Канон святому праведному Иоанну Русскому, исповеднику (молебный)

Тя́жкими удруча́емь напа́стьми, к тебе́ простира́ю и те́ло, и ду́шу, моля́ся ти́, преподо́бне о́тче, от печа́лей и бе́д мя́ изба́вити.

Пло́ти волне́ния нахо́д, блаже́нне Иоа́нне, возмуща́ет мя́ непреста́нно, умири́, о́тче, тишино́ю, богоприя́тными предста́тельствы твои́ми.

Де́монов по́лчища лука́вая вою́ют на раба́ твоего́ немилосе́рдно, отреши́ и́х си́лою Креста́, человеколю́бными предста́тельствы твои́ми.

От челове́к, неду́гующих лука́вством всегда́, ды́шащих ху́льно угро́зы, ты́ мя́ спаси́, лю́тую си́х я́рость разжени́, благоче́стных утвержде́ние, о́тче всесла́вне.

Устро́ивый разу́мно до́м души́ и изря́дно украси́вый, Богоблаже́нне, благода́ть Ду́ха приимы́й и Све́та исполня́емь, яви́ся, я́ко сто́лп о́гненный.

Исцеле́ний дарова́ния, к тебе́ прибега́ющии, почерпа́ем ра́достно и сла́вим тя́, исто́чниче чуде́с.

Каппадоки́ян сосло́вия и Проко́пиян благочести́выя мно́жества, Афо́нских оте́ц собо́ри и Росси́йстии ве́рнии лю́дие помо́щника зна́ют и предста́теля вси́ восхваля́ют тя́.

Проше́д му́жественнейше о́блак пло́ти твоея́ дея́нием, вну́трь бы́л еси́, приснопа́мятне, Све́та Боже́ственнаго, я́ко возжеле́л еси́.

Сохрани́ на́с предста́тельствы твои́ми, блаже́нне, и руко́ю твое́ю кре́пкою го́рькия де́моны низложи́, всечу́дне.

Да́руй на́м здра́вие, моля́щимся тебе́, и души́, и те́ла всегда́ и благоуха́нную кре́пость, о́тче всебога́те.

Исцели́ лю́ди, притека́ющия к тебе́, чу́дне, и па́губныя боле́зни, и огня́, и муче́ний вся́ческих всеце́ло изба́ви.

Чуде́с тя́ сокро́вище ве́м и исто́чника благи́х, Иоа́нне, не́мощей исцеля́юща стра́сти и нало́ги бесо́в отгоня́юща, и молю́ся, е́же спасти́ ны́не от па́губы мя́ злы́х, благода́ти тезоимени́те.

Предста́теля тя́ ни́щих пропове́дуем и стра́жа Каппадоки́и всея́, искуше́ний избавля́юща ста́до, нечести́вых вре́д отгоня́юща, и все́х ны́не благочести́вых от бе́д изба́вити мо́лимся.

Приста́нище тя́ в ско́рбех и́мамы и в печа́лех предста́теля, всеблаже́нне, и всесоверше́нное от бе́д спасе́ние, и ре́ку дарова́ний неисчерпа́емую, родни́к благодея́ний и исто́чник исцеле́ний приснотеку́щий.

Ду́шу сла́дости и ра́дости вся́кия покажи́ испо́лнену, Богому́дре Иоа́нне, и́же тя́ те́пле воспева́ющих и вопи́ти всегда́ научи́: оте́ц на́ших Бо́же, благослове́н еси́.

Освеще́нный стра́стию твое́ю омраче́нна мя́ грехми́ просвети́, любо́вию приходя́ща честны́м твои́м моще́м, и взыва́ти сподо́би: оте́ц на́ших Бо́же, благослове́н еси́.

Искуше́ний, и бе́д, и ну́жды, и печа́ли, и вре́да де́монов свободи́ я́же на тя́ благоче́стно наде́ющияся и с ве́рою зову́щия: оте́ц на́ших Бо́же, благослове́н еси́.

Потопля́емым жите́йскими треволне́нии ру́ку пода́ждь, всеблаже́нне, пою́щим и превознося́щим Христа́ во ве́ки.

Твои́х честны́х моще́й каса́ющихся испо́лни благоуха́ния Боже́ственнаго, Го́спода пою́щих ве́рно во ве́ки.

Моля́щихся непреста́нно, Богоно́се, и благода́ти прося́щих приими́, и славосло́вящих Бо́га во ве́ки.

Звезду́, Иоа́нне, тя́ знаменоно́сную испове́дуем, на́м све́т облистава́ющую, благочести́вии, правосла́вно Христу́ служа́щии.

Волне́нием, Богоно́се, обурева́емым мно́гих зо́л, твои́м моли́твенником помози́, отгоня́я стре́лы врага́.

Моли́тву мою́ приими́, смири́вшагося, и тя́жких, Богоно́се, злострада́ний и греха́ мя́ изба́ви.