дꙋйсѧ, ꙗ҆́кѡ нетлѣ́нїемъ тѣ́ло твоѐ гдⷭ҇ь прославлѧ́етъ: ра́дꙋйсѧ, ꙗ҆́кѡ бл҃гоꙋха́нїемъ ѿ негѡ̀ то́й вѣ́рныхъ возвеселѧ́етъ.
Ра́дꙋйсѧ, ꙗ҆́кѡ моще́й твои́хъ де́мони трепе́щꙋтъ: ра́дꙋйсѧ, сосꙋ́де бжⷭ҇твенныѧ бл҃года́ти.
Ра́дꙋйсѧ, ꙗ҆́кѡ во црⷭ҇твїи нбⷭ҇нѣмъ со ст҃ы́ми пребыва́еши: ра́дꙋйсѧ, ꙗ҆́кѡ и҆ на́съ грѣ́шныхъ на землѝ не ѡ҆ставлѧ́еши.
Ра́дꙋйсѧ, страда́льче првⷣный і҆ѡа́нне, терпѣ́нїю и҆ кро́тости на́съ наꙋча́ѧй.
Конда́къ з҃
Хотѧ́щымъ врагѡ́мъ гра́дъ тво́й разори́ти и҆ мо́щи твоѧ̑ ѻ҆гню̀ преда́ти, ꙗ҆ви́сѧ стра́шное и҆ пресла́вное чꙋ́до: во́ини ᲂу҆ви́дѣша тѧ̀, і҆ѡа́нне, стоѧ́ща посредѣ̀ ѻ҆гнѧ̀ и҆ ѡ҆ста́вити гра́дъ гро́знѡ и҆̀мъ повелѣва́юща. Ті́и же ѡ҆ видѣ́нїи ᲂу҆жасо́шасѧ и҆ во́нъ бѣжа́ша и҆ никоегѡ́же ѕла̀ сотвори́ша. Вѣ́рнїи же лю́дїе па́ки ѡ҆брѣто́ша мо́щи твоѧ̑, къ ни̑мже и҆ мы̀ припа́дающе, вопїе́мъ бг҃ꙋ побѣ́днꙋю пѣ́снь: А҆ллилꙋ́їа.
І҆́косъ з҃
Но́ваго тѧ̀ чꙋдотво́рца и҆ мл҃твенника во времена̀ послѣ̑днѧѧ дарова̀ на́мъ чл҃вѣколю́бецъ гдⷭ҇ь, є҆гда̀ вѣ́ра ѡ҆скꙋдѣ̀, любы̀ ѡ҆хладѣ̀, наде́жда поколеба́сѧ. Тѣ́мже мо́лимъ тѧ̀, првⷣне і҆ѡа́нне, не ѡ҆ста́ви на́съ, грѣ́шныхъ и҆ сла́быхъ, въ годи́нꙋ и҆спыта́нїй, ᲂу҆крѣпѝ мл҃твами твои́ми всѣ́хъ лю́бѧщихъ тѧ̀ и҆ вопїю́щихъ тѝ такова̑ѧ:
Ра́дꙋйсѧ, вѣ́рныхъ наде́ждо и҆ застꙋпле́нїе: ра́дꙋйсѧ, невѣ́рныхъ стра́хъ и҆ посрамле́нїе.
Ра́дꙋйсѧ, ꙗ҆́кѡ пѡ́двиги твои́ми гра́дъ проко́пїонъ ѡ҆ст҃и́лъ є҆сѝ: ра́дꙋйсѧ, ꙗ҆́кѡ мл҃твами твои́ми зе́млю є҆лла́ды ѡ҆бл҃гоꙋха́лъ є҆сѝ.
Ра́дꙋйсѧ, свѣ́тъ хрⷭ҇то́въ въ се́рдцѣ твое́мъ носи́вый: ра́дꙋйсѧ, тьмꙋ̀ жи́зни на́шеѧ свѣ́томъ ѻ҆́нымъ ѡ҆зарѧ́ѧй.
Ра́дꙋйсѧ, ѡ҆ лю́дехъ страны̀ гре́ческїѧ мл҃твенниче неꙋсы́пный: ра́дꙋйсѧ, помо́щниче лю́демъ рꙋ̑сскимъ бг҃одарова́нный.
Ра́дꙋйсѧ, градѡ́мъ и҆ хра́мѡмъ ѿ разоре́нїѧ защище́нїе: ра́дꙋйсѧ, правосла́вныхъ хрⷭ҇тїа́нъ ско́рое прибѣ́жище.
Ра́дꙋйсѧ, ꙗ҆́кѡ ны́нѣ со всѣ́ми ст҃ы́ми прⷭ҇то́лꙋ бж҃їю предстои́ши: ра́дꙋйсѧ, ꙗ҆́кѡ неизрече́ннꙋю сла́вꙋ гдⷭ҇ню созерца́еши.
Ра́дꙋйсѧ, страда́льче првⷣный і҆ѡа́нне, терпѣ́нїю и҆ кро́тости на́съ наꙋча́ѧй.
Конда́къ и҃
Стра́нникъ и҆ пришле́цъ бы́лъ є҆сѝ въ странѣ̀ плѣне́нїѧ твоегѡ̀, ᲂу҆го́дниче бж҃їй, взыскꙋ́ѧй го́рнѧгѡ і҆ерⷭ҇ли́ма, и҆ та́кѡ бꙋ́ее мїрски̑мъ лю́демъ, премꙋ́дрое же ѡ҆ хрⷭ҇тѣ̀ житїѐ пожи́въ, добродѣ́тельми мно́гими къ бг҃ꙋ прибли́зилсѧ є҆сѝ, наꙋча́ѧ всѣ́хъ вѣ́рныхъ и҆ска́ти є҆ди́нагѡ на потре́бꙋ. Сегѡ̀ ра́ди са́мъ гдⷭ҇ь, ви́дѧ смире́нїе твоѐ, возвели́чи тѧ̀ бл҃года́тїю свое́ю, є҆го́же восхвалѧ́юще, пое́мъ а҆́гг҃льскꙋю пѣ́снь: А҆ллилꙋ́їа.
І҆́косъ и҃
Ве́сь бы́лъ є҆сѝ любвѐ бжⷭ҇твенныѧ и҆спо́лненъ, бл҃же́нне, свѣ́томъ бл҃года́ти бж҃їѧ сїѧ́ѧ пред̾ человѣ̑ки, и҆ ст҃ы̑ѧ мо́щи твоѧ̑ и҆сто́чникъ є҆́сть и҆сцѣле́нїй, сокро́вище чꙋде́съ, нбⷭ҇ныхъ а҆рѡма̑тъ вмѣсти́лище. Сегѡ̀ ра́ди, дерзнове́нїе ве́лїе ко гдⷭ҇ꙋ и҆мѣ́ѧ, мо́лишисѧ за хрⷭ҇тїа́ны, во все́мъ мі́рѣ живꙋ́щыѧ, и҆ вѣ́рою тѧ̀ на по́мощь призыва́ющымъ посо́бствꙋеши. Не ѡ҆ста́ви ᲂу҆́бѡ и҆ на́съ бл҃года́тною твое́ю по́мощїю и҆ застꙋпле́нїемъ, да бл҃года́рнѡ тебѣ̀ зове́мъ:
Ра́дꙋйсѧ, да́ромъ любвѐ къ бг҃ꙋ и҆ бли̑жнимъ и҆спо́лненный: ра́дꙋйсѧ, вѣ́рою чꙋдодѣ́йственною ѡ҆заре́нный.
Ра́дꙋйсѧ, въ мл҃твахъ и҆ бдѣ́нїихъ преди́вный на́шъ ᲂу҆чи́телю: ра́дꙋйсѧ, всѣ́хъ приходѧ́щихъ къ тебѣ̀ ско́рый ᲂу҆тѣ́шителю.
Ра́дꙋйсѧ, ро́сꙋ и҆сцѣле́нїй вѣ̑рнымъ и҆сточа́ѧй: ра́дꙋйсѧ, недꙋ́ги лю̑тыѧ прогонѧ́ѧй.
Ра́дꙋйсѧ, млⷭ҇ти сокро́вище неистощи́мое: ра́дꙋйсѧ, правосла́вныхъ приста́нище ти́хое.
Ра́дꙋйсѧ, въ со́нїихъ и҆ видѣ́нїихъ стра́ждꙋщихъ посѣща́ѧй: ра́дꙋйсѧ, въ бѣда́хъ и҆ напа́стехъ по́мощь и҆̀мъ подава́ѧй.
Ра́дꙋйсѧ, стра́нниче, во ѻ҆те́чество нбⷭ҇ное вше́дый: ра́дꙋйсѧ, во все́мъ мі́рѣ хрⷭ҇тїа́нстѣмъ просла́вленный.
Ра́дꙋйсѧ, страда́льче првⷣный і҆ѡа́нне, терпѣ́нїю и҆ кро́тости на́съ наꙋча́ѧй.
Конда́къ ѳ҃
Всѧ́кое є҆стество̀ человѣ́ческое ᲂу҆диви́сѧ, ви́дѣвше чꙋдеса̀ пресла̑внаѧ, ѿ моще́й првⷣнагѡ і҆ѡа́нна и҆стека̑ющаѧ, мно́зи ᲂу҆́бѡ восхотѣ́ша ча̑сти и҆́хъ во и҆ны̑ѧ мѣста̀ и҆ гра́ды ѿдѣли́ти, ѻ҆ба́че всѣ̑мъ хотѧ́щымъ взѧ́ти и҆̀хъ ты̀, ᲂу҆го́дниче бж҃їй, возбранѧ́лъ є҆сѝ. Е҆гда́ же ст҃ого́рцы рꙋ́сскагѡ монастырѧ̀ молѧ́хꙋсѧ, да ча́сть моще́й твои́хъ да́рꙋетсѧ и҆̀мъ, бл҃говоли́лъ є҆сѝ є҆́же принестѝ и҆̀мъ въ вертогра́дъ бг҃омт҃ре деснꙋ́ю рꙋ́кꙋ твою̀ въ бл҃гослове́нїе и҆ ᲂу҆тѣше́нїе. И҆ бы́сть ве́лїе торжество̀: всѝ и҆́ноцы ѻ҆би́тели пантелеи́мѡновы, колѣ̑на прекло́ньше, срѣто́ша деснꙋ́ю рꙋ́кꙋ твою̀, ѿ гра́да проко́пїона принесе́ннꙋю, воспѣва́юще бг҃ꙋ бл҃года́рственнꙋю пѣ́снь: А҆ллилꙋ́їа.
І҆́косъ ѳ҃
Вѣті̑и многовѣща́ннїи не возмо́гꙋтъ и҆зрещѝ си́лꙋ любвѐ правосла́вныхъ є҆́ллинѡвъ, и҆̀же и҆згна́ни бы́вше ѿ проко́пїона невѣ́рными, и҆знесо́ша многоцѣлє́бныѧ мо́щи твоѧ̑, првⷣне і҆ѡа́нне, на ѻ҆́стровъ є҆́ѵвїю, и҆дѣ́же воздвиго́ша ве́лїй бл҃голѣ́пный хра́мъ во и҆́мѧ твоѐ, въ не́мже и҆ положи́ша и҆̀хъ. Тѣ́мже и҆ мы̀, молѧ́щесѧ во хра́мѣ се́мъ и҆ предстоѧ́ще пред̾ ра́кою твое́ю, чꙋдесы̀ бл҃гоꙋха́ющею, прилѣ́жнѡ мо́лимъ тѧ̀: ᲂу҆слы́ши на́съ, твоегѡ̀ предста́тельства просѧ́щихъ и҆ бл҃гоговѣ́йнѣ вопїю́щихъ:
Ра́дꙋйсѧ, вѣ́рныхъ и҆ невѣ́рныхъ въ бѣда́хъ ᲂу҆тѣ́шителю: ра́дꙋйсѧ, хра́мꙋ, во и҆́мѧ твоѐ созда́нномꙋ, бжⷭ҇твенный покро́ве.
Ра́дꙋйсѧ, странꙋ̀ гре́ческꙋю и҆ лю́ди є҆ѧ̀ возлюби́вый: ра́дꙋйсѧ, ꙗ҆́кѡ моща́ми твои́ми во є҆лла́дꙋ прїитѝ и҆зво́ливый.
Ра́дꙋйсѧ, гра́да но́вагѡ проко́пїона ст҃ы́й покрови́телю: ра́дꙋйсѧ, все́й странѣ̀ гре́честѣй незаходи́мое свѣти́ло.
Ра́дꙋйсѧ, моща́ми твои́ми го́рꙋ а҆ѳѡ́нскꙋю посѣти́вый: ра́дꙋйсѧ, нетлѣ́нною десни́цею ѻ҆би́тель пантелеи́мѡновꙋ бл҃гослови́вый.
Ра́дꙋйсѧ, ꙗ҆́кѡ бра́тїи а҆ѳѡ́нскагѡ вертогра́да въ по́двизѣхъ ско́рѡ помога́еши: ра́дꙋйсѧ, ꙗ҆́кѡ и҆ ѻ҆те́чество твоѐ, рꙋ́сь ст҃ꙋ́ю, не ѡ҆ставлѧ́еши.
Ра́дꙋйсѧ, ꙗ҆́кѡ и҆́мѧ твоѐ по все́й вселе́ннѣй призыва́етсѧ: ра́дꙋйсѧ, ꙗ҆́кѡ вѣ́ра хрⷭ҇тїа́нскаѧ тобо́ю прославлѧ́етсѧ.
Ра́дꙋйсѧ, страда́льче првⷣный і҆ѡа́нне, терпѣ́нїю и҆ кро́тости на́съ наꙋча́ѧй.
Конда́къ і҃
Сп҃се́нїе въ бѣда́хъ и҆ напа́стехъ восхотѣ́въ да́ти гдⷭ҇ь вѣ̑рнымъ ча́дѡмъ свои̑мъ, ꙗ҆вѝ на́мъ тѧ̀, ᲂу҆го́дниче бж҃їй, прїѧ́лъ бо є҆сѝ бл҃года́ть цѣли́ти недꙋ́ги всѣ̑мъ притека́ющымъ къ тебѣ̀ съ мл҃твою: кровоточи́вїи бо и҆ прокаже́ннїи прикоснове́нїемъ къ ра́цѣ моще́й твои́хъ ѡ҆чища́ютсѧ, глꙋсі́и слы́шатъ, разсла́бленнїи здра́ви быва́ютъ, слѣпі́и прозрѣва́ютъ. Мы́ же, помина́юще ско́рое застꙋпле́нїе твоѐ, бл҃года́рнымъ гла́сомъ восхвалѧ́емъ бг҃а, пою́ще є҆мꙋ̀ пѣ́снь: А҆ллилꙋ́їа.
І҆́косъ і҃
Стѣна̀ є҆сѝ странѣ̀ гре́честѣй и҆ наро́дꙋ є҆ѧ̀ бл҃гочести́вомꙋ, првⷣне і҆ѡа́нне, и҆ неѡбори́мый застꙋ́пникъ всѣ̑мъ призыва́ющымъ и҆́мѧ твоѐ, занѐ та́кѡ бл҃говолѝ са́мъ гдⷭ҇ь бы́ти тебѣ̀ защи́тникꙋ хрⷭ҇тїа́нъ не то́кмѡ землѝ є҆лла́ды, но всѣ́хъ лю́бѧщихъ и҆ чтꙋ́щихъ тѧ̀ люде́й правосла́вныхъ. Тѣ́мже є҆лла́дскїѧ цр҃кве лю́дїе, а҆ѳѡ́нскихъ ѻ҆тє́цъ собо́ри, рꙋсѝ ст҃ы́ѧ вѣ́рнїи и҆ во всѧ́кой странѣ̀ чтꙋ́щїи бг҃а восхвалѧ́ютъ тѧ̀ си́це:
Ра́дꙋйсѧ, стра́жꙋ землѝ є҆лла́ды, нечести̑выѧ ѿгонѧ́ѧй: ра́дꙋйсѧ, всѣ́хъ бл҃гочести́выхъ люде́й є҆ѧ̀ ѿ бѣ́дъ и҆збавлѧ́ѧй.
Ра́дꙋйсѧ, ꙗ҆́кѡ всѣ̑мъ хрⷭ҇тїа́нѡмъ бл҃года́тнꙋю по́мощь подае́ши: ра́дꙋйсѧ, ꙗ҆́кѡ цѣлє́бныѧ да́ры повсю́дꙋ то́чиши.
Ра́дꙋйсѧ, ѿ гдⷭ҇а вла́сть на дꙋ́хи нечи̑стыѧ прїе́мый: ра́дꙋйсѧ, си́лою бж҃їею и҆̀хъ и҆згонѧ́ѧй.
Ра́дꙋйсѧ, ѡ҆ста́влєннымъ врача́ми преди́вное поможе́нїе: ра́дꙋйсѧ, ѿ смертоно́сныхъ ꙗ҆́звъ мнѡ́гимъ свобожде́нїе.
Ра́дꙋйсѧ, болѧ́щихъ младе́нцєвъ бл҃гонаде́жный врачева́телю: ра́дꙋйсѧ, скорбѧ́щихъ и҆́хъ роди́телей бл҃гі́й ᲂу҆тѣ́шителю.
Ра́дꙋйсѧ, проповѣ́дниче покаѧ́нїѧ и҆ хода́таю ѡ҆ на́шемъ сп҃се́нїи: ра́дꙋйсѧ, ᲂу҆чи́телю смиренномꙋ́дрїѧ и҆ долготерпѣ́нїѧ.
Ра́дꙋйсѧ, страда́льче првⷣный і҆ѡа́нне, терпѣ́нїю и҆ кро́тости на́съ наꙋча́ѧй.
Конда́къ а҃і
Пѣ́нїе всеꙋмиле́нное прино́симъ хрⷭ҇тꙋ̀ бг҃ꙋ, просла́вльшемꙋ тѧ̀, првⷣне і҆ѡа́нне, ꙗ҆́кѡ дарова̀ на́мъ вели́каго застꙋ́пника, ᲂу҆тѣ́шителѧ и҆ мл҃твенника ѡ҆ сп҃се́нїи правосла́вныхъ хрⷭ҇тїа́нъ, по всемꙋ̀ лицꙋ̀ землѝ ѡ҆бита́ющихъ. Тѣ́мже сла́вимъ тѧ̀, просѧ́ще твоегѡ̀ предста́тельства пред̾ гдⷭ҇емъ ѡ҆ странѣ̀ на́шей рꙋ́сской, да и҆зба́вимсѧ ѿ наше́ствїй и҆ноплеме́нныхъ и҆ междоꙋсо́бныѧ бра́ни, и҆ возмо́жемъ въ ми́рѣ и҆ тишинѣ̀ воспѣва́ти хрⷭ҇тꙋ̀ бг҃ꙋ пѣ́снь: А҆ллилꙋ́їа.
І҆́косъ а҃і
Свѣтоза́рный свѣти́льникъ бж҃їѧ бл҃года́ти ꙗ҆ви́лсѧ є҆сѝ, првⷣне і҆ѡа́нне, дꙋхо́внымъ сїѧ́нїемъ по́двигѡвъ твои́хъ и҆ чꙋде́съ просвѣти́вый зе́мли а҆сі́и и҆ є҆лла́ды. Ты́ бо, рꙋ́сскою земле́ю рожде́нный, повсю́дꙋ и҆сточа́еши чꙋде́съ мно́жество и҆ мо́лишисѧ ѡ҆ всѣ́хъ лю́бѧщихъ и҆ чтꙋ́щихъ тѧ̀. Тѣ́мже ᲂу҆́бѡ молѝ хрⷭ҇та̀ бг҃а ѻ҆те́чествꙋ твоемꙋ̀ и҆ все́й странѣ̀ гре́честѣй непоколеби̑мымъ и҆ безмѧтє́жнымъ бы́ти, ѿ навѣ̑тъ вра́жїихъ и҆ ѿ а҆га́рѧнскагѡ наше́ствїѧ и҆̀хъ ѡ҆градѝ, во́инствꙋ правосла́вномꙋ побѣ̑ды на врагѝ да́рꙋй, да къ тебѣ̀ ꙗ҆́кѡ крѣ́пкомꙋ ѡ҆ на́съ мл҃твенникꙋ взыва́емъ си́це:
Ра́дꙋйсѧ, цр҃кве вселе́нскїѧ пресла́вное ᲂу҆краше́нїе: ра́дꙋйсѧ, ѡ҆ лю́дехъ правосла́вныхъ пред̾ бг҃омъ предста́телю.
Ра́дꙋйсѧ, а҆́гг҃ле землѝ на́шеѧ, во странѣ̀ гре́честѣй просїѧ́вый: ра́дꙋйсѧ, и҆ во ѻ҆те́чествѣ свое́мъ бл҃гоговѣ́йнѣ почита́емый.
Ра́дꙋйсѧ, во дни̑ бѣ́дъ и҆ и҆спыта́нїй чтꙋ́щымъ тѧ̀ защи́тниче: ра́дꙋйсѧ, ѡ҆ лю́бѧщихъ тѧ̀ те́плый мл҃твенниче.
Ра́дꙋйсѧ, свѣти́льниче, ѡ҆мрачє́нныѧ дꙋ́ши просвѣща́ѧй: ра́дꙋйсѧ, лампа́до злата́ѧ, є҆ле́емъ млⷭ҇ти и҆спо́лненнаѧ.
Ра́дꙋйсѧ, ра́дости дꙋхо́вныѧ чтꙋ́щымъ тѧ̀ пода́телю: ра́дꙋйсѧ, сп҃си́тельное всѣ̑мъ хрⷭ҇тїа́нѡмъ прибѣ́жище.
Ра́дꙋйсѧ, ко ѡ҆чище́нїю ѿ страсте́й пꙋтеводи́телю: ра́дꙋйсѧ, ᲂу҆ прⷭ҇то́ла бж҃їѧ ѡ҆ на́съ недосто́йныхъ хода́таю.
Ра́дꙋйсѧ, страда́льче првⷣный і҆ѡа́нне, терпѣ́нїю и҆ кро́тости на́съ наꙋча́ѧй.
Конда́къ в҃і
Бл҃года́ть дх҃а ст҃а́гѡ, живꙋ́щаѧ въ тебѣ̀, бл҃же́нне, ди́внѡ показа́сѧ въ чꙋдесѣ́хъ и҆ и҆сцѣле́нїихъ ѿ нетлѣ́нныхъ твои́хъ чтⷭ҇ны́хъ моще́й, и҆̀хже любо́вїю лобыза́юще, сла́вимъ ѡ҆ тебѣ̀ хрⷭ҇та̀ бг҃а, ди́внаго во ст҃ы́хъ свои́хъ. Сегѡ̀ ра́ди не забꙋ́ди и҆ на́съ, ᲂу҆се́рднѡ призыва́ющихъ тѧ̀ во времена̀ тѧ́жкихъ бѣ́дъ и҆ напа́стей, ѿ ни́хже мл҃твами твои́ми и҆зба́ви и҆ не преста́ни хода́тайствовати пред̾ бг҃омъ ѡ҆ дарова́нїи всѣ̑мъ на́мъ дꙋше́внагѡ сп҃се́нїѧ и҆ тѣле́снагѡ здра́вїѧ, со бл҃гоговѣ́нїемъ пою́щымъ є҆мꙋ̀: А҆ллилꙋ́їа.
І҆́косъ в҃і
Пою́ще по́двиги многоболѣ́зненнагѡ житїѧ̀ твоегѡ̀, почита́емъ страда̑нїѧ, хва́лимъ долготерпѣ́нїе, сла́вимъ кро́тость и҆ смире́нїе, ᲂу҆бл҃жа́емъ ст҃ꙋ́ю твою̀ кончи́нꙋ и҆ чти́мъ тѧ̀, ꙗ҆́кѡ нбⷭ҇наго предста́телѧ на́шего, ты́ бо ѿ бѣ́дъ и҆ скорбе́й и҆збавлѧ́еши, недꙋ́ги врачꙋ́еши, печа̑ли ᲂу҆толѧ́еши всѣ́хъ почита́ющихъ тѧ̀. Бл҃годари́мъ и҆ велича́емъ просла́вившаго тѧ̀ гдⷭ҇а, дарова́вшаго на́мъ ди́внаго мл҃твенника и҆ чꙋдотво́рца, є҆го́же ᲂу҆молѝ сп҃сти́сѧ всѣ̑мъ пою́щымъ тѝ такова̑ѧ:
Ра́дꙋйсѧ, цр҃ѧ̀ нбⷭ҇нагѡ добропобѣ́дный во́ине: ра́дꙋйсѧ, вели́кїй хрⷭ҇то́въ ᲂу҆го́дниче.
Ра́дꙋйсѧ, ꙗ҆́кѡ пла́чемъ и҆ скорбьмѝ ᲂу҆тѣше́нїѧ вѣ́чнагѡ сподо́билсѧ є҆сѝ: ра́дꙋйсѧ, ꙗ҆́кѡ кро́тостїю свое́ю и҆ смире́нїемъ зе́млю првⷣныхъ наслѣ́довалъ є҆сѝ.
Ра́дꙋйсѧ, чистото́ю и҆ цѣломꙋ́дрїемъ ѿ бг҃а ᲂу҆краше́нный: ра́дꙋйсѧ, цвѣ́томъ неꙋвѧда́емымъ на нб҃сѝ почте́нный.
Ра́дꙋйсѧ, а҆́гг҃льскихъ во́инствъ собесѣ́дниче: ра́дꙋйсѧ, ликѡ́мъ прпⷣбныхъ и҆ првⷣныхъ совсе́льниче.
Ра́дꙋйсѧ, млⷭ҇тивое застꙋпле́нїе бж҃їѧ мт҃ре къ на́мъ приклонѧ́ѧй: ра́дꙋйсѧ, со всѣ́ми ст҃ы́ми прⷭ҇то́лꙋ бж҃їю ны́нѣ предстоѧ́й.
Ра́дꙋйсѧ, всѣ́хъ ст҃ы́хъ землѝ рꙋ́сскїѧ сонаслѣ́дниче: ра́дꙋйсѧ, на́съ ѡ҆свѣща́ѧй, любвѐ свѣти́льниче.
Ра́дꙋйсѧ, страда́льче првⷣный і҆ѡа́нне, терпѣ́нїю и҆ кро́тости на́съ наꙋча́ѧй.
Конда́къ г҃і
Ѽ пречꙋ́дный и҆ пресла́вный чꙋдотво́рче, ст҃ы́й првⷣный і҆ѡа́нне, землѝ рꙋ́сскїѧ бл҃года́тное рожде́нїе, подви́жникѡвъ є҆лла́ды похвало̀ и҆ ᲂу҆краше́нїе. Прїимѝ ѿ лю́бѧщихъ тѧ̀ ма́лое сїѐ моле́нїе и҆ принесѝ є҆̀ ко хрⷭ҇тꙋ̀ бг҃ꙋ на́шемꙋ, да сохрани́тъ на́съ ѿ вра̑гъ ви́димыхъ и҆ неви́димыхъ, ѿ недꙋ́га и҆ гла́да, ѿ всѧ́кїѧ ско́рби и҆ внеза́пныѧ сме́рти, и҆ сподо́битъ вкꙋ́пѣ съ тобо́ю во црⷭ҇твїи нбⷭ҇нѣмъ непреста́ннѡ пѣ́ти є҆мꙋ̀: А҆ллилꙋ́їа.
Повто́ръ
Сей конда́къ глаго́лется три́жды, та́же і҆́косъ а҃-й и҆ конда́къ а҃-й.
І҆́косъ а҃
А҆́гг҃лѡвъ творе́цъ и҆ всеѧ̀ тва́ри созда́тель и҆збра́ тѧ, првⷣне і҆ѡа́нне, во є҆́же наро́ды ст҃ы́ѧ рꙋсѝ и҆ є҆лла́ды дꙋхо́внѡ соедини́ти, и҆ ꙗ҆ви́ тѧ цр҃кви свое́й ст҃ѣ́й вели́каго чꙋдотво́рца, и҆мꙋ́щаго къ немꙋ̀ дерзнове́нїе моли́тисѧ ѡ҆ и҆сцѣле́нїи недꙋ́гѡвъ дꙋше́вныхъ и҆ тѣле́сныхъ, ѡ҆ и҆збавле́нїи ѿ всѧ́кихъ бѣ́дъ и҆ скорбе́й. Тѣ́мже мы̀, сы́нове рꙋ́сскїи, бл҃гоговѣ́йнѣ преклонѧ́емъ пред̾ тобо́ю колѣ̑на серде́цъ на́шихъ и҆ ᲂу҆миле́ннѡ глаго́лемъ:
Ра́дꙋйсѧ, земны́й а҆́гг҃ле и҆ человѣ́че нбⷭ҇ный: ра́дꙋйсѧ, бл҃года́ти тезоимени́тый.
Ра́дꙋйсѧ, кро́тости и҆ послꙋша́нїѧ ѻ҆́бразе: ра́дꙋйсѧ, мл҃твы бл҃гоꙋха́нное кади́ло.
Ра́дꙋйсѧ, терпѣ́нїемъ ѕло́бꙋ мі́ра сегѡ̀ побѣди́вый: ра́дꙋйсѧ, вѣнце́мъ и҆сповѣ́дническимъ ѿ гдⷭ҇а ᲂу҆краше́нный.
Ра́дꙋйсѧ, зе́мли а҆сі́и пѡ́двиги свои́ми ѡ҆зари́вый: ра́дꙋйсѧ, чꙋдесы̀ твои́ми зе́млю є҆лла́ды напо́лнивый.
Ра́дꙋйсѧ, рꙋ́сскаѧ ѕвѣздо̀, зе́мли всѧ̑ просвѣща́ѧй: ра́дꙋйсѧ, ѻ҆те́чество земно́е мл҃твами твои́ми не ѡ҆ставлѧ́ѧй.
Ра́дꙋйсѧ, хрⷭ҇та̀ ра́ди на землѝ пострада́вый: ра́дꙋйсѧ, съ ни́мъ на нб҃сѣ́хъ воцари́выйсѧ.
Ра́дꙋйсѧ, страда́льче првⷣный і҆ѡа́нне, терпѣ́нїю и҆ кро́тости на́съ наꙋча́ѧй.
Конда́къ а҃
И҆збра́ннаго и҆сповѣ́дника хрⷭ҇то́ва и҆ чꙋдотво́рца преди́внаго, побо́рника ст҃ы́ѧ вѣ́ры правосла́вныѧ, рꙋ́сскою земле́ю рожде́ннаго и҆ въ землѝ є҆лла́ды возсїѧ́вшаго, ст҃а́го првⷣнаго і҆ѡа́нна похва́льными пѣ́сньми почти́мъ: ты́ же, ᲂу҆го́дниче бж҃їй, ꙗ҆́кѡ предстоѧ́й пред̾ прⷭ҇то́ломъ цр҃ѧ̀ сла́вы, ѿ всѧ́кихъ на́съ бѣ́дъ свободѝ, съ любо́вїю и҆ бл҃годаре́нїемъ зовꙋ́щихъ тѝ:
Ра́дꙋйсѧ, страда́льче првⷣный і҆ѡа́нне, терпѣ́нїю и҆ кро́тости на́съ наꙋча́ѧй.
Моли́твы
Ѽ вели́кїй ᲂу҆го́дниче бж҃їй, ст҃ы́й првⷣный і҆ѡа́нне рꙋ́сскїй, просїѧ́вый въ землѝ а҆сі́и равноа́гг҃льнымъ житїе́мъ твои́мъ, ре́вностїю ѡ҆ гдⷭ҇ѣ и҆ пѡ́двиги во и҆сповѣ́данїи вѣ́ры хрⷭ҇то́вы, гра́да проко́пїона но́вагѡ и҆ всеѧ̀ є҆лла́ды пресвѣ́тлое ᲂу҆краше́нїе, бг҃охрани́мѣй странѣ̀ рꙋ́сстѣй, лю́демъ є҆ѧ̀ и҆ во все́мъ мі́рѣ живꙋ́щымъ правосла̑внымъ хрⷭ҇тїа́нѡмъ по́моще и҆ крѣ́пкое застꙋпле́нїе. Бл҃годари́мъ гдⷭ҇а, ди́внаго во ст҃ы́хъ свои́хъ, въ вѣ́рѣ и҆́стиннѣй непоколеби́мѡ тѧ̀ ᲂу҆тверди́вшаго, въ стоѧ́нїи за и҆сповѣ́данїе є҆ѧ̀ ᲂу҆крѣпи́вшаго и҆ до́брое сконча́нїе по́двига многотрꙋ́днагѡ дарова́вшаго, послѣди́ же мнѡ́гаѧ и҆ вели̑каѧ чꙋдеса̀ на́мъ ꙗ҆ви́вшаго чрез̾ многоцѣле́бнꙋю ра́кꙋ моще́й твои́хъ. Ны́нѣ, предстоѧ̀ нбⷭ҇номꙋ цр҃ю̀, и҆спросѝ ᲂу҆ негѡ̀ и҆зба́вити всѧ̑ гра́ды и҆ вє́си страны̀ рꙋ́сскїѧ и҆ землѝ є҆лла́дскїѧ ѿ гла́да, трꙋ́са, ѻ҆гнѧ̀, смертоно́сныхъ болѣ́зней, ѿ наше́ствїй и҆ноплеме́нныхъ и҆ междоꙋсо́бныѧ бра́ни, и҆схода́тайствꙋй хрⷭ҇толюби́вомꙋ во́инствꙋ на́шемꙋ во бра́нехъ съ врага́ми ѻ҆те́чества на́шегѡ побѣ́дꙋ и҆ ѡ҆долѣ́нїе. Помозѝ всѣ̑мъ пꙋтеше́ствꙋющымъ, болѧ́щымъ, въ заточе́нїи сꙋ́щымъ, скѡ́рби и҆ гонє́нїѧ за ст҃ꙋ́ю вѣ́рꙋ правосла́внꙋю терпѧ́щымъ. Соединѝ всѣ́хъ правосла́вныхъ люде́й любо́вїю ко хрⷭ҇тꙋ̀ бг҃ꙋ на́шемꙋ и҆ цр҃кви є҆гѡ̀ ст҃ѣ́й, да́рꙋй на́мъ дꙋ́хъ любвѐ и҆ ми́ра къ бра́тскомꙋ є҆дине́нїю всѣ́хъ вѣ́рныхъ. Оу҆молѝ гдⷭ҇а, да пода́стъ на́мъ дꙋ́хъ покаѧ́нїѧ и҆ сокрꙋше́нїѧ ѡ҆ грѣсѣ́хъ на́шихъ и҆ всеси́льною свое́ю бл҃года́тїю да помо́жетъ и҆ ᲂу҆крѣпи́тъ въ борьбѣ̀ со страстьмѝ и҆ похотьмѝ, да да́рꙋетъ на́мъ дꙋ́хъ смире́нїѧ и҆ кро́тости, дꙋ́хъ братолю́бїѧ и҆ неѕло́бїѧ, дꙋ́хъ ре́вности по бз҃ѣ ѡ҆ сп҃се́нїи бли́жнихъ. Помѧнѝ и҆ на́съ грѣ́шныхъ, молѧ́щихсѧ тебѣ̀: стра́ждꙋщихъ и҆ болѧ́щихъ и҆сцѣлѝ, скорбѧ́щихъ ᲂу҆тѣ́ши, бѣ́дствꙋющымъ ско́рꙋю по́мощь пода́ждь, всѣ̑мъ же чтꙋ́щымъ и҆ лю́бѧщымъ тѧ̀ и҆спросѝ хрⷭ҇тїа́нскꙋю кончи́нꙋ живота̀, безболѣ́зненнꙋ, непосты́днꙋ, ми́рнꙋ и҆ до́брый ѿвѣ́тъ на стра́шнѣмъ сꙋди́щи хрⷭ҇то́вѣ. Бꙋ́ди на́мъ помо́щникъ и҆ покрови́тель во сп҃се́нїе, да твои́ми мл҃твами сподо́бимсѧ въ ны́нѣшнѣмъ и҆ бꙋ́дꙋщемъ вѣ́цѣ прославлѧ́ти въ трⷪ҇цѣ покланѧ́емаго бг҃а, ѻ҆ц҃а̀, и҆ сн҃а, и҆ ст҃а́го дх҃а, ны́нѣ и҆ при́снѡ, и҆ во вѣ́ки вѣкѡ́въ. А҆ми́нь.
Ѽ всебл҃же́нный и҆сповѣ́дниче хрⷭ҇то́въ и҆ вели́кїй чꙋдотво́рче і҆ѡа́нне, є҆́ѵвїи сокро́вище, гре́ческїѧ страны̀ похвало̀ и҆ люде́й рꙋ́сскихъ сро́дниче. Ты̀ въ плѣне́нїи а҆га́рѧнстѣмъ лю̑таѧ мꙋчє́нїѧ за хрⷭ҇та̀ претерпѣ́лъ є҆сѝ, бл҃гоче́стїемъ же свои́мъ пѡ́двиги и҆ чꙋдесы̀ вѣ̑рныѧ премно́гѡ ᲂу҆крѣпи́лъ є҆сѝ, невѣ̑рныѧ же ᲂу҆мѧгчи́лъ є҆сѝ и҆ просвѣти́лъ є҆сѝ, по кончи́нѣ же безчи́сленными чꙋдесы̀ и҆ и҆сцѣле́ньми просїѧва́еши. Вѣ́мы, ᲂу҆го́дниче бж҃їй, ꙗ҆́кѡ ве́лїе дерзнове́нїе и҆́маши ко гдⷭ҇ꙋ, на́мъ же, бѣ́дствꙋющымъ, состра́ждеши та́кѡ те́плѣ, ꙗ҆́кѡ не терпи́ши и҆ зрѣ́ти ны̀ въ лю́тыхъ недꙋ́зѣхъ и҆лѝ тѧ́жкихъ ско́рбехъ сꙋ́щихъ, и҆ сегѡ̀ ра́ди и҆ непризыва́емый ско́рѡ притека́еши, тѣлеса̀ и҆ дꙋ́шы врачꙋ́ѧ, бѣ́сы и҆згонѧ́ѧ, заблꙋ́ждшыѧ ѡ҆браща́ѧ, наипа́че же ѿ младе́нєцъ всѧ́кꙋю болѣ́знь и҆ го́ресть ѿгонѧ́ѧ. Се́ бо и҆ ны́нѣ грѣсѝ мно́зи ѡ҆тѧготи́ша ны̀ и҆ и҆знꙋрѧ́ющими скорбьмѝ дꙋ́шы на́шѧ сотро́шасѧ, си̑лы же тѣлє́сныѧ ѡ҆скꙋдѣ́ша, и҆ ка́кѡ ᲂу҆ны́нїю и҆ тѧ́гостнѣй печа́ли противоста́ти возмо́жемъ, а҆́ще не ты̀ са́мъ, ст҃че бж҃їй, воста́неши по на́съ и҆ проти́вꙋ врагѡ́въ на́шихъ бл҃года́тнѣ ѡ҆полчи́шисѧ. И҆спроси́ же бл҃гопрїѧ́тными твои́ми ко гдⷭ҇ꙋ мл҃твами соверше́нное и҆сцѣле́нїе тѣле́сными недꙋ̑ги стра́ждꙋщымъ, всѣ̑мъ же сп҃си́тельное терпѣ́нїе и҆ бл҃годаре́нїе: скѡ́рби, бѣсѡ́вскїѧ навѣ́ты и҆ и҆скꙋшє́нїѧ ѿвратѝ: всѧ̑ же, є҆ли̑ка попꙋ́ститъ гдⷭ҇ь, наꙋчѝ во ѡ҆чище́нїе понестѝ бл҃горазꙋ́мнѣ: на́съ же, во тьмѣ̀ невѣ́дѣнїѧ и҆ забве́нїѧ за́повѣдей бж҃їихъ сꙋ́щихъ, просвѣтѝ, вы́нꙋ неꙋкло́ннѣ твори́ти во́лю бж҃їю наста́ви, безпло́дїѧ дꙋхо́внагѡ разрѣшѝ, ѡ҆чище́нїе, ѡ҆сщ҃е́нїе и҆ просвѣще́нїе дꙋша́мъ на́шымъ да́рꙋй: да съ тобо́ю вкꙋ́пѣ просла́вимъ всебл҃га́го бг҃а и҆ пречⷭ҇тꙋю бцⷣꙋ во вѣ́ки вѣкѡ́въ. А҆ми́нь.